2.34 Ayodhyakanda - Chatustrimsha Sargah

ॐ

2.34 𑌅𑌯𑍋𑌧𑍍𑌯𑌾𑌕𑌾𑌣𑍍𑌡 - 𑌚𑌤𑍁𑌸𑍍𑌤𑍍𑌰𑌿𑌂𑌶 𑌸𑌰𑍍𑌗𑌃

Valmiki Grantha

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑌮𑍍 ।

𑌅𑌥 𑌚𑌤𑍁𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।

𑌤𑌤𑌃 𑌕𑌮𑌲𑌪𑌤𑍍𑌰𑌾𑌕𑍍𑌷𑌃 𑌶𑍍𑌯𑌾𑌮𑍋 𑌨𑌿𑌰𑍁𑌪𑌮𑍋 𑌮𑌹𑌾𑌨𑍍 ।

𑌉𑌵𑌾𑌚 𑌰𑌾𑌮 𑌸𑍍𑌤𑌂 𑌸𑍂𑌤𑌂 𑌪𑌿𑌤𑍁𑌰𑌾𑌖𑍍𑌯𑌾𑌹𑌿 𑌮𑌾𑌮𑌿𑌤𑌿 ॥ 1 ॥

𑌸 𑌰𑌾𑌮𑌪𑍍𑌰𑍇𑌷𑌿𑌤𑌃 𑌕𑍍𑌷𑌿𑌪𑍍𑌰𑌂 𑌸𑌨𑍍𑌤𑌾𑌪𑌕𑌲𑍁𑌷𑍇𑌨𑍍𑌦𑍍𑌰𑌿𑌯𑌃 ।

𑌪𑍍𑌰𑌵𑌿𑌶𑍍𑌯 𑌨𑍃𑌪𑌤𑌿𑌂 𑌸𑍂𑌤𑍋 𑌨𑌿𑌶𑍍𑌵𑌸𑌨𑍍𑌤𑌂 𑌦𑌦𑌰𑍍𑌶 𑌹 ॥ 2 ॥

𑌉𑌪𑌰𑌕𑍍𑌤𑌮𑌿𑌵𑌾𑌦𑌿𑌤𑍍𑌯𑌂 𑌭𑌸𑍍𑌮𑌚𑍍𑌛𑌨𑍍𑌨𑌮𑌿𑌵𑌾𑌨𑌲𑌮𑍍 ।

𑌤𑌟𑌾𑌕𑌮𑌿𑌵 𑌨𑌿𑌸𑍍𑌤𑍋𑌯𑌮𑌪𑌶𑍍𑌯𑌜𑍍𑌜𑌗𑌤𑍀𑌪𑌤𑌿𑌮𑍍 ॥ 3 ॥

𑌆𑌲𑍋𑌕𑍍𑌯 𑌤𑍁 𑌮𑌹𑌾𑌪𑍍𑌰𑌾𑌜𑍍𑌞𑌃 𑌪𑌰𑌮𑌾𑌕𑍁𑌲𑌚𑍇𑌤𑌸𑌮𑍍 ।

𑌰𑌾𑌮𑌮𑍇𑌵𑌾𑌨𑍁𑌶𑍋𑌚𑌨𑍍𑌤𑌂 𑌸𑍂𑌤𑌃 𑌪𑍍𑌰𑌾𑌞𑍍𑌜𑌲𑌿𑌰𑌾𑌸𑌦𑌤𑍍 ॥ 4 ॥

𑌤𑌂 𑌵𑌰𑍍𑌧𑌯𑌿𑌤𑍍𑌵𑌾 𑌰𑌾𑌜𑌾𑌨𑌂 𑌪𑍂𑌰𑍍𑌵𑌂 𑌸𑍂𑌤𑍋 𑌜𑌯𑌾𑌶𑌿𑌷𑌾 ।

𑌭𑌯𑌵𑌿𑌕𑍍𑌲𑌬𑌯𑌾 𑌵𑌾𑌚𑌾 𑌮𑌨𑍍𑌦𑌯𑌾 𑌶𑍍𑌲𑌕𑍍𑌷𑍍𑌣𑌮𑌬𑍍𑌰𑌵𑍀𑌤𑍍 ॥ 5 ॥

𑌅𑌯𑌂 𑌸 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍋 𑌦𑍍𑌵𑌾𑌰𑌿 𑌤𑌿𑌷𑍍𑌠𑌤𑌿 𑌤𑍇 𑌸𑍁𑌤𑌃 ।

𑌬𑍍𑌰𑌾𑌹𑍍𑌮𑌣𑍇𑌭𑍍𑌯𑍋 𑌧𑌨𑌂 𑌦𑌤𑍍𑌵𑌾 𑌸𑌰𑍍𑌵𑌞𑍍𑌚𑍈𑌵𑍋𑌪𑌜𑍀𑌵𑌿𑌨𑌾𑌮𑍍 ॥ 6 ॥

𑌗𑌮𑌿𑌷𑍍𑌯𑌤𑌿 𑌮𑌹𑌾𑌰𑌣𑍍𑌯𑌂 𑌤𑌂 𑌪𑌶𑍍𑌯 𑌜𑌗𑌤𑍀𑌪𑌤𑍇 ।

𑌵𑍃𑌤𑌂 𑌰𑌾𑌜𑌗𑍁𑌣𑍈 𑌸𑍍𑌸𑌰𑍍𑌵𑍈𑌰𑌾𑌦𑌿𑌤𑍍𑌯𑌮𑌿𑌵 𑌰𑌶𑍍𑌮𑌿𑌭𑌿𑌃 ॥ 7 ॥

𑌸 𑌸𑌤𑍍𑌯𑌵𑌾𑌦𑍀 𑌧𑌰𑍍𑌮𑌾𑌤𑍍𑌮𑌾 𑌗𑌾𑌮𑍍𑌭𑍀𑌰𑍍𑌯𑌾𑌤𑍍𑌸𑌾𑌗𑌰𑍋𑌪𑌮𑌃 ।

𑌆𑌕𑌾𑌶 𑌇𑌵 𑌨𑌿𑌷𑍍𑌪𑌙𑍍𑌕𑍋 𑌨𑌰𑍇𑌨𑍍𑌦𑍍𑌰𑌃 𑌪𑍍𑌰𑌤𑍍𑌯𑍁𑌵𑌾𑌚 𑌤𑌮𑍍 ॥ 8 ॥

𑌸𑍁𑌮𑌨𑍍𑌨𑍍𑌤𑍍𑌰𑌾𑌨𑌯 𑌮𑍇 𑌦𑌾𑌰𑌾𑌨𑍍 𑌯𑍇 𑌕𑍇𑌚𑌿𑌦𑌿𑌹 𑌮𑌾𑌮𑌕𑌾𑌃 ।

𑌦𑌾𑌰𑍈𑌃 𑌪𑌰𑌿𑌵𑍃𑌤𑌸𑍍𑌸𑌰𑍍𑌵𑍈𑌰𑍍𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌮𑌿 𑌧𑌾𑌰𑍍𑌮𑌿𑌕𑌮𑍍 ॥ 9 ॥

𑌸𑍋𑌽𑌨𑍍𑌤𑌃𑌪𑍁𑌰𑌮𑌤𑍀𑌤𑍍𑌯𑍈𑌵 𑌸𑍍𑌤𑍍𑌰𑌿𑌯𑌸𑍍𑌤𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।

