5.1 Sundarakanda - Prathama Sargah

ॐ

5.1 𑌸𑍁𑌨𑍍𑌦𑌰𑌕𑌾𑌣𑍍𑌡 - 𑌪𑍍𑌰𑌥𑌮 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑌮𑍍 ।

𑌅𑌥 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ।

𑌤𑌤𑍋 𑌰𑌾𑌵𑌣𑌨𑍀𑌤𑌾𑌯𑌾𑌃 𑌸𑍀𑌤𑌾𑌯𑌾𑌃 𑌶𑌤𑍍𑌰𑍁𑌕𑌰𑍍𑌶𑌨𑌃 ।

𑌇𑌯𑍇𑌷 𑌪𑌦𑌮𑌨𑍍𑌵𑍇𑌷𑍍𑌟𑍁𑌂 𑌚𑌾𑌰𑌣𑌾𑌚𑌰𑌿𑌤𑍇 𑌪𑌥𑌿 ॥ 1 ॥

𑌦𑍁𑌷𑍍𑌕𑌰𑌂 𑌨𑌿𑌷𑍍𑌪𑍍𑌰𑌤𑌿𑌦𑍍𑌵𑌨𑍍𑌦𑍍𑌵𑌂 𑌚𑌿𑌕𑍀𑌰𑍍𑌷𑌨𑍍 𑌕𑌰𑍍𑌮 𑌵𑌾𑌨𑌰𑌃 ।

𑌸𑌮𑍁𑌦𑌗𑍍𑌰𑌶𑌿𑌰𑍋𑌗𑍍𑌰𑍀𑌵𑍋 𑌗𑌵𑌾𑌮𑍍𑌪𑌤𑌿𑌰𑌿𑌵𑌾𑌬𑌭𑍗 ॥ 2 ॥

𑌅𑌥 𑌵𑍈𑌡𑍂𑌰𑍍𑌯𑌵𑌰𑍍𑌣𑍇𑌷𑍁 𑌶𑌾𑌦𑍍𑌵𑌲𑍇𑌷𑍁 𑌮𑌹𑌾𑌬𑌲𑌃 ।

𑌧𑍀𑌰𑌃 𑌸𑌲𑌿𑌲𑌕𑌲𑍍𑌪𑍇𑌷𑍁 𑌵𑌿𑌚𑌚𑌾𑌰 𑌯𑌥𑌾𑌸𑍁𑌖𑌮𑍍 ॥ 3 ॥

𑌦𑍍𑌵𑌿𑌜𑌾𑌨𑍍 𑌵𑌿𑌤𑍍𑌰𑌾𑌸𑌯𑌨𑍍 𑌧𑍀𑌮𑌾𑌨𑍁𑌰𑌸𑌾 𑌪𑌾𑌦𑌪𑌾𑌨𑍍 𑌹𑌰𑌨𑍍 ।

𑌮𑍃𑌗𑌾𑌂𑌶𑍍𑌚 𑌸𑍁𑌬𑌹𑍂𑌨𑍍𑌨𑌿𑌘𑍍𑌨𑌨𑍍 𑌪𑍍𑌰𑌵𑍃𑌦𑍍𑌧 𑌇𑌵 𑌕𑍇𑌸𑌰𑍀 ॥ 4 ॥

𑌨𑍀𑌲𑌲𑍋𑌹𑌿𑌤𑌮𑌾𑌞𑍍𑌜𑌿𑌷𑍍𑌠𑌪𑌤𑍍𑌰𑌵𑌰𑍍𑌣𑍈𑌃 𑌸𑌿𑌤𑌾𑌸𑌿𑌤𑍈𑌃 ।

𑌸𑍍𑌵𑌭𑌾𑌵𑌵𑌿𑌹𑌿𑌤𑍈𑌶𑍍𑌚𑌿𑌤𑍍𑌰𑍈𑌰𑍍𑌧𑌾𑌤𑍁𑌭𑌿𑌃 𑌸𑌮𑌲𑌙𑍍𑌕𑍃𑌤𑌮𑍍 ॥ 5 ॥

𑌕𑌾𑌮𑌰𑍂𑌪𑌿𑌭𑌿𑌰𑌾𑌵𑌿𑌷𑍍𑌟𑌮𑌭𑍀𑌕𑍍𑌷𑍍𑌣𑌂 𑌸𑌪𑌰𑌿𑌚𑍍𑌛𑌦𑍈𑌃 ।

𑌯𑌕𑍍𑌷𑌕𑌿𑌨𑍍𑌨𑌰𑌗𑌨𑍍𑌧𑌰𑍍𑌵𑍈𑌰𑍍𑌦𑍇𑌵𑌕𑌲𑍍𑌪𑍈𑌶𑍍𑌚 𑌪𑌨𑍍𑌨𑌗𑍈𑌃 ॥ 6 ॥

𑌸 𑌤𑌸𑍍𑌯 𑌗𑌿𑌰𑌿𑌵𑌰𑍍𑌯𑌸𑍍𑌯 𑌤𑌲𑍇 𑌨𑌾𑌗𑌵𑌰𑌾𑌯𑍁𑌤𑍇 ।

𑌤𑌿𑌷𑍍𑌠𑌨𑍍 𑌕𑌪𑌿𑌵𑌰𑌸𑍍𑌤𑌤𑍍𑌰 𑌹𑍍𑌰𑌦𑍇 𑌨𑌾𑌗 𑌇𑌵𑌾𑌬𑌭𑍗 ॥ 7 ॥

𑌸 𑌸𑍂𑌰𑍍𑌯𑌾𑌯 𑌮𑌹𑍇𑌨𑍍𑌦𑍍𑌰𑌾𑌯 𑌪𑌵𑌨𑌾𑌯 𑌸𑍍𑌵𑌯𑌮𑍍𑌭𑍁𑌵𑍇 ।

𑌭𑍂𑌤𑍇𑌭𑍍𑌯𑌶𑍍𑌚𑌾𑌞𑍍𑌜𑌲𑌿𑌂 𑌕𑍃𑌤𑍍𑌵𑌾 𑌚𑌕𑌾𑌰 𑌗𑌮𑌨𑍇 𑌮𑌤𑌿𑌮𑍍 ॥ 8 ॥

𑌅𑌞𑍍𑌜𑌲𑌿𑌂 𑌪𑍍𑌰𑌾𑌙𑍍𑌮𑍁𑌖𑌃 𑌕𑍁𑌰𑍍𑌵𑌨𑍍 𑌪𑌵𑌨𑌾𑌯𑌾𑌤𑍍𑌮𑌯𑍋𑌨𑌯𑍇 ।

𑌤𑌤𑍋 𑌹𑌿 𑌵𑌵𑍃𑌧𑍇 𑌗𑌨𑍍𑌤𑍁𑌂 𑌦𑌕𑍍𑌷𑌿𑌣𑍋 𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ॥ 9 ॥

𑌪𑍍𑌲𑌵𑌙𑍍𑌗𑌪𑍍𑌰𑌵𑌰𑍈𑌰𑍍𑌦𑍃𑌷𑍍𑌟𑌃 𑌪𑍍𑌲𑌵𑌨𑍇 𑌕𑍃𑌤𑌨𑌿𑌶𑍍𑌚𑌯𑌃 ।

𑌵𑌵𑍃𑌧𑍇 𑌰𑌾𑌮𑌵𑍃𑌦𑍍𑌧𑍍𑌯𑌰𑍍𑌥𑌂 𑌸𑌮𑍁𑌦𑍍𑌰 𑌇𑌵 𑌪𑌰𑍍𑌵𑌸𑍁 ॥ 10 ॥

𑌨𑌿𑌷𑍍𑌪𑍍𑌰𑌮𑌾𑌣𑌶𑌰𑍀𑌰𑌃 𑌸𑌨𑍍 𑌲𑌿𑌲𑌙𑍍𑌘𑌯𑌿𑌷𑍁𑌰𑌰𑍍𑌣𑌵𑌮𑍍 ।

𑌬𑌾𑌹𑍁𑌭𑍍𑌯𑌾𑌂 𑌪𑍀𑌡𑌯𑌾𑌮𑌾𑌸 𑌚𑌰𑌣𑌾𑌭𑍍𑌯𑌾𑌂 𑌚 𑌪𑌰𑍍𑌵𑌤𑌮𑍍 ॥ 11 ॥

𑌸 𑌚𑌚𑌾𑌲𑌾𑌚𑌲𑌶𑍍𑌚𑌾𑌪𑌿 𑌮𑍁𑌹𑍂𑌰𑍍𑌤𑌂 𑌕𑌪𑌿𑌪𑍀𑌡𑌿𑌤𑌃 ।

𑌤𑌰𑍂𑌣𑌾𑌂 𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌣𑌾𑌂 𑌸𑌰𑍍𑌵𑌂 𑌪𑍁𑌷𑍍𑌪𑌮𑌶𑌾𑌤𑌯𑌤𑍍 ॥ 12 ॥

𑌤𑍇𑌨 𑌪𑌾𑌦𑌪𑌮𑍁𑌕𑍍𑌤𑍇𑌨 𑌪𑍁𑌷𑍍𑌪𑍗𑌘𑍇𑌣 𑌸𑍁𑌗𑌨𑍍𑌧𑌿𑌨𑌾 ।

𑌸𑌰𑍍𑌵𑌤𑌃 𑌸𑌂𑌵𑍃𑌤𑌃 𑌶𑍈𑌲𑍋 𑌬𑌭𑍗 𑌪𑍁𑌷𑍍𑌪𑌮𑌯𑍋 𑌯𑌥𑌾 ॥ 13 ॥

𑌤𑍇𑌨 𑌚𑍋𑌤𑍍𑌤𑌮𑌵𑍀𑌰𑍍𑌯𑍇𑌣 𑌪𑍀𑌡𑍍𑌯𑌮𑌾𑌨𑌃 𑌸 𑌪𑌰𑍍𑌵𑌤𑌃 ।

𑌸𑌲𑌿𑌲𑌂 𑌸𑌮𑍍𑌪𑍍𑌰𑌸𑍁𑌸𑍍𑌰𑌾𑌵 𑌮𑌦𑌂 𑌮𑌤𑍍𑌤 𑌇𑌵 𑌦𑍍𑌵𑌿𑌪𑌃 ॥ 14 ॥

𑌪𑍀𑌡𑍍𑌯𑌮𑌾𑌨𑌸𑍍𑌤𑍁 𑌬𑌲𑌿𑌨𑌾 𑌮𑌹𑍇𑌨𑍍𑌦𑍍𑌰𑌸𑍍𑌤𑍇𑌨 𑌪𑌰𑍍𑌵𑌤𑌃 ।

𑌰𑍀𑌤𑍀𑌰𑍍𑌨𑌿𑌰𑍍𑌵𑌰𑍍𑌤𑌯𑌾𑌮𑌾𑌸 𑌕𑌾𑌞𑍍𑌚𑌨𑌾𑌞𑍍𑌜𑌨𑌰𑌾𑌜𑌤𑍀𑌃 ॥ 15 ॥

𑌮𑍁𑌮𑍋𑌚 𑌚 𑌶𑌿𑌲𑌾𑌃 𑌶𑍈𑌲𑍋 𑌵𑌿𑌶𑌾𑌲𑌾𑌃 𑌸𑌮𑌨𑌃𑌶𑌿𑌲𑌾𑌃 ।

𑌮𑌧𑍍𑌯𑌮𑍇𑌨𑌾𑌰𑍍𑌚𑌿𑌷𑌾 𑌜𑍁𑌷𑍍𑌟𑌾 𑌧𑍂𑌮𑌰𑌾𑌜𑍀𑌰𑌿𑌵𑌾𑌨𑌲𑌃 ॥ 16 ॥

𑌗𑌿𑌰𑌿𑌣𑌾 𑌪𑍀𑌡𑍍𑌯𑌮𑌾𑌨𑍇𑌨 𑌪𑍀𑌡𑍍𑌯𑌮𑌾𑌨𑌾𑌨𑌿 𑌸𑌰𑍍𑌵𑌤𑌃 ।

𑌗𑍁𑌹𑌾𑌵𑌿𑌷𑍍𑌟𑌾𑌨𑌿 𑌭𑍂𑌤𑌾𑌨𑌿 𑌵𑌿𑌨𑍇𑌦𑍁𑌰𑍍𑌵𑌿𑌕𑍃𑌤𑍈𑌃 𑌸𑍍𑌵𑌰𑍈𑌃 ॥ 17 ॥

𑌸 𑌮𑌹𑌾𑌸𑌤𑍍𑌤𑍍𑌵𑌸𑌨𑍍𑌨𑌾𑌦𑌃 𑌶𑍈𑌲𑌪𑍀𑌡𑌾𑌨𑌿𑌮𑌿𑌤𑍍𑌤𑌜𑌃 ।

𑌪𑍃𑌥𑌿𑌵𑍀𑌂 𑌪𑍂𑌰𑌯𑌾𑌮𑌾𑌸 𑌦𑌿𑌶𑌶𑍍𑌚𑍋𑌪𑌵𑌨𑌾𑌨𑌿 𑌚 ॥ 18 ॥

𑌶𑌿𑌰𑍋𑌭𑌿𑌃 𑌪𑍃𑌥𑍁𑌭𑌿𑌃 𑌸𑌰𑍍𑌪𑌾 𑌵𑍍𑌯𑌕𑍍𑌤𑌸𑍍𑌵𑌸𑍍𑌤𑌿𑌕𑌲𑌕𑍍𑌷𑌣𑍈𑌃 ।

𑌵𑌮𑌨𑍍𑌤𑌃 𑌪𑌾𑌵𑌕𑌂 𑌘𑍋𑌰𑌂 𑌦𑌦𑌂𑌶𑍁𑌰𑍍𑌦𑌶𑌨𑍈𑌃 𑌶𑌿𑌲𑌾𑌃 ॥ 19 ॥

𑌤𑌾𑌸𑍍𑌤𑌦𑌾 𑌸𑌵𑌿𑌷𑍈𑌰𑍍𑌦𑌷𑍍𑌟𑌾𑌃 𑌕𑍁𑌪𑌿𑌤𑍈𑌸𑍍𑌤𑍈𑌰𑍍𑌮𑌹𑌾𑌶𑌿𑌲𑌾𑌃 ।

𑌜𑌜𑍍𑌜𑍍𑌵𑌲𑍁𑌃 𑌪𑌾𑌵𑌕𑍋𑌦𑍍𑌦𑍀𑌪𑍍𑌤𑌾 𑌬𑌿𑌭𑌿𑌦𑍁𑌶𑍍𑌚 𑌸𑌹𑌸𑍍𑌰𑌧𑌾 ॥ 20 ॥

𑌯𑌾𑌨𑌿 𑌚𑍗𑌷𑌧𑌜𑌾𑌲𑌾𑌨𑌿 𑌤𑌸𑍍𑌮𑌿𑌨𑍍 𑌜𑌾𑌤𑌾𑌨𑌿 𑌪𑌰𑍍𑌵𑌤𑍇 ।

𑌵𑌿𑌷𑌘𑍍𑌨𑌾𑌨𑍍𑌯𑌪𑌿 𑌨𑌾𑌗𑌾𑌨𑌾𑌂 𑌨 𑌶𑍇𑌕𑍁𑌃 𑌶𑌮𑌿𑌤𑍁𑌂 𑌵𑌿𑌷𑌮𑍍 ॥ 21 ॥

𑌭𑌿𑌦𑍍𑌯𑌤𑍇𑌽𑌯𑌂 𑌗𑌿𑌰𑌿𑌰𑍍𑌭𑍂𑌤𑍈𑌰𑌿𑌤𑌿 𑌮𑌤𑍍𑌤𑍍𑌵𑌾 𑌤𑌪𑌸𑍍𑌵𑌿𑌨𑌃 ।

𑌤𑍍𑌰𑌸𑍍𑌤𑌾 𑌵𑌿𑌦𑍍𑌯𑌾𑌧𑌰𑌾𑌸𑍍𑌤𑌸𑍍𑌮𑌾𑌦𑍁𑌤𑍍𑌪𑍇𑌤𑍁𑌃 𑌸𑍍𑌤𑍍𑌰𑍀 𑌗𑌣𑍈𑌃 𑌸𑌹 ॥ 22 ॥

𑌪𑌾𑌨𑌭𑍂𑌮𑌿𑌗𑌤𑌂 𑌹𑌿𑌤𑍍𑌵𑌾 𑌹𑍈𑌮𑌮𑌾𑌸𑌵𑌭𑌾𑌜𑌨𑌮𑍍 ।

𑌪𑌾𑌤𑍍𑌰𑌾𑌣𑌿 𑌚 𑌮𑌹𑌾𑌰𑍍𑌹𑌾𑌣𑌿 𑌕𑌰𑌕𑌾𑌂𑌶𑍍𑌚 𑌹𑌿𑌰𑌣𑍍𑌮𑌯𑌾𑌨𑍍 ॥ 23 ॥

𑌲𑍇𑌹𑍍𑌯𑌾𑌨𑍁𑌚𑍍𑌚𑌾𑌵𑌚𑌾𑌨𑍍 𑌭𑌕𑍍𑌷𑍍𑌯𑌾𑌨𑍍 𑌮𑌾𑌂𑌸𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ।

𑌆𑌰𑍍𑌷𑌭𑌾𑌣𑌿 𑌚 𑌚𑌰𑍍𑌮𑌾𑌣𑌿 𑌖𑌡𑌗𑌾𑌂𑌶𑍍𑌚 𑌕𑌨𑌕𑌤𑍍𑌸𑌰𑍂𑌨𑍍 ॥ 24 ॥

𑌕𑍃𑌤𑌕𑌣𑍍𑌠𑌗𑍁𑌣𑌾𑌃 𑌕𑍍𑌷𑍀𑌬𑌾 𑌰𑌕𑍍𑌤𑌮𑌾𑌲𑍍𑌯𑌾𑌨𑍁𑌲𑍇𑌪𑌨𑌾𑌃 ।

𑌰𑌕𑍍𑌤𑌾𑌕𑍍𑌷𑌾𑌃 𑌪𑍁𑌷𑍍𑌕𑌰𑌾𑌕𑍍𑌷𑌾𑌶𑍍𑌚 𑌗𑌗𑌨𑌂 𑌪𑍍𑌰𑌤𑌿𑌪𑍇𑌦𑌿𑌰𑍇 ॥ 25 ॥

𑌹𑌾𑌰𑌨𑍂𑌪𑍁𑌰𑌕𑍇𑌯𑍂𑌰𑌪𑌾𑌰𑌿𑌹𑌾𑌰𑍍𑌯𑌧𑌰𑌾𑌃 𑌸𑍍𑌤𑍍𑌰𑌿𑌯𑌃 ।

𑌵𑌿𑌸𑍍𑌮𑌿𑌤𑌾𑌃 𑌸𑌸𑍍𑌮𑌿𑌤𑌾𑌸𑍍𑌤𑌸𑍍𑌥𑍁𑌰𑌾𑌕𑌾𑌶𑍇 𑌰𑌮𑌣𑍈𑌃 𑌸𑌹 ॥ 26 ॥

𑌦𑌰𑍍𑌶𑌯𑌨𑍍𑌤𑍋 𑌮𑌹𑌾𑌵𑌿𑌦𑍍𑌯𑌾𑌂 𑌵𑌿𑌦𑍍𑌯𑌾𑌧𑌰𑌮𑌹𑌰𑍍𑌷𑌯𑌃 ।

𑌸𑌹𑌿𑌤𑌾𑌸𑍍𑌤𑌸𑍍𑌥𑍁𑌰𑌾𑌕𑌾𑌶𑍇 𑌵𑍀𑌕𑍍𑌷𑌾𑌞𑍍𑌚𑌕𑍍𑌰𑍁𑌶𑍍𑌚 𑌪𑌰𑍍𑌵𑌤𑌮𑍍 ॥ 27 ॥

𑌶𑍁𑌶𑍍𑌰𑍁𑌵𑍁𑌶𑍍𑌚 𑌤𑌦𑌾 𑌶𑌬𑍍𑌦𑌮𑍃𑌷𑍀𑌣𑌾𑌂 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ।

𑌚𑌾𑌰𑌣𑌾𑌨𑌾𑌂 𑌚 𑌸𑌿𑌦𑍍𑌧𑌾𑌨𑌾𑌂 𑌸𑍍𑌥𑌿𑌤𑌾𑌨𑌾𑌂 𑌵𑌿𑌮𑌲𑍇𑌽𑌮𑍍𑌬𑌰𑍇 ॥ 28 ॥

𑌏𑌷 𑌪𑌰𑍍𑌵𑌤𑌸𑌙𑍍𑌕𑌾𑌶𑍋 𑌹𑌨𑍁𑌮𑌾𑌨𑍍 𑌮𑌾𑌰𑍁𑌤𑌾𑌤𑍍𑌮𑌜𑌃 ।

𑌤𑌿𑌤𑍀𑌰𑍍𑌷𑌤𑌿 𑌮𑌹𑌾𑌵𑍇𑌗𑌸𑍍𑌸𑌮𑍁𑌦𑍍𑌰𑌂 𑌮𑌕𑌰𑌾𑌲𑌯𑌮𑍍 ॥ 29 ॥

𑌰𑌾𑌮𑌾𑌰𑍍𑌥𑌂 𑌵𑌾𑌨𑌰𑌾𑌰𑍍𑌥𑌂 𑌚 𑌚𑌿𑌕𑍀𑌰𑍍𑌷𑌨𑍍 𑌕𑌰𑍍𑌮 𑌦𑍁𑌷𑍍𑌕𑌰𑌮𑍍 ।

𑌸𑌮𑍁𑌦𑍍𑌰𑌸𑍍𑌯 𑌪𑌰𑌂 𑌪𑌾𑌰𑌂 𑌦𑍁𑌷𑍍𑌪𑍍𑌰𑌾𑌪𑌂 𑌪𑍍𑌰𑌾𑌪𑍍𑌤𑍁𑌮𑌿𑌚𑍍𑌛𑌤𑌿 ॥ 30 ॥

𑌇𑌤𑌿 𑌵𑌿𑌦𑍍𑌯𑌾𑌧𑌰𑌾𑌃 𑌶𑍍𑌰𑍁𑌤𑍍𑌵𑌾 𑌵𑌚𑌸𑍍𑌤𑍇𑌷𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।

