📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌨𑌿𑌰𑍍𑌗𑍁𑌣 𑌮𑌾𑌨𑌸 𑌪𑍂𑌜𑌾
Nirguna Manasa Puja
Puja Vidhi Adi Shankaracharya Grantha
𑌶𑌿𑌷𑍍𑌯 𑌉𑌵𑌾𑌚
𑌅𑌖𑌣𑍍𑌡𑍇 𑌸𑌚𑍍𑌚𑌿𑌦𑌾𑌨𑌨𑍍𑌦𑍇 𑌨𑌿𑌰𑍍𑌵𑌿𑌕𑌲𑍍𑌪𑍈𑌕𑌰𑍂𑌪𑌿𑌣𑌿 ।
𑌸𑍍𑌥𑌿𑌤𑍇𑌽𑌦𑍍𑌵𑌿𑌤𑍀𑌯𑌭𑌾𑌵𑍇𑌽𑌪𑌿 𑌕𑌥𑌂 𑌪𑍂𑌜𑌾 𑌵𑌿𑌧𑍀𑌯𑌤𑍇 ॥ 1 ॥
𑌪𑍂𑌰𑍍𑌣𑌸𑍍𑌯𑌾𑌵𑌾𑌹𑌨𑌂 𑌕𑍁𑌤𑍍𑌰 𑌸𑌰𑍍𑌵𑌾𑌧𑌾𑌰𑌸𑍍𑌯 𑌚𑌾𑌸𑌨𑌮𑍍 ।
𑌸𑍍𑌵𑌚𑍍𑌛𑌸𑍍𑌯 𑌪𑌾𑌦𑍍𑌯𑌮𑌰𑍍𑌘𑍍𑌯𑌂 𑌚 𑌶𑍁𑌦𑍍𑌧𑌸𑍍𑌯𑌾𑌚𑌮𑌨𑌂 𑌕𑍁𑌤𑌃 ॥ 2 ॥
𑌨𑌿𑌰𑍍𑌮𑌲𑌸𑍍𑌯 𑌕𑍁𑌤𑌃 𑌸𑍍𑌨𑌾𑌨𑌂 𑌵𑌾𑌸𑍋 𑌵𑌿𑌶𑍍𑌵𑍋𑌦𑌰𑌸𑍍𑌯 𑌚 ।
𑌅𑌗𑍋𑌤𑍍𑌰𑌸𑍍𑌯 𑌤𑍍𑌵𑌵𑌰𑍍𑌣𑌸𑍍𑌯 𑌕𑍁𑌤𑌸𑍍𑌤𑌸𑍍𑌯𑍋𑌪𑌵𑍀𑌤𑌕𑌮𑍍 ॥ 3 ॥
𑌨𑌿𑌰𑍍𑌲𑍇𑌪𑌸𑍍𑌯 𑌕𑍁𑌤𑍋 𑌗𑌨𑍍𑌧𑌃 𑌪𑍁𑌷𑍍𑌪𑌂 𑌨𑌿𑌰𑍍𑌵𑌾𑌸𑌨𑌸𑍍𑌯 𑌚 ।
𑌨𑌿𑌰𑍍𑌵𑌿𑌶𑍇𑌷𑌸𑍍𑌯 𑌕𑌾 𑌭𑍂𑌷𑌾 𑌕𑍋𑌽𑌲𑌙𑍍𑌕𑌾𑌰𑍋 𑌨𑌿𑌰𑌾𑌕𑍃𑌤𑍇𑌃 ॥ 4 ॥
𑌨𑌿𑌰𑌞𑍍𑌜𑌨𑌸𑍍𑌯 𑌕𑌿𑌂 𑌧𑍂𑌪𑍈𑌰𑍍𑌦𑍀𑌪𑍈𑌰𑍍𑌵𑌾 𑌸𑌰𑍍𑌵𑌸𑌾𑌕𑍍𑌷𑌿𑌣𑌃 ।
𑌨𑌿𑌜𑌾𑌨𑌨𑍍𑌦𑍈𑌕𑌤𑍃𑌪𑍍𑌤𑌸𑍍𑌯 𑌨𑍈𑌵𑍇𑌦𑍍𑌯𑌂 𑌕𑌿𑌂 𑌭𑌵𑍇𑌦𑌿𑌹 ॥ 5 ॥
𑌵𑌿𑌶𑍍𑌵𑌾𑌨𑌨𑍍𑌦𑌯𑌿𑌤𑍁𑌸𑍍𑌤𑌸𑍍𑌯 𑌕𑌿𑌂 𑌤𑌾𑌮𑍍𑌬𑍂𑌲𑌂 𑌪𑍍𑌰𑌕𑌲𑍍𑌪𑌤𑍇 ।
𑌸𑍍𑌵𑌯𑌮𑍍𑌪𑍍𑌰𑌕𑌾𑌶𑌚𑌿𑌦𑍍𑌰𑍂𑌪𑍋 𑌯𑍋𑌽𑌸𑌾𑌵𑌰𑍍𑌕𑌾𑌦𑌿𑌭𑌾𑌸𑌕𑌃 ॥ 6 ॥
𑌗𑍀𑌯𑌤𑍇 𑌶𑍍𑌰𑍁𑌤𑌿𑌭𑌿𑌸𑍍𑌤𑌸𑍍𑌯 𑌨𑍀𑌰𑌾𑌜𑌨𑌵𑌿𑌧𑌿𑌃 𑌕𑍁𑌤𑌃 ।
𑌪𑍍𑌰𑌦𑌕𑍍𑌷𑌿𑌣𑌮𑌨𑌨𑍍𑌤𑌸𑍍𑌯 𑌪𑍍𑌰𑌣𑌾𑌮𑍋𑌽𑌦𑍍𑌵𑌯𑌵𑌸𑍍𑌤𑍁𑌨𑌃 ॥ 7 ॥
𑌵𑍇𑌦𑌵𑌾𑌚𑌾𑌮𑌵𑍇𑌦𑍍𑌯𑌸𑍍𑌯 𑌕𑌿𑌂 𑌵𑌾 𑌸𑍍𑌤𑍋𑌤𑍍𑌰𑌂 𑌵𑌿𑌧𑍀𑌯𑌤𑍇 ।