𑌆𑌰𑍍𑌯𑌾𑌹𑍍𑌵𑌯𑌤𑌿 𑌵𑍋 𑌰𑌾𑌜𑌾 𑌗𑌮𑍍𑌯𑌤𑌾𑌂 𑌤𑌤𑍍𑌰 𑌮𑌾 𑌚𑌿𑌰𑌮𑍍 ॥ 10 ॥

𑌏𑌵𑌮𑍁𑌕𑍍𑌤𑌾𑌃 𑌸𑍍𑌤𑍍𑌰𑌿𑌯 𑌸𑍍𑌸𑌰𑍍𑌵𑌾𑌃 𑌸𑍁𑌮𑌨𑍍𑌤𑍍𑌰𑍇𑌣 𑌨𑍃𑌪𑌾𑌜𑍍𑌞𑌯𑌾 ।

𑌪𑍍𑌰𑌚𑌕𑍍𑌰𑌮𑍁 𑌸𑍍𑌤𑌦𑍍𑌭𑌵𑌨𑌂 𑌭𑌰𑍍𑌤𑍁𑌰𑌾𑌜𑍍𑌞𑌾𑌯 𑌶𑌾𑌸𑌨𑌮𑍍 ॥ 11 ॥

𑌅𑌰𑍍𑌧𑌸𑌪𑍍𑌤𑌶𑌤𑌾𑌸𑍍𑌤𑌾𑌸𑍍𑌤𑍁 𑌪𑍍𑌰𑌮𑌦𑌾𑌸𑍍𑌤𑌾𑌮𑍍𑌰𑌲𑍋𑌚𑌨𑌾𑌃 ।

𑌕𑍗𑌸𑌲𑍍𑌯𑌾𑌂 𑌪𑌰𑌿𑌵𑌾𑌰𑍍𑌯𑌾𑌥 𑌶𑌨𑍈𑌰𑍍𑌜𑌗𑍍𑌮𑍁𑌰𑍍𑌧𑍃𑌤𑌵𑍍𑌰𑌤𑌾𑌃 ॥ 12 ॥

𑌆𑌗𑌤𑍇𑌷𑍁 𑌚 𑌦𑌾𑌰𑍇𑌷𑍁 𑌸𑌮𑌵𑍇𑌕𑍍𑌷𑍍𑌯 𑌮𑌹𑍀𑌪𑌤𑌿𑌃 ।

𑌉𑌵𑌾𑌚 𑌰𑌾𑌜𑌾 𑌤𑌂 𑌸𑍂𑌤𑌂 𑌸𑍁𑌮𑌨𑍍𑌤𑍍𑌰𑌾𑌽𑌨𑌯 𑌮𑍇 𑌸𑍁𑌤𑌮𑍍 ॥ 13 ॥

𑌸 𑌸𑍂𑌤𑍋 𑌰𑌾𑌮𑌮𑌾𑌦𑌾𑌯 𑌲𑌕𑍍𑌷𑍍𑌮𑌣𑌂 𑌮𑍈𑌥𑌿𑌲𑍀𑌂 𑌤𑌦𑌾 ।

𑌜𑌗𑌾𑌮𑌾𑌭𑌿𑌮𑍁𑌖𑌸𑍍𑌤𑍂𑌰𑍍𑌣𑌂 𑌸𑌕𑌾𑌶𑌂 𑌜𑌗𑌤𑍀𑌪𑌤𑍇𑌃 ॥ 14 ॥

𑌸 𑌰𑌾𑌜𑌾 𑌪𑍁𑌤𑍍𑌰𑌮𑌾𑌯𑌾𑌨𑍍𑌤𑌂 𑌦𑍃𑌷𑍍𑌟𑍍𑌵𑌾 𑌦𑍂𑌰𑌾𑌤𑍍𑌕𑍃𑌤𑌾𑌞𑍍𑌜𑌲𑌿𑌮𑍍 ।

𑌉𑌤𑍍𑌪𑌪𑌾𑌤𑌾𑌸𑌨𑌾𑌤𑍍𑌤𑍂𑌰𑍍𑌣𑌮𑌾𑌰𑍍𑌤 𑌸𑍍𑌤𑍍𑌰𑍀𑌜𑌨𑌸𑌂𑌵𑍃𑌤𑌃 ॥ 15 ॥

𑌸𑍋𑌽𑌭𑌿𑌦𑍁𑌦𑍍𑌰𑌾𑌵 𑌵𑍇𑌗𑍇𑌨 𑌰𑌾𑌮𑌂 𑌦𑍃𑌷𑍍𑌟𑍍𑌵𑌾 𑌵𑌿𑌶𑌾𑌮𑍍𑌪𑌤𑌿𑌃 ।

𑌤𑌮𑌸𑌮𑍍𑌪𑍍𑌰𑌾𑌪𑍍𑌯 𑌦𑍁𑌃𑌖𑌾𑌰𑍍𑌤𑌃 𑌪𑌪𑌾𑌤 𑌭𑍁𑌵𑌿 𑌮𑍂𑌰𑍍𑌛𑌿𑌤𑌃 ॥ 16 ॥

𑌤𑌂 𑌰𑌾𑌮𑍋𑌽𑌭𑍍𑌯𑌪𑌤𑌤𑍍 𑌕𑍍𑌷𑌿𑌪𑍍𑌰𑌂 𑌲𑌕𑍍𑌷𑍍𑌮𑌣𑌶𑍍𑌚 𑌮𑌹𑌾𑌰𑌥𑌃 ।

𑌵𑌿𑌸𑌞𑍍𑌜𑍍𑌞𑌮𑌿𑌵 𑌦𑍁𑌃𑌖𑍇𑌨 𑌸𑌶𑍋𑌕𑌂 𑌨𑍃𑌪𑌤𑌿𑌂 𑌤𑌦𑌾 ॥ 17 ॥

𑌸𑍍𑌤𑍍𑌰𑍀𑌸𑌹𑌸𑍍𑌰𑌨𑌿𑌨𑌾𑌦𑌶𑍍𑌚 𑌸𑌞𑍍𑌜𑌜𑍍𑌞𑍇 𑌰𑌾𑌜𑌵𑍇𑌶𑍍𑌮𑌨𑌿 ।

𑌹𑌾 𑌹𑌾 𑌰𑌾𑌮𑍇𑌤𑌿 𑌸𑌹𑌸𑌾 𑌭𑍂𑌷𑌣𑌧𑍍𑌵𑌨𑌿𑌮𑍂𑌰𑍍𑌛𑌿𑌤𑌃 ॥ 18 ॥

𑌤𑌂 𑌪𑌰𑌿𑌷𑍍𑌵𑌜𑍍𑌯 𑌬𑌾𑌹𑍁𑌭𑍍𑌯𑌾𑌂 𑌤𑌾𑌵𑍁𑌭𑍗 𑌰𑌾𑌮𑌲𑌕𑍍𑌷𑍍𑌮𑌣𑍗 ।

𑌪𑌰𑍍𑌯𑌂𑌙𑍍𑌕𑍇 𑌸𑍀𑌤𑌯𑌾 𑌸𑌾𑌰𑍍𑌧𑌂 𑌰𑍁𑌦𑌨𑍍𑌤𑌃 𑌸𑌮𑌵𑍇𑌶𑌯𑌨𑍍 ॥ 19 ॥

𑌅𑌥 𑌰𑌾𑌮𑍋 𑌮𑍁𑌹𑍂𑌰𑍍𑌤𑍇𑌨 𑌲𑌬𑍍𑌧𑌸𑌞𑍍𑌜𑍍𑌞𑌂 𑌮𑌹𑍀𑌪𑌤𑌿𑌮𑍍 ।

