📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
5.51 𑌸𑍁𑌨𑍍𑌦𑌰𑌕𑌾𑌣𑍍𑌡 - 𑌏𑌕𑌪𑌞𑍍𑌚𑌾𑌶 𑌸𑌰𑍍𑌗𑌃
5.51 Sundarakanda - Ekapanchasha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।
𑌅𑌥 𑌏𑌕𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌂 𑌸𑌮𑍀𑌕𑍍𑌷𑍍𑌯 𑌮𑌹𑌾𑌸𑌤𑍍𑌤𑍍𑌵𑌂 𑌸𑌤𑍍𑌤𑍍𑌵𑌵𑌾𑌨𑍍𑌹𑌰𑌿𑌸𑌤𑍍𑌤𑌮𑌃 ।
𑌵𑌾𑌕𑍍𑌯𑌮𑌰𑍍𑌥𑌵𑌦𑌵𑍍𑌯𑌗𑍍𑌰𑌸𑍍𑌤𑌮𑍁𑌵𑌾𑌚 𑌦𑌶𑌾𑌨𑌨𑌮𑍍 ॥ 1 ॥
𑌅𑌹𑌂 𑌸𑍁𑌗𑍍𑌰𑍀𑌵𑌸𑌨𑍍𑌦𑍇𑌶𑌾𑌦𑌿𑌹 𑌪𑍍𑌰𑌾𑌪𑍍𑌤𑌸𑍍𑌤𑌵𑌾𑌲𑌯𑌮𑍍 ।
𑌰𑌾𑌕𑍍𑌷𑌸𑍇𑌨𑍍𑌦𑍍𑌰 𑌹𑌰𑍀𑌶𑌸𑍍𑌤𑍍𑌵𑌾𑌂 𑌭𑍍𑌰𑌾𑌤𑌾 𑌕𑍁𑌶𑌲𑌮𑌬𑍍𑌰𑌵𑍀𑌤𑍍 ॥ 2 ॥
𑌭𑍍𑌰𑌾𑌤𑍁𑌶𑍍𑌶𑍃𑌣𑍁 𑌸𑌮𑌾𑌦𑍇𑌶𑌂 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌧𑌰𑍍𑌮𑌾𑌰𑍍𑌥𑍋𑌪𑌹𑌿𑌤𑌂 𑌵𑌾𑌕𑍍𑌯𑌮𑌿𑌹 𑌚𑌾𑌮𑍁𑌤𑍍𑌰 𑌚 𑌕𑍍𑌷𑌮𑌮𑍍 ॥ 3 ॥
𑌰𑌾𑌜𑌾 𑌦𑌶𑌰𑌥𑍋 𑌨𑌾𑌮 𑌰𑌥𑌕𑍁𑌞𑍍𑌜𑌰𑌵𑌾𑌜𑌿𑌮𑌾𑌨𑍍 ।
𑌪𑌿𑌤𑍇𑌵 𑌬𑌨𑍍𑌧𑍁𑌰𑍍𑌲𑍋𑌕𑌸𑍍𑌯 𑌸𑍁𑌰𑍇𑌶𑍍𑌵𑌰𑌸𑌮𑌦𑍍𑌯𑍁𑌤𑌿𑌃 ॥ 4 ॥
𑌜𑍍𑌯𑍇𑌷𑍍𑌠𑌸𑍍𑌤𑌸𑍍𑌯 𑌮𑌹𑌾𑌬𑌾𑌹𑍁𑌃 𑌪𑍁𑌤𑍍𑌰𑌃 𑌪𑍍𑌰𑌿𑌯𑌕𑌰𑌃 𑌪𑍍𑌰𑌭𑍁𑌃 ।
𑌪𑌿𑌤𑍁𑌰𑍍𑌨𑌿𑌦𑍇𑌶𑌾𑌨𑍍𑌨𑌿𑌷𑍍𑌕𑍍𑌰𑌾𑌨𑍍𑌤𑌃 𑌪𑍍𑌰𑌵𑌿𑌷𑍍𑌟𑍋 𑌦𑌣𑍍𑌡𑌕𑌾𑌵𑌨𑌮𑍍 ॥ 5 ॥
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌸𑍀𑌤𑌯𑌾 𑌚𑌾𑌪𑌿 𑌭𑌾𑌰𑍍𑌯𑌯𑌾 ।
𑌰𑌾𑌮𑍋 𑌨𑌾𑌮 𑌮𑌹𑌾𑌤𑍇𑌜𑌾 𑌧𑌰𑍍𑌮𑍍𑌯𑌂 𑌪𑌨𑍍𑌥𑌾𑌨𑌮𑌾𑌸𑍍𑌥𑌿𑌤𑌃 ॥ 6 ॥
𑌤𑌸𑍍𑌯 𑌭𑌾𑌰𑍍𑌯𑌾 𑌵𑌨𑍇 𑌨𑌷𑍍𑌟𑌾 𑌸𑍀𑌤𑌾 𑌪𑌤𑌿𑌮𑌨𑍁𑌵𑍍𑌰𑌤𑌾 ।
𑌵𑍈𑌦𑍇𑌹𑌸𑍍𑌯 𑌸𑍁𑌤𑌾 𑌰𑌾𑌜𑍍𑌞𑍋 𑌜𑌨𑌕𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 7 ॥
𑌸 𑌮𑌾𑌰𑍍𑌗𑌮𑌾𑌣𑌸𑍍𑌤𑌾𑌂 𑌦𑍇𑌵𑍀𑌂 𑌰𑌾𑌜𑌪𑍁𑌤𑍍𑌰𑌃 𑌸𑌹𑌾𑌨𑍁𑌜𑌃 ।
𑌋𑌶𑍍𑌯𑌮𑍂𑌕𑌮𑌨𑍁𑌪𑍍𑌰𑌾𑌪𑍍𑌤𑌃 𑌸𑍁𑌗𑍍𑌰𑍀𑌵𑍇𑌣 𑌸𑌮𑌾𑌗𑌤𑌃 ॥ 8 ॥
𑌤𑌸𑍍𑌯 𑌤𑍇𑌨 𑌪𑍍𑌰𑌤𑌿𑌜𑍍𑌞𑌾𑌤𑌂 𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑌮𑍍 ।
𑌸𑍁𑌗𑍍𑌰𑍀𑌵𑌸𑍍𑌯𑌾𑌪𑌿 𑌰𑌾𑌮𑍇𑌣 𑌹𑌰𑌿𑌰𑌾𑌜𑍍𑌯𑌂 𑌨𑌿𑌵𑍇𑌦𑌿𑌤𑌮𑍍 ॥ 9 ॥
