📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
4.52 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡 - 𑌦𑍍𑌵𑌿𑌪𑌞𑍍𑌚𑌾𑌶 𑌸𑌰𑍍𑌗𑌃
4.52 Kishkindhakanda - Dvipanchasha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑌮𑍍 ।
𑌅𑌥 𑌦𑍍𑌵𑌿𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।
𑌅𑌥 𑌤𑌾𑌨𑌬𑍍𑌰𑌵𑍀𑌤𑍍𑌸𑌰𑍍𑌵𑌾𑌨𑍍𑌵𑌿𑌶𑍍𑌰𑌾𑌨𑍍𑌤𑌾𑌨𑍍𑌹𑌰𑌿𑌯𑍂𑌥𑌪𑌾𑌨𑍍 ।
𑌇𑌦𑌂 𑌵𑌚𑌨𑌮𑍇𑌕𑌾𑌗𑍍𑌰𑌾 𑌤𑌾𑌪𑌸𑍀 𑌧𑌰𑍍𑌮𑌚𑌾𑌰𑌿𑌣𑍀 ॥ 1 ॥
𑌵𑌾𑌨𑌰𑌾 𑌯𑌦𑌿 𑌵𑌃 𑌖𑍇𑌦𑌃 𑌪𑍍𑌰𑌨𑌷𑍍𑌟𑌃 𑌫𑌲𑌭𑌕𑍍𑌷𑌣𑌾𑌤𑍍 ।
𑌯𑌦𑌿 𑌚𑍈𑌤𑌨𑍍𑌮𑌯𑌾 𑌶𑍍𑌰𑌾𑌵𑍍𑌯𑌂 𑌶𑍍𑌰𑍋𑌤𑍁𑌮𑌿𑌚𑍍𑌛𑌾𑌮𑌿 𑌕𑌥𑍍𑌯𑌤𑌾𑌮𑍍 ॥ 2 ॥
𑌤𑌸𑍍𑌯𑌾𑌸𑍍𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌹𑌨𑍂𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌆𑌰𑍍𑌜𑌵𑍇𑌨 𑌯𑌥𑌾𑌤𑌤𑍍𑌤𑍍𑌵𑌮𑌾𑌖𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 3 ॥
𑌰𑌾𑌜𑌾 𑌸𑌰𑍍𑌵𑌸𑍍𑌯 𑌲𑍋𑌕𑌸𑍍𑌯 𑌮𑌹𑍇𑌨𑍍𑌦𑍍𑌰𑌵𑌰𑍁𑌣𑍋𑌪𑌮𑌃 ।
𑌰𑌾𑌮𑍋 𑌦𑌾𑌶𑌰𑌥𑌿𑌶𑍍𑌶𑍀𑌮𑌾𑌨𑍍𑌪𑍍𑌰𑌵𑌿𑌷𑍍𑌟𑍋 𑌦𑌣𑍍𑌡𑌕𑌾𑌵𑌨𑌮𑍍 ॥ 4 ॥
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌵𑍈𑌦𑍇𑌹𑍍𑌯𑌾 𑌚𑌾𑌪𑌿 𑌭𑌾𑌰𑍍𑌯𑌯𑌾 ।
𑌤𑌸𑍍𑌯 𑌭𑌾𑌰𑍍𑌯𑌾 𑌜𑌨𑌸𑍍𑌥𑌾𑌨𑌾𑌦𑍍𑌰𑌾𑌵𑌣𑍇𑌨 𑌹𑍃𑌤𑌾 𑌬𑌲𑌾𑌤𑍍 ॥ 5 ॥
𑌵𑍀𑌰𑌸𑍍𑌤𑌸𑍍𑌯 𑌸𑌖𑌾 𑌰𑌾𑌜𑍍𑌞𑌸𑍍𑌸𑍁𑌗𑍍𑌰𑍀𑌵𑍋 𑌨𑌾𑌮 𑌵𑌾𑌨𑌰𑌃 ।
𑌰𑌾𑌜𑌾 𑌵𑌾𑌨𑌰𑌮𑍁𑌖𑍍𑌯𑌾𑌨𑌾𑌂 𑌯𑍇𑌨 𑌪𑍍𑌰𑌸𑍍𑌥𑌾𑌪𑌿𑌤𑌾 𑌵𑌯𑌮𑍍 ॥ 6 ॥
𑌅𑌗𑌸𑍍𑌤𑍍𑌯𑌚𑌰𑌿𑌤𑌾𑌮𑌾𑌶𑌾𑌂 𑌦𑌕𑍍𑌷𑌿𑌣𑌾𑌂 𑌯𑌮𑌰𑌕𑍍𑌷𑌿𑌤𑌾𑌮𑍍 ।
𑌸𑌹𑍈𑌭𑌿𑌰𑍍𑌵𑌾𑌨𑌰𑍈𑌰𑍍𑌘𑍋𑌰𑍈𑌰𑌙𑍍𑌗𑌦𑌪𑍍𑌰𑌮𑍁𑌖𑍈𑌰𑍍𑌵𑌯𑌮𑍍 ॥ 7 ॥
𑌰𑌾𑌵𑌣𑌂 𑌸𑌹𑌿𑌤𑌾𑌸𑍍𑌸𑌰𑍍𑌵𑍇 𑌰𑌾𑌕𑍍𑌷𑌸𑌂 𑌕𑌾𑌮𑌰𑍂𑌪𑌿𑌣𑌮𑍍 ।
