Narayaniyam Dashaka 65 - Gopikanam Bhagavatsamipyapraptih

ॐ

નારાયણીયં દશક 65 - ગોપિકાનાં ભગવત્સામીપ્યપ્રાપ્તિઃ

Vishnu Gujarati

ગોપીજનાય કથિતં નિયમાવસાને

મારોત્સવં ત્વમથ સાધયિતું પ્રવૃત્તઃ ।

સાન્દ્રેણ ચાન્દ્રમહસા શિશિરીકૃતાશે

પ્રાપૂરયો મુરલિકાં યમુનાવનાન્તે ॥1॥

સમ્મૂર્છનાભિરુદિતસ્વરમણ્ડલાભિઃ

સમ્મૂર્છયન્તમખિલં ભુવનાન્તરાલમ્ ।

ત્વદ્વેણુનાદમુપકર્ણ્ય વિભો તરુણ્ય-

સ્તત્તાદૃશં કમપિ ચિત્તવિમોહમાપુઃ ॥2॥

તા ગેહકૃત્યનિરતાસ્તનયપ્રસક્તાઃ

કાન્તોપસેવનપરાશ્ચ સરોરુહાક્ષ્યઃ ।

સર્વં વિસૃજ્ય મુરલીરવમોહિતાસ્તે

કાન્તારદેશમયિ કાન્તતનો સમેતાઃ ॥3॥

કાશ્ચિન્નિજાઙ્ગપરિભૂષણમાદધાના

વેણુપ્રણાદમુપકર્ણ્ય કૃતાર્ધભૂષાઃ ।

ત્વામાગતા નનુ તથૈવ વિભૂષિતાભ્ય-

સ્તા એવ સંરુરુચિરે તવ લોચનાય ॥4॥

હારં નિતમ્બભુવિ કાચન ધારયન્તી

કાઞ્ચીં ચ કણ્ઠભુવિ દેવ સમાગતા ત્વામ્ ।

હારિત્વમાત્મજઘનસ્ય મુકુન્દ તુભ્યં

વ્યક્તં બભાષ ઇવ મુગ્ધમુખી વિશેષાત્ ॥5॥

કાચિત્ કુચે પુનરસજ્જિતકઞ્ચુલીકા

વ્યામોહતઃ પરવધૂભિરલક્ષ્યમાણા ।

ત્વામાયયૌ નિરુપમપ્રણયાતિભાર-

રાજ્યાભિષેકવિધયે કલશીધરેવ ॥6॥

કાશ્ચિત્ ગૃહાત્ કિલ નિરેતુમપારયન્ત્ય-

સ્ત્વામેવ દેવ હૃદયે સુદૃઢં વિભાવ્ય ।

દેહં વિધૂય પરચિત્સુખરૂપમેકં

ત્વામાવિશન્ પરમિમા નનુ ધન્યધન્યાઃ ॥7॥

જારાત્મના ન પરમાત્મતયા સ્મરન્ત્યો

નાર્યો ગતાઃ પરમહંસગતિં ક્ષણેન ।

તં ત્વાં પ્રકાશપરમાત્મતનું કથઞ્ચિ-

ચ્ચિત્તે વહન્નમૃતમશ્રમમશ્નુવીય ॥8॥

અભ્યાગતાભિરભિતો વ્રજસુન્દરીભિ-

ર્મુગ્ધસ્મિતાર્દ્રવદનઃ કરુણાવલોકી ।

નિસ્સીમકાન્તિજલધિસ્ત્વમવેક્ષ્યમાણો

વિશ્વૈકહૃદ્ય હર મે પવનેશ રોગાન્ ॥9॥

Roman (IAST) Transliteration

gopījanāya kathitaṃ niyamāvasāne

mārotsavaṃ tvamatha sādhayituṃ pravṛttaḥ |

sāndreṇa cāndramahasā śiśirīkṛtāśe

prāpūrayo muralikāṃ yamunāvanānte ||1||

sammūrchanābhiruditasvaramaṇḍalābhiḥ

sammūrchayantamakhilaṃ bhuvanāntarālam |

tvadveṇunādamupakarṇya vibho taruṇya-

stattādṛśaṃ kamapi cittavimohamāpuḥ ||2||

tā gehakṛtyaniratāstanayaprasaktāḥ

kāntopasevanaparāśca saroruhākṣyaḥ |

sarvaṃ visṛjya muralīravamohitāste

kāntāradeśamayi kāntatano sametāḥ ||3||

kāścinnijāṅgaparibhūṣaṇamādadhānā

veṇupraṇādamupakarṇya kṛtārdhabhūṣāḥ |

tvāmāgatā nanu tathaiva vibhūṣitābhya-

stā eva saṃrurucire tava locanāya ||4||

hāraṃ nitambabhuvi kācana dhārayantī

kāñcīṃ ca kaṇṭhabhuvi deva samāgatā tvām |

hāritvamātmajaghanasya mukunda tubhyaṃ

vyaktaṃ babhāṣa iva mugdhamukhī viśeṣāt ||5||

kācit kuce punarasajjitakañculīkā

vyāmohataḥ paravadhūbhiralakṣyamāṇā |

tvāmāyayau nirupamapraṇayātibhāra-

rājyābhiṣekavidhaye kalaśīdhareva ||6||

kāścit gṛhāt kila niretumapārayantya-

stvāmeva deva hṛdaye sudṛḍhaṃ vibhāvya |

dehaṃ vidhūya paracitsukharūpamekaṃ

tvāmāviśan paramimā nanu dhanyadhanyāḥ ||7||

jārātmanā na paramātmatayā smarantyo

nāryo gatāḥ paramahaṃsagatiṃ kṣaṇena |

taṃ tvāṃ prakāśaparamātmatanuṃ kathañci-

ccitte vahannamṛtamaśramamaśnuvīya ||8||

abhyāgatābhirabhito vrajasundarībhi-

rmugdhasmitārdravadanaḥ karuṇāvalokī |

nissīmakāntijaladhistvamavekṣyamāṇo

viśvaikahṛdya hara me pavaneśa rogān ||9||