𑌤𑌤𑌸𑍍𑌤𑍇𑌨 𑌮𑍃𑌧𑍇 𑌹𑌤𑍍𑌵𑌾 𑌰𑌾𑌜𑌪𑍁𑌤𑍍𑌰𑍇𑌣 𑌵𑌾𑌲𑌿𑌨𑌮𑍍 ।
𑌸𑍁𑌗𑍍𑌰𑍀𑌵𑌃 𑌸𑍍𑌥𑌾𑌪𑌿𑌤𑍋 𑌰𑌾𑌜𑍍𑌯𑍇 𑌹𑌰𑍍𑌯𑍃𑌕𑍍𑌷𑌾𑌣𑌾𑌂 𑌗𑌣𑍇𑌶𑍍𑌵𑌰𑌃 ॥ 10 ॥
𑌤𑍍𑌵𑌯𑌾 𑌵𑌿𑌜𑍍𑌞𑌾𑌤𑌪𑍂𑌰𑍍𑌵𑌶𑍍𑌚 𑌵𑌾𑌲𑍀 𑌵𑌾𑌨𑌰𑌪𑍁𑌙𑍍𑌗𑌵𑌃 ।
𑌰𑌾𑌮𑍇𑌣 𑌨𑌿𑌹𑌤𑌸𑍍𑌸𑌙𑍍𑌖𑍍𑌯𑍇 𑌶𑌰𑍇𑌣𑍈𑌕𑍇𑌨 𑌵𑌾𑌨𑌰𑌃 ॥ 11 ॥
𑌸 𑌸𑍀𑌤𑌾𑌮𑌾𑌰𑍍𑌗𑌣𑍇 𑌵𑍍𑌯𑌗𑍍𑌰𑌸𑍍𑌸𑍁𑌗𑍍𑌰𑍀𑌵𑌃 𑌸𑌤𑍍𑌯𑌸𑌙𑍍𑌗𑌰𑌃 ।
𑌹𑌰𑍀𑌨𑍍 𑌸𑌮𑍍𑌪𑍍𑌰𑍇𑌷𑌯𑌾𑌮𑌾𑌸 𑌦𑌿𑌶𑌸𑍍𑌸𑌰𑍍𑌵𑌾 𑌹𑌰𑍀𑌶𑍍𑌵𑌰𑌃 ॥ 12 ॥
𑌤𑌾𑌂 𑌹𑌰𑍀𑌣𑌾𑌂 𑌸𑌹𑌸𑍍𑌰𑌾𑌣𑌿 𑌶𑌤𑌾𑌨𑌿 𑌨𑌿𑌯𑍁𑌤𑌾𑌨𑌿 𑌚 ।
𑌦𑌿𑌕𑍍𑌷𑍁 𑌸𑌰𑍍𑌵𑌾𑌸𑍁 𑌮𑌾𑌰𑍍𑌗𑌨𑍍𑌤𑍇 𑌹𑍍𑌯𑌧𑌶𑍍𑌚𑍋𑌪𑌰𑌿 𑌚𑌾𑌮𑍍𑌬𑌰𑍇 ॥ 13 ॥
𑌵𑍈𑌨𑌤𑍇𑌯𑌸𑌮𑌾𑌃 𑌕𑍇𑌚𑌿𑌤𑍍𑌕𑍇𑌚𑌿𑌤𑍍𑌤𑌤𑍍𑌰𑌾𑌨𑌿𑌲𑍋𑌪𑌮𑌾𑌃 ।
𑌅𑌸𑌙𑍍𑌗𑌗𑌤𑌯𑌶𑌶𑍀𑌘𑍍𑌰𑌾 𑌹𑌰𑌿𑌵𑍀𑌰𑌾 𑌮𑌹𑌾𑌬𑌲𑌾𑌃 ॥ 14 ॥
𑌅𑌹𑌂 𑌤𑍁 𑌹𑌨𑍁𑌮𑌾𑌨𑍍𑌨𑌾𑌮 𑌮𑌾𑌰𑍁𑌤𑌸𑍍𑌯𑍗𑌰𑌸𑌸𑍍𑌸𑍁𑌤𑌃 ।
𑌸𑍀𑌤𑌾𑌯𑌾𑌸𑍍𑌤𑍁 𑌕𑍃𑌤𑍇 𑌤𑍂𑌰𑍍𑌣𑌂 𑌶𑌤𑌯𑍋𑌜𑌨𑌮𑌾𑌯𑌤𑌮𑍍 ॥ 15 ॥
𑌸𑌮𑍁𑌦𑍍𑌰𑌂 𑌲𑌙𑍍𑌘𑌯𑌿𑌤𑍍𑌵𑍈𑌵 𑌤𑌾𑌂 𑌦𑌿𑌦𑍃𑌕𑍍𑌷𑍁𑌰𑌿𑌹𑌾𑌗𑌤𑌃 ।
𑌭𑍍𑌰𑌮𑌤𑌾 𑌚 𑌮𑌯𑌾 𑌦𑍃𑌷𑍍𑌟𑌾 𑌗𑍃𑌹𑍇 𑌤𑍇 𑌜𑌨𑌕𑌾𑌤𑍍𑌮𑌜𑌾 ॥ 16 ॥
𑌤𑌦𑍍𑌭𑌵𑌾𑌨𑍍 𑌦𑍃𑌷𑍍𑌟𑌧𑌰𑍍𑌮𑌾𑌰𑍍𑌥𑌸𑍍𑌤𑌪𑌃𑌕𑍃𑌤𑌪𑌰𑌿𑌗𑍍𑌰𑌹𑌃 ।
𑌪𑌰𑌦𑌾𑌰𑌾𑌨𑍍 𑌮𑌹𑌾𑌪𑍍𑌰𑌾𑌜𑍍𑌞 𑌨𑍋𑌪𑌰𑍋𑌦𑍍𑌧𑍁𑌂 𑌤𑍍𑌵𑌮𑌰𑍍𑌹𑌸𑌿 ॥ 17 ॥
𑌨 𑌹𑌿 𑌧𑌰𑍍𑌮𑌵𑌿𑌰𑍁𑌦𑍍𑌧𑍇𑌷𑍁 𑌬𑌹𑍍𑌵𑌪𑌾𑌯𑍇𑌷𑍁 𑌕𑌰𑍍𑌮𑌸𑍁 ।
𑌮𑍂𑌲𑌘𑌾𑌤𑌿𑌷𑍁 𑌸𑌜𑍍𑌜𑌨𑍍𑌤𑍇 𑌬𑍁𑌦𑍍𑌧𑌿𑌮𑌨𑍍𑌤𑍋 𑌭𑌵𑌦𑍍𑌵𑌿𑌧𑌾𑌃 ॥ 18 ॥
𑌕𑌶𑍍𑌚 𑌲𑌕𑍍𑌷𑍍𑌮𑌣𑌮𑍁𑌕𑍍𑌤𑌾𑌨𑌾𑌂 𑌰𑌾𑌮𑌕𑍋𑌪𑌾𑌨𑍁𑌵𑌰𑍍𑌤𑌿𑌨𑌾𑌮𑍍 ।
𑌶𑌰𑌾𑌣𑌾𑌮𑌗𑍍𑌰𑌤𑌃 𑌸𑍍𑌥𑌾𑌤𑍁𑌂 𑌶𑌕𑍍𑌤𑍋 𑌦𑍇𑌵𑌾𑌸𑍁𑌰𑍇𑌷𑍍𑌵𑌪𑌿 ॥ 19 ॥
𑌨 𑌚𑌾𑌪𑌿 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌰𑌾𑌜𑌨𑍍𑌵𑌿𑌦𑍍𑌯𑍇𑌤 𑌕𑌶𑍍𑌚𑌨 ।
𑌰𑌾𑌘𑌵𑌸𑍍𑌯 𑌵𑍍𑌯𑌲𑍀𑌕𑌂 𑌯𑌃 𑌕𑍃𑌤𑍍𑌵𑌾 𑌸𑍁𑌖𑌮𑌵𑌾𑌪𑍍𑌨𑍁𑌯𑌾𑌤𑍍 ॥ 20 ॥
𑌤𑌤𑍍 𑌤𑍍𑌰𑌿𑌕𑌾𑌲𑌹𑌿𑌤𑌂 𑌵𑌾𑌕𑍍𑌯𑌂 𑌧𑌰𑍍𑌮𑍍𑌯𑌮𑌰𑍍𑌥𑌾𑌨𑍁𑌬𑌨𑍍𑌧𑌿 𑌚 ।
𑌮𑌨𑍍𑌯𑌸𑍍𑌵 𑌨𑌰𑌦𑍇𑌵𑌾𑌯 𑌜𑌾𑌨𑌕𑍀 𑌪𑍍𑌰𑌤𑌿𑌦𑍀𑌯𑌤𑌾𑌮𑍍 ॥ 21 ॥
𑌦𑍃𑌷𑍍𑌟𑌾 𑌹𑍀𑌯𑌂 𑌮𑌯𑌾 𑌦𑍇𑌵𑍀 𑌲𑌬𑍍𑌧𑌂 𑌯𑌦𑌿𑌹 𑌦𑍁𑌰𑍍𑌲𑌭𑌮𑍍 ।
𑌉𑌤𑍍𑌤𑌰𑌂 𑌕𑌰𑍍𑌮 𑌯𑌚𑍍𑌛𑍇𑌷𑌂 𑌨𑌿𑌮𑌿𑌤𑍍𑌤𑌂 𑌤𑌤𑍍𑌰 𑌰𑌾𑌘𑌵𑌃 ॥ 22 ॥
𑌲𑌕𑍍𑌷𑌿𑌤𑍇𑌯𑌂 𑌮𑌯𑌾 𑌸𑍀𑌤𑌾 𑌤𑌥𑌾 𑌶𑍋𑌕𑌪𑌰𑌾𑌯𑌣𑌾 ।
