5.29 Sundarakanda - Ekonatrimsha Sargah

ॐ

5.29 𑌸𑍁𑌨𑍍𑌦𑌰𑌕𑌾𑌣𑍍𑌡 - 𑌏𑌕𑍋𑌨𑌤𑍍𑌰𑌿𑌂𑌶 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।

𑌅𑌥 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌤𑌥𑌾𑌗𑌤𑌾𑌂 𑌤𑌾𑌂 𑌵𑍍𑌯𑌥𑌿𑌤𑌾𑌮𑌨𑌿𑌨𑍍𑌦𑌿𑌤𑌾𑌂 𑌵𑍍𑌯𑌪𑍇𑌤𑌹𑌰𑍍𑌷𑌾𑌂 𑌪𑌰𑌿𑌦𑍀𑌨𑌮𑌾𑌨𑌸𑌾𑌮𑍍 ।

𑌶𑍁𑌭𑌾𑌂 𑌨𑌿𑌮𑌿𑌤𑍍𑌤𑌾𑌨𑌿 𑌶𑍁𑌭𑌾𑌨𑌿 𑌭𑍇𑌜𑌿𑌰𑍇 𑌨𑌰𑌂 𑌶𑍍𑌰𑌿𑌯𑌾 𑌜𑍁𑌷𑍍𑌟𑌮𑌿𑌵𑍋𑌪𑌜𑍀𑌵𑌿𑌨𑌃 ॥ 1 ॥

𑌤𑌸𑍍𑌯𑌾𑌃 𑌶𑍁𑌭𑌂 𑌵𑌾𑌮𑌮𑌰𑌾𑌲𑌪𑌕𑍍𑌷𑍍𑌮 𑌰𑌾𑌜𑍀𑌵𑍃𑌤𑌂 𑌕𑍃𑌷𑍍𑌣𑌵𑌿𑌶𑌾𑌲𑌶𑍁𑌕𑍍𑌲𑌮𑍍 ।

𑌪𑍍𑌰𑌾𑌸𑍍𑌪𑌨𑍍𑌦𑌤𑍈𑌕𑌂 𑌨𑌯𑌨𑌂 𑌸𑍁𑌕𑍇𑌶𑍍𑌯𑌾 𑌮𑍀𑌨𑌾𑌹𑌤𑌂 𑌪𑌦𑍍𑌮𑌮𑌿𑌵𑌾𑌭𑌿𑌤𑌾𑌮𑍍𑌰𑌮𑍍 ॥ 2 ॥

𑌭𑍁𑌜𑌶𑍍𑌚 𑌚𑌾𑌰𑍍𑌵𑌞𑍍𑌚𑌿𑌤𑌪𑍀𑌨𑌵𑍃𑌤𑍍𑌤𑌃 𑌪𑌰𑌾𑌰𑍍𑌥𑍍𑌯𑌕𑌾𑌲𑌾𑌗𑌰𑍁𑌚𑌨𑍍𑌦𑌨𑌾𑌰𑍍𑌹𑌃 ।

𑌅𑌨𑍁𑌤𑍍𑌤𑌮𑍇𑌨𑌾𑌧𑍍𑌯𑍁𑌷𑌿𑌤𑌃 𑌪𑍍𑌰𑌿𑌯𑍇𑌣 𑌚𑌿𑌰𑍇𑌣 𑌵𑌾𑌮𑌃 𑌸𑌮𑌵𑍇𑌪𑌤𑌾𑌽𑌶𑍁 ॥ 3 ॥

𑌗𑌜𑍇𑌨𑍍𑌦𑍍𑌰𑌹𑌸𑍍𑌤𑌪𑍍𑌰𑌤𑌿𑌮𑌶𑍍𑌚 𑌪𑍀𑌨 𑌸𑍍𑌤𑌯𑍋𑌰𑍍𑌦𑍍𑌵𑌯𑍋𑌃 𑌸𑌮𑍍𑌹𑌤𑌯𑍋𑌃 𑌸𑍁𑌜𑌾𑌤𑌃 ।

𑌪𑍍𑌰𑌸𑍍𑌪𑌨𑍍𑌦𑌮𑌾𑌨𑌃 𑌪𑍁𑌨𑌰𑍂𑌰𑍁𑌰𑌸𑍍𑌯𑌾 𑌰𑌾𑌮𑌂 𑌪𑍁𑌰𑌸𑍍𑌤𑌾𑌤𑍍 𑌸𑍍𑌥𑌿𑌤𑌮𑌾𑌚𑌚𑌕𑍍𑌷𑍇 ॥ 4 ॥

𑌶𑍁𑌭𑌂 𑌪𑍁𑌨𑌰𑍍𑌹𑍇𑌮𑌸𑌮𑌾𑌨𑌵𑌰𑍍𑌣 𑌮𑍀𑌷𑌦𑍍𑌰𑌜𑍋𑌧𑍍𑌵𑌸𑍍𑌤𑌮𑌿𑌵𑌾𑌮𑌲𑌾𑌕𑍍𑌷𑍍𑌯𑌾𑌃 ।

𑌵𑌾𑌸 𑌸𑍍𑌸𑍍𑌥𑌿𑌤𑌾𑌯𑌾 𑌶𑍍𑌶𑌿𑌖𑌰𑌾𑌗𑍍𑌰𑌦𑌨𑍍𑌤𑍍𑌯𑌾𑌃 𑌕𑌿𑌞𑍍𑌚𑌿𑌤𑍍𑌪𑌰𑌿𑌸𑍍𑌰𑌂𑌸𑌤 𑌚𑌾𑌰𑍁𑌗𑌾𑌤𑍍𑌯𑍍𑌰𑌾𑌃 ॥ 5 ॥

𑌏𑌤𑍈𑌰𑍍𑌨𑌿𑌮𑌿𑌤𑍍𑌤𑍈𑌰𑌪𑌰𑍈𑌶𑍍𑌚 𑌸𑍁𑌭𑍍𑌰𑍂𑌃 𑌸𑌮𑍍𑌬𑍋𑌧𑌿𑌤𑌾 𑌪𑍍𑌰𑌾𑌗𑌪𑌿 𑌸𑌾𑌧𑍁 𑌸𑌿𑌦𑍍𑌧𑍈𑌃 ।

𑌵𑌾𑌤𑌾𑌤𑌪𑌕𑍍𑌲𑌾𑌨𑍍𑌤𑌮𑌿𑌵 𑌪𑍍𑌰𑌣𑌷𑍍𑌟𑌂 𑌵𑌰𑍍𑌷𑍇𑌣 𑌬𑍀𑌜𑌂 𑌪𑍍𑌰𑌤𑌿𑌸𑌞𑍍𑌜𑌹𑌰𑍍𑌷 ॥ 6 ॥

𑌤𑌸𑍍𑌯𑌾𑌃 𑌪𑍁𑌨𑌰𑍍𑌬𑌿𑌮𑍍𑌬𑌫𑌲𑌾𑌧𑌰𑍋𑌷𑍍𑌠𑌂 𑌸𑍍𑌵𑌕𑍍𑌷𑌿𑌭𑍍𑌰𑍁𑌕𑍇𑌶𑌾𑌨𑍍𑌤𑌮𑌰𑌾𑌲𑌪𑌕𑍍𑌷𑍍𑌮 ।

𑌵𑌕𑍍𑌤𑍍𑌰𑌂 𑌬𑌭𑌾𑌸𑍇 𑌸𑌿𑌤𑌶𑍁𑌕𑍍𑌲𑌦𑌂𑌷𑍍𑌟𑍍𑌰𑌂 𑌰𑌾𑌹𑍋𑌰𑍍𑌮𑍁𑌖𑌾𑌚𑍍𑌚𑌨𑍍𑌦𑍍𑌰 𑌇𑌵 𑌪𑍍𑌰𑌮𑍁𑌕𑍍𑌤𑌃 ॥ 7 ॥

𑌸𑌾 𑌵𑍀𑌤𑌶𑍋𑌕𑌾 𑌵𑍍𑌯𑌪𑌨𑍀𑌤𑌤𑌨𑍍𑌦𑍍𑌰𑍀 𑌶𑌾𑌨𑍍𑌤𑌜𑍍𑌵𑌰𑌾 𑌹𑌰𑍍𑌷𑌵𑌿𑌬𑍁𑌦𑍍𑌧𑌸𑌤𑍍𑌤𑍍𑌵𑌾 ।

𑌅𑌶𑍋𑌭𑌤𑌾𑌰𑍍𑌯𑌾 𑌵𑌦𑌨𑍇𑌨 𑌶𑍁𑌕𑍍𑌲𑍇 𑌶𑍀𑌤𑌾𑌂𑌶𑍁𑌨𑌾 𑌰𑌾𑌤𑍍𑌰𑌿𑌰𑌿𑌵𑍋𑌦𑌿𑌤𑍇𑌨 ॥ 8 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha ekonatriṃśassargaḥ |

