2.64 Ayodhyakanda - Chatuhshashtitama Sargah

ॐ

2.64 𑌅𑌯𑍋𑌧𑍍𑌯𑌾𑌕𑌾𑌣𑍍𑌡 - 𑌚𑌤𑍁𑌃𑌷𑌷𑍍𑌟𑌿𑌤𑌮 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑌮𑍍 ।

𑌅𑌥 𑌚𑌤𑍁𑌃𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।

𑌵𑌧𑌮𑌪𑍍𑌰𑌤𑌿𑌰𑍂𑌪𑌂 𑌤𑍁 𑌮𑌹𑌰𑍍𑌷𑍇𑌸𑍍𑌤𑌸𑍍𑌯 𑌰𑌾𑌘𑌵𑌃 ।

𑌵𑌿𑌲𑌪𑌨𑍍𑌨𑍇𑌵 𑌧𑌰𑍍𑌮𑌾𑌤𑍍𑌮𑌾 𑌕𑍗𑌸𑌲𑍍𑌯𑌾𑌂 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ 1 ॥

𑌤𑌦𑌜𑍍𑌞𑌾𑌨𑌾𑌨𑍍𑌮𑌹𑌤𑍍𑌪𑌾𑌪𑌂 𑌕𑍃𑌤𑍍𑌵𑌾𑌹𑌂 𑌸𑌙𑍍𑌕𑍁𑌲𑍇𑌨𑍍𑌦𑍍𑌰𑌿𑌯𑌃 ।

𑌏𑌕𑌸𑍍𑌤𑍍𑌵𑌚𑌿𑌨𑍍𑌤𑌯𑌂 𑌬𑍁𑌧𑍍𑌯𑌾 𑌕𑌥𑌂 𑌨𑍁 𑌸𑍁𑌕𑍃𑌤𑌂 𑌭𑌵𑍇𑌤𑍍 ॥ 2 ॥

𑌤𑌤𑌸𑍍𑌤𑌂 𑌘𑌟𑌮𑌾𑌦𑌾𑌯 𑌪𑍂𑌰𑍍𑌣𑌂 𑌪𑌰𑌮𑌵𑌾𑌰𑌿𑌣𑌾 ।

𑌆𑌶𑍍𑌰𑌮𑌂 𑌤𑌮𑌹𑌂 𑌪𑍍𑌰𑌾𑌪𑍍𑌯 𑌯𑌥𑌾𑌽𑌖𑍍𑌯𑌾𑌤𑌪𑌥𑌂 𑌗𑌤𑌃 ॥ 3 ॥

𑌤𑌤𑍍𑌰𑌾𑌹𑌂 𑌦𑍁𑌰𑍍𑌬𑌲𑌾𑌵𑌨𑍍𑌧𑍗 𑌵𑍃𑌦𑍍𑌧𑌾𑌵𑌪𑌰𑌿𑌣𑌾𑌯𑌕𑍗 ।

𑌅𑌪𑌶𑍍𑌯𑌂 𑌤𑌸𑍍𑌯 𑌪𑌿𑌤𑌰𑍗 𑌲𑍂𑌨𑌪𑌕𑍍𑌷𑌾𑌵𑌿𑌵 𑌦𑍍𑌵𑌿𑌜𑍗 ॥ 4 ॥

𑌤𑌨𑍍𑌨𑌿𑌮𑌿𑌤𑍍𑌤𑌾𑌭𑌿𑌰𑌾𑌸𑍀𑌨𑍗 𑌕𑌥𑌾𑌭𑌿𑌰𑌪𑌰𑌿𑌶𑍍𑌰𑌮𑍗 ।

𑌤𑌾𑌮𑌾𑌶𑌾𑌂 𑌮𑌤𑍍𑌕𑍃𑌤𑍇 𑌹𑍀𑌨𑌾𑌵𑍁𑌦𑌾𑌸𑍀𑌨𑌾𑌵𑌨𑌾𑌥𑌵𑌤𑍍 ॥ 5 ॥

𑌶𑍋𑌕𑍋𑌪𑌹𑌤𑌚𑌿𑌤𑍍𑌤𑌶𑍍𑌚 𑌭𑌯𑌸𑌨𑍍𑌤𑍍𑌰𑌸𑍍𑌤𑌚𑍇𑌤𑌨𑌃 ।

𑌤𑌚𑍍𑌚𑌾𑌽𑌶𑍍𑌰𑌮𑌪𑌦𑌂 𑌗𑌤𑍍𑌵𑌾 𑌭𑍂𑌯𑌶𑍍𑌶𑍋𑌕𑌮𑌹𑌂 𑌗𑌤𑌃 ॥ 6 ॥

𑌪𑌦𑌶𑌬𑍍𑌦𑌂 𑌤𑍁 𑌮𑍇 𑌶𑍍𑌰𑍁𑌤𑍍𑌵𑌾 𑌮𑍁𑌨𑌿𑌰𑍍𑌵𑌾𑌕𑍍𑌯𑌮𑌭𑌾𑌷𑌤 ।

𑌕𑌿𑌂 𑌚𑌿𑌰𑌾𑌯𑌸𑌿 𑌮𑍇 𑌪𑍁𑌤𑍍𑌰 𑌪𑌾𑌨𑍀𑌯𑌂 𑌕𑍍𑌷𑌿𑌪𑍍𑌰𑌮𑌾𑌨𑌯 ॥ 7 ॥

𑌯𑌨𑍍𑌨𑌿𑌮𑌿𑌤𑍍𑌤𑌮𑌿𑌦𑌂 𑌤𑌾𑌤 𑌸𑌲𑌿𑌲𑍇 𑌕𑍍𑌰𑍀𑌡𑌿𑌤𑌂 𑌤𑍍𑌵𑌯𑌾 ।

𑌉𑌤𑍍𑌕𑌣𑍍𑌠𑌿𑌤𑌾 𑌤𑍇 𑌮𑌾𑌤𑍇𑌯𑌂 𑌪𑍍𑌰𑌵𑌿𑌶 𑌕𑍍𑌷𑌿𑌪𑍍𑌰𑌮𑌾𑌶𑍍𑌰𑌮𑌮𑍍 ॥ 8 ॥

𑌯𑌦𑍍𑌵𑍍𑌯𑌲𑍀𑌕𑌂 𑌕𑍃𑌤𑌂 𑌪𑍁𑌤𑍍𑌰 𑌮𑌾𑌤𑍍𑌰𑌾 𑌤𑍇 𑌯𑌦𑌿 𑌵𑌾 𑌮𑌯𑌾 ।

𑌨 𑌤𑌨𑍍𑌮𑌨𑌸𑌿 𑌕𑌰𑍍𑌤𑌵𑍍𑌯𑌂 𑌤𑍍𑌵𑌯𑌾 𑌤𑌾𑌤 𑌤𑌪𑌸𑍍𑌵𑌿𑌨𑌾 ॥ 9 ॥

𑌤𑍍𑌵𑌂 𑌗𑌤𑌿𑌸𑍍𑌤𑍍𑌵𑌗𑌤𑍀𑌨𑌾𑌂 𑌚𑌕𑍍𑌷𑍁𑌸𑍍𑌤𑍍𑌵𑌂 𑌹𑍀𑌨𑌚𑌕𑍍𑌷𑍁𑌷𑌾𑌮𑍍 ।

𑌸𑌮𑌾𑌸𑌕𑍍𑌤𑌾𑌸𑍍𑌤𑍍𑌵𑌯𑌿 𑌪𑍍𑌰𑌾𑌣𑌾𑌃 𑌕𑌿𑌂 𑌤𑍍𑌵𑌂 𑌨𑍋 𑌨𑌾𑌭𑌿𑌭𑌾𑌷𑌸𑍇 ॥ 10 ॥

𑌮𑍁𑌨𑌿𑌮𑌵𑍍𑌯𑌕𑍍𑌤𑌯𑌾 𑌵𑌾𑌚𑌾 𑌤𑌮𑌹𑌂 𑌸𑌜𑍍𑌜𑌮𑌾𑌨𑌯𑌾 ।

𑌹𑍀𑌨𑌵𑍍𑌯𑌞𑍍𑌜𑌨𑌯𑌾 𑌪𑍍𑌰𑍇𑌕𑍍𑌷𑍍𑌯 𑌭𑍀𑌤𑌚𑌿𑌤𑍍𑌤 𑌇𑌵𑌾𑌬𑍍𑌰𑍁𑌵𑌮𑍍 ॥ 11 ॥

𑌮𑌨𑌸𑌃 𑌕𑌰𑍍𑌮 𑌚𑍇𑌷𑍍𑌟𑌾𑌭𑌿𑌰𑌭𑌿𑌸𑌂𑌸𑍍𑌤𑌭𑍍𑌯 𑌵𑌾𑌗𑍍𑌬𑌲𑌮𑍍 ।

𑌆𑌚𑌚𑌕𑍍𑌷𑍇 𑌤𑍍𑌵𑌹𑌂 𑌤𑌸𑍍𑌮𑍈 𑌪𑍁𑌤𑍍𑌰𑌵𑍍𑌯𑌸𑌨𑌜𑌂 𑌭𑌯𑌮𑍍 ॥ 12 ॥

𑌕𑍍𑌷𑌤𑍍𑌰𑌿𑌯𑍋𑌽𑌹𑌂 𑌦𑌶𑌰𑌥𑍋 𑌨𑌾𑌹𑌂 𑌪𑍁𑌤𑍍𑌰𑍋 𑌮𑌹𑌾𑌤𑍍𑌮𑌨𑌃 ।

