📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
4.6 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡 - 𑌷𑌷𑍍𑌠 𑌸𑌰𑍍𑌗𑌃
4.6 Kishkindhakanda - Shashtha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑌮𑍍 ।
𑌅𑌥 𑌷𑌷𑍍𑌠𑌸𑍍𑌸𑌰𑍍𑌗𑌃 ।
𑌪𑍁𑌨𑌰𑍇𑌵𑌾𑌬𑍍𑌰𑌵𑍀𑌤𑍍𑌪𑍍𑌰𑍀𑌤𑍋 𑌰𑌾𑌘𑌵𑌂 𑌰𑌘𑍁𑌨𑌨𑍍𑌦𑌨𑌮𑍍 ।
𑌅𑌯𑌮𑌾𑌖𑍍𑌯𑌾𑌤𑌿 𑌮𑍇 𑌰𑌾𑌮 𑌸𑌚𑌿𑌵𑍋 𑌮𑌨𑍍𑌤𑍍𑌰𑌿𑌸𑌤𑍍𑌤𑌮𑌃 ॥ 1 ॥
𑌹𑌨𑍁𑌮𑌾𑌨𑍍𑌯𑌨𑍍𑌨𑌿𑌮𑌿𑌤𑍍𑌤𑌂 𑌤𑍍𑌵𑌂 𑌨𑌿𑌰𑍍𑌜𑌨𑌂 𑌵𑌨𑌮𑌾𑌗𑌤𑌃 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌵𑌸𑌤𑌶𑍍𑌚 𑌵𑌨𑍇 𑌤𑌵 ॥ 2 ॥
𑌰𑌕𑍍𑌷𑌸𑌾𑌽𑌪𑌹𑍃𑌤𑌾 𑌭𑌾𑌰𑍍𑌯𑌾 𑌮𑍈𑌥𑌿𑌲𑍀 𑌜𑌨𑌕𑌾𑌤𑍍𑌮𑌜𑌾 ।
𑌤𑍍𑌵𑌯𑌾 𑌵𑌿𑌯𑍁𑌕𑍍𑌤𑌾 𑌰𑍁𑌦𑌤𑍀 𑌲𑌕𑍍𑌷𑍍𑌮𑌣𑍇𑌨 𑌚 𑌧𑍀𑌮𑌤𑌾 ॥ 3 ॥
𑌅𑌨𑍍𑌤𑌰𑌪𑍍𑌰𑍇𑌪𑍍𑌸𑍁𑌨𑌾 𑌤𑍇𑌨 𑌹𑌤𑍍𑌵𑌾 𑌗𑍃𑌧𑍍𑌰𑌂 𑌜𑌟𑌾𑌯𑍁𑌷𑌮𑍍 ॥ 4 ॥
𑌭𑌾𑌰𑍍𑌯𑌾𑌵𑌿𑌯𑍋𑌗𑌜𑌂 𑌦𑍁𑌃𑌖𑌂 𑌨 𑌚𑌿𑌰𑌾𑌤𑍍𑌤𑍍𑌵𑌂 𑌵𑌿𑌮𑍋𑌕𑍍𑌷𑍍𑌯𑌸𑍇 ।
𑌅𑌹𑌂 𑌤𑌾𑌮𑌾𑌨𑌯𑌿𑌷𑍍𑌯𑌾𑌮𑌿 𑌨𑌷𑍍𑌟𑌾𑌂 𑌵𑍇𑌦𑌶𑍍𑌰𑍁𑌤𑍀𑌮𑌿𑌵 ॥ 5 ॥
𑌰𑌸𑌾𑌤𑌲𑍇 𑌵𑌾 𑌵𑌰𑍍𑌤𑌨𑍍𑌤𑍀𑌂 𑌵𑌰𑍍𑌤𑌨𑍍𑌤𑍀 𑌵𑌾 𑌨𑌭𑌸𑍍𑌥𑌲𑍇 𑌅𑌹𑌮𑌾𑌨𑍀𑌯 𑌦𑌾𑌸𑍍𑌯𑌾𑌮𑌿 𑌤𑌵 𑌭𑌾𑌰𑍍𑌯𑌾𑌮𑌰𑌿𑌨𑍍𑌦𑌮 ॥ 6 ॥
𑌇𑌦𑌂 𑌤𑌥𑍍𑌯𑌂 𑌮𑌮 𑌵𑌚𑌸𑍍𑌤𑍍𑌵𑌮𑌵𑍇𑌹𑌿 𑌚 𑌰𑌾𑌘𑌵 ।
𑌨 𑌶𑌕𑍍𑌯𑌾 𑌸𑌾 𑌜𑌰𑌯𑌿𑌤𑍁𑌂 𑌸𑍇𑌨𑍍𑌦𑍍𑌰𑍈𑌰𑌪𑌿 𑌸𑍍𑌸𑍁𑌰𑌾𑌸𑍁𑌰𑍈𑌃 ॥ 7 ॥
𑌤𑌵 𑌭𑌾𑌰𑍍𑌯𑌾 𑌮𑌹𑌾𑌬𑌾𑌹𑍋 𑌭𑌕𑍍𑌷𑍍𑌯𑌂 𑌵𑌿𑌷𑌕𑍃𑌤𑌂 𑌯𑌥𑌾 ।
𑌤𑍍𑌯𑌜 𑌶𑍋𑌕𑌂 𑌮𑌹𑌾𑌬𑌾𑌹𑍋 𑌤𑌾𑌂 𑌕𑌾𑌨𑍍𑌤𑌾𑌮𑌾𑌨𑌯𑌾𑌮𑌿 𑌤𑍇 ॥ 8 ॥
𑌅𑌨𑍁𑌮𑌾𑌨𑌾𑌤𑍍𑌤𑍁 𑌜𑌾𑌨𑌾𑌮𑌿 𑌮𑍈𑌥𑌿𑌲𑍀 𑌸𑌾 𑌨 𑌸𑌂𑌶𑌯𑌃 ।