𑌸𑍀𑌤𑌯𑌾 𑌸𑌹 𑌵𑍈𑌦𑍇𑌹𑍍𑌯𑌾 𑌮𑌾𑌰𑍍𑌗𑌧𑍍𑌵𑌮𑌿𑌤𑌿 𑌚𑍋𑌦𑌿𑌤𑌾𑌃 ॥ 8 ॥
𑌵𑌿𑌚𑌿𑌤𑍍𑌯 𑌤𑍁 𑌵𑌯𑌂 𑌸𑌰𑍍𑌵𑍇 𑌸𑌮𑌗𑍍𑌰𑌾𑌂 𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ।
𑌪𑌰𑌿𑌤𑍍𑌰𑌾𑌨𑍍𑌤𑌾 𑌬𑍁𑌭𑍁𑌕𑍍𑌷𑌿𑌤𑌾 𑌵𑍃𑌕𑍍𑌷𑌮𑍂𑌲𑌮𑍁𑌪𑌾𑌶𑍍𑌰𑌿𑌤𑌾𑌃 ॥ 9 ॥
𑌵𑌿𑌵𑌰𑍍𑌣𑌵𑌦𑌨𑌾𑌸𑍍𑌸𑌰𑍍𑌵𑍇 𑌸𑌰𑍍𑌵𑍇 𑌧𑍍𑌯𑌾𑌨𑌪𑌰𑌾𑌯𑌣𑌾𑌃 ।
𑌨𑌾𑌧𑌿𑌗𑌚𑍍𑌛𑌾𑌮𑌹𑍇 𑌪𑌾𑌰𑌂 𑌮𑌗𑍍𑌨𑌾𑌶𑍍𑌚𑌿𑌨𑍍𑌤𑌾𑌮𑌹𑌾𑌰𑍍𑌣𑌵𑍇 ॥ 10 ॥
𑌚𑌾𑌰𑌯𑌨𑍍𑌤𑌸𑍍𑌤𑌤𑌶𑍍𑌚𑌕𑍍𑌷𑍁𑌰𑍍𑌦𑍃𑌷𑍍𑌟𑌵𑌨𑍍𑌤𑍋 𑌵𑌯𑌂 𑌬𑌿𑌲𑌮𑍍 ।
𑌲𑌤𑌾𑌪𑌾𑌦𑌪𑌸𑌞𑍍𑌚𑍍𑌛𑌨𑍍𑌨𑌂 𑌤𑌿𑌮𑌿𑌰𑍇𑌣 𑌸𑌮𑌾𑌵𑍃𑌤𑌮𑍍 ॥ 11 ॥
𑌅𑌸𑍍𑌮𑌾𑌦𑍍𑌧𑌂𑌸𑌾 𑌜𑌲𑌕𑍍𑌲𑌿𑌨𑍍𑌨𑌾𑌃 𑌪𑌕𑍍𑌷𑍈𑌸𑍍𑌸𑌲𑌿𑌲𑌵𑌿𑌸𑍍𑌰𑌵𑍈𑌃 ।
𑌕𑍁𑌰𑌰𑌾𑌸𑍍𑌸𑌾𑌰𑌸𑌾𑌶𑍍𑌚𑍈𑌵 𑌨𑌿𑌷𑍍𑌪𑌤𑌨𑍍𑌤𑌿 𑌪𑌤𑌤𑍍𑌰𑌿𑌣𑌃 ॥ 12 ॥
𑌸𑌾𑌧𑍍𑌵𑌤𑍍𑌰 𑌪𑍍𑌰𑌵𑌿𑌶𑌾𑌮𑍇𑌤𑌿 𑌮𑌯𑌾 𑌤𑍂𑌕𑍍𑌤𑌾𑌃 𑌪𑍍𑌲𑌵𑌙𑍍𑌗𑌮𑌾𑌃 ।
𑌤𑍇𑌷𑌾𑌮𑌪𑌿 𑌹𑌿 𑌸𑌰𑍍𑌵𑍇𑌷𑌾𑌮𑌨𑍁𑌮𑌾𑌨𑌮𑍁𑌪𑌾𑌗𑌤𑌮𑍍 ॥ 13 ॥
𑌗𑌚𑍍𑌛𑌾𑌮 𑌪𑍍𑌰𑌵𑌿𑌶𑌾𑌮𑍇𑌤𑌿 𑌭𑌰𑍍𑌤𑍃𑌕𑌾𑌰𑍍𑌯𑌤𑍍𑌵𑌰𑌾𑌨𑍍𑌵𑌿𑌤𑌾𑌃 ।
𑌤𑌤𑍋 𑌗𑌾𑌢𑌂 𑌨𑌿𑌪𑌤𑌿𑌤𑌾 𑌗𑍃𑌹𑍍𑌯 𑌹𑌸𑍍𑌤𑍗 𑌪𑌰𑌸𑍍𑌪𑌰𑌮𑍍 ॥ 14 ॥
𑌇𑌦𑌂 𑌪𑍍𑌰𑌵𑌿𑌷𑍍𑌟𑌾𑌸𑍍𑌸𑌹𑌸𑌾 𑌬𑌿𑌲𑌂 𑌤𑌿𑌮𑌿𑌰𑌸𑌂𑌵𑍃𑌤𑌮𑍍 ।
𑌏𑌤𑌨𑍍𑌨𑌃 𑌕𑌾𑌰𑍍𑌯𑌮𑍇𑌤𑍇𑌨 𑌕𑍃𑌤𑍍𑌯𑍇𑌨 𑌵𑌯𑌮𑌾𑌗𑌤𑌾𑌃 ॥ 15 ॥
𑌤𑍍𑌵𑌾𑌂 𑌚𑍈𑌵𑍋𑌪𑌗𑌤𑌾𑌸𑍍𑌸𑌰𑍍𑌵𑍇 𑌪𑌰𑌿𑌦𑍍𑌯𑍂𑌨𑌾 𑌬𑍁𑌭𑍁𑌕𑍍𑌷𑌿𑌤𑌾𑌃 ।
𑌆𑌤𑌿𑌥𑍍𑌯𑌧𑌰𑍍𑌮𑌦𑌤𑍍𑌤𑌾𑌨𑌿 𑌮𑍂𑌲𑌾𑌨𑌿 𑌚 𑌫𑌲𑌾𑌨𑌿 𑌚 ॥ 16 ॥
𑌅𑌸𑍍𑌮𑌾𑌭𑌿𑌰𑍁𑌪𑌭𑍁𑌕𑍍𑌤𑌾𑌨𑌿 𑌬𑍁𑌭𑍁𑌕𑍍𑌷𑌾𑌪𑌰𑌿𑌪𑍀𑌡𑌿𑌤𑍈𑌃 ।
𑌯𑌤𑍍𑌤𑍍𑌵𑌯𑌾 𑌰𑌕𑍍𑌷𑌿𑌤𑌾𑌸𑍍𑌸𑌰𑍍𑌵𑍇 𑌮𑍍𑌰𑌿𑌯𑌮𑌾𑌣𑌾 𑌬𑍁𑌭𑍁𑌕𑍍𑌷𑌯𑌾 ॥ 17 ॥
𑌬𑍍𑌰𑍂𑌹𑌿 𑌪𑍍𑌰𑌤𑍍𑌯𑍁𑌪𑌕𑌾𑌰𑌾𑌰𑍍𑌥𑌂 𑌕𑌿𑌂 𑌤𑍇 𑌕𑍁𑌰𑍍𑌵𑌨𑍍𑌤𑍁 𑌵𑌾𑌨𑌰𑌾𑌃 ।
𑌏𑌵𑌮𑍁𑌕𑍍𑌤𑌾 𑌤𑍁 𑌧𑌰𑍍𑌮𑌜𑍍𑌞𑍈𑌰𑍍𑌵𑌾𑌨𑌰𑍈𑌸𑍍𑌤𑍈𑌸𑍍𑌸𑍍𑌵𑌯𑌮𑍍𑌪𑍍𑌰𑌭𑌾 ॥ 18 ॥
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑌸𑍍𑌸𑌰𑍍𑌵𑌾𑌨𑌿𑌦𑌂 𑌵𑌾𑌨𑌰𑌪𑍁𑌙𑍍𑌗𑌵𑌾𑌨𑍍 ।
