Vidura Niti - Udyoga Parvam, Adhyayah 34

ॐ

𑌵𑌿𑌦𑍁𑌰 𑌨𑍀𑌤𑌿 - 𑌉𑌦𑍍𑌯𑍋𑌗 𑌪𑌰𑍍𑌵𑌮𑍍, 𑌅𑌧𑍍𑌯𑌾𑌯𑌃 34

Vyasa Grantha

॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿

𑌵𑌿𑌦𑍁𑌰𑌨𑍀𑌤𑌿𑌵𑌾𑌕𑍍𑌯𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥

𑌧𑍃𑌤𑌰𑌾𑌷𑍍𑌟𑍍𑌰 𑌉𑌵𑌾𑌚 ।

𑌜𑌾𑌗𑍍𑌰𑌤𑍋 𑌦𑌹𑍍𑌯𑌮𑌾𑌨𑌸𑍍𑌯 𑌯𑌤𑍍𑌕𑌾𑌰𑍍𑌯𑌮𑌨𑍁𑌪𑌶𑍍𑌯𑌸𑌿 ।

𑌤𑌦𑍍𑌬𑍍𑌰𑍂𑌹𑌿 𑌤𑍍𑌵𑌂 𑌹𑌿 𑌨𑌸𑍍𑌤𑌾𑌤 𑌧𑌰𑍍𑌮𑌾𑌰𑍍𑌥𑌕𑍁𑌶𑌲𑌃 𑌶𑍁𑌚𑌿𑌃 ॥ 1॥

𑌤𑍍𑌵𑌂 𑌮𑌾𑌂 𑌯𑌥𑌾𑌵𑌦𑍍𑌵𑌿𑌦𑍁𑌰 𑌪𑍍𑌰𑌶𑌾𑌧𑌿

𑌪𑍍𑌰𑌜𑍍𑌞𑌾 𑌪𑍂𑌰𑍍𑌵𑌂 𑌸𑌰𑍍𑌵𑌮𑌜𑌾𑌤𑌶𑌤𑍍𑌰𑍋𑌃 ।

𑌯𑌨𑍍𑌮𑌨𑍍𑌯𑌸𑍇 𑌪𑌥𑍍𑌯𑌮𑌦𑍀𑌨𑌸𑌤𑍍𑌤𑍍𑌵

𑌶𑍍𑌰𑍇𑌯𑌃 𑌕𑌰𑌂 𑌬𑍍𑌰𑍂𑌹𑌿 𑌤𑌦𑍍𑌵𑍈 𑌕𑍁𑌰𑍂𑌣𑌾𑌮𑍍 ॥ 2॥

𑌪𑌾𑌪𑌾𑌶𑌙𑍍𑌗𑍀 𑌪𑌾𑌪𑌮𑍇𑌵 𑌨𑍗𑌪𑌶𑍍𑌯𑌨𑍍

𑌪𑍃𑌚𑍍𑌛𑌾𑌮𑌿 𑌤𑍍𑌵𑌾𑌂 𑌵𑍍𑌯𑌾𑌕𑍁𑌲𑍇𑌨𑌾𑌤𑍍𑌮𑌨𑌾𑌹𑌮𑍍 ।

𑌕𑌵𑍇 𑌤𑌨𑍍𑌮𑍇 𑌬𑍍𑌰𑍂𑌹𑌿 𑌸𑌰𑍍𑌵𑌂 𑌯𑌥𑌾𑌵𑌨𑍍

𑌮𑌨𑍀𑌷𑌿𑌤𑌂 𑌸𑌰𑍍𑌵𑌮𑌜𑌾𑌤𑌶𑌤𑍍𑌰𑍋𑌃 ॥ 3॥

𑌵𑌿𑌦𑍁𑌰 𑌉𑌵𑌾𑌚 ।

𑌶𑍁𑌭𑌂 𑌵𑌾 𑌯𑌦𑌿 𑌵𑌾 𑌪𑌾𑌪𑌂 𑌦𑍍𑌵𑍇𑌷𑍍𑌯𑌂 𑌵𑌾 𑌯𑌦𑌿 𑌵𑌾 𑌪𑍍𑌰𑌿𑌯𑌮𑍍 ।

𑌅𑌪𑍃𑌷𑍍𑌟𑌸𑍍𑌤𑌸𑍍𑌯 𑌤𑌦𑍍𑌬𑍍𑌰𑍂𑌯𑌾𑌦𑍍𑌯𑌸𑍍𑌯 𑌨𑍇𑌚𑍍𑌛𑍇𑌤𑍍𑌪𑌰𑌾𑌭𑌵𑌮𑍍 ॥ 4॥

𑌤𑌸𑍍𑌮𑌾𑌦𑍍𑌵𑌕𑍍𑌷𑍍𑌯𑌾𑌮𑌿 𑌤𑍇 𑌰𑌾𑌜𑌨𑍍𑌭𑌵𑌮𑌿𑌚𑍍𑌛𑌨𑍍𑌕𑍁𑌰𑍂𑌨𑍍𑌪𑍍𑌰𑌤𑌿 ।

𑌵𑌚𑌃 𑌶𑍍𑌰𑍇𑌯𑌃 𑌕𑌰𑌂 𑌧𑌰𑍍𑌮𑍍𑌯𑌂 𑌬𑍍𑌰𑍁𑌵𑌤𑌸𑍍𑌤𑌨𑍍𑌨𑌿𑌬𑍋𑌧 𑌮𑍇 ॥ 5॥

𑌮𑌿𑌥𑍍𑌯𑍋𑌪𑍇𑌤𑌾𑌨𑌿 𑌕𑌰𑍍𑌮𑌾𑌣𑌿 𑌸𑌿𑌧𑍍𑌯𑍇𑌯𑍁𑌰𑍍𑌯𑌾𑌨𑌿 𑌭𑌾𑌰𑌤 ।

𑌅𑌨𑍁𑌪𑌾𑌯 𑌪𑍍𑌰𑌯𑍁𑌕𑍍𑌤𑌾𑌨𑌿 𑌮𑌾 𑌸𑍍𑌮 𑌤𑍇𑌷𑍁 𑌮𑌨𑌃 𑌕𑍃𑌥𑌾𑌃 ॥ 6॥

𑌤𑌥𑍈𑌵 𑌯𑍋𑌗𑌵𑌿𑌹𑌿𑌤𑌂 𑌨 𑌸𑌿𑌧𑍍𑌯𑍇𑌤𑍍𑌕𑌰𑍍𑌮 𑌯𑌨𑍍𑌨𑍃𑌪 ।

𑌉𑌪𑌾𑌯𑌯𑍁𑌕𑍍𑌤𑌂 𑌮𑍇𑌧𑌾𑌵𑍀 𑌨 𑌤𑌤𑍍𑌰 𑌗𑍍𑌲𑌪𑌯𑍇𑌨𑍍𑌮𑌨𑌃 ॥ 7॥

𑌅𑌨𑍁𑌬𑌨𑍍𑌧𑌾𑌨𑌵𑍇𑌕𑍍𑌷𑍇𑌤 𑌸𑌾𑌨𑍁𑌬𑌨𑍍𑌧𑍇𑌷𑍁 𑌕𑌰𑍍𑌮𑌸𑍁 ।

𑌸𑌮𑍍𑌪𑍍𑌰𑌧𑌾𑌰𑍍𑌯 𑌚 𑌕𑍁𑌰𑍍𑌵𑍀𑌤 𑌨 𑌵𑍇𑌗𑍇𑌨 𑌸𑌮𑌾𑌚𑌰𑍇𑌤𑍍 ॥ 8॥

𑌅𑌨𑍁𑌬𑌨𑍍𑌧𑌂 𑌚 𑌸𑌮𑍍𑌪𑍍𑌰𑍇𑌕𑍍𑌷𑍍𑌯 𑌵𑌿𑌪𑌾𑌕𑌾𑌂𑌶𑍍𑌚𑍈𑌵 𑌕𑌰𑍍𑌮𑌣𑌾𑌮𑍍 ।

𑌉𑌤𑍍𑌥𑌾𑌨𑌮𑌾𑌤𑍍𑌮𑌨𑌶𑍍𑌚𑍈𑌵 𑌧𑍀𑌰𑌃 𑌕𑍁𑌰𑍍𑌵𑍀𑌤 𑌵𑌾 𑌨 𑌵𑌾 ॥ 9॥

𑌯𑌃 𑌪𑍍𑌰𑌮𑌾𑌣𑌂 𑌨 𑌜𑌾𑌨𑌾𑌤𑌿 𑌸𑍍𑌥𑌾𑌨𑍇 𑌵𑍃𑌦𑍍𑌧𑍗 𑌤𑌥𑌾 𑌕𑍍𑌷𑌯𑍇 ।

𑌕𑍋𑌶𑍇 𑌜𑌨𑌪𑌦𑍇 𑌦𑌣𑍍𑌡𑍇 𑌨 𑌸 𑌰𑌾𑌜𑍍𑌯𑌾𑌵𑌤𑌿𑌷𑍍𑌠𑌤𑍇 ॥ 10॥

𑌯𑌸𑍍𑌤𑍍𑌵𑍇𑌤𑌾𑌨𑌿 𑌪𑍍𑌰𑌮𑌾𑌣𑌾𑌨𑌿 𑌯𑌥𑍋𑌕𑍍𑌤𑌾𑌨𑍍𑌯𑌨𑍁𑌪𑌶𑍍𑌯𑌤𑌿 ।

𑌯𑍁𑌕𑍍𑌤𑍋 𑌧𑌰𑍍𑌮𑌾𑌰𑍍𑌥𑌯𑍋𑌰𑍍𑌜𑍍𑌞𑌾𑌨𑍇 𑌸 𑌰𑌾𑌜𑍍𑌯𑌮𑌧𑌿𑌗𑌚𑍍𑌛𑌤𑌿 ॥ 11॥

𑌨 𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌤𑌮𑌿𑌤𑍍𑌯𑍇𑌵 𑌵𑌰𑍍𑌤𑌿𑌤𑌵𑍍𑌯𑌮𑌸𑌾𑌮𑍍𑌪𑍍𑌰𑌤𑌮𑍍 ।

