Narayaniyam Dashaka 92 - Karmamishrabhaktih

ॐ

નારાયણીયં દશક 92 - કર્મમિશ્રભક્તિઃ

Vishnu Gujarati

વેદૈસ્સર્વાણિ કર્માણ્યફલપરતયા વર્ણિતાનીતિ બુધ્વા

તાનિ ત્વય્યર્પિતાન્યેવ હિ સમનુચરન્ યાનિ નૈષ્કર્મ્યમીશ ।

મા ભૂદ્વેદૈર્નિષિદ્ધે કુહચિદપિ મનઃકર્મવાચાં પ્રવૃત્તિ-

ર્દુર્વર્જં ચેદવાપ્તં તદપિ ખલુ ભવત્યર્પયે ચિત્પ્રકાશે ॥1॥

યસ્ત્વન્યઃ કર્મયોગસ્તવ ભજનમયસ્તત્ર ચાભીષ્ટમૂર્તિં

હૃદ્યાં સત્ત્વૈકરૂપાં દૃષદિ હૃદિ મૃદિ ક્વાપિ વા ભાવયિત્વા ।

પુષ્પૈર્ગન્ધૈર્નિવેદ્યૈરપિ ચ વિરચિતૈઃ શક્તિતો ભક્તિપૂતૈ-

ર્નિત્યં વર્યાં સપર્યાં વિદધદયિ વિભો ત્વત્પ્રસાદં ભજેયમ્ ॥2॥

સ્ત્રીશૂદ્રાસ્ત્વત્કથાદિશ્રવણવિરહિતા આસતાં તે દયાર્હા-

સ્ત્વત્પાદાસન્નયાતાન્ દ્વિજકુલજનુષો હન્ત શોચામ્યશાન્તાન્ ।

વૃત્ત્યર્થં તે યજન્તો બહુકથિતમપિ ત્વામનાકર્ણયન્તો

દૃપ્તા વિદ્યાભિજાત્યૈઃ કિમુ ન વિદધતે તાદૃશં મા કૃથા મામ્ ॥3॥

પાપોઽયં કૃષ્ણરામેત્યભિલપતિ નિજં ગૂહિતું દુશ્ચરિત્રં

નિર્લજ્જસ્યાસ્ય વાચા બહુતરકથનીયાનિ મે વિઘ્નિતાનિ ।

ભ્રાતા મે વન્ધ્યશીલો ભજતિ કિલ સદા વિષ્ણુમિત્થં બુધાંસ્તે

નિન્દન્ત્યુચ્ચૈર્હસન્તિ ત્વયિ નિહિતમતીંસ્તાદૃશં મા કૃથા મામ્ ॥4॥

શ્વેતચ્છાયં કૃતે ત્વાં મુનિવરવપુષં પ્રીણયન્તે તપોભિ-

સ્ત્રેતાયાં સ્રુક્સ્રુવાદ્યઙ્કિતમરુણતનું યજ્ઞરૂપં યજન્તે ।

સેવન્તે તન્ત્રમાર્ગૈર્વિલસદરિગદં દ્વાપરે શ્યામલાઙ્ગં

નીલં સઙ્કીર્તનાદ્યૈરિહ કલિસમયે માનુષાસ્ત્વાં ભજન્તે ॥5॥

સોઽયં કાલેયકાલો જયતિ મુરરિપો યત્ર સઙ્કીર્તનાદ્યૈ-

ર્નિર્યત્નૈરેવ માર્ગૈરખિલદ ન ચિરાત્ત્વત્પ્રસાદં ભજન્તે ।

જાતાસ્ત્રેતાકૃતાદાવપિ હિ કિલ કલૌ સમ્ભવં કામયન્તે

દૈવાત્તત્રૈવ જાતાન્ વિષયવિષરસૈર્મા વિભો વઞ્ચયાસ્માન્ ॥6॥

ભક્તાસ્તાવત્કલૌ સ્યુર્દ્રમિલભુવિ તતો ભૂરિશસ્તત્ર ચોચ્ચૈ:

