📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.71 𑌬𑌾𑌲𑌕𑌾𑌣𑍍𑌡 - 𑌏𑌕𑌸𑌪𑍍𑌤𑌤𑌿𑌤𑌮 𑌸𑌰𑍍𑌗𑌃
1.71 Balakanda - Ekasaptatitama Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌣𑍍𑌡𑌮𑍍 ।
𑌅𑌥 𑌏𑌕𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌏𑌵𑌂 𑌬𑍍𑌰𑍁𑌵𑌾𑌣𑌂 𑌜𑌨𑌕𑌃 𑌪𑍍𑌰𑌤𑍍𑌯𑍁𑌵𑌾𑌚 𑌕𑍃𑌤𑌾𑌞𑍍𑌜𑌲𑌿𑌃 ।
𑌶𑍍𑌰𑍋𑌤𑍁𑌮𑌰𑍍𑌹𑌸𑌿 𑌭𑌦𑍍𑌰𑌂 𑌤𑍇 𑌕𑍁𑌲𑌂 𑌨𑌃 𑌪𑌰𑌿𑌕𑍀𑌰𑍍𑌤𑌿𑌤𑌮𑍍 ॥ 1 ॥
𑌪𑍍𑌰𑌦𑌾𑌨𑍇 𑌹𑌿 𑌮𑍁𑌨𑌿𑌶𑍍𑌰𑍇𑌷𑍍𑌠 𑌕𑍁𑌲𑌂 𑌨𑌿𑌰𑌵𑌶𑍇𑌷𑌤𑌃 ।
𑌵𑌕𑍍𑌤𑌵𑍍𑌯𑌂 𑌕𑍁𑌲𑌜𑌾𑌤𑍇𑌨 𑌤𑌨𑍍𑌨𑌿𑌬𑍋𑌧 𑌮𑌹𑌾𑌮𑍁𑌨𑍇 ॥ 2 ॥
𑌰𑌾𑌜𑌾𑌽𑌭𑍂𑌤𑍍 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌵𑌿𑌶𑍍𑌰𑍁𑌤 𑌸𑍍𑌸𑍍𑌵𑍇𑌨 𑌕𑌰𑍍𑌮𑌣𑌾 ।
𑌨𑌿𑌮𑌿𑌃 𑌪𑌰𑌮𑌧𑌰𑍍𑌮𑌾𑌤𑍍𑌮𑌾 𑌸𑌰𑍍𑌵𑌸𑌤𑍍𑌤𑍍𑌵𑌵𑌤𑌾𑌂 𑌵𑌰𑌃 ॥ 3 ॥
𑌤𑌸𑍍𑌯 𑌪𑍁𑌤𑍍𑌰𑍋𑌮𑌿𑌥𑌿𑌰𑍍𑌨𑌾𑌮 𑌮𑌿𑌥𑌿𑌲𑌾 𑌯𑍇𑌨 𑌨𑌿𑌰𑍍𑌮𑌿𑌤𑌾 ।
𑌪𑍍𑌰𑌥𑌮𑍋 𑌜𑌨𑌕𑍋 𑌨𑌾𑌮 𑌜𑌨𑌕𑌾𑌦𑌪𑍍𑌯𑍁𑌦𑌾𑌵𑌸𑍁𑌃 ॥ 4 ॥
𑌉𑌦𑌾𑌵𑌸𑍋𑌸𑍍𑌤𑍁 𑌧𑌰𑍍𑌮𑌾𑌤𑍍𑌮𑌾 𑌜𑌾𑌤𑍋 𑌵𑍈 𑌨𑌨𑍍𑌦𑌿𑌵𑌰𑍍𑌧𑌨𑌃 ।
𑌨𑌨𑍍𑌦𑌿𑌵𑌰𑍍𑌧𑌨𑌪𑍁𑌤𑍍𑌰𑌸𑍍𑌤𑍁 𑌸𑍁𑌕𑍇𑌤𑍁𑌰𑍍𑌨𑌾𑌮 𑌨𑌾𑌮𑌤𑌃 ॥ 5 ॥
𑌸𑍁𑌕𑍇𑌤𑍋𑌰𑌪𑌿 𑌧𑌰𑍍𑌮𑌾𑌤𑍍𑌮𑌾 𑌦𑍇𑌵𑌰𑌾𑌤𑍋 𑌮𑌹𑌾𑌬𑌲𑌃 ।
𑌦𑍇𑌵𑌰𑌾𑌤𑌸𑍍𑌯 𑌰𑌾𑌜𑌰𑍍𑌷𑍇𑌰𑍍𑌬𑍃𑌹𑌦𑍍𑌰𑌥 𑌇𑌤𑌿 𑌸𑍍𑌮𑍃𑌤𑌃 ॥ 6 ॥
𑌬𑍃𑌹𑌦𑍍𑌰𑌥𑌸𑍍𑌯 𑌶𑍂𑌰𑍋𑌽𑌭𑍂𑌨𑍍𑌮𑌹𑌾𑌵𑍀𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌮𑌹𑌾𑌵𑍀𑌰𑌸𑍍𑌯 𑌧𑍃𑌤𑌿𑌮𑌾𑌨𑍍 𑌸𑍁𑌧𑍃𑌤𑌿𑌸𑍍𑌸𑌤𑍍𑌯𑌵𑌿𑌕𑍍𑌰𑌮𑌃 ॥ 7 ॥
𑌸𑍁𑌧𑍃𑌤𑍇𑌰𑌪𑌿 𑌧𑌰𑍍𑌮𑌾𑌤𑍍𑌮𑌾 𑌦𑍃𑌷𑍍𑌟𑌕𑍇𑌤𑍁𑌸𑍍𑌸𑍁𑌧𑌾𑌰𑍍𑌮𑌿𑌕𑌃 ।
𑌦𑍃𑌷𑍍𑌟𑌕𑍇𑌤𑍋𑌸𑍍𑌤𑍁 𑌰𑌾𑌜𑌰𑍍𑌷𑍇𑌰𑍍𑌹𑌰𑍍𑌯𑌶𑍍𑌵 𑌇𑌤𑌿 𑌵𑌿𑌶𑍍𑌰𑍁𑌤𑌃 ॥ 8 ॥