𑌸𑌜𑍍𑌜𑌨𑌾𑌵𑌮𑌤𑌂 𑌦𑍁𑌃𑌖𑌮𑌿𑌦𑌂 𑌪𑍍𑌰𑌾𑌪𑍍𑌤𑌂 𑌸𑍍𑌵𑌕𑌰𑍍𑌮𑌜𑌮𑍍 ॥ 13 ॥

𑌭𑌗𑌵𑌂𑌶𑍍𑌚𑌾𑌪𑌹𑌸𑍍𑌤𑍋𑌽𑌹𑌂 𑌸𑌰𑌯𑍂𑌤𑍀𑌰𑌮𑌾𑌗𑌤𑌃 ।

𑌜𑌿𑌘𑌾𑌂𑌸𑍁𑌶𑍍𑌶𑍍𑌵𑌾𑌪𑌦𑌂 𑌕𑌞𑍍𑌚𑌿𑌨𑍍𑌨𑌿𑌪𑌾𑌨𑍇 𑌚𑌾𑌽𑌗𑌤𑌂 𑌗𑌜𑌮𑍍 ॥ 14 ॥

𑌤𑌤𑌶𑍍𑌶𑍍𑌰𑍁𑌤𑍋 𑌮𑌯𑌾 𑌶𑌬𑍍𑌦𑍋 𑌜𑌲𑍇 𑌕𑍁𑌮𑍍𑌭𑌸𑍍𑌯 𑌪𑍂𑌰𑍍𑌯𑌤𑌃 ।

𑌦𑍍𑌵𑌿𑌪𑍋𑌽𑌯𑌮𑌿𑌤𑌿 𑌮𑌤𑍍𑌵𑌾𑌽𑌯𑌂 𑌬𑌾𑌣𑍇𑌨𑌾𑌭𑌿𑌹𑌤𑍋 𑌮𑌯𑌾 ॥ 15 ॥

𑌗𑌤𑍍𑌵𑌾 𑌨𑌦𑍍𑌯𑌾𑌸𑍍𑌤𑌤 𑌸𑍍𑌤𑍀𑌰𑌮𑌪𑌶𑍍𑌯𑌮𑌿𑌷𑍁𑌣𑌾 𑌹𑍃𑌦𑌿 ।

𑌵𑌿𑌨𑌿𑌰𑍍𑌭𑌿𑌨𑍍𑌨𑌂 𑌗𑌤𑌪𑍍𑌰𑌾𑌣𑌂 𑌶𑌯𑌾𑌨𑌂 𑌭𑍁𑌵𑌿 𑌤𑌾𑌪𑌸𑌮𑍍 ॥ 16 ॥

𑌭𑌗𑌵𑌚𑍍𑌛𑌶𑌬𑍍𑌦𑌮𑌾𑌲𑌕𑍍𑌷𑍍𑌯 𑌮𑌯𑌾 𑌗𑌜𑌜𑌿𑌘𑌾𑌂𑌸𑍁𑌨𑌾 ।

𑌵𑌿𑌸𑍃𑌪𑍍𑌟𑍋𑌽𑌮𑍍𑌭𑌸𑌿 𑌨𑌾𑌰𑌾𑌚𑌸𑍍𑌤𑍇𑌨 𑌤𑍇 𑌨𑌿𑌹𑌤𑌸𑍍𑌸𑍁𑌤𑌃 ॥ 17 ॥

𑌤𑌤𑌸𑍍𑌤𑌸𑍍𑌯𑍈𑌵 𑌵𑌚𑌨𑌾𑌦𑍁𑌪𑍇𑌤𑍍𑌯 𑌪𑌰𑌿𑌤𑌪𑍍𑌯𑌤𑌃 ।

𑌸 𑌮𑌯𑌾 𑌸𑌹𑌸𑌾 𑌬𑌾𑌣 𑌉𑌧𑍃𑌤𑍋 𑌮𑌰𑍍𑌮𑌤𑌸𑍍𑌤𑌦𑌾 ॥ 18 ॥

𑌸 𑌚𑍋𑌧𑍃𑌤𑍇𑌨 𑌬𑌾𑌣𑍇𑌨 𑌤𑌤𑍍𑌰𑍈𑌵 𑌸𑍍𑌵𑌰𑍍𑌗𑌮𑌾𑌸𑍍𑌥𑌿𑌤𑌃 ।

𑌭𑌵𑌨𑍍𑌤𑍗 𑌪𑌿𑌤𑌰𑍗 𑌶𑍋𑌚𑌨𑍍𑌨𑌨𑍍𑌧𑌾𑌵𑌿𑌤𑌿 𑌵𑌿𑌲𑌪𑍍𑌯 𑌚 ॥ 19 ॥

𑌅𑌜𑍍𑌞𑌾𑌨𑌾𑌦𑍍𑌭𑌵𑌤𑌃 𑌪𑍁𑌤𑍍𑌰 𑌸𑍍𑌸𑌹𑌸𑌾𑌽𑌭𑌿𑌹𑌤𑍋 𑌮𑌯𑌾 ।

𑌶𑍇𑌷𑌮𑍇𑌵𑌂 𑌗𑌤𑍇 𑌯𑌤𑍍𑌸𑍍𑌯𑌾𑌤𑍍𑌤𑌤𑍍𑌪𑍍𑌰𑌸𑍀𑌦𑌤𑍁 𑌮𑍇 𑌮𑍁𑌨𑌿𑌃 ॥ 20 ॥

𑌸 𑌤𑌚𑍍𑌚𑍍𑌰𑍁𑌤𑍍𑌵𑌾 𑌵𑌚𑌃 𑌕𑍍𑌰𑍂𑌰𑌂 𑌮𑌯𑍋𑌕𑍍𑌤𑌮𑌘𑌶𑌂𑌸𑌿𑌨𑌾 ।

𑌨𑌾𑌶𑌕𑌤𑍍𑌤𑍀𑌵𑍍𑌰𑌮𑌾𑌯𑌾𑌸𑌮𑌕𑌰𑍍𑌤𑍁𑌂 𑌭𑌗𑌵𑌾𑌨𑍃𑌷𑌿𑌃 ॥ 21 ॥

𑌸 𑌬𑌾𑌷𑍍𑌪𑌪𑍂𑌰𑍍𑌣𑌵𑌦𑌨𑍋 𑌨𑌿𑌶𑍍𑌶𑍍𑌵𑌸𑌨𑍍𑌶𑍋𑌕𑌕𑌰𑍍𑌶𑌿𑌤𑌃 ।

𑌮𑌾𑌮𑍁𑌵𑌾𑌚 𑌮𑌹𑌾𑌤𑍇𑌜𑌾𑌃 𑌕𑍃𑌤𑌾𑌞𑍍𑌜𑌲𑌿𑌮𑍁𑌪𑌸𑍍𑌥𑌿𑌤𑌮𑍍 ॥ 22 ॥

𑌯𑌦𑍍𑌯𑍇𑌤𑌦𑌶𑍁𑌭𑌂 𑌕𑌰𑍍𑌮 𑌨 𑌤𑍍𑌵𑌂 𑌮𑍇 𑌕𑌥𑌯𑍇𑌸𑍍𑌸𑍍𑌵𑌯𑌮𑍍 ।

𑌫𑌲𑍇𑌨𑍍𑌮𑍂𑌰𑍍𑌧𑌾 𑌸𑍍𑌮 𑌤𑍇 𑌰𑌾𑌜𑌨𑍍 𑌸𑌦𑍍𑌯 𑌶𑍍𑌶𑌤𑌸𑌹𑌸𑍍𑌰𑌧𑌾 ॥ 23 ॥

𑌕𑍍𑌷𑌤𑍍𑌰𑌿𑌯𑍇𑌣 𑌵𑌧𑍋 𑌰𑌾𑌜𑌨𑍍 𑌵𑌾𑌨𑌪𑍍𑌰𑌸𑍍𑌥𑍇 𑌵𑌿𑌶𑍇𑌷𑌤𑌃 ।

𑌜𑍍𑌞𑌾𑌨𑌪𑍂𑌰𑍍𑌵𑌂 𑌕𑍃𑌤 𑌸𑍍𑌸𑍍𑌥𑌾𑌨𑌾𑌚𑍍𑌚𑍍𑌯𑌾𑌵𑌯𑍇𑌦𑌪𑌿 𑌵𑌜𑍍𑌰𑌿𑌣𑌮𑍍 ॥ 24 ॥

𑌸𑌪𑍍𑌤𑌧𑌾 𑌤𑍁 𑌫𑌲𑍇𑌨𑍍𑌮𑍂𑌰𑍍𑌧𑌾 𑌮𑍁𑌨𑍗 𑌤𑌪𑌸𑌿 𑌤𑌿𑌷𑍍𑌠𑌤𑌿 ।

𑌜𑍍𑌞𑌾𑌨𑌾𑌦𑍍𑌵𑌿𑌸𑍃𑌜𑌤𑌶𑍍𑌶𑌸𑍍𑌤𑍍𑌰𑌂 𑌤𑌾𑌦𑍃𑌶𑍇 𑌬𑍍𑌰𑌹𑍍𑌮𑌾𑌵𑌾𑌦𑌿𑌨𑌿 ॥ 25 ॥

𑌅𑌜𑍍𑌞𑌾𑌨𑌾𑌦𑍍𑌧𑌿𑌕𑍃𑌤𑌂 𑌯𑌸𑍍𑌮𑌾𑌦𑌿𑌦𑌂 𑌤𑍇𑌨𑍈𑌵 𑌜𑌵𑌸𑌿 ।

𑌅𑌪𑌿 𑌹𑍍𑌯𑌦𑍍𑌯 𑌕𑍁𑌲𑌂 𑌨 𑌸𑍍𑌯𑌾𑌦𑌿𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌤𑍋 𑌭𑌵𑌾𑌨𑍍 ॥ 26 ॥

𑌨𑌯 𑌨𑍗 𑌨𑍃𑌪 𑌤𑌂 𑌦𑍇𑌶𑌮𑌿𑌤𑌿 𑌮𑌾𑌂 𑌚𑌾𑌭𑍍𑌯𑌭𑌾𑌷𑌤 ।

𑌅𑌦𑍍𑌯 𑌤𑌂 𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌵𑌃 𑌪𑍁𑌤𑍍𑌰𑌂 𑌪𑌶𑍍𑌚𑌿𑌮𑌦𑌰𑍍𑌶𑌨𑌮𑍍 ॥ 27 ॥

