📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌶𑌿𑌵𑌸𑌙𑍍𑌕𑌲𑍍𑌪𑍋𑌪𑌨𑌿𑌷𑌤𑍍 (𑌶𑌿𑌵 𑌸𑌙𑍍𑌕𑌲𑍍𑌪𑌮𑌸𑍍𑌤𑍁)
Shivasankalpopanishat (shiva Sankalpamastu)
Shiva Upanishad Vedic Grantha
𑌯𑍇𑌨𑍇𑌦𑌂 𑌭𑍂𑌤𑌂 𑌭𑍁𑌵𑌨𑌂 𑌭𑌵𑌿𑌷𑍍𑌯𑌤𑍍 𑌪𑌰𑌿𑌗𑍃𑌹𑍀𑌤𑌮𑌮𑍃𑌤𑍇𑌨 𑌸𑌰𑍍𑌵𑌮𑍍 ।
𑌯𑍇𑌨 𑌯𑌜𑍍𑌞𑌸𑍍𑌤𑌾𑌯𑌤𑍇 𑌸𑌪𑍍𑌤𑌹𑍋𑌤𑌾 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 1॥
𑌯𑍇𑌨 𑌕𑌰𑍍𑌮𑌾𑌣𑌿 𑌪𑍍𑌰𑌚𑌰𑌨𑍍𑌤𑌿 𑌧𑍀𑌰𑌾 𑌯𑌤𑍋 𑌵𑌾𑌚𑌾 𑌮𑌨𑌸𑌾 𑌚𑌾𑌰𑍁 𑌯𑌨𑍍𑌤𑌿 ।
𑌯𑌤𑍍𑌸𑌮𑍍𑌮𑌿𑌤𑌮𑌨𑍁 𑌸𑌂𑌯𑌨𑍍𑌤𑌿 𑌪𑍍𑌰𑌾𑌣𑌿𑌨𑌸𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 2॥
𑌯𑍇𑌨 𑌕𑌰𑍍𑌮𑌾𑌣𑍍𑌯𑌪𑌸𑍋 𑌮𑌨𑍀𑌷𑌿𑌣𑍋 𑌯𑌜𑍍𑌞𑍇 𑌕𑍃𑌣𑍍𑌵𑌨𑍍𑌤𑌿 𑌵𑌿𑌦𑌥𑍇𑌷𑍁 𑌧𑍀𑌰𑌾𑌃 ।
𑌯𑌦𑌪𑍂𑌰𑍍𑌵𑌂 𑌯𑌕𑍍𑌷𑌮𑌨𑍍𑌤𑌃 𑌪𑍍𑌰𑌜𑌾𑌨𑌾𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 3॥
𑌯𑌤𑍍𑌪𑍍𑌰𑌜𑍍𑌞𑌾𑌨𑌮𑍁𑌤 𑌚𑍇𑌤𑍋 𑌧𑍃𑌤𑌿𑌶𑍍𑌚 𑌯𑌜𑍍𑌜𑍍𑌯𑍋𑌤𑌿𑌰𑌨𑍍𑌤𑌰𑌮𑍃𑌤𑌂 𑌪𑍍𑌰𑌜𑌾𑌸𑍁 ।
𑌯𑌸𑍍𑌮𑌾𑌨𑍍𑌨 𑌋𑌤𑍇 𑌕𑌿𑌞𑍍𑌚𑌨 𑌕𑌰𑍍𑌮 𑌕𑍍𑌰𑌿𑌯𑌤𑍇 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 4॥
𑌸𑍁𑌷𑌾𑌰𑌥𑌿𑌰𑌶𑍍𑌵𑌾𑌨𑌿𑌵 𑌯𑌨𑍍𑌮𑌨𑍁𑌷𑍍𑌯𑌾𑌨𑍍𑌨𑍇𑌨𑍀𑌯𑌤𑍇𑌽𑌭𑍀𑌶𑍁𑌭𑌿𑌰𑍍𑌵𑌾𑌜𑌿𑌨 𑌇𑌵 ।
𑌹𑍃𑌤𑍍𑌪𑍍𑌰𑌤𑌿𑌷𑍍𑌠𑌂 𑌯𑌦𑌜𑌿𑌰𑌂 𑌜𑌵𑌿𑌷𑍍𑌠𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 5॥
𑌯𑌸𑍍𑌮𑌿𑌨𑍍𑌨𑍃𑌚𑌃 𑌸𑌾𑌮 𑌯𑌜𑍂𑌷𑌿 𑌯𑌸𑍍𑌮𑌿𑌨𑍍 𑌪𑍍𑌰𑌤𑌿𑌷𑍍𑌠𑌿𑌤𑌾 𑌰𑌥𑌨𑌾𑌭𑌾𑌵𑌿𑌵𑌾𑌰𑌾𑌃 ।
𑌯𑌸𑍍𑌮𑌿𑌂𑌶𑍍𑌚𑌿𑌤𑍍𑌤𑌂 𑌸𑌰𑍍𑌵𑌮𑍋𑌤𑌂 𑌪𑍍𑌰𑌜𑌾𑌨𑌾𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 6॥
𑌯𑌦𑌤𑍍𑌰 𑌷𑌷𑍍𑌠𑌂 𑌤𑍍𑌰𑌿𑌶𑌤𑌂 𑌸𑍁𑌵𑍀𑌰𑌂 𑌯𑌜𑍍𑌞𑌸𑍍𑌯 𑌗𑍁𑌹𑍍𑌯𑌂 𑌨𑌵𑌨𑌾𑌵𑌮𑌾𑌯𑍍𑌯𑌂 (?) ।
𑌦𑌶 𑌪𑌞𑍍𑌚 𑌤𑍍𑌰𑌿𑌂𑌶𑌤𑌂 𑌯𑌤𑍍𑌪𑌰𑌂 𑌚 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 7॥
𑌯𑌜𑍍𑌜𑌾𑌗𑍍𑌰𑌤𑍋 𑌦𑍂𑌰𑌮𑍁𑌦𑍈𑌤𑌿 𑌦𑍈𑌵𑌂 𑌤𑌦𑍁 𑌸𑍁𑌪𑍍𑌤𑌸𑍍𑌯 𑌤𑌥𑍈𑌵𑍈𑌤𑌿 ।
𑌦𑍂𑌰𑌙𑍍𑌗𑌮𑌂 𑌜𑍍𑌯𑍋𑌤𑌿𑌷𑌾𑌂 𑌜𑍍𑌯𑍋𑌤𑌿𑌰𑍇𑌕𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 8॥