𑌹𑌰𑍍𑌯𑌶𑍍𑌵𑌸𑍍𑌯 𑌮𑌰𑍁𑌃 𑌪𑍁𑌤𑍍𑌰𑍋 𑌮𑌰𑍋𑌃 𑌪𑍁𑌤𑍍𑌰𑌃 𑌪𑍍𑌰𑌤𑌿𑌨𑍍𑌧𑌕𑌃 ।
𑌪𑍍𑌰𑌤𑌿𑌨𑍍𑌧𑌕𑌸𑍍𑌯 𑌧𑌰𑍍𑌮𑌾𑌤𑍍𑌮𑌾 𑌰𑌾𑌜𑌾 𑌕𑍀𑌰𑍍𑌤𑌿𑌰𑌥𑌸𑍍𑌸𑍁𑌤𑌃 ॥ 9 ॥
𑌪𑍁𑌤𑍍𑌰𑌃 𑌕𑍀𑌰𑍍𑌤𑌿𑌰𑌥𑌸𑍍𑌯𑌾𑌪𑌿 𑌦𑍇𑌵𑌮𑍀𑌢 𑌇𑌤𑌿 𑌸𑍍𑌮𑍃𑌤𑌃 ।
𑌦𑍇𑌵𑌮𑍀𑌢𑌸𑍍𑌯 𑌵𑌿𑌬𑍁𑌧𑍋 𑌵𑌿𑌬𑍁𑌧𑌸𑍍𑌯 𑌮𑌹𑍀𑌧𑍍𑌰𑌕𑌃 ॥ 10 ॥
𑌮𑌹𑍀𑌧𑍍𑌰𑌕𑌸𑍁𑌤𑍋 𑌰𑌾𑌜𑌾 𑌕𑍀𑌰𑍍𑌤𑌿𑌰𑌾𑌤𑍋 𑌮𑌹𑌾𑌬𑌲𑌃 ।
𑌕𑍀𑌰𑍍𑌤𑌿𑌰𑌾𑌤𑌸𑍍𑌯 𑌰𑌾𑌜𑌰𑍍𑌷𑍇𑌰𑍍𑌮𑌹𑌾𑌰𑍋𑌮𑌾 𑌵𑍍𑌯𑌜𑌾𑌯𑌤 ॥ 11 ॥
𑌮𑌹𑌾𑌰𑍋𑌮𑍍𑌣𑌸𑍍𑌤𑍁 𑌧𑌰𑍍𑌮𑌾𑌤𑍍𑌮𑌾 𑌸𑍍𑌵𑌰𑍍𑌣𑌰𑍋𑌮𑌾 𑌵𑍍𑌯𑌜𑌾𑌯𑌤 ।
𑌸𑍍𑌵𑌰𑍍𑌣𑌰𑍋𑌮𑍍𑌣𑌸𑍍𑌤𑍁 𑌰𑌾𑌜𑌰𑍍𑌷𑍇𑌰𑍍𑌹𑍍𑌰𑌸𑍍𑌵𑌰𑍋𑌮𑌾 𑌵𑍍𑌯𑌜𑌾𑌯𑌤 ॥ 12 ॥
𑌤𑌸𑍍𑌯 𑌪𑍁𑌤𑍍𑌰𑌦𑍍𑌵𑌯𑌂 𑌜𑌜𑍍𑌞𑍇 𑌧𑌰𑍍𑌮𑌜𑍍𑌞𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌜𑍍𑌯𑍇𑌷𑍍𑌠𑍋𑌽𑌹𑌮𑌨𑍁𑌜𑍋 𑌭𑍍𑌰𑌾𑌤𑌾 𑌮𑌮 𑌵𑍀𑌰𑌃 𑌕𑍁𑌶𑌧𑍍𑌵𑌜𑌃 ॥ 13 ॥
𑌮𑌾𑌂 𑌤𑍁 𑌜𑍍𑌯𑍇𑌷𑍍𑌠𑌂 𑌪𑌿𑌤𑌾 𑌰𑌾𑌜𑍍𑌯𑍇 𑌸𑍋𑌽𑌭𑌿𑌷𑌿𑌚𑍍𑌯 𑌨𑌰𑌾𑌧𑌿𑌪𑌃 ।
𑌕𑍁𑌶𑌧𑍍𑌵𑌜𑌂 𑌸𑌮𑌾𑌵𑍇𑌶𑍍𑌯 𑌭𑌾𑌰𑌂 𑌮𑌯𑌿 𑌵𑌨𑌂 𑌗𑌤𑌃 ॥ 14 ॥
𑌵𑍃𑌦𑍍𑌧𑍇 𑌪𑌿𑌤𑌰𑌿 𑌸𑍍𑌵𑌰𑍍𑌯𑌾𑌤𑍇 𑌧𑌰𑍍𑌮𑍇𑌣 𑌧𑍁𑌰𑌮𑌾𑌵𑌹𑌮𑍍 ।
𑌭𑍍𑌰𑌾𑌤𑌰𑌂 𑌦𑍇𑌵𑌸𑌙𑍍𑌕𑌾𑌶𑌂 𑌸𑍍𑌨𑍇𑌹𑌾𑌤𑍍𑌪𑌶𑍍𑌯𑌨𑍍 𑌕𑍁𑌶𑌧𑍍𑌵𑌜𑌮𑍍 ॥ 15 ॥
𑌕𑌸𑍍𑌯 𑌚𑌿𑌤𑍍𑌤𑍍𑌵𑌥𑌕𑌾𑌲𑌸𑍍𑌯 𑌸𑌾𑌙𑍍𑌕𑌾𑌶𑍍𑌯𑌾𑌦𑌗𑌮𑌤𑍍𑌪𑍁𑌰𑌾𑌤𑍍 ।
𑌸𑍁𑌧𑌨𑍍𑌵𑌾 𑌵𑍀𑌰𑍍𑌯𑌵𑌾𑌨𑍍𑌰𑌾𑌜𑌾 𑌮𑌿𑌥𑌿𑌲𑌾𑌮𑌵𑌰𑍋𑌧𑌕𑌃 ॥ 16 ॥
𑌸 𑌚 𑌮𑍇 𑌪𑍍𑌰𑍇𑌷𑌯𑌾𑌮𑌾𑌸 𑌶𑍈𑌵𑌂 𑌧𑌨𑍁𑌰𑌨𑍁𑌤𑍍𑌤𑌮𑌮𑍍 ।
𑌸𑍀𑌤𑌾 𑌕𑌨𑍍𑌯𑌾 𑌚 𑌪𑌦𑍍𑌮𑌾𑌕𑍍𑌷𑍀 𑌮𑌹𑍍𑌯𑌂 𑌵𑍈 𑌦𑍀𑌯𑌤𑌾𑌮𑌿𑌤𑌿 ॥ 17 ॥
𑌤𑌸𑍍𑌯𑌾𑌪𑍍𑌰𑌦𑌾𑌨𑌾𑌦𑍍𑌬𑍍𑌰𑌹𑍍𑌮𑌰𑍍𑌷𑍇 𑌯𑍁𑌦𑍍𑌧𑌮𑌾𑌸𑍀𑌨𑍍𑌮𑌯𑌾 𑌸𑌹 ।
𑌸 𑌹𑌤𑍋𑌽𑌭𑌿𑌮𑍁𑌖𑍋 𑌰𑌾𑌜𑌾 𑌸𑍁𑌧𑌨𑍍𑌵𑌾 𑌤𑍁 𑌮𑌯𑌾 𑌰𑌣𑍇 ॥ 18 ॥
𑌨𑌿𑌹𑌤𑍍𑌯 𑌤𑌂 𑌮𑍁𑌨𑌿𑌶𑍍𑌰𑍇𑌷𑍍𑌠 𑌸𑍁𑌧𑌨𑍍𑌵𑌾𑌨𑌂 𑌨𑌰𑌾𑌧𑌿𑌪𑌮𑍍 ।
𑌸𑌾𑌙𑍍𑌕𑌾𑌶𑍍𑌯𑍇 𑌭𑍍𑌰𑌾𑌤𑌰𑌂 𑌵𑍀𑌰𑌮𑌭𑍍𑌯𑌷𑌿𑌞𑍍𑌚𑌂 𑌕𑍁𑌶𑌧𑍍𑌵𑌜𑌮𑍍 ॥ 19 ॥