𑌗𑍃𑌹𑍍𑌯 𑌯𑌾𑌂 𑌨𑌾𑌭𑌿𑌜𑌾𑌨𑌾𑌸𑌿 𑌪𑌞𑍍𑌚𑌾𑌸𑍍𑌯𑌾𑌮𑌿𑌵 𑌪𑌨𑍍𑌨𑌗𑍀𑌮𑍍 ॥ 23 ॥
𑌨𑍇𑌯𑌂 𑌜𑌰𑌯𑌿𑌤𑍁𑌂 𑌶𑌕𑍍𑌯𑌾 𑌸𑌾𑌸𑍁𑌰𑍈𑌰𑌮𑌰𑍈𑌰𑌪𑌿 ।
𑌵𑌿𑌷𑌸𑌂𑌸𑍃𑌷𑍍𑌟𑌮𑌤𑍍𑌯𑌰𑍍𑌥𑌂 𑌭𑍁𑌕𑍍𑌤𑌮𑌨𑍍𑌨𑌮𑌿𑌵𑍗𑌜𑌸𑌾 ॥ 24 ॥
𑌤𑌪𑌸𑍍𑌸𑌨𑍍𑌤𑌾𑌪𑌲𑌬𑍍𑌧𑌸𑍍𑌤𑍇 𑌯𑍋𑌽𑌯𑌂 𑌧𑌰𑍍𑌮𑌪𑌰𑌿𑌗𑍍𑌰𑌹𑌃 ।
𑌨 𑌸 𑌨𑌾𑌶𑌯𑌿𑌤𑍁𑌂 𑌨𑍍𑌯𑌾𑌯𑍍𑌯 𑌆𑌤𑍍𑌮𑌪𑍍𑌰𑌾𑌣𑌪𑌰𑌿𑌗𑍍𑌰𑌹𑌃 ॥ 25 ॥
𑌅𑌵𑌧𑍍𑌯𑌤𑌾𑌂 𑌤𑌪𑍋𑌭𑌿𑌰𑍍𑌯𑌾𑌂 𑌭𑌵𑌾𑌨𑍍 𑌸𑌮𑌨𑍁𑌪𑌶𑍍𑌯𑌤𑌿 ।
𑌆𑌤𑍍𑌮𑌨𑌃 𑌸𑌾𑌸𑍁𑌰𑍈𑌰𑍍𑌦𑍇𑌵𑍈𑌰𑍍𑌹𑍇𑌤𑍁𑌸𑍍𑌤𑌤𑍍𑌰𑌾𑌪𑍍𑌯𑌯𑌂 𑌮𑌹𑌾𑌨𑍍 ॥ 26 ॥
𑌸𑍁𑌗𑍍𑌰𑍀𑌵𑍋 𑌨 𑌹𑌿 𑌦𑍇𑌵𑍋𑌽𑌯𑌂 𑌨𑌾𑌸𑍁𑌰𑍋 𑌨 𑌚 𑌰𑌾𑌕𑍍𑌷𑌸𑌃 ।
𑌨 𑌦𑌾𑌨𑌵𑍋 𑌨 𑌗𑌨𑍍𑌧𑌰𑍍𑌵𑍋 𑌨 𑌯𑌕𑍍𑌷𑍋 𑌨 𑌚 𑌪𑌨𑍍𑌨𑌗𑌃 ॥ 27 ॥
𑌤𑌸𑍍𑌮𑌾𑌤𑍍𑌪𑍍𑌰𑌾𑌣𑌪𑌰𑌿𑌤𑍍𑌰𑌾𑌣𑌂 𑌕𑌥𑌂 𑌰𑌾𑌜𑌨𑍍𑌕𑌰𑌿𑌷𑍍𑌯𑌸𑌿 ।
𑌨 𑌤𑍁 𑌧𑌰𑍍𑌮𑍋𑌪𑌸𑌂𑌹𑌾𑌰𑌮𑌧𑌰𑍍𑌮𑌫𑌲𑌸𑌂𑌹𑌿𑌤𑌮𑍍 ॥ 28 ॥
𑌤𑌦𑍇𑌵 𑌫𑌲𑌮𑌨𑍍𑌵𑍇𑌤𑌿 𑌧𑌰𑍍𑌮𑌶𑍍𑌚𑌾𑌧𑌰𑍍𑌮𑌨𑌾𑌶𑌨𑌃 ।
𑌪𑍍𑌰𑌾𑌪𑍍𑌤𑌂 𑌧𑌰𑍍𑌮𑌫𑌲𑌂 𑌤𑌾𑌵𑌦𑍍𑌭𑌵𑌤𑌾 𑌨𑌾𑌤𑍍𑌰 𑌸𑌂𑌶𑌯𑌃 ।
𑌫𑌲𑌮𑌸𑍍𑌯𑌾𑌪𑍍𑌯𑌧𑌰𑍍𑌮𑌸𑍍𑌯 𑌕𑍍𑌷𑌿𑌪𑍍𑌰𑌮𑍇𑌵 𑌪𑍍𑌰𑌪𑌤𑍍𑌸𑍍𑌯𑌸𑍇 ॥ 29 ॥
𑌜𑌨𑌸𑍍𑌥𑌾𑌨𑌵𑌧𑌂 𑌬𑍁𑌦𑍍𑌧𑍍𑌵𑌾 𑌬𑍁𑌦𑍍𑌧𑍍𑌵𑌾 𑌵𑌾𑌲𑌿𑌵𑌧𑌂 𑌤𑌥𑌾 ॥ 30 ॥
𑌰𑌾𑌮𑌸𑍁𑌗𑍍𑌰𑍀𑌵𑌸𑌖𑍍𑌯𑌂 𑌚 𑌬𑍁𑌧𑍍𑌯𑌸𑍍𑌵 𑌹𑌿𑌤𑌮𑌾𑌤𑍍𑌮𑌨𑌃 ।
𑌕𑌾𑌮𑌂 𑌖𑌲𑍍𑌵𑌹𑌮𑌪𑍍𑌯𑍇𑌕𑌸𑍍𑌸𑌵𑌾𑌜𑌿𑌰𑌥𑌕𑍁𑌞𑍍𑌜𑌰𑌾𑌮𑍍 ॥ 31 ॥
𑌲𑌙𑍍𑌕𑌾𑌂 𑌨𑌾𑌶𑌯𑌿𑌤𑍁𑌂 𑌶𑌕𑍍𑌤𑌸𑍍𑌤𑌸𑍍𑌯𑍈𑌷 𑌤𑍁 𑌨 𑌨𑌿𑌶𑍍𑌚𑌯𑌃 ।
𑌰𑌾𑌮𑍇𑌣 𑌹𑌿 𑌪𑍍𑌰𑌤𑌿𑌜𑍍𑌞𑌾𑌤𑌂 𑌹𑌰𑍍𑌯𑍃𑌕𑍍𑌷𑌗𑌣𑌸𑌨𑍍𑌨𑌿𑌧𑍗 ॥ 32 ॥
𑌉𑌤𑍍𑌸𑌾𑌦𑌨𑌮𑌮𑌿𑌤𑍍𑌰𑌾𑌣𑌾𑌂 𑌸𑍀𑌤𑌾 𑌯𑍈𑌸𑍍𑌤𑍁 𑌪𑍍𑌰𑌧𑌰𑍍𑌷𑌿𑌤𑌾 ।
𑌅𑌪𑌕𑍁𑌰𑍍𑌵𑌨𑍍 𑌹𑌿 𑌰𑌾𑌮𑌸𑍍𑌯 𑌸𑌾𑌕𑍍𑌷𑌾𑌦𑌪𑌿 𑌪𑍁𑌰𑌨𑍍𑌦𑌰𑌃 ॥ 33 ॥
𑌨 𑌸𑍁𑌖𑌂 𑌪𑍍𑌰𑌾𑌪𑍍𑌨𑍁𑌯𑌾𑌦𑌨𑍍𑌯𑌃 𑌕𑌿𑌂 𑌪𑍁𑌨𑌸𑍍𑌤𑍍𑌵𑌦𑍍𑌵𑌿𑌧𑍋 𑌜𑌨𑌃 ।
𑌯𑌾𑌂 𑌸𑍀𑌤𑍇𑌤𑍍𑌯𑌭𑌿𑌜𑌾𑌨𑌾𑌸𑌿 𑌯𑍇𑌯𑌂 𑌤𑌿𑌷𑍍𑌠𑌤𑌿 𑌤𑍇 𑌵𑌶𑍇 ॥ 34 ॥
𑌕𑌾𑌲𑌰𑌾𑌤𑍍𑌰𑍀𑌤𑌿 𑌤𑌾𑌂 𑌵𑌿𑌦𑍍𑌧𑌿 𑌸𑌰𑍍𑌵𑌲𑌙𑍍𑌕𑌾𑌵𑌿𑌨𑌾𑌶𑌿𑌨𑍀𑌮𑍍 ।
𑌤𑌦𑌲𑌂 𑌕𑌾𑌲𑌪𑌾𑌶𑍇𑌨 𑌸𑍀𑌤𑌾𑌵𑌿𑌗𑍍𑌰𑌹𑌰𑍂𑌪𑌿𑌣𑌾 ॥ 35 ॥
𑌸𑍍𑌵𑌯𑌂 𑌸𑍍𑌕𑌨𑍍𑌧𑌾𑌵𑌸𑌕𑍍𑌤𑍇𑌨 𑌕𑍍𑌷𑍇𑌮𑌮𑌾𑌤𑍍𑌮𑌨𑌿 𑌚𑌿𑌨𑍍𑌤𑍍𑌯𑌤𑌾𑌮𑍍 ।
𑌸𑍀𑌤𑌾𑌯𑌾𑌸𑍍𑌤𑍇𑌜𑌸𑌾 𑌦𑌗𑍍𑌧𑌾𑌂 𑌰𑌾𑌮𑌕𑍋𑌪𑌪𑍍𑌰𑌪𑍀𑌡𑌿𑌤𑌾𑌮𑍍 ॥ 36 ॥