𑌸𑌰𑍍𑌵𑍇𑌷𑌾𑌂 𑌪𑌰𑌿𑌤𑍁𑌷𑍍𑌟𑌾𑌽𑌸𑍍𑌮𑌿 𑌵𑌾𑌨𑌰𑌾𑌣𑌾𑌂 𑌤𑌰𑌸𑍍𑌵𑌿𑌨𑌾𑌮𑍍 ॥ 19 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌨𑍍𑌧𑌾𑌕𑌾𑌣𑍍𑌡𑍇 𑌦𑍍𑌵𑌿𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe kiṣkindhākāṇḍam |
atha dvipañcāśassargaḥ |
atha tānabravītsarvānviśrāntānhariyūthapān |
idaṃ vacanamekāgrā tāpasī dharmacāriṇī || 1 ||
vānarā yadi vaḥ khedaḥ pranaṣṭaḥ phalabhakṣaṇāt |
yadi caitanmayā śrāvyaṃ śrotumicchāmi kathyatām || 2 ||
tasyāstadvacanaṃ śrutvā hanūmānmārutātmajaḥ |
ārjavena yathātattvamākhyātumupacakrame || 3 ||
rājā sarvasya lokasya mahendravaruṇopamaḥ |
rāmo dāśarathiśśīmānpraviṣṭo daṇḍakāvanam || 4 ||
lakṣmaṇena saha bhrātrā vaidehyā cāpi bhāryayā |
tasya bhāryā janasthānādrāvaṇena hṛtā balāt || 5 ||
vīrastasya sakhā rājñassugrīvo nāma vānaraḥ |
rājā vānaramukhyānāṃ yena prasthāpitā vayam || 6 ||
agastyacaritāmāśāṃ dakṣiṇāṃ yamarakṣitām |
sahaibhirvānarairghorairaṅgadapramukhairvayam || 7 ||
rāvaṇaṃ sahitāssarve rākṣasaṃ kāmarūpiṇam |
sītayā saha vaidehyā mārgadhvamiti coditāḥ || 8 ||
vicitya tu vayaṃ sarve samagrāṃ dakṣiṇāṃ diśam |
paritrāntā bubhukṣitā vṛkṣamūlamupāśritāḥ || 9 ||
vivarṇavadanāssarve sarve dhyānaparāyaṇāḥ |