𑌕𑌨𑍀𑌯𑌾𑌨𑍇𑌷 𑌮𑍇 𑌭𑍍𑌰𑌾𑌤𑌾 𑌅𑌹𑌂 𑌜𑍍𑌯𑍇𑌷𑍍𑌠𑍋 𑌮𑌹𑌾𑌮𑍁𑌨𑍇 ।
𑌦𑌦𑌾𑌮𑌿 𑌪𑌰𑌮𑌪𑍍𑌰𑍀𑌤𑍋 𑌵𑌧𑍍𑌵𑍗 𑌤𑍇 𑌮𑍁𑌨𑌿𑌪𑍁𑌙𑍍𑌗𑌵 ॥ 20 ॥
𑌸𑍀𑌤𑌾𑌂 𑌰𑌾𑌮𑌾𑌯 𑌭𑌦𑍍𑌰𑌂 𑌤𑍇 𑌊𑌰𑍍𑌮𑌿𑌲𑌾 𑌲𑌕𑍍𑌷𑍍𑌮𑌣𑌾𑌯 𑌚 ।
𑌵𑍀𑌰𑍍𑌯𑌶𑍁𑌲𑍍𑌕𑌾𑌂 𑌮𑌮 𑌸𑍁𑌤𑌾𑌂 𑌸𑍀𑌤𑌾𑌂 𑌸𑍁𑌰𑌸𑍁𑌤𑍋𑌪𑌮𑌾𑌮𑍍 ॥ 21 ॥
𑌦𑍍𑌵𑌿𑌤𑍀𑌯𑌾𑌮𑍂𑌰𑍍𑌮𑌿𑌲𑌾𑌂 𑌚𑍈𑌵 𑌤𑍍𑌰𑌿𑌰𑍍𑌦𑌦𑌾𑌮𑌿 𑌨 𑌸𑌂𑌶𑌯𑌃 ।
𑌦𑌦𑌾𑌮𑌿 𑌪𑌰𑌮𑌪𑍍𑌰𑍀𑌤𑍋 𑌵𑌧𑍍𑌵𑍗 𑌤𑍇 𑌰𑌘𑍁𑌨𑌨𑍍𑌦𑌨 ॥ 22 ॥
𑌰𑌾𑌮𑌲𑌕𑍍𑌷𑍍𑌮𑌣𑌯𑍋 𑌰𑌾𑌜𑌨𑍍 𑌗𑍋𑌦𑌾𑌨𑌂 𑌕𑌾𑌰𑌯𑌸𑍍𑌵 𑌹 ।
𑌪𑌿𑌤𑍃𑌕𑌾𑌰𑍍𑌯𑌂 𑌚 𑌭𑌦𑍍𑌰𑌂 𑌤𑍇 𑌤𑌤𑍋 𑌵𑍈𑌵𑌾𑌹𑌿𑌕𑌂 𑌕𑍁𑌰𑍁 ॥ 23 ॥
𑌮𑌖𑌾 𑌹𑍍𑌯𑌦𑍍𑌯 𑌮𑌹𑌾𑌬𑌾𑌹𑍋 𑌤𑍃𑌤𑍀𑌯𑍇 𑌦𑌿𑌵𑌸𑍇 𑌪𑍍𑌰𑌭𑍋 ।
𑌫𑌲𑍍𑌗𑍁𑌨𑍍𑌯𑌾𑌮𑍁𑌤𑍍𑌤𑌰𑍇 𑌰𑌾𑌜𑌂𑌸𑍍𑌤𑌸𑍍𑌮𑌿𑌨𑍍𑌵𑍈𑌵𑌾𑌹𑌿𑌕𑌂 𑌕𑍁𑌰𑍁 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌣𑍍𑌡𑍇 𑌏𑌕𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekasaptatitamassargaḥ |
evaṃ bruvāṇaṃ janakaḥ pratyuvāca kṛtāñjaliḥ |
śrotumarhasi bhadraṃ te kulaṃ naḥ parikīrtitam || 1 ||
pradāne hi muniśreṣṭha kulaṃ niravaśeṣataḥ |
vaktavyaṃ kulajātena tannibodha mahāmune || 2 ||
rājā'bhūt triṣu lokeṣu viśruta ssvena karmaṇā |
nimiḥ paramadharmātmā sarvasattvavatāṃ varaḥ || 3 ||
tasya putromithirnāma mithilā yena nirmitā |
prathamo janako nāma janakādapyudāvasuḥ || 4 ||
udāvasostu dharmātmā jāto vai nandivardhanaḥ |
nandivardhanaputrastu suketurnāma nāmataḥ || 5 ||