𑌤𑌮𑌪𑍍𑌰𑌮𑍇𑌯𑌂 𑌦𑌦𑍃𑌶𑍁𑌃 𑌪𑌰𑍍𑌵𑌤𑍇 𑌵𑌾𑌨𑌰𑌰𑍍𑌷𑌭𑌮𑍍 ॥ 31 ॥

𑌦𑍁𑌧𑍁𑌵𑍇 𑌚 𑌸 𑌰𑍋𑌮𑌾𑌣𑌿 𑌚𑌕𑌮𑍍𑌪𑍇 𑌚𑌾𑌚𑌲𑍋𑌪𑌮𑌃 ।

𑌨𑌨𑌾𑌦 𑌸𑍁𑌮𑌹𑌾𑌨𑌾𑌦𑌂 𑌸𑍁𑌮𑌹𑌾𑌨𑌿𑌵 𑌤𑍋𑌯𑌦𑌃 ॥ 32 ॥

𑌆𑌨𑍁𑌪𑍂𑌰𑍍𑌵𑍍𑌯𑍇𑌣 𑌵𑍃𑌤𑍍𑌤𑌂 𑌚 𑌲𑌾𑌙𑍍𑌗𑍂𑌲𑌂 𑌲𑍋𑌮𑌭𑌿𑌶𑍍𑌚𑌿𑌤𑌮𑍍 ।

𑌉𑌤𑍍𑌪𑌤𑌿𑌷𑍍𑌯𑌨𑍍 𑌵𑌿𑌚𑌿𑌕𑍍𑌷𑍇𑌪 𑌪𑌕𑍍𑌷𑌿𑌰𑌾𑌜 𑌇𑌵𑍋𑌰𑌗𑌮𑍍 ॥ 33 ॥

𑌤𑌸𑍍𑌯 𑌲𑌾𑌙𑍍𑌗𑍂𑌲𑌮𑌾𑌵𑌿𑌦𑍍𑌧𑌮𑌾𑌤𑍍𑌤𑌵𑍇𑌗𑌸𑍍𑌯 𑌪𑍃𑌷𑍍𑌠𑌤𑌃 ।

𑌦𑌦𑍃𑌶𑍇 𑌗𑌰𑍁𑌡𑍇𑌨𑍇𑌵 𑌹𑍍𑌰𑌿𑌯𑌮𑌾𑌣𑍋 𑌮𑌹𑍋𑌰𑌗𑌃 ॥ 34 ॥

𑌬𑌾𑌹𑍂 𑌸𑌂𑌸𑍍𑌤𑌮𑍍𑌭𑌯𑌾𑌮𑌾𑌸 𑌮𑌹𑌾𑌪𑌰𑌿𑌘𑌸𑌨𑍍𑌨𑌿𑌭𑍗 ।

𑌸𑌸𑌾𑌦 𑌚 𑌕𑌪𑌿𑌃 𑌕𑌟𑍍𑌯𑌾𑌂 𑌚𑌰𑌣𑍗 𑌸𑌞𑍍𑌚𑍁𑌕𑍋𑌚 𑌚 ॥ 35 ॥

𑌸𑌂𑌹𑍃𑌤𑍍𑌯 𑌚 𑌭𑍁𑌜𑍗 𑌶𑍍𑌰𑍀𑌮𑌾𑌂𑌸𑍍𑌤𑌥𑍈𑌵 𑌚 𑌶𑌿𑌰𑍋𑌧𑌰𑌾𑌮𑍍 ।

𑌤𑍇𑌜𑌃 𑌸𑌤𑍍𑌤𑍍𑌵𑌂 𑌤𑌥𑌾 𑌵𑍀𑌰𑍍𑌯𑌮𑌾𑌵𑌿𑌵𑍇𑌶 𑌸 𑌵𑍀𑌰𑍍𑌯𑌵𑌾𑌨𑍍 ॥ 36 ॥

𑌮𑌾𑌰𑍍𑌗𑌮𑌾𑌲𑍋𑌕𑌯𑌨𑍍𑌦𑍂𑌰𑌾𑌦𑍂𑌰𑍍𑌧𑍍𑌵𑌂 𑌪𑍍𑌰𑌣𑌿𑌹𑌿𑌤𑍇𑌕𑍍𑌷𑌣𑌃 ।

𑌰𑍁𑌰𑍋𑌧 𑌹𑍃𑌦𑌯𑍇 𑌪𑍍𑌰𑌾𑌣𑌾𑌨𑌾𑌕𑌾𑌶𑌮𑌵𑌲𑍋𑌕𑌯𑌨𑍍 ॥ 37 ॥

𑌪𑌦𑍍𑌭𑍍𑌯𑌾𑌂 𑌦𑍃𑌢𑌮𑌵𑌸𑍍𑌥𑌾𑌨𑌂 𑌕𑍃𑌤𑍍𑌵𑌾 𑌸 𑌕𑌪𑌿𑌕𑍁𑌞𑍍𑌜𑌰𑌃 ।

𑌨𑌿𑌕𑍁𑌞𑍍𑌚𑍍𑌯 𑌕𑌰𑍍𑌣𑍗 𑌹𑌨𑍁𑌮𑌾𑌨𑍁𑌤𑍍𑌪𑌤𑌿𑌷𑍍𑌯𑌨𑍍 𑌮𑌹𑌾𑌬𑌲𑌃 ।

𑌵𑌾𑌨𑌰𑌾𑌨𑍍 𑌵𑌾𑌨𑌰𑌶𑍍𑌰𑍇𑌷𑍍𑌠 𑌇𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 38 ॥

𑌯𑌥𑌾 𑌰𑌾𑌘𑌵𑌨𑌿𑌰𑍍𑌮𑍁𑌕𑍍𑌤𑌃 𑌶𑌰𑌃 𑌶𑍍𑌵𑌸𑌨𑌵𑌿𑌕𑍍𑌰𑌮𑌃 ।

𑌗𑌚𑍍𑌛𑍇𑌤𑍍𑌤𑌦𑍍𑌵𑌦𑍍𑌗𑌮𑌿𑌷𑍍𑌯𑌾𑌮𑌿 𑌲𑌙𑍍𑌕𑌾𑌂 𑌰𑌾𑌵𑌣𑌪𑌾𑌲𑌿𑌤𑌾𑌮𑍍 ॥ 39 ॥

𑌨 𑌹𑌿 𑌦𑍍𑌰𑌕𑍍𑌷𑍍𑌯𑌾𑌮𑌿 𑌯𑌦𑌿 𑌤𑌾𑌂 𑌲𑌙𑍍𑌕𑌾𑌯𑌾𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ।

𑌅𑌨𑍇𑌨𑍈𑌵 𑌹𑌿 𑌵𑍇𑌗𑍇𑌨 𑌗𑌮𑌿𑌷𑍍𑌯𑌾𑌮𑌿 𑌸𑍁𑌰𑌾𑌲𑌯𑌮𑍍 ॥ 40 ॥

𑌯𑌦𑌿 𑌵𑌾 𑌤𑍍𑌰𑌿𑌦𑌿𑌵𑍇 𑌸𑍀𑌤𑌾𑌂 𑌨 𑌦𑍍𑌰𑌕𑍍𑌷𑍍𑌯𑌾𑌮𑍍𑌯𑌕𑍃𑌤𑌶𑍍𑌰𑌮𑌃 ।

𑌬𑌦𑍍𑌧𑍍𑌵𑌾 𑌰𑌾𑌕𑍍𑌷𑌸𑌰𑌾𑌜𑌾𑌨𑌮𑌾𑌨𑌯𑌿𑌷𑍍𑌯𑌾𑌮𑌿 𑌰𑌾𑌵𑌣𑌮𑍍 ॥ 41 ॥

𑌸𑌰𑍍𑌵𑌥𑌾 𑌕𑍃𑌤𑌕𑌾𑌰𑍍𑌯𑍋𑌽𑌹𑌮𑍇𑌷𑍍𑌯𑌾𑌮𑌿 𑌸𑌹 𑌸𑍀𑌤𑌯𑌾 ।

𑌆𑌨𑌯𑌿𑌷𑍍𑌯𑌾𑌮𑌿 𑌵𑌾 𑌲𑌙𑍍𑌕𑌾𑌂 𑌸𑌮𑍁𑌤𑍍𑌪𑌾𑌟𑍍𑌯 𑌸𑌰𑌾𑌵𑌣𑌾𑌮𑍍 ॥ 42 ॥

𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌹𑌨𑍁𑌮𑌾𑌨𑍍𑌵𑌾𑌨𑌰𑌾𑌨𑍍𑌵𑌾𑌨𑌰𑍋𑌤𑍍𑌤𑌮𑌃 ॥ 43 ॥

