Shri Lalita Stavaratnam (arya Dvishati)

ॐ

શ્રી લલિતા સ્તવરત્નમ્ (આર્યા દ્વિશતી)

Devi Gujarati

વન્દે ગજેન્દ્રવદનં

વામાઙ્કારૂઢવલ્લભાશ્લિષ્ટમ્ ।

કુઙ્કુમપરાગશોણં

કુવલયિનીજારકોરકાપીડમ્ ॥ 1 ॥

સ જયતિ સુવર્ણશૈલઃ

સકલજગચ્ચક્રસઙ્ઘટિતમૂર્તિઃ ।

કાઞ્ચનનિકુઞ્જવાટી-

-કન્દલદમરીપ્રપઞ્ચસઙ્ગીતઃ ॥ 2 ॥

હરિહયનૈરૃતમારુત-

-હરિતામન્તેષ્વવસ્થિતં તસ્ય ।

વિનુમઃ સાનુત્રિતયં

વિધિહરિગૌરીશવિષ્ટપાધારમ્ ॥ 3 ॥

મધ્યે પુનર્મનોહર-

-રત્નરુચિસ્તબકરઞ્જિતદિગન્તમ્ ।

ઉપરિ ચતુઃશતયોજન-

-મુત્તુઙ્ગં શૃઙ્ગપુઙ્ગવમુપાસે ॥ 4 ॥

તત્ર ચતુઃશતયોજન-

-પરિણાહં દેવશિલ્પિના રચિતમ્ ।

નાનાસાલમનોજ્ઞં

નમામ્યહં નગરમાદિવિદ્યાયાઃ ॥ 5 ॥

પ્રથમં સહસ્રપૂર્વક-

-ષટ્શતસઙ્ખ્યાકયોજનં પરિતઃ ।

વલયીકૃતસ્વગાત્રં

વરણં શરણં વ્રજામ્યયોરૂપમ્ ॥ 6 ॥

તસ્યોત્તરે સમીરણ-

-યોજનદૂરે તરઙ્ગિતચ્છાયઃ ।

ઘટયતુ મુદં દ્વિતીયો

ઘણ્ટાસ્તનસારનિર્મિતઃ સાલઃ ॥ 7 ॥

ઉભયોરન્તરસીમ-

-ન્યુદ્દામભ્રમરરઞ્જિતોદારમ્ ।

ઉપવનમુપાસ્મહે વય-

-મૂરીકૃતમન્દમારુતસ્યન્દમ્ ॥ 8 ॥

આલિઙ્ગ્ય ભદ્રકાલી-

-માસીનસ્તત્ર હરિશિલાશ્યામામ્ ।

મનસિ મહાકાલો મે

વિહરતુ મધુપાનવિભ્રમન્નેત્રઃ ॥ 9 ॥

તાર્તીયીકો વરણ-

-સ્તસ્યોત્તરસીમ્નિ વાતયોજનતઃ ।

તામ્રેણ રચિતમૂર્તિ-

-સ્તનુતામાચન્દ્રતારકં ભદ્રમ્ ॥ 10 ॥

મધ્યે તયોશ્ચ મણિમય-

-પલ્લવશાખાપ્રસૂનપક્ષ્મલિતામ્ ।

કલ્પાનોકહવાટીં

કલયે મકરન્દપઙ્કિલાવાલામ્ ॥ 11 ॥

તત્ર મધુમાધવશ્રી-

-તરુણીભ્યાં તરલદૃક્ચકોરાભ્યામ્ ।

આલિઙ્ગિતોઽવતાન્મા-

-મનિશં પ્રથમર્તુરાત્તપુષ્પાસ્ત્રઃ ॥ 12 ॥

નમત તદુત્તરભાગે

નાકિપથોલ્લઙ્ઘિશૃઙ્ગસઙ્ઘાતમ્ ।

સીસાકૃતિં તુરીયં

સિતકિરણાલોકનિર્મલં સાલમ્ ॥ 13 ॥

સાલદ્વયાન્તરાલે

સરલાલિકપોતચાટુસુભગાયામ્ ।

સન્તાનવાટિકાયાં

સક્તં ચેતોઽસ્તુ સતતમસ્માકમ્ ॥ 14 ॥

તત્ર તપનાતિરૂક્ષઃ

સામ્રાજ્ઞીચરણસાન્દ્રિતસ્વાન્તઃ ।

શુક્રશુચિશ્રીસહિતો

ગ્રીષ્મર્તુર્દિશતુ કીર્તિમાકલ્પમ્ ॥ 15 ॥

ઉત્તરસીમનિ તસ્યો-

-ન્નતશિખરોત્કમ્પિહાટકપતાકઃ ।

પ્રકટયતુ પઞ્ચમો નઃ

પ્રાકારઃ કુશલમારકૂટમયઃ ॥ 16 ॥

પ્રાકારયોશ્ચ મધ્યે

પલ્લવિતાન્યભૃતપઞ્ચમોન્મેષા ।

હરિચન્દનદ્રુવાટી-

-હરતાદામૂલમસ્મદનુતાપમ્ ॥ 17 ॥

તત્ર નભઃ શ્રીમુખ્યૈ-

-સ્તરુણીવર્ગૈઃ સમન્વિતઃ પરિતઃ ।

વજ્રાટ્ટહાસમુખરો

વાઞ્છાપૂર્તિં તનોતુ વર્ષર્તુઃ ॥ 18 ॥

મારુતયોજનદૂરે

મહનીયસ્તસ્ય ચોત્તરે ભાગે ।

ભદ્રં કૃષીષ્ટ ષષ્ઠઃ

પ્રાકારઃ પઞ્ચલોહધાતુમયઃ ॥ 19 ॥

અનયોર્મધ્યે સન્તત-

-મઙ્કૂરદ્દિવ્યકુસુમગન્ધાયામ્ ।

મન્દારવાટિકાયાં

માનસમઙ્ગીકરોતુ મે વિહૃતિમ્ ॥ 20 ॥

તસ્યામિષોર્જલક્ષ્મી-

-તરુણીભ્યાં શરદૃતુઃ સદા સહિતઃ ।

અભ્યર્ચયન્ સ જીયા-

-દમ્બામામોદમેદુરૈઃ કુસુમૈઃ ॥ 21 ॥

તસ્યર્ષિસઙ્ખ્યયોજન-

-દૂરે દેદીપ્યમાનશૃઙ્ગૌઘઃ ।

કલધૌતકલિતમૂર્તિઃ

કલ્યાણં દિશતુ સપ્તમઃ સાલઃ ॥ 22 ॥

મધ્યે તયોર્મરુત્પથ

લઙ્ઘિતવિટપાગ્રવિરુતકલકણ્ઠા ।

શ્રીપારિજાતવાટી

શ્રિયમનિશં દિશતુ શીતલોદ્દેશા ॥ 23 ॥

તસ્યામતિપ્રિયાભ્યાં

સહ ખેલન્ સહસહસ્યલક્ષ્મીભ્યામ્ ।

સામન્તો ઝષકેતો-

-ર્હેમન્તો ભવતુ હેમવૃદ્ધ્યૈ નઃ ॥ 24 ॥

ઉત્તરતસ્તસ્ય મહા-

-નુદ્ભટહુતભુક્શિખારુણમયૂખઃ ।

તપનીયખણ્ડરચિત-

-સ્તનુતાદાયુષ્યમષ્ટમો વરણઃ ॥ 25 ॥

કાદમ્બવિપિનવાટી-

-મનયોર્મધ્યભુવિ કલ્પિતાવાસામ્ ।

કલયામિ સૂનકોરક-

-કન્દલિતામોદતુન્દિલસમીરામ્ ॥ 26 ॥

તસ્યામતિશિશિરાકૃતિ-

-રાસીનસ્તપતપસ્યલક્ષ્મીભ્યામ્ ।

શિવમનિશં કુરુતાન્મે

શિશિરર્તુઃ સતતશીતલદિગન્તઃ ॥ 27 ॥

તસ્યાં કદમ્બવાટ્યાં

તત્પ્રસવામોદમિલિતમધુગન્ધમ્ ।

સપ્તાવરણમનોજ્ઞં

શરણં સમુપૈમિ મન્ત્રિણીશરણમ્ ॥ 28 ॥

તત્રાલયે વિશાલે

તપનીયારચિતતરલસોપાને ।

માણિક્યમણ્ડપાન્ત-

-ર્મહિતે સિંહાસને સુમણિખચિતે ॥ 29 ॥

બિન્દુત્રિપઞ્ચકોણ-

-દ્વિપનૃપવસુવેદદલકુરેખાઢ્યે ।

ચક્રે સદા નિવિષ્ટાં

ષષ્ઠ્યષ્ટત્રિંશદક્ષરેશાનીમ્ ॥ 30 ॥

તાપિઞ્છમેચકાભાં

તાલીદલઘટિતકર્ણતાટઙ્કામ્ ।

તામ્બૂલપૂરિતમુખીં

તામ્રાધરબિમ્બદૃષ્ટદરહાસામ્ ॥ 31 ॥

કુઙ્કુમપઙ્કિલદેહાં

કુવલયજીવાતુશાવકવતંસામ્ ।

કોકનદશોણચરણાં

કોકિલનિક્વાણકોમલાલાપામ્ ॥ 32 ॥

વામાઙ્ગગલિતચૂલીં

વનમાલ્યકદમ્બમાલિકાભરણામ્ ।

મુક્તાલલન્તિકાઞ્ચિત

મુગ્ધાલિકમિલિતચિત્રકોદારામ્ ॥ 33 ॥

કરવિધૃતકીરશાવક-

-કલનિનદવ્યક્તનિખિલનિગમાર્થામ્ ।

વામકુચસઙ્ગિવીણાવાદન-

-સૌખ્યાર્ધમીલિતાક્ષિયુગામ્ ॥ 34 ॥

આપાટલાંશુકધરા-

-માદિરસોન્મેષવાસિતકટાક્ષામ્ ।

આમ્નાયસારગુલિકા-

-માદ્યાં સઙ્ગીતમાતૃકાં વન્દે ॥ 35 ॥

તસ્ય ચ સુવર્ણસાલ-

-સ્યોત્તરતસ્તરુણકુઙ્કુમચ્છાયઃ ।

શમયતુ મમ સન્તાપં

સાલો નવમઃ સ પુષ્પરાગમયઃ ॥ 36 ॥

અનયોરન્તરવસુધાઃ

પ્રણુમઃ પ્રત્યગ્રપુષ્પરાગમયીઃ ।

સિંહાસનેશ્વરીમનુ-

-ચિન્તનનિસ્તન્દ્રસિદ્ધનીરન્ધ્રાઃ ॥ 37 ॥

તત્સાલોત્તરદેશે

તરુણજપાકિરણધોરણીશોણઃ ।

પ્રશમયતુ પદ્મરાગ-

-પ્રાકારો મમ પરાભવં દશમઃ ॥ 38 ॥

અન્તરભૂકૃતવાસા-

-નનયોરપનીતચિત્તવૈમત્યાન્ ।

ચક્રેશીપદભક્તાં-

-શ્ચારણવર્ગાનહર્નિશં કલયે ॥ 39 ॥

સારઙ્ગવાહયોજનદૂરે-

-ઽસઙ્ઘટિતકેતનસ્તસ્ય ।

ગોમેદકેન રચિતો

ગોપાયતુ માં સમુન્નતઃ સાલઃ ॥ 40 ॥

વપ્રદ્વયાન્તરોર્વ્યાં

વટુકૈર્વિવિધૈશ્ચ યોગિનીબૃન્દૈઃ ।

સતતં સમર્ચિતાયાઃ

સઙ્કર્ષણ્યાઃ પ્રણૌમિ ચરણાબ્જમ્ ॥ 41 ॥

તાપસયોજનદૂરે

તસ્ય સમુત્તુઙ્ગ ગોપુરોપેતઃ ।

વાઞ્છાપૂર્ત્યૈ ભવતા-

-દ્વજ્રમણીનિકરનિર્મિતો વપ્રઃ ॥ 42 ॥

વરણદ્વિતયાન્તરતો

વાસજુષો વિહિતમધુરસાસ્વાદાઃ ।

રમ્ભાદિવિબુધવેશ્યા

રચયન્તુ મહાન્તમસ્મદાનન્દમ્ ॥ 43 ॥

તત્ર સદા પ્રવહન્તી

તટિની વજ્રાભિધા ચિરં જીયાત્ ।

ચટુલોર્મિજાલનૃત્ય-

-ત્કલહંસીકુલકલક્વણિતપુષ્ટા ॥ 44 ॥

રોધસિ તસ્યા રુચિરે

વજ્રેશી જયતિ વજ્રભૂષાઢ્યા ।

વજ્રપ્રદાનતોષિત-

-વજ્રિમુખત્રિદશવિનુતચારિત્રા ॥ 45 ॥

તસ્યોદીચ્યાં હરિતિ

સ્તવકિતસુષમાવલીઢવિયદન્તઃ ।

વૈડૂર્યરત્નરચિતો

વૈમલ્યં દિશતુ ચેતસો વરણઃ ॥ 46 ॥

અધિમધ્યમેતયોઃ પુન-

-રમ્બાચરણાવલમ્બિતસ્વાન્તાન્ ।

કાર્કોટકાદિનાગાન્

કલયામઃ કિં ચ બલિમુખાન્ દનુજાન્ ॥ 47 ॥

ગન્ધવહસઙ્ખ્યયોજન-

-દૂરે ગગનોર્ધ્વજાઙ્ઘિકસ્તસ્ય ।

વાસવમણિપ્રણીતો

વરણો બહલયતુ વૈદુષીં વિશદામ્ ॥ 48 ॥

મધ્યક્ષોણ્યામનયો-

-ર્મહેન્દ્રનીલાત્મકાનિ ચ સરાંસિ ।

શાતોદરીસહાયા-

-ન્ભૂપાલાનપિ પુનઃ પુનઃ પ્રણુમઃ ॥ 49 ॥

આશુગયોજનદૂરે

તસ્યોર્ધ્વં કાન્તિધવલિતદિગન્તઃ ।

મુક્તાવિરચિતગાત્રો

મુહુરસ્માકં મુદે ભવતુ સાલઃ ॥ 50 ॥

આવૃત્ત્યોરધિમધ્યં

પૂર્વસ્યાં દિશિ પુરન્દરઃ શ્રીમાન્ ।

અભ્રમુવિટાધિરૂઢો

વિભ્રમમસ્માકમનિશમાતનુતાત્ ॥ 51 ॥

તત્કોણે વ્યજનસ્રુ-

-ક્તોમરપાત્રસ્રુવાન્નશક્તિધરઃ ।

સ્વાહાસ્વધાસમેતઃ

સુખયતુ માં હવ્યવાહનઃ સુચિરમ્ ॥ 52 ॥

દક્ષિણદિગન્તરાલે

દણ્ડધરો નીલનીરદચ્છાયઃ ।

ત્રિપુરાપદાબ્જભક્તસ્તિરયતુ

મમ નિખિલમંહસાં નિકરમ્ ॥ 53 ॥

તસ્યૈવ પશ્ચિમાયાં

દિશિ દલિતેન્દીવરપ્રભાશ્યામઃ ।

ખેટાસિયષ્ટિધારી

ખેદાનપનયતુ યાતુધાનો મે ॥ 54 ॥