𑌯𑍇𑌨 𑌦𑍍𑌯𑍗𑌃 𑌪𑍃𑌥𑌿𑌵𑍀 𑌚𑌾𑌨𑍍𑌤𑌰𑌿𑌕𑍍𑌷𑌂 𑌚 𑌯𑍇 𑌪𑌰𑍍𑌵𑌤𑌾𑌃 𑌪𑍍𑌰𑌦𑌿𑌶𑍋 𑌦𑌿𑌶𑌶𑍍𑌚 ।
𑌯𑍇𑌨𑍇𑌦𑌂 𑌜𑌗𑌦𑍍𑌵𑍍𑌯𑌾𑌪𑍍𑌤𑌂 𑌪𑍍𑌰𑌜𑌾𑌨𑌾𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 9॥
𑌯𑍇𑌨𑍇𑌦𑌂 𑌵𑌿𑌶𑍍𑌵𑌂 𑌜𑌗𑌤𑍋 𑌬𑌭𑍂𑌵 𑌯𑍇 𑌦𑍇𑌵𑌾 𑌅𑌪𑌿 𑌮𑌹𑌤𑍋 𑌜𑌾𑌤𑌵𑍇𑌦𑌾𑌃 ।
𑌤𑌦𑍇𑌵𑌾𑌗𑍍𑌨𑌿𑌸𑍍𑌤𑌮𑌸𑍋 𑌜𑍍𑌯𑍋𑌤𑌿𑌰𑍇𑌕𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 10॥
𑌯𑍇 𑌮𑌨𑍋 𑌹𑍃𑌦𑌯𑌂 𑌯𑍇 𑌚 𑌦𑍇𑌵𑌾 𑌯𑍇 𑌦𑌿𑌵𑍍𑌯𑌾 𑌆𑌪𑍋 𑌯𑍇 𑌸𑍂𑌰𑍍𑌯𑌰𑌶𑍍𑌮𑌿𑌃 ।
𑌤𑍇 𑌶𑍍𑌰𑍋𑌤𑍍𑌰𑍇 𑌚𑌕𑍍𑌷𑍁𑌷𑍀 𑌸𑌞𑍍𑌚𑌰𑌨𑍍𑌤𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 11॥
𑌅𑌚𑌿𑌨𑍍𑌤𑍍𑌯𑌂 𑌚𑌾𑌪𑍍𑌰𑌮𑍇𑌯𑌂 𑌚 𑌵𑍍𑌯𑌕𑍍𑌤𑌾𑌵𑍍𑌯𑌕𑍍𑌤𑌪𑌰𑌂 𑌚 𑌯𑌤 ।
𑌸𑍂𑌕𑍍𑌷𑍍𑌮𑌾𑌤𑍍𑌸𑍂𑌕𑍍𑌷𑍍𑌮𑌤𑌰𑌂 𑌜𑍍𑌞𑍇𑌯𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 12॥
𑌏𑌕𑌾 𑌚 𑌦𑌶 𑌶𑌤𑌂 𑌚 𑌸𑌹𑌸𑍍𑌰𑌂 𑌚𑌾𑌯𑍁𑌤𑌂 𑌚
𑌨𑌿𑌯𑍁𑌤𑌂 𑌚 𑌪𑍍𑌰𑌯𑍁𑌤𑌂 𑌚𑌾𑌰𑍍𑌬𑍁𑌦𑌂 𑌚 𑌨𑍍𑌯𑌰𑍍𑌬𑍁𑌦𑌂 𑌚 ।
𑌸𑌮𑍁𑌦𑍍𑌰𑌶𑍍𑌚 𑌮𑌧𑍍𑌯𑌂 𑌚𑌾𑌨𑍍𑌤𑌶𑍍𑌚 𑌪𑌰𑌾𑌰𑍍𑌧𑌶𑍍𑌚
𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 13॥
𑌯𑍇 𑌪𑌞𑍍𑌚 𑌪𑌞𑍍𑌚𑌦𑌶 𑌶𑌤𑌂 𑌸𑌹𑌸𑍍𑌰𑌮𑌯𑍁𑌤𑌂 𑌨𑍍𑌯𑌰𑍍𑌬𑍁𑌦𑌂 𑌚 ।
𑌤𑍇𑌽𑌗𑍍𑌨𑌿𑌚𑌿𑌤𑍍𑌯𑍇𑌷𑍍𑌟𑌕𑌾𑌸𑍍𑌤𑌂 𑌶𑌰𑍀𑌰𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 14॥
𑌵𑍇𑌦𑌾𑌹𑌮𑍇𑌤𑌂 𑌪𑍁𑌰𑍁𑌷𑌂 𑌮𑌹𑌾𑌨𑍍𑌤𑌮𑌾𑌦𑌿𑌤𑍍𑌯𑌵𑌰𑍍𑌣𑌂 𑌤𑌮𑌸𑌃 𑌪𑌰𑌸𑍍𑌤𑌾𑌤𑍍 ।
𑌯𑌸𑍍𑌯 𑌯𑍋𑌨𑌿𑌂 𑌪𑌰𑌿𑌪𑌶𑍍𑌯𑌨𑍍𑌤𑌿 𑌧𑍀𑌰𑌾𑌸𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥
𑌯𑌸𑍍𑌯𑍇𑌦𑌂 𑌧𑍀𑌰𑌾𑌃 𑌪𑍁𑌨𑌨𑍍𑌤𑌿 𑌕𑌵𑌯𑍋 𑌬𑍍𑌰𑌹𑍍𑌮𑌾𑌣𑌮𑍇𑌤𑌂 𑌤𑍍𑌵𑌾 𑌵𑍃𑌣𑍁𑌤 𑌇𑌨𑍍𑌦𑍁𑌮𑍍 ।
𑌸𑍍𑌥𑌾𑌵𑌰𑌂 𑌜𑌙𑍍𑌗𑌮𑌂 𑌦𑍍𑌯𑍗𑌰𑌾𑌕𑌾𑌶𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 16॥
𑌪𑌰𑌾𑌤𑍍 𑌪𑌰𑌤𑌰𑌂 𑌚𑍈𑌵 𑌯𑌤𑍍𑌪𑌰𑌾𑌚𑍍𑌚𑍈𑌵 𑌯𑌤𑍍𑌪𑌰𑌮𑍍 ।
𑌯𑌤𑍍𑌪𑌰𑌾𑌤𑍍 𑌪𑌰𑌤𑍋 𑌜𑍍𑌞𑍇𑌯𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 17॥
𑌪𑌰𑌾𑌤𑍍 𑌪𑌰𑌤𑌰𑍋 𑌬𑍍𑌰𑌹𑍍𑌮𑌾 𑌤𑌤𑍍𑌪𑌰𑌾𑌤𑍍 𑌪𑌰𑌤𑍋 𑌹𑌰𑌿𑌃 ।
