Narayaniyam Dashaka 94 - Tattvajnanotpattih

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 94 - 𑌤𑌤𑍍𑌤𑍍𑌵𑌜𑍍𑌞𑌾𑌨𑍋𑌤𑍍𑌪𑌤𑍍𑌤𑌿𑌃

Vishnu Narayana Bhattathiri Grantha

𑌶𑍁𑌦𑍍𑌧𑌾 𑌨𑌿𑌷𑍍𑌕𑌾𑌮𑌧𑌰𑍍𑌮𑍈𑌃 𑌪𑍍𑌰𑌵𑌰𑌗𑍁𑌰𑍁𑌗𑌿𑌰𑌾 𑌤𑌤𑍍𑌸𑍍𑌵𑌰𑍂𑌪𑌂 𑌪𑌰𑌂 𑌤𑍇

𑌶𑍁𑌦𑍍𑌧𑌂 𑌦𑍇𑌹𑍇𑌨𑍍𑌦𑍍𑌰𑌿𑌯𑌾𑌦𑌿𑌵𑍍𑌯𑌪𑌗𑌤𑌮𑌖𑌿𑌲𑌵𑍍𑌯𑌾𑌪𑍍𑌤𑌮𑌾𑌵𑍇𑌦𑌯𑌨𑍍𑌤𑍇 ।

𑌨𑌾𑌨𑌾𑌤𑍍𑌵𑌸𑍍𑌥𑍗𑌲𑍍𑌯𑌕𑌾𑌰𑍍𑌶𑍍𑌯𑌾𑌦𑌿 𑌤𑍁 𑌗𑍁𑌣𑌜𑌵𑌪𑍁𑌸𑍍𑌸𑌙𑍍𑌗𑌤𑍋𑌽𑌧𑍍𑌯𑌾𑌸𑌿𑌤𑌂 𑌤𑍇

𑌵𑌹𑍍𑌨𑍇𑌰𑍍𑌦𑌾𑌰𑍁𑌪𑍍𑌰𑌭𑍇𑌦𑍇𑌷𑍍𑌵𑌿𑌵 𑌮𑌹𑌦𑌣𑍁𑌤𑌾𑌦𑍀𑌪𑍍𑌤𑌤𑌾𑌶𑌾𑌨𑍍𑌤𑌤𑌾𑌦𑌿 ॥1॥

𑌆𑌚𑌾𑌰𑍍𑌯𑌾𑌖𑍍𑌯𑌾𑌧𑌰𑌸𑍍𑌥𑌾𑌰𑌣𑌿𑌸𑌮𑌨𑍁𑌮𑌿𑌲𑌚𑍍𑌛𑌿𑌷𑍍𑌯𑌰𑍂𑌪𑍋𑌤𑍍𑌤𑌰𑌾𑌰-

𑌣𑍍𑌯𑌾𑌵𑍇𑌧𑍋𑌦𑍍𑌭𑌾𑌸𑌿𑌤𑍇𑌨 𑌸𑍍𑌫𑍁𑌟𑌤𑌰𑌪𑌰𑌿𑌬𑍋𑌧𑌾𑌗𑍍𑌨𑌿𑌨𑌾 𑌦𑌹𑍍𑌯𑌮𑌾𑌨𑍇 ।

𑌕𑌰𑍍𑌮𑌾𑌲𑍀𑌵𑌾𑌸𑌨𑌾𑌤𑌤𑍍𑌕𑍃𑌤𑌤𑌨𑍁𑌭𑍁𑌵𑌨𑌭𑍍𑌰𑌾𑌨𑍍𑌤𑌿𑌕𑌾𑌨𑍍𑌤𑌾𑌰𑌪𑍂𑌰𑍇

𑌦𑌾𑌹𑍍𑌯𑌾𑌭𑌾𑌵𑍇𑌨 𑌵𑌿𑌦𑍍𑌯𑌾𑌶𑌿𑌖𑌿𑌨𑌿 𑌚 𑌵𑌿𑌰𑌤𑍇 𑌤𑍍𑌵𑌨𑍍𑌮𑌯𑍀 𑌖𑌲𑍍𑌵𑌵𑌸𑍍𑌥𑌾 ॥2॥

𑌏𑌵𑌂 𑌤𑍍𑌵𑌤𑍍𑌪𑍍𑌰𑌾𑌪𑍍𑌤𑌿𑌤𑍋𑌽𑌨𑍍𑌯𑍋 𑌨𑌹𑌿 𑌖𑌲𑍁 𑌨𑌿𑌖𑌿𑌲𑌕𑍍𑌲𑍇𑌶𑌹𑌾𑌨𑍇𑌰𑍁𑌪𑌾𑌯𑍋

𑌨𑍈𑌕𑌾𑌨𑍍𑌤𑌾𑌤𑍍𑌯𑌨𑍍𑌤𑌿𑌕𑌾𑌸𑍍𑌤𑍇 𑌕𑍃𑌷𑌿𑌵𑌦𑌗𑌦𑌷𑌾𑌡𑍍𑌗𑍁𑌣𑍍𑌯𑌷𑌟𑍍𑌕𑌰𑍍𑌮𑌯𑍋𑌗𑌾𑌃 ।

𑌦𑍁𑌰𑍍𑌵𑍈𑌕𑌲𑍍𑌯𑍈𑌰𑌕𑌲𑍍𑌯𑌾 𑌅𑌪𑌿 𑌨𑌿𑌗𑌮𑌪𑌥𑌾𑌸𑍍𑌤𑌤𑍍𑌫𑌲𑌾𑌨𑍍𑌯𑌪𑍍𑌯𑌵𑌾𑌪𑍍𑌤𑌾

𑌮𑌤𑍍𑌤𑌾𑌸𑍍𑌤𑍍𑌵𑌾𑌂 𑌵𑌿𑌸𑍍𑌮𑌰𑌨𑍍𑌤𑌃 𑌪𑍍𑌰𑌸𑌜𑌤𑌿 𑌪𑌤𑌨𑍇 𑌯𑌾𑌨𑍍𑌤𑍍𑌯𑌨𑌨𑍍𑌤𑌾𑌨𑍍 𑌵𑌿𑌷𑌾𑌦𑌾𑌨𑍍॥3॥

𑌤𑍍𑌵𑌲𑍍𑌲𑍋𑌕𑌾𑌦𑌨𑍍𑌯𑌲𑍋𑌕𑌃 𑌕𑍍𑌵𑌨𑍁 𑌭𑌯𑌰𑌹𑌿𑌤𑍋 𑌯𑌤𑍍 𑌪𑌰𑌾𑌰𑍍𑌧𑌦𑍍𑌵𑌯𑌾𑌨𑍍𑌤𑍇

𑌤𑍍𑌵𑌦𑍍𑌭𑍀𑌤𑌸𑍍𑌸𑌤𑍍𑌯𑌲𑍋𑌕𑍇𑌽𑌪𑌿 𑌨 𑌸𑍁𑌖𑌵𑌸𑌤𑌿𑌃 𑌪𑌦𑍍𑌮𑌭𑍂𑌃 𑌪𑌦𑍍𑌮𑌨𑌾𑌭 ।

𑌏𑌵𑌂 𑌭𑌾𑌵𑍇 𑌤𑍍𑌵𑌧𑌰𑍍𑌮𑌾𑌰𑍍𑌜𑌿𑌤𑌬𑌹𑍁𑌤𑌮𑌸𑌾𑌂 𑌕𑌾 𑌕𑌥𑌾 𑌨𑌾𑌰𑌕𑌾𑌣𑌾𑌂

𑌤𑌨𑍍𑌮𑍇 𑌤𑍍𑌵𑌂 𑌛𑌿𑌨𑍍𑌧𑌿 𑌬𑌨𑍍𑌧𑌂 𑌵𑌰𑌦𑍍 𑌕𑍃𑌪𑌣𑌬𑌨𑍍𑌧𑍋 𑌕𑍃𑌪𑌾𑌪𑍂𑌰𑌸𑌿𑌨𑍍𑌧𑍋 ॥4॥

𑌯𑌾𑌥𑌾𑌰𑍍𑌥𑍍𑌯𑌾𑌤𑍍𑌤𑍍𑌵𑌨𑍍𑌮𑌯𑌸𑍍𑌯𑍈𑌵 𑌹𑌿 𑌮𑌮 𑌨 𑌵𑌿𑌭𑍋 𑌵𑌸𑍍𑌤𑍁𑌤𑍋 𑌬𑌨𑍍𑌧𑌮𑍋𑌕𑍍𑌷𑍗

𑌮𑌾𑌯𑌾𑌵𑌿𑌦𑍍𑌯𑌾𑌤𑌨𑍁𑌭𑍍𑌯𑌾𑌂 𑌤𑌵 𑌤𑍁 𑌵𑌿𑌰𑌚𑌿𑌤𑍗 𑌸𑍍𑌵𑌪𑍍𑌨𑌬𑍋𑌧𑍋𑌪𑌮𑍗 𑌤𑍗 ।

𑌬𑌦𑍍𑌧𑍇 𑌜𑍀𑌵𑌦𑍍𑌵𑌿𑌮𑍁𑌕𑍍𑌤𑌿𑌂 𑌗𑌤𑌵𑌤𑌿 𑌚 𑌭𑌿𑌦𑌾 𑌤𑌾𑌵𑌤𑍀 𑌤𑌾𑌵𑌦𑍇𑌕𑍋

𑌭𑍁𑌙𑍍𑌕𑍍𑌤𑍇 𑌦𑍇𑌹𑌦𑍍𑌰𑍁𑌮𑌸𑍍𑌥𑍋 𑌵𑌿𑌷𑌯𑌫𑌲𑌰𑌸𑌾𑌨𑍍𑌨𑌾𑌪𑌰𑍋 𑌨𑌿𑌰𑍍𑌵𑍍𑌯𑌥𑌾𑌤𑍍𑌮𑌾 ॥5॥

𑌜𑍀𑌵𑌨𑍍𑌮𑍁𑌕𑍍𑌤𑌤𑍍𑌵𑌮𑍇𑌵𑌂𑌵𑌿𑌧𑌮𑌿𑌤𑌿 𑌵𑌚𑌸𑌾 𑌕𑌿𑌂 𑌫𑌲𑌂 𑌦𑍂𑌰𑌦𑍂𑌰𑍇

𑌤𑌨𑍍𑌨𑌾𑌮𑌾𑌶𑍁𑌦𑍍𑌧𑌬𑍁𑌦𑍍𑌧𑍇𑌰𑍍𑌨 𑌚 𑌲𑌘𑍁 𑌮𑌨𑌸𑌶𑍍𑌶𑍋𑌧𑌨𑌂 𑌭𑌕𑍍𑌤𑌿𑌤𑍋𑌽𑌨𑍍𑌯𑌤𑍍 ।

𑌤𑌨𑍍𑌮𑍇 𑌵𑌿𑌷𑍍𑌣𑍋 𑌕𑍃𑌷𑍀𑌷𑍍𑌠𑌾𑌸𑍍𑌤𑍍𑌵𑌯𑌿 𑌕𑍃𑌤𑌸𑌕𑌲𑌪𑍍𑌰𑌾𑌰𑍍𑌪𑌣𑌂 𑌭𑌕𑍍𑌤𑌿𑌭𑌾𑌰𑌂

𑌯𑍇𑌨 𑌸𑍍𑌯𑌾𑌂 𑌮𑌙𑍍𑌕𑍍𑌷𑍁 𑌕𑌿𑌞𑍍𑌚𑌿𑌦𑍍 𑌗𑍁𑌰𑍁𑌵𑌚𑌨𑌮𑌿𑌲𑌤𑍍𑌤𑍍𑌵𑌤𑍍𑌪𑍍𑌰𑌬𑍋𑌧𑌸𑍍𑌤𑍍𑌵𑌦𑌾𑌤𑍍𑌮𑌾 ॥6॥

𑌶𑌬𑍍𑌦𑍍𑌬𑍍𑌰𑌹𑍍𑌮𑌣𑍍𑌯𑌪𑍀𑌹 𑌪𑍍𑌰𑌯𑌤𑌿𑌤𑌮𑌨𑌸𑌸𑍍𑌤𑍍𑌵𑌾𑌂 𑌨 𑌜𑌾𑌨𑌨𑍍𑌤𑌿 𑌕𑍇𑌚𑌿𑌤𑍍

𑌕𑌷𑍍𑌟𑌂 𑌵𑌨𑍍𑌧𑍍𑌯𑌶𑍍𑌰𑌮𑌾𑌸𑍍𑌤𑍇 𑌚𑌿𑌰𑌤𑌰𑌮𑌿𑌹 𑌗𑌾𑌂 𑌬𑌿𑌭𑍍𑌰𑌤𑍇 𑌨𑌿𑌷𑍍𑌪𑍍𑌰𑌸𑍂𑌤𑌿𑌮𑍍 ।

𑌯𑌸𑍍𑌯𑌾𑌂 𑌵𑌿𑌶𑍍𑌵𑌾𑌭𑌿𑌰𑌾𑌮𑌾𑌸𑍍𑌸𑌕𑌲𑌮𑌲𑌹𑌰𑌾 𑌦𑌿𑌵𑍍𑌯𑌲𑍀𑌲𑌾𑌵𑌤𑌾𑌰𑌾𑌃

𑌸𑌚𑍍𑌚𑌿𑌤𑍍𑌸𑌾𑌨𑍍𑌦𑍍𑌰𑌂 𑌚 𑌰𑍂𑌪𑌂 𑌤𑌵 𑌨 𑌨𑌿𑌗𑌦𑌿𑌤𑌂 𑌤𑌾𑌂 𑌨 𑌵𑌾𑌚𑌂 𑌭𑍍𑌰𑌿𑌯𑌾𑌸𑌮𑍍 ॥7॥

𑌯𑍋 𑌯𑌾𑌵𑌾𑌨𑍍 𑌯𑌾𑌦𑍃𑌶𑍋 𑌵𑌾 𑌤𑍍𑌵𑌮𑌿𑌤𑌿 𑌕𑌿𑌮𑌪𑌿 𑌨𑍈𑌵𑌾𑌵𑌗𑌚𑍍𑌛𑌾𑌮𑌿 𑌭𑍂𑌮𑍍-

𑌨𑍍𑌨𑍇𑌵𑌞𑍍𑌚𑌾𑌨𑌨𑍍𑌯𑌭𑌾𑌵𑌸𑍍𑌤𑍍𑌵𑌦𑌨𑍁𑌭𑌜𑌨𑌮𑍇𑌵𑌾𑌦𑍍𑌰𑌿𑌯𑍇 𑌚𑍈𑌦𑍍𑌯𑌵𑍈𑌰𑌿𑌨𑍍 ।

𑌤𑍍𑌵𑌲𑍍𑌲𑌿𑌙𑍍𑌗𑌾𑌨𑌾𑌂 𑌤𑍍𑌵𑌦𑌙𑍍𑌘𑍍𑌰𑌿𑌪𑍍𑌰𑌿𑌯𑌜𑌨𑌸𑌦𑌸𑌾𑌂 𑌦𑌰𑍍𑌶𑌨𑌸𑍍𑌪𑌰𑍍𑌶𑌨𑌾𑌦𑌿-

𑌰𑍍𑌭𑍂𑌯𑌾𑌨𑍍𑌮𑍇 𑌤𑍍𑌵𑌤𑍍𑌪𑍍𑌰𑌪𑍂𑌜𑌾𑌨𑌤𑌿𑌨𑍁𑌤𑌿𑌗𑍁𑌣𑌕𑌰𑍍𑌮𑌾𑌨𑍁𑌕𑍀𑌰𑍍𑌤𑍍𑌯𑌾𑌦𑌰𑍋𑌽𑌪𑌿 ॥8॥

𑌯𑌦𑍍𑌯𑌲𑍍𑌲𑌭𑍍𑌯𑍇𑌤 𑌤𑌤𑍍𑌤𑌤𑍍𑌤𑌵 𑌸𑌮𑍁𑌪𑌹𑍃𑌤𑌂 𑌦𑍇𑌵 𑌦𑌾𑌸𑍋𑌽𑌸𑍍𑌮𑌿 𑌤𑍇𑌽𑌹𑌂

𑌤𑍍𑌵𑌦𑍍𑌗𑍇𑌹𑍋𑌨𑍍𑌮𑌾𑌰𑍍𑌜𑌨𑌾𑌦𑍍𑌯𑌂 𑌭𑌵𑌤𑍁 𑌮𑌮 𑌮𑍁𑌹𑍁𑌃 𑌕𑌰𑍍𑌮 𑌨𑌿𑌰𑍍𑌮𑌾𑌯𑌮𑍇𑌵 ।

𑌸𑍂𑌰𑍍𑌯𑌾𑌗𑍍𑌨𑌿𑌬𑍍𑌰𑌾𑌹𑍍𑌮𑌣𑌾𑌤𑍍𑌮𑌾𑌦𑌿𑌷𑍁 𑌲𑌸𑌿𑌤𑌚𑌤𑍁𑌰𑍍𑌬𑌾𑌹𑍁𑌮𑌾𑌰𑌾𑌧𑌯𑍇 𑌤𑍍𑌵𑌾𑌂

𑌤𑍍𑌵𑌤𑍍𑌪𑍍𑌰𑍇𑌮𑌾𑌰𑍍𑌦𑍍𑌰𑌤𑍍𑌵𑌰𑍂𑌪𑍋 𑌮𑌮 𑌸𑌤𑌤𑌮𑌭𑌿𑌷𑍍𑌯𑌨𑍍𑌦𑌤𑌾𑌂 𑌭𑌕𑍍𑌤𑌿𑌯𑍋𑌗𑌃 ॥9॥

𑌐𑌕𑍍𑌯𑌂 𑌤𑍇 𑌦𑌾𑌨𑌹𑍋𑌮𑌵𑍍𑌰𑌤𑌨𑌿𑌯𑌮𑌤𑌪𑌸𑍍𑌸𑌾𑌙𑍍𑌖𑍍𑌯𑌯𑍋𑌗𑍈𑌰𑍍𑌦𑍁𑌰𑌾𑌪𑌂

𑌤𑍍𑌵𑌤𑍍𑌸𑌙𑍍𑌗𑍇𑌨𑍈𑌵 𑌗𑍋𑌪𑍍𑌯𑌃 𑌕𑌿𑌲 𑌸𑍁𑌕𑍃𑌤𑌿𑌤𑌮𑌾 𑌪𑍍𑌰𑌾𑌪𑍁𑌰𑌾𑌨𑌨𑍍𑌦𑌸𑌾𑌨𑍍𑌦𑍍𑌰𑌮𑍍 ।

𑌭𑌕𑍍𑌤𑍇𑌷𑍍𑌵𑌨𑍍𑌯𑍇𑌷𑍁 𑌭𑍂𑌯𑌸𑍍𑌸𑍍𑌵𑌪𑌿 𑌬𑌹𑍁𑌮𑌨𑍁𑌷𑍇 𑌭𑌕𑍍𑌤𑌿𑌮𑍇𑌵 𑌤𑍍𑌵𑌮𑌾𑌸𑌾𑌂

𑌤𑌨𑍍𑌮𑍇 𑌤𑍍𑌵𑌦𑍍𑌭𑌕𑍍𑌤𑌿𑌮𑍇𑌵 𑌦𑍍𑌰𑌢𑌯 𑌹𑌰 𑌗𑌦𑌾𑌨𑍍 𑌕𑍃𑌷𑍍𑌣 𑌵𑌾𑌤𑌾𑌲𑌯𑍇𑌶 ॥10॥

Roman (IAST) Transliteration

śuddhā niṣkāmadharmaiḥ pravaragurugirā tatsvarūpaṃ paraṃ te

śuddhaṃ dehendriyādivyapagatamakhilavyāptamāvedayante |

nānātvasthaulyakārśyādi tu guṇajavapussaṅgato'dhyāsitaṃ te

vahnerdāruprabhedeṣviva mahadaṇutādīptatāśāntatādi ||1||

ācāryākhyādharasthāraṇisamanumilacchiṣyarūpottarāra-

ṇyāvedhodbhāsitena sphuṭataraparibodhāgninā dahyamāne |

karmālīvāsanātatkṛtatanubhuvanabhrāntikāntārapūre

dāhyābhāvena vidyāśikhini ca virate tvanmayī khalvavasthā ||2||

evaṃ tvatprāptito'nyo nahi khalu nikhilakleśahānerupāyo

naikāntātyantikāste kṛṣivadagadaṣāḍguṇyaṣaṭkarmayogāḥ |

durvaikalyairakalyā api nigamapathāstatphalānyapyavāptā

mattāstvāṃ vismarantaḥ prasajati patane yāntyanantān viṣādān||3||

tvallokādanyalokaḥ kvanu bhayarahito yat parārdhadvayānte

tvadbhītassatyaloke'pi na sukhavasatiḥ padmabhūḥ padmanābha |

evaṃ bhāve tvadharmārjitabahutamasāṃ kā kathā nārakāṇāṃ

tanme tvaṃ chindhi bandhaṃ varad kṛpaṇabandho kṛpāpūrasindho ||4||

yāthārthyāttvanmayasyaiva hi mama na vibho vastuto bandhamokṣau

māyāvidyātanubhyāṃ tava tu viracitau svapnabodhopamau tau |

baddhe jīvadvimuktiṃ gatavati ca bhidā tāvatī tāvadeko

bhuṅkte dehadrumastho viṣayaphalarasānnāparo nirvyathātmā ||5||

jīvanmuktatvamevaṃvidhamiti vacasā kiṃ phalaṃ dūradūre

tannāmāśuddhabuddherna ca laghu manasaśśodhanaṃ bhaktito'nyat |

tanme viṣṇo kṛṣīṣṭhāstvayi kṛtasakalaprārpaṇaṃ bhaktibhāraṃ

yena syāṃ maṅkṣu kiñcid guruvacanamilattvatprabodhastvadātmā ||6||

śabdbrahmaṇyapīha prayatitamanasastvāṃ na jānanti kecit

kaṣṭaṃ vandhyaśramāste cirataramiha gāṃ bibhrate niṣprasūtim |

yasyāṃ viśvābhirāmāssakalamalaharā divyalīlāvatārāḥ

saccitsāndraṃ ca rūpaṃ tava na nigaditaṃ tāṃ na vācaṃ bhriyāsam ||7||

yo yāvān yādṛśo vā tvamiti kimapi naivāvagacchāmi bhūm-

nnevañcānanyabhāvastvadanubhajanamevādriye caidyavairin |

tvalliṅgānāṃ tvadaṅghripriyajanasadasāṃ darśanasparśanādi-

rbhūyānme tvatprapūjānatinutiguṇakarmānukīrtyādaro'pi ||8||

yadyallabhyeta tattattava samupahṛtaṃ deva dāso'smi te'haṃ

tvadgehonmārjanādyaṃ bhavatu mama muhuḥ karma nirmāyameva |

sūryāgnibrāhmaṇātmādiṣu lasitacaturbāhumārādhaye tvāṃ

tvatpremārdratvarūpo mama satatamabhiṣyandatāṃ bhaktiyogaḥ ||9||

aikyaṃ te dānahomavrataniyamatapassāṅkhyayogairdurāpaṃ

tvatsaṅgenaiva gopyaḥ kila sukṛtitamā prāpurānandasāndram |

bhakteṣvanyeṣu bhūyassvapi bahumanuṣe bhaktimeva tvamāsāṃ

tanme tvadbhaktimeva draḍhaya hara gadān kṛṣṇa vātālayeśa ||10||