Sakala Janani Stavah — InfoLyter.in

ॐ

સકલ જનની સ્તવઃ

Sakala Janani Stavah

Gujarati

અજાનન્તો યાન્તિ ક્ષયમવશમન્યોન્યકલહૈ-

-રમી માયાગ્રન્થૌ તવ પરિલુઠન્તઃ સમયિનઃ ।

જગન્માતર્જન્મજ્વરભયતમઃ કૌમુદિ વયં

નમસ્તે કુર્વાણાઃ શરણમુપયામો ભગવતીમ્ ॥ 1 ॥

વચસ્તર્કાગમ્યસ્વરસપરમાનન્દવિભવ-

-પ્રબોધાકારાય દ્યુતિતુલિતનીલોત્પલરુચે ।

શિવાદ્યારાધ્યાય સ્તનભરવિનમ્રાય સતતં

નમસ્તસ્મૈ કસ્મૈચન ભવતુ મુગ્ધાય મહસે ॥ 2 ॥

અનાદ્યન્તાભેદપ્રણયરસિકાપિ પ્રણયિની

શિવસ્યાસીર્યત્ત્વં પરિણયવિધૌ દેવિ ગૃહિણી ।

સવિત્રી ભૂતાનામપિ યદુદભૂઃ શૈલતનયા

તદેતત્સંસારપ્રણયનમહાનાટકમુખમ્ ॥ 3 ॥

બ્રુવન્ત્યેકે તત્ત્વં ભગવતિ સદન્યે વિદુરસ-

-ત્પરે માતઃ પ્રાહુસ્તવ સદસદન્યે સુકવયઃ ।

પરે નૈતત્સર્વં સમભિદધતે દેવિ સુધિય-

-સ્તદેતત્ત્વન્માયાવિલસિતમશેષં નનુ શિવે ॥ 4 ॥

લુઠદ્ગુઞ્જાહારસ્તનભરનમન્મધ્યલતિકા-

-મુદઞ્ચદ્ધર્મામ્ભઃ કણગુણિતવક્ત્રામ્બુજરુચમ્ ।

શિવં પાર્થત્રાણપ્રવણમૃગયાકારગુણિતં

શિવામન્વગ્યાન્તીં શરણમહમન્વેમિ શબરીમ્ ॥ 5 ॥

મિથઃ કેશાકેશિપ્રથનનિધનાસ્તર્કઘટનાઃ

બહુશ્રદ્ધાભક્તિપ્રણતિવિષયાઃ શાસ્ત્રવિધયઃ ।

પ્રસીદ પ્રત્યક્ષીભવ ગિરિસુતે દેહિ શરણં

નિરાલમ્બં ચેતઃ પરિલુઠતિ પારિપ્લવમિદમ્ ॥ 6 ॥

શુનાં વા વહ્નેર્વા ખગપરિષદો વા યદશનં

કદા કેન ક્વેતિ ક્વચિદપિ ન કશ્ચિત્કલયતિ ।

અમુષ્મિન્વિશ્વાસં વિજહિહિ મમાહ્નાય વપુષિ

પ્રપદ્યેથાશ્ચેતઃ સકલજનનીમેવ શરણમ્ ॥ 7 ॥

તટિત્કોટિજ્યોતિર્દ્યુતિદલિતષડ્ગ્રન્થિગહનં

પ્રવિષ્ટં સ્વાધારં પુનરપિ સુધાવૃષ્ટિવપુષા ।

કિમપ્યષ્ટાવિંશત્કિરણસકલીભૂતમનિશં

ભજે ધામ શ્યામં કુચભરનતં બર્બરકચમ્ ॥ 8 ॥

ચતુષ્પત્રાન્તઃ ષડ્દલપુટભગાન્તસ્ત્રિવલય-

-સ્ફુરદ્વિદ્યુદ્વહ્નિદ્યુમણિનિયુતાભદ્યુતિલતે ।

ષડશ્રં ભિત્ત્વાદૌ દશદલમથ દ્વાદશદલં

કલાશ્રં ચ દ્વ્યશ્રં ગતવતિ નમસ્તે ગિરિસુતે ॥ 9 ॥

કુલં કેચિત્પ્રાહુર્વપુરકુલમન્યે તવ બુધાઃ

પરે તત્સમ્ભેદં સમભિદધતે કૌલમપરે ।

ચતુર્ણામપ્યેષામુપરિ કિમપિ પ્રાહુરપરે

મહામાયે તત્ત્વં તવ કથમમી નિશ્ચિનુમહે ॥ 10 ॥

ષડધ્વારણ્યાનીં પ્રલયરવિકોટિપ્રતિરુચા

રુચા ભસ્મીકૃત્ય સ્વપદકમલપ્રહ્વશિરસામ્ ।

વિતન્વાનઃ શૈવં કિમપિ વપુરિન્દીવરરુચિઃ

કુચાભ્યામાનમ્રસ્તવ પુરુષકારો વિજયતે ॥ 11 ॥

પ્રકાશાનન્દાભ્યામવિદિતચરીં મધ્યપદવીં

પ્રવિશ્યૈતદ્દ્વન્દ્વં રવિશશિસમાખ્યં કબલયન્ ।

પ્રપદ્યોર્ધ્વં નાદં લયદહનભસ્મીકૃતકુલઃ

