Shiva Keshadi Padanta Varnana Stotram

ॐ

𑌶𑌿𑌵 𑌕𑍇𑌶𑌾𑌦𑌿 𑌪𑌾𑌦𑌾𑌨𑍍𑌤 𑌵𑌰𑍍𑌣𑌨 𑌸𑍍𑌤𑍋𑌤𑍍𑌰𑌂

Shiva Stotram Grantha

𑌦𑍇𑌯𑌾𑌸𑍁𑌰𑍍𑌮𑍂𑌰𑍍𑌧𑍍𑌨𑌿 𑌰𑌾𑌜𑌤𑍍𑌸𑌰𑌸𑌸𑍁𑌰𑌸𑌰𑌿𑌤𑍍𑌪𑌾𑌰𑌪𑌰𑍍𑌯𑌨𑍍𑌤𑌨𑌿𑌰𑍍𑌯-

-𑌤𑍍𑌪𑍍𑌰𑌾𑌂𑌶𑍁𑌸𑍍𑌤𑌮𑍍𑌬𑌾𑌃 𑌪𑌿𑌶𑌙𑍍𑌗𑌾𑌸𑍍𑌤𑍁𑌲𑌿𑌤𑌪𑌰𑌿𑌣𑌤𑌾𑌰𑌕𑍍𑌤𑌶𑌾𑌲𑍀𑌲𑌤𑌾 𑌵𑌃 ।

𑌦𑍁𑌰𑍍𑌵𑌾𑌰𑌾𑌪𑌤𑍍𑌤𑌿𑌗𑌰𑍍𑌤𑌶𑍍𑌰𑌿𑌤𑌨𑌿𑌖𑌿𑌲𑌜𑌨𑍋𑌤𑍍𑌤𑌾𑌰𑌣𑍇 𑌰𑌜𑍍𑌜𑍁𑌭𑍂𑌤𑌾

𑌘𑍋𑌰𑌾𑌘𑍋𑌰𑍍𑌵𑍀𑌰𑍁𑌹𑌾𑌲𑍀𑌦𑌹𑌨𑌶𑌿𑌖𑌿𑌶𑌿𑌖𑌾𑌃 𑌶𑌰𑍍𑌮 𑌶𑌾𑌰𑍍𑌵𑌾𑌃 𑌕𑌪𑌰𑍍𑌦𑌾𑌃 ॥ 1 ॥

𑌕𑍁𑌰𑍍𑌵𑌨𑍍𑌨𑌿𑌰𑍍𑌵𑌾𑌣𑌮𑌾𑌰𑍍𑌗𑌪𑍍𑌰𑌗𑌮𑌪𑌰𑌿𑌲𑌸𑌦𑍍𑌰𑍂𑌪𑍍𑌯𑌸𑍋𑌪𑌾𑌨𑌶𑌙𑍍𑌕𑌾𑌂

𑌶𑌕𑍍𑌰𑌾𑌰𑍀𑌣𑌾𑌂 𑌪𑍁𑌰𑌾𑌣𑌾𑌂 𑌤𑍍𑌰𑌯𑌵𑌿𑌜𑌯𑌕𑍃𑌤𑌸𑍍𑌪𑌷𑍍𑌟𑌰𑍇𑌖𑌾𑌯𑌮𑌾𑌣𑌮𑍍 ।

𑌅𑌵𑍍𑌯𑌾𑌦𑌵𑍍𑌯𑌾𑌜𑌮𑍁𑌚𑍍𑌚𑍈𑌰𑌲𑌿𑌕𑌹𑌿𑌮𑌧𑌰𑌾𑌧𑌿𑌤𑍍𑌯𑌕𑌾𑌨𑍍𑌤𑌸𑍍𑌤𑍍𑌰𑌿𑌧𑍋𑌦𑍍𑌯-

-𑌜𑍍𑌜𑌾𑌹𑍍𑌨𑌵𑍍𑌯𑌾𑌭𑌂 𑌮𑍃𑌡𑌾𑌨𑍀𑌕𑌮𑌿𑌤𑍁𑌰𑍁𑌡𑍁𑌪𑌰𑍁𑌕𑍍𑌪𑌾𑌣𑍍𑌡𑌰𑌂 𑌵𑌸𑍍𑌤𑍍𑌰𑌿𑌪𑍁𑌣𑍍𑌡𑍍𑌰𑌮𑍍 ॥ 2 ॥

𑌕𑍍𑌰𑍁𑌧𑍍𑌯𑌦𑍍𑌗𑍗𑌰𑍀𑌪𑍍𑌰𑌸𑌾𑌦𑌾𑌨𑌤𑌿𑌸𑌮𑌯𑌪𑌦𑌾𑌙𑍍𑌗𑍁𑌷𑍍𑌠𑌸𑌙𑍍𑌕𑍍𑌰𑌾𑌨𑍍𑌤𑌲𑌾𑌕𑍍𑌷𑌾-

-𑌬𑌿𑌨𑍍𑌦𑍁𑌸𑍍𑌪𑌰𑍍𑌧𑌿 𑌸𑍍𑌮𑌰𑌾𑌰𑍇𑌃 𑌸𑍍𑌫𑌟𑌿𑌕𑌮𑌣𑌿𑌦𑍃𑌷𑌨𑍍𑌮𑌗𑍍𑌨𑌮𑌾𑌣𑌿𑌕𑍍𑌯𑌶𑍋𑌭𑌮𑍍 ।

𑌮𑍂𑌰𑍍𑌧𑍍𑌨𑍍𑌯𑍁𑌦𑍍𑌯𑌦𑍍𑌦𑌿𑌵𑍍𑌯𑌸𑌿𑌨𑍍𑌧𑍋𑌃 𑌪𑌤𑌿𑌤𑌶𑌫𑌰𑌿𑌕𑌾𑌕𑌾𑌰𑌿 𑌵𑍋 𑌮𑌸𑍍𑌤𑌕𑌂 𑌸𑍍𑌤𑌾-

-𑌦𑌸𑍍𑌤𑍋𑌕𑌾𑌪𑌤𑍍𑌤𑌿𑌕𑍃𑌤𑍍𑌯𑍈 𑌹𑍁𑌤𑌵𑌹𑌕𑌣𑌿𑌕𑌾𑌮𑍋𑌕𑍍𑌷𑌰𑍂𑌕𑍍𑌷𑌂 𑌸𑌦𑌾𑌕𑍍𑌷𑌿 ॥ 3 ॥

𑌭𑍂𑌤𑍍𑌯𑍈 𑌦𑍃𑌗𑍍𑌭𑍂𑌤𑌯𑍋𑌃 𑌸𑍍𑌯𑌾𑌦𑍍𑌯𑌦𑌹𑌿𑌮𑌹𑌿𑌮𑌰𑍁𑌗𑍍𑌬𑌿𑌮𑍍𑌬𑌯𑍋𑌃 𑌸𑍍𑌨𑌿𑌗𑍍𑌧𑌵𑌰𑍍𑌣𑍋

𑌦𑍈𑌤𑍍𑌯𑍗𑌘𑌧𑍍𑌵𑌂𑌸𑌶𑌂𑌸𑍀 𑌸𑍍𑌫𑍁𑌟 𑌇𑌵 𑌪𑌰𑌿𑌵𑍇𑌷𑌾𑌵𑌶𑍇𑌷𑍋 𑌵𑌿𑌭𑌾𑌤𑌿 ।

𑌸𑌰𑍍𑌗𑌸𑍍𑌥𑌿𑌤𑍍𑌯𑌨𑍍𑌤𑌵𑍃𑌤𑍍𑌤𑌿𑌰𑍍𑌮𑌯𑌿 𑌸𑌮𑍁𑌪𑌗𑌤𑍇𑌤𑍀𑌵 𑌨𑌿𑌰𑍍𑌵𑍃𑌤𑍍𑌤𑌗𑌰𑍍𑌵𑌂