𑌹𑍍𑌰𑌿𑌯𑌮𑌾𑌣𑌾 𑌮𑌯𑌾 𑌦𑍃𑌷𑍍𑌟𑌾 𑌰𑌕𑍍𑌷𑌸𑌾 𑌕𑍍𑌰𑍂𑌰𑌕𑌰𑍍𑌮𑌣𑌾 ॥ 9 ॥
𑌕𑍍𑌰𑍋𑌶𑌨𑍍𑌤𑍀 𑌰𑌾𑌮 𑌰𑌾𑌮𑍇𑌤𑌿 𑌲𑌕𑍍𑌷𑍍𑌮𑌣𑍇𑌤𑌿 𑌚 𑌵𑌿𑌸𑍍𑌵𑌰𑌮𑍍 ।
𑌸𑍍𑌫𑍁𑌰𑌨𑍍𑌤𑍀 𑌰𑌾𑌵𑌣𑌸𑍍𑌯𑌾𑌙𑍍𑌕𑍇 𑌪𑌨𑍍𑌨𑌗𑍇𑌨𑍍𑌦𑍍𑌰𑌵𑌧𑍂𑌰𑍍𑌯𑌥𑌾 ॥ 10 ॥
𑌆𑌤𑍍𑌮𑌨𑌾 𑌪𑌞𑍍𑌚𑌮𑌂 𑌮𑌾𑌂 𑌹𑌿 𑌦𑍃𑌷𑍍𑌟𑍍𑌵𑌾 𑌶𑍈𑌲𑌤𑌟𑍇 𑌸𑍍𑌥𑌿𑌤𑌮𑍍 ।
𑌉𑌤𑍍𑌤𑌰𑍀𑌯𑌂 𑌤𑌯𑌾 𑌤𑍍𑌯𑌕𑍍𑌤𑌂 𑌶𑍁𑌭𑌾𑌨𑍍𑌯𑌾𑌭𑌰𑌣𑌾𑌨𑌿 𑌚 ॥ 11 ॥
𑌤𑌾𑌨𑍍𑌯𑌸𑍍𑌮𑌾𑌭𑌿𑌗𑍃𑌹𑍀𑌤𑌾𑌨𑌿 𑌨𑌿𑌹𑌿𑌤𑌾𑌨𑌿 𑌚 𑌰𑌾𑌘𑌵 ।
𑌆𑌨𑌯𑌿𑌷𑍍𑌯𑌾𑌮𑍍𑌯𑌹𑌂 𑌤𑌾𑌨𑌿 𑌪𑍍𑌰𑌤𑍍𑌯𑌭𑌿𑌜𑍍𑌞𑌾𑌤𑍁𑌮𑌰𑍍𑌹𑌸𑌿 ॥ 12 ॥
𑌤𑌮𑌬𑍍𑌰𑌵𑍀𑌤𑍍𑌤𑌤𑍋 𑌰𑌾𑌮𑌸𑍍𑌸𑍁𑌗𑍍𑌰𑍀𑌵𑌂 𑌪𑍍𑌰𑌿𑌯𑌵𑌾𑌦𑌿𑌨𑌮𑍍 ।
𑌆𑌨𑌯𑌸𑍍𑌵 𑌸𑌖𑍇 𑌶𑍀𑌘𑍍𑌰𑌂 𑌕𑌿𑌮𑌰𑍍𑌥𑌂 𑌪𑍍𑌰𑌵𑌿𑌲𑌮𑍍𑌬𑌸𑍇 ॥ 13 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍁𑌗𑍍𑌰𑍀𑌵𑌶𑍍𑌶𑍈𑌲𑌸𑍍𑌯 𑌗𑌹𑌨𑌾𑌂 𑌗𑍁𑌹𑌾𑌮𑍍 ।
𑌪𑍍𑌰𑌵𑌿𑌵𑍇𑌶 𑌤𑌤𑌶𑌶𑍀𑌘𑍍𑌰𑌂 𑌰𑌾𑌘𑌵𑌪𑍍𑌰𑌿𑌯𑌕𑌾𑌮𑍍𑌯𑌯𑌾 ॥ 14 ॥
𑌉𑌤𑍍𑌤𑌰𑍀𑌯𑌂 𑌗𑍃𑌹𑍀𑌤𑍍𑌵𑌾 𑌤𑍁 𑌶𑍁𑌭𑌾𑌨𑍍𑌯𑌾𑌭𑌰𑌣𑌾𑌨𑌿 𑌚 ।
𑌇𑌦𑌂 𑌪𑌶𑍍𑌯𑍇𑌤𑌿 𑌰𑌾𑌮𑌾𑌯 𑌦𑌰𑍍𑌶𑌯𑌾𑌮𑌾𑌸 𑌵𑌾𑌨𑌰𑌃 ॥ 15 ॥
𑌤𑌤𑍋 𑌗𑍃𑌹𑍀𑌤𑍍𑌵𑌾 𑌵𑌾𑌸𑌸𑍍𑌤𑍁 𑌶𑍍𑌶𑍁𑌭𑌾𑌨𑍍𑌯𑌾𑌭𑌰𑌣𑌾𑌨𑌿 𑌚 ।
𑌅𑌭𑌵𑌦𑍍𑌬𑌾𑌷𑍍𑌪𑌸𑌂𑌰𑍁𑌦𑍍𑌧𑍋 𑌨𑍀𑌹𑌾𑌰𑍇𑌣𑍇𑌵 𑌚𑌨𑍍𑌦𑍍𑌰𑌮𑌾𑌃 ॥ 16 ॥
𑌸𑍀𑌤𑌾𑌸𑍍𑌨𑍇𑌹𑌪𑍍𑌰𑌵𑍃𑌤𑍍𑌤𑍇𑌨 𑌸 𑌤𑍁 𑌬𑌾𑌷𑍍𑌪𑍇𑌣 𑌦𑍂𑌷𑌿𑌤𑌃 ।
𑌹𑌾 𑌪𑍍𑌰𑌿𑌯𑍇𑌤𑌿 𑌰𑍁𑌦𑌨𑍍𑌧𑍈𑌰𑍍𑌯𑌮𑍁𑌤𑍍𑌸𑍃𑌜𑍍𑌯 𑌨𑍍𑌯𑌪𑌤𑌤𑍍𑌕𑍍𑌷𑌿𑌤𑍗 ॥ 17 ॥
𑌹𑍃𑌦𑌿 𑌕𑍃𑌤𑍍𑌵𑌾 𑌤𑍁 𑌬𑌹𑍁𑌶𑌸𑍍𑌤𑌮𑌲𑌙𑍍𑌕𑌾𑌰𑌮𑍁𑌤𑍍𑌤𑌮𑌮𑍍 ।
𑌨𑌿𑌶𑌶𑍍𑌵𑌾𑌸 𑌭𑍃𑌶𑌂 𑌸𑌰𑍍𑌪𑍋 𑌬𑌿𑌲𑌸𑍍𑌥 𑌇𑌵 𑌰𑍋𑌷𑌿𑌤𑌃 ॥ 18 ॥
𑌅𑌵𑌿𑌚𑍍𑌛𑌿𑌨𑍍𑌨𑌾𑌶𑍍𑌰𑍁𑌵𑍇𑌗𑌸𑍍𑌤𑍁 𑌸𑍗𑌮𑌿𑌤𑍍𑌰𑌿𑌂 𑌵𑍀𑌕𑍍𑌷𑍍𑌯 𑌪𑌾𑌰𑍍𑌶𑍍𑌵𑌤𑌃 ।