𑌶𑍍𑌰𑌿𑌯𑌂 𑌹𑍍𑌯𑌵𑌿𑌨𑌯𑍋 𑌹𑌨𑍍𑌤𑌿 𑌜𑌰𑌾 𑌰𑍂𑌪𑌮𑌿𑌵𑍋𑌤𑍍𑌤𑌮𑌮𑍍 ॥ 12॥

𑌭𑌕𑍍𑌷𑍍𑌯𑍋𑌤𑍍𑌤𑌮 𑌪𑍍𑌰𑌤𑌿𑌚𑍍𑌛𑌨𑍍𑌨𑌂 𑌮𑌤𑍍𑌸𑍍𑌯𑍋 𑌬𑌡𑌿𑌶𑌮𑌾𑌯𑌸𑌮𑍍 ।

𑌰𑍂𑌪𑌾𑌭𑌿𑌪𑌾𑌤𑍀 𑌗𑍍𑌰𑌸𑌤𑍇 𑌨𑌾𑌨𑍁𑌬𑌨𑍍𑌧𑌮𑌵𑍇𑌕𑍍𑌷𑌤𑍇 ॥ 13॥

𑌯𑌚𑍍𑌛𑌕𑍍𑌯𑌂 𑌗𑍍𑌰𑌸𑌿𑌤𑍁𑌂 𑌗𑍍𑌰𑌸𑍍𑌯𑌂 𑌗𑍍𑌰𑌸𑍍𑌤𑌂 𑌪𑌰𑌿𑌣𑌮𑍇𑌚𑍍𑌚 𑌯𑌤𑍍 ।

𑌹𑌿𑌤𑌂 𑌚 𑌪𑌰𑌿𑌣𑌾𑌮𑍇 𑌯𑌤𑍍𑌤𑌦𑌦𑍍𑌯𑌂 𑌭𑍂𑌤𑌿𑌮𑌿𑌚𑍍𑌛𑌤𑌾 ॥ 14॥

𑌵𑌨𑌸𑍍𑌪𑌤𑍇𑌰𑌪𑌕𑍍𑌵𑌾𑌨𑌿 𑌫𑌲𑌾𑌨𑌿 𑌪𑍍𑌰𑌚𑌿𑌨𑍋𑌤𑌿 𑌯𑌃 ।

𑌸 𑌨𑌾𑌪𑍍𑌨𑍋𑌤𑌿 𑌰𑌸𑌂 𑌤𑍇𑌭𑍍𑌯𑍋 𑌬𑍀𑌜𑌂 𑌚𑌾𑌸𑍍𑌯 𑌵𑌿𑌨𑌶𑍍𑌯𑌤𑌿 ॥ 15॥

𑌯𑌸𑍍𑌤𑍁 𑌪𑌕𑍍𑌵𑌮𑍁𑌪𑌾𑌦𑌤𑍍𑌤𑍇 𑌕𑌾𑌲𑍇 𑌪𑌰𑌿𑌣𑌤𑌂 𑌫𑌲𑌮𑍍 ।

𑌫𑌲𑌾𑌦𑍍𑌰𑌸𑌂 𑌸 𑌲𑌭𑌤𑍇 𑌬𑍀𑌜𑌾𑌚𑍍𑌚𑍈𑌵 𑌫𑌲𑌂 𑌪𑍁𑌨𑌃 ॥ 16॥

𑌯𑌥𑌾 𑌮𑌧𑍁 𑌸𑌮𑌾𑌦𑌤𑍍𑌤𑍇 𑌰𑌕𑍍𑌷𑌨𑍍𑌪𑍁𑌷𑍍𑌪𑌾𑌣𑌿 𑌷𑌟𑍍𑌪𑌦𑌃 ।

𑌤𑌦𑍍𑌵𑌦𑌰𑍍𑌥𑌾𑌨𑍍𑌮𑌨𑍁𑌷𑍍𑌯𑍇𑌭𑍍𑌯 𑌆𑌦𑌦𑍍𑌯𑌾𑌦𑌵𑌿𑌹𑌿𑌂𑌸𑌯𑌾 ॥ 17॥

𑌪𑍁𑌷𑍍𑌪𑌂 𑌪𑍁𑌷𑍍𑌪𑌂 𑌵𑌿𑌚𑌿𑌨𑍍𑌵𑍀𑌤 𑌮𑍂𑌲𑌚𑍍𑌛𑍇𑌦𑌂 𑌨 𑌕𑌾𑌰𑌯𑍇𑌤𑍍 ।

𑌮𑌾𑌲𑌾𑌕𑌾𑌰 𑌇𑌵𑌾𑌰𑌾𑌮𑍇 𑌨 𑌯𑌥𑌾𑌙𑍍𑌗𑌾𑌰𑌕𑌾𑌰𑌕𑌃 ॥ 18॥

𑌕𑌿𑌂 𑌨𑍁 𑌮𑍇 𑌸𑍍𑌯𑌾𑌦𑌿𑌦𑌂 𑌕𑍃𑌤𑍍𑌵𑌾 𑌕𑌿𑌂 𑌨𑍁 𑌮𑍇 𑌸𑍍𑌯𑌾𑌦𑌕𑍁𑌰𑍍𑌵𑌤𑌃 ।

𑌇𑌤𑌿 𑌕𑌰𑍍𑌮𑌾𑌣𑌿 𑌸𑌞𑍍𑌚𑌿𑌨𑍍𑌤𑍍𑌯 𑌕𑍁𑌰𑍍𑌯𑌾𑌦𑍍𑌵𑌾 𑌪𑍁𑌰𑍁𑌷𑍋 𑌨 𑌵𑌾 ॥ 19॥

𑌅𑌨𑌾𑌰𑌭𑍍𑌯𑌾 𑌭𑌵𑌨𑍍𑌤𑍍𑌯𑌰𑍍𑌥𑌾𑌃 𑌕𑍇 𑌚𑌿𑌨𑍍𑌨𑌿𑌤𑍍𑌯𑌂 𑌤𑌥𑌾𑌗𑌤𑌾𑌃 ।

𑌕𑍃𑌤𑌃 𑌪𑍁𑌰𑍁𑌷𑌕𑌾𑌰𑍋𑌽𑌪𑌿 𑌭𑌵𑍇𑌦𑍍𑌯𑍇𑌷𑍁 𑌨𑌿𑌰𑌰𑍍𑌥𑌕𑌃 ॥ 20॥

𑌕𑌾𑌂𑌶𑍍𑌚𑌿𑌦𑌰𑍍𑌥𑌾𑌨𑍍𑌨𑌰𑌃 𑌪𑍍𑌰𑌾𑌜𑍍𑌞𑍋 𑌲𑌭𑍁 𑌮𑍂𑌲𑌾𑌨𑍍𑌮𑌹𑌾𑌫𑌲𑌾𑌨𑍍 ।

𑌕𑍍𑌷𑌿𑌪𑍍𑌰𑌮𑌾𑌰𑌭𑌤𑍇 𑌕𑌰𑍍𑌤𑍁𑌂 𑌨 𑌵𑌿𑌘𑍍𑌨𑌯𑌤𑌿 𑌤𑌾𑌦𑍃𑌶𑌾𑌨𑍍 ॥ 21॥

𑌋𑌜𑍁 𑌪𑌶𑍍𑌯𑌤𑌿 𑌯𑌃 𑌸𑌰𑍍𑌵𑌂 𑌚𑌕𑍍𑌷𑍁𑌷𑌾𑌨𑍁𑌪𑌿𑌬𑌨𑍍𑌨𑌿𑌵 ।

𑌆𑌸𑍀𑌨𑌮𑌪𑌿 𑌤𑍂𑌷𑍍𑌣𑍀𑌕𑌮𑌨𑍁𑌰𑌜𑍍𑌯𑌨𑍍𑌤𑌿 𑌤𑌂 𑌪𑍍𑌰𑌜𑌾𑌃 ॥ 22॥

𑌚𑌕𑍍𑌷𑍁𑌷𑌾 𑌮𑌨𑌸𑌾 𑌵𑌾𑌚𑌾 𑌕𑌰𑍍𑌮𑌣𑌾 𑌚 𑌚𑌤𑍁𑌰𑍍𑌵𑌿𑌧𑌮𑍍 ।

𑌪𑍍𑌰𑌸𑌾𑌦𑌯𑌤𑌿 𑌲𑍋𑌕𑌂 𑌯𑌸𑍍𑌤𑌂 𑌲𑍋𑌕𑍋𑌽𑌨𑍁𑌪𑍍𑌰𑌸𑍀𑌦𑌤𑌿 ॥ 23॥

𑌯𑌸𑍍𑌮𑌾𑌤𑍍𑌤𑍍𑌰𑌸𑍍𑌯𑌨𑍍𑌤𑌿 𑌭𑍂𑌤𑌾𑌨𑌿 𑌮𑍃𑌗𑌵𑍍𑌯𑌾𑌧𑌾𑌨𑍍𑌮𑍃𑌗𑌾 𑌇𑌵 ।

𑌸𑌾𑌗𑌰𑌾𑌨𑍍𑌤𑌾𑌮𑌪𑌿 𑌮𑌹𑍀𑌂 𑌲𑌬𑍍𑌧𑍍𑌵𑌾 𑌸 𑌪𑌰𑌿𑌹𑍀𑌯𑌤𑍇 ॥ 24॥

𑌪𑌿𑌤𑍃𑌪𑍈𑌤𑌾𑌮𑌹𑌂 𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌤𑌵𑌾𑌨𑍍𑌸𑍍𑌵𑍇𑌨 𑌤𑍇𑌜𑌸𑌾 ।