પ્રસાદાત્તે જન્તુઃ શિવમકુલમમ્બ પ્રવિશતિ ॥ 12 ॥

મનુષ્યાસ્તિર્યઞ્ચો મરુત ઇતિ લોકત્રયમિદં

ભવામ્ભોધૌ મગ્નં ત્રિગુણલહરીકોટિલુઠિતમ્ ।

કટાક્ષશ્ચેદ્યત્ર ક્વચન તવ માતઃ કરુણયા

શરીરી સદ્યોઽયં વ્રજતિ પરમાનન્દતનુતામ્ ॥ 13 ॥

પ્રિયઙ્ગુશ્યામાઙ્ગીમરુણતરવાસં કિસલયાં

સમુન્મીલન્મુક્તાફલવહલનેપથ્યસુભગામ્ ।

સ્તનદ્વન્દ્વસ્ફારસ્તબકનમિતાં કલ્પલતિકાં

સકૃદ્ધ્યાયન્તસ્ત્વાં દધતિ શિવચિન્તામણિપદમ્ ॥ 14 ॥

ષડાધારાવર્તૈરપરિમિતમન્ત્રોર્મિપટલૈઃ

લસન્મુદ્રાફેનૈર્બહુવિધલસદ્દૈવતઝષૈઃ ।

ક્રમસ્રોતોભિસ્ત્વં વહસિ પરનાદામૃતનદી

ભવાનિ પ્રત્યગ્રા શિવચિદમૃતાબ્ધિપ્રણયિની ॥ 15 ॥

મહીપાથોવહ્નિશ્વસનવિયદાત્મેન્દુરવિભિ-

-ર્વપુર્ભિગ્રસ્તાશૈરપિ તવ કિયાનમ્બ મહિમા ।

અમૂન્યાલોક્યન્તે ભગવતિ ન કુત્રાપ્યણુતમા-

-મવસ્થાં પ્રાપ્તાનિ ત્વયિ તુ પરમવ્યોમવપુષિ ॥ 16 ॥

કલામાજ્ઞાં પ્રજ્ઞાં સમયમનુભૂતિં સમરસં

ગુરું પારમ્પર્યં વિનયમુપદેશં શિવપદમ્ ।

પ્રમાણં નિર્વાણં પ્રકૃતિમભિભૂતિં પરગુહાં

વિધિં વિદ્યામાહુઃ સકલજનનીમેવ મુનયઃ ॥ 17 ॥

પ્રલીને શબ્દૌઘે તદનુ વિરતે બિન્દુવિભવે

તતસ્તત્ત્વે ચાષ્ટધ્વનિભિરનપાયિન્યધિગતે ।

શ્રિતે શાક્તે પર્વણ્યનુકલિતચિન્માત્ર ગહનાં

સ્વસંવિત્તિં યોગી રસયતિ શિવાખ્યાં ભગવતીમ્ ॥ 18 ॥

પરાનન્દાકારાં નિરવધિશિવૈશ્વર્યવપુષં

નિરાકારાં જ્ઞાનપ્રકૃતિમપરિચ્છિન્નકરુણામ્ ।

સવિત્રીં લોકાનાં નિરતિશયધામાસ્પદપદાં

ભવો વા મોક્ષો વા ભવતુ ભવતીમેવ ભજતામ્ ॥ 19 ॥

જગત્કાયે કૃત્વા તદપિ હૃદયે તચ્ચ પુરુષે

પુમાંસં બિન્દુસ્થં તદપિ વિયદાખ્યે ચ ગહને ।

તદેતદ્જ્ઞાનાખ્યે તદપિ પરમાનન્દગહને

મહાવ્યોમાકારે ત્વદનુભવશીલો વિજયતે ॥ 20 ॥

વિધે વેદ્યે વિદ્યે વિવિધસમયે વેદગુલિકે

વિચિત્રે વિશ્વાદ્યે વિનયસુલભે વેદજનનિ ।

શિવજ્ઞે શૂલસ્થે શિવપદવદાન્યે શિવનિધે

શિવે માતર્મહ્યં ત્વયિ વિતર ભક્તિં નિરુપમામ્ ॥ 21 ॥

વિધેર્મુણ્ડં હૃત્વા યદકુરુત પાત્રં કરતલે

હરિં શૂલપ્રોતં યદગમયદંસાભરણતામ્ ।

અલઞ્ચક્રે કણ્ઠં યદપિ ગરલેનામ્બ ગિરિશઃ

શિવસ્થાયાઃ શક્તેસ્તદિદમખિલં તે વિલસિતમ્ ॥ 22 ॥

વિરિઞ્ચ્યાખ્યા માતઃ સૃજસિ હરિસઞ્જ્ઞા ત્વમવસિ

ત્રિલોકીં રુદ્રાખ્યા હરસિ વિદધાસીશ્વરદશામ્ ।

ભવન્તી નાદાખ્યા વિહરસિ ચ પાશૌઘદલની

ત્વમેવૈકાઽનેકા ભવસિ કૃતિભેદૈર્ગિરિસુતે ॥ 23 ॥

મુનીનાં ચેતોભિઃ પ્રમૃદિતકષાયૈરપિ મના-

-ગશક્યં સંસ્પ્રષ્ટું ચકિતચકિતૈરમ્બ સતતમ્ ।

શ્રુતીનાં મૂર્ધાનઃ પ્રકૃતિકઠિનાઃ કોમલતરે