તસ્યા ઉત્તરદેશે

ધવલાઙ્ગો વિપુલઝષવરારૂઢઃ ।

પાશાયુધાત્તપાણિઃ

પાશી વિદલયતુ પાશજાલાનિ ॥ 55 ॥

વન્દે તદુત્તરહરિ-

-ત્કોણે વાયું ચમૂરુવરવાહમ્ ।

કોરકિતતત્ત્વબોધા-

-ન્ગોરક્ષપ્રમુખયોગિનોઽપિ મુહુઃ ॥ 56 ॥

તરુણીરિડાપ્રધાના-

-સ્તિસ્રો વાતસ્ય તસ્ય કૃતવાસાઃ ।

પ્રત્યગ્રકાપિશાયન-

-પાનપરિભ્રાન્તલોચનાઃ કલયે ॥ 57 ॥

તલ્લોકપૂર્વભાગે

ધનદં ધ્યાયામિ શેવધિકુલેશમ્ ।

અપિ માણિભદ્રમુખ્યા-

-નમ્બાચરણાવલમ્બિનો યક્ષાન્ ॥ 58 ॥

તસ્યૈવ પૂર્વસીમનિ

તપનીયારચિતગોપુરે નગરે ।

કાત્યાયનીસહાયં

કલયે શીતાંશુખણ્ડચૂડાલમ્ ॥ 59 ॥

તત્પુરષોડશવરણ-

-સ્થલભાજસ્તરુણચન્દ્રચૂડાલાન્ ।

રુદ્રાધ્યાયે પઠિતા-

-ન્રુદ્રાણીસહચરાન્ભજે રુદ્રાન્ ॥ 60 ॥

પવમાનસઙ્ખ્યયોજન-

-દૂરે બાલતૃણ્મેચકસ્તસ્ય ।

સાલો મરકતરચિતઃ

સમ્પદમચલાં શ્રિયં ચ પુષ્ણાતુ ॥ 61 ॥

આવૃતિયુગ્માન્તરતો

હરિતમણીનિવહમેચકે દેશે ।

હાટકતાલીવિપિનં

હાલાઘટઘટિતવિટપમાકલયે ॥ 62 ॥

તત્રૈવ મન્ત્રિણીગૃહ-

-પરિણાહં તરલકેતનં સદનમ્ ।

મરકતસૌધમનોજ્ઞં

દદ્યાદાયૂંષિ દણ્ડનાથાયાઃ ॥ 63 ॥

સદને તત્ર હરિન્મણિ-

-સઙ્ઘટિતે મણ્ડપે શતસ્તમ્ભે ।

કાર્તસ્વરમયપીઠે

કનકમયામ્બુરુહકર્ણિકામધ્યે ॥ 64 ॥

બિન્દુત્રિકોણવર્તુલ-

-ષડસ્રવૃત્તદ્વયાન્વિતે ચક્રે ।

સઞ્ચારિણી દશોત્તર-

શતાર્ણમનુરાજકમલકલહંસી ॥ 65 ॥

કોલવદના કુશેશય-

-નયના કોકારિમણ્ડિતશિખણ્ડા ।

સન્તપ્તકાઞ્ચનાભા

સન્ધ્યારુણચેલસંવૃતનિતમ્બા ॥ 66 ॥

હલમુસલશઙ્ખચક્રા-

-ઽઙ્કુશપાશાભયવરસ્ફુરિતહસ્તા ।

કૂલઙ્કષાનુકમ્પા

કુઙ્કુમજમ્બાલિતસ્તનાભોગા ॥ 67 ॥

ધૂર્તાનામતિદૂરા-

-વાર્તાશેષાવલગ્નકમનીયા ।

આર્તાલીશુભદાત્રી

વાર્તાલી ભવતુ વાઞ્છિતાર્થાય ॥ 68 ॥

તસ્યાઃ પરિતો દેવીઃ

સ્વપ્નેશ્યુન્મત્તભૈરવીમુખ્યાઃ ।

પ્રણમત જમ્ભિન્યાદ્યાઃ

ભૈરવવર્ગાંશ્ચ હેતુકપ્રમુખાન્ ॥ 69 ॥

પૂર્વોક્તસઙ્ખ્યયોજન-

-દૂરે પૂયાંશુપાટલસ્તસ્ય ।

વિદ્રાવયતુ મદાર્તિં

વિદ્રુમસાલો વિશઙ્કટદ્વારઃ ॥ 70 ॥

આવરણયોરહર્નિશ-

-મન્તરભૂમૌપ્રકાશશાલિન્યામ્ ।

આસીનમમ્બુજાસન-

-મભિનવસિન્દૂરગૌરમહમીડે ॥ 71 ॥

વરણસ્ય તસ્ય મારુત-

-યોજનતો વિપુલગોપુરદ્વારઃ ।

સાલો નાનારત્નૈઃ

સઙ્ઘટિતાઙ્ગઃ કૃષીષ્ટ મદભીષ્ટમ્ ॥ 72 ॥

અન્તરકક્ષ્યામનયો-

-રવિરલશોભાપિચણ્ડિલોદ્દેશામ્ ।

માણિક્યમણ્ડપાખ્યાં

મહતીમધિહૃદયમનિશમાકલયે ॥ 73 ॥

તત્ર સ્થિતં પ્રસન્નં

તરુણતમાલપ્રવાલકિરણાભમ્ ।

કર્ણાવલમ્બિકુણ્ડલ-

-કન્દલિતાભીશુકવચિતકપોલમ્ ॥ 74 ॥

શોણાધરં શુચિસ્મિત-

-મેણાઙ્કવદનમેધમાનકૃપમ્ ।

મુગ્ધૈણમદવિશેષક-

-મુદ્રિતનિટિલેન્દુરેખિકારુચિરમ્ ॥ 75 ॥

નાલીકદલસહોદર-

-નયનાઞ્ચલઘટિતમનસિજાકૂતમ્ ।

કમલાકઠિનપયોધર-

-કસ્તૂરીઘુસૃણપઙ્કિલોરસ્કમ્ ॥ 76 ॥

ચામ્પેયગન્ધિકૈશ્યં

શમ્પાસબ્રહ્મચારિકૌશેયમ્ ।

શ્રીવત્સકૌસ્તુભધરં

શ્રિતજનરક્ષાધુરીણચરણાબ્જમ્ ॥ 77 ॥

કમ્બુસુદર્શનવિલસ-

-ત્કરપદ્મં કણ્ઠલોલવનમાલમ્ ।

મુચુકુન્દમોક્ષફલદં

મુકુન્દમાનન્દકન્દમવલમ્બે ॥ 78 ॥

તદ્વરણોત્તરભાગે

તારાપતિબિમ્બચુમ્બિનિજશૃઙ્ગઃ ।

વિવિધમણીગણઘટિતો

વિતરતુ સાલો વિનિર્મલાં ધિષણામ્ ॥ 79 ॥

પ્રાકારદ્વિતયાન્તર-

-કક્ષ્યાં પૃથુરત્નનિકરસઙ્કીર્ણામ્ ।

નમત સહસ્રસ્તમ્ભક-

-મણ્ડપનામ્નાતિવિશ્રુતાં ભુવને ॥ 80 ॥

પ્રણુમસ્તત્ર ભવાની-

-સહચરમીશાનમિન્દુખણ્ડધરમ્ ।

શૃઙ્ગારનાયિકામનુ-

-શીલનભાજોઽપિ ભૃઙ્ગિનન્દિમુખાન્ ॥ 81 ॥

તસ્યૈણવાહયોજન-

-દૂરે વન્દે મનોમયં વપ્રમ્ ।

અઙ્કૂરન્મણિકિરણા-

-મન્તરકક્ષ્યાં ચ નિર્મલામનયોઃ ॥ 82 ॥

તત્રૈવામૃતવાપીં

તરલતરઙ્ગાવલીઢતટયુગ્મામ્ ।

મુક્તામયકલહંસી-

-મુદ્રિતકનકારવિન્દસન્દોહામ્ ॥ 83 ॥

શક્રોપલમયભૃઙ્ગી-

-સઙ્ગીતોન્મેષઘોષિતદિગન્તામ્ ।

કાઞ્ચનમયાઙ્ગવિલસ-

-ત્કારણ્ડવષણ્ડતાણ્ડવમનોજ્ઞામ્ ॥ 84 ॥

કુરુવિન્દાત્મકહલ્લક-

-કોરકસુષમાસમૂહપાટલિતામ્ ।

કલયે સુધાસ્વરૂપાં

કન્દલિતામન્દકૈરવામોદામ્ ॥ 85 ॥

તદ્વાપિકાન્તરાલે તરલે

મણિપોતસીમ્નિ વિહરન્તીમ્ ।

સિન્દૂરપાટલાઙ્ગીં

સિતકિરણાઙ્કૂરકલ્પિતવતંસામ્ ॥ 86 ॥

પર્વેન્દુબિમ્બવદનાં

પલ્લવશોણાધરસ્ફુરિતહાસામ્ ।

કુટિલકબરીં કુરઙ્ગી-

-શિશુનયનાં કુણ્ડલસ્ફુરિતગણ્ડામ્ ॥ 87 ॥

નિકટસ્થપોતનિલયાઃ

શક્તીઃ શયવિધૃતહેમશૃઙ્ગજલૈઃ ।

પરિષિઞ્ચન્તીં પરિત-

-સ્તારાં તારુણ્યગર્વિતાં વન્દે ॥ 88 ॥

પ્રાગુક્તસઙ્ખ્યયોજનદૂરે

પ્રણમામિ બુદ્ધિમયસાલમ્ ।

અનયોરન્તરકક્ષ્યા-

-મષ્ટાપદપુષ્ટમેદિનીં રુચિરામ્ ॥ 89 ॥

કાદમ્બરીનિધાનાં

કલયામ્યાનન્દવાપિકાં તસ્યામ્ ।

શોણાશ્મનિવહનિર્મિત-

-સોપાનશ્રેણિશોભમાનતટીમ્ ॥ 90 ॥

માણિક્યતરણિનિલયાં

મધ્યે તસ્યા મદારુણકપોલામ્ ।

અમૃતેશીત્યભિધાના-

-મન્તઃ કલયામિ વારુણીં દેવીમ્ ॥ 91 ॥

સૌવર્ણકેનિપાતન-

-હસ્તાઃ સૌન્દર્યગર્વિતા દેવ્યઃ ।

તત્પુરતઃ સ્થિતિભાજો

વિતરન્ત્વસ્માકમાયુષો વૃદ્ધિમ્ ॥ 92 ॥

તસ્ય પૃષદશ્વયોજન-

-દૂરેઽહઙ્કારસાલમતિતુઙ્ગમ્ ।

વન્દે તયોશ્ચ મધ્યે

કક્ષ્યાં વલમાનમલયપવમાનામ્ ॥ 93 ॥

વિનુમો વિમર્શવાપીં

સૌષુમ્નસુધાસ્વરૂપિણીં તત્ર ।

વેલાતિલઙ્ઘ્યવીચી-

-કોલાહલભરિતકૂલવનવાટીમ્ ॥ 94 ॥

તત્રૈવ સલિલમધ્યે

તાપિઞ્છદલપ્રપઞ્ચસુષમાભામ્ ।

શ્યામલકઞ્ચુકલસિતાં

શ્યામાવિટબિમ્બડમ્બરહરાસ્યામ્ ॥ 95 ॥

આભુગ્નમસૃણચિલ્લી-

-હસિતાયુગ્મશરકાર્મુકવિલાસામ્ ।

મન્દસ્મિતાઞ્ચિતમુખીં

મણિમયતાટઙ્કમણ્ડિતકપોલામ્ ॥ 96 ॥

કુરુવિન્દતરણિનિલયાં

કુલાચલસ્પર્ધિકુચનમન્મધ્યામ્ ।

કુઙ્કુમવિલિપ્તગાત્રીં

કુરુકુલ્લાં મનસિ કુર્મહે સતતમ્ ॥ 97 ॥

તત્સાલોત્તરભાગે

ભાનુમયં વપ્રમાશ્રયે દીપ્તમ્ ।

મધ્યં ચ વિપુલમનયો-

-ર્મન્યે વિશ્રાન્તમાતપોદ્ગારમ્ ॥ 98 ॥

તત્ર કુરુવિન્દપીઠે

તામરસે કનકકર્ણિકાઘટિતે ।

આસીનમરુણવાસસ-

-મમ્લાનપ્રસવમાલિકાભરણમ્ ॥ 99 ॥

ચક્ષુષ્મતીપ્રકાશન-

-શક્તિચ્છાયાસમારચિતકેલિમ્ ।

માણિક્યમુકુટરમ્યં

મન્યે માર્તાણ્ડભૈરવં હૃદયે ॥ 100 ॥

ઇન્દુમયસાલમીડે

તસ્યોત્તરતસ્તુષારગિરિગૌરમ્ ।

અત્યન્તશિશિરમારુત-

-મનયોર્મધ્યં ચ ચન્દ્રિકોદ્ગારમ્ ॥ 101 ॥

તત્ર પ્રકાશમાનં

તારાનિકરૈઃ પરિષ્કૃતોદ્દેશમ્ ।

અમૃતમયકાન્તિકન્દલ-

-મન્તઃ કલયામિ કુન્દસિતમિન્દુમ્ ॥ 102 ॥

શૃઙ્ગારસાલમીડે

શૃઙ્ગોલ્લસિતં તદુત્તરે ભાગે ।

મધ્યસ્થલે તયોરપિ

મહિતાં શૃઙ્ગારપૂર્વિકાં પરિખામ્ ॥ 103 ॥

તત્ર મણિનૌસ્થિતાભિ-

-સ્તપનીયાવિરચિતાગ્રહસ્તાભિઃ ।

શૃઙ્ગારદેવતાભિઃ

સહિતં પરિખાધિપં ભજે મદનમ્ ॥ 104 ॥

શૃઙ્ગારવરણવર્યસ્યોત્તરતઃ

સકલવિબુધસંસેવ્યમ્ ।

ચિન્તામણિગણરચિતં

ચિન્તાં દૂરીકરોતુ મે સદનમ્ ॥ 105 ॥

મણિસદનસાલયોરધિ-

-મધ્યં દશતાલભૂમિરુહદીર્ઘૈઃ ।

પર્ણૈઃ સુવર્ણવર્ણૈ-

-ર્યુક્તાં કાણ્ડૈશ્ચ યોજનોત્તુઙ્ગૈઃ ॥ 106 ॥

મૃદુલૈસ્તાલીપઞ્ચક-

-માનૈર્મિલિતાં ચ કેસરકદમ્બૈઃ ।

સન્તતગલિતમરન્દ-

-સ્રોતોનિર્યન્મિલિન્દસન્દોહામ્ ॥ 107 ॥

પાટીરપવનબાલક-

-ધાટીનિર્યત્પરાગપિઞ્જરિતામ્ ।

કલહંસીકુલકલકલ-

-કૂલઙ્કષનિનદનિચયકમનીયામ્ ॥ 108 ॥

પદ્માટવીં ભજામઃ

પરિમલકલ્લોલપક્ષ્મલોપાન્તામ્ ।

[ દેવ્યર્ઘ્યપાત્રધારી

તસ્યાઃ પૂર્વદિશિ દશકલાયુક્તઃ । ]

