📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌶𑌿𑌵 𑌸𑌹𑌸𑍍𑌰 𑌨𑌾𑌮 𑌸𑍍𑌤𑍋𑌤𑍍𑌰𑌮𑍍
Shiva Sahasra Nama Stotram
Shiva Stotram Grantha
𑌪𑍂𑌰𑍍𑌵𑌪𑍀𑌠𑌿𑌕𑌾 ॥
𑌵𑌾𑌸𑍁𑌦𑍇𑌵 𑌉𑌵𑌾𑌚 ।
𑌤𑌤𑌃 𑌸 𑌪𑍍𑌰𑌯𑌤𑍋 𑌭𑍂𑌤𑍍𑌵𑌾 𑌮𑌮 𑌤𑌾𑌤 𑌯𑍁𑌧𑌿𑌷𑍍𑌠𑌿𑌰 ।
𑌪𑍍𑌰𑌾𑌞𑍍𑌜𑌲𑌿𑌃 𑌪𑍍𑌰𑌾𑌹 𑌵𑌿𑌪𑍍𑌰𑌰𑍍𑌷𑌿𑌰𑍍𑌨𑌾𑌮𑌸𑌙𑍍𑌗𑍍𑌰𑌹𑌮𑌾𑌦𑌿𑌤𑌃 ॥ 1 ॥
𑌉𑌪𑌮𑌨𑍍𑌯𑍁𑌰𑍁𑌵𑌾𑌚 ।
𑌬𑍍𑌰𑌹𑍍𑌮𑌪𑍍𑌰𑍋𑌕𑍍𑌤𑍈𑌰𑍃𑌷𑌿𑌪𑍍𑌰𑍋𑌕𑍍𑌤𑍈𑌰𑍍𑌵𑍇𑌦𑌵𑍇𑌦𑌾𑌙𑍍𑌗𑌸𑌮𑍍𑌭𑌵𑍈𑌃 ।
𑌸𑌰𑍍𑌵𑌲𑍋𑌕𑍇𑌷𑍁 𑌵𑌿𑌖𑍍𑌯𑌾𑌤𑌂 𑌸𑍍𑌤𑍁𑌤𑍍𑌯𑌂 𑌸𑍍𑌤𑍋𑌷𑍍𑌯𑌾𑌮𑌿 𑌨𑌾𑌮𑌭𑌿𑌃 ॥ 2 ॥
𑌮𑌹𑌦𑍍𑌭𑌿𑌰𑍍𑌵𑌿𑌹𑌿𑌤𑍈𑌃 𑌸𑌤𑍍𑌯𑍈𑌃 𑌸𑌿𑌦𑍍𑌧𑍈𑌃 𑌸𑌰𑍍𑌵𑌾𑌰𑍍𑌥𑌸𑌾𑌧𑌕𑍈𑌃 ।
𑌋𑌷𑌿𑌣𑌾 𑌤𑌣𑍍𑌡𑌿𑌨𑌾 𑌭𑌕𑍍𑌤𑍍𑌯𑌾 𑌕𑍃𑌤𑍈𑌰𑍍𑌵𑍇𑌦𑌕𑍃𑌤𑌾𑌤𑍍𑌮𑌨𑌾 ॥ 3 ॥
𑌯𑌥𑍋𑌕𑍍𑌤𑍈𑌃 𑌸𑌾𑌧𑍁𑌭𑌿𑌃 𑌖𑍍𑌯𑌾𑌤𑍈𑌰𑍍𑌮𑍁𑌨𑌿𑌭𑌿𑌸𑍍𑌤𑌤𑍍𑌤𑍍𑌵𑌦𑌰𑍍𑌶𑌿𑌭𑌿𑌃 ।
𑌪𑍍𑌰𑌵𑌰𑌂 𑌪𑍍𑌰𑌥𑌮𑌂 𑌸𑍍𑌵𑌰𑍍𑌗𑍍𑌯𑌂 𑌸𑌰𑍍𑌵𑌭𑍂𑌤𑌹𑌿𑌤𑌂 𑌶𑍁𑌭𑌮𑍍 ॥ 4 ॥
𑌶𑍍𑌰𑍁𑌤𑍈𑌃 𑌸𑌰𑍍𑌵𑌤𑍍𑌰 𑌜𑌗𑌤𑌿 𑌬𑍍𑌰𑌹𑍍𑌮𑌲𑍋𑌕𑌾𑌵𑌤𑌾𑌰𑌿𑌤𑍈𑌃 ।
𑌸𑌤𑍍𑌯𑍈𑌸𑍍𑌤𑌤𑍍𑌪𑌰𑌮𑌂 𑌬𑍍𑌰𑌹𑍍𑌮 𑌬𑍍𑌰𑌹𑍍𑌮𑌪𑍍𑌰𑍋𑌕𑍍𑌤𑌂 𑌸𑌨𑌾𑌤𑌨𑌮𑍍 ॥ 5 ॥
𑌵𑌕𑍍𑌷𑍍𑌯𑍇 𑌯𑌦𑍁𑌕𑍁𑌲𑌶𑍍𑌰𑍇𑌷𑍍𑌠 𑌶𑍃𑌣𑍁𑌷𑍍𑌵𑌾𑌵𑌹𑌿𑌤𑍋 𑌮𑌮 ।
𑌵𑌰𑌯𑍈𑌨𑌂 𑌭𑌵𑌂 𑌦𑍇𑌵𑌂 𑌭𑌕𑍍𑌤𑌸𑍍𑌤𑍍𑌵𑌂 𑌪𑌰𑌮𑍇𑌶𑍍𑌵𑌰𑌮𑍍 ॥ 6 ॥
𑌤𑍇𑌨 𑌤𑍇 𑌶𑍍𑌰𑌾𑌵𑌯𑌿𑌷𑍍𑌯𑌾𑌮𑌿 𑌯𑌤𑍍𑌤𑌦𑍍𑌬𑍍𑌰𑌹𑍍𑌮 𑌸𑌨𑌾𑌤𑌨𑌮𑍍 ।
𑌨 𑌶𑌕𑍍𑌯𑌂 𑌵𑌿𑌸𑍍𑌤𑌰𑌾𑌤𑍍𑌕𑍃𑌤𑍍𑌸𑍍𑌨𑌂 𑌵𑌕𑍍𑌤𑍁𑌂 𑌸𑌰𑍍𑌵𑌸𑍍𑌯 𑌕𑍇𑌨𑌚𑌿𑌤𑍍 ॥ 7 ॥
𑌯𑍁𑌕𑍍𑌤𑍇𑌨𑌾𑌪𑌿 𑌵𑌿𑌭𑍂𑌤𑍀𑌨𑌾𑌮𑌪𑌿 𑌵𑌰𑍍𑌷𑌶𑌤𑍈𑌰𑌪𑌿 ।
𑌯𑌸𑍍𑌯𑌾𑌦𑌿𑌰𑍍𑌮𑌧𑍍𑌯𑌮𑌨𑍍𑌤𑌂 𑌚 𑌸𑍁𑌰𑍈𑌰𑌪𑌿 𑌨 𑌗𑌮𑍍𑌯𑌤𑍇 ॥ 8 ॥
𑌕𑌸𑍍𑌤𑌸𑍍𑌯 𑌶𑌕𑍍𑌨𑍁𑌯𑌾𑌦𑍍𑌵𑌕𑍍𑌤𑍁𑌂 𑌗𑍁𑌣𑌾𑌨𑍍 𑌕𑌾𑌰𑍍𑌤𑍍𑌸𑍍𑌨𑍍𑌯𑍇𑌨 𑌮𑌾𑌧𑌵 ।
𑌕𑌿𑌂 𑌤𑍁 𑌦𑍇𑌵𑌸𑍍𑌯 𑌮𑌹𑌤𑌃 𑌸𑌙𑍍𑌕𑍍𑌷𑌿𑌪𑍍𑌤𑌾𑌰𑍍𑌥𑌪𑌦𑌾𑌕𑍍𑌷𑌰𑌮𑍍 ॥ 9 ॥
𑌶𑌕𑍍𑌤𑌿𑌤𑌶𑍍𑌚𑌰𑌿𑌤𑌂 𑌵𑌕𑍍𑌷𑍍𑌯𑍇 𑌪𑍍𑌰𑌸𑌾𑌦𑌾𑌤𑍍𑌤𑌸𑍍𑌯 𑌧𑍀𑌮𑌤𑌃 ।
𑌅𑌪𑍍𑌰𑌾𑌪𑍍𑌯 𑌤𑍁 𑌤𑌤𑍋𑌽𑌨𑍁𑌜𑍍𑌞𑌾𑌂 𑌨 𑌶𑌕𑍍𑌯𑌃 𑌸𑍍𑌤𑍋𑌤𑍁𑌮𑍀𑌶𑍍𑌵𑌰𑌃 ॥ 10 ॥
𑌯𑌦𑌾 𑌤𑍇𑌨𑌾𑌭𑍍𑌯𑌨𑍁𑌜𑍍𑌞𑌾𑌤𑌃 𑌸𑍍𑌤𑍁𑌤𑍋 𑌵𑍈 𑌸 𑌤𑌦𑌾 𑌮𑌯𑌾 ।
𑌅𑌨𑌾𑌦𑌿𑌨𑌿𑌧𑌨𑌸𑍍𑌯𑌾𑌹𑌂 𑌜𑌗𑌦𑍍𑌯𑍋𑌨𑍇𑌰𑍍𑌮𑌹𑌾𑌤𑍍𑌮𑌨𑌃 ॥ 11 ॥
𑌨𑌾𑌮𑍍𑌨𑌾𑌂 𑌕𑌿𑌞𑍍𑌚𑌿𑌤𑍍𑌸𑌮𑍁𑌦𑍍𑌦𑍇𑌶𑌂 𑌵𑌕𑍍𑌷𑍍𑌯𑌾𑌮𑍍𑌯𑌵𑍍𑌯𑌕𑍍𑌤𑌯𑍋𑌨𑌿𑌨𑌃 ।
𑌵𑌰𑌦𑌸𑍍𑌯 𑌵𑌰𑍇𑌣𑍍𑌯𑌸𑍍𑌯 𑌵𑌿𑌶𑍍𑌵𑌰𑍂𑌪𑌸𑍍𑌯 𑌧𑍀𑌮𑌤𑌃 ॥ 12 ॥
𑌶𑍃𑌣𑍁 𑌨𑌾𑌮𑍍𑌨𑌾𑌂 𑌚 𑌯𑌂 𑌕𑍃𑌷𑍍𑌣 𑌯𑌦𑍁𑌕𑍍𑌤𑌂 𑌪𑌦𑍍𑌮𑌯𑍋𑌨𑌿𑌨𑌾 ।
𑌦𑌶𑌨𑌾𑌮𑌸𑌹𑌸𑍍𑌰𑌾𑌣𑌿 𑌯𑌾𑌨𑍍𑌯𑌾𑌹 𑌪𑍍𑌰𑌪𑌿𑌤𑌾𑌮𑌹𑌃 ॥ 13 ॥
𑌤𑌾𑌨𑌿 𑌨𑌿𑌰𑍍𑌮𑌥𑍍𑌯 𑌮𑌨𑌸𑌾 𑌦𑌧𑍍𑌨𑍋 𑌘𑍃𑌤𑌮𑌿𑌵𑍋𑌦𑍍𑌧𑍃𑌤𑌮𑍍 ।
𑌗𑌿𑌰𑍇𑌃 𑌸𑌾𑌰𑌂 𑌯𑌥𑌾 𑌹𑍇𑌮 𑌪𑍁𑌷𑍍𑌪𑌸𑌾𑌰𑌂 𑌯𑌥𑌾 𑌮𑌧𑍁 ॥ 14 ॥
𑌘𑍃𑌤𑌾𑌤𑍍𑌸𑌾𑌰𑌂 𑌯𑌥𑌾 𑌮𑌣𑍍𑌡𑌸𑍍𑌤𑌥𑍈𑌤𑌤𑍍𑌸𑌾𑌰𑌮𑍁𑌦𑍍𑌧𑍃𑌤𑌮𑍍 ।
𑌸𑌰𑍍𑌵𑌪𑌾𑌪𑌾𑌪𑌹𑌮𑌿𑌦𑌂 𑌚𑌤𑍁𑌰𑍍𑌵𑍇𑌦𑌸𑌮𑌨𑍍𑌵𑌿𑌤𑌮𑍍 ॥ 15 ॥
𑌪𑍍𑌰𑌯𑌤𑍍𑌨𑍇𑌨𑌾𑌧𑌿𑌗𑌨𑍍𑌤𑌵𑍍𑌯𑌂 𑌧𑌾𑌰𑍍𑌯𑌂 𑌚 𑌪𑍍𑌰𑌯𑌤𑌾𑌤𑍍𑌮𑌨𑌾 ।
𑌮𑌾𑌙𑍍𑌗𑌲𑍍𑌯𑌂 𑌪𑍗𑌷𑍍𑌟𑌿𑌕𑌂 𑌚𑍈𑌵 𑌰𑌕𑍍𑌷𑍋𑌘𑍍𑌨𑌂 𑌪𑌾𑌵𑌨𑌂 𑌮𑌹𑌤𑍍 ॥ 16 ॥
𑌇𑌦𑌂 𑌭𑌕𑍍𑌤𑌾𑌯 𑌦𑌾𑌤𑌵𑍍𑌯𑌂 𑌶𑍍𑌰𑌦𑍍𑌦𑌧𑌾𑌨𑌾𑌸𑍍𑌤𑌿𑌕𑌾𑌯 𑌚 ।
𑌨𑌾𑌶𑍍𑌰𑌦𑍍𑌦𑌧𑌾𑌨𑌰𑍂𑌪𑌾𑌯 𑌨𑌾𑌸𑍍𑌤𑌿𑌕𑌾𑌯𑌾𑌜𑌿𑌤𑌾𑌤𑍍𑌮𑌨𑍇 ॥ 17 ॥
𑌯𑌶𑍍𑌚𑌾𑌭𑍍𑌯𑌸𑍂𑌯𑌤𑍇 𑌦𑍇𑌵𑌂 𑌕𑌾𑌰𑌣𑌾𑌤𑍍𑌮𑌾𑌨𑌮𑍀𑌶𑍍𑌵𑌰𑌮𑍍 ।
𑌸 𑌕𑍃𑌷𑍍𑌣 𑌨𑌰𑌕𑌂 𑌯𑌾𑌤𑌿 𑌸𑌹 𑌪𑍂𑌰𑍍𑌵𑍈𑌃 𑌸𑌹𑌾𑌤𑍍𑌮𑌜𑍈𑌃 ॥ 18 ॥
𑌇𑌦𑌂 𑌧𑍍𑌯𑌾𑌨𑌮𑌿𑌦𑌂 𑌯𑍋𑌗𑌮𑌿𑌦𑌂 𑌧𑍍𑌯𑍇𑌯𑌮𑌨𑍁𑌤𑍍𑌤𑌮𑌮𑍍 ।
𑌇𑌦𑌂 𑌜𑌪𑍍𑌯𑌮𑌿𑌦𑌂 𑌜𑍍𑌞𑌾𑌨𑌂 𑌰𑌹𑌸𑍍𑌯𑌮𑌿𑌦𑌮𑍁𑌤𑍍𑌤𑌮𑌮𑍍 ॥ 19 ॥
𑌯𑌂 𑌜𑍍𑌞𑌾𑌤𑍍𑌵𑌾 𑌅𑌨𑍍𑌤𑌕𑌾𑌲𑍇𑌪𑌿 𑌗𑌚𑍍𑌛𑍇𑌤 𑌪𑌰𑌮𑌾𑌂 𑌗𑌤𑌿𑌮𑍍 ।
𑌪𑌵𑌿𑌤𑍍𑌰𑌂 𑌮𑌙𑍍𑌗𑌲𑌂 𑌮𑍇𑌧𑍍𑌯𑌂 𑌕𑌲𑍍𑌯𑌾𑌣𑌮𑌿𑌦𑌮𑍁𑌤𑍍𑌤𑌮𑌮𑍍 ॥ 20 ॥
𑌇𑌦𑌂 𑌬𑍍𑌰𑌹𑍍𑌮𑌾 𑌪𑍁𑌰𑌾 𑌕𑍃𑌤𑍍𑌵𑌾 𑌸𑌰𑍍𑌵𑌲𑍋𑌕𑌪𑌿𑌤𑌾𑌮𑌹𑌃 ।
𑌸𑌰𑍍𑌵 𑌸𑍍𑌤𑌵𑌾𑌨𑌾𑌂 𑌰𑌾𑌜𑌤𑍍𑌵𑍇 𑌦𑌿𑌵𑍍𑌯𑌾𑌨𑌾𑌂 𑌸𑌮𑌕𑌲𑍍𑌪𑌯𑌤𑍍 ॥ 21 ॥
𑌤𑌦𑌾 𑌪𑍍𑌰𑌭𑍃𑌤𑌿 𑌚𑍈𑌵𑌾𑌯𑌮𑍀𑌶𑍍𑌵𑌰𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌸𑍍𑌤𑌵𑌰𑌾𑌜 𑌇𑌤𑌿 𑌖𑍍𑌯𑌾𑌤𑍋 𑌜𑌗𑌤𑍍𑌯𑌮𑌰𑌪𑍂𑌜𑌿𑌤𑌃 ॥ 22 ॥
𑌬𑍍𑌰𑌹𑍍𑌮𑌲𑍋𑌕𑌾𑌦𑌯𑌂 𑌸𑍍𑌵𑌰𑍍𑌗𑍇 𑌸𑍍𑌤𑌵𑌰𑌾𑌜𑍋𑌽𑌵𑌤𑌾𑌰𑌿𑌤𑌃 ।
𑌯𑌤𑌸𑍍𑌤𑌣𑍍𑌡𑌿𑌃 𑌪𑍁𑌰𑌾 𑌪𑍍𑌰𑌾𑌪 𑌤𑍇𑌨 𑌤𑌣𑍍𑌡𑌿𑌕𑍃𑌤𑍋𑌽𑌭𑌵𑌤𑍍 ॥ 23 ॥
𑌸𑍍𑌵𑌰𑍍𑌗𑌾𑌚𑍍𑌚𑍈𑌵𑌾𑌤𑍍𑌰 𑌭𑍂𑌰𑍍𑌲𑍋𑌕𑌂 𑌤𑌣𑍍𑌡𑌿𑌨𑌾 𑌹𑍍𑌯𑌵𑌤𑌾𑌰𑌿𑌤𑌃 ।
𑌸𑌰𑍍𑌵𑌮𑌙𑍍𑌗𑌲𑌮𑌾𑌙𑍍𑌗𑌲𑍍𑌯𑌂 𑌸𑌰𑍍𑌵𑌪𑌾𑌪𑌪𑍍𑌰𑌣𑌾𑌶𑌨𑌮𑍍 ॥ 24 ॥
𑌨𑌿𑌗𑌦𑌿𑌷𑍍𑌯𑍇 𑌮𑌹𑌾𑌬𑌾𑌹𑍋 𑌸𑍍𑌤𑌵𑌾𑌨𑌾𑌮𑍁𑌤𑍍𑌤𑌮𑌂 𑌸𑍍𑌤𑌵𑌮𑍍 ।
𑌬𑍍𑌰𑌹𑍍𑌮𑌣𑌾𑌮𑌪𑌿 𑌯𑌦𑍍𑌬𑍍𑌰𑌹𑍍𑌮 𑌪𑌰𑌾𑌣𑌾𑌮𑌪𑌿 𑌯𑌤𑍍𑌪𑌰𑌮𑍍 ॥ 25 ॥
𑌤𑍇𑌜𑌸𑌾𑌮𑌪𑌿 𑌯𑌤𑍍𑌤𑍇𑌜𑌸𑍍𑌤𑌪𑌸𑌾𑌮𑌪𑌿 𑌯𑌤𑍍𑌤𑌪𑌃 ।
𑌶𑌾𑌨𑍍𑌤𑌾𑌨𑌾𑌮𑌪𑌿 𑌯𑌃 𑌶𑌾𑌨𑍍𑌤𑍋 𑌦𑍍𑌯𑍁𑌤𑍀𑌨𑌾𑌮𑌪𑌿 𑌯𑌾 𑌦𑍍𑌯𑍁𑌤𑌿𑌃 ॥ 26 ॥
𑌦𑌾𑌨𑍍𑌤𑌾𑌨𑌾𑌮𑌪𑌿 𑌯𑍋 𑌦𑌾𑌨𑍍𑌤𑍋 𑌧𑍀𑌮𑌤𑌾𑌮𑌪𑌿 𑌯𑌾 𑌚 𑌧𑍀𑌃 ।
𑌦𑍇𑌵𑌾𑌨𑌾𑌮𑌪𑌿 𑌯𑍋 𑌦𑍇𑌵 𑌋𑌷𑍀𑌣𑌾𑌮𑌪𑌿 𑌯𑌸𑍍𑌤𑍍𑌵𑍃𑌷𑌿𑌃 ॥ 27 ॥
𑌯𑌜𑍍𑌞𑌾𑌨𑌾𑌮𑌪𑌿 𑌯𑍋 𑌯𑌜𑍍𑌞𑌃 𑌶𑌿𑌵𑌾𑌨𑌾𑌮𑌪𑌿 𑌯𑌃 𑌶𑌿𑌵𑌃 ।
𑌰𑍁𑌦𑍍𑌰𑌾𑌣𑌾𑌮𑌪𑌿 𑌯𑍋 𑌰𑍁𑌦𑍍𑌰𑌃 𑌪𑍍𑌰𑌭𑌾 𑌪𑍍𑌰𑌭𑌵𑌤𑌾𑌮𑌪𑌿 ॥ 28 ॥
𑌯𑍋𑌗𑌿𑌨𑌾𑌮𑌪𑌿 𑌯𑍋 𑌯𑍋𑌗𑍀 𑌕𑌾𑌰𑌣𑌾𑌨𑌾𑌂 𑌚 𑌕𑌾𑌰𑌣𑌮𑍍 ।
𑌯𑌤𑍋 𑌲𑍋𑌕𑌾𑌃 𑌸𑌮𑍍𑌭𑌵𑌨𑍍𑌤𑌿 𑌨 𑌭𑌵𑌨𑍍𑌤𑌿 𑌯𑌤𑌃 𑌪𑍁𑌨𑌃 ॥ 29 ॥
𑌸𑌰𑍍𑌵𑌭𑍂𑌤𑌾𑌤𑍍𑌮𑌭𑍂𑌤𑌸𑍍𑌯 𑌹𑌰𑌸𑍍𑌯𑌾𑌮𑌿𑌤𑌤𑍇𑌜𑌸𑌃 ।
𑌅𑌷𑍍𑌟𑍋𑌤𑍍𑌤𑌰𑌸𑌹𑌸𑍍𑌰𑌂 𑌤𑍁 𑌨𑌾𑌮𑍍𑌨𑌾𑌂 𑌶𑌰𑍍𑌵𑌸𑍍𑌯 𑌮𑍇 𑌶𑍃𑌣𑍁 ।
𑌯𑌚𑍍𑌛𑍍𑌰𑍁𑌤𑍍𑌵𑌾 𑌮𑌨𑍁𑌜𑌵𑍍𑌯𑌾𑌘𑍍𑌰 𑌸𑌰𑍍𑌵𑌾𑌨𑍍𑌕𑌾𑌮𑌾𑌨𑌵𑌾𑌪𑍍𑌸𑍍𑌯𑌸𑌿 ॥ 30 ॥
𑌧𑍍𑌯𑌾𑌨𑌮𑍍 ।
𑌶𑌾𑌨𑍍𑌤𑌂 𑌪𑌦𑍍𑌮𑌾𑌸𑌨𑌸𑍍𑌥𑌂 𑌶𑌶𑌿𑌧𑌰𑌮𑍁𑌕𑍁𑌟𑌂 𑌪𑌞𑍍𑌚𑌵𑌕𑍍𑌤𑍍𑌰𑌂 𑌤𑍍𑌰𑌿𑌨𑍇𑌤𑍍𑌰𑌂
𑌶𑍂𑌲𑌂 𑌵𑌜𑍍𑌰𑌂 𑌚 𑌖𑌡𑍍𑌗𑌂 𑌪𑌰𑌶𑍁𑌮𑌭𑌯𑌦𑌂 𑌦𑌕𑍍𑌷𑌭𑌾𑌗𑍇 𑌵𑌹𑌨𑍍𑌤𑌮𑍍 ।
𑌨𑌾𑌗𑌂 𑌪𑌾𑌶𑌂 𑌚 𑌘𑌣𑍍𑌟𑌾𑌂 𑌪𑍍𑌰𑌲𑌯𑌹𑍁𑌤𑌵𑌹𑌂 𑌸𑌾𑌙𑍍𑌕𑍁𑌶𑌂 𑌵𑌾𑌮𑌭𑌾𑌗𑍇
𑌨𑌾𑌨𑌾𑌲𑌙𑍍𑌕𑌾𑌰𑌯𑍁𑌕𑍍𑌤𑌂 𑌸𑍍𑌫𑌟𑌿𑌕𑌮𑌣𑌿𑌨𑌿𑌭𑌂 𑌪𑌾𑌰𑍍𑌵𑌤𑍀𑌶𑌂 𑌨𑌮𑌾𑌮𑌿 ॥
𑌸𑍍𑌤𑍋𑌤𑍍𑌰𑌮𑍍 ।
𑍐 𑌸𑍍𑌥𑌿𑌰𑌃 𑌸𑍍𑌥𑌾𑌣𑍁𑌃 𑌪𑍍𑌰𑌭𑍁𑌰𑍍𑌭𑍀𑌮𑌃 𑌪𑍍𑌰𑌵𑌰𑍋 𑌵𑌰𑌦𑍋 𑌵𑌰𑌃 ।
𑌸𑌰𑍍𑌵𑌾𑌤𑍍𑌮𑌾 𑌸𑌰𑍍𑌵𑌵𑌿𑌖𑍍𑌯𑌾𑌤𑌃 𑌸𑌰𑍍𑌵𑌃 𑌸𑌰𑍍𑌵𑌕𑌰𑍋 𑌭𑌵𑌃 ॥ 1 ॥
𑌜𑌟𑍀 𑌚𑌰𑍍𑌮𑍀 𑌶𑌿𑌖𑌣𑍍𑌡𑍀 𑌚 𑌸𑌰𑍍𑌵𑌾𑌙𑍍𑌗𑌃 𑌸𑌰𑍍𑌵𑌭𑌾𑌵𑌨𑌃 ।
𑌹𑌰𑌶𑍍𑌚 𑌹𑌰𑌿𑌣𑌾𑌕𑍍𑌷𑌶𑍍𑌚 𑌸𑌰𑍍𑌵𑌭𑍂𑌤𑌹𑌰𑌃 𑌪𑍍𑌰𑌭𑍁𑌃 ॥ 2 ॥
𑌪𑍍𑌰𑌵𑍃𑌤𑍍𑌤𑌿𑌶𑍍𑌚 𑌨𑌿𑌵𑍃𑌤𑍍𑌤𑌿𑌶𑍍𑌚 𑌨𑌿𑌯𑌤𑌃 𑌶𑌾𑌶𑍍𑌵𑌤𑍋 𑌧𑍍𑌰𑍁𑌵𑌃 ।
𑌶𑍍𑌮𑌶𑌾𑌨𑌵𑌾𑌸𑍀 𑌭𑌗𑌵𑌾𑌨𑍍 𑌖𑌚𑌰𑍋 𑌗𑍋𑌚𑌰𑍋𑌽𑌰𑍍𑌦𑌨𑌃 ॥ 3 ॥
𑌅𑌭𑌿𑌵𑌾𑌦𑍍𑌯𑍋 𑌮𑌹𑌾𑌕𑌰𑍍𑌮𑌾 𑌤𑌪𑌸𑍍𑌵𑍀 𑌭𑍂𑌤𑌭𑌾𑌵𑌨𑌃 ।
𑌉𑌨𑍍𑌮𑌤𑍍𑌤𑌵𑍇𑌷𑌪𑍍𑌰𑌚𑍍𑌛𑌨𑍍𑌨𑌃 𑌸𑌰𑍍𑌵𑌲𑍋𑌕𑌪𑍍𑌰𑌜𑌾𑌪𑌤𑌿𑌃 ॥ 4 ॥
𑌮𑌹𑌾𑌰𑍂𑌪𑍋 𑌮𑌹𑌾𑌕𑌾𑌯𑍋 𑌵𑍃𑌷𑌰𑍂𑌪𑍋 𑌮𑌹𑌾𑌯𑌶𑌾𑌃 ।
𑌮𑌹𑌾𑌤𑍍𑌮𑌾 𑌸𑌰𑍍𑌵𑌭𑍂𑌤𑌾𑌤𑍍𑌮𑌾 𑌵𑌿𑌶𑍍𑌵𑌰𑍂𑌪𑍋 𑌮𑌹𑌾𑌹𑌨𑍁𑌃 ॥ 5 ॥
𑌲𑍋𑌕𑌪𑌾𑌲𑍋𑌽𑌨𑍍𑌤𑌰𑍍𑌹𑌿𑌤𑌾𑌤𑍍𑌮𑌾 𑌪𑍍𑌰𑌸𑌾𑌦𑍋 𑌹𑌯𑌗𑌰𑍍𑌦𑌭𑌿𑌃 ।
𑌪𑌵𑌿𑌤𑍍𑌰𑌂 𑌚 𑌮𑌹𑌾𑌂𑌶𑍍𑌚𑍈𑌵 𑌨𑌿𑌯𑌮𑍋 𑌨𑌿𑌯𑌮𑌾𑌶𑍍𑌰𑌿𑌤𑌃 ॥ 6 ॥
𑌸𑌰𑍍𑌵𑌕𑌰𑍍𑌮𑌾 𑌸𑍍𑌵𑌯𑌮𑍍𑌭𑍂𑌤 𑌆𑌦𑌿𑌰𑌾𑌦𑌿𑌕𑌰𑍋 𑌨𑌿𑌧𑌿𑌃 ।
𑌸𑌹𑌸𑍍𑌰𑌾𑌕𑍍𑌷𑍋 𑌵𑌿𑌶𑌾𑌲𑌾𑌕𑍍𑌷𑌃 𑌸𑍋𑌮𑍋 𑌨𑌕𑍍𑌷𑌤𑍍𑌰𑌸𑌾𑌧𑌕𑌃 ॥ 7 ॥
𑌚𑌨𑍍𑌦𑍍𑌰𑌃 𑌸𑍂𑌰𑍍𑌯𑌃 𑌶𑌨𑌿𑌃 𑌕𑍇𑌤𑍁𑌰𑍍𑌗𑍍𑌰𑌹𑍋 𑌗𑍍𑌰𑌹𑌪𑌤𑌿𑌰𑍍𑌵𑌰𑌃 ।
𑌅𑌤𑍍𑌰𑌿𑌰𑌤𑍍𑌰𑍍𑌯𑌾 𑌨𑌮𑌸𑍍𑌕𑌰𑍍𑌤𑌾 𑌮𑍃𑌗𑌬𑌾𑌣𑌾𑌰𑍍𑌪𑌣𑍋𑌽𑌨𑌘𑌃 ॥ 8 ॥ [𑌆𑌦𑍍𑌯𑌨𑍍𑌤𑌲𑌯𑌕𑌰𑍍𑌤𑌾 𑌚]
𑌮𑌹𑌾𑌤𑌪𑌾 𑌘𑍋𑌰𑌤𑌪𑌾 𑌅𑌦𑍀𑌨𑍋 𑌦𑍀𑌨𑌸𑌾𑌧𑌕𑌃 ।
𑌸𑌂𑌵𑌤𑍍𑌸𑌰𑌕𑌰𑍋 𑌮𑌨𑍍𑌤𑍍𑌰𑌃 𑌪𑍍𑌰𑌮𑌾𑌣𑌂 𑌪𑌰𑌮𑌂 𑌤𑌪𑌃 ॥ 9 ॥
𑌯𑍋𑌗𑍀 𑌯𑍋𑌜𑍍𑌯𑍋 𑌮𑌹𑌾𑌬𑍀𑌜𑍋 𑌮𑌹𑌾𑌰𑍇𑌤𑌾 𑌮𑌹𑌾𑌬𑌲𑌃 ।
𑌸𑍁𑌵𑌰𑍍𑌣𑌰𑍇𑌤𑌾𑌃 𑌸𑌰𑍍𑌵𑌜𑍍𑌞𑌃 𑌸𑍁𑌬𑍀𑌜𑍋 𑌬𑍀𑌜𑌵𑌾𑌹𑌨𑌃 ॥ 10 ॥
𑌦𑌶𑌬𑌾𑌹𑍁𑌸𑍍𑌤𑍍𑌵𑌨𑌿𑌮𑌿𑌷𑍋 𑌨𑍀𑌲𑌕𑌣𑍍𑌠 𑌉𑌮𑌾𑌪𑌤𑌿𑌃 ।
𑌵𑌿𑌶𑍍𑌵𑌰𑍂𑌪𑌃 𑌸𑍍𑌵𑌯𑌂 𑌶𑍍𑌰𑍇𑌷𑍍𑌠𑍋 𑌬𑌲𑌵𑍀𑌰𑍋 𑌬𑌲𑍋 𑌗𑌣𑌃 ॥ 11 ॥
𑌗𑌣𑌕𑌰𑍍𑌤𑌾 𑌗𑌣𑌪𑌤𑌿𑌰𑍍𑌦𑌿𑌗𑍍𑌵𑌾𑌸𑌾𑌃 𑌕𑌾𑌮 𑌏𑌵 𑌚 ।
𑌮𑌨𑍍𑌤𑍍𑌰𑌵𑌿𑌤𑍍𑌪𑌰𑌮𑍋 𑌮𑌨𑍍𑌤𑍍𑌰𑌃 𑌸𑌰𑍍𑌵𑌭𑌾𑌵𑌕𑌰𑍋 𑌹𑌰𑌃 ॥ 12 ॥
𑌕𑌮𑌣𑍍𑌡𑌲𑍁𑌧𑌰𑍋 𑌧𑌨𑍍𑌵𑍀 𑌬𑌾𑌣𑌹𑌸𑍍𑌤𑌃 𑌕𑌪𑌾𑌲𑌵𑌾𑌨𑍍 ।
𑌅𑌶𑌨𑍀 𑌶𑌤𑌘𑍍𑌨𑍀 𑌖𑌡𑍍𑌗𑍀 𑌪𑌟𑍍𑌟𑌿𑌶𑍀 𑌚𑌾𑌯𑍁𑌧𑍀 𑌮𑌹𑌾𑌨𑍍 ॥ 13 ॥
𑌸𑍍𑌰𑍁𑌵𑌹𑌸𑍍𑌤𑌃 𑌸𑍁𑌰𑍂𑌪𑌶𑍍𑌚 𑌤𑍇𑌜𑌸𑍍𑌤𑍇𑌜𑌸𑍍𑌕𑌰𑍋 𑌨𑌿𑌧𑌿𑌃 ।
𑌉𑌷𑍍𑌣𑍀𑌷𑍀 𑌚 𑌸𑍁𑌵𑌕𑍍𑌤𑍍𑌰𑌶𑍍𑌚 𑌉𑌦𑌗𑍍𑌰𑍋 𑌵𑌿𑌨𑌤𑌸𑍍𑌤𑌥𑌾 ॥ 14 ॥
𑌦𑍀𑌰𑍍𑌘𑌶𑍍𑌚 𑌹𑌰𑌿𑌕𑍇𑌶𑌶𑍍𑌚 𑌸𑍁𑌤𑍀𑌰𑍍𑌥𑌃 𑌕𑍃𑌷𑍍𑌣 𑌏𑌵 𑌚 ।