𑌤𑌤𑍍𑌪𑌰𑌾𑌤𑍍 𑌪𑌰𑌤𑍋𑌽𑌧𑍀𑌶𑌸𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 18॥
𑌯𑌾 𑌵𑍇𑌦𑌾𑌦𑌿𑌷𑍁 𑌗𑌾𑌯𑌤𑍍𑌰𑍀 𑌸𑌰𑍍𑌵𑌵𑍍𑌯𑌾𑌪𑍀 𑌮𑌹𑍇𑌶𑍍𑌵𑌰𑍀 ।
𑌋𑌗𑍍𑌯𑌜𑍁𑌸𑍍𑌸𑌾𑌮𑌾𑌥𑌰𑍍𑌵𑍈𑌶𑍍𑌚 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 19॥
𑌯𑍋 𑌵𑍈 𑌦𑍇𑌵𑌂 𑌮𑌹𑌾𑌦𑍇𑌵𑌂 𑌪𑍍𑌰𑌣𑌵𑌂 𑌪𑍁𑌰𑍁𑌷𑍋𑌤𑍍𑌤𑌮𑌮𑍍 ।
𑌯𑌃 𑌸𑌰𑍍𑌵𑍇 𑌸𑌰𑍍𑌵𑌵𑍇𑌦𑍈𑌶𑍍𑌚 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 20॥
𑌪𑍍𑌰𑌯𑌤𑌃 𑌪𑍍𑌰𑌣𑌵𑍋𑌙𑍍𑌕𑌾𑌰𑌂 𑌪𑍍𑌰𑌣𑌵𑌂 𑌪𑍁𑌰𑍁𑌷𑍋𑌤𑍍𑌤𑌮𑌮𑍍 ।
𑌓𑌙𑍍𑌕𑌾𑌰𑌂 𑌪𑍍𑌰𑌣𑌵𑌾𑌤𑍍𑌮𑌾𑌨𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 21॥
𑌯𑍋𑌽𑌸𑍗 𑌸𑌰𑍍𑌵𑍇𑌷𑍁 𑌵𑍇𑌦𑍇𑌷𑍁 𑌪𑌠𑍍𑌯𑌤𑍇 𑌹𑍍𑌯𑌜 𑌇𑌶𑍍𑌵𑌰𑌃 ।
𑌅𑌕𑌾𑌯𑍋 𑌨𑌿𑌰𑍍𑌗𑍁𑌣𑍋 𑌹𑍍𑌯𑌾𑌤𑍍𑌮𑌾 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 22॥
𑌗𑍋𑌭𑌿𑌰𑍍𑌜𑍁𑌷𑍍𑌟𑌂 𑌧𑌨𑍇𑌨 𑌹𑍍𑌯𑌾𑌯𑍁𑌷𑌾 𑌚 𑌬𑌲𑍇𑌨 𑌚 ।
𑌪𑍍𑌰𑌜𑌯𑌾 𑌪𑌶𑍁𑌭𑌿𑌃 𑌪𑍁𑌷𑍍𑌕𑌰𑌾𑌕𑍍𑌷𑌂 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 23॥
𑌤𑍍𑌰𑌿𑌯𑌮𑍍𑌬𑌕𑌂 𑌯𑌜𑌾𑌮𑌹𑍇 𑌸𑍁𑌗𑌨𑍍𑌧𑌿𑌂 𑌪𑍁𑌷𑍍𑌟𑌿𑌵𑌰𑍍𑌧𑌨𑌮𑍍 ।
𑌉𑌰𑍍𑌵𑌾𑌰𑍁𑌕𑌮𑌿𑌵 𑌬𑌨𑍍𑌧𑌨𑌾𑌨𑍍𑌮𑍃𑌤𑍍𑌯𑍋𑌰𑍍𑌮𑍁𑌕𑍍𑌷𑍀𑌯
𑌮𑌾𑌽𑌮𑍃𑌤𑌾𑌤𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 24॥
𑌕𑍈𑌲𑌾𑌸𑌶𑌿𑌖𑌰𑍇 𑌰𑌮𑍍𑌯𑍇 𑌶𑌙𑍍𑌕𑌰𑌸𑍍𑌯 𑌶𑌿𑌵𑌾𑌲𑌯𑍇 ।
𑌦𑍇𑌵𑌤𑌾𑌸𑍍𑌤𑌤𑍍𑌰 𑌮𑍋𑌦𑌨𑍍𑌤𑍇 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 25॥
𑌵𑌿𑌶𑍍𑌵𑌤𑌶𑍍𑌚𑌕𑍍𑌷𑍁𑌰𑍁𑌤 𑌵𑌿𑌶𑍍𑌵𑌤𑍋𑌮𑍁𑌖𑍋 𑌵𑌿𑌶𑍍𑌵𑌤𑍋𑌹𑌸𑍍𑌤 𑌉𑌤 𑌵𑌿𑌶𑍍𑌵𑌤𑌸𑍍𑌪𑌾𑌤𑍍 ।
𑌸𑌮𑍍𑌬𑌾𑌹𑍁𑌭𑍍𑌯𑌾𑌂 𑌨𑌮𑌤𑌿 𑌸𑌮𑍍𑌪𑌤𑌤𑍍𑌰𑍈𑌰𑍍𑌦𑍍𑌯𑌾𑌵𑌾𑌪𑍃𑌥𑌿𑌵𑍀
𑌜𑌨𑌯𑌨𑍍 𑌦𑍇𑌵 𑌏𑌕𑌸𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 26॥
𑌚𑌤𑍁𑌰𑍋 𑌵𑍇𑌦𑌾𑌨𑌧𑍀𑌯𑍀𑌤 𑌸𑌰𑍍𑌵𑌶𑌾𑌸𑍍𑌯𑌮𑌯𑌂 𑌵𑌿𑌦𑍁𑌃 ।
𑌇𑌤𑌿𑌹𑌾𑌸𑌪𑍁𑌰𑌾𑌣𑌾𑌨𑌾𑌂 𑌤𑌨𑍍𑌮𑍇 𑌮𑌨 𑌶𑌿𑌵𑌸𑌙𑍍𑌕𑌨𑍍𑌲𑍍𑌪𑌮𑌸𑍍𑌤𑍁 ॥ 27॥
𑌮𑌾 𑌨𑍋 𑌮𑌹𑌾𑌨𑍍𑌤𑌮𑍁𑌤 𑌮𑌾 𑌨𑍋 𑌅𑌰𑍍𑌭𑌕𑌂 𑌮𑌾 𑌨 𑌉𑌕𑍍𑌷𑌨𑍍𑌤𑌮𑍁𑌤 𑌮𑌾 𑌨 𑌉𑌕𑍍𑌷𑌿𑌤𑌮𑍍 ।
𑌮𑌾 𑌨𑍋 𑌵𑌧𑍀𑌃 𑌪𑌿𑌤𑌰𑌂 𑌮𑍋𑌤 𑌮𑌾𑌤𑌰𑌂 𑌪𑍍𑌰𑌿𑌯𑌾 𑌮𑌾 𑌨𑌃