વલયિતમૂર્તિર્ભગવા-

-ન્વહ્નિઃ ક્રોશોન્નતશ્ચિરં પાયાત્ ॥ 109 ॥

તત્રાધારે દેવ્યાઃ

પાત્રીરૂપઃ પ્રભાકરઃ શ્રીમાન્ ।

દ્વાદશકલાસમેતો

ધ્વાન્તં મમ બહુલમાન્તરં ભિન્દ્યાત્ ॥ 110 ॥

તસ્મિન્ દિનેશપાત્રે

તરઙ્ગિતામોદમમૃતમયમર્ઘ્યમ્ ।

ચન્દ્રકલાત્મકમમૃતં

સાન્દ્રીકુર્યાદમન્દમાનન્દમ્ ॥ 111 ॥

અમૃતે તસ્મિન્નભિતો

વિહરન્ત્યો વિવિધમણિતરણિભાજઃ ।

ષોડશ કલાઃ સુધાંશોઃ

શોકાદુત્તારયન્તુ મામનિશમ્ ॥ 112 ॥

તત્રૈવ વિહૃતિભાજો

ધાતૃમુખાનાં ચ કારણેશાનામ્ ।

સૃષ્ટ્યાદિરૂપિકાસ્તાઃ

શમયન્ત્વખિલાઃ કલાશ્ચ સન્તાપમ્ ॥ 113 ॥

કીનાશવરુણકિન્નર-

-રાજદિગન્તેષુ રત્નગેહસ્ય ।

કલયામિ તાન્યજસ્રં

કલયન્ત્વાયુષ્યમર્ઘ્યપાત્રાણિ ॥ 114 ॥

પાત્રસ્થલસ્ય પુરતઃ

પદ્મારમણવિધિપાર્વતીશાનામ્ ।

ભવનાનિ શર્મણે નો

ભવન્તુ ભાસા પ્રદીપિતજગન્તિ ॥ 115 ॥

સદનસ્યાનલકોણે

સતતં પ્રણમામિ કુણ્ડમાગ્નેયમ્ ।

તત્ર સ્થિતં ચ વહ્નિં

તરલશિખાજટિલમમ્બિકાજનકમ્ ॥ 116 ॥

તસ્યાસુરદિશિ તાદૃશ-

-રત્નપરિસ્ફુરિતપર્વનવકાઢ્યમ્ ।

ચક્રાત્મકં શતાઙ્ગં

શતયોજનમુન્નતં ભજે દિવ્યમ્ ॥ 117 ॥

તત્રૈવ દિશિ નિષણ્ણં

તપનીયધ્વજપરમ્પરાશ્લિષ્ટમ્ ।

રથમપરં ચ ભવાન્યા

રચયામો મનસિ રત્નમયચૂડમ્ ॥ 118 ॥

ભવનસ્ય વાયુભાગે

પરિષ્કૃતો વિવિધવૈજયન્તીભિઃ ।

રચયતુ મુદં રથેન્દ્રઃ

સચિવેશાન્યાઃ સમસ્તવન્દ્યાયાઃ ॥ 119 ॥

કુર્મોઽધિહૃદયમનિશં

ક્રોડાસ્યાયાઃ શતાઙ્ગમૂર્ધન્યમ્ ।

રુદ્રદિશિ રત્નધામ્નો

રુચિરશલાકાપ્રપઞ્ચકઞ્ચુકિતમ્ ॥ 120 ॥

પરિતો દેવીધામ્નઃ

પ્રણીતવાસા મનુસ્વરૂપિણ્યઃ ।

કુર્વન્તુ રશ્મિમાલા-

-કૃતયઃ કુશલાનિ દેવતા નિખિલાઃ ॥ 121 ॥

પ્રાગ્દ્વારસ્ય ભવાની-

-ધામ્નઃ પાર્શ્વદ્વયારચિતવાસે ।

માતઙ્ગીકિટિમુખ્યૌ

મણિસદને મનસિ ભાવયામિ ચિરમ્ ॥ 122 ॥

યોજનયુગલાભોગા

તત્ક્રોશપરિણાહયૈવ ભિત્ત્યા ચ ।

ચિન્તામણિગૃહભૂમિ-

-ર્જીયાદામ્નાયમયચતુર્દ્વારા ॥ 123 ॥

દ્વારે દ્વારે ધામ્નઃ

પિણ્ડીભૂતા નવીનબિમ્બાભાઃ ।

વિદધતુ વિપુલાં કીર્તિં

દિવ્યા લૌહિત્યસિદ્ધ્યો દેવ્યઃ ॥ 124 ॥

મણિસદનસ્યાન્તરતો

મહનીયે રત્નવેદિકામધ્યે ।

બિન્દુમયચક્રમીડે

પીઠાનામુપરિ વિરચિતાવાસમ્ ॥ 125 ॥

ચક્રાણાં સકલાનાં

પ્રથમમધઃ સીમફલકવાસ્તવ્યાઃ ।

અણિમાદિસિદ્ધયો મા-

-મવન્તુ દેવી પ્રભાસ્વરૂપિણ્યઃ ॥ 126 ॥

અણિમાદિસિદ્ધિફલક-

-સ્યોપરિહરિણાઙ્કખણ્ડકૃતચૂડાઃ ।

ભદ્રં પક્ષ્મલયન્તુ

બ્રાહ્મીપ્રમુખાશ્ચ માતરોઽસ્માકમ્ ॥ 127 ॥

તસ્યોપરિ મણિફલકે

તારુણ્યોત્તુઙ્ગપીનકુચભારાઃ ।

સઙ્ક્ષોભિણીપ્રધાનાઃ

ભ્રાન્તિ વિદ્રાવયન્તુ દશ મુદ્રાઃ ॥ 128 ॥

ફલકત્રયસ્વરૂપે

પૃથુલે ત્રૈલોક્યમોહને ચક્રે ।

દીવ્યન્તુ પ્રકટાખ્યા-

-સ્તાસાં કર્ત્રીં ચ ભગવતી ત્રિપુરા ॥ 129 ॥

તદુપરિ વિપુલે ધિષ્ણ્યે

તરલદૃશસ્તરુણકોકનદભાસઃ ।

કામાકર્ષિણ્યાદ્યાઃ

કલયે દેવીઃ કલાધરશિખણ્ડાઃ ॥ 130 ॥

સર્વાશાપરિપૂરકચક્રે-

-ઽસ્મિન્ ગુપ્તયોગિનીસેવ્યાઃ ।

ત્રિપુરેશી મમ દુરિતં

તુદ્યાત્ કણ્ઠાવલમ્બિમણિહારા ॥ 131 ॥

તસ્યોપરિ મણિપીઠે

તામ્રામ્ભોરુહદલપ્રભાશોણાઃ ।

ધ્યાયામ્યનઙ્ગકુસુમા-

-પ્રમુખા દેવીશ્ચ વિધૃતકૂર્પાસાઃ ॥ 132 ॥

સઙ્ક્ષોભકારકેઽસ્મિં-

-શ્ચક્રે શ્રીત્રિપુરસુન્દરી સાક્ષાત્ ।

ગોપ્ત્રી ગુપ્તતરાખ્યાઃ

ગોપાયતુ માં કૃપાર્દ્રયા દૃષ્ટ્યા ॥ 133 ॥

સઙ્ક્ષોભિણીપ્રધાનાઃ

શક્તીસ્તસ્યોર્ધ્વવલયકૃતવાસાઃ ।

આલોલનીલવેણી-

-રન્તઃ કલયામિ યૌવનોન્મત્તાઃ ॥ 134 ॥

સૌભાગ્યદાયકેઽસ્મિં-

-શ્ચક્રેશી ત્રિપુરવાસિની જીયાત્ ।

શક્તીશ્ચ સમ્પ્રદાયાભિધાઃ

સમસ્તાઃ પ્રમોદયન્ત્વનિશમ્ ॥ 135 ॥

મણિપીઠોપરિ તાસાં

મહતિ ચતુર્હસ્તવિસ્તૃતે વલયે ।

સન્તતવિરચિતવાસાઃ

શક્તીઃ કલયામિ સર્વસિદ્ધિમુખાઃ ॥ 136 ॥

સર્વાર્થસાધકાખ્યે

ચક્રેઽમુષ્મિન્ સમસ્તફલદાત્રી ।

ત્રિપુરા શ્રીર્મમ કુશલં

દિશતાદુત્તીર્ણયોગિનીસેવ્યા ॥ 137 ॥

તાસાં નિલયસ્યોપરિ

ધિષ્ણ્યે કૌસુમ્ભકઞ્ચુકમનોજ્ઞાઃ ।

સર્વાજ્ઞાદ્યાઃ દેવ્યઃ

સકલાઃ સમ્પાદયન્તુ મમ કીર્તિમ્ ॥ 138 ॥

ચક્રે સમસ્તરક્ષા-

-કરનામ્ન્યસ્મિન્ સમસ્તજનસેવ્યામ્ ।

મનસિ નિગર્ભાસહિતાં

મન્યે શ્રીત્રિપુરમાલિનીં દેવીમ્ ॥ 139 ॥

સર્વજ્ઞાસદનસ્યોપરિ

ચક્રે વિપુલે સમાકલિતગેહાઃ ।

વન્દે વશિનીમુખ્યાઃ

શક્તીઃ સિન્દૂરરેણુરુચઃ ॥ 140 ॥

શ્રીસર્વરોગહરાખ્ય-

-ચક્રેઽસ્મિંસ્ત્રિપુરપૂર્વિકાં સિદ્ધામ્ ।

વન્દે રહસ્યનામ્ના

વેદ્યાભિઃ શક્તિભિઃ સદા સેવ્યામ્ ॥ 141 ॥

વશિનીગૃહોપરિષ્ટા-

-દ્વિંશતિહસ્તોન્નતે મહાપીઠે ।

શમયન્તુ શત્રુબૃન્દં

શસ્ત્રાણ્યસ્ત્રાણિ ચાદિદમ્પત્યોઃ ॥ 142 ॥

શસ્ત્રસદનોપરિષ્ટા-

-દ્વલયે વલવૈરિરત્નસઙ્ઘટિતે ।

કામેશ્વરીપ્રધાનાઃ

કલયે દેવીઃ સમસ્તજનવન્દ્યાઃ ॥ 143 ॥

ચક્રેઽત્ર સર્વસિદ્ધિપ્રદ-

-નામનિ સર્વફલદાત્રી ।

ત્રિપુરામ્બાવતુ સતતં

પરાપરરહસ્યયોગિનીસેવ્યા ॥ 144 ॥

કામેશ્વરીગૃહોપરિવલયે

વિવિધમનુસમ્પ્રદાયજ્ઞાઃ ।

ચત્વારો યુગનાથા

જયન્તુ મિત્રેશપૂર્વકાઃ ગુરવઃ ॥ 145 ॥

નાથભવનોપરિષ્ટા-

-ન્નાનારત્નચયમેદુરે પીઠે ।

કામેશ્યાદ્યા નિત્યાઃ

કલયન્તુ મુદં તિથિસ્વરૂપિણ્યઃ ॥ 146 ॥

નિત્યાસદનસ્યોપરિ

નિર્મલમણિનિવહવિરચિતે ધિષ્ણ્યે ।

કુશલં ષડઙ્ગદેવ્યઃ

કલયન્ત્વસ્માકમુત્તરલનેત્રાઃ ॥ 147 ॥

સદનસ્યોપરિ તાસાં

સર્વાનન્દમયનામકે બિન્દૌ ।

પઞ્ચબ્રહ્માકારાં

મઞ્ચં પ્રણમામિ મણિગણાકીર્ણમ્ ॥ 148 ॥

પરિતો મણિમઞ્ચસ્ય

પ્રલમ્બમાના નિયન્ત્રિતા પાશૈઃ ।

માયામયી જવનિકા

મમ દુરિતં હરતુ મેચકચ્છાયા ॥ 149 ॥

મઞ્ચસ્યોપરિ લમ્બ-

-ન્મદનીપુન્નાગમાલિકાભરિતમ્ ।

હરિગોપમયવિતાનં

હરતાદાલસ્યમનિશમસ્માકમ્ ॥ 150 ॥

પર્યઙ્કસ્ય ભજામઃ

પાદાન્બિમ્બામ્બુદેન્દુહેમરુચઃ ।

અજહરિરુદ્રેશમયા-

-નનલાસુરમારુતેશકોણસ્થાન્ ॥ 151 ॥

ફલકં સદાશિવમયં

પ્રણૌમિ સિન્દૂરરેણુકિરણાભમ્ ।

આરભ્યાઙ્ગેશીનાં

સદનાત્કલિતં ચ રત્નસોપાનમ્ ॥ 152 ॥

પટ્ટોપધાનગણ્ડક-

-ચતુષ્ટયસ્ફુરિતપાટલાસ્તરણમ્ ।

પર્યઙ્કોપરિ ઘટિતં

પાતુ ચિરં હંસતૂલશયનં નઃ ॥ 153 ॥

તસ્યોપરિ નિવસન્તં

તારુણ્યશ્રીનિષેવિતં સતતમ્ ।

આવૃન્તપુલ્લહલ્લક-

-મરીચિકાપુઞ્જમઞ્જુલચ્છાયમ્ ॥ 154 ॥

સિન્દૂરશોણવસનં

શીતાંશુસ્તબકચુમ્બિતકિરીટમ્ ।

કુઙ્કુમતિલકમનોહર-

-કુટિલાલિકહસિતકુમુદબન્ધુશિશુમ્ ॥ 155 ॥

પૂર્ણેન્દુબિમ્બવદનં

ફુલ્લસરોજાતલોચનત્રિતયમ્ ।

તરલાપાઙ્ગતરઙ્ગિત-

-શફરાઙ્કનશાસ્ત્રસમ્પ્રદાયાર્થમ્ ॥ 156 ॥

મણિમયકુણ્ડલપુષ્ય-

-ન્મરીચિકલ્લોલમાંસલકપોલમ્ ।

વિદ્રુમસહોદરાધર-

-વિસૃમરસુસ્મિતકિશોરસઞ્ચારમ્ ॥ 157 ॥

આમોદિકુસુમશેખર-

-માનીલભ્રૂલતાયુગમનોજ્ઞમ્ ।

વીટીસૌરભવીચી-

-દ્વિગુણિતવક્ત્રારવિન્દસૌરભ્યમ્ ॥ 158 ॥

પાશાઙ્કુશેક્ષુચાપ-

-પ્રસવશરસ્ફુરિતકોમલકરાબ્જમ્ ।

કાશ્મીરપઙ્કિલાઙ્ગં

કામેશં મનસિ કુર્મહે સતતમ્ ॥ 159 ॥

તસ્યાઙ્કભુવિ નિષણ્ણાં

તરુણકદમ્બપ્રસૂનકિરણાભામ્ ।

શીતાંશુખણ્ડચૂડાં

સીમન્તન્યસ્તસાન્દ્રસિન્દૂરામ્ ॥ 160 ॥

કુઙ્કુમલલામભાસ્વ-

-ન્નિટિલાં કુટિલતરચિલ્લિકાયુગલામ્ ।

નાલીકતુલ્યનયનાં

નાસાઞ્ચલનટિતમૌક્તિકાભરણામ્ ॥ 161 ॥

અઙ્કુરિતમન્દહાસ-

-મરુણાધરકાન્તિવિજિતબિમ્બાભામ્ ।

કસ્તૂરીમકરીયુત-

-કપોલસઙ્ક્રાન્તકનકતાટઙ્કામ્ ॥ 162 ॥

કર્પૂરસાન્દ્રવીટી-

-કબલિતવદનારવિન્દકમનીયામ્ ।

કમ્બુસહોદરકણ્ઠ-

-પ્રલમ્બમાનાચ્છમૌક્તિકકલાપામ્ ॥ 163 ॥

કહ્લારદામકોમલ-

-ભુજયુગલસ્ફુરિતરત્નકેયૂરામ્ ।

કરપદ્મમૂલવિલસ-

-ત્કાઞ્ચનમયકટકવલયસન્દોહામ્ ॥ 164 ॥

પાણિચતુષ્ટયવિલસ-

-ત્પાશાઙ્કુશપુણ્ડ્રચાપપુષ્પાસ્ત્રામ્ ।

કૂલઙ્કષકુચશિખરાં

કુઙ્કુમકર્દમિતરત્નકૂર્પાસામ્ ॥ 165 ॥