𑌵𑌾𑌯𑍁𑌰𑌭𑍍𑌰𑌮𑌿𑌵𑌾𑌸𑌾𑌦𑍍𑌯 𑌭𑍍𑌰𑌂𑌶𑌯𑌤𑍍𑌯𑌨𑌯𑍇 𑌸𑍍𑌥𑌿𑌤𑌃 ॥ 25॥

𑌧𑌰𑍍𑌮𑌮𑌾𑌚𑌰𑌤𑍋 𑌰𑌾𑌜𑍍𑌞𑌃 𑌸𑌦𑍍𑌭𑌿𑌶𑍍𑌚𑌰𑌿𑌤𑌮𑌾𑌦𑌿𑌤𑌃 ।

𑌵𑌸𑍁𑌧𑌾 𑌵𑌸𑍁𑌸𑌮𑍍𑌪𑍂𑌰𑍍𑌣𑌾 𑌵𑌰𑍍𑌧𑌤𑍇 𑌭𑍂𑌤𑌿𑌵𑌰𑍍𑌧𑌨𑍀 ॥ 26॥

𑌅𑌥 𑌸𑌨𑍍𑌤𑍍𑌯𑌜𑌤𑍋 𑌧𑌰𑍍𑌮𑌮𑌧𑌰𑍍𑌮𑌂 𑌚𑌾𑌨𑍁𑌤𑌿𑌷𑍍𑌠𑌤𑌃 ।

𑌪𑍍𑌰𑌤𑌿𑌸𑌂𑌵𑍇𑌷𑍍𑌟𑌤𑍇 𑌭𑍂𑌮𑌿𑌰𑌗𑍍𑌨𑍗 𑌚𑌰𑍍𑌮𑌾𑌹𑌿𑌤𑌂 𑌯𑌥𑌾 ॥ 27॥

𑌯 𑌏𑌵 𑌯𑌤𑍍𑌨𑌃 𑌕𑍍𑌰𑌿𑌯𑌤𑍇 𑌪𑍍𑌰𑌰 𑌰𑌾𑌷𑍍𑌟𑍍𑌰𑌾𑌵𑌮𑌰𑍍𑌦𑌨𑍇 ।

𑌸 𑌏𑌵 𑌯𑌤𑍍𑌨𑌃 𑌕𑌰𑍍𑌤𑌵𑍍𑌯𑌃 𑌸𑍍𑌵𑌰𑌾𑌷𑍍𑌟𑍍𑌰 𑌪𑌰𑌿𑌪𑌾𑌲𑌨𑍇 ॥ 28॥

𑌧𑌰𑍍𑌮𑍇𑌣 𑌰𑌾𑌜𑍍𑌯𑌂 𑌵𑌿𑌨𑍍𑌦𑍇𑌤 𑌧𑌰𑍍𑌮𑍇𑌣 𑌪𑌰𑌿𑌪𑌾𑌲𑌯𑍇𑌤𑍍 ।

𑌧𑌰𑍍𑌮𑌮𑍂𑌲𑌾𑌂 𑌶𑍍𑌰𑌿𑌯𑌂 𑌪𑍍𑌰𑌾𑌪𑍍𑌯 𑌨 𑌜𑌹𑌾𑌤𑌿 𑌨 𑌹𑍀𑌯𑌤𑍇 ॥ 29॥

𑌅𑌪𑍍𑌯𑍁𑌨𑍍𑌮𑌤𑍍𑌤𑌾𑌤𑍍𑌪𑍍𑌰𑌲𑌪𑌤𑍋 𑌬𑌾𑌲𑌾𑌚𑍍𑌚 𑌪𑌰𑌿𑌸𑌰𑍍𑌪𑌤𑌃 ।

𑌸𑌰𑍍𑌵𑌤𑌃 𑌸𑌾𑌰𑌮𑌾𑌦𑌦𑍍𑌯𑌾𑌦𑌶𑍍𑌮𑌭𑍍𑌯 𑌇𑌵 𑌕𑌾𑌞𑍍𑌚𑌨𑌮𑍍 ॥ 30॥

𑌸𑍁𑌵𑍍𑌯𑌾𑌹𑍃𑌤𑌾𑌨𑌿 𑌸𑍁𑌧𑌿𑌯𑌾𑌂 𑌸𑍁𑌕𑍃𑌤𑌾𑌨𑌿 𑌤𑌤𑌸𑍍𑌤𑌤𑌃 ।

𑌸𑌞𑍍𑌚𑌿𑌨𑍍𑌵𑌨𑍍𑌧𑍀𑌰 𑌆𑌸𑍀𑌤 𑌶𑌿𑌲𑌾 𑌹𑌾𑌰𑍀 𑌶𑌿𑌲𑌂 𑌯𑌥𑌾 ॥ 31॥

𑌗𑌨𑍍𑌧𑍇𑌨 𑌗𑌾𑌵𑌃 𑌪𑌶𑍍𑌯𑌨𑍍𑌤𑌿 𑌵𑍇𑌦𑍈𑌃 𑌪𑌶𑍍𑌯𑌨𑍍𑌤𑌿 𑌬𑍍𑌰𑌾𑌹𑍍𑌮𑌣𑌾𑌃 ।

𑌚𑌾𑌰𑍈𑌃 𑌪𑌶𑍍𑌯𑌨𑍍𑌤𑌿 𑌰𑌾𑌜𑌾𑌨𑌶𑍍𑌚𑌕𑍍𑌷𑍁𑌰𑍍𑌭𑍍𑌯𑌾𑌮𑌿𑌤𑌰𑍇 𑌜𑌨𑌾𑌃 ॥ 32॥

𑌭𑍂𑌯𑌾𑌂𑌸𑌂 𑌲𑌭𑌤𑍇 𑌕𑍍𑌲𑍇𑌶𑌂 𑌯𑌾 𑌗𑍗𑌰𑍍𑌭𑌵𑌤𑌿 𑌦𑍁𑌰𑍍𑌦𑍁𑌹𑌾 ।

𑌅𑌥 𑌯𑌾 𑌸𑍁𑌦𑍁𑌹𑌾 𑌰𑌾𑌜𑌨𑍍𑌨𑍈𑌵 𑌤𑌾𑌂 𑌵𑌿𑌨𑌯𑌨𑍍𑌤𑍍𑌯𑌪𑌿 ॥ 33॥

𑌯𑌦𑌤𑌪𑍍𑌤𑌂 𑌪𑍍𑌰𑌣𑌮𑌤𑌿 𑌨 𑌤𑌤𑍍𑌸𑌨𑍍𑌤𑌾𑌪𑌯𑌨𑍍𑌤𑍍𑌯𑌪𑌿 ।

𑌯𑌚𑍍𑌚 𑌸𑍍𑌵𑌯𑌂 𑌨𑌤𑌂 𑌦𑌾𑌰𑍁 𑌨 𑌤𑌤𑍍𑌸𑌨𑍍𑌨𑌾𑌮𑌯𑌨𑍍𑌤𑍍𑌯𑌪𑌿 ॥ 34॥

𑌏𑌤𑌯𑍋𑌪𑌮𑌯𑌾 𑌧𑍀𑌰𑌃 𑌸𑌨𑍍𑌨𑌮𑍇𑌤 𑌬𑌲𑍀𑌯𑌸𑍇 ।

𑌇𑌨𑍍𑌦𑍍𑌰𑌾𑌯 𑌸 𑌪𑍍𑌰𑌣𑌮𑌤𑍇 𑌨𑌮𑌤𑍇 𑌯𑍋 𑌬𑌲𑍀𑌯𑌸𑍇 ॥ 35॥

𑌪𑌰𑍍𑌜𑌨𑍍𑌯𑌨𑌾𑌥𑌾𑌃 𑌪𑌶𑌵𑍋 𑌰𑌾𑌜𑌾𑌨𑍋 𑌮𑌿𑌤𑍍𑌰 𑌬𑌾𑌨𑍍𑌧𑌵𑌾𑌃 ।

𑌪𑌤𑌯𑍋 𑌬𑌾𑌨𑍍𑌧𑌵𑌾𑌃 𑌸𑍍𑌤𑍍𑌰𑍀𑌣𑌾𑌂 𑌬𑍍𑌰𑌾𑌹𑍍𑌮𑌣𑌾 𑌵𑍇𑌦 𑌬𑌾𑌨𑍍𑌧𑌵𑌾𑌃 ॥ 36॥

𑌸𑌤𑍍𑌯𑍇𑌨 𑌰𑌕𑍍𑌷𑍍𑌯𑌤𑍇 𑌧𑌰𑍍𑌮𑍋 𑌵𑌿𑌦𑍍𑌯𑌾 𑌯𑍋𑌗𑍇𑌨 𑌰𑌕𑍍𑌷𑍍𑌯𑌤𑍇 ।

𑌮𑍃𑌜𑌯𑌾 𑌰𑌕𑍍𑌷𑍍𑌯𑌤𑍇 𑌰𑍂𑌪𑌂 𑌕𑍁𑌲𑌂 𑌵𑍃𑌤𑍍𑌤𑍇𑌨 𑌰𑌕𑍍𑌷𑍍𑌯𑌤𑍇 ॥ 37॥