𑌸𑍃𑌗𑌾𑌲𑌰𑍂𑌪𑌃 𑌸𑌿𑌦𑍍𑌧𑌾𑌰𑍍𑌥𑍋 𑌮𑍁𑌣𑍍𑌡𑌃 𑌸𑌰𑍍𑌵𑌶𑍁𑌭𑌙𑍍𑌕𑌰𑌃 ॥ 15 ॥
𑌅𑌜𑌶𑍍𑌚 𑌬𑌹𑍁𑌰𑍂𑌪𑌶𑍍𑌚 𑌗𑌨𑍍𑌧𑌧𑌾𑌰𑍀 𑌕𑌪𑌰𑍍𑌦𑍍𑌯𑌪𑌿 ।
𑌊𑌰𑍍𑌧𑍍𑌵𑌰𑍇𑌤𑌾 𑌊𑌰𑍍𑌧𑍍𑌵𑌲𑌿𑌙𑍍𑌗 𑌊𑌰𑍍𑌧𑍍𑌵𑌶𑌾𑌯𑍀 𑌨𑌭𑌃𑌸𑍍𑌥𑌲𑌃 ॥ 16 ॥
𑌤𑍍𑌰𑌿𑌜𑌟𑍀 𑌚𑍀𑌰𑌵𑌾𑌸𑌾𑌶𑍍𑌚 𑌰𑍁𑌦𑍍𑌰𑌃 𑌸𑍇𑌨𑌾𑌪𑌤𑌿𑌰𑍍𑌵𑌿𑌭𑍁𑌃 ।
𑌅𑌹𑌶𑍍𑌚𑌰𑍋 𑌨𑌕𑍍𑌤𑌞𑍍𑌚𑌰𑌸𑍍𑌤𑌿𑌗𑍍𑌮𑌮𑌨𑍍𑌯𑍁𑌃 𑌸𑍁𑌵𑌰𑍍𑌚𑌸𑌃 ॥ 17 ॥
𑌗𑌜𑌹𑌾 𑌦𑍈𑌤𑍍𑌯𑌹𑌾 𑌕𑌾𑌲𑍋 𑌲𑍋𑌕𑌧𑌾𑌤𑌾 𑌗𑍁𑌣𑌾𑌕𑌰𑌃 ।
𑌸𑌿𑌂𑌹𑌶𑌾𑌰𑍍𑌦𑍂𑌲𑌰𑍂𑌪𑌶𑍍𑌚 𑌆𑌰𑍍𑌦𑍍𑌰𑌚𑌰𑍍𑌮𑌾𑌮𑍍𑌬𑌰𑌾𑌵𑍃𑌤𑌃 ॥ 18 ॥
𑌕𑌾𑌲𑌯𑍋𑌗𑍀 𑌮𑌹𑌾𑌨𑌾𑌦𑌃 𑌸𑌰𑍍𑌵𑌕𑌾𑌮𑌶𑍍𑌚𑌤𑍁𑌷𑍍𑌪𑌥𑌃 ।
𑌨𑌿𑌶𑌾𑌚𑌰𑌃 𑌪𑍍𑌰𑍇𑌤𑌚𑌾𑌰𑍀 𑌭𑍂𑌤𑌚𑌾𑌰𑍀 𑌮𑌹𑍇𑌶𑍍𑌵𑌰𑌃 ॥ 19 ॥
𑌬𑌹𑍁𑌭𑍂𑌤𑍋 𑌬𑌹𑍁𑌧𑌰𑌃 𑌸𑍍𑌵𑌰𑍍𑌭𑌾𑌨𑍁𑌰𑌮𑌿𑌤𑍋 𑌗𑌤𑌿𑌃 ।
𑌨𑍃𑌤𑍍𑌯𑌪𑍍𑌰𑌿𑌯𑍋 𑌨𑌿𑌤𑍍𑌯𑌨𑌰𑍍𑌤𑍋 𑌨𑌰𑍍𑌤𑌕𑌃 𑌸𑌰𑍍𑌵𑌲𑌾𑌲𑌸𑌃 ॥ 20 ॥
𑌘𑍋𑌰𑍋 𑌮𑌹𑌾𑌤𑌪𑌾𑌃 𑌪𑌾𑌶𑍋 𑌨𑌿𑌤𑍍𑌯𑍋 𑌗𑌿𑌰𑌿𑌰𑍁𑌹𑍋 𑌨𑌭𑌃 ।
𑌸𑌹𑌸𑍍𑌰𑌹𑌸𑍍𑌤𑍋 𑌵𑌿𑌜𑌯𑍋 𑌵𑍍𑌯𑌵𑌸𑌾𑌯𑍋 𑌹𑍍𑌯𑌤𑌨𑍍𑌦𑍍𑌰𑌿𑌤𑌃 ॥ 21 ॥
𑌅𑌧𑌰𑍍𑌷𑌣𑍋 𑌧𑌰𑍍𑌷𑌣𑌾𑌤𑍍𑌮𑌾 𑌯𑌜𑍍𑌞𑌹𑌾 𑌕𑌾𑌮𑌨𑌾𑌶𑌕𑌃 । [𑌮𑌰𑍍𑌷]
𑌦𑌕𑍍𑌷𑌯𑌾𑌗𑌾𑌪𑌹𑌾𑌰𑍀 𑌚 𑌸𑍁𑌸𑌹𑍋 𑌮𑌧𑍍𑌯𑌮𑌸𑍍𑌤𑌥𑌾 ॥ 22 ॥
𑌤𑍇𑌜𑍋𑌪𑌹𑌾𑌰𑍀 𑌬𑌲𑌹𑌾 𑌮𑍁𑌦𑌿𑌤𑍋𑌽𑌰𑍍𑌥𑍋𑌽𑌜𑌿𑌤𑍋𑌽𑌵𑌰𑌃 ।
𑌗𑌮𑍍𑌭𑍀𑌰𑌘𑍋𑌷𑍋 𑌗𑌮𑍍𑌭𑍀𑌰𑍋 𑌗𑌮𑍍𑌭𑍀𑌰𑌬𑌲𑌵𑌾𑌹𑌨𑌃 ॥ 23 ॥
𑌨𑍍𑌯𑌗𑍍𑌰𑍋𑌧𑌰𑍂𑌪𑍋 𑌨𑍍𑌯𑌗𑍍𑌰𑍋𑌧𑍋 𑌵𑍃𑌕𑍍𑌷𑌕𑌰𑍍𑌣𑌸𑍍𑌥𑌿𑌤𑌿𑌰𑍍𑌵𑌿𑌭𑍁𑌃 ।
𑌸𑍁𑌤𑍀𑌕𑍍𑌷𑍍𑌣𑌦𑌶𑌨𑌶𑍍𑌚𑍈𑌵 𑌮𑌹𑌾𑌕𑌾𑌯𑍋 𑌮𑌹𑌾𑌨𑌨𑌃 ॥ 24 ॥
𑌵𑌿𑌷𑍍𑌵𑌕𑍍𑌸𑍇𑌨𑍋 𑌹𑌰𑌿𑌰𑍍𑌯𑌜𑍍𑌞𑌃 𑌸𑌂𑌯𑍁𑌗𑌾𑌪𑍀𑌡𑌵𑌾𑌹𑌨𑌃 ।
𑌤𑍀𑌕𑍍𑌷𑍍𑌣𑌤𑌾𑌪𑌶𑍍𑌚 𑌹𑌰𑍍𑌯𑌶𑍍𑌵𑌃 𑌸𑌹𑌾𑌯𑌃 𑌕𑌰𑍍𑌮𑌕𑌾𑌲𑌵𑌿𑌤𑍍 ॥ 25 ॥
𑌵𑌿𑌷𑍍𑌣𑍁𑌪𑍍𑌰𑌸𑌾𑌦𑌿𑌤𑍋 𑌯𑌜𑍍𑌞𑌃 𑌸𑌮𑍁𑌦𑍍𑌰𑍋 𑌬𑌡𑌬𑌾𑌮𑍁𑌖𑌃 ।
𑌹𑍁𑌤𑌾𑌶𑌨𑌸𑌹𑌾𑌯𑌶𑍍𑌚 𑌪𑍍𑌰𑌶𑌾𑌨𑍍𑌤𑌾𑌤𑍍𑌮𑌾 𑌹𑍁𑌤𑌾𑌶𑌨𑌃 ॥ 26 ॥
𑌉𑌗𑍍𑌰𑌤𑍇𑌜𑌾 𑌮𑌹𑌾𑌤𑍇𑌜𑌾 𑌜𑌨𑍍𑌯𑍋 𑌵𑌿𑌜𑌯𑌕𑌾𑌲𑌵𑌿𑌤𑍍 ।
𑌜𑍍𑌯𑍋𑌤𑌿𑌷𑌾𑌮𑌯𑌨𑌂 𑌸𑌿𑌦𑍍𑌧𑌿𑌃 𑌸𑌰𑍍𑌵𑌵𑌿𑌗𑍍𑌰𑌹 𑌏𑌵 𑌚 ॥ 27 ॥
𑌶𑌿𑌖𑍀 𑌮𑍁𑌣𑍍𑌡𑍀 𑌜𑌟𑍀 𑌜𑍍𑌵𑌾𑌲𑍀 𑌮𑍂𑌰𑍍𑌤𑌿𑌜𑍋 𑌮𑍂𑌰𑍍𑌧𑌗𑍋 𑌬𑌲𑍀 ।
𑌵𑍇𑌣𑌵𑍀 𑌪𑌣𑌵𑍀 𑌤𑌾𑌲𑍀 𑌖𑌲𑍀 𑌕𑌾𑌲𑌕𑌟𑌙𑍍𑌕𑌟𑌃 ॥ 28 ॥
𑌨𑌕𑍍𑌷𑌤𑍍𑌰𑌵𑌿𑌗𑍍𑌰𑌹𑌮𑌤𑌿𑌰𑍍𑌗𑍁𑌣𑌬𑍁𑌦𑍍𑌧𑌿𑌰𑍍𑌲𑌯𑍋𑌽𑌗𑌮𑌃 ।
𑌪𑍍𑌰𑌜𑌾𑌪𑌤𑌿𑌰𑍍𑌵𑌿𑌶𑍍𑌵𑌬𑌾𑌹𑍁𑌰𑍍𑌵𑌿𑌭𑌾𑌗𑌃 𑌸𑌰𑍍𑌵𑌗𑍋𑌽𑌮𑍁𑌖𑌃 ॥ 29 ॥
𑌵𑌿𑌮𑍋𑌚𑌨𑌃 𑌸𑍁𑌸𑌰𑌣𑍋 𑌹𑌿𑌰𑌣𑍍𑌯𑌕𑌵𑌚𑍋𑌦𑍍𑌭𑌵𑌃 ।
𑌮𑍇𑌢𑍍𑌰𑌜𑍋 𑌬𑌲𑌚𑌾𑌰𑍀 𑌚 𑌮𑌹𑍀𑌚𑌾𑌰𑍀 𑌸𑍍𑌰𑍁𑌤𑌸𑍍𑌤𑌥𑌾 ॥ 30 ॥ [𑌮𑍇𑌘𑌜𑍋]
𑌸𑌰𑍍𑌵𑌤𑍂𑌰𑍍𑌯𑌨𑌿𑌨𑌾𑌦𑍀 𑌚 𑌸𑌰𑍍𑌵𑌾𑌤𑍋𑌦𑍍𑌯𑌪𑌰𑌿𑌗𑍍𑌰𑌹𑌃 ।
𑌵𑍍𑌯𑌾𑌲𑌰𑍂𑌪𑍋 𑌗𑍁𑌹𑌾𑌵𑌾𑌸𑍀 𑌗𑍁𑌹𑍋 𑌮𑌾𑌲𑍀 𑌤𑌰𑌙𑍍𑌗𑌵𑌿𑌤𑍍 ॥ 31 ॥
𑌤𑍍𑌰𑌿𑌦𑌶𑌸𑍍𑌤𑍍𑌰𑌿𑌕𑌾𑌲𑌧𑍃𑌕𑍍𑌕𑌰𑍍𑌮𑌸𑌰𑍍𑌵𑌬𑌨𑍍𑌧𑌵𑌿𑌮𑍋𑌚𑌨𑌃 ।
𑌬𑌨𑍍𑌧𑌨𑌸𑍍𑌤𑍍𑌵𑌸𑍁𑌰𑍇𑌨𑍍𑌦𑍍𑌰𑌾𑌣𑌾𑌂 𑌯𑍁𑌧𑌿𑌶𑌤𑍍𑌰𑍁𑌵𑌿𑌨𑌾𑌶𑌨𑌃 ॥ 32 ॥
𑌸𑌾𑌙𑍍𑌖𑍍𑌯𑌪𑍍𑌰𑌸𑌾𑌦𑍋 𑌦𑍁𑌰𑍍𑌵𑌾𑌸𑌾𑌃 𑌸𑌰𑍍𑌵𑌸𑌾𑌧𑍁𑌨𑌿𑌷𑍇𑌵𑌿𑌤𑌃 ।
𑌪𑍍𑌰𑌸𑍍𑌕𑌨𑍍𑌦𑌨𑍋 𑌵𑌿𑌭𑌾𑌗𑌜𑍍𑌞𑍋 𑌅𑌤𑍁𑌲𑍍𑌯𑍋 𑌯𑌜𑍍𑌞𑌭𑌾𑌗𑌵𑌿𑌤𑍍 ॥ 33 ॥
𑌸𑌰𑍍𑌵𑌵𑌾𑌸𑌃 𑌸𑌰𑍍𑌵𑌚𑌾𑌰𑍀 𑌦𑍁𑌰𑍍𑌵𑌾𑌸𑌾 𑌵𑌾𑌸𑌵𑍋𑌽𑌮𑌰𑌃 ।
𑌹𑍈𑌮𑍋 𑌹𑍇𑌮𑌕𑌰𑍋𑌽𑌯𑌜𑍍𑌞𑌃 𑌸𑌰𑍍𑌵𑌧𑌾𑌰𑍀 𑌧𑌰𑍋𑌤𑍍𑌤𑌮𑌃 ॥ 34 ॥ [𑌯𑌜𑍍𑌞𑌃]
𑌲𑍋𑌹𑌿𑌤𑌾𑌕𑍍𑌷𑍋 𑌮𑌹𑌾𑌕𑍍𑌷𑌶𑍍𑌚 𑌵𑌿𑌜𑌯𑌾𑌕𑍍𑌷𑍋 𑌵𑌿𑌶𑌾𑌰𑌦𑌃 ।
𑌸𑌙𑍍𑌗𑍍𑌰𑌹𑍋 𑌨𑌿𑌗𑍍𑌰𑌹𑌃 𑌕𑌰𑍍𑌤𑌾 𑌸𑌰𑍍𑌪𑌚𑍀𑌰𑌨𑌿𑌵𑌾𑌸𑌨𑌃 ॥ 35 ॥
𑌮𑍁𑌖𑍍𑌯𑍋𑌽𑌮𑍁𑌖𑍍𑌯𑌶𑍍𑌚 𑌦𑍇𑌹𑌶𑍍𑌚 𑌕𑌾𑌹𑌲𑌿𑌃 𑌸𑌰𑍍𑌵𑌕𑌾𑌮𑌦𑌃 ।
𑌸𑌰𑍍𑌵𑌕𑌾𑌲𑌪𑍍𑌰𑌸𑌾𑌦𑌶𑍍𑌚 𑌸𑍁𑌬𑌲𑍋 𑌬𑌲𑌰𑍂𑌪𑌧𑍃𑌤𑍍 ॥ 36 ॥
𑌸𑌰𑍍𑌵𑌕𑌾𑌮𑌵𑌰𑌶𑍍𑌚𑍈𑌵 𑌸𑌰𑍍𑌵𑌦𑌃 𑌸𑌰𑍍𑌵𑌤𑍋𑌮𑍁𑌖𑌃 ।
𑌆𑌕𑌾𑌶𑌨𑌿𑌰𑍍𑌵𑌿𑌰𑍂𑌪𑌶𑍍𑌚 𑌨𑌿𑌪𑌾𑌤𑍀 𑌹𑍍𑌯𑌵𑌶𑌃 𑌖𑌗𑌃 ॥ 37 ॥
𑌰𑍗𑌦𑍍𑌰𑌰𑍂𑌪𑍋𑌽𑌂𑌶𑍁𑌰𑌾𑌦𑌿𑌤𑍍𑌯𑍋 𑌬𑌹𑍁𑌰𑌶𑍍𑌮𑌿𑌃 𑌸𑍁𑌵𑌰𑍍𑌚𑌸𑍀 ।
𑌵𑌸𑍁𑌵𑍇𑌗𑍋 𑌮𑌹𑌾𑌵𑍇𑌗𑍋 𑌮𑌨𑍋𑌵𑍇𑌗𑍋 𑌨𑌿𑌶𑌾𑌚𑌰𑌃 ॥ 38 ॥
𑌸𑌰𑍍𑌵𑌵𑌾𑌸𑍀 𑌶𑍍𑌰𑌿𑌯𑌾𑌵𑌾𑌸𑍀 𑌉𑌪𑌦𑍇𑌶𑌕𑌰𑍋𑌽𑌕𑌰𑌃 ।
𑌮𑍁𑌨𑌿𑌰𑌾𑌤𑍍𑌮𑌨𑌿𑌰𑌾𑌲𑍋𑌕𑌃 𑌸𑌮𑍍𑌭𑌗𑍍𑌨𑌶𑍍𑌚 𑌸𑌹𑌸𑍍𑌰𑌦𑌃 ॥ 39 ॥
𑌪𑌕𑍍𑌷𑍀 𑌚 𑌪𑌕𑍍𑌷𑌰𑍂𑌪𑌶𑍍𑌚 𑌅𑌤𑌿𑌦𑍀𑌪𑍍𑌤𑍋 𑌵𑌿𑌶𑌾𑌂 𑌪𑌤𑌿𑌃 ।
𑌉𑌨𑍍𑌮𑌾𑌦𑍋 𑌮𑌦𑌨𑌃 𑌕𑌾𑌮𑍋 𑌹𑍍𑌯𑌶𑍍𑌵𑌤𑍍𑌥𑍋𑌽𑌰𑍍𑌥𑌕𑌰𑍋 𑌯𑌶𑌃 ॥ 40 ॥
𑌵𑌾𑌮𑌦𑍇𑌵𑌶𑍍𑌚 𑌵𑌾𑌮𑌶𑍍𑌚 𑌪𑍍𑌰𑌾𑌗𑍍𑌦𑌕𑍍𑌷𑌿𑌣𑌶𑍍𑌚 𑌵𑌾𑌮𑌨𑌃 ।
𑌸𑌿𑌦𑍍𑌧𑌯𑍋𑌗𑍀 𑌮𑌹𑌰𑍍𑌷𑌿𑌶𑍍𑌚 𑌸𑌿𑌦𑍍𑌧𑌾𑌰𑍍𑌥𑌃 𑌸𑌿𑌦𑍍𑌧𑌸𑌾𑌧𑌕𑌃 ॥ 41 ॥
𑌭𑌿𑌕𑍍𑌷𑍁𑌶𑍍𑌚 𑌭𑌿𑌕𑍍𑌷𑍁𑌰𑍂𑌪𑌶𑍍𑌚 𑌵𑌿𑌪𑌣𑍋 𑌮𑍃𑌦𑍁𑌰𑌵𑍍𑌯𑌯𑌃 ।
𑌮𑌹𑌾𑌸𑍇𑌨𑍋 𑌵𑌿𑌶𑌾𑌖𑌶𑍍𑌚 𑌷𑌷𑍍𑌟𑌿𑌭𑌾𑌗𑍋 𑌗𑌵𑌾𑌂 𑌪𑌤𑌿𑌃 ॥ 42 ॥
𑌵𑌜𑍍𑌰𑌹𑌸𑍍𑌤𑌶𑍍𑌚 𑌵𑌿𑌷𑍍𑌕𑌮𑍍𑌭𑍀 𑌚𑌮𑍂𑌸𑍍𑌤𑌮𑍍𑌭𑌨 𑌏𑌵 𑌚 ।
𑌵𑍃𑌤𑍍𑌤𑌾𑌵𑍃𑌤𑍍𑌤𑌕𑌰𑌸𑍍𑌤𑌾𑌲𑍋 𑌮𑌧𑍁𑌰𑍍𑌮𑌧𑍁𑌕𑌲𑍋𑌚𑌨𑌃 ॥ 43 ॥
𑌵𑌾𑌚𑌸𑍍𑌪𑌤𑍍𑌯𑍋 𑌵𑌾𑌜𑌸𑌨𑍋 𑌨𑌿𑌤𑍍𑌯𑌮𑌾𑌶𑍍𑌰𑌮𑌪𑍂𑌜𑌿𑌤𑌃 । [𑌨𑌿𑌤𑍍𑌯𑌮𑌾𑌶𑍍𑌰𑌿𑌤𑌪𑍂𑌜𑌿𑌤𑌃]
𑌬𑍍𑌰𑌹𑍍𑌮𑌚𑌾𑌰𑍀 𑌲𑍋𑌕𑌚𑌾𑌰𑍀 𑌸𑌰𑍍𑌵𑌚𑌾𑌰𑍀 𑌵𑌿𑌚𑌾𑌰𑌵𑌿𑌤𑍍 ॥ 44 ॥
𑌈𑌶𑌾𑌨 𑌈𑌶𑍍𑌵𑌰𑌃 𑌕𑌾𑌲𑍋 𑌨𑌿𑌶𑌾𑌚𑌾𑌰𑍀 𑌪𑌿𑌨𑌾𑌕𑌭𑍃𑌤𑍍 ।
𑌨𑌿𑌮𑌿𑌤𑍍𑌤𑌸𑍍𑌥𑍋 𑌨𑌿𑌮𑌿𑌤𑍍𑌤𑌂 𑌚 𑌨𑌨𑍍𑌦𑌿𑌰𑍍𑌨𑌨𑍍𑌦𑌿𑌕𑌰𑍋 𑌹𑌰𑌿𑌃 ॥ 45 ॥
𑌨𑌨𑍍𑌦𑍀𑌶𑍍𑌵𑌰𑌶𑍍𑌚 𑌨𑌨𑍍𑌦𑍀 𑌚 𑌨𑌨𑍍𑌦𑌨𑍋 𑌨𑌨𑍍𑌦𑌿𑌵𑌰𑍍𑌧𑌨𑌃 ।
𑌭𑌗𑌹𑌾𑌰𑍀 𑌨𑌿𑌹𑌨𑍍𑌤𑌾 𑌚 𑌕𑌾𑌲𑍋 𑌬𑍍𑌰𑌹𑍍𑌮𑌾 𑌪𑌿𑌤𑌾𑌮𑌹𑌃 ॥ 46 ॥
𑌚𑌤𑍁𑌰𑍍𑌮𑍁𑌖𑍋 𑌮𑌹𑌾𑌲𑌿𑌙𑍍𑌗𑌶𑍍𑌚𑌾𑌰𑍁𑌲𑌿𑌙𑍍𑌗𑌸𑍍𑌤𑌥𑍈𑌵 𑌚 ।
𑌲𑌿𑌙𑍍𑌗𑌾𑌧𑍍𑌯𑌕𑍍𑌷𑌃 𑌸𑍁𑌰𑌾𑌧𑍍𑌯𑌕𑍍𑌷𑍋 𑌯𑍋𑌗𑌾𑌧𑍍𑌯𑌕𑍍𑌷𑍋 𑌯𑍁𑌗𑌾𑌵𑌹𑌃 ॥ 47 ॥
𑌬𑍀𑌜𑌾𑌧𑍍𑌯𑌕𑍍𑌷𑍋 𑌬𑍀𑌜𑌕𑌰𑍍𑌤𑌾 𑌅𑌧𑍍𑌯𑌾𑌤𑍍𑌮𑌾𑌨𑍁𑌗𑌤𑍋 𑌬𑌲𑌃 ।
𑌇𑌤𑌿𑌹𑌾𑌸𑌃 𑌸𑌕𑌲𑍍𑌪𑌶𑍍𑌚 𑌗𑍗𑌤𑌮𑍋𑌽𑌥 𑌨𑌿𑌶𑌾𑌕𑌰𑌃 ॥ 48 ॥
𑌦𑌮𑍍𑌭𑍋 𑌹𑍍𑌯𑌦𑌮𑍍𑌭𑍋 𑌵𑍈𑌦𑌮𑍍𑌭𑍋 𑌵𑌶𑍍𑌯𑍋 𑌵𑌶𑌕𑌰𑌃 𑌕𑌲𑌿𑌃 ।
𑌲𑍋𑌕𑌕𑌰𑍍𑌤𑌾 𑌪𑌶𑍁𑌪𑌤𑌿𑌰𑍍𑌮𑌹𑌾𑌕𑌰𑍍𑌤𑌾 𑌹𑍍𑌯𑌨𑍗𑌷𑌧𑌃 ॥ 49 ॥
𑌅𑌕𑍍𑌷𑌰𑌂 𑌪𑌰𑌮𑌂 𑌬𑍍𑌰𑌹𑍍𑌮 𑌬𑌲𑌵𑌚𑍍𑌛𑌕𑍍𑌰 𑌏𑌵 𑌚 ।
𑌨𑍀𑌤𑌿𑌰𑍍𑌹𑍍𑌯𑌨𑍀𑌤𑌿𑌃 𑌶𑍁𑌦𑍍𑌧𑌾𑌤𑍍𑌮𑌾 𑌶𑍁𑌦𑍍𑌧𑍋 𑌮𑌾𑌨𑍍𑌯𑍋 𑌗𑌤𑌾𑌗𑌤𑌃 ॥ 50 ॥
𑌬𑌹𑍁𑌪𑍍𑌰𑌸𑌾𑌦𑌃 𑌸𑍁𑌸𑍍𑌵𑌪𑍍𑌨𑍋 𑌦𑌰𑍍𑌪𑌣𑍋𑌽𑌥 𑌤𑍍𑌵𑌮𑌿𑌤𑍍𑌰𑌜𑌿𑌤𑍍 ।
𑌵𑍇𑌦𑌕𑌾𑌰𑍋 𑌮𑌨𑍍𑌤𑍍𑌰𑌕𑌾𑌰𑍋 𑌵𑌿𑌦𑍍𑌵𑌾𑌨𑍍 𑌸𑌮𑌰𑌮𑌰𑍍𑌦𑌨𑌃 ॥ 51 ॥
𑌮𑌹𑌾𑌮𑍇𑌘𑌨𑌿𑌵𑌾𑌸𑍀 𑌚 𑌮𑌹𑌾𑌘𑍋𑌰𑍋 𑌵𑌶𑍀𑌕𑌰𑌃 ।
𑌅𑌗𑍍𑌨𑌿𑌜𑍍𑌵𑌾𑌲𑍋 𑌮𑌹𑌾𑌜𑍍𑌵𑌾𑌲𑍋 𑌅𑌤𑌿𑌧𑍂𑌮𑍍𑌰𑍋 𑌹𑍁𑌤𑍋 𑌹𑌵𑌿𑌃 ॥ 52 ॥
𑌵𑍃𑌷𑌣𑌃 𑌶𑌙𑍍𑌕𑌰𑍋 𑌨𑌿𑌤𑍍𑌯𑌵𑌰𑍍𑌚𑌸𑍍𑌵𑍀 𑌧𑍂𑌮𑌕𑍇𑌤𑌨𑌃 ।
𑌨𑍀𑌲𑌸𑍍𑌤𑌥𑌾𑌙𑍍𑌗𑌲𑍁𑌬𑍍𑌧𑌶𑍍𑌚 𑌶𑍋𑌭𑌨𑍋 𑌨𑌿𑌰𑌵𑌗𑍍𑌰𑌹𑌃 ॥ 53 ॥
𑌸𑍍𑌵𑌸𑍍𑌤𑌿𑌦𑌃 𑌸𑍍𑌵𑌸𑍍𑌤𑌿𑌭𑌾𑌵𑌶𑍍𑌚 𑌭𑌾𑌗𑍀 𑌭𑌾𑌗𑌕𑌰𑍋 𑌲𑌘𑍁𑌃 ।
𑌉𑌤𑍍𑌸𑌙𑍍𑌗𑌶𑍍𑌚 𑌮𑌹𑌾𑌙𑍍𑌗𑌶𑍍𑌚 𑌮𑌹𑌾𑌗𑌰𑍍𑌭𑌪𑌰𑌾𑌯𑌣𑌃 ॥ 54 ॥
𑌕𑍃𑌷𑍍𑌣𑌵𑌰𑍍𑌣𑌃 𑌸𑍁𑌵𑌰𑍍𑌣𑌶𑍍𑌚 𑌇𑌨𑍍𑌦𑍍𑌰𑌿𑌯𑌂 𑌸𑌰𑍍𑌵𑌦𑍇𑌹𑌿𑌨𑌾𑌮𑍍 ।
𑌮𑌹𑌾𑌪𑌾𑌦𑍋 𑌮𑌹𑌾𑌹𑌸𑍍𑌤𑍋 𑌮𑌹𑌾𑌕𑌾𑌯𑍋 𑌮𑌹𑌾𑌯𑌶𑌾𑌃 ॥ 55 ॥
𑌮𑌹𑌾𑌮𑍂𑌰𑍍𑌧𑌾 𑌮𑌹𑌾𑌮𑌾𑌤𑍍𑌰𑍋 𑌮𑌹𑌾𑌨𑍇𑌤𑍍𑌰𑍋 𑌨𑌿𑌶𑌾𑌲𑌯𑌃 ।
𑌮𑌹𑌾𑌨𑍍𑌤𑌕𑍋 𑌮𑌹𑌾𑌕𑌰𑍍𑌣𑍋 𑌮𑌹𑍋𑌷𑍍𑌠𑌶𑍍𑌚 𑌮𑌹𑌾𑌹𑌨𑍁𑌃 ॥ 56 ॥
𑌮𑌹𑌾𑌨𑌾𑌸𑍋 𑌮𑌹𑌾𑌕𑌮𑍍𑌬𑍁𑌰𑍍𑌮𑌹𑌾𑌗𑍍𑌰𑍀𑌵𑌃 𑌶𑍍𑌮𑌶𑌾𑌨𑌭𑌾𑌕𑍍 ।
𑌮𑌹𑌾𑌵𑌕𑍍𑌷𑌾 𑌮𑌹𑍋𑌰𑌸𑍍𑌕𑍋 𑌹𑍍𑌯𑌨𑍍𑌤𑌰𑌾𑌤𑍍𑌮𑌾 𑌮𑍃𑌗𑌾𑌲𑌯𑌃 ॥ 57 ॥
𑌲𑌮𑍍𑌬𑌨𑍋 𑌲𑌮𑍍𑌬𑌿𑌤𑍋𑌷𑍍𑌠𑌶𑍍𑌚 𑌮𑌹𑌾𑌮𑌾𑌯𑌃 𑌪𑌯𑍋𑌨𑌿𑌧𑌿𑌃 ।
𑌮𑌹𑌾𑌦𑌨𑍍𑌤𑍋 𑌮𑌹𑌾𑌦𑌂𑌷𑍍𑌟𑍍𑌰𑍋 𑌮𑌹𑌾𑌜𑌿𑌹𑍍𑌵𑍋 𑌮𑌹𑌾𑌮𑍁𑌖𑌃 ॥ 58 ॥
𑌮𑌹𑌾𑌨𑌖𑍋 𑌮𑌹𑌾𑌰𑍋𑌮𑌾 𑌮𑌹𑌾𑌕𑍇𑌶𑍋 𑌮𑌹𑌾𑌜𑌟𑌃 ।
𑌪𑍍𑌰𑌸𑌨𑍍𑌨𑌶𑍍𑌚 𑌪𑍍𑌰𑌸𑌾𑌦𑌶𑍍𑌚 𑌪𑍍𑌰𑌤𑍍𑌯𑌯𑍋 𑌗𑌿𑌰𑌿𑌸𑌾𑌧𑌨𑌃 ॥ 59 ॥
𑌸𑍍𑌨𑍇𑌹𑌨𑍋𑌽𑌸𑍍𑌨𑍇𑌹𑌨𑌶𑍍𑌚𑍈𑌵 𑌅𑌜𑌿𑌤𑌶𑍍𑌚 𑌮𑌹𑌾𑌮𑍁𑌨𑌿𑌃 ।
𑌵𑍃𑌕𑍍𑌷𑌾𑌕𑌾𑌰𑍋 𑌵𑍃𑌕𑍍𑌷𑌕𑍇𑌤𑍁𑌰𑌨𑌲𑍋 𑌵𑌾𑌯𑍁𑌵𑌾𑌹𑌨𑌃 ॥ 60 ॥
𑌗𑌣𑍍𑌡𑌲𑍀 𑌮𑍇𑌰𑍁𑌧𑌾𑌮𑌾 𑌚 𑌦𑍇𑌵𑌾𑌧𑌿𑌪𑌤𑌿𑌰𑍇𑌵 𑌚 ।
𑌅𑌥𑌰𑍍𑌵𑌶𑍀𑌰𑍍𑌷𑌃 𑌸𑌾𑌮𑌾𑌸𑍍𑌯 𑌋𑌕𑍍𑌸𑌹𑌸𑍍𑌰𑌾𑌮𑌿𑌤𑍇𑌕𑍍𑌷𑌣𑌃 ॥ 61 ॥
𑌯𑌜𑍁𑌃 𑌪𑌾𑌦𑌭𑍁𑌜𑍋 𑌗𑍁𑌹𑍍𑌯𑌃 𑌪𑍍𑌰𑌕𑌾𑌶𑍋 𑌜𑌙𑍍𑌗𑌮𑌸𑍍𑌤𑌥𑌾 ।
𑌅𑌮𑍋𑌘𑌾𑌰𑍍𑌥𑌃 𑌪𑍍𑌰𑌸𑌾𑌦𑌶𑍍𑌚 𑌅𑌭𑌿𑌗𑌮𑍍𑌯𑌃 𑌸𑍁𑌦𑌰𑍍𑌶𑌨𑌃 ॥ 62 ॥
𑌉𑌪𑌕𑌾𑌰𑌃 𑌪𑍍𑌰𑌿𑌯𑌃 𑌸𑌰𑍍𑌵𑌃 𑌕𑌨𑌕𑌃 𑌕𑌾𑌞𑍍𑌚𑌨𑌚𑍍𑌛𑌵𑌿𑌃 ।
𑌨𑌾𑌭𑌿𑌰𑍍𑌨𑌨𑍍𑌦𑌿𑌕𑌰𑍋 𑌭𑌾𑌵𑌃 𑌪𑍁𑌷𑍍𑌕𑌰𑌸𑍍𑌥𑌪𑌤𑌿𑌃 𑌸𑍍𑌥𑌿𑌰𑌃 ॥ 63 ॥
𑌦𑍍𑌵𑌾𑌦𑌶𑌸𑍍𑌤𑍍𑌰𑌾𑌸𑌨𑌶𑍍𑌚𑌾𑌦𑍍𑌯𑍋 𑌯𑌜𑍍𑌞𑍋 𑌯𑌜𑍍𑌞𑌸𑌮𑌾𑌹𑌿𑌤𑌃 ।
𑌨𑌕𑍍𑌤𑌂 𑌕𑌲𑌿𑌶𑍍𑌚 𑌕𑌾𑌲𑌶𑍍𑌚 𑌮𑌕𑌰𑌃 𑌕𑌾𑌲𑌪𑍂𑌜𑌿𑌤𑌃 ॥ 64 ॥
𑌸𑌗𑌣𑍋 𑌗𑌣𑌕𑌾𑌰𑌶𑍍𑌚 𑌭𑍂𑌤𑌵𑌾𑌹𑌨𑌸𑌾𑌰𑌥𑌿𑌃 ।
𑌭𑌸𑍍𑌮𑌶𑌯𑍋 𑌭𑌸𑍍𑌮𑌗𑍋𑌪𑍍𑌤𑌾 𑌭𑌸𑍍𑌮𑌭𑍂𑌤𑌸𑍍𑌤𑌰𑍁𑌰𑍍𑌗𑌣𑌃 ॥ 65 ॥
𑌲𑍋𑌕𑌪𑌾𑌲𑌸𑍍𑌤𑌥𑌾𑌽𑌲𑍋𑌕𑍋 𑌮𑌹𑌾𑌤𑍍𑌮𑌾 𑌸𑌰𑍍𑌵𑌪𑍂𑌜𑌿𑌤𑌃 ।
𑌶𑍁𑌕𑍍𑌲𑌸𑍍𑌤𑍍𑌰𑌿𑌶𑍁𑌕𑍍𑌲𑌃 𑌸𑌮𑍍𑌪𑌨𑍍𑌨𑌃 𑌶𑍁𑌚𑌿𑌰𑍍𑌭𑍂𑌤𑌨𑌿𑌷𑍇𑌵𑌿𑌤𑌃 ॥ 66 ॥