કથં તે વિન્દન્તે પદકિસલયે પાર્વતિ પદમ્ ॥ 24 ॥

તટિદ્વલ્લીં નિત્યામમૃતસરિતં પારરહિતાં

મલોત્તીર્ણાં જ્યોત્સ્નાં પ્રકૃતિમગુણગ્રન્થિગહનામ્ ।

ગિરાં દૂરાં વિદ્યામવિનતકુચાં વિશ્વજનની-

-મપર્યન્તાં લક્ષ્મીમભિદધતિ સન્તો ભગવતીમ્ ॥ 25 ॥

શરીરં ક્ષિત્યમ્ભઃ પ્રભૃતિરચિતં કેવલમચિત્

સુખં દુઃખં ચાયં કલયતિ પુમાંશ્ચેતન ઇતિ ।

સ્ફુટં જાનાનોઽપિ પ્રભવતિ ન દેહી રહયિતું

શરીરાહઙ્કારં તવ સમયબાહ્યો ગિરિસુતે ॥ 26 ॥

પિતા માતા ભ્રાતા સુહૃદનુચરઃ સદ્મ ગૃહિણી

વપુઃ ક્ષેત્રં મિત્રં ધનમપિ યદા માં વિજહતિ ।

તદા મે ભિન્દાના સપદિ ભયમોહાન્ધતમસં

મહાજ્યોત્સ્ને માતર્ભવ કરુણયા સન્નિધિકરી ॥ 27 ॥

સુતા દક્ષસ્યાદૌ કિલ સકલમાતસ્ત્વમુદભૂઃ

સદોષં તં હિત્વા તદનુ ગિરિરાજસ્ય દુહિતા ।

અનાદ્યન્તા શમ્ભોરપૃથગપિ શક્તિર્ભગવતી

વિવાહાજ્જાયાસીત્યહહ ચરિતં વેત્તિ તવ કઃ ॥ 28 ॥

કણાસ્ત્વદ્દીપ્તીનાં રવિશશિકૃશાનુપ્રભૃતયઃ

પરં બ્રહ્મ ક્ષુદ્રં તવ નિયતમાનન્દકણિકા ।

શિવાદિ ક્ષિત્યન્તં ત્રિવલયતનોઃ સર્વમુદરે

તવાસ્તે ભક્તસ્ય સ્ફુરસિ હૃદિ ચિત્રં ભગવતિ ॥ 29 ॥

પુરઃ પશ્ચાદન્તર્બહિરપરિમેયં પરિમિતં

પરં સ્થૂલં સૂક્ષ્મં સકલમકુલં ગુહ્યમગુહમ્ ।

દવીયો નેદીયઃ સદસદિતિ વિશ્વં ભગવતી

સદા પશ્યન્ત્યાખ્યાં વહસિ ભુવનક્ષોભજનનીમ્ ॥ 30 ॥

પ્રવિશ્ય ત્વન્માર્ગં સહજદયયા દેશિકદૃશા

ષડધ્વધ્વાન્તૌઘચ્છિદુરગણનાતીતકરુણામ્ ।

પરામાજ્ઞાકારાં સપદિ શિવયન્તીં શિવતનું

સ્વમાત્માનં ધન્યાશ્ચિરમુપલભન્તે ભગવતીમ્ ॥ 31 ॥

મયૂખાઃ પૂષ્ણીવ જ્વલન ઇવ તદ્દીપ્તિકણિકાઃ

પયોધૌ કલ્લોલાઃ પ્રતિહતમહિમ્નીવ પૃષતઃ ।

ઉદેત્યોદેત્યામ્બ ત્વયિ સહ નિજૈઃ સાત્ત્વિકગુણૈ-

-ર્ભજન્તે તત્ત્વૌઘાઃ પ્રશમમનુકલ્પં પરવશાઃ ॥ 32 ॥

વિધુર્વિષ્ણુર્બ્રહ્મા પ્રકૃતિરણુરાત્મા દિનકરઃ

સ્વભાવો જૈનેન્દ્રઃ સુગતમુનિરાકાશમલિનઃ ।

શિવઃ શક્તિશ્ચેતિ શ્રુતિવિષયતાં તામુપગતાં

વિકલ્પૈરેભિસ્ત્વામભિદધતિ સન્તો ભગવતીમ્ ॥ 33 ॥

શિવસ્ત્વં શક્તિસ્ત્વં ત્વમસિ સમયા ત્વં સમયિની

ત્વમાત્મા ત્વં દીક્ષા ત્વમયમણિમાદિર્ગુણગણઃ ।

અવિદ્યા ત્વં વિદ્યા ત્વમસિ નિખિલં ત્વં કિમપરં

પૃથક્તત્ત્વં ત્વત્તો ભગવતિ ન વીક્ષામહ ઇમે ॥ 34 ॥

ત્વયાસૌ જાનીતે રચયતિ ભવત્યૈવ સતતં

ત્વયૈવેચ્છત્યમ્બ ત્વમસિ નિખિલા યસ્ય તનવઃ ।

જગત્સામ્યં શમ્ભોર્વહસિ પરમવ્યોમવપુષઃ

તથાપ્યર્ધં ભૂત્વા વિહરસિ શિવસ્યેતિ કિમિદમ્ ॥ 35 ॥

અસઙ્ખ્યૈઃ પ્રાચીનૈર્જનનિ જનનૈઃ કર્મવિલયા-