𑌉𑌵𑌾𑌚 𑌪𑍍𑌰𑌾𑌞𑍍𑌜𑌲𑌿𑌰𑍍𑌭𑍂𑌤𑍍𑌵𑌾 𑌶𑍋𑌕𑌾𑌰𑍍𑌣𑌵𑌪𑌰𑌿𑌪𑍍𑌲𑍁𑌤𑌮𑍍 ॥ 20 ॥

𑌆𑌪𑍃𑌚𑍍𑌛𑍇 𑌤𑍍𑌵𑌾𑌂 𑌮𑌹𑌾𑌰𑌾𑌜 𑌸𑌰𑍍𑌵𑍇𑌷𑌾𑌮𑍀𑌶𑍍𑌵𑌰𑍋𑌽𑌸𑌿 𑌨𑌃 ।

𑌪𑍍𑌰𑌸𑍍𑌥𑌿𑌤𑌂 𑌦𑌣𑍍𑌡𑌕𑌾𑌰𑌣𑍍𑌯𑌂 𑌪𑌶𑍍𑌯 𑌤𑍍𑌵𑌂 𑌕𑍁𑌶𑌲𑍇𑌨 𑌮𑌾𑌮𑍍 ॥ 21 ॥

𑌲𑌕𑍍𑌷𑍍𑌮𑌣𑌂 𑌚𑌾𑌨𑍁𑌜𑌾𑌨𑍀𑌹𑌿 𑌸𑍀𑌤𑌾 𑌚𑌾𑌨𑍍𑌵𑍇𑌤𑌿 𑌮𑌾𑌂 𑌵𑌨𑌮𑍍 ।

𑌕𑌾𑌰𑌣𑍈𑌰𑍍𑌬𑌹𑍁𑌭𑌿 𑌸𑍍𑌤𑌥𑍍𑌯𑍈𑌰𑍍𑌵𑌾𑌰𑍍𑌯𑌮𑌾𑌣𑍗 𑌨 𑌚𑍇𑌚𑍍𑌛𑌤𑌃 ॥ 22 ॥

𑌅𑌨𑍁𑌜𑌾𑌨𑍀𑌹𑌿 𑌸𑌰𑍍𑌵𑌾𑌨𑍍𑌨𑌃 𑌶𑍋𑌕𑌮𑍁𑌤𑍍𑌸𑍃𑌜𑍍𑌯 𑌮𑌾𑌨𑌦 ।

𑌲𑌕𑍍𑌷𑍍𑌮𑌣𑌂 𑌮𑌾𑌂 𑌚 𑌸𑍀𑌤𑌾𑌂 𑌚 𑌪𑍍𑌰𑌜𑌾𑌪𑌤𑌿𑌰𑌿𑌵 𑌪𑍍𑌰𑌜𑌾𑌃 ॥ 23 ॥

𑌪𑍍𑌰𑌤𑍀𑌕𑍍𑌷𑌮𑌾𑌣𑌮𑌵𑍍𑌯𑌗𑍍𑌰𑌮𑌨𑍁𑌜𑍍𑌞𑌾𑌂 𑌜𑌗𑌤𑍀𑌪𑌤𑍇𑌃 ।

𑌉𑌵𑌾𑌚 𑌰𑌾𑌜𑌾 𑌸𑌮𑍍𑌪𑍍𑌰𑍇𑌕𑍍𑌷𑍍𑌯 𑌵𑌨𑌵𑌾𑌸𑌾𑌯 𑌰𑌾𑌘𑌵𑌮𑍍 ॥ 24 ॥

𑌅𑌹𑌂 𑌰𑌾𑌘𑌵 𑌕𑍈𑌕𑍇𑌯𑍍𑌯𑌾 𑌵𑌰𑌦𑌾𑌨𑍇𑌨 𑌮𑍋𑌹𑌿𑌤𑌃 ।

𑌅𑌯𑍋𑌧𑍍𑌯𑌾𑌯𑌾𑌸𑍍𑌤𑍍𑌵𑌮𑍇𑌵𑌾𑌦𑍍𑌯 𑌭𑌵 𑌰𑌾𑌜𑌾 𑌨𑌿𑌗𑍃𑌹𑍍𑌯 𑌮𑌾𑌮𑍍 ॥ 25 ॥

𑌏𑌵𑌮𑍁𑌕𑍍𑌤𑍋 𑌨𑍃𑌪𑌤𑌿𑌨𑌾 𑌰𑌾𑌮𑍋 𑌧𑌰𑍍𑌮𑌭𑍃𑌤𑌾𑌂 𑌵𑌰𑌃 ।

𑌪𑍍𑌰𑌤𑍍𑌯𑍁𑌵𑌾𑌚𑌾𑌞𑍍𑌜𑌲𑌿𑌂 𑌕𑍃𑌤𑍍𑌵𑌾 𑌪𑌿𑌤𑌰𑌂 𑌵𑌾𑌕𑍍𑌯𑌕𑍋𑌵𑌿𑌦𑌃 ॥ 26 ॥

𑌭𑌵𑌾𑌨𑍍𑌵𑌰𑍍𑌷 𑌸𑌹𑌸𑍍𑌰𑌾𑌯 𑌪𑍃𑌥𑌿𑌵𑍍𑌯𑌾 𑌨𑍃𑌪𑌤𑍇 𑌪𑌤𑌿𑌃 ।

𑌅𑌹𑌂 𑌤𑍍𑌵𑌰𑌣𑍍𑌯𑍇𑌵𑌤𑍍𑌸𑍍𑌯𑌾𑌮𑌿 𑌨 𑌮𑍇 𑌕𑌾𑌰𑍍𑌯𑌂 𑌤𑍍𑌵𑌯𑌾𑌽𑌨𑍃𑌤𑌮𑍍 ॥ 27 ॥

𑌨𑌵 𑌪𑌞𑍍𑌚 𑌚 𑌵𑌰𑍍𑌷𑌾𑌣𑌿 𑌵𑌨𑌵𑌾𑌸𑍇 𑌵𑌿𑌹𑍃𑌤𑍍𑌯 𑌤𑍇 ।

𑌪𑍁𑌨𑌃𑌪𑌾𑌦𑍗 𑌗𑍍𑌰𑌹𑍀𑌷𑍍𑌯𑌾𑌮𑌿 𑌪𑍍𑌰𑌤𑌿𑌜𑍍𑌞𑌾𑌨𑍍𑌤𑍇 𑌨𑌰𑌾𑌧𑌿𑌪 ॥ 28 ॥

𑌰𑍁𑌦𑌨𑍍𑌨𑌾𑌰𑍍𑌤𑌃 𑌪𑍍𑌰𑌿𑌯𑌂 𑌪𑍁𑌤𑍍𑌰𑌂 𑌸𑌤𑍍𑌯𑌪𑌾𑌶𑍇𑌨 𑌸𑌂𑌯𑌤𑌃 ।

𑌕𑍈𑌕𑍇𑌯𑍍𑌯𑌾 𑌚𑍋𑌦𑍍𑌯𑌮𑌾𑌨𑌸𑍍𑌤𑍁 𑌮𑌿𑌥𑍋 𑌰𑌾𑌜𑌾 𑌤𑌮𑌬𑍍𑌰𑌵𑍀𑌤𑍍 ॥ 29 ॥