𑌶𑌰𑍍𑌵𑌾𑌣𑍀𑌭𑌰𑍍𑌤𑍁𑌰𑍁𑌚𑍍𑌚𑍈𑌰𑍍𑌯𑍁𑌗𑌲𑌮𑌥 𑌦𑌧𑌦𑍍𑌵𑌿𑌭𑍍𑌰𑌮𑌂 𑌤𑌦𑍍𑌭𑍍𑌰𑍁𑌵𑍋𑌰𑍍𑌵𑌃 ॥ 4 ॥

𑌯𑍁𑌗𑍍𑌮𑍇 𑌰𑍁𑌕𑍍𑌮𑌾𑌬𑍍𑌜𑌪𑌿𑌙𑍍𑌗𑍇 𑌗𑍍𑌰𑌹 𑌇𑌵 𑌪𑌿𑌹𑌿𑌤𑍇 𑌦𑍍𑌰𑌾𑌗𑍍𑌯𑌯𑍋𑌃 𑌪𑍍𑌰𑌾𑌗𑍍𑌦𑍁𑌹𑌿𑌤𑍍𑌰𑌾

𑌶𑍈𑌲𑌸𑍍𑌯 𑌧𑍍𑌵𑌾𑌨𑍍𑌤𑌨𑍀𑌲𑌾𑌮𑍍𑌬𑌰𑌰𑌚𑌿𑌤𑌬𑍃𑌹𑌤𑍍𑌕𑌞𑍍𑌚𑍁𑌕𑍋𑌽𑌭𑍂𑌤𑍍𑌪𑍍𑌰𑌪𑌞𑍍𑌚𑌃 ।

𑌤𑍇 𑌤𑍍𑌰𑍈𑌨𑍇𑌤𑍍𑌰𑍇 𑌪𑌵𑌿𑌤𑍍𑌰𑍇 𑌤𑍍𑌰𑌿𑌦𑌶𑌵𑌰𑌘𑌟𑌾𑌮𑌿𑌤𑍍𑌰𑌜𑍈𑌤𑍍𑌰𑍋𑌗𑍍𑌰𑌶𑌸𑍍𑌤𑍍𑌰𑍇

𑌨𑍇𑌤𑍍𑌰𑍇 𑌨𑍇𑌤𑍍𑌰𑍇 𑌭𑌵𑍇𑌤𑌾𑌂 𑌦𑍍𑌰𑍁𑌤𑌮𑌿𑌹 𑌭𑌵𑌤𑌾𑌮𑌿𑌨𑍍𑌦𑍍𑌰𑌿𑌯𑌾𑌶𑍍𑌵𑌾𑌨𑍍𑌵𑌿𑌯𑌨𑍍𑌤𑍁𑌮𑍍 ॥ 5 ॥

𑌚𑌣𑍍𑌡𑍀𑌵𑌕𑍍𑌤𑍍𑌰𑌾𑌰𑍍𑌪𑌣𑍇𑌚𑍍𑌛𑍋𑌸𑍍𑌤𑌦𑌨𑍁 𑌭𑌗𑌵𑌤𑌃 𑌪𑌾𑌣𑍍𑌡𑍁𑌰𑍁𑌕𑍍𑌪𑌾𑌣𑍍𑌡𑍁𑌗𑌣𑍍𑌡-

-𑌪𑍍𑌰𑍋𑌦𑍍𑌯𑌤𑍍𑌕𑌣𑍍𑌡𑍂𑌂 𑌵𑌿𑌨𑍇𑌤𑍁𑌂 𑌵𑌿𑌤𑌨𑍁𑌤 𑌇𑌵 𑌯𑍇 𑌰𑌤𑍍𑌨𑌕𑍋𑌣𑍈𑌰𑍍𑌵𑌿𑌘𑍃𑌷𑍍𑌟𑌿𑌮𑍍 ।

𑌚𑌣𑍍𑌡𑌾𑌰𑍍𑌚𑌿𑌰𑍍𑌮𑌣𑍍𑌡𑌲𑌾𑌭𑍇 𑌸𑌤𑌤𑌨𑌤𑌜𑌨𑌧𑍍𑌵𑌾𑌨𑍍𑌤𑌖𑌣𑍍𑌡𑌾𑌤𑌿𑌶𑍗𑌣𑍍𑌡𑍇

𑌚𑌾𑌣𑍍𑌡𑍀𑌶𑍇 𑌤𑍇 𑌶𑍍𑌰𑌿𑌯𑍇𑌸𑍍𑌤𑌾𑌮𑌧𑌿𑌕𑌮𑌵𑌨𑌤𑌾𑌖𑌣𑍍𑌡𑌲𑍇 𑌕𑍁𑌣𑍍𑌡𑌲𑍇 𑌵𑌃 ॥ 6 ॥

𑌖𑌟𑍍𑌵𑌾𑌙𑍍𑌗𑍋𑌦𑌗𑍍𑌰𑌪𑌾𑌣𑍇𑌃 𑌸𑍍𑌫𑍁𑌟𑌵𑌿𑌕𑌟𑌪𑍁𑌟𑍋 𑌵𑌕𑍍𑌤𑍍𑌰𑌰𑌨𑍍𑌧𑍍𑌰𑌪𑍍𑌰𑌵𑍇𑌶-

-𑌪𑍍𑌰𑍇𑌪𑍍𑌸𑍂𑌦𑌞𑍍𑌚𑌤𑍍𑌫𑌣𑍋𑌰𑍁𑌶𑍍𑌵𑌸𑌦𑌤𑌿𑌧𑌵𑌲𑌾𑌹𑍀𑌨𑍍𑌦𑍍𑌰𑌶𑌙𑍍𑌕𑌾𑌂 𑌦𑌧𑌾𑌨𑌃 ।

𑌯𑍁𑌷𑍍𑌮𑌾𑌕𑌂 𑌕𑍍𑌰𑌮𑌵𑌕𑍍𑌤𑍍𑌰𑌾𑌮𑍍𑌬𑍁𑌰𑍁𑌹𑌪𑌰𑌿𑌲𑌸𑌤𑍍𑌕𑌰𑍍𑌣𑌿𑌕𑌾𑌕𑌾𑌰𑌶𑍋𑌭𑌃

𑌶𑌶𑍍𑌵𑌤𑍍𑌤𑍍𑌰𑌾𑌣𑌾𑌯 𑌭𑍂𑌯𑌾𑌦𑌲𑌮𑌤𑌿𑌵𑌿𑌮𑌲𑍋𑌤𑍍𑌤𑍁𑌙𑍍𑌗𑌕𑍋𑌣𑌃 𑌸 𑌘𑍋𑌣𑌃 ॥ 7 ॥

𑌕𑍍𑌰𑍁𑌧𑍍𑌯𑌤𑍍𑌯𑌦𑍍𑌧𑌾 𑌯𑌯𑍋𑌃 𑌸𑍍𑌵𑌾𑌂 𑌤𑌨𑍁𑌮𑌤𑌿𑌲𑌸𑌤𑍋𑌰𑍍𑌬𑌿𑌮𑍍𑌬𑌿𑌤𑌾𑌂 𑌲𑌕𑍍𑌷𑌯𑌨𑍍𑌤𑍀

𑌭𑌰𑍍𑌤𑍍𑌰𑍇 𑌸𑍍𑌪𑌰𑍍𑌧𑌾𑌤𑌿𑌨𑌿𑌘𑍍𑌨𑌾 𑌮𑍁𑌹𑍁𑌰𑌿𑌤𑌰𑌵𑌧𑍂𑌶𑌙𑍍𑌕𑌯𑌾 𑌶𑍈𑌲𑌕𑌨𑍍𑌯𑌾 ।

𑌯𑍁𑌷𑍍𑌮𑌾𑌂𑌸𑍍𑌤𑍗 𑌶𑌶𑍍𑌵𑌦𑍁𑌚𑍍𑌚𑍈𑌰𑌬𑌹𑍁𑌲𑌦𑌶𑌮𑍀𑌶𑌰𑍍𑌵𑌰𑍀𑌶𑌾𑌤𑌿𑌶𑍁𑌭𑍍𑌰𑌾-

-𑌵𑌵𑍍𑌯𑌾𑌸𑍍𑌤𑌾𑌂 𑌦𑌿𑌵𑍍𑌯𑌸𑌿𑌨𑍍𑌧𑍋𑌃 𑌕𑌮𑌿𑌤𑍁𑌰𑌵𑌨𑌮𑌲𑍍𑌲𑍋𑌕𑌪𑌾𑌲𑍗 𑌕𑌪𑍋𑌲𑍗 ॥ 8 ॥