𑌰𑍁𑌧𑌿𑌰𑍇𑌣𑌾𑌵𑌸𑌿𑌕𑍍𑌤𑌾𑌙𑍍𑌗𑌂 𑌪𑍍𑌰𑌕𑍀𑌰𑍍𑌣𑌾𑌜𑌿𑌨𑌵𑌾𑌸𑌸𑌮𑍍 ।

𑌶𑌯𑌾𑌨𑌂 𑌭𑍁𑌵𑌿 𑌨𑌿𑌸𑍍𑌸𑌞𑍍𑌜𑍍𑌞𑌂 𑌧𑌰𑍍𑌮 𑌰𑌾𑌜𑌵𑌶𑌂 𑌗𑌤𑌮𑍍 ॥ 28 ॥

𑌅𑌥𑌾𑌹𑌮𑍇𑌕𑌸𑍍𑌤𑌂 𑌦𑍇𑌶𑌂 𑌨𑍀𑌤𑍍𑌵𑌾 𑌤𑍗 𑌭𑍃𑌶𑌦𑍁𑌃𑌖𑌿𑌤𑍗 ।

𑌅𑌸𑍍𑌪𑌰𑍍𑌶𑌯𑌮𑌹𑌂 𑌪𑍁𑌤𑍍𑌰𑌂 𑌤𑌂 𑌮𑍁𑌨𑌿𑌂 𑌸𑌹 𑌭𑌾𑌰𑍍𑌯𑌯𑌾 ॥ 29 ॥

𑌨𑌾𑌭𑌿𑌵𑌾𑌦𑌯𑌸𑍇 𑌮𑌾𑌦𑍍𑌯 𑌨 𑌚 𑌮𑌾𑌽𑌮𑌭𑌿𑌭𑌾𑌷𑌸𑍇 ।

𑌕𑌿𑌂 𑌨𑍁 𑌶𑍇𑌷𑍇 𑌤𑍁 𑌭𑍂𑌮𑍗 𑌤𑍍𑌵𑌂 𑌵𑌤𑍍𑌸 𑌕𑌿𑌂 𑌕𑍁𑌪𑌿𑌤𑍋 𑌹𑍍𑌯𑌸𑌿 ॥ 30 ॥

𑌨 𑌤𑍍𑌵𑌹𑌂 𑌤𑍇 𑌪𑍍𑌰𑌿𑌯𑌂 𑌪𑍁𑌤𑍍𑌰 𑌮𑌾𑌤𑌰𑌂 𑌪𑌶𑍍𑌯 𑌧𑌾𑌰𑍍𑌮𑌿𑌕 ।

𑌕𑌿𑌂 𑌨𑍁 𑌨𑌾𑌲𑌿𑌙𑍍𑌗𑌸𑍇 𑌪𑍁𑌤𑍍𑌰 𑌸𑍁𑌕𑍁𑌮𑌾𑌰 𑌵𑌚𑍋 𑌵𑌦 ॥ 31 ॥

𑌕𑌸𑍍𑌯 𑌵𑌾¶𑌰𑌾𑌤𑍍𑌰𑍇𑌽𑌹𑌂 𑌶𑍍𑌰𑍋𑌷𑍍𑌯𑌾𑌮𑌿 𑌹𑍃𑌦𑌯𑌙𑍍𑌗𑌮𑌮𑍍 ।

𑌅𑌧𑍀𑌯𑌾𑌨𑌸𑍍𑌯 𑌮𑌧𑍁𑌰𑌂 𑌶𑌾𑌸𑍍𑌤𑍍𑌰𑌂 𑌵𑌾𑌨𑍍𑌯𑌦𑍍𑌵𑌿𑌶𑍇𑌷𑌤𑌃 ॥ 32 ॥

𑌕𑍋 𑌮𑌾𑌂 𑌸𑌨𑍍𑌦𑍍𑌯𑌾𑌮𑍁𑌪𑌾𑌸𑍍𑌯𑍈𑌵 𑌸𑍍𑌨𑌾𑌤𑍍𑌵𑌾 𑌹𑍁𑌤𑌹𑍁𑌤𑌾𑌶𑌨𑌃 ।

𑌶𑍍𑌲𑌾𑌘𑌯𑌿𑌷𑍍𑌯𑌤𑍍𑌯𑍁𑌪𑌾𑌸𑍀𑌨𑌃 𑌪𑍁𑌤𑍍𑌰 𑌶𑍋𑌕𑌭𑌯𑌾𑌰𑍍𑌦𑌿𑌤𑌮𑍍 ॥ 33 ॥

𑌕𑌨𑍍𑌦𑌮𑍂𑌲𑌫𑌲𑌂 𑌹𑍃𑌤𑍍𑌵𑌾 𑌕𑍋 𑌮𑌾𑌂 𑌪𑍍𑌰𑌿𑌯𑌮𑌿𑌵𑌾𑌤𑌿𑌥𑌿𑌮𑍍 ।

𑌭𑍋𑌜𑌯𑌿𑌷𑍍𑌯𑌤𑍍𑌯𑌕𑌰𑍍𑌮𑌣𑍍𑌯𑌮𑌪𑍍𑌰𑌗𑍍𑌰𑌹𑌮𑌨𑌾𑌯𑌕𑌮𑍍 ॥ 34 ॥

𑌇𑌮𑌾𑌮𑌨𑍍𑌧𑌾𑌂 𑌚 𑌵𑍃𑌦𑍍𑌧𑌾𑌂 𑌚 𑌮𑌾𑌤𑌰𑌂 𑌤𑍇 𑌤𑌪𑌸𑍍𑌵𑌿𑌨𑍀𑌮𑍍 ।

𑌕𑌥𑌂 𑌵𑌤𑍍𑌸 𑌭𑌰𑌿𑌷𑍍𑌯𑌾𑌮𑌿 𑌕𑍃𑌪𑌣𑌾𑌂 𑌪𑍁𑌤𑍍𑌰𑌗𑌰𑍍𑌧𑌿𑌨𑍀𑌮𑍍 ॥ 35 ॥

𑌤𑌿𑌷𑍍𑌠 𑌮𑌾𑌂 𑌮𑌾𑌗𑌮𑌃 𑌪𑍁𑌤𑍍𑌰 𑌯𑌮𑌸𑍍𑌯 𑌸𑌦𑌨𑌂 𑌪𑍍𑌰𑌤𑌿 ।

𑌶𑍍𑌵𑍋 𑌮𑌯𑌾 𑌸𑌹 𑌗𑌨𑍍𑌤𑌾𑌸𑌿 𑌜𑌨𑌨𑍍𑌯𑌾 𑌚 𑌸𑌮𑍇𑌧𑌿𑌤𑌃 ॥ 36 ॥

𑌤𑌤𑍋 𑌵𑍈𑌵𑌸𑍍𑌵𑌤𑌂 𑌦𑍃𑌷𑍍𑌟𑍍𑌵𑌾 𑌤𑌂 𑌪𑍍𑌰𑌵𑌕𑍍𑌷𑍍𑌯𑌾𑌮𑌿 𑌭𑌾𑌰𑌤𑍀𑌮𑍍 ।

𑌕𑍍𑌷𑌮𑌤𑌾𑌂 𑌧𑌰𑍍𑌮𑌰𑌾𑌜𑍋 𑌮𑍇 𑌬𑌿𑌭𑍃𑌯𑌾𑌤𑍍𑌪𑌿𑌤𑌰𑌾𑌵𑌯𑌮𑍍 ॥ 37 ॥

𑌦𑌾𑌤𑍁𑌮𑌰𑍍𑌹𑌤𑌿 𑌧𑌰𑍍𑌮𑌾𑌤𑍍𑌮𑌾 𑌲𑍋𑌕𑌪𑌾𑌲𑍋 𑌮𑌹𑌾𑌯𑌶𑌾𑌃 ।

𑌈𑌦𑍃𑌶𑌸𑍍𑌯 𑌮𑌮𑌾𑌕𑍍𑌷𑌯𑍍𑌯𑌾 𑌮𑍇𑌕𑌾𑌮𑌭𑌯𑌦𑌕𑍍𑌷𑌿𑌣𑌾𑌮𑍍 ॥ 38 ॥

𑌅𑌪𑌾𑌪𑍋𑌽𑌸𑌿 𑌯𑌦𑌾 𑌪𑍁𑌤𑍍𑌰 𑌨𑌿𑌹𑌤𑌃 𑌪𑌾𑌪𑌕𑌰𑍍𑌮𑌣𑌾 ।

