📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
1.19 𑌬𑌾𑌲𑌕𑌾𑌣𑍍𑌡 - 𑌏𑌕𑍋𑌨𑌵𑌿𑌂𑌶 𑌸𑌰𑍍𑌗𑌃
1.19 Balakanda - Ekonavimsha Sargah
Valmiki Grantha
𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌣𑍍𑌡𑌮𑍍 ।
𑌅𑌥 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌚𑍍𑌛𑍍𑌰𑍁𑌤𑍍𑌵𑌾 𑌰𑌾𑌜𑌸𑌿𑌂𑌹𑌸𑍍𑌯 𑌵𑌾𑌕𑍍𑌯𑌮𑌦𑍍𑌭𑍁𑌤𑌵𑌿𑌸𑍍𑌤𑌰𑌮𑍍 ।
𑌹𑍃𑌷𑍍𑌟𑌰𑍋𑌮𑌾 𑌮𑌹𑌾𑌤𑍇𑌜𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌭𑍍𑌯𑌭𑌾𑌷𑌤 ॥ 1 ॥
𑌸𑌦𑍃𑌶𑌂 𑌰𑌾𑌜𑌶𑌾𑌰𑍍𑌦𑍂𑌲 𑌤𑌵𑍈𑌤𑌦𑍍𑌭𑍁𑌵𑌿 𑌨𑌾𑌨𑍍𑌯𑌥𑌾 ।
𑌮𑌹𑌾𑌵𑌂𑌶𑌪𑍍𑌰𑌸𑍂𑌤𑌸𑍍𑌯 𑌵𑌸𑌿𑌷𑍍𑌠𑌵𑍍𑌯𑌪𑌦𑍇𑌶𑌿𑌨𑌃 ॥ 2 ॥
𑌯𑌤𑍍𑌤𑍁 𑌮𑍇 𑌹𑍃𑌦𑍍𑌗𑌤𑌂 𑌵𑌾𑌕𑍍𑌯𑌂 𑌤𑌸𑍍𑌯 𑌕𑌾𑌰𑍍𑌯𑌸𑍍𑌯 𑌨𑌿𑌶𑍍𑌚𑌯𑌮𑍍 ।
𑌕𑍁𑌰𑍂𑌷𑍍𑌵 𑌰𑌾𑌜𑌶𑌾𑌰𑍍𑌦𑍂𑌲 𑌭𑌵 𑌸𑌤𑍍𑌯𑌪𑍍𑌰𑌤𑌿𑌶𑍍𑌰𑌵𑌃 ॥ 3 ॥
𑌅𑌹𑌨𑍍𑌨𑌿𑌯𑌮𑌮𑌾𑌤𑌿𑌷𑍍𑌠𑍇 𑌸𑌿𑌧𑍍𑌯𑌰𑍍𑌥𑌂 𑌪𑍁𑌰𑍁𑌷𑌰𑍍𑌷𑌭 ।
𑌤𑌸𑍍𑌯 𑌵𑌿𑌘𑍍𑌨𑌕𑌰𑍗 𑌦𑍍𑌵𑍗 𑌤𑍁 𑌰𑌾𑌕𑍍𑌷𑌸𑍗 𑌕𑌾𑌮𑌰𑍂𑌪𑌿𑌣𑍗 ॥ 4 ॥
𑌵𑍍𑌰𑌤𑍇 𑌮𑍇 𑌬𑌹𑍁𑌶𑌶𑍍𑌚𑍀𑌰𑍍𑌣𑍇 𑌸𑌮𑌾𑌪𑍍𑌤𑍍𑌯𑌾𑌂 𑌰𑌾𑌕𑍍𑌷𑌸𑌾𑌵𑌿𑌮𑍗 ।
𑌮𑌾𑌰𑍀𑌚𑌶𑍍𑌚 𑌸𑍁𑌬𑌾𑌹𑍁𑌶𑍍𑌚 𑌵𑍀𑌰𑍍𑌯𑌵𑌨𑍍𑌤𑍗 𑌸𑍁𑌶𑌿𑌕𑍍𑌷𑌿𑌤𑍗 ॥ 5 ॥
𑌸𑌮𑌾𑌂𑌸𑌰𑍁𑌧𑌿𑌰𑍗𑌘𑍇𑌣 𑌵𑍇𑌦𑌿𑌂 𑌤𑌾𑌮𑌭𑍍𑌯𑌵𑌰𑍍𑌷𑌤𑌾𑌮𑍍 ।
𑌅𑌵𑌧𑍂𑌤𑍇 𑌤𑌥𑌾𑌭𑍂𑌤𑍇 𑌤𑌸𑍍𑌮𑌿𑌨𑍍𑌨𑌿𑌯𑌮𑌨𑌿𑌶𑍍𑌚𑌯𑍇 ॥ 6 ॥
𑌕𑍃𑌤𑌶𑍍𑌰𑌮𑍋 𑌨𑌿𑌰𑍁𑌤𑍍𑌸𑌾𑌹𑌸𑍍𑌤𑌸𑍍𑌮𑌾𑌦𑍍𑌦𑍇𑌶𑌾𑌦𑌪𑌾𑌕𑍍𑌰𑌮𑍇 ।
𑌨 𑌚 𑌮𑍇 𑌕𑍍𑌰𑍋𑌧𑌮𑍁𑌤𑍍𑌸𑍍𑌰𑌷𑍍𑌟𑍁𑌂 𑌬𑍁𑌦𑍍𑌧𑌿𑌰𑍍𑌭𑌵𑌤𑌿 𑌪𑌾𑌰𑍍𑌥𑌿𑌵 ॥ 7 ॥
𑌤𑌥𑌾 𑌭𑍂𑌤𑌾 𑌹𑌿 𑌸𑌾 𑌚𑌰𑍍𑌯𑌾 𑌨 𑌶𑌾𑌪𑌸𑍍𑌤𑌤𑍍𑌰 𑌮𑍁𑌚𑍍𑌯𑌤𑍇 ।