𑌅𑌨𑍍𑌤𑌰𑍍𑌬𑌹𑌿𑌃 𑌸𑌂𑌸𑍍𑌥𑌿𑌤𑌸𑍍𑌯 𑌉𑌦𑍍𑌵𑌾𑌸𑌨𑌵𑌿𑌧𑌿𑌃 𑌕𑍁𑌤𑌃 ॥ 8 ॥
𑌶𑍍𑌰𑍀 𑌗𑍁𑌰𑍁𑌰𑍁𑌵𑌾𑌚
𑌆𑌰𑌾𑌧𑌯𑌾𑌮𑌿 𑌮𑌣𑌿𑌸𑌨𑍍𑌨𑌿𑌭𑌮𑌾𑌤𑍍𑌮𑌲𑌿𑌙𑍍𑌗𑌮𑍍
𑌮𑌾𑌯𑌾𑌪𑍁𑌰𑍀𑌹𑍃𑌦𑌯𑌪𑌙𑍍𑌕𑌜𑌸𑌨𑍍𑌨𑌿𑌵𑌿𑌷𑍍𑌟𑌮𑍍 ।
𑌶𑍍𑌰𑌦𑍍𑌧𑌾𑌨𑌦𑍀𑌵𑌿𑌮𑌲𑌚𑌿𑌤𑍍𑌤𑌜𑌲𑌾𑌭𑌿𑌷𑍇𑌕𑍈-
𑌰𑍍𑌨𑌿𑌤𑍍𑌯𑌂 𑌸𑌮𑌾𑌧𑌿𑌕𑍁𑌸𑍁𑌮𑍈𑌰𑍍𑌨𑌪𑍁𑌨𑌰𑍍𑌭𑌵𑌾𑌯 ॥ 9 ॥
𑌅𑌯𑌮𑍇𑌕𑍋𑌽𑌵𑌶𑌿𑌷𑍍𑌟𑍋𑌽𑌸𑍍𑌮𑍀𑌤𑍍𑌯𑍇𑌵𑌮𑌾𑌵𑌾𑌹𑌯𑍇𑌚𑍍𑌛𑌿𑌵𑌮𑍍 ।
𑌆𑌸𑌨𑌂 𑌕𑌲𑍍𑌪𑌯𑍇𑌤𑍍𑌪𑌶𑍍𑌚𑌾𑌤𑍍𑌸𑍍𑌵𑌪𑍍𑌰𑌤𑌿𑌷𑍍𑌠𑌾𑌤𑍍𑌮𑌚𑌿𑌨𑍍𑌤𑌨𑌮𑍍 ॥ 10 ॥
𑌪𑍁𑌣𑍍𑌯𑌪𑌾𑌪𑌰𑌜𑌃𑌸𑌙𑍍𑌗𑍋 𑌮𑌮 𑌨𑌾𑌸𑍍𑌤𑍀𑌤𑌿 𑌵𑍇𑌦𑌨𑌮𑍍 ।
𑌪𑌾𑌦𑍍𑌯𑌂 𑌸𑌮𑌰𑍍𑌪𑌯𑍇𑌦𑍍𑌵𑌿𑌦𑍍𑌵𑌨𑍍𑌸𑌰𑍍𑌵𑌕𑌲𑍍𑌮𑌷𑌨𑌾𑌶𑌨𑌮𑍍 ॥ 11 ॥
𑌅𑌨𑌾𑌦𑌿𑌕𑌲𑍍𑌪𑌵𑌿𑌧𑍃𑌤𑌮𑍂𑌲𑌾𑌜𑍍𑌞𑌾𑌨𑌜𑌲𑌾𑌞𑍍𑌜𑌲𑌿𑌮𑍍 ।
𑌵𑌿𑌸𑍃𑌜𑍇𑌦𑌾𑌤𑍍𑌮𑌲𑌿𑌙𑍍𑌗𑌸𑍍𑌯 𑌤𑌦𑍇𑌵𑌾𑌰𑍍𑌘𑍍𑌯𑌸𑌮𑌰𑍍𑌪𑌣𑌮𑍍 ॥ 12 ॥
𑌬𑍍𑌰𑌹𑍍𑌮𑌾𑌨𑌨𑍍𑌦𑌾𑌬𑍍𑌧𑌿𑌕𑌲𑍍𑌲𑍋𑌲𑌕𑌣𑌕𑍋𑌟𑍍𑌯𑌂𑌶𑌲𑍇𑌶𑌕𑌮𑍍 ।
𑌪𑌿𑌬𑌨𑍍𑌤𑍀𑌨𑍍𑌦𑍍𑌰𑌾𑌦𑌯 𑌇𑌤𑌿 𑌧𑍍𑌯𑌾𑌨𑌮𑌾𑌚𑌮𑌨𑌂 𑌮𑌤𑌮𑍍 ॥ 13 ॥
𑌬𑍍𑌰𑌹𑍍𑌮𑌾𑌨𑌨𑍍𑌦𑌜𑌲𑍇𑌨𑍈𑌵 𑌲𑍋𑌕𑌾𑌃 𑌸𑌰𑍍𑌵𑍇 𑌪𑌰𑌿𑌪𑍍𑌲𑍁𑌤𑌾𑌃 ।
𑌅𑌚𑍍𑌛𑍇𑌦𑍍𑌯𑍋𑌽𑌯𑌮𑌿𑌤𑌿 𑌧𑍍𑌯𑌾𑌨𑌮𑌭𑌿𑌷𑍇𑌚𑌨𑌮𑌾𑌤𑍍𑌮𑌨𑌃 ॥ 14 ॥
𑌨𑌿𑌰𑌾𑌵𑌰𑌣𑌚𑍈𑌤𑌨𑍍𑌯𑌂 𑌪𑍍𑌰𑌕𑌾𑌶𑍋𑌽𑌸𑍍𑌮𑍀𑌤𑌿 𑌚𑌿𑌨𑍍𑌤𑌨𑌮𑍍 ।
𑌆𑌤𑍍𑌮𑌲𑌿𑌙𑍍𑌗𑌸𑍍𑌯 𑌸𑌦𑍍𑌵𑌸𑍍𑌤𑍍𑌰𑌮𑌿𑌤𑍍𑌯𑍇𑌵𑌂 𑌚𑌿𑌨𑍍𑌤𑌯𑍇𑌨𑍍𑌮𑍁𑌨𑌿𑌃 ॥ 15 ॥
𑌤𑍍𑌰𑌿𑌗𑍁𑌣𑌾𑌤𑍍𑌮𑌾𑌶𑍇𑌷𑌲𑍋𑌕𑌮𑌾𑌲𑌿𑌕𑌾𑌸𑍂𑌤𑍍𑌰𑌮𑌸𑍍𑌮𑍍𑌯𑌹𑌮𑍍 ।
𑌇𑌤𑌿 𑌨𑌿𑌶𑍍𑌚𑌯𑌮𑍇𑌵𑌾𑌤𑍍𑌰 𑌹𑍍𑌯𑍁𑌪𑌵𑍀𑌤𑌂 𑌪𑌰𑌂 𑌮𑌤𑌮𑍍 ॥ 16 ॥
𑌅𑌨𑍇𑌕𑌵𑌾𑌸𑌨𑌾𑌮𑌿𑌶𑍍𑌰𑌪𑍍𑌰𑌪𑌞𑍍𑌚𑍋𑌽𑌯𑌂 𑌧𑍃𑌤𑍋 𑌮𑌯𑌾 ।
