📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
2.56 𑌅𑌯𑍋𑌧𑍍𑌯𑌾𑌕𑌾𑌣𑍍𑌡 - 𑌷𑌟𑍍𑌪𑌞𑍍𑌚𑌾𑌶 𑌸𑌰𑍍𑌗𑌃
2.56 Ayodhyakanda - Shatpanchasha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑌮𑍍 ।
𑌅𑌥 𑌷𑌟𑍍𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ।
𑌅𑌥 𑌰𑌾𑌤𑍍𑌰𑍍𑌯𑌾𑌂 𑌵𑍍𑌯𑌤𑍀𑌤𑌾𑌯𑌾𑌮𑌵𑌸𑍁𑌪𑍍𑌤𑌮𑌨𑌨𑍍𑌤𑌰𑌮𑍍 ।
𑌪𑍍𑌰𑌬𑍋𑌧𑌯𑌾𑌮𑌾𑌸 𑌶𑌨𑍈𑌰𑍍𑌲𑌕𑍍𑌷𑍍𑌮𑌣𑌂 𑌰𑌘𑍁𑌨𑌨𑍍𑌦𑌨𑌃 ॥ 1 ॥
𑌸𑍗𑌮𑌿𑌤𑍍𑌰𑍇 𑌶𑍍𑌰𑍁𑌣𑍁 𑌵𑌨𑍍𑌯𑌾𑌨𑌾𑌂 𑌵𑌲𑍍𑌗𑍁 𑌵𑍍𑌯𑌾𑌹𑌰𑌤𑌾𑌂 𑌸𑍍𑌵𑌨𑌮𑍍 ।
𑌸𑌮𑍍𑌪𑍍𑌰𑌤𑌿𑌷𑍍𑌠𑌾𑌮𑌹𑍇 𑌕𑌾𑌲 𑌪𑍍𑌰𑌸𑍍𑌥𑌾𑌨𑌸𑍍𑌯 𑌪𑌰𑌨𑍍𑌤𑌪 ॥ 2 ॥
𑌸 𑌸𑍁𑌪𑍍𑌤𑌸𑍍𑌸𑌮𑌯𑍇 𑌭𑍍𑌰𑌾𑌤𑍍𑌰𑌾 𑌲𑌕𑍍𑌷𑍍𑌮𑌣𑌃 𑌪𑍍𑌰𑌤𑌿𑌬𑍋𑌧𑌿𑌤𑌃 ।
𑌜𑌹𑍗 𑌨𑌿𑌦𑍍𑌰𑌾𑌂 𑌚 𑌤𑌨𑍍𑌦𑍍𑌰𑍀𑌂 𑌚 𑌪𑍍𑌰𑌸𑌕𑍍𑌤𑌂 𑌚 𑌪𑌥𑌿 𑌶𑍍𑌰𑌮𑌮𑍍 ॥ 3 ॥
𑌤𑌤 𑌉𑌤𑍍𑌥𑌾𑌯 𑌤𑍇 𑌸𑌰𑍍𑌵𑍇 𑌸𑍍𑌪𑍃𑌷𑍍𑌟𑍍𑌵𑌾 𑌨𑌦𑍍𑌯𑌾 𑌶𑍍𑌶𑌿𑌵𑌂 𑌜𑌲𑌮𑍍 ।
𑌪𑌨𑍍𑌥𑌾𑌨𑌮𑍃𑌷𑌿𑌣𑌾𑌽𑌦𑌿𑌷𑍍𑌟𑌂 𑌚𑌿𑌤𑍍𑌰𑌕𑍂𑌟𑌸𑍍𑌯 𑌤𑌂 𑌯𑌯𑍁𑌃 ॥ 4 ॥
𑌤𑌤𑌸𑍍𑌸𑌮𑍍𑌪𑍍𑌰𑌸𑍍𑌥𑌿𑌤𑌃 𑌕𑌾𑌲𑍇 𑌰𑌾𑌮𑌸𑍍𑌸𑍗𑌮𑌿𑌤𑍍𑌰𑌿𑌣𑌾 𑌸𑌹 ।
𑌸𑍀𑌤𑌾𑌂 𑌕𑌮𑌲𑌪𑌤𑍍𑌰𑌾𑌕𑍍𑌷𑍀𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 5 ॥
𑌆𑌦𑌿𑌪𑍍𑌤𑌾𑌨𑌿𑌵 𑌵𑍈𑌦𑍇𑌹𑌿 𑌸𑌰𑍍𑌵𑌤𑌃 𑌪𑍁𑌷𑍍𑌪𑌿𑌤𑌾𑌨𑍍𑌨𑌗𑌾𑌨𑍍 ।
𑌸𑍍𑌵𑍈𑌃 𑌪𑍁𑌷𑍍𑌪𑍈𑌃 𑌕𑌿𑌂𑌶𑍁𑌕𑌾𑌨𑍍 𑌪𑌶𑍍𑌯 𑌮𑌾𑌲𑌿𑌨𑌶𑌿𑌶𑌿𑌰𑌾𑌤𑍍𑌯𑌯𑍇 ॥ 6 ॥
𑌪𑌶𑍍𑌯 𑌭𑌲𑍍𑌲𑌾𑌤𑌕𑌾𑌨𑍍 𑌫𑍁𑌲𑍍𑌲𑌾𑌨𑍍𑌨𑌰𑍈 𑌰𑌨𑍁𑌪𑌸𑍇𑌵𑌿𑌤𑌾𑌨𑍍 ।
𑌫𑌲𑌪𑌤𑍍𑌰𑍈𑌰𑌵𑌨𑌤𑌾 𑌨𑍍𑌨𑍂𑌨𑌂 𑌶𑌕𑍍𑌷𑍍𑌯𑌾𑌮 𑌜𑍀𑌵𑌿𑌤𑍁𑌮𑍍 ॥ 7 ॥
𑌪𑌶𑍍𑌯 𑌦𑍍𑌰𑍋𑌣𑌪𑍍𑌰𑌮𑌾𑌣𑌾𑌨𑌿 𑌲𑌮𑍍𑌬𑌮𑌾𑌨𑌾𑌨𑌿 𑌲𑌕𑍍𑌷𑍍𑌮𑌣 ।
𑌮𑌧𑍂𑌨𑌿 𑌮𑌧𑍁𑌕𑌾𑌰𑍀𑌭𑌿 𑌸𑍍𑌸𑌮𑍍𑌭𑍃𑌤𑌾𑌨𑌿 𑌨𑌗𑍇 𑌨𑌗𑍇 ॥ 8 ॥