𑌤𑌨𑍁𑌵𑍋 𑌰𑍁𑌦𑍍𑌰 𑌰𑍀𑌰𑌿𑌷𑌸𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 28॥
𑌮𑌾 𑌨𑌸𑍍𑌤𑍋𑌕𑍇 𑌤𑌨𑌯𑍇 𑌮𑌾 𑌨 𑌆𑌯𑍁𑌷𑌿 𑌮𑌾 𑌨𑍋 𑌗𑍋𑌷𑍁 𑌮𑌾 𑌨𑍋 𑌅𑌶𑍍𑌵𑍇𑌷𑍁 𑌰𑍀𑌰𑌿𑌷𑌃 ।
𑌵𑍀𑌰𑌾𑌨𑍍𑌮𑌾 𑌨𑍋 𑌰𑍁𑌦𑍍𑌰 𑌭𑌾𑌮𑌿𑌤𑍋 𑌵𑌧𑍀𑌰𑍍𑌹𑌵𑌿𑌷𑍍𑌮𑌨𑍍𑌤𑌃
𑌨𑌮𑌸𑌾 𑌵𑌿𑌧𑍇𑌮 𑌤𑍇 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 29॥
𑌋𑌤𑌂 𑌸𑌤𑍍𑌯𑌂 𑌪𑌰𑌂 𑌬𑍍𑌰𑌹𑍍𑌮 𑌪𑍁𑌰𑍁𑌷𑌂 𑌕𑍃𑌷𑍍𑌣𑌪𑌿𑌙𑍍𑌗𑌲𑌮𑍍 ।
𑌊𑌰𑍍𑌧𑍍𑌵𑌰𑍇𑌤𑌂 𑌵𑌿𑌰𑍂𑌪𑌾𑌕𑍍𑌷𑌂 𑌵𑌿𑌶𑍍𑌵𑌰𑍂𑌪𑌾𑌯 𑌵𑍈 𑌨𑌮𑍋 𑌨𑌮𑌃
𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 30॥
𑌕𑌦𑍍𑌰𑍁𑌦𑍍𑌰𑌾𑌯 𑌪𑍍𑌰𑌚𑍇𑌤𑌸𑍇 𑌮𑍀𑌢𑍁𑌷𑍍𑌟𑌮𑌾𑌯 𑌤𑌵𑍍𑌯𑌸𑍇 ।
𑌵𑍋𑌚𑍇𑌮 𑌶𑌨𑍍𑌤𑌮𑌂 𑌹𑍃𑌦𑍇 । 𑌸𑌰𑍍𑌵𑍋 𑌹𑍍𑌯𑍇𑌷 𑌰𑍁𑌦𑍍𑌰𑌸𑍍𑌤𑌸𑍍𑌮𑍈 𑌰𑍁𑌦𑍍𑌰𑌾𑌯
𑌨𑌮𑍋 𑌅𑌸𑍍𑌤𑍁 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 31॥
𑌬𑍍𑌰𑌹𑍍𑌮 𑌜𑌜𑍍𑌞𑌾𑌨𑌂 𑌪𑍍𑌰𑌥𑌮𑌂 𑌪𑍁𑌰𑌸𑍍𑌤𑌾𑌤𑍍 𑌵𑌿 𑌸𑍀𑌮𑌤𑌃 𑌸𑍁𑌰𑍁𑌚𑍋 𑌵𑍇𑌨 𑌆𑌵𑌃 ।
𑌸 𑌬𑍁𑌧𑍍𑌨𑌿𑌯𑌾 𑌉𑌪𑌮𑌾 𑌅𑌸𑍍𑌯 𑌵𑌿𑌷𑍍𑌠𑌾𑌃 𑌸𑌤𑌶𑍍𑌚 𑌯𑍋𑌨𑌿𑌂
𑌅𑌸𑌤𑌶𑍍𑌚 𑌵𑌿𑌵𑌸𑍍𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 32॥
𑌯𑌃 𑌪𑍍𑌰𑌾𑌣𑌤𑍋 𑌨𑌿𑌮𑌿𑌷𑌤𑍋 𑌮𑌹𑌿𑌤𑍍𑌵𑍈𑌕 𑌇𑌦𑍍𑌰𑌾𑌜𑌾 𑌜𑌗𑌤𑍋 𑌬𑌭𑍂𑌵 ।
𑌯 𑌈𑌶𑍇 𑌅𑌸𑍍𑌯 𑌦𑍍𑌵𑌿𑌪𑌦𑌶𑍍𑌚𑌤𑍁𑌷𑍍𑌪𑌦𑌃 𑌕𑌸𑍍𑌮𑍈 𑌦𑍇𑌵𑌾𑌯
𑌹𑌵𑌿𑌷𑌾 𑌵𑌿𑌧𑍇𑌮 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 33॥
𑌯 𑌆𑌤𑍍𑌮𑌦𑌾 𑌬𑌲𑌦𑌾 𑌯𑌸𑍍𑌯 𑌵𑌿𑌶𑍍𑌵𑍇 𑌉𑌪𑌾𑌸𑌤𑍇 𑌪𑍍𑌰𑌶𑌿𑌷𑌂 𑌯𑌸𑍍𑌯 𑌦𑍇𑌵𑌾𑌃 ।
𑌯𑌸𑍍𑌯 𑌛𑌾𑌯𑌾𑌽𑌮𑍃𑌤𑌂 𑌯𑌸𑍍𑌯 𑌮𑍃𑌤𑍍𑌯𑍁𑌃 𑌕𑌸𑍍𑌮𑍈 𑌦𑍇𑌵𑌾𑌯
𑌹𑌵𑌿𑌷𑌾 𑌵𑌿𑌧𑍇𑌮 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 34॥
𑌯𑍋 𑌰𑍁𑌦𑍍𑌰𑍋 𑌅𑌗𑍍𑌨𑍗 𑌯𑍋 𑌅𑌪𑍍𑌸𑍁 𑌯 𑌓𑌷𑌧𑍀𑌷𑍁 𑌯𑍋 𑌰𑍁𑌦𑍍𑌰𑍋 𑌵𑌿𑌶𑍍𑌵𑌾 𑌭𑍁𑌵𑌨𑌾𑌽𑌽𑌵𑌿𑌵𑍇𑌶 ।
𑌤𑌸𑍍𑌮𑍈 𑌰𑍁𑌦𑍍𑌰𑌾𑌯 𑌨𑌮𑍋 𑌅𑌸𑍍𑌤𑍁 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 35॥
𑌗𑌨𑍍𑌧𑌦𑍍𑌵𑌾𑌰𑌾𑌂 𑌦𑍁𑌰𑌾𑌧𑌰𑍍𑌷𑌾𑌂 𑌨𑌿𑌤𑍍𑌯𑌪𑍁𑌷𑍍𑌟𑌾𑌂 𑌕𑌰𑍀𑌷𑌿𑌣𑍀𑌮𑍍 ।
𑌈𑌶𑍍𑌵𑌰𑍀𑌂 𑌸𑌰𑍍𑌵𑌭𑍂𑌤𑌾𑌨𑌾𑌂 𑌤𑌾𑌮𑌿𑌹𑍋𑌪𑌹𑍍𑌵𑌯𑍇 𑌶𑍍𑌰𑌿𑌯𑌂
𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 36॥
𑌯 𑌇𑌦𑌂 𑌶𑌿𑌵𑌸𑌙𑍍𑌕𑌲𑍍𑌪𑌂 𑌸𑌦𑌾 𑌧𑍍𑌯𑌾𑌯𑌨𑍍𑌤𑌿 𑌬𑍍𑌰𑌾𑌹𑍍𑌮𑌣𑌾𑌃 ।
𑌤𑍇 𑌪𑌰𑌂 𑌮𑍋𑌕𑍍𑌷𑌂 𑌗𑌮𑌿𑌷𑍍𑌯𑌨𑍍𑌤𑌿 𑌤𑌨𑍍𑌮𑍇 𑌮𑌨𑌃 𑌶𑌿𑌵𑌸𑌙𑍍𑌕𑌲𑍍𑌪𑌮𑌸𑍍𑌤𑍁 ॥ 37॥
𑌇𑌤𑌿 𑌶𑌿𑌵𑌸𑌙𑍍𑌕𑌲𑍍𑌪𑌮𑌨𑍍𑌤𑍍𑌰𑌾𑌃 𑌸𑌮𑌾𑌪𑍍𑌤𑌾𑌃 ।
(𑌶𑍈𑌵-𑌉𑌪𑌨𑌿𑌷𑌦𑌃)
𑌇𑌤𑌿 𑌶𑌿𑌵𑌸𑌙𑍍𑌕𑌲𑍍𑌪𑍋𑌪𑌨𑌿𑌷𑌤𑍍 𑌸𑌮𑌾𑌪𑍍𑌤 ।
Roman (IAST) Transliteration
yenedaṃ bhūtaṃ bhuvanaṃ bhaviṣyat parigṛhītamamṛtena sarvam |
yena yajñastāyate saptahotā tanme manaḥ śivasaṅkalpamastu || 1||
yena karmāṇi pracaranti dhīrā yato vācā manasā cāru yanti |
yatsammitamanu saṃyanti prāṇinastanme manaḥ śivasaṅkalpamastu || 2||
yena karmāṇyapaso manīṣiṇo yajñe kṛṇvanti vidatheṣu dhīrāḥ |
yadapūrvaṃ yakṣamantaḥ prajānāṃ tanme manaḥ śivasaṅkalpamastu || 3||
yatprajñānamuta ceto dhṛtiśca yajjyotirantaramṛtaṃ prajāsu |
yasmānna ṛte kiñcana karma kriyate tanme manaḥ śivasaṅkalpamastu || 4||
suṣārathiraśvāniva yanmanuṣyānnenīyate'bhīśubhirvājina iva |
hṛtpratiṣṭhaṃ yadajiraṃ javiṣṭhaṃ tanme manaḥ śivasaṅkalpamastu || 5||
yasminnṛcaḥ sāma yajūṣi yasmin pratiṣṭhitā rathanābhāvivārāḥ |
yasmiṃścittaṃ sarvamotaṃ prajānāṃ tanme manaḥ śivasaṅkalpamastu || 6||
yadatra ṣaṣṭhaṃ triśataṃ suvīraṃ yajñasya guhyaṃ navanāvamāyyaṃ (?) |
daśa pañca triṃśataṃ yatparaṃ ca tanme manaḥ śivasaṅkalpamastu || 7||
yajjāgrato dūramudaiti daivaṃ tadu suptasya tathaivaiti |
dūraṅgamaṃ jyotiṣāṃ jyotirekaṃ tanme manaḥ śivasaṅkalpamastu || 8||