-ત્સકૃજ્જન્મન્યન્તે ગુરુવપુષમાસાદ્ય ગિરિશમ્ ।

અવાપ્યાજ્ઞાં શૈવીં શિવતનુમપિ ત્વાં વિદિતવા-

-ન્નયેયં ત્વત્પૂજાસ્તુતિવિરચનેનૈવ દિવસાન્ ॥ 36 ॥

યત્ષટ્પત્રં કમલમુદિતં તસ્ય યા કર્ણિકાખ્યા

યોનિસ્તસ્યાઃ પ્રથિતમુદરે યત્તદોઙ્કારપીઠમ્ ।

તસ્યાપ્યન્તઃ કુચભરનતાં કુણ્ડલીતિ પ્રસિદ્ધાં

શ્યામાકારાં સકલજનનીં સન્તતં ભાવયામિ ॥ 37 ॥

ભુવિ પયસિ કૃશાનૌ મારુતે ખે શશાઙ્કે

સવિતરિ યજમાનેઽપ્યષ્ટધા શક્તિરેકા ।

વહસિ કુચભરાભ્યાં યાવનમ્રાપિ વિશ્વં

સકલજનનિ સા ત્વં પાહિ મામિત્યવાચ્યમ્ ॥ 38 ॥

ઇતિ શ્રીકાલિદાસ વિરચિત પઞ્ચસ્તવ્યાં પઞ્ચમઃ સકલજનનીસ્તવઃ ।

Roman (IAST) Transliteration

ajānanto yānti kṣayamavaśamanyonyakalahai-

-ramī māyāgranthau tava pariluṭhantaḥ samayinaḥ |

jaganmātarjanmajvarabhayatamaḥ kaumudi vayaṃ

namaste kurvāṇāḥ śaraṇamupayāmo bhagavatīm || 1 ||

vacastarkāgamyasvarasaparamānandavibhava-

-prabodhākārāya dyutitulitanīlotpalaruce |

śivādyārādhyāya stanabharavinamrāya satataṃ

namastasmai kasmaicana bhavatu mugdhāya mahase || 2 ||

anādyantābhedapraṇayarasikāpi praṇayinī

śivasyāsīryattvaṃ pariṇayavidhau devi gṛhiṇī |

savitrī bhūtānāmapi yadudabhūḥ śailatanayā

tadetatsaṃsārapraṇayanamahānāṭakamukham || 3 ||

bruvantyeke tattvaṃ bhagavati sadanye vidurasa-

-tpare mātaḥ prāhustava sadasadanye sukavayaḥ |

pare naitatsarvaṃ samabhidadhate devi sudhiya-

-stadetattvanmāyāvilasitamaśeṣaṃ nanu śive || 4 ||

luṭhadguñjāhārastanabharanamanmadhyalatikā-

-mudañcaddharmāmbhaḥ kaṇaguṇitavaktrāmbujarucam |

śivaṃ pārthatrāṇapravaṇamṛgayākāraguṇitaṃ

śivāmanvagyāntīṃ śaraṇamahamanvemi śabarīm || 5 ||

mithaḥ keśākeśiprathananidhanāstarkaghaṭanāḥ

bahuśraddhābhaktipraṇativiṣayāḥ śāstravidhayaḥ |

prasīda pratyakṣībhava girisute dehi śaraṇaṃ

nirālambaṃ cetaḥ pariluṭhati pāriplavamidam || 6 ||

śunāṃ vā vahnervā khagapariṣado vā yadaśanaṃ

kadā kena kveti kvacidapi na kaścitkalayati |

amuṣminviśvāsaṃ vijahihi mamāhnāya vapuṣi

prapadyethāścetaḥ sakalajananīmeva śaraṇam || 7 ||

taṭitkoṭijyotirdyutidalitaṣaḍgranthigahanaṃ

praviṣṭaṃ svādhāraṃ punarapi sudhāvṛṣṭivapuṣā |

