Narayaniyam Dashaka 76 - Uddhavadautyam

ॐ

નારાયણીયં દશક 76 - ઉદ્ધવદૌત્યમ્

Vishnu Gujarati

ગત્વા સાન્દીપનિમથ ચતુષ્ષષ્ટિમાત્રૈરહોભિઃ

સર્વજ્ઞસ્ત્વં સહ મુસલિના સર્વવિદ્યા ગૃહીત્વા ।

પુત્રં નષ્ટં યમનિલયનાદાહૃતં દક્ષિણાર્થં

દત્વા તસ્મૈ નિજપુરમગા નાદયન્ પાઞ્ચજન્યમ્ ॥1॥

સ્મૃત્વા સ્મૃત્વા પશુપસુદૃશઃ પ્રેમભારપ્રણુન્નાઃ

કારુણ્યેન ત્વમપિ વિવશઃ પ્રાહિણોરુદ્ધવં તમ્ ।

કિઞ્ચામુષ્મૈ પરમસુહૃદે ભક્તવર્યાય તાસાં

ભક્ત્યુદ્રેકં સકલભુવને દુર્લભં દર્શયિષ્યન્ ॥2॥

ત્વન્માહાત્મ્યપ્રથિમપિશુનં ગોકુલં પ્રાપ્ય સાયં

ત્વદ્વાર્તાભિર્બહુ સ રમયામાસ નન્દં યશોદામ્ ।

પ્રાતર્દ્દૃષ્ટ્વા મણિમયરથં શઙ્કિતાઃ પઙ્કજાક્ષ્યઃ

શ્રુત્વા પ્રાપ્તં ભવદનુચરં ત્યક્તકાર્યાઃ સમીયુઃ ॥3॥

દૃષ્ટ્વા ચૈનં ત્વદુપમલસદ્વેષભૂષાભિરામં

સ્મૃત્વા સ્મૃત્વા તવ વિલસિતાન્યુચ્ચકૈસ્તાનિ તાનિ ।

રુદ્ધાલાપાઃ કથમપિ પુનર્ગદ્ગદાં વાચમૂચુઃ

સૌજન્યાદીન્ નિજપરભિદામપ્યલં વિસ્મરન્ત્યઃ ॥4॥

શ્રીમાન્ કિં ત્વં પિતૃજનકૃતે પ્રેષિતો નિર્દયેન

ક્વાસૌ કાન્તો નગરસુદૃશાં હા હરે નાથ પાયાઃ ।

આશ્લેષાણામમૃતવપુષો હન્ત તે ચુમ્બનાના-

મુન્માદાનાં કુહકવચસાં વિસ્મરેત્ કાન્ત કા વા ॥5॥

રાસક્રીડાલુલિતલલિતં વિશ્લથત્કેશપાશં

મન્દોદ્ભિન્નશ્રમજલકણં લોભનીયં ત્વદઙ્ગમ્ ।

કારુણ્યાબ્ધે સકૃદપિ સમાલિઙ્ગિતું દર્શયેતિ

પ્રેમોન્માદાદ્ભુવનમદન ત્વત્પ્રિયાસ્ત્વાં વિલેપુઃ ॥6॥

એવમ્પ્રાયૈર્વિવશવચનૈરાકુલા ગોપિકાસ્તા-

સ્ત્વત્સન્દેશૈઃ પ્રકૃતિમનયત્ સોઽથ વિજ્ઞાનગર્ભૈઃ ।

ભૂયસ્તાભિર્મુદિતમતિભિસ્ત્વન્મયીભિર્વધૂભિ-

સ્તત્તદ્વાર્તાસરસમનયત્ કાનિચિદ્વાસરાણિ ॥7॥

ત્વત્પ્રોદ્ગાનૈઃ સહિતમનિશં સર્વતો ગેહકૃત્યં

ત્વદ્વાર્તૈવ પ્રસરતિ મિથઃ સૈવ ચોત્સ્વાપલાપાઃ ।

ચેષ્ટાઃ પ્રાયસ્ત્વદનુકૃતયસ્ત્વન્મયં સર્વમેવં

દૃષ્ટ્વા તત્ર વ્યમુહદધિકં વિસ્મયાદુદ્ધવોઽયમ્ ॥8॥

રાધાયા મે પ્રિયતમમિદં મત્પ્રિયૈવં બ્રવીતિ

ત્વં કિં મૌનં કલયસિ સખે માનિનીમત્પ્રિયેવ।

ઇત્યાદ્યેવ પ્રવદતિ સખિ ત્વત્પ્રિયો નિર્જને મા-

મિત્થંવાદૈરરમદયં ત્વત્પ્રિયામુત્પલાક્ષીમ્ ॥9॥

એષ્યામિ દ્રાગનુપગમનં કેવલં કાર્યભારા-

દ્વિશ્લેષેઽપિ સ્મરણદૃઢતાસમ્ભવાન્માસ્તુ ખેદઃ ।

બ્રહ્માનન્દે મિલતિ નચિરાત્ સઙ્ગમો વા વિયોગ-

સ્તુલ્યો વઃ સ્યાદિતિ તવ ગિરા સોઽકરોન્નિર્વ્યથાસ્તાઃ ॥10॥

એવં ભક્તિ સકલભુવને નેક્ષિતા ન શ્રુતા વા

કિં શાસ્ત્રૌઘૈઃ કિમિહ તપસા ગોપિકાભ્યો નમોઽસ્તુ ।

ઇત્યાનન્દાકુલમુપગતં ગોકુલાદુદ્ધવં તં

દૃષ્ટ્વા હૃષ્ટો ગુરુપુરપતે પાહિ મામામયૌઘાત્ ॥11॥

Roman (IAST) Transliteration

gatvā sāndīpanimatha catuṣṣaṣṭimātrairahobhiḥ