𑌯𑍋 𑌭𑌾𑌸𑌾 𑌭𑌾𑌤𑍍𑌯𑍁𑌪𑌾𑌨𑍍𑌤𑌸𑍍𑌥𑌿𑌤 𑌇𑌵 𑌨𑌿𑌭𑍃𑌤𑌂 𑌕𑍗𑌸𑍍𑌤𑍁𑌭𑍋 𑌦𑍍𑌰𑌷𑍍𑌟𑍁𑌮𑌿𑌚𑍍𑌛-

-𑌨𑍍𑌸𑍋𑌤𑍍𑌥𑌸𑍍𑌨𑍇𑌹𑌾𑌨𑍍𑌨𑌿𑌤𑌾𑌨𑍍𑌤𑌂 𑌗𑌲𑌗𑌤𑌗𑌰𑌲𑌂 𑌪𑌤𑍍𑌯𑍁𑌰𑍁𑌚𑍍𑌚𑍈𑌃 𑌪𑌶𑍂𑌨𑌾𑌮𑍍 ।

𑌪𑍍𑌰𑍋𑌦𑍍𑌯𑌤𑍍𑌪𑍍𑌰𑍇𑌮𑍍𑌣𑌾 𑌯𑌮𑌾𑌰𑍍𑌦𑍍𑌰𑌾 𑌪𑌿𑌬𑌤𑌿 𑌗𑌿𑌰𑌿𑌸𑍁𑌤𑌾 𑌸𑌮𑍍𑌪𑌦𑌃 𑌸𑌾𑌤𑌿𑌰𑍇𑌕𑌾

𑌲𑍋𑌕𑌾𑌃 𑌶𑍋𑌣𑍀𑌕𑍃𑌤𑌾𑌨𑍍𑌤𑌾 𑌯𑌦𑌧𑌰𑌮𑌹𑌸𑌾 𑌸𑍋𑌽𑌧𑌰𑍋 𑌵𑍋 𑌵𑌿𑌧𑌤𑍍𑌤𑌾𑌮𑍍 ॥ 9 ॥

𑌅𑌤𑍍𑌯𑌰𑍍𑌥𑌂 𑌰𑌾𑌜𑌤𑍇 𑌯𑌾 𑌵𑌦𑌨𑌶𑌶𑌧𑌰𑌾𑌦𑍁𑌦𑍍𑌗𑌲𑌚𑍍𑌚𑌾𑌰𑍁𑌵𑌾𑌣𑍀-

-𑌪𑍀𑌯𑍂𑌷𑌾𑌮𑍍𑌭𑌃𑌪𑍍𑌰𑌵𑌾𑌹𑌪𑍍𑌰𑌸𑌰𑌪𑌰𑌿𑌲𑌸𑌤𑍍𑌫𑍇𑌨𑌬𑌿𑌨𑍍𑌦𑍍𑌵𑌾𑌵𑌲𑍀𑌵 ।

𑌦𑍇𑌯𑌾𑌤𑍍𑌸𑌾 𑌦𑌨𑍍𑌤𑌪𑌙𑍍𑌕𑍍𑌤𑌿𑌶𑍍𑌚𑌿𑌰𑌮𑌿𑌹 𑌦𑌨𑍁𑌦𑌾𑌯𑌾𑌦𑌦𑍗𑌵𑌾𑌰𑌿𑌕𑌸𑍍𑌯

𑌦𑍍𑌯𑍁𑌤𑍍𑌯𑌾 𑌦𑍀𑌪𑍍𑌤𑍇𑌨𑍍𑌦𑍁𑌕𑍁𑌨𑍍𑌦𑌚𑍍𑌛𑌵𑌿𑌰𑌮𑌲𑌤𑌰𑌪𑍍𑌰𑍋𑌨𑍍𑌨𑌤𑌾𑌗𑍍𑌰𑌾 𑌮𑍁𑌦𑌂 𑌵𑌃 ॥ 10 ॥

𑌨𑍍𑌯𑌕𑍍𑌕𑍁𑌰𑍍𑌵𑌨𑍍𑌨𑍁𑌰𑍍𑌵𑌰𑌾𑌭𑍃𑌨𑍍𑌨𑌿𑌭𑌘𑌨𑌸𑌮𑌯𑍋𑌦𑍍𑌧𑍁𑌷𑍍𑌟𑌮𑍇𑌘𑍗𑌘𑌘𑍋𑌷𑌂

𑌸𑍍𑌫𑍂𑌰𑍍𑌜𑌦𑍍𑌵𑌾𑌰𑍍𑌧𑍍𑌯𑍁𑌤𑍍𑌥𑌿𑌤𑍋𑌰𑍁𑌧𑍍𑌵𑌨𑌿𑌤𑌮𑌪𑌿 𑌪𑌰𑌬𑍍𑌰𑌹𑍍𑌮𑌭𑍂𑌤𑍋 𑌗𑌭𑍀𑌰𑌃 ।

𑌸𑍁𑌵𑍍𑌯𑌕𑍍𑌤𑍋 𑌵𑍍𑌯𑌕𑍍𑌤𑌮𑍂𑌰𑍍𑌤𑍇𑌃 𑌪𑍍𑌰𑌕𑌟𑌿𑌤𑌕𑌰𑌣𑌃 𑌪𑍍𑌰𑌾𑌣𑌨𑌾𑌥𑌸𑍍𑌯 𑌸𑌤𑍍𑌯𑌾𑌃

𑌪𑍍𑌰𑍀𑌤𑍍𑌯𑌾 𑌵𑌃 𑌸𑌂𑌵𑌿𑌦𑌧𑍍𑌯𑌾𑌤𑍍𑌫𑌲𑌵𑌿𑌕𑌲𑌮𑌲𑌂 𑌜𑌨𑍍𑌮 𑌨𑌾𑌦𑌃 𑌸 𑌨𑌾𑌦𑌃 ॥ 11 ॥

𑌭𑌾𑌸𑌾 𑌯𑌸𑍍𑌯 𑌤𑍍𑌰𑌿𑌲𑍋𑌕𑍀 𑌲𑌸𑌤𑌿 𑌪𑌰𑌿𑌲𑌸𑌤𑍍𑌫𑍇𑌨𑌬𑌿𑌨𑍍𑌦𑍍𑌵𑌰𑍍𑌣𑌵𑌾𑌨𑍍𑌤-

-𑌰𑍍𑌵𑍍𑌯𑌾𑌮𑌗𑍍𑌨𑍇𑌵𑌾𑌤𑌿𑌗𑍗𑌰𑌸𑍍𑌤𑍁𑌲𑌿𑌤𑌸𑍁𑌰𑌸𑌰𑌿𑌦𑍍𑌵𑌾𑌰𑌿𑌪𑍂𑌰𑌪𑍍𑌰𑌸𑌾𑌰𑌃 ।

𑌪𑍀𑌨𑌾𑌤𑍍𑌮𑌾 𑌦𑌨𑍍𑌤𑌭𑌾𑌭𑌿𑌰𑍍𑌭𑍃𑌶𑌮𑌹𑌹𑌹𑌕𑌾𑌰𑌾𑌤𑌿𑌭𑍀𑌮𑌃 𑌸𑌦𑍇𑌷𑍍𑌟𑌾𑌂

𑌪𑍁𑌷𑍍𑌟𑌾𑌂 𑌤𑍁𑌷𑍍𑌟𑌿𑌂 𑌕𑍃𑌷𑍀𑌷𑍍𑌟 𑌸𑍍𑌫𑍁𑌟𑌮𑌿𑌹 𑌭𑌵𑌤𑌾𑌮𑌟𑍍𑌟𑌹𑌾𑌸𑍋𑌽𑌷𑍍𑌟𑌮𑍂𑌰𑍍𑌤𑍇𑌃 ॥ 12 ॥

𑌸𑌦𑍍𑌯𑍋𑌜𑌾𑌤𑌾𑌖𑍍𑌯𑌮𑌾𑌪𑍍𑌯𑌂 𑌯𑌦𑍁𑌵𑌿𑌮𑌲𑌮𑍁𑌦𑌗𑍍𑌵𑌰𑍍𑌤𑌿 𑌯𑌦𑍍𑌵𑌾𑌮𑌦𑍇𑌵𑌂