𑌶𑍍𑌰𑍇𑌯𑌸𑍇 𑌵𑍃𑌦𑍍𑌧𑌯𑍇 𑌤𑌾𑌤 𑌪𑍁𑌨𑌰𑌾𑌗𑌮𑌨𑌾𑌯 𑌚 ।

𑌗𑌚𑍍𑌛𑌸𑍍𑌵𑌾𑌰𑌿𑌷𑍍𑌟𑌮𑌵𑍍𑌯𑌗𑍍𑌰𑌃 𑌪𑌨𑍍𑌥𑌾𑌨𑌮𑌕𑍁𑌤𑍋𑌭𑌯𑌮𑍍 ॥ 30 ॥

𑌨 𑌹𑌿 𑌸𑌤𑍍𑌯𑌾𑌤𑍍𑌮𑌨𑌸𑍍𑌤𑌾𑌤 𑌧𑌰𑍍𑌮𑌾𑌭𑌿𑌮𑌨𑌸 𑌸𑍍𑌤𑌵 ।

𑌵𑌿𑌨𑌿𑌵𑌰𑍍𑌤𑌯𑌿𑌤𑍁𑌂 𑌬𑍁𑌦𑍍𑌧𑌿𑌃 𑌶𑌕𑍍𑌯𑌤𑍇 𑌰𑌘𑍁𑌨𑌨𑍍𑌦𑌨 ॥ 31 ॥

𑌅𑌦𑍍𑌯 𑌤𑍍𑌵𑌿𑌦𑌾𑌨𑍀𑌂 𑌰𑌜𑌨𑍀𑌂 𑌪𑍁𑌤𑍍𑌰 𑌮𑌾 𑌗𑌚𑍍𑌛 𑌸𑌰𑍍𑌵𑌥𑌾 ।

𑌏𑌕𑌾𑌹𑌦𑌰𑍍𑌶𑌨𑍇𑌨𑌾𑌪𑌿 𑌸𑌾𑌧𑍁 𑌤𑌾𑌵𑌚𑍍𑌚𑌰𑌾𑌮𑍍𑌯𑌹𑌮𑍍 ॥ 32 ॥

𑌮𑌾𑌤𑌰𑌂 𑌮𑌾𑌂 𑌚 𑌸𑌮𑍍𑌪𑌶𑍍𑌯𑌨𑍍 𑌵𑌸𑍇𑌮𑌾𑌮𑌦𑍍𑌯 𑌶𑌰𑍍𑌵𑌰𑍀𑌮𑍍 ।

𑌤𑌰𑍍𑌪𑌿𑌤 𑌸𑍍𑌸𑌰𑍍𑌵𑌕𑌾𑌮𑍈𑌸𑍍𑌤𑍍𑌵𑌂 𑌶𑍍𑌵𑌃 𑌕𑌾𑌲𑍇 𑌸𑌾𑌧𑌯𑌿𑌷𑍍𑌯𑌸𑌿 ॥ 33 ॥

𑌦𑍁𑌷𑍍𑌕𑌰𑌂 𑌕𑍍𑌰𑌿𑌯𑌤𑍇 𑌪𑍁𑌤𑍍𑌰 𑌸𑌰𑍍𑌵𑌥𑌾 𑌰𑌾𑌘𑌵 𑌤𑍍𑌵𑌯𑌾 ।

𑌮𑌤𑍍𑌪𑍍𑌰𑌿𑌯𑌾𑌰𑍍𑌥𑌂 𑌪𑍍𑌰𑌿𑌯𑌾𑌂𑌸𑍍𑌤𑍍𑌯𑌕𑍍𑌤𑍍𑌵𑌾 𑌯𑌦𑍍𑌯𑌾𑌸𑌿 𑌵𑌿𑌜𑌨𑌂 𑌵𑌨𑌮𑍍 ॥ 34 ॥

𑌨 𑌚𑍈𑌤𑌨𑍍𑌮𑍇 𑌪𑍍𑌰𑌿𑌯𑌂 𑌪𑍁𑌤𑍍𑌰 𑌶𑌪𑍇 𑌸𑌤𑍍𑌯𑍇𑌨 𑌰𑌾𑌘𑌵 ।

𑌛𑌨𑍍𑌨𑌯𑌾 𑌚𑌲𑌿𑌤𑌸𑍍𑌤𑍍𑌵𑌸𑍍𑌮𑌿 𑌸𑍍𑌤𑍍𑌰𑌿𑌯𑌾 𑌛𑌨𑍍𑌨𑌾𑌗𑍍𑌨𑌿𑌕𑌲𑍍𑌪𑌯𑌾 ॥ 35 ॥

𑌵𑌞𑍍𑌚𑌨𑌾 𑌯𑌾 𑌤𑍁 𑌲𑌬𑍍𑌧𑌾 𑌮𑍇 𑌤𑌾𑌂 𑌤𑍍𑌵𑌂 𑌨𑌿𑌸𑍍𑌤𑌰𑍍𑌤𑍁𑌮𑌿𑌚𑍍𑌛𑌸𑌿 ।

𑌅𑌨𑌯𑌾 𑌵𑍃𑌤𑍍𑌤𑌸𑌾𑌦𑌿𑌨𑍍𑌯𑌾 𑌕𑍈𑌕𑍇𑌯𑍍𑌯𑌾𑌽𑌭𑌿𑌪𑍍𑌰𑌚𑍋𑌦𑌿𑌤𑌃 ॥ 36 ॥

𑌨 𑌚𑍈𑌤𑌦𑌾𑌶𑍍𑌚𑌰𑍍𑌯𑌤𑌮𑌂 𑌯𑌤𑍍𑌤𑌜𑍍𑌯𑍇𑌷𑍍𑌠𑌸𑍍𑌸𑍁𑌤𑍋 𑌮𑌮 ।

𑌅𑌪𑌾𑌨𑍃𑌤𑌕𑌥𑌂 𑌪𑍁𑌤𑍍𑌰 𑌪𑌿𑌤𑌰𑌂 𑌕𑌰𑍍𑌤𑍁𑌮𑌿𑌚𑍍𑌛𑌸𑌿 ॥ 37 ॥

𑌅𑌥 𑌰𑌾𑌮𑌸𑍍𑌤𑌥𑌾 𑌶𑍍𑌰𑍁𑌤𑍍𑌵𑌾 𑌪𑌿𑌤𑍁𑌰𑌾𑌰𑍍𑌤𑌸𑍍𑌯 𑌭𑌾𑌷𑌿𑌤𑌮𑍍 ।

𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌦𑍀𑌨𑍋 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 38 ॥