𑌉𑌤𑍍𑌪𑌪𑌾𑌤𑌾𑌥 𑌵𑍇𑌗𑍇𑌨 𑌵𑍇𑌗𑌵𑌾𑌨𑌵𑌿𑌚𑌾𑌰𑌯𑌨𑍍 ।

𑌸𑍁𑌪𑌰𑍍𑌣𑌮𑌿𑌵 𑌚𑌾𑌤𑍍𑌮𑌾𑌨𑌂 𑌮𑍇𑌨𑍇 𑌸 𑌕𑌪𑌿𑌕𑍁𑌞𑍍𑌜𑌰𑌃 ॥ 44 ॥

𑌸𑌮𑍁𑌤𑍍𑌪𑌤𑌤𑌿 𑌤𑌸𑍍𑌮𑌿𑌂𑌸𑍍𑌤𑍁 𑌵𑍇𑌗𑌾𑌤𑍍𑌤𑍇 𑌨𑌗𑌰𑍋𑌹𑌿𑌣𑌃 ।

𑌸𑌂𑌹𑍃𑌤𑍍𑌯 𑌵𑌿𑌟𑌪𑌾𑌨𑍍 𑌸𑌰𑍍𑌵𑌾𑌨𑍍 𑌸𑌮𑍁𑌤𑍍𑌪𑍇𑌤𑍁𑌃 𑌸𑌮𑌨𑍍𑌤𑌤𑌃 ॥ 45 ॥

𑌸 𑌮𑌤𑍍𑌤𑌕𑍋𑌯𑌷𑍍𑌟𑌿𑌮𑌕𑌾𑌨𑍍 𑌪𑌾𑌦𑌪𑌾𑌨𑍍 𑌪𑍁𑌷𑍍𑌪𑌶𑌾𑌲𑌿𑌨𑌃 ।

𑌉𑌦𑍍𑌵𑌹𑌨𑍍𑌨𑍂𑌰𑍁𑌵𑍇𑌗𑍇𑌨 𑌜𑌗𑌾𑌮 𑌵𑌿𑌮𑌲𑍇𑌽𑌮𑍍𑌬𑌰𑍇 ॥ 46 ॥

𑌊𑌰𑍁𑌵𑍇𑌗𑍋𑌦𑍍𑌧𑌤𑌾 𑌵𑍃𑌕𑍍𑌷𑌾 𑌮𑍁𑌹𑍂𑌰𑍍𑌤𑌂 𑌕𑌪𑌿𑌮𑌨𑍍𑌵𑌯𑍁𑌃 ।

𑌪𑍍𑌰𑌸𑍍𑌥𑌿𑌤𑌂 𑌦𑍀𑌰𑍍𑌘𑌮𑌧𑍍𑌵𑌾𑌨𑌂 𑌸𑍍𑌵𑌬𑌨𑍍𑌧𑍁𑌮𑌿𑌵 𑌬𑌾𑌨𑍍𑌧𑌵𑌾𑌃 ॥ 47 ॥

𑌤𑌮𑍂𑌰𑍁𑌵𑍇𑌗𑍋𑌨𑍍𑌮𑌥𑌿𑌤𑌾𑌃 𑌸𑌾𑌲𑌾𑌶𑍍𑌚𑌾𑌨𑍍𑌯𑍇 𑌨𑌗𑍋𑌤𑍍𑌤𑌮𑌾𑌃 ।

𑌅𑌨𑍁𑌜𑌗𑍍𑌮𑍁𑌰𑍍𑌹𑌨𑍂𑌮𑌨𑍍𑌤𑌂 𑌸𑍈𑌨𑍍𑌯𑌾 𑌇𑌵 𑌮𑌹𑍀𑌪𑌤𑌿𑌮𑍍 ॥ 48 ॥

𑌸𑍁𑌪𑍁𑌷𑍍𑌪𑌿𑌤𑌾𑌗𑍍𑌰𑍈𑌰𑍍𑌬𑌹𑍁𑌭𑌿𑌃 𑌪𑌾𑌦𑌪𑍈𑌰𑌨𑍍𑌵𑌿𑌤𑌃 𑌕𑌪𑌿𑌃 ।

𑌹𑌨𑍁𑌮𑌾𑌨𑍍 𑌪𑌰𑍍𑌵𑌤𑌾𑌕𑌾𑌰𑍋 𑌬𑌭𑍂𑌵𑌾𑌦𑍍𑌭𑍁𑌤𑌦𑌰𑍍𑌶𑌨𑌃 ॥ 49 ॥

𑌸𑌾𑌰𑌵𑌨𑍍𑌤𑍋𑌽𑌥 𑌯𑍇 𑌵𑍃𑌕𑍍𑌷𑌾 𑌨𑍍𑌯𑌮𑌜𑍍𑌜𑌨𑍍 𑌲𑌵𑌣𑌾𑌮𑍍𑌭𑌸𑌿 ।

𑌭𑌯𑌾𑌦𑌿𑌵 𑌮𑌹𑍇𑌨𑍍𑌦𑍍𑌰𑌸𑍍𑌯 𑌪𑌰𑍍𑌵𑌤𑌾 𑌵𑌰𑍁𑌣𑌾𑌲𑌯𑍇 ॥ 50 ॥

𑌸 𑌨𑌾𑌨𑌾𑌕𑍁𑌸𑍁𑌮𑍈𑌃 𑌕𑍀𑌰𑍍𑌣𑌃 𑌕𑌪𑌿𑌃 𑌸𑌾𑌙𑍍𑌕𑍁𑌰𑌕𑍋𑌰𑌕𑍈𑌃 ।

𑌶𑍁𑌶𑍁𑌭𑍇 𑌮𑍇𑌘𑌸𑌙𑍍𑌕𑌾𑌶𑌃 𑌖𑌦𑍍𑌯𑍋𑌤𑍈𑌰𑌿𑌵 𑌪𑌰𑍍𑌵𑌤𑌃 ॥ 51 ॥

𑌵𑌿𑌮𑍁𑌕𑍍𑌤𑌾𑌸𑍍𑌤𑌸𑍍𑌯 𑌵𑍇𑌗𑍇𑌨 𑌮𑍁𑌕𑍍𑌤𑍍𑌵𑌾 𑌪𑍁𑌷𑍍𑌪𑌾𑌣𑌿 𑌤𑍇 𑌦𑍍𑌰𑍁𑌮𑌾𑌃 ।

𑌅𑌵𑌶𑍀𑌰𑍍𑌯𑌨𑍍𑌤 𑌸𑌲𑌿𑌲𑍇 𑌨𑌿𑌵𑍃𑌤𑍍𑌤𑌾𑌃 𑌸𑍁𑌹𑍃𑌦𑍋 𑌯𑌥𑌾 ॥ 52 ॥

𑌲𑌘𑍁𑌤𑍍𑌵𑍇𑌨𑍋𑌪𑌪𑌨𑍍𑌨𑌂 𑌤𑌦𑍍𑌵𑌿𑌚𑌿𑌤𑍍𑌰𑌂 𑌸𑌾𑌗𑌰𑍇𑌽𑌪𑌤𑌤𑍍 ।

𑌦𑍍𑌰𑍁𑌮𑌾𑌣𑌾𑌂 𑌵𑌿𑌵𑌿𑌧𑌂 𑌪𑍁𑌷𑍍𑌪𑌂 𑌕𑌪𑌿𑌵𑌾𑌯𑍁𑌸𑌮𑍀𑌰𑌿𑌤𑌮𑍍 ॥ 53 ॥

𑌤𑌾𑌰𑌾𑌚𑌿𑌤𑌮𑌿𑌵𑌾𑌕𑌾𑌶𑌂 𑌪𑍍𑌰𑌬𑌭𑍗 𑌸 𑌮𑌹𑌾𑌰𑍍𑌣𑌵𑌃 ।

𑌪𑍁𑌷𑍍𑌪𑍗𑌘𑍇𑌣𑌾𑌨𑍁𑌬𑌦𑍍𑌧𑍇𑌨 𑌨𑌾𑌨𑌾𑌵𑌰𑍍𑌣𑍇𑌨 𑌵𑌾𑌨𑌰𑌃 ।

𑌬𑌭𑍗 𑌮𑍇𑌘 𑌇𑌵𑌾𑌕𑌾𑌶𑍇 𑌵𑌿𑌦𑍍𑌯𑍁𑌦𑍍𑌗𑌣 𑌵𑌿𑌭𑍂𑌷𑌿𑌤𑌃 ॥ 54 ॥

𑌤𑌸𑍍𑌯 𑌵𑍇𑌗𑌸𑌮𑌾𑌧𑍂𑌤𑍈𑌃 𑌪𑍁𑌷𑍍𑌪𑍈𑌸𑍍𑌤𑍋𑌯𑌮𑌦𑍃𑌶𑍍𑌯𑌤 ॥ 55 ॥

𑌤𑌾𑌰𑌾𑌭𑌿𑌰𑌭𑌿𑌰𑌾𑌮𑌾𑌭𑌿𑌰𑍁𑌦𑌿𑌤𑌾𑌭𑌿𑌰𑌿𑌵𑌾𑌮𑍍𑌬𑌰𑌮𑍍 ।

𑌤𑌸𑍍𑌯𑌾𑌮𑍍𑌬𑌰𑌗𑌤𑍗 𑌬𑌾𑌹𑍂 𑌦𑌦𑍃𑌶𑌾𑌤𑍇 𑌪𑍍𑌰𑌸𑌾𑌰𑌿𑌤𑍗 ॥ 56 ॥

𑌪𑌰𑍍𑌵𑌤𑌾𑌗𑍍𑌰𑌾𑌦𑍍𑌵𑌿𑌨𑌿𑌷𑍍𑌕𑍍𑌰𑌾𑌨𑍍𑌤𑍗 𑌪𑌞𑍍𑌚𑌾𑌸𑍍𑌯𑌾𑌵𑌿𑌵 𑌪𑌨𑍍𑌨𑌗𑍗 ।

𑌪𑌿𑌬𑌨𑍍𑌨𑌿𑌵 𑌬𑌭𑍗 𑌚𑌾𑌪𑌿 𑌸𑍋𑌰𑍍𑌮𑌿𑌮𑌾𑌲𑌂 𑌮𑌹𑌾𑌰𑍍𑌣𑌵𑌮𑍍 ॥ 57 ॥

𑌪𑌿𑌪𑌾𑌸𑍁𑌰𑌿𑌵 𑌚𑌾𑌕𑌾𑌶𑌂 𑌦𑌦𑍃𑌶𑍇 𑌸 𑌮𑌹𑌾𑌕𑌪𑌿𑌃 ।

𑌤𑌸𑍍𑌯 𑌵𑌿𑌦𑍍𑌯𑍁𑌤𑍍𑌪𑍍𑌰𑌭𑌾𑌕𑌾𑌰𑍇 𑌵𑌾𑌯𑍁𑌮𑌾𑌰𑍍𑌗𑌾𑌨𑍁𑌸𑌾𑌰𑌿𑌣𑌃 ॥ 58 ॥

𑌨𑌯𑌨𑍇 𑌵𑌿𑌪𑍍𑌰𑌕𑌾𑌶𑍇𑌤𑍇 𑌪𑌰𑍍𑌵𑌤𑌸𑍍𑌥𑌾𑌵𑌿𑌵𑌾𑌨𑌲𑍗 ।

𑌪𑌿𑌙𑍍𑌗𑍇 𑌪𑌿𑌙𑍍𑌗𑌾𑌕𑍍𑌷𑌮𑍁𑌖𑍍𑌯𑌸𑍍𑌯 𑌬𑍃𑌹𑌤𑍀 𑌪𑌰𑌿𑌮𑌣𑍍𑌡𑌲𑍇 ॥ 59 ॥

𑌚𑌕𑍍𑌷𑍁𑌷𑍀 𑌸𑌮𑍍𑌪𑍍𑌰𑌾𑌕𑌾𑌶𑍇𑌤𑍇 𑌚𑌨𑍍𑌦𑍍𑌰𑌸𑍂𑌰𑍍𑌯𑌾𑌵𑌿𑌵𑍋𑌦𑌿𑌤𑍗 ।

𑌮𑍁𑌖𑌂 𑌨𑌾𑌸𑌿𑌕𑌯𑌾 𑌤𑌸𑍍𑌯 𑌤𑌾𑌮𑍍𑌰𑌯𑌾 𑌤𑌾𑌮𑍍𑌰𑌮𑌾𑌬𑌭𑍗 ॥ 60 ॥

𑌸𑌨𑍍𑌧𑍍𑌯𑌯𑌾 𑌸𑌮𑌭𑌿𑌸𑍍𑌪𑍃𑌷𑍍𑌟𑌂 𑌯𑌥𑌾 𑌤𑌤𑍍𑌸𑍂𑌰𑍍𑌯𑌮𑌣𑍍𑌡𑌲𑌮𑍍 ।

𑌲𑌾𑌙𑍍𑌗𑍂𑌲𑌂 𑌚 𑌸𑌮𑌾𑌵𑌿𑌦𑍍𑌧𑌂 𑌪𑍍𑌲𑌵𑌮𑌾𑌨𑌸𑍍𑌯 𑌶𑍋𑌭𑌤𑍇 ॥ 61 ॥

𑌅𑌮𑍍𑌬𑌰𑍇 𑌵𑌾𑌯𑍁𑌪𑍁𑌤𑍍𑌰𑌸𑍍𑌯 𑌶𑌕𑍍𑌰𑌧𑍍𑌵𑌜 𑌇𑌵𑍋𑌚𑍍𑌛𑍍𑌰𑌿𑌤𑌮𑍍 ।

𑌲𑌾𑌙𑍍𑌗𑍂𑌲𑌚𑌕𑍍𑌰𑍇𑌣 𑌮𑌹𑌾𑌨𑍍 𑌶𑍁𑌕𑍍𑌲𑌦𑌂𑌷𑍍𑌟𑍍𑌰𑍋𑌽𑌨𑌿𑌲𑌾𑌤𑍍𑌮𑌜𑌃 ॥ 62 ॥

𑌵𑍍𑌯𑌰𑍋𑌚𑌤 𑌮𑌹𑌾𑌪𑍍𑌰𑌾𑌜𑍍𑌞𑌃 𑌪𑌰𑌿𑌵𑍇𑌷𑍀𑌵 𑌭𑌾𑌸𑍍𑌕𑌰𑌃 ।

𑌸𑍍𑌫𑌿𑌗𑍍𑌦𑍇𑌶𑍇𑌨𑌾𑌭𑌿𑌤𑌾𑌮𑍍𑌰𑍇𑌣 𑌰𑌰𑌾𑌜 𑌸 𑌮𑌹𑌾𑌕𑌪𑌿𑌃 ॥ 63 ॥

𑌮𑌹𑌤𑌾 𑌦𑌾𑌰𑌿𑌤𑍇𑌨𑍇𑌵 𑌗𑌿𑌰𑌿𑌰𑍍𑌗𑍈𑌰𑌿𑌕𑌧𑌾𑌤𑍁𑌨𑌾 ।

𑌤𑌸𑍍𑌯 𑌵𑌾𑌨𑌰𑌸𑌿𑌂𑌹𑌸𑍍𑌯 𑌪𑍍𑌲𑌵𑌮𑌾𑌨𑌸𑍍𑌯 𑌸𑌾𑌗𑌰𑌮𑍍 ॥ 64 ॥

𑌕𑌕𑍍𑌷𑌾𑌨𑍍𑌤𑌰𑌗𑌤𑍋 𑌵𑌾𑌯𑍁𑌰𑍍𑌜𑍀𑌮𑍂𑌤 𑌇𑌵 𑌗𑌰𑍍𑌜𑌤𑌿 ।

𑌖𑍇 𑌯𑌥𑌾 𑌨𑌿𑌪𑌤𑌤𑍍𑌯𑍁𑌲𑍍𑌕𑌾 𑌹𑍍𑌯𑍁𑌤𑍍𑌤𑌰𑌾𑌨𑍍𑌤𑌾𑌦𑍍𑌵𑌿𑌨𑌿𑌃𑌸𑍃𑌤𑌾 ॥ 65 ॥

𑌦𑍃𑌶𑍍𑌯𑌤𑍇 𑌸𑌾𑌨𑍁𑌬𑌨𑍍𑌧𑌾 𑌚 𑌤𑌥𑌾 𑌸 𑌕𑌪𑌿𑌕𑍁𑌞𑍍𑌜𑌰𑌃 ।

𑌪𑌤𑌤𑍍𑌪𑌤𑌙𑍍𑌗𑌸𑌙𑍍𑌕𑌾𑌶𑍋 𑌵𑍍𑌯𑌾𑌯𑌤𑌃 𑌶𑍁𑌶𑍁𑌭𑍇 𑌕𑌪𑌿𑌃 ॥ 66 ॥

𑌪𑍍𑌰𑌵𑍃𑌦𑍍𑌧 𑌇𑌵 𑌮𑌾𑌤𑌙𑍍𑌗𑌃 𑌕𑌕𑍍𑌷𑍍𑌯𑌯𑌾 𑌬𑌧𑍍𑌯𑌮𑌾𑌨𑌯𑌾 ।

𑌉𑌪𑌰𑌿𑌷𑍍𑌟𑌾𑌚𑍍𑌛𑌰𑍀𑌰𑍇𑌣 𑌛𑌾𑌯𑌯𑌾 𑌚𑌾𑌵𑌗𑌾𑌢𑌯𑌾 ॥ 67 ॥

𑌸𑌾𑌗𑌰𑍇 𑌮𑌾𑌰𑍁𑌤𑌾𑌵𑌿𑌷𑍍𑌟𑌾 𑌨𑍗𑌰𑌿𑌵𑌾𑌸𑍀𑌤𑍍𑌤𑌦𑌾 𑌕𑌪𑌿𑌃 ।

𑌯𑌂 𑌯𑌂 𑌦𑍇𑌶𑌂 𑌸𑌮𑍁𑌦𑍍𑌰𑌸𑍍𑌯 𑌜𑌗𑌾𑌮 𑌸 𑌮𑌹𑌾𑌕𑌪𑌿𑌃 ।

𑌸 𑌸 𑌤𑌸𑍍𑌯𑍋𑌰𑍁𑌵𑍇𑌗𑍇𑌨 𑌸𑍋𑌨𑍍𑌮𑌾𑌦 𑌇𑌵 𑌲𑌕𑍍𑌷𑍍𑌯𑌤𑍇 ॥ 68 ॥

𑌸𑌾𑌗𑌰𑌸𑍍𑌯𑍋𑌰𑍍𑌮𑌿𑌜𑌾𑌲𑌾𑌨𑌾𑌮𑍁𑌰𑌸𑌾 𑌶𑍈𑌲𑌵𑌰𑍍𑌷𑍍𑌮𑌣𑌾𑌮𑍍 ।

𑌅𑌭𑌿𑌘𑍍𑌨𑌂𑌸𑍍𑌤𑍁 𑌮𑌹𑌾𑌵𑍇𑌗𑌃 𑌪𑍁𑌪𑍍𑌲𑍁𑌵𑍇 𑌸 𑌮𑌹𑌾𑌕𑌪𑌿𑌃 ॥ 69 ॥

𑌕𑌪𑌿𑌵𑌾𑌤𑌶𑍍𑌚 𑌬𑌲𑌵𑌾𑌨𑍍 𑌮𑍇𑌘𑌵𑌾𑌤𑌶𑍍𑌚 𑌨𑌿𑌃𑌸𑍃𑌤𑌃 ।

𑌸𑌾𑌗𑌰𑌂 𑌭𑍀𑌮𑌨𑌿𑌰𑍍𑌘𑍋𑌷𑌂 𑌕𑌮𑍍𑌪𑌯𑌾𑌮𑌾𑌸𑌤𑍁𑌰𑍍𑌭𑍃𑌶𑌮𑍍 ॥ 70 ॥

𑌵𑌿𑌕𑌰𑍍𑌷𑌨𑍍𑌨𑍂𑌰𑍍𑌮𑌿𑌜𑌾𑌲𑌾𑌨𑌿 𑌬𑍃𑌹𑌨𑍍𑌤𑌿 𑌲𑌵𑌣𑌾𑌮𑍍𑌭𑌸𑌿 ।

𑌪𑍁𑌪𑍍𑌲𑍁𑌵𑍇 𑌕𑌪𑌿𑌶𑌾𑌰𑍍𑌦𑍂𑌲𑍋 𑌵𑌿𑌕𑌿𑌰𑌨𑍍𑌨𑌿𑌵 𑌰𑍋𑌦𑌸𑍀 ॥ 71 ॥

𑌮𑍇𑌰𑍁𑌮𑌨𑍍𑌦𑌰𑌸𑌙𑍍𑌕𑌾𑌶𑌾𑌨𑍁𑌦𑍍𑌧𑌤𑌾𑌨𑍍 𑌸 𑌮𑌹𑌾𑌰𑍍𑌣𑌵𑍇 ।

𑌅𑌤𑍍𑌯𑌕𑍍𑌰𑌾𑌮𑌨𑍍𑌮𑌹𑌾𑌵𑍇𑌗𑌸𑍍𑌤𑌰𑌙𑍍𑌗𑌾𑌨𑍍 𑌗𑌣𑌯𑌨𑍍𑌨𑌿𑌵 ॥ 72 ॥

𑌤𑌸𑍍𑌯 𑌵𑍇𑌗𑌸𑌮𑍁𑌦𑍍𑌧𑍂𑌤𑌂 𑌜𑌲𑌂 𑌸𑌜𑌲𑌦𑌂 𑌤𑌦𑌾 ।

𑌅𑌮𑍍𑌬𑌰𑌸𑍍𑌥𑌂 𑌵𑌿𑌬𑌭𑍍𑌰𑌾𑌜 𑌶𑌾𑌰𑌦𑌾𑌭𑍍𑌰𑌮𑌿𑌵𑌾𑌤𑌤𑌮𑍍 ॥ 73 ॥

𑌤𑌿𑌮𑌿𑌨𑌕𑍍𑌰𑌝𑌷𑌾𑌃 𑌕𑍂𑌰𑍍𑌮𑌾 𑌦𑍃𑌶𑍍𑌯𑌨𑍍𑌤𑍇 𑌵𑌿𑌵𑍃𑌤𑌾𑌸𑍍𑌤𑌦𑌾 ।

𑌵𑌸𑍍𑌤𑍍𑌰𑌾𑌪𑌕𑌰𑍍𑌷𑌣𑍇𑌨𑍇𑌵 𑌶𑌰𑍀𑌰𑌾𑌣𑌿 𑌶𑌰𑍀𑌰𑌿𑌣𑌾𑌮𑍍 ॥ 74 ॥

𑌪𑍍𑌲𑌵𑌮𑌾𑌨𑌂 𑌸𑌮𑍀𑌕𑍍𑌷𑍍𑌯𑌾𑌥 𑌭𑍁𑌜𑌙𑍍𑌗𑌾𑌃 𑌸𑌾𑌗𑌰𑌾𑌲𑌯𑌾𑌃 ।

𑌵𑍍𑌯𑍋𑌮𑍍𑌨𑌿 𑌤𑌂 𑌕𑌪𑌿𑌶𑌾𑌰𑍍𑌦𑍂𑌲𑌂 𑌸𑍁𑌪𑌰𑍍𑌣 𑌇𑌤𑌿 𑌮𑍇𑌨𑌿𑌰𑍇 ॥ 75 ॥

𑌦𑌶𑌯𑍋𑌜𑌨𑌵𑌿𑌸𑍍𑌤𑍀𑌰𑍍𑌣𑌾 𑌤𑍍𑌰𑌿𑌂𑌶𑌦𑍍𑌯𑍋𑌜𑌨𑌮𑌾𑌯𑌤𑌾 ।

𑌛𑌾𑌯𑌾 𑌵𑌾𑌨𑌰𑌸𑌿𑌂𑌹𑌸𑍍𑌯 𑌜𑌲𑍇 𑌚𑌾𑌰𑍁𑌤𑌰𑌾𑌭𑌵𑌤𑍍 ॥ 76 ॥

𑌶𑍍𑌵𑍇𑌤𑌾𑌭𑍍𑌰𑌘𑌨𑌰𑌾𑌜𑍀𑌵 𑌵𑌾𑌯𑍁𑌪𑍁𑌤𑍍𑌰𑌾𑌨𑍁𑌗𑌾𑌮𑌿𑌨𑍀 ।

𑌤𑌸𑍍𑌯 𑌸𑌾 𑌶𑍁𑌶𑍁𑌭𑍇 𑌛𑌾𑌯𑌾 𑌵𑌿𑌤𑌤𑌾 𑌲𑌵𑌣𑌾𑌮𑍍𑌭𑌸𑌿 ॥ 77 ॥

𑌶𑍁𑌶𑍁𑌭𑍇 𑌸 𑌮𑌹𑌾𑌤𑍇𑌜𑌾 𑌮𑌹𑌾𑌕𑌾𑌯𑍋 𑌮𑌹𑌾𑌕𑌪𑌿𑌃 ।

𑌵𑌾𑌯𑍁𑌮𑌾𑌰𑍍𑌗𑍇 𑌨𑌿𑌰𑌾𑌲𑌮𑍍𑌬𑍇 𑌪𑌕𑍍𑌷𑌵𑌾𑌨𑌿𑌵 𑌪𑌰𑍍𑌵𑌤𑌃 ॥ 78 ॥

𑌯𑍇𑌨𑌾𑌸𑍗 𑌯𑌾𑌤𑌿 𑌬𑌲𑌵𑌾𑌨𑍍 𑌵𑍇𑌗𑍇𑌨 𑌕𑌪𑌿𑌕𑍁𑌞𑍍𑌜𑌰𑌃 ।

𑌤𑍇𑌨 𑌮𑌾𑌰𑍍𑌗𑍇𑌣 𑌸𑌹𑌸𑌾 𑌦𑍍𑌰𑍋𑌣𑍀𑌕𑍃𑌤 𑌇𑌵𑌾𑌰𑍍𑌣𑌵𑌃 ॥ 79 ॥

𑌆𑌪𑌾𑌤𑍇 𑌪𑌕𑍍𑌷𑌿𑌸𑌙𑍍𑌘𑌾𑌨𑌾𑌂 𑌪𑌕𑍍𑌷𑌿𑌰𑌾𑌜 𑌇𑌵 𑌵𑍍𑌰𑌜𑌨𑍍 ।

𑌹𑌨𑍁𑌮𑌾𑌨𑍍 𑌮𑍇𑌘𑌜𑌾𑌲𑌾𑌨𑌿 𑌪𑍍𑌰𑌕𑌰𑍍𑌷𑌨𑍍 𑌮𑌾𑌰𑍁𑌤𑍋 𑌯𑌥𑌾 ॥ 80 ॥

𑌪𑌾𑌣𑍍𑌡𑍁𑌰𑌾𑌰𑍁𑌣𑌵𑌰𑍍𑌣𑌾𑌨𑌿 𑌨𑍀𑌲𑌮𑌾𑌞𑍍𑌜𑌿𑌷𑍍𑌠𑌕𑌾𑌨𑌿 𑌚 ।

𑌕𑌪𑌿𑌨𑌾𑌕𑍃𑌷𑍍𑌯𑌮𑌾𑌣𑌾𑌨𑌿 𑌮𑌹𑌾𑌭𑍍𑌰𑌾𑌣𑌿 𑌚𑌕𑌾𑌶𑌿𑌰𑍇 ॥ 81 ॥

𑌪𑍍𑌰𑌵𑌿𑌶𑌨𑍍𑌨𑌭𑍍𑌰𑌜𑌾𑌲𑌾𑌨𑌿 𑌨𑌿𑌷𑍍𑌪𑌤𑌂𑌶𑍍𑌚 𑌪𑍁𑌨𑌃 𑌪𑍁𑌨𑌃 ।

𑌪𑍍𑌰𑌚𑍍𑌛𑌨𑍍𑌨𑌶𑍍𑌚 𑌪𑍍𑌰𑌕𑌾𑌶𑌶𑍍𑌚 𑌚𑌨𑍍𑌦𑍍𑌰𑌮𑌾 𑌇𑌵 𑌲𑌕𑍍𑌷𑍍𑌯𑌤𑍇 ॥ 82 ॥

𑌪𑍍𑌲𑌵𑌮𑌾𑌨𑌂 𑌤𑍁 𑌤𑌂 𑌦𑍃𑌷𑍍𑌟𑍍𑌵𑌾 𑌪𑍍𑌲𑌵𑌙𑍍𑌗𑌂 𑌤𑍍𑌵𑌰𑌿𑌤𑌂 𑌤𑌦𑌾 ।

𑌵𑌵𑌰𑍍𑌷𑍁𑌃 𑌪𑍁𑌷𑍍𑌪𑌵𑌰𑍍𑌷𑌾𑌣𑌿 𑌦𑍇𑌵𑌗𑌨𑍍𑌧𑌰𑍍𑌵𑌦𑌾𑌨𑌵𑌾𑌃 ॥ 83 ॥

𑌤𑌤𑌾𑌪 𑌨 𑌹𑌿 𑌤𑌂 𑌸𑍂𑌰𑍍𑌯𑌃 𑌪𑍍𑌲𑌵𑌨𑍍𑌤𑌂 𑌵𑌾𑌨𑌰𑍋𑌤𑍍𑌤𑌮𑌮𑍍 ।

𑌸𑌿𑌷𑍇𑌵𑍇 𑌚 𑌤𑌦𑌾 𑌵𑌾𑌯𑍂 𑌰𑌾𑌮𑌕𑌾𑌰𑍍𑌯𑌾𑌰𑍍𑌥𑌸𑌿𑌦𑍍𑌧𑌯𑍇 ॥ 84 ॥

𑌋𑌷𑌯𑌸𑍍𑌤𑍁𑌷𑍍𑌟𑍁𑌵𑍁𑌶𑍍𑌚𑍈𑌨𑌂 𑌪𑍍𑌲𑌵𑌮𑌾𑌨𑌂 𑌵𑌿𑌹𑌾𑌯𑌸𑌾 ।

𑌜𑌗𑍁𑌶𑍍𑌚 𑌦𑍇𑌵𑌗𑌨𑍍𑌧𑌰𑍍𑌵𑌾𑌃 𑌪𑍍𑌰𑌶𑌂𑌸𑌨𑍍𑌤𑍋 𑌮𑌹𑍗𑌜𑌸𑌮𑍍 ॥ 85 ॥

𑌨𑌾𑌗𑌾𑌶𑍍𑌚 𑌤𑍁𑌷𑍍𑌟𑍁𑌵𑍁𑌰𑍍𑌯𑌕𑍍𑌷𑌾 𑌰𑌕𑍍𑌷𑌾𑌂𑌸𑌿 𑌵𑌿𑌬𑍁𑌧𑌾𑌃 𑌖𑌗𑌾𑌃 ।

𑌪𑍍𑌰𑍇𑌕𑍍𑌷𑍍𑌯 𑌸𑌰𑍍𑌵𑍇 𑌕𑌪𑌿𑌵𑌰𑌂 𑌸𑌹𑌸𑌾 𑌵𑌿𑌗𑌤𑌕𑍍𑌲𑌮𑌮𑍍 ॥ 86 ॥

𑌤𑌸𑍍𑌮𑌿𑌨𑍍 𑌪𑍍𑌲𑌵𑌗𑌶𑌾𑌰𑍍𑌦𑍂𑌲𑍇 𑌪𑍍𑌲𑌵𑌮𑌾𑌨𑍇 𑌹𑌨𑍂𑌮𑌤𑌿 ।

𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌮𑌾𑌨𑌾𑌰𑍍𑌥𑍀 𑌚𑌿𑌨𑍍𑌤𑌯𑌾𑌮𑌾𑌸 𑌸𑌾𑌗𑌰𑌃 ॥ 87 ॥