𑌦𑌹𑍍𑌯𑌮𑌾𑌨𑌾𑌮𑌿𑌮𑌾𑌂 𑌪𑌶𑍍𑌯 𑌪𑍁𑌰𑍀𑌂 𑌸𑌾𑌟𑍍𑌟𑌪𑍍𑌰𑌤𑍋𑌲𑌿𑌕𑌾𑌮𑍍 ।
𑌸𑍍𑌵𑌾𑌨𑌿 𑌮𑌿𑌤𑍍𑌰𑌾𑌣𑌿 𑌮𑌨𑍍𑌤𑍍𑌰𑍀𑌂𑌶𑍍𑌚 𑌜𑍍𑌞𑌾𑌤𑍀𑌨𑍍 𑌭𑍍𑌰𑌾𑌤𑍍𑌰𑍂𑌨𑍍 𑌸𑍁𑌤𑌾𑌨𑍍 𑌹𑌿𑌤𑌾𑌨𑍍 ॥ 37 ॥
𑌭𑍋𑌗𑌾𑌨𑍍𑌦𑌾𑌰𑌾𑌂𑌶𑍍𑌚 𑌲𑌙𑍍𑌕𑌾𑌂 𑌚 𑌮𑌾 𑌵𑌿𑌨𑌾𑌶𑌮𑍁𑌪𑌾𑌨𑌯 ।
𑌸𑌤𑍍𑌯𑌂 𑌰𑌾𑌕𑍍𑌷𑌸𑌰𑌾𑌜𑍇𑌨𑍍𑌦𑍍𑌰 𑌶𑍃𑌣𑍁𑌷𑍍𑌵 𑌵𑌚𑌨𑌂 𑌮𑌮 ॥ 38 ॥
𑌰𑌾𑌮𑌦𑌾𑌸𑌸𑍍𑌯 𑌦𑍂𑌤𑌸𑍍𑌯 𑌵𑌾𑌨𑌰𑌸𑍍𑌯 𑌵𑌿𑌶𑍇𑌷𑌤𑌃 ।
𑌸𑌰𑍍𑌵𑌾𑌨𑍍 𑌲𑍋𑌕𑌾𑌨𑍍 𑌸𑍁𑌸𑌂𑌹𑍃𑌤𑍍𑌯 𑌸𑌭𑍂𑌤𑌾𑌨𑍍 𑌸𑌚𑌰𑌾𑌚𑌰𑌾𑌨𑍍 ॥ 39 ॥
𑌪𑍁𑌨𑌰𑍇𑌵 𑌤𑌥𑌾 𑌸𑍍𑌰𑌷𑍍𑌟𑍁𑌂 𑌶𑌕𑍍𑌤𑍋 𑌰𑌾𑌮𑍋 𑌮𑌹𑌾𑌯𑌶𑌾𑌃 ।
𑌦𑍇𑌵𑌾𑌸𑍁𑌰𑌨𑌰𑍇𑌨𑍍𑌦𑍍𑌰𑍇𑌷𑍁 𑌯𑌕𑍍𑌷𑌰𑌕𑍍𑌷𑍋𑌗𑌣𑍇𑌷𑍁 𑌚 ॥ 40 ॥
𑌵𑌿𑌦𑍍𑌯𑌾𑌧𑌰𑍇𑌷𑍁 𑌸𑌰𑍍𑌵𑍇𑌷𑍁 𑌗𑌨𑍍𑌧𑌰𑍍𑌵𑍇𑌷𑍂𑌰𑌗𑍇𑌷𑍁 𑌚 ।
𑌸𑌿𑌦𑍍𑌧𑍇𑌷𑍁 𑌕𑌿𑌨𑍍𑌨𑌰𑍇𑌨𑍍𑌦𑍍𑌰𑍇𑌷𑍁 𑌪𑌤𑌤𑍍𑌰𑌿𑌷𑍁 𑌚 𑌸𑌰𑍍𑌵𑌤𑌃 ॥ 41 ॥
𑌸𑌰𑍍𑌵𑌭𑍂𑌤𑍇𑌷𑍁 𑌸𑌰𑍍𑌵𑌤𑍍𑌰 𑌸𑌰𑍍𑌵𑌕𑌾𑌲𑍇𑌷𑍁 𑌨𑌾𑌸𑍍𑌤𑌿 𑌸𑌃 ।
𑌯𑍋 𑌰𑌾𑌮𑌂 𑌪𑍍𑌰𑌤𑌿𑌯𑍁𑌧𑍍𑌯𑍇𑌤 𑌵𑌿𑌷𑍍𑌣𑍁𑌤𑍁𑌲𑍍𑌯𑌪𑌰𑌾𑌕𑍍𑌰𑌮𑌮𑍍 ॥ 42 ॥
𑌸𑌰𑍍𑌵𑌲𑍋𑌕𑍇𑌶𑍍𑌵𑌰𑌸𑍍𑌯𑍈𑌵𑌂 𑌕𑍃𑌤𑍍𑌵𑌾 𑌵𑌿𑌪𑍍𑌰𑌿𑌯𑌮𑍁𑌤𑍍𑌤𑌮𑌮𑍍 ।
𑌰𑌾𑌮𑌸𑍍𑌯 𑌰𑌾𑌜𑌸𑌿𑌂𑌹𑌸𑍍𑌯 𑌦𑍁𑌰𑍍𑌲𑌭𑌂 𑌤𑌵 𑌜𑍀𑌵𑌿𑌤𑌮𑍍 ॥ 43 ॥
𑌦𑍇𑌵𑌾𑌶𑍍𑌚 𑌦𑍈𑌤𑍍𑌯𑌾𑌶𑍍𑌚 𑌨𑌿𑌶𑌾𑌚𑌰𑍇𑌨𑍍𑌦𑍍𑌰 𑌗𑌨𑍍𑌧𑌰𑍍𑌵𑌵𑌿𑌦𑍍𑌯𑌾𑌧𑌰𑌨𑌾𑌗𑌯𑌕𑍍𑌷𑌾𑌃 ।
𑌰𑌾𑌮𑌸𑍍𑌯 𑌲𑍋𑌕𑌤𑍍𑌰𑌯𑌨𑌾𑌯𑌕𑌸𑍍𑌯 𑌸𑍍𑌥𑌾𑌤𑍁𑌂 𑌨 𑌶𑌕𑍍𑌤𑌾𑌸𑍍𑌸𑌮𑌰𑍇𑌷𑍁 𑌸𑌰𑍍𑌵𑍇 ॥ 44 ॥
𑌬𑍍𑌰𑌹𑍍𑌮𑌾 𑌸𑍍𑌵𑌯𑌮𑍍𑌭𑍂𑌶𑍍𑌚𑌤𑍁𑌰𑌾𑌨𑌨𑍋 𑌵𑌾 𑌰𑍁𑌦𑍍𑌰𑌸𑍍𑌤𑍍𑌰𑌿𑌣𑍇𑌤𑍍𑌰𑌸𑍍𑌤𑍍𑌰𑌿𑌪𑍁𑌰𑌾𑌨𑍍𑌤𑌕𑍋 𑌵𑌾 ।
𑌇𑌨𑍍𑌦𑍍𑌰𑍋 𑌮𑌹𑍇𑌨𑍍𑌦𑍍𑌰𑌸𑍍𑌸𑍁𑌰𑌨𑌾𑌯𑌕𑍋 𑌵𑌾 𑌤𑍍𑌰𑌾𑌤𑍁𑌂 𑌨 𑌶𑌕𑍍𑌤𑌾 𑌯𑍁𑌧𑌿 𑌰𑌾𑌮𑌵𑌧𑍍𑌯𑌮𑍍 ॥ 45 ॥
𑌸 𑌸𑍗𑌷𑍍𑌠𑌵𑍋𑌪𑍇𑌤𑌮𑌦𑍀𑌨𑌵𑌾𑌦𑌿𑌨𑌃 𑌕𑌪𑍇𑌰𑍍𑌨𑌿𑌶𑌮𑍍𑌯𑌾𑌪𑍍𑌰𑌤𑌿𑌮𑍋𑌽𑌪𑍍𑌰𑌿𑌯𑌂 𑌵𑌚𑌃 ।
𑌦𑌶𑌾𑌨𑌨𑌃 𑌕𑍋𑌪𑌵𑌿𑌵𑍃𑌤𑍍𑌤𑌲𑍋𑌚𑌨𑌃 𑌸𑌮𑌾𑌦𑌿𑌶𑌤𑍍𑌤𑌸𑍍𑌯 𑌵𑌧𑌂 𑌮𑌹𑌾𑌕𑌪𑍇𑌃 ॥ 46 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌏𑌕𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe sundarakāṇḍam |
atha ekapañcāśassargaḥ |
taṃ samīkṣya mahāsattvaṃ sattvavānharisattamaḥ |