𑌪𑍍𑌰𑌾𑌪𑍍𑌸𑍍𑌯𑌾𑌮𑌿 𑌯𑌾𑌨𑌦𑍍𑌯 𑌗𑍁𑌣𑌾𑌨𑍍𑌕𑍋 𑌮𑍇 𑌶𑍍𑌵𑌸𑍍𑌤𑌾𑌨𑍍 𑌪𑍍𑌰𑌦𑌾𑌸𑍍𑌯𑌤𑌿 ।

𑌅𑌪𑌕𑍍𑌰𑌮𑌣𑌮𑍇𑌵𑌾𑌤𑌃 𑌸𑌰𑍍𑌵𑌕𑌾𑌮𑍈𑌰𑌹𑌂 𑌵𑍃𑌣𑍇 ॥ 39 ॥

𑌇𑌯𑌂 𑌸𑌰𑌾𑌷𑍍𑌟𑍍𑌰𑌾 𑌸𑌜𑌨𑌾 𑌧𑌨𑌧𑌾𑌨𑍍𑌯𑌸𑌮𑌾𑌕𑍁𑌲𑌾 ।

𑌮𑌯𑌾 𑌵𑌿𑌸𑍃𑌷𑍍𑌟𑌾 𑌵𑌸𑍁𑌧𑌾 𑌭𑌰𑌤𑌾𑌯 𑌪𑍍𑌰𑌦𑍀𑌯𑌤𑌾𑌮𑍍 ॥ 40 ॥

𑌵𑌨𑌵𑌾𑌸𑌕𑍃𑌤𑌾 𑌬𑍁𑌦𑍍𑌧𑌿𑌰𑍍𑌨 𑌚 𑌮𑍇𑌽𑌦𑍍𑌯 𑌚𑌲𑌿𑌷𑍍𑌯𑌤𑌿 ।

𑌯𑌸𑍍𑌤𑍁𑌷𑍍𑌟𑍇𑌨 𑌵𑌰𑍋 𑌦𑌤𑍍𑌤𑌃 𑌕𑍈𑌕𑍇𑌯𑍍𑌯𑍈 𑌵𑌰𑌦 𑌤𑍍𑌵𑌯𑌾 ॥ 41 ॥

𑌦𑍀𑌯𑌤𑌾𑌂 𑌨𑌿𑌖𑌿𑌲𑍇𑌨𑍈𑌵 𑌸𑌤𑍍𑌯𑌸𑍍𑌤𑍍𑌵𑌂 𑌭𑌵 𑌪𑌾𑌰𑍍𑌥𑌿𑌵 ।

𑌅𑌹𑌂 𑌨𑌿𑌦𑍇𑌶𑌂 𑌭𑌵𑌤𑍋 𑌯𑌥𑍋𑌕𑍍𑌤𑌮𑌨𑍁𑌪𑌾𑌲𑌯𑌨𑍍 ॥ 42 ॥

𑌚𑌤𑍁𑌰𑍍𑌦𑌶 𑌸𑌮𑌾 𑌵𑌤𑍍𑌸𑍍𑌯𑍇 𑌵𑌨𑍇 𑌵𑌨𑌚𑌰𑍈𑌸𑍍𑌸𑌹 ।

𑌮𑌾 𑌵𑌿𑌮𑌰𑍍𑌶𑍋 𑌵𑌸𑍁𑌮𑌤𑍀 𑌭𑌰𑌤𑌾𑌯 𑌪𑍍𑌰𑌦𑍀𑌯𑌤𑌾𑌮𑍍 ॥ 43 ॥

𑌨 𑌹𑌿 𑌮𑍇 𑌕𑌾𑌙𑍍𑌕𑍍𑌷𑌿𑌤𑌂 𑌰𑌾𑌜𑍍𑌯𑌂 𑌸𑍁𑌖𑌮𑌾𑌤𑍍𑌮𑌨𑌿 𑌵𑌾 𑌪𑍍𑌰𑌿𑌯𑌮𑍍 ।

𑌯𑌥𑌾𑌨𑌿𑌦𑍇𑌶𑌂 𑌕𑌰𑍍𑌤𑍁𑌂 𑌵𑍈 𑌤𑌵𑍈𑌵 𑌰𑌘𑍁𑌨𑌨𑍍𑌦𑌨 ॥ 44 ॥

𑌅𑌪𑌗𑌚𑍍𑌛𑌤𑍁 𑌤𑍇 𑌦𑍁𑌃𑌖𑌂 𑌮𑌾𑌭𑍂𑌰𑍍𑌬𑌾𑌷𑍍𑌪𑌪𑌰𑌿𑌪𑍍𑌲𑍁𑌤𑌃 ।

𑌨 𑌹𑌿 𑌕𑍍𑌷𑍁𑌭𑍍𑌯𑌤𑌿 𑌦𑍁𑌰𑍍𑌧𑌰𑍍𑌷𑌃 𑌸𑌮𑍁𑌦𑍍𑌰𑌃 𑌸𑌰𑌿𑌤𑌾𑌂 𑌪𑌤𑌿𑌃 ॥ 45 ॥

𑌨𑍈𑌵𑌾𑌹𑌂 𑌰𑌾𑌜𑍍𑌯𑌮𑌿𑌚𑍍𑌛𑌾𑌮𑌿 𑌨 𑌸𑍁𑌖𑌂 𑌨 𑌚 𑌮𑍇𑌦𑌿𑌨𑍀𑌮𑍍 ।

𑌨𑍈𑌵 𑌸𑌰𑍍𑌵𑌾𑌨𑌿𑌮𑌾𑌨𑍍 𑌕𑌾𑌮𑌾 𑌨𑍍𑌨𑌸𑍍𑌵𑌰𑍍𑌗𑌂 𑌨𑍈𑌵 𑌜𑍀𑌵𑌿𑌤𑌮𑍍 ॥ 46 ॥

𑌤𑍍𑌵𑌾𑌮𑌹𑌂 𑌸𑌤𑍍𑌯𑌮𑌿𑌚𑍍𑌛𑌾𑌮𑌿 𑌨𑌾𑌨𑍃𑌤𑌂 𑌪𑍁𑌰𑍁𑌷𑌰𑍍𑌷𑌭 ।

𑌪𑍍𑌰𑌤𑍍𑌯𑌕𑍍𑌷𑌂 𑌤𑌵 𑌸𑌤𑍍𑌯𑍇𑌨 𑌸𑍁𑌕𑍃𑌤𑍇𑌨 𑌚 𑌤𑍇 𑌶𑌪𑍇 ॥ 47 ॥

𑌨 𑌚 𑌶𑌕𑍍𑌯𑌂 𑌮𑌯𑌾 𑌤𑌾𑌤 𑌸𑍍𑌥𑌾𑌤𑍁𑌂 𑌕𑍍𑌷𑌣𑌮𑌪𑌿 𑌪𑍍𑌰𑌭𑍋 ।

𑌸 𑌶𑍋𑌕𑌂 𑌧𑌾𑌰𑌯𑌸𑍍𑌵𑍇𑌮𑌂 𑌨 𑌹𑌿 𑌮𑍇𑌽𑌸𑍍𑌤𑌿 𑌵𑌿𑌪𑌰𑍍𑌯𑌯𑌃 ॥ 48 ॥

𑌅𑌰𑍍𑌥𑌿𑌤𑍋 𑌹𑍍𑌯𑌸𑍍𑌮𑌿 𑌕𑍈𑌕𑍇𑌯𑍍𑌯𑌾 𑌵𑌨𑌂 𑌗𑌚𑍍𑌛𑍇𑌤𑌿 𑌰𑌾𑌘𑌵 ।

𑌮𑌯𑌾 𑌚𑍋𑌕𑍍𑌤𑌂 𑌵𑍍𑌰𑌜𑌾𑌮𑍀𑌤𑌿 𑌤𑌤𑍍𑌸𑌤𑍍𑌯𑌮𑌨𑍁𑌪𑌾𑌲𑌯𑍇 ॥ 49 ॥

𑌮𑌾 𑌚𑍋𑌤𑍍𑌕𑌣𑍍𑌠𑌾𑌂 𑌕𑍃𑌥𑌾 𑌦𑍇𑌵 𑌵𑌨𑍇 𑌰𑌂𑌸𑍍𑌯𑌾𑌮𑌹𑍇 𑌵𑌯𑌮𑍍 ।

𑌪𑍍𑌰𑌶𑌾𑌨𑍍𑌤𑌹𑌰𑌿𑌣𑌾𑌕𑍀𑌰𑍍𑌣𑍇 𑌨𑌾𑌨𑌾𑌶𑌕𑍁𑌨𑌿𑌨𑌾𑌦𑌿𑌤𑍇 ॥ 50 ॥

𑌪𑌿𑌤𑌾 𑌹𑌿 𑌦𑍈𑌵𑌤𑌂 𑌤𑌾𑌤 𑌦𑍇𑌵𑌤𑌾𑌨𑌾𑌮𑌪𑌿 𑌸𑍍𑌮𑍃𑌤𑌮𑍍 ।

𑌤𑌸𑍍𑌮𑌾𑌦𑍍𑌦𑍈𑌵𑌤𑌮𑌿𑌤𑍍𑌯𑍇𑌵 𑌕𑌰𑌿𑌷𑍍𑌯𑌾𑌮𑌿 𑌪𑌿𑌤𑍁𑌰𑍍𑌵𑌚𑌃 ॥ 51 ॥