𑌸𑌾𑌹𑌾𑌯𑍍𑌯𑌂 𑌵𑌾𑌨𑌰𑍇𑌨𑍍𑌦𑍍𑌰𑌸𑍍𑌯 𑌯𑌦𑌿 𑌨𑌾𑌹𑌂 𑌹𑌨𑍂𑌮𑌤𑌃 ।

𑌕𑌰𑌿𑌷𑍍𑌯𑌾𑌮𑌿 𑌭𑌵𑌿𑌷𑍍𑌯𑌾𑌮𑌿 𑌸𑌰𑍍𑌵𑌵𑌾𑌚𑍍𑌯𑍋 𑌵𑌿𑌵𑌕𑍍𑌷𑌤𑌾𑌮𑍍 ॥ 88 ॥

𑌅𑌹𑌮𑌿𑌕𑍍𑌷𑍍𑌵𑌾𑌕𑍁𑌨𑌾𑌥𑍇𑌨 𑌸𑌗𑌰𑍇𑌣 𑌵𑌿𑌵𑌰𑍍𑌧𑌿𑌤𑌃 ।

𑌇𑌕𑍍𑌷𑍍𑌵𑌾𑌕𑍁𑌸𑌚𑌿𑌵𑌶𑍍𑌚𑌾𑌯𑌂 𑌨𑌾𑌵𑌸𑍀𑌦𑌿𑌤𑍁𑌮𑌰𑍍𑌹𑌤𑌿 ॥ 89 ॥

𑌤𑌥𑌾 𑌮𑌯𑌾 𑌵𑌿𑌧𑌾𑌤𑌵𑍍𑌯𑌂 𑌵𑌿𑌶𑍍𑌰𑌮𑍇𑌤 𑌯𑌥𑌾 𑌕𑌪𑌿𑌃 ॥ 90 ॥

𑌶𑍇𑌷𑌂 𑌚 𑌮𑌯𑌿 𑌵𑌿𑌶𑍍𑌰𑌾𑌨𑍍𑌤𑌃 𑌸𑍁𑌖𑍇𑌨𑌾𑌤𑌿𑌪𑌤𑌿𑌷𑍍𑌯𑌤𑌿 ।

𑌇𑌤𑌿 𑌕𑍃𑌤𑍍𑌵𑌾 𑌮𑌤𑌿𑌂 𑌸𑌾𑌧𑍍𑌵𑍀𑌂𑌸𑌮𑍁𑌦𑍍𑌰 𑌶𑍍𑌛𑌨𑍍𑌨𑌮𑌮𑍍𑌭𑌸𑌿 ॥ 91 ॥

𑌹𑌿𑌰𑌣𑍍𑌯𑌨𑌾𑌭𑌂 𑌮𑍈𑌨𑌾𑌕𑌮𑍁𑌵𑌾𑌚 𑌗𑌿𑌰𑌿𑌸𑌤𑍍𑌤𑌮𑌮𑍍 ।

𑌤𑍍𑌵𑌮𑌿𑌹𑌾𑌸𑍁𑌰𑌸𑌙𑍍𑌘𑌾𑌨𑌾𑌂 𑌪𑌾𑌤𑌾𑌲𑌤𑌲𑌵𑌾𑌸𑌿𑌨𑌾𑌮𑍍 ॥ 92 ॥

𑌦𑍇𑌵𑌰𑌾𑌜𑍍𑌞𑌾 𑌗𑌿𑌰𑌿𑌶𑍍𑌰𑍇𑌷𑍍𑌠 𑌪𑌰𑌿𑌘𑌃 𑌸𑌨𑍍𑌨𑌿𑌵𑍇𑌶𑌿𑌤𑌃 ।

𑌤𑍍𑌵𑌮𑍇𑌷𑌾𑌂 𑌜𑌾𑌤𑌵𑍀𑌰𑍍𑌯𑌾𑌣𑌾𑌂 𑌪𑍁𑌨𑌰𑍇𑌵𑍋𑌤𑍍𑌪𑌤𑌿𑌷𑍍𑌯𑌤𑌾𑌮𑍍 ॥ 93 ॥

𑌪𑌾𑌤𑌾𑌲𑌸𑍍𑌯𑌾𑌪𑍍𑌰𑌮𑍇𑌯𑌸𑍍𑌯 𑌦𑍍𑌵𑌾𑌰𑌮𑌾𑌵𑍃𑌤𑍍𑌯 𑌤𑌿𑌷𑍍𑌠𑌸𑌿 ।

𑌤𑌿𑌰𑍍𑌯𑌗𑍂𑌰𑍍𑌧𑍍𑌵𑌮𑌧𑌶𑍍𑌚𑍈𑌵 𑌶𑌕𑍍𑌤𑌿𑌸𑍍𑌤𑍇 𑌶𑍈𑌲 𑌵𑌰𑍍𑌧𑌿𑌤𑍁𑌮𑍍 ॥ 94 ॥

𑌤𑌸𑍍𑌮𑌾𑌤𑍍𑌸𑌞𑍍𑌚𑍋𑌦𑌯𑌾𑌮𑌿 𑌤𑍍𑌵𑌾𑌮𑍁𑌤𑍍𑌤𑌿𑌷𑍍𑌠 𑌗𑌿𑌰𑌿𑌸𑌤𑍍𑌤𑌮 ।

𑌸 𑌏𑌷 𑌕𑌪𑌿𑌶𑌾𑌰𑍍𑌦𑍂𑌲𑌸𑍍𑌤𑍍𑌵𑌾𑌮𑍁𑌪𑌰𑍍𑌯𑍇𑌤𑌿 𑌵𑍀𑌰𑍍𑌯𑌵𑌾𑌨𑍍 ॥ 95 ॥

𑌹𑌨𑍂𑌮𑌾𑌨𑍍𑌰𑌾𑌮𑌕𑌾𑌰𑍍𑌯𑌾𑌰𑍍𑌥𑌂 𑌭𑍀𑌮𑌕𑌰𑍍𑌮𑌾 𑌖𑌮𑌾𑌪𑍍𑌲𑍁𑌤𑌃 ।

𑌅𑌸𑍍𑌯 𑌸𑌾𑌹𑍍𑌯𑌂 𑌮𑌯𑌾 𑌕𑌾𑌰𑍍𑌯𑌮𑌿𑌕𑍍𑌷𑍍𑌵𑌾𑌕𑍁𑌕𑍁𑌲𑌵𑌰𑍍𑌤𑌿𑌨𑌃 ॥ 96 ॥

𑌮𑌮 𑌹𑍀𑌕𑍍𑌷𑍍𑌵𑌾𑌕𑌵𑌃 𑌪𑍂𑌜𑍍𑌯𑌾𑌃 𑌪𑌰𑌂 𑌪𑍂𑌜𑍍𑌯𑌤𑌮𑌾𑌸𑍍𑌤𑌵 ।

𑌕𑍁𑌰𑍁 𑌸𑌾𑌚𑌿𑌵𑍍𑌯𑌮𑌸𑍍𑌮𑌾𑌕𑌂 𑌨 𑌨𑌃 𑌕𑌾𑌰𑍍𑌯𑌮𑌤𑌿𑌕𑍍𑌰𑌮𑍇𑌤𑍍 ॥ 97 ॥

𑌕𑌰𑍍𑌤𑌵𑍍𑌯𑌮𑌕𑍃𑌤𑌂 𑌕𑌾𑌰𑍍𑌯𑌂 𑌸𑌤𑌾𑌂 𑌮𑌨𑍍𑌯𑍁𑌮𑍁𑌦𑍀𑌰𑌯𑍇𑌤𑍍 ।

𑌸𑌲𑌿𑌲𑌾𑌦𑍂𑌰𑍍𑌧𑍍𑌵𑌮𑍁𑌤𑍍𑌤𑌿𑌷𑍍𑌠 𑌤𑌿𑌷𑍍𑌠𑌤𑍍𑌵𑍇𑌷 𑌕𑌪𑌿𑌸𑍍𑌤𑍍𑌵𑌯𑌿 ॥ 98 ॥

𑌅𑌸𑍍𑌮𑌾𑌕𑌮𑌤𑌿𑌥𑌿𑌶𑍍𑌚𑍈𑌵 𑌪𑍂𑌜𑍍𑌯𑌶𑍍𑌚 𑌪𑍍𑌲𑌵𑌤𑌾𑌂 𑌵𑌰𑌃 ।

𑌚𑌾𑌮𑍀𑌕𑌰𑌮𑌹𑌾𑌨𑌾𑌭 𑌦𑍇𑌵𑌗𑌨𑍍𑌧𑌰𑍍𑌵𑌸𑍇𑌵𑌿𑌤 ॥ 99 ॥

𑌹𑌨𑍁𑌮𑌾𑌂𑌸𑍍𑌤𑍍𑌵𑌯𑌿 𑌵𑌿𑌶𑍍𑌰𑌾𑌨𑍍𑌤𑌸𑍍𑌤𑌤𑌃 𑌶𑍇𑌷𑌂 𑌗𑌮𑌿𑌷𑍍𑌯𑌤𑌿 ।

𑌕𑌾𑌕𑍁𑌤𑍍𑌸𑍍𑌥𑌸𑍍𑌯𑌾𑌨𑍃𑌶𑌂𑌸𑍍𑌯𑌂 𑌚 𑌮𑍈𑌥𑌿𑌲𑍍𑌯𑌾𑌶𑍍𑌚 𑌵𑌿𑌵𑌾𑌸𑌨𑌮𑍍 ॥ 100 ॥

𑌶𑍍𑌰𑌮𑌂 𑌚 𑌪𑍍𑌲𑌵𑌗𑍇𑌨𑍍𑌦𑍍𑌰𑌸𑍍𑌯 𑌸𑌮𑍀𑌕𑍍𑌷𑍍𑌯𑍋𑌤𑍍𑌥𑌾𑌤𑍁𑌮𑌰𑍍𑌹𑌸𑌿 ।

𑌹𑌿𑌰𑌣𑍍𑌯𑌨𑌾𑌭𑍋 𑌮𑍈𑌨𑌾𑌕𑍋 𑌨𑌿𑌶𑌮𑍍𑌯 𑌲𑌵𑌣𑌾𑌮𑍍𑌭𑌸𑌃 ॥ 101 ॥

𑌉𑌤𑍍𑌪𑌪𑌾𑌤 𑌜𑌲𑌾𑌤𑍍𑌤𑍂𑌰𑍍𑌣𑌂 𑌮𑌹𑌾𑌦𑍍𑌰𑍁𑌮𑌲𑌤𑌾𑌯𑍁𑌤𑌃 ।

𑌸 𑌸𑌾𑌗𑌰𑌜𑌲𑌂 𑌭𑌿𑌤𑍍𑌤𑍍𑌵𑌾 𑌬𑌭𑍂𑌵𑌾𑌭𑍍𑌯𑍁𑌤𑍍𑌥𑌿𑌤𑌸𑍍𑌤𑌦𑌾 ॥ 102 ॥

𑌯𑌥𑌾 𑌜𑌲𑌧𑌰𑌂 𑌭𑌿𑌤𑍍𑌤𑍍𑌵𑌾 𑌦𑍀𑌪𑍍𑌤𑌰𑌶𑍍𑌮𑌿𑌰𑍍𑌦𑌿𑌵𑌾𑌕𑌰𑌃 ।

𑌸 𑌮𑌹𑌾𑌤𑍍𑌮𑌾 𑌮𑍁𑌹𑍂𑌰𑍍𑌤𑍇𑌨 𑌸𑌰𑍍𑌵𑌤𑌃 𑌸𑌲𑌿𑌲𑌾𑌵𑍃𑌤𑌃 ॥ 103 ॥

𑌦𑌰𑍍𑌶𑌯𑌾𑌮𑌾𑌸 𑌶𑍃𑌙𑍍𑌗𑌾𑌣𑌿 𑌸𑌾𑌗𑌰𑍇𑌣 𑌨𑌿𑌯𑍋𑌜𑌿𑌤𑌃 ।

𑌆𑌦𑌿𑌤𑍍𑌯𑍋𑌦𑌯𑌸𑌙𑍍𑌕𑌾𑌶𑍈𑌰𑌾𑌲𑌿𑌖𑌦𑍍𑌭𑌿𑌰𑌿𑌵𑌾𑌮𑍍𑌬𑌰𑌮𑍍 ।

𑌶𑌾𑌤𑌕𑍁𑌮𑍍𑌭𑌮𑌯𑍈𑌃 𑌶𑍃𑌙𑍍𑌗𑍈𑌃 𑌸𑌕𑌿𑌨𑍍𑌨𑌰𑌮𑌹𑍋𑌰𑌗𑍈𑌃 ॥ 104 ॥

𑌤𑌪𑍍𑌤𑌜𑌾𑌮𑍍𑌬𑍂𑌨𑌦𑍈𑌃 𑌶𑍃𑌙𑍍𑌗𑍈𑌃 𑌪𑌰𑍍𑌵𑌤𑌸𑍍𑌯 𑌸𑌮𑍁𑌤𑍍𑌥𑌿𑌤𑍈𑌃 ॥ 105 ॥

𑌆𑌕𑌾𑌶𑌂 𑌶𑌸𑍍𑌤𑍍𑌰𑌸𑌙𑍍𑌕𑌾𑌶𑌮𑌭𑌵𑌤𑍍𑌕𑌾𑌞𑍍𑌚𑌨𑌪𑍍𑌰𑌭𑌮𑍍 ।

𑌜𑌾𑌤𑌰𑍂𑌪𑌮𑌯𑍈𑌃 𑌶𑍃𑌙𑍍𑌗𑍈𑌰𑍍𑌭𑍍𑌰𑌾𑌜𑌮𑌾𑌨𑍈𑌃 𑌸𑍍𑌵𑌯𑌮𑍍𑌪𑍍𑌰𑌭𑍈𑌃 ॥ 106 ॥

𑌆𑌦𑌿𑌤𑍍𑌯𑌶𑌤𑌸𑌙𑍍𑌕𑌾𑌶𑌃 𑌸𑍋𑌽𑌭𑌵𑌦𑍍𑌗𑌿𑌰𑌿𑌸𑌤𑍍𑌤𑌮𑌃 ।

𑌤𑌮𑍁𑌤𑍍𑌥𑌿𑌤𑌮𑌸𑌙𑍍𑌗𑍇𑌨 𑌹𑌨𑍁𑌮𑌾𑌨𑌗𑍍𑌰𑌤𑌃 𑌸𑍍𑌥𑌿𑌤𑌮𑍍 ॥ 107 ॥

𑌮𑌧𑍍𑌯𑍇 𑌲𑌵𑌣𑌤𑍋𑌯𑌸𑍍𑌯 𑌵𑌿𑌘𑍍𑌨𑍋𑌽𑌯𑌮𑌿𑌤𑌿 𑌨𑌿𑌶𑍍𑌚𑌿𑌤𑌃 ।

𑌸 𑌤𑌮𑍁𑌚𑍍𑌛𑍍𑌰𑍍𑌰𑌤𑌮𑌤𑍍𑌯𑌰𑍍𑌥𑌂 𑌮𑌹𑌾𑌵𑍇𑌗𑍋 𑌮𑌹𑌾𑌕𑌪𑌿𑌃 ॥ 108 ॥

𑌉𑌰𑌸𑌾 𑌪𑌾𑌤𑌯𑌾𑌮𑌾𑌸 𑌜𑍀𑌮𑍂𑌤𑌮𑌿𑌵 𑌮𑌾𑌰𑍁𑌤𑌃 ।

𑌸 𑌤𑌥𑌾 𑌪𑌾𑌤𑌿𑌤𑌸𑍍𑌤𑍇𑌨 𑌕𑌪𑌿𑌨𑌾 𑌪𑌰𑍍𑌵𑌤𑍋𑌤𑍍𑌤𑌮𑌃 ॥ 109 ॥

𑌬𑍁𑌦𑍍𑌧𑍍𑌵𑌾 𑌤𑌸𑍍𑌯 𑌕𑌪𑍇𑌰𑍍𑌵𑍇𑌗𑌂 𑌜𑌹𑌰𑍍𑌷 𑌚 𑌨𑌨𑌨𑍍𑌦 𑌚 ।

𑌤𑌮𑌾𑌕𑌾𑌶𑌗𑌤𑌂 𑌵𑍀𑌰𑌮𑌾𑌕𑌾𑌶𑍇 𑌸𑌮𑍁𑌪𑌸𑍍𑌥𑌿𑌤𑌃 ॥ 110 ॥

𑌪𑍍𑌰𑍀𑌤𑍋 𑌹𑍃𑌷𑍍𑌟𑌮𑌾𑌨𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍𑌪𑌰𑍍𑌵𑌤𑌃 𑌕𑌪𑌿𑌮𑍍 ।

𑌮𑌾𑌨𑍁𑌷𑌂 𑌧𑌾𑌰𑌯𑌨𑍍 𑌰𑍂𑌪𑌮𑌾𑌤𑍍𑌮𑌨𑌃 𑌶𑌿𑌖𑌰𑍇 𑌸𑍍𑌥𑌿𑌤𑌃 ॥ 111 ॥

𑌦𑍁𑌷𑍍𑌕𑌰𑌂 𑌕𑍃𑌤𑌵𑌾𑌨𑍍𑌕𑌰𑍍𑌮 𑌤𑍍𑌵𑌮𑌿𑌦𑌂 𑌵𑌾𑌨𑌰𑍋𑌤𑍍𑌤𑌮 ।

𑌨𑌿𑌪𑌤𑍍𑌯 𑌮𑌮 𑌶𑍃𑌙𑍍𑌗𑍇𑌷𑍁 𑌵𑌿𑌶𑍍𑌰𑌮𑌸𑍍𑌵 𑌯𑌥𑌾𑌸𑍁𑌖𑌮𑍍 ॥ 112 ॥

𑌰𑌾𑌘𑌵𑌸𑍍𑌯 𑌕𑍁𑌲𑍇 𑌜𑌾𑌤𑍈𑌰𑍁𑌦𑌧𑌿𑌃 𑌪𑌰𑌿𑌵𑌰𑍍𑌧𑌿𑌤𑌃 ।

𑌸 𑌤𑍍𑌵𑌾𑌂 𑌰𑌾𑌮𑌹𑌿𑌤𑍇 𑌯𑍁𑌕𑍍𑌤𑌂 𑌪𑍍𑌰𑌤𑍍𑌯𑌰𑍍𑌚𑌯𑌤𑌿 𑌸𑌾𑌗𑌰𑌃 ॥ 113 ॥

𑌕𑍃𑌤𑍇 𑌚 𑌪𑍍𑌰𑌤𑌿𑌕𑌰𑍍𑌤𑌵𑍍𑌯𑌮𑍇𑌷 𑌧𑌰𑍍𑌮𑌃 𑌸𑌨𑌾𑌤𑌨𑌃 ।

𑌸𑍋𑌽𑌯𑌂 𑌤𑍍𑌵𑌤𑍍𑌪𑍍𑌰𑌤𑌿𑌕𑌾𑌰𑌾𑌰𑍍𑌥𑍀 𑌤𑍍𑌵𑌤𑍍𑌤𑌃 𑌸𑌮𑍍𑌮𑌾𑌨𑌮𑌰𑍍𑌹𑌤𑌿 ॥ 114 ॥

𑌤𑍍𑌵𑌨𑍍𑌨𑌿𑌮𑌿𑌤𑍍𑌤𑌮𑌨𑍇𑌨𑌾𑌹𑌂 𑌬𑌹𑍁𑌮𑌾𑌨𑌾𑌤𑍍𑌪𑍍𑌰𑌚𑍋𑌦𑌿𑌤𑌃 ।

𑌤𑌿𑌷𑍍𑌠 𑌤𑍍𑌵𑌂 𑌕𑌪𑌿𑌶𑌾𑌰𑍍𑌦𑍂𑌲 𑌮𑌯𑌿 𑌵𑌿𑌶𑍍𑌰𑌮𑍍𑌯 𑌗𑌮𑍍𑌯𑌤𑌾𑌮𑍍 ॥ 115 ॥

𑌤𑌵 𑌸𑌾𑌨𑍁𑌷𑍁 𑌵𑌿𑌶𑍍𑌰𑌾𑌨𑍍𑌤𑌃 𑌶𑍇𑌷𑌂 𑌪𑍍𑌰𑌕𑍍𑌰𑌮𑌤𑌾𑌮𑌿𑌤𑌿 ।

𑌯𑍋𑌜𑌨𑌾𑌨𑌾𑌂 𑌶𑌤𑌂 𑌚𑌾𑌪𑌿 𑌕𑌪𑌿𑌰𑍇𑌷 𑌸𑌮𑌾𑌪𑍍𑌲𑍁𑌤𑌃 ॥ 116 ॥

𑌤𑌦𑌿𑌦𑌂 𑌗𑌨𑍍𑌧𑌵𑌤𑍍𑌸𑍍𑌵𑌾𑌦𑍁 𑌕𑌨𑍍𑌦𑌮𑍂𑌲𑌫𑌲𑌂 𑌬𑌹𑍁 ।

𑌤𑌦𑌾𑌸𑍍𑌵𑌾𑌦𑍍𑌯 𑌹𑌰𑌿𑌶𑍍𑌰𑍇𑌷𑍍𑌠 𑌵𑌿𑌶𑍍𑌰𑌾𑌨𑍍𑌤𑍋𑌽𑌨𑍁 𑌗𑌮𑌿𑌷𑍍𑌯𑌸𑌿 ॥ 117 ॥

𑌅𑌸𑍍𑌮𑌾𑌕𑌮𑌪𑌿 𑌸𑌮𑍍𑌬𑌨𑍍𑌧𑌃 𑌕𑌪𑌿𑌮𑍁𑌖𑍍𑌯 𑌤𑍍𑌵𑌯𑌾𑌸𑍍𑌤𑌿 𑌵𑍈 ।

𑌪𑍍𑌰𑌖𑍍𑌯𑌾𑌤𑌸𑍍𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌮𑌹𑌾𑌗𑍁𑌣𑌪𑌰𑌿𑌗𑍍𑌰𑌹𑌃 ॥ 118 ॥

𑌵𑍇𑌗𑌵𑌨𑍍𑌤𑌃 𑌪𑍍𑌲𑌵𑌨𑍍𑌤𑍋 𑌯𑍇 𑌪𑍍𑌲𑌵𑌗𑌾 𑌮𑌾𑌰𑍁𑌤𑌾𑌤𑍍𑌮𑌜 ।

𑌤𑍇𑌷𑌾𑌂 𑌮𑍁𑌖𑍍𑌯𑌤𑌮𑌂 𑌮𑌨𑍍𑌯𑍇 𑌤𑍍𑌵𑌾𑌮𑌹𑌂 𑌕𑌪𑌿𑌕𑍁𑌞𑍍𑌜𑌰 ॥ 119 ॥

𑌅𑌤𑌿𑌥𑌿𑌃 𑌕𑌿𑌲 𑌪𑍂𑌜𑌾𑌰𑍍𑌹𑌃 𑌪𑍍𑌰𑌾𑌕𑍃𑌤𑍋𑌽𑌪𑌿 𑌵𑌿𑌜𑌾𑌨𑌤𑌾 ।

𑌧𑌰𑍍𑌮𑌂 𑌜𑌿𑌜𑍍𑌞𑌾𑌸𑌮𑌾𑌨𑍇𑌨 𑌕𑌿𑌂 𑌪𑍁𑌨𑌸𑍍𑌤𑍍𑌵𑌾𑌦𑍃𑌶𑍋 𑌮𑌹𑌾𑌨𑍍 ॥ 120 ॥

𑌤𑍍𑌵𑌂 𑌹𑌿 𑌦𑍇𑌵𑌵𑌰𑌿𑌷𑍍𑌠𑌸𑍍𑌯 𑌮𑌾𑌰𑍁𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।

𑌪𑍁𑌤𑍍𑌰𑌸𑍍𑌤𑌸𑍍𑌯𑍈𑌵 𑌵𑍇𑌗𑍇𑌨 𑌸𑌦𑍃𑌶𑌃 𑌕𑌪𑌿𑌕𑍁𑌞𑍍𑌜𑌰 ॥ 121 ॥

𑌪𑍂𑌜𑌿𑌤𑍇 𑌤𑍍𑌵𑌯𑌿 𑌧𑌰𑍍𑌮𑌜𑍍𑌞 𑌪𑍂𑌜𑌾𑌂 𑌪𑍍𑌰𑌾𑌪𑍍𑌨𑍋𑌤𑌿 𑌮𑌾𑌰𑍁𑌤𑌃 ।

𑌤𑌸𑍍𑌮𑌾𑌤𑍍𑌤𑍍𑌵𑌂 𑌪𑍂𑌜𑌨𑍀𑌯𑍋 𑌮𑍇 𑌶𑍃𑌣𑍁 𑌚𑌾𑌪𑍍𑌯𑌤𑍍𑌰 𑌕𑌾𑌰𑌣𑌮𑍍 ॥ 122 ॥

𑌪𑍂𑌰𑍍𑌵𑌂 𑌕𑍃𑌤𑌯𑍁𑌗𑍇 𑌤𑌾𑌤 𑌪𑌰𑍍𑌵𑌤𑌾𑌃 𑌪𑌕𑍍𑌷𑌿𑌣𑍋𑌽𑌭𑌵𑌨𑍍 ।

𑌤𑍇 𑌹𑌿 𑌜𑌗𑍍𑌮𑍁𑌰𑍍𑌦𑌿𑌶𑌃 𑌸𑌰𑍍𑌵𑌾 𑌗𑌰𑍁𑌡𑌾𑌨𑌿𑌲𑌵𑍇𑌗𑌿𑌨𑌃 ॥ 123 ॥

𑌤𑌤𑌸𑍍𑌤𑍇𑌷𑍁 𑌪𑍍𑌰𑌯𑌾𑌤𑍇𑌷𑍁 𑌦𑍇𑌵𑌸𑌙𑍍𑌘𑌾𑌃 𑌮𑌹𑌰𑍍𑌷𑌿𑌭𑌿𑌃 ।

𑌭𑍂𑌤𑌾𑌨𑌿 𑌚 𑌭𑌯𑌂 𑌜𑌗𑍍𑌮𑍁𑌸𑍍𑌤𑍇𑌷𑌾𑌂 𑌪𑌤𑌨𑌶𑌙𑍍𑌕𑌯𑌾 ॥ 124 ॥

𑌤𑌤𑌃 𑌕𑍍𑌰𑍁𑌦𑍍𑌧𑌃 𑌸𑌹𑌸𑍍𑌰𑌾𑌕𑍍𑌷𑌃 𑌪𑌰𑍍𑌵𑌤𑌾𑌨𑌾𑌂 𑌶𑌤𑌕𑍍𑌰𑌤𑍁𑌃 ।

𑌪𑌕𑍍𑌷𑌾𑌨𑍍 𑌚𑌿𑌚𑍍𑌛𑍇𑌦 𑌵𑌜𑍍𑌰𑍇𑌣 𑌤𑌤𑍍𑌰 𑌤𑌤𑍍𑌰 𑌸𑌹𑌸𑍍𑌰𑌶𑌃 ॥ 125 ॥

𑌸 𑌮𑌾𑌮𑍁𑌪𑌾𑌗𑌤𑌃 𑌕𑍍𑌰𑍁𑌦𑍍𑌧𑍋 𑌵𑌜𑍍𑌰𑌮𑍁𑌦𑍍𑌯𑌮𑍍𑌯 𑌦𑍇𑌵𑌰𑌾𑌟𑍍 ।

𑌤𑌤𑍋𑌽𑌹𑌂 𑌸𑌹𑌸𑌾 𑌕𑍍𑌷𑌿𑌪𑍍𑌤𑌃 𑌶𑍍𑌵𑌸𑌨𑍇𑌨 𑌮𑌹𑌾𑌤𑍍𑌮𑌨𑌾 ॥ 126 ॥

𑌅𑌸𑍍𑌮𑌿𑌨𑍍𑌲𑌵𑌣𑌤𑍋𑌯𑍇 𑌚 𑌪𑍍𑌰𑌕𑍍𑌷𑌿𑌪𑍍𑌤𑌃 𑌪𑍍𑌲𑌵𑌗𑍋𑌤𑍍𑌤𑌮 ।

𑌗𑍁𑌪𑍍𑌤𑌪𑌕𑍍𑌷𑌸𑌮𑌗𑍍𑌰𑌶𑍍𑌚 𑌤𑌵 𑌪𑌿𑌤𑍍𑌰𑌾𑌭𑌿𑌰𑌕𑍍𑌷𑌿𑌤𑌃 ॥ 127 ॥

𑌤𑌤𑍋𑌽𑌹𑌂 𑌮𑌾𑌨𑌯𑌾𑌮𑌿 𑌤𑍍𑌵𑌾𑌂 𑌮𑌾𑌨𑍍𑌯𑍋 𑌹𑌿 𑌮𑌮 𑌮𑌾𑌰𑍁𑌤𑌃 ।

𑌤𑍍𑌵𑌯𑌾 𑌮𑍇 𑌹𑍍𑌯𑍇𑌷 𑌸𑌮𑍍𑌬𑌨𑍍𑌧𑌃 𑌕𑌪𑌿𑌮𑍁𑌖𑍍𑌯 𑌮𑌹𑌾𑌗𑍁𑌣𑌃 ॥ 128 ॥

𑌅𑌸𑍍𑌮𑌿𑌨𑍍𑌨𑍇𑌵𑌙𑍍𑌗𑌤𑍇 𑌕𑌾𑌰𑍍𑌯𑍇 𑌸𑌾𑌗𑌰𑌸𑍍𑌯 𑌮𑌮𑍈𑌵 𑌚 ।

𑌪𑍍𑌰𑍀𑌤𑌿𑌂 𑌪𑍍𑌰𑍀𑌤𑌮𑌨𑌾𑌃 𑌕𑌰𑍍𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 𑌮𑌹𑌾𑌕𑌪𑍇 ॥ 129 ॥