vākyamarthavadavyagrastamuvāca daśānanam || 1 ||
ahaṃ sugrīvasandeśādiha prāptastavālayam |
rākṣasendra harīśastvāṃ bhrātā kuśalamabravīt || 2 ||
bhrātuśśṛṇu samādeśaṃ sugrīvasya mahātmanaḥ |
dharmārthopahitaṃ vākyamiha cāmutra ca kṣamam || 3 ||
rājā daśaratho nāma rathakuñjaravājimān |
piteva bandhurlokasya sureśvarasamadyutiḥ || 4 ||
jyeṣṭhastasya mahābāhuḥ putraḥ priyakaraḥ prabhuḥ |
piturnideśānniṣkrāntaḥ praviṣṭo daṇḍakāvanam || 5 ||
lakṣmaṇena saha bhrātrā sītayā cāpi bhāryayā |
rāmo nāma mahātejā dharmyaṃ panthānamāsthitaḥ || 6 ||
tasya bhāryā vane naṣṭā sītā patimanuvratā |
vaidehasya sutā rājño janakasya mahātmanaḥ || 7 ||
sa mārgamāṇastāṃ devīṃ rājaputraḥ sahānujaḥ |
ṛśyamūkamanuprāptaḥ sugrīveṇa samāgataḥ || 8 ||
tasya tena pratijñātaṃ sītāyāḥ parimārgaṇam |
sugrīvasyāpi rāmeṇa harirājyaṃ niveditam || 9 ||
tatastena mṛdhe hatvā rājaputreṇa vālinam |
sugrīvaḥ sthāpito rājye haryṛkṣāṇāṃ gaṇeśvaraḥ || 10 ||
tvayā vijñātapūrvaśca vālī vānarapuṅgavaḥ |
rāmeṇa nihatassaṅkhye śareṇaikena vānaraḥ || 11 ||
sa sītāmārgaṇe vyagrassugrīvaḥ satyasaṅgaraḥ |
harīn sampreṣayāmāsa diśassarvā harīśvaraḥ || 12 ||
tāṃ harīṇāṃ sahasrāṇi śatāni niyutāni ca |