𑌆𑌶𑍍𑌰𑌮𑌸𑍍𑌥𑌃 𑌕𑍍𑌰𑌿𑌯𑌾𑌵𑌸𑍍𑌥𑍋 𑌵𑌿𑌶𑍍𑌵𑌕𑌰𑍍𑌮𑌮𑌤𑌿𑌰𑍍𑌵𑌰𑌃 ।
𑌵𑌿𑌶𑌾𑌲𑌶𑌾𑌖𑌸𑍍𑌤𑌾𑌮𑍍𑌰𑍋𑌷𑍍𑌠𑍋 𑌹𑍍𑌯𑌮𑍍𑌬𑍁𑌜𑌾𑌲𑌃 𑌸𑍁𑌨𑌿𑌶𑍍𑌚𑌲𑌃 ॥ 67 ॥
𑌕𑌪𑌿𑌲𑌃 𑌕𑌪𑌿𑌶𑌃 𑌶𑍁𑌕𑍍𑌲 𑌆𑌯𑍁𑌶𑍍𑌚𑍈𑌵 𑌪𑌰𑍋¶𑌃 ।
𑌗𑌨𑍍𑌧𑌰𑍍𑌵𑍋 𑌹𑍍𑌯𑌦𑌿𑌤𑌿𑌸𑍍𑌤𑌾𑌰𑍍𑌕𑍍𑌷𑍍𑌯𑌃 𑌸𑍁𑌵𑌿𑌜𑍍𑌞𑍇𑌯𑌃 𑌸𑍁𑌶𑌾𑌰𑌦𑌃 ॥ 68 ॥
𑌪𑌰𑌶𑍍𑌵𑌧𑌾𑌯𑍁𑌧𑍋 𑌦𑍇𑌵𑍋 𑌹𑍍𑌯𑌨𑍁𑌕𑌾𑌰𑍀 𑌸𑍁𑌬𑌾𑌨𑍍𑌧𑌵𑌃 ।
𑌤𑍁𑌮𑍍𑌬𑌵𑍀𑌣𑍋 𑌮𑌹𑌾𑌕𑍍𑌰𑍋𑌧 𑌊𑌰𑍍𑌧𑍍𑌵𑌰𑍇𑌤𑌾 𑌜𑌲𑍇𑌶𑌯𑌃 ॥ 69 ॥
𑌉𑌗𑍍𑌰𑍋 𑌵𑌂𑌶𑌕𑌰𑍋 𑌵𑌂𑌶𑍋 𑌵𑌂𑌶𑌨𑌾𑌦𑍋 𑌹𑍍𑌯𑌨𑌿𑌨𑍍𑌦𑌿𑌤𑌃 ।
𑌸𑌰𑍍𑌵𑌾𑌙𑍍𑌗𑌰𑍂𑌪𑍋 𑌮𑌾𑌯𑌾𑌵𑍀 𑌸𑍁𑌹𑍃𑌦𑍋 𑌹𑍍𑌯𑌨𑌿𑌲𑍋𑌽𑌨𑌲𑌃 ॥ 70 ॥
𑌬𑌨𑍍𑌧𑌨𑍋 𑌬𑌨𑍍𑌧𑌕𑌰𑍍𑌤𑌾 𑌚 𑌸𑍁𑌬𑌨𑍍𑌧𑌨𑌵𑌿𑌮𑍋𑌚𑌨𑌃 ।
𑌸 𑌯𑌜𑍍𑌞𑌾𑌰𑌿𑌃 𑌸 𑌕𑌾𑌮𑌾𑌰𑌿𑌰𑍍𑌮𑌹𑌾𑌦𑌂𑌷𑍍𑌟𑍍𑌰𑍋 𑌮𑌹𑌾𑌯𑍁𑌧𑌃 ॥ 71 ॥
𑌬𑌹𑍁𑌧𑌾 𑌨𑌿𑌨𑍍𑌦𑌿𑌤𑌃 𑌶𑌰𑍍𑌵𑌃 𑌶𑌙𑍍𑌕𑌰𑌃 𑌶𑌙𑍍𑌕𑌰𑍋𑌽𑌧𑌨𑌃 ।
𑌅𑌮𑌰𑍇𑌶𑍋 𑌮𑌹𑌾𑌦𑍇𑌵𑍋 𑌵𑌿𑌶𑍍𑌵𑌦𑍇𑌵𑌃 𑌸𑍁𑌰𑌾𑌰𑌿𑌹𑌾 ॥ 72 ॥
𑌅𑌹𑌿𑌰𑍍𑌬𑍁𑌧𑍍𑌨𑍍𑌯𑍋𑌽𑌨𑌿𑌲𑌾𑌭𑌶𑍍𑌚 𑌚𑍇𑌕𑌿𑌤𑌾𑌨𑍋 𑌹𑌵𑌿𑌸𑍍𑌤𑌥𑌾 । [𑌹𑌰𑌿]
𑌅𑌜𑍈𑌕𑌪𑌾𑌚𑍍𑌚 𑌕𑌾𑌪𑌾𑌲𑍀 𑌤𑍍𑌰𑌿𑌶𑌙𑍍𑌕𑍁𑌰𑌜𑌿𑌤𑌃 𑌶𑌿𑌵𑌃 ॥ 73 ॥
𑌧𑌨𑍍𑌵𑌨𑍍𑌤𑌰𑌿𑌰𑍍𑌧𑍂𑌮𑌕𑍇𑌤𑍁𑌃 𑌸𑍍𑌕𑌨𑍍𑌦𑍋 𑌵𑍈𑌶𑍍𑌰𑌵𑌣𑌸𑍍𑌤𑌥𑌾 ।
𑌧𑌾𑌤𑌾 𑌶𑌕𑍍𑌰𑌶𑍍𑌚 𑌵𑌿𑌷𑍍𑌣𑍁𑌶𑍍𑌚 𑌮𑌿𑌤𑍍𑌰𑌸𑍍𑌤𑍍𑌵𑌷𑍍𑌟𑌾 𑌧𑍍𑌰𑍁𑌵𑍋 𑌧𑌰𑌃 ॥ 74 ॥
𑌪𑍍𑌰𑌭𑌾𑌵𑌃 𑌸𑌰𑍍𑌵𑌗𑍋 𑌵𑌾𑌯𑍁𑌰𑌰𑍍𑌯𑌮𑌾 𑌸𑌵𑌿𑌤𑌾 𑌰𑌵𑌿𑌃 ।
𑌉𑌷𑌙𑍍𑌗𑍁𑌶𑍍𑌚 𑌵𑌿𑌧𑌾𑌤𑌾 𑌚 𑌮𑌾𑌨𑍍𑌧𑌾𑌤𑌾 𑌭𑍂𑌤𑌭𑌾𑌵𑌨𑌃 ॥ 75 ॥
𑌵𑌿𑌭𑍁𑌰𑍍𑌵𑌰𑍍𑌣𑌵𑌿𑌭𑌾𑌵𑍀 𑌚 𑌸𑌰𑍍𑌵𑌕𑌾𑌮𑌗𑍁𑌣𑌾𑌵𑌹𑌃 ।
𑌪𑌦𑍍𑌮𑌨𑌾𑌭𑍋 𑌮𑌹𑌾𑌗𑌰𑍍𑌭𑌶𑍍𑌚𑌨𑍍𑌦𑍍𑌰𑌵𑌕𑍍𑌤𑍍𑌰𑍋𑌽𑌨𑌿𑌲𑍋𑌽𑌨𑌲𑌃 ॥ 76 ॥
𑌬𑌲𑌵𑌾𑌂𑌶𑍍𑌚𑍋𑌪𑌶𑌾𑌨𑍍𑌤𑌶𑍍𑌚 𑌪𑍁𑌰𑌾𑌣𑌃 𑌪𑍁𑌣𑍍𑌯𑌚𑌞𑍍𑌚𑍁𑌰𑍀 ।
𑌕𑍁𑌰𑍁𑌕𑌰𑍍𑌤𑌾 𑌕𑍁𑌰𑍁𑌵𑌾𑌸𑍀 𑌕𑍁𑌰𑍁𑌭𑍂𑌤𑍋 𑌗𑍁𑌣𑍗𑌷𑌧𑌃 ॥ 77 ॥
𑌸𑌰𑍍𑌵𑌾𑌶𑌯𑍋 𑌦𑌰𑍍𑌭𑌚𑌾𑌰𑍀 𑌸𑌰𑍍𑌵𑍇𑌷𑌾𑌂 𑌪𑍍𑌰𑌾𑌣𑌿𑌨𑌾𑌂 𑌪𑌤𑌿𑌃 ।
𑌦𑍇𑌵𑌦𑍇𑌵𑌃 𑌸𑍁𑌖𑌾𑌸𑌕𑍍𑌤𑌃 𑌸𑌦𑌸𑌤𑍍𑌸𑌰𑍍𑌵𑌰𑌤𑍍𑌨𑌵𑌿𑌤𑍍 ॥ 78 ॥
𑌕𑍈𑌲𑌾𑌸𑌗𑌿𑌰𑌿𑌵𑌾𑌸𑍀 𑌚 𑌹𑌿𑌮𑌵𑌦𑍍𑌗𑌿𑌰𑌿𑌸𑌂𑌶𑍍𑌰𑌯𑌃 ।
𑌕𑍂𑌲𑌹𑌾𑌰𑍀 𑌕𑍂𑌲𑌕𑌰𑍍𑌤𑌾 𑌬𑌹𑍁𑌵𑌿𑌦𑍍𑌯𑍋 𑌬𑌹𑍁𑌪𑍍𑌰𑌦𑌃 ॥ 79 ॥
𑌵𑌣𑌿𑌜𑍋 𑌵𑌰𑍍𑌧𑌕𑍀 𑌵𑍃𑌕𑍍𑌷𑍋 𑌵𑌕𑍁𑌲𑌶𑍍𑌚𑌨𑍍𑌦𑌨𑌶𑍍𑌛𑌦𑌃 ।
𑌸𑌾𑌰𑌗𑍍𑌰𑍀𑌵𑍋 𑌮𑌹𑌾𑌜𑌤𑍍𑌰𑍁𑌰𑌲𑍋𑌲𑌶𑍍𑌚 𑌮𑌹𑍗𑌷𑌧𑌃 ॥ 80 ॥
𑌸𑌿𑌦𑍍𑌧𑌾𑌰𑍍𑌥𑌕𑌾𑌰𑍀 𑌸𑌿𑌦𑍍𑌧𑌾𑌰𑍍𑌥𑌶𑍍𑌛𑌨𑍍𑌦𑍋𑌵𑍍𑌯𑌾𑌕𑌰𑌣𑍋𑌤𑍍𑌤𑌰𑌃 ।
𑌸𑌿𑌂𑌹𑌨𑌾𑌦𑌃 𑌸𑌿𑌂𑌹𑌦𑌂𑌷𑍍𑌟𑍍𑌰𑌃 𑌸𑌿𑌂𑌹𑌗𑌃 𑌸𑌿𑌂𑌹𑌵𑌾𑌹𑌨𑌃 ॥ 81 ॥
𑌪𑍍𑌰𑌭𑌾𑌵𑌾𑌤𑍍𑌮𑌾 𑌜𑌗𑌤𑍍𑌕𑌾𑌲𑌸𑍍𑌥𑌾𑌲𑍋 𑌲𑍋𑌕𑌹𑌿𑌤𑌸𑍍𑌤𑌰𑍁𑌃 ।
𑌸𑌾𑌰𑌙𑍍𑌗𑍋 𑌨𑌵𑌚𑌕𑍍𑌰𑌾𑌙𑍍𑌗𑌃 𑌕𑍇𑌤𑍁𑌮𑌾𑌲𑍀 𑌸𑌭𑌾𑌵𑌨𑌃 ॥ 82 ॥
𑌭𑍂𑌤𑌾𑌲𑌯𑍋 𑌭𑍂𑌤𑌪𑌤𑌿𑌰𑌹𑍋𑌰𑌾𑌤𑍍𑌰𑌮𑌨𑌿𑌨𑍍𑌦𑌿𑌤𑌃 ॥ 83 ॥
𑌵𑌾𑌹𑌿𑌤𑌾 𑌸𑌰𑍍𑌵𑌭𑍂𑌤𑌾𑌨𑌾𑌂 𑌨𑌿𑌲𑌯𑌶𑍍𑌚 𑌵𑌿𑌭𑍁𑌰𑍍𑌭𑌵𑌃 ।
𑌅𑌮𑍋𑌘𑌃 𑌸𑌂𑌯𑌤𑍋 𑌹𑍍𑌯𑌶𑍍𑌵𑍋 𑌭𑍋𑌜𑌨𑌃 𑌪𑍍𑌰𑌾𑌣𑌧𑌾𑌰𑌣𑌃 ॥ 84 ॥
𑌧𑍃𑌤𑌿𑌮𑌾𑌨𑍍 𑌮𑌤𑌿𑌮𑌾𑌨𑍍 𑌦𑌕𑍍𑌷𑌃 𑌸𑌤𑍍𑌕𑍃𑌤𑌶𑍍𑌚 𑌯𑍁𑌗𑌾𑌧𑌿𑌪𑌃 ।
𑌗𑍋𑌪𑌾𑌲𑌿𑌰𑍍𑌗𑍋𑌪𑌤𑌿𑌰𑍍𑌗𑍍𑌰𑌾𑌮𑍋 𑌗𑍋𑌚𑌰𑍍𑌮𑌵𑌸𑌨𑍋 𑌹𑌰𑌿𑌃 ॥ 85 ॥
𑌹𑌿𑌰𑌣𑍍𑌯𑌬𑌾𑌹𑍁𑌶𑍍𑌚 𑌤𑌥𑌾 𑌗𑍁𑌹𑌾𑌪𑌾𑌲𑌃 𑌪𑍍𑌰𑌵𑍇𑌶𑌿𑌨𑌾𑌮𑍍 ।
𑌪𑍍𑌰𑌕𑍃𑌷𑍍𑌟𑌾𑌰𑌿𑌰𑍍𑌮𑌹𑌾𑌹𑌰𑍍𑌷𑍋 𑌜𑌿𑌤𑌕𑌾𑌮𑍋 𑌜𑌿𑌤𑍇𑌨𑍍𑌦𑍍𑌰𑌿𑌯𑌃 ॥ 86 ॥
𑌗𑌾𑌨𑍍𑌧𑌾𑌰𑌶𑍍𑌚 𑌸𑍁𑌵𑌾𑌸𑌶𑍍𑌚 𑌤𑌪𑌃𑌸𑌕𑍍𑌤𑍋 𑌰𑌤𑌿𑌰𑍍𑌨𑌰𑌃 ।
𑌮𑌹𑌾𑌗𑍀𑌤𑍋 𑌮𑌹𑌾𑌨𑍃𑌤𑍍𑌯𑍋 𑌹𑍍𑌯𑌪𑍍𑌸𑌰𑍋𑌗𑌣𑌸𑍇𑌵𑌿𑌤𑌃 ॥ 87 ॥
𑌮𑌹𑌾𑌕𑍇𑌤𑍁𑌰𑍍𑌮𑌹𑌾𑌧𑌾𑌤𑍁𑌰𑍍𑌨𑍈𑌕𑌸𑌾𑌨𑍁𑌚𑌰𑌶𑍍𑌚𑌲𑌃 ।
𑌆𑌵𑍇𑌦𑌨𑍀𑌯 𑌆𑌦𑍇𑌶𑌃 𑌸𑌰𑍍𑌵𑌗𑌨𑍍𑌧𑌸𑍁𑌖𑌾𑌵𑌹𑌃 ॥ 88 ॥
𑌤𑍋𑌰𑌣𑌸𑍍𑌤𑌾𑌰𑌣𑍋 𑌵𑌾𑌤𑌃 𑌪𑌰𑌿𑌧𑍀 𑌪𑌤𑌿𑌖𑍇𑌚𑌰𑌃 ।
𑌸𑌂𑌯𑍋𑌗𑍋 𑌵𑌰𑍍𑌧𑌨𑍋 𑌵𑍃𑌦𑍍𑌧𑍋 𑌅𑌤𑌿𑌵𑍃𑌦𑍍𑌧𑍋 𑌗𑍁𑌣𑌾𑌧𑌿𑌕𑌃 ॥ 89 ॥
𑌨𑌿𑌤𑍍𑌯 𑌆𑌤𑍍𑌮𑌸𑌹𑌾𑌯𑌶𑍍𑌚 𑌦𑍇𑌵𑌾𑌸𑍁𑌰𑌪𑌤𑌿𑌃 𑌪𑌤𑌿𑌃 ।
𑌯𑍁𑌕𑍍𑌤𑌶𑍍𑌚 𑌯𑍁𑌕𑍍𑌤𑌬𑌾𑌹𑍁𑌶𑍍𑌚 𑌦𑍇𑌵𑍋 𑌦𑌿𑌵𑌿𑌸𑍁𑌪𑌰𑍍𑌵𑌣𑌃 ॥ 90 ॥
𑌆𑌷𑌾𑌢𑌶𑍍𑌚 𑌸𑍁𑌷𑌾𑌢𑌶𑍍𑌚 𑌧𑍍𑌰𑍁𑌵𑍋𑌽𑌥 𑌹𑌰𑌿𑌣𑍋 𑌹𑌰𑌃 ।
𑌵𑌪𑍁𑌰𑌾𑌵𑌰𑍍𑌤𑌮𑌾𑌨𑍇𑌭𑍍𑌯𑍋 𑌵𑌸𑍁𑌶𑍍𑌰𑍇𑌷𑍍𑌠𑍋 𑌮𑌹𑌾𑌪𑌥𑌃 ॥ 91 ॥
𑌶𑌿𑌰𑍋𑌹𑌾𑌰𑍀 𑌵𑌿𑌮𑌰𑍍𑌶𑌶𑍍𑌚 𑌸𑌰𑍍𑌵𑌲𑌕𑍍𑌷𑌣𑌲𑌕𑍍𑌷𑌿𑌤𑌃 ।
𑌅𑌕𑍍𑌷𑌶𑍍𑌚 𑌰𑌥𑌯𑍋𑌗𑍀 𑌚 𑌸𑌰𑍍𑌵𑌯𑍋𑌗𑍀 𑌮𑌹𑌾𑌬𑌲𑌃 ॥ 92 ॥
𑌸𑌮𑌾𑌮𑍍𑌨𑌾𑌯𑍋𑌽𑌸𑌮𑌾𑌮𑍍𑌨𑌾𑌯𑌸𑍍𑌤𑍀𑌰𑍍𑌥𑌦𑍇𑌵𑍋 𑌮𑌹𑌾𑌰𑌥𑌃 ।
𑌨𑌿𑌰𑍍𑌜𑍀𑌵𑍋 𑌜𑍀𑌵𑌨𑍋 𑌮𑌨𑍍𑌤𑍍𑌰𑌃 𑌶𑍁𑌭𑌾𑌕𑍍𑌷𑍋 𑌬𑌹𑍁𑌕𑌰𑍍𑌕𑌶𑌃 ॥ 93 ॥
𑌰𑌤𑍍𑌨𑌪𑍍𑌰𑌭𑍂𑌤𑍋 𑌰𑌕𑍍𑌤𑌾𑌙𑍍𑌗𑍋 𑌮𑌹𑌾𑌰𑍍𑌣𑌵𑌨𑌿𑌪𑌾𑌨𑌵𑌿𑌤𑍍 । [𑌰𑌤𑍍𑌨𑌾𑌙𑍍𑌗𑍋]
𑌮𑍂𑌲𑌂 𑌵𑌿𑌶𑌾𑌲𑍋 𑌹𑍍𑌯𑌮𑍃𑌤𑍋 𑌵𑍍𑌯𑌕𑍍𑌤𑌾𑌵𑍍𑌯𑌕𑍍𑌤𑌸𑍍𑌤𑌪𑍋𑌨𑌿𑌧𑌿𑌃 ॥ 94 ॥
𑌆𑌰𑍋𑌹𑌣𑍋𑌽𑌧𑌿𑌰𑍋𑌹𑌶𑍍𑌚 𑌶𑍀𑌲𑌧𑌾𑌰𑍀 𑌮𑌹𑌾𑌯𑌶𑌾𑌃 ।
𑌸𑍇𑌨𑌾𑌕𑌲𑍍𑌪𑍋 𑌮𑌹𑌾𑌕𑌲𑍍𑌪𑍋 𑌯𑍋𑌗𑍋 𑌯𑍁𑌗𑌕𑌰𑍋 𑌹𑌰𑌿𑌃 ॥ 95 ॥ [𑌯𑍋𑌗𑌕𑌰𑍋]
𑌯𑍁𑌗𑌰𑍂𑌪𑍋 𑌮𑌹𑌾𑌰𑍂𑌪𑍋 𑌮𑌹𑌾𑌨𑌾𑌗𑌹𑌨𑍋 𑌵𑌧𑌃 ।
𑌨𑍍𑌯𑌾𑌯𑌨𑌿𑌰𑍍𑌵𑌪𑌣𑌃 𑌪𑌾𑌦𑌃 𑌪𑌣𑍍𑌡𑌿𑌤𑍋 𑌹𑍍𑌯𑌚𑌲𑍋𑌪𑌮𑌃 ॥ 96 ॥
𑌬𑌹𑍁𑌮𑌾𑌲𑍋 𑌮𑌹𑌾𑌮𑌾𑌲𑌃 𑌶𑌶𑍀 𑌹𑌰𑌸𑍁𑌲𑍋𑌚𑌨𑌃 ।
𑌵𑌿𑌸𑍍𑌤𑌾𑌰𑍋 𑌲𑌵𑌣𑌃 𑌕𑍂𑌪𑌸𑍍𑌤𑍍𑌰𑌿𑌯𑍁𑌗𑌃 𑌸𑌫𑌲𑍋𑌦𑌯𑌃 ॥ 97 ॥
𑌤𑍍𑌰𑌿𑌲𑍋𑌚𑌨𑍋 𑌵𑌿𑌷𑌣𑍍𑌣𑌾𑌙𑍍𑌗𑍋 𑌮𑌣𑌿𑌵𑌿𑌦𑍍𑌧𑍋 𑌜𑌟𑌾𑌧𑌰𑌃 ।
𑌬𑌿𑌨𑍍𑌦𑍁𑌰𑍍𑌵𑌿𑌸𑌰𑍍𑌗𑌃 𑌸𑍁𑌮𑍁𑌖𑌃 𑌶𑌰𑌃 𑌸𑌰𑍍𑌵𑌾𑌯𑍁𑌧𑌃 𑌸𑌹𑌃 ॥ 98 ॥
𑌨𑌿𑌵𑍇𑌦𑌨𑌃 𑌸𑍁𑌖𑌾𑌜𑌾𑌤𑌃 𑌸𑍁𑌗𑌨𑍍𑌧𑌾𑌰𑍋 𑌮𑌹𑌾𑌧𑌨𑍁𑌃 ।
𑌗𑌨𑍍𑌧𑌪𑌾𑌲𑍀 𑌚 𑌭𑌗𑌵𑌾𑌨𑍁𑌤𑍍𑌥𑌾𑌨𑌃 𑌸𑌰𑍍𑌵𑌕𑌰𑍍𑌮𑌣𑌾𑌮𑍍 ॥ 99 ॥
𑌮𑌨𑍍𑌥𑌾𑌨𑍋 𑌬𑌹𑍁𑌲𑍋 𑌵𑌾𑌯𑍁𑌃 𑌸𑌕𑌲𑌃 𑌸𑌰𑍍𑌵𑌲𑍋𑌚𑌨𑌃 ।
𑌤𑌲𑌸𑍍𑌤𑌾𑌲𑌃 𑌕𑌰𑌸𑍍𑌥𑌾𑌲𑍀 𑌊𑌰𑍍𑌧𑍍𑌵𑌸𑌂𑌹𑌨𑌨𑍋 𑌮𑌹𑌾𑌨𑍍 ॥ 100 ॥
𑌛𑌤𑍍𑌰𑌂 𑌸𑍁𑌚𑍍𑌛𑌤𑍍𑌰𑍋 𑌵𑌿𑌖𑍍𑌯𑌾𑌤𑍋 𑌲𑍋𑌕𑌃 𑌸𑌰𑍍𑌵𑌾𑌶𑍍𑌰𑌯𑌃 𑌕𑍍𑌰𑌮𑌃 ।
𑌮𑍁𑌣𑍍𑌡𑍋 𑌵𑌿𑌰𑍂𑌪𑍋 𑌵𑌿𑌕𑍃𑌤𑍋 𑌦𑌣𑍍𑌡𑍀 𑌕𑍁𑌣𑍍𑌡𑍀 𑌵𑌿𑌕𑍁𑌰𑍍𑌵𑌣𑌃 ॥ 101 ॥
𑌹𑌰𑍍𑌯𑌕𑍍𑌷𑌃 𑌕𑌕𑍁𑌭𑍋 𑌵𑌜𑍍𑌰𑍀 𑌶𑌤𑌜𑌿𑌹𑍍𑌵𑌃 𑌸𑌹𑌸𑍍𑌰𑌪𑌾𑌤𑍍 ।
𑌸𑌹𑌸𑍍𑌰𑌮𑍂𑌰𑍍𑌧𑌾 𑌦𑍇𑌵𑍇𑌨𑍍𑌦𑍍𑌰𑌃 𑌸𑌰𑍍𑌵𑌦𑍇𑌵𑌮𑌯𑍋 𑌗𑍁𑌰𑍁𑌃 ॥ 102 ॥
𑌸𑌹𑌸𑍍𑌰𑌬𑌾𑌹𑍁𑌃 𑌸𑌰𑍍𑌵𑌾𑌙𑍍𑌗𑌃 𑌶𑌰𑌣𑍍𑌯𑌃 𑌸𑌰𑍍𑌵𑌲𑍋𑌕𑌕𑍃𑌤𑍍 ।
𑌪𑌵𑌿𑌤𑍍𑌰𑌂 𑌤𑍍𑌰𑌿𑌕𑌕𑍁𑌨𑍍𑌮𑌨𑍍𑌤𑍍𑌰𑌃 𑌕𑌨𑌿𑌷𑍍𑌠𑌃 𑌕𑍃𑌷𑍍𑌣𑌪𑌿𑌙𑍍𑌗𑌲𑌃 ॥ 103 ॥
𑌬𑍍𑌰𑌹𑍍𑌮𑌦𑌣𑍍𑌡𑌵𑌿𑌨𑌿𑌰𑍍𑌮𑌾𑌤𑌾 𑌶𑌤𑌘𑍍𑌨𑍀𑌪𑌾𑌶𑌶𑌕𑍍𑌤𑌿𑌮𑌾𑌨𑍍 ।
𑌪𑌦𑍍𑌮𑌗𑌰𑍍𑌭𑍋 𑌮𑌹𑌾𑌗𑌰𑍍𑌭𑍋 𑌬𑍍𑌰𑌹𑍍𑌮𑌗𑌰𑍍𑌭𑍋 𑌜𑌲𑍋𑌦𑍍𑌭𑌵𑌃 ॥ 104 ॥
𑌗𑌭𑌸𑍍𑌤𑌿𑌰𑍍𑌬𑍍𑌰𑌹𑍍𑌮𑌕𑍃𑌦𑍍𑌬𑍍𑌰𑌹𑍍𑌮𑍀 𑌬𑍍𑌰𑌹𑍍𑌮𑌵𑌿𑌦𑍍𑌬𑍍𑌰𑌾𑌹𑍍𑌮𑌣𑍋 𑌗𑌤𑌿𑌃 ।
𑌅𑌨𑌨𑍍𑌤𑌰𑍂𑌪𑍋 𑌨𑍈𑌕𑌾𑌤𑍍𑌮𑌾 𑌤𑌿𑌗𑍍𑌮𑌤𑍇𑌜𑌾𑌃 𑌸𑍍𑌵𑌯𑌮𑍍𑌭𑍁𑌵𑌃 ॥ 105 ॥
𑌊𑌰𑍍𑌧𑍍𑌵𑌗𑌾𑌤𑍍𑌮𑌾 𑌪𑌶𑍁𑌪𑌤𑌿𑌰𑍍𑌵𑌾𑌤𑌰𑌂𑌹𑌾 𑌮𑌨𑍋𑌜𑌵𑌃 ।
𑌚𑌨𑍍𑌦𑌨𑍀 𑌪𑌦𑍍𑌮𑌨𑌾𑌲𑌾𑌗𑍍𑌰𑌃 𑌸𑍁𑌰𑌭𑍍𑌯𑍁𑌤𑍍𑌤𑌰𑌣𑍋 𑌨𑌰𑌃 ॥ 106 ॥
𑌕𑌰𑍍𑌣𑌿𑌕𑌾𑌰𑌮𑌹𑌾𑌸𑍍𑌰𑌗𑍍𑌵𑍀 𑌨𑍀𑌲𑌮𑍗𑌲𑌿𑌃 𑌪𑌿𑌨𑌾𑌕𑌧𑍃𑌤𑍍 ।
𑌉𑌮𑌾𑌪𑌤𑌿𑌰𑍁𑌮𑌾𑌕𑌾𑌨𑍍𑌤𑍋 𑌜𑌾𑌹𑍍𑌨𑌵𑍀𑌧𑍃𑌦𑍁𑌮𑌾𑌧𑌵𑌃 ॥ 107 ॥
𑌵𑌰𑍋 𑌵𑌰𑌾𑌹𑍋 𑌵𑌰𑌦𑍋 𑌵𑌰𑍇𑌣𑍍𑌯𑌃 𑌸𑍁𑌮𑌹𑌾𑌸𑍍𑌵𑌨𑌃 ।
𑌮𑌹𑌾𑌪𑍍𑌰𑌸𑌾𑌦𑍋 𑌦𑌮𑌨𑌃 𑌶𑌤𑍍𑌰𑍁𑌹𑌾 𑌶𑍍𑌵𑍇𑌤𑌪𑌿𑌙𑍍𑌗𑌲𑌃 ॥ 108 ॥
𑌪𑍀𑌤𑌾𑌤𑍍𑌮𑌾 𑌪𑌰𑌮𑌾𑌤𑍍𑌮𑌾 𑌚 𑌪𑍍𑌰𑌯𑌤𑌾𑌤𑍍𑌮𑌾 𑌪𑍍𑌰𑌧𑌾𑌨𑌧𑍃𑌤𑍍 । [𑌪𑍍𑌰𑍀𑌤𑌾𑌤𑍍𑌮𑌾]
𑌸𑌰𑍍𑌵𑌪𑌾𑌰𑍍𑌶𑍍𑌵𑌮𑍁𑌖𑌸𑍍𑌤𑍍𑌰𑍍𑌯𑌕𑍍𑌷𑍋 𑌧𑌰𑍍𑌮𑌸𑌾𑌧𑌾𑌰𑌣𑍋 𑌵𑌰𑌃 ॥ 109 ॥
𑌚𑌰𑌾𑌚𑌰𑌾𑌤𑍍𑌮𑌾 𑌸𑍂𑌕𑍍𑌷𑍍𑌮𑌾𑌤𑍍𑌮𑌾 𑌅𑌮𑍃𑌤𑍋 𑌗𑍋𑌵𑍃𑌷𑍇𑌶𑍍𑌵𑌰𑌃 ।
𑌸𑌾𑌧𑍍𑌯𑌰𑍍𑌷𑌿𑌰𑍍𑌵𑌸𑍁𑌰𑌾𑌦𑌿𑌤𑍍𑌯𑍋 𑌵𑌿𑌵𑌸𑍍𑌵𑌾𑌨𑍍𑌸𑌵𑌿𑌤𑌾𑌮𑍃𑌤𑌃 ॥ 110 ॥
𑌵𑍍𑌯𑌾𑌸𑌃 𑌸𑌰𑍍𑌗𑌃 𑌸𑍁𑌸𑌙𑍍𑌕𑍍𑌷𑍇𑌪𑍋 𑌵𑌿𑌸𑍍𑌤𑌰𑌃 𑌪𑌰𑍍𑌯𑌯𑍋 𑌨𑌰𑌃 ।
𑌋𑌤𑍁𑌃 𑌸𑌂𑌵𑌤𑍍𑌸𑌰𑍋 𑌮𑌾𑌸𑌃 𑌪𑌕𑍍𑌷𑌃 𑌸𑌙𑍍𑌖𑍍𑌯𑌾𑌸𑌮𑌾𑌪𑌨𑌃 ॥ 111 ॥
𑌕𑌲𑌾 𑌕𑌾𑌷𑍍𑌠𑌾 𑌲𑌵𑌾 𑌮𑌾𑌤𑍍𑌰𑌾 𑌮𑍁𑌹𑍂𑌰𑍍𑌤𑌾𑌹𑌃 𑌕𑍍𑌷𑌪𑌾𑌃 𑌕𑍍𑌷𑌣𑌾𑌃 ।
𑌵𑌿𑌶𑍍𑌵𑌕𑍍𑌷𑍇𑌤𑍍𑌰𑌂 𑌪𑍍𑌰𑌜𑌾𑌬𑍀𑌜𑌂 𑌲𑌿𑌙𑍍𑌗𑌮𑌾𑌦𑍍𑌯𑌸𑍍𑌤𑍁 𑌨𑌿𑌰𑍍𑌗𑌮𑌃 ॥ 112 ॥
𑌸𑌦𑌸𑌦𑍍𑌵𑍍𑌯𑌕𑍍𑌤𑌮𑌵𑍍𑌯𑌕𑍍𑌤𑌂 𑌪𑌿𑌤𑌾 𑌮𑌾𑌤𑌾 𑌪𑌿𑌤𑌾𑌮𑌹𑌃 ।
𑌸𑍍𑌵𑌰𑍍𑌗𑌦𑍍𑌵𑌾𑌰𑌂 𑌪𑍍𑌰𑌜𑌾𑌦𑍍𑌵𑌾𑌰𑌂 𑌮𑍋𑌕𑍍𑌷𑌦𑍍𑌵𑌾𑌰𑌂 𑌤𑍍𑌰𑌿𑌵𑌿𑌷𑍍𑌟𑌪𑌮𑍍 ॥ 113 ॥
𑌨𑌿𑌰𑍍𑌵𑌾𑌣𑌂 𑌹𑍍𑌲𑌾𑌦𑌨𑌶𑍍𑌚𑍈𑌵 𑌬𑍍𑌰𑌹𑍍𑌮𑌲𑍋𑌕𑌃 𑌪𑌰𑌾 𑌗𑌤𑌿𑌃 ।
𑌦𑍇𑌵𑌾𑌸𑍁𑌰𑌵𑌿𑌨𑌿𑌰𑍍𑌮𑌾𑌤𑌾 𑌦𑍇𑌵𑌾𑌸𑍁𑌰𑌪𑌰𑌾𑌯𑌣𑌃 ॥ 114 ॥
𑌦𑍇𑌵𑌾𑌸𑍁𑌰𑌗𑍁𑌰𑍁𑌰𑍍𑌦𑍇𑌵𑍋 𑌦𑍇𑌵𑌾𑌸𑍁𑌰𑌨𑌮𑌸𑍍𑌕𑍃𑌤𑌃 ।
𑌦𑍇𑌵𑌾𑌸𑍁𑌰𑌮𑌹𑌾𑌮𑌾𑌤𑍍𑌰𑍋 𑌦𑍇𑌵𑌾𑌸𑍁𑌰𑌗𑌣𑌾𑌶𑍍𑌰𑌯𑌃 ॥ 115 ॥
𑌦𑍇𑌵𑌾𑌸𑍁𑌰𑌗𑌣𑌾𑌧𑍍𑌯𑌕𑍍𑌷𑍋 𑌦𑍇𑌵𑌾𑌸𑍁𑌰𑌗𑌣𑌾𑌗𑍍𑌰𑌣𑍀𑌃 ।
𑌦𑍇𑌵𑌾𑌤𑌿𑌦𑍇𑌵𑍋 𑌦𑍇𑌵𑌰𑍍𑌷𑌿𑌰𑍍𑌦𑍇𑌵𑌾𑌸𑍁𑌰𑌵𑌰𑌪𑍍𑌰𑌦𑌃 ॥ 116 ॥ [𑌦𑍇𑌵𑌾𑌦𑌿]
𑌦𑍇𑌵𑌾𑌸𑍁𑌰𑍇𑌶𑍍𑌵𑌰𑍋 𑌵𑌿𑌶𑍍𑌵𑍋 𑌦𑍇𑌵𑌾𑌸𑍁𑌰𑌮𑌹𑍇𑌶𑍍𑌵𑌰𑌃 ।
