Narayaniyam Dashaka 59 - Venuganavarnanam

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 59 - 𑌵𑍇𑌣𑍁𑌗𑌾𑌨𑌵𑌰𑍍𑌣𑌨𑌮𑍍

Vishnu Grantha

𑌤𑍍𑌵𑌦𑍍𑌵𑌪𑍁𑌰𑍍𑌨𑌵𑌕𑌲𑌾𑌯𑌕𑍋𑌮𑌲𑌂 𑌪𑍍𑌰𑍇𑌮𑌦𑍋𑌹𑌨𑌮𑌶𑍇𑌷𑌮𑍋𑌹𑌨𑌮𑍍 ।

𑌬𑍍𑌰𑌹𑍍𑌮 𑌤𑌤𑍍𑌤𑍍𑌵𑌪𑌰𑌚𑌿𑌨𑍍𑌮𑍁𑌦𑌾𑌤𑍍𑌮𑌕𑌂 𑌵𑍀𑌕𑍍𑌷𑍍𑌯 𑌸𑌮𑍍𑌮𑍁𑌮𑍁𑌹𑍁𑌰𑌨𑍍𑌵𑌹𑌂 𑌸𑍍𑌤𑍍𑌰𑌿𑌯𑌃 ॥1॥

𑌮𑌨𑍍𑌮𑌥𑍋𑌨𑍍𑌮𑌥𑌿𑌤𑌮𑌾𑌨𑌸𑌾𑌃 𑌕𑍍𑌰𑌮𑌾𑌤𑍍𑌤𑍍𑌵𑌦𑍍𑌵𑌿𑌲𑍋𑌕𑌨𑌰𑌤𑌾𑌸𑍍𑌤𑌤𑌸𑍍𑌤𑌤𑌃 ।

𑌗𑍋𑌪𑌿𑌕𑌾𑌸𑍍𑌤𑌵 𑌨 𑌸𑍇𑌹𑌿𑌰𑍇 𑌹𑌰𑍇 𑌕𑌾𑌨𑌨𑍋𑌪𑌗𑌤𑌿𑌮𑌪𑍍𑌯𑌹𑌰𑍍𑌮𑍁𑌖𑍇 ॥2॥

𑌨𑌿𑌰𑍍𑌗𑌤𑍇 𑌭𑌵𑌤𑌿 𑌦𑌤𑍍𑌤𑌦𑍃𑌷𑍍𑌟𑌯𑌸𑍍𑌤𑍍𑌵𑌦𑍍𑌗𑌤𑍇𑌨 𑌮𑌨𑌸𑌾 𑌮𑍃𑌗𑍇𑌕𑍍𑌷𑌣𑌾𑌃 ।

𑌵𑍇𑌣𑍁𑌨𑌾𑌦𑌮𑍁𑌪𑌕𑌰𑍍𑌣𑍍𑌯 𑌦𑍂𑌰𑌤𑌸𑍍𑌤𑍍𑌵𑌦𑍍𑌵𑌿𑌲𑌾𑌸𑌕𑌥𑌯𑌾𑌽𑌭𑌿𑌰𑍇𑌮𑌿𑌰𑍇 ॥3॥

𑌕𑌾𑌨𑌨𑌾𑌨𑍍𑌤𑌮𑌿𑌤𑌵𑌾𑌨𑍍 𑌭𑌵𑌾𑌨𑌪𑌿 𑌸𑍍𑌨𑌿𑌗𑍍𑌧𑌪𑌾𑌦𑌪𑌤𑌲𑍇 𑌮𑌨𑍋𑌰𑌮𑍇 ।

𑌵𑍍𑌯𑌤𑍍𑌯𑌯𑌾𑌕𑌲𑌿𑌤𑌪𑌾𑌦𑌮𑌾𑌸𑍍𑌥𑌿𑌤𑌃 𑌪𑍍𑌰𑌤𑍍𑌯𑌪𑍂𑌰𑌯𑌤 𑌵𑍇𑌣𑍁𑌨𑌾𑌲𑌿𑌕𑌾𑌮𑍍 ॥4॥

𑌮𑌾𑌰𑌬𑌾𑌣𑌧𑍁𑌤𑌖𑍇𑌚𑌰𑍀𑌕𑍁𑌲𑌂 𑌨𑌿𑌰𑍍𑌵𑌿𑌕𑌾𑌰𑌪𑌶𑍁𑌪𑌕𑍍𑌷𑌿𑌮𑌣𑍍𑌡𑌲𑌮𑍍 ।

𑌦𑍍𑌰𑌾𑌵𑌣𑌂 𑌚 𑌦𑍃𑌷𑌦𑌾𑌮𑌪𑌿 𑌪𑍍𑌰𑌭𑍋 𑌤𑌾𑌵𑌕𑌂 𑌵𑍍𑌯𑌜𑌨𑌿 𑌵𑍇𑌣𑍁𑌕𑍂𑌜𑌿𑌤𑌮𑍍 ॥5॥

𑌵𑍇𑌣𑍁𑌰𑌨𑍍𑌧𑍍𑌰𑌤𑌰𑌲𑌾𑌙𑍍𑌗𑍁𑌲𑍀𑌦𑌲𑌂 𑌤𑌾𑌲𑌸𑌞𑍍𑌚𑌲𑌿𑌤𑌪𑌾𑌦𑌪𑌲𑍍𑌲𑌵𑌮𑍍 ।

𑌤𑌤𑍍 𑌸𑍍𑌥𑌿𑌤𑌂 𑌤𑌵 𑌪𑌰𑍋𑌕𑍍𑌷𑌮𑌪𑍍𑌯𑌹𑍋 𑌸𑌂𑌵𑌿𑌚𑌿𑌨𑍍𑌤𑍍𑌯 𑌮𑍁𑌮𑍁𑌹𑍁𑌰𑍍𑌵𑍍𑌰𑌜𑌾𑌙𑍍𑌗𑌨𑌾𑌃 ॥6॥

𑌨𑌿𑌰𑍍𑌵𑌿𑌶𑌙𑍍𑌕𑌭𑌵𑌦𑌙𑍍𑌗𑌦𑌰𑍍𑌶𑌿𑌨𑍀𑌃 𑌖𑍇𑌚𑌰𑍀𑌃 𑌖𑌗𑌮𑍃𑌗𑌾𑌨𑍍 𑌪𑌶𑍂𑌨𑌪𑌿 ।