𑌪𑌰𑌿𑌦𑍇𑌵𑌯𑌿𑌤𑍁𑌂 𑌦𑍀𑌨𑌂 𑌰𑌾𑌮𑌸𑍍𑌸𑌮𑍁𑌪𑌚𑌕𑍍𑌰𑌮𑍇 ॥ 19 ॥
𑌪𑌶𑍍𑌯 𑌲𑌕𑍍𑌷𑍍𑌮𑌣 𑌵𑍈𑌦𑍇𑌹𑍍𑌯𑌾 𑌸𑌨𑍍𑌤𑍍𑌯𑌕𑍍𑌤𑌂 𑌹𑍍𑌰𑌿𑌯𑌮𑌾𑌣𑌯𑌾 ।
𑌉𑌤𑍍𑌤𑌰𑍀𑌯𑌮𑌿𑌦𑌂 𑌭𑍂𑌮𑍗 𑌶𑌰𑍀𑌰𑌾𑌦𑍍𑌭𑍂𑌷𑌣𑌾𑌨𑌿 𑌚 ॥ 20 ॥
𑌶𑌾𑌦𑍍𑌵𑌲𑌿𑌨𑍍𑌯𑌾𑌂 𑌧𑍍𑌰𑍁𑌵𑌂 𑌭𑍂𑌮𑍗 𑌸𑍀𑌤𑌯𑌾 𑌹𑍍𑌰𑌿𑌯𑌮𑌾𑌣𑌯𑌾 ।
𑌉𑌤𑍍𑌸𑍃𑌷𑍍𑌟𑌂 𑌭𑍂𑌷𑌣𑌮𑌿𑌦𑌂 𑌤𑌥𑌾𑌰𑍂𑌪𑌂 𑌹𑌿 𑌦𑍃𑌶𑍍𑌯𑌤𑍇 ॥ 21 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌲𑌕𑍍𑌷𑍍𑌮𑌣𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌨𑌾𑌹𑌂 𑌜𑌾𑌨𑌾𑌮𑌿 𑌕𑍇𑌯𑍂𑌰𑍇 𑌨𑌾𑌹𑌂 𑌜𑌾𑌨𑌾𑌮𑌿 𑌕𑍁𑌣𑍍𑌡𑌲𑍇 ॥ 22 ॥
𑌨𑍂𑌪𑍁𑌰𑍇 𑌤𑍍𑌵𑌭𑌿𑌜𑌾𑌨𑌾𑌮𑌿 𑌨𑌿𑌤𑍍𑌯𑌂 𑌪𑌾𑌦𑌾𑌭𑌿𑌵𑌨𑍍𑌦𑌨𑌾𑌤𑍍 ।
𑌤𑌤𑌸𑍍𑌤𑍁 𑌰𑌾𑌘𑌵𑍋 𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 23 ॥
𑌬𑍍𑌰𑍂𑌹𑌿 𑌸𑍁𑌗𑍍𑌰𑍀𑌵 𑌕𑌂 𑌦𑍇𑌶𑌂 𑌹𑍍𑌰𑌿𑌯𑌨𑍍𑌤𑍀 𑌲𑌕𑍍𑌷𑌿𑌤𑌾 𑌤𑍍𑌵𑌯𑌾 ।
𑌰𑌕𑍍𑌷𑌸𑌾 𑌰𑍗𑌦𑍍𑌰𑌰𑍂𑌪𑍇𑌣 𑌮𑌮 𑌪𑍍𑌰𑌾𑌣𑍈𑌃 𑌪𑍍𑌰𑌿𑌯𑌾 𑌪𑍍𑌰𑌿𑌯𑌾 ॥ 24 ॥
𑌕𑍍𑌵 𑌵𑌾 𑌵𑌸𑌤𑌿 𑌤𑌦𑍍𑌰𑌕𑍍𑌷𑍋 𑌮𑌹𑌦𑍍𑌵𑍍𑌯𑌸𑌨𑌦𑌂 𑌮𑌮 ।
𑌯𑌨𑍍𑌨𑌿𑌮𑌿𑌤𑍍𑌤𑌮𑌹𑌂 𑌸𑌰𑍍𑌵𑌾𑌨𑍍𑌨𑌾𑌶𑌯𑌿𑌷𑍍𑌯𑌾𑌮𑌿 𑌰𑌾𑌕𑍍𑌷𑌸𑌾𑌨𑍍 ॥ 25 ॥
𑌹𑌰𑌤𑌾 𑌮𑍈𑌥𑌿𑌲𑍀𑌂 𑌯𑍇𑌨 𑌮𑌾𑌂 𑌚 𑌰𑍋𑌷𑌯𑌤𑌾 𑌭𑍃𑌶𑌮𑍍 ।
𑌆𑌤𑍍𑌮𑌨𑍋 𑌜𑍀𑌵𑌿𑌤𑌾𑌨𑍍𑌤𑌾𑌯 𑌮𑍃𑌤𑍍𑌯𑍁𑌦𑍍𑌵𑌾𑌰𑌮𑌪𑌾𑌵𑍃𑌤𑌮𑍍 ॥ 26 ॥
𑌮𑌮 𑌦𑌯𑌿𑌤𑌤𑌰𑌾 𑌹𑍃𑌤𑌾 𑌵𑌨𑌾𑌨𑍍𑌤𑌾 𑌦𑍍𑌰𑌜𑌨𑌿𑌚𑌰𑍇𑌣 𑌵𑌿𑌮𑌥𑍍𑌯 𑌯𑍇𑌨 𑌸𑌾 ।
𑌕𑌥𑌯 𑌮𑌮 𑌰𑌿𑌪𑍁𑌂 𑌤𑌮𑌦𑍍𑌯 𑌵𑍈 𑌪𑍍𑌲𑌵𑌗𑌪𑌤𑍇 𑌯𑌮𑌸𑌾𑌦𑌨𑌂 𑌨𑌯𑌾𑌮𑌿 ॥ 27 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑍇 𑌷𑌷𑍍𑌠𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha ṣaṣṭhassargaḥ |