dikṣu sarvāsu mārgante hyadhaścopari cāmbare || 13 ||
vainateyasamāḥ kecitkecittatrānilopamāḥ |
asaṅgagatayaśaśīghrā harivīrā mahābalāḥ || 14 ||
ahaṃ tu hanumānnāma mārutasyaurasassutaḥ |
sītāyāstu kṛte tūrṇaṃ śatayojanamāyatam || 15 ||
samudraṃ laṅghayitvaiva tāṃ didṛkṣurihāgataḥ |
bhramatā ca mayā dṛṣṭā gṛhe te janakātmajā || 16 ||
tadbhavān dṛṣṭadharmārthastapaḥkṛtaparigrahaḥ |
paradārān mahāprājña noparoddhuṃ tvamarhasi || 17 ||
na hi dharmaviruddheṣu bahvapāyeṣu karmasu |
mūlaghātiṣu sajjante buddhimanto bhavadvidhāḥ || 18 ||
kaśca lakṣmaṇamuktānāṃ rāmakopānuvartinām |
śarāṇāmagrataḥ sthātuṃ śakto devāsureṣvapi || 19 ||
na cāpi triṣu lokeṣu rājanvidyeta kaścana |
rāghavasya vyalīkaṃ yaḥ kṛtvā sukhamavāpnuyāt || 20 ||
tat trikālahitaṃ vākyaṃ dharmyamarthānubandhi ca |
manyasva naradevāya jānakī pratidīyatām || 21 ||
dṛṣṭā hīyaṃ mayā devī labdhaṃ yadiha durlabham |
uttaraṃ karma yaccheṣaṃ nimittaṃ tatra rāghavaḥ || 22 ||
lakṣiteyaṃ mayā sītā tathā śokaparāyaṇā |
gṛhya yāṃ nābhijānāsi pañcāsyāmiva pannagīm || 23 ||
neyaṃ jarayituṃ śakyā sāsurairamarairapi |
viṣasaṃsṛṣṭamatyarthaṃ bhuktamannamivaujasā || 24 ||
tapassantāpalabdhaste yo'yaṃ dharmaparigrahaḥ |