𑌶𑍍𑌰𑌮𑌂 𑌮𑍋𑌕𑍍𑌷𑌯 𑌪𑍂𑌜𑌾𑌂 𑌚 𑌗𑍃𑌹𑌾𑌣 𑌕𑌪𑌿𑌸𑌤𑍍𑌤𑌮 ।

𑌪𑍍𑌰𑍀𑌤𑌿𑌂 𑌚 𑌬𑌹𑍁𑌮𑌨𑍍𑌯𑌸𑍍𑌵 𑌪𑍍𑌰𑍀𑌤𑍋𑌽𑌸𑍍𑌮𑌿 𑌤𑌵 𑌦𑌰𑍍𑌶𑌨𑌾𑌤𑍍 ॥ 130 ॥

𑌏𑌵𑌮𑍁𑌕𑍍𑌤𑌃 𑌕𑌪𑌿𑌶𑍍𑌰𑍇𑌷𑍍𑌠𑌸𑍍𑌤𑌂 𑌨𑌗𑍋𑌤𑍍𑌤𑌮𑌮𑌬𑍍𑌰𑌵𑍀𑌤𑍍 ।

𑌪𑍍𑌰𑍀𑌤𑍋𑌽𑌸𑍍𑌮𑌿 𑌕𑍃𑌤𑌮𑌾𑌤𑌿𑌥𑍍𑌯𑌂 𑌮𑌨𑍍𑌯𑍁𑌰𑍇𑌷𑍋𑌽𑌪𑌨𑍀𑌯𑌤𑌾𑌮𑍍 ॥ 131 ॥

𑌤𑍍𑌵𑌰𑌤𑍇 𑌕𑌾𑌰𑍍𑌯𑌕𑌾𑌲𑍋 𑌮𑍇 𑌅𑌹𑌶𑍍𑌚𑌾𑌪𑍍𑌯𑌤𑌿𑌵𑌰𑍍𑌤𑌤𑍇 ।

𑌪𑍍𑌰𑌤𑌿𑌜𑍍𑌞𑌾 𑌚 𑌮𑌯𑌾 𑌦𑌤𑍍𑌤𑌾 𑌨 𑌸𑍍𑌥𑌾𑌤𑌵𑍍𑌯𑌮𑌿𑌹𑌾𑌨𑍍𑌤𑌰𑍇 ॥ 132 ॥

𑌇𑌤𑍍𑌯𑍁𑌕𑍍𑌤𑍍𑌵𑌾 𑌪𑌾𑌣𑌿𑌨𑌾 𑌶𑍈𑌲𑌮𑌾𑌲𑌭𑍍𑌯 𑌹𑌰𑌿𑌪𑍁𑌙𑍍𑌗𑌵𑌃 ।

𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌵𑍀𑌰𑍍𑌯𑌵𑌾𑌨𑍍 𑌪𑍍𑌰𑌹𑌸𑌨𑍍𑌨𑌿𑌵 ॥ 133 ॥

𑌸 𑌪𑌰𑍍𑌵𑌤𑌸𑌮𑍁𑌦𑍍𑌰𑌾𑌭𑍍𑌯𑌾𑌂 𑌬𑌹𑍁𑌮𑌾𑌨𑌾𑌦𑌵𑍇𑌕𑍍𑌷𑌿𑌤𑌃 ।

𑌪𑍂𑌜𑌿𑌤𑌶𑍍𑌚𑍋𑌪𑌪𑌨𑍍𑌨𑌾𑌭𑌿𑌰𑌾𑌶𑍀𑌰𑍍𑌭𑌿𑌰𑌨𑌿𑌲𑌾𑌤𑍍𑌮𑌜𑌃 ॥ 134 ॥

𑌅𑌥𑍋𑌰𑍍𑌧𑍍𑌵𑌂 𑌦𑍂𑌰𑌮𑍁𑌤𑍍𑌪𑍍𑌲𑍁𑌤𑍍𑌯 𑌹𑌿𑌤𑍍𑌵𑌾 𑌶𑍈𑌲𑌮𑌹𑌾𑌰𑍍𑌣𑌵𑍗 ।

𑌪𑌿𑌤𑍁𑌃 𑌪𑌨𑍍𑌥𑌾𑌨𑌮𑌾𑌸𑍍𑌥𑌾𑌯 𑌜𑌗𑌾𑌮 𑌵𑌿𑌮𑌲𑍇𑌽𑌮𑍍𑌬𑌰𑍇 ॥ 135 ॥

𑌭𑍂𑌯𑌶𑍍𑌚𑍋𑌰𑍍𑌧𑍍𑌵𑌂 𑌗𑌤𑌿𑌂 𑌪𑍍𑌰𑌾𑌪𑍍𑌯 𑌗𑌿𑌰𑌿𑌂 𑌤𑌮𑌵𑌲𑍋𑌕𑌯𑌨𑍍 ।

𑌵𑌾𑌯𑍁𑌸𑍂𑌨𑍁𑌰𑍍𑌨𑌿𑌰𑌾𑌲𑌮𑍍𑌬𑍇 𑌜𑌗𑌾𑌮 𑌵𑌿𑌮𑌲𑍇𑌽𑌮𑍍𑌬𑌰𑍇 ॥ 136 ॥

𑌤𑌦𑍍 𑌦𑍍𑌵𑌿𑌤𑍀𑌯𑌂 𑌹𑌨𑍁𑌮𑌤𑍋 𑌦𑍃𑌷𑍍𑌟𑍍𑌵𑌾 𑌕𑌰𑍍𑌮 𑌸𑍁𑌦𑍁𑌷𑍍𑌕𑌰𑌮𑍍 ।

𑌪𑍍𑌰𑌶𑌶𑌂𑌸𑍁𑌃 𑌸𑍁𑌰𑌾𑌃 𑌸𑌰𑍍𑌵𑍇 𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ॥ 137 ॥

𑌦𑍇𑌵𑌤𑌾𑌶𑍍𑌚𑌾𑌭𑌵𑌨𑍍 𑌹𑍃𑌷𑍍𑌟𑌾𑌸𑍍𑌤𑌤𑍍𑌰𑌸𑍍𑌥𑌾𑌸𑍍𑌤𑌸𑍍𑌯 𑌕𑌰𑍍𑌮𑌣𑌾 ।

𑌕𑌾𑌞𑍍𑌚𑌨𑌸𑍍𑌯 𑌸𑍁𑌨𑌾𑌭𑌸𑍍𑌯 𑌸𑌹𑌸𑍍𑌰𑌾𑌕𑍍𑌷𑌶𑍍𑌚 𑌵𑌾𑌸𑌵𑌃 ॥ 138 ॥

𑌉𑌵𑌾𑌚 𑌵𑌚𑌨𑌂 𑌧𑍀𑌮𑌾𑌨𑍍 𑌪𑌰𑌿𑌤𑍋𑌷𑌾𑌤𑍍𑌸𑌗𑌦𑍍𑌗𑌦𑌮𑍍 ।

𑌸𑍁𑌨𑌾𑌭𑌂 𑌪𑌰𑍍𑌵𑌤𑌶𑍍𑌰𑍇𑌷𑍍𑌠𑌂 𑌸𑍍𑌵𑌯𑌮𑍇𑌵 𑌶𑌚𑍀𑌪𑌤𑌿𑌃 ॥ 139 ॥

𑌹𑌿𑌰𑌣𑍍𑌯𑌨𑌾𑌭 𑌶𑍈𑌲𑍇𑌨𑍍𑌦𑍍𑌰 𑌪𑌰𑌿𑌤𑍁𑌷𑍍𑌟𑍋𑌽𑌸𑍍𑌮𑌿 𑌤𑍇 𑌭𑍃𑌶𑌮𑍍 ।

𑌅𑌭𑌯𑌂 𑌤𑍇 𑌪𑍍𑌰𑌯𑌚𑍍𑌛𑌾𑌮𑌿 𑌤𑌿𑌷𑍍𑌠 𑌸𑍗𑌮𑍍𑌯 𑌯𑌥𑌾𑌸𑍁𑌖𑌮𑍍 ॥ 140 ॥

𑌸𑌾𑌹𑍍𑌯𑌂 𑌕𑍃𑌤𑌂 𑌤𑍇 𑌸𑍁𑌮𑌹𑌦𑍍𑌵𑌿𑌕𑍍𑌰𑌾𑌨𑍍𑌤𑌸𑍍𑌯 𑌹𑌨𑍂𑌮𑌤𑌃 ।

𑌕𑍍𑌰𑌮𑌤𑍋 𑌯𑍋𑌜𑌨𑌶𑌤𑌂 𑌨𑌿𑌰𑍍𑌭𑌯𑌸𑍍𑌯 𑌭𑌯𑍇 𑌸𑌤𑌿 ॥ 141 ॥

𑌰𑌾𑌮𑌸𑍍𑌯𑍈𑌷 𑌹𑌿𑌤𑌾𑌯𑍈𑌵 𑌯𑌾𑌤𑌿 𑌦𑌾𑌶𑌰𑌥𑍇𑌰𑍍𑌹𑌰𑌿𑌃 ।

𑌸𑌤𑍍𑌕𑍍𑌰𑌿𑌯𑌾𑌂 𑌕𑍁𑌰𑍍𑌵𑌤𑌾 𑌤𑌸𑍍𑌯 𑌤𑍋𑌷𑌿𑌤𑍋𑌽𑌸𑍍𑌮𑌿 𑌦𑍃𑌢𑌂 𑌤𑍍𑌵𑌯𑌾 ॥ 142 ॥

𑌤𑌤𑌃 𑌪𑍍𑌰𑌹𑌰𑍍𑌷𑌮𑌗𑌮𑌦𑍍𑌵𑌿𑌪𑍁𑌲𑌂 𑌪𑌰𑍍𑌵𑌤𑍋𑌤𑍍𑌤𑌮𑌃 ।

𑌦𑍇𑌵𑌤𑌾𑌨𑌾𑌂 𑌪𑌤𑌿𑌂 𑌦𑍃𑌷𑍍𑌟𑍍𑌵𑌾 𑌪𑌰𑌿𑌤𑍁𑌷𑍍𑌟𑌂 𑌶𑌤𑌕𑍍𑌰𑌤𑍁𑌮𑍍 ॥ 143 ॥

𑌸 𑌵𑍈 𑌦𑌤𑍍𑌤𑌵𑌰𑌃 𑌶𑍈𑌲𑍋 𑌬𑌭𑍂𑌵𑌾𑌵𑌸𑍍𑌥𑌿𑌤𑌸𑍍𑌤𑌦𑌾 ।

𑌹𑌨𑍁𑌮𑌾𑌂𑌶𑍍𑌚 𑌮𑍁𑌹𑍂𑌰𑍍𑌤𑍇𑌨 𑌵𑍍𑌯𑌤𑌿𑌚𑌕𑍍𑌰𑌾𑌮 𑌸𑌾𑌗𑌰𑌮𑍍 ॥ 144 ॥

𑌤𑌤𑍋 𑌦𑍇𑌵𑌾𑌃 𑌸𑌗𑌨𑍍𑌧𑌰𑍍𑌵𑌾𑌃 𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ।

𑌅𑌬𑍍𑌰𑍁𑌵𑌨𑍍 𑌸𑍂𑌰𑍍𑌯𑌸𑌙𑍍𑌕𑌾𑌶𑌾𑌂 𑌸𑍁𑌰𑌸𑌾𑌂 𑌨𑌾𑌗𑌮𑌾𑌤𑌰𑌮𑍍 ॥ 145 ॥

𑌅𑌯𑌂 𑌵𑌾𑌤𑌾𑌤𑍍𑌮𑌜𑌃 𑌶𑍍𑌰𑍀𑌮𑌾𑌨𑍍𑌪𑍍𑌲𑌵𑌤𑍇 𑌸𑌾𑌗𑌰𑍋𑌪𑌰𑌿 ।

𑌹𑌨𑍁𑌮𑌾𑌨𑍍𑌨𑌾𑌮 𑌤𑌸𑍍𑌯 𑌤𑍍𑌵𑌂 𑌮𑍁𑌹𑍂𑌰𑍍𑌤𑌂 𑌵𑌿𑌘𑍍𑌨𑌮𑌾𑌚𑌰 ॥ 146 ॥

𑌰𑌾𑌕𑍍𑌷𑌸𑌂 𑌰𑍂𑌪𑌮𑌾𑌸𑍍𑌥𑌾𑌯 𑌸𑍁𑌘𑍋𑌰𑌂 𑌪𑌰𑍍𑌵𑌤𑍋𑌪𑌮𑌮𑍍 ।

𑌦𑌂𑌷𑍍𑌟𑍍𑌰𑌾𑌕𑌰𑌾𑌲𑌂 𑌪𑌿𑌙𑍍𑌗𑌾𑌕𑍍𑌷𑌂 𑌵𑌕𑍍𑌤𑍍𑌰𑌂 𑌕𑍃𑌤𑍍𑌵𑌾 𑌨𑌭𑌃 𑌸𑌮𑌮𑍍 ॥ 147 ॥

𑌬𑌲𑌮𑌿𑌚𑍍𑌛𑌾𑌮𑌹𑍇 𑌜𑍍𑌞𑌾𑌤𑍁𑌂 𑌭𑍂𑌯𑌶𑍍𑌚𑌾𑌸𑍍𑌯 𑌪𑌰𑌾𑌕𑍍𑌰𑌮𑌮𑍍 ।

𑌤𑍍𑌵𑌾𑌂 𑌵𑌿𑌜𑍇𑌷𑍍𑌯𑌤𑍍𑌯𑍁𑌪𑌾𑌯𑍇𑌨 𑌵𑌿𑌷𑌾𑌦𑌂 𑌵𑌾 𑌗𑌮𑌿𑌷𑍍𑌯𑌤𑌿 ॥ 148 ॥

𑌏𑌵𑌮𑍁𑌕𑍍𑌤𑌾 𑌤𑍁 𑌸𑌾 𑌦𑍇𑌵𑍀 𑌦𑍈𑌵𑌤𑍈𑌰𑌭𑌿𑌸𑌤𑍍𑌕𑍃𑌤𑌾 ।

𑌸𑌮𑍁𑌦𑍍𑌰𑌮𑌧𑍍𑌯𑍇 𑌸𑍁𑌰𑌸𑌾 𑌬𑌿𑌭𑍍𑌰𑌤𑍀 𑌰𑌾𑌕𑍍𑌷𑌸𑌂 𑌵𑌪𑍁𑌃 ॥ 149 ॥

𑌵𑌿𑌕𑍃𑌤𑌂 𑌚 𑌵𑌿𑌰𑍂𑌪𑌂 𑌚 𑌸𑌰𑍍𑌵𑌸𑍍𑌯 𑌚 𑌭𑌯𑌾𑌵𑌹𑌮𑍍 ।

𑌪𑍍𑌲𑌵𑌮𑌾𑌨𑌂 𑌹𑌨𑍂𑌮𑌨𑍍𑌤𑌮𑌾𑌵𑍃𑌤𑍍𑌯𑍇𑌦𑌮𑍁𑌵𑌾𑌚 𑌹 ॥ 150 ॥

𑌮𑌮 𑌭𑌕𑍍𑌷𑌃 𑌪𑍍𑌰𑌦𑌿𑌷𑍍𑌟𑌸𑍍𑌤𑍍𑌵𑌮𑍀𑌶𑍍𑌵𑌰𑍈𑌰𑍍𑌵𑌾𑌨𑌰𑌰𑍍𑌷𑌭 ।

𑌅𑌹𑌂 𑌤𑍍𑌵𑌾𑌂 𑌭𑌕𑍍𑌷𑌯𑌿𑌷𑍍𑌯𑌾𑌮𑌿 𑌪𑍍𑌰𑌵𑌿𑌶𑍇𑌦𑌂 𑌮𑌮𑌾𑌨𑌨𑌮𑍍 ॥ 151 ॥

𑌏𑌵𑌮𑍁𑌕𑍍𑌤𑌃 𑌸𑍁𑌰𑌸𑌯𑌾 𑌪𑍍𑌰𑌾𑌞𑍍𑌜𑌲𑌿𑌰𑍍𑌵𑌾𑌨𑌰𑌰𑍍𑌷𑌭𑌃 ।

𑌪𑍍𑌰𑌹𑍃𑌷𑍍𑌟𑌵𑌦𑌨𑌃 𑌶𑍍𑌰𑍀𑌮𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 152 ॥

𑌰𑌾𑌮𑍋 𑌦𑌾𑌶𑌰𑌥𑌿𑌰𑍍𑌨𑌾𑌮 𑌪𑍍𑌰𑌵𑌿𑌷𑍍𑌟𑍋 𑌦𑌣𑍍𑌡𑌕𑌾𑌵𑌨𑌮𑍍 ।

𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌵𑍈𑌦𑍇𑌹𑍍𑌯𑌾 𑌚𑌾𑌪𑌿 𑌭𑌾𑌰𑍍𑌯𑌯𑌾 ॥ 153 ॥

𑌅𑌨𑍍𑌯𑌕𑌾𑌰𑍍𑌯𑌵𑌿𑌷𑌕𑍍𑌤𑌸𑍍𑌯 𑌬𑌦𑍍𑌧𑌵𑍈𑌰𑌸𑍍𑌯 𑌰𑌾𑌕𑍍𑌷𑌸𑍈𑌃 ।

𑌤𑌸𑍍𑌯 𑌸𑍀𑌤𑌾 𑌹𑍃𑌤𑌾 𑌭𑌾𑌰𑍍𑌯𑌾 𑌰𑌾𑌵𑌣𑍇𑌨 𑌯𑌶𑌸𑍍𑌵𑌿𑌨𑍀 ॥ 154 ॥

𑌤𑌸𑍍𑌯𑌾𑌃 𑌸𑌕𑌾𑌶𑌂 𑌦𑍂𑌤𑍋𑌽𑌹𑌂 𑌗𑌮𑌿𑌷𑍍𑌯𑍇 𑌰𑌾𑌮𑌶𑌾𑌸𑌨𑌾𑌤𑍍 ।

𑌕𑌰𑍍𑌤𑍁𑌮𑌰𑍍𑌹𑌸𑌿 𑌰𑌾𑌮𑌸𑍍𑌯 𑌸𑌾𑌹𑍍𑌯𑌂 𑌵𑌿𑌷𑌯𑌵𑌾𑌸𑌿𑌨𑌿 ॥ 155 ॥

𑌅𑌥𑌵𑌾 𑌮𑍈𑌥𑌿𑌲𑍀𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌂 𑌚𑌾𑌕𑍍𑌲𑌿𑌷𑍍𑌟𑌕𑌾𑌰𑌿𑌣𑌮𑍍 ।

𑌆𑌗𑌮𑌿𑌷𑍍𑌯𑌾𑌮𑌿 𑌤𑍇 𑌵𑌕𑍍𑌤𑍍𑌰𑌂 𑌸𑌤𑍍𑌯𑌂 𑌪𑍍𑌰𑌤𑌿𑌶𑍃𑌣𑍋𑌮𑌿 𑌤𑍇 ॥ 156 ॥

𑌏𑌵𑌮𑍁𑌕𑍍𑌤𑌾 𑌹𑌨𑍁𑌮𑌤𑌾 𑌸𑍁𑌰𑌸𑌾 𑌕𑌾𑌮𑌰𑍂𑌪𑌿𑌣𑍀 ।

𑌅𑌬𑍍𑌰𑌵𑍀𑌨𑍍𑌨𑌾𑌤𑌿𑌵𑌰𑍍𑌤𑍇𑌨𑍍𑌮𑌾𑌂 𑌕𑌶𑍍𑌚𑌿𑌦𑍇𑌷 𑌵𑌰𑍋 𑌮𑌮 ॥ 157 ॥

𑌤𑌂 𑌪𑍍𑌰𑌯𑌾𑌨𑍍𑌤𑌂 𑌸𑌮𑍁𑌦𑍍𑌵𑍀𑌕𑍍𑌷𑍍𑌯 𑌸𑍁𑌰𑌸𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।

𑌬𑌲𑌂 𑌜𑌿𑌜𑍍𑌞𑌾𑌸𑌮𑌾𑌨𑌾 𑌵𑍈 𑌨𑌾𑌗𑌮𑌾𑌤𑌾 𑌹𑌨𑍂𑌮𑌤𑌃 ॥ 158 ॥

𑌪𑍍𑌰𑌵𑌿𑌶𑍍𑌯 𑌵𑌦𑌨𑌂 𑌮𑍇𑌽𑌦𑍍𑌯 𑌗𑌨𑍍𑌤𑌵𑍍𑌯𑌂 𑌵𑌾𑌨𑌰𑍋𑌤𑍍𑌤𑌮 ।

𑌵𑌰 𑌏𑌷 𑌪𑍁𑌰𑌾 𑌦𑌤𑍍𑌤𑍋 𑌮𑌮 𑌧𑌾𑌤𑍍𑌰𑍇𑌤𑌿 𑌸𑌤𑍍𑌵𑌰𑌾 ॥ 159 ॥

𑌵𑍍𑌯𑌾𑌦𑌾𑌯 𑌵𑌿𑌪𑍁𑌲𑌂 𑌵𑌕𑍍𑌤𑍍𑌰𑌂 𑌸𑍍𑌥𑌿𑌤𑌾 𑌸𑌾 𑌮𑌾𑌰𑍁𑌤𑍇𑌃 𑌪𑍁𑌰𑌃 ।

𑌏𑌵𑌮𑍁𑌕𑍍𑌤𑌃 𑌸𑍁𑌰𑌸𑌯𑌾 𑌕𑍍𑌰𑍁𑌦𑍍𑌧𑍋 𑌵𑌾𑌨𑌰𑌪𑍁𑌙𑍍𑌗𑌵𑌃 ॥ 160 ॥

𑌅𑌬𑍍𑌰𑌵𑍀𑌤𑍍𑌕𑍁𑌰𑍁 𑌵𑍈 𑌵𑌕𑍍𑌤𑍍𑌰𑌂 𑌯𑍇𑌨 𑌮𑌾𑌂 𑌵𑌿𑌷𑌹𑌿𑌷𑍍𑌯𑌸𑍇 ।

𑌇𑌤𑍍𑌯𑍁𑌕𑍍𑌤𑍍𑌵𑌾 𑌸𑍁𑌰𑌸𑌾𑌂 𑌕𑍍𑌰𑍁𑌦𑍍𑌧𑍋 𑌧𑌶𑌯𑍋𑌜𑌨𑌮𑌾𑌯𑌤𑌾 ॥ 161 ॥

𑌦𑌶𑌯𑍋𑌜𑌨𑌵𑌿𑌸𑍍𑌤𑌾𑌰𑍋 𑌬𑌭𑍂𑌵 𑌹𑌨𑍁𑌮𑌾𑌂𑌸𑍍𑌤𑌦𑌾 ।

𑌤𑌂 𑌦𑍃𑌷𑍍𑌟𑍍𑌵𑌾 𑌮𑍇𑌘𑌸𑌙𑍍𑌕𑌾𑌶𑌂 𑌦𑌶𑌯𑍋𑌜𑌨𑌮𑌾𑌯𑌤𑌮𑍍 ॥ 162 ॥

𑌚𑌕𑌾𑌰 𑌸𑍁𑌰𑌸𑌾 𑌚𑌾𑌸𑍍𑌯𑌂 𑌵𑌿𑌂𑌶𑌦𑍍𑌯𑍋𑌜𑌨𑌮𑌾𑌯𑌤𑌮𑍍 ।

𑌹𑌨𑍁𑌮𑌾𑌂𑌸𑍍𑌤𑍁 𑌤𑌤𑌃 𑌕𑍍𑌰𑍁𑌦𑍍𑌧𑌸𑍍𑌤𑍍𑌰𑌿𑌂𑌶𑌦𑍍𑌯𑍋𑌜𑌨𑌮𑌾𑌯𑌤𑌃 ॥ 163 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌂 𑌚𑌤𑍍𑌵𑌾𑌰𑌿𑌂𑌶𑌤𑍍𑌤𑌥𑍋𑌚𑍍𑌛𑍍𑌰𑌿𑌤𑌮𑍍 ।

𑌬𑌭𑍂𑌵 𑌹𑌨𑍁𑌮𑌾𑌵𑌨𑍀𑌰𑌃 𑌪𑌞𑍍𑌚𑌾𑌶𑌦𑍍𑌯𑍋𑌜𑌨𑍋𑌚𑍍𑌛𑍍𑌰𑌿𑌤𑌃 ॥ 164 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌂 𑌷𑌷𑍍𑌟𑌿𑌯𑍋𑌜𑌨𑌮𑌾𑌯𑌤𑌮𑍍 ।