𑌏𑌷 𑌕𑍍𑌰𑍋𑌶𑌤𑌿 𑌨𑌤𑍍𑌯𑍂𑌹𑌸𑍍𑌤𑌂 𑌶𑌿𑌖𑍀 𑌪𑍍𑌰𑌤𑌿𑌕𑍂𑌜𑌤𑌿 ।
𑌰𑌮𑌣𑍀𑌯𑍇 𑌵𑌨𑍋𑌦𑍍𑌦𑍇𑌶𑍇 𑌪𑍁𑌷𑍍𑌪𑌸𑌂𑌸𑍍𑌤𑌰𑌸𑌙𑍍𑌕𑌟𑍇 ॥ 9 ॥
𑌮𑌾𑌤𑌙𑍍𑌗𑌯𑍂𑌥𑌾𑌨𑍁𑌸𑍃𑌤𑌂 𑌪𑌕𑍍𑌷𑌿𑌸𑌂𑌙𑍍𑌘𑌾𑌨𑍁𑌨𑌾𑌦𑌿𑌤𑌮𑍍 ।
𑌚𑌿𑌤𑍍𑌰𑌕𑍂𑌟𑌮𑌿𑌮𑌂 𑌪𑌶𑍍𑌯 𑌪𑍍𑌰𑌵𑍃𑌦𑍍𑌧𑌶𑌿𑌖𑌰𑌂 𑌗𑌿𑌰𑌿𑌮𑍍 ॥ 10 ॥
𑌸𑌮𑌭𑍂𑌮𑌿𑌤𑌲𑍇 𑌰𑌮𑍍𑌯𑍇 𑌦𑍍𑌰𑍁𑌮𑍈𑌰𑍍𑌬𑌹𑍁𑌭𑌿𑌰𑌾𑌵𑍃𑌤𑍇 ।
𑌪𑍁𑌣𑍍𑌯𑍇 𑌰𑌂𑌸𑍍𑌯𑌾𑌮𑌹𑍇 𑌤𑌾𑌤 𑌚𑌿𑌤𑍍𑌰𑌕𑍂𑌟𑌸𑍍𑌯 𑌕𑌾𑌨𑌨𑍇 ॥ 11 ॥
𑌤𑌤𑌸𑍍𑌤𑍗 𑌪𑌾𑌦𑌚𑌾𑌰𑍇𑌣 𑌗𑌚𑍍𑌛𑌨𑍍𑌤𑍗 𑌸𑌹 𑌸𑍀𑌤𑌯𑌾 ।
𑌰𑌮𑍍𑌯𑌮𑌾𑌸𑍇𑌦𑌤𑍁𑌶𑍍𑌶𑍈𑌲𑌂 𑌚𑌿𑌤𑍍𑌰𑌕𑍂𑌟𑌂 𑌮𑌨𑍋𑌰𑌮𑌮𑍍 ॥ 12 ॥
𑌤𑌨𑍍𑌤𑍁 𑌪𑌰𑍍𑌵𑌤𑌮𑌾𑌸𑌾𑌦𑍍𑌯 𑌨𑌾𑌨𑌾𑌪𑌕𑍍𑌷𑌿𑌗𑌣𑌾𑌯𑍁𑌤𑌮𑍍 ।
𑌬𑌹𑍁𑌮𑍂𑌲𑌫𑌲𑌂 𑌰𑌮𑍍𑌯𑌂 𑌸𑌮𑍍𑌪𑌨𑍍𑌨𑌂 𑌸𑌰𑌸𑍋𑌦𑌕𑌮𑍍 ॥ 13 ॥
𑌮𑌨𑍋𑌜𑍍𑌞𑍋𑌽𑌯𑌂 𑌗𑌿𑌰𑌿𑌸𑍍𑌸𑍗𑌮𑍍𑌯 𑌨𑌾𑌨𑌾𑌦𑍍𑌰𑍁𑌮𑌲𑌤𑌾𑌯𑍁𑌤𑌃 ।
𑌬𑌹𑍁𑌮𑍂𑌲𑌫𑌲𑍋 𑌰𑌮𑍍𑌯 𑌸𑍍𑌸𑍍𑌵𑌾𑌜𑍀𑌵𑌃 𑌪𑍍𑌰𑌤𑌿𑌭𑌾𑌤𑌿 𑌮𑍇 ॥ 14 ॥
𑌮𑍁𑌨𑌯𑌶𑍍𑌚 𑌮𑌹𑌾𑌤𑍍𑌮𑌾𑌨𑍋 𑌵𑌸𑌨𑍍𑌤𑍍𑌯𑌸𑍍𑌮𑌿 𑌶𑌿𑌲𑍋𑌚𑍍𑌚𑌯𑍇 ।
𑌅𑌯𑌂 𑌵𑌾𑌸𑍋 𑌭𑌵𑍇𑌤𑍍𑌤𑌾𑌵𑌦𑌤𑍍𑌰 𑌸𑍗𑌮𑍍𑌯 𑌰𑌮𑍇𑌮𑌹𑌿 ॥ 15 ॥
𑌇𑌤𑌿 𑌸𑍀𑌤𑌾 𑌚 𑌰𑌾𑌮𑌶𑍍𑌚 𑌲𑌕𑍍𑌷𑍍𑌮𑌣𑌶𑍍𑌚 𑌕𑍃𑌤𑌾𑌞𑍍𑌜𑌲𑌿𑌃 ।
𑌅𑌭𑌿𑌗𑌮𑍍𑌯𑌾𑌽𑌶𑍍𑌰𑌮𑌂 𑌸𑌰𑍍𑌵𑍇 𑌵𑌾𑌲𑍍𑌮𑍀𑌕𑌿 𑌮𑌭𑌿𑌵𑌾𑌦𑌯𑌨𑍍 ॥ 16 ॥
𑌤𑌾𑌨𑍍𑌮𑌹𑌰𑍍𑌷𑌿 𑌪𑍍𑌰𑌮𑍁𑌦𑌿𑌤𑌃 𑌪𑍂𑌜𑌯𑌾𑌮𑌾𑌸 𑌧𑌰𑍍𑌮𑌵𑌿𑌤𑍍 ।
𑌅𑌸𑍍𑌯𑌤𑌾𑌮𑌿𑌤𑌿 𑌚𑍋𑌵𑌾𑌚 𑌸𑍍𑌵𑌾𑌗𑌨𑍍𑌤𑍁 𑌨𑌿𑌵𑍇𑌦𑍍𑌯 𑌚 ॥ 17 ॥
𑌤𑌤𑍋𑌽𑌬𑍍𑌰𑌵𑍀𑌨𑍍𑌮𑌹𑌾𑌬𑌾𑌹𑍁𑌰𑍍𑌲𑌕𑍍𑌷𑍍𑌮𑌣𑌂 𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑌃 ।
𑌸𑌨𑍍𑌨𑌿𑌵𑍇𑌦𑍍𑌯 𑌯𑌥𑌾𑌨𑍍𑌯𑌾𑌯 𑌮𑌾𑌤𑍍𑌮𑌾𑌨𑌮𑍃𑌷𑌯𑍇 𑌪𑍍𑌰𑌭𑍁𑌃 ॥ 18 ॥
𑌲𑌕𑍍𑌷𑍍𑌮𑌣𑌾𑌽𑌽𑌨𑌯 𑌦𑌾𑌰𑍂𑌣𑌿 𑌦𑍃𑌢𑌾𑌨𑌿 𑌚 𑌵𑌰𑌾𑌣𑌿 𑌚 ।