suketorapi dharmātmā devarāto mahābalaḥ |
devarātasya rājarṣerbṛhadratha iti smṛtaḥ || 6 ||
bṛhadrathasya śūro'bhūnmahāvīraḥ pratāpavān |
mahāvīrasya dhṛtimān sudhṛtissatyavikramaḥ || 7 ||
sudhṛterapi dharmātmā dṛṣṭaketussudhārmikaḥ |
dṛṣṭaketostu rājarṣerharyaśva iti viśrutaḥ || 8 ||
haryaśvasya maruḥ putro maroḥ putraḥ pratindhakaḥ |
pratindhakasya dharmātmā rājā kīrtirathassutaḥ || 9 ||
putraḥ kīrtirathasyāpi devamīḍha iti smṛtaḥ |
devamīḍhasya vibudho vibudhasya mahīdhrakaḥ || 10 ||
mahīdhrakasuto rājā kīrtirāto mahābalaḥ |
kīrtirātasya rājarṣermahāromā vyajāyata || 11 ||
mahāromṇastu dharmātmā svarṇaromā vyajāyata |
svarṇaromṇastu rājarṣerhrasvaromā vyajāyata || 12 ||
tasya putradvayaṃ jajñe dharmajñasya mahātmanaḥ |
jyeṣṭho'hamanujo bhrātā mama vīraḥ kuśadhvajaḥ || 13 ||
māṃ tu jyeṣṭhaṃ pitā rājye so'bhiṣicya narādhipaḥ |
kuśadhvajaṃ samāveśya bhāraṃ mayi vanaṃ gataḥ || 14 ||
vṛddhe pitari svaryāte dharmeṇa dhuramāvaham |
bhrātaraṃ devasaṅkāśaṃ snehātpaśyan kuśadhvajam || 15 ||
