Narayaniyam Dashaka 37 - Shrikrishnavataropakramam

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 37 - 𑌶𑍍𑌰𑍀𑌕𑍃𑌷𑍍𑌣𑌾𑌵𑌤𑌾𑌰𑍋𑌪𑌕𑍍𑌰𑌮𑌮𑍍

Vishnu Grantha

𑌸𑌾𑌨𑍍𑌦𑍍𑌰𑌾𑌨𑌨𑍍𑌦𑌤𑌨𑍋 𑌹𑌰𑍇 𑌨𑌨𑍁 𑌪𑍁𑌰𑌾 𑌦𑍈𑌵𑌾𑌸𑍁𑌰𑍇 𑌸𑌙𑍍𑌗𑌰𑍇

𑌤𑍍𑌵𑌤𑍍𑌕𑍃𑌤𑍍𑌤𑌾 𑌅𑌪𑌿 𑌕𑌰𑍍𑌮𑌶𑍇𑌷𑌵𑌶𑌤𑍋 𑌯𑍇 𑌤𑍇 𑌨 𑌯𑌾𑌤𑌾 𑌗𑌤𑌿𑌮𑍍 ।

𑌤𑍇𑌷𑌾𑌂 𑌭𑍂𑌤𑌲𑌜𑌨𑍍𑌮𑌨𑌾𑌂 𑌦𑌿𑌤𑌿𑌭𑍁𑌵𑌾𑌂 𑌭𑌾𑌰𑍇𑌣 𑌦𑍂𑌰𑌾𑌰𑍍𑌦𑌿𑌤𑌾

𑌭𑍂𑌮𑌿𑌃 𑌪𑍍𑌰𑌾𑌪 𑌵𑌿𑌰𑌿𑌞𑍍𑌚𑌮𑌾𑌶𑍍𑌰𑌿𑌤𑌪𑌦𑌂 𑌦𑍇𑌵𑍈𑌃 𑌪𑍁𑌰𑍈𑌵𑌾𑌗𑌤𑍈𑌃 ॥1॥

𑌹𑌾 𑌹𑌾 𑌦𑍁𑌰𑍍𑌜𑌨𑌭𑍂𑌰𑌿𑌭𑌾𑌰𑌮𑌥𑌿𑌤𑌾𑌂 𑌪𑌾𑌥𑍋𑌨𑌿𑌧𑍗 𑌪𑌾𑌤𑍁𑌕𑌾-

𑌮𑍇𑌤𑌾𑌂 𑌪𑌾𑌲𑌯 𑌹𑌨𑍍𑌤 𑌮𑍇 𑌵𑌿𑌵𑌶𑌤𑌾𑌂 𑌸𑌮𑍍𑌪𑍃𑌚𑍍𑌛 𑌦𑍇𑌵𑌾𑌨𑌿𑌮𑌾𑌨𑍍 ।

𑌇𑌤𑍍𑌯𑌾𑌦𑌿𑌪𑍍𑌰𑌚𑍁𑌰𑌪𑍍𑌰𑌲𑌾𑌪𑌵𑌿𑌵𑌶𑌾𑌮𑌾𑌲𑍋𑌕𑍍𑌯 𑌧𑌾𑌤𑌾 𑌮𑌹𑍀𑌂

𑌦𑍇𑌵𑌾𑌨𑌾𑌂 𑌵𑌦𑌨𑌾𑌨𑌿 𑌵𑍀𑌕𑍍𑌷𑍍𑌯 𑌪𑌰𑌿𑌤𑍋 𑌦𑌧𑍍𑌯𑍗 𑌭𑌵𑌨𑍍𑌤𑌂 𑌹𑌰𑍇 ॥2॥

𑌊𑌚𑍇 𑌚𑌾𑌮𑍍𑌬𑍁𑌜𑌭𑍂𑌰𑌮𑍂𑌨𑌯𑌿 𑌸𑍁𑌰𑌾𑌃 𑌸𑌤𑍍𑌯𑌂 𑌧𑌰𑌿𑌤𑍍𑌰𑍍𑌯𑌾 𑌵𑌚𑍋

𑌨𑌨𑍍𑌵𑌸𑍍𑌯𑌾 𑌭𑌵𑌤𑌾𑌂 𑌚 𑌰𑌕𑍍𑌷𑌣𑌵𑌿𑌧𑍗 𑌦𑌕𑍍𑌷𑍋 𑌹𑌿 𑌲𑌕𑍍𑌷𑍍𑌮𑍀𑌪𑌤𑌿𑌃 ।

