Narayaniyam Dashaka 39 - Yogamaya Pradurbhavam Tatha Gokule Krishnajanmotsavam

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 39 - 𑌯𑍋𑌗𑌮𑌾𑌯𑌾 𑌪𑍍𑌰𑌾𑌦𑍁𑌰𑍍𑌭𑌾𑌵𑌂 𑌤𑌥𑌾 𑌗𑍋𑌕𑍁𑌲𑍇 𑌕𑍃𑌷𑍍𑌣𑌜𑌨𑍍𑌮𑍋𑌤𑍍𑌸𑌵𑌮𑍍

Vishnu Grantha

𑌭𑌵𑌨𑍍𑌤𑌮𑌯𑌮𑍁𑌦𑍍𑌵𑌹𑌨𑍍 𑌯𑌦𑍁𑌕𑍁𑌲𑍋𑌦𑍍𑌵𑌹𑍋 𑌨𑌿𑌸𑍍𑌸𑌰𑌨𑍍

𑌦𑌦𑌰𑍍𑌶 𑌗𑌗𑌨𑍋𑌚𑍍𑌚𑌲𑌜𑍍𑌜𑌲𑌭𑌰𑌾𑌂 𑌕𑌲𑌿𑌨𑍍𑌦𑌾𑌤𑍍𑌮𑌜𑌾𑌮𑍍 ।

𑌅𑌹𑍋 𑌸𑌲𑌿𑌲𑌸𑌞𑍍𑌚𑌯𑌃 𑌸 𑌪𑍁𑌨𑌰𑍈𑌨𑍍𑌦𑍍𑌰𑌜𑌾𑌲𑍋𑌦𑌿𑌤𑍋

𑌜𑌲𑍗𑌘 𑌇𑌵 𑌤𑌤𑍍𑌕𑍍𑌷𑌣𑌾𑌤𑍍 𑌪𑍍𑌰𑌪𑌦𑌮𑍇𑌯𑌤𑌾𑌮𑌾𑌯𑌯𑍗 ॥1॥

𑌪𑍍𑌰𑌸𑍁𑌪𑍍𑌤𑌪𑌶𑍁𑌪𑌾𑌲𑌿𑌕𑌾𑌂 𑌨𑌿𑌭𑍃𑌤𑌮𑌾𑌰𑍁𑌦𑌦𑍍𑌬𑌾𑌲𑌿𑌕𑌾-

𑌮𑌪𑌾𑌵𑍃𑌤𑌕𑌵𑌾𑌟𑌿𑌕𑌾𑌂 𑌪𑌶𑍁𑌪𑌵𑌾𑌟𑌿𑌕𑌾𑌮𑌾𑌵𑌿𑌶𑌨𑍍 ।

𑌭𑌵𑌨𑍍𑌤𑌮𑌯𑌮𑌰𑍍𑌪𑌯𑌨𑍍 𑌪𑍍𑌰𑌸𑌵𑌤𑌲𑍍𑌪𑌕𑍇 𑌤𑌤𑍍𑌪𑌦𑌾-

𑌦𑍍𑌵𑌹𑌨𑍍 𑌕𑌪𑌟𑌕𑌨𑍍𑌯𑌕𑌾𑌂 𑌸𑍍𑌵𑌪𑍁𑌰𑌮𑌾𑌗𑌤𑍋 𑌵𑍇𑌗𑌤𑌃 ॥2॥

𑌤𑌤𑌸𑍍𑌤𑍍𑌵𑌦𑌨𑍁𑌜𑌾𑌰𑌵𑌕𑍍𑌷𑌪𑌿𑌤𑌨𑌿𑌦𑍍𑌰𑌵𑍇𑌗𑌦𑍍𑌰𑌵𑌦𑍍-

𑌭𑌟𑍋𑌤𑍍𑌕𑌰𑌨𑌿𑌵𑍇𑌦𑌿𑌤𑌪𑍍𑌰𑌸𑌵𑌵𑌾𑌰𑍍𑌤𑌯𑍈𑌵𑌾𑌰𑍍𑌤𑌿𑌮𑌾𑌨𑍍 ।

𑌵𑌿𑌮𑍁𑌕𑍍𑌤𑌚𑌿𑌕𑍁𑌰𑍋𑌤𑍍𑌕𑌰𑌸𑍍𑌤𑍍𑌵𑌰𑌿𑌤𑌮𑌾𑌪𑌤𑌨𑍍 𑌭𑍋𑌜𑌰𑌾-

𑌡𑌤𑍁𑌷𑍍𑌟 𑌇𑌵 𑌦𑍃𑌷𑍍𑌟𑌵𑌾𑌨𑍍 𑌭𑌗𑌿𑌨𑌿𑌕𑌾𑌕𑌰𑍇 𑌕𑌨𑍍𑌯𑌕𑌾𑌮𑍍 ॥3॥

𑌧𑍍𑌰𑍁𑌵𑌂 𑌕𑌪𑌟𑌶𑌾𑌲𑌿𑌨𑍋 𑌮𑌧𑍁𑌹𑌰𑌸𑍍𑌯 𑌮𑌾𑌯𑌾 𑌭𑌵𑍇-

𑌦𑌸𑌾𑌵𑌿𑌤𑌿 𑌕𑌿𑌶𑍋𑌰𑌿𑌕𑌾𑌂 𑌭𑌗𑌿𑌨𑌿𑌕𑌾𑌕𑌰𑌾𑌲𑌿𑌙𑍍𑌗𑌿𑌤𑌾𑌮𑍍 ।

𑌦𑍍𑌵𑌿𑌪𑍋 𑌨𑌲𑌿𑌨𑌿𑌕𑌾𑌨𑍍𑌤𑌰𑌾𑌦𑌿𑌵 𑌮𑍃𑌣𑌾𑌲𑌿𑌕𑌾𑌮𑌾𑌕𑍍𑌷𑌿𑌪-

𑌨𑍍𑌨𑌯𑌂 𑌤𑍍𑌵𑌦𑌨𑍁𑌜𑌾𑌮𑌜𑌾𑌮𑍁𑌪𑌲𑌪𑌟𑍍𑌟𑌕𑍇 𑌪𑌿𑌷𑍍𑌟𑌵𑌾𑌨𑍍 ॥4॥

𑌤𑌤𑌃 𑌭𑌵𑌦𑍁𑌪𑌾𑌸𑌕𑍋 𑌝𑌟𑌿𑌤𑌿 𑌮𑍃𑌤𑍍𑌯𑍁𑌪𑌾𑌶𑌾𑌦𑌿𑌵

𑌪𑍍𑌰𑌮𑍁𑌚𑍍𑌯 𑌤𑌰𑌸𑍈𑌵 𑌸𑌾 𑌸𑌮𑌧𑌿𑌰𑍂𑌢𑌰𑍂𑌪𑌾𑌨𑍍𑌤𑌰𑌾 ।