𑌮𑌾𑌨𑍇𑌨 𑌰𑌕𑍍𑌷𑍍𑌯𑌤𑍇 𑌧𑌾𑌨𑍍𑌯𑌮𑌶𑍍𑌵𑌾𑌨𑍍𑌰𑌕𑍍𑌷𑍍𑌯𑌤𑍍𑌯𑌨𑍁𑌕𑍍𑌰𑌮𑌃 ।

𑌅𑌭𑍀𑌕𑍍𑌷𑍍𑌣𑌦𑌰𑍍𑌶𑌨𑌾𑌦𑍍𑌗𑌾𑌵𑌃 𑌸𑍍𑌤𑍍𑌰𑌿𑌯𑍋 𑌰𑌕𑍍𑌷𑍍𑌯𑌾𑌃 𑌕𑍁𑌚𑍇𑌲𑌤𑌃 ॥ 38॥

𑌨 𑌕𑍁𑌲𑌂 𑌵𑍃𑌤𑍍𑌤𑌿 𑌹𑍀𑌨𑌸𑍍𑌯 𑌪𑍍𑌰𑌮𑌾𑌣𑌮𑌿𑌤𑌿 𑌮𑍇 𑌮𑌤𑌿𑌃 ।

𑌅𑌨𑍍𑌤𑍍𑌯𑍇𑌷𑍍𑌵𑌪𑌿 𑌹𑌿 𑌜𑌾𑌤𑌾𑌨𑌾𑌂 𑌵𑍃𑌤𑍍𑌤𑌮𑍇𑌵 𑌵𑌿𑌶𑌿𑌷𑍍𑌯𑌤𑍇 ॥ 39॥

𑌯 𑌈𑌰𑍍𑌷𑍍𑌯𑍁𑌃 𑌪𑌰𑌵𑌿𑌤𑍍𑌤𑍇𑌷𑍁 𑌰𑍂𑌪𑍇 𑌵𑍀𑌰𑍍𑌯𑍇 𑌕𑍁𑌲𑌾𑌨𑍍𑌵𑌯𑍇 ।

𑌸𑍁𑌖𑍇 𑌸𑍗𑌭𑌾𑌗𑍍𑌯𑌸𑌤𑍍𑌕𑌾𑌰𑍇 𑌤𑌸𑍍𑌯 𑌵𑍍𑌯𑌾𑌧𑌿𑌰𑌨𑌨𑍍𑌤𑌕𑌃 ॥ 40॥

𑌅𑌕𑌾𑌰𑍍𑌯 𑌕𑌰𑌣𑌾𑌦𑍍𑌭𑍀𑌤𑌃 𑌕𑌾𑌰𑍍𑌯𑌾𑌣𑌾𑌂 𑌚 𑌵𑌿𑌵𑌰𑍍𑌜𑌨𑌾𑌤𑍍 ।

𑌅𑌕𑌾𑌲𑍇 𑌮𑌨𑍍𑌤𑍍𑌰𑌭𑍇𑌦𑌾𑌚𑍍𑌚 𑌯𑍇𑌨 𑌮𑌾𑌦𑍍𑌯𑍇𑌨𑍍𑌨 𑌤𑌤𑍍𑌪𑌿𑌬𑍇𑌤𑍍 ॥ 41॥

𑌵𑌿𑌦𑍍𑌯𑌾𑌮𑌦𑍋 𑌧𑌨𑌮𑌦𑌸𑍍𑌤𑍃𑌤𑍀𑌯𑍋𑌽𑌭𑌿𑌜𑌨𑍋 𑌮𑌦𑌃 ।

𑌏𑌤𑍇 𑌮𑌦𑌾𑌵𑌲𑌿𑌪𑍍𑌤𑌾𑌨𑌾𑌮𑍇𑌤 𑌏𑌵 𑌸𑌤𑌾𑌂 𑌦𑌮𑌾𑌃 ॥ 42॥

𑌅𑌸𑌨𑍍𑌤𑍋𑌽𑌭𑍍𑌯𑌰𑍍𑌥𑌿𑌤𑌾𑌃 𑌸𑌦𑍍𑌭𑌿𑌃 𑌕𑌿𑌂 𑌚𑌿𑌤𑍍𑌕𑌾𑌰𑍍𑌯𑌂 𑌕𑌦𑌾 𑌚𑌨 ।

𑌮𑌨𑍍𑌯𑌨𑍍𑌤𑍇 𑌸𑌨𑍍𑌤𑌮𑌾𑌤𑍍𑌮𑌾𑌨𑌮𑌸𑌨𑍍𑌤𑌮𑌪𑌿 𑌵𑌿𑌶𑍍𑌰𑍁𑌤𑌮𑍍 ॥ 43॥

𑌗𑌤𑌿𑌰𑌾𑌤𑍍𑌮𑌵𑌤𑌾𑌂 𑌸𑌨𑍍𑌤𑌃 𑌸𑌨𑍍𑌤 𑌏𑌵 𑌸𑌤𑌾𑌂 𑌗𑌤𑌿𑌃 ।

𑌅𑌸𑌤𑌾𑌂 𑌚 𑌗𑌤𑌿𑌃 𑌸𑌨𑍍𑌤𑍋 𑌨 𑌤𑍍𑌵𑌸𑌨𑍍𑌤𑌃 𑌸𑌤𑌾𑌂 𑌗𑌤𑌿𑌃 ॥ 44॥

𑌜𑌿𑌤𑌾 𑌸𑌭𑌾 𑌵𑌸𑍍𑌤𑍍𑌰𑌵𑌤𑌾 𑌸𑌮𑌾𑌶𑌾 𑌗𑍋𑌮𑌤𑌾 𑌜𑌿𑌤𑌾 ।

𑌅𑌧𑍍𑌵𑌾 𑌜𑌿𑌤𑍋 𑌯𑌾𑌨𑌵𑌤𑌾 𑌸𑌰𑍍𑌵𑌂 𑌶𑍀𑌲𑌵𑌤𑌾 𑌜𑌿𑌤𑌮𑍍 ॥ 45॥

𑌶𑍀𑌲𑌂 𑌪𑍍𑌰𑌧𑌾𑌨𑌂 𑌪𑍁𑌰𑍁𑌷𑍇 𑌤𑌦𑍍𑌯𑌸𑍍𑌯𑍇𑌹 𑌪𑍍𑌰𑌣𑌶𑍍𑌯𑌤𑌿 ।

𑌨 𑌤𑌸𑍍𑌯 𑌜𑍀𑌵𑌿𑌤𑍇𑌨𑌾𑌰𑍍𑌥𑍋 𑌨 𑌧𑌨𑍇𑌨 𑌨 𑌬𑌨𑍍𑌧𑍁𑌭𑌿𑌃 ॥ 46॥

𑌆𑌢𑍍𑌯𑌾𑌨𑌾𑌂 𑌮𑌾𑌂𑌸𑌪𑌰𑌮𑌂 𑌮𑌧𑍍𑌯𑌾𑌨𑌾𑌂 𑌗𑍋𑌰𑌸𑍋𑌤𑍍𑌤𑌰𑌮𑍍 ।

𑌲𑌵𑌣𑍋𑌤𑍍𑌤𑌰𑌂 𑌦𑌰𑌿𑌦𑍍𑌰𑌾𑌣𑌾𑌂 𑌭𑍋𑌜𑌨𑌂 𑌭𑌰𑌤𑌰𑍍𑌷𑌭 ॥ 47॥

𑌸𑌮𑍍𑌪𑌨𑍍𑌨𑌤𑌰𑌮𑍇𑌵𑌾𑌨𑍍𑌨𑌂 𑌦𑌰𑌿𑌦𑍍𑌰𑌾 𑌭𑍁𑌞𑍍𑌜𑌤𑍇 𑌸𑌦𑌾 ।

𑌕𑍍𑌷𑍁𑌤𑍍𑌸𑍍𑌵𑌾𑌦𑍁𑌤𑌾𑌂 𑌜𑌨𑌯𑌤𑌿 𑌸𑌾 𑌚𑌾𑌢𑍍𑌯𑍇𑌷𑍁 𑌸𑍁𑌦𑍁𑌰𑍍𑌲𑌭𑌾 ॥ 48॥

𑌪𑍍𑌰𑌾𑌯𑍇𑌣 𑌶𑍍𑌰𑍀𑌮𑌤𑌾𑌂 𑌲𑍋𑌕𑍇 𑌭𑍋𑌕𑍍𑌤𑍁𑌂 𑌶𑌕𑍍𑌤𑌿𑌰𑍍𑌨 𑌵𑌿𑌦𑍍𑌯𑌤𑍇 ।

𑌦𑌰𑌿𑌦𑍍𑌰𑌾𑌣𑌾𑌂 𑌤𑍁 𑌰𑌾𑌜𑍇𑌨𑍍𑌦𑍍𑌰 𑌅𑌪𑌿 𑌕𑌾𑌷𑍍𑌠𑌂 𑌹𑌿 𑌜𑍀𑌰𑍍𑌯𑌤𑍇 ॥ 49॥