kasya cittvathakālasya sāṅkāśyādagamatpurāt |
sudhanvā vīryavānrājā mithilāmavarodhakaḥ || 16 ||
sa ca me preṣayāmāsa śaivaṃ dhanuranuttamam |
sītā kanyā ca padmākṣī mahyaṃ vai dīyatāmiti || 17 ||
tasyāpradānādbrahmarṣe yuddhamāsīnmayā saha |
sa hato'bhimukho rājā sudhanvā tu mayā raṇe || 18 ||
nihatya taṃ muniśreṣṭha sudhanvānaṃ narādhipam |
sāṅkāśye bhrātaraṃ vīramabhyaṣiñcaṃ kuśadhvajam || 19 ||
kanīyāneṣa me bhrātā ahaṃ jyeṣṭho mahāmune |
dadāmi paramaprīto vadhvau te munipuṅgava || 20 ||
sītāṃ rāmāya bhadraṃ te ūrmilā lakṣmaṇāya ca |
vīryaśulkāṃ mama sutāṃ sītāṃ surasutopamām || 21 ||
dvitīyāmūrmilāṃ caiva trirdadāmi na saṃśayaḥ |
dadāmi paramaprīto vadhvau te raghunandana || 22 ||
rāmalakṣmaṇayo rājan godānaṃ kārayasva ha |
pitṛkāryaṃ ca bhadraṃ te tato vaivāhikaṃ kuru || 23 ||
makhā hyadya mahābāho tṛtīye divase prabho |
phalgunyāmuttare rājaṃstasminvaivāhikaṃ kuru || 24 ||
ityārṣe śrīmadrāmāyaṇe vālmīkīya ādikāvye bālakāṇḍe ekasaptatitamassargaḥ ||
InfoLyter.in — Sacred Vedic Knowledge Portal · Free forever