અણુદાયાદવલગ્ના-

-મમ્બુદશોભાસનાભિરોમલતામ્ ।

માણિક્યખચિતકાઞ્ચી-

-મરીચિકાક્રાન્તમાંસલનિતમ્બામ્ ॥ 166 ॥

કરભોરુકાણ્ડયુગલાં

જઙ્ઘાજિતકામજૈત્રતૂણીરામ્ ।

પ્રપદપરિભૂતકૂર્માં

પલ્લવસચ્છાયપદયુગમનોજ્ઞામ્ ॥ 167 ॥

કમલભવકઞ્જલોચન-

-કિરીટરત્નાંશુરઞ્જિતપદાબ્જામ્ ।

ઉન્મસ્તકાનુકમ્પા-

-મુત્તરલાપાઙ્ગપોષિતાનઙ્ગામ્ ॥ 168 ॥

આદિમરસાવલમ્બા-

-મનિદં પ્રથમોક્તિવલ્લરીકલિકામ્ ।

આબ્રહ્મકીટજનની-

-મન્તઃ કલયામિ સુન્દરીમનિશમ્ ॥ 169 ॥

કસ્તુ ક્ષિતૌ પટીયા-

-ન્વસ્તુ સ્તોતું શિવાઙ્કવાસ્તવ્યમ્ ।

અસ્તુ ચિરન્તનસુકૃતૈઃ

પ્રસ્તુતકામ્યાય તન્મમ પુરસ્તાત્ ॥ 170 ॥

પ્રભુસમ્મિતોક્તિગમ્યં

પરમશિવોત્સઙ્ગતુઙ્ગપર્યઙ્કમ્ ।

તેજઃ કિઞ્ચન દિવ્યં

પુરતો મે ભવતુ પુણ્ડ્રકોદણ્ડમ્ ॥ 171 ॥

મધુરિમભરિતશરાસં

મકરન્દસ્યન્દિમાર્ગણોદારમ્ ।

કૈરવિણીવિટચૂડં

કૈવલ્યાયાસ્તુ કિઞ્ચન મહો નઃ ॥ 172 ॥

અક્ષુદ્રમિક્ષુચાપં

પરોક્ષમવલગ્નસીમ્નિ ત્ર્યક્ષમ્ ।

ક્ષપયતુ મે ક્ષેમેતર-

-મુક્ષરથપ્રેમપક્ષ્મલં તેજઃ ॥ 173 ॥

ભૃઙ્ગરુચિસઙ્ગરકરાપાઙ્ગં

શૃઙ્ગારતુઙ્ગમરુણાઙ્ગમ્ ।

મઙ્ગલમભઙ્ગુરં મે

ઘટયતુ ગઙ્ગાધરાઙ્ગસઙ્ગિ મહઃ ॥ 174 ॥

પ્રપદાજિતકૂર્મમૂર્જિત-

-કરુણં ભર્મરુચિનિર્મથનદેહમ્ ।

શ્રિતવર્મ મર્મ શમ્ભોઃ

કિઞ્ચન મમ નર્મ શર્મ નિર્માતુ ॥ 175 ॥

કાલકુરલાલિકાલિમ-

-કન્દલવિજિતાલિ વિધૃતમણિવાલિ ।

મિલતુ હૃદિ પુલિનજઘનં

બહુલિતગલગરલકેલિ કિમપિ મહઃ ॥ 176 ॥

કુઙ્કુમતિલકિતફાલા

કુરુવિન્દચ્છાયપાટલદુકૂલા ।

કરુણાપયોધિવેલા

કાચન ચિત્તે ચકાસ્તુ મે લીલા ॥ 177 ॥

પુષ્પન્ધયરુચિવેણ્યઃ

પુલિનાભોગત્રપાકરશ્રેણ્યઃ ।

જીયાસુરિક્ષુપાણ્યઃ

કાશ્ચન કામારિકેલિસાક્ષિણ્યઃ ॥ 178 ॥

તપનીયાંશુકભાંસિ

દ્રાક્ષામાધુર્યનાસ્તિકવચાંસિ ।

કતિચન શુચં મહાંસિ

ક્ષપયતુ કપાલિતોષિતમનાંસિ ॥ 179 ॥

અસિતકચમાયતાક્ષં

કુસુમશરં કૂલમુદ્વહકૃપાર્દ્રમ્ ।

આદિમરસાધિદૈવત-

-મન્તઃ કલયે હરાઙ્કવાસિ મહઃ ॥ 180 ॥

કર્ણોપાન્તતરઙ્ગિત-

-કટાક્ષવિસ્પન્દિકણ્ઠદઘ્નકૃપામ્ ।

કામેશ્વરાઙ્કનિલયાં

કામપિ વિદ્યાં પુરાતનીં કલયે ॥ 181 ॥

અરવિન્દકાન્ત્યરુન્તુદ-

-વિલોચનદ્વન્દ્વસુન્દરમુખેન્દુ ।

છન્દઃ કન્દલમન્દિર-

-મન્તઃપુરમૈન્દુશેખરં વન્દે ॥ 182 ॥

બિમ્બિનિકુરમ્બડમ્બર-

-વિડમ્બકચ્છાયમમ્બરવલગ્નમ્ ।

કમ્બુગલમમ્બુદકુચં

બિમ્બોકં કમપિ ચુમ્બતુ મનો મે ॥ 183 ॥

કમપિ કમનીયરૂપં

કલયામ્યન્તઃ કદમ્બકુસુમાઢ્યમ્ ।

ચમ્પકરુચિરસુવેષૈઃ

સમ્પાદિતકાન્ત્યલઙ્કૃતદિગન્તમ્ ॥ 184 ॥

શમ્પારુચિભર-

-ગર્હાસમ્પાદકકાન્તિકવચિતદિગન્તમ્ ।

સિદ્ધાન્તં નિગમાનાં

શુદ્ધાન્તં કિમપિ શૂલિનઃ કલયે ॥ 185 ॥

ઉદ્યદ્દિનકરશોણા-

-નુત્પલબન્ધુસ્તનન્ધયાપીડાન્ ।

કરકલિતપુણ્ડ્રચાપા-

-ન્કલયે કાનપિ કપર્દિનઃ પ્રાણાન્ ॥ 186 ॥

રશનાલસજ્જઘનયા

રસનાજીવાતુચાપભાસુરયા ।

ઘ્રાણાયુષ્કરશરયા

ઘ્રાતં ચિત્તં કયાપિ વાસનયા ॥ 187 ॥

સરસિજસહયુધ્વદૃશા

શમ્પાલતિકાસનાભિવિગ્રહયા ।

ભાસા કયાપિ ચેતો

નાસામણિશોભિવદનયા ભરિતમ્ ॥ 188 ॥

નવયાવકાભસિચયાન્વિતયા

ગજયાનયા દયાપરયા ।

ધૃતયામિનીશકલયા

ધિયા કયાપિ ક્ષતામયા હિ વયમ્ ॥ 189 ॥

અલમલમકુસુમબાણૈ-

-રબિમ્બશોણૈરપુણ્ડ્રકોદણ્ડૈઃ ।

અકુમુદબાન્ધવચૂડૈ-

-રન્યૈરિહ જગતિ દૈવતં મન્યૈઃ ॥ 190 ॥

કુવલયસદૃક્ષનયનૈઃ

કુલગિરિકૂટસ્થબન્ધુકુચભારૈઃ ।

કરુણાસ્પન્દિકટાક્ષૈઃ

કવચિતચિત્તોઽસ્મિ કતિપયૈઃ કુતુકૈઃ ॥ 191 ॥

નતજનસુલભાય નમો

નાલીકસનાભિલોચનાય નમઃ ।

નન્દિતગિરિશાય નમો

મહસે નવનીપપાટલાય નમઃ ॥ 192 ॥

કાદમ્બકુસુમદામ્ને

કાયચ્છાયાકણાયિતાર્યમ્ણે ।

સીમ્ને ચિરન્તનગિરાં

ભૂમ્ને કસ્મૈચિદાદદે પ્રણતિમ્ ॥ 193 ॥

કુટિલકબરીભરેભ્યઃ

કુઙ્કુમસબ્રહ્મચારિકિરણેભ્યઃ ।

કૂલઙ્કષસ્તનેભ્યઃ

કુર્મઃ પ્રણતિં કુલાદ્રિકુતુકેભ્યઃ ॥ 194 ॥

કોકનદશોણચરણા-

-ત્કોમલકુરલાલિવિજિતશૈવાલાત્ ।

ઉત્પલસગન્ધિનયના-

-દુરરીકુર્મો ન દેવતમાન્યામ્ ॥ 195 ॥

આપાટલાધરાણા-

-માનીલસ્નિગ્ધબર્બરકચાનામ્ ।

આમ્નાયજીવનાના-

-માકૂતાનાં હરસ્ય દાસોઽહમ્ ॥ 196 ॥

પુઙ્ખિતવિલાસહાસ-

-સ્ફુરિતાસુ પુરાહિતાઙ્કનિલયાસુ ।

મગ્નં મનો મદીયં

કાસ્વપિ કામારિજીવનાડીષુ ॥ 197 ॥

લલિતા પાતુ શિરો મે

લલાટમમ્બા ચ મધુમતીરૂપા ।

ભ્રૂયુગ્મં ચ ભવાની

પુષ્પશરા પાતુ લોચનદ્વન્દ્વમ્ ॥ 198 ॥

પાયાન્નાસાં બાલા

સુભગા દન્તાંશ્ચ સુન્દરી જિહ્વામ્ ।

અધરોષ્ઠમાદિશક્તિ-

-શ્ચક્રેશી પાતુ મે ચિરં ચિબુકમ્ ॥ 199 ॥

કામેશ્વરી ચ કર્ણૌ

કામાક્ષી પાતુ ગણ્ડયોર્યુગલમ્ ।

શૃઙ્ગારનાયિકાવ્યા-

-દ્વદનં સિંહાસનેશ્વરી ચ ગલમ્ ॥ 200 ॥

સ્કન્દપ્રસૂશ્ચ પાતુ

સ્કન્ધૌ બાહૂ ચ પાટલાઙ્ગી મે ।

પાણી ચ પદ્મનિલયા

પાયાદનિશં નખાવલીર્વિજયા ॥ 201 ॥

કોદણ્ડિની ચ વક્ષઃ

કુક્ષિં ચાવ્યાત્ કુલાચલતનૂજા ।

કલ્યાણી ચ વલગ્નં

કટિં ચ પાયાત્કલાધરશિખણ્ડા ॥ 202 ॥

ઊરુદ્વયં ચ પાયા-

-દુમા મૃડાની ચ જાનુની રક્ષેત્ ।

જઙ્ઘે ચ ષોડશી મે

પાયાત્ પાદૌ ચ પાશસૃણિહસ્તા ॥ 203 ॥

પ્રાતઃ પાતુ પરા માં

મધ્યાહ્ને પાતુ મણિગૃહાધીશા ।

શર્વાણ્યવતુ ચ સાયં

પાયાદ્રાત્રૌ ચ ભૈરવી સાક્ષાત્ ॥ 204 ॥

ભાર્યાં રક્ષતુ ગૌરીં

પાયાત્ પુત્રાંશ્ચ બિન્દુગૃહપીઠા ।

શ્રીવિદ્યા ચ યશો મે

શીલં ચાવ્યાચ્ચિરં મહારાજ્ઞી ॥ 205 ॥

પવનમયિ પાવકમયિ

ક્ષોણીમયિ ગગનમયિ કૃપીટમયિ ।

રવિમયિ શશિમયિ દિઙ્મયિ

સમયમયિ પ્રાણમયિ શિવે પાહિ ॥ 206 ॥

કાલિ કપાલિનિ શૂલિનિ

ભૈરવિ માતઙ્ગિ પઞ્ચમિ ત્રિપુરે ।

વાગ્દેવિ વિન્ધ્યવાસિનિ

બાલે ભુવનેશિ પાલય ચિરં મામ્ ॥ 207 ॥

અભિનવસિન્દૂરાભા-

-મમ્બ ત્વાં ચિન્તયન્તિ યે હૃદયે ।

ઉપરિ નિપતન્તિ તેષા-

-મુત્પલનયનાકટાક્ષકલ્લોલાઃ ॥ 208 ॥

વર્ગાષ્ટકમિલિતાભિ-

-ર્વશિનીમુખ્યાભિરાવૃતાં ભવતીમ્ ।

ચિન્તયતાં સિતવર્ણાં

વાચો નિર્યાન્ત્યયત્નતો વદનાત્ ॥ 209 ॥

કનકશલાકાગૌરીં

કર્ણવ્યાલોલકુણ્ડલદ્વિતયામ્ ।

પ્રહસિતમુખીં ચ ભવતીં

ધ્યાયન્તો યે ત એવ ભૂધનદાઃ ॥ 210 ॥

શીર્ષામ્ભોરુહમધ્યે

શીતલપીયૂષવર્ષિણીં ભવતીમ્ ।

અનુદિનમનુચિન્તયતા-

-માયુષ્યં ભવતિ પુષ્કલમવન્યામ્ ॥ 211 ॥

મધુરસ્મિતાં મદારુણનયનાં

માતઙ્ગકુમ્ભવક્ષોજામ્ ।

ચન્દ્રવતંસિનીં ત્વાં

સવિધે પશ્યન્તિ સુકૃતિનઃ કેચિત્ ॥ 212 ॥

લલિતાયાઃ સ્તવરત્નં

લલિતપદાભિઃ પ્રણીતમાર્યાભિઃ ।

પ્રતિદિનમવનૌ પઠતાં

ફલાનિ વક્તું પ્રગલ્ભતે સૈવ ॥ 213 ॥

સદસદનુગ્રહનિગ્રહ-

-ગૃહીતમુનિવિગ્રહો ભગવાન્ ।

સર્વાસામુપનિષદાં

દુર્વાસા જયતિ દેશિકઃ પ્રથમઃ ॥ 214 ॥

ઇતિ મહર્ષિદુર્વાસઃ વિરચિતં શ્રીલલિતાસ્તવરત્નમ્ ।

Roman (IAST) Transliteration

vande gajendravadanaṃ

vāmāṅkārūḍhavallabhāśliṣṭam |

kuṅkumaparāgaśoṇaṃ

kuvalayinījārakorakāpīḍam || 1 ||

sa jayati suvarṇaśailaḥ

sakalajagaccakrasaṅghaṭitamūrtiḥ |

kāñcananikuñjavāṭī-

-kandaladamarīprapañcasaṅgītaḥ || 2 ||

harihayanairṛtamāruta-

-haritāmanteṣvavasthitaṃ tasya |

vinumaḥ sānutritayaṃ

vidhiharigaurīśaviṣṭapādhāram || 3 ||

madhye punarmanohara-

-ratnarucistabakarañjitadigantam |

upari catuḥśatayojana-

-muttuṅgaṃ śṛṅgapuṅgavamupāse || 4 ||

tatra catuḥśatayojana-

-pariṇāhaṃ devaśilpinā racitam |

nānāsālamanojñaṃ

namāmyahaṃ nagaramādividyāyāḥ || 5 ||

prathamaṃ sahasrapūrvaka-

-ṣaṭśatasaṅkhyākayojanaṃ paritaḥ |

valayīkṛtasvagātraṃ

varaṇaṃ śaraṇaṃ vrajāmyayorūpam || 6 ||

tasyottare samīraṇa-

-yojanadūre taraṅgitacchāyaḥ |

ghaṭayatu mudaṃ dvitīyo

