Devi Bhujanga Stotram — InfoLyter.in

ॐ

દેવી ભુજઙ્ગ સ્તોત્રં

Devi Bhujanga Stotram

Devi Stotram Gujarati

વિરિઞ્ચ્યાદિભિઃ પઞ્ચભિર્લોકપાલૈઃ

સમૂઢે મહાનન્દપીઠે નિષણ્ણમ્ ।

ધનુર્બાણપાશાઙ્કુશપ્રોતહસ્તં

મહસ્ત્રૈપુરં શઙ્કરાદ્વૈતમવ્યાત્ ॥ 1 ॥

યદન્નાદિભિઃ પઞ્ચભિઃ કોશજાલૈઃ

શિરઃપક્ષપુચ્છાત્મકૈરન્તરન્તઃ ।

નિગૂઢે મહાયોગપીઠે નિષણ્ણં

પુરારેરથાન્તઃપુરં નૌમિ નિત્યમ્ ॥ 2 ॥

વિરિઞ્ચાદિરૂપૈઃ પ્રપઞ્ચે વિહૃત્ય

સ્વતન્ત્રા યદા સ્વાત્મવિશ્રાન્તિરેષા ।

તદા માનમાતૃપ્રમેયાતિરિક્તં

પરાનન્દમીડે ભવાનિ ત્વદીયમ્ ॥ 3 ॥

વિનોદાય ચૈતન્યમેકં વિભજ્ય

દ્વિધા દેવિ જીવઃ શિવશ્ચેતિ નામ્ના ।

શિવસ્યાપિ જીવત્વમાપાદયન્તી

પુનર્જીવમેનં શિવં વા કરોષિ ॥ 4 ॥

સમાકુઞ્ચ્ય મૂલં હૃદિ ન્યસ્ય વાયું

મનો ભ્રૂબિલં પ્રાપયિત્વા નિવૃત્તાઃ ।

તતઃ સચ્ચિદાનન્દરૂપે પદે તે

ભવન્ત્યમ્બ જીવાઃ શિવત્વેન કેચિત્ ॥ 5 ॥

શરીરેઽતિકષ્ટે રિપૌ પુત્રવર્ગે

સદાભીતિમૂલે કલત્રે ધને વા ।

ન કશ્ચિદ્વિરજ્યત્યહો દેવિ ચિત્રં

કથં ત્વત્કટાક્ષં વિના તત્ત્વબોધઃ ॥ 6 ॥

શરીરે ધનેઽપત્યવર્ગે કલત્રે

વિરક્તસ્ય સદ્દેશિકાદિષ્ટબુદ્ધેઃ ।

યદાકસ્મિકં જ્યોતિરાનન્દરૂપં

સમાધૌ ભવેત્તત્ત્વમસ્યમ્બ સત્યમ્ ॥ 7 ॥

મૃષાન્યો મૃષાન્યઃ પરો મિશ્રમેનં

પરઃ પ્રાકૃતં ચાપરો બુદ્ધિમાત્રમ્ ।

પ્રપઞ્ચં મિમીતે મુનીનાં ગણોઽયં

તદેતત્ત્વમેવેતિ ન ત્વાં જહીમઃ ॥ 8 ॥

નિવૃત્તિઃ પ્રતિષ્ઠા ચ વિદ્યા ચ શાન્તિ-

સ્તથા શાન્ત્યતીતેતિ પઞ્ચીકૃતાભિઃ ।

કલાભિઃ પરે પઞ્ચવિંશાત્મિકાભિ-

સ્ત્વમેકૈવ સેવ્યા શિવાભિન્નરૂપા ॥ 9 ॥

અગાધેઽત્ર સંસારપઙ્કે નિમગ્નં

કલત્રાદિભારેણ ખિન્નં નિતાન્તમ્ ।

મહામોહપાશૌઘબદ્ધં ચિરાન્માં

સમુદ્ધર્તુમમ્બ ત્વમેકૈવ શક્તા ॥ 10 ॥

સમારભ્ય મૂલં ગતો બ્રહ્મચક્રં

ભવદ્દિવ્યચક્રેશ્વરીધામભાજઃ ।

મહાસિદ્ધિસઙ્ઘાતકલ્પદ્રુમાભા-

નવાપ્યામ્બ નાદાનુપાસ્તે ચ યોગી ॥ 11 ॥

ગણેશૈર્ગ્રહૈરમ્બ નક્ષત્રપઙ્ક્ત્યા

તથા યોગિનીરાશિપીઠૈરભિન્નમ્ ।

મહાકાલમાત્માનમામૃશ્ય લોકં

વિધત્સે કૃતિં વા સ્થિતિં વા મહેશિ ॥ 12 ॥

લસત્તારહારામતિસ્વચ્છચેલાં

વહન્તીં કરે પુસ્તકં ચાક્ષમાલામ્ ।

શરચ્ચન્દ્રકોટિપ્રભાભાસુરાં ત્વાં

સકૃદ્ભાવયન્ભારતીવલ્લભઃ સ્યાત્ ॥ 13 ॥

સમુદ્યત્સહસ્રાર્કબિમ્બાભવક્ત્રાં

સ્વભાસૈવ સિન્દૂરિતાજાણ્ડકોટિમ્ ।

ધનુર્બાણપાશાઙ્કુશાન્ધારયન્તીં

સ્મરન્તઃ સ્મરં વાપિ સમ્મોહયેયુઃ ॥ 14 ॥

મણિસ્યૂતતાટઙ્કશોણાસ્યબિમ્બાં