𑌅𑌵𑍃𑌤𑍍𑌤𑌿𑌰𑍍𑌭𑌯𑌮𑌨𑍍𑌤𑍍𑌯𑌾𑌨𑌾𑌂 𑌮𑌧𑍍𑌯𑌾𑌨𑌾𑌂 𑌮𑌰𑌣𑌾𑌦𑍍𑌭𑌯𑌮𑍍 ।

𑌉𑌤𑍍𑌤𑌮𑌾𑌨𑌾𑌂 𑌤𑍁 𑌮𑌰𑍍𑌤𑍍𑌯𑌾𑌨𑌾𑌮𑌵𑌮𑌾𑌨𑌾𑌤𑍍𑌪𑌰𑌂 𑌭𑌯𑌮𑍍 ॥ 50॥

𑌐𑌶𑍍𑌵𑌰𑍍𑌯𑌮𑌦𑌪𑌾𑌪𑌿𑌷𑍍𑌠𑌾 𑌮𑌦𑌾𑌃 𑌪𑌾𑌨𑌮𑌦𑌾𑌦𑌯𑌃 ।

𑌐𑌶𑍍𑌵𑌰𑍍𑌯𑌮𑌦𑌮𑌤𑍍𑌤𑍋 𑌹𑌿 𑌨𑌾𑌪𑌤𑌿𑌤𑍍𑌵𑌾 𑌵𑌿𑌬𑍁𑌧𑍍𑌯𑌤𑍇 ॥ 51॥

𑌇𑌨𑍍𑌦𑍍𑌰𑌿𑌯𑍗𑌰𑌿𑌨𑍍𑌦𑍍𑌰𑌿𑌯𑌾𑌰𑍍𑌥𑍇𑌷𑍁 𑌵𑌰𑍍𑌤𑌮𑌾𑌨𑍈𑌰𑌨𑌿𑌗𑍍𑌰𑌹𑍈𑌃 ।

𑌤𑍈𑌰𑌯𑌂 𑌤𑌾𑌪𑍍𑌯𑌤𑍇 𑌲𑍋𑌕𑍋 𑌨𑌕𑍍𑌷𑌤𑍍𑌰𑌾𑌣𑌿 𑌗𑍍𑌰𑌹𑍈𑌰𑌿𑌵 ॥ 52॥

𑌯𑍋 𑌜𑌿𑌤𑌃 𑌪𑌞𑍍𑌚𑌵𑌰𑍍𑌗𑍇𑌣 𑌸𑌹𑌜𑍇𑌨𑌾𑌤𑍍𑌮 𑌕𑌰𑍍𑌶𑌿𑌨𑌾 ।

𑌆𑌪𑌦𑌸𑍍𑌤𑌸𑍍𑌯 𑌵𑌰𑍍𑌧𑌨𑍍𑌤𑍇 𑌶𑍁𑌕𑍍𑌲𑌪𑌕𑍍𑌷 𑌇𑌵𑍋𑌡𑍁𑌰𑌾𑌡𑍍 ॥ 53॥

𑌅𑌵𑌿𑌜𑌿𑌤𑍍𑌯 𑌯 𑌆𑌤𑍍𑌮𑌾𑌨𑌮𑌮𑌾𑌤𑍍𑌯𑌾𑌨𑍍𑌵𑌿𑌜𑌿𑌗𑍀𑌷𑌤𑍇 ।

𑌅𑌮𑌿𑌤𑍍𑌰𑌾𑌨𑍍𑌵𑌾𑌜𑌿𑌤𑌾𑌮𑌾𑌤𑍍𑌯𑌃 𑌸𑍋𑌽𑌵𑌶𑌃 𑌪𑌰𑌿𑌹𑍀𑌯𑌤𑍇 ॥ 54॥

𑌆𑌤𑍍𑌮𑌾𑌨𑌮𑍇𑌵 𑌪𑍍𑌰𑌥𑌮𑌂 𑌦𑍇𑌶𑌰𑍂𑌪𑍇𑌣 𑌯𑍋 𑌜𑌯𑍇𑌤𑍍 ।

𑌤𑌤𑍋𑌽𑌮𑌾𑌤𑍍𑌯𑌾𑌨𑌮𑌿𑌤𑍍𑌰𑌾𑌂𑌶𑍍𑌚 𑌨 𑌮𑍋𑌘𑌂 𑌵𑌿𑌜𑌿𑌗𑍀𑌷𑌤𑍇 ॥ 55॥

𑌵𑌶𑍍𑌯𑍇𑌨𑍍𑌦𑍍𑌰𑌿𑌯𑌂 𑌜𑌿𑌤𑌾𑌮𑌾𑌤𑍍𑌯𑌂 𑌧𑍃𑌤𑌦𑌣𑍍𑌡𑌂 𑌵𑌿𑌕𑌾𑌰𑌿𑌷𑍁 ।

𑌪𑌰𑍀𑌕𑍍𑌷𑍍𑌯 𑌕𑌾𑌰𑌿𑌣𑌂 𑌧𑍀𑌰𑌮𑌤𑍍𑌯𑌨𑍍𑌤𑌂 𑌶𑍍𑌰𑍀𑌰𑍍𑌨𑌿𑌷𑍇𑌵𑌤𑍇 ॥ 56॥

𑌰𑌥𑌃 𑌶𑌰𑍀𑌰𑌂 𑌪𑍁𑌰𑍁𑌷𑌸𑍍𑌯 𑌰𑌾𑌜𑌨𑍍

𑌨𑌾𑌤𑍍𑌮𑌾 𑌨𑌿𑌯𑌨𑍍𑌤𑍇𑌨𑍍𑌦𑍍𑌰𑌿𑌯𑌾𑌣𑍍𑌯𑌸𑍍𑌯 𑌚𑌾𑌶𑍍𑌵𑌾𑌃 ।

𑌤𑍈𑌰𑌪𑍍𑌰𑌮𑌤𑍍𑌤𑌃 𑌕𑍁𑌶𑌲𑌃 𑌸𑌦𑌶𑍍𑌵𑍈𑌰𑍍

𑌦𑌾𑌨𑍍𑌤𑍈𑌃 𑌸𑍁𑌖𑌂 𑌯𑌾𑌤𑌿 𑌰𑌥𑍀𑌵 𑌧𑍀𑌰𑌃 ॥ 57॥

𑌏𑌤𑌾𑌨𑍍𑌯𑌨𑌿𑌗𑍃𑌹𑍀𑌤𑌾𑌨𑌿 𑌵𑍍𑌯𑌾𑌪𑌾𑌦𑌯𑌿𑌤𑍁𑌮𑌪𑍍𑌯𑌲𑌮𑍍 ।

𑌅𑌵𑌿𑌧𑍇𑌯𑌾 𑌇𑌵𑌾𑌦𑌾𑌨𑍍𑌤𑌾 𑌹𑌯𑌾𑌃 𑌪𑌥𑌿 𑌕𑍁𑌸𑌾𑌰𑌥𑌿𑌮𑍍 ॥ 58॥

𑌅𑌨𑌰𑍍𑌥𑌮𑌰𑍍𑌥𑌤𑌃 𑌪𑌶𑍍𑌯𑌨𑍍𑌨𑌰𑍍𑌤𑌂 𑌚𑍈𑌵𑌾𑌪𑍍𑌯𑌨𑌰𑍍𑌥𑌤𑌃 ।

𑌇𑌨𑍍𑌦𑍍𑌰𑌿𑌯𑍈𑌃 𑌪𑍍𑌰𑌸𑍃𑌤𑍋 𑌬𑌾𑌲𑌃 𑌸𑍁𑌦𑍁𑌃𑌖𑌂 𑌮𑌨𑍍𑌯𑌤𑍇 𑌸𑍁𑌖𑌮𑍍 ॥ 59॥

𑌧𑌰𑍍𑌮𑌾𑌰𑍍𑌥𑍗 𑌯𑌃 𑌪𑌰𑌿𑌤𑍍𑌯𑌜𑍍𑌯 𑌸𑍍𑌯𑌾𑌦𑌿𑌨𑍍𑌦𑍍𑌰𑌿𑌯𑌵𑌶𑌾𑌨𑍁𑌗𑌃 ।

𑌶𑍍𑌰𑍀𑌪𑍍𑌰𑌾𑌣𑌧𑌨𑌦𑌾𑌰𑍇𑌭𑍍𑌯 𑌕𑍍𑌷𑌿𑌪𑍍𑌰𑌂 𑌸 𑌪𑌰𑌿𑌹𑍀𑌯𑌤𑍇 ॥ 60॥

𑌅𑌰𑍍𑌥𑌾𑌨𑌾𑌮𑍀𑌶𑍍𑌵𑌰𑍋 𑌯𑌃 𑌸𑍍𑌯𑌾𑌦𑌿𑌨𑍍𑌦𑍍𑌰𑌿𑌯𑌾𑌣𑌾𑌮𑌨𑍀𑌶𑍍𑌵𑌰𑌃 ।

𑌇𑌨𑍍𑌦𑍍𑌰𑌿𑌯𑌾𑌣𑌾𑌮𑌨𑍈𑌶𑍍𑌵𑌰𑍍𑌯𑌾𑌦𑍈𑌶𑍍𑌵𑌰𑍍𑌯𑌾𑌦𑍍𑌭𑍍𑌰𑌶𑍍𑌯𑌤𑍇 𑌹𑌿 𑌸𑌃 ॥ 61॥