𑌅𑌧𑌸𑍍𑌤𑌲𑌮𑌜𑌗𑍍𑌮𑍁𑌷𑍀 𑌵𑌿𑌕𑌸𑌦𑌷𑍍𑌟𑌬𑌾𑌹𑍁𑌸𑍍𑌫𑍁𑌰-

𑌨𑍍𑌮𑌹𑌾𑌯𑍁𑌧𑌮𑌹𑍋 𑌗𑌤𑌾 𑌕𑌿𑌲 𑌵𑌿𑌹𑌾𑌯𑌸𑌾 𑌦𑌿𑌦𑍍𑌯𑍁𑌤𑍇 ॥5॥

𑌨𑍃𑌶𑌂𑌸𑌤𑌰 𑌕𑌂𑌸 𑌤𑍇 𑌕𑌿𑌮𑍁 𑌮𑌯𑌾 𑌵𑌿𑌨𑌿𑌷𑍍𑌪𑌿𑌷𑍍𑌟𑌯𑌾

𑌬𑌭𑍂𑌵 𑌭𑌵𑌦𑌨𑍍𑌤𑌕𑌃 𑌕𑍍𑌵𑌚𑌨 𑌚𑌿𑌨𑍍𑌤𑍍𑌯𑌤𑌾𑌂 𑌤𑍇 𑌹𑌿𑌤𑌮𑍍 ।

𑌇𑌤𑌿 𑌤𑍍𑌵𑌦𑌨𑍁𑌜𑌾 𑌵𑌿𑌭𑍋 𑌖𑌲𑌮𑍁𑌦𑍀𑌰𑍍𑌯 𑌤𑌂 𑌜𑌗𑍍𑌮𑍁𑌷𑍀

𑌮𑌰𑍁𑌦𑍍𑌗𑌣𑌪𑌣𑌾𑌯𑌿𑌤𑌾 𑌭𑍁𑌵𑌿 𑌚 𑌮𑌨𑍍𑌦𑌿𑌰𑌾𑌣𑍍𑌯𑍇𑌯𑍁𑌷𑍀 ॥6॥

𑌪𑍍𑌰𑌗𑍇 𑌪𑍁𑌨𑌰𑌗𑌾𑌤𑍍𑌮𑌜𑌾𑌵𑌚𑌨𑌮𑍀𑌰𑌿𑌤𑌾 𑌭𑍂𑌭𑍁𑌜𑌾

𑌪𑍍𑌰𑌲𑌮𑍍𑌬𑌬𑌕𑌪𑍂𑌤𑌨𑌾𑌪𑍍𑌰𑌮𑍁𑌖𑌦𑌾𑌨𑌵𑌾 𑌮𑌾𑌨𑌿𑌨𑌃 ।

𑌭𑌵𑌨𑍍𑌨𑌿𑌧𑌨𑌕𑌾𑌮𑍍𑌯𑌯𑌾 𑌜𑌗𑌤𑌿 𑌬𑌭𑍍𑌰𑌮𑍁𑌰𑍍𑌨𑌿𑌰𑍍𑌭𑌯𑌾𑌃

𑌕𑍁𑌮𑌾𑌰𑌕𑌵𑌿𑌮𑌾𑌰𑌕𑌾𑌃 𑌕𑌿𑌮𑌿𑌵 𑌦𑍁𑌷𑍍𑌕𑌰𑌂 𑌨𑌿𑌷𑍍𑌕𑍃𑌪𑍈𑌃 ॥7॥

𑌤𑌤𑌃 𑌪𑌶𑍁𑌪𑌮𑌨𑍍𑌦𑌿𑌰𑍇 𑌤𑍍𑌵𑌯𑌿 𑌮𑍁𑌕𑍁𑌨𑍍𑌦 𑌨𑌨𑍍𑌦𑌪𑍍𑌰𑌿𑌯𑌾-

𑌪𑍍𑌰𑌸𑍂𑌤𑌿𑌶𑌯𑌨𑍇𑌶𑌯𑍇 𑌰𑍁𑌦𑌤𑌿 𑌕𑌿𑌞𑍍𑌚𑌿𑌦𑌞𑍍𑌚𑌤𑍍𑌪𑌦𑍇 ।

𑌵𑌿𑌬𑍁𑌧𑍍𑌯 𑌵𑌨𑌿𑌤𑌾𑌜𑌨𑍈𑌸𑍍𑌤𑌨𑌯𑌸𑌮𑍍𑌭𑌵𑍇 𑌘𑍋𑌷𑌿𑌤𑍇

𑌮𑍁𑌦𑌾 𑌕𑌿𑌮𑍁 𑌵𑌦𑌾𑌮𑍍𑌯𑌹𑍋 𑌸𑌕𑌲𑌮𑌾𑌕𑍁𑌲𑌂 𑌗𑍋𑌕𑍁𑌲𑌮𑍍 ॥8॥

𑌅𑌹𑍋 𑌖𑌲𑍁 𑌯𑌶𑍋𑌦𑌯𑌾 𑌨𑌵𑌕𑌲𑌾𑌯𑌚𑍇𑌤𑍋𑌹𑌰𑌂

𑌭𑌵𑌨𑍍𑌤𑌮𑌲𑌮𑌨𑍍𑌤𑌿𑌕𑍇 𑌪𑍍𑌰𑌥𑌮𑌮𑌾𑌪𑌿𑌬𑌨𑍍𑌤𑍍𑌯𑌾 𑌦𑍃𑌶𑌾 ।

𑌪𑍁𑌨𑌃 𑌸𑍍𑌤𑌨𑌭𑌰𑌂 𑌨𑌿𑌜𑌂 𑌸𑌪𑌦𑌿 𑌪𑌾𑌯𑌯𑌨𑍍𑌤𑍍𑌯𑌾 𑌮𑍁𑌦𑌾

𑌮𑌨𑍋𑌹𑌰𑌤𑌨𑍁𑌸𑍍𑌪𑍃𑌶𑌾 𑌜𑌗𑌤𑌿 𑌪𑍁𑌣𑍍𑌯𑌵𑌨𑍍𑌤𑍋 𑌜𑌿𑌤𑌾𑌃 ॥9॥

𑌭𑌵𑌤𑍍𑌕𑍁𑌶𑌲𑌕𑌾𑌮𑍍𑌯𑌯𑌾 𑌸 𑌖𑌲𑍁 𑌨𑌨𑍍𑌦𑌗𑍋𑌪𑌸𑍍𑌤𑌦𑌾

𑌪𑍍𑌰𑌮𑍋𑌦𑌭𑌰𑌸𑌙𑍍𑌕𑍁𑌲𑍋 𑌦𑍍𑌵𑌿𑌜𑌕𑍁𑌲𑌾𑌯 𑌕𑌿𑌨𑍍𑌨𑌾𑌦𑌦𑌾𑌤𑍍 ।

𑌤𑌥𑍈𑌵 𑌪𑌶𑍁𑌪𑌾𑌲𑌕𑌾𑌃 𑌕𑌿𑌮𑍁 𑌨 𑌮𑌙𑍍𑌗𑌲𑌂 𑌤𑍇𑌨𑌿𑌰𑍇

𑌜𑌗𑌤𑍍𑌤𑍍𑌰𑌿𑌤𑌯𑌮𑌙𑍍𑌗𑌲 𑌤𑍍𑌵𑌮𑌿𑌹 𑌪𑌾𑌹𑌿 𑌮𑌾𑌮𑌾𑌮𑌯𑌾𑌤𑍍 ॥10॥

Roman (IAST) Transliteration

