Narayaniyam Dashaka 71 - Keshi Tatha Vyomasuravadham

ॐ

નારાયણીયં દશક 71 - કેશી તથા વ્યોમાસુરવધમ્

Vishnu Gujarati

યત્નેષુ સર્વેષ્વપિ નાવકેશી કેશી સ ભોજેશિતુરિષ્ટબન્ધુઃ ।

ત્વાં સિન્ધુજાવાપ્ય ઇતીવ મત્વા સમ્પ્રાપ્તવાન્ સિન્ધુજવાજિરૂપઃ ॥1॥

ગન્ધર્વતામેષ ગતોઽપિ રૂક્ષૈર્નાદૈઃ સમુદ્વેજિતસર્વલોકઃ ।

ભવદ્વિલોકાવધિ ગોપવાટીં પ્રમર્દ્ય પાપઃ પુનરાપતત્ત્વામ્ ॥2॥

તાર્ક્ષ્યાર્પિતાઙ્ઘ્રેસ્તવ તાર્ક્ષ્ય એષ ચિક્ષેપ વક્ષોભુવિ નામ પાદમ્ ।

ભૃગોઃ પદાઘાતકથાં નિશમ્ય સ્વેનાપિ શક્યં તદિતીવ મોહાત્ ॥3॥

પ્રવઞ્ચયન્નસ્ય ખુરાઞ્ચલં દ્રાગમુઞ્ચ ચિક્ષેપિથ દૂરદૂરમ્

સમ્મૂર્ચ્છિતોઽપિ હ્યતિમૂર્ચ્છિતેન ક્રોધોષ્મણા ખાદિતુમાદ્રુતસ્ત્વામ્ ॥4॥

ત્વં વાહદણ્ડે કૃતધીશ્ચ વાહાદણ્ડં ન્યધાસ્તસ્ય મુખે તદાનીમ્ ।

તદ્ વૃદ્ધિરુદ્ધશ્વસનો ગતાસુઃ સપ્તીભવન્નપ્યયમૈક્યમાગાત્ ॥5॥

આલમ્ભમાત્રેણ પશોઃ સુરાણાં પ્રસાદકે નૂત્ન ઇવાશ્વમેધે ।

કૃતે ત્વયા હર્ષવશાત્ સુરેન્દ્રાસ્ત્વાં તુષ્ટુવુઃ કેશવનામધેયમ્ ॥6॥

કંસાય તે શૌરિસુતત્વમુક્ત્વા તં તદ્વધોત્કં પ્રતિરુધ્ય વાચા।

પ્રાપ્તેન કેશિક્ષપણાવસાને શ્રીનારદેન ત્વમભિષ્ટુતોઽભૂઃ ॥7॥

કદાપિ ગોપૈઃ સહ કાનનાન્તે નિલાયનક્રીડનલોલુપં ત્વામ્ ।

મયાત્મજઃ પ્રાપ દુરન્તમાયો વ્યોમાભિધો વ્યોમચરોપરોધી ॥8॥

સ ચોરપાલાયિતવલ્લવેષુ ચોરાયિતો ગોપશિશૂન્ પશૂંશ્ચ

ગુહાસુ કૃત્વા પિદધે શિલાભિસ્ત્વયા ચ બુદ્ધ્વા પરિમર્દિતોઽભૂત્ ॥9॥

એવં વિધૈશ્ચાદ્ભુતકેલિભેદૈરાનન્દમૂર્ચ્છામતુલાં વ્રજસ્ય ।

પદે પદે નૂતનયન્નસીમાં પરાત્મરૂપિન્ પવનેશ પાયાઃ ॥10॥

Roman (IAST) Transliteration

yatneṣu sarveṣvapi nāvakeśī keśī sa bhojeśituriṣṭabandhuḥ |

tvāṃ sindhujāvāpya itīva matvā samprāptavān sindhujavājirūpaḥ ||1||

gandharvatāmeṣa gato'pi rūkṣairnādaiḥ samudvejitasarvalokaḥ |

bhavadvilokāvadhi gopavāṭīṃ pramardya pāpaḥ punarāpatattvām ||2||

tārkṣyārpitāṅghrestava tārkṣya eṣa cikṣepa vakṣobhuvi nāma pādam |

bhṛgoḥ padāghātakathāṃ niśamya svenāpi śakyaṃ taditīva mohāt ||3||

pravañcayannasya khurāñcalaṃ drāgamuñca cikṣepitha dūradūram

sammūrcchito'pi hyatimūrcchitena krodhoṣmaṇā khāditumādrutastvām ||4||

tvaṃ vāhadaṇḍe kṛtadhīśca vāhādaṇḍaṃ nyadhāstasya mukhe tadānīm |

tad vṛddhiruddhaśvasano gatāsuḥ saptībhavannapyayamaikyamāgāt ||5||

ālambhamātreṇa paśoḥ surāṇāṃ prasādake nūtna ivāśvamedhe |

kṛte tvayā harṣavaśāt surendrāstvāṃ tuṣṭuvuḥ keśavanāmadheyam ||6||

kaṃsāya te śaurisutatvamuktvā taṃ tadvadhotkaṃ pratirudhya vācā|

prāptena keśikṣapaṇāvasāne śrīnāradena tvamabhiṣṭuto'bhūḥ ||7||

kadāpi gopaiḥ saha kānanānte nilāyanakrīḍanalolupaṃ tvām |

mayātmajaḥ prāpa durantamāyo vyomābhidho vyomacaroparodhī ||8||

sa corapālāyitavallaveṣu corāyito gopaśiśūn paśūṃśca

guhāsu kṛtvā pidadhe śilābhistvayā ca buddhvā parimardito'bhūt ||9||

evaṃ vidhaiścādbhutakelibhedairānandamūrcchāmatulāṃ vrajasya |

pade pade nūtanayannasīmāṃ parātmarūpin pavaneśa pāyāḥ ||10||