nādhigacchāmahe pāraṃ magnāścintāmahārṇave || 10 ||
cārayantastataścakṣurdṛṣṭavanto vayaṃ bilam |
latāpādapasañcchannaṃ timireṇa samāvṛtam || 11 ||
asmāddhaṃsā jalaklinnāḥ pakṣaissalilavisravaiḥ |
kurarāssārasāścaiva niṣpatanti patatriṇaḥ || 12 ||
sādhvatra praviśāmeti mayā tūktāḥ plavaṅgamāḥ |
teṣāmapi hi sarveṣāmanumānamupāgatam || 13 ||
gacchāma praviśāmeti bhartṛkāryatvarānvitāḥ |
tato gāḍhaṃ nipatitā gṛhya hastau parasparam || 14 ||
idaṃ praviṣṭāssahasā bilaṃ timirasaṃvṛtam |
etannaḥ kāryametena kṛtyena vayamāgatāḥ || 15 ||
tvāṃ caivopagatāssarve paridyūnā bubhukṣitāḥ |
ātithyadharmadattāni mūlāni ca phalāni ca || 16 ||
asmābhirupabhuktāni bubhukṣāparipīḍitaiḥ |
yattvayā rakṣitāssarve mriyamāṇā bubhukṣayā || 17 ||
brūhi pratyupakārārthaṃ kiṃ te kurvantu vānarāḥ |
evamuktā tu dharmajñairvānaraistaissvayamprabhā || 18 ||
pratyuvāca tatassarvānidaṃ vānarapuṅgavān |
sarveṣāṃ parituṣṭā'smi vānarāṇāṃ tarasvinām || 19 ||
ityārṣe śrīmadrāmāyaṇe vālmīkīya ādikāvye kiṣkindhākāṇḍe dvipañcāśassargaḥ ||
InfoLyter.in — Sacred Vedic Knowledge Portal · Free forever