𑌨𑌾𑌨𑍍𑌯𑍇𑌨𑍇𑌤𑍍𑌯𑌨𑍁𑌸𑌨𑍍𑌧𑌾𑌨𑌮𑌾𑌤𑍍𑌮𑌨𑌶𑍍𑌚𑌨𑍍𑌦𑌨𑌂 𑌭𑌵𑍇𑌤𑍍 ॥ 17 ॥
𑌰𑌜𑌃𑌸𑌤𑍍𑌤𑍍𑌵𑌤𑌮𑍋𑌵𑍃𑌤𑍍𑌤𑌿𑌤𑍍𑌯𑌾𑌗𑌰𑍂𑌪𑍈𑌸𑍍𑌤𑌿𑌲𑌾𑌕𑍍𑌷𑌤𑍈𑌃 ।
𑌆𑌤𑍍𑌮𑌲𑌿𑌙𑍍𑌗𑌂 𑌯𑌜𑍇𑌨𑍍𑌨𑌿𑌤𑍍𑌯𑌂 𑌜𑍀𑌵𑌨𑍍𑌮𑍁𑌕𑍍𑌤𑌿𑌪𑍍𑌰𑌸𑌿𑌦𑍍𑌧𑌯𑍇 ॥ 18 ॥
𑌈𑌶𑍍𑌵𑌰𑍋 𑌗𑍁𑌰𑍁𑌰𑌾𑌤𑍍𑌮𑍇𑌤𑌿 𑌭𑍇𑌦𑌤𑍍𑌰𑌯𑌵𑌿𑌵𑌰𑍍𑌜𑌿𑌤𑍈𑌃 ।
𑌬𑌿𑌲𑍍𑌵𑌪𑌤𑍍𑌰𑍈𑌰𑌦𑍍𑌵𑌿𑌤𑍀𑌯𑍈𑌰𑌾𑌤𑍍𑌮𑌲𑌿𑌙𑍍𑌗𑌂 𑌯𑌜𑍇𑌚𑍍𑌛𑌿𑌵𑌮𑍍 ॥ 19 ॥
𑌸𑌮𑌸𑍍𑌤𑌵𑌾𑌸𑌨𑌾𑌤𑍍𑌯𑌾𑌗𑌂 𑌧𑍂𑌪𑌂 𑌤𑌸𑍍𑌯 𑌵𑌿𑌚𑌿𑌨𑍍𑌤𑌯𑍇𑌤𑍍 ।
𑌜𑍍𑌯𑍋𑌤𑌿𑌰𑍍𑌮𑌯𑌾𑌤𑍍𑌮𑌵𑌿𑌜𑍍𑌞𑌾𑌨𑌂 𑌦𑍀𑌪𑌂 𑌸𑌨𑍍𑌦𑌰𑍍𑌶𑌯𑍇𑌦𑍍𑌬𑍁𑌧𑌃 ॥ 20 ॥
𑌨𑍈𑌵𑍇𑌦𑍍𑌯𑌮𑌾𑌤𑍍𑌮𑌲𑌿𑌙𑍍𑌗𑌸𑍍𑌯 𑌬𑍍𑌰𑌹𑍍𑌮𑌾𑌣𑍍𑌡𑌾𑌖𑍍𑌯𑌂 𑌮𑌹𑍋𑌦𑌨𑌮𑍍 ।
𑌪𑌿𑌬𑌾𑌨𑌨𑍍𑌦𑌰𑌸𑌂 𑌸𑍍𑌵𑌾𑌦𑍁 𑌮𑍃𑌤𑍍𑌯𑍁𑌰𑌸𑍍𑌯𑍋𑌪𑌸𑍇𑌚𑌨𑌮𑍍 ॥ 21 ॥
𑌅𑌜𑍍𑌞𑌾𑌨𑍋𑌚𑍍𑌛𑌿𑌷𑍍𑌟𑌕𑌰𑌸𑍍𑌯 𑌕𑍍𑌷𑌾𑌲𑌨𑌂 𑌜𑍍𑌞𑌾𑌨𑌵𑌾𑌰𑌿𑌣𑌾 ।
𑌵𑌿𑌶𑍁𑌦𑍍𑌧𑌸𑍍𑌯𑌾𑌤𑍍𑌮𑌲𑌿𑌙𑍍𑌗𑌸𑍍𑌯 𑌹𑌸𑍍𑌤𑌪𑍍𑌰𑌕𑍍𑌷𑌾𑌲𑌨𑌂 𑌸𑍍𑌮𑌰𑍇𑌤𑍍 ॥ 22 ॥
𑌰𑌾𑌗𑌾𑌦𑌿𑌗𑍁𑌣𑌶𑍂𑌨𑍍𑌯𑌸𑍍𑌯 𑌶𑌿𑌵𑌸𑍍𑌯 𑌪𑌰𑌮𑌾𑌤𑍍𑌮𑌨𑌃 ।
𑌸𑌰𑌾𑌗𑌵𑌿𑌷𑌯𑌾𑌭𑍍𑌯𑌾𑌸𑌤𑍍𑌯𑌾𑌗𑌸𑍍𑌤𑌾𑌮𑍍𑌬𑍂𑌲𑌚𑌰𑍍𑌵𑌣𑌮𑍍 ॥ 23 ॥
𑌅𑌜𑍍𑌞𑌾𑌨𑌧𑍍𑌵𑌾𑌨𑍍𑌤𑌵𑌿𑌧𑍍𑌵𑌂𑌸𑌪𑍍𑌰𑌚𑌣𑍍𑌡𑌮𑌤𑌿𑌭𑌾𑌸𑍍𑌕𑌰𑌮𑍍 ।
𑌆𑌤𑍍𑌮𑌨𑍋 𑌬𑍍𑌰𑌹𑍍𑌮𑌤𑌾𑌜𑍍𑌞𑌾𑌨𑌂 𑌨𑍀𑌰𑌾𑌜𑌨𑌮𑌿𑌹𑌾𑌤𑍍𑌮𑌨𑌃 ॥ 24 ॥
𑌵𑌿𑌵𑌿𑌧𑌬𑍍𑌰𑌹𑍍𑌮𑌸𑌨𑍍𑌦𑍃𑌷𑍍𑌟𑌿𑌰𑍍𑌮𑌾𑌲𑌿𑌕𑌾𑌭𑌿𑌰𑌲𑌙𑍍𑌕𑍃𑌤𑌮𑍍 ।
𑌪𑍂𑌰𑍍𑌣𑌾𑌨𑌨𑍍𑌦𑌾𑌤𑍍𑌮𑌤𑌾𑌦𑍃𑌷𑍍𑌟𑌿𑌂 𑌪𑍁𑌷𑍍𑌪𑌾𑌞𑍍𑌜𑌲𑌿𑌮𑌨𑍁𑌸𑍍𑌮𑌰𑍇𑌤𑍍 ॥ 25 ॥
𑌪𑌰𑌿𑌭𑍍𑌰𑌮𑌨𑍍𑌤𑌿 𑌬𑍍𑌰𑌹𑍍𑌮𑌾𑌣𑍍𑌡𑌸𑌹𑌸𑍍𑌰𑌾𑌣𑌿 𑌮𑌯𑍀𑌶𑍍𑌵𑌰𑍇 ।