tathāgatāṃ tāṃ vyathitāmaninditāṃ vyapetaharṣāṃ paridīnamānasām |

śubhāṃ nimittāni śubhāni bhejire naraṃ śriyā juṣṭamivopajīvinaḥ || 1 ||

tasyāḥ śubhaṃ vāmamarālapakṣma rājīvṛtaṃ kṛṣṇaviśālaśuklam |

prāspandataikaṃ nayanaṃ sukeśyā mīnāhataṃ padmamivābhitāmram || 2 ||

bhujaśca cārvañcitapīnavṛttaḥ parārthyakālāgarucandanārhaḥ |

anuttamenādhyuṣitaḥ priyeṇa cireṇa vāmaḥ samavepatā'śu || 3 ||

gajendrahastapratimaśca pīna stayordvayoḥ samhatayoḥ sujātaḥ |

praspandamānaḥ punarūrurasyā rāmaṃ purastāt sthitamācacakṣe || 4 ||

śubhaṃ punarhemasamānavarṇa mīṣadrajodhvastamivāmalākṣyāḥ |

vāsa ssthitāyā śśikharāgradantyāḥ kiñcitparisraṃsata cārugātyrāḥ || 5 ||

etairnimittairaparaiśca subhrūḥ sambodhitā prāgapi sādhu siddhaiḥ |

vātātapaklāntamiva praṇaṣṭaṃ varṣeṇa bījaṃ pratisañjaharṣa || 6 ||

tasyāḥ punarbimbaphalādharoṣṭhaṃ svakṣibhrukeśāntamarālapakṣma |

vaktraṃ babhāse sitaśukladaṃṣṭraṃ rāhormukhāccandra iva pramuktaḥ || 7 ||

sā vītaśokā vyapanītatandrī śāntajvarā harṣavibuddhasattvā |

aśobhatāryā vadanena śukle śītāṃśunā rātririvoditena || 8 ||

ityārṣe śrīmadrāmāyaṇe vālmīkīya ādikāvye sundarakāṇḍe ekonatriṃśassargaḥ ||