Tripura Sundari Ashtakam (stotram)

ॐ

𑌤𑍍𑌰𑌿𑌪𑍁𑌰 𑌸𑍁𑌨𑍍𑌦𑌰𑍀 𑌅𑌷𑍍𑌟𑌕𑌂 (𑌸𑍍𑌤𑍋𑌤𑍍𑌰𑌂)

Ashtakam Adi Shankaracharya Grantha

𑌕𑌦𑌮𑍍𑌬𑌵𑌨𑌚𑌾𑌰𑌿𑌣𑍀𑌂 𑌮𑍁𑌨𑌿𑌕𑌦𑌮𑍍𑌬𑌕𑌾𑌦𑌮𑍍𑌬𑌿𑌨𑍀𑌂

𑌨𑌿𑌤𑌮𑍍𑌬𑌜𑌿𑌤𑌭𑍂𑌧𑌰𑌾𑌂 𑌸𑍁𑌰𑌨𑌿𑌤𑌮𑍍𑌬𑌿𑌨𑍀𑌸𑍇𑌵𑌿𑌤𑌾𑌮𑍍 ।

𑌨𑌵𑌾𑌮𑍍𑌬𑍁𑌰𑍁𑌹𑌲𑍋𑌚𑌨𑌾𑌮𑌭𑌿𑌨𑌵𑌾𑌮𑍍𑌬𑍁𑌦𑌶𑍍𑌯𑌾𑌮𑌲𑌾𑌂

𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌮𑍍𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌨𑍍𑌦𑌰𑍀𑌮𑌾𑌶𑍍𑌰𑌯𑍇 ॥ 1 ॥

𑌕𑌦𑌮𑍍𑌬𑌵𑌨𑌵𑌾𑌸𑌿𑌨𑍀𑌂 𑌕𑌨𑌕𑌵𑌲𑍍𑌲𑌕𑍀𑌧𑌾𑌰𑌿𑌣𑍀𑌂

𑌮𑌹𑌾𑌰𑍍𑌹𑌮𑌣𑌿𑌹𑌾𑌰𑌿𑌣𑍀𑌂 𑌮𑍁𑌖𑌸𑌮𑍁𑌲𑍍𑌲𑌸𑌦𑍍𑌵𑌾𑌰𑍁𑌣𑍀𑌮𑍍 ।

𑌦𑌯𑌾𑌵𑌿𑌭𑌵𑌕𑌾𑌰𑌿𑌣𑍀𑌂 𑌵𑌿𑌶𑌦𑌰𑍋𑌚𑌨𑌾𑌚𑌾𑌰𑌿𑌣𑍀𑌂

𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌮𑍍𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌨𑍍𑌦𑌰𑍀𑌮𑌾𑌶𑍍𑌰𑌯𑍇 ॥ 2 ॥

𑌕𑌦𑌮𑍍𑌬𑌵𑌨𑌶𑌾𑌲𑌯𑌾 𑌕𑍁𑌚𑌭𑌰𑍋𑌲𑍍𑌲𑌸𑌨𑍍𑌮𑌾𑌲𑌯𑌾

𑌕𑍁𑌚𑍋𑌪𑌮𑌿𑌤𑌶𑍈𑌲𑌯𑌾 𑌗𑍁𑌰𑍁𑌕𑍃𑌪𑌾𑌲𑌸𑌦𑍍𑌵𑍇𑌲𑌯𑌾 ।

𑌮𑌦𑌾𑌰𑍁𑌣𑌕𑌪𑍋𑌲𑌯𑌾 𑌮𑌧𑍁𑌰𑌗𑍀𑌤𑌵𑌾𑌚𑌾𑌲𑌯𑌾

𑌕𑌯𑌾𑌪𑌿 𑌘𑌨𑌨𑍀𑌲𑌯𑌾 𑌕𑌵𑌚𑌿𑌤𑌾 𑌵𑌯𑌂 𑌲𑍀𑌲𑌯𑌾 ॥ 3 ॥

𑌕𑌦𑌮𑍍𑌬𑌵𑌨𑌮𑌧𑍍𑌯𑌗𑌾𑌂 𑌕𑌨𑌕𑌮𑌣𑍍𑌡𑌲𑍋𑌪𑌸𑍍𑌥𑌿𑌤𑌾𑌂

𑌷𑌡𑌮𑍍𑌬𑍁𑌰𑍁𑌹𑌵𑌾𑌸𑌿𑌨𑍀𑌂 𑌸𑌤𑌤𑌸𑌿𑌦𑍍𑌧𑌸𑍗𑌦𑌾𑌮𑌿𑌨𑍀𑌮𑍍 ।

𑌵𑌿𑌡𑌮𑍍𑌬𑌿𑌤𑌜𑌪𑌾𑌰𑍁𑌚𑌿𑌂 𑌵𑌿𑌕𑌚𑌚𑌨𑍍𑌦𑍍𑌰𑌚𑍂𑌡𑌾𑌮𑌣𑌿𑌂

𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌮𑍍𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌨𑍍𑌦𑌰𑍀𑌮𑌾𑌶𑍍𑌰𑌯𑍇 ॥ 4 ॥