punarevābravītprīto rāghavaṃ raghunandanam |
ayamākhyāti me rāma sacivo mantrisattamaḥ || 1 ||
hanumānyannimittaṃ tvaṃ nirjanaṃ vanamāgataḥ |
lakṣmaṇena saha bhrātrā vasataśca vane tava || 2 ||
rakṣasā'pahṛtā bhāryā maithilī janakātmajā |
tvayā viyuktā rudatī lakṣmaṇena ca dhīmatā || 3 ||
antaraprepsunā tena hatvā gṛdhraṃ jaṭāyuṣam || 4 ||
bhāryāviyogajaṃ duḥkhaṃ na cirāttvaṃ vimokṣyase |
ahaṃ tāmānayiṣyāmi naṣṭāṃ vedaśrutīmiva || 5 ||
rasātale vā vartantīṃ vartantī vā nabhasthale ahamānīya dāsyāmi tava bhāryāmarindama || 6 ||
idaṃ tathyaṃ mama vacastvamavehi ca rāghava |
na śakyā sā jarayituṃ sendrairapi ssurāsuraiḥ || 7 ||
tava bhāryā mahābāho bhakṣyaṃ viṣakṛtaṃ yathā |
tyaja śokaṃ mahābāho tāṃ kāntāmānayāmi te || 8 ||
anumānāttu jānāmi maithilī sā na saṃśayaḥ |
hriyamāṇā mayā dṛṣṭā rakṣasā krūrakarmaṇā || 9 ||
krośantī rāma rāmeti lakṣmaṇeti ca visvaram |