𑌕𑍂𑌟𑌸𑍍𑌥𑌾𑌚𑌲𑌰𑍂𑌪𑍋𑌽𑌹𑌮𑌿𑌤𑌿 𑌧𑍍𑌯𑌾𑌨𑌂 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 26 ॥
𑌵𑌿𑌶𑍍𑌵𑌵𑌨𑍍𑌦𑍍𑌯𑍋𑌽𑌹𑌮𑍇𑌵𑌾𑌸𑍍𑌮𑌿 𑌨𑌾𑌸𑍍𑌤𑌿 𑌵𑌨𑍍𑌦𑍍𑌯𑍋 𑌮𑌦𑌨𑍍𑌯𑌤𑌃 ।
𑌇𑌤𑍍𑌯𑌾𑌲𑍋𑌚𑌨𑌮𑍇𑌵𑌾𑌤𑍍𑌰 𑌸𑍍𑌵𑌾𑌤𑍍𑌮𑌲𑌿𑌙𑍍𑌗𑌸𑍍𑌯 𑌵𑌨𑍍𑌦𑌨𑌮𑍍 ॥ 27 ॥
𑌆𑌤𑍍𑌮𑌨𑌃 𑌸𑌤𑍍𑌕𑍍𑌰𑌿𑌯𑌾 𑌪𑍍𑌰𑍋𑌕𑍍𑌤𑌾 𑌕𑌰𑍍𑌤𑌵𑍍𑌯𑌾𑌭𑌾𑌵𑌭𑌾𑌵𑌨𑌾 ।
𑌨𑌾𑌮𑌰𑍂𑌪𑌵𑍍𑌯𑌤𑍀𑌤𑌾𑌤𑍍𑌮𑌚𑌿𑌨𑍍𑌤𑌨𑌂 𑌨𑌾𑌮𑌕𑍀𑌰𑍍𑌤𑌨𑌮𑍍 ॥ 28 ॥
𑌶𑍍𑌰𑌵𑌣𑌂 𑌤𑌸𑍍𑌯 𑌦𑍇𑌵𑌸𑍍𑌯 𑌶𑍍𑌰𑍋𑌤𑌵𑍍𑌯𑌾𑌭𑌾𑌵𑌚𑌿𑌨𑍍𑌤𑌨𑌮𑍍 ।
𑌮𑌨𑌨𑌂 𑌤𑍍𑌵𑌾𑌤𑍍𑌮𑌲𑌿𑌙𑍍𑌗𑌸𑍍𑌯 𑌮𑌨𑍍𑌤𑌵𑍍𑌯𑌾𑌭𑌾𑌵𑌚𑌿𑌨𑍍𑌤𑌨𑌮𑍍 ॥ 29 ॥
𑌧𑍍𑌯𑌾𑌤𑌵𑍍𑌯𑌾𑌭𑌾𑌵𑌵𑌿𑌜𑍍𑌞𑌾𑌨𑌂 𑌨𑌿𑌦𑌿𑌧𑍍𑌯𑌾𑌸𑌨𑌮𑌾𑌤𑍍𑌮𑌨𑌃 ।
𑌸𑌮𑌸𑍍𑌤𑌭𑍍𑌰𑌾𑌨𑍍𑌤𑌿𑌵𑌿𑌕𑍍𑌷𑍇𑌪𑌰𑌾𑌹𑌿𑌤𑍍𑌯𑍇𑌨𑌾𑌤𑍍𑌮𑌨𑌿𑌷𑍍𑌠𑌤𑌾 ॥ 30 ॥
𑌸𑌮𑌾𑌧𑌿𑌰𑌾𑌤𑍍𑌮𑌨𑍋 𑌨𑌾𑌮 𑌨𑌾𑌨𑍍𑌯𑌚𑍍𑌚𑌿𑌤𑍍𑌤𑌸𑍍𑌯 𑌵𑌿𑌭𑍍𑌰𑌮𑌃 ।
𑌤𑌤𑍍𑌰𑍈𑌵 𑌬𑌹𑍍𑌮𑌣𑌿 𑌸𑌦𑌾 𑌚𑌿𑌤𑍍𑌤𑌵𑌿𑌶𑍍𑌰𑌾𑌨𑍍𑌤𑌿𑌰𑌿𑌷𑍍𑌯𑌤𑍇 ॥ 31 ॥
𑌏𑌵𑌂 𑌵𑍇𑌦𑌾𑌨𑍍𑌤𑌕𑌲𑍍𑌪𑍋𑌕𑍍𑌤𑌸𑍍𑌵𑌾𑌤𑍍𑌮𑌲𑌿𑌙𑍍𑌗𑌪𑍍𑌰𑌪𑍂𑌜𑌨𑌮𑍍 ।
𑌕𑍁𑌰𑍍𑌵𑌨𑍍𑌨𑌾 𑌮𑌰𑌣𑌂 𑌵𑌾𑌪𑌿 𑌕𑍍𑌷𑌣𑌂 𑌵𑌾 𑌸𑍁𑌸𑌮𑌾𑌹𑌿𑌤𑌃 ॥ 32 ॥
𑌸𑌰𑍍𑌵𑌦𑍁𑌰𑍍𑌵𑌾𑌸𑌨𑌾𑌜𑌾𑌲𑌂 𑌪𑌦𑌪𑌾𑌂𑌸𑍁𑌮𑌿𑌵 𑌤𑍍𑌯𑌜𑍇𑌤𑍍 ।
𑌵𑌿𑌧𑍂𑌯𑌾𑌜𑍍𑌞𑌾𑌨𑌦𑍁𑌃𑌖𑍗𑌘𑌂 𑌮𑍋𑌕𑍍𑌷𑌾𑌨𑌨𑍍𑌦𑌂 𑌸𑌮𑌶𑍍𑌨𑍁𑌤𑍇 ॥ 33 ॥
Roman (IAST) Transliteration
śiṣya uvāca
akhaṇḍe saccidānande nirvikalpaikarūpiṇi |