𑌸𑌰𑍍𑌵𑌦𑍇𑌵𑌮𑌯𑍋𑌽𑌚𑌿𑌨𑍍𑌤𑍍𑌯𑍋 𑌦𑍇𑌵𑌤𑌾𑌤𑍍𑌮𑌾𑌽𑌽𑌤𑍍𑌮𑌸𑌮𑍍𑌭𑌵𑌃 ॥ 117 ॥
𑌉𑌦𑍍𑌭𑌿𑌤𑍍𑌤𑍍𑌰𑌿𑌵𑌿𑌕𑍍𑌰𑌮𑍋 𑌵𑍈𑌦𑍍𑌯𑍋 𑌵𑌿𑌰𑌜𑍋 𑌨𑍀𑌰𑌜𑍋𑌽𑌮𑌰𑌃 ।
𑌈𑌡𑍍𑌯𑍋 𑌹𑌸𑍍𑌤𑍀𑌶𑍍𑌵𑌰𑍋 𑌵𑍍𑌯𑌾𑌘𑍍𑌰𑍋 𑌦𑍇𑌵𑌸𑌿𑌂𑌹𑍋 𑌨𑌰𑌰𑍍𑌷𑌭𑌃 ॥ 118 ॥
𑌵𑌿𑌬𑍁𑌧𑍋𑌽𑌗𑍍𑌰𑌵𑌰𑌃 𑌸𑍂𑌕𑍍𑌷𑍍𑌮𑌃 𑌸𑌰𑍍𑌵𑌦𑍇𑌵𑌸𑍍𑌤𑌪𑍋𑌮𑌯𑌃 ।
𑌸𑍁𑌯𑍁𑌕𑍍𑌤𑌃 𑌶𑍋𑌭𑌨𑍋 𑌵𑌜𑍍𑌰𑍀 𑌪𑍍𑌰𑌾𑌸𑌾𑌨𑌾𑌂 𑌪𑍍𑌰𑌭𑌵𑍋𑌽𑌵𑍍𑌯𑌯𑌃 ॥ 119 ॥
𑌗𑍁𑌹𑌃 𑌕𑌾𑌨𑍍𑌤𑍋 𑌨𑌿𑌜𑌃 𑌸𑌰𑍍𑌗𑌃 𑌪𑌵𑌿𑌤𑍍𑌰𑌂 𑌸𑌰𑍍𑌵𑌪𑌾𑌵𑌨𑌃 ।
𑌶𑍃𑌙𑍍𑌗𑍀 𑌶𑍃𑌙𑍍𑌗𑌪𑍍𑌰𑌿𑌯𑍋 𑌬𑌭𑍍𑌰𑍂 𑌰𑌾𑌜𑌰𑌾𑌜𑍋 𑌨𑌿𑌰𑌾𑌮𑌯𑌃 ॥ 120 ॥
𑌅𑌭𑌿𑌰𑌾𑌮𑌃 𑌸𑍁𑌰𑌗𑌣𑍋 𑌵𑌿𑌰𑌾𑌮𑌃 𑌸𑌰𑍍𑌵𑌸𑌾𑌧𑌨𑌃 ।
𑌲𑌲𑌾𑌟𑌾𑌕𑍍𑌷𑍋 𑌵𑌿𑌶𑍍𑌵𑌦𑍇𑌵𑍋 𑌹𑌰𑌿𑌣𑍋 𑌬𑍍𑌰𑌹𑍍𑌮𑌵𑌰𑍍𑌚𑌸𑌃 ॥ 121 ॥
𑌸𑍍𑌥𑌾𑌵𑌰𑌾𑌣𑌾𑌂 𑌪𑌤𑌿𑌶𑍍𑌚𑍈𑌵 𑌨𑌿𑌯𑌮𑍇𑌨𑍍𑌦𑍍𑌰𑌿𑌯𑌵𑌰𑍍𑌧𑌨𑌃 ।
𑌸𑌿𑌦𑍍𑌧𑌾𑌰𑍍𑌥𑌃 𑌸𑌿𑌦𑍍𑌧𑌭𑍂𑌤𑌾𑌰𑍍𑌥𑍋𑌽𑌚𑌿𑌨𑍍𑌤𑍍𑌯𑌃 𑌸𑌤𑍍𑌯𑌵𑍍𑌰𑌤𑌃 𑌶𑍁𑌚𑌿𑌃 ॥ 122 ॥
𑌵𑍍𑌰𑌤𑌾𑌧𑌿𑌪𑌃 𑌪𑌰𑌂 𑌬𑍍𑌰𑌹𑍍𑌮 𑌭𑌕𑍍𑌤𑌾𑌨𑌾𑌂 𑌪𑌰𑌮𑌾 𑌗𑌤𑌿𑌃 । [𑌭𑌕𑍍𑌤𑌾𑌨𑍁𑌗𑍍𑌰𑌹𑌕𑌾𑌰𑌕𑌃]
𑌵𑌿𑌮𑍁𑌕𑍍𑌤𑍋 𑌮𑍁𑌕𑍍𑌤𑌤𑍇𑌜𑌾𑌶𑍍𑌚 𑌶𑍍𑌰𑍀𑌮𑌾𑌨𑍍 𑌶𑍍𑌰𑍀𑌵𑌰𑍍𑌧𑌨𑍋 𑌜𑌗𑌤𑍍 ॥ 123 ॥
𑌉𑌤𑍍𑌤𑌰𑌪𑍀𑌠𑌿𑌕𑌾 (𑌫𑌲𑌶𑍃𑌤𑌿)
𑌯𑌥𑌾 𑌪𑍍𑌰𑌧𑌾𑌨𑌂 𑌭𑌗𑌵𑌾𑌨𑌿𑌤𑌿 𑌭𑌕𑍍𑌤𑍍𑌯𑌾 𑌸𑍍𑌤𑍁𑌤𑍋 𑌮𑌯𑌾 ।
𑌯𑌂 𑌨 𑌬𑍍𑌰𑌹𑍍𑌮𑌾𑌦𑌯𑍋 𑌦𑍇𑌵𑌾 𑌵𑌿𑌦𑍁𑌸𑍍𑌤𑌤𑍍𑌤𑍍𑌵𑍇𑌨 𑌨𑌰𑍍𑌷𑌯𑌃 ॥ 1 ॥
𑌸𑍍𑌤𑍋𑌤𑌵𑍍𑌯𑌮𑌰𑍍𑌚𑍍𑌯𑌂 𑌵𑌨𑍍𑌦𑍍𑌯𑌂 𑌚 𑌕𑌃 𑌸𑍍𑌤𑍋𑌷𑍍𑌯𑌤𑌿 𑌜𑌗𑌤𑍍𑌪𑌤𑌿𑌮𑍍 ।
𑌭𑌕𑍍𑌤𑍍𑌯𑌾 𑌤𑍍𑌵𑍇𑌵𑌂 𑌪𑍁𑌰𑌸𑍍𑌕𑍃𑌤𑍍𑌯 𑌮𑌯𑌾 𑌯𑌜𑍍𑌞𑌪𑌤𑌿𑌰𑍍𑌵𑌿𑌭𑍁𑌃 ॥ 2 ॥
𑌤𑌤𑍋𑌽𑌭𑍍𑌯𑌨𑍁𑌜𑍍𑌞𑌾𑌂 𑌸𑌮𑍍𑌪𑍍𑌰𑌾𑌪𑍍𑌯 𑌸𑍍𑌤𑍁𑌤𑍋 𑌮𑌤𑌿𑌮𑌤𑌾𑌂 𑌵𑌰𑌃 ।
𑌶𑌿𑌵𑌮𑍇𑌭𑌿𑌃 𑌸𑍍𑌤𑍁𑌵𑌨𑍍 𑌦𑍇𑌵𑌂 𑌨𑌾𑌮𑌭𑌿𑌃 𑌪𑍁𑌷𑍍𑌟𑌿𑌵𑌰𑍍𑌧𑌨𑍈𑌃 ॥ 3 ॥
𑌨𑌿𑌤𑍍𑌯𑌯𑍁𑌕𑍍𑌤𑌃 𑌶𑍁𑌚𑌿𑌰𑍍𑌭𑌕𑍍𑌤𑌃 𑌪𑍍𑌰𑌾𑌪𑍍𑌨𑍋𑌤𑍍𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌨𑌾 ।
𑌏𑌤𑌦𑍍𑌧𑌿 𑌪𑌰𑌮𑌂 𑌬𑍍𑌰𑌹𑍍𑌮 𑌪𑌰𑌂 𑌬𑍍𑌰𑌹𑍍𑌮𑌾𑌧𑌿𑌗𑌚𑍍𑌛𑌤𑌿 ॥ 4 ॥
𑌋𑌷𑌯𑌶𑍍𑌚𑍈𑌵 𑌦𑍇𑌵𑌾𑌶𑍍𑌚 𑌸𑍍𑌤𑍁𑌵𑌨𑍍𑌤𑍍𑌯𑍇𑌤𑍇𑌨 𑌤𑌤𑍍𑌪𑌰𑌮𑍍 ।
𑌸𑍍𑌤𑍂𑌯𑌮𑌾𑌨𑍋 𑌮𑌹𑌾𑌦𑍇𑌵𑌸𑍍𑌤𑍁𑌷𑍍𑌯𑌤𑍇 𑌨𑌿𑌯𑌤𑌾𑌤𑍍𑌮𑌭𑌿𑌃 ॥ 5 ॥
𑌭𑌕𑍍𑌤𑌾𑌨𑍁𑌕𑌮𑍍𑌪𑍀 𑌭𑌗𑌵𑌾𑌨𑌾𑌤𑍍𑌮𑌸𑌂𑌸𑍍𑌥𑌾𑌕𑌰𑍋 𑌵𑌿𑌭𑍁𑌃 ।
𑌤𑌥𑍈𑌵 𑌚 𑌮𑌨𑍁𑌷𑍍𑌯𑍇𑌷𑍁 𑌯𑍇 𑌮𑌨𑍁𑌷𑍍𑌯𑌾𑌃 𑌪𑍍𑌰𑌧𑌾𑌨𑌤𑌃 ॥ 6 ॥
𑌆𑌸𑍍𑌤𑌿𑌕𑌾𑌃 𑌶𑍍𑌰𑌦𑍍𑌦𑌧𑌾𑌨𑌾𑌶𑍍𑌚 𑌬𑌹𑍁𑌭𑌿𑌰𑍍𑌜𑌨𑍍𑌮𑌭𑌿𑌃 𑌸𑍍𑌤𑌵𑍈𑌃 ।
𑌭𑌕𑍍𑌤𑍍𑌯𑌾 𑌹𑍍𑌯𑌨𑌨𑍍𑌯𑌮𑍀𑌶𑌾𑌨𑌂 𑌪𑌰𑌂 𑌦𑍇𑌵𑌂 𑌸𑌨𑌾𑌤𑌨𑌮𑍍 ॥ 7 ॥
𑌕𑌰𑍍𑌮𑌣𑌾 𑌮𑌨𑌸𑌾 𑌵𑌾𑌚𑌾 𑌭𑌾𑌵𑍇𑌨𑌾𑌮𑌿𑌤𑌤𑍇𑌜𑌸𑌃 ।
𑌶𑌯𑌾𑌨𑌾 𑌜𑌾𑌗𑍍𑌰𑌮𑌾𑌣𑌾𑌶𑍍𑌚 𑌵𑍍𑌰𑌜𑌨𑍍𑌨𑍁𑌪𑌵𑌿𑌶𑌂𑌸𑍍𑌤𑌥𑌾 ॥ 8 ॥
𑌉𑌨𑍍𑌮𑌿𑌷𑌨𑍍𑌨𑌿𑌮𑌿𑌷𑌂𑌶𑍍𑌚𑍈𑌵 𑌚𑌿𑌨𑍍𑌤𑌯𑌨𑍍𑌤𑌃 𑌪𑍁𑌨𑌃 𑌪𑍁𑌨𑌃 ।
𑌶𑍃𑌣𑍍𑌵𑌨𑍍𑌤𑌃 𑌶𑍍𑌰𑌾𑌵𑌯𑌨𑍍𑌤𑌶𑍍𑌚 𑌕𑌥𑌯𑌨𑍍𑌤𑌶𑍍𑌚 𑌤𑍇 𑌭𑌵𑌮𑍍 ॥ 9 ॥
𑌸𑍍𑌤𑍁𑌵𑌨𑍍𑌤𑌃 𑌸𑍍𑌤𑍂𑌯𑌮𑌾𑌨𑌾𑌶𑍍𑌚 𑌤𑍁𑌷𑍍𑌯𑌨𑍍𑌤𑌿 𑌚 𑌰𑌮𑌨𑍍𑌤𑌿 𑌚 ।
𑌜𑌨𑍍𑌮𑌕𑍋𑌟𑌿𑌸𑌹𑌸𑍍𑌰𑍇𑌷𑍁 𑌨𑌾𑌨𑌾𑌸𑌂𑌸𑌾𑌰𑌯𑍋𑌨𑌿𑌷𑍁 ॥ 10 ॥
𑌜𑌨𑍍𑌤𑍋𑌰𑍍𑌵𑌿𑌗𑌤𑌪𑌾𑌪𑌸𑍍𑌯 𑌭𑌵𑍇 𑌭𑌕𑍍𑌤𑌿𑌃 𑌪𑍍𑌰𑌜𑌾𑌯𑌤𑍇 ।
𑌉𑌤𑍍𑌪𑌨𑍍𑌨𑌾 𑌚 𑌭𑌵𑍇 𑌭𑌕𑍍𑌤𑌿𑌰𑌨𑌨𑍍𑌯𑌾 𑌸𑌰𑍍𑌵𑌭𑌾𑌵𑌤𑌃 ॥ 11 ॥
𑌭𑌾𑌵𑌿𑌨𑌃 𑌕𑌾𑌰𑌣𑍇 𑌚𑌾𑌸𑍍𑌯 𑌸𑌰𑍍𑌵𑌯𑍁𑌕𑍍𑌤𑌸𑍍𑌯 𑌸𑌰𑍍𑌵𑌥𑌾 ।
𑌏𑌤𑌦𑍍𑌦𑍇𑌵𑍇𑌷𑍁 𑌦𑍁𑌷𑍍𑌪𑍍𑌰𑌾𑌪𑌂 𑌮𑌨𑍁𑌷𑍍𑌯𑍇𑌷𑍁 𑌨 𑌲𑌭𑍍𑌯𑌤𑍇 ॥ 12 ॥
𑌨𑌿𑌰𑍍𑌵𑌿𑌘𑍍𑌨𑌾 𑌨𑌿𑌶𑍍𑌚𑌲𑌾 𑌰𑍁𑌦𑍍𑌰𑍇 𑌭𑌕𑍍𑌤𑌿𑌰𑌵𑍍𑌯𑌭𑌿𑌚𑌾𑌰𑌿𑌣𑍀 ।
𑌤𑌸𑍍𑌯𑍈𑌵 𑌚 𑌪𑍍𑌰𑌸𑌾𑌦𑍇𑌨 𑌭𑌕𑍍𑌤𑌿𑌰𑍁𑌤𑍍𑌪𑌦𑍍𑌯𑌤𑍇 𑌨𑍃𑌣𑌾𑌮𑍍 ॥ 13 ॥
𑌯𑍇𑌨 𑌯𑌾𑌨𑍍𑌤𑌿 𑌪𑌰𑌾𑌂 𑌸𑌿𑌦𑍍𑌧𑌿𑌂 𑌤𑌦𑍍𑌭𑌾𑌵𑌗𑌤𑌚𑍇𑌤𑌸𑌃 ।
𑌯𑍇 𑌸𑌰𑍍𑌵𑌭𑌾𑌵𑌾𑌨𑍁𑌗𑌤𑌾𑌃 𑌪𑍍𑌰𑌪𑌦𑍍𑌯𑌨𑍍𑌤𑍇 𑌮𑌹𑍇𑌶𑍍𑌵𑌰𑌮𑍍 ॥ 14 ॥
𑌪𑍍𑌰𑌪𑌨𑍍𑌨𑌵𑌤𑍍𑌸𑌲𑍋 𑌦𑍇𑌵𑌃 𑌸𑌂𑌸𑌾𑌰𑌾𑌤𑍍𑌤𑌾𑌨𑍍𑌸𑌮𑍁𑌦𑍍𑌧𑌰𑍇𑌤𑍍 ।
𑌏𑌵𑌮𑌨𑍍𑌯𑍇 𑌵𑌿𑌕𑍁𑌰𑍍𑌵𑌨𑍍𑌤𑌿 𑌦𑍇𑌵𑌾𑌃 𑌸𑌂𑌸𑌾𑌰𑌮𑍋𑌚𑌨𑌮𑍍 ॥ 15 ॥
𑌮𑌨𑍁𑌷𑍍𑌯𑌾𑌣𑌾𑌮𑍃𑌤𑍇 𑌦𑍇𑌵𑌂 𑌨𑌾𑌨𑍍𑌯𑌾 𑌶𑌕𑍍𑌤𑌿𑌸𑍍𑌤𑌪𑍋𑌬𑌲𑌮𑍍 ।
𑌇𑌤𑌿 𑌤𑍇𑌨𑍇𑌨𑍍𑌦𑍍𑌰𑌕𑌲𑍍𑌪𑍇𑌨 𑌭𑌗𑌵𑌾𑌨𑍍 𑌸𑌦𑌸𑌤𑍍𑌪𑌤𑌿𑌃 ॥ 16 ॥
𑌕𑍃𑌤𑍍𑌤𑌿𑌵𑌾𑌸𑌾𑌃 𑌸𑍍𑌤𑍁𑌤𑌃 𑌕𑍃𑌷𑍍𑌣 𑌤𑌣𑍍𑌡𑌿𑌨𑌾 𑌶𑍁𑌭𑌬𑍁𑌦𑍍𑌧𑌿𑌨𑌾 ।
𑌸𑍍𑌤𑌵𑌮𑍇𑌤𑌂 𑌭𑌗𑌵𑌤𑍋 𑌬𑍍𑌰𑌹𑍍𑌮𑌾 𑌸𑍍𑌵𑌯𑌮𑌧𑌾𑌰𑌯𑌤𑍍 ॥ 17 ॥
𑌗𑍀𑌯𑌤𑍇 𑌚 𑌸 𑌬𑍁𑌦𑍍𑌧𑍍𑌯𑍇𑌤 𑌬𑍍𑌰𑌹𑍍𑌮𑌾 𑌶𑌙𑍍𑌕𑌰𑌸𑌨𑍍𑌨𑌿𑌧𑍗 ।
𑌇𑌦𑌂 𑌪𑍁𑌣𑍍𑌯𑌂 𑌪𑌵𑌿𑌤𑍍𑌰𑌂 𑌚 𑌸𑌰𑍍𑌵𑌦𑌾 𑌪𑌾𑌪𑌨𑌾𑌶𑌨𑌮𑍍 ॥ 18 ॥
𑌯𑍋𑌗𑌦𑌂 𑌮𑍋𑌕𑍍𑌷𑌦𑌂 𑌚𑍈𑌵 𑌸𑍍𑌵𑌰𑍍𑌗𑌦𑌂 𑌤𑍋𑌷𑌦𑌂 𑌤𑌥𑌾 ।
𑌏𑌵𑌮𑍇𑌤𑌤𑍍𑌪𑌠𑌨𑍍𑌤𑍇 𑌯 𑌏𑌕𑌭𑌕𑍍𑌤𑍍𑌯𑌾 𑌤𑍁 𑌶𑌙𑍍𑌕𑌰𑌮𑍍 ॥ 19 ॥
𑌯𑌾 𑌗𑌤𑌿𑌃 𑌸𑌾𑌙𑍍𑌖𑍍𑌯𑌯𑍋𑌗𑌾𑌨𑌾𑌂 𑌵𑍍𑌰𑌜𑌨𑍍𑌤𑍍𑌯𑍇𑌤𑌾𑌂 𑌗𑌤𑌿𑌂 𑌤𑌦𑌾 ।
𑌸𑍍𑌤𑌵𑌮𑍇𑌤𑌂 𑌪𑍍𑌰𑌯𑌤𑍍𑌨𑍇𑌨 𑌸𑌦𑌾 𑌰𑍁𑌦𑍍𑌰𑌸𑍍𑌯 𑌸𑌨𑍍𑌨𑌿𑌧𑍗 ॥ 20 ॥
𑌅𑌬𑍍𑌦𑌮𑍇𑌕𑌂 𑌚𑌰𑍇𑌦𑍍𑌭𑌕𑍍𑌤𑌃 𑌪𑍍𑌰𑌾𑌪𑍍𑌨𑍁𑌯𑌾𑌦𑍀𑌪𑍍𑌸𑌿𑌤𑌂 𑌫𑌲𑌮𑍍 ।
𑌏𑌤𑌦𑍍𑌰𑌹𑌸𑍍𑌯𑌂 𑌪𑌰𑌮𑌂 𑌬𑍍𑌰𑌹𑍍𑌮𑌣𑍋 𑌹𑍃𑌦𑌿 𑌸𑌂𑌸𑍍𑌥𑌿𑌤𑌮𑍍 ॥ 21 ॥
𑌬𑍍𑌰𑌹𑍍𑌮𑌾 𑌪𑍍𑌰𑍋𑌵𑌾𑌚 𑌶𑌕𑍍𑌰𑌾𑌯 𑌶𑌕𑍍𑌰𑌃 𑌪𑍍𑌰𑍋𑌵𑌾𑌚 𑌮𑍃𑌤𑍍𑌯𑌵𑍇 ।
𑌮𑍃𑌤𑍍𑌯𑍁𑌃 𑌪𑍍𑌰𑍋𑌵𑌾𑌚 𑌰𑍁𑌦𑍍𑌰𑍇𑌭𑍍𑌯𑍋 𑌰𑍁𑌦𑍍𑌰𑍇𑌭𑍍𑌯𑌸𑍍𑌤𑌣𑍍𑌡𑌿𑌮𑌾𑌗𑌮𑌤𑍍 ॥ 22 ॥
𑌮𑌹𑌤𑌾 𑌤𑌪𑌸𑌾 𑌪𑍍𑌰𑌾𑌪𑍍𑌤𑌸𑍍𑌤𑌣𑍍𑌡𑌿𑌨𑌾 𑌬𑍍𑌰𑌹𑍍𑌮𑌸𑌦𑍍𑌮𑌨𑌿 ।
𑌤𑌣𑍍𑌡𑌿𑌃 𑌪𑍍𑌰𑍋𑌵𑌾𑌚 𑌶𑍁𑌕𑍍𑌰𑌾𑌯 𑌗𑍗𑌤𑌮𑌾𑌯 𑌚 𑌭𑌾𑌰𑍍𑌗𑌵𑌃 ॥ 23 ॥
𑌵𑍈𑌵𑌸𑍍𑌵𑌤𑌾𑌯 𑌮𑌨𑌵𑍇 𑌗𑍗𑌤𑌮𑌃 𑌪𑍍𑌰𑌾𑌹 𑌮𑌾𑌧𑌵 ।
𑌨𑌾𑌰𑌾𑌯𑌣𑌾𑌯 𑌸𑌾𑌧𑍍𑌯𑌾𑌯 𑌸𑌮𑌾𑌧𑌿𑌷𑍍𑌠𑌾𑌯 𑌧𑍀𑌮𑌤𑍇 ॥ 24 ॥
𑌯𑌮𑌾𑌯 𑌪𑍍𑌰𑌾𑌹 𑌭𑌗𑌵𑌾𑌨𑍍 𑌸𑌾𑌧𑍍𑌯𑍋 𑌨𑌾𑌰𑌾𑌯𑌣𑍋𑌽𑌚𑍍𑌯𑍁𑌤𑌃 ।
𑌨𑌾𑌚𑌿𑌕𑍇𑌤𑌾𑌯 𑌭𑌗𑌵𑌾𑌨𑌾𑌹 𑌵𑍈𑌵𑌸𑍍𑌵𑌤𑍋 𑌯𑌮𑌃 ॥ 25 ॥
𑌮𑌾𑌰𑍍𑌕𑌣𑍍𑌡𑍇𑌯𑌾𑌯 𑌵𑌾𑌰𑍍𑌷𑍍𑌣𑍇𑌯 𑌨𑌾𑌚𑌿𑌕𑍇𑌤𑍋𑌽𑌭𑍍𑌯𑌭𑌾𑌷𑌤 ।
𑌮𑌾𑌰𑍍𑌕𑌣𑍍𑌡𑍇𑌯𑌾𑌨𑍍𑌮𑌯𑌾 𑌪𑍍𑌰𑌾𑌪𑍍𑌤𑍋 𑌨𑌿𑌯𑌮𑍇𑌨 𑌜𑌨𑌾𑌰𑍍𑌦𑌨 ॥ 26 ॥
𑌤𑌵𑌾𑌪𑍍𑌯𑌹𑌮𑌮𑌿𑌤𑍍𑌰𑌘𑍍𑌨 𑌸𑍍𑌤𑌵𑌂 𑌦𑌦𑍍𑌯𑌾𑌂 𑌹𑍍𑌯𑌵𑌿𑌶𑍍𑌰𑍁𑌤𑌮𑍍 ।
𑌸𑍍𑌵𑌰𑍍𑌗𑍍𑌯𑌮𑌾𑌰𑍋𑌗𑍍𑌯𑌮𑌾𑌯𑍁𑌷𑍍𑌯𑌂 𑌧𑌨𑍍𑌯𑌂 𑌵𑍇𑌦𑍇𑌨 𑌸𑌮𑍍𑌮𑌿𑌤𑌮𑍍 ॥ 27 ॥
𑌨𑌾𑌸𑍍𑌯 𑌵𑌿𑌘𑍍𑌨𑌂 𑌵𑌿𑌕𑍁𑌰𑍍𑌵𑌨𑍍𑌤𑌿 𑌦𑌾𑌨𑌵𑌾 𑌯𑌕𑍍𑌷𑌰𑌾𑌕𑍍𑌷𑌸𑌾𑌃 ।
𑌪𑌿𑌶𑌾𑌚𑌾 𑌯𑌾𑌤𑍁𑌧𑌾𑌨𑌾 𑌵𑌾 𑌗𑍁𑌹𑍍𑌯𑌕𑌾 𑌭𑍁𑌜𑌗𑌾 𑌅𑌪𑌿 ॥ 28 ॥
𑌯𑌃 𑌪𑌠𑍇𑌤 𑌶𑍁𑌚𑌿𑌃 𑌪𑌾𑌰𑍍𑌥 𑌬𑍍𑌰𑌹𑍍𑌮𑌚𑌾𑌰𑍀 𑌜𑌿𑌤𑍇𑌨𑍍𑌦𑍍𑌰𑌿𑌯𑌃 । [𑌭𑍂𑌤𑍍𑌵𑌾]
𑌅𑌭𑌗𑍍𑌨𑌯𑍋𑌗𑍋 𑌵𑌰𑍍𑌷𑌂 𑌤𑍁 𑌸𑍋𑌽𑌶𑍍𑌵𑌮𑍇𑌧𑌫𑌲𑌂 𑌲𑌭𑍇𑌤𑍍 ॥ 29 ॥
𑌇𑌤𑌿 𑌶𑍍𑌰𑍀𑌮𑌹𑌾𑌭𑌾𑌰𑌤𑍇 𑌅𑌨𑍁𑌶𑌾𑌸𑌨𑌪𑌰𑍍𑌵𑌣𑌿 𑌮𑌹𑌾𑌦𑍇𑌵𑌸𑌹𑌸𑍍𑌰𑌨𑌾𑌮 𑌸𑍍𑌤𑍋𑌤𑍍𑌰𑌂 𑌨𑌾𑌮 𑌸𑌪𑍍𑌤𑌦𑌶𑍋𑌽𑌧𑍍𑌯𑌾𑌯𑌃 ॥
Roman (IAST) Transliteration
pūrvapīṭhikā ||
vāsudeva uvāca |
tataḥ sa prayato bhūtvā mama tāta yudhiṣṭhira |
prāñjaliḥ prāha viprarṣirnāmasaṅgrahamāditaḥ || 1 ||
upamanyuruvāca |
brahmaproktairṛṣiproktairvedavedāṅgasambhavaiḥ |
sarvalokeṣu vikhyātaṃ stutyaṃ stoṣyāmi nāmabhiḥ || 2 ||
mahadbhirvihitaiḥ satyaiḥ siddhaiḥ sarvārthasādhakaiḥ |
ṛṣiṇā taṇḍinā bhaktyā kṛtairvedakṛtātmanā || 3 ||
yathoktaiḥ sādhubhiḥ khyātairmunibhistattvadarśibhiḥ |
pravaraṃ prathamaṃ svargyaṃ sarvabhūtahitaṃ śubham || 4 ||
śrutaiḥ sarvatra jagati brahmalokāvatāritaiḥ |
satyaistatparamaṃ brahma brahmaproktaṃ sanātanam || 5 ||
vakṣye yadukulaśreṣṭha śṛṇuṣvāvahito mama |
varayainaṃ bhavaṃ devaṃ bhaktastvaṃ parameśvaram || 6 ||
tena te śrāvayiṣyāmi yattadbrahma sanātanam |
na śakyaṃ vistarātkṛtsnaṃ vaktuṃ sarvasya kenacit || 7 ||
yuktenāpi vibhūtīnāmapi varṣaśatairapi |
yasyādirmadhyamantaṃ ca surairapi na gamyate || 8 ||
kastasya śaknuyādvaktuṃ guṇān kārtsnyena mādhava |
kiṃ tu devasya mahataḥ saṅkṣiptārthapadākṣaram || 9 ||
śaktitaścaritaṃ vakṣye prasādāttasya dhīmataḥ |