yena dyauḥ pṛthivī cāntarikṣaṃ ca ye parvatāḥ pradiśo diśaśca |
yenedaṃ jagadvyāptaṃ prajānāṃ tanme manaḥ śivasaṅkalpamastu || 9||
yenedaṃ viśvaṃ jagato babhūva ye devā api mahato jātavedāḥ |
tadevāgnistamaso jyotirekaṃ tanme manaḥ śivasaṅkalpamastu || 10||
ye mano hṛdayaṃ ye ca devā ye divyā āpo ye sūryaraśmiḥ |
te śrotre cakṣuṣī sañcarantaṃ tanme manaḥ śivasaṅkalpamastu || 11||
acintyaṃ cāprameyaṃ ca vyaktāvyaktaparaṃ ca yata |
sūkṣmātsūkṣmataraṃ jñeyaṃ tanme manaḥ śivasaṅkalpamastu || 12||
ekā ca daśa śataṃ ca sahasraṃ cāyutaṃ ca
niyutaṃ ca prayutaṃ cārbudaṃ ca nyarbudaṃ ca |
samudraśca madhyaṃ cāntaśca parārdhaśca
tanme manaḥ śivasaṅkalpamastu || 13||
ye pañca pañcadaśa śataṃ sahasramayutaṃ nyarbudaṃ ca |
te'gnicityeṣṭakāstaṃ śarīraṃ tanme manaḥ śivasaṅkalpamastu || 14||
vedāhametaṃ puruṣaṃ mahāntamādityavarṇaṃ tamasaḥ parastāt |
yasya yoniṃ paripaśyanti dhīrāstanme manaḥ śivasaṅkalpamastu ||
yasyedaṃ dhīrāḥ punanti kavayo brahmāṇametaṃ tvā vṛṇuta indum |
sthāvaraṃ jaṅgamaṃ dyaurākāśaṃ tanme manaḥ śivasaṅkalpamastu || 16||
parāt parataraṃ caiva yatparāccaiva yatparam |
yatparāt parato jñeyaṃ tanme manaḥ śivasaṅkalpamastu || 17||
parāt parataro brahmā tatparāt parato hariḥ |
tatparāt parato'dhīśastanme manaḥ śivasaṅkalpamastu || 18||
yā vedādiṣu gāyatrī sarvavyāpī maheśvarī |
