Shrimadbhagavadgita Parayana - Dvadasho'dhyayah

ॐ

શ્રીમદ્ભગવદ્ગીતા પારાયણ - દ્વાદશોઽધ્યાયઃ

Gita Vyasa Gujarati

ૐ શ્રી પરમાત્મને નમઃ

અથ દ્વાદશોઽધ્યાયઃ

ભક્તિયોગઃ

અર્જુન ઉવાચ

એવં સતતયુક્તા યે ભક્તાસ્ત્વાં પર્યુપાસતે ।

યે ચાપ્યક્ષરમવ્યક્તં તેષાં કે યોગવિત્તમાઃ ॥1॥

શ્રી ભગવાનુવાચ

મય્યાવેશ્ય મનો યે માં નિત્યયુક્તા ઉપાસતે ।

શ્રદ્ધયા પરયોપેતાઃ તે મે યુક્તતમા મતાઃ ॥2॥

યે ત્વક્ષરમનિર્દેશ્યમ્ અવ્યક્તં પર્યુપાસતે ।

સર્વત્રગમચિન્ત્યં ચ કૂટસ્થમચલં ધ્રુવમ્ ॥3॥

સન્નિયમ્યેન્દ્રિયગ્રામં સર્વત્ર સમબુદ્ધયઃ ।

તે પ્રાપ્નુવન્તિ મામેવ સર્વભૂતહિતે રતાઃ ॥4॥

ક્લેશોઽધિકતરસ્તેષામ્ અવ્યક્તાસક્તચેતસામ્ ।

અવ્યક્તા હિ ગતિર્દુઃખં દેહવદ્ભિરવાપ્યતે ॥5॥

યે તુ સર્વાણિ કર્માણિ મયિ સન્ન્યસ્ય મત્પરાઃ ।

અનન્યેનૈવ યોગેન માં ધ્યાયન્ત ઉપાસતે ॥6॥

તેષામહં સમુદ્ધર્તા મૃત્યુસંસારસાગરાત્ ।

ભવામિ નચિરાત્પાર્થ મય્યાવેશિતચેતસામ્ ॥7॥

મય્યેવ મન આધત્સ્વ મયિ બુદ્ધિં નિવેશય ।

નિવસિષ્યસિ મય્યેવ અત ઊર્ધ્વં ન સંશયઃ ॥8॥

અથ ચિત્તં સમાધાતું ન શક્નોષિ મયિ સ્થિરમ્ ।

અભ્યાસયોગેન તતઃ મામિચ્છાપ્તું ધનઞ્જય ॥9॥

અભ્યાસેઽપ્યસમર્થોઽસિ મત્કર્મપરમો ભવ ।

મદર્થમપિ કર્માણિ કુર્વન્સિદ્ધિમવાપ્સ્યસિ ॥10॥

અથૈતદપ્યશક્તોઽસિ કર્તું મદ્યોગમાશ્રિતઃ ।

સર્વકર્મફલત્યાગં તતઃ કુરુ યતાત્મવાન્ ॥11॥

શ્રેયો હિ જ્ઞાનમભ્યાસાત્ જ્ઞાનાદ્ધ્યાનં વિશિષ્યતે ।

ધ્યાનાત્કર્મફલત્યાગઃ ત્યાગાચ્છાન્તિરનન્તરમ્ ॥12॥

અદ્વેષ્ટા સર્વભૂતાનાં મૈત્રઃ કરુણ એવ ચ ।

નિર્મમો નિરહઙ્કારઃ સમદુઃખસુખઃ ક્ષમી ॥13॥

સન્તુષ્ટઃ સતતં યોગી યતાત્મા દૃઢનિશ્ચયઃ ।

મય્યર્પિતમનોબુદ્ધિઃ યો મદ્ભક્તઃ સ મે પ્રિયઃ ॥14॥

યસ્માન્નોદ્વિજતે લોકઃ લોકાન્નોદ્વિજતે ચ યઃ ।

હર્ષામર્ષભયોદ્વેગૈઃ મુક્તો યઃ સ ચ મે પ્રિયઃ ॥15॥

અનપેક્ષઃ શુચિર્દક્ષઃ ઉદાસીનો ગતવ્યથઃ ।

સર્વારમ્ભપરિત્યાગી યો મદ્ભક્તઃ સ મે પ્રિયઃ ॥16॥

યો ન હૃષ્યતિ ન દ્વેષ્ટિ ન શોચતિ ન કાઙ્ક્ષતિ ।

શુભાશુભપરિત્યાગી ભક્તિમાન્યઃ સ મે પ્રિયઃ ॥17॥

સમઃ શત્રૌ ચ મિત્રે ચ તથા માનાપમાનયોઃ ।

શીતોષ્ણસુખદુઃખેષુ સમઃ સઙ્ગવિવર્જિતઃ ॥18॥

તુલ્યનિન્દાસ્તુતિર્મૌની સન્તુષ્ટો યેન કેનચિત્ ।

અનિકેતઃ સ્થિરમતિઃ ભક્તિમાન્મે પ્રિયો નરઃ ॥19॥

યે તુ ધર્મ્યામૃતમિદં યથોક્તં પર્યુપાસતે ।

શ્રદ્દધાના મત્પરમાઃ ભક્તાસ્તેઽતીવ મે પ્રિયાઃ ॥20॥

॥ ૐ તત્સદિતિ શ્રીમદ્ભગવદ્ગીતાસુ ઉપનિષત્સુ બ્રહ્મવિદ્યાયાં યોગશાસ્ત્રે

શ્રીકૃષ્ણાર્જુનસંવાદે ભક્તિયોગો નામ દ્વાદશોઽધ્યાયઃ ।38

Roman (IAST) Transliteration

oṃ śrī paramātmane namaḥ

atha dvādaśo'dhyāyaḥ