𑌕𑍁𑌰𑍁𑌷𑍍𑌵𑌾𑌽𑌵𑌸𑌥𑌂 𑌸𑍗𑌮𑍍𑌯 𑌵𑌾𑌸𑍇 𑌮𑍇𑌽𑌭𑌿𑌰𑌤𑌂 𑌮𑌨𑌃 ॥ 19 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑍗𑌮𑌿𑌤𑍍𑌰𑌿𑌰𑍍𑌵𑌿𑌵𑌿𑌧𑌾𑌨𑍍 𑌦𑍍𑌰𑍁𑌮𑌾𑌨𑍍 ।
𑌆𑌜𑌹𑌾𑌰 𑌤𑌤 𑌶𑍍𑌚𑌕𑍍𑌰𑍇 𑌪𑌰𑍍𑌣𑌶𑌾𑌲𑌾𑌮𑌰𑌿𑌨𑍍𑌦𑌮𑌃 ॥ 20 ॥
𑌤𑌾𑌂 𑌨𑌿𑌷𑍍𑌠𑌿𑌤𑌾𑌂 𑌬𑌦𑍍𑌧𑌕𑌟𑌾𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌸𑍍𑌸𑍁𑌦𑌰𑍍𑌶𑌨𑌾𑌮𑍍 ।
𑌶𑍁𑌶𑍍𑌰𑍂𑌷𑌮𑌾𑌣𑌮𑍇𑌕𑌾𑌗𑍍𑌰𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 21 ॥
𑌐𑌣𑍇𑌯𑌂 𑌮𑌾𑌂𑌸𑌮𑌾𑌹𑍃𑌤𑍍𑌯 𑌶𑌾𑌲𑌾𑌂 𑌯𑌕𑍍𑌷𑍍𑌯𑌾𑌮𑌹𑍇 𑌵𑌯𑌮𑍍 ।
𑌕𑌰𑍍𑌤𑌵𑍍𑌯𑌂 𑌵𑌾𑌸𑍍𑌤𑍁𑌶𑌮𑌨𑌂 𑌸𑍗𑌮𑌿𑌤𑍍𑌰𑍇 𑌚𑌿𑌰𑌜𑍀𑌵𑌿𑌭𑌿𑌃 ॥ 22 ॥
𑌮𑍃𑌗𑌂 𑌹𑌤𑍍𑌵𑌾𑌽𑌽𑌨𑌯 𑌕𑍍𑌷𑌿𑌪𑍍𑌰𑌂 𑌲𑌕𑍍𑌷𑍍𑌮𑌣𑍇𑌹 𑌶𑍁𑌭𑍇𑌕𑍍𑌷𑌣 ।
𑌕𑌰𑍍𑌤𑌵𑍍𑌯 𑌶𑍍𑌶𑌾𑌸𑍍𑌤𑍍𑌰𑌦𑍃𑌷𑍍𑌟𑍋 𑌹𑌿 𑌵𑌿𑌧𑌿𑌰𑍍𑌧𑌰𑍍𑌮𑌮𑌨𑍁𑌸𑍍𑌮𑌰 ॥ 23 ॥
𑌭𑍍𑌰𑌾𑌤𑍁𑌰𑍍𑌵𑌚𑌨𑌮𑌾𑌜𑍍𑌞𑌾𑌯 𑌲𑌕𑍍𑌷𑍍𑌮𑌣𑌃 𑌪𑌰𑌵𑍀𑌰𑌹𑌾 ।
𑌚𑌕𑌾𑌰 𑌸 𑌯𑌥𑍋𑌕𑍍𑌤𑌂 𑌚 𑌤𑌂 𑌰𑌾𑌮 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ 24 ॥
𑌐𑌣𑍇𑌯𑌂 𑌶𑍍𑌰𑌪𑌯𑌸𑍍𑌵𑍈𑌤𑌚𑍍𑌛𑌾𑌲𑌾𑌂 𑌯𑌕𑍍𑌷𑍍𑌯𑌾𑌮𑌹𑍇 𑌵𑌯𑌮𑍍 ।
𑌤𑍍𑌵𑌰 𑌸𑍗𑌮𑍍𑌯 𑌮𑍁𑌹𑍂𑌰𑍍𑌤𑍋𑌽𑌯𑌂 𑌧𑍍𑌰𑍁𑌵𑌶𑍍𑌚 𑌦𑌿𑌵𑌸𑍋𑌽𑌪𑍍𑌯𑌯𑌮𑍍 ॥ 25 ॥
𑌸 𑌲𑌕𑍍𑌷𑍍𑌮𑌣𑌃 𑌕𑍃𑌷𑍍𑌣𑌮𑍃𑌗𑌂 𑌮𑍇𑌧𑍍𑌯𑌂 𑌹𑌤𑍍𑌵𑌾 𑌪𑍍𑌰𑌤𑌾𑌪𑌵𑌾𑌨𑍍 ।
𑌅𑌥 𑌚𑌿𑌕𑍍𑌷𑍇𑌪 𑌸𑍗𑌮𑌿𑌤𑍍𑌰𑌿𑌸𑍍𑌸𑌮𑌿𑌦𑍍𑌧𑍇 𑌜𑌾𑌤𑌵𑍇𑌦𑌸𑌿 ॥ 26 ॥
𑌤𑌨𑍍𑌤𑍁 𑌪𑌕𑍍𑌵𑌂 𑌪𑌰𑌿𑌜𑍍𑌞𑌾𑌯 𑌨𑌿𑌷𑍍𑌟𑌪𑍍𑌤𑌂 𑌛𑌿𑌨𑍍𑌨𑌶𑍋𑌣𑌿𑌤𑌮𑍍 ।
𑌲𑌕𑍍𑌷𑍍𑌮𑌣𑌃 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌮𑌥 𑌰𑌾𑌘𑌵𑌮𑌬𑍍𑌰𑌵𑍀𑌤𑍍 ॥ 27 ॥
𑌅𑌯𑌂 𑌸𑌰𑍍𑌵𑌃 𑌸𑌮𑌸𑍍𑌤𑌾𑌗𑍍𑌙𑌃 𑌶𑍍𑌰𑍃𑌤𑌃 𑌕𑍃𑌷𑍍𑌣𑌮𑍃𑌗𑍋 𑌮𑌯𑌾 ।
