Narayaniyam Dashaka 53 - Dhenukasuravadham

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 53 - 𑌧𑍇𑌨𑍁𑌕𑌾𑌸𑍁𑌰𑌵𑌧𑌮𑍍

Vishnu Grantha

𑌅𑌤𑍀𑌤𑍍𑌯 𑌬𑌾𑌲𑍍𑌯𑌂 𑌜𑌗𑌤𑌾𑌂 𑌪𑌤𑍇 𑌤𑍍𑌵𑌮𑍁𑌪𑍇𑌤𑍍𑌯 𑌪𑍗𑌗𑌣𑍍𑌡𑌵𑌯𑍋 𑌮𑌨𑍋𑌜𑍍𑌞𑌮𑍍 ।

𑌉𑌪𑍇𑌕𑍍𑌷𑍍𑌯 𑌵𑌤𑍍𑌸𑌾𑌵𑌨𑌮𑍁𑌤𑍍𑌸𑌵𑍇𑌨 𑌪𑍍𑌰𑌾𑌵𑌰𑍍𑌤𑌥𑌾 𑌗𑍋𑌗𑌣𑌪𑌾𑌲𑌨𑌾𑌯𑌾𑌮𑍍 ॥1॥

𑌉𑌪𑌕𑍍𑌰𑌮𑌸𑍍𑌯𑌾𑌨𑍁𑌗𑍁𑌣𑍈𑌵 𑌸𑍇𑌯𑌂 𑌮𑌰𑍁𑌤𑍍𑌪𑍁𑌰𑌾𑌧𑍀𑌶 𑌤𑌵 𑌪𑍍𑌰𑌵𑍃𑌤𑍍𑌤𑌿𑌃 ।

𑌗𑍋𑌤𑍍𑌰𑌾𑌪𑌰𑌿𑌤𑍍𑌰𑌾𑌣𑌕𑍃𑌤𑍇𑌽𑌵𑌤𑍀𑌰𑍍𑌣𑌸𑍍𑌤𑌦𑍇𑌵 𑌦𑍇𑌵𑌾𑌽𑌽𑌰𑌭𑌥𑌾𑌸𑍍𑌤𑌦𑌾 𑌯𑌤𑍍 ॥2॥

𑌕𑌦𑌾𑌪𑌿 𑌰𑌾𑌮𑍇𑌣 𑌸𑌮𑌂 𑌵𑌨𑌾𑌨𑍍𑌤𑍇 𑌵𑌨𑌶𑍍𑌰𑌿𑌯𑌂 𑌵𑍀𑌕𑍍𑌷𑍍𑌯 𑌚𑌰𑌨𑍍 𑌸𑍁𑌖𑍇𑌨 ।

𑌶𑍍𑌰𑍀𑌦𑌾𑌮𑌨𑌾𑌮𑍍𑌨𑌃 𑌸𑍍𑌵𑌸𑌖𑌸𑍍𑌯 𑌵𑌾𑌚𑌾 𑌮𑍋𑌦𑌾𑌦𑌗𑌾 𑌧𑍇𑌨𑍁𑌕𑌕𑌾𑌨𑌨𑌂 𑌤𑍍𑌵𑌮𑍍 ॥3॥

𑌉𑌤𑍍𑌤𑌾𑌲𑌤𑌾𑌲𑍀𑌨𑌿𑌵𑌹𑍇 𑌤𑍍𑌵𑌦𑍁𑌕𑍍𑌤𑍍𑌯𑌾 𑌬𑌲𑍇𑌨 𑌧𑍂𑌤𑍇𑌽𑌥 𑌬𑌲𑍇𑌨 𑌦𑍋𑌰𑍍𑌭𑍍𑌯𑌾𑌮𑍍 ।

𑌮𑍃𑌦𑍁𑌃 𑌖𑌰𑌶𑍍𑌚𑌾𑌭𑍍𑌯𑌪𑌤𑌤𑍍𑌪𑍁𑌰𑌸𑍍𑌤𑌾𑌤𑍍 𑌫𑌲𑍋𑌤𑍍𑌕𑌰𑍋 𑌧𑍇𑌨𑍁𑌕𑌦𑌾𑌨𑌵𑍋𑌽𑌪𑌿 ॥4॥

𑌸𑌮𑍁𑌦𑍍𑌯𑌤𑍋 𑌧𑍈𑌨𑍁𑌕𑌪𑌾𑌲𑌨𑍇𑌽𑌹𑌂 𑌕𑌥𑌂 𑌵𑌧𑌂 𑌧𑍈𑌨𑍁𑌕𑌮𑌦𑍍𑌯 𑌕𑍁𑌰𑍍𑌵𑍇 ।

𑌇𑌤𑍀𑌵 𑌮𑌤𑍍𑌵𑌾 𑌧𑍍𑌰𑍁𑌵𑌮𑌗𑍍𑌰𑌜𑍇𑌨 𑌸𑍁𑌰𑍗𑌘𑌯𑍋𑌦𑍍𑌧𑌾𑌰𑌮𑌜𑍀𑌘𑌨𑌸𑍍𑌤𑍍𑌵𑌮𑍍 ॥5॥

𑌤𑌦𑍀𑌯𑌭𑍃𑌤𑍍𑌯𑌾𑌨𑌪𑌿 𑌜𑌮𑍍𑌬𑍁𑌕𑌤𑍍𑌵𑍇𑌨𑍋𑌪𑌾𑌗𑌤𑌾𑌨𑌗𑍍𑌰𑌜𑌸𑌂𑌯𑍁𑌤𑌸𑍍𑌤𑍍𑌵𑌮𑍍 ।

𑌜𑌮𑍍𑌬𑍂𑌫𑌲𑌾𑌨𑍀𑌵 𑌤𑌦𑌾 𑌨𑌿𑌰𑌾𑌸𑍍𑌥𑌸𑍍𑌤𑌾𑌲𑍇𑌷𑍁 𑌖𑍇𑌲𑌨𑍍 𑌭𑌗𑌵𑌨𑍍 𑌨𑌿𑌰𑌾𑌸𑍍𑌥𑌃 ॥6॥

𑌵𑌿𑌨𑌿𑌘𑍍𑌨𑌤𑌿 𑌤𑍍𑌵𑌯𑍍𑌯𑌥 𑌜𑌮𑍍𑌬𑍁𑌕𑍗𑌘𑌂 𑌸𑌨𑌾𑌮𑌕𑌤𑍍𑌵𑌾𑌦𑍍𑌵𑌰𑍁𑌣𑌸𑍍𑌤𑌦𑌾𑌨𑍀𑌮𑍍 ।

