Narayaniyam Dashaka 98 - Nishkalabrahmopasanam

ॐ

નારાયણીયં દશક 98 - નિષ્કલબ્રહ્મોપાસનમ્

Vishnu Gujarati

યસ્મિન્નેતદ્વિભાતં યત ઇદમભવદ્યેન ચેદં ય એત-

દ્યોઽસ્માદુત્તીર્ણરૂપઃ ખલુ સકલમિદં ભાસિતં યસ્ય ભાસા ।

યો વાચાં દૂરદૂરે પુનરપિ મનસાં યસ્ય દેવા મુનીન્દ્રાઃ

નો વિદ્યુસ્તત્ત્વરૂપં કિમુ પુનરપરે કૃષ્ણ તસ્મૈ નમસ્તે ॥1॥

જન્માથો કર્મ નામ સ્ફુટમિહ ગુણદોષાદિકં વા ન યસ્મિન્

લોકાનામૂતયે યઃ સ્વયમનુભજતે તાનિ માયાનુસારી ।

વિભ્રચ્છક્તીરરૂપોઽપિ ચ બહુતરરૂપોઽવભાત્યદ્ભુતાત્મા

તસ્મૈ કૈવલ્યધામ્ને પરરસપરિપૂર્ણાય વિષ્ણો નમસ્તે ॥2॥

નો તિર્યઞ્ચન્ન મર્ત્યં ન ચ સુરમસુરં ન સ્ત્રિયં નો પુમ્માંસં

ન દ્રવ્યં કર્મ જાતિં ગુણમપિ સદસદ્વાપિ તે રૂપમાહુઃ ।

શિષ્ટં યત્ સ્યાન્નિષેધે સતિ નિગમશતૈર્લક્ષણાવૃત્તિતસ્તત્

કૃચ્છ્રેણાવેદ્યમાનં પરમસુખમયં ભાતિ તસ્મૈ નમસ્તે ॥3॥

માયાયાં બિમ્બિતસ્ત્વં સૃજસિ મહદહઙ્કારતન્માત્રભેદૈ-

ર્ભૂતગ્રામેન્દ્રિયાદ્યૈરપિ સકલજગત્સ્વપ્નસઙ્કલ્પકલ્પમ્ ।

ભૂયઃ સંહૃત્ય સર્વં કમઠ ઇવ પદાન્યાત્મના કાલશક્ત્યા

ગમ્ભીરે જાયમાને તમસિ વિતિમિરો ભાસિ તસ્મૈ નમસ્તે ॥4॥

શબ્દબ્રહ્મેતિ કર્મેત્યણુરિતિ ભગવન્ કાલ ઇત્યાલપન્તિ

ત્વામેકં વિશ્વહેતું સકલમયતયા સર્વથા કલ્પ્યમાનમ્ ।

વેદાન્તૈર્યત્તુ ગીતં પુરુષપરચિદાત્માભિધં તત્તુ તત્ત્વં

પ્રેક્ષામાત્રેણ મૂલપ્રકૃતિવિકૃતિકૃત્ કૃષ્ણ તસ્મૈ નમસ્તે ॥5॥

સત્ત્વેનાસત્તયા વા ન ચ ખલુ સદસત્ત્વેન નિર્વાચ્યરૂપા

ધત્તે યાસાવવિદ્યા ગુણફણિમતિવદ્વિશ્વદૃશ્યાવભાસમ્ ।

વિદ્યાત્વં સૈવ યાતા શ્રુતિવચનલવૈર્યત્કૃપાસ્યન્દલાભે

સંસારારણ્યસદ્યસ્ત્રુટનપરશુતામેતિ તસ્મૈ નમસ્તે ॥6॥

ભૂષાસુ સ્વર્ણવદ્વા જગતિ ઘટશરાવાદિકે મૃત્તિકાવ-

ત્તત્ત્વે સઞ્ચિન્ત્યમાને સ્ફુરતિ તદધુનાપ્યદ્વિતીયં વપુસ્તે ।

સ્વપ્નદ્રષ્ટુઃ પ્રબોધે તિમિરલયવિધૌ જીર્ણરજ્જોશ્ચ યદ્વ-

દ્વિદ્યાલાભે તથૈવ સ્ફુટમપિ વિકસેત્ કૃષ્ણ તસ્મૈ નમસ્તે ॥7॥

યદ્ભીત્યોદેતિ સૂર્યો દહતિ ચ દહનો વાતિ વાયુસ્તથાન્યે

યદ્ભીતાઃ પદ્મજાદ્યાઃ પુનરુચિતબલીનાહરન્તેઽનુકાલમ્ ।

યેનૈવારોપિતાઃ પ્રાઙ્નિજપદમપિ તે ચ્યાવિતારશ્ચ પશ્ચાત્

તસ્મૈ વિશ્વં નિયન્ત્રે વયમપિ ભવતે કૃષ્ણ કુર્મઃ પ્રણામમ્ ॥8॥

ત્રૈલોક્યં ભાવયન્તં ત્રિગુણમયમિદં ત્ર્યક્ષરસ્યૈકવાચ્યં

ત્રીશાનામૈક્યરૂપં ત્રિભિરપિ નિગમૈર્ગીયમાનસ્વરૂપમ્ ।

તિસ્રોવસ્થા વિદન્તં ત્રિયુગજનિજુષં ત્રિક્રમાક્રાન્તવિશ્વં

ત્રૈકાલ્યે ભેદહીનં ત્રિભિરહમનિશં યોગભેદૈર્ભજે ત્વામ્ ॥9॥

સત્યં શુદ્ધં વિબુદ્ધં જયતિ તવ વપુર્નિત્યમુક્તં નિરીહં

નિર્દ્વન્દ્વં નિર્વિકારં નિખિલગુણગણવ્યઞ્જનાધારભૂતમ્ ।

નિર્મૂલં નિર્મલં તન્નિરવધિમહિમોલ્લાસિ નિર્લીનમન્ત-

ર્નિસ્સઙ્ગાનાં મુનીનાં નિરુપમપરમાનન્દસાન્દ્રપ્રકાશમ્ ॥10॥

દુર્વારં દ્વાદશારં ત્રિશતપરિમિલત્ષષ્ટિપર્વાભિવીતં

સમ્ભ્રામ્યત્ ક્રૂરવેગં ક્ષણમનુ જગદાચ્છિદ્ય સન્ધાવમાનમ્ ।

ચક્રં તે કાલરૂપં વ્યથયતુ ન તુ માં ત્વત્પદૈકાવલમ્બં

વિષ્ણો કારુણ્યસિન્ધો પવનપુરપતે પાહિ સર્વામયૌઘાત્ ॥11॥

Roman (IAST) Transliteration

yasminnetadvibhātaṃ yata idamabhavadyena cedaṃ ya eta-

