Narayaniyam Dashaka 7 - Viratsbrahmanah Janma, Tapah Tatha Vaikunthadarshanamvarupavarnanam

ॐ

નારાયણીયં દશક 7 - વિરાટ્સ્બ્રહ્મણઃ જન્મ, તપઃ તથા વૈકુણ્ઠદર્શનમ્વરૂપવર્ણનમ્

Vishnu Gujarati

એવં દેવ ચતુર્દશાત્મકજગદ્રૂપેણ જાતઃ પુન-

સ્તસ્યોર્ધ્વં ખલુ સત્યલોકનિલયે જાતોઽસિ ધાતા સ્વયમ્ ।

યં શંસન્તિ હિરણ્યગર્ભમખિલત્રૈલોક્યજીવાત્મકં

યોઽભૂત્ સ્ફીતરજોવિકારવિકસન્નાનાસિસૃક્ષારસઃ ॥1॥

સોઽયં વિશ્વવિસર્ગદત્તહૃદયઃ સમ્પશ્યમાનઃ સ્વયં

બોધં ખલ્વનવાપ્ય વિશ્વવિષયં ચિન્તાકુલસ્તસ્થિવાન્ ।

તાવત્ત્વં જગતાં પતે તપ તપેત્યેવં હિ વૈહાયસીં

વાણીમેનમશિશ્રવઃ શ્રુતિસુખાં કુર્વંસ્તપઃપ્રેરણામ્ ॥2॥

કોઽસૌ મામવદત્ પુમાનિતિ જલાપૂર્ણે જગન્મણ્ડલે

દિક્ષૂદ્વીક્ષ્ય કિમપ્યનીક્ષિતવતા વાક્યાર્થમુત્પશ્યતા ।

દિવ્યં વર્ષસહસ્રમાત્તતપસા તેન ત્વમારાધિત -

સ્તસ્મૈ દર્શિતવાનસિ સ્વનિલયં વૈકુણ્ઠમેકાદ્ભુતમ્ ॥3॥

માયા યત્ર કદાપિ નો વિકુરુતે ભાતે જગદ્ભ્યો બહિઃ

શોકક્રોધવિમોહસાધ્વસમુખા ભાવાસ્તુ દૂરં ગતાઃ ।

સાન્દ્રાનન્દઝરી ચ યત્ર પરમજ્યોતિઃપ્રકાશાત્મકે

તત્તે ધામ વિભાવિતં વિજયતે વૈકુણ્ઠરૂપં વિભો ॥4॥

યસ્મિન્નામ ચતુર્ભુજા હરિમણિશ્યામાવદાતત્વિષો

નાનાભૂષણરત્નદીપિતદિશો રાજદ્વિમાનાલયાઃ ।

ભક્તિપ્રાપ્તતથાવિધોન્નતપદા દીવ્યન્તિ દિવ્યા જના-

તત્તે ધામ નિરસ્તસર્વશમલં વૈકુણ્ઠરૂપં જયેત્ ॥5॥

નાનાદિવ્યવધૂજનૈરભિવૃતા વિદ્યુલ્લતાતુલ્યયા

વિશ્વોન્માદનહૃદ્યગાત્રલતયા વિદ્યોતિતાશાન્તરા ।

ત્વત્પાદામ્બુજસૌરભૈકકુતુકાલ્લક્ષ્મીઃ સ્વયં લક્ષ્યતે

યસ્મિન્ વિસ્મયનીયદિવ્યવિભવં તત્તે પદં દેહિ મે ॥6॥

તત્રૈવં પ્રતિદર્શિતે નિજપદે રત્નાસનાધ્યાસિતં

ભાસ્વત્કોટિલસત્કિરીટકટકાદ્યાકલ્પદીપ્રાકૃતિ ।

શ્રીવત્સાઙ્કિતમાત્તકૌસ્તુભમણિચ્છાયારુણં કારણં

વિશ્વેષાં તવ રૂપમૈક્ષત વિધિસ્તત્તે વિભો ભાતુ મે ॥7॥

કાલામ્ભોદકલાયકોમલરુચીચક્રેણ ચક્રં દિશા -

માવૃણ્વાનમુદારમન્દહસિતસ્યન્દપ્રસન્નાનનમ્ ।

રાજત્કમ્બુગદારિપઙ્કજધરશ્રીમદ્ભુજામણ્ડલં

સ્રષ્ટુસ્તુષ્ટિકરં વપુસ્તવ વિભો મદ્રોગમુદ્વાસયેત્ ॥8॥

દૃષ્ટ્વા સમ્ભૃતસમ્ભ્રમઃ કમલભૂસ્ત્વત્પાદપાથોરુહે

હર્ષાવેશવશંવદો નિપતિતઃ પ્રીત્યા કૃતાર્થીભવન્ ।

જાનાસ્યેવ મનીષિતં મમ વિભો જ્ઞાનં તદાપાદય

દ્વૈતાદ્વૈતભવત્સ્વરૂપપરમિત્યાચષ્ટ તં ત્વાં ભજે ॥9॥

આતામ્રે ચરણે વિનમ્રમથ તં હસ્તેન હસ્તે સ્પૃશન્

બોધસ્તે ભવિતા ન સર્ગવિધિભિર્બન્ધોઽપિ સઞ્જાયતે ।

ઇત્યાભાષ્ય ગિરં પ્રતોષ્ય નિતરાં તચ્ચિત્તગૂઢઃ સ્વયં

સૃષ્ટૌ તં સમુદૈરયઃ સ ભગવન્નુલ્લાસયોલ્લાઘતામ્ ॥10॥

Roman (IAST) Transliteration