sthite'dvitīyabhāve'pi kathaṃ pūjā vidhīyate || 1 ||
pūrṇasyāvāhanaṃ kutra sarvādhārasya cāsanam |
svacchasya pādyamarghyaṃ ca śuddhasyācamanaṃ kutaḥ || 2 ||
nirmalasya kutaḥ snānaṃ vāso viśvodarasya ca |
agotrasya tvavarṇasya kutastasyopavītakam || 3 ||
nirlepasya kuto gandhaḥ puṣpaṃ nirvāsanasya ca |
nirviśeṣasya kā bhūṣā ko'laṅkāro nirākṛteḥ || 4 ||
nirañjanasya kiṃ dhūpairdīpairvā sarvasākṣiṇaḥ |
nijānandaikatṛptasya naivedyaṃ kiṃ bhavediha || 5 ||
viśvānandayitustasya kiṃ tāmbūlaṃ prakalpate |
svayamprakāśacidrūpo yo'sāvarkādibhāsakaḥ || 6 ||
gīyate śrutibhistasya nīrājanavidhiḥ kutaḥ |
pradakṣiṇamanantasya praṇāmo'dvayavastunaḥ || 7 ||
vedavācāmavedyasya kiṃ vā stotraṃ vidhīyate |
antarbahiḥ saṃsthitasya udvāsanavidhiḥ kutaḥ || 8 ||
śrī gururuvāca
ārādhayāmi maṇisannibhamātmaliṅgam
māyāpurīhṛdayapaṅkajasanniviṣṭam |
