Narayaniyam Dashaka 46 - Vishvarupadarshanam

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 46 - 𑌵𑌿𑌶𑍍𑌵𑌰𑍂𑌪𑌦𑌰𑍍𑌶𑌨𑌮𑍍

Vishnu Grantha

𑌅𑌯𑌿 𑌦𑍇𑌵 𑌪𑍁𑌰𑌾 𑌕𑌿𑌲 𑌤𑍍𑌵𑌯𑌿 𑌸𑍍𑌵𑌯𑌮𑍁𑌤𑍍𑌤𑌾𑌨𑌶𑌯𑍇 𑌸𑍍𑌤𑌨𑌨𑍍𑌧𑌯𑍇 ।

𑌪𑌰𑌿𑌜𑍃𑌮𑍍𑌭𑌣𑌤𑍋 𑌵𑍍𑌯𑌪𑌾𑌵𑍃𑌤𑍇 𑌵𑌦𑌨𑍇 𑌵𑌿𑌶𑍍𑌵𑌮𑌚𑌷𑍍𑌟 𑌵𑌲𑍍𑌲𑌵𑍀 ॥1॥

𑌪𑍁𑌨𑌰𑌪𑍍𑌯𑌥 𑌬𑌾𑌲𑌕𑍈𑌃 𑌸𑌮𑌂 𑌤𑍍𑌵𑌯𑌿 𑌲𑍀𑌲𑌾𑌨𑌿𑌰𑌤𑍇 𑌜𑌗𑌤𑍍𑌪𑌤𑍇 ।

𑌫𑌲𑌸𑌞𑍍𑌚𑌯𑌵𑌞𑍍𑌚𑌨𑌕𑍍𑌰𑍁𑌧𑌾 𑌤𑌵 𑌮𑍃𑌦𑍍𑌭𑍋𑌜𑌨𑌮𑍂𑌚𑍁𑌰𑌰𑍍𑌭𑌕𑌾𑌃 ॥2॥

𑌅𑌯𑌿 𑌤𑍇 𑌪𑍍𑌰𑌲𑌯𑌾𑌵𑌧𑍗 𑌵𑌿𑌭𑍋 𑌕𑍍𑌷𑌿𑌤𑌿𑌤𑍋𑌯𑌾𑌦𑌿𑌸𑌮𑌸𑍍𑌤𑌭𑌕𑍍𑌷𑌿𑌣𑌃 ।

𑌮𑍃𑌦𑍁𑌪𑌾𑌶𑌨𑌤𑍋 𑌰𑍁𑌜𑌾 𑌭𑌵𑍇𑌦𑌿𑌤𑌿 𑌭𑍀𑌤𑌾 𑌜𑌨𑌨𑍀 𑌚𑍁𑌕𑍋𑌪 𑌸𑌾 ॥3॥

𑌅𑌯𑌿 𑌦𑍁𑌰𑍍𑌵𑌿𑌨𑌯𑌾𑌤𑍍𑌮𑌕 𑌤𑍍𑌵𑌯𑌾 𑌕𑌿𑌮𑍁 𑌮𑍃𑌤𑍍𑌸𑌾 𑌬𑌤 𑌵𑌤𑍍𑌸 𑌭𑌕𑍍𑌷𑌿𑌤𑌾 ।

𑌇𑌤𑌿 𑌮𑌾𑌤𑍃𑌗𑌿𑌰𑌂 𑌚𑌿𑌰𑌂 𑌵𑌿𑌭𑍋 𑌵𑌿𑌤𑌥𑌾𑌂 𑌤𑍍𑌵𑌂 𑌪𑍍𑌰𑌤𑌿𑌜𑌜𑍍𑌞𑌿𑌷𑍇 𑌹𑌸𑌨𑍍 ॥4॥

𑌅𑌯𑌿 𑌤𑍇 𑌸𑌕𑌲𑍈𑌰𑍍𑌵𑌿𑌨𑌿𑌶𑍍𑌚𑌿𑌤𑍇 𑌵𑌿𑌮𑌤𑌿𑌶𑍍𑌚𑍇𑌦𑍍𑌵𑌦𑌨𑌂 𑌵𑌿𑌦𑌾𑌰𑍍𑌯𑌤𑌾𑌮𑍍 ।

𑌇𑌤𑌿 𑌮𑌾𑌤𑍃𑌵𑌿𑌭𑌰𑍍𑌤𑍍𑌸𑌿𑌤𑍋 𑌮𑍁𑌖𑌂 𑌵𑌿𑌕𑌸𑌤𑍍𑌪𑌦𑍍𑌮𑌨𑌿𑌭𑌂 𑌵𑍍𑌯𑌦𑌾𑌰𑌯𑌃 ॥5॥

𑌅𑌪𑌿 𑌮𑍃𑌲𑍍𑌲𑌵𑌦𑌰𑍍𑌶𑌨𑍋𑌤𑍍𑌸𑍁𑌕𑌾𑌂 𑌜𑌨𑌨𑍀𑌂 𑌤𑌾𑌂 𑌬𑌹𑍁 𑌤𑌰𑍍𑌪𑌯𑌨𑍍𑌨𑌿𑌵 ।

𑌪𑍃𑌥𑌿𑌵𑍀𑌂 𑌨𑌿𑌖𑌿𑌲𑌾𑌂 𑌨 𑌕𑍇𑌵𑌲𑌂 𑌭𑍁𑌵𑌨𑌾𑌨𑍍𑌯𑌪𑍍𑌯𑌖𑌿𑌲𑌾𑌨𑍍𑌯𑌦𑍀𑌦𑍃𑌶𑌃 ॥6॥

𑌕𑍁𑌹𑌚𑌿𑌦𑍍𑌵𑌨𑌮𑌮𑍍𑌬𑍁𑌧𑌿𑌃 𑌕𑍍𑌵𑌚𑌿𑌤𑍍 𑌕𑍍𑌵𑌚𑌿𑌦𑌭𑍍𑌰𑌂 𑌕𑍁𑌹𑌚𑌿𑌦𑍍𑌰𑌸𑌾𑌤𑌲𑌮𑍍 ।

𑌮𑌨𑍁𑌜𑌾 𑌦𑌨𑍁𑌜𑌾𑌃 𑌕𑍍𑌵𑌚𑌿𑌤𑍍 𑌸𑍁𑌰𑌾 𑌦𑌦𑍃𑌶𑍇 𑌕𑌿𑌂 𑌨 𑌤𑌦𑌾 𑌤𑍍𑌵𑌦𑌾𑌨𑌨𑍇 ॥7॥

𑌕𑌲𑌶𑌾𑌮𑍍𑌬𑍁𑌧𑌿𑌶𑌾𑌯𑌿𑌨𑌂 𑌪𑍁𑌨𑌃 𑌪𑌰𑌵𑍈𑌕𑍁𑌣𑍍𑌠𑌪𑌦𑌾𑌧𑌿𑌵𑌾𑌸𑌿𑌨𑌮𑍍 ।

𑌸𑍍𑌵𑌪𑍁𑌰𑌶𑍍𑌚 𑌨𑌿𑌜𑌾𑌰𑍍𑌭𑌕𑌾𑌤𑍍𑌮𑌕𑌂 𑌕𑌤𑌿𑌧𑌾 𑌤𑍍𑌵𑌾𑌂 𑌨 𑌦𑌦𑌰𑍍𑌶 𑌸𑌾 𑌮𑍁𑌖𑍇 ॥8॥

𑌵𑌿𑌕𑌸𑌦𑍍𑌭𑍁𑌵𑌨𑍇 𑌮𑍁𑌖𑍋𑌦𑌰𑍇 𑌨𑌨𑍁 𑌭𑍂𑌯𑍋𑌽𑌪𑌿 𑌤𑌥𑌾𑌵𑌿𑌧𑌾𑌨𑌨𑌃 ।

𑌅𑌨𑌯𑌾 𑌸𑍍𑌫𑍁𑌟𑌮𑍀𑌕𑍍𑌷𑌿𑌤𑍋 𑌭𑌵𑌾𑌨𑌨𑌵𑌸𑍍𑌥𑌾𑌂 𑌜𑌗𑌤𑌾𑌂 𑌬𑌤𑌾𑌤𑌨𑍋𑌤𑍍 ॥9॥

𑌧𑍃𑌤𑌤𑌤𑍍𑌤𑍍𑌵𑌧𑌿𑌯𑌂 𑌤𑌦𑌾 𑌕𑍍𑌷𑌣𑌂 𑌜𑌨𑌨𑍀𑌂 𑌤𑌾𑌂 𑌪𑍍𑌰𑌣𑌯𑍇𑌨 𑌮𑍋𑌹𑌯𑌨𑍍 ।

𑌸𑍍𑌤𑌨𑌮𑌮𑍍𑌬 𑌦𑌿𑌶𑍇𑌤𑍍𑌯𑍁𑌪𑌾𑌸𑌜𑌨𑍍 𑌭𑌗𑌵𑌨𑍍𑌨𑌦𑍍𑌭𑍁𑌤𑌬𑌾𑌲 𑌪𑌾𑌹𑌿 𑌮𑌾𑌮𑍍 ॥10॥

Roman (IAST) Transliteration