𑌦𑍇𑌵𑌤𑌾𑌂 𑌦𑍇𑌵𑌸𑌙𑍍𑌕𑌾𑌶 𑌯𑌜𑌸𑍍𑌵 𑌕𑍁𑌶𑌲𑍋 𑌹𑍍𑌯𑌸𑌿 ॥ 28 ॥
𑌰𑌾𑌮𑌃 𑌸𑍍𑌨𑌾𑌤𑍍𑌵𑌾 𑌤𑍁 𑌨𑌿𑌯𑌤𑍋 𑌗𑍁𑌣𑌵𑌾𑌨𑍍 𑌜𑌪𑍍𑌯𑌕𑍋𑌵𑌿𑌦𑌃 ।
𑌸𑌙𑍍𑌗𑍍𑌰𑌹𑍇𑌣𑌾𑌕𑌰𑍋𑌤𑍍 𑌸𑍍𑌰𑌵𑌾𑌰𑍍𑌨 𑌮𑌨𑍍𑌤𑍍𑌰𑌾𑌨𑍍 𑌸𑌤𑍍𑌰𑌾𑌵𑌸𑌾𑌨𑌿𑌕𑌾𑌨𑍍 ॥ 29 ॥
𑌇𑌷𑍍𑌟𑍍𑌵𑌾 𑌦𑍇𑌵𑌗𑌣𑌾𑌨𑍍𑌸𑌰𑍍𑌵𑌾𑌨𑍍𑌵𑌿𑌵𑍇𑌶𑌾𑌽𑌵𑌸𑌥𑌂 𑌶𑍁𑌚𑌿𑌃 ।
𑌬𑌭𑍂𑌵 𑌚 𑌮𑌨𑍋𑌹𑍍𑌲𑌾𑌦𑍋 𑌰𑌾𑌮𑌸𑍍𑌯𑌾𑌮𑌿𑌤𑌤𑍇𑌜𑌸𑌃 ॥ 30 ॥
𑌵𑍈𑌶𑍍𑌵𑌦𑍇𑌵𑌬𑌲𑌿𑌂 𑌕𑍃𑌤𑍍𑌵𑌾 𑌰𑍗𑌦𑍍𑌰𑌂 𑌵𑍈𑌷𑍍𑌣𑌵 𑌮𑍇𑌵 𑌚 ।
𑌵𑌾𑌸𑍍𑌤𑍁𑌸𑌂𑌶𑌮𑌨𑍀𑌯𑌾𑌨𑌿 𑌮𑌙𑍍𑌗𑌲𑌾𑌨𑌿 𑌪𑍍𑌰𑌵𑌰𑍍𑌤𑌯𑌨𑍍 ॥ 31 ॥
𑌜𑌪𑌂 𑌚 𑌨𑍍𑌯𑌾𑌯𑌤 𑌕𑍃𑌤𑍍𑌵𑌾 𑌸𑍍𑌨𑌾𑌤𑍍𑌵𑌾 𑌨𑌦𑍍𑌯𑌾𑌂 𑌯𑌥𑌾𑌵𑌿𑌧𑌿 ।
𑌪𑌾𑌪𑌸𑌂𑌶𑌮𑌨𑌂 𑌰𑌾𑌮 𑌶𑍍𑌚𑌕𑌾𑌰 𑌬𑌲𑌿𑌮𑍁𑌤𑍍𑌤𑌮𑌮𑍍 ॥ 32 ॥
𑌵𑍇𑌦𑌿𑌸𑍍𑌥𑌲𑌵𑌿𑌧𑌾𑌨𑌾𑌨𑌿 𑌚𑍈𑌤𑍍𑌯𑌾𑌨𑍍𑌯𑌾𑌯𑌤𑌨𑌾𑌨𑌿 𑌚 ।
𑌆𑌶𑍍𑌰𑌮𑌸𑍍𑌯𑌾𑌨𑍁𑌰𑍂𑌪𑌾𑌣𑌿 𑌸𑍍𑌥𑌾𑌪𑌯𑌾𑌮𑌾𑌸 𑌰𑌾𑌘𑌵𑌃 ॥ 33 ॥
𑌵𑌨𑍍𑌯𑍈𑌰𑍍𑌮𑌾𑌲𑍍𑌯𑍈𑌃 𑌫𑌲𑍈𑌰𑍍𑌮𑍂𑌲𑍈𑌃 𑌪𑌕𑍍𑌵𑍈𑌰𑍍𑌮𑌾𑌂𑌸𑍈𑌰𑍍𑌯𑌥𑌾𑌵𑌿𑌧𑌿 ।
𑌅𑌦𑍍𑌭𑌿𑌰𑍍𑌜𑌪𑍈𑌶𑍍𑌚 𑌵𑍇𑌦𑍋𑌕𑍍𑌤𑍈𑌰𑍍𑌦𑌰𑍍𑌭𑍈𑌶𑍍𑌚 𑌸𑌸𑌮𑌿𑌤𑍍𑌕𑍁𑌶𑍈𑌃 ॥ 34 ॥
𑌤𑍗 𑌤𑌰𑍍𑌪𑌯𑌿𑌤𑍍𑌵𑌾 𑌭𑍂𑌤𑌾𑌨𑌿 𑌰𑌾𑌘𑌵𑍗 𑌸𑌹 𑌸𑍀𑌤𑌯𑌾 ।
𑌤𑌦𑌾 𑌵𑌿𑌵𑌿𑌶𑌤𑍁 𑌶𑍍𑌶𑌾𑌲𑌾𑌂 𑌸𑍁𑌶𑍁𑌭𑌾𑌂 𑌶𑍁𑌭𑌲𑌕𑍍𑌷𑌣𑍗 ॥ 35 ॥
𑌤𑌾𑌂 𑌵𑍃𑌕𑍍𑌷𑌪𑌰𑍍𑌣𑌚𑍍𑌛𑌦𑌨𑌾𑌂 𑌮𑌨𑍋𑌜𑍍𑌞𑌾𑌂 𑌯𑌥𑌾𑌪𑍍𑌰𑌦𑍇𑌶𑌂 𑌸𑍁𑌕𑍃𑌤𑌾𑌂 𑌨𑌿𑌵𑌾𑌤𑌾𑌮𑍍 ।
𑌵𑌾𑌸𑌾𑌯 𑌸𑌰𑍍𑌵𑍇 𑌵𑌿𑌵𑌿𑌶𑍁𑌸𑍍𑌸𑌮𑍇𑌤𑌾𑌸𑍍𑌸𑌭𑌾𑌂 𑌯𑌥𑌾 𑌦𑍇𑌵𑌗𑌣𑌾𑌸𑍍𑌸𑍁𑌧𑌰𑍍𑌮𑌾𑌮𑍍 ॥ 36 ॥
𑌅𑌨𑍇𑌕𑌨𑌾𑌨𑌾𑌮𑍃𑌗𑌪𑌕𑍍𑌷𑌿𑌸𑌙𑍍𑌕𑍁𑌲𑍇 𑌵𑌿𑌚𑌿𑌤𑍍𑌰𑌪𑌤𑍍𑌰𑌸𑍍𑌤𑌬𑌕𑍈𑌰𑍍𑌦𑍍𑌰𑍁𑌮𑍈𑌰𑍍𑌯𑍁𑌤𑍇 ।
𑌵𑌨𑍋𑌤𑍍𑌤𑌮𑍇 𑌵𑍍𑌯𑌾𑌲𑌮𑍃𑌗𑌾𑌨𑍁𑌨𑌾𑌦𑌿𑌤𑍇 𑌤𑌦𑌾 𑌵𑌿𑌜𑌹𑍍𑌰𑍁 𑌸𑍍𑌸𑍁𑌸𑍁𑌖𑌂 𑌜𑌿𑌤𑍇𑌨𑍍𑌦𑍍𑌰𑌿𑌯𑌾𑌃 ॥ 37 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑍇 𑌷𑌟𑍍𑌪𑌞𑍍𑌚𑌾𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe ayodhyākāṇḍam |