𑌨𑌾𑌮𑍍𑌨𑌾 𑌹𑍇𑌮𑍍𑌨𑌾 𑌸𑌦𑍃𑌕𑍍𑌷𑌂 𑌜𑌲𑌦𑌨𑌿𑌭𑌮𑌘𑍋𑌰𑌾𑌹𑍍𑌵𑌯𑌂 𑌦𑌕𑍍𑌷𑌿𑌣𑌂 𑌯𑌤𑍍 ।

𑌯𑌦𑍍𑌬𑌾𑌲𑌾𑌰𑍍𑌕𑌪𑍍𑌰𑌭𑌂 𑌤𑌤𑍍𑌪𑍁𑌰𑍁𑌷𑌨𑌿𑌗𑌦𑌿𑌤𑌂 𑌪𑍂𑌰𑍍𑌵𑌮𑍀𑌶𑌾𑌨𑌸𑌞𑍍𑌜𑍍𑌞𑌂

𑌯𑌦𑍍𑌦𑌿𑌵𑍍𑌯𑌂 𑌤𑌾𑌨𑌿 𑌶𑌮𑍍𑌭𑍋𑌰𑍍𑌭𑌵𑌦𑌭𑌿𑌲𑌷𑌿𑌤𑌂 𑌪𑌞𑍍𑌚 𑌦𑌦𑍍𑌯𑍁𑌰𑍍𑌮𑍁𑌖𑌾𑌨𑌿 ॥ 13 ॥

𑌆𑌤𑍍𑌮𑌪𑍍𑌰𑍇𑌮𑍍𑌣𑍋 𑌭𑌵𑌾𑌨𑍍𑌯𑌾 𑌸𑍍𑌵𑌯𑌮𑌿𑌵 𑌰𑌚𑌿𑌤𑌾𑌃 𑌸𑌾𑌦𑌰𑌂 𑌸𑌾𑌂𑌵𑌨𑌨𑍍𑌯𑌾

𑌮𑌷𑍍𑌯𑌾 𑌤𑌿𑌸𑍍𑌰𑌃𑌸𑍁𑌨𑍀𑌲𑌾𑌞𑍍𑌜𑌨𑌨𑌿𑌭𑌗𑌰𑌰𑍇𑌖𑌾𑌃 𑌸𑌮𑌾𑌭𑌾𑌨𑍍𑌤𑌿 𑌯𑌸𑍍𑌯𑌾𑌮𑍍 ।

𑌅𑌕𑌲𑍍𑌪𑌾𑌨𑌲𑍍𑌪𑌭𑌾𑌸𑌾 𑌭𑍃𑌶𑌰𑍁𑌚𑌿𑌰𑌤𑌰𑌾 𑌕𑌮𑍍𑌬𑍁𑌕𑌲𑍍𑌪𑌾𑌮𑍍𑌬𑌿𑌕𑌾𑌯𑌾𑌃

𑌪𑌤𑍍𑌯𑍁𑌃 𑌸𑌾𑌤𑍍𑌯𑌨𑍍𑌤𑌮𑌨𑍍𑌤𑌰𑍍𑌵𑌿𑌲𑌸𑌤𑍁 𑌸𑌤𑌤𑌂 𑌮𑌨𑍍𑌥𑌰𑌾 𑌕𑌨𑍍𑌧𑌰𑌾 𑌵𑌃 ॥ 14 ॥

𑌵𑌕𑍍𑌤𑍍𑌰𑍇𑌨𑍍𑌦𑍋𑌰𑍍𑌦𑌨𑍍𑌤𑌲𑌕𑍍𑌷𑍍𑌮𑍍𑌯𑌾𑌶𑍍𑌚𑌿𑌰𑌮𑌧𑌰𑌮𑌹𑌾𑌕𑍗𑌸𑍍𑌤𑍁𑌭𑌸𑍍𑌯𑌾𑌪𑍍𑌯𑍁𑌪𑌾𑌨𑍍𑌤𑍇

𑌸𑍋𑌤𑍍𑌥𑌾𑌨𑌾𑌂 𑌪𑍍𑌰𑌾𑌰𑍍𑌥𑌯𑌨𑍍𑌯𑌃 𑌸𑍍𑌥𑌿𑌤𑌿𑌮𑌚𑌲𑌭𑍁𑌵𑍇 𑌵𑌾𑌰𑌯𑌨𑍍𑌤𑍍𑌯𑍈 𑌨𑌿𑌵𑍇𑌶𑌮𑍍 ।

𑌪𑍍𑌰𑌾𑌯𑍁𑌙𑍍𑌕𑍍𑌤𑍇𑌵𑌾𑌶𑌿𑌷𑍋 𑌯𑌃 𑌪𑍍𑌰𑌤𑌿𑌪𑌦𑌮𑌮𑍃𑌤𑌤𑍍𑌵𑍇 𑌸𑍍𑌥𑌿𑌤𑌃 𑌕𑌾𑌲𑌶𑌤𑍍𑌰𑍋𑌃

𑌕𑌾𑌲𑌂 𑌕𑍁𑌰𑍍𑌵𑌨𑍍𑌗𑌲𑌂 𑌵𑍋 𑌹𑍃𑌦𑌯𑌮𑌯𑌮𑌲𑌂 𑌕𑍍𑌷𑌾𑌲𑌯𑍇𑌤𑍍𑌕𑌾𑌲𑌕𑍂𑌟𑌃 ॥ 15 ॥

𑌪𑍍𑌰𑍗𑌢𑌪𑍍𑌰𑍇𑌮𑌾𑌕𑍁𑌲𑌾𑌯𑌾 𑌦𑍃𑌢𑌤𑌰𑌪𑌰𑌿𑌰𑌮𑍍𑌭𑍇𑌷𑍁 𑌪𑌰𑍍𑌵𑍇𑌨𑍍𑌦𑍁𑌮𑍁𑌖𑍍𑌯𑌾𑌃

𑌪𑌾𑌰𑍍𑌵𑌤𑍍𑌯𑌾𑌶𑍍𑌚𑌾𑌰𑍁𑌚𑌾𑌮𑍀𑌕𑌰𑌵𑌲𑌯𑌪𑌦𑍈𑌰𑌙𑍍𑌕𑌿𑌤𑌂 𑌕𑌾𑌨𑍍𑌤𑌿𑌶𑌾𑌲𑌿 ।

𑌰𑌙𑍍𑌗𑌨𑍍𑌨𑌾𑌗𑌾𑌙𑍍𑌗𑌦𑌾𑌢𑍍𑌯𑌂 𑌸𑌤𑌤𑌮𑌵𑌿𑌹𑌿𑌤𑌂 𑌕𑌰𑍍𑌮 𑌨𑌿𑌰𑍍𑌮𑍂𑌲𑌯𑍇𑌤𑍍𑌤-

-𑌦𑍍𑌦𑍋𑌰𑍍𑌮𑍂𑌲𑌂 𑌨𑌿𑌰𑍍𑌮𑌲𑌂 𑌯𑌦𑍍𑌧𑍃𑌦𑌿 𑌦𑍁𑌰𑌿𑌤𑌮𑌪𑌾𑌸𑍍𑌯𑌾𑌰𑍍𑌜𑌿𑌤𑌂 𑌧𑍂𑌰𑍍𑌜𑌟𑍇𑌰𑍍𑌵𑌃 ॥ 16 ॥

𑌕𑌣𑍍𑌠𑌾𑌶𑍍𑌲𑍇𑌷𑌾𑌰𑍍𑌥𑌮𑌾𑌪𑍍𑌤𑌾 𑌦𑌿𑌵 𑌇𑌵 𑌕𑌮𑌿𑌤𑍁𑌃 𑌸𑍍𑌵𑌰𑍍𑌗𑌸𑌿𑌨𑍍𑌧𑍋𑌃 𑌪𑍍𑌰𑌵𑌾𑌹𑌾𑌃

𑌕𑍍𑌰𑌾𑌨𑍍𑌤𑍍𑌯𑍈 𑌸𑌂𑌸𑌾𑌰𑌸𑌿𑌨𑍍𑌧𑍋𑌃 𑌸𑍍𑌫𑌟𑌿𑌕𑌮𑌣𑌿𑌮𑌹𑌾𑌸𑌙𑍍𑌕𑍍𑌰𑌮𑌾𑌕𑌾𑌰𑌦𑍀𑌰𑍍𑌘𑌾𑌃 ।