kimapyaṣṭāviṃśatkiraṇasakalībhūtamaniśaṃ

bhaje dhāma śyāmaṃ kucabharanataṃ barbarakacam || 8 ||

catuṣpatrāntaḥ ṣaḍdalapuṭabhagāntastrivalaya-

-sphuradvidyudvahnidyumaṇiniyutābhadyutilate |

ṣaḍaśraṃ bhittvādau daśadalamatha dvādaśadalaṃ

kalāśraṃ ca dvyaśraṃ gatavati namaste girisute || 9 ||

kulaṃ kecitprāhurvapurakulamanye tava budhāḥ

pare tatsambhedaṃ samabhidadhate kaulamapare |

caturṇāmapyeṣāmupari kimapi prāhurapare

mahāmāye tattvaṃ tava kathamamī niścinumahe || 10 ||

ṣaḍadhvāraṇyānīṃ pralayaravikoṭipratirucā

rucā bhasmīkṛtya svapadakamalaprahvaśirasām |

vitanvānaḥ śaivaṃ kimapi vapurindīvararuciḥ

kucābhyāmānamrastava puruṣakāro vijayate || 11 ||

prakāśānandābhyāmaviditacarīṃ madhyapadavīṃ

praviśyaitaddvandvaṃ raviśaśisamākhyaṃ kabalayan |

prapadyordhvaṃ nādaṃ layadahanabhasmīkṛtakulaḥ

prasādātte jantuḥ śivamakulamamba praviśati || 12 ||

manuṣyāstiryañco maruta iti lokatrayamidaṃ

bhavāmbhodhau magnaṃ triguṇalaharīkoṭiluṭhitam |

kaṭākṣaścedyatra kvacana tava mātaḥ karuṇayā

śarīrī sadyo'yaṃ vrajati paramānandatanutām || 13 ||

priyaṅguśyāmāṅgīmaruṇataravāsaṃ kisalayāṃ

samunmīlanmuktāphalavahalanepathyasubhagām |

stanadvandvasphārastabakanamitāṃ kalpalatikāṃ

sakṛddhyāyantastvāṃ dadhati śivacintāmaṇipadam || 14 ||

ṣaḍādhārāvartairaparimitamantrormipaṭalaiḥ

lasanmudrāphenairbahuvidhalasaddaivatajhaṣaiḥ |

kramasrotobhistvaṃ vahasi paranādāmṛtanadī

bhavāni pratyagrā śivacidamṛtābdhipraṇayinī || 15 ||

mahīpāthovahniśvasanaviyadātmenduravibhi-

-rvapurbhigrastāśairapi tava kiyānamba mahimā |

amūnyālokyante bhagavati na kutrāpyaṇutamā-

-mavasthāṃ prāptāni tvayi tu paramavyomavapuṣi || 16 ||

kalāmājñāṃ prajñāṃ samayamanubhūtiṃ samarasaṃ

guruṃ pāramparyaṃ vinayamupadeśaṃ śivapadam |

pramāṇaṃ nirvāṇaṃ prakṛtimabhibhūtiṃ paraguhāṃ

vidhiṃ vidyāmāhuḥ sakalajananīmeva munayaḥ || 17 ||

pralīne śabdaughe tadanu virate binduvibhave

tatastattve cāṣṭadhvanibhiranapāyinyadhigate |

śrite śākte parvaṇyanukalitacinmātra gahanāṃ

svasaṃvittiṃ yogī rasayati śivākhyāṃ bhagavatīm || 18 ||