𑌤𑌥𑍈𑌵 𑌹𑌨𑍁𑌮𑌾𑌵𑌨𑍀𑌰𑌃 𑌸𑌪𑍍𑌤𑌤𑍀𑌯𑍋𑌜𑌨𑍋𑌚𑍍𑌛𑍍𑌰𑌿𑌤𑌃 ॥ 165 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌮𑌶𑍀𑌤𑍀𑌯𑍋𑌜𑌨𑌾𑌯𑌤𑌮𑍍 ।

𑌹𑌨𑍁𑌮𑌾𑌨𑌚𑌲𑌪𑍍𑌰𑌖𑍍𑌯𑍋 𑌨𑌵𑌤𑍀𑌯𑍋𑌜𑌨𑍋𑌚𑍍𑌛𑍍𑌰𑌿𑌤𑌃 ॥ 166 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌂 𑌶𑌤𑌯𑍋𑌜𑌨𑌮𑌾𑌯𑌤𑌂 𑌤𑌵 𑌸𑌾𑌨𑍁𑌷𑍁 𑌵𑌿𑌶𑍍𑌰𑌾𑌨𑍍𑌤𑌃 𑌶𑍇𑌷𑌂 𑌪𑍍𑌰𑌕𑍍𑌰𑌮𑌤𑌾𑌮𑌿𑌤𑌿 ।

𑌤𑌦𑍍𑌦𑍃𑌷𑍍𑌟𑍍𑌵𑌾 𑌵𑍍𑌯𑌾𑌦𑌿𑌤𑌂 𑌤𑍍𑌵𑌾𑌸𑍍𑌯𑌂 𑌵𑌾𑌯𑍁𑌪𑍁𑌤𑍍𑌰𑌃 𑌸𑍁𑌬𑍁𑌦𑍍𑌧𑌿𑌮𑌾𑌨𑍍 ।

𑌦𑍀𑌰𑍍𑌘𑌜𑌿𑌹𑍍𑌵𑌂 𑌸𑍁𑌰𑌸𑌯𑌾 𑌸𑍁𑌘𑍋𑌰𑌂 𑌨𑌰𑌕𑍋𑌪𑌮𑌮𑍍 ॥ 167 ॥

𑌸𑍁𑌸𑌙𑍍𑌕𑍍𑌷𑌿𑌪𑍍𑌯𑌾𑌤𑍍𑌮𑌨𑌃 𑌕𑌾𑌯𑌂 𑌬𑌭𑍂𑌵𑌾𑌙𑍍𑌗𑍁𑌷𑍍𑌠𑌮𑌾𑌤𑍍𑌰𑌕𑌃 ।

𑌸𑍋𑌽𑌭𑌿𑌪𑌤𑍍𑌯𑌾𑌶𑍁 𑌤𑌦𑍍𑌵𑌕𑍍𑌤𑍍𑌰𑌂 𑌨𑌿𑌷𑍍𑌪𑌤𑍍𑌯 𑌚 𑌮𑌹𑌾𑌬𑌲𑌃 ।

𑌅𑌨𑍍𑌤𑌰𑌿𑌕𑍍𑌷𑍇 𑌸𑍍𑌥𑌿𑌤𑌃 𑌶𑍍𑌰𑍀𑌮𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 168 ॥

𑌪𑍍𑌰𑌵𑌿𑌷𑍍𑌟𑍋𑌽𑌸𑍍𑌮𑌿 𑌹𑌿 𑌤𑍇 𑌵𑌕𑍍𑌤𑍍𑌰𑌂 𑌦𑌾𑌕𑍍𑌷𑌾𑌯𑌣𑌿 𑌨𑌮𑍋𑌽𑌸𑍍𑌤𑍁 𑌤𑍇 ।

𑌗𑌮𑌿𑌷𑍍𑌯𑍇 𑌯𑌤𑍍𑌰 𑌵𑍈𑌦𑍇𑌹𑍀 𑌸𑌤𑍍𑌯𑌂 𑌚𑌾𑌸𑍀𑌦𑍍𑌵𑌰𑌸𑍍𑌤𑌵 ॥ 169 ॥

𑌤𑌂 𑌦𑍃𑌷𑍍𑌟𑍍𑌵𑌾 𑌵𑌦𑌨𑌾𑌨𑍍𑌮𑍁𑌕𑍍𑌤𑌂 𑌚𑌨𑍍𑌦𑍍𑌰𑌂 𑌰𑌾𑌹𑍁𑌮𑍁𑌖𑌾𑌦𑌿𑌵 ।

𑌅𑌬𑍍𑌰𑌵𑍀𑌤𑍍𑌸𑍁𑌰𑌸𑌾 𑌦𑍇𑌵𑍀 𑌸𑍍𑌵𑍇𑌨 𑌰𑍂𑌪𑍇𑌣 𑌵𑌾𑌨𑌰𑌮𑍍 ॥ 170 ॥

𑌅𑌰𑍍𑌥𑌸𑌿𑌦𑍍𑌧𑍍𑌯𑍈 𑌹𑌰𑌿𑌶𑍍𑌰𑍇𑌷𑍍𑌠 𑌗𑌚𑍍𑌛 𑌸𑍗𑌮𑍍𑌯 𑌯𑌥𑌾𑌸𑍁𑌖𑌮𑍍 ।

𑌸𑌮𑌾𑌨𑌯𑌸𑍍𑌵 𑌵𑍈𑌦𑍇𑌹𑍀𑌂 𑌰𑌾𑌘𑌵𑍇𑌣 𑌮𑌹𑌾𑌤𑍍𑌮𑌨𑌾 ॥ 171 ॥

𑌤𑌤𑍍𑌤𑍃𑌤𑍀𑌯𑌂 𑌹𑌨𑍁𑌮𑌤𑍋 𑌦𑍃𑌷𑍍𑌟𑍍𑌵𑌾 𑌕𑌰𑍍𑌮 𑌸𑍁𑌦𑍁𑌷𑍍𑌕𑌰𑌮𑍍 ।

𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌭𑍂𑌤𑌾𑌨𑌿 𑌪𑍍𑌰𑌶𑌶𑌂𑌸𑍁𑌸𑍍𑌤𑌦𑌾 𑌹𑌰𑌿𑌮𑍍 ॥ 172 ॥

𑌸 𑌸𑌾𑌗𑌰𑌮𑌨𑌾𑌧𑍃𑌷𑍍𑌯𑌮𑌭𑍍𑌯𑍇𑌤𑍍𑌯 𑌵𑌰𑍁𑌣𑌾𑌲𑌯𑌮𑍍 ।

𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌵𑍇𑌗𑍇𑌨 𑌗𑌰𑍁𑌡𑍋𑌪𑌮𑌃 ॥ 173 ॥

𑌸𑍇𑌵𑌿𑌤𑍇 𑌵𑌾𑌰𑌿𑌧𑌾𑌰𑌾𑌭𑌿𑌃 𑌪𑌤𑌗𑍈𑌶𑍍𑌚 𑌨𑌿𑌷𑍇𑌵𑌿𑌤𑍇 ।

𑌚𑌰𑌿𑌤𑍇 𑌕𑍈𑌶𑌿𑌕𑌾𑌚𑌾𑌰𑍍𑌯𑍈𑌰𑍈𑌰𑌾𑌵𑌤𑌨𑌿𑌷𑍇𑌵𑌿𑌤𑍇 ॥ 174 ॥

𑌸𑌿𑌂𑌹𑌕𑍁𑌞𑍍𑌜𑌰𑌶𑌾𑌰𑍍𑌦𑍂𑌲𑌪𑌤𑌗𑍋𑌰𑌗𑌵𑌾𑌹𑌨𑍈𑌃 ।

𑌵𑌿𑌮𑌾𑌨𑍈𑌃 𑌸𑌮𑍍𑌪𑌤𑌦𑍍𑌭𑌿𑌶𑍍𑌚 𑌵𑌿𑌮𑌲𑍈𑌃 𑌸𑌮𑌲𑌙𑍍𑌕𑍃𑌤𑍇 ॥ 175 ॥

𑌵𑌜𑍍𑌰𑌾𑌶𑌨𑌿𑌸𑌮𑌾𑌘𑌾𑌤𑍈𑌃 𑌪𑌾𑌵𑌕𑍈𑌰𑍁𑌪𑌶𑍋𑌭𑌿𑌤𑍇 ।

𑌕𑍃𑌤𑌪𑍁𑌣𑍍𑌯𑍈𑌰𑍍𑌮𑌹𑌾𑌭𑌾𑌗𑍈𑌃 𑌸𑍍𑌵𑌰𑍍𑌗𑌜𑌿𑌦𑍍𑌭𑌿𑌰𑌲𑌙𑍍𑌕𑍃𑌤𑍇 ॥ 176 ॥

𑌵𑌹𑌤𑌾 𑌹𑌵𑍍𑌯𑌮𑌤𑍍𑌯𑌰𑍍𑌧𑌂 𑌸𑍇𑌵𑌿𑌤𑍇 𑌚𑌿𑌤𑍍𑌰𑌭𑌾𑌨𑍁𑌨𑌾 ।

𑌗𑍍𑌰𑌹𑌨𑌕𑍍𑌷𑌤𑍍𑌰𑌚𑌨𑍍𑌦𑍍𑌰𑌾𑌰𑍍𑌕𑌤𑌾𑌰𑌾𑌗𑌣 𑌵𑌿𑌭𑍂𑌷𑌿𑌤𑍇 ॥ 177 ॥

𑌮𑌹𑌰𑍍𑌷𑌿𑌗𑌣𑌗𑌨𑍍𑌧𑌰𑍍𑌵𑌨𑌾𑌗𑌯𑌕𑍍𑌷𑌸𑌮𑌾𑌕𑍁𑌲𑍇 ।

𑌵𑌿𑌵𑌿𑌕𑍍𑌤𑍇 𑌵𑌿𑌮𑌲𑍇 𑌵𑌿𑌶𑍍𑌵𑍇 𑌵𑌿𑌶𑍍𑌵𑌾𑌵𑌸𑍁𑌨𑌿𑌷𑍇𑌵𑌿𑌤𑍇 ॥ 178 ॥

𑌦𑍇𑌵𑌰𑌾𑌜𑌗𑌜𑌾𑌕𑍍𑌰𑌾𑌨𑍍𑌤𑍇 𑌚𑌨𑍍𑌦𑍍𑌰𑌸𑍂𑌰𑍍𑌯𑌪𑌥𑍇 𑌶𑌿𑌵𑍇 ।

𑌵𑌿𑌤𑌾𑌨𑍇 𑌜𑍀𑌵𑌲𑍋𑌕𑌸𑍍𑌯 𑌵𑌿𑌤𑌤𑍇 𑌬𑍍𑌰𑌹𑍍𑌮𑌨𑌿𑌰𑍍𑌮𑌿𑌤𑍇 ॥ 179 ॥

𑌬𑌹𑍁𑌶𑌃 𑌸𑍇𑌵𑌿𑌤𑍇 𑌵𑍀𑌰𑍈𑌰𑍍𑌵𑌿𑌦𑍍𑌯𑌾𑌧𑌰𑌗𑌣𑍈𑌰𑍍𑌵𑌰𑍈𑌃 ।

𑌜𑌗𑌾𑌮 𑌵𑌾𑌯𑍁𑌮𑌾𑌰𑍍𑌗𑍇 𑌤𑍁 𑌗𑌰𑍁𑌤𑍍𑌮𑌾𑌨𑌿𑌵 𑌮𑌾𑌰𑍁𑌤𑌿𑌃 ॥ 180 ॥

𑌪𑍍𑌰𑌦𑍃𑌶𑍍𑌯𑌮𑌾𑌨𑌃 𑌸𑌰𑍍𑌵𑌤𑍍𑌰𑌃 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।

𑌭𑍇𑌜𑍇𑌽𑌮𑍍𑌬𑌰𑌂 𑌨𑌿𑌰𑌾𑌲𑌮𑍍𑌬𑌂 𑌲𑌮𑍍𑌬𑌪𑌕𑍍𑌷 𑌇𑌵𑌾𑌦𑍍𑌰𑌿𑌰𑌾𑌟𑍍 ॥ 181 ॥

𑌪𑍍𑌲𑌵𑌮𑌾𑌨𑌂 𑌤𑍁 𑌤𑌂 𑌦𑍃𑌷𑍍𑌟𑍍𑌵𑌾 𑌸𑌿𑌂𑌹𑌿𑌕𑌾 𑌨𑌾𑌮 𑌰𑌾𑌕𑍍𑌷𑌸𑍀 ।

𑌮𑌨𑌸𑌾 𑌚𑌿𑌨𑍍𑌤𑌯𑌾𑌮𑌾𑌸 𑌪𑍍𑌰𑌵𑍃𑌦𑍍𑌧𑌾 𑌕𑌾𑌮𑌰𑍂𑌪𑌿𑌣𑍀 ॥ 182 ॥

𑌅𑌦𑍍𑌯 𑌦𑍀𑌰𑍍𑌘𑌸𑍍𑌯 𑌕𑌾𑌲𑌸𑍍𑌯 𑌭𑌵𑌿𑌷𑍍𑌯𑌾𑌮𑍍𑌯𑌹𑌮𑌾𑌶𑌿𑌤𑌾 ।

𑌇𑌦𑌂 𑌹𑌿 𑌮𑍇 𑌮𑌹𑌤𑍍𑌸𑌤𑍍𑌤𑍍𑌵𑌂 𑌚𑌿𑌰𑌸𑍍𑌯 𑌵𑌶𑌮𑌾𑌗𑌤𑌮𑍍 ॥ 183 ॥

𑌇𑌤𑌿 𑌸𑌞𑍍𑌚𑌿𑌨𑍍𑌤𑍍𑌯 𑌮𑌨𑌸𑌾 𑌛𑌾𑌯𑌾𑌮𑌸𑍍𑌯 𑌸𑌮𑌾𑌕𑍍𑌷𑌿𑌪𑌤𑍍 ।

𑌛𑌾𑌯𑌾𑌯𑌾𑌂 𑌗𑍃𑌹𑍍𑌯𑌮𑌾𑌣𑌾𑌯𑌾𑌂 𑌚𑌿𑌨𑍍𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 184 ॥

𑌸𑌮𑌾𑌕𑍍𑌷𑌿𑌪𑍍𑌤𑍋𑌽𑌸𑍍𑌮𑌿 𑌸𑌹𑌸𑌾 𑌪𑌙𑍍𑌗𑍂𑌕𑍃𑌤𑌪𑌰𑌾𑌕𑍍𑌰𑌮𑌃 ।

𑌪𑍍𑌰𑌤𑌿𑌲𑍋𑌮𑍇𑌨 𑌵𑌾𑌤𑍇𑌨 𑌮𑌹𑌾𑌨𑍗𑌰𑌿𑌵 𑌸𑌾𑌗𑌰𑍇 ॥ 185 ॥

𑌤𑌿𑌰𑍍𑌯𑌗𑍂𑌰𑍍𑌧𑍍𑌵𑌮𑌧𑌶𑍍𑌚𑍈𑌵 𑌵𑍀𑌕𑍍𑌷𑌮𑌾𑌣𑌸𑍍𑌤𑌤𑌃 𑌕𑌪𑌿𑌃 ।

𑌦𑌦𑌰𑍍𑌶 𑌸 𑌮𑌹𑌤𑍍𑌸𑌤𑍍𑌤𑍍𑌵𑌮𑍁𑌤𑍍𑌥𑌿𑌤𑌂 𑌲𑌵𑌣𑌾𑌮𑍍𑌭𑌸𑌿 ॥ 186 ॥

𑌤𑌦𑍍𑌧𑍃𑌷𑍍𑌟𑍍𑌵𑌾 𑌚𑌿𑌨𑍍𑌤𑌯𑌾𑌮𑌾𑌸 𑌮𑌾𑌰𑍁𑌤𑌿𑌰𑍍𑌵𑌿𑌕𑍃𑌤𑌾𑌨𑌨𑌮𑍍 ।

𑌕𑌪𑌿𑌰𑌾𑌜𑍇𑌨 𑌕𑌥𑌿𑌤𑌂 𑌸𑌤𑍍𑌤𑍍𑌵𑌮𑌦𑍍𑌭𑍁𑌤𑌦𑌰𑍍𑌶𑌨𑌮𑍍 ॥ 187 ॥

𑌛𑌾𑌯𑌾𑌗𑍍𑌰𑌾𑌹𑌿 𑌮𑌹𑌾𑌵𑍀𑌰𑍍𑌯𑌂 𑌤𑌦𑌿𑌦𑌂 𑌨𑌾𑌤𑍍𑌰 𑌸𑌂𑌶𑌯𑌃 ।

𑌸 𑌤𑌾𑌂 𑌬𑍁𑌦𑍍𑌧𑍍𑌵𑌾𑌰𑍍𑌥𑌤𑌤𑍍𑌤𑍍𑌵𑍇𑌨 𑌸𑌿𑌂𑌹𑌿𑌕𑌾𑌂 𑌮𑌤𑌿𑌮𑌾𑌨𑍍𑌕𑌪𑌿𑌃 ॥ 188 ॥

𑌵𑍍𑌯𑌵𑌰𑍍𑌧𑌤 𑌮𑌹𑌾𑌕𑌾𑌯𑌃 𑌪𑍍𑌰𑌾𑌵𑍃𑌷𑍀𑌵 𑌵𑌲𑌾𑌹𑌕𑌃 ।

𑌤𑌸𑍍𑌯 𑌸𑌾 𑌕𑌾𑌯𑌮𑍁𑌦𑍍𑌵𑍀𑌕𑍍𑌷𑍍𑌯 𑌵𑌰𑍍𑌧𑌮𑌾𑌨𑌂 𑌮𑌹𑌾𑌕𑌪𑍇𑌃 ॥ 189 ॥

𑌵𑌕𑍍𑌤𑍍𑌰𑌂 𑌪𑍍𑌰𑌸𑌾𑌰𑌯𑌾𑌮𑌾𑌸 𑌪𑌾𑌤𑌾𑌲𑌾𑌨𑍍𑌤𑌰𑌸𑌨𑍍𑌨𑌿𑌭𑌮𑍍 ।

𑌘𑌨𑌰𑌾𑌜𑍀𑌵 𑌗𑌰𑍍𑌜𑌨𑍍𑌤𑍀 𑌵𑌾𑌨𑌰𑌂 𑌸𑌮𑌭𑌿𑌦𑍍𑌰𑌵𑌤𑍍 ॥ 190 ॥

𑌸 𑌦𑌦𑌰𑍍𑌶 𑌤𑌤𑌸𑍍𑌤𑌸𑍍𑌯𑌾 𑌵𑌿𑌵𑍃𑌤𑌂 𑌸𑍁𑌮𑌹𑌨𑍍𑌮𑍁𑌖𑌮𑍍 ।

𑌕𑌾𑌯𑌮𑌾𑌤𑍍𑌰𑌂 𑌚 𑌮𑍇𑌧𑌾𑌵𑍀 𑌮𑌰𑍍𑌮𑌾𑌣𑌿 𑌚 𑌮𑌹𑌾𑌕𑌪𑌿𑌃 ॥ 191 ॥

𑌸 𑌤𑌸𑍍𑌯𑌾 𑌵𑌿𑌵𑍃𑌤𑍇 𑌵𑌕𑍍𑌤𑍍𑌰𑍇 𑌵𑌜𑍍𑌰𑌸𑌂𑌹𑌨𑌨𑌃 𑌕𑌪𑌿𑌃 ।

𑌸𑌙𑍍𑌕𑍍𑌷𑌿𑌪𑍍𑌯 𑌮𑍁𑌹𑍁𑌰𑌾𑌤𑍍𑌮𑌾𑌨𑌂 𑌨𑌿𑌷𑍍𑌪𑌪𑌾𑌤 𑌮𑌹𑌾𑌬𑌲𑌃 ॥ 192 ॥

𑌆𑌸𑍍𑌯𑍇 𑌤𑌸𑍍𑌯𑌾 𑌨𑌿𑌮𑌜𑍍𑌜𑌨𑍍𑌤𑌂 𑌦𑌦𑍃𑌶𑍁𑌃 𑌸𑌿𑌦𑍍𑌧𑌚𑌾𑌰𑌣𑌾𑌃 ।

𑌗𑍍𑌰𑌸𑍍𑌯𑌮𑌾𑌨𑌂 𑌯𑌥𑌾 𑌚𑌨𑍍𑌦𑍍𑌰𑌂 𑌪𑍂𑌰𑍍𑌣𑌂 𑌪𑌰𑍍𑌵𑌣𑌿 𑌰𑌾𑌹𑍁𑌣𑌾 ॥ 193 ॥

𑌤𑌤𑌸𑍍𑌤𑌸𑍍𑌯𑌾 𑌨𑌖𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑍍𑌮𑌰𑍍𑌮𑌾𑌣𑍍𑌯𑍁𑌤𑍍𑌕𑍃𑌤𑍍𑌯 𑌵𑌾𑌨𑌰𑌃 ।