evaṃ deva caturdaśātmakajagadrūpeṇa jātaḥ puna-

stasyordhvaṃ khalu satyalokanilaye jāto'si dhātā svayam |

yaṃ śaṃsanti hiraṇyagarbhamakhilatrailokyajīvātmakaṃ

yo'bhūt sphītarajovikāravikasannānāsisṛkṣārasaḥ ||1||

so'yaṃ viśvavisargadattahṛdayaḥ sampaśyamānaḥ svayaṃ

bodhaṃ khalvanavāpya viśvaviṣayaṃ cintākulastasthivān |

tāvattvaṃ jagatāṃ pate tapa tapetyevaṃ hi vaihāyasīṃ

vāṇīmenamaśiśravaḥ śrutisukhāṃ kurvaṃstapaḥpreraṇām ||2||

ko'sau māmavadat pumāniti jalāpūrṇe jaganmaṇḍale

dikṣūdvīkṣya kimapyanīkṣitavatā vākyārthamutpaśyatā |

divyaṃ varṣasahasramāttatapasā tena tvamārādhita -

stasmai darśitavānasi svanilayaṃ vaikuṇṭhamekādbhutam ||3||

māyā yatra kadāpi no vikurute bhāte jagadbhyo bahiḥ

śokakrodhavimohasādhvasamukhā bhāvāstu dūraṃ gatāḥ |

sāndrānandajharī ca yatra paramajyotiḥprakāśātmake

tatte dhāma vibhāvitaṃ vijayate vaikuṇṭharūpaṃ vibho ||4||

yasminnāma caturbhujā harimaṇiśyāmāvadātatviṣo

nānābhūṣaṇaratnadīpitadiśo rājadvimānālayāḥ |

bhaktiprāptatathāvidhonnatapadā dīvyanti divyā janā-

tatte dhāma nirastasarvaśamalaṃ vaikuṇṭharūpaṃ jayet ||5||

nānādivyavadhūjanairabhivṛtā vidyullatātulyayā

viśvonmādanahṛdyagātralatayā vidyotitāśāntarā |

tvatpādāmbujasaurabhaikakutukāllakṣmīḥ svayaṃ lakṣyate

yasmin vismayanīyadivyavibhavaṃ tatte padaṃ dehi me ||6||

tatraivaṃ pratidarśite nijapade ratnāsanādhyāsitaṃ

bhāsvatkoṭilasatkirīṭakaṭakādyākalpadīprākṛti |

śrīvatsāṅkitamāttakaustubhamaṇicchāyāruṇaṃ kāraṇaṃ

viśveṣāṃ tava rūpamaikṣata vidhistatte vibho bhātu me ||7||

kālāmbhodakalāyakomalarucīcakreṇa cakraṃ diśā -

māvṛṇvānamudāramandahasitasyandaprasannānanam |

rājatkambugadāripaṅkajadharaśrīmadbhujāmaṇḍalaṃ

sraṣṭustuṣṭikaraṃ vapustava vibho madrogamudvāsayet ||8||

dṛṣṭvā sambhṛtasambhramaḥ kamalabhūstvatpādapāthoruhe

harṣāveśavaśaṃvado nipatitaḥ prītyā kṛtārthībhavan |

jānāsyeva manīṣitaṃ mama vibho jñānaṃ tadāpādaya

dvaitādvaitabhavatsvarūpaparamityācaṣṭa taṃ tvāṃ bhaje ||9||

ātāmre caraṇe vinamramatha taṃ hastena haste spṛśan

bodhaste bhavitā na sargavidhibhirbandho'pi sañjāyate |

ityābhāṣya giraṃ pratoṣya nitarāṃ taccittagūḍhaḥ svayaṃ

sṛṣṭau taṃ samudairayaḥ sa bhagavannullāsayollāghatām ||10||