parānandākārāṃ niravadhiśivaiśvaryavapuṣaṃ

nirākārāṃ jñānaprakṛtimaparicchinnakaruṇām |

savitrīṃ lokānāṃ niratiśayadhāmāspadapadāṃ

bhavo vā mokṣo vā bhavatu bhavatīmeva bhajatām || 19 ||

jagatkāye kṛtvā tadapi hṛdaye tacca puruṣe

pumāṃsaṃ bindusthaṃ tadapi viyadākhye ca gahane |

tadetadjñānākhye tadapi paramānandagahane

mahāvyomākāre tvadanubhavaśīlo vijayate || 20 ||

vidhe vedye vidye vividhasamaye vedagulike

vicitre viśvādye vinayasulabhe vedajanani |

śivajñe śūlasthe śivapadavadānye śivanidhe

śive mātarmahyaṃ tvayi vitara bhaktiṃ nirupamām || 21 ||

vidhermuṇḍaṃ hṛtvā yadakuruta pātraṃ karatale

hariṃ śūlaprotaṃ yadagamayadaṃsābharaṇatām |

alañcakre kaṇṭhaṃ yadapi garalenāmba giriśaḥ

śivasthāyāḥ śaktestadidamakhilaṃ te vilasitam || 22 ||

viriñcyākhyā mātaḥ sṛjasi harisañjñā tvamavasi

trilokīṃ rudrākhyā harasi vidadhāsīśvaradaśām |

bhavantī nādākhyā viharasi ca pāśaughadalanī

tvamevaikā'nekā bhavasi kṛtibhedairgirisute || 23 ||

munīnāṃ cetobhiḥ pramṛditakaṣāyairapi manā-

-gaśakyaṃ saṃspraṣṭuṃ cakitacakitairamba satatam |

śrutīnāṃ mūrdhānaḥ prakṛtikaṭhināḥ komalatare

kathaṃ te vindante padakisalaye pārvati padam || 24 ||

taṭidvallīṃ nityāmamṛtasaritaṃ pārarahitāṃ

malottīrṇāṃ jyotsnāṃ prakṛtimaguṇagranthigahanām |

girāṃ dūrāṃ vidyāmavinatakucāṃ viśvajananī-

-maparyantāṃ lakṣmīmabhidadhati santo bhagavatīm || 25 ||

śarīraṃ kṣityambhaḥ prabhṛtiracitaṃ kevalamacit

sukhaṃ duḥkhaṃ cāyaṃ kalayati pumāṃścetana iti |

sphuṭaṃ jānāno'pi prabhavati na dehī rahayituṃ

śarīrāhaṅkāraṃ tava samayabāhyo girisute || 26 ||

pitā mātā bhrātā suhṛdanucaraḥ sadma gṛhiṇī

vapuḥ kṣetraṃ mitraṃ dhanamapi yadā māṃ vijahati |

tadā me bhindānā sapadi bhayamohāndhatamasaṃ

mahājyotsne mātarbhava karuṇayā sannidhikarī || 27 ||

sutā dakṣasyādau kila sakalamātastvamudabhūḥ

sadoṣaṃ taṃ hitvā tadanu girirājasya duhitā |

anādyantā śambhorapṛthagapi śaktirbhagavatī

vivāhājjāyāsītyahaha caritaṃ vetti tava kaḥ || 28 ||

kaṇāstvaddīptīnāṃ raviśaśikṛśānuprabhṛtayaḥ