ṛgyajussāmātharvaiśca tanme manaḥ śivasaṅkalpamastu || 19||
yo vai devaṃ mahādevaṃ praṇavaṃ puruṣottamam |
yaḥ sarve sarvavedaiśca tanme manaḥ śivasaṅkalpamastu || 20||
prayataḥ praṇavoṅkāraṃ praṇavaṃ puruṣottamam |
oṅkāraṃ praṇavātmānaṃ tanme manaḥ śivasaṅkalpamastu || 21||
yo'sau sarveṣu vedeṣu paṭhyate hyaja iśvaraḥ |
akāyo nirguṇo hyātmā tanme manaḥ śivasaṅkalpamastu || 22||
gobhirjuṣṭaṃ dhanena hyāyuṣā ca balena ca |
prajayā paśubhiḥ puṣkarākṣaṃ tanme manaḥ śivasaṅkalpamastu || 23||
triyambakaṃ yajāmahe sugandhiṃ puṣṭivardhanam |
urvārukamiva bandhanānmṛtyormukṣīya
mā'mṛtāttanme manaḥ śivasaṅkalpamastu || 24||
kailāsaśikhare ramye śaṅkarasya śivālaye |
devatāstatra modante tanme manaḥ śivasaṅkalpamastu || 25||
viśvataścakṣuruta viśvatomukho viśvatohasta uta viśvataspāt |
sambāhubhyāṃ namati sampatatrairdyāvāpṛthivī
janayan deva ekastanme manaḥ śivasaṅkalpamastu || 26||
caturo vedānadhīyīta sarvaśāsyamayaṃ viduḥ |
itihāsapurāṇānāṃ tanme mana śivasaṅkanlpamastu || 27||
mā no mahāntamuta mā no arbhakaṃ mā na ukṣantamuta mā na ukṣitam |
mā no vadhīḥ pitaraṃ mota mātaraṃ priyā mā naḥ
tanuvo rudra rīriṣastanme manaḥ śivasaṅkalpamastu || 28||
mā nastoke tanaye mā na āyuṣi mā no goṣu mā no aśveṣu rīriṣaḥ |
vīrānmā no rudra bhāmito vadhīrhaviṣmantaḥ
namasā vidhema te tanme manaḥ śivasaṅkalpamastu || 29||
