Narayaniyam Dashaka 100 - Bhagavatah Keshadipadavarnanam

ॐ

નારાયણીયં દશક 100 - ભગવતઃ કેશાદિપાદવર્ણનમ્

Vishnu Narayana Bhattatiri Gujarati

અગ્રે પશ્યામિ તેજો નિબિડતરકલાયાવલીલોભનીયં

પીયૂષાપ્લાવિતોઽહં તદનુ તદુદરે દિવ્યકૈશોરવેષમ્ ।

તારુણ્યારમ્ભરમ્યં પરમસુખરસાસ્વાદરોમાઞ્ચિતાઙ્ગૈ-

રાવીતં નારદાદ્યૈર્વિલસદુપનિષત્સુન્દરીમણ્ડલૈશ્ચ ॥1॥

નીલાભં કુઞ્ચિતાગ્રં ઘનમમલતરં સંયતં ચારુભઙ્ગ્યા

રત્નોત્તંસાભિરામં વલયિતમુદયચ્ચન્દ્રકૈઃ પિઞ્છજાલૈઃ ।

મન્દારસ્રઙ્નિવીતં તવ પૃથુકબરીભારમાલોકયેઽહં

સ્નિગ્ધશ્વેતોર્ધ્વપુણ્ડ્રામપિ ચ સુલલિતાં ફાલબાલેન્દુવીથીમ્ ॥2

હૃદ્યં પૂર્ણાનુકમ્પાર્ણવમૃદુલહરીચઞ્ચલભ્રૂવિલાસૈ-

રાનીલસ્નિગ્ધપક્ષ્માવલિપરિલસિતં નેત્રયુગ્મં વિભો તે ।

સાન્દ્રચ્છાયં વિશાલારુણકમલદલાકારમામુગ્ધતારં

કારુણ્યાલોકલીલાશિશિરિતભુવનં ક્ષિપ્યતાં મય્યનાથે ॥3॥

ઉત્તુઙ્ગોલ્લાસિનાસં હરિમણિમુકુરપ્રોલ્લસદ્ગણ્ડપાલી-

વ્યાલોલત્કર્ણપાશાઞ્ચિતમકરમણીકુણ્ડલદ્વન્દ્વદીપ્રમ્ ।

ઉન્મીલદ્દન્તપઙ્ક્તિસ્ફુરદરુણતરચ્છાયબિમ્બાધરાન્તઃ-

પ્રીતિપ્રસ્યન્દિમન્દસ્મિતમધુરતરં વક્ત્રમુદ્ભાસતાં મે ॥4॥

બાહુદ્વન્દ્વેન રત્નોજ્જ્વલવલયભૃતા શોણપાણિપ્રવાલે-

નોપાત્તાં વેણુનાલી પ્રસૃતનખમયૂખાઙ્ગુલીસઙ્ગશારામ્ ।

કૃત્વા વક્ત્રારવિન્દે સુમધુરવિકસદ્રાગમુદ્ભાવ્યમાનૈઃ

શબ્દબ્રહ્મામૃતૈસ્ત્વં શિશિરિતભુવનૈઃ સિઞ્ચ મે કર્ણવીથીમ્ ॥5॥

ઉત્સર્પત્કૌસ્તુભશ્રીતતિભિરરુણિતં કોમલં કણ્ઠદેશં

વક્ષઃ શ્રીવત્સરમ્યં તરલતરસમુદ્દીપ્રહારપ્રતાનમ્ ।

નાનાવર્ણપ્રસૂનાવલિકિસલયિનીં વન્યમાલાં વિલોલ-

લ્લોલમ્બાં લમ્બમાનામુરસિ તવ તથા ભાવયે રત્નમાલામ્ ॥6॥

અઙ્ગે પઞ્ચાઙ્ગરાગૈરતિશયવિકસત્સૌરભાકૃષ્ટલોકં

લીનાનેકત્રિલોકીવિતતિમપિ કૃશાં બિભ્રતં મધ્યવલ્લીમ્ ।

શક્રાશ્મન્યસ્તતપ્તોજ્જ્વલકનકનિભં પીતચેલં દધાનં

ધ્યાયામો દીપ્તરશ્મિસ્ફુટમણિરશનાકિઙ્કિણીમણ્ડિતં ત્વામ્ ॥7॥

ઊરૂ ચારૂ તવોરૂ ઘનમસૃણરુચૌ ચિત્તચોરૌ રમાયાઃ

વિશ્વક્ષોભં વિશઙ્ક્ય ધ્રુવમનિશમુભૌ પીતચેલાવૃતાઙ્ગૌ ।

આનમ્રાણાં પુરસ્તાન્ન્યસનધૃતસમસ્તાર્થપાલીસમુદ્ગ-

ચ્છાયં જાનુદ્વયં ચ ક્રમપૃથુલમનોજ્ઞે ચ જઙ્ઘે નિષેવે ॥8॥

મઞ્જીરં મઞ્જુનાદૈરિવ પદભજનં શ્રેય ઇત્યાલપન્તં

પાદાગ્રં ભ્રાન્તિમજ્જત્પ્રણતજનમનોમન્દરોદ્ધારકૂર્મમ્ ।

ઉત્તુઙ્ગાતામ્રરાજન્નખરહિમકરજ્યોત્સ્નયા ચાઽશ્રિતાનાં

સન્તાપધ્વાન્તહન્ત્રીં તતિમનુકલયે મઙ્ગલામઙ્ગુલીનામ્ ॥9॥

યોગીન્દ્રાણાં ત્વદઙ્ગેષ્વધિકસુમધુરં મુક્તિભાજાં નિવાસો

ભક્તાનાં કામવર્ષદ્યુતરુકિસલયં નાથ તે પાદમૂલમ્ ।

નિત્યં ચિત્તસ્થિતં મે પવનપુરપતે કૃષ્ણ કારુણ્યસિન્ધો

હૃત્વા નિશ્શેષતાપાન્ પ્રદિશતુ પરમાનન્દસન્દોહલક્ષ્મીમ્ ॥10॥

અજ્ઞાત્વા તે મહત્વં યદિહ નિગદિતં વિશ્વનાથ ક્ષમેથાઃ

સ્તોત્રં ચૈતત્સહસ્રોત્તરમધિકતરં ત્વત્પ્રસાદાય ભૂયાત્ ।

દ્વેધા નારાયણીયં શ્રુતિષુ ચ જનુષા સ્તુત્યતાવર્ણનેન

સ્ફીતં લીલાવતારૈરિદમિહ કુરુતામાયુરારોગ્યસૌખ્યમ્ ॥11॥

Roman (IAST) Transliteration

agre paśyāmi tejo nibiḍatarakalāyāvalīlobhanīyaṃ