𑌤𑌿𑌰𑍍𑌯𑌗𑍍𑌵𑌿𑌷𑍍𑌕𑌮𑍍𑌭𑌭𑍂𑌤𑌾𑌸𑍍𑌤𑍍𑌰𑌿𑌭𑍁𑌵𑌨𑌵𑌸𑌤𑍇𑌰𑍍𑌭𑌿𑌨𑍍𑌨𑌦𑍈𑌤𑍍𑌯𑍇𑌭𑌦𑍇𑌹𑌾

𑌬𑌾𑌹𑌾 𑌵𑌸𑍍𑌤𑌾 𑌹𑌰𑌸𑍍𑌯 𑌦𑍍𑌰𑍁𑌤𑌮𑌿𑌹 𑌨𑌿𑌵𑌹𑌾𑌨𑌂𑌹𑌸𑌾𑌂 𑌸𑌂𑌹𑌰𑌨𑍍𑌤𑍁 ॥ 17 ॥

𑌵𑌕𑍍𑌷𑍋 𑌦𑌕𑍍𑌷𑌦𑍍𑌵𑌿𑌷𑍋𑌽𑌲𑌂 𑌸𑍍𑌮𑌰𑌭𑌰𑌵𑌿𑌨𑌮𑌦𑍍𑌦𑌕𑍍𑌷𑌜𑌾𑌕𑍍𑌷𑍀𑌣𑌵𑌕𑍍𑌷𑍋-

-𑌜𑌾𑌨𑍍𑌤𑌰𑍍𑌨𑌿𑌕𑍍𑌷𑌿𑌪𑍍𑌤𑌶𑍁𑌮𑍍𑌭𑌨𑍍𑌮𑌲𑌯𑌜𑌮𑌿𑌲𑌿𑌤𑍋𑌦𑍍𑌭𑌾𑌸𑌿 𑌭𑌸𑍍𑌮𑍋𑌕𑍍𑌷𑌿𑌤𑌂 𑌯𑌤𑍍 ।

𑌕𑍍𑌷𑌿𑌪𑍍𑌰𑌂 𑌤𑌦𑍍𑌰𑍂𑌕𑍍𑌷𑌚𑌕𑍍𑌷𑍁𑌃 𑌶𑍍𑌰𑍁𑌤𑌿𑌗𑌣𑌫𑌣𑌰𑌤𑍍𑌨𑍗𑌘𑌭𑌾𑌭𑍀𑌕𑍍𑌷𑍍𑌣𑌶𑍋𑌭𑌂

𑌯𑍁𑌷𑍍𑌮𑌾𑌕𑌂 𑌶𑌶𑍍𑌵𑌦𑍇𑌨𑌃 𑌸𑍍𑌫𑌟𑌿𑌕𑌮𑌣𑌿𑌶𑌿𑌲𑌾𑌮𑌣𑍍𑌡𑌲𑌾𑌭𑌂 𑌕𑍍𑌷𑌿𑌣𑍋𑌤𑍁 ॥ 18 ॥

𑌮𑍁𑌕𑍍𑌤𑌾𑌮𑍁𑌕𑍍𑌤𑍇 𑌵𑌿𑌚𑌿𑌤𑍍𑌰𑌾𑌕𑍁𑌲𑌵𑌲𑌿𑌲𑌹𑌰𑍀𑌜𑌾𑌲𑌶𑌾𑌲𑌿𑌨𑍍𑌯𑌵𑌾𑌞𑍍𑌚-

-𑌨𑍍𑌨𑌾𑌭𑍍𑌯𑌾𑌵𑌰𑍍𑌤𑍇 𑌵𑌿𑌲𑍋𑌲𑌦𑍍𑌭𑍁𑌜𑌗𑌵𑌰𑌯𑍁𑌤𑍇 𑌕𑌾𑌲𑌶𑌤𑍍𑌰𑍋𑌰𑍍𑌵𑌿𑌶𑌾𑌲𑍇 ।

𑌯𑍁𑌷𑍍𑌮𑌚𑍍𑌚𑌿𑌤𑍍𑌤𑌤𑍍𑌰𑌿𑌧𑌾𑌮𑌾 𑌪𑍍𑌰𑌤𑌿𑌨𑌵𑌰𑍁𑌚𑌿𑌰𑍇 𑌮𑌨𑍍𑌦𑌿𑌰𑍇 𑌕𑌾𑌨𑍍𑌤𑌿𑌲𑌕𑍍𑌷𑍍𑌮𑍍𑌯𑌾𑌃

𑌶𑍇𑌤𑌾𑌂 𑌶𑍀𑌤𑌾𑌂𑌶𑍁𑌗𑍗𑌰𑍇 𑌚𑌿𑌰𑌤𑌰𑌮𑍁𑌦𑌰𑌕𑍍𑌷𑍀𑌰𑌸𑌿𑌨𑍍𑌧𑍗 𑌸𑌲𑍀𑌲𑌮𑍍 ॥ 19 ॥

𑌵𑍈𑌯𑌾𑌘𑍍𑌰𑍀 𑌯𑌤𑍍𑌰 𑌕𑍃𑌤𑍍𑌤𑌿𑌃 𑌸𑍍𑌫𑍁𑌰𑌤𑌿 𑌹𑌿𑌮𑌗𑌿𑌰𑍇𑌰𑍍𑌵𑌿𑌸𑍍𑌤𑍃𑌤𑍋𑌪𑌤𑍍𑌯𑌕𑌾𑌨𑍍𑌤𑌃

𑌸𑌾𑌨𑍍𑌦𑍍𑌰𑌾𑌵𑌶𑍍𑌯𑌾𑌯𑌮𑌿𑌶𑍍𑌰𑌾 𑌪𑌰𑌿𑌤 𑌇𑌵 𑌵𑍃𑌤𑌾 𑌨𑍀𑌲𑌜𑍀𑌮𑍂𑌤𑌮𑌾𑌲𑌾 ।

𑌆𑌬𑌦𑍍𑌧𑌾𑌹𑍀𑌨𑍍𑌦𑍍𑌰𑌕𑌾𑌞𑍍𑌚𑍀𑌗𑍁𑌣𑌮𑌤𑌿𑌪𑍃𑌥𑍁𑌲𑌂 𑌶𑍈𑌲𑌜𑌾𑌕𑍍𑌰𑍀𑌡𑌭𑍂𑌮𑌿-

-𑌸𑍍𑌤𑌦𑍍𑌵𑍋 𑌨𑌿𑌃𑌶𑍍𑌰𑍇𑌯𑌸𑍇 𑌸𑍍𑌯𑌾𑌜𑍍𑌜𑌘𑌨𑌮𑌤𑌿𑌘𑌨𑌂 𑌬𑌾𑌲𑌶𑍀𑌤𑌾𑌂𑌶𑍁𑌮𑍗𑌲𑍇𑌃 ॥ 20 ॥

𑌪𑍁𑌷𑍍𑌟𑌾𑌵𑌷𑍍𑌟𑌮𑍍𑌭𑌭𑍂𑌤𑍗 𑌪𑍃𑌥𑍁𑌤𑌰𑌜𑌘𑌨𑌸𑍍𑌯𑌾𑌪𑌿 𑌨𑌿𑌤𑍍𑌯𑌂 𑌤𑍍𑌰𑌿𑌲𑍋𑌕𑍍𑌯𑌾𑌃

𑌸𑌮𑍍𑌯𑌗𑍍𑌵𑍃𑌤𑍍𑌤𑍗 𑌸𑍁𑌰𑍇𑌨𑍍𑌦𑍍𑌰𑌦𑍍𑌵𑌿𑌰𑌦𑌵𑌰𑌕𑌰𑍋𑌦𑌾𑌰𑌕𑌾𑌨𑍍𑌤𑌿𑌂 𑌦𑌧𑌾𑌨𑍗 ।

𑌸𑌾𑌰𑌾𑌵𑍂𑌰𑍂 𑌪𑍁𑌰𑌾𑌰𑍇𑌃 𑌪𑍍𑌰𑌸𑌭𑌮𑌰𑌿𑌘𑌟𑌾𑌘𑌸𑍍𑌮𑌰𑍗 𑌭𑌸𑍍𑌮𑌶𑍁𑌭𑍍𑌰𑍗

𑌭𑌕𑍍𑌤𑍈𑌰𑌤𑍍𑌯𑌾𑌰𑍍𑌦𑍍𑌰𑌚𑌿𑌤𑍍𑌤𑍈𑌰𑌧𑌿𑌕𑌮𑌵𑌨𑌤𑍗 𑌵𑌾𑌞𑍍𑌛𑌿𑌤𑌂 𑌵𑍋 𑌵𑌿𑌧𑌤𑍍𑌤𑌾𑌮𑍍 ॥ 21 ॥