sarvajñastvaṃ saha musalinā sarvavidyā gṛhītvā |

putraṃ naṣṭaṃ yamanilayanādāhṛtaṃ dakṣiṇārthaṃ

datvā tasmai nijapuramagā nādayan pāñcajanyam ||1||

smṛtvā smṛtvā paśupasudṛśaḥ premabhārapraṇunnāḥ

kāruṇyena tvamapi vivaśaḥ prāhiṇoruddhavaṃ tam |

kiñcāmuṣmai paramasuhṛde bhaktavaryāya tāsāṃ

bhaktyudrekaṃ sakalabhuvane durlabhaṃ darśayiṣyan ||2||

tvanmāhātmyaprathimapiśunaṃ gokulaṃ prāpya sāyaṃ

tvadvārtābhirbahu sa ramayāmāsa nandaṃ yaśodām |

prātarddṛṣṭvā maṇimayarathaṃ śaṅkitāḥ paṅkajākṣyaḥ

śrutvā prāptaṃ bhavadanucaraṃ tyaktakāryāḥ samīyuḥ ||3||

dṛṣṭvā cainaṃ tvadupamalasadveṣabhūṣābhirāmaṃ

smṛtvā smṛtvā tava vilasitānyuccakaistāni tāni |

ruddhālāpāḥ kathamapi punargadgadāṃ vācamūcuḥ

saujanyādīn nijaparabhidāmapyalaṃ vismarantyaḥ ||4||

śrīmān kiṃ tvaṃ pitṛjanakṛte preṣito nirdayena

kvāsau kānto nagarasudṛśāṃ hā hare nātha pāyāḥ |

āśleṣāṇāmamṛtavapuṣo hanta te cumbanānā-

munmādānāṃ kuhakavacasāṃ vismaret kānta kā vā ||5||

rāsakrīḍālulitalalitaṃ viślathatkeśapāśaṃ

mandodbhinnaśramajalakaṇaṃ lobhanīyaṃ tvadaṅgam |

kāruṇyābdhe sakṛdapi samāliṅgituṃ darśayeti

premonmādādbhuvanamadana tvatpriyāstvāṃ vilepuḥ ||6||

evamprāyairvivaśavacanairākulā gopikāstā-

stvatsandeśaiḥ prakṛtimanayat so'tha vijñānagarbhaiḥ |

bhūyastābhirmuditamatibhistvanmayībhirvadhūbhi-

stattadvārtāsarasamanayat kānicidvāsarāṇi ||7||

tvatprodgānaiḥ sahitamaniśaṃ sarvato gehakṛtyaṃ

tvadvārtaiva prasarati mithaḥ saiva cotsvāpalāpāḥ |

ceṣṭāḥ prāyastvadanukṛtayastvanmayaṃ sarvamevaṃ

dṛṣṭvā tatra vyamuhadadhikaṃ vismayāduddhavo'yam ||8||

rādhāyā me priyatamamidaṃ matpriyaivaṃ bravīti

tvaṃ kiṃ maunaṃ kalayasi sakhe māninīmatpriyeva|

ityādyeva pravadati sakhi tvatpriyo nirjane mā-

mitthaṃvādairaramadayaṃ tvatpriyāmutpalākṣīm ||9||

eṣyāmi drāganupagamanaṃ kevalaṃ kāryabhārā-

dviśleṣe'pi smaraṇadṛḍhatāsambhavānmāstu khedaḥ |

brahmānande milati nacirāt saṅgamo vā viyoga-

stulyo vaḥ syāditi tava girā so'karonnirvyathāstāḥ ||10||

evaṃ bhakti sakalabhuvane nekṣitā na śrutā vā

kiṃ śāstraughaiḥ kimiha tapasā gopikābhyo namo'stu |

ityānandākulamupagataṃ gokulāduddhavaṃ taṃ

dṛṣṭvā hṛṣṭo gurupurapate pāhi māmāmayaughāt ||11||