𑌕𑍁𑌚𑌾𑌞𑍍𑌚𑌿𑌤𑌵𑌿𑌪𑌞𑍍𑌚𑌿𑌕𑌾𑌂 𑌕𑍁𑌟𑌿𑌲𑌕𑍁𑌨𑍍𑌤𑌲𑌾𑌲𑌙𑍍𑌕𑍃𑌤𑌾𑌂

𑌕𑍁𑌶𑍇𑌶𑌯𑌨𑌿𑌵𑌾𑌸𑌿𑌨𑍀𑌂 𑌕𑍁𑌟𑌿𑌲𑌚𑌿𑌤𑍍𑌤𑌵𑌿𑌦𑍍𑌵𑍇𑌷𑌿𑌣𑍀𑌮𑍍 ।

𑌮𑌦𑌾𑌰𑍁𑌣𑌵𑌿𑌲𑍋𑌚𑌨𑌾𑌂 𑌮𑌨𑌸𑌿𑌜𑌾𑌰𑌿𑌸𑌮𑍍𑌮𑍋𑌹𑌿𑌨𑍀𑌂

𑌮𑌤𑌙𑍍𑌗𑌮𑍁𑌨𑌿𑌕𑌨𑍍𑌯𑌕𑌾𑌂 𑌮𑌧𑍁𑌰𑌭𑌾𑌷𑌿𑌣𑍀𑌮𑌾𑌶𑍍𑌰𑌯𑍇 ॥ 5 ॥

𑌸𑍍𑌮𑌰𑍇𑌤𑍍𑌪𑍍𑌰𑌥𑌮𑌪𑍁𑌷𑍍𑌪𑌿𑌣𑍀𑌂 𑌰𑍁𑌧𑌿𑌰𑌬𑌿𑌨𑍍𑌦𑍁𑌨𑍀𑌲𑌾𑌮𑍍𑌬𑌰𑌾𑌂

𑌗𑍃𑌹𑍀𑌤𑌮𑌧𑍁𑌪𑌾𑌤𑍍𑌰𑌿𑌕𑌾𑌂 𑌮𑌦𑌵𑌿𑌘𑍂𑌰𑍍𑌣𑌨𑍇𑌤𑍍𑌰𑌾𑌞𑍍𑌚𑌲𑌾𑌮𑍍 ।

𑌘𑌨𑌸𑍍𑌤𑌨𑌭𑌰𑍋𑌨𑍍𑌨𑌤𑌾𑌂 𑌗𑌲𑌿𑌤𑌚𑍂𑌲𑌿𑌕𑌾𑌂 𑌶𑍍𑌯𑌾𑌮𑌲𑌾𑌂

𑌤𑍍𑌰𑌿𑌲𑍋𑌚𑌨𑌕𑍁𑌟𑍁𑌮𑍍𑌬𑌿𑌨𑍀𑌂 𑌤𑍍𑌰𑌿𑌪𑍁𑌰𑌸𑍁𑌨𑍍𑌦𑌰𑍀𑌮𑌾𑌶𑍍𑌰𑌯𑍇 ॥ 6 ॥

𑌸𑌕𑍁𑌙𑍍𑌕𑍁𑌮𑌵𑌿𑌲𑍇𑌪𑌨𑌾𑌮𑌲𑌕𑌚𑍁𑌮𑍍𑌬𑌿𑌕𑌸𑍍𑌤𑍂𑌰𑌿𑌕𑌾𑌂

𑌸𑌮𑌨𑍍𑌦𑌹𑌸𑌿𑌤𑍇𑌕𑍍𑌷𑌣𑌾𑌂 𑌸𑌶𑌰𑌚𑌾𑌪𑌪𑌾𑌶𑌾𑌙𑍍𑌕𑍁𑌶𑌾𑌮𑍍 ।

𑌅𑌶𑍇𑌷𑌜𑌨𑌮𑍋𑌹𑌿𑌨𑍀𑌮𑌰𑍁𑌣𑌮𑌾𑌲𑍍𑌯𑌭𑍂𑌷𑌾𑌮𑍍𑌬𑌰𑌾𑌂

𑌜𑌪𑌾𑌕𑍁𑌸𑍁𑌮𑌭𑌾𑌸𑍁𑌰𑌾𑌂 𑌜𑌪𑌵𑌿𑌧𑍗 𑌸𑍍𑌮𑌰𑌾𑌮𑍍𑌯𑌮𑍍𑌬𑌿𑌕𑌾𑌮𑍍 ॥ 7 ॥

𑌪𑍁𑌰𑌨𑍍𑌦𑌰𑌪𑍁𑌰𑌨𑍍𑌧𑍍𑌰𑌿𑌕𑌾𑌚𑌿𑌕𑍁𑌰𑌬𑌨𑍍𑌧𑌸𑍈𑌰𑌨𑍍𑌧𑍍𑌰𑌿𑌕𑌾𑌂

𑌪𑌿𑌤𑌾𑌮𑌹𑌪𑌤𑌿𑌵𑍍𑌰𑌤𑌾𑌪𑌟𑍁𑌪𑌟𑍀𑌰𑌚𑌰𑍍𑌚𑌾𑌰𑌤𑌾𑌮𑍍 ।

𑌮𑍁𑌕𑍁𑌨𑍍𑌦𑌰𑌮𑌣𑍀𑌮𑌣𑍀𑌲𑌸𑌦𑌲𑌙𑍍𑌕𑍍𑌰𑌿𑌯𑌾𑌕𑌾𑌰𑌿𑌣𑍀𑌂

𑌭𑌜𑌾𑌮𑌿 𑌭𑍁𑌵𑌨𑌾𑌮𑍍𑌬𑌿𑌕𑌾𑌂 𑌸𑍁𑌰𑌵𑌧𑍂𑌟𑌿𑌕𑌾𑌚𑍇𑌟𑌿𑌕𑌾𑌮𑍍 ॥ 8 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌨𑍍𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌙𑍍𑌕𑌰𑌭𑌗𑌵𑌤𑌃 𑌕𑍃𑌤𑍗 𑌤𑍍𑌰𑌿𑌪𑍁𑌰𑌸𑍁𑌨𑍍𑌦𑌰𑍍𑌯𑌷𑍍𑌟𑌕𑌮𑍍 ।

Roman (IAST) Transliteration

kadambavanacāriṇīṃ munikadambakādambinīṃ

nitambajitabhūdharāṃ suranitambinīsevitām |

navāmburuhalocanāmabhinavāmbudaśyāmalāṃ

trilocanakuṭumbinīṃ tripurasundarīmāśraye || 1 ||

kadambavanavāsinīṃ kanakavallakīdhāriṇīṃ

mahārhamaṇihāriṇīṃ mukhasamullasadvāruṇīm |

dayāvibhavakāriṇīṃ viśadarocanācāriṇīṃ

trilocanakuṭumbinīṃ tripurasundarīmāśraye || 2 ||