𑌆𑌨𑌨𑍍𑌦𑌾𑌯𑍇𑌨𑍍𑌦𑍁𑌕𑌾𑌨𑍍𑌤𑍋𑌪𑌲𑌰𑌚𑌿𑌤𑌸𑌮𑍁𑌦𑍍𑌗𑌾𑌯𑌿𑌤𑍇 𑌯𑍇 𑌮𑍁𑌨𑍀𑌨𑌾𑌂

𑌚𑌿𑌤𑍍𑌤𑌾𑌦𑌰𑍍𑌶𑌂 𑌨𑌿𑌧𑌾𑌤𑍁𑌂 𑌵𑌿𑌦𑌧𑌤𑌿 𑌚𑌰𑌣𑍇 𑌤𑌾𑌣𑍍𑌡𑌵𑌾𑌕𑍁𑌞𑍍𑌚𑌨𑌾𑌨𑌿 ।

𑌕𑌾𑌞𑍍𑌚𑍀𑌭𑍋𑌗𑍀𑌨𑍍𑌦𑍍𑌰𑌮𑍂𑌰𑍍𑌧𑍍𑌨𑌾𑌂 𑌪𑍍𑌰𑌤𑌿𑌮𑍁𑌹𑍁𑌰𑍁𑌪𑌧𑌾𑌨𑌾𑌯𑌮𑌾𑌨𑍇 𑌕𑍍𑌷𑌣𑌂 𑌤𑍇

𑌕𑌾𑌨𑍍𑌤𑍇 𑌸𑍍𑌤𑌾𑌮𑌨𑍍𑌤𑌕𑌾𑌰𑍇𑌰𑍍𑌦𑍍𑌯𑍁𑌤𑌿𑌵𑌿𑌜𑌿𑌤𑌸𑍁𑌧𑌾𑌭𑌾𑌨𑍁𑌨𑍀 𑌜𑌾𑌨𑍁𑌨𑍀 𑌵𑌃 ॥ 22 ॥

𑌮𑌞𑍍𑌜𑍀𑌰𑍀𑌭𑍂𑌤𑌭𑍋𑌗𑌿𑌪𑍍𑌰𑌵𑌰𑌗𑌣𑌫𑌣𑌾𑌮𑌣𑍍𑌡𑌲𑌾𑌨𑍍𑌤𑌰𑍍𑌨𑌿𑌤𑌾𑌨𑍍𑌤-

-𑌵𑍍𑌯𑌾𑌦𑍀𑌰𑍍𑌘𑌾𑌨𑌰𑍍𑌘𑌰𑌤𑍍𑌨𑌦𑍍𑌯𑍁𑌤𑌿𑌕𑌿𑌸𑌲𑌯𑌤𑍇 𑌸𑍍𑌤𑍂𑌯𑌮𑌾𑌨𑍇 𑌦𑍍𑌯𑍁𑌸𑌦𑍍𑌭𑌿𑌃 ।

𑌬𑌿𑌭𑍍𑌰𑌤𑍍𑌯𑍗 𑌵𑌿𑌭𑍍𑌰𑌮𑌂 𑌵𑌃 𑌸𑍍𑌫𑌟𑌿𑌕𑌮𑌣𑌿𑌬𑍃𑌹𑌦𑍍𑌦𑌣𑍍𑌡𑌵𑌦𑍍𑌭𑌾𑌸𑌿𑌤𑍇 𑌯𑍇

𑌜𑌙𑍍𑌘𑍇 𑌶𑌙𑍍𑌖𑍇𑌨𑍍𑌦𑍁𑌶𑍁𑌭𑍍𑌰𑍇 𑌭𑍃𑌶𑌮𑌿𑌹 𑌭𑌵𑌤𑌾𑌂 𑌮𑌾𑌨𑌸𑍇 𑌶𑍂𑌲𑌪𑌾𑌣𑍇𑌃 ॥ 23 ॥

𑌅𑌸𑍍𑌤𑍋𑌕𑌸𑍍𑌤𑍋𑌮𑌶𑌸𑍍𑌤𑍍𑌰𑍈𑌰𑌪𑌚𑌿𑌤𑌿𑌮𑌮𑌲𑌾𑌂 𑌭𑍂𑌰𑌿𑌭𑌾𑌵𑍋𑌪𑌹𑌾𑌰𑍈𑌃

𑌕𑍁𑌰𑍍𑌵𑌦𑍍𑌭𑌿𑌃 𑌸𑌰𑍍𑌵𑌦𑍋𑌚𑍍𑌚𑍈𑌃 𑌸𑌤𑌤𑌮𑌭𑌿𑌵𑍃𑌤𑍗 𑌬𑍍𑌰𑌹𑍍𑌮𑌵𑌿𑌦𑍍𑌦𑍇𑌵𑌲𑌾𑌦𑍍𑌯𑍈𑌃 ।

𑌸𑌮𑍍𑌯𑌕𑍍𑌸𑌮𑍍𑌪𑍂𑌜𑍍𑌯𑌮𑌾𑌨𑌾𑌵𑌿𑌹 𑌹𑍃𑌦𑌿 𑌸𑌰𑌸𑍀𑌵𑌾𑌨𑌿𑌶𑌂 𑌯𑍁𑌷𑍍𑌮𑌦𑍀𑌯𑍇

𑌶𑌰𑍍𑌵𑌸𑍍𑌯 𑌕𑍍𑌰𑍀𑌡𑌤𑌾𑌂 𑌤𑍗 𑌪𑍍𑌰𑌪𑌦𑌵𑌰𑌬𑍃𑌹𑌤𑍍𑌕𑌚𑍍𑌛𑌪𑌾𑌵𑌚𑍍𑌛𑌭𑌾𑌸𑍗 ॥ 24 ॥

𑌯𑌾𑌃 𑌸𑍍𑌵𑌸𑍍𑌯𑍈𑌕𑌾𑌂𑌶𑌪𑌾𑌤𑌾𑌦𑌤𑌿𑌬𑌹𑌲𑌗𑌲𑌦𑍍𑌰𑌕𑍍𑌤𑌵𑌕𑍍𑌤𑍍𑌰𑌂 𑌪𑍍𑌰𑌣𑍁𑌨𑍍𑌨-

-𑌪𑍍𑌰𑌾𑌣𑌂 𑌪𑍍𑌰𑌾𑌕𑍍𑌰𑍋𑌶𑌯𑌨𑍍𑌪𑍍𑌰𑌾𑌙𑍍𑌨𑌿𑌜𑌮𑌚𑌲𑌵𑌰𑌂 𑌚𑌾𑌲𑌯𑌨𑍍𑌤𑌂 𑌦𑌶𑌾𑌸𑍍𑌯𑌮𑍍 ।

𑌪𑌾𑌦𑌾𑌙𑍍𑌗𑍁𑌲𑍍𑌯𑍋 𑌦𑌿𑌶𑌨𑍍𑌤𑍁 𑌦𑍍𑌰𑍁𑌤𑌮𑌯𑍁𑌗𑌦𑍃𑌶𑌃 𑌕𑌲𑍍𑌮𑌷𑌪𑍍𑌲𑍋𑌷𑌕𑌲𑍍𑌯𑌾𑌃

𑌕𑌲𑍍𑌯𑌾𑌣𑌂 𑌫𑍁𑌲𑍍𑌲𑌮𑌾𑌲𑍍𑌯𑌪𑍍𑌰𑌕𑌰𑌵𑌿𑌲𑌸𑌿𑌤𑌾 𑌵𑌃 𑌪𑍍𑌰𑌣𑌦𑍍𑌧𑌾𑌹𑌿𑌵𑌲𑍍𑌲𑍍𑌯𑌃 ॥ 25 ॥

𑌪𑍍𑌰𑌹𑍍𑌵𑌪𑍍𑌰𑌾𑌚𑍀𑌨𑌬𑌰𑍍𑌹𑌿𑌃𑌪𑍍𑌰𑌮𑍁𑌖𑌸𑍁𑌰𑌵𑌰𑌪𑍍𑌰𑌸𑍍𑌫𑍁𑌰𑌨𑍍𑌮𑍗𑌲𑌿𑌸𑌕𑍍𑌤-