aprāpya tu tato'nujñāṃ na śakyaḥ stotumīśvaraḥ || 10 ||
yadā tenābhyanujñātaḥ stuto vai sa tadā mayā |
anādinidhanasyāhaṃ jagadyonermahātmanaḥ || 11 ||
nāmnāṃ kiñcitsamuddeśaṃ vakṣyāmyavyaktayoninaḥ |
varadasya vareṇyasya viśvarūpasya dhīmataḥ || 12 ||
śṛṇu nāmnāṃ ca yaṃ kṛṣṇa yaduktaṃ padmayoninā |
daśanāmasahasrāṇi yānyāha prapitāmahaḥ || 13 ||
tāni nirmathya manasā dadhno ghṛtamivoddhṛtam |
gireḥ sāraṃ yathā hema puṣpasāraṃ yathā madhu || 14 ||
ghṛtātsāraṃ yathā maṇḍastathaitatsāramuddhṛtam |
sarvapāpāpahamidaṃ caturvedasamanvitam || 15 ||
prayatnenādhigantavyaṃ dhāryaṃ ca prayatātmanā |
māṅgalyaṃ pauṣṭikaṃ caiva rakṣoghnaṃ pāvanaṃ mahat || 16 ||
idaṃ bhaktāya dātavyaṃ śraddadhānāstikāya ca |
nāśraddadhānarūpāya nāstikāyājitātmane || 17 ||
yaścābhyasūyate devaṃ kāraṇātmānamīśvaram |
sa kṛṣṇa narakaṃ yāti saha pūrvaiḥ sahātmajaiḥ || 18 ||
idaṃ dhyānamidaṃ yogamidaṃ dhyeyamanuttamam |
idaṃ japyamidaṃ jñānaṃ rahasyamidamuttamam || 19 ||
yaṃ jñātvā antakālepi gaccheta paramāṃ gatim |
pavitraṃ maṅgalaṃ medhyaṃ kalyāṇamidamuttamam || 20 ||
idaṃ brahmā purā kṛtvā sarvalokapitāmahaḥ |
sarva stavānāṃ rājatve divyānāṃ samakalpayat || 21 ||
tadā prabhṛti caivāyamīśvarasya mahātmanaḥ |
stavarāja iti khyāto jagatyamarapūjitaḥ || 22 ||
brahmalokādayaṃ svarge stavarājo'vatāritaḥ |
yatastaṇḍiḥ purā prāpa tena taṇḍikṛto'bhavat || 23 ||
svargāccaivātra bhūrlokaṃ taṇḍinā hyavatāritaḥ |
sarvamaṅgalamāṅgalyaṃ sarvapāpapraṇāśanam || 24 ||
nigadiṣye mahābāho stavānāmuttamaṃ stavam |
brahmaṇāmapi yadbrahma parāṇāmapi yatparam || 25 ||
tejasāmapi yattejastapasāmapi yattapaḥ |
śāntānāmapi yaḥ śānto dyutīnāmapi yā dyutiḥ || 26 ||
dāntānāmapi yo dānto dhīmatāmapi yā ca dhīḥ |
devānāmapi yo deva ṛṣīṇāmapi yastvṛṣiḥ || 27 ||
yajñānāmapi yo yajñaḥ śivānāmapi yaḥ śivaḥ |
rudrāṇāmapi yo rudraḥ prabhā prabhavatāmapi || 28 ||
yogināmapi yo yogī kāraṇānāṃ ca kāraṇam |
yato lokāḥ sambhavanti na bhavanti yataḥ punaḥ || 29 ||
sarvabhūtātmabhūtasya harasyāmitatejasaḥ |
aṣṭottarasahasraṃ tu nāmnāṃ śarvasya me śṛṇu |
yacchrutvā manujavyāghra sarvānkāmānavāpsyasi || 30 ||
dhyānam |
śāntaṃ padmāsanasthaṃ śaśidharamukuṭaṃ pañcavaktraṃ trinetraṃ
śūlaṃ vajraṃ ca khaḍgaṃ paraśumabhayadaṃ dakṣabhāge vahantam |
nāgaṃ pāśaṃ ca ghaṇṭāṃ pralayahutavahaṃ sāṅkuśaṃ vāmabhāge
nānālaṅkārayuktaṃ sphaṭikamaṇinibhaṃ pārvatīśaṃ namāmi ||
stotram |
oṃ sthiraḥ sthāṇuḥ prabhurbhīmaḥ pravaro varado varaḥ |
sarvātmā sarvavikhyātaḥ sarvaḥ sarvakaro bhavaḥ || 1 ||
jaṭī carmī śikhaṇḍī ca sarvāṅgaḥ sarvabhāvanaḥ |
haraśca hariṇākṣaśca sarvabhūtaharaḥ prabhuḥ || 2 ||
pravṛttiśca nivṛttiśca niyataḥ śāśvato dhruvaḥ |
śmaśānavāsī bhagavān khacaro gocaro'rdanaḥ || 3 ||
abhivādyo mahākarmā tapasvī bhūtabhāvanaḥ |
unmattaveṣapracchannaḥ sarvalokaprajāpatiḥ || 4 ||
mahārūpo mahākāyo vṛṣarūpo mahāyaśāḥ |
mahātmā sarvabhūtātmā viśvarūpo mahāhanuḥ || 5 ||
lokapālo'ntarhitātmā prasādo hayagardabhiḥ |
pavitraṃ ca mahāṃścaiva niyamo niyamāśritaḥ || 6 ||
sarvakarmā svayambhūta ādirādikaro nidhiḥ |
sahasrākṣo viśālākṣaḥ somo nakṣatrasādhakaḥ || 7 ||
candraḥ sūryaḥ śaniḥ keturgraho grahapatirvaraḥ |
atriratryā namaskartā mṛgabāṇārpaṇo'naghaḥ || 8 || [ādyantalayakartā ca]
mahātapā ghoratapā adīno dīnasādhakaḥ |
saṃvatsarakaro mantraḥ pramāṇaṃ paramaṃ tapaḥ || 9 ||
yogī yojyo mahābījo mahāretā mahābalaḥ |
suvarṇaretāḥ sarvajñaḥ subījo bījavāhanaḥ || 10 ||
daśabāhustvanimiṣo nīlakaṇṭha umāpatiḥ |
viśvarūpaḥ svayaṃ śreṣṭho balavīro balo gaṇaḥ || 11 ||
gaṇakartā gaṇapatirdigvāsāḥ kāma eva ca |
mantravitparamo mantraḥ sarvabhāvakaro haraḥ || 12 ||
kamaṇḍaludharo dhanvī bāṇahastaḥ kapālavān |
aśanī śataghnī khaḍgī paṭṭiśī cāyudhī mahān || 13 ||
sruvahastaḥ surūpaśca tejastejaskaro nidhiḥ |
uṣṇīṣī ca suvaktraśca udagro vinatastathā || 14 ||
dīrghaśca harikeśaśca sutīrthaḥ kṛṣṇa eva ca |
sṛgālarūpaḥ siddhārtho muṇḍaḥ sarvaśubhaṅkaraḥ || 15 ||
ajaśca bahurūpaśca gandhadhārī kapardyapi |
ūrdhvaretā ūrdhvaliṅga ūrdhvaśāyī nabhaḥsthalaḥ || 16 ||
trijaṭī cīravāsāśca rudraḥ senāpatirvibhuḥ |
ahaścaro naktañcarastigmamanyuḥ suvarcasaḥ || 17 ||
gajahā daityahā kālo lokadhātā guṇākaraḥ |
siṃhaśārdūlarūpaśca ārdracarmāmbarāvṛtaḥ || 18 ||
kālayogī mahānādaḥ sarvakāmaścatuṣpathaḥ |
niśācaraḥ pretacārī bhūtacārī maheśvaraḥ || 19 ||
bahubhūto bahudharaḥ svarbhānuramito gatiḥ |
nṛtyapriyo nityanarto nartakaḥ sarvalālasaḥ || 20 ||
ghoro mahātapāḥ pāśo nityo giriruho nabhaḥ |