𑌭𑌯𑌾𑌕𑍁𑌲𑍋 𑌜𑌮𑍍𑌬𑍁𑌕𑌨𑌾𑌮𑌧𑍇𑌯𑌂 𑌶𑍍𑌰𑍁𑌤𑌿𑌪𑍍𑌰𑌸𑌿𑌦𑍍𑌧𑌂 𑌵𑍍𑌯𑌧𑌿𑌤𑍇𑌤𑌿 𑌮𑌨𑍍𑌯𑍇 ॥7॥

𑌤𑌵𑌾𑌵𑌤𑌾𑌰𑌸𑍍𑌯 𑌫𑌲𑌂 𑌮𑍁𑌰𑌾𑌰𑍇 𑌸𑌞𑍍𑌜𑌾𑌤𑌮𑌦𑍍𑌯𑍇𑌤𑌿 𑌸𑍁𑌰𑍈𑌰𑍍𑌨𑍁𑌤𑌸𑍍𑌤𑍍𑌵𑌮𑍍 ।

𑌸𑌤𑍍𑌯𑌂 𑌫𑌲𑌂 𑌜𑌾𑌤𑌮𑌿𑌹𑍇𑌤𑌿 𑌹𑌾𑌸𑍀 𑌬𑌾𑌲𑍈𑌃 𑌸𑌮𑌂 𑌤𑌾𑌲𑌫𑌲𑌾𑌨𑍍𑌯𑌭𑍁𑌙𑍍𑌕𑍍𑌥𑌾𑌃 ॥8॥

𑌮𑌧𑍁𑌦𑍍𑌰𑌵𑌸𑍍𑌰𑍁𑌨𑍍𑌤𑌿 𑌬𑍃𑌹𑌨𑍍𑌤𑌿 𑌤𑌾𑌨𑌿 𑌫𑌲𑌾𑌨𑌿 𑌮𑍇𑌦𑍋𑌭𑌰𑌭𑍃𑌨𑍍𑌤𑌿 𑌭𑍁𑌕𑍍𑌤𑍍𑌵𑌾 ।

𑌤𑍃𑌪𑍍𑌤𑍈𑌶𑍍𑌚 𑌦𑍃𑌪𑍍𑌤𑍈𑌰𑍍𑌭𑌵𑌨𑌂 𑌫𑌲𑍗𑌘𑌂 𑌵𑌹𑌦𑍍𑌭𑌿𑌰𑌾𑌗𑌾𑌃 𑌖𑌲𑍁 𑌬𑌾𑌲𑌕𑍈𑌸𑍍𑌤𑍍𑌵𑌮𑍍 ॥9॥

𑌹𑌤𑍋 𑌹𑌤𑍋 𑌧𑍇𑌨𑍁𑌕 𑌇𑌤𑍍𑌯𑍁𑌪𑍇𑌤𑍍𑌯 𑌫𑌲𑌾𑌨𑍍𑌯𑌦𑌦𑍍𑌭𑌿𑌰𑍍𑌮𑌧𑍁𑌰𑌾𑌣𑌿 𑌲𑍋𑌕𑍈𑌃 ।

𑌜𑌯𑍇𑌤𑌿 𑌜𑍀𑌵𑍇𑌤𑌿 𑌨𑍁𑌤𑍋 𑌵𑌿𑌭𑍋 𑌤𑍍𑌵𑌂 𑌮𑌰𑍁𑌤𑍍𑌪𑍁𑌰𑌾𑌧𑍀𑌶𑍍𑌵𑌰 𑌪𑌾𑌹𑌿 𑌰𑍋𑌗𑌾𑌤𑍍 ॥10॥

Roman (IAST) Transliteration

atītya bālyaṃ jagatāṃ pate tvamupetya paugaṇḍavayo manojñam |

upekṣya vatsāvanamutsavena prāvartathā gogaṇapālanāyām ||1||

upakramasyānuguṇaiva seyaṃ marutpurādhīśa tava pravṛttiḥ |

gotrāparitrāṇakṛte'vatīrṇastadeva devā''rabhathāstadā yat ||2||

kadāpi rāmeṇa samaṃ vanānte vanaśriyaṃ vīkṣya caran sukhena |

śrīdāmanāmnaḥ svasakhasya vācā modādagā dhenukakānanaṃ tvam ||3||

uttālatālīnivahe tvaduktyā balena dhūte'tha balena dorbhyām |

