Shri Madhvacharya Krita Dvadasha Stotra - Tritiyastotram

ॐ

શ્રી મધ્વાચાર્ય કૃત દ્વાદશ સ્તોત્ર - તૃતીયસ્તોત્રમ્

Stotram Madhvacharya Gujarati

અથ તૃતીયસ્તોત્રમ્

કુરુ ભુઙ્ક્ષ્વ ચ કર્મ નિજં નિયતં હરિપાદવિનમ્રધિયા સતતમ્ ।

હરિરેવ પરો હરિરેવ ગુરુઃ હરિરેવ જગત્પિતૃમાતૃગતિઃ ॥ 1॥

ન તતોઽસ્ત્યપરં જગદીડ્યતમં (જગતીડ્યતમં) પરમાત્પરતઃ પુરુષોત્તમતઃ ।

તદલં બહુલોકવિચિન્તનયા પ્રવણં કુરુ માનસમીશપદે ॥ 2॥

યતતોઽપિ હરેઃ પદસંસ્મરણે સકલં હ્યઘમાશુ લયં વ્રજતિ ।

સ્મરતસ્તુ વિમુક્તિપદં પરમં સ્ફુટમેષ્યતિ તત્કિમપાક્રિયતે ॥ 3॥

શ‍ઋણુતામલસત્યવચઃ પરમં શપથેરિતં ઉચ્છ્રિતબાહુયુગમ્ ।

ન હરેઃ પરમો ન હરેઃ સદૃશઃ પરમઃ સ તુ સર્વ ચિદાત્મગણાત્ ॥ 4॥

યદિ નામ પરો ન ભવેત (ભવેત્સ) હરિઃ કથમસ્ય વશે જગદેતદભૂત્ ।

યદિ નામ ન તસ્ય વશે સકલં કથમેવ તુ નિત્યસુખં ન ભવેત્ ॥ 5॥

ન ચ કર્મવિમામલ કાલગુણપ્રભૃતીશમચિત્તનુ તદ્ધિ યતઃ ।

ચિદચિત્તનુ સર્વમસૌ તુ હરિર્યમયેદિતિ વૈદિકમસ્તિ વચઃ ॥ 6॥

વ્યવહારભિદાઽપિ ગુરોર્જગતાં ન તુ ચિત્તગતા સ હિ ચોદ્યપરમ્ ।

બહવઃ પુરુષાઃ પુરુષપ્રવરો હરિરિત્યવદત્સ્વયમેવ હરિઃ ॥ 7॥

ચતુરાનન પૂર્વવિમુક્તગણા હરિમેત્ય તુ પૂર્વવદેવ સદા ।

નિયતોચ્ચવિનીચતયૈવ નિજાં સ્થિતિમાપુરિતિ સ્મ પરં વચનમ્ ॥ 8॥

આનન્દતીર્થસન્નામ્ના પૂર્ણપ્રજ્ઞાભિધાયુજા ।

કૃતં હર્યષ્ટકં ભક્ત્યા પઠતઃ પ્રીયતે હરિઃ ॥ 9॥

ઇતિ શ્રીમદાનન્દતીર્થભગવત્પાદાચાર્ય વિરચિતં

દ્વાદશસ્તોત્રેષુ તૃતીયસ્તોત્રં સમ્પૂર્ણમ્

Roman (IAST) Transliteration

atha tṛtīyastotram

kuru bhuṅkṣva ca karma nijaṃ niyataṃ haripādavinamradhiyā satatam |

harireva paro harireva guruḥ harireva jagatpitṛmātṛgatiḥ || 1||

na tato'styaparaṃ jagadīḍyatamaṃ (jagatīḍyatamaṃ) paramātparataḥ puruṣottamataḥ |

tadalaṃ bahulokavicintanayā pravaṇaṃ kuru mānasamīśapade || 2||

yatato'pi hareḥ padasaṃsmaraṇe sakalaṃ hyaghamāśu layaṃ vrajati |

smaratastu vimuktipadaṃ paramaṃ sphuṭameṣyati tatkimapākriyate || 3||

śa‍ṛṇutāmalasatyavacaḥ paramaṃ śapatheritaṃ ucchritabāhuyugam |

na hareḥ paramo na hareḥ sadṛśaḥ paramaḥ sa tu sarva cidātmagaṇāt || 4||

yadi nāma paro na bhaveta (bhavetsa) hariḥ kathamasya vaśe jagadetadabhūt |

yadi nāma na tasya vaśe sakalaṃ kathameva tu nityasukhaṃ na bhavet || 5||

na ca karmavimāmala kālaguṇaprabhṛtīśamacittanu taddhi yataḥ |

cidacittanu sarvamasau tu hariryamayediti vaidikamasti vacaḥ || 6||

vyavahārabhidā'pi gurorjagatāṃ na tu cittagatā sa hi codyaparam |

bahavaḥ puruṣāḥ puruṣapravaro harirityavadatsvayameva hariḥ || 7||

caturānana pūrvavimuktagaṇā harimetya tu pūrvavadeva sadā |

niyatoccavinīcatayaiva nijāṃ sthitimāpuriti sma paraṃ vacanam || 8||

ānandatīrthasannāmnā pūrṇaprajñābhidhāyujā |

kṛtaṃ haryaṣṭakaṃ bhaktyā paṭhataḥ prīyate hariḥ || 9||

iti śrīmadānandatīrthabhagavatpādācārya viracitaṃ

dvādaśastotreṣu tṛtīyastotraṃ sampūrṇam