હરિત્પટ્ટવસ્ત્રાં ત્વગુલ્લાસિભૂષામ્ ।

હૃદા ભાવયંસ્તપ્તહેમપ્રભાં ત્વાં

શ્રિયો નાશયત્યમ્બ ચાઞ્ચલ્યભાવમ્ ॥ 15 ॥

મહામન્ત્રરાજાન્તબીજં પરાખ્યં

સ્વતો ન્યસ્તબિન્દુ સ્વયં ન્યસ્તહાર્દમ્ ।

ભવદ્વક્ત્રવક્ષોજગુહ્યાભિધાનં

સ્વરૂપં સકૃદ્ભાવયેત્સ ત્વમેવ ॥ 16 ॥

તથાન્યે વિકલ્પેષુ નિર્વિણ્ણચિત્તા-

સ્તદેકં સમાધાય બિન્દુત્રયં તે ।

પરાનન્દસન્ધાનસિન્ધૌ નિમગ્નાઃ

પુનર્ગર્ભરન્ધ્રં ન પશ્યન્તિ ધીરાઃ ॥ 17 ॥

ત્વદુન્મેષલીલાનુબન્ધાધિકારા-

ન્વિરિઞ્ચ્યાદિકાંસ્ત્વદ્ગુણામ્ભોધિબિન્દૂન્ ।

ભજન્તસ્તિતીર્ષન્તિ સંસારસિન્ધું

શિવે તાવકીના સુસમ્ભાવનેયમ્ ॥ 18 ॥

કદા વા ભવત્પાદપોતેન તૂર્ણં

ભવામ્ભોધિમુત્તીર્ય પૂર્ણાન્તરઙ્ગઃ ।

નિમજ્જન્તમેનં દુરાશાવિષાબ્ધૌ

સમાલોક્ય લોકં કથં પર્યુદાસ્સે ॥ 19 ॥

કદાવા હૃષીકાણિ સામ્યં ભજેયુઃ

કદા વા ન શત્રુર્ન મિત્રં ભવાનિ ।

કદા વા દુરાશાવિષૂચીવિલોપઃ

કદા વા મનો મે સમૂલં વિનશ્યેત્ ॥ 20 ॥

નમોવાકમાશાસ્મહે દેવિ યુષ્મ-

ત્પદામ્ભોજયુગ્માય તિગ્માય ગૌરિ ।

વિરિઞ્ચ્યાદિભાસ્વત્કિરીટપ્રતોલી-

પ્રદીપાયમાનપ્રભાભાસ્વરાય ॥ 21 ॥

કચે ચન્દ્રરેખં કુચે તારહારં

કરે સ્વાદુચાપં શરે ષટ્પદૌઘમ્ ।

સ્મરામિ સ્મરારેરભિપ્રાયમેકં

મદાઘૂર્ણનેત્રં મદીયં નિધાનમ્ ॥ 22 ॥

શરેષ્વેવ નાસા ધનુષ્વેવ જિહ્વા

જપાપાટલે લોચને તે સ્વરૂપે ।

ત્વગેષા ભવચ્ચન્દ્રખણ્ડે શ્રવો મે

ગુણે તે મનોવૃત્તિરમ્બ ત્વયિ સ્યાત્ ॥ 23 ॥

જગત્કર્મધીરાન્વચોધૂતકીરાન્

કુચન્યસ્તહારાઙ્કૃપાસિન્ધુપૂરાન્ ।

ભવામ્ભોધિપારાન્મહાપાપદૂરાન્

ભજે વેદસારાંશિવપ્રેમદારાન્ ॥ 24 ॥

સુધાસિન્ધુસારે ચિદાનન્દનીરે

સમુત્ફુલ્લનીપે સુરત્રાન્તરીપે ।

મણિવ્યૂહસાલે સ્થિતે હૈમશાલે

મનોજારિવામે નિષણ્ણં મનો મે ॥ 25 ॥

દૃગન્તે વિલોલા સુગન્ધીષુમાલા

પ્રપઞ્ચેન્દ્રજાલા વિપત્સિન્ધુકૂલા ।

મુનિસ્વાન્તશાલા નમલ્લોકપાલા

હૃદિ પ્રેમલોલામૃતસ્વાદુલીલા ॥ 26 ॥

જગજ્જાલમેતત્ત્વયૈવામ્બ સૃષ્ટં

ત્વમેવાદ્ય યાસીન્દ્રિયૈરર્થજાલમ્ ।

ત્વમેકૈવ કર્ત્રી ત્વમેકૈવ ભોક્ત્રી

ન મે પુણ્યપાપે ન મે બન્ધમોક્ષૌ ॥ 27 ॥

ઇતિ પ્રેમભારેણ કિઞ્ચિન્મયોક્તં

ન બુધ્વૈવ તત્ત્વં મદીયં ત્વદીયમ્ ।

વિનોદાય બાલસ્ય મૌર્ખ્યં હિ માતસ્-

તદેતત્પ્રલાપસ્તુતિં મે ગૃહાણ ॥ 28 ॥

॥ ઇતિ શ્રીમચ્છઙ્કરાચાર્યવિરચિતા દેવીભુજઙ્ગં સમ્પૂર્ણમ્ ॥

Roman (IAST) Transliteration

viriñcyādibhiḥ pañcabhirlokapālaiḥ

samūḍhe mahānandapīṭhe niṣaṇṇam |

dhanurbāṇapāśāṅkuśaprotahastaṃ