bhaktiyogaḥ

arjuna uvāca

evaṃ satatayuktā ye bhaktāstvāṃ paryupāsate |

ye cāpyakṣaramavyaktaṃ teṣāṃ ke yogavittamāḥ ||1||

śrī bhagavānuvāca

mayyāveśya mano ye māṃ nityayuktā upāsate |

śraddhayā parayopetāḥ te me yuktatamā matāḥ ||2||

ye tvakṣaramanirdeśyam avyaktaṃ paryupāsate |

sarvatragamacintyaṃ ca kūṭasthamacalaṃ dhruvam ||3||

sanniyamyendriyagrāmaṃ sarvatra samabuddhayaḥ |

te prāpnuvanti māmeva sarvabhūtahite ratāḥ ||4||

kleśo'dhikatarasteṣām avyaktāsaktacetasām |

avyaktā hi gatirduḥkhaṃ dehavadbhiravāpyate ||5||

ye tu sarvāṇi karmāṇi mayi sannyasya matparāḥ |

ananyenaiva yogena māṃ dhyāyanta upāsate ||6||

teṣāmahaṃ samuddhartā mṛtyusaṃsārasāgarāt |

bhavāmi nacirātpārtha mayyāveśitacetasām ||7||

mayyeva mana ādhatsva mayi buddhiṃ niveśaya |

nivasiṣyasi mayyeva ata ūrdhvaṃ na saṃśayaḥ ||8||

atha cittaṃ samādhātuṃ na śaknoṣi mayi sthiram |

abhyāsayogena tataḥ māmicchāptuṃ dhanañjaya ||9||

abhyāse'pyasamartho'si matkarmaparamo bhava |

madarthamapi karmāṇi kurvansiddhimavāpsyasi ||10||

athaitadapyaśakto'si kartuṃ madyogamāśritaḥ |

sarvakarmaphalatyāgaṃ tataḥ kuru yatātmavān ||11||

śreyo hi jñānamabhyāsāt jñānāddhyānaṃ viśiṣyate |

dhyānātkarmaphalatyāgaḥ tyāgācchāntiranantaram ||12||

adveṣṭā sarvabhūtānāṃ maitraḥ karuṇa eva ca |

nirmamo nirahaṅkāraḥ samaduḥkhasukhaḥ kṣamī ||13||

santuṣṭaḥ satataṃ yogī yatātmā dṛḍhaniścayaḥ |

mayyarpitamanobuddhiḥ yo madbhaktaḥ sa me priyaḥ ||14||

yasmānnodvijate lokaḥ lokānnodvijate ca yaḥ |

harṣāmarṣabhayodvegaiḥ mukto yaḥ sa ca me priyaḥ ||15||

anapekṣaḥ śucirdakṣaḥ udāsīno gatavyathaḥ |

sarvārambhaparityāgī yo madbhaktaḥ sa me priyaḥ ||16||

yo na hṛṣyati na dveṣṭi na śocati na kāṅkṣati |

śubhāśubhaparityāgī bhaktimānyaḥ sa me priyaḥ ||17||

samaḥ śatrau ca mitre ca tathā mānāpamānayoḥ |

śītoṣṇasukhaduḥkheṣu samaḥ saṅgavivarjitaḥ ||18||

tulyanindāstutirmaunī santuṣṭo yena kenacit |

aniketaḥ sthiramatiḥ bhaktimānme priyo naraḥ ||19||

ye tu dharmyāmṛtamidaṃ yathoktaṃ paryupāsate |

śraddadhānā matparamāḥ bhaktāste'tīva me priyāḥ ||20||

|| oṃ tatsaditi śrīmadbhagavadgītāsu upaniṣatsu brahmavidyāyāṃ yogaśāstre

śrīkṛṣṇārjunasaṃvāde bhaktiyogo nāma dvādaśo'dhyāyaḥ |38