atha ṣaṭpañcāśassargaḥ |
atha rātryāṃ vyatītāyāmavasuptamanantaram |
prabodhayāmāsa śanairlakṣmaṇaṃ raghunandanaḥ || 1 ||
saumitre śruṇu vanyānāṃ valgu vyāharatāṃ svanam |
sampratiṣṭhāmahe kāla prasthānasya parantapa || 2 ||
sa suptassamaye bhrātrā lakṣmaṇaḥ pratibodhitaḥ |
jahau nidrāṃ ca tandrīṃ ca prasaktaṃ ca pathi śramam || 3 ||
tata utthāya te sarve spṛṣṭvā nadyā śśivaṃ jalam |
panthānamṛṣiṇā'diṣṭaṃ citrakūṭasya taṃ yayuḥ || 4 ||
tatassamprasthitaḥ kāle rāmassaumitriṇā saha |
sītāṃ kamalapatrākṣīmidaṃ vacanamabravīt || 5 ||
ādiptāniva vaidehi sarvataḥ puṣpitānnagān |
svaiḥ puṣpaiḥ kiṃśukān paśya mālinaśiśirātyaye || 6 ||
paśya bhallātakān phullānnarai ranupasevitān |
phalapatrairavanatā nnūnaṃ śakṣyāma jīvitum || 7 ||
paśya droṇapramāṇāni lambamānāni lakṣmaṇa |
madhūni madhukārībhi ssambhṛtāni nage nage || 8 ||
eṣa krośati natyūhastaṃ śikhī pratikūjati |
ramaṇīye vanoddeśe puṣpasaṃstarasaṅkaṭe || 9 ||
mātaṅgayūthānusṛtaṃ pakṣisaṃṅghānunāditam |