𑌆𑌤𑍍𑌮𑌨𑌾𑌤𑍍𑌮𑌾𑌨𑌮𑌨𑍍𑌵𑌿𑌚𑍍𑌛𑍇𑌨𑍍𑌮𑌨𑍋 𑌬𑍁𑌦𑍍𑌧𑍀𑌨𑍍𑌦𑍍𑌰𑌿𑌯𑍈𑌰𑍍𑌯𑌤𑍈𑌃 ।

𑌆𑌤𑍍𑌮𑍈𑌵 𑌹𑍍𑌯𑌾𑌤𑍍𑌮𑌨𑍋 𑌬𑌨𑍍𑌧𑍁𑌰𑌾𑌤𑍍𑌮𑍈𑌵 𑌰𑌿𑌪𑍁𑌰𑌾𑌤𑍍𑌮𑌨𑌃 ॥ 62॥

𑌕𑍍𑌷𑍁𑌦𑍍𑌰𑌾𑌕𑍍𑌷𑍇𑌣𑍇𑌵 𑌜𑌾𑌲𑍇𑌨 𑌝𑌷𑌾𑌵𑌪𑌿𑌹𑌿𑌤𑌾𑌵𑍁𑌭𑍗 ।

𑌕𑌾𑌮𑌶𑍍𑌚 𑌰𑌾𑌜𑌨𑍍𑌕𑍍𑌰𑍋𑌧𑌶𑍍𑌚 𑌤𑍗 𑌪𑍍𑌰𑌾𑌜𑍍𑌞𑌾𑌨𑌂 𑌵𑌿𑌲𑍁𑌮𑍍𑌪𑌤𑌃 ॥ 63॥

𑌸𑌮𑌵𑍇𑌕𑍍𑌷𑍍𑌯𑍇𑌹 𑌧𑌰𑍍𑌮𑌾𑌰𑍍𑌥𑍗 𑌸𑌮𑍍𑌭𑌾𑌰𑌾𑌨𑍍𑌯𑍋𑌽𑌧𑌿𑌗𑌚𑍍𑌛𑌤𑌿 ।

𑌸 𑌵𑍈 𑌸𑌮𑍍𑌭𑍃𑌤 𑌸𑌮𑍍𑌭𑌾𑌰𑌃 𑌸𑌤𑌤𑌂 𑌸𑍁𑌖𑌮𑍇𑌧𑌤𑍇 ॥ 64॥

𑌯𑌃 𑌪𑌞𑍍𑌚𑌾𑌭𑍍𑌯𑌨𑍍𑌤𑌰𑌾𑌞𑍍𑌶𑌤𑍍𑌰𑍂𑌨𑌵𑌿𑌜𑌿𑌤𑍍𑌯 𑌮𑌤𑌿𑌕𑍍𑌷𑌯𑌾𑌨𑍍 ।

𑌜𑌿𑌗𑍀𑌷𑌤𑌿 𑌰𑌿𑌪𑍂𑌨𑌨𑍍𑌯𑌾𑌨𑍍𑌰𑌿𑌪𑌵𑍋𑌽𑌭𑌿𑌭𑌵𑌨𑍍𑌤𑌿 𑌤𑌮𑍍 ॥ 65॥

𑌦𑍃𑌶𑍍𑌯𑌨𑍍𑌤𑍇 𑌹𑌿 𑌦𑍁𑌰𑌾𑌤𑍍𑌮𑌾𑌨𑍋 𑌵𑌧𑍍𑌯𑌮𑌾𑌨𑌾𑌃 𑌸𑍍𑌵𑌕𑌰𑍍𑌮 𑌭𑌿𑌃 ।

𑌇𑌨𑍍𑌦𑍍𑌰𑌿𑌯𑌾𑌣𑌾𑌮𑌨𑍀𑌶𑌤𑍍𑌵𑌾𑌦𑍍𑌰𑌾𑌜𑌾𑌨𑍋 𑌰𑌾𑌜𑍍𑌯𑌵𑌿𑌭𑍍𑌰𑌮𑍈𑌃 ॥ 66॥

𑌅𑌸𑌨𑍍𑌤𑍍𑌯𑌾𑌗𑌾𑌤𑍍𑌪𑌾𑌪𑌕𑍃𑌤𑌾𑌮𑌪𑌾𑌪𑌾𑌂𑌸𑍍

𑌤𑍁𑌲𑍍𑌯𑍋 𑌦𑌣𑍍𑌡𑌃 𑌸𑍍𑌪𑍃𑌶𑌤𑍇 𑌮𑌿𑌶𑍍𑌰𑌭𑌾𑌵𑌾𑌤𑍍 ।

𑌶𑍁𑌷𑍍𑌕𑍇𑌣𑌾𑌰𑍍𑌦𑍍𑌰𑌂 𑌦𑌹𑍍𑌯𑌤𑍇 𑌮𑌿𑌶𑍍𑌰𑌭𑌾𑌵𑌾𑌤𑍍

𑌤𑌸𑍍𑌮𑌾𑌤𑍍𑌪𑌾𑌪𑍈𑌃 𑌸𑌹 𑌸𑌨𑍍𑌧𑌿𑌂 𑌨 𑌕𑍁𑌰𑍍𑌯𑌾𑌤𑍍 ॥ 67॥

𑌨𑌿𑌜𑌾𑌨𑍁𑌤𑍍𑌪𑌤𑌤𑌃 𑌶𑌤𑍍𑌰𑍂𑌨𑍍𑌪𑌞𑍍𑌚 𑌪𑌞𑍍𑌚 𑌪𑍍𑌰𑌯𑍋𑌜𑌨𑌾𑌨𑍍 ।

𑌯𑍋 𑌮𑍋𑌹𑌾𑌨𑍍𑌨 𑌨𑌿𑌘𑍃𑌹𑍍𑌣𑌾𑌤𑌿 𑌤𑌮𑌾𑌪𑌦𑍍𑌗𑍍𑌰𑌸𑌤𑍇 𑌨𑌰𑌮𑍍 ॥ 68॥

𑌅𑌨𑌸𑍂𑌯𑌾𑌰𑍍𑌜𑌵𑌂 𑌶𑍗𑌚𑌂 𑌸𑌨𑍍𑌤𑍋𑌷𑌃 𑌪𑍍𑌰𑌿𑌯𑌵𑌾𑌦𑌿𑌤𑌾 ।

𑌦𑌮𑌃 𑌸𑌤𑍍𑌯𑌮𑌨𑌾𑌯𑌾𑌸𑍋 𑌨 𑌭𑌵𑌨𑍍𑌤𑌿 𑌦𑍁𑌰𑌾𑌤𑍍𑌮𑌨𑌾𑌮𑍍 ॥ 69॥

𑌆𑌤𑍍𑌮𑌜𑍍𑌞𑌾𑌨𑌮𑌨𑌾𑌯𑌾𑌸𑌸𑍍𑌤𑌿𑌤𑌿𑌕𑍍𑌷𑌾 𑌧𑌰𑍍𑌮𑌨𑌿𑌤𑍍𑌯𑌤𑌾 ।

𑌵𑌾𑌕𑍍𑌚𑍈𑌵 𑌗𑍁𑌪𑍍𑌤𑌾 𑌦𑌾𑌨𑌂 𑌚 𑌨𑍈𑌤𑌾𑌨𑍍𑌯𑌨𑍍𑌤𑍍𑌯𑍇𑌷𑍁 𑌭𑌾𑌰𑌤 ॥ 70॥

𑌆𑌕𑍍𑌰𑍋𑌶 𑌪𑌰𑌿𑌵𑌾𑌦𑌾𑌭𑍍𑌯𑌾𑌂 𑌵𑌿𑌹𑌿𑌂𑌸𑌨𑍍𑌤𑍍𑌯𑌬𑍁𑌧𑌾 𑌬𑍁𑌧𑌾𑌨𑍍 ।

𑌵𑌕𑍍𑌤𑌾 𑌪𑌾𑌪𑌮𑍁𑌪𑌾𑌦𑌤𑍍𑌤𑍇 𑌕𑍍𑌷𑌮𑌮𑌾𑌣𑍋 𑌵𑌿𑌮𑍁𑌚𑍍𑌯𑌤𑍇 ॥ 71॥

𑌹𑌿𑌂𑌸𑌾 𑌬𑌲𑌮𑌸𑌾𑌧𑍂𑌨𑌾𑌂 𑌰𑌾𑌜𑍍𑌞𑌾𑌂 𑌦𑌣𑍍𑌡𑌵𑌿𑌧𑌿𑌰𑍍𑌬𑌲𑌮𑍍 ।

𑌶𑍁𑌶𑍍𑌰𑍂𑌷𑌾 𑌤𑍁 𑌬𑌲𑌂 𑌸𑍍𑌤𑍍𑌰𑍀𑌣𑌾𑌂 𑌕𑍍𑌷𑌮𑌾𑌗𑍁𑌣𑌵𑌤𑌾𑌂 𑌬𑌲𑌮𑍍 ॥ 72॥