dyo'smāduttīrṇarūpaḥ khalu sakalamidaṃ bhāsitaṃ yasya bhāsā |

yo vācāṃ dūradūre punarapi manasāṃ yasya devā munīndrāḥ

no vidyustattvarūpaṃ kimu punarapare kṛṣṇa tasmai namaste ||1||

janmātho karma nāma sphuṭamiha guṇadoṣādikaṃ vā na yasmin

lokānāmūtaye yaḥ svayamanubhajate tāni māyānusārī |

vibhracchaktīrarūpo'pi ca bahutararūpo'vabhātyadbhutātmā

tasmai kaivalyadhāmne pararasaparipūrṇāya viṣṇo namaste ||2||

no tiryañcanna martyaṃ na ca suramasuraṃ na striyaṃ no pummāṃsaṃ

na dravyaṃ karma jātiṃ guṇamapi sadasadvāpi te rūpamāhuḥ |

śiṣṭaṃ yat syānniṣedhe sati nigamaśatairlakṣaṇāvṛttitastat

kṛcchreṇāvedyamānaṃ paramasukhamayaṃ bhāti tasmai namaste ||3||

māyāyāṃ bimbitastvaṃ sṛjasi mahadahaṅkāratanmātrabhedai-

rbhūtagrāmendriyādyairapi sakalajagatsvapnasaṅkalpakalpam |

bhūyaḥ saṃhṛtya sarvaṃ kamaṭha iva padānyātmanā kālaśaktyā

gambhīre jāyamāne tamasi vitimiro bhāsi tasmai namaste ||4||

śabdabrahmeti karmetyaṇuriti bhagavan kāla ityālapanti

tvāmekaṃ viśvahetuṃ sakalamayatayā sarvathā kalpyamānam |

vedāntairyattu gītaṃ puruṣaparacidātmābhidhaṃ tattu tattvaṃ

prekṣāmātreṇa mūlaprakṛtivikṛtikṛt kṛṣṇa tasmai namaste ||5||

sattvenāsattayā vā na ca khalu sadasattvena nirvācyarūpā

dhatte yāsāvavidyā guṇaphaṇimativadviśvadṛśyāvabhāsam |

vidyātvaṃ saiva yātā śrutivacanalavairyatkṛpāsyandalābhe

saṃsārāraṇyasadyastruṭanaparaśutāmeti tasmai namaste ||6||

bhūṣāsu svarṇavadvā jagati ghaṭaśarāvādike mṛttikāva-

ttattve sañcintyamāne sphurati tadadhunāpyadvitīyaṃ vapuste |

svapnadraṣṭuḥ prabodhe timiralayavidhau jīrṇarajjośca yadva-

dvidyālābhe tathaiva sphuṭamapi vikaset kṛṣṇa tasmai namaste ||7||

yadbhītyodeti sūryo dahati ca dahano vāti vāyustathānye

yadbhītāḥ padmajādyāḥ punarucitabalīnāharante'nukālam |

yenaivāropitāḥ prāṅnijapadamapi te cyāvitāraśca paścāt

tasmai viśvaṃ niyantre vayamapi bhavate kṛṣṇa kurmaḥ praṇāmam ||8||

trailokyaṃ bhāvayantaṃ triguṇamayamidaṃ tryakṣarasyaikavācyaṃ

trīśānāmaikyarūpaṃ tribhirapi nigamairgīyamānasvarūpam |

tisrovasthā vidantaṃ triyugajanijuṣaṃ trikramākrāntaviśvaṃ

traikālye bhedahīnaṃ tribhirahamaniśaṃ yogabhedairbhaje tvām ||9||

satyaṃ śuddhaṃ vibuddhaṃ jayati tava vapurnityamuktaṃ nirīhaṃ

nirdvandvaṃ nirvikāraṃ nikhilaguṇagaṇavyañjanādhārabhūtam |

nirmūlaṃ nirmalaṃ tanniravadhimahimollāsi nirlīnamanta-

rnissaṅgānāṃ munīnāṃ nirupamaparamānandasāndraprakāśam ||10||

durvāraṃ dvādaśāraṃ triśataparimilatṣaṣṭiparvābhivītaṃ

sambhrāmyat krūravegaṃ kṣaṇamanu jagadācchidya sandhāvamānam |

cakraṃ te kālarūpaṃ vyathayatu na tu māṃ tvatpadaikāvalambaṃ

viṣṇo kāruṇyasindho pavanapurapate pāhi sarvāmayaughāt ||11||