ghaṇṭāstanasāranirmitaḥ sālaḥ || 7 ||

ubhayorantarasīma-

-nyuddāmabhramararañjitodāram |

upavanamupāsmahe vaya-

-mūrīkṛtamandamārutasyandam || 8 ||

āliṅgya bhadrakālī-

-māsīnastatra hariśilāśyāmām |

manasi mahākālo me

viharatu madhupānavibhramannetraḥ || 9 ||

tārtīyīko varaṇa-

-stasyottarasīmni vātayojanataḥ |

tāmreṇa racitamūrti-

-stanutāmācandratārakaṃ bhadram || 10 ||

madhye tayośca maṇimaya-

-pallavaśākhāprasūnapakṣmalitām |

kalpānokahavāṭīṃ

kalaye makarandapaṅkilāvālām || 11 ||

tatra madhumādhavaśrī-

-taruṇībhyāṃ taraladṛkcakorābhyām |

āliṅgito'vatānmā-

-maniśaṃ prathamarturāttapuṣpāstraḥ || 12 ||

namata taduttarabhāge

nākipathollaṅghiśṛṅgasaṅghātam |

sīsākṛtiṃ turīyaṃ

sitakiraṇālokanirmalaṃ sālam || 13 ||

sāladvayāntarāle

saralālikapotacāṭusubhagāyām |

santānavāṭikāyāṃ

saktaṃ ceto'stu satatamasmākam || 14 ||

tatra tapanātirūkṣaḥ

sāmrājñīcaraṇasāndritasvāntaḥ |

śukraśuciśrīsahito

grīṣmarturdiśatu kīrtimākalpam || 15 ||

uttarasīmani tasyo-

-nnataśikharotkampihāṭakapatākaḥ |

prakaṭayatu pañcamo naḥ

prākāraḥ kuśalamārakūṭamayaḥ || 16 ||

prākārayośca madhye

pallavitānyabhṛtapañcamonmeṣā |

haricandanadruvāṭī-

-haratādāmūlamasmadanutāpam || 17 ||

tatra nabhaḥ śrīmukhyai-

-staruṇīvargaiḥ samanvitaḥ paritaḥ |

vajrāṭṭahāsamukharo

vāñchāpūrtiṃ tanotu varṣartuḥ || 18 ||

mārutayojanadūre

mahanīyastasya cottare bhāge |

bhadraṃ kṛṣīṣṭa ṣaṣṭhaḥ

prākāraḥ pañcalohadhātumayaḥ || 19 ||

anayormadhye santata-

-maṅkūraddivyakusumagandhāyām |

mandāravāṭikāyāṃ

mānasamaṅgīkarotu me vihṛtim || 20 ||

tasyāmiṣorjalakṣmī-

-taruṇībhyāṃ śaradṛtuḥ sadā sahitaḥ |

abhyarcayan sa jīyā-

-dambāmāmodameduraiḥ kusumaiḥ || 21 ||

tasyarṣisaṅkhyayojana-

-dūre dedīpyamānaśṛṅgaughaḥ |

kaladhautakalitamūrtiḥ

kalyāṇaṃ diśatu saptamaḥ sālaḥ || 22 ||

madhye tayormarutpatha

laṅghitaviṭapāgravirutakalakaṇṭhā |

śrīpārijātavāṭī

śriyamaniśaṃ diśatu śītaloddeśā || 23 ||

tasyāmatipriyābhyāṃ

saha khelan sahasahasyalakṣmībhyām |

sāmanto jhaṣaketo-

-rhemanto bhavatu hemavṛddhyai naḥ || 24 ||

uttaratastasya mahā-

-nudbhaṭahutabhukśikhāruṇamayūkhaḥ |

tapanīyakhaṇḍaracita-

-stanutādāyuṣyamaṣṭamo varaṇaḥ || 25 ||

kādambavipinavāṭī-

-manayormadhyabhuvi kalpitāvāsām |

kalayāmi sūnakoraka-

-kandalitāmodatundilasamīrām || 26 ||

tasyāmatiśiśirākṛti-

-rāsīnastapatapasyalakṣmībhyām |

śivamaniśaṃ kurutānme

śiśirartuḥ satataśītaladigantaḥ || 27 ||

tasyāṃ kadambavāṭyāṃ

tatprasavāmodamilitamadhugandham |

saptāvaraṇamanojñaṃ

śaraṇaṃ samupaimi mantriṇīśaraṇam || 28 ||

tatrālaye viśāle

tapanīyāracitataralasopāne |

māṇikyamaṇḍapānta-

-rmahite siṃhāsane sumaṇikhacite || 29 ||

bindutripañcakoṇa-

-dvipanṛpavasuvedadalakurekhāḍhye |

cakre sadā niviṣṭāṃ

ṣaṣṭhyaṣṭatriṃśadakṣareśānīm || 30 ||

tāpiñchamecakābhāṃ

tālīdalaghaṭitakarṇatāṭaṅkām |

tāmbūlapūritamukhīṃ

tāmrādharabimbadṛṣṭadarahāsām || 31 ||

kuṅkumapaṅkiladehāṃ

kuvalayajīvātuśāvakavataṃsām |

kokanadaśoṇacaraṇāṃ

kokilanikvāṇakomalālāpām || 32 ||

vāmāṅgagalitacūlīṃ

vanamālyakadambamālikābharaṇām |

muktālalantikāñcita

mugdhālikamilitacitrakodārām || 33 ||

karavidhṛtakīraśāvaka-

-kalaninadavyaktanikhilanigamārthām |

vāmakucasaṅgivīṇāvādana-

-saukhyārdhamīlitākṣiyugām || 34 ||

āpāṭalāṃśukadharā-

-mādirasonmeṣavāsitakaṭākṣām |

āmnāyasāragulikā-

-mādyāṃ saṅgītamātṛkāṃ vande || 35 ||

tasya ca suvarṇasāla-

-syottaratastaruṇakuṅkumacchāyaḥ |

śamayatu mama santāpaṃ

sālo navamaḥ sa puṣparāgamayaḥ || 36 ||

anayorantaravasudhāḥ

praṇumaḥ pratyagrapuṣparāgamayīḥ |

siṃhāsaneśvarīmanu-

-cintananistandrasiddhanīrandhrāḥ || 37 ||

tatsālottaradeśe

taruṇajapākiraṇadhoraṇīśoṇaḥ |

praśamayatu padmarāga-

-prākāro mama parābhavaṃ daśamaḥ || 38 ||

antarabhūkṛtavāsā-

-nanayorapanītacittavaimatyān |

cakreśīpadabhaktāṃ-

-ścāraṇavargānaharniśaṃ kalaye || 39 ||

sāraṅgavāhayojanadūre-

-'saṅghaṭitaketanastasya |

gomedakena racito

gopāyatu māṃ samunnataḥ sālaḥ || 40 ||

vapradvayāntarorvyāṃ

vaṭukairvividhaiśca yoginībṛndaiḥ |

satataṃ samarcitāyāḥ

saṅkarṣaṇyāḥ praṇaumi caraṇābjam || 41 ||

tāpasayojanadūre

tasya samuttuṅga gopuropetaḥ |

vāñchāpūrtyai bhavatā-

-dvajramaṇīnikaranirmito vapraḥ || 42 ||

varaṇadvitayāntarato

vāsajuṣo vihitamadhurasāsvādāḥ |

rambhādivibudhaveśyā

racayantu mahāntamasmadānandam || 43 ||

tatra sadā pravahantī

taṭinī vajrābhidhā ciraṃ jīyāt |

caṭulormijālanṛtya-

-tkalahaṃsīkulakalakvaṇitapuṣṭā || 44 ||

rodhasi tasyā rucire

vajreśī jayati vajrabhūṣāḍhyā |

vajrapradānatoṣita-

-vajrimukhatridaśavinutacāritrā || 45 ||

tasyodīcyāṃ hariti

stavakitasuṣamāvalīḍhaviyadantaḥ |

vaiḍūryaratnaracito

vaimalyaṃ diśatu cetaso varaṇaḥ || 46 ||

adhimadhyametayoḥ puna-

-rambācaraṇāvalambitasvāntān |

kārkoṭakādināgān

kalayāmaḥ kiṃ ca balimukhān danujān || 47 ||

gandhavahasaṅkhyayojana-

-dūre gaganordhvajāṅghikastasya |

vāsavamaṇipraṇīto

varaṇo bahalayatu vaiduṣīṃ viśadām || 48 ||

madhyakṣoṇyāmanayo-

-rmahendranīlātmakāni ca sarāṃsi |

śātodarīsahāyā-

-nbhūpālānapi punaḥ punaḥ praṇumaḥ || 49 ||

āśugayojanadūre

tasyordhvaṃ kāntidhavalitadigantaḥ |

muktāviracitagātro

muhurasmākaṃ mude bhavatu sālaḥ || 50 ||

āvṛttyoradhimadhyaṃ

pūrvasyāṃ diśi purandaraḥ śrīmān |

abhramuviṭādhirūḍho

vibhramamasmākamaniśamātanutāt || 51 ||

tatkoṇe vyajanasru-

-ktomarapātrasruvānnaśaktidharaḥ |

svāhāsvadhāsametaḥ

sukhayatu māṃ havyavāhanaḥ suciram || 52 ||

dakṣiṇadigantarāle

daṇḍadharo nīlanīradacchāyaḥ |

tripurāpadābjabhaktastirayatu

mama nikhilamaṃhasāṃ nikaram || 53 ||

tasyaiva paścimāyāṃ

diśi dalitendīvaraprabhāśyāmaḥ |

kheṭāsiyaṣṭidhārī

khedānapanayatu yātudhāno me || 54 ||

tasyā uttaradeśe

dhavalāṅgo vipulajhaṣavarārūḍhaḥ |

pāśāyudhāttapāṇiḥ

pāśī vidalayatu pāśajālāni || 55 ||

vande taduttarahari-

-tkoṇe vāyuṃ camūruvaravāham |

korakitatattvabodhā-

-ngorakṣapramukhayogino'pi muhuḥ || 56 ||

taruṇīriḍāpradhānā-

-stisro vātasya tasya kṛtavāsāḥ |

pratyagrakāpiśāyana-

-pānaparibhrāntalocanāḥ kalaye || 57 ||

tallokapūrvabhāge

dhanadaṃ dhyāyāmi śevadhikuleśam |

api māṇibhadramukhyā-

-nambācaraṇāvalambino yakṣān || 58 ||