-𑌜𑍍𑌯𑌾𑌯𑍋𑌰𑌤𑍍𑌨𑍋𑌤𑍍𑌕𑌰𑍋𑌸𑍍𑌰𑍈𑌰𑌵𑌿𑌰𑌤𑌮𑌮𑌲𑌾 𑌭𑍂𑌰𑌿𑌨𑍀𑌰𑌾𑌜𑌿𑌤𑌾 𑌯𑌾 ।

𑌪𑍍𑌰𑍋𑌦𑌗𑍍𑌰𑌾𑌗𑍍𑌰𑌾 𑌪𑍍𑌰𑌦𑍇𑌯𑌾𑌤𑍍𑌤𑌤𑌿𑌰𑌿𑌵 𑌰𑍁𑌚𑌿𑌰𑌾 𑌤𑌾𑌰𑌕𑌾𑌣𑌾𑌂 𑌨𑌿𑌤𑌾𑌨𑍍𑌤𑌂

𑌨𑍀𑌲𑌗𑍍𑌰𑍀𑌵𑌸𑍍𑌯 𑌪𑌾𑌦𑌾𑌮𑍍𑌬𑍁𑌰𑍁𑌹𑌵𑌿𑌲𑌸𑌿𑌤𑌾 𑌸𑌾 𑌨𑌖𑌾𑌲𑍀 𑌸𑍁𑌖𑌂 𑌵𑌃 ॥ 26 ॥

𑌸𑌤𑍍𑌯𑌾𑌃 𑌸𑌤𑍍𑌯𑌾𑌨𑌨𑍇𑌨𑍍𑌦𑌾𑌵𑌪𑌿 𑌸𑌵𑌿𑌧𑌗𑌤𑍇 𑌯𑍇 𑌵𑌿𑌕𑌾𑌸𑌂 𑌦𑌧𑌾𑌤𑍇

𑌸𑍍𑌵𑌾𑌨𑍍𑌤𑍇 𑌸𑍍𑌵𑌾𑌂 𑌤𑍇 𑌲𑌭𑌨𑍍𑌤𑍇 𑌶𑍍𑌰𑌿𑌯𑌮𑌿𑌹 𑌸𑌰𑌸𑍀𑌵𑌾𑌮𑌰𑌾 𑌯𑍇 𑌦𑌧𑌾𑌨𑌾𑌃 ।

𑌲𑍋𑌲𑌂 𑌲𑍋𑌲𑌮𑍍𑌬𑌕𑌾𑌨𑌾𑌂 𑌕𑍁𑌲𑌮𑌿𑌵 𑌸𑍁𑌧𑌿𑌯𑌾𑌂 𑌸𑍇𑌵𑌤𑍇 𑌯𑍇 𑌸𑌦𑌾 𑌸𑍍𑌤𑌾𑌂

𑌭𑍂𑌤𑍍𑌯𑍈 𑌭𑍂𑌤𑍍𑌯𑍈𑌣𑌪𑌾𑌣𑍇𑌰𑍍𑌵𑌿𑌮𑌲𑌤𑌰𑌰𑍁𑌚𑌸𑍍𑌤𑍇 𑌪𑌦𑌾𑌮𑍍𑌭𑍋𑌰𑍁𑌹𑍇 𑌵𑌃 ॥ 27 ॥

𑌯𑍇𑌷𑌾𑌂 𑌰𑌾𑌗𑌾𑌦𑌿𑌦𑍋𑌷𑌾𑌕𑍍𑌷𑌤𑌮𑌤𑌿 𑌯𑌤𑌯𑍋 𑌯𑌾𑌨𑍍𑌤𑌿 𑌮𑍁𑌕𑍍𑌤𑌿𑌂 𑌪𑍍𑌰𑌸𑌾𑌦𑌾-

-𑌦𑍍𑌯𑍇 𑌵𑌾 𑌨𑌮𑍍𑌰𑌾𑌤𑍍𑌮𑌮𑍂𑌰𑍍𑌤𑌿𑌦𑍍𑌯𑍁𑌸𑌦𑍃𑌷𑌿𑌪𑌰𑌿𑌷𑌨𑍍𑌮𑍂𑌰𑍍𑌧𑍍𑌨𑌿 𑌶𑍇𑌷𑌾𑌯𑌮𑌾𑌣𑌾𑌃 ।

𑌶𑍍𑌰𑍀𑌕𑌣𑍍𑌠𑌸𑍍𑌯𑌾𑌰𑍁𑌣𑍋𑌦𑍍𑌯𑌚𑍍𑌚𑌰𑌣𑌸𑌰𑌸𑌿𑌜𑌪𑍍𑌰𑍋𑌤𑍍𑌥𑌿𑌤𑌾𑌸𑍍𑌤𑍇 𑌭𑌾𑌵𑌾𑌖𑍍𑌯𑌾-

-𑌤𑍍𑌪𑌾𑌰𑌾𑌵𑌾𑌰𑌾𑌚𑍍𑌚𑌿𑌰𑌂 𑌵𑍋 𑌦𑍁𑌰𑌿𑌤𑌹𑌤𑌿𑌕𑍃𑌤𑌸𑍍𑌤𑌾𑌰𑌯𑍇𑌯𑍁𑌃 𑌪𑌰𑌾𑌗𑌾𑌃 ॥ 28 ॥

𑌭𑍂𑌮𑍍𑌨𑌾 𑌯𑌸𑍍𑌯𑌾𑌸𑍍𑌤𑌸𑍀𑌮𑍍𑌨𑌾 𑌭𑍁𑌵𑌨𑌮𑌨𑍁𑌸𑍃𑌤𑌂 𑌯𑌤𑍍𑌪𑌰𑌂 𑌧𑌾𑌮 𑌧𑌾𑌮𑍍𑌨𑌾𑌂

𑌸𑌾𑌮𑍍𑌨𑌾𑌮𑌾𑌮𑍍𑌨𑌾𑌯𑌤𑌤𑍍𑌤𑍍𑌵𑌂 𑌯𑌦𑌪𑌿 𑌚 𑌪𑌰𑌮𑌂 𑌯𑌦𑍍𑌗𑍁𑌣𑌾𑌤𑍀𑌤𑌮𑌾𑌦𑍍𑌯𑌮𑍍 ।

𑌯𑌚𑍍𑌚𑌾𑌂𑌹𑍋𑌹𑌨𑍍𑌨𑌿𑌰𑍀𑌹𑌂 𑌗𑌹𑌨𑌮𑌿𑌤𑌿 𑌮𑍁𑌹𑍁𑌃 𑌪𑍍𑌰𑌾𑌹𑍁𑌰𑍁𑌚𑍍𑌚𑍈𑌰𑍍𑌮𑌹𑌾𑌨𑍍𑌤𑍋

𑌮𑌾𑌹𑍇𑌶𑌂 𑌤𑌨𑍍𑌮𑌹𑍋 𑌮𑍇 𑌮𑌹𑌿𑌤𑌮𑌹𑌰𑌹𑌰𑍍𑌮𑍋𑌹𑌰𑍋𑌹𑌂 𑌨𑌿𑌹𑌨𑍍𑌤𑍁 ॥ 29 ॥

𑌇𑌤𑌿 𑌶𑍍𑌰𑍀𑌮𑌤𑍍𑌪𑌰𑌮𑌹𑌂𑌸𑌪𑌰𑌿𑌵𑍍𑌰𑌾𑌜𑌕𑌾𑌚𑌾𑌰𑍍𑌯𑌸𑍍𑌯 𑌶𑍍𑌰𑍀𑌗𑍋𑌵𑌿𑌨𑍍𑌦𑌭𑌗𑌵𑌤𑍍𑌪𑍂𑌜𑍍𑌯𑌪𑌾𑌦𑌶𑌿𑌷𑍍𑌯𑌸𑍍𑌯 𑌶𑍍𑌰𑍀𑌮𑌚𑍍𑌛𑌙𑍍𑌕𑌰𑌭𑌗𑌵𑌤𑌃 𑌕𑍃𑌤𑍗 𑌶𑍍𑌰𑍀 𑌶𑌿𑌵 𑌕𑍇𑌶𑌾𑌦𑌿𑌪𑌾𑌦𑌾𑌨𑍍𑌤𑌵𑌰𑍍𑌣𑌨 𑌸𑍍𑌤𑍋𑌤𑍍𑌰𑌮𑍍 ॥