śraddhānadīvimalacittajalābhiṣekai-
rnityaṃ samādhikusumairnapunarbhavāya || 9 ||
ayameko'vaśiṣṭo'smītyevamāvāhayecchivam |
āsanaṃ kalpayetpaścātsvapratiṣṭhātmacintanam || 10 ||
puṇyapāparajaḥsaṅgo mama nāstīti vedanam |
pādyaṃ samarpayedvidvansarvakalmaṣanāśanam || 11 ||
anādikalpavidhṛtamūlājñānajalāñjalim |
visṛjedātmaliṅgasya tadevārghyasamarpaṇam || 12 ||
brahmānandābdhikallolakaṇakoṭyaṃśaleśakam |
pibantīndrādaya iti dhyānamācamanaṃ matam || 13 ||
brahmānandajalenaiva lokāḥ sarve pariplutāḥ |
acchedyo'yamiti dhyānamabhiṣecanamātmanaḥ || 14 ||
nirāvaraṇacaitanyaṃ prakāśo'smīti cintanam |
ātmaliṅgasya sadvastramityevaṃ cintayenmuniḥ || 15 ||
triguṇātmāśeṣalokamālikāsūtramasmyaham |
iti niścayamevātra hyupavītaṃ paraṃ matam || 16 ||
anekavāsanāmiśraprapañco'yaṃ dhṛto mayā |
nānyenetyanusandhānamātmanaścandanaṃ bhavet || 17 ||