𑌚𑌤𑍁𑌰𑍍𑌦𑌶𑌸𑍁 𑌵𑌰𑍍𑌷𑍇𑌷𑍁 𑌗𑌤𑍇𑌷𑍁 𑌨𑌰𑌸𑌤𑍍𑌤𑌮 ।

𑌪𑍁𑌨𑌰𑍍𑌦𑍍𑌰𑌕𑍍𑌷𑍍𑌯𑌸𑌿 𑌮𑌾𑌂 𑌪𑍍𑌰𑌾𑌪𑍍𑌤𑌂 𑌸𑌨𑍍𑌤𑌾𑌪𑍋𑌽𑌯𑌂 𑌵𑌿𑌮𑍁𑌚𑍍𑌯𑌤𑌾𑌮𑍍 ॥ 52 ॥

𑌯𑍇𑌨 𑌸𑌂𑌸𑍍𑌤𑌮𑍍𑌭𑌨𑍀𑌯𑍋𑌽𑌯𑌂 𑌸𑌰𑍍𑌵𑍋 𑌬𑌾𑌷𑍍𑌪𑌗𑌲𑍋 𑌜𑌨𑌃 ।

𑌸 𑌤𑍍𑌵𑌂 𑌪𑍁𑌰𑍁𑌷𑌶𑌾𑌰𑍍𑌦𑍂𑌲 𑌕𑌿𑌮𑌰𑍍𑌥𑌂 𑌵𑌿𑌕𑍍𑌰𑌿𑌯𑌾𑌂 𑌗𑌤𑌃 ॥ 53 ॥

𑌪𑍁𑌰𑌂 𑌚 𑌰𑌾𑌷𑍍𑌟𑍍𑌰𑌂 𑌚 𑌮𑌹𑍀 𑌚 𑌕𑍇𑌵𑌲𑌾 𑌮𑌯𑌾 𑌨𑌿𑌸𑍃𑌷𑍍𑌟𑌾 𑌭𑌰𑌤𑌾𑌯 𑌦𑍀𑌯𑌤𑌾𑌮𑍍 ।

𑌅𑌹𑌂 𑌨𑌿𑌦𑍇𑌶𑌂 𑌭𑌵𑌤𑍋𑌽𑌨𑍁𑌪𑌾𑌲𑌯𑌨𑍍 𑌵𑌨𑌂 𑌗𑌮𑌿𑌷𑍍𑌯𑌾𑌮𑌿 𑌚𑌿𑌰𑌾𑌯 𑌸𑍇𑌵𑌿𑌤𑍁𑌮𑍍 ॥ 54 ॥

𑌮𑌯𑌾 𑌨𑌿𑌸𑍃𑌷𑍍𑌟𑌾𑌂 𑌭𑌰𑌤𑍋 𑌮𑌹𑍀𑌮𑌿𑌮𑌾𑌂 𑌸𑌶𑍈𑌲𑌷𑌣𑍍𑌡𑌾𑌂 𑌸𑌪𑍁𑌰𑌾𑌂 𑌸𑌕𑌾𑌨𑌨𑌾𑌮𑍍 ।

𑌶𑌿𑌵𑌾𑌂 𑌸𑍁𑌸𑍀𑌮𑌾𑌮𑌨𑍁𑌶𑌾𑌸𑍍𑌤𑍁 𑌕𑍇𑌵𑌲𑌂 𑌤𑍍𑌵𑌯𑌾 𑌯𑌦𑍁𑌕𑍍𑌤𑌂 𑌨𑍃𑌪𑌤𑍇 𑌤𑌥𑌾𑌸𑍍𑌤𑍁 𑌤𑌤𑍍 ॥ 55 ॥

𑌨 𑌮𑍇 𑌤𑌥𑌾 𑌪𑌾𑌰𑍍𑌥𑌿𑌵 𑌧𑍀𑌯𑌤𑍇 𑌮𑌨𑍋 𑌮𑌹𑌤𑍍𑌸𑍁 𑌕𑌾𑌮𑍇𑌷𑍁 𑌨 𑌚𑌾𑌤𑍍𑌮𑌨𑌃𑌪𑍍𑌰𑌿𑌯𑍇 ।

𑌯𑌥𑌾 𑌨𑌿𑌦𑍇𑌶𑍇 𑌤𑌵 𑌶𑌿𑌷𑍍𑌟𑌸𑌮𑍍𑌮𑌤𑍇 𑌵𑍍𑌯𑌪𑍈𑌤𑍁 𑌦𑍁𑌃𑌖𑌂 𑌤𑌵 𑌮𑌤𑍍𑌕𑍃𑌤𑍇𑌽𑌨𑌘 ॥ 56 ॥

𑌤𑌦𑌦𑍍𑌯 𑌨𑍈𑌵𑌾𑌨𑌘 𑌰𑌾𑌜𑍍𑌯𑌮𑌵𑍍𑌯𑌯𑌂 𑌨 𑌸𑌰𑍍𑌵𑌕𑌾𑌮𑌾𑌨𑍍𑌨 𑌸𑍁𑌖𑌂 𑌨 𑌮𑍈𑌥𑌿𑌲𑍀𑌮𑍍 ।

𑌨 𑌜𑍀𑌵𑌿𑌤𑌂 𑌤𑍍𑌵𑌾𑌮𑌨𑍃𑌤𑍇𑌨 𑌯𑍋𑌜𑌯𑌨𑍍 𑌵𑍃𑌣𑍀𑌯 𑌸𑌤𑍍𑌯𑌂 𑌵𑍍𑌰𑌤𑌮𑌸𑍍𑌤𑍁 𑌤𑍇 𑌤𑌥𑌾 ॥ 57 ॥

𑌫𑌲𑌾𑌨𑌿 𑌮𑍂𑌲𑌾𑌨𑌿 𑌚 𑌭𑌕𑍍𑌷𑌯𑌨𑍍𑌵𑌨𑍇 𑌗𑌿𑌰𑍀𑌂𑌶𑍍𑌚 𑌪𑌶𑍍𑌯𑌨𑍍 𑌸𑌰𑌿𑌤𑌸𑍍𑌸𑌰𑌾𑌂𑌸𑌿 𑌚 ।

𑌵𑌨𑌂 𑌪𑍍𑌰𑌵𑌿𑌶𑍍𑌯𑍈𑌵 𑌵𑌿𑌚𑌿𑌤𑍍𑌰𑌪𑌾𑌦𑌪𑌂 𑌸𑍁𑌖𑍀 𑌭𑌵𑌿𑌷𑍍𑌯𑌾𑌮𑌿 𑌤𑌵𑌾𑌸𑍍𑌤𑍁 𑌨𑌿𑌰𑍍𑌵𑍃𑌤𑌿𑌃 ॥ 58 ॥

𑌏𑌵𑌂 𑌸 𑌰𑌾𑌜𑌾 𑌵𑍍𑌯𑌸𑌨𑌾𑌭𑌿𑌪𑌨𑍍𑌨𑌃 𑌶𑍋𑌕𑍇𑌨 𑌦𑍁𑌃𑌖𑍇𑌨 𑌚 𑌤𑌾𑌮𑍍𑌯𑌮𑌾𑌨𑌃 ।

𑌆𑌲𑌿𑌙𑍍𑌗𑍍𑌯 𑌪𑍁𑌤𑍍𑌰𑌂 𑌸𑍁𑌵𑌿𑌨𑌷𑍍𑌟𑌸𑌞𑍍𑌜𑍍𑌞𑍋 𑌮𑍋𑌹𑌂 𑌗𑌤𑍋 𑌨𑍈𑌵 𑌚𑌿𑌚𑍇𑌷𑍍𑌟 𑌕𑌿𑌂𑌞𑍍𑌚𑌿𑌤𑍍 ॥ 59 ॥

𑌦𑍇𑌵𑍍𑌯𑌸𑍍𑌤𑌤 𑌸𑍍𑌸𑌂𑌰𑍁𑌰𑍁𑌦𑍁𑌸𑍍𑌸𑌮𑍇𑌤𑌾 𑌸𑍍𑌤𑌾𑌂 𑌵𑌰𑍍𑌜𑌯𑌿𑌤𑍍𑌵𑌾 𑌨𑌰𑌦𑍇𑌵𑌪𑌤𑍍𑌨𑍀𑌮𑍍 ।

𑌰𑍁𑌦𑌨𑍍 𑌸𑍁𑌮𑌨𑍍𑌤𑍍𑌰𑍋𑌽𑌽𑌪𑌿 𑌜𑌗𑌾𑌮 𑌮𑍂𑌰𑍍𑌛𑌾𑌂 𑌹𑌾𑌹𑌾𑌕𑍃𑌤𑌂 𑌤𑌤𑍍𑌰 𑌬𑌭𑍂𑌵 𑌸𑌰𑍍𑌵𑌮𑍍 ॥ 60 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌣𑍍𑌡𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥

Roman (IAST) Transliteration

śrīmadvālmīkīya rāmāyaṇe ayodhyākāṇḍam |

atha catustriṃśassargaḥ |

tataḥ kamalapatrākṣaḥ śyāmo nirupamo mahān |

uvāca rāma staṃ sūtaṃ piturākhyāhi māmiti || 1 ||

sa rāmapreṣitaḥ kṣipraṃ santāpakaluṣendriyaḥ |

praviśya nṛpatiṃ sūto niśvasantaṃ dadarśa ha || 2 ||

uparaktamivādityaṃ bhasmacchannamivānalam |

taṭākamiva nistoyamapaśyajjagatīpatim || 3 ||

ālokya tu mahāprājñaḥ paramākulacetasam |

rāmamevānuśocantaṃ sūtaḥ prāñjalirāsadat || 4 ||

taṃ vardhayitvā rājānaṃ pūrvaṃ sūto jayāśiṣā |

bhayaviklabayā vācā mandayā ślakṣṇamabravīt || 5 ||

ayaṃ sa puruṣavyāghro dvāri tiṣṭhati te sutaḥ |

brāhmaṇebhyo dhanaṃ datvā sarvañcaivopajīvinām || 6 ||

gamiṣyati mahāraṇyaṃ taṃ paśya jagatīpate |

vṛtaṃ rājaguṇai ssarvairādityamiva raśmibhiḥ || 7 ||

sa satyavādī dharmātmā gāmbhīryātsāgaropamaḥ |

ākāśa iva niṣpaṅko narendraḥ pratyuvāca tam || 8 ||

sumanntrānaya me dārān ye kecidiha māmakāḥ |

dāraiḥ parivṛtassarvairdraṣṭumicchāmi dhārmikam || 9 ||

so'ntaḥpuramatītyaiva striyastā vākyamabravīt |

āryāhvayati vo rājā gamyatāṃ tatra mā ciram || 10 ||

evamuktāḥ striya ssarvāḥ sumantreṇa nṛpājñayā |

pracakramu stadbhavanaṃ bharturājñāya śāsanam || 11 ||

ardhasaptaśatāstāstu pramadāstāmralocanāḥ |

kausalyāṃ parivāryātha śanairjagmurdhṛtavratāḥ || 12 ||

āgateṣu ca dāreṣu samavekṣya mahīpatiḥ |

uvāca rājā taṃ sūtaṃ sumantrā'naya me sutam || 13 ||

sa sūto rāmamādāya lakṣmaṇaṃ maithilīṃ tadā |

jagāmābhimukhastūrṇaṃ sakāśaṃ jagatīpateḥ || 14 ||

sa rājā putramāyāntaṃ dṛṣṭvā dūrātkṛtāñjalim |

utpapātāsanāttūrṇamārta strījanasaṃvṛtaḥ || 15 ||

so'bhidudrāva vegena rāmaṃ dṛṣṭvā viśāmpatiḥ |

tamasamprāpya duḥkhārtaḥ papāta bhuvi mūrchitaḥ || 16 ||

taṃ rāmo'bhyapatat kṣipraṃ lakṣmaṇaśca mahārathaḥ |

visañjñamiva duḥkhena saśokaṃ nṛpatiṃ tadā || 17 ||

strīsahasraninādaśca sañjajñe rājaveśmani |

hā hā rāmeti sahasā bhūṣaṇadhvanimūrchitaḥ || 18 ||

taṃ pariṣvajya bāhubhyāṃ tāvubhau rāmalakṣmaṇau |

paryaṃṅke sītayā sārdhaṃ rudantaḥ samaveśayan || 19 ||

atha rāmo muhūrtena labdhasañjñaṃ mahīpatim |

uvāca prāñjalirbhūtvā śokārṇavapariplutam || 20 ||

āpṛcche tvāṃ mahārāja sarveṣāmīśvaro'si naḥ |

prasthitaṃ daṇḍakāraṇyaṃ paśya tvaṃ kuśalena mām || 21 ||

lakṣmaṇaṃ cānujānīhi sītā cānveti māṃ vanam |

kāraṇairbahubhi stathyairvāryamāṇau na cecchataḥ || 22 ||

anujānīhi sarvānnaḥ śokamutsṛjya mānada |

lakṣmaṇaṃ māṃ ca sītāṃ ca prajāpatiriva prajāḥ || 23 ||

pratīkṣamāṇamavyagramanujñāṃ jagatīpateḥ |

uvāca rājā samprekṣya vanavāsāya rāghavam || 24 ||

ahaṃ rāghava kaikeyyā varadānena mohitaḥ |

ayodhyāyāstvamevādya bhava rājā nigṛhya mām || 25 ||

evamukto nṛpatinā rāmo dharmabhṛtāṃ varaḥ |

pratyuvācāñjaliṃ kṛtvā pitaraṃ vākyakovidaḥ || 26 ||

bhavānvarṣa sahasrāya pṛthivyā nṛpate patiḥ |

ahaṃ tvaraṇyevatsyāmi na me kāryaṃ tvayā'nṛtam || 27 ||

nava pañca ca varṣāṇi vanavāse vihṛtya te |

punaḥpādau grahīṣyāmi pratijñānte narādhipa || 28 ||

rudannārtaḥ priyaṃ putraṃ satyapāśena saṃyataḥ |

kaikeyyā codyamānastu mitho rājā tamabravīt || 29 ||

śreyase vṛddhaye tāta punarāgamanāya ca |

gacchasvāriṣṭamavyagraḥ panthānamakutobhayam || 30 ||

na hi satyātmanastāta dharmābhimanasa stava |

vinivartayituṃ buddhiḥ śakyate raghunandana || 31 ||

adya tvidānīṃ rajanīṃ putra mā gaccha sarvathā |