𑌸𑍍𑌵𑌪𑍁𑌤𑍍𑌰𑌂 𑌰𑌾𑌜𑌶𑌾𑌰𑍍𑌦𑍂𑌲 𑌰𑌾𑌮𑌂 𑌸𑌤𑍍𑌯𑌪𑌰𑌾𑌕𑍍𑌰𑌮𑌮𑍍 ॥ 8 ॥
𑌕𑌾𑌕𑌪𑌕𑍍𑌷𑌧𑌰𑌂 𑌶𑍂𑌰𑌂 𑌜𑍍𑌯𑍇𑌷𑍍𑌠𑌂 𑌮𑍇 𑌦𑌾𑌤𑍁𑌮𑌰𑍍𑌹𑌸𑌿 ।
𑌶𑌕𑍍𑌤𑍋 𑌹𑍍𑌯𑍇𑌷 𑌮𑌯𑌾 𑌗𑍁𑌪𑍍𑌤𑍋 𑌦𑌿𑌵𑍍𑌯𑍇𑌨 𑌸𑍍𑌵𑍇𑌨 𑌤𑍇𑌜𑌸𑌾 ॥ 9 ॥
𑌰𑌾𑌕𑍍𑌷𑌸𑌾 𑌯𑍇 𑌵𑌿𑌕𑌰𑍍𑌤𑌾𑌰𑌸𑍍𑌤𑍇𑌷𑌾𑌮𑌪𑌿 𑌵𑌿𑌨𑌾𑌶𑌨𑍇 ।
𑌶𑍍𑌰𑍇𑌯𑌶𑍍𑌚𑌾𑌸𑍍𑌮𑍈 𑌪𑍍𑌰𑌦𑌾𑌸𑍍𑌯𑌾𑌮𑌿 𑌬𑌹𑍁𑌰𑍂𑌪𑌂 𑌨 𑌸𑌂𑌶𑌯𑌃 ॥ 10 ॥
𑌤𑍍𑌰𑌯𑌾𑌣𑌾𑌮𑌪𑌿 𑌲𑍋𑌕𑌾𑌨𑌾𑌂 𑌯𑍇𑌨 𑌖𑍍𑌯𑌾𑌤𑌿𑌂 𑌗𑌮𑌿𑌷𑍍𑌯𑌤𑌿 ।
𑌨 𑌚 𑌤𑍗 𑌰𑌾𑌮𑌮𑌾𑌸𑌾𑌦𑍍𑌯 𑌶𑌕𑍍𑌤𑍗 𑌸𑍍𑌥𑌾𑌤𑍁𑌂 𑌕𑌥𑌞𑍍𑌚𑌨 ॥ 11 ॥
𑌨 𑌚 𑌤𑍗 𑌰𑌾𑌘𑌵𑌾𑌦𑌨𑍍𑌯𑍋 𑌹𑌨𑍍𑌤𑍁𑌮𑍁𑌤𑍍𑌸𑌹𑌤𑍇 𑌪𑍁𑌮𑌾𑌨𑍍 ।
𑌵𑍀𑌰𑍍𑌯𑍋𑌤𑍍𑌸𑌿𑌕𑍍𑌤𑍗 𑌹𑌿 𑌤𑍗 𑌪𑌾𑌪𑍗 𑌕𑌾𑌲𑌪𑌾𑌶𑌵𑌶𑌂 𑌗𑌤𑍗 ॥ 12 ॥
𑌰𑌾𑌮𑌸𑍍𑌯 𑌰𑌾𑌜𑌶𑌾𑌰𑍍𑌦𑍂𑌲 𑌨 𑌪𑌰𑍍𑌯𑌾𑌪𑍍𑌤𑍗 𑌮𑌹𑌾𑌤𑍍𑌮𑌨𑌃 ।
𑌨 𑌚 𑌪𑍁𑌤𑍍𑌰𑌕𑍃𑌤𑌸𑍍𑌨𑍇𑌹𑌂 𑌕𑌰𑍍𑌤𑍁𑌮𑌰𑍍𑌹𑌸𑌿 𑌪𑌾𑌰𑍍𑌥𑌿𑌵 ॥ 13 ॥
𑌅𑌹𑌂 𑌤𑍇 𑌪𑍍𑌰𑌤𑌿𑌜𑌾𑌨𑌾𑌮𑌿 𑌹𑌤𑍗 𑌤𑍗 𑌵𑌿𑌦𑍍𑌧𑌿 𑌰𑌾𑌕𑍍𑌷𑌸𑍗 ।
𑌅𑌹𑌂 𑌵𑍇𑌦𑍍𑌮𑌿 𑌮𑌹𑌾𑌤𑍍𑌮𑌾𑌨𑌂 𑌰𑌾𑌮𑌂 𑌸𑌤𑍍𑌯𑌪𑌰𑌾𑌕𑍍𑌰𑌮𑌮𑍍 ॥ 14 ॥
𑌵𑌸𑌿𑌷𑍍𑌠𑍋𑌽𑌪𑌿 𑌮𑌹𑌾𑌤𑍇𑌜𑌾 𑌯𑍇 𑌚𑍇𑌮𑍇 𑌤𑌪𑌸𑌿 𑌸𑍍𑌥𑌿𑌤𑌾𑌃 ।
𑌯𑌦𑌿 𑌤𑍇 𑌧𑌰𑍍𑌮𑌲𑌾𑌭𑌂 𑌚 𑌯𑌶𑌶𑍍𑌚 𑌪𑌰𑌮𑌂 𑌭𑍁𑌵𑌿 ॥ 15 ॥
𑌸𑍍𑌥𑌿𑌤𑌮𑌿𑌚𑍍𑌛𑌸𑌿 𑌰𑌾𑌜𑍇𑌨𑍍𑌦𑍍𑌰 𑌰𑌾𑌮𑌂 𑌮𑍇 𑌦𑌾𑌤𑍁𑌮𑌰𑍍𑌹𑌸𑌿 ।
𑌯𑌦𑌿𑌹𑍍𑌯𑌨𑍁𑌜𑍍𑌞𑌾𑌂 𑌕𑌾𑌕𑍁𑌤𑍍𑌸𑍍𑌥 𑌦𑌦𑌤𑍇 𑌤𑌵 𑌮𑌨𑍍𑌤𑍍𑌰𑌿𑌣𑌃 ॥ 16 ॥
𑌵𑌸𑌿𑌷𑍍𑌠𑌪𑍍𑌰𑌮𑍁𑌖𑌾𑌃 𑌸𑌰𑍍𑌵𑍇 𑌤𑌤𑍋 𑌰𑌾𑌮𑌂 𑌵𑌿𑌸𑌰𑍍𑌜𑌯 ।
𑌅𑌭𑌿𑌪𑍍𑌰𑍇𑌤𑌮𑌸𑌂𑌸𑌕𑍍𑌤𑌮𑌾𑌤𑍍𑌮𑌜𑌂 𑌦𑌾𑌤𑍁𑌮𑌰𑍍𑌹𑌸𑌿 ॥ 17 ॥
𑌦𑌶𑌰𑌾𑌤𑍍𑌰𑌂 𑌹𑌿 𑌯𑌜𑍍𑌞𑌸𑍍𑌯 𑌰𑌾𑌮𑌂 𑌰𑌾𑌜𑍀𑌵𑌲𑍋𑌚𑌨𑌮𑍍 ।
𑌨𑌾𑌤𑍍𑌯𑍇𑌤𑌿 𑌕𑌾𑌲𑍋 𑌯𑌜𑍍𑌞𑌸𑍍𑌯 𑌯𑌥𑌾𑌽𑌯𑌂 𑌮𑌮 𑌰𑌾𑌘𑌵 ॥ 18 ॥