𑌸𑌰𑍍𑌵𑍇 𑌶𑌰𑍍𑌵𑌪𑍁𑌰𑌸𑍍𑌸𑌰𑌾 𑌵𑌯𑌮𑌿𑌤𑍋 𑌗𑌤𑍍𑌵𑌾 𑌪𑌯𑍋𑌵𑌾𑌰𑌿𑌧𑌿𑌂

𑌨𑌤𑍍𑌵𑌾 𑌤𑌂 𑌸𑍍𑌤𑍁𑌮𑌹𑍇 𑌜𑌵𑌾𑌦𑌿𑌤𑌿 𑌯𑌯𑍁𑌃 𑌸𑌾𑌕𑌂 𑌤𑌵𑌾𑌕𑍇𑌤𑌨𑌮𑍍 ॥3॥

𑌤𑍇 𑌮𑍁𑌗𑍍𑌧𑌾𑌨𑌿𑌲𑌶𑌾𑌲𑌿𑌦𑍁𑌗𑍍𑌧𑌜𑌲𑌧𑍇𑌸𑍍𑌤𑍀𑌰𑌂 𑌗𑌤𑌾𑌃 𑌸𑌙𑍍𑌗𑌤𑌾

𑌯𑌾𑌵𑌤𑍍𑌤𑍍𑌵𑌤𑍍𑌪𑌦𑌚𑌿𑌨𑍍𑌤𑌨𑍈𑌕𑌮𑌨𑌸𑌸𑍍𑌤𑌾𑌵𑌤𑍍 𑌸 𑌪𑌾𑌥𑍋𑌜𑌭𑍂𑌃 ।

𑌤𑍍𑌵𑌦𑍍𑌵𑌾𑌚𑌂 𑌹𑍃𑌦𑌯𑍇 𑌨𑌿𑌶𑌮𑍍𑌯 𑌸𑌕𑌲𑌾𑌨𑌾𑌨𑌨𑍍𑌦𑌯𑌨𑍍𑌨𑍂𑌚𑌿𑌵𑌾-

𑌨𑌾𑌖𑍍𑌯𑌾𑌤𑌃 𑌪𑌰𑌮𑌾𑌤𑍍𑌮𑌨𑌾 𑌸𑍍𑌵𑌯𑌮𑌹𑌂 𑌵𑌾𑌕𑍍𑌯𑌂 𑌤𑌦𑌾𑌕𑌰𑍍𑌣𑍍𑌯𑌤𑌾𑌮𑍍 ॥4॥

𑌜𑌾𑌨𑍇 𑌦𑍀𑌨𑌦𑌶𑌾𑌮𑌹𑌂 𑌦𑌿𑌵𑌿𑌷𑌦𑌾𑌂 𑌭𑍂𑌮𑍇𑌶𑍍𑌚 𑌭𑍀𑌮𑍈𑌰𑍍𑌨𑍃𑌪𑍈-

𑌸𑍍𑌤𑌤𑍍𑌕𑍍𑌷𑍇𑌪𑌾𑌯 𑌭𑌵𑌾𑌮𑌿 𑌯𑌾𑌦𑌵𑌕𑍁𑌲𑍇 𑌸𑍋𑌽𑌹𑌂 𑌸𑌮𑌗𑍍𑌰𑌾𑌤𑍍𑌮𑌨𑌾 ।

𑌦𑍇𑌵𑌾 𑌵𑍃𑌷𑍍𑌣𑌿𑌕𑍁𑌲𑍇 𑌭𑌵𑌨𑍍𑌤𑍁 𑌕𑌲𑌯𑌾 𑌦𑍇𑌵𑌾𑌙𑍍𑌗𑌨𑌾𑌶𑍍𑌚𑌾𑌵𑌨𑍗

𑌮𑌤𑍍𑌸𑍇𑌵𑌾𑌰𑍍𑌥𑌮𑌿𑌤𑌿 𑌤𑍍𑌵𑌦𑍀𑌯𑌵𑌚𑌨𑌂 𑌪𑌾𑌥𑍋𑌜𑌭𑍂𑌰𑍂𑌚𑌿𑌵𑌾𑌨𑍍 ॥5॥

𑌶𑍍𑌰𑍁𑌤𑍍𑌵𑌾 𑌕𑌰𑍍𑌣𑌰𑌸𑌾𑌯𑌨𑌂 𑌤𑌵 𑌵𑌚𑌃 𑌸𑌰𑍍𑌵𑍇𑌷𑍁 𑌨𑌿𑌰𑍍𑌵𑌾𑌪𑌿𑌤-

𑌸𑍍𑌵𑌾𑌨𑍍𑌤𑍇𑌷𑍍𑌵𑍀𑌶 𑌗𑌤𑍇𑌷𑍁 𑌤𑌾𑌵𑌕𑌕𑍃𑌪𑌾𑌪𑍀𑌯𑍂𑌷𑌤𑍃𑌪𑍍𑌤𑌾𑌤𑍍𑌮𑌸𑍁 ।

𑌵𑌿𑌖𑍍𑌯𑌾𑌤𑍇 𑌮𑌧𑍁𑌰𑌾𑌪𑍁𑌰𑍇 𑌕𑌿𑌲 𑌭𑌵𑌤𑍍𑌸𑌾𑌨𑍍𑌨𑌿𑌧𑍍𑌯𑌪𑍁𑌣𑍍𑌯𑍋𑌤𑍍𑌤𑌰𑍇