rajaḥsattvatamovṛttityāgarūpaistilākṣataiḥ |
ātmaliṅgaṃ yajennityaṃ jīvanmuktiprasiddhaye || 18 ||
īśvaro gururātmeti bhedatrayavivarjitaiḥ |
bilvapatrairadvitīyairātmaliṅgaṃ yajecchivam || 19 ||
samastavāsanātyāgaṃ dhūpaṃ tasya vicintayet |
jyotirmayātmavijñānaṃ dīpaṃ sandarśayedbudhaḥ || 20 ||
naivedyamātmaliṅgasya brahmāṇḍākhyaṃ mahodanam |
pibānandarasaṃ svādu mṛtyurasyopasecanam || 21 ||
ajñānocchiṣṭakarasya kṣālanaṃ jñānavāriṇā |
viśuddhasyātmaliṅgasya hastaprakṣālanaṃ smaret || 22 ||
rāgādiguṇaśūnyasya śivasya paramātmanaḥ |
sarāgaviṣayābhyāsatyāgastāmbūlacarvaṇam || 23 ||
ajñānadhvāntavidhvaṃsapracaṇḍamatibhāskaram |
ātmano brahmatājñānaṃ nīrājanamihātmanaḥ || 24 ||
vividhabrahmasandṛṣṭirmālikābhiralaṅkṛtam |
pūrṇānandātmatādṛṣṭiṃ puṣpāñjalimanusmaret || 25 ||
paribhramanti brahmāṇḍasahasrāṇi mayīśvare |