bhavantamayamudvahan yadukulodvaho nissaran

dadarśa gaganoccalajjalabharāṃ kalindātmajām |

aho salilasañcayaḥ sa punaraindrajālodito

jalaugha iva tatkṣaṇāt prapadameyatāmāyayau ||1||

prasuptapaśupālikāṃ nibhṛtamārudadbālikā-

mapāvṛtakavāṭikāṃ paśupavāṭikāmāviśan |

bhavantamayamarpayan prasavatalpake tatpadā-

dvahan kapaṭakanyakāṃ svapuramāgato vegataḥ ||2||

tatastvadanujāravakṣapitanidravegadravad-

bhaṭotkaraniveditaprasavavārtayaivārtimān |

vimuktacikurotkarastvaritamāpatan bhojarā-

ḍatuṣṭa iva dṛṣṭavān bhaginikākare kanyakām ||3||

dhruvaṃ kapaṭaśālino madhuharasya māyā bhave-

dasāviti kiśorikāṃ bhaginikākarāliṅgitām |

dvipo nalinikāntarādiva mṛṇālikāmākṣipa-

nnayaṃ tvadanujāmajāmupalapaṭṭake piṣṭavān ||4||

tataḥ bhavadupāsako jhaṭiti mṛtyupāśādiva

pramucya tarasaiva sā samadhirūḍharūpāntarā |

adhastalamajagmuṣī vikasadaṣṭabāhusphura-

nmahāyudhamaho gatā kila vihāyasā didyute ||5||