citrakūṭamimaṃ paśya pravṛddhaśikharaṃ girim || 10 ||
samabhūmitale ramye drumairbahubhirāvṛte |
puṇye raṃsyāmahe tāta citrakūṭasya kānane || 11 ||
tatastau pādacāreṇa gacchantau saha sītayā |
ramyamāsedatuśśailaṃ citrakūṭaṃ manoramam || 12 ||
tantu parvatamāsādya nānāpakṣigaṇāyutam |
bahumūlaphalaṃ ramyaṃ sampannaṃ sarasodakam || 13 ||
manojño'yaṃ girissaumya nānādrumalatāyutaḥ |
bahumūlaphalo ramya ssvājīvaḥ pratibhāti me || 14 ||
munayaśca mahātmāno vasantyasmi śiloccaye |
ayaṃ vāso bhavettāvadatra saumya ramemahi || 15 ||
iti sītā ca rāmaśca lakṣmaṇaśca kṛtāñjaliḥ |
abhigamyā'śramaṃ sarve vālmīki mabhivādayan || 16 ||
tānmaharṣi pramuditaḥ pūjayāmāsa dharmavit |
asyatāmiti covāca svāgantu nivedya ca || 17 ||
tato'bravīnmahābāhurlakṣmaṇaṃ lakṣmaṇāgrajaḥ |
sannivedya yathānyāya mātmānamṛṣaye prabhuḥ || 18 ||
lakṣmaṇā''naya dārūṇi dṛḍhāni ca varāṇi ca |
kuruṣvā'vasathaṃ saumya vāse me'bhirataṃ manaḥ || 19 ||
tasya tadvacanaṃ śrutvā saumitrirvividhān drumān |