sphurantī rāvaṇasyāṅke pannagendravadhūryathā || 10 ||
ātmanā pañcamaṃ māṃ hi dṛṣṭvā śailataṭe sthitam |
uttarīyaṃ tayā tyaktaṃ śubhānyābharaṇāni ca || 11 ||
tānyasmābhigṛhītāni nihitāni ca rāghava |
ānayiṣyāmyahaṃ tāni pratyabhijñātumarhasi || 12 ||
tamabravīttato rāmassugrīvaṃ priyavādinam |
ānayasva sakhe śīghraṃ kimarthaṃ pravilambase || 13 ||
evamuktastu sugrīvaśśailasya gahanāṃ guhām |
praviveśa tataśaśīghraṃ rāghavapriyakāmyayā || 14 ||
uttarīyaṃ gṛhītvā tu śubhānyābharaṇāni ca |
idaṃ paśyeti rāmāya darśayāmāsa vānaraḥ || 15 ||
tato gṛhītvā vāsastu śśubhānyābharaṇāni ca |
abhavadbāṣpasaṃruddho nīhāreṇeva candramāḥ || 16 ||
sītāsnehapravṛttena sa tu bāṣpeṇa dūṣitaḥ |
hā priyeti rudandhairyamutsṛjya nyapatatkṣitau || 17 ||
hṛdi kṛtvā tu bahuśastamalaṅkāramuttamam |
niśaśvāsa bhṛśaṃ sarpo bilastha iva roṣitaḥ || 18 ||
avicchinnāśruvegastu saumitriṃ vīkṣya pārśvataḥ |
paridevayituṃ dīnaṃ rāmassamupacakrame || 19 ||