mṛduḥ kharaścābhyapatatpurastāt phalotkaro dhenukadānavo'pi ||4||

samudyato dhainukapālane'haṃ kathaṃ vadhaṃ dhainukamadya kurve |

itīva matvā dhruvamagrajena suraughayoddhāramajīghanastvam ||5||

tadīyabhṛtyānapi jambukatvenopāgatānagrajasaṃyutastvam |

jambūphalānīva tadā nirāsthastāleṣu khelan bhagavan nirāsthaḥ ||6||

vinighnati tvayyatha jambukaughaṃ sanāmakatvādvaruṇastadānīm |

bhayākulo jambukanāmadheyaṃ śrutiprasiddhaṃ vyadhiteti manye ||7||

tavāvatārasya phalaṃ murāre sañjātamadyeti surairnutastvam |

satyaṃ phalaṃ jātamiheti hāsī bālaiḥ samaṃ tālaphalānyabhuṅkthāḥ ||8||

madhudravasrunti bṛhanti tāni phalāni medobharabhṛnti bhuktvā |

tṛptaiśca dṛptairbhavanaṃ phalaughaṃ vahadbhirāgāḥ khalu bālakaistvam ||9||

hato hato dhenuka ityupetya phalānyadadbhirmadhurāṇi lokaiḥ |

jayeti jīveti nuto vibho tvaṃ marutpurādhīśvara pāhi rogāt ||10||