𑌧𑌨𑍍𑌯𑌾𑌂 𑌦𑍇𑌵𑌕𑌨𑌨𑍍𑌦𑌨𑌾𑌮𑍁𑌦𑌵𑌹𑌦𑍍𑌰𑌾𑌜𑌾 𑌸 𑌶𑍂𑌰𑌾𑌤𑍍𑌮𑌜𑌃 ॥6॥

𑌉𑌦𑍍𑌵𑌾𑌹𑌾𑌵𑌸𑌿𑌤𑍗 𑌤𑌦𑍀𑌯𑌸𑌹𑌜𑌃 𑌕𑌂𑌸𑍋𑌽𑌥 𑌸𑌮𑍍𑌮𑌾𑌨𑌯-

𑌨𑍍𑌨𑍇𑌤𑍗 𑌸𑍂𑌤𑌤𑌯𑌾 𑌗𑌤𑌃 𑌪𑌥𑌿 𑌰𑌥𑍇 𑌵𑍍𑌯𑍋𑌮𑍋𑌤𑍍𑌥𑌯𑌾 𑌤𑍍𑌵𑌦𑍍𑌗𑌿𑌰𑌾 ।

𑌅𑌸𑍍𑌯𑌾𑌸𑍍𑌤𑍍𑌵𑌾𑌮𑌤𑌿𑌦𑍁𑌷𑍍𑌟𑌮𑌷𑍍𑌟𑌮𑌸𑍁𑌤𑍋 𑌹𑌨𑍍𑌤𑍇𑌤𑌿 𑌹𑌨𑍍𑌤𑍇𑌰𑌿𑌤𑌃

𑌸𑌨𑍍𑌤𑍍𑌰𑌾𑌸𑌾𑌤𑍍 𑌸 𑌤𑍁 𑌹𑌨𑍍𑌤𑍁𑌮𑌨𑍍𑌤𑌿𑌕𑌗𑌤𑌾𑌂 𑌤𑌨𑍍𑌵𑍀𑌂 𑌕𑍃𑌪𑌾𑌣𑍀𑌮𑌧𑌾𑌤𑍍 ॥7॥

𑌗𑍃𑌹𑍍𑌣𑌾𑌨𑌶𑍍𑌚𑌿𑌕𑍁𑌰𑍇𑌷𑍁 𑌤𑌾𑌂 𑌖𑌲𑌮𑌤𑌿𑌃 𑌶𑍗𑌰𑍇𑌶𑍍𑌚𑌿𑌰𑌂 𑌸𑌾𑌨𑍍𑌤𑍍𑌵𑌨𑍈-

𑌰𑍍𑌨𑍋 𑌮𑍁𑌞𑍍𑌚𑌨𑍍 𑌪𑍁𑌨𑌰𑌾𑌤𑍍𑌮𑌜𑌾𑌰𑍍𑌪𑌣𑌗𑌿𑌰𑌾 𑌪𑍍𑌰𑍀𑌤𑍋𑌽𑌥 𑌯𑌾𑌤𑍋 𑌗𑍃𑌹𑌾𑌨𑍍 ।

𑌆𑌦𑍍𑌯𑌂 𑌤𑍍𑌵𑌤𑍍𑌸𑌹𑌜𑌂 𑌤𑌥𑌾𑌽𑌰𑍍𑌪𑌿𑌤𑌮𑌪𑌿 𑌸𑍍𑌨𑍇𑌹𑍇𑌨 𑌨𑌾𑌹𑌨𑍍𑌨𑌸𑍗

𑌦𑍁𑌷𑍍𑌟𑌾𑌨𑌾𑌮𑌪𑌿 𑌦𑍇𑌵 𑌪𑍁𑌷𑍍𑌟𑌕𑌰𑍁𑌣𑌾 𑌦𑍃𑌷𑍍𑌟𑌾 𑌹𑌿 𑌧𑍀𑌰𑍇𑌕𑌦𑌾 ॥8॥

𑌤𑌾𑌵𑌤𑍍𑌤𑍍𑌵𑌨𑍍𑌮𑌨𑌸𑍈𑌵 𑌨𑌾𑌰𑌦𑌮𑍁𑌨𑌿𑌃 𑌪𑍍𑌰𑍋𑌚𑍇 𑌸 𑌭𑍋𑌜𑍇𑌶𑍍𑌵𑌰𑌂

𑌯𑍂𑌯𑌂 𑌨𑌨𑍍𑌵𑌸𑍁𑌰𑌾𑌃 𑌸𑍁𑌰𑌾𑌶𑍍𑌚 𑌯𑌦𑌵𑍋 𑌜𑌾𑌨𑌾𑌸𑌿 𑌕𑌿𑌂 𑌨 𑌪𑍍𑌰𑌭𑍋 ।

𑌮𑌾𑌯𑌾𑌵𑍀 𑌸 𑌹𑌰𑌿𑌰𑍍𑌭𑌵𑌦𑍍𑌵𑌧𑌕𑍃𑌤𑍇 𑌭𑌾𑌵𑍀 𑌸𑍁𑌰𑌪𑍍𑌰𑌾𑌰𑍍𑌥𑌨𑌾-

𑌦𑌿𑌤𑍍𑌯𑌾𑌕𑌰𑍍𑌣𑍍𑌯