paśya lakṣmaṇa vaidehyā santyaktaṃ hriyamāṇayā |
uttarīyamidaṃ bhūmau śarīrādbhūṣaṇāni ca || 20 ||
śādvalinyāṃ dhruvaṃ bhūmau sītayā hriyamāṇayā |
utsṛṣṭaṃ bhūṣaṇamidaṃ tathārūpaṃ hi dṛśyate || 21 ||
evamuktastu rāmeṇa lakṣmaṇo vākyamabravīt |
nāhaṃ jānāmi keyūre nāhaṃ jānāmi kuṇḍale || 22 ||
nūpure tvabhijānāmi nityaṃ pādābhivandanāt |
tatastu rāghavo vākyaṃ sugrīvamidamabravīt || 23 ||
brūhi sugrīva kaṃ deśaṃ hriyantī lakṣitā tvayā |
rakṣasā raudrarūpeṇa mama prāṇaiḥ priyā priyā || 24 ||
kva vā vasati tadrakṣo mahadvyasanadaṃ mama |
yannimittamahaṃ sarvānnāśayiṣyāmi rākṣasān || 25 ||
haratā maithilīṃ yena māṃ ca roṣayatā bhṛśam |
ātmano jīvitāntāya mṛtyudvāramapāvṛtam || 26 ||
mama dayitatarā hṛtā vanāntā drajanicareṇa vimathya yena sā |
kathaya mama ripuṃ tamadya vai plavagapate yamasādanaṃ nayāmi || 27 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe ṣaṣṭhassargaḥ ||
InfoLyter.in — Sacred Vedic Knowledge Portal · Free forever