ājahāra tata ścakre parṇaśālāmarindamaḥ || 20 ||
tāṃ niṣṭhitāṃ baddhakaṭāṃ dṛṣṭvā rāmassudarśanām |
śuśrūṣamāṇamekāgramidaṃ vacanamabravīt || 21 ||
aiṇeyaṃ māṃsamāhṛtya śālāṃ yakṣyāmahe vayam |
kartavyaṃ vāstuśamanaṃ saumitre cirajīvibhiḥ || 22 ||
mṛgaṃ hatvā''naya kṣipraṃ lakṣmaṇeha śubhekṣaṇa |
kartavya śśāstradṛṣṭo hi vidhirdharmamanusmara || 23 ||
bhrāturvacanamājñāya lakṣmaṇaḥ paravīrahā |
cakāra sa yathoktaṃ ca taṃ rāma punarabravīt || 24 ||
aiṇeyaṃ śrapayasvaitacchālāṃ yakṣyāmahe vayam |
tvara saumya muhūrto'yaṃ dhruvaśca divaso'pyayam || 25 ||
sa lakṣmaṇaḥ kṛṣṇamṛgaṃ medhyaṃ hatvā pratāpavān |
atha cikṣepa saumitrissamiddhe jātavedasi || 26 ||
tantu pakvaṃ parijñāya niṣṭaptaṃ chinnaśoṇitam |
lakṣmaṇaḥ puruṣavyāghramatha rāghavamabravīt || 27 ||
ayaṃ sarvaḥ samastāgṅaḥ śrṛtaḥ kṛṣṇamṛgo mayā |
devatāṃ devasaṅkāśa yajasva kuśalo hyasi || 28 ||
rāmaḥ snātvā tu niyato guṇavān japyakovidaḥ |
saṅgraheṇākarot sravārna mantrān satrāvasānikān || 29 ||