𑌤𑍇𑌨 𑌸𑌤𑍍𑌯𑍇𑌨 𑌗𑌚𑍍𑌛𑌾𑌽𑌽𑌶𑍁 𑌯𑍇 𑌲𑍋𑌕𑌾𑌶𑍍𑌶𑌸𑍍𑌤𑍍𑌰𑌯𑍋𑌧𑌿𑌨𑌾𑌮𑍍 ॥ 39 ॥

𑌯𑌾𑌨𑍍𑌤𑌿 𑌶𑍂𑌰𑌾 𑌗𑌤𑌿𑌂 𑌯𑌾𑌂 𑌚 𑌸𑌙𑍍𑌗𑍍𑌰𑌾𑌮𑍇𑌷𑍍𑌵𑌨𑌿𑌵𑌰𑍍𑌤𑌿𑌨𑌃 ।

𑌹𑌤𑌾𑌸𑍍𑌤𑍍𑌵𑌭𑌿𑌮𑍁𑌖𑌾𑌃 𑌪𑍁𑌤𑍍𑌰 𑌗𑌤𑌿𑌂 𑌤𑌾𑌂 𑌪𑌰𑌮𑌾𑌂 𑌵𑍍𑌰𑌜 ॥ 40 ॥

𑌯𑌾𑌂 𑌗𑌤𑌿𑌂 𑌸𑌗𑌰𑌶𑍍𑌶𑍈𑌬𑍍𑌯𑍋 𑌦𑌿𑌲𑍀𑌪𑍋 𑌜𑌨𑌮𑍇𑌜𑌯𑌃 ।

𑌨𑌹𑍁𑌷𑍋 𑌦𑍁𑌨𑍍𑌦𑍁𑌮𑌾𑌰𑌶𑍍𑌚 𑌪𑍍𑌰𑌾𑌪𑍍𑌤𑌾𑌸𑍍𑌤𑌾𑌂 𑌗𑌚𑍍𑌛 𑌪𑍁𑌤𑍍𑌰𑌕 ॥ 41 ॥

𑌯𑌾 𑌗𑌤𑌿 𑌸𑍍𑌸𑌰𑍍𑌵𑌸𑌾𑌧𑍂𑌨𑌾𑌂 𑌸𑍍𑌵𑌾𑌧𑍍𑌯𑌾𑌯𑌾𑌤𑍍𑌤𑌪𑌸𑌾𑌚 𑌯𑌾 ।

𑌯𑌾 𑌭𑍂𑌮𑌿𑌦𑌸𑍍𑌯𑌾𑌹𑌿𑌽𑌤𑌾𑌗𑍍𑌨𑍇𑌰𑍇𑌕𑌪𑌤𑍍𑌨𑍀 𑌵𑍍𑌰𑌤𑌸𑍍𑌯 𑌚 ॥ 42 ॥

𑌗𑍋𑌸𑌹𑌸𑍍𑌰𑌪𑍍𑌰𑌦𑌾𑌤𑍃𑌣𑌾𑌂 𑌯𑌾 𑌯𑌾 𑌗𑍁𑌰𑍁𑌭𑍃𑌤𑌾𑌮𑌪𑌿 ।

𑌦𑍇𑌹𑌨𑍍𑌯𑌾𑌸𑌕𑍃𑌤𑌾𑌂 𑌯𑌾 𑌚 𑌤𑌾𑌂 𑌗𑌤𑌿𑌂 𑌗𑌚𑍍𑌛 𑌪𑍁𑌤𑍍𑌰𑌕 ॥ 43 ॥

𑌨 𑌹𑌿 𑌤𑍍𑌵𑌸𑍍𑌮𑌿𑌨𑍍𑌕𑍁𑌲𑍇 𑌜𑌾𑌤𑍋 𑌗𑌚𑍍𑌛𑌤𑍍𑌯𑌕𑍁𑌶𑌲𑌾𑌂 𑌗𑌤𑌿𑌮𑍍 ।

𑌸 𑌤𑍁 𑌯𑌾𑌸𑍍𑌯𑌤𑌿 𑌯𑍇𑌨 𑌤𑍍𑌵𑌂 𑌨𑌿𑌹𑌤𑍋 𑌮𑌮 𑌬𑌾𑌨𑍍𑌧𑌵𑌃 ॥ 44 ॥

𑌏𑌵𑌂 𑌸 𑌕𑍃𑌪𑌣𑌂 𑌤𑌤𑍍𑌰 𑌪𑌰𑍍𑌯𑌦𑍇𑌵𑌯𑌤𑌾𑌸𑌕𑍃𑌤𑍍 ।

𑌤𑌤𑍋𑌽𑌸𑍍𑌮𑍈 𑌕𑌰𑍍𑌤𑍁𑌮𑍁𑌦𑌕𑌂 𑌪𑍍𑌰𑌵𑍃𑌤𑍍𑌤𑌸𑍍𑌸𑌹𑌭𑌾𑌰𑍍𑌯𑌯𑌾 ॥ 45 ॥

𑌸 𑌤𑍁 𑌦𑌿𑌵𑍍𑌯𑍇𑌨 𑌰𑍂𑌪𑍇𑌣 𑌮𑍁𑌨𑌿𑌪𑍁𑌤𑍍𑌰𑌸𑍍𑌸𑍍𑌵𑌕𑌰𑍍𑌮𑌭𑌿𑌃 ।

𑌸𑍍𑌵𑌰𑍍𑌗𑌮𑌧𑍍𑌯𑌾𑌰𑍁𑌹𑌤𑍍𑌕𑍍𑌷𑌿𑌪𑍍𑌰𑌂 𑌶𑌕𑍍𑌰𑍇𑌣 𑌸𑌹 𑌧𑌰𑍍𑌮𑌵𑌿𑌤𑍍 ॥ 46 ॥

𑌆𑌬𑌭𑌾𑌷𑍇 𑌚 𑌵𑍃𑌦𑍍𑌧𑍗 𑌤𑍗 𑌸𑌹 𑌶𑌕𑍍𑌰𑍇𑌣 𑌤𑌾𑌪𑌸𑌃 ।

𑌆𑌶𑍍𑌵𑌾𑌸𑍍𑌯𑌚 𑌮𑍁𑌹𑍂𑌰𑍍𑌤𑌂 𑌤𑍁 𑌪𑌿𑌤𑌰𑍗 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 47 ॥

𑌸𑍍𑌥𑌾𑌨𑌮𑌸𑍍𑌮𑌿 𑌮𑌹𑌤𑍍𑌪𑍍𑌰𑌾𑌪𑍍𑌤𑍋 𑌭𑌵𑌤𑍋𑌃 𑌪𑌰𑌿𑌚𑌾𑌰𑌣𑌾𑌤𑍍 ।

𑌭𑌵𑌨𑍍𑌤𑌾𑌵𑌪𑌿 𑌚 𑌕𑍍𑌷𑌿𑌪𑍍𑌰𑌂 𑌮𑌮 𑌮𑍂𑌲𑌮𑍁𑌪𑍈𑌷𑍍𑌯𑌤𑌃 ॥ 48 ॥

𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌦𑌿𑌵𑍍𑌯𑍇𑌨 𑌵𑌿𑌮𑌾𑌨𑍇𑌨 𑌵𑌪𑍁𑌷𑍍𑌮𑌤𑌾 ।