sahasrahasto vijayo vyavasāyo hyatandritaḥ || 21 ||
adharṣaṇo dharṣaṇātmā yajñahā kāmanāśakaḥ | [marṣa]
dakṣayāgāpahārī ca susaho madhyamastathā || 22 ||
tejopahārī balahā mudito'rtho'jito'varaḥ |
gambhīraghoṣo gambhīro gambhīrabalavāhanaḥ || 23 ||
nyagrodharūpo nyagrodho vṛkṣakarṇasthitirvibhuḥ |
sutīkṣṇadaśanaścaiva mahākāyo mahānanaḥ || 24 ||
viṣvakseno hariryajñaḥ saṃyugāpīḍavāhanaḥ |
tīkṣṇatāpaśca haryaśvaḥ sahāyaḥ karmakālavit || 25 ||
viṣṇuprasādito yajñaḥ samudro baḍabāmukhaḥ |
hutāśanasahāyaśca praśāntātmā hutāśanaḥ || 26 ||
ugratejā mahātejā janyo vijayakālavit |
jyotiṣāmayanaṃ siddhiḥ sarvavigraha eva ca || 27 ||
śikhī muṇḍī jaṭī jvālī mūrtijo mūrdhago balī |
veṇavī paṇavī tālī khalī kālakaṭaṅkaṭaḥ || 28 ||
nakṣatravigrahamatirguṇabuddhirlayo'gamaḥ |
prajāpatirviśvabāhurvibhāgaḥ sarvago'mukhaḥ || 29 ||
vimocanaḥ susaraṇo hiraṇyakavacodbhavaḥ |
meḍhrajo balacārī ca mahīcārī srutastathā || 30 || [meghajo]
sarvatūryaninādī ca sarvātodyaparigrahaḥ |
vyālarūpo guhāvāsī guho mālī taraṅgavit || 31 ||
tridaśastrikāladhṛkkarmasarvabandhavimocanaḥ |
bandhanastvasurendrāṇāṃ yudhiśatruvināśanaḥ || 32 ||
sāṅkhyaprasādo durvāsāḥ sarvasādhuniṣevitaḥ |
praskandano vibhāgajño atulyo yajñabhāgavit || 33 ||
sarvavāsaḥ sarvacārī durvāsā vāsavo'maraḥ |
haimo hemakaro'yajñaḥ sarvadhārī dharottamaḥ || 34 || [yajñaḥ]
lohitākṣo mahākṣaśca vijayākṣo viśāradaḥ |
saṅgraho nigrahaḥ kartā sarpacīranivāsanaḥ || 35 ||
mukhyo'mukhyaśca dehaśca kāhaliḥ sarvakāmadaḥ |
sarvakālaprasādaśca subalo balarūpadhṛt || 36 ||
sarvakāmavaraścaiva sarvadaḥ sarvatomukhaḥ |
ākāśanirvirūpaśca nipātī hyavaśaḥ khagaḥ || 37 ||
raudrarūpo'ṃśurādityo bahuraśmiḥ suvarcasī |
vasuvego mahāvego manovego niśācaraḥ || 38 ||
sarvavāsī śriyāvāsī upadeśakaro'karaḥ |
munirātmanirālokaḥ sambhagnaśca sahasradaḥ || 39 ||
pakṣī ca pakṣarūpaśca atidīpto viśāṃ patiḥ |
unmādo madanaḥ kāmo hyaśvattho'rthakaro yaśaḥ || 40 ||
vāmadevaśca vāmaśca prāgdakṣiṇaśca vāmanaḥ |
siddhayogī maharṣiśca siddhārthaḥ siddhasādhakaḥ || 41 ||
bhikṣuśca bhikṣurūpaśca vipaṇo mṛduravyayaḥ |
mahāseno viśākhaśca ṣaṣṭibhāgo gavāṃ patiḥ || 42 ||
vajrahastaśca viṣkambhī camūstambhana eva ca |
vṛttāvṛttakarastālo madhurmadhukalocanaḥ || 43 ||
vācaspatyo vājasano nityamāśramapūjitaḥ | [nityamāśritapūjitaḥ]
brahmacārī lokacārī sarvacārī vicāravit || 44 ||
īśāna īśvaraḥ kālo niśācārī pinākabhṛt |
nimittastho nimittaṃ ca nandirnandikaro hariḥ || 45 ||
nandīśvaraśca nandī ca nandano nandivardhanaḥ |
bhagahārī nihantā ca kālo brahmā pitāmahaḥ || 46 ||
caturmukho mahāliṅgaścāruliṅgastathaiva ca |
liṅgādhyakṣaḥ surādhyakṣo yogādhyakṣo yugāvahaḥ || 47 ||
bījādhyakṣo bījakartā adhyātmānugato balaḥ |
itihāsaḥ sakalpaśca gautamo'tha niśākaraḥ || 48 ||
dambho hyadambho vaidambho vaśyo vaśakaraḥ kaliḥ |
lokakartā paśupatirmahākartā hyanauṣadhaḥ || 49 ||
akṣaraṃ paramaṃ brahma balavacchakra eva ca |
nītirhyanītiḥ śuddhātmā śuddho mānyo gatāgataḥ || 50 ||
bahuprasādaḥ susvapno darpaṇo'tha tvamitrajit |
vedakāro mantrakāro vidvān samaramardanaḥ || 51 ||
mahāmeghanivāsī ca mahāghoro vaśīkaraḥ |
agnijvālo mahājvālo atidhūmro huto haviḥ || 52 ||
vṛṣaṇaḥ śaṅkaro nityavarcasvī dhūmaketanaḥ |
nīlastathāṅgalubdhaśca śobhano niravagrahaḥ || 53 ||
svastidaḥ svastibhāvaśca bhāgī bhāgakaro laghuḥ |
utsaṅgaśca mahāṅgaśca mahāgarbhaparāyaṇaḥ || 54 ||
kṛṣṇavarṇaḥ suvarṇaśca indriyaṃ sarvadehinām |
mahāpādo mahāhasto mahākāyo mahāyaśāḥ || 55 ||
mahāmūrdhā mahāmātro mahānetro niśālayaḥ |
mahāntako mahākarṇo mahoṣṭhaśca mahāhanuḥ || 56 ||
mahānāso mahākamburmahāgrīvaḥ śmaśānabhāk |
mahāvakṣā mahorasko hyantarātmā mṛgālayaḥ || 57 ||
lambano lambitoṣṭhaśca mahāmāyaḥ payonidhiḥ |
mahādanto mahādaṃṣṭro mahājihvo mahāmukhaḥ || 58 ||
mahānakho mahāromā mahākeśo mahājaṭaḥ |
prasannaśca prasādaśca pratyayo girisādhanaḥ || 59 ||
snehano'snehanaścaiva ajitaśca mahāmuniḥ |
vṛkṣākāro vṛkṣaketuranalo vāyuvāhanaḥ || 60 ||
gaṇḍalī merudhāmā ca devādhipatireva ca |
atharvaśīrṣaḥ sāmāsya ṛksahasrāmitekṣaṇaḥ || 61 ||
yajuḥ pādabhujo guhyaḥ prakāśo jaṅgamastathā |
amoghārthaḥ prasādaśca abhigamyaḥ sudarśanaḥ || 62 ||
upakāraḥ priyaḥ sarvaḥ kanakaḥ kāñcanacchaviḥ |
nābhirnandikaro bhāvaḥ puṣkarasthapatiḥ sthiraḥ || 63 ||
dvādaśastrāsanaścādyo yajño yajñasamāhitaḥ |
naktaṃ kaliśca kālaśca makaraḥ kālapūjitaḥ || 64 ||
sagaṇo gaṇakāraśca bhūtavāhanasārathiḥ |
bhasmaśayo bhasmagoptā bhasmabhūtastarurgaṇaḥ || 65 ||
lokapālastathā'loko mahātmā sarvapūjitaḥ |