tasyaiva pūrvasīmani

tapanīyāracitagopure nagare |

kātyāyanīsahāyaṃ

kalaye śītāṃśukhaṇḍacūḍālam || 59 ||

tatpuraṣoḍaśavaraṇa-

-sthalabhājastaruṇacandracūḍālān |

rudrādhyāye paṭhitā-

-nrudrāṇīsahacarānbhaje rudrān || 60 ||

pavamānasaṅkhyayojana-

-dūre bālatṛṇmecakastasya |

sālo marakataracitaḥ

sampadamacalāṃ śriyaṃ ca puṣṇātu || 61 ||

āvṛtiyugmāntarato

haritamaṇīnivahamecake deśe |

hāṭakatālīvipinaṃ

hālāghaṭaghaṭitaviṭapamākalaye || 62 ||

tatraiva mantriṇīgṛha-

-pariṇāhaṃ taralaketanaṃ sadanam |

marakatasaudhamanojñaṃ

dadyādāyūṃṣi daṇḍanāthāyāḥ || 63 ||

sadane tatra harinmaṇi-

-saṅghaṭite maṇḍape śatastambhe |

kārtasvaramayapīṭhe

kanakamayāmburuhakarṇikāmadhye || 64 ||

bindutrikoṇavartula-

-ṣaḍasravṛttadvayānvite cakre |

sañcāriṇī daśottara-

śatārṇamanurājakamalakalahaṃsī || 65 ||

kolavadanā kuśeśaya-

-nayanā kokārimaṇḍitaśikhaṇḍā |

santaptakāñcanābhā

sandhyāruṇacelasaṃvṛtanitambā || 66 ||

halamusalaśaṅkhacakrā-

-'ṅkuśapāśābhayavarasphuritahastā |

kūlaṅkaṣānukampā

kuṅkumajambālitastanābhogā || 67 ||

dhūrtānāmatidūrā-

-vārtāśeṣāvalagnakamanīyā |

ārtālīśubhadātrī

vārtālī bhavatu vāñchitārthāya || 68 ||

tasyāḥ parito devīḥ

svapneśyunmattabhairavīmukhyāḥ |

praṇamata jambhinyādyāḥ

bhairavavargāṃśca hetukapramukhān || 69 ||

pūrvoktasaṅkhyayojana-

-dūre pūyāṃśupāṭalastasya |

vidrāvayatu madārtiṃ

vidrumasālo viśaṅkaṭadvāraḥ || 70 ||

āvaraṇayoraharniśa-

-mantarabhūmauprakāśaśālinyām |

āsīnamambujāsana-

-mabhinavasindūragauramahamīḍe || 71 ||

varaṇasya tasya māruta-

-yojanato vipulagopuradvāraḥ |

sālo nānāratnaiḥ

saṅghaṭitāṅgaḥ kṛṣīṣṭa madabhīṣṭam || 72 ||

antarakakṣyāmanayo-

-raviralaśobhāpicaṇḍiloddeśām |

māṇikyamaṇḍapākhyāṃ

mahatīmadhihṛdayamaniśamākalaye || 73 ||

tatra sthitaṃ prasannaṃ

taruṇatamālapravālakiraṇābham |

karṇāvalambikuṇḍala-

-kandalitābhīśukavacitakapolam || 74 ||

śoṇādharaṃ śucismita-

-meṇāṅkavadanamedhamānakṛpam |

mugdhaiṇamadaviśeṣaka-

-mudritaniṭilendurekhikāruciram || 75 ||

nālīkadalasahodara-

-nayanāñcalaghaṭitamanasijākūtam |

kamalākaṭhinapayodhara-

-kastūrīghusṛṇapaṅkiloraskam || 76 ||

cāmpeyagandhikaiśyaṃ

śampāsabrahmacārikauśeyam |

śrīvatsakaustubhadharaṃ

śritajanarakṣādhurīṇacaraṇābjam || 77 ||

kambusudarśanavilasa-

-tkarapadmaṃ kaṇṭhalolavanamālam |

mucukundamokṣaphaladaṃ

mukundamānandakandamavalambe || 78 ||

tadvaraṇottarabhāge

tārāpatibimbacumbinijaśṛṅgaḥ |

vividhamaṇīgaṇaghaṭito

vitaratu sālo vinirmalāṃ dhiṣaṇām || 79 ||

prākāradvitayāntara-

-kakṣyāṃ pṛthuratnanikarasaṅkīrṇām |

namata sahasrastambhaka-

-maṇḍapanāmnātiviśrutāṃ bhuvane || 80 ||

praṇumastatra bhavānī-

-sahacaramīśānamindukhaṇḍadharam |

śṛṅgāranāyikāmanu-

-śīlanabhājo'pi bhṛṅginandimukhān || 81 ||

tasyaiṇavāhayojana-

-dūre vande manomayaṃ vapram |

aṅkūranmaṇikiraṇā-

-mantarakakṣyāṃ ca nirmalāmanayoḥ || 82 ||

tatraivāmṛtavāpīṃ

taralataraṅgāvalīḍhataṭayugmām |

muktāmayakalahaṃsī-

-mudritakanakāravindasandohām || 83 ||

śakropalamayabhṛṅgī-

-saṅgītonmeṣaghoṣitadigantām |

kāñcanamayāṅgavilasa-

-tkāraṇḍavaṣaṇḍatāṇḍavamanojñām || 84 ||

kuruvindātmakahallaka-

-korakasuṣamāsamūhapāṭalitām |

kalaye sudhāsvarūpāṃ

kandalitāmandakairavāmodām || 85 ||

tadvāpikāntarāle tarale

maṇipotasīmni viharantīm |

sindūrapāṭalāṅgīṃ

sitakiraṇāṅkūrakalpitavataṃsām || 86 ||

parvendubimbavadanāṃ

pallavaśoṇādharasphuritahāsām |

kuṭilakabarīṃ kuraṅgī-

-śiśunayanāṃ kuṇḍalasphuritagaṇḍām || 87 ||

nikaṭasthapotanilayāḥ

śaktīḥ śayavidhṛtahemaśṛṅgajalaiḥ |

pariṣiñcantīṃ parita-

-stārāṃ tāruṇyagarvitāṃ vande || 88 ||

prāguktasaṅkhyayojanadūre

praṇamāmi buddhimayasālam |

anayorantarakakṣyā-

-maṣṭāpadapuṣṭamedinīṃ rucirām || 89 ||

kādambarīnidhānāṃ

kalayāmyānandavāpikāṃ tasyām |

śoṇāśmanivahanirmita-

-sopānaśreṇiśobhamānataṭīm || 90 ||

māṇikyataraṇinilayāṃ

madhye tasyā madāruṇakapolām |

amṛteśītyabhidhānā-

-mantaḥ kalayāmi vāruṇīṃ devīm || 91 ||

sauvarṇakenipātana-

-hastāḥ saundaryagarvitā devyaḥ |

tatpurataḥ sthitibhājo

vitarantvasmākamāyuṣo vṛddhim || 92 ||

tasya pṛṣadaśvayojana-

-dūre'haṅkārasālamatituṅgam |

vande tayośca madhye

kakṣyāṃ valamānamalayapavamānām || 93 ||

vinumo vimarśavāpīṃ

sauṣumnasudhāsvarūpiṇīṃ tatra |

velātilaṅghyavīcī-

-kolāhalabharitakūlavanavāṭīm || 94 ||

tatraiva salilamadhye

tāpiñchadalaprapañcasuṣamābhām |

śyāmalakañcukalasitāṃ

śyāmāviṭabimbaḍambaraharāsyām || 95 ||

ābhugnamasṛṇacillī-

-hasitāyugmaśarakārmukavilāsām |

mandasmitāñcitamukhīṃ

maṇimayatāṭaṅkamaṇḍitakapolām || 96 ||

kuruvindataraṇinilayāṃ

kulācalaspardhikucanamanmadhyām |

kuṅkumaviliptagātrīṃ

kurukullāṃ manasi kurmahe satatam || 97 ||

tatsālottarabhāge

bhānumayaṃ vapramāśraye dīptam |

madhyaṃ ca vipulamanayo-

-rmanye viśrāntamātapodgāram || 98 ||

tatra kuruvindapīṭhe

tāmarase kanakakarṇikāghaṭite |

āsīnamaruṇavāsasa-

-mamlānaprasavamālikābharaṇam || 99 ||

cakṣuṣmatīprakāśana-

-śakticchāyāsamāracitakelim |

māṇikyamukuṭaramyaṃ

manye mārtāṇḍabhairavaṃ hṛdaye || 100 ||

indumayasālamīḍe

tasyottaratastuṣāragirigauram |

atyantaśiśiramāruta-

-manayormadhyaṃ ca candrikodgāram || 101 ||

tatra prakāśamānaṃ

tārānikaraiḥ pariṣkṛtoddeśam |

amṛtamayakāntikandala-

-mantaḥ kalayāmi kundasitamindum || 102 ||

śṛṅgārasālamīḍe

śṛṅgollasitaṃ taduttare bhāge |

madhyasthale tayorapi

mahitāṃ śṛṅgārapūrvikāṃ parikhām || 103 ||

tatra maṇinausthitābhi-

-stapanīyāviracitāgrahastābhiḥ |

śṛṅgāradevatābhiḥ

sahitaṃ parikhādhipaṃ bhaje madanam || 104 ||

śṛṅgāravaraṇavaryasyottarataḥ

sakalavibudhasaṃsevyam |

cintāmaṇigaṇaracitaṃ

cintāṃ dūrīkarotu me sadanam || 105 ||

maṇisadanasālayoradhi-

-madhyaṃ daśatālabhūmiruhadīrghaiḥ |

parṇaiḥ suvarṇavarṇai-

-ryuktāṃ kāṇḍaiśca yojanottuṅgaiḥ || 106 ||

mṛdulaistālīpañcaka-

-mānairmilitāṃ ca kesarakadambaiḥ |

santatagalitamaranda-

-srotoniryanmilindasandohām || 107 ||

pāṭīrapavanabālaka-

-dhāṭīniryatparāgapiñjaritām |

kalahaṃsīkulakalakala-

-kūlaṅkaṣaninadanicayakamanīyām || 108 ||

padmāṭavīṃ bhajāmaḥ

parimalakallolapakṣmalopāntām |

[ devyarghyapātradhārī

tasyāḥ pūrvadiśi daśakalāyuktaḥ | ]