mahastraipuraṃ śaṅkarādvaitamavyāt || 1 ||

yadannādibhiḥ pañcabhiḥ kośajālaiḥ

śiraḥpakṣapucchātmakairantarantaḥ |

nigūḍhe mahāyogapīṭhe niṣaṇṇaṃ

purārerathāntaḥpuraṃ naumi nityam || 2 ||

viriñcādirūpaiḥ prapañce vihṛtya

svatantrā yadā svātmaviśrāntireṣā |

tadā mānamātṛprameyātiriktaṃ

parānandamīḍe bhavāni tvadīyam || 3 ||

vinodāya caitanyamekaṃ vibhajya

dvidhā devi jīvaḥ śivaśceti nāmnā |

śivasyāpi jīvatvamāpādayantī

punarjīvamenaṃ śivaṃ vā karoṣi || 4 ||

samākuñcya mūlaṃ hṛdi nyasya vāyuṃ

mano bhrūbilaṃ prāpayitvā nivṛttāḥ |

tataḥ saccidānandarūpe pade te

bhavantyamba jīvāḥ śivatvena kecit || 5 ||

śarīre'tikaṣṭe ripau putravarge

sadābhītimūle kalatre dhane vā |

na kaścidvirajyatyaho devi citraṃ

kathaṃ tvatkaṭākṣaṃ vinā tattvabodhaḥ || 6 ||

śarīre dhane'patyavarge kalatre

viraktasya saddeśikādiṣṭabuddheḥ |

yadākasmikaṃ jyotirānandarūpaṃ

samādhau bhavettattvamasyamba satyam || 7 ||

mṛṣānyo mṛṣānyaḥ paro miśramenaṃ

paraḥ prākṛtaṃ cāparo buddhimātram |

prapañcaṃ mimīte munīnāṃ gaṇo'yaṃ

tadetattvameveti na tvāṃ jahīmaḥ || 8 ||

nivṛttiḥ pratiṣṭhā ca vidyā ca śānti-

stathā śāntyatīteti pañcīkṛtābhiḥ |

kalābhiḥ pare pañcaviṃśātmikābhi-

stvamekaiva sevyā śivābhinnarūpā || 9 ||

agādhe'tra saṃsārapaṅke nimagnaṃ

kalatrādibhāreṇa khinnaṃ nitāntam |

mahāmohapāśaughabaddhaṃ cirānmāṃ

samuddhartumamba tvamekaiva śaktā || 10 ||

samārabhya mūlaṃ gato brahmacakraṃ

bhavaddivyacakreśvarīdhāmabhājaḥ |

mahāsiddhisaṅghātakalpadrumābhā-

navāpyāmba nādānupāste ca yogī || 11 ||

gaṇeśairgrahairamba nakṣatrapaṅktyā

tathā yoginīrāśipīṭhairabhinnam |

mahākālamātmānamāmṛśya lokaṃ

vidhatse kṛtiṃ vā sthitiṃ vā maheśi || 12 ||

lasattārahārāmatisvacchacelāṃ

vahantīṃ kare pustakaṃ cākṣamālām |

śaraccandrakoṭiprabhābhāsurāṃ tvāṃ

sakṛdbhāvayanbhāratīvallabhaḥ syāt || 13 ||

samudyatsahasrārkabimbābhavaktrāṃ

svabhāsaiva sindūritājāṇḍakoṭim |

dhanurbāṇapāśāṅkuśāndhārayantīṃ

smarantaḥ smaraṃ vāpi sammohayeyuḥ || 14 ||

maṇisyūtatāṭaṅkaśoṇāsyabimbāṃ

haritpaṭṭavastrāṃ tvagullāsibhūṣām |