𑌉𑌤𑍍𑌪𑌪𑌾𑌤𑌾𑌥 𑌵𑍇𑌗𑍇𑌨 𑌮𑌨𑌃 𑌸𑌮𑍍𑌪𑌾𑌤𑌵𑌿𑌕𑍍𑌰𑌮𑌃 ॥ 194 ॥

𑌤𑌾𑌂 𑌤𑍁 𑌦𑍃𑌷𑍍𑌟𑍍𑌵𑌾 𑌚 𑌧𑍃𑌤𑍍𑌯𑌾 𑌚 𑌦𑌾𑌕𑍍𑌷𑌿𑌣𑍍𑌯𑍇𑌨 𑌨𑌿𑌪𑌾𑌤𑍍𑌯 𑌚 ।

𑌸 𑌕𑌪𑌿𑌪𑍍𑌰𑌵𑌰𑍋 𑌵𑍇𑌗𑌾𑌦𑍍𑌵𑌵𑍃𑌧𑍇 𑌪𑍁𑌨𑌰𑌾𑌤𑍍𑌮𑌵𑌾𑌨𑍍 ॥ 195 ॥

𑌹𑍃𑌤𑌹𑍃𑌤𑍍𑌸𑌾 𑌹𑌨𑍁𑌮𑌤𑌾𑌪𑌪𑌾𑌤 𑌵𑌿𑌧𑍁𑌰𑌾𑌮𑍍𑌭𑌸𑌿 ।

𑌤𑌾𑌂 𑌹𑌤𑌾𑌂 𑌵𑌾𑌨𑌰𑍇𑌣𑌾𑌶𑍁 𑌪𑌤𑌿𑌤𑌾𑌂 𑌵𑍀𑌕𑍍𑌷𑍍𑌯 𑌸𑌿𑌂𑌹𑌿𑌕𑌾𑌮𑍍 ॥ 196 ॥

𑌭𑍂𑌤𑌾𑌨𑍍𑌯𑌾𑌕𑌾𑌶𑌚𑌾𑌰𑍀𑌣𑌿 𑌤𑌮𑍂𑌚𑍁𑌃 𑌪𑍍𑌲𑌵𑌗𑍋𑌤𑍍𑌤𑌮𑌮𑍍 ।

𑌭𑍀𑌮𑌮𑌦𑍍𑌯 𑌕𑍃𑌤𑌂 𑌕𑌰𑍍𑌮 𑌮𑌹𑌤𑍍𑌸𑌤𑍍𑌤𑍍𑌵𑌂 𑌤𑍍𑌵𑌯𑌾 𑌹𑌤𑌮𑍍 ॥ 197 ॥

𑌸𑌾𑌧𑌯𑌾𑌰𑍍𑌥𑌮𑌭𑌿𑌪𑍍𑌰𑍇𑌤𑌮𑌰𑌿𑌷𑍍𑌟𑌂 𑌪𑍍𑌲𑌵𑌤𑌾𑌂 𑌵𑌰 ।

𑌯𑌸𑍍𑌯 𑌤𑍍𑌵𑍇𑌤𑌾𑌨𑌿 𑌚𑌤𑍍𑌵𑌾𑌰𑌿 𑌵𑌾𑌨𑌰𑍇𑌨𑍍𑌦𑍍𑌰 𑌯𑌥𑌾 𑌤𑌵 ॥ 198 ॥

𑌧𑍃𑌤𑌿𑌰𑍍𑌦𑍃𑌷𑍍𑌟𑌿𑌰𑍍𑌮𑌤𑌿𑌰𑍍𑌦𑌾𑌕𑍍𑌷𑍍𑌯𑌂 𑌸𑌃 𑌕𑌰𑍍𑌮𑌸𑍁 𑌨 𑌸𑍀𑌦𑌤𑌿 ।

𑌸 𑌤𑍈𑌃 𑌸𑌮𑍍𑌭𑌾𑌵𑌿𑌤𑌃 𑌪𑍂𑌜𑍍𑌯𑌃 𑌪𑍍𑌰𑌤𑌿𑌪𑌨𑍍𑌨𑌪𑍍𑌰𑌯𑍋𑌜𑌨𑌃 ॥ 199 ॥

𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌪𑌨𑍍𑌨𑌗𑌾𑌶𑌨𑌵𑌤𑍍𑌕𑌪𑌿𑌃 ।

𑌪𑍍𑌰𑌾𑌪𑍍𑌤𑌭𑍂𑌯𑌿𑌷𑍍𑌠𑌪𑌾𑌰𑌸𑍍𑌤𑍁 𑌸𑌰𑍍𑌵𑌤𑌃 𑌪𑍍𑌰𑌤𑌿𑌲𑍋𑌕𑌯𑌨𑍍 ॥ 200 ॥

𑌯𑍋𑌜𑌨𑌾𑌨𑌾𑌂 𑌶𑌤𑌸𑍍𑌯𑌾𑌨𑍍𑌤𑍇 𑌵𑌨𑌰𑌾𑌜𑌿𑌂 𑌦𑌦𑌰𑍍𑌶 𑌸𑌃 ।

𑌦𑌦𑌰𑍍𑌶 𑌚 𑌪𑌤𑌨𑍍𑌨𑍇𑌵 𑌵𑌿𑌵𑌿𑌧𑌦𑍍𑌰𑍁𑌮𑌭𑍂𑌷𑌿𑌤𑌮𑍍 ॥ 201 ॥

𑌦𑍍𑌵𑍀𑌪𑌂 𑌶𑌾𑌖𑌾𑌮𑍃𑌗𑌶𑍍𑌰𑍇𑌷𑍍𑌠𑍋 𑌮𑌲𑌯𑍋𑌪𑌵𑌨𑌾𑌨𑌿 𑌚 ।

𑌸𑌾𑌗𑌰𑌂 𑌸𑌾𑌗𑌰𑌾𑌨𑍂𑌪𑌂 𑌸𑌾𑌗𑌰𑌾𑌨𑍂𑌪𑌜𑌾𑌨𑍍 𑌦𑍍𑌰𑍁𑌮𑌾𑌨𑍍 ॥ 202 ॥

𑌸𑌾𑌗𑌰𑌸𑍍𑌯 𑌚 𑌪𑌤𑍍𑌨𑍀𑌨𑌾𑌂 𑌮𑍁𑌖𑍍𑌯𑌾𑌨𑍍𑌯𑌪𑌿 𑌵𑌿𑌲𑍋𑌕𑌯𑌨𑍍 ।

𑌸 𑌮𑌹𑌾𑌮𑍇𑌘𑌸𑌙𑍍𑌕𑌾𑌶𑌂 𑌸𑌮𑍀𑌕𑍍𑌷𑍍𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌵𑌾𑌨𑍍 ॥ 203 ॥

𑌨𑌿𑌰𑍁𑌨𑍍𑌧𑌨𑍍𑌤𑌮𑌿𑌵𑌾𑌕𑌾𑌶𑌂 𑌚𑌕𑌾𑌰 𑌮𑌤𑌿𑌮𑌾𑌨𑍍 𑌮𑌤𑌿𑌮𑍍 ।

𑌕𑌾𑌯𑌵𑍃𑌦𑍍𑌧𑌿𑌂 𑌪𑍍𑌰𑌵𑍇𑌗𑌂 𑌚 𑌮𑌮 𑌦𑍃𑌷𑍍𑌟𑍍𑌵𑍈𑌵 𑌰𑌾𑌕𑍍𑌷𑌸𑌾𑌃 ॥ 204 ॥

𑌮𑌯𑌿 𑌕𑍗𑌤𑍂𑌹𑌲𑌂 𑌕𑍁𑌰𑍍𑌯𑌰𑌿𑌤𑌿 𑌮𑍇𑌨𑍇 𑌮𑌹𑌾𑌕𑌪𑌿𑌃 ।

𑌤𑌤𑌃 𑌶𑌰𑍀𑌰𑌂 𑌸𑌙𑍍𑌕𑍍𑌷𑌿𑌪𑍍𑌯 𑌤𑌨𑍍𑌮𑌹𑍀𑌧𑌰𑌸𑌨𑍍𑌨𑌿𑌭𑌮𑍍 ॥ 205 ॥

𑌪𑍁𑌨𑌃 𑌪𑍍𑌰𑌕𑍃𑌤𑌿𑌮𑌾𑌪𑍇𑌦𑍇 𑌵𑍀𑌤𑌮𑍋𑌹 𑌇𑌵𑌾𑌤𑍍𑌮𑌵𑌾𑌨𑍍 ।

𑌤𑌦𑍍𑌰𑍂𑌪𑌮𑌤𑌿𑌸𑌙𑍍𑌕𑍍𑌷𑌿𑌪𑍍𑌯 𑌹𑌨𑍁𑌮𑌾𑌨𑍍 𑌪𑍍𑌰𑌕𑍃𑌤𑍗 𑌸𑍍𑌥𑌿𑌤𑌃 ॥ 206 ॥

𑌤𑍍𑌰𑍀𑌨𑍍 𑌕𑍍𑌰𑌮𑌾𑌨𑌿𑌵 𑌵𑌿𑌕𑍍𑌰𑌮𑍍𑌯 𑌬𑌲𑌿𑌵𑍀𑌰𑍍𑌯𑌹𑌰𑍋 𑌹𑌰𑌿𑌃 ।

𑌸 𑌚𑌾𑌰𑍁𑌨𑌾𑌨𑌾𑌵𑌿𑌧𑌰𑍂𑌪𑌧𑌾𑌰𑍀 𑌪𑌰𑌂 𑌸𑌮𑌾𑌸𑌾𑌦𑍍𑌯 𑌸𑌮𑍁𑌦𑍍𑌰𑌤𑍀𑌰𑌮𑍍 ।

𑌪𑌰𑍈𑌰𑌶𑌕𑍍𑌯𑌃 𑌪𑍍𑌰𑌤𑌿𑌪𑌨𑍍𑌨𑌰𑍂𑌪𑌃 𑌸𑌮𑍀𑌕𑍍𑌷𑌿𑌤𑌾𑌤𑍍𑌮𑌾 𑌸𑌮𑌵𑍇𑌕𑍍𑌷𑌿𑌤𑌾𑌰𑍍𑌧𑌃 ॥ 207 ॥

𑌤𑌤𑌃 𑌸 𑌲𑌮𑍍𑌬𑌸𑍍𑌯 𑌗𑌿𑌰𑍇𑌃 𑌸𑌮𑍃𑌦𑍍𑌧𑍇 𑌵𑌿𑌚𑌿𑌤𑍍𑌰𑌕𑍂𑌟𑍇 𑌨𑌿𑌪𑌪𑌾𑌤 𑌕𑍂𑌟𑍇 ।

𑌸𑌕𑍇𑌤𑌕𑍋𑌦𑍍𑌦𑌾𑌲𑌕𑌨𑌾𑌲𑌿𑌕𑍇𑌰𑍇 𑌮𑌹𑌾𑌦𑍍𑌰𑌿𑌕𑍂𑌟𑌪𑍍𑌰𑌤𑌿𑌮𑍋 𑌮𑌹𑌾𑌤𑍍𑌮𑌾 ॥ 208 ॥

𑌤𑌤𑌸𑍍𑌤𑍁 𑌸𑌮𑍍𑌪𑍍𑌰𑌾𑌪𑍍𑌯 𑌸𑌮𑍁𑌦𑍍𑌰𑌤𑍀𑌰𑌂 𑌸𑌮𑍀𑌕𑍍𑌷𑍍𑌯 𑌲𑌙𑍍𑌕𑌾𑌂 𑌗𑌿𑌰𑌿𑌵𑌰𑍍𑌯𑌮𑍂𑌰𑍍𑌧𑍍𑌨𑌿 ।

𑌕𑌪𑌿𑌸𑍍𑌤𑍁 𑌤𑌸𑍍𑌨𑌿𑌨𑍍𑌨𑌿𑌪𑌪𑌾𑌤 𑌪𑌰𑍍𑌵𑌤𑍇 𑌵𑌿𑌧𑍂𑌯 𑌰𑍂𑌪𑌂 𑌵𑍍𑌯𑌥𑌯𑌨𑍍𑌮𑍃𑌗𑌦𑍍𑌵𑌿𑌜𑌾𑌨𑍍 ॥ 209 ॥

𑌸 𑌸𑌾𑌗𑌰𑌂 𑌦𑌾𑌨𑌵𑌪𑌨𑍍𑌨𑌗𑌾𑌯𑍁𑌤𑌂 𑌬𑌲𑍇𑌨 𑌵𑌿𑌕𑍍𑌰𑌮𑍍𑌯 𑌮𑌹𑍋𑌰𑍍𑌮𑌿𑌮𑌾𑌲𑌿𑌨𑌮𑍍 ।

𑌨𑌿𑌪𑌤𑍍𑌯 𑌤𑍀𑌰𑍇 𑌚 𑌮𑌹𑍋𑌦𑌧𑍇𑌸𑍍𑌤𑌦𑌾 𑌦𑌦𑌰𑍍𑌶 𑌲𑌙𑍍𑌕𑌾𑌮𑌮𑌰𑌾𑌵𑌤𑍀𑌮𑌿𑌵 ॥ 210 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌨𑍍𑌦𑌰𑌕𑌾𑌣𑍍𑌡𑍇 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe sundarakāṇḍam |