nṛśaṃsatara kaṃsa te kimu mayā viniṣpiṣṭayā

babhūva bhavadantakaḥ kvacana cintyatāṃ te hitam |

iti tvadanujā vibho khalamudīrya taṃ jagmuṣī

marudgaṇapaṇāyitā bhuvi ca mandirāṇyeyuṣī ||6||

prage punaragātmajāvacanamīritā bhūbhujā

pralambabakapūtanāpramukhadānavā māninaḥ |

bhavannidhanakāmyayā jagati babhramurnirbhayāḥ

kumārakavimārakāḥ kimiva duṣkaraṃ niṣkṛpaiḥ ||7||

tataḥ paśupamandire tvayi mukunda nandapriyā-

prasūtiśayaneśaye rudati kiñcidañcatpade |

vibudhya vanitājanaistanayasambhave ghoṣite

mudā kimu vadāmyaho sakalamākulaṃ gokulam ||8||

aho khalu yaśodayā navakalāyacetoharaṃ

bhavantamalamantike prathamamāpibantyā dṛśā |

punaḥ stanabharaṃ nijaṃ sapadi pāyayantyā mudā

manoharatanuspṛśā jagati puṇyavanto jitāḥ ||9||

bhavatkuśalakāmyayā sa khalu nandagopastadā

pramodabharasaṅkulo dvijakulāya kinnādadāt |

tathaiva paśupālakāḥ kimu na maṅgalaṃ tenire

jagattritayamaṅgala tvamiha pāhi māmāmayāt ||10||