hṛdā bhāvayaṃstaptahemaprabhāṃ tvāṃ

śriyo nāśayatyamba cāñcalyabhāvam || 15 ||

mahāmantrarājāntabījaṃ parākhyaṃ

svato nyastabindu svayaṃ nyastahārdam |

bhavadvaktravakṣojaguhyābhidhānaṃ

svarūpaṃ sakṛdbhāvayetsa tvameva || 16 ||

tathānye vikalpeṣu nirviṇṇacittā-

stadekaṃ samādhāya bindutrayaṃ te |

parānandasandhānasindhau nimagnāḥ

punargarbharandhraṃ na paśyanti dhīrāḥ || 17 ||

tvadunmeṣalīlānubandhādhikārā-

nviriñcyādikāṃstvadguṇāmbhodhibindūn |

bhajantastitīrṣanti saṃsārasindhuṃ

śive tāvakīnā susambhāvaneyam || 18 ||

kadā vā bhavatpādapotena tūrṇaṃ

bhavāmbhodhimuttīrya pūrṇāntaraṅgaḥ |

nimajjantamenaṃ durāśāviṣābdhau

samālokya lokaṃ kathaṃ paryudāsse || 19 ||

kadāvā hṛṣīkāṇi sāmyaṃ bhajeyuḥ

kadā vā na śatrurna mitraṃ bhavāni |

kadā vā durāśāviṣūcīvilopaḥ

kadā vā mano me samūlaṃ vinaśyet || 20 ||

namovākamāśāsmahe devi yuṣma-

tpadāmbhojayugmāya tigmāya gauri |

viriñcyādibhāsvatkirīṭapratolī-

pradīpāyamānaprabhābhāsvarāya || 21 ||

kace candrarekhaṃ kuce tārahāraṃ

kare svāducāpaṃ śare ṣaṭpadaugham |

smarāmi smarārerabhiprāyamekaṃ

madāghūrṇanetraṃ madīyaṃ nidhānam || 22 ||

śareṣveva nāsā dhanuṣveva jihvā

japāpāṭale locane te svarūpe |

tvageṣā bhavaccandrakhaṇḍe śravo me

guṇe te manovṛttiramba tvayi syāt || 23 ||

jagatkarmadhīrānvacodhūtakīrān

kucanyastahārāṅkṛpāsindhupūrān |

bhavāmbhodhipārānmahāpāpadūrān

bhaje vedasārāṃśivapremadārān || 24 ||

sudhāsindhusāre cidānandanīre

samutphullanīpe suratrāntarīpe |

maṇivyūhasāle sthite haimaśāle

manojārivāme niṣaṇṇaṃ mano me || 25 ||

dṛgante vilolā sugandhīṣumālā

prapañcendrajālā vipatsindhukūlā |

munisvāntaśālā namallokapālā

hṛdi premalolāmṛtasvādulīlā || 26 ||

jagajjālametattvayaivāmba sṛṣṭaṃ

tvamevādya yāsīndriyairarthajālam |

tvamekaiva kartrī tvamekaiva bhoktrī

na me puṇyapāpe na me bandhamokṣau || 27 ||

iti premabhāreṇa kiñcinmayoktaṃ

na budhvaiva tattvaṃ madīyaṃ tvadīyam |

vinodāya bālasya maurkhyaṃ hi mātas-

tadetatpralāpastutiṃ me gṛhāṇa || 28 ||

|| iti śrīmacchaṅkarācāryaviracitā devībhujaṅgaṃ sampūrṇam ||