𑌆𑌰𑍁𑌰𑍋𑌹 𑌦𑌿𑌵𑌂 𑌕𑍍𑌷𑌿𑌪𑍍𑌰𑌂 𑌮𑍁𑌨𑌿𑌪𑍁𑌤𑍍𑌰𑍋 𑌜𑌿𑌤𑍇𑌨𑍍𑌦𑍍𑌰𑌿𑌯𑌃 ॥ 49 ॥

𑌸 𑌕𑍃𑌤𑍍𑌵𑌾 𑌤𑍂𑌦𑌕𑌂 𑌤𑍂𑌰𑍍𑌣𑌂 𑌤𑌾𑌪𑌸 𑌸𑍍𑌸𑌹 𑌭𑌾𑌰𑍍𑌯𑌯𑌾 ।

𑌮𑌾𑌮𑍁𑌵𑌾𑌚 𑌮𑌹𑌾𑌤𑍇𑌜𑌾𑌃 𑌕𑍃𑌤𑌾𑌞𑍍𑌜𑌲𑌿𑌮𑍁𑌪𑌸𑍍𑌥𑌿𑌤𑌮𑍍 ॥ 50 ॥

𑌅𑌦𑍍𑌯𑍈𑌵 𑌜𑌹𑌿𑌂 𑌮𑌾𑌂 𑌰𑌾𑌜𑌨𑍍𑌮𑌰𑌣𑍇 𑌨𑌾𑌸𑍍𑌤𑌿 𑌮𑍇 𑌵𑍍𑌯𑌥𑌾 ।

𑌯𑌚𑍍𑌛𑌰𑍇𑌣𑍈𑌕𑌪𑍁𑌤𑍍𑌰𑌂 𑌮𑌾𑌂 𑌤𑍍𑌵𑌮𑌕𑌰𑍍𑌷𑍀𑌰𑌪𑍁𑌤𑍍𑌰𑌕𑌮𑍍 ॥ 51 ॥

𑌤𑍍𑌵𑌯𑌾 𑌤𑍁 𑌯𑌦𑌵𑌿𑌜𑍍𑌞𑌾𑌨𑌾𑌨𑍍𑌨𑌿𑌹𑌤𑍋 𑌮𑍇 𑌸𑍁𑌤𑌶𑍍𑌶𑍁𑌚𑌿𑌃 ।

𑌤𑍇𑌨 𑌤𑍍𑌵𑌾𑌮𑌭𑌿𑌶𑌪𑍍𑌸𑍍𑌯𑌾𑌮𑌿 𑌸𑍁𑌦𑍁𑌃𑌖𑌮𑌤𑌿𑌦𑌾𑌰𑍁𑌣𑌮𑍍 ॥ 52 ॥

𑌪𑍁𑌤𑍍𑌰𑌵𑍍𑌯𑌸𑌨𑌜𑌂 𑌦𑍁𑌃𑌖𑌂 𑌯𑌦𑍇𑌤𑌨𑍍𑌮𑌮 𑌸𑌾𑌮𑍍𑌪𑍍𑌰𑌤𑌮𑍍 ।

𑌏𑌵𑌂 𑌤𑍍𑌵𑌂 𑌪𑍁𑌤𑍍𑌰𑌶𑍋𑌕𑍇𑌨 𑌰𑌾𑌜𑌨𑍍𑌕𑌾𑌲𑌂 𑌕𑌰𑌿𑌷𑍍𑌯𑌸𑌿 ॥ 53 ॥

𑌅𑌜𑍍𑌞𑌾𑌨𑌾𑌤𑍍𑌤𑍁 𑌹𑌤𑍋 𑌯𑌸𑍍𑌮𑌾𑌤𑍍𑌕𑍍𑌷𑌤𑍍𑌰𑌿𑌯𑍇𑌣 𑌤𑍍𑌵𑌯𑌾 𑌮𑍁𑌨𑌿𑌃 ।

𑌤𑌸𑍍𑌮𑌾𑌤𑍍𑌤𑍍𑌵𑌾𑌂 𑌨𑌾𑌵𑌿𑌶𑌤𑍍𑌯𑌾𑌶𑍁 𑌬𑍍𑌰𑌹𑍍𑌮𑌹𑌤𑍍𑌯𑌾 𑌨𑌰𑌾𑌧𑌿𑌪 ॥ 54 ॥

𑌤𑍍𑌵𑌾𑌮𑌪𑍍𑌯𑍇𑌤𑌾𑌦𑍃𑌶𑍋 𑌭𑌾𑌵𑌃 𑌕𑍍𑌷𑌿𑌪𑍍𑌰𑌮𑍇𑌵 𑌗𑌮𑌿𑌷𑍍𑌯𑌤𑌿 ।

𑌜𑍀𑌵𑌿𑌤𑌾𑌨𑍍𑌤𑌕𑌰𑍋 𑌘𑍋𑌰𑍋 𑌦𑌾𑌤𑌾𑌰𑌮𑌿𑌵 𑌦𑌕𑍍𑌷𑌿𑌣𑌾 ॥ 55 ॥

𑌏𑌵𑌂 𑌶𑌾𑌪𑌂 𑌮𑌯𑌿 𑌨𑍍𑌯𑌸𑍍𑌯 𑌵𑌿𑌲𑌪𑍍𑌯 𑌕𑌰𑍁𑌣𑌂 𑌬𑌹𑍁 ।

𑌚𑌿𑌤𑌾𑌮𑌾𑌰𑍋𑌪𑍍𑌯 𑌦𑍇𑌹𑌂 𑌤𑌨𑍍𑌮𑌿𑌥𑍁𑌨𑌂 𑌸𑍍𑌵𑌰𑍍𑌗𑌮𑌭𑍍𑌯𑌯𑌾𑌤𑍍 ॥ 56 ॥

𑌤𑌦𑍇𑌤𑌚𑍍𑌛𑌿𑌨𑍍𑌤𑌯𑌾𑌨𑍇𑌨 𑌸𑍍𑌮𑍃𑌤𑌂 𑌪𑌾𑌪𑌂 𑌮𑌯𑌾 𑌸𑍍𑌵𑌯𑌮𑍍 ।

𑌤𑌦𑌾 𑌬𑌾𑌲𑍍𑌯𑌾𑌤𑍍𑌕𑍃𑌤𑌂 𑌦𑍇𑌵𑌿 𑌶𑌬𑍍𑌦𑌵𑍇𑌧𑍍𑌯𑌨𑍁𑌶𑌿𑌕𑍍𑌷𑌿𑌣𑌾 ॥ 57 ॥

𑌤𑌸𑍍𑌯𑌾𑌯𑌂 𑌕𑌰𑍍𑌮𑌣𑍋 𑌦𑍇𑌵𑌿 𑌵𑌿𑌪𑌾𑌕𑌸𑍍𑌸𑌮𑍁𑌪𑌸𑍍𑌥𑌿𑌤𑌃 ।

𑌅𑌪𑌥𑍍𑌯𑍈𑌸𑍍𑌸𑌹𑌮𑍍𑌭𑍁𑌕𑍍𑌤𑍇 𑌵𑍍𑌯𑌾𑌧𑌿𑌰𑌨𑍍𑌨𑌰𑌸𑍇 𑌯𑌥𑌾 ॥ 58 ॥

𑌤𑌸𑍍𑌮𑌾𑌨𑍍𑌮𑌾𑌮𑌾𑌗𑌤𑌂 𑌭𑌦𑍍𑌰𑍇 𑌤𑌸𑍍𑌯𑍋𑌦𑌾𑌰𑌸𑍍𑌯 𑌤𑌦𑍍𑌵𑌚𑌃 ।

𑌯𑌦𑌹𑌂 𑌪𑍁𑌤𑍍𑌰𑌶𑍋𑌕𑍇𑌨 𑌸𑌨𑍍𑌤𑍍𑌯𑌕𑍍𑌷𑍍𑌯𑌾𑌮𑍍𑌯𑌦𑍍𑌯 𑌜𑍀𑌵𑌿𑌤𑌮𑍍 ॥ 59 ॥

𑌚𑌕𑍍𑌷𑍁𑌭𑍍𑌯𑌾𑌂 𑌤𑍍𑌵𑌾𑌂 𑌨 𑌪𑌶𑍍𑌯𑌾𑌮𑌿 𑌕𑍗𑌸𑌲𑍍𑌯𑍇 𑌸𑌾𑌧𑍁 𑌮𑌾𑌂 𑌸𑍍𑌫𑍃𑌶 ।

𑌇𑌤𑍍𑌯𑍁𑌕𑍍𑌤𑍍𑌵𑌾 𑌸 𑌰𑍁𑌦𑌂𑌸𑍍𑌤𑍍𑌰𑌸𑍍𑌤𑍋 𑌭𑌾𑌰𑍍𑌯𑌾𑌮𑌾𑌹 𑌚 𑌭𑍂𑌮𑌿𑌪𑌃 ॥ 60 ॥

𑌏𑌤𑌨𑍍𑌮𑍇 𑌸𑌦𑍃𑌶𑌂 𑌦𑍇𑌵𑌿 𑌯𑌨𑍍𑌮𑌯𑌾 𑌰𑌾𑌘𑌵𑍇 𑌕𑍃𑌤𑌮𑍍 ।

𑌸𑌦𑍃𑌶𑌂 𑌤𑌤𑍍𑌤𑍁 𑌤𑌸𑍍𑌯𑍈𑌵 𑌯𑌦𑌨𑍇𑌨 𑌕𑍃𑌤𑌂 𑌮𑌯𑌿 ॥ 61 ॥

𑌦𑍁𑌰𑍍𑌵𑍃𑌤𑍍𑌤𑌮𑌪𑌿 𑌕𑌃 𑌪𑍁𑌤𑍍𑌰𑌂 𑌤𑍍𑌯𑌜𑍇𑌦𑍍𑌭𑍁𑌵𑌿 𑌵𑌿𑌚𑌕𑍍𑌷𑌣𑌃 ।

𑌕𑌶𑍍𑌚 𑌪𑍍𑌰𑌵𑍍𑌰𑌾𑌜𑍍𑌯𑌮𑌾𑌨𑍋 𑌵𑌾 𑌨𑌾𑌸𑍂𑌯𑍇𑌤𑍍𑌪𑌿𑌤𑌰𑌂 𑌸𑍁𑌤𑌃 ॥ 62 ॥

𑌯𑌦𑌿 𑌮𑌾𑌂 𑌸𑌂𑌸𑍍𑌪𑍃𑌶𑍇𑌦𑍍𑌰𑌾𑌮𑌸𑍍𑌸𑌕𑍃𑌦𑌦𑍍𑌯 𑌲𑌭𑍇𑌤 𑌵𑌾 ।

𑌯𑌮𑌕𑍍𑌷𑌯𑌮𑌨𑍁𑌪𑍍𑌰𑌾𑌪𑍍𑌤𑌾 𑌦𑍍𑌰𑌕𑍍𑌷𑍍𑌯𑌨𑍍𑌤𑌿 𑌨 𑌹𑌿 𑌮𑌾𑌨𑌵𑌾𑌃 ॥ 63 ॥

𑌚𑌕𑍍𑌷𑍁𑌷𑌾 𑌤𑍍𑌵𑌾𑌂 𑌨 𑌪𑌶𑍍𑌯𑌾𑌮𑌿 𑌸𑍍𑌮𑍃𑌤𑌿𑌰𑍍𑌮𑌮 𑌵𑌿𑌲𑍁𑌪𑍍𑌯𑌤𑍇 ।