pīyūṣāplāvito'haṃ tadanu tadudare divyakaiśoraveṣam |

tāruṇyārambharamyaṃ paramasukharasāsvādaromāñcitāṅgai-

rāvītaṃ nāradādyairvilasadupaniṣatsundarīmaṇḍalaiśca ||1||

nīlābhaṃ kuñcitāgraṃ ghanamamalataraṃ saṃyataṃ cārubhaṅgyā

ratnottaṃsābhirāmaṃ valayitamudayaccandrakaiḥ piñchajālaiḥ |

mandārasraṅnivītaṃ tava pṛthukabarībhāramālokaye'haṃ

snigdhaśvetordhvapuṇḍrāmapi ca sulalitāṃ phālabālenduvīthīm ||2

hṛdyaṃ pūrṇānukampārṇavamṛdulaharīcañcalabhrūvilāsai-

rānīlasnigdhapakṣmāvaliparilasitaṃ netrayugmaṃ vibho te |

sāndracchāyaṃ viśālāruṇakamaladalākāramāmugdhatāraṃ

kāruṇyālokalīlāśiśiritabhuvanaṃ kṣipyatāṃ mayyanāthe ||3||

uttuṅgollāsināsaṃ harimaṇimukuraprollasadgaṇḍapālī-

vyālolatkarṇapāśāñcitamakaramaṇīkuṇḍaladvandvadīpram |

unmīladdantapaṅktisphuradaruṇataracchāyabimbādharāntaḥ-

prītiprasyandimandasmitamadhurataraṃ vaktramudbhāsatāṃ me ||4||

bāhudvandvena ratnojjvalavalayabhṛtā śoṇapāṇipravāle-

nopāttāṃ veṇunālī prasṛtanakhamayūkhāṅgulīsaṅgaśārām |

kṛtvā vaktrāravinde sumadhuravikasadrāgamudbhāvyamānaiḥ

śabdabrahmāmṛtaistvaṃ śiśiritabhuvanaiḥ siñca me karṇavīthīm ||5||

utsarpatkaustubhaśrītatibhiraruṇitaṃ komalaṃ kaṇṭhadeśaṃ

vakṣaḥ śrīvatsaramyaṃ taralatarasamuddīprahārapratānam |

nānāvarṇaprasūnāvalikisalayinīṃ vanyamālāṃ vilola-

llolambāṃ lambamānāmurasi tava tathā bhāvaye ratnamālām ||6||

aṅge pañcāṅgarāgairatiśayavikasatsaurabhākṛṣṭalokaṃ

līnānekatrilokīvitatimapi kṛśāṃ bibhrataṃ madhyavallīm |

śakrāśmanyastataptojjvalakanakanibhaṃ pītacelaṃ dadhānaṃ

dhyāyāmo dīptaraśmisphuṭamaṇiraśanākiṅkiṇīmaṇḍitaṃ tvām ||7||

ūrū cārū tavorū ghanamasṛṇarucau cittacorau ramāyāḥ

viśvakṣobhaṃ viśaṅkya dhruvamaniśamubhau pītacelāvṛtāṅgau |

ānamrāṇāṃ purastānnyasanadhṛtasamastārthapālīsamudga-

cchāyaṃ jānudvayaṃ ca kramapṛthulamanojñe ca jaṅghe niṣeve ||8||

mañjīraṃ mañjunādairiva padabhajanaṃ śreya ityālapantaṃ

pādāgraṃ bhrāntimajjatpraṇatajanamanomandaroddhārakūrmam |

uttuṅgātāmrarājannakharahimakarajyotsnayā cā'śritānāṃ

santāpadhvāntahantrīṃ tatimanukalaye maṅgalāmaṅgulīnām ||9||

yogīndrāṇāṃ tvadaṅgeṣvadhikasumadhuraṃ muktibhājāṃ nivāso

bhaktānāṃ kāmavarṣadyutarukisalayaṃ nātha te pādamūlam |

nityaṃ cittasthitaṃ me pavanapurapate kṛṣṇa kāruṇyasindho

hṛtvā niśśeṣatāpān pradiśatu paramānandasandohalakṣmīm ||10||

ajñātvā te mahatvaṃ yadiha nigaditaṃ viśvanātha kṣamethāḥ

stotraṃ caitatsahasrottaramadhikataraṃ tvatprasādāya bhūyāt |

dvedhā nārāyaṇīyaṃ śrutiṣu ca januṣā stutyatāvarṇanena

sphītaṃ līlāvatārairidamiha kurutāmāyurārogyasaukhyam ||11||