valayitamūrtirbhagavā-

-nvahniḥ krośonnataściraṃ pāyāt || 109 ||

tatrādhāre devyāḥ

pātrīrūpaḥ prabhākaraḥ śrīmān |

dvādaśakalāsameto

dhvāntaṃ mama bahulamāntaraṃ bhindyāt || 110 ||

tasmin dineśapātre

taraṅgitāmodamamṛtamayamarghyam |

candrakalātmakamamṛtaṃ

sāndrīkuryādamandamānandam || 111 ||

amṛte tasminnabhito

viharantyo vividhamaṇitaraṇibhājaḥ |

ṣoḍaśa kalāḥ sudhāṃśoḥ

śokāduttārayantu māmaniśam || 112 ||

tatraiva vihṛtibhājo

dhātṛmukhānāṃ ca kāraṇeśānām |

sṛṣṭyādirūpikāstāḥ

śamayantvakhilāḥ kalāśca santāpam || 113 ||

kīnāśavaruṇakinnara-

-rājadiganteṣu ratnagehasya |

kalayāmi tānyajasraṃ

kalayantvāyuṣyamarghyapātrāṇi || 114 ||

pātrasthalasya purataḥ

padmāramaṇavidhipārvatīśānām |

bhavanāni śarmaṇe no

bhavantu bhāsā pradīpitajaganti || 115 ||

sadanasyānalakoṇe

satataṃ praṇamāmi kuṇḍamāgneyam |

tatra sthitaṃ ca vahniṃ

taralaśikhājaṭilamambikājanakam || 116 ||

tasyāsuradiśi tādṛśa-

-ratnaparisphuritaparvanavakāḍhyam |

cakrātmakaṃ śatāṅgaṃ

śatayojanamunnataṃ bhaje divyam || 117 ||

tatraiva diśi niṣaṇṇaṃ

tapanīyadhvajaparamparāśliṣṭam |

rathamaparaṃ ca bhavānyā

racayāmo manasi ratnamayacūḍam || 118 ||

bhavanasya vāyubhāge

pariṣkṛto vividhavaijayantībhiḥ |

racayatu mudaṃ rathendraḥ

saciveśānyāḥ samastavandyāyāḥ || 119 ||

kurmo'dhihṛdayamaniśaṃ

kroḍāsyāyāḥ śatāṅgamūrdhanyam |

rudradiśi ratnadhāmno

ruciraśalākāprapañcakañcukitam || 120 ||

parito devīdhāmnaḥ

praṇītavāsā manusvarūpiṇyaḥ |

kurvantu raśmimālā-

-kṛtayaḥ kuśalāni devatā nikhilāḥ || 121 ||

prāgdvārasya bhavānī-

-dhāmnaḥ pārśvadvayāracitavāse |

mātaṅgīkiṭimukhyau

maṇisadane manasi bhāvayāmi ciram || 122 ||

yojanayugalābhogā

tatkrośapariṇāhayaiva bhittyā ca |

cintāmaṇigṛhabhūmi-

-rjīyādāmnāyamayacaturdvārā || 123 ||

dvāre dvāre dhāmnaḥ

piṇḍībhūtā navīnabimbābhāḥ |

vidadhatu vipulāṃ kīrtiṃ

divyā lauhityasiddhyo devyaḥ || 124 ||

maṇisadanasyāntarato

mahanīye ratnavedikāmadhye |

bindumayacakramīḍe

pīṭhānāmupari viracitāvāsam || 125 ||

cakrāṇāṃ sakalānāṃ

prathamamadhaḥ sīmaphalakavāstavyāḥ |

aṇimādisiddhayo mā-

-mavantu devī prabhāsvarūpiṇyaḥ || 126 ||

aṇimādisiddhiphalaka-

-syoparihariṇāṅkakhaṇḍakṛtacūḍāḥ |

bhadraṃ pakṣmalayantu

brāhmīpramukhāśca mātaro'smākam || 127 ||

tasyopari maṇiphalake

tāruṇyottuṅgapīnakucabhārāḥ |

saṅkṣobhiṇīpradhānāḥ

bhrānti vidrāvayantu daśa mudrāḥ || 128 ||

phalakatrayasvarūpe

pṛthule trailokyamohane cakre |

dīvyantu prakaṭākhyā-

-stāsāṃ kartrīṃ ca bhagavatī tripurā || 129 ||

tadupari vipule dhiṣṇye

taraladṛśastaruṇakokanadabhāsaḥ |

kāmākarṣiṇyādyāḥ

kalaye devīḥ kalādharaśikhaṇḍāḥ || 130 ||

sarvāśāparipūrakacakre-

-'smin guptayoginīsevyāḥ |

tripureśī mama duritaṃ

tudyāt kaṇṭhāvalambimaṇihārā || 131 ||

tasyopari maṇipīṭhe

tāmrāmbhoruhadalaprabhāśoṇāḥ |

dhyāyāmyanaṅgakusumā-

-pramukhā devīśca vidhṛtakūrpāsāḥ || 132 ||

saṅkṣobhakārake'smiṃ-

-ścakre śrītripurasundarī sākṣāt |

goptrī guptatarākhyāḥ

gopāyatu māṃ kṛpārdrayā dṛṣṭyā || 133 ||

saṅkṣobhiṇīpradhānāḥ

śaktīstasyordhvavalayakṛtavāsāḥ |

ālolanīlaveṇī-

-rantaḥ kalayāmi yauvanonmattāḥ || 134 ||

saubhāgyadāyake'smiṃ-

-ścakreśī tripuravāsinī jīyāt |

śaktīśca sampradāyābhidhāḥ

samastāḥ pramodayantvaniśam || 135 ||

maṇipīṭhopari tāsāṃ

mahati caturhastavistṛte valaye |

santataviracitavāsāḥ

śaktīḥ kalayāmi sarvasiddhimukhāḥ || 136 ||

sarvārthasādhakākhye

cakre'muṣmin samastaphaladātrī |

tripurā śrīrmama kuśalaṃ

diśatāduttīrṇayoginīsevyā || 137 ||

tāsāṃ nilayasyopari

dhiṣṇye kausumbhakañcukamanojñāḥ |

sarvājñādyāḥ devyaḥ

sakalāḥ sampādayantu mama kīrtim || 138 ||

cakre samastarakṣā-

-karanāmnyasmin samastajanasevyām |

manasi nigarbhāsahitāṃ

manye śrītripuramālinīṃ devīm || 139 ||

sarvajñāsadanasyopari

cakre vipule samākalitagehāḥ |

vande vaśinīmukhyāḥ

śaktīḥ sindūrareṇurucaḥ || 140 ||

śrīsarvarogaharākhya-

-cakre'smiṃstripurapūrvikāṃ siddhām |

vande rahasyanāmnā

vedyābhiḥ śaktibhiḥ sadā sevyām || 141 ||

vaśinīgṛhopariṣṭā-

-dviṃśatihastonnate mahāpīṭhe |

śamayantu śatrubṛndaṃ

śastrāṇyastrāṇi cādidampatyoḥ || 142 ||

śastrasadanopariṣṭā-

-dvalaye valavairiratnasaṅghaṭite |

kāmeśvarīpradhānāḥ

kalaye devīḥ samastajanavandyāḥ || 143 ||

cakre'tra sarvasiddhiprada-

-nāmani sarvaphaladātrī |

tripurāmbāvatu satataṃ

parāpararahasyayoginīsevyā || 144 ||

kāmeśvarīgṛhoparivalaye

vividhamanusampradāyajñāḥ |

catvāro yuganāthā

jayantu mitreśapūrvakāḥ guravaḥ || 145 ||

nāthabhavanopariṣṭā-

-nnānāratnacayamedure pīṭhe |

kāmeśyādyā nityāḥ

kalayantu mudaṃ tithisvarūpiṇyaḥ || 146 ||

nityāsadanasyopari

nirmalamaṇinivahaviracite dhiṣṇye |

kuśalaṃ ṣaḍaṅgadevyaḥ

kalayantvasmākamuttaralanetrāḥ || 147 ||

sadanasyopari tāsāṃ

sarvānandamayanāmake bindau |

pañcabrahmākārāṃ

mañcaṃ praṇamāmi maṇigaṇākīrṇam || 148 ||

parito maṇimañcasya

pralambamānā niyantritā pāśaiḥ |

māyāmayī javanikā

mama duritaṃ haratu mecakacchāyā || 149 ||

mañcasyopari lamba-

-nmadanīpunnāgamālikābharitam |

harigopamayavitānaṃ

haratādālasyamaniśamasmākam || 150 ||

paryaṅkasya bhajāmaḥ

pādānbimbāmbudenduhemarucaḥ |

ajaharirudreśamayā-

-nanalāsuramāruteśakoṇasthān || 151 ||

phalakaṃ sadāśivamayaṃ

praṇaumi sindūrareṇukiraṇābham |

ārabhyāṅgeśīnāṃ

sadanātkalitaṃ ca ratnasopānam || 152 ||

paṭṭopadhānagaṇḍaka-

-catuṣṭayasphuritapāṭalāstaraṇam |

paryaṅkopari ghaṭitaṃ

pātu ciraṃ haṃsatūlaśayanaṃ naḥ || 153 ||

tasyopari nivasantaṃ

tāruṇyaśrīniṣevitaṃ satatam |

āvṛntapullahallaka-

-marīcikāpuñjamañjulacchāyam || 154 ||

sindūraśoṇavasanaṃ

śītāṃśustabakacumbitakirīṭam |

kuṅkumatilakamanohara-

-kuṭilālikahasitakumudabandhuśiśum || 155 ||

pūrṇendubimbavadanaṃ

phullasarojātalocanatritayam |

taralāpāṅgataraṅgita-

-śapharāṅkanaśāstrasampradāyārtham || 156 ||

maṇimayakuṇḍalapuṣya-

-nmarīcikallolamāṃsalakapolam |

vidrumasahodarādhara-

-visṛmarasusmitakiśorasañcāram || 157 ||

āmodikusumaśekhara-

-mānīlabhrūlatāyugamanojñam |

vīṭīsaurabhavīcī-

-dviguṇitavaktrāravindasaurabhyam || 158 ||

pāśāṅkuśekṣucāpa-

-prasavaśarasphuritakomalakarābjam |

kāśmīrapaṅkilāṅgaṃ

kāmeśaṃ manasi kurmahe satatam || 159 ||

tasyāṅkabhuvi niṣaṇṇāṃ

taruṇakadambaprasūnakiraṇābhām |

śītāṃśukhaṇḍacūḍāṃ

sīmantanyastasāndrasindūrām || 160 ||

kuṅkumalalāmabhāsva-

-nniṭilāṃ kuṭilataracillikāyugalām |

nālīkatulyanayanāṃ

nāsāñcalanaṭitamauktikābharaṇām || 161 ||

aṅkuritamandahāsa-

-maruṇādharakāntivijitabimbābhām |

kastūrīmakarīyuta-