𑌦𑍂𑌤𑌾 𑌵𑍈𑌵𑌸𑍍𑌵𑌤𑌸𑍍𑌯𑍈𑌤𑍇 𑌕𑍗𑌸𑌲𑍍𑌯𑍇 𑌤𑍍𑌵𑌰𑌯𑌨𑍍𑌤𑌿 𑌮𑌾𑌮𑍍 ॥ 64 ॥

𑌅𑌤𑌸𑍍𑌤𑍁 𑌕𑌿𑌂 𑌦𑍁𑌃𑌖𑌤𑌰𑌂 𑌯𑌦𑌹𑌂 𑌜𑍀𑌵𑌿𑌤𑌕𑍍𑌷𑌯𑍇 ।

𑌨 𑌹𑌿 𑌪𑌶𑍍𑌯𑌾𑌮𑌿 𑌧𑌰𑍍𑌮𑌜𑍍𑌞𑌂 𑌰𑌾𑌮𑌂 𑌸𑌤𑍍𑌯𑌪𑌰𑌾𑌕𑍍𑌰𑌮𑌮𑍍 ॥ 65 ॥

𑌤𑌸𑍍𑌯𑌾𑌦𑌰𑍍𑌶𑌨𑌜𑌶𑍍𑌶𑍋𑌕𑌸𑍍𑌸𑍁𑌤𑌸𑍍𑌯𑌾𑌪𑍍𑌰𑌤𑌿𑌕𑌰𑍍𑌮𑌣𑌃 ।

𑌉𑌚𑍍𑌛𑍋𑌷𑌯𑌤𑌿 𑌮𑍇 𑌪𑍍𑌰𑌾𑌣𑌾𑌨𑍍𑌵𑌾𑌰𑌿𑌸𑍍𑌤𑍋𑌕𑌮𑌿𑌵𑌾𑌤𑌪𑌃 ॥ 66 ॥

𑌨 𑌤𑍇 𑌮𑌨𑍁𑌷𑍍𑌯𑌾 𑌦𑍇𑌵𑌾𑌸𑍍𑌤𑍇 𑌯𑍇 𑌚𑌾𑌰𑍁𑌶𑍁𑌭𑌕𑍁𑌣𑍍𑌡𑌲𑌮𑍍 ।

𑌮𑍁𑌖𑌂 𑌦𑍍𑌰𑌕𑍍𑌷𑍍𑌯𑌨𑍍𑌤𑌿 𑌰𑌾𑌮𑌸𑍍𑌯 𑌵𑌰𑍍𑌷𑍇 𑌪𑌞𑍍𑌚𑌦𑌶𑍇 𑌪𑍁𑌨𑌃 ॥ 67 ॥

𑌪𑌦𑍍𑌮𑌪𑌤𑍍𑌰𑍇𑌕𑍍𑌷𑌣𑌂 𑌸𑍁𑌭𑍍𑌰𑍁 𑌸𑍁𑌦𑌂𑌷𑍍𑌟𑍍𑌰𑌂 𑌚𑌾𑌰𑍁𑌨𑌾𑌸𑌿𑌕𑌮𑍍 ।

𑌧𑌨𑍍𑌯𑌾 𑌦𑍍𑌰𑌕𑍍𑌷𑍍𑌯𑌨𑍍𑌤𑌿 𑌰𑌾𑌮𑌸𑍍𑌯 𑌤𑌾𑌰𑌾𑌧𑌿𑌪𑌨𑌿𑌭𑌂 𑌮𑍁𑌖𑌮𑍍 ॥ 68 ॥

𑌸𑌦𑍃𑌶𑌂 𑌶𑌾𑌰𑌦𑌸𑍍𑌯𑍇𑌨𑍍𑌦𑍋𑌃 𑌪𑍁𑌲𑍍𑌲𑌸𑍍𑌯 𑌕𑌮𑌲𑌸𑍍𑌯 𑌚 ।

𑌸𑍁𑌗𑌨𑍍𑌧𑌿 𑌮𑌮 𑌨𑌾𑌥𑌸𑍍𑌯 𑌧𑌨𑍍𑌯𑌾 𑌦𑍍𑌰𑌕𑍍𑌷𑍍𑌯𑌨𑍍𑌤𑌿 𑌤𑌨𑍍𑌮𑍁𑌖𑌮𑍍 ॥ 69 ॥

𑌨𑌿𑌵𑍃𑌤𑍍𑌤𑌵𑌨𑌵𑌾𑌸𑌂 𑌤𑌮𑌯𑍋𑌧𑍍𑌯𑌾𑌂 𑌪𑍁𑌨𑌰𑌾𑌗𑌤𑌮𑍍 ।

𑌦𑍍𑌰𑌕𑍍𑌷𑍍𑌯𑌨𑍍𑌤𑌿 𑌸𑍁𑌖𑌿𑌨𑍋 𑌰𑌾𑌮𑌂 𑌶𑍁𑌕𑍍𑌰𑌂 𑌮𑌾𑌰𑍍𑌗𑌗𑌤𑌂 𑌯𑌥𑌾 ॥ 70 ॥

𑌕𑍗𑌸𑌲𑍍𑌯𑍇 𑌚𑌿𑌤𑍍𑌤𑌮𑍋𑌹𑍇𑌨 𑌹𑍃𑌦𑌯𑌂 𑌸𑍀𑌦𑌤𑍀𑌵 𑌮𑍇 ।

𑌵𑍇𑌦𑌯𑍇 𑌨 𑌚 𑌸𑌂𑌯𑍁𑌕𑍍𑌤𑌾𑌨𑍍 𑌶𑌬𑍍𑌦𑌸𑍍𑌪𑌰𑍍𑌶𑌰𑌸𑌾𑌨𑌹𑌮𑍍 ॥ 71 ॥

𑌚𑌿𑌤𑍍𑌤𑌨𑌾𑌶𑌾𑌦𑍍𑌵𑌿𑌪𑌦𑍍𑌯𑌨𑍍𑌤𑍇 𑌸𑌰𑍍𑌵𑌾𑌣𑍍𑌯𑍇𑌨𑍍𑌦𑍍𑌰𑌿𑌯𑌾𑌣𑌿 𑌮𑍇 ।

𑌕𑍍𑌷𑍀𑌣𑌸𑍍𑌨𑍇𑌹𑌸𑍍𑌯 𑌦𑍀𑌪𑌸𑍍𑌯 𑌸𑌂𑌸𑌕𑍍𑌤𑌾 𑌰𑌶𑍍𑌮𑌯𑍋 𑌯𑌥𑌾 ॥ 72 ॥

𑌅𑌯𑌮𑌾𑌤𑍍𑌮𑌭𑌵𑌶𑍍𑌶𑍋𑌕𑍋 𑌮𑌾𑌮𑌨𑌾𑌥𑌮𑌚𑍇𑌤𑌨𑌮𑍍 ।

𑌸𑌂𑌸𑌾𑌦𑌯𑌤𑌿 𑌵𑍇𑌗𑍇𑌨 𑌯𑌥𑌾 𑌕𑍂𑌲𑌂 𑌨𑌦𑍀𑌰𑌯𑌃 ॥ 73 ॥

𑌹𑌾 𑌰𑌾𑌘𑌵 𑌮𑌹𑌾𑌬𑌾𑌹𑍋 𑌹𑌾 𑌮𑌮𑌾𑌽𑌯𑌾𑌸𑌨𑌾𑌶𑌨 ।

𑌹𑌾 𑌪𑌿𑌤𑍃𑌪𑍍𑌰𑌿𑌯 𑌮𑍇 𑌨𑌾𑌥 𑌹𑌾𑌽𑌦𑍍𑌯 𑌕𑍍𑌵𑌾𑌸𑌿 𑌗𑌤𑌸𑍍𑌸𑍁𑌤 ॥ 74 ॥

𑌹𑌾 𑌕𑍗𑌸𑌲𑍍𑌯𑍇 𑌨𑌶𑌿𑌷𑍍𑌯𑌾𑌮𑌿 𑌹𑌾 𑌸𑍁𑌮𑌿𑌤𑍍𑌰𑍇 𑌤𑌪𑌸𑍍𑌵𑌿𑌨𑌿 ।

𑌹𑌾 𑌨𑍃𑌶𑌂𑌸𑍇 𑌮𑌮𑌾𑌮𑌿𑌤𑍍𑌰𑍇 𑌕𑍈𑌕𑍇𑌯𑌿 𑌕𑍁𑌲𑌪𑌾𑌂𑌸𑌨𑌿 ॥ 75 ॥

𑌇𑌤𑌿 𑌰𑌾𑌮𑌸𑍍𑌯 𑌮𑌾𑌤𑍁𑌶𑍍𑌚 𑌸𑍁𑌮𑌿𑌤𑍍𑌰𑌾𑌯𑌾𑌶𑍍𑌚 𑌸𑌨𑍍𑌨𑌿𑌧𑍗 ।

𑌰𑌾𑌜𑌾 𑌦𑌶𑌰𑌥 𑌶𑍍𑌶𑍋𑌚𑌞𑍍𑌜𑍀𑌵𑌿𑌤𑌾𑌨𑍍𑌤𑌮𑍁𑌪𑌾𑌗𑌮𑌤𑍍 ॥ 76 ॥

𑌯𑌦𑌾 𑌤𑍁 𑌦𑍀𑌨𑌂 𑌕𑌥𑌯𑌨𑍍𑌨𑌰𑌾𑌧𑌿𑌪𑌃 𑌪𑍍𑌰𑌿𑌯𑌸𑍍𑌯 𑌪𑍁𑌤𑍍𑌤𑍍𑌰𑌸𑍍𑌯 𑌵𑌿𑌵𑌾𑌸𑌨𑌾𑌤𑍁𑌰𑌃 ।

𑌗𑌤𑍇𑌽𑌰𑍍𑌧𑌰𑌾𑌤𑍍𑌰𑍇 𑌭𑍃𑌶𑌦𑍁𑌃𑌖𑌪𑍀𑌡𑌿𑌤𑌸𑍍𑌤𑌦𑌾 𑌜𑌹𑍗 𑌪𑍍𑌰𑌾𑌣𑌮𑍁𑌦𑌾𑌰𑌦𑌰𑍍𑌶𑌨𑌃 ॥ 77 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑍇 𑌚𑌤𑍁𑌃𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha catuḥṣaṣṭitamassargaḥ |