𑌤𑍍𑌵𑌤𑍍𑌪𑌦𑌪𑍍𑌰𑌣𑌯𑌿 𑌕𑌾𑌨𑌨𑌂 𑌚 𑌤𑌾𑌃 𑌧𑌨𑍍𑌯𑌧𑌨𑍍𑌯𑌮𑌿𑌤𑌿 𑌨𑌨𑍍𑌵𑌮𑌾𑌨𑌯𑌨𑍍 ॥7॥

𑌆𑌪𑌿𑌬𑍇𑌯𑌮𑌧𑌰𑌾𑌮𑍃𑌤𑌂 𑌕𑌦𑌾 𑌵𑍇𑌣𑍁𑌭𑍁𑌕𑍍𑌤𑌰𑌸𑌶𑍇𑌷𑌮𑍇𑌕𑌦𑌾 ।

𑌦𑍂𑌰𑌤𑍋 𑌬𑌤 𑌕𑍃𑌤𑌂 𑌦𑍁𑌰𑌾𑌶𑌯𑍇𑌤𑍍𑌯𑌾𑌕𑍁𑌲𑌾 𑌮𑍁𑌹𑍁𑌰𑌿𑌮𑌾𑌃 𑌸𑌮𑌾𑌮𑍁𑌹𑌨𑍍 ॥8॥

𑌪𑍍𑌰𑌤𑍍𑌯𑌹𑌂 𑌚 𑌪𑍁𑌨𑌰𑌿𑌤𑍍𑌥𑌮𑌙𑍍𑌗𑌨𑌾𑌶𑍍𑌚𑌿𑌤𑍍𑌤𑌯𑍋𑌨𑌿𑌜𑌨𑌿𑌤𑌾𑌦𑌨𑍁𑌗𑍍𑌰𑌹𑌾𑌤𑍍 ।

𑌬𑌦𑍍𑌧𑌰𑌾𑌗𑌵𑌿𑌵𑌶𑌾𑌸𑍍𑌤𑍍𑌵𑌯𑌿 𑌪𑍍𑌰𑌭𑍋 𑌨𑌿𑌤𑍍𑌯𑌮𑌾𑌪𑍁𑌰𑌿𑌹 𑌕𑍃𑌤𑍍𑌯𑌮𑍂𑌢𑌤𑌾𑌮𑍍 ॥9॥

𑌰𑌾𑌗𑌸𑍍𑌤𑌾𑌵𑌜𑍍𑌜𑌾𑌯𑌤𑍇 𑌹𑌿 𑌸𑍍𑌵𑌭𑌾𑌵𑌾-

𑌨𑍍𑌮𑍋𑌕𑍍𑌷𑍋𑌪𑌾𑌯𑍋 𑌯𑌤𑍍𑌨𑌤𑌃 𑌸𑍍𑌯𑌾𑌨𑍍𑌨 𑌵𑌾 𑌸𑍍𑌯𑌾𑌤𑍍 ।

𑌤𑌾𑌸𑌾𑌂 𑌤𑍍𑌵𑍇𑌕𑌂 𑌤𑌦𑍍𑌦𑍍𑌵𑌯𑌂 𑌲𑌬𑍍𑌧𑌮𑌾𑌸𑍀𑌤𑍍

𑌭𑌾𑌗𑍍𑌯𑌂 𑌭𑌾𑌗𑍍𑌯𑌂 𑌪𑌾𑌹𑌿 𑌮𑌾𑌂 𑌮𑌾𑌰𑍁𑌤𑍇𑌶 ॥10॥

Roman (IAST) Transliteration

tvadvapurnavakalāyakomalaṃ premadohanamaśeṣamohanam |

brahma tattvaparacinmudātmakaṃ vīkṣya sammumuhuranvahaṃ striyaḥ ||1||

manmathonmathitamānasāḥ kramāttvadvilokanaratāstatastataḥ |

gopikāstava na sehire hare kānanopagatimapyaharmukhe ||2||

nirgate bhavati dattadṛṣṭayastvadgatena manasā mṛgekṣaṇāḥ |

veṇunādamupakarṇya dūratastvadvilāsakathayā'bhiremire ||3||

kānanāntamitavān bhavānapi snigdhapādapatale manorame |