atha prathamassargaḥ |

tato rāvaṇanītāyāḥ sītāyāḥ śatrukarśanaḥ |

iyeṣa padamanveṣṭuṃ cāraṇācarite pathi || 1 ||

duṣkaraṃ niṣpratidvandvaṃ cikīrṣan karma vānaraḥ |

samudagraśirogrīvo gavāmpatirivābabhau || 2 ||

atha vaiḍūryavarṇeṣu śādvaleṣu mahābalaḥ |

dhīraḥ salilakalpeṣu vicacāra yathāsukham || 3 ||

dvijān vitrāsayan dhīmānurasā pādapān haran |

mṛgāṃśca subahūnnighnan pravṛddha iva kesarī || 4 ||

nīlalohitamāñjiṣṭhapatravarṇaiḥ sitāsitaiḥ |

svabhāvavihitaiścitrairdhātubhiḥ samalaṅkṛtam || 5 ||

kāmarūpibhirāviṣṭamabhīkṣṇaṃ saparicchadaiḥ |

yakṣakinnaragandharvairdevakalpaiśca pannagaiḥ || 6 ||

sa tasya girivaryasya tale nāgavarāyute |

tiṣṭhan kapivarastatra hrade nāga ivābabhau || 7 ||

sa sūryāya mahendrāya pavanāya svayambhuve |

bhūtebhyaścāñjaliṃ kṛtvā cakāra gamane matim || 8 ||

añjaliṃ prāṅmukhaḥ kurvan pavanāyātmayonaye |

tato hi vavṛdhe gantuṃ dakṣiṇo dakṣiṇāṃ diśam || 9 ||

plavaṅgapravarairdṛṣṭaḥ plavane kṛtaniścayaḥ |

vavṛdhe rāmavṛddhyarthaṃ samudra iva parvasu || 10 ||

niṣpramāṇaśarīraḥ san lilaṅghayiṣurarṇavam |

bāhubhyāṃ pīḍayāmāsa caraṇābhyāṃ ca parvatam || 11 ||

sa cacālācalaścāpi muhūrtaṃ kapipīḍitaḥ |

tarūṇāṃ puṣpitāgrāṇāṃ sarvaṃ puṣpamaśātayat || 12 ||

tena pādapamuktena puṣpaugheṇa sugandhinā |

sarvataḥ saṃvṛtaḥ śailo babhau puṣpamayo yathā || 13 ||

tena cottamavīryeṇa pīḍyamānaḥ sa parvataḥ |

salilaṃ samprasusrāva madaṃ matta iva dvipaḥ || 14 ||

pīḍyamānastu balinā mahendrastena parvataḥ |

rītīrnirvartayāmāsa kāñcanāñjanarājatīḥ || 15 ||

mumoca ca śilāḥ śailo viśālāḥ samanaḥśilāḥ |

madhyamenārciṣā juṣṭā dhūmarājīrivānalaḥ || 16 ||

giriṇā pīḍyamānena pīḍyamānāni sarvataḥ |

guhāviṣṭāni bhūtāni vinedurvikṛtaiḥ svaraiḥ || 17 ||

sa mahāsattvasannādaḥ śailapīḍānimittajaḥ |

pṛthivīṃ pūrayāmāsa diśaścopavanāni ca || 18 ||

śirobhiḥ pṛthubhiḥ sarpā vyaktasvastikalakṣaṇaiḥ |

vamantaḥ pāvakaṃ ghoraṃ dadaṃśurdaśanaiḥ śilāḥ || 19 ||

tāstadā saviṣairdaṣṭāḥ kupitaistairmahāśilāḥ |

jajjvaluḥ pāvakoddīptā bibhiduśca sahasradhā || 20 ||

yāni cauṣadhajālāni tasmin jātāni parvate |

viṣaghnānyapi nāgānāṃ na śekuḥ śamituṃ viṣam || 21 ||

bhidyate'yaṃ girirbhūtairiti mattvā tapasvinaḥ |

trastā vidyādharāstasmādutpetuḥ strī gaṇaiḥ saha || 22 ||

pānabhūmigataṃ hitvā haimamāsavabhājanam |

pātrāṇi ca mahārhāṇi karakāṃśca hiraṇmayān || 23 ||

lehyānuccāvacān bhakṣyān māṃsāni vividhāni ca |

ārṣabhāṇi ca carmāṇi khaḍagāṃśca kanakatsarūn || 24 ||

kṛtakaṇṭhaguṇāḥ kṣībā raktamālyānulepanāḥ |

raktākṣāḥ puṣkarākṣāśca gaganaṃ pratipedire || 25 ||

hāranūpurakeyūrapārihāryadharāḥ striyaḥ |

vismitāḥ sasmitāstasthurākāśe ramaṇaiḥ saha || 26 ||

darśayanto mahāvidyāṃ vidyādharamaharṣayaḥ |

sahitāstasthurākāśe vīkṣāñcakruśca parvatam || 27 ||

śuśruvuśca tadā śabdamṛṣīṇāṃ bhāvitātmanām |

cāraṇānāṃ ca siddhānāṃ sthitānāṃ vimale'mbare || 28 ||

eṣa parvatasaṅkāśo hanumān mārutātmajaḥ |

titīrṣati mahāvegassamudraṃ makarālayam || 29 ||

rāmārthaṃ vānarārthaṃ ca cikīrṣan karma duṣkaram |

samudrasya paraṃ pāraṃ duṣprāpaṃ prāptumicchati || 30 ||

iti vidyādharāḥ śrutvā vacasteṣāṃ mahātmanām |

tamaprameyaṃ dadṛśuḥ parvate vānararṣabham || 31 ||

dudhuve ca sa romāṇi cakampe cācalopamaḥ |

nanāda sumahānādaṃ sumahāniva toyadaḥ || 32 ||

ānupūrvyeṇa vṛttaṃ ca lāṅgūlaṃ lomabhiścitam |

utpatiṣyan vicikṣepa pakṣirāja ivoragam || 33 ||

tasya lāṅgūlamāviddhamāttavegasya pṛṣṭhataḥ |

dadṛśe garuḍeneva hriyamāṇo mahoragaḥ || 34 ||

bāhū saṃstambhayāmāsa mahāparighasannibhau |

sasāda ca kapiḥ kaṭyāṃ caraṇau sañcukoca ca || 35 ||

saṃhṛtya ca bhujau śrīmāṃstathaiva ca śirodharām |

tejaḥ sattvaṃ tathā vīryamāviveśa sa vīryavān || 36 ||

mārgamālokayandūrādūrdhvaṃ praṇihitekṣaṇaḥ |

rurodha hṛdaye prāṇānākāśamavalokayan || 37 ||

padbhyāṃ dṛḍhamavasthānaṃ kṛtvā sa kapikuñjaraḥ |

nikuñcya karṇau hanumānutpatiṣyan mahābalaḥ |

vānarān vānaraśreṣṭha idaṃ vacanamabravīt || 38 ||

yathā rāghavanirmuktaḥ śaraḥ śvasanavikramaḥ |

gacchettadvadgamiṣyāmi laṅkāṃ rāvaṇapālitām || 39 ||

na hi drakṣyāmi yadi tāṃ laṅkāyāṃ janakātmajām |

anenaiva hi vegena gamiṣyāmi surālayam || 40 ||

yadi vā tridive sītāṃ na drakṣyāmyakṛtaśramaḥ |

baddhvā rākṣasarājānamānayiṣyāmi rāvaṇam || 41 ||

sarvathā kṛtakāryo'hameṣyāmi saha sītayā |

ānayiṣyāmi vā laṅkāṃ samutpāṭya sarāvaṇām || 42 ||

evamuktvā tu hanumānvānarānvānarottamaḥ || 43 ||

utpapātātha vegena vegavānavicārayan |

suparṇamiva cātmānaṃ mene sa kapikuñjaraḥ || 44 ||

samutpatati tasmiṃstu vegātte nagarohiṇaḥ |

saṃhṛtya viṭapān sarvān samutpetuḥ samantataḥ || 45 ||

sa mattakoyaṣṭimakān pādapān puṣpaśālinaḥ |

udvahannūruvegena jagāma vimale'mbare || 46 ||

ūruvegoddhatā vṛkṣā muhūrtaṃ kapimanvayuḥ |

prasthitaṃ dīrghamadhvānaṃ svabandhumiva bāndhavāḥ || 47 ||

tamūruvegonmathitāḥ sālāścānye nagottamāḥ |

anujagmurhanūmantaṃ sainyā iva mahīpatim || 48 ||

supuṣpitāgrairbahubhiḥ pādapairanvitaḥ kapiḥ |

hanumān parvatākāro babhūvādbhutadarśanaḥ || 49 ||

sāravanto'tha ye vṛkṣā nyamajjan lavaṇāmbhasi |

bhayādiva mahendrasya parvatā varuṇālaye || 50 ||

sa nānākusumaiḥ kīrṇaḥ kapiḥ sāṅkurakorakaiḥ |

śuśubhe meghasaṅkāśaḥ khadyotairiva parvataḥ || 51 ||

vimuktāstasya vegena muktvā puṣpāṇi te drumāḥ |

avaśīryanta salile nivṛttāḥ suhṛdo yathā || 52 ||

laghutvenopapannaṃ tadvicitraṃ sāgare'patat |

drumāṇāṃ vividhaṃ puṣpaṃ kapivāyusamīritam || 53 ||

tārācitamivākāśaṃ prababhau sa mahārṇavaḥ |

puṣpaugheṇānubaddhena nānāvarṇena vānaraḥ |

babhau megha ivākāśe vidyudgaṇa vibhūṣitaḥ || 54 ||

tasya vegasamādhūtaiḥ puṣpaistoyamadṛśyata || 55 ||

tārābhirabhirāmābhiruditābhirivāmbaram |

tasyāmbaragatau bāhū dadṛśāte prasāritau || 56 ||

parvatāgrādviniṣkrāntau pañcāsyāviva pannagau |

pibanniva babhau cāpi sormimālaṃ mahārṇavam || 57 ||

pipāsuriva cākāśaṃ dadṛśe sa mahākapiḥ |

tasya vidyutprabhākāre vāyumārgānusāriṇaḥ || 58 ||

nayane viprakāśete parvatasthāvivānalau |

piṅge piṅgākṣamukhyasya bṛhatī parimaṇḍale || 59 ||

cakṣuṣī samprākāśete candrasūryāvivoditau |

mukhaṃ nāsikayā tasya tāmrayā tāmramābabhau || 60 ||

sandhyayā samabhispṛṣṭaṃ yathā tatsūryamaṇḍalam |

lāṅgūlaṃ ca samāviddhaṃ plavamānasya śobhate || 61 ||

ambare vāyuputrasya śakradhvaja ivocchritam |

lāṅgūlacakreṇa mahān śukladaṃṣṭro'nilātmajaḥ || 62 ||

vyarocata mahāprājñaḥ pariveṣīva bhāskaraḥ |

sphigdeśenābhitāmreṇa rarāja sa mahākapiḥ || 63 ||

mahatā dāriteneva girirgairikadhātunā |

tasya vānarasiṃhasya plavamānasya sāgaram || 64 ||

kakṣāntaragato vāyurjīmūta iva garjati |

khe yathā nipatatyulkā hyuttarāntādviniḥsṛtā || 65 ||

dṛśyate sānubandhā ca tathā sa kapikuñjaraḥ |

patatpataṅgasaṅkāśo vyāyataḥ śuśubhe kapiḥ || 66 ||

pravṛddha iva mātaṅgaḥ kakṣyayā badhyamānayā |

upariṣṭāccharīreṇa chāyayā cāvagāḍhayā || 67 ||

sāgare mārutāviṣṭā naurivāsīttadā kapiḥ |

yaṃ yaṃ deśaṃ samudrasya jagāma sa mahākapiḥ |

sa sa tasyoruvegena sonmāda iva lakṣyate || 68 ||

sāgarasyormijālānāmurasā śailavarṣmaṇām |

abhighnaṃstu mahāvegaḥ pupluve sa mahākapiḥ || 69 ||

kapivātaśca balavān meghavātaśca niḥsṛtaḥ |

sāgaraṃ bhīmanirghoṣaṃ kampayāmāsaturbhṛśam || 70 ||

vikarṣannūrmijālāni bṛhanti lavaṇāmbhasi |

pupluve kapiśārdūlo vikiranniva rodasī || 71 ||

merumandarasaṅkāśānuddhatān sa mahārṇave |

atyakrāmanmahāvegastaraṅgān gaṇayanniva || 72 ||

tasya vegasamuddhūtaṃ jalaṃ sajaladaṃ tadā |

ambarasthaṃ vibabhrāja śāradābhramivātatam || 73 ||

timinakrajhaṣāḥ kūrmā dṛśyante vivṛtāstadā |

vastrāpakarṣaṇeneva śarīrāṇi śarīriṇām || 74 ||

plavamānaṃ samīkṣyātha bhujaṅgāḥ sāgarālayāḥ |

vyomni taṃ kapiśārdūlaṃ suparṇa iti menire || 75 ||

daśayojanavistīrṇā triṃśadyojanamāyatā |

chāyā vānarasiṃhasya jale cārutarābhavat || 76 ||

śvetābhraghanarājīva vāyuputrānugāminī |

tasya sā śuśubhe chāyā vitatā lavaṇāmbhasi || 77 ||

śuśubhe sa mahātejā mahākāyo mahākapiḥ |

vāyumārge nirālambe pakṣavāniva parvataḥ || 78 ||

yenāsau yāti balavān vegena kapikuñjaraḥ |

tena mārgeṇa sahasā droṇīkṛta ivārṇavaḥ || 79 ||

āpāte pakṣisaṅghānāṃ pakṣirāja iva vrajan |

hanumān meghajālāni prakarṣan māruto yathā || 80 ||

pāṇḍurāruṇavarṇāni nīlamāñjiṣṭhakāni ca |

kapinākṛṣyamāṇāni mahābhrāṇi cakāśire || 81 ||

praviśannabhrajālāni niṣpataṃśca punaḥ punaḥ |

pracchannaśca prakāśaśca candramā iva lakṣyate || 82 ||

plavamānaṃ tu taṃ dṛṣṭvā plavaṅgaṃ tvaritaṃ tadā |

vavarṣuḥ puṣpavarṣāṇi devagandharvadānavāḥ || 83 ||

tatāpa na hi taṃ sūryaḥ plavantaṃ vānarottamam |

siṣeve ca tadā vāyū rāmakāryārthasiddhaye || 84 ||

ṛṣayastuṣṭuvuścainaṃ plavamānaṃ vihāyasā |

jaguśca devagandharvāḥ praśaṃsanto mahaujasam || 85 ||

nāgāśca tuṣṭuvuryakṣā rakṣāṃsi vibudhāḥ khagāḥ |

prekṣya sarve kapivaraṃ sahasā vigataklamam || 86 ||

tasmin plavagaśārdūle plavamāne hanūmati |

ikṣvākukulamānārthī cintayāmāsa sāgaraḥ || 87 ||

sāhāyyaṃ vānarendrasya yadi nāhaṃ hanūmataḥ |

kariṣyāmi bhaviṣyāmi sarvavācyo vivakṣatām || 88 ||

ahamikṣvākunāthena sagareṇa vivardhitaḥ |

ikṣvākusacivaścāyaṃ nāvasīditumarhati || 89 ||

tathā mayā vidhātavyaṃ viśrameta yathā kapiḥ || 90 ||

śeṣaṃ ca mayi viśrāntaḥ sukhenātipatiṣyati |

iti kṛtvā matiṃ sādhvīṃsamudra śchannamambhasi || 91 ||

hiraṇyanābhaṃ mainākamuvāca girisattamam |

tvamihāsurasaṅghānāṃ pātālatalavāsinām || 92 ||

devarājñā giriśreṣṭha parighaḥ sanniveśitaḥ |

tvameṣāṃ jātavīryāṇāṃ punarevotpatiṣyatām || 93 ||

pātālasyāprameyasya dvāramāvṛtya tiṣṭhasi |

tiryagūrdhvamadhaścaiva śaktiste śaila vardhitum || 94 ||

tasmātsañcodayāmi tvāmuttiṣṭha girisattama |

sa eṣa kapiśārdūlastvāmuparyeti vīryavān || 95 ||

hanūmānrāmakāryārthaṃ bhīmakarmā khamāplutaḥ |

asya sāhyaṃ mayā kāryamikṣvākukulavartinaḥ || 96 ||

mama hīkṣvākavaḥ pūjyāḥ paraṃ pūjyatamāstava |

kuru sācivyamasmākaṃ na naḥ kāryamatikramet || 97 ||

kartavyamakṛtaṃ kāryaṃ satāṃ manyumudīrayet |

salilādūrdhvamuttiṣṭha tiṣṭhatveṣa kapistvayi || 98 ||

asmākamatithiścaiva pūjyaśca plavatāṃ varaḥ |

cāmīkaramahānābha devagandharvasevita || 99 ||

hanumāṃstvayi viśrāntastataḥ śeṣaṃ gamiṣyati |

kākutsthasyānṛśaṃsyaṃ ca maithilyāśca vivāsanam || 100 ||

śramaṃ ca plavagendrasya samīkṣyotthātumarhasi |

hiraṇyanābho maināko niśamya lavaṇāmbhasaḥ || 101 ||

utpapāta jalāttūrṇaṃ mahādrumalatāyutaḥ |

sa sāgarajalaṃ bhittvā babhūvābhyutthitastadā || 102 ||

yathā jaladharaṃ bhittvā dīptaraśmirdivākaraḥ |

sa mahātmā muhūrtena sarvataḥ salilāvṛtaḥ || 103 ||

darśayāmāsa śṛṅgāṇi sāgareṇa niyojitaḥ |

ādityodayasaṅkāśairālikhadbhirivāmbaram |

śātakumbhamayaiḥ śṛṅgaiḥ sakinnaramahoragaiḥ || 104 ||

taptajāmbūnadaiḥ śṛṅgaiḥ parvatasya samutthitaiḥ || 105 ||

ākāśaṃ śastrasaṅkāśamabhavatkāñcanaprabham |

jātarūpamayaiḥ śṛṅgairbhrājamānaiḥ svayamprabhaiḥ || 106 ||

ādityaśatasaṅkāśaḥ so'bhavadgirisattamaḥ |

tamutthitamasaṅgena hanumānagrataḥ sthitam || 107 ||

madhye lavaṇatoyasya vighno'yamiti niścitaḥ |

sa tamucchrratamatyarthaṃ mahāvego mahākapiḥ || 108 ||

urasā pātayāmāsa jīmūtamiva mārutaḥ |

sa tathā pātitastena kapinā parvatottamaḥ || 109 ||

buddhvā tasya kapervegaṃ jaharṣa ca nananda ca |

tamākāśagataṃ vīramākāśe samupasthitaḥ || 110 ||

prīto hṛṣṭamānā vākyamabravītparvataḥ kapim |

mānuṣaṃ dhārayan rūpamātmanaḥ śikhare sthitaḥ || 111 ||

duṣkaraṃ kṛtavānkarma tvamidaṃ vānarottama |

nipatya mama śṛṅgeṣu viśramasva yathāsukham || 112 ||

rāghavasya kule jātairudadhiḥ parivardhitaḥ |

sa tvāṃ rāmahite yuktaṃ pratyarcayati sāgaraḥ || 113 ||

kṛte ca pratikartavyameṣa dharmaḥ sanātanaḥ |

so'yaṃ tvatpratikārārthī tvattaḥ sammānamarhati || 114 ||

tvannimittamanenāhaṃ bahumānātpracoditaḥ |

tiṣṭha tvaṃ kapiśārdūla mayi viśramya gamyatām || 115 ||

tava sānuṣu viśrāntaḥ śeṣaṃ prakramatāmiti |

yojanānāṃ śataṃ cāpi kapireṣa samāplutaḥ || 116 ||

tadidaṃ gandhavatsvādu kandamūlaphalaṃ bahu |

tadāsvādya hariśreṣṭha viśrānto'nu gamiṣyasi || 117 ||

asmākamapi sambandhaḥ kapimukhya tvayāsti vai |

prakhyātastriṣu lokeṣu mahāguṇaparigrahaḥ || 118 ||

vegavantaḥ plavanto ye plavagā mārutātmaja |

teṣāṃ mukhyatamaṃ manye tvāmahaṃ kapikuñjara || 119 ||

atithiḥ kila pūjārhaḥ prākṛto'pi vijānatā |

dharmaṃ jijñāsamānena kiṃ punastvādṛśo mahān || 120 ||

tvaṃ hi devavariṣṭhasya mārutasya mahātmanaḥ |

putrastasyaiva vegena sadṛśaḥ kapikuñjara || 121 ||

pūjite tvayi dharmajña pūjāṃ prāpnoti mārutaḥ |

tasmāttvaṃ pūjanīyo me śṛṇu cāpyatra kāraṇam || 122 ||

pūrvaṃ kṛtayuge tāta parvatāḥ pakṣiṇo'bhavan |

te hi jagmurdiśaḥ sarvā garuḍānilaveginaḥ || 123 ||

tatasteṣu prayāteṣu devasaṅghāḥ maharṣibhiḥ |

bhūtāni ca bhayaṃ jagmusteṣāṃ patanaśaṅkayā || 124 ||

tataḥ kruddhaḥ sahasrākṣaḥ parvatānāṃ śatakratuḥ |

pakṣān ciccheda vajreṇa tatra tatra sahasraśaḥ || 125 ||

sa māmupāgataḥ kruddho vajramudyamya devarāṭ |

tato'haṃ sahasā kṣiptaḥ śvasanena mahātmanā || 126 ||

asminlavaṇatoye ca prakṣiptaḥ plavagottama |

guptapakṣasamagraśca tava pitrābhirakṣitaḥ || 127 ||

tato'haṃ mānayāmi tvāṃ mānyo hi mama mārutaḥ |

tvayā me hyeṣa sambandhaḥ kapimukhya mahāguṇaḥ || 128 ||

asminnevaṅgate kārye sāgarasya mamaiva ca |

prītiṃ prītamanāḥ kartuṃ tvamarhasi mahākape || 129 ||

śramaṃ mokṣaya pūjāṃ ca gṛhāṇa kapisattama |

prītiṃ ca bahumanyasva prīto'smi tava darśanāt || 130 ||

evamuktaḥ kapiśreṣṭhastaṃ nagottamamabravīt |

prīto'smi kṛtamātithyaṃ manyureṣo'panīyatām || 131 ||

tvarate kāryakālo me ahaścāpyativartate |

pratijñā ca mayā dattā na sthātavyamihāntare || 132 ||

ityuktvā pāṇinā śailamālabhya haripuṅgavaḥ |

jagāmākāśamāviśya vīryavān prahasanniva || 133 ||

sa parvatasamudrābhyāṃ bahumānādavekṣitaḥ |

pūjitaścopapannābhirāśīrbhiranilātmajaḥ || 134 ||

athordhvaṃ dūramutplutya hitvā śailamahārṇavau |

pituḥ panthānamāsthāya jagāma vimale'mbare || 135 ||

bhūyaścordhvaṃ gatiṃ prāpya giriṃ tamavalokayan |

vāyusūnurnirālambe jagāma vimale'mbare || 136 ||

tad dvitīyaṃ hanumato dṛṣṭvā karma suduṣkaram |

praśaśaṃsuḥ surāḥ sarve siddhāśca paramarṣayaḥ || 137 ||

devatāścābhavan hṛṣṭāstatrasthāstasya karmaṇā |

kāñcanasya sunābhasya sahasrākṣaśca vāsavaḥ || 138 ||

uvāca vacanaṃ dhīmān paritoṣātsagadgadam |

sunābhaṃ parvataśreṣṭhaṃ svayameva śacīpatiḥ || 139 ||

hiraṇyanābha śailendra parituṣṭo'smi te bhṛśam |

abhayaṃ te prayacchāmi tiṣṭha saumya yathāsukham || 140 ||

sāhyaṃ kṛtaṃ te sumahadvikrāntasya hanūmataḥ |

kramato yojanaśataṃ nirbhayasya bhaye sati || 141 ||

rāmasyaiṣa hitāyaiva yāti dāśaratherhariḥ |

satkriyāṃ kurvatā tasya toṣito'smi dṛḍhaṃ tvayā || 142 ||

tataḥ praharṣamagamadvipulaṃ parvatottamaḥ |

devatānāṃ patiṃ dṛṣṭvā parituṣṭaṃ śatakratum || 143 ||

sa vai dattavaraḥ śailo babhūvāvasthitastadā |

hanumāṃśca muhūrtena vyaticakrāma sāgaram || 144 ||

tato devāḥ sagandharvāḥ siddhāśca paramarṣayaḥ |

abruvan sūryasaṅkāśāṃ surasāṃ nāgamātaram || 145 ||

ayaṃ vātātmajaḥ śrīmānplavate sāgaropari |

hanumānnāma tasya tvaṃ muhūrtaṃ vighnamācara || 146 ||

rākṣasaṃ rūpamāsthāya sughoraṃ parvatopamam |

daṃṣṭrākarālaṃ piṅgākṣaṃ vaktraṃ kṛtvā nabhaḥ samam || 147 ||

balamicchāmahe jñātuṃ bhūyaścāsya parākramam |

tvāṃ vijeṣyatyupāyena viṣādaṃ vā gamiṣyati || 148 ||

evamuktā tu sā devī daivatairabhisatkṛtā |

samudramadhye surasā bibhratī rākṣasaṃ vapuḥ || 149 ||

vikṛtaṃ ca virūpaṃ ca sarvasya ca bhayāvaham |

plavamānaṃ hanūmantamāvṛtyedamuvāca ha || 150 ||

mama bhakṣaḥ pradiṣṭastvamīśvarairvānararṣabha |

ahaṃ tvāṃ bhakṣayiṣyāmi praviśedaṃ mamānanam || 151 ||

evamuktaḥ surasayā prāñjalirvānararṣabhaḥ |

prahṛṣṭavadanaḥ śrīmānidaṃ vacanamabravīt || 152 ||

rāmo dāśarathirnāma praviṣṭo daṇḍakāvanam |

lakṣmaṇena saha bhrātrā vaidehyā cāpi bhāryayā || 153 ||

anyakāryaviṣaktasya baddhavairasya rākṣasaiḥ |

tasya sītā hṛtā bhāryā rāvaṇena yaśasvinī || 154 ||

tasyāḥ sakāśaṃ dūto'haṃ gamiṣye rāmaśāsanāt |

kartumarhasi rāmasya sāhyaṃ viṣayavāsini || 155 ||

athavā maithilīṃ dṛṣṭvā rāmaṃ cākliṣṭakāriṇam |

āgamiṣyāmi te vaktraṃ satyaṃ pratiśṛṇomi te || 156 ||

evamuktā hanumatā surasā kāmarūpiṇī |

abravīnnātivartenmāṃ kaścideṣa varo mama || 157 ||

taṃ prayāntaṃ samudvīkṣya surasā vākyamabravīt |

balaṃ jijñāsamānā vai nāgamātā hanūmataḥ || 158 ||

praviśya vadanaṃ me'dya gantavyaṃ vānarottama |

vara eṣa purā datto mama dhātreti satvarā || 159 ||

vyādāya vipulaṃ vaktraṃ sthitā sā māruteḥ puraḥ |

evamuktaḥ surasayā kruddho vānarapuṅgavaḥ || 160 ||

abravītkuru vai vaktraṃ yena māṃ viṣahiṣyase |

ityuktvā surasāṃ kruddho dhaśayojanamāyatā || 161 ||

daśayojanavistāro babhūva hanumāṃstadā |

taṃ dṛṣṭvā meghasaṅkāśaṃ daśayojanamāyatam || 162 ||

cakāra surasā cāsyaṃ viṃśadyojanamāyatam |

hanumāṃstu tataḥ kruddhastriṃśadyojanamāyataḥ || 163 ||

cakāra surasā vaktraṃ catvāriṃśattathocchritam |

babhūva hanumāvanīraḥ pañcāśadyojanocchritaḥ || 164 ||

cakāra surasā vaktraṃ ṣaṣṭiyojanamāyatam |

tathaiva hanumāvanīraḥ saptatīyojanocchritaḥ || 165 ||

cakāra surasā vaktramaśītīyojanāyatam |

hanumānacalaprakhyo navatīyojanocchritaḥ || 166 ||

cakāra surasā vaktraṃ śatayojanamāyataṃ tava sānuṣu viśrāntaḥ śeṣaṃ prakramatāmiti |

taddṛṣṭvā vyāditaṃ tvāsyaṃ vāyuputraḥ subuddhimān |

dīrghajihvaṃ surasayā sughoraṃ narakopamam || 167 ||

susaṅkṣipyātmanaḥ kāyaṃ babhūvāṅguṣṭhamātrakaḥ |

so'bhipatyāśu tadvaktraṃ niṣpatya ca mahābalaḥ |

antarikṣe sthitaḥ śrīmānidaṃ vacanamabravīt || 168 ||

praviṣṭo'smi hi te vaktraṃ dākṣāyaṇi namo'stu te |

gamiṣye yatra vaidehī satyaṃ cāsīdvarastava || 169 ||

taṃ dṛṣṭvā vadanānmuktaṃ candraṃ rāhumukhādiva |

abravītsurasā devī svena rūpeṇa vānaram || 170 ||

arthasiddhyai hariśreṣṭha gaccha saumya yathāsukham |

samānayasva vaidehīṃ rāghaveṇa mahātmanā || 171 ||

tattṛtīyaṃ hanumato dṛṣṭvā karma suduṣkaram |

sādhu sādhviti bhūtāni praśaśaṃsustadā harim || 172 ||

sa sāgaramanādhṛṣyamabhyetya varuṇālayam |

jagāmākāśamāviśya vegena garuḍopamaḥ || 173 ||

sevite vāridhārābhiḥ patagaiśca niṣevite |

carite kaiśikācāryairairāvataniṣevite || 174 ||

siṃhakuñjaraśārdūlapatagoragavāhanaiḥ |

vimānaiḥ sampatadbhiśca vimalaiḥ samalaṅkṛte || 175 ||

vajrāśanisamāghātaiḥ pāvakairupaśobhite |

kṛtapuṇyairmahābhāgaiḥ svargajidbhiralaṅkṛte || 176 ||

vahatā havyamatyardhaṃ sevite citrabhānunā |

grahanakṣatracandrārkatārāgaṇa vibhūṣite || 177 ||

maharṣigaṇagandharvanāgayakṣasamākule |

vivikte vimale viśve viśvāvasuniṣevite || 178 ||

devarājagajākrānte candrasūryapathe śive |

vitāne jīvalokasya vitate brahmanirmite || 179 ||

bahuśaḥ sevite vīrairvidyādharagaṇairvaraiḥ |

jagāma vāyumārge tu garutmāniva mārutiḥ || 180 ||

pradṛśyamānaḥ sarvatraḥ hanumānmārutātmajaḥ |

bheje'mbaraṃ nirālambaṃ lambapakṣa ivādrirāṭ || 181 ||

plavamānaṃ tu taṃ dṛṣṭvā siṃhikā nāma rākṣasī |

manasā cintayāmāsa pravṛddhā kāmarūpiṇī || 182 ||

adya dīrghasya kālasya bhaviṣyāmyahamāśitā |

idaṃ hi me mahatsattvaṃ cirasya vaśamāgatam || 183 ||

iti sañcintya manasā chāyāmasya samākṣipat |

chāyāyāṃ gṛhyamāṇāyāṃ cintayāmāsa vānaraḥ || 184 ||

samākṣipto'smi sahasā paṅgūkṛtaparākramaḥ |

pratilomena vātena mahānauriva sāgare || 185 ||

tiryagūrdhvamadhaścaiva vīkṣamāṇastataḥ kapiḥ |

dadarśa sa mahatsattvamutthitaṃ lavaṇāmbhasi || 186 ||

taddhṛṣṭvā cintayāmāsa mārutirvikṛtānanam |

kapirājena kathitaṃ sattvamadbhutadarśanam || 187 ||

chāyāgrāhi mahāvīryaṃ tadidaṃ nātra saṃśayaḥ |

sa tāṃ buddhvārthatattvena siṃhikāṃ matimānkapiḥ || 188 ||

vyavardhata mahākāyaḥ prāvṛṣīva valāhakaḥ |

tasya sā kāyamudvīkṣya vardhamānaṃ mahākapeḥ || 189 ||

vaktraṃ prasārayāmāsa pātālāntarasannibham |

ghanarājīva garjantī vānaraṃ samabhidravat || 190 ||

sa dadarśa tatastasyā vivṛtaṃ sumahanmukham |

kāyamātraṃ ca medhāvī marmāṇi ca mahākapiḥ || 191 ||

sa tasyā vivṛte vaktre vajrasaṃhananaḥ kapiḥ |

saṅkṣipya muhurātmānaṃ niṣpapāta mahābalaḥ || 192 ||

āsye tasyā nimajjantaṃ dadṛśuḥ siddhacāraṇāḥ |

grasyamānaṃ yathā candraṃ pūrṇaṃ parvaṇi rāhuṇā || 193 ||

tatastasyā nakhaistīkṣṇairmarmāṇyutkṛtya vānaraḥ |

utpapātātha vegena manaḥ sampātavikramaḥ || 194 ||

tāṃ tu dṛṣṭvā ca dhṛtyā ca dākṣiṇyena nipātya ca |

sa kapipravaro vegādvavṛdhe punarātmavān || 195 ||

hṛtahṛtsā hanumatāpapāta vidhurāmbhasi |

tāṃ hatāṃ vānareṇāśu patitāṃ vīkṣya siṃhikām || 196 ||

bhūtānyākāśacārīṇi tamūcuḥ plavagottamam |

bhīmamadya kṛtaṃ karma mahatsattvaṃ tvayā hatam || 197 ||

sādhayārthamabhipretamariṣṭaṃ plavatāṃ vara |

yasya tvetāni catvāri vānarendra yathā tava || 198 ||

dhṛtirdṛṣṭirmatirdākṣyaṃ saḥ karmasu na sīdati |

sa taiḥ sambhāvitaḥ pūjyaḥ pratipannaprayojanaḥ || 199 ||

jagāmākāśamāviśya pannagāśanavatkapiḥ |

prāptabhūyiṣṭhapārastu sarvataḥ pratilokayan || 200 ||

yojanānāṃ śatasyānte vanarājiṃ dadarśa saḥ |

dadarśa ca patanneva vividhadrumabhūṣitam || 201 ||

dvīpaṃ śākhāmṛgaśreṣṭho malayopavanāni ca |

sāgaraṃ sāgarānūpaṃ sāgarānūpajān drumān || 202 ||

sāgarasya ca patnīnāṃ mukhyānyapi vilokayan |

sa mahāmeghasaṅkāśaṃ samīkṣyātmānamātmavān || 203 ||

nirundhantamivākāśaṃ cakāra matimān matim |

kāyavṛddhiṃ pravegaṃ ca mama dṛṣṭvaiva rākṣasāḥ || 204 ||

mayi kautūhalaṃ kuryariti mene mahākapiḥ |

tataḥ śarīraṃ saṅkṣipya tanmahīdharasannibham || 205 ||

punaḥ prakṛtimāpede vītamoha ivātmavān |

tadrūpamatisaṅkṣipya hanumān prakṛtau sthitaḥ || 206 ||

trīn kramāniva vikramya balivīryaharo hariḥ |

sa cārunānāvidharūpadhārī paraṃ samāsādya samudratīram |

parairaśakyaḥ pratipannarūpaḥ samīkṣitātmā samavekṣitārdhaḥ || 207 ||

tataḥ sa lambasya gireḥ samṛddhe vicitrakūṭe nipapāta kūṭe |

saketakoddālakanālikere mahādrikūṭapratimo mahātmā || 208 ||

tatastu samprāpya samudratīraṃ samīkṣya laṅkāṃ girivaryamūrdhni |

kapistu tasninnipapāta parvate vidhūya rūpaṃ vyathayanmṛgadvijān || 209 ||

sa sāgaraṃ dānavapannagāyutaṃ balena vikramya mahormimālinam |

nipatya tīre ca mahodadhestadā dadarśa laṅkāmamarāvatīmiva || 210 ||

ityārṣe śrīmadrāmāyaṇe vālmīkīya ādikāvye sundarakāṇḍe prathamassargaḥ ||