kadambavanaśālayā kucabharollasanmālayā

kucopamitaśailayā gurukṛpālasadvelayā |

madāruṇakapolayā madhuragītavācālayā

kayāpi ghananīlayā kavacitā vayaṃ līlayā || 3 ||

kadambavanamadhyagāṃ kanakamaṇḍalopasthitāṃ

ṣaḍamburuhavāsinīṃ satatasiddhasaudāminīm |

viḍambitajapāruciṃ vikacacandracūḍāmaṇiṃ

trilocanakuṭumbinīṃ tripurasundarīmāśraye || 4 ||

kucāñcitavipañcikāṃ kuṭilakuntalālaṅkṛtāṃ

kuśeśayanivāsinīṃ kuṭilacittavidveṣiṇīm |

madāruṇavilocanāṃ manasijārisammohinīṃ

mataṅgamunikanyakāṃ madhurabhāṣiṇīmāśraye || 5 ||

smaretprathamapuṣpiṇīṃ rudhirabindunīlāmbarāṃ

gṛhītamadhupātrikāṃ madavighūrṇanetrāñcalām |

ghanastanabharonnatāṃ galitacūlikāṃ śyāmalāṃ

trilocanakuṭumbinīṃ tripurasundarīmāśraye || 6 ||

sakuṅkumavilepanāmalakacumbikastūrikāṃ

samandahasitekṣaṇāṃ saśaracāpapāśāṅkuśām |

aśeṣajanamohinīmaruṇamālyabhūṣāmbarāṃ

japākusumabhāsurāṃ japavidhau smarāmyambikām || 7 ||

purandarapurandhrikācikurabandhasairandhrikāṃ

pitāmahapativratāpaṭupaṭīracarcāratām |

mukundaramaṇīmaṇīlasadalaṅkriyākāriṇīṃ

bhajāmi bhuvanāmbikāṃ suravadhūṭikāceṭikām || 8 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau tripurasundaryaṣṭakam |