vyatyayākalitapādamāsthitaḥ pratyapūrayata veṇunālikām ||4||

mārabāṇadhutakhecarīkulaṃ nirvikārapaśupakṣimaṇḍalam |

drāvaṇaṃ ca dṛṣadāmapi prabho tāvakaṃ vyajani veṇukūjitam ||5||

veṇurandhrataralāṅgulīdalaṃ tālasañcalitapādapallavam |

tat sthitaṃ tava parokṣamapyaho saṃvicintya mumuhurvrajāṅganāḥ ||6||

nirviśaṅkabhavadaṅgadarśinīḥ khecarīḥ khagamṛgān paśūnapi |

tvatpadapraṇayi kānanaṃ ca tāḥ dhanyadhanyamiti nanvamānayan ||7||

āpibeyamadharāmṛtaṃ kadā veṇubhuktarasaśeṣamekadā |

dūrato bata kṛtaṃ durāśayetyākulā muhurimāḥ samāmuhan ||8||

pratyahaṃ ca punaritthamaṅganāścittayonijanitādanugrahāt |

baddharāgavivaśāstvayi prabho nityamāpuriha kṛtyamūḍhatām ||9||

rāgastāvajjāyate hi svabhāvā-

nmokṣopāyo yatnataḥ syānna vā syāt |

tāsāṃ tvekaṃ taddvayaṃ labdhamāsīt

bhāgyaṃ bhāgyaṃ pāhi māṃ māruteśa ||10||