𑌵𑌾𑌕𑍍𑌸𑌂𑌯𑌮𑍋 𑌹𑌿 𑌨𑍃𑌪𑌤𑍇 𑌸𑍁𑌦𑍁𑌷𑍍𑌕𑌰𑌤𑌮𑍋 𑌮𑌤𑌃 ।

𑌅𑌰𑍍𑌥𑌵𑌚𑍍𑌚 𑌵𑌿𑌚𑌿𑌤𑍍𑌰𑌂 𑌚 𑌨 𑌶𑌕𑍍𑌯𑌂 𑌬𑌹𑍁𑌭𑌾𑌷𑌿𑌤𑍁𑌮𑍍 ॥ 73॥

𑌅𑌭𑍍𑌯𑌾𑌵𑌹𑌤𑌿 𑌕𑌲𑍍𑌯𑌾𑌣𑌂 𑌵𑌿𑌵𑌿𑌧𑌾 𑌵𑌾𑌕𑍍𑌸𑍁𑌭𑌾𑌷𑌿𑌤𑌾 ।

𑌸𑍈𑌵 𑌦𑍁𑌰𑍍𑌭𑌾𑌷𑌿𑌤𑌾 𑌰𑌾𑌜𑌨𑍍𑌨𑌨𑌰𑍍𑌥𑌾𑌯𑍋𑌪𑌪𑌦𑍍𑌯𑌤𑍇 ॥ 74॥

𑌸𑌂𑌰𑍋𑌹𑌤𑌿 𑌶𑌰𑍈𑌰𑍍𑌵𑌿𑌦𑍍𑌧𑌂 𑌵𑌨𑌂 𑌪𑌰𑌶𑍁𑌨𑌾 𑌹𑌤𑌮𑍍 ।

𑌵𑌾𑌚𑌾 𑌦𑍁𑌰𑍁𑌕𑍍𑌤𑌂 𑌬𑍀𑌭𑌤𑍍𑌸𑌂 𑌨 𑌸𑌂𑌰𑍋𑌹𑌤𑌿 𑌵𑌾𑌕𑍍𑌕𑍍𑌷𑌤𑌮𑍍 ॥ 75॥

𑌕𑌰𑍍𑌣𑌿𑌨𑌾𑌲𑍀𑌕𑌨𑌾𑌰𑌾𑌚𑌾 𑌨𑌿𑌰𑍍𑌹𑌰𑌨𑍍𑌤𑌿 𑌶𑌰𑍀𑌰𑌤𑌃 ।

𑌵𑌾𑌕𑍍𑌷𑌲𑍍𑌯𑌸𑍍𑌤𑍁 𑌨 𑌨𑌿𑌰𑍍𑌹𑌰𑍍𑌤𑍁𑌂 𑌶𑌕𑍍𑌯𑍋 𑌹𑍃𑌦𑌿 𑌶𑌯𑍋 𑌹𑌿 𑌸𑌃 ॥ 76॥

𑌵𑌾𑌕𑍍𑌸𑌾𑌯𑌕𑌾 𑌵𑌦𑌨𑌾𑌨𑍍𑌨𑌿𑌷𑍍𑌪𑌤𑌨𑍍𑌤𑌿

𑌯𑍈𑌰𑌾𑌹𑌤𑌃 𑌶𑍋𑌚𑌤𑌿 𑌰𑌤𑍍𑌰𑍍𑌯𑌹𑌾𑌨𑌿 ।

𑌪𑌰𑌸𑍍𑌯 𑌨𑌾𑌮𑌰𑍍𑌮𑌸𑍁 𑌤𑍇 𑌪𑌤𑌨𑍍𑌤𑌿

𑌤𑌾𑌨𑍍𑌪𑌣𑍍𑌡𑌿𑌤𑍋 𑌨𑌾𑌵𑌸𑍃𑌜𑍇𑌤𑍍𑌪𑌰𑍇𑌷𑍁 ॥ 77॥

𑌯𑌸𑍍𑌮𑍈 𑌦𑍇𑌵𑌾𑌃 𑌪𑍍𑌰𑌯𑌚𑍍𑌛𑌨𑍍𑌤𑌿 𑌪𑍁𑌰𑍁𑌷𑌾𑌯 𑌪𑌰𑌾𑌭𑌵𑌮𑍍 ।

𑌬𑍁𑌦𑍍𑌧𑌿𑌂 𑌤𑌸𑍍𑌯𑌾𑌪𑌕𑌰𑍍𑌷𑌨𑍍𑌤𑌿 𑌸𑍋𑌽𑌪𑌾𑌚𑍀𑌨𑌾𑌨𑌿 𑌪𑌶𑍍𑌯𑌤𑌿 ॥ 78॥

𑌬𑍁𑌦𑍍𑌧𑍗 𑌕𑌲𑍁𑌷 𑌭𑍂𑌤𑌾𑌯𑌾𑌂 𑌵𑌿𑌨𑌾𑌶𑍇 𑌪𑍍𑌰𑌤𑍍𑌯𑍁𑌪𑌸𑍍𑌥𑌿𑌤𑍇 ।

𑌅𑌨𑌯𑍋 𑌨𑌯𑌸𑌙𑍍𑌕𑌾𑌶𑍋 𑌹𑍃𑌦𑌯𑌾𑌨𑍍𑌨𑌾𑌪𑌸𑌰𑍍𑌪𑌤𑌿 ॥ 79॥

𑌸𑍇𑌯𑌂 𑌬𑍁𑌦𑍍𑌧𑌿𑌃 𑌪𑌰𑍀𑌤𑌾 𑌤𑍇 𑌪𑍁𑌤𑍍𑌰𑌾𑌣𑌾𑌂 𑌤𑌵 𑌭𑌾𑌰𑌤 ।

𑌪𑌾𑌣𑍍𑌡𑌵𑌾𑌨𑌾𑌂 𑌵𑌿𑌰𑍋𑌧𑍇𑌨 𑌨 𑌚𑍈𑌨𑌾𑌂 𑌅𑌵𑌬𑍁𑌧𑍍𑌯𑌸𑍇 ॥ 80॥

𑌰𑌾𑌜𑌾 𑌲𑌕𑍍𑌷𑌣𑌸𑌮𑍍𑌪𑌨𑍍𑌨𑌸𑍍𑌤𑍍𑌰𑍈𑌲𑍋𑌕𑍍𑌯𑌸𑍍𑌯𑌾𑌪𑌿 𑌯𑍋 𑌭𑌵𑍇𑌤𑍍 ।

𑌶𑌿𑌷𑍍𑌯𑌸𑍍𑌤𑍇 𑌶𑌾𑌸𑌿𑌤𑌾 𑌸𑍋𑌽𑌸𑍍𑌤𑍁 𑌧𑍃𑌤𑌰𑌾𑌷𑍍𑌟𑍍𑌰 𑌯𑍁𑌧𑌿𑌷𑍍𑌠𑌿𑌰𑌃 ॥ 81॥

𑌅𑌤𑍀𑌵 𑌸𑌰𑍍𑌵𑌾𑌨𑍍𑌪𑍁𑌤𑍍𑌰𑌾𑌂𑌸𑍍𑌤𑍇 𑌭𑌾𑌗𑌧𑍇𑌯 𑌪𑍁𑌰𑌸𑍍𑌕𑍃𑌤𑌃 ।

𑌤𑍇𑌜𑌸𑌾 𑌪𑍍𑌰𑌜𑍍𑌞𑌯𑌾 𑌚𑍈𑌵 𑌯𑍁𑌕𑍍𑌤𑍋 𑌧𑌰𑍍𑌮𑌾𑌰𑍍𑌥𑌤𑌤𑍍𑌤𑍍𑌵𑌵𑌿𑌤𑍍 ॥ 82॥

𑌆𑌨𑍃𑌶𑌂𑌸𑍍𑌯𑌾𑌦𑌨𑍁𑌕𑍍𑌰𑍋𑌶𑌾𑌦𑍍𑌯𑍋𑌽𑌸𑍗 𑌧𑌰𑍍𑌮𑌭𑍃𑌤𑌾𑌂 𑌵𑌰𑌃 ।

𑌗𑍗𑌰𑌵𑌾𑌤𑍍𑌤𑌵 𑌰𑌾𑌜𑍇𑌨𑍍𑌦𑍍𑌰 𑌬𑌹𑍂𑌨𑍍𑌕𑍍𑌲𑍇𑌶𑌾𑌂𑌸𑍍𑌤𑌿𑌤𑌿𑌕𑍍𑌷𑌤𑌿 ॥ 83॥

॥ 𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌉𑌦𑍍𑌯𑍋𑌗𑌪𑌰𑍍𑌵𑌣𑌿 𑌪𑍍𑌰𑌜𑌾𑌗𑌰𑌪𑌰𑍍𑌵𑌣𑌿