iṣṭvā devagaṇānsarvānviveśā'vasathaṃ śuciḥ |
babhūva ca manohlādo rāmasyāmitatejasaḥ || 30 ||
vaiśvadevabaliṃ kṛtvā raudraṃ vaiṣṇava meva ca |
vāstusaṃśamanīyāni maṅgalāni pravartayan || 31 ||
japaṃ ca nyāyata kṛtvā snātvā nadyāṃ yathāvidhi |
pāpasaṃśamanaṃ rāma ścakāra balimuttamam || 32 ||
vedisthalavidhānāni caityānyāyatanāni ca |
āśramasyānurūpāṇi sthāpayāmāsa rāghavaḥ || 33 ||
vanyairmālyaiḥ phalairmūlaiḥ pakvairmāṃsairyathāvidhi |
adbhirjapaiśca vedoktairdarbhaiśca sasamitkuśaiḥ || 34 ||
tau tarpayitvā bhūtāni rāghavau saha sītayā |
tadā viviśatu śśālāṃ suśubhāṃ śubhalakṣaṇau || 35 ||
tāṃ vṛkṣaparṇacchadanāṃ manojñāṃ yathāpradeśaṃ sukṛtāṃ nivātām |
vāsāya sarve viviśussametāssabhāṃ yathā devagaṇāssudharmām || 36 ||
anekanānāmṛgapakṣisaṅkule vicitrapatrastabakairdrumairyute |
vanottame vyālamṛgānunādite tadā vijahru ssusukhaṃ jitendriyāḥ || 37 ||
ityārṣe śrīmadrāmāyaṇe vālmīkīya ādikāvye ayodhyākāṇḍe ṣaṭpañcāśassargaḥ ||
InfoLyter.in — Sacred Vedic Knowledge Portal · Free forever