vadhamapratirūpaṃ tu maharṣestasya rāghavaḥ |

vilapanneva dharmātmā kausalyāṃ punarabravīt || 1 ||

tadajñānānmahatpāpaṃ kṛtvāhaṃ saṅkulendriyaḥ |

ekastvacintayaṃ budhyā kathaṃ nu sukṛtaṃ bhavet || 2 ||

tatastaṃ ghaṭamādāya pūrṇaṃ paramavāriṇā |

āśramaṃ tamahaṃ prāpya yathā'khyātapathaṃ gataḥ || 3 ||

tatrāhaṃ durbalāvandhau vṛddhāvapariṇāyakau |

apaśyaṃ tasya pitarau lūnapakṣāviva dvijau || 4 ||

tannimittābhirāsīnau kathābhirapariśramau |

tāmāśāṃ matkṛte hīnāvudāsīnāvanāthavat || 5 ||

śokopahatacittaśca bhayasantrastacetanaḥ |

taccā'śramapadaṃ gatvā bhūyaśśokamahaṃ gataḥ || 6 ||

padaśabdaṃ tu me śrutvā munirvākyamabhāṣata |

kiṃ cirāyasi me putra pānīyaṃ kṣipramānaya || 7 ||

yannimittamidaṃ tāta salile krīḍitaṃ tvayā |

utkaṇṭhitā te māteyaṃ praviśa kṣipramāśramam || 8 ||

yadvyalīkaṃ kṛtaṃ putra mātrā te yadi vā mayā |

na tanmanasi kartavyaṃ tvayā tāta tapasvinā || 9 ||

tvaṃ gatistvagatīnāṃ cakṣustvaṃ hīnacakṣuṣām |

samāsaktāstvayi prāṇāḥ kiṃ tvaṃ no nābhibhāṣase || 10 ||

munimavyaktayā vācā tamahaṃ sajjamānayā |

hīnavyañjanayā prekṣya bhītacitta ivābruvam || 11 ||

manasaḥ karma ceṣṭābhirabhisaṃstabhya vāgbalam |

ācacakṣe tvahaṃ tasmai putravyasanajaṃ bhayam || 12 ||

kṣatriyo'haṃ daśaratho nāhaṃ putro mahātmanaḥ |

sajjanāvamataṃ duḥkhamidaṃ prāptaṃ svakarmajam || 13 ||

bhagavaṃścāpahasto'haṃ sarayūtīramāgataḥ |

jighāṃsuśśvāpadaṃ kañcinnipāne cā'gataṃ gajam || 14 ||

tataśśruto mayā śabdo jale kumbhasya pūryataḥ |

dvipo'yamiti matvā'yaṃ bāṇenābhihato mayā || 15 ||

gatvā nadyāstata stīramapaśyamiṣuṇā hṛdi |

vinirbhinnaṃ gataprāṇaṃ śayānaṃ bhuvi tāpasam || 16 ||

bhagavacchaśabdamālakṣya mayā gajajighāṃsunā |

visṛpṭo'mbhasi nārācastena te nihatassutaḥ || 17 ||

tatastasyaiva vacanādupetya paritapyataḥ |

sa mayā sahasā bāṇa udhṛto marmatastadā || 18 ||

sa codhṛtena bāṇena tatraiva svargamāsthitaḥ |

bhavantau pitarau śocannandhāviti vilapya ca || 19 ||

ajñānādbhavataḥ putra ssahasā'bhihato mayā |

śeṣamevaṃ gate yatsyāttatprasīdatu me muniḥ || 20 ||

sa taccrutvā vacaḥ krūraṃ mayoktamaghaśaṃsinā |

nāśakattīvramāyāsamakartuṃ bhagavānṛṣiḥ || 21 ||

sa bāṣpapūrṇavadano niśśvasanśokakarśitaḥ |

māmuvāca mahātejāḥ kṛtāñjalimupasthitam || 22 ||

yadyetadaśubhaṃ karma na tvaṃ me kathayessvayam |

phalenmūrdhā sma te rājan sadya śśatasahasradhā || 23 ||

kṣatriyeṇa vadho rājan vānaprasthe viśeṣataḥ |

jñānapūrvaṃ kṛta ssthānāccyāvayedapi vajriṇam || 24 ||

saptadhā tu phalenmūrdhā munau tapasi tiṣṭhati |

jñānādvisṛjataśśastraṃ tādṛśe brahmāvādini || 25 ||

ajñānāddhikṛtaṃ yasmādidaṃ tenaiva javasi |

api hyadya kulaṃ na syādikṣvākūṇāṃ kuto bhavān || 26 ||

naya nau nṛpa taṃ deśamiti māṃ cābhyabhāṣata |

adya taṃ draṣṭumicchāvaḥ putraṃ paścimadarśanam || 27 ||

rudhireṇāvasiktāṅgaṃ prakīrṇājinavāsasam |

śayānaṃ bhuvi nissañjñaṃ dharma rājavaśaṃ gatam || 28 ||

athāhamekastaṃ deśaṃ nītvā tau bhṛśaduḥkhitau |

asparśayamahaṃ putraṃ taṃ muniṃ saha bhāryayā || 29 ||

nābhivādayase mādya na ca mā'mabhibhāṣase |

kiṃ nu śeṣe tu bhūmau tvaṃ vatsa kiṃ kupito hyasi || 30 ||

na tvahaṃ te priyaṃ putra mātaraṃ paśya dhārmika |

kiṃ nu nāliṅgase putra sukumāra vaco vada || 31 ||

kasya vā¶rātre'haṃ śroṣyāmi hṛdayaṅgamam |

adhīyānasya madhuraṃ śāstraṃ vānyadviśeṣataḥ || 32 ||

ko māṃ sandyāmupāsyaiva snātvā hutahutāśanaḥ |

ślāghayiṣyatyupāsīnaḥ putra śokabhayārditam || 33 ||

kandamūlaphalaṃ hṛtvā ko māṃ priyamivātithim |

bhojayiṣyatyakarmaṇyamapragrahamanāyakam || 34 ||

imāmandhāṃ ca vṛddhāṃ ca mātaraṃ te tapasvinīm |

kathaṃ vatsa bhariṣyāmi kṛpaṇāṃ putragardhinīm || 35 ||

tiṣṭha māṃ māgamaḥ putra yamasya sadanaṃ prati |

śvo mayā saha gantāsi jananyā ca samedhitaḥ || 36 ||

tato vaivasvataṃ dṛṣṭvā taṃ pravakṣyāmi bhāratīm |

kṣamatāṃ dharmarājo me bibhṛyātpitarāvayam || 37 ||

dātumarhati dharmātmā lokapālo mahāyaśāḥ |

īdṛśasya mamākṣayyā mekāmabhayadakṣiṇām || 38 ||

apāpo'si yadā putra nihataḥ pāpakarmaṇā |

tena satyena gacchā''śu ye lokāśśastrayodhinām || 39 ||