-kapolasaṅkrāntakanakatāṭaṅkām || 162 ||

karpūrasāndravīṭī-

-kabalitavadanāravindakamanīyām |

kambusahodarakaṇṭha-

-pralambamānācchamauktikakalāpām || 163 ||

kahlāradāmakomala-

-bhujayugalasphuritaratnakeyūrām |

karapadmamūlavilasa-

-tkāñcanamayakaṭakavalayasandohām || 164 ||

pāṇicatuṣṭayavilasa-

-tpāśāṅkuśapuṇḍracāpapuṣpāstrām |

kūlaṅkaṣakucaśikharāṃ

kuṅkumakardamitaratnakūrpāsām || 165 ||

aṇudāyādavalagnā-

-mambudaśobhāsanābhiromalatām |

māṇikyakhacitakāñcī-

-marīcikākrāntamāṃsalanitambām || 166 ||

karabhorukāṇḍayugalāṃ

jaṅghājitakāmajaitratūṇīrām |

prapadaparibhūtakūrmāṃ

pallavasacchāyapadayugamanojñām || 167 ||

kamalabhavakañjalocana-

-kirīṭaratnāṃśurañjitapadābjām |

unmastakānukampā-

-muttaralāpāṅgapoṣitānaṅgām || 168 ||

ādimarasāvalambā-

-manidaṃ prathamoktivallarīkalikām |

ābrahmakīṭajananī-

-mantaḥ kalayāmi sundarīmaniśam || 169 ||

kastu kṣitau paṭīyā-

-nvastu stotuṃ śivāṅkavāstavyam |

astu cirantanasukṛtaiḥ

prastutakāmyāya tanmama purastāt || 170 ||

prabhusammitoktigamyaṃ

paramaśivotsaṅgatuṅgaparyaṅkam |

tejaḥ kiñcana divyaṃ

purato me bhavatu puṇḍrakodaṇḍam || 171 ||

madhurimabharitaśarāsaṃ

makarandasyandimārgaṇodāram |

kairaviṇīviṭacūḍaṃ

kaivalyāyāstu kiñcana maho naḥ || 172 ||

akṣudramikṣucāpaṃ

parokṣamavalagnasīmni tryakṣam |

kṣapayatu me kṣemetara-

-mukṣarathapremapakṣmalaṃ tejaḥ || 173 ||

bhṛṅgarucisaṅgarakarāpāṅgaṃ

śṛṅgāratuṅgamaruṇāṅgam |

maṅgalamabhaṅguraṃ me

ghaṭayatu gaṅgādharāṅgasaṅgi mahaḥ || 174 ||

prapadājitakūrmamūrjita-

-karuṇaṃ bharmarucinirmathanadeham |

śritavarma marma śambhoḥ

kiñcana mama narma śarma nirmātu || 175 ||

kālakuralālikālima-

-kandalavijitāli vidhṛtamaṇivāli |

milatu hṛdi pulinajaghanaṃ

bahulitagalagaralakeli kimapi mahaḥ || 176 ||

kuṅkumatilakitaphālā

kuruvindacchāyapāṭaladukūlā |

karuṇāpayodhivelā

kācana citte cakāstu me līlā || 177 ||

puṣpandhayaruciveṇyaḥ

pulinābhogatrapākaraśreṇyaḥ |

jīyāsurikṣupāṇyaḥ

kāścana kāmārikelisākṣiṇyaḥ || 178 ||

tapanīyāṃśukabhāṃsi

drākṣāmādhuryanāstikavacāṃsi |

katicana śucaṃ mahāṃsi

kṣapayatu kapālitoṣitamanāṃsi || 179 ||

asitakacamāyatākṣaṃ

kusumaśaraṃ kūlamudvahakṛpārdram |

ādimarasādhidaivata-

-mantaḥ kalaye harāṅkavāsi mahaḥ || 180 ||

karṇopāntataraṅgita-

-kaṭākṣavispandikaṇṭhadaghnakṛpām |

kāmeśvarāṅkanilayāṃ

kāmapi vidyāṃ purātanīṃ kalaye || 181 ||

aravindakāntyaruntuda-

-vilocanadvandvasundaramukhendu |

chandaḥ kandalamandira-

-mantaḥpuramainduśekharaṃ vande || 182 ||

bimbinikurambaḍambara-

-viḍambakacchāyamambaravalagnam |

kambugalamambudakucaṃ

bimbokaṃ kamapi cumbatu mano me || 183 ||

kamapi kamanīyarūpaṃ

kalayāmyantaḥ kadambakusumāḍhyam |

campakarucirasuveṣaiḥ

sampāditakāntyalaṅkṛtadigantam || 184 ||

śampārucibhara-

-garhāsampādakakāntikavacitadigantam |

siddhāntaṃ nigamānāṃ

śuddhāntaṃ kimapi śūlinaḥ kalaye || 185 ||

udyaddinakaraśoṇā-

-nutpalabandhustanandhayāpīḍān |

karakalitapuṇḍracāpā-

-nkalaye kānapi kapardinaḥ prāṇān || 186 ||

raśanālasajjaghanayā

rasanājīvātucāpabhāsurayā |

ghrāṇāyuṣkaraśarayā

ghrātaṃ cittaṃ kayāpi vāsanayā || 187 ||

sarasijasahayudhvadṛśā

śampālatikāsanābhivigrahayā |

bhāsā kayāpi ceto

nāsāmaṇiśobhivadanayā bharitam || 188 ||

navayāvakābhasicayānvitayā

gajayānayā dayāparayā |

dhṛtayāminīśakalayā

dhiyā kayāpi kṣatāmayā hi vayam || 189 ||

alamalamakusumabāṇai-

-rabimbaśoṇairapuṇḍrakodaṇḍaiḥ |

akumudabāndhavacūḍai-

-ranyairiha jagati daivataṃ manyaiḥ || 190 ||

kuvalayasadṛkṣanayanaiḥ

kulagirikūṭasthabandhukucabhāraiḥ |

karuṇāspandikaṭākṣaiḥ

kavacitacitto'smi katipayaiḥ kutukaiḥ || 191 ||

natajanasulabhāya namo

nālīkasanābhilocanāya namaḥ |

nanditagiriśāya namo

mahase navanīpapāṭalāya namaḥ || 192 ||

kādambakusumadāmne

kāyacchāyākaṇāyitāryamṇe |

sīmne cirantanagirāṃ

bhūmne kasmaicidādade praṇatim || 193 ||

kuṭilakabarībharebhyaḥ

kuṅkumasabrahmacārikiraṇebhyaḥ |

kūlaṅkaṣastanebhyaḥ

kurmaḥ praṇatiṃ kulādrikutukebhyaḥ || 194 ||

kokanadaśoṇacaraṇā-

-tkomalakuralālivijitaśaivālāt |

utpalasagandhinayanā-

-durarīkurmo na devatamānyām || 195 ||

āpāṭalādharāṇā-

-mānīlasnigdhabarbarakacānām |

āmnāyajīvanānā-

-mākūtānāṃ harasya dāso'ham || 196 ||

puṅkhitavilāsahāsa-

-sphuritāsu purāhitāṅkanilayāsu |

magnaṃ mano madīyaṃ

kāsvapi kāmārijīvanāḍīṣu || 197 ||

lalitā pātu śiro me

lalāṭamambā ca madhumatīrūpā |

bhrūyugmaṃ ca bhavānī

puṣpaśarā pātu locanadvandvam || 198 ||

pāyānnāsāṃ bālā

subhagā dantāṃśca sundarī jihvām |

adharoṣṭhamādiśakti-

-ścakreśī pātu me ciraṃ cibukam || 199 ||

kāmeśvarī ca karṇau

kāmākṣī pātu gaṇḍayoryugalam |

śṛṅgāranāyikāvyā-

-dvadanaṃ siṃhāsaneśvarī ca galam || 200 ||

skandaprasūśca pātu

skandhau bāhū ca pāṭalāṅgī me |

pāṇī ca padmanilayā

pāyādaniśaṃ nakhāvalīrvijayā || 201 ||

kodaṇḍinī ca vakṣaḥ

kukṣiṃ cāvyāt kulācalatanūjā |

kalyāṇī ca valagnaṃ

kaṭiṃ ca pāyātkalādharaśikhaṇḍā || 202 ||

ūrudvayaṃ ca pāyā-

-dumā mṛḍānī ca jānunī rakṣet |

jaṅghe ca ṣoḍaśī me

pāyāt pādau ca pāśasṛṇihastā || 203 ||

prātaḥ pātu parā māṃ

madhyāhne pātu maṇigṛhādhīśā |

śarvāṇyavatu ca sāyaṃ

pāyādrātrau ca bhairavī sākṣāt || 204 ||

bhāryāṃ rakṣatu gaurīṃ

pāyāt putrāṃśca bindugṛhapīṭhā |

śrīvidyā ca yaśo me

śīlaṃ cāvyācciraṃ mahārājñī || 205 ||

pavanamayi pāvakamayi

kṣoṇīmayi gaganamayi kṛpīṭamayi |

ravimayi śaśimayi diṅmayi

samayamayi prāṇamayi śive pāhi || 206 ||

kāli kapālini śūlini

bhairavi mātaṅgi pañcami tripure |

vāgdevi vindhyavāsini

bāle bhuvaneśi pālaya ciraṃ mām || 207 ||

abhinavasindūrābhā-

-mamba tvāṃ cintayanti ye hṛdaye |

upari nipatanti teṣā-

-mutpalanayanākaṭākṣakallolāḥ || 208 ||

vargāṣṭakamilitābhi-

-rvaśinīmukhyābhirāvṛtāṃ bhavatīm |

cintayatāṃ sitavarṇāṃ

vāco niryāntyayatnato vadanāt || 209 ||

kanakaśalākāgaurīṃ

karṇavyālolakuṇḍaladvitayām |

prahasitamukhīṃ ca bhavatīṃ

dhyāyanto ye ta eva bhūdhanadāḥ || 210 ||

śīrṣāmbhoruhamadhye

śītalapīyūṣavarṣiṇīṃ bhavatīm |

anudinamanucintayatā-

-māyuṣyaṃ bhavati puṣkalamavanyām || 211 ||

madhurasmitāṃ madāruṇanayanāṃ

mātaṅgakumbhavakṣojām |

candravataṃsinīṃ tvāṃ

savidhe paśyanti sukṛtinaḥ kecit || 212 ||

lalitāyāḥ stavaratnaṃ

lalitapadābhiḥ praṇītamāryābhiḥ |

pratidinamavanau paṭhatāṃ

phalāni vaktuṃ pragalbhate saiva || 213 ||

sadasadanugrahanigraha-

-gṛhītamunivigraho bhagavān |

sarvāsāmupaniṣadāṃ

durvāsā jayati deśikaḥ prathamaḥ || 214 ||

iti maharṣidurvāsaḥ viracitaṃ śrīlalitāstavaratnam |