Roman (IAST) Transliteration

deyāsurmūrdhni rājatsarasasurasaritpāraparyantanirya-

-tprāṃśustambāḥ piśaṅgāstulitapariṇatāraktaśālīlatā vaḥ |

durvārāpattigartaśritanikhilajanottāraṇe rajjubhūtā

ghorāghorvīruhālīdahanaśikhiśikhāḥ śarma śārvāḥ kapardāḥ || 1 ||

kurvannirvāṇamārgapragamaparilasadrūpyasopānaśaṅkāṃ

śakrārīṇāṃ purāṇāṃ trayavijayakṛtaspaṣṭarekhāyamāṇam |

avyādavyājamuccairalikahimadharādhityakāntastridhodya-

-jjāhnavyābhaṃ mṛḍānīkamituruḍuparukpāṇḍaraṃ vastripuṇḍram || 2 ||

krudhyadgaurīprasādānatisamayapadāṅguṣṭhasaṅkrāntalākṣā-

-binduspardhi smarāreḥ sphaṭikamaṇidṛṣanmagnamāṇikyaśobham |

mūrdhnyudyaddivyasindhoḥ patitaśapharikākāri vo mastakaṃ stā-

-dastokāpattikṛtyai hutavahakaṇikāmokṣarūkṣaṃ sadākṣi || 3 ||

bhūtyai dṛgbhūtayoḥ syādyadahimahimarugbimbayoḥ snigdhavarṇo

daityaughadhvaṃsaśaṃsī sphuṭa iva pariveṣāvaśeṣo vibhāti |

sargasthityantavṛttirmayi samupagatetīva nirvṛttagarvaṃ

śarvāṇībharturuccairyugalamatha dadhadvibhramaṃ tadbhruvorvaḥ || 4 ||

yugme rukmābjapiṅge graha iva pihite drāgyayoḥ prāgduhitrā

śailasya dhvāntanīlāmbararacitabṛhatkañcuko'bhūtprapañcaḥ |

te trainetre pavitre tridaśavaraghaṭāmitrajaitrograśastre

netre netre bhavetāṃ drutamiha bhavatāmindriyāśvānviyantum || 5 ||

caṇḍīvaktrārpaṇecchostadanu bhagavataḥ pāṇḍurukpāṇḍugaṇḍa-

-prodyatkaṇḍūṃ vinetuṃ vitanuta iva ye ratnakoṇairvighṛṣṭim |

caṇḍārcirmaṇḍalābhe satatanatajanadhvāntakhaṇḍātiśauṇḍe

cāṇḍīśe te śriyestāmadhikamavanatākhaṇḍale kuṇḍale vaḥ || 6 ||

khaṭvāṅgodagrapāṇeḥ sphuṭavikaṭapuṭo vaktrarandhrapraveśa-

-prepsūdañcatphaṇoruśvasadatidhavalāhīndraśaṅkāṃ dadhānaḥ |

yuṣmākaṃ kramavaktrāmburuhaparilasatkarṇikākāraśobhaḥ

śaśvattrāṇāya bhūyādalamativimalottuṅgakoṇaḥ sa ghoṇaḥ || 7 ||

krudhyatyaddhā yayoḥ svāṃ tanumatilasatorbimbitāṃ lakṣayantī

bhartre spardhātinighnā muhuritaravadhūśaṅkayā śailakanyā |

yuṣmāṃstau śaśvaduccairabahuladaśamīśarvarīśātiśubhrā-

-vavyāstāṃ divyasindhoḥ kamituravanamallokapālau kapolau || 8 ||

yo bhāsā bhātyupāntasthita iva nibhṛtaṃ kaustubho draṣṭumiccha-

-nsotthasnehānnitāntaṃ galagatagaralaṃ patyuruccaiḥ paśūnām |

prodyatpremṇā yamārdrā pibati girisutā sampadaḥ sātirekā

lokāḥ śoṇīkṛtāntā yadadharamahasā so'dharo vo vidhattām || 9 ||

atyarthaṃ rājate yā vadanaśaśadharādudgalaccāruvāṇī-

-pīyūṣāmbhaḥpravāhaprasaraparilasatphenabindvāvalīva |

deyātsā dantapaṅktiściramiha danudāyādadauvārikasya

dyutyā dīptendukundacchaviramalatarapronnatāgrā mudaṃ vaḥ || 10 ||

nyakkurvannurvarābhṛnnibhaghanasamayoddhuṣṭameghaughaghoṣaṃ

sphūrjadvārdhyutthitorudhvanitamapi parabrahmabhūto gabhīraḥ |

suvyakto vyaktamūrteḥ prakaṭitakaraṇaḥ prāṇanāthasya satyāḥ

prītyā vaḥ saṃvidadhyātphalavikalamalaṃ janma nādaḥ sa nādaḥ || 11 ||

bhāsā yasya trilokī lasati parilasatphenabindvarṇavānta-

-rvyāmagnevātigaurastulitasurasaridvāripūraprasāraḥ |

pīnātmā dantabhābhirbhṛśamahahahakārātibhīmaḥ sadeṣṭāṃ

puṣṭāṃ tuṣṭiṃ kṛṣīṣṭa sphuṭamiha bhavatāmaṭṭahāso'ṣṭamūrteḥ || 12 ||

sadyojātākhyamāpyaṃ yaduvimalamudagvarti yadvāmadevaṃ

nāmnā hemnā sadṛkṣaṃ jaladanibhamaghorāhvayaṃ dakṣiṇaṃ yat |

yadbālārkaprabhaṃ tatpuruṣanigaditaṃ pūrvamīśānasañjñaṃ

yaddivyaṃ tāni śambhorbhavadabhilaṣitaṃ pañca dadyurmukhāni || 13 ||

ātmapremṇo bhavānyā svayamiva racitāḥ sādaraṃ sāṃvananyā

maṣyā tisraḥsunīlāñjananibhagararekhāḥ samābhānti yasyām |

akalpānalpabhāsā bhṛśaruciratarā kambukalpāmbikāyāḥ

patyuḥ sātyantamantarvilasatu satataṃ mantharā kandharā vaḥ || 14 ||

vaktrendordantalakṣmyāściramadharamahākaustubhasyāpyupānte

sotthānāṃ prārthayanyaḥ sthitimacalabhuve vārayantyai niveśam |

prāyuṅktevāśiṣo yaḥ pratipadamamṛtatve sthitaḥ kālaśatroḥ

kālaṃ kurvangalaṃ vo hṛdayamayamalaṃ kṣālayetkālakūṭaḥ || 15 ||

prauḍhapremākulāyā dṛḍhataraparirambheṣu parvendumukhyāḥ

pārvatyāścārucāmīkaravalayapadairaṅkitaṃ kāntiśāli |

raṅgannāgāṅgadāḍhyaṃ satatamavihitaṃ karma nirmūlayetta-

-ddormūlaṃ nirmalaṃ yaddhṛdi duritamapāsyārjitaṃ dhūrjaṭervaḥ || 16 ||

kaṇṭhāśleṣārthamāptā diva iva kamituḥ svargasindhoḥ pravāhāḥ

krāntyai saṃsārasindhoḥ sphaṭikamaṇimahāsaṅkramākāradīrghāḥ |

tiryagviṣkambhabhūtāstribhuvanavasaterbhinnadaityebhadehā

bāhā vastā harasya drutamiha nivahānaṃhasāṃ saṃharantu || 17 ||

vakṣo dakṣadviṣo'laṃ smarabharavinamaddakṣajākṣīṇavakṣo-

-jāntarnikṣiptaśumbhanmalayajamilitodbhāsi bhasmokṣitaṃ yat |

kṣipraṃ tadrūkṣacakṣuḥ śrutigaṇaphaṇaratnaughabhābhīkṣṇaśobhaṃ

yuṣmākaṃ śaśvadenaḥ sphaṭikamaṇiśilāmaṇḍalābhaṃ kṣiṇotu || 18 ||

muktāmukte vicitrākulavalilaharījālaśālinyavāñca-

-nnābhyāvarte viloladbhujagavarayute kālaśatrorviśāle |

yuṣmaccittatridhāmā pratinavarucire mandire kāntilakṣmyāḥ

śetāṃ śītāṃśugaure cirataramudarakṣīrasindhau salīlam || 19 ||

vaiyāghrī yatra kṛttiḥ sphurati himagirervistṛtopatyakāntaḥ

sāndrāvaśyāyamiśrā parita iva vṛtā nīlajīmūtamālā |

ābaddhāhīndrakāñcīguṇamatipṛthulaṃ śailajākrīḍabhūmi-

-stadvo niḥśreyase syājjaghanamatighanaṃ bālaśītāṃśumauleḥ || 20 ||

puṣṭāvaṣṭambhabhūtau pṛthutarajaghanasyāpi nityaṃ trilokyāḥ

samyagvṛttau surendradviradavarakarodārakāntiṃ dadhānau |

sārāvūrū purāreḥ prasabhamarighaṭāghasmarau bhasmaśubhrau

bhaktairatyārdracittairadhikamavanatau vāñchitaṃ vo vidhattām || 21 ||

ānandāyendukāntopalaracitasamudgāyite ye munīnāṃ

cittādarśaṃ nidhātuṃ vidadhati caraṇe tāṇḍavākuñcanāni |

kāñcībhogīndramūrdhnāṃ pratimuhurupadhānāyamāne kṣaṇaṃ te

kānte stāmantakārerdyutivijitasudhābhānunī jānunī vaḥ || 22 ||

mañjīrībhūtabhogipravaragaṇaphaṇāmaṇḍalāntarnitānta-

-vyādīrghānargharatnadyutikisalayate stūyamāne dyusadbhiḥ |

bibhratyau vibhramaṃ vaḥ sphaṭikamaṇibṛhaddaṇḍavadbhāsite ye

jaṅghe śaṅkhenduśubhre bhṛśamiha bhavatāṃ mānase śūlapāṇeḥ || 23 ||

astokastomaśastrairapacitimamalāṃ bhūribhāvopahāraiḥ

kurvadbhiḥ sarvadoccaiḥ satatamabhivṛtau brahmaviddevalādyaiḥ |

samyaksampūjyamānāviha hṛdi sarasīvāniśaṃ yuṣmadīye

śarvasya krīḍatāṃ tau prapadavarabṛhatkacchapāvacchabhāsau || 24 ||

yāḥ svasyaikāṃśapātādatibahalagaladraktavaktraṃ praṇunna-

-prāṇaṃ prākrośayanprāṅnijamacalavaraṃ cālayantaṃ daśāsyam |

pādāṅgulyo diśantu drutamayugadṛśaḥ kalmaṣaploṣakalyāḥ

kalyāṇaṃ phullamālyaprakaravilasitā vaḥ praṇaddhāhivallyaḥ || 25 ||

prahvaprācīnabarhiḥpramukhasuravaraprasphuranmaulisakta-

-jyāyoratnotkarosrairaviratamamalā bhūrinīrājitā yā |

prodagrāgrā pradeyāttatiriva rucirā tārakāṇāṃ nitāntaṃ

nīlagrīvasya pādāmburuhavilasitā sā nakhālī sukhaṃ vaḥ || 26 ||

satyāḥ satyānanendāvapi savidhagate ye vikāsaṃ dadhāte

svānte svāṃ te labhante śriyamiha sarasīvāmarā ye dadhānāḥ |

lolaṃ lolambakānāṃ kulamiva sudhiyāṃ sevate ye sadā stāṃ

bhūtyai bhūtyaiṇapāṇervimalatararucaste padāmbhoruhe vaḥ || 27 ||

yeṣāṃ rāgādidoṣākṣatamati yatayo yānti muktiṃ prasādā-

-dye vā namrātmamūrtidyusadṛṣipariṣanmūrdhni śeṣāyamāṇāḥ |

śrīkaṇṭhasyāruṇodyaccaraṇasarasijaprotthitāste bhāvākhyā-

-tpārāvārācciraṃ vo duritahatikṛtastārayeyuḥ parāgāḥ || 28 ||

bhūmnā yasyāstasīmnā bhuvanamanusṛtaṃ yatparaṃ dhāma dhāmnāṃ

sāmnāmāmnāyatattvaṃ yadapi ca paramaṃ yadguṇātītamādyam |

yaccāṃhohannirīhaṃ gahanamiti muhuḥ prāhuruccairmahānto

māheśaṃ tanmaho me mahitamaharaharmoharohaṃ nihantu || 29 ||

iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau śrī śiva keśādipādāntavarṇana stotram ||