𑌵𑌿𑌦𑍁𑌰𑌨𑍀𑌤𑌿𑌵𑌾𑌕𑍍𑌯𑍇 𑌚𑌤𑍁𑌸𑍍𑌤𑍍𑌰𑌿𑌂𑌶𑍋𑌽𑌧𑍍𑌯𑌾𑌯𑌃 ॥ 34॥

Roman (IAST) Transliteration

|| iti śrīmahābhārate udyogaparvaṇi prajāgaraparvaṇi

viduranītivākye catustriṃśo'dhyāyaḥ ||

dhṛtarāṣṭra uvāca |

jāgrato dahyamānasya yatkāryamanupaśyasi |

tadbrūhi tvaṃ hi nastāta dharmārthakuśalaḥ śuciḥ || 1||

tvaṃ māṃ yathāvadvidura praśādhi

prajñā pūrvaṃ sarvamajātaśatroḥ |

yanmanyase pathyamadīnasattva

śreyaḥ karaṃ brūhi tadvai kurūṇām || 2||

pāpāśaṅgī pāpameva naupaśyan

pṛcchāmi tvāṃ vyākulenātmanāham |

kave tanme brūhi sarvaṃ yathāvan

manīṣitaṃ sarvamajātaśatroḥ || 3||

vidura uvāca |

śubhaṃ vā yadi vā pāpaṃ dveṣyaṃ vā yadi vā priyam |

apṛṣṭastasya tadbrūyādyasya necchetparābhavam || 4||

tasmādvakṣyāmi te rājanbhavamicchankurūnprati |

vacaḥ śreyaḥ karaṃ dharmyaṃ bruvatastannibodha me || 5||

mithyopetāni karmāṇi sidhyeyuryāni bhārata |

anupāya prayuktāni mā sma teṣu manaḥ kṛthāḥ || 6||

tathaiva yogavihitaṃ na sidhyetkarma yannṛpa |

upāyayuktaṃ medhāvī na tatra glapayenmanaḥ || 7||

anubandhānavekṣeta sānubandheṣu karmasu |

sampradhārya ca kurvīta na vegena samācaret || 8||

anubandhaṃ ca samprekṣya vipākāṃścaiva karmaṇām |

utthānamātmanaścaiva dhīraḥ kurvīta vā na vā || 9||

yaḥ pramāṇaṃ na jānāti sthāne vṛddhau tathā kṣaye |

kośe janapade daṇḍe na sa rājyāvatiṣṭhate || 10||

yastvetāni pramāṇāni yathoktānyanupaśyati |

yukto dharmārthayorjñāne sa rājyamadhigacchati || 11||

na rājyaṃ prāptamityeva vartitavyamasāmpratam |

śriyaṃ hyavinayo hanti jarā rūpamivottamam || 12||

bhakṣyottama praticchannaṃ matsyo baḍiśamāyasam |

rūpābhipātī grasate nānubandhamavekṣate || 13||

yacchakyaṃ grasituṃ grasyaṃ grastaṃ pariṇamecca yat |

hitaṃ ca pariṇāme yattadadyaṃ bhūtimicchatā || 14||

vanaspaterapakvāni phalāni pracinoti yaḥ |

sa nāpnoti rasaṃ tebhyo bījaṃ cāsya vinaśyati || 15||

yastu pakvamupādatte kāle pariṇataṃ phalam |

phalādrasaṃ sa labhate bījāccaiva phalaṃ punaḥ || 16||

yathā madhu samādatte rakṣanpuṣpāṇi ṣaṭpadaḥ |

tadvadarthānmanuṣyebhya ādadyādavihiṃsayā || 17||

puṣpaṃ puṣpaṃ vicinvīta mūlacchedaṃ na kārayet |

mālākāra ivārāme na yathāṅgārakārakaḥ || 18||

kiṃ nu me syādidaṃ kṛtvā kiṃ nu me syādakurvataḥ |

iti karmāṇi sañcintya kuryādvā puruṣo na vā || 19||

anārabhyā bhavantyarthāḥ ke cinnityaṃ tathāgatāḥ |

kṛtaḥ puruṣakāro'pi bhavedyeṣu nirarthakaḥ || 20||

kāṃścidarthānnaraḥ prājño labhu mūlānmahāphalān |

kṣipramārabhate kartuṃ na vighnayati tādṛśān || 21||

ṛju paśyati yaḥ sarvaṃ cakṣuṣānupibanniva |

āsīnamapi tūṣṇīkamanurajyanti taṃ prajāḥ || 22||

cakṣuṣā manasā vācā karmaṇā ca caturvidham |

prasādayati lokaṃ yastaṃ loko'nuprasīdati || 23||

yasmāttrasyanti bhūtāni mṛgavyādhānmṛgā iva |

sāgarāntāmapi mahīṃ labdhvā sa parihīyate || 24||

pitṛpaitāmahaṃ rājyaṃ prāptavānsvena tejasā |

vāyurabhramivāsādya bhraṃśayatyanaye sthitaḥ || 25||

dharmamācarato rājñaḥ sadbhiścaritamāditaḥ |

vasudhā vasusampūrṇā vardhate bhūtivardhanī || 26||

atha santyajato dharmamadharmaṃ cānutiṣṭhataḥ |

pratisaṃveṣṭate bhūmiragnau carmāhitaṃ yathā || 27||

ya eva yatnaḥ kriyate prara rāṣṭrāvamardane |

sa eva yatnaḥ kartavyaḥ svarāṣṭra paripālane || 28||

dharmeṇa rājyaṃ vindeta dharmeṇa paripālayet |

dharmamūlāṃ śriyaṃ prāpya na jahāti na hīyate || 29||

apyunmattātpralapato bālācca parisarpataḥ |

sarvataḥ sāramādadyādaśmabhya iva kāñcanam || 30||

suvyāhṛtāni sudhiyāṃ sukṛtāni tatastataḥ |

sañcinvandhīra āsīta śilā hārī śilaṃ yathā || 31||

gandhena gāvaḥ paśyanti vedaiḥ paśyanti brāhmaṇāḥ |

cāraiḥ paśyanti rājānaścakṣurbhyāmitare janāḥ || 32||

bhūyāṃsaṃ labhate kleśaṃ yā gaurbhavati durduhā |

atha yā suduhā rājannaiva tāṃ vinayantyapi || 33||

yadataptaṃ praṇamati na tatsantāpayantyapi |

yacca svayaṃ nataṃ dāru na tatsannāmayantyapi || 34||

etayopamayā dhīraḥ sannameta balīyase |

indrāya sa praṇamate namate yo balīyase || 35||

parjanyanāthāḥ paśavo rājāno mitra bāndhavāḥ |

patayo bāndhavāḥ strīṇāṃ brāhmaṇā veda bāndhavāḥ || 36||

satyena rakṣyate dharmo vidyā yogena rakṣyate |

mṛjayā rakṣyate rūpaṃ kulaṃ vṛttena rakṣyate || 37||

mānena rakṣyate dhānyamaśvānrakṣyatyanukramaḥ |

abhīkṣṇadarśanādgāvaḥ striyo rakṣyāḥ kucelataḥ || 38||

na kulaṃ vṛtti hīnasya pramāṇamiti me matiḥ |

antyeṣvapi hi jātānāṃ vṛttameva viśiṣyate || 39||

ya īrṣyuḥ paravitteṣu rūpe vīrye kulānvaye |

sukhe saubhāgyasatkāre tasya vyādhiranantakaḥ || 40||

akārya karaṇādbhītaḥ kāryāṇāṃ ca vivarjanāt |

akāle mantrabhedācca yena mādyenna tatpibet || 41||

vidyāmado dhanamadastṛtīyo'bhijano madaḥ |

ete madāvaliptānāmeta eva satāṃ damāḥ || 42||

asanto'bhyarthitāḥ sadbhiḥ kiṃ citkāryaṃ kadā cana |

manyante santamātmānamasantamapi viśrutam || 43||

gatirātmavatāṃ santaḥ santa eva satāṃ gatiḥ |

asatāṃ ca gatiḥ santo na tvasantaḥ satāṃ gatiḥ || 44||

jitā sabhā vastravatā samāśā gomatā jitā |

adhvā jito yānavatā sarvaṃ śīlavatā jitam || 45||

śīlaṃ pradhānaṃ puruṣe tadyasyeha praṇaśyati |

na tasya jīvitenārtho na dhanena na bandhubhiḥ || 46||

āḍhyānāṃ māṃsaparamaṃ madhyānāṃ gorasottaram |

lavaṇottaraṃ daridrāṇāṃ bhojanaṃ bharatarṣabha || 47||

sampannataramevānnaṃ daridrā bhuñjate sadā |

kṣutsvādutāṃ janayati sā cāḍhyeṣu sudurlabhā || 48||

prāyeṇa śrīmatāṃ loke bhoktuṃ śaktirna vidyate |

daridrāṇāṃ tu rājendra api kāṣṭhaṃ hi jīryate || 49||

avṛttirbhayamantyānāṃ madhyānāṃ maraṇādbhayam |

uttamānāṃ tu martyānāmavamānātparaṃ bhayam || 50||

aiśvaryamadapāpiṣṭhā madāḥ pānamadādayaḥ |

aiśvaryamadamatto hi nāpatitvā vibudhyate || 51||

indriyaurindriyārtheṣu vartamānairanigrahaiḥ |

tairayaṃ tāpyate loko nakṣatrāṇi grahairiva || 52||

yo jitaḥ pañcavargeṇa sahajenātma karśinā |

āpadastasya vardhante śuklapakṣa ivoḍurāḍ || 53||

avijitya ya ātmānamamātyānvijigīṣate |

amitrānvājitāmātyaḥ so'vaśaḥ parihīyate || 54||

ātmānameva prathamaṃ deśarūpeṇa yo jayet |

tato'mātyānamitrāṃśca na moghaṃ vijigīṣate || 55||

vaśyendriyaṃ jitāmātyaṃ dhṛtadaṇḍaṃ vikāriṣu |

parīkṣya kāriṇaṃ dhīramatyantaṃ śrīrniṣevate || 56||

rathaḥ śarīraṃ puruṣasya rājan

nātmā niyantendriyāṇyasya cāśvāḥ |

tairapramattaḥ kuśalaḥ sadaśvair

dāntaiḥ sukhaṃ yāti rathīva dhīraḥ || 57||

etānyanigṛhītāni vyāpādayitumapyalam |

avidheyā ivādāntā hayāḥ pathi kusārathim || 58||

anarthamarthataḥ paśyannartaṃ caivāpyanarthataḥ |

indriyaiḥ prasṛto bālaḥ suduḥkhaṃ manyate sukham || 59||

dharmārthau yaḥ parityajya syādindriyavaśānugaḥ |

śrīprāṇadhanadārebhya kṣipraṃ sa parihīyate || 60||

arthānāmīśvaro yaḥ syādindriyāṇāmanīśvaraḥ |

indriyāṇāmanaiśvaryādaiśvaryādbhraśyate hi saḥ || 61||

ātmanātmānamanvicchenmano buddhīndriyairyataiḥ |

ātmaiva hyātmano bandhurātmaiva ripurātmanaḥ || 62||

kṣudrākṣeṇeva jālena jhaṣāvapihitāvubhau |

kāmaśca rājankrodhaśca tau prājñānaṃ vilumpataḥ || 63||

samavekṣyeha dharmārthau sambhārānyo'dhigacchati |

sa vai sambhṛta sambhāraḥ satataṃ sukhamedhate || 64||

yaḥ pañcābhyantarāñśatrūnavijitya matikṣayān |

jigīṣati ripūnanyānripavo'bhibhavanti tam || 65||

dṛśyante hi durātmāno vadhyamānāḥ svakarma bhiḥ |

indriyāṇāmanīśatvādrājāno rājyavibhramaiḥ || 66||

asantyāgātpāpakṛtāmapāpāṃs

tulyo daṇḍaḥ spṛśate miśrabhāvāt |

śuṣkeṇārdraṃ dahyate miśrabhāvāt

tasmātpāpaiḥ saha sandhiṃ na kuryāt || 67||

nijānutpatataḥ śatrūnpañca pañca prayojanān |

yo mohānna nighṛhṇāti tamāpadgrasate naram || 68||

anasūyārjavaṃ śaucaṃ santoṣaḥ priyavāditā |

damaḥ satyamanāyāso na bhavanti durātmanām || 69||

ātmajñānamanāyāsastitikṣā dharmanityatā |

vākcaiva guptā dānaṃ ca naitānyantyeṣu bhārata || 70||

ākrośa parivādābhyāṃ vihiṃsantyabudhā budhān |

vaktā pāpamupādatte kṣamamāṇo vimucyate || 71||

hiṃsā balamasādhūnāṃ rājñāṃ daṇḍavidhirbalam |

śuśrūṣā tu balaṃ strīṇāṃ kṣamāguṇavatāṃ balam || 72||

vāksaṃyamo hi nṛpate suduṣkaratamo mataḥ |

arthavacca vicitraṃ ca na śakyaṃ bahubhāṣitum || 73||

abhyāvahati kalyāṇaṃ vividhā vāksubhāṣitā |

saiva durbhāṣitā rājannanarthāyopapadyate || 74||

saṃrohati śarairviddhaṃ vanaṃ paraśunā hatam |

vācā duruktaṃ bībhatsaṃ na saṃrohati vākkṣatam || 75||

karṇinālīkanārācā nirharanti śarīrataḥ |

vākṣalyastu na nirhartuṃ śakyo hṛdi śayo hi saḥ || 76||

vāksāyakā vadanānniṣpatanti

yairāhataḥ śocati ratryahāni |

parasya nāmarmasu te patanti

tānpaṇḍito nāvasṛjetpareṣu || 77||

yasmai devāḥ prayacchanti puruṣāya parābhavam |

buddhiṃ tasyāpakarṣanti so'pācīnāni paśyati || 78||

buddhau kaluṣa bhūtāyāṃ vināśe pratyupasthite |

anayo nayasaṅkāśo hṛdayānnāpasarpati || 79||

seyaṃ buddhiḥ parītā te putrāṇāṃ tava bhārata |

pāṇḍavānāṃ virodhena na caināṃ avabudhyase || 80||

rājā lakṣaṇasampannastrailokyasyāpi yo bhavet |

śiṣyaste śāsitā so'stu dhṛtarāṣṭra yudhiṣṭhiraḥ || 81||

atīva sarvānputrāṃste bhāgadheya puraskṛtaḥ |

tejasā prajñayā caiva yukto dharmārthatattvavit || 82||

ānṛśaṃsyādanukrośādyo'sau dharmabhṛtāṃ varaḥ |

gauravāttava rājendra bahūnkleśāṃstitikṣati || 83||

|| iti śrīmahābhārate udyogaparvaṇi prajāgaraparvaṇi

viduranītivākye catustriṃśo'dhyāyaḥ || 34||