કાવેરીં તામ્રપર્ણીમનુ કિલ કૃતમાલાં ચ પુણ્યાં પ્રતીચીમ્ ।

હા મામપ્યેતદન્તર્ભવમપિ ચ વિભો કિઞ્ચિદઞ્ચદ્રસં ત્વ-

ય્યાશાપાશૈર્નિબધ્ય ભ્રમય ન ભગવન્ પૂરય ત્વન્નિષેવામ્ ॥7॥

દૃષ્ટ્વા ધર્મદ્રુહં તં કલિમપકરુણં પ્રાઙ્મહીક્ષિત્ પરીક્ષિત્

હન્તું વ્યાકૃષ્ટખડ્ગોઽપિ ન વિનિહતવાન્ સારવેદી ગુણાંશાત્ ।

ત્વત્સેવાદ્યાશુ સિદ્ધ્યેદસદિહ ન તથા ત્વત્પરે ચૈષ ભીરુ-

ર્યત્તુ પ્રાગેવ રોગાદિભિરપહરતે તત્ર હા શિક્ષયૈનમ્ ॥8॥

ગઙ્ગા ગીતા ચ ગાયત્ર્યપિ ચ તુલસિકા ગોપિકાચન્દનં તત્

સાલગ્રામાભિપૂજા પરપુરુષ તથૈકાદશી નામવર્ણાઃ ।

એતાન્યષ્ટાપ્યયત્નાન્યપિ કલિસમયે ત્વત્પ્રસાદપ્રવૃદ્ધ્યા

ક્ષિપ્રં મુક્તિપ્રદાનીત્યભિદધુઃ ઋષયસ્તેષુ માં સજ્જયેથાઃ ॥9॥

દેવર્ષીણાં પિતૃણામપિ ન પુનઃ ઋણી કિઙ્કરો વા સ ભૂમન્ ।

યોઽસૌ સર્વાત્મના ત્વાં શરણમુપગતસ્સર્વકૃત્યાનિ હિત્વા ।

તસ્યોત્પન્નં વિકર્માપ્યખિલમપનુદસ્યેવ ચિત્તસ્થિતસ્ત્વં

તન્મે પાપોત્થતાપાન્ પવનપુરપતે રુન્ધિ ભક્તિં પ્રણીયાઃ ॥10॥

Roman (IAST) Transliteration

vedaissarvāṇi karmāṇyaphalaparatayā varṇitānīti budhvā

tāni tvayyarpitānyeva hi samanucaran yāni naiṣkarmyamīśa |

mā bhūdvedairniṣiddhe kuhacidapi manaḥkarmavācāṃ pravṛtti-

rdurvarjaṃ cedavāptaṃ tadapi khalu bhavatyarpaye citprakāśe ||1||

yastvanyaḥ karmayogastava bhajanamayastatra cābhīṣṭamūrtiṃ

hṛdyāṃ sattvaikarūpāṃ dṛṣadi hṛdi mṛdi kvāpi vā bhāvayitvā |

puṣpairgandhairnivedyairapi ca viracitaiḥ śaktito bhaktipūtai-

rnityaṃ varyāṃ saparyāṃ vidadhadayi vibho tvatprasādaṃ bhajeyam ||2||

strīśūdrāstvatkathādiśravaṇavirahitā āsatāṃ te dayārhā-

stvatpādāsannayātān dvijakulajanuṣo hanta śocāmyaśāntān |

vṛttyarthaṃ te yajanto bahukathitamapi tvāmanākarṇayanto

dṛptā vidyābhijātyaiḥ kimu na vidadhate tādṛśaṃ mā kṛthā mām ||3||

pāpo'yaṃ kṛṣṇarāmetyabhilapati nijaṃ gūhituṃ duścaritraṃ

nirlajjasyāsya vācā bahutarakathanīyāni me vighnitāni |

bhrātā me vandhyaśīlo bhajati kila sadā viṣṇumitthaṃ budhāṃste

nindantyuccairhasanti tvayi nihitamatīṃstādṛśaṃ mā kṛthā mām ||4||

śvetacchāyaṃ kṛte tvāṃ munivaravapuṣaṃ prīṇayante tapobhi-

stretāyāṃ sruksruvādyaṅkitamaruṇatanuṃ yajñarūpaṃ yajante |

sevante tantramārgairvilasadarigadaṃ dvāpare śyāmalāṅgaṃ

nīlaṃ saṅkīrtanādyairiha kalisamaye mānuṣāstvāṃ bhajante ||5||

so'yaṃ kāleyakālo jayati muraripo yatra saṅkīrtanādyai-

rniryatnaireva mārgairakhilada na cirāttvatprasādaṃ bhajante |

jātāstretākṛtādāvapi hi kila kalau sambhavaṃ kāmayante

daivāttatraiva jātān viṣayaviṣarasairmā vibho vañcayāsmān ||6||

bhaktāstāvatkalau syurdramilabhuvi tato bhūriśastatra coccai:

kāverīṃ tāmraparṇīmanu kila kṛtamālāṃ ca puṇyāṃ pratīcīm |

hā māmapyetadantarbhavamapi ca vibho kiñcidañcadrasaṃ tva-

yyāśāpāśairnibadhya bhramaya na bhagavan pūraya tvanniṣevām ||7||

dṛṣṭvā dharmadruhaṃ taṃ kalimapakaruṇaṃ prāṅmahīkṣit parīkṣit

hantuṃ vyākṛṣṭakhaḍgo'pi na vinihatavān sāravedī guṇāṃśāt |

tvatsevādyāśu siddhyedasadiha na tathā tvatpare caiṣa bhīru-

ryattu prāgeva rogādibhirapaharate tatra hā śikṣayainam ||8||

gaṅgā gītā ca gāyatryapi ca tulasikā gopikācandanaṃ tat

sālagrāmābhipūjā parapuruṣa tathaikādaśī nāmavarṇāḥ |

etānyaṣṭāpyayatnānyapi kalisamaye tvatprasādapravṛddhyā

kṣipraṃ muktipradānītyabhidadhuḥ ṛṣayasteṣu māṃ sajjayethāḥ ||9||

devarṣīṇāṃ pitṛṇāmapi na punaḥ ṛṇī kiṅkaro vā sa bhūman |

yo'sau sarvātmanā tvāṃ śaraṇamupagatassarvakṛtyāni hitvā |

tasyotpannaṃ vikarmāpyakhilamapanudasyeva cittasthitastvaṃ

tanme pāpotthatāpān pavanapurapate rundhi bhaktiṃ praṇīyāḥ ||10||