ekāhadarśanenāpi sādhu tāvaccarāmyaham || 32 ||

mātaraṃ māṃ ca sampaśyan vasemāmadya śarvarīm |

tarpita ssarvakāmaistvaṃ śvaḥ kāle sādhayiṣyasi || 33 ||

duṣkaraṃ kriyate putra sarvathā rāghava tvayā |

matpriyārthaṃ priyāṃstyaktvā yadyāsi vijanaṃ vanam || 34 ||

na caitanme priyaṃ putra śape satyena rāghava |

channayā calitastvasmi striyā channāgnikalpayā || 35 ||

vañcanā yā tu labdhā me tāṃ tvaṃ nistartumicchasi |

anayā vṛttasādinyā kaikeyyā'bhipracoditaḥ || 36 ||

na caitadāścaryatamaṃ yattajyeṣṭhassuto mama |

apānṛtakathaṃ putra pitaraṃ kartumicchasi || 37 ||

atha rāmastathā śrutvā piturārtasya bhāṣitam |

lakṣmaṇena saha bhrātrā dīno vacanamabravīt || 38 ||

prāpsyāmi yānadya guṇānko me śvastān pradāsyati |

apakramaṇamevātaḥ sarvakāmairahaṃ vṛṇe || 39 ||

iyaṃ sarāṣṭrā sajanā dhanadhānyasamākulā |

mayā visṛṣṭā vasudhā bharatāya pradīyatām || 40 ||

vanavāsakṛtā buddhirna ca me'dya caliṣyati |

yastuṣṭena varo dattaḥ kaikeyyai varada tvayā || 41 ||

dīyatāṃ nikhilenaiva satyastvaṃ bhava pārthiva |

ahaṃ nideśaṃ bhavato yathoktamanupālayan || 42 ||

caturdaśa samā vatsye vane vanacaraissaha |

mā vimarśo vasumatī bharatāya pradīyatām || 43 ||

na hi me kāṅkṣitaṃ rājyaṃ sukhamātmani vā priyam |

yathānideśaṃ kartuṃ vai tavaiva raghunandana || 44 ||

apagacchatu te duḥkhaṃ mābhūrbāṣpapariplutaḥ |

na hi kṣubhyati durdharṣaḥ samudraḥ saritāṃ patiḥ || 45 ||

naivāhaṃ rājyamicchāmi na sukhaṃ na ca medinīm |

naiva sarvānimān kāmā nnasvargaṃ naiva jīvitam || 46 ||

tvāmahaṃ satyamicchāmi nānṛtaṃ puruṣarṣabha |

pratyakṣaṃ tava satyena sukṛtena ca te śape || 47 ||

na ca śakyaṃ mayā tāta sthātuṃ kṣaṇamapi prabho |

sa śokaṃ dhārayasvemaṃ na hi me'sti viparyayaḥ || 48 ||

arthito hyasmi kaikeyyā vanaṃ gaccheti rāghava |

mayā coktaṃ vrajāmīti tatsatyamanupālaye || 49 ||

mā cotkaṇṭhāṃ kṛthā deva vane raṃsyāmahe vayam |

praśāntahariṇākīrṇe nānāśakuninādite || 50 ||

pitā hi daivataṃ tāta devatānāmapi smṛtam |

tasmāddaivatamityeva kariṣyāmi piturvacaḥ || 51 ||

caturdaśasu varṣeṣu gateṣu narasattama |

punardrakṣyasi māṃ prāptaṃ santāpo'yaṃ vimucyatām || 52 ||

yena saṃstambhanīyo'yaṃ sarvo bāṣpagalo janaḥ |

sa tvaṃ puruṣaśārdūla kimarthaṃ vikriyāṃ gataḥ || 53 ||

puraṃ ca rāṣṭraṃ ca mahī ca kevalā mayā nisṛṣṭā bharatāya dīyatām |

ahaṃ nideśaṃ bhavato'nupālayan vanaṃ gamiṣyāmi cirāya sevitum || 54 ||

mayā nisṛṣṭāṃ bharato mahīmimāṃ saśailaṣaṇḍāṃ sapurāṃ sakānanām |

śivāṃ susīmāmanuśāstu kevalaṃ tvayā yaduktaṃ nṛpate tathāstu tat || 55 ||

na me tathā pārthiva dhīyate mano mahatsu kāmeṣu na cātmanaḥpriye |

yathā nideśe tava śiṣṭasammate vyapaitu duḥkhaṃ tava matkṛte'nagha || 56 ||

tadadya naivānagha rājyamavyayaṃ na sarvakāmānna sukhaṃ na maithilīm |

na jīvitaṃ tvāmanṛtena yojayan vṛṇīya satyaṃ vratamastu te tathā || 57 ||

phalāni mūlāni ca bhakṣayanvane girīṃśca paśyan saritassarāṃsi ca |

vanaṃ praviśyaiva vicitrapādapaṃ sukhī bhaviṣyāmi tavāstu nirvṛtiḥ || 58 ||

evaṃ sa rājā vyasanābhipannaḥ śokena duḥkhena ca tāmyamānaḥ |

āliṅgya putraṃ suvinaṣṭasañjño mohaṃ gato naiva ciceṣṭa kiṃñcit || 59 ||

devyastata ssaṃrurudussametā stāṃ varjayitvā naradevapatnīm |

rudan sumantro''pi jagāma mūrchāṃ hāhākṛtaṃ tatra babhūva sarvam || 60 ||

ityārṣe śrīmadrāmāyaṇe vālmīkīya ādikāvye ayodhyākāṇḍe catustriṃśassargaḥ ||