na sa nāśayituṃ nyāyya ātmaprāṇaparigrahaḥ || 25 ||
avadhyatāṃ tapobhiryāṃ bhavān samanupaśyati |
ātmanaḥ sāsurairdevairhetustatrāpyayaṃ mahān || 26 ||
sugrīvo na hi devo'yaṃ nāsuro na ca rākṣasaḥ |
na dānavo na gandharvo na yakṣo na ca pannagaḥ || 27 ||
tasmātprāṇaparitrāṇaṃ kathaṃ rājankariṣyasi |
na tu dharmopasaṃhāramadharmaphalasaṃhitam || 28 ||
tadeva phalamanveti dharmaścādharmanāśanaḥ |
prāptaṃ dharmaphalaṃ tāvadbhavatā nātra saṃśayaḥ |
phalamasyāpyadharmasya kṣiprameva prapatsyase || 29 ||
janasthānavadhaṃ buddhvā buddhvā vālivadhaṃ tathā || 30 ||
rāmasugrīvasakhyaṃ ca budhyasva hitamātmanaḥ |
kāmaṃ khalvahamapyekassavājirathakuñjarām || 31 ||
laṅkāṃ nāśayituṃ śaktastasyaiṣa tu na niścayaḥ |
rāmeṇa hi pratijñātaṃ haryṛkṣagaṇasannidhau || 32 ||
utsādanamamitrāṇāṃ sītā yaistu pradharṣitā |
apakurvan hi rāmasya sākṣādapi purandaraḥ || 33 ||
na sukhaṃ prāpnuyādanyaḥ kiṃ punastvadvidho janaḥ |
yāṃ sītetyabhijānāsi yeyaṃ tiṣṭhati te vaśe || 34 ||
kālarātrīti tāṃ viddhi sarvalaṅkāvināśinīm |
tadalaṃ kālapāśena sītāvigraharūpiṇā || 35 ||
svayaṃ skandhāvasaktena kṣemamātmani cintyatām |
sītāyāstejasā dagdhāṃ rāmakopaprapīḍitām || 36 ||
dahyamānāmimāṃ paśya purīṃ sāṭṭapratolikām |