ṛtaṃ satyaṃ paraṃ brahma puruṣaṃ kṛṣṇapiṅgalam |
ūrdhvaretaṃ virūpākṣaṃ viśvarūpāya vai namo namaḥ
tanme manaḥ śivasaṅkalpamastu || 30||
kadrudrāya pracetase mīḍhuṣṭamāya tavyase |
vocema śantamaṃ hṛde | sarvo hyeṣa rudrastasmai rudrāya
namo astu tanme manaḥ śivasaṅkalpamastu || 31||
brahma jajñānaṃ prathamaṃ purastāt vi sīmataḥ suruco vena āvaḥ |
sa budhniyā upamā asya viṣṭhāḥ sataśca yoniṃ
asataśca vivastanme manaḥ śivasaṅkalpamastu || 32||
yaḥ prāṇato nimiṣato mahitvaika idrājā jagato babhūva |
ya īśe asya dvipadaścatuṣpadaḥ kasmai devāya
haviṣā vidhema tanme manaḥ śivasaṅkalpamastu || 33||
ya ātmadā baladā yasya viśve upāsate praśiṣaṃ yasya devāḥ |
yasya chāyā'mṛtaṃ yasya mṛtyuḥ kasmai devāya
haviṣā vidhema tanme manaḥ śivasaṅkalpamastu || 34||
yo rudro agnau yo apsu ya oṣadhīṣu yo rudro viśvā bhuvanā''viveśa |
tasmai rudrāya namo astu tanme manaḥ śivasaṅkalpamastu || 35||
gandhadvārāṃ durādharṣāṃ nityapuṣṭāṃ karīṣiṇīm |
īśvarīṃ sarvabhūtānāṃ tāmihopahvaye śriyaṃ
tanme manaḥ śivasaṅkalpamastu || 36||
ya idaṃ śivasaṅkalpaṃ sadā dhyāyanti brāhmaṇāḥ |
te paraṃ mokṣaṃ gamiṣyanti tanme manaḥ śivasaṅkalpamastu || 37||
iti śivasaṅkalpamantrāḥ samāptāḥ |
(śaiva-upaniṣadaḥ)
iti śivasaṅkalpopaniṣat samāpta |
InfoLyter.in — Sacred Vedic Knowledge Portal · Free forever