śuklastriśuklaḥ sampannaḥ śucirbhūtaniṣevitaḥ || 66 ||
āśramasthaḥ kriyāvastho viśvakarmamatirvaraḥ |
viśālaśākhastāmroṣṭho hyambujālaḥ suniścalaḥ || 67 ||
kapilaḥ kapiśaḥ śukla āyuścaiva paro¶ḥ |
gandharvo hyaditistārkṣyaḥ suvijñeyaḥ suśāradaḥ || 68 ||
paraśvadhāyudho devo hyanukārī subāndhavaḥ |
tumbavīṇo mahākrodha ūrdhvaretā jaleśayaḥ || 69 ||
ugro vaṃśakaro vaṃśo vaṃśanādo hyaninditaḥ |
sarvāṅgarūpo māyāvī suhṛdo hyanilo'nalaḥ || 70 ||
bandhano bandhakartā ca subandhanavimocanaḥ |
sa yajñāriḥ sa kāmārirmahādaṃṣṭro mahāyudhaḥ || 71 ||
bahudhā ninditaḥ śarvaḥ śaṅkaraḥ śaṅkaro'dhanaḥ |
amareśo mahādevo viśvadevaḥ surārihā || 72 ||
ahirbudhnyo'nilābhaśca cekitāno havistathā | [hari]
ajaikapācca kāpālī triśaṅkurajitaḥ śivaḥ || 73 ||
dhanvantarirdhūmaketuḥ skando vaiśravaṇastathā |
dhātā śakraśca viṣṇuśca mitrastvaṣṭā dhruvo dharaḥ || 74 ||
prabhāvaḥ sarvago vāyuraryamā savitā raviḥ |
uṣaṅguśca vidhātā ca māndhātā bhūtabhāvanaḥ || 75 ||
vibhurvarṇavibhāvī ca sarvakāmaguṇāvahaḥ |
padmanābho mahāgarbhaścandravaktro'nilo'nalaḥ || 76 ||
balavāṃścopaśāntaśca purāṇaḥ puṇyacañcurī |
kurukartā kuruvāsī kurubhūto guṇauṣadhaḥ || 77 ||
sarvāśayo darbhacārī sarveṣāṃ prāṇināṃ patiḥ |
devadevaḥ sukhāsaktaḥ sadasatsarvaratnavit || 78 ||
kailāsagirivāsī ca himavadgirisaṃśrayaḥ |
kūlahārī kūlakartā bahuvidyo bahupradaḥ || 79 ||
vaṇijo vardhakī vṛkṣo vakulaścandanaśchadaḥ |
sāragrīvo mahājatruralolaśca mahauṣadhaḥ || 80 ||
siddhārthakārī siddhārthaśchandovyākaraṇottaraḥ |
siṃhanādaḥ siṃhadaṃṣṭraḥ siṃhagaḥ siṃhavāhanaḥ || 81 ||
prabhāvātmā jagatkālasthālo lokahitastaruḥ |
sāraṅgo navacakrāṅgaḥ ketumālī sabhāvanaḥ || 82 ||
bhūtālayo bhūtapatirahorātramaninditaḥ || 83 ||
vāhitā sarvabhūtānāṃ nilayaśca vibhurbhavaḥ |
amoghaḥ saṃyato hyaśvo bhojanaḥ prāṇadhāraṇaḥ || 84 ||
dhṛtimān matimān dakṣaḥ satkṛtaśca yugādhipaḥ |
gopālirgopatirgrāmo gocarmavasano hariḥ || 85 ||
hiraṇyabāhuśca tathā guhāpālaḥ praveśinām |
prakṛṣṭārirmahāharṣo jitakāmo jitendriyaḥ || 86 ||
gāndhāraśca suvāsaśca tapaḥsakto ratirnaraḥ |
mahāgīto mahānṛtyo hyapsarogaṇasevitaḥ || 87 ||
mahāketurmahādhāturnaikasānucaraścalaḥ |
āvedanīya ādeśaḥ sarvagandhasukhāvahaḥ || 88 ||
toraṇastāraṇo vātaḥ paridhī patikhecaraḥ |
saṃyogo vardhano vṛddho ativṛddho guṇādhikaḥ || 89 ||
nitya ātmasahāyaśca devāsurapatiḥ patiḥ |
yuktaśca yuktabāhuśca devo divisuparvaṇaḥ || 90 ||
āṣāḍhaśca suṣāḍhaśca dhruvo'tha hariṇo haraḥ |
vapurāvartamānebhyo vasuśreṣṭho mahāpathaḥ || 91 ||
śirohārī vimarśaśca sarvalakṣaṇalakṣitaḥ |
akṣaśca rathayogī ca sarvayogī mahābalaḥ || 92 ||
samāmnāyo'samāmnāyastīrthadevo mahārathaḥ |
nirjīvo jīvano mantraḥ śubhākṣo bahukarkaśaḥ || 93 ||
ratnaprabhūto raktāṅgo mahārṇavanipānavit | [ratnāṅgo]
mūlaṃ viśālo hyamṛto vyaktāvyaktastaponidhiḥ || 94 ||
ārohaṇo'dhirohaśca śīladhārī mahāyaśāḥ |
senākalpo mahākalpo yogo yugakaro hariḥ || 95 || [yogakaro]
yugarūpo mahārūpo mahānāgahano vadhaḥ |
nyāyanirvapaṇaḥ pādaḥ paṇḍito hyacalopamaḥ || 96 ||
bahumālo mahāmālaḥ śaśī harasulocanaḥ |
vistāro lavaṇaḥ kūpastriyugaḥ saphalodayaḥ || 97 ||
trilocano viṣaṇṇāṅgo maṇividdho jaṭādharaḥ |
bindurvisargaḥ sumukhaḥ śaraḥ sarvāyudhaḥ sahaḥ || 98 ||
nivedanaḥ sukhājātaḥ sugandhāro mahādhanuḥ |
gandhapālī ca bhagavānutthānaḥ sarvakarmaṇām || 99 ||
manthāno bahulo vāyuḥ sakalaḥ sarvalocanaḥ |
talastālaḥ karasthālī ūrdhvasaṃhanano mahān || 100 ||
chatraṃ succhatro vikhyāto lokaḥ sarvāśrayaḥ kramaḥ |
muṇḍo virūpo vikṛto daṇḍī kuṇḍī vikurvaṇaḥ || 101 ||
haryakṣaḥ kakubho vajrī śatajihvaḥ sahasrapāt |
sahasramūrdhā devendraḥ sarvadevamayo guruḥ || 102 ||
sahasrabāhuḥ sarvāṅgaḥ śaraṇyaḥ sarvalokakṛt |
pavitraṃ trikakunmantraḥ kaniṣṭhaḥ kṛṣṇapiṅgalaḥ || 103 ||
brahmadaṇḍavinirmātā śataghnīpāśaśaktimān |
padmagarbho mahāgarbho brahmagarbho jalodbhavaḥ || 104 ||
gabhastirbrahmakṛdbrahmī brahmavidbrāhmaṇo gatiḥ |
anantarūpo naikātmā tigmatejāḥ svayambhuvaḥ || 105 ||
ūrdhvagātmā paśupatirvātaraṃhā manojavaḥ |
candanī padmanālāgraḥ surabhyuttaraṇo naraḥ || 106 ||
karṇikāramahāsragvī nīlamauliḥ pinākadhṛt |
umāpatirumākānto jāhnavīdhṛdumādhavaḥ || 107 ||
varo varāho varado vareṇyaḥ sumahāsvanaḥ |
mahāprasādo damanaḥ śatruhā śvetapiṅgalaḥ || 108 ||
pītātmā paramātmā ca prayatātmā pradhānadhṛt | [prītātmā]
sarvapārśvamukhastryakṣo dharmasādhāraṇo varaḥ || 109 ||
carācarātmā sūkṣmātmā amṛto govṛṣeśvaraḥ |
sādhyarṣirvasurādityo vivasvānsavitāmṛtaḥ || 110 ||
vyāsaḥ sargaḥ susaṅkṣepo vistaraḥ paryayo naraḥ |
