Narayaniyam Dashaka 71 - Keshi Tatha Vyomasuravadham

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 71 - 𑌕𑍇𑌶𑍀 𑌤𑌥𑌾 𑌵𑍍𑌯𑍋𑌮𑌾𑌸𑍁𑌰𑌵𑌧𑌮𑍍

Vishnu Grantha

𑌯𑌤𑍍𑌨𑍇𑌷𑍁 𑌸𑌰𑍍𑌵𑍇𑌷𑍍𑌵𑌪𑌿 𑌨𑌾𑌵𑌕𑍇𑌶𑍀 𑌕𑍇𑌶𑍀 𑌸 𑌭𑍋𑌜𑍇𑌶𑌿𑌤𑍁𑌰𑌿𑌷𑍍𑌟𑌬𑌨𑍍𑌧𑍁𑌃 ।

𑌤𑍍𑌵𑌾𑌂 𑌸𑌿𑌨𑍍𑌧𑍁𑌜𑌾𑌵𑌾𑌪𑍍𑌯 𑌇𑌤𑍀𑌵 𑌮𑌤𑍍𑌵𑌾 𑌸𑌮𑍍𑌪𑍍𑌰𑌾𑌪𑍍𑌤𑌵𑌾𑌨𑍍 𑌸𑌿𑌨𑍍𑌧𑍁𑌜𑌵𑌾𑌜𑌿𑌰𑍂𑌪𑌃 ॥1॥

𑌗𑌨𑍍𑌧𑌰𑍍𑌵𑌤𑌾𑌮𑍇𑌷 𑌗𑌤𑍋𑌽𑌪𑌿 𑌰𑍂𑌕𑍍𑌷𑍈𑌰𑍍𑌨𑌾𑌦𑍈𑌃 𑌸𑌮𑍁𑌦𑍍𑌵𑍇𑌜𑌿𑌤𑌸𑌰𑍍𑌵𑌲𑍋𑌕𑌃 ।

𑌭𑌵𑌦𑍍𑌵𑌿𑌲𑍋𑌕𑌾𑌵𑌧𑌿 𑌗𑍋𑌪𑌵𑌾𑌟𑍀𑌂 𑌪𑍍𑌰𑌮𑌰𑍍𑌦𑍍𑌯 𑌪𑌾𑌪𑌃 𑌪𑍁𑌨𑌰𑌾𑌪𑌤𑌤𑍍𑌤𑍍𑌵𑌾𑌮𑍍 ॥2॥

𑌤𑌾𑌰𑍍𑌕𑍍𑌷𑍍𑌯𑌾𑌰𑍍𑌪𑌿𑌤𑌾𑌙𑍍𑌘𑍍𑌰𑍇𑌸𑍍𑌤𑌵 𑌤𑌾𑌰𑍍𑌕𑍍𑌷𑍍𑌯 𑌏𑌷 𑌚𑌿𑌕𑍍𑌷𑍇𑌪 𑌵𑌕𑍍𑌷𑍋𑌭𑍁𑌵𑌿 𑌨𑌾𑌮 𑌪𑌾𑌦𑌮𑍍 ।

𑌭𑍃𑌗𑍋𑌃 𑌪𑌦𑌾𑌘𑌾𑌤𑌕𑌥𑌾𑌂 𑌨𑌿𑌶𑌮𑍍𑌯 𑌸𑍍𑌵𑍇𑌨𑌾𑌪𑌿 𑌶𑌕𑍍𑌯𑌂 𑌤𑌦𑌿𑌤𑍀𑌵 𑌮𑍋𑌹𑌾𑌤𑍍 ॥3॥

𑌪𑍍𑌰𑌵𑌞𑍍𑌚𑌯𑌨𑍍𑌨𑌸𑍍𑌯 𑌖𑍁𑌰𑌾𑌞𑍍𑌚𑌲𑌂 𑌦𑍍𑌰𑌾𑌗𑌮𑍁𑌞𑍍𑌚 𑌚𑌿𑌕𑍍𑌷𑍇𑌪𑌿𑌥 𑌦𑍂𑌰𑌦𑍂𑌰𑌮𑍍

𑌸𑌮𑍍𑌮𑍂𑌰𑍍𑌚𑍍𑌛𑌿𑌤𑍋𑌽𑌪𑌿 𑌹𑍍𑌯𑌤𑌿𑌮𑍂𑌰𑍍𑌚𑍍𑌛𑌿𑌤𑍇𑌨 𑌕𑍍𑌰𑍋𑌧𑍋𑌷𑍍𑌮𑌣𑌾 𑌖𑌾𑌦𑌿𑌤𑍁𑌮𑌾𑌦𑍍𑌰𑍁𑌤𑌸𑍍𑌤𑍍𑌵𑌾𑌮𑍍 ॥4॥

𑌤𑍍𑌵𑌂 𑌵𑌾𑌹𑌦𑌣𑍍𑌡𑍇 𑌕𑍃𑌤𑌧𑍀𑌶𑍍𑌚 𑌵𑌾𑌹𑌾𑌦𑌣𑍍𑌡𑌂 𑌨𑍍𑌯𑌧𑌾𑌸𑍍𑌤𑌸𑍍𑌯 𑌮𑍁𑌖𑍇 𑌤𑌦𑌾𑌨𑍀𑌮𑍍 ।

𑌤𑌦𑍍 𑌵𑍃𑌦𑍍𑌧𑌿𑌰𑍁𑌦𑍍𑌧𑌶𑍍𑌵𑌸𑌨𑍋 𑌗𑌤𑌾𑌸𑍁𑌃 𑌸𑌪𑍍𑌤𑍀𑌭𑌵𑌨𑍍𑌨𑌪𑍍𑌯𑌯𑌮𑍈𑌕𑍍𑌯𑌮𑌾𑌗𑌾𑌤𑍍 ॥5॥

𑌆𑌲𑌮𑍍𑌭𑌮𑌾𑌤𑍍𑌰𑍇𑌣 𑌪𑌶𑍋𑌃 𑌸𑍁𑌰𑌾𑌣𑌾𑌂 𑌪𑍍𑌰𑌸𑌾𑌦𑌕𑍇 𑌨𑍂𑌤𑍍𑌨 𑌇𑌵𑌾𑌶𑍍𑌵𑌮𑍇𑌧𑍇 ।

𑌕𑍃𑌤𑍇 𑌤𑍍𑌵𑌯𑌾 𑌹𑌰𑍍𑌷𑌵𑌶𑌾𑌤𑍍 𑌸𑍁𑌰𑍇𑌨𑍍𑌦𑍍𑌰𑌾𑌸𑍍𑌤𑍍𑌵𑌾𑌂 𑌤𑍁𑌷𑍍𑌟𑍁𑌵𑍁𑌃 𑌕𑍇𑌶𑌵𑌨𑌾𑌮𑌧𑍇𑌯𑌮𑍍 ॥6॥

𑌕𑌂𑌸𑌾𑌯 𑌤𑍇 𑌶𑍗𑌰𑌿𑌸𑍁𑌤𑌤𑍍𑌵𑌮𑍁𑌕𑍍𑌤𑍍𑌵𑌾 𑌤𑌂 𑌤𑌦𑍍𑌵𑌧𑍋𑌤𑍍𑌕𑌂 𑌪𑍍𑌰𑌤𑌿𑌰𑍁𑌧𑍍𑌯 𑌵𑌾𑌚𑌾।

𑌪𑍍𑌰𑌾𑌪𑍍𑌤𑍇𑌨 𑌕𑍇𑌶𑌿𑌕𑍍𑌷𑌪𑌣𑌾𑌵𑌸𑌾𑌨𑍇 𑌶𑍍𑌰𑍀𑌨𑌾𑌰𑌦𑍇𑌨 𑌤𑍍𑌵𑌮𑌭𑌿𑌷𑍍𑌟𑍁𑌤𑍋𑌽𑌭𑍂𑌃 ॥7॥

𑌕𑌦𑌾𑌪𑌿 𑌗𑍋𑌪𑍈𑌃 𑌸𑌹 𑌕𑌾𑌨𑌨𑌾𑌨𑍍𑌤𑍇 𑌨𑌿𑌲𑌾𑌯𑌨𑌕𑍍𑌰𑍀𑌡𑌨𑌲𑍋𑌲𑍁𑌪𑌂 𑌤𑍍𑌵𑌾𑌮𑍍 ।

𑌮𑌯𑌾𑌤𑍍𑌮𑌜𑌃 𑌪𑍍𑌰𑌾𑌪 𑌦𑍁𑌰𑌨𑍍𑌤𑌮𑌾𑌯𑍋 𑌵𑍍𑌯𑍋𑌮𑌾𑌭𑌿𑌧𑍋 𑌵𑍍𑌯𑍋𑌮𑌚𑌰𑍋𑌪𑌰𑍋𑌧𑍀 ॥8॥

𑌸 𑌚𑍋𑌰𑌪𑌾𑌲𑌾𑌯𑌿𑌤𑌵𑌲𑍍𑌲𑌵𑍇𑌷𑍁 𑌚𑍋𑌰𑌾𑌯𑌿𑌤𑍋 𑌗𑍋𑌪𑌶𑌿𑌶𑍂𑌨𑍍 𑌪𑌶𑍂𑌂𑌶𑍍𑌚

𑌗𑍁𑌹𑌾𑌸𑍁 𑌕𑍃𑌤𑍍𑌵𑌾 𑌪𑌿𑌦𑌧𑍇 𑌶𑌿𑌲𑌾𑌭𑌿𑌸𑍍𑌤𑍍𑌵𑌯𑌾 𑌚 𑌬𑍁𑌦𑍍𑌧𑍍𑌵𑌾 𑌪𑌰𑌿𑌮𑌰𑍍𑌦𑌿𑌤𑍋𑌽𑌭𑍂𑌤𑍍 ॥9॥

𑌏𑌵𑌂 𑌵𑌿𑌧𑍈𑌶𑍍𑌚𑌾𑌦𑍍𑌭𑍁𑌤𑌕𑍇𑌲𑌿𑌭𑍇𑌦𑍈𑌰𑌾𑌨𑌨𑍍𑌦𑌮𑍂𑌰𑍍𑌚𑍍𑌛𑌾𑌮𑌤𑍁𑌲𑌾𑌂 𑌵𑍍𑌰𑌜𑌸𑍍𑌯 ।

𑌪𑌦𑍇 𑌪𑌦𑍇 𑌨𑍂𑌤𑌨𑌯𑌨𑍍𑌨𑌸𑍀𑌮𑌾𑌂 𑌪𑌰𑌾𑌤𑍍𑌮𑌰𑍂𑌪𑌿𑌨𑍍 𑌪𑌵𑌨𑍇𑌶 𑌪𑌾𑌯𑌾𑌃 ॥10॥

Roman (IAST) Transliteration

yatneṣu sarveṣvapi nāvakeśī keśī sa bhojeśituriṣṭabandhuḥ |

tvāṃ sindhujāvāpya itīva matvā samprāptavān sindhujavājirūpaḥ ||1||

gandharvatāmeṣa gato'pi rūkṣairnādaiḥ samudvejitasarvalokaḥ |

bhavadvilokāvadhi gopavāṭīṃ pramardya pāpaḥ punarāpatattvām ||2||

tārkṣyārpitāṅghrestava tārkṣya eṣa cikṣepa vakṣobhuvi nāma pādam |

bhṛgoḥ padāghātakathāṃ niśamya svenāpi śakyaṃ taditīva mohāt ||3||

pravañcayannasya khurāñcalaṃ drāgamuñca cikṣepitha dūradūram

sammūrcchito'pi hyatimūrcchitena krodhoṣmaṇā khāditumādrutastvām ||4||

tvaṃ vāhadaṇḍe kṛtadhīśca vāhādaṇḍaṃ nyadhāstasya mukhe tadānīm |

tad vṛddhiruddhaśvasano gatāsuḥ saptībhavannapyayamaikyamāgāt ||5||

ālambhamātreṇa paśoḥ surāṇāṃ prasādake nūtna ivāśvamedhe |

kṛte tvayā harṣavaśāt surendrāstvāṃ tuṣṭuvuḥ keśavanāmadheyam ||6||

kaṃsāya te śaurisutatvamuktvā taṃ tadvadhotkaṃ pratirudhya vācā|

prāptena keśikṣapaṇāvasāne śrīnāradena tvamabhiṣṭuto'bhūḥ ||7||

kadāpi gopaiḥ saha kānanānte nilāyanakrīḍanalolupaṃ tvām |

mayātmajaḥ prāpa durantamāyo vyomābhidho vyomacaroparodhī ||8||

sa corapālāyitavallaveṣu corāyito gopaśiśūn paśūṃśca

guhāsu kṛtvā pidadhe śilābhistvayā ca buddhvā parimardito'bhūt ||9||

evaṃ vidhaiścādbhutakelibhedairānandamūrcchāmatulāṃ vrajasya |

pade pade nūtanayannasīmāṃ parātmarūpin pavaneśa pāyāḥ ||10||