ayi deva purā kila tvayi svayamuttānaśaye stanandhaye |

parijṛmbhaṇato vyapāvṛte vadane viśvamacaṣṭa vallavī ||1||

punarapyatha bālakaiḥ samaṃ tvayi līlānirate jagatpate |

phalasañcayavañcanakrudhā tava mṛdbhojanamūcurarbhakāḥ ||2||

ayi te pralayāvadhau vibho kṣititoyādisamastabhakṣiṇaḥ |

mṛdupāśanato rujā bhavediti bhītā jananī cukopa sā ||3||

ayi durvinayātmaka tvayā kimu mṛtsā bata vatsa bhakṣitā |

iti mātṛgiraṃ ciraṃ vibho vitathāṃ tvaṃ pratijajñiṣe hasan ||4||

ayi te sakalairviniścite vimatiścedvadanaṃ vidāryatām |

iti mātṛvibhartsito mukhaṃ vikasatpadmanibhaṃ vyadārayaḥ ||5||

api mṛllavadarśanotsukāṃ jananīṃ tāṃ bahu tarpayanniva |

pṛthivīṃ nikhilāṃ na kevalaṃ bhuvanānyapyakhilānyadīdṛśaḥ ||6||

kuhacidvanamambudhiḥ kvacit kvacidabhraṃ kuhacidrasātalam |

manujā danujāḥ kvacit surā dadṛśe kiṃ na tadā tvadānane ||7||

kalaśāmbudhiśāyinaṃ punaḥ paravaikuṇṭhapadādhivāsinam |

svapuraśca nijārbhakātmakaṃ katidhā tvāṃ na dadarśa sā mukhe ||8||

vikasadbhuvane mukhodare nanu bhūyo'pi tathāvidhānanaḥ |

anayā sphuṭamīkṣito bhavānanavasthāṃ jagatāṃ batātanot ||9||

dhṛtatattvadhiyaṃ tadā kṣaṇaṃ jananīṃ tāṃ praṇayena mohayan |

stanamamba diśetyupāsajan bhagavannadbhutabāla pāhi mām ||10||