ṛtuḥ saṃvatsaro māsaḥ pakṣaḥ saṅkhyāsamāpanaḥ || 111 ||
kalā kāṣṭhā lavā mātrā muhūrtāhaḥ kṣapāḥ kṣaṇāḥ |
viśvakṣetraṃ prajābījaṃ liṅgamādyastu nirgamaḥ || 112 ||
sadasadvyaktamavyaktaṃ pitā mātā pitāmahaḥ |
svargadvāraṃ prajādvāraṃ mokṣadvāraṃ triviṣṭapam || 113 ||
nirvāṇaṃ hlādanaścaiva brahmalokaḥ parā gatiḥ |
devāsuravinirmātā devāsuraparāyaṇaḥ || 114 ||
devāsuragururdevo devāsuranamaskṛtaḥ |
devāsuramahāmātro devāsuragaṇāśrayaḥ || 115 ||
devāsuragaṇādhyakṣo devāsuragaṇāgraṇīḥ |
devātidevo devarṣirdevāsuravarapradaḥ || 116 || [devādi]
devāsureśvaro viśvo devāsuramaheśvaraḥ |
sarvadevamayo'cintyo devatātmā''tmasambhavaḥ || 117 ||
udbhittrivikramo vaidyo virajo nīrajo'maraḥ |
īḍyo hastīśvaro vyāghro devasiṃho nararṣabhaḥ || 118 ||
vibudho'gravaraḥ sūkṣmaḥ sarvadevastapomayaḥ |
suyuktaḥ śobhano vajrī prāsānāṃ prabhavo'vyayaḥ || 119 ||
guhaḥ kānto nijaḥ sargaḥ pavitraṃ sarvapāvanaḥ |
śṛṅgī śṛṅgapriyo babhrū rājarājo nirāmayaḥ || 120 ||
abhirāmaḥ suragaṇo virāmaḥ sarvasādhanaḥ |
lalāṭākṣo viśvadevo hariṇo brahmavarcasaḥ || 121 ||
sthāvarāṇāṃ patiścaiva niyamendriyavardhanaḥ |
siddhārthaḥ siddhabhūtārtho'cintyaḥ satyavrataḥ śuciḥ || 122 ||
vratādhipaḥ paraṃ brahma bhaktānāṃ paramā gatiḥ | [bhaktānugrahakārakaḥ]
vimukto muktatejāśca śrīmān śrīvardhano jagat || 123 ||
uttarapīṭhikā (phalaśṛti)
yathā pradhānaṃ bhagavāniti bhaktyā stuto mayā |
yaṃ na brahmādayo devā vidustattvena narṣayaḥ || 1 ||
stotavyamarcyaṃ vandyaṃ ca kaḥ stoṣyati jagatpatim |
bhaktyā tvevaṃ puraskṛtya mayā yajñapatirvibhuḥ || 2 ||
tato'bhyanujñāṃ samprāpya stuto matimatāṃ varaḥ |
śivamebhiḥ stuvan devaṃ nāmabhiḥ puṣṭivardhanaiḥ || 3 ||
nityayuktaḥ śucirbhaktaḥ prāpnotyātmānamātmanā |
etaddhi paramaṃ brahma paraṃ brahmādhigacchati || 4 ||
ṛṣayaścaiva devāśca stuvantyetena tatparam |
stūyamāno mahādevastuṣyate niyatātmabhiḥ || 5 ||
bhaktānukampī bhagavānātmasaṃsthākaro vibhuḥ |
tathaiva ca manuṣyeṣu ye manuṣyāḥ pradhānataḥ || 6 ||
āstikāḥ śraddadhānāśca bahubhirjanmabhiḥ stavaiḥ |
bhaktyā hyananyamīśānaṃ paraṃ devaṃ sanātanam || 7 ||
karmaṇā manasā vācā bhāvenāmitatejasaḥ |
śayānā jāgramāṇāśca vrajannupaviśaṃstathā || 8 ||
unmiṣannimiṣaṃścaiva cintayantaḥ punaḥ punaḥ |
śṛṇvantaḥ śrāvayantaśca kathayantaśca te bhavam || 9 ||
stuvantaḥ stūyamānāśca tuṣyanti ca ramanti ca |
janmakoṭisahasreṣu nānāsaṃsārayoniṣu || 10 ||
jantorvigatapāpasya bhave bhaktiḥ prajāyate |
utpannā ca bhave bhaktirananyā sarvabhāvataḥ || 11 ||
bhāvinaḥ kāraṇe cāsya sarvayuktasya sarvathā |
etaddeveṣu duṣprāpaṃ manuṣyeṣu na labhyate || 12 ||
nirvighnā niścalā rudre bhaktiravyabhicāriṇī |
tasyaiva ca prasādena bhaktirutpadyate nṛṇām || 13 ||
yena yānti parāṃ siddhiṃ tadbhāvagatacetasaḥ |
ye sarvabhāvānugatāḥ prapadyante maheśvaram || 14 ||
prapannavatsalo devaḥ saṃsārāttānsamuddharet |
evamanye vikurvanti devāḥ saṃsāramocanam || 15 ||
manuṣyāṇāmṛte devaṃ nānyā śaktistapobalam |
iti tenendrakalpena bhagavān sadasatpatiḥ || 16 ||
kṛttivāsāḥ stutaḥ kṛṣṇa taṇḍinā śubhabuddhinā |
stavametaṃ bhagavato brahmā svayamadhārayat || 17 ||
gīyate ca sa buddhyeta brahmā śaṅkarasannidhau |
idaṃ puṇyaṃ pavitraṃ ca sarvadā pāpanāśanam || 18 ||
yogadaṃ mokṣadaṃ caiva svargadaṃ toṣadaṃ tathā |
evametatpaṭhante ya ekabhaktyā tu śaṅkaram || 19 ||
yā gatiḥ sāṅkhyayogānāṃ vrajantyetāṃ gatiṃ tadā |
stavametaṃ prayatnena sadā rudrasya sannidhau || 20 ||
abdamekaṃ caredbhaktaḥ prāpnuyādīpsitaṃ phalam |
etadrahasyaṃ paramaṃ brahmaṇo hṛdi saṃsthitam || 21 ||
brahmā provāca śakrāya śakraḥ provāca mṛtyave |
mṛtyuḥ provāca rudrebhyo rudrebhyastaṇḍimāgamat || 22 ||
mahatā tapasā prāptastaṇḍinā brahmasadmani |
taṇḍiḥ provāca śukrāya gautamāya ca bhārgavaḥ || 23 ||
vaivasvatāya manave gautamaḥ prāha mādhava |
nārāyaṇāya sādhyāya samādhiṣṭhāya dhīmate || 24 ||
yamāya prāha bhagavān sādhyo nārāyaṇo'cyutaḥ |
nāciketāya bhagavānāha vaivasvato yamaḥ || 25 ||
mārkaṇḍeyāya vārṣṇeya nāciketo'bhyabhāṣata |
mārkaṇḍeyānmayā prāpto niyamena janārdana || 26 ||
tavāpyahamamitraghna stavaṃ dadyāṃ hyaviśrutam |
svargyamārogyamāyuṣyaṃ dhanyaṃ vedena sammitam || 27 ||
nāsya vighnaṃ vikurvanti dānavā yakṣarākṣasāḥ |
piśācā yātudhānā vā guhyakā bhujagā api || 28 ||
yaḥ paṭheta śuciḥ pārtha brahmacārī jitendriyaḥ | [bhūtvā]
abhagnayogo varṣaṃ tu so'śvamedhaphalaṃ labhet || 29 ||
iti śrīmahābhārate anuśāsanaparvaṇi mahādevasahasranāma stotraṃ nāma saptadaśo'dhyāyaḥ ||
InfoLyter.in — Sacred Vedic Knowledge Portal · Free forever