svāni mitrāṇi mantrīṃśca jñātīn bhrātrūn sutān hitān || 37 ||
bhogāndārāṃśca laṅkāṃ ca mā vināśamupānaya |
satyaṃ rākṣasarājendra śṛṇuṣva vacanaṃ mama || 38 ||
rāmadāsasya dūtasya vānarasya viśeṣataḥ |
sarvān lokān susaṃhṛtya sabhūtān sacarācarān || 39 ||
punareva tathā sraṣṭuṃ śakto rāmo mahāyaśāḥ |
devāsuranarendreṣu yakṣarakṣogaṇeṣu ca || 40 ||
vidyādhareṣu sarveṣu gandharveṣūrageṣu ca |
siddheṣu kinnarendreṣu patatriṣu ca sarvataḥ || 41 ||
sarvabhūteṣu sarvatra sarvakāleṣu nāsti saḥ |
yo rāmaṃ pratiyudhyeta viṣṇutulyaparākramam || 42 ||
sarvalokeśvarasyaivaṃ kṛtvā vipriyamuttamam |
rāmasya rājasiṃhasya durlabhaṃ tava jīvitam || 43 ||
devāśca daityāśca niśācarendra gandharvavidyādharanāgayakṣāḥ |
rāmasya lokatrayanāyakasya sthātuṃ na śaktāssamareṣu sarve || 44 ||
brahmā svayambhūścaturānano vā rudrastriṇetrastripurāntako vā |
indro mahendrassuranāyako vā trātuṃ na śaktā yudhi rāmavadhyam || 45 ||
sa sauṣṭhavopetamadīnavādinaḥ kaperniśamyāpratimo'priyaṃ vacaḥ |
daśānanaḥ kopavivṛttalocanaḥ samādiśattasya vadhaṃ mahākapeḥ || 46 ||
ityārṣe śrīmadrāmāyaṇe vālmīkīya ādikāvye sundarakāṇḍe ekapañcāśassargaḥ ||
InfoLyter.in — Sacred Vedic Knowledge Portal · Free forever