kūṭasthācalarūpo'hamiti dhyānaṃ pradakṣiṇam || 26 ||
viśvavandyo'hamevāsmi nāsti vandyo madanyataḥ |
ityālocanamevātra svātmaliṅgasya vandanam || 27 ||
ātmanaḥ satkriyā proktā kartavyābhāvabhāvanā |
nāmarūpavyatītātmacintanaṃ nāmakīrtanam || 28 ||
śravaṇaṃ tasya devasya śrotavyābhāvacintanam |
mananaṃ tvātmaliṅgasya mantavyābhāvacintanam || 29 ||
dhyātavyābhāvavijñānaṃ nididhyāsanamātmanaḥ |
samastabhrāntivikṣeparāhityenātmaniṣṭhatā || 30 ||
samādhirātmano nāma nānyaccittasya vibhramaḥ |
tatraiva bahmaṇi sadā cittaviśrāntiriṣyate || 31 ||
evaṃ vedāntakalpoktasvātmaliṅgaprapūjanam |
kurvannā maraṇaṃ vāpi kṣaṇaṃ vā susamāhitaḥ || 32 ||
sarvadurvāsanājālaṃ padapāṃsumiva tyajet |
vidhūyājñānaduḥkhaughaṃ mokṣānandaṃ samaśnute || 33 ||
InfoLyter.in — Sacred Vedic Knowledge Portal · Free forever