paraṃ brahma kṣudraṃ tava niyatamānandakaṇikā |

śivādi kṣityantaṃ trivalayatanoḥ sarvamudare

tavāste bhaktasya sphurasi hṛdi citraṃ bhagavati || 29 ||

puraḥ paścādantarbahiraparimeyaṃ parimitaṃ

paraṃ sthūlaṃ sūkṣmaṃ sakalamakulaṃ guhyamaguham |

davīyo nedīyaḥ sadasaditi viśvaṃ bhagavatī

sadā paśyantyākhyāṃ vahasi bhuvanakṣobhajananīm || 30 ||

praviśya tvanmārgaṃ sahajadayayā deśikadṛśā

ṣaḍadhvadhvāntaughacchiduragaṇanātītakaruṇām |

parāmājñākārāṃ sapadi śivayantīṃ śivatanuṃ

svamātmānaṃ dhanyāściramupalabhante bhagavatīm || 31 ||

mayūkhāḥ pūṣṇīva jvalana iva taddīptikaṇikāḥ

payodhau kallolāḥ pratihatamahimnīva pṛṣataḥ |

udetyodetyāmba tvayi saha nijaiḥ sāttvikaguṇai-

-rbhajante tattvaughāḥ praśamamanukalpaṃ paravaśāḥ || 32 ||

vidhurviṣṇurbrahmā prakṛtiraṇurātmā dinakaraḥ

svabhāvo jainendraḥ sugatamunirākāśamalinaḥ |

śivaḥ śaktiśceti śrutiviṣayatāṃ tāmupagatāṃ

vikalpairebhistvāmabhidadhati santo bhagavatīm || 33 ||

śivastvaṃ śaktistvaṃ tvamasi samayā tvaṃ samayinī

tvamātmā tvaṃ dīkṣā tvamayamaṇimādirguṇagaṇaḥ |

avidyā tvaṃ vidyā tvamasi nikhilaṃ tvaṃ kimaparaṃ

pṛthaktattvaṃ tvatto bhagavati na vīkṣāmaha ime || 34 ||

tvayāsau jānīte racayati bhavatyaiva satataṃ

tvayaivecchatyamba tvamasi nikhilā yasya tanavaḥ |

jagatsāmyaṃ śambhorvahasi paramavyomavapuṣaḥ

tathāpyardhaṃ bhūtvā viharasi śivasyeti kimidam || 35 ||

asaṅkhyaiḥ prācīnairjanani jananaiḥ karmavilayā-

-tsakṛjjanmanyante guruvapuṣamāsādya giriśam |

avāpyājñāṃ śaivīṃ śivatanumapi tvāṃ viditavā-

-nnayeyaṃ tvatpūjāstutiviracanenaiva divasān || 36 ||

yatṣaṭpatraṃ kamalamuditaṃ tasya yā karṇikākhyā

yonistasyāḥ prathitamudare yattadoṅkārapīṭham |

tasyāpyantaḥ kucabharanatāṃ kuṇḍalīti prasiddhāṃ

śyāmākārāṃ sakalajananīṃ santataṃ bhāvayāmi || 37 ||

bhuvi payasi kṛśānau mārute khe śaśāṅke

savitari yajamāne'pyaṣṭadhā śaktirekā |

vahasi kucabharābhyāṃ yāvanamrāpi viśvaṃ

sakalajanani sā tvaṃ pāhi māmityavācyam || 38 ||

iti śrīkālidāsa viracita pañcastavyāṃ pañcamaḥ sakalajananīstavaḥ |