yānti śūrā gatiṃ yāṃ ca saṅgrāmeṣvanivartinaḥ |

hatāstvabhimukhāḥ putra gatiṃ tāṃ paramāṃ vraja || 40 ||

yāṃ gatiṃ sagaraśśaibyo dilīpo janamejayaḥ |

nahuṣo dundumāraśca prāptāstāṃ gaccha putraka || 41 ||

yā gati ssarvasādhūnāṃ svādhyāyāttapasāca yā |

yā bhūmidasyāhi'tāgnerekapatnī vratasya ca || 42 ||

gosahasrapradātṛṇāṃ yā yā gurubhṛtāmapi |

dehanyāsakṛtāṃ yā ca tāṃ gatiṃ gaccha putraka || 43 ||

na hi tvasminkule jāto gacchatyakuśalāṃ gatim |

sa tu yāsyati yena tvaṃ nihato mama bāndhavaḥ || 44 ||

evaṃ sa kṛpaṇaṃ tatra paryadevayatāsakṛt |

tato'smai kartumudakaṃ pravṛttassahabhāryayā || 45 ||

sa tu divyena rūpeṇa muniputrassvakarmabhiḥ |

svargamadhyāruhatkṣipraṃ śakreṇa saha dharmavit || 46 ||

ābabhāṣe ca vṛddhau tau saha śakreṇa tāpasaḥ |

āśvāsyaca muhūrtaṃ tu pitarau vākyamabravīt || 47 ||

sthānamasmi mahatprāpto bhavatoḥ paricāraṇāt |

bhavantāvapi ca kṣipraṃ mama mūlamupaiṣyataḥ || 48 ||

evamuktvā tu divyena vimānena vapuṣmatā |

āruroha divaṃ kṣipraṃ muniputro jitendriyaḥ || 49 ||

sa kṛtvā tūdakaṃ tūrṇaṃ tāpasa ssaha bhāryayā |

māmuvāca mahātejāḥ kṛtāñjalimupasthitam || 50 ||

adyaiva jahiṃ māṃ rājanmaraṇe nāsti me vyathā |

yacchareṇaikaputraṃ māṃ tvamakarṣīraputrakam || 51 ||

tvayā tu yadavijñānānnihato me sutaśśuciḥ |

tena tvāmabhiśapsyāmi suduḥkhamatidāruṇam || 52 ||

putravyasanajaṃ duḥkhaṃ yadetanmama sāmpratam |

evaṃ tvaṃ putraśokena rājankālaṃ kariṣyasi || 53 ||

ajñānāttu hato yasmātkṣatriyeṇa tvayā muniḥ |

tasmāttvāṃ nāviśatyāśu brahmahatyā narādhipa || 54 ||

tvāmapyetādṛśo bhāvaḥ kṣiprameva gamiṣyati |

jīvitāntakaro ghoro dātāramiva dakṣiṇā || 55 ||

evaṃ śāpaṃ mayi nyasya vilapya karuṇaṃ bahu |

citāmāropya dehaṃ tanmithunaṃ svargamabhyayāt || 56 ||

tadetacchintayānena smṛtaṃ pāpaṃ mayā svayam |

tadā bālyātkṛtaṃ devi śabdavedhyanuśikṣiṇā || 57 ||

tasyāyaṃ karmaṇo devi vipākassamupasthitaḥ |

apathyaissahambhukte vyādhirannarase yathā || 58 ||

tasmānmāmāgataṃ bhadre tasyodārasya tadvacaḥ |

yadahaṃ putraśokena santyakṣyāmyadya jīvitam || 59 ||

cakṣubhyāṃ tvāṃ na paśyāmi kausalye sādhu māṃ sphṛśa |

ityuktvā sa rudaṃstrasto bhāryāmāha ca bhūmipaḥ || 60 ||

etanme sadṛśaṃ devi yanmayā rāghave kṛtam |

sadṛśaṃ tattu tasyaiva yadanena kṛtaṃ mayi || 61 ||

durvṛttamapi kaḥ putraṃ tyajedbhuvi vicakṣaṇaḥ |

kaśca pravrājyamāno vā nāsūyetpitaraṃ sutaḥ || 62 ||

yadi māṃ saṃspṛśedrāmassakṛdadya labheta vā |

yamakṣayamanuprāptā drakṣyanti na hi mānavāḥ || 63 ||

cakṣuṣā tvāṃ na paśyāmi smṛtirmama vilupyate |

dūtā vaivasvatasyaite kausalye tvarayanti mām || 64 ||

atastu kiṃ duḥkhataraṃ yadahaṃ jīvitakṣaye |

na hi paśyāmi dharmajñaṃ rāmaṃ satyaparākramam || 65 ||

tasyādarśanajaśśokassutasyāpratikarmaṇaḥ |

ucchoṣayati me prāṇānvāristokamivātapaḥ || 66 ||

na te manuṣyā devāste ye cāruśubhakuṇḍalam |

mukhaṃ drakṣyanti rāmasya varṣe pañcadaśe punaḥ || 67 ||

padmapatrekṣaṇaṃ subhru sudaṃṣṭraṃ cārunāsikam |

dhanyā drakṣyanti rāmasya tārādhipanibhaṃ mukham || 68 ||

sadṛśaṃ śāradasyendoḥ pullasya kamalasya ca |

sugandhi mama nāthasya dhanyā drakṣyanti tanmukham || 69 ||

nivṛttavanavāsaṃ tamayodhyāṃ punarāgatam |

drakṣyanti sukhino rāmaṃ śukraṃ mārgagataṃ yathā || 70 ||

kausalye cittamohena hṛdayaṃ sīdatīva me |

vedaye na ca saṃyuktān śabdasparśarasānaham || 71 ||

cittanāśādvipadyante sarvāṇyendriyāṇi me |

kṣīṇasnehasya dīpasya saṃsaktā raśmayo yathā || 72 ||

ayamātmabhavaśśoko māmanāthamacetanam |

saṃsādayati vegena yathā kūlaṃ nadīrayaḥ || 73 ||

hā rāghava mahābāho hā mamā'yāsanāśana |

hā pitṛpriya me nātha hā'dya kvāsi gatassuta || 74 ||

hā kausalye naśiṣyāmi hā sumitre tapasvini |

hā nṛśaṃse mamāmitre kaikeyi kulapāṃsani || 75 ||

iti rāmasya mātuśca sumitrāyāśca sannidhau |

rājā daśaratha śśocañjīvitāntamupāgamat || 76 ||

yadā tu dīnaṃ kathayannarādhipaḥ priyasya puttrasya vivāsanāturaḥ |

gate'rdharātre bhṛśaduḥkhapīḍitastadā jahau prāṇamudāradarśanaḥ || 77 ||

ityārṣe śrīmadrāmāyaṇe vālmīkīya ādikāvye ayodhyākāṇḍe catuḥṣaṣṭitamassargaḥ ||