𑌤𑌥𑌾 𑌕𑍁𑌰𑍁𑌷𑍍𑌵 𑌭𑌦𑍍𑌰𑌂 𑌤𑍇 𑌮𑌾 𑌚 𑌶𑍋𑌕𑍇 𑌮𑌨𑌃 𑌕𑍃𑌥𑌾𑌃 ।
𑌇𑌤𑍍𑌯𑍇𑌵𑌮𑍁𑌕𑍍𑌤𑍍𑌵𑌾 𑌧𑌰𑍍𑌮𑌾𑌤𑍍𑌮𑌾 𑌧𑌰𑍍𑌮𑌾𑌰𑍍𑌥𑌸𑌹𑌿𑌤𑌂 𑌵𑌚𑌃 ॥ 19 ॥
𑌵𑌿𑌰𑌰𑌾𑌮 𑌮𑌹𑌾𑌤𑍇𑌜𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ।
𑌸 𑌤𑌨𑍍𑌨𑌿𑌶𑌮𑍍𑌯 𑌰𑌾𑌜𑍇𑌨𑍍𑌦𑍍𑌰𑍋 𑌵𑌿𑌶𑍍𑌵𑌾𑌮𑌿𑌤𑍍𑌰𑌵𑌚𑌶𑍍𑌶𑍁𑌭𑌮𑍍 ॥ 20 ॥
𑌶𑍋𑌕𑌮𑌭𑍍𑌯𑌗𑌮𑌤𑍍𑌤𑍀𑌵𑍍𑌰𑌂 𑌵𑍍𑌯𑌷𑍀𑌦𑌤 𑌭𑌯𑌾𑌨𑍍𑌵𑌿𑌤𑌃 ।
𑌇𑌤𑌿 𑌹𑍃𑌦𑌯𑌮𑌨𑍋𑌵𑌿𑌦𑌾𑌰𑌣𑌂 𑌮𑍁𑌨𑌿𑌵𑌚𑌨𑌂 𑌤𑌦𑌤𑍀𑌵 𑌶𑍁𑌶𑍍𑌰𑍁𑌵𑌾𑌨𑍍 ।
𑌨𑌰𑌪𑌤𑌿𑌰𑌭𑌵𑌨𑍍𑌮𑌹𑌾𑌂𑌸𑍍𑌤𑌦𑌾 𑌵𑍍𑌯𑌥𑌿𑌤𑌮𑌨𑌾𑌃 𑌪𑍍𑌰𑌚𑌚𑌾𑌲 𑌚𑌾𑌸𑌨𑌾𑌤𑍍 ॥ 21 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌣𑍍𑌡𑍇 𑌏𑌕𑍋𑌨𑌵𑌿𑌂𑌶𑌸𑍍𑌸𑌰𑍍𑌗𑌃 ॥
Roman (IAST) Transliteration
śrīmadvālmīkīya rāmāyaṇe bālakāṇḍam |
atha ekonaviṃśassargaḥ |
tacchrutvā rājasiṃhasya vākyamadbhutavistaram |
hṛṣṭaromā mahātejā viśvāmitro'bhyabhāṣata || 1 ||
sadṛśaṃ rājaśārdūla tavaitadbhuvi nānyathā |
mahāvaṃśaprasūtasya vasiṣṭhavyapadeśinaḥ || 2 ||
yattu me hṛdgataṃ vākyaṃ tasya kāryasya niścayam |
kurūṣva rājaśārdūla bhava satyapratiśravaḥ || 3 ||
ahanniyamamātiṣṭhe sidhyarthaṃ puruṣarṣabha |
tasya vighnakarau dvau tu rākṣasau kāmarūpiṇau || 4 ||
vrate me bahuśaścīrṇe samāptyāṃ rākṣasāvimau |
mārīcaśca subāhuśca vīryavantau suśikṣitau || 5 ||
samāṃsarudhiraugheṇa vediṃ tāmabhyavarṣatām |
avadhūte tathābhūte tasminniyamaniścaye || 6 ||
kṛtaśramo nirutsāhastasmāddeśādapākrame |
na ca me krodhamutsraṣṭuṃ buddhirbhavati pārthiva || 7 ||
tathā bhūtā hi sā caryā na śāpastatra mucyate |
svaputraṃ rājaśārdūla rāmaṃ satyaparākramam || 8 ||
kākapakṣadharaṃ śūraṃ jyeṣṭhaṃ me dātumarhasi |
śakto hyeṣa mayā gupto divyena svena tejasā || 9 ||
rākṣasā ye vikartārasteṣāmapi vināśane |
śreyaścāsmai pradāsyāmi bahurūpaṃ na saṃśayaḥ || 10 ||
trayāṇāmapi lokānāṃ yena khyātiṃ gamiṣyati |
na ca tau rāmamāsādya śaktau sthātuṃ kathañcana || 11 ||
na ca tau rāghavādanyo hantumutsahate pumān |
vīryotsiktau hi tau pāpau kālapāśavaśaṃ gatau || 12 ||
rāmasya rājaśārdūla na paryāptau mahātmanaḥ |
na ca putrakṛtasnehaṃ kartumarhasi pārthiva || 13 ||
ahaṃ te pratijānāmi hatau tau viddhi rākṣasau |
ahaṃ vedmi mahātmānaṃ rāmaṃ satyaparākramam || 14 ||
vasiṣṭho'pi mahātejā ye ceme tapasi sthitāḥ |
yadi te dharmalābhaṃ ca yaśaśca paramaṃ bhuvi || 15 ||
sthitamicchasi rājendra rāmaṃ me dātumarhasi |
yadihyanujñāṃ kākutstha dadate tava mantriṇaḥ || 16 ||
vasiṣṭhapramukhāḥ sarve tato rāmaṃ visarjaya |
abhipretamasaṃsaktamātmajaṃ dātumarhasi || 17 ||
daśarātraṃ hi yajñasya rāmaṃ rājīvalocanam |
nātyeti kālo yajñasya yathā'yaṃ mama rāghava || 18 ||
tathā kuruṣva bhadraṃ te mā ca śoke manaḥ kṛthāḥ |
ityevamuktvā dharmātmā dharmārthasahitaṃ vacaḥ || 19 ||
virarāma mahātejā viśvāmitro mahāmuniḥ |
sa tanniśamya rājendro viśvāmitravacaśśubham || 20 ||
śokamabhyagamattīvraṃ vyaṣīdata bhayānvitaḥ |
iti hṛdayamanovidāraṇaṃ munivacanaṃ tadatīva śuśruvān |
narapatirabhavanmahāṃstadā vyathitamanāḥ pracacāla cāsanāt || 21 ||
ityārṣe śrīmadrāmāyaṇe vālmīkīya ādikāvye bālakāṇḍe ekonaviṃśassargaḥ ||
InfoLyter.in — Sacred Vedic Knowledge Portal · Free forever