Narayaniyam Dashaka 66 - Gopijanahladanam

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 66 - 𑌗𑍋𑌪𑍀𑌜𑌨𑌾𑌹𑍍𑌲𑌾𑌦𑌨𑌮𑍍

Vishnu Grantha

𑌉𑌪𑌯𑌾𑌤𑌾𑌨𑌾𑌂 𑌸𑍁𑌦𑍃𑌶𑌾𑌂 𑌕𑍁𑌸𑍁𑌮𑌾𑌯𑍁𑌧𑌬𑌾𑌣𑌪𑌾𑌤𑌵𑌿𑌵𑌶𑌾𑌨𑌾𑌮𑍍 ।

𑌅𑌭𑌿𑌵𑌾𑌞𑍍𑌛𑌿𑌤𑌂 𑌵𑌿𑌧𑌾𑌤𑍁𑌂 𑌕𑍃𑌤𑌮𑌤𑌿𑌰𑌪𑌿 𑌤𑌾 𑌜𑌗𑌾𑌥 𑌵𑌾𑌮𑌮𑌿𑌵 ॥1॥

𑌗𑌗𑌨𑌗𑌤𑌂 𑌮𑍁𑌨𑌿𑌨𑌿𑌵𑌹𑌂 𑌶𑍍𑌰𑌾𑌵𑌯𑌿𑌤𑍁𑌂 𑌜𑌗𑌿𑌥 𑌕𑍁𑌲𑌵𑌧𑍂𑌧𑌰𑍍𑌮𑌮𑍍 ।

𑌧𑌰𑍍𑌮𑍍𑌯𑌂 𑌖𑌲𑍁 𑌤𑍇 𑌵𑌚𑌨𑌂 𑌕𑌰𑍍𑌮 𑌤𑍁 𑌨𑍋 𑌨𑌿𑌰𑍍𑌮𑌲𑌸𑍍𑌯 𑌵𑌿𑌶𑍍𑌵𑌾𑌸𑍍𑌯𑌮𑍍 ॥2॥

𑌆𑌕𑌰𑍍𑌣𑍍𑌯 𑌤𑍇 𑌪𑍍𑌰𑌤𑍀𑌪𑌾𑌂 𑌵𑌾𑌣𑍀𑌮𑍇𑌣𑍀𑌦𑍃𑌶𑌃 𑌪𑌰𑌂 𑌦𑍀𑌨𑌾𑌃 ।

𑌮𑌾 𑌮𑌾 𑌕𑌰𑍁𑌣𑌾𑌸𑌿𑌨𑍍𑌧𑍋 𑌪𑌰𑌿𑌤𑍍𑌯𑌜𑍇𑌤𑍍𑌯𑌤𑌿𑌚𑌿𑌰𑌂 𑌵𑌿𑌲𑍇𑌪𑍁𑌸𑍍𑌤𑌾𑌃 ॥3॥

𑌤𑌾𑌸𑌾𑌂 𑌰𑍁𑌦𑌿𑌤𑍈𑌰𑍍𑌲𑌪𑌿𑌤𑍈𑌃 𑌕𑌰𑍁𑌣𑌾𑌕𑍁𑌲𑌮𑌾𑌨𑌸𑍋 𑌮𑍁𑌰𑌾𑌰𑍇 𑌤𑍍𑌵𑌮𑍍 ।

𑌤𑌾𑌭𑌿𑌸𑍍𑌸𑌮𑌂 𑌪𑍍𑌰𑌵𑍃𑌤𑍍𑌤𑍋 𑌯𑌮𑍁𑌨𑌾𑌪𑍁𑌲𑌿𑌨𑍇𑌷𑍁 𑌕𑌾𑌮𑌮𑌭𑌿𑌰𑌨𑍍𑌤𑍁𑌮𑍍 ॥4॥

𑌚𑌨𑍍𑌦𑍍𑌰𑌕𑌰𑌸𑍍𑌯𑌨𑍍𑌦𑌲𑌸𑌤𑍍𑌸𑍁𑌨𑍍𑌦𑌰𑌯𑌮𑍁𑌨𑌾𑌤𑌟𑌾𑌨𑍍𑌤𑌵𑍀𑌥𑍀𑌷𑍁 ।

𑌗𑍋𑌪𑍀𑌜𑌨𑍋𑌤𑍍𑌤𑌰𑍀𑌯𑍈𑌰𑌾𑌪𑌾𑌦𑌿𑌤𑌸𑌂𑌸𑍍𑌤𑌰𑍋 𑌨𑍍𑌯𑌷𑍀𑌦𑌸𑍍𑌤𑍍𑌵𑌮𑍍 ॥5॥

𑌸𑍁𑌮𑌧𑍁𑌰𑌨𑌰𑍍𑌮𑌾𑌲𑌪𑌨𑍈𑌃 𑌕𑌰𑌸𑌙𑍍𑌗𑍍𑌰𑌹𑌣𑍈𑌶𑍍𑌚 𑌚𑍁𑌮𑍍𑌬𑌨𑍋𑌲𑍍𑌲𑌾𑌸𑍈𑌃 ।

𑌗𑌾𑌢𑌾𑌲𑌿𑌙𑍍𑌗𑌨𑌸𑌙𑍍𑌗𑍈𑌸𑍍𑌤𑍍𑌵𑌮𑌙𑍍𑌗𑌨𑌾𑌲𑍋𑌕𑌮𑌾𑌕𑍁𑌲𑍀𑌚𑌕𑍃𑌷𑍇 ॥6॥

𑌵𑌾𑌸𑍋𑌹𑌰𑌣𑌦𑌿𑌨𑍇 𑌯𑌦𑍍𑌵𑌾𑌸𑍋𑌹𑌰𑌣𑌂 𑌪𑍍𑌰𑌤𑌿𑌶𑍍𑌰𑍁𑌤𑌂 𑌤𑌾𑌸𑌾𑌮𑍍 ।

𑌤𑌦𑌪𑌿 𑌵𑌿𑌭𑍋 𑌰𑌸𑌵𑌿𑌵𑌶𑌸𑍍𑌵𑌾𑌨𑍍𑌤𑌾𑌨𑌾𑌂 𑌕𑌾𑌨𑍍𑌤 𑌸𑍁𑌭𑍍𑌰𑍁𑌵𑌾𑌮𑌦𑌧𑌾𑌃 ॥7॥

𑌕𑌨𑍍𑌦𑌲𑌿𑌤𑌘𑌰𑍍𑌮𑌲𑍇𑌶𑌂 𑌕𑍁𑌨𑍍𑌦𑌮𑍃𑌦𑍁𑌸𑍍𑌮𑍇𑌰𑌵𑌕𑍍𑌤𑍍𑌰𑌪𑌾𑌥𑍋𑌜𑌮𑍍 ।

𑌨𑌨𑍍𑌦𑌸𑍁𑌤 𑌤𑍍𑌵𑌾𑌂 𑌤𑍍𑌰𑌿𑌜𑌗𑌤𑍍𑌸𑍁𑌨𑍍𑌦𑌰𑌮𑍁𑌪𑌗𑍂𑌹𑍍𑌯 𑌨𑌨𑍍𑌦𑌿𑌤𑌾 𑌬𑌾𑌲𑌾𑌃 ॥8॥

𑌵𑌿𑌰𑌹𑍇𑌷𑍍𑌵𑌙𑍍𑌗𑌾𑌰𑌮𑌯𑌃 𑌶𑍃𑌙𑍍𑌗𑌾𑌰𑌮𑌯𑌶𑍍𑌚 𑌸𑌙𑍍𑌗𑌮𑍇 𑌹𑌿 𑌤𑍍𑌵𑌮𑍍 𑌨𑌿𑌤𑌰𑌾𑌮𑌙𑍍𑌗𑌾𑌰𑌮𑌯𑌸𑍍𑌤𑌤𑍍𑌰 𑌪𑍁𑌨𑌸𑍍𑌸𑌙𑍍𑌗𑌮𑍇𑌽𑌪𑌿 𑌚𑌿𑌤𑍍𑌰𑌮𑌿𑌦𑌮𑍍 ॥9॥

𑌰𑌾𑌧𑌾𑌤𑍁𑌙𑍍𑌗𑌪𑌯𑍋𑌧𑌰𑌸𑌾𑌧𑍁𑌪𑌰𑍀𑌰𑌮𑍍𑌭𑌲𑍋𑌲𑍁𑌪𑌾𑌤𑍍𑌮𑌾𑌨𑌮𑍍 ।

𑌆𑌰𑌾𑌧𑌯𑍇 𑌭𑌵𑌨𑍍𑌤𑌂 𑌪𑌵𑌨𑌪𑍁𑌰𑌾𑌧𑍀𑌶 𑌶𑌮𑌯 𑌸𑌕𑌲𑌗𑌦𑌾𑌨𑍍 ॥10॥

Roman (IAST) Transliteration

upayātānāṃ sudṛśāṃ kusumāyudhabāṇapātavivaśānām |

abhivāñchitaṃ vidhātuṃ kṛtamatirapi tā jagātha vāmamiva ||1||

gaganagataṃ muninivahaṃ śrāvayituṃ jagitha kulavadhūdharmam |

dharmyaṃ khalu te vacanaṃ karma tu no nirmalasya viśvāsyam ||2||

ākarṇya te pratīpāṃ vāṇīmeṇīdṛśaḥ paraṃ dīnāḥ |

mā mā karuṇāsindho parityajetyaticiraṃ vilepustāḥ ||3||

tāsāṃ ruditairlapitaiḥ karuṇākulamānaso murāre tvam |

tābhissamaṃ pravṛtto yamunāpulineṣu kāmamabhirantum ||4||

candrakarasyandalasatsundarayamunātaṭāntavīthīṣu |

gopījanottarīyairāpāditasaṃstaro nyaṣīdastvam ||5||

sumadhuranarmālapanaiḥ karasaṅgrahaṇaiśca cumbanollāsaiḥ |

gāḍhāliṅganasaṅgaistvamaṅganālokamākulīcakṛṣe ||6||

vāsoharaṇadine yadvāsoharaṇaṃ pratiśrutaṃ tāsām |

tadapi vibho rasavivaśasvāntānāṃ kānta subhruvāmadadhāḥ ||7||

kandalitagharmaleśaṃ kundamṛdusmeravaktrapāthojam |

nandasuta tvāṃ trijagatsundaramupagūhya nanditā bālāḥ ||8||

viraheṣvaṅgāramayaḥ śṛṅgāramayaśca saṅgame hi tvam nitarāmaṅgāramayastatra punassaṅgame'pi citramidam ||9||

rādhātuṅgapayodharasādhuparīrambhalolupātmānam |

ārādhaye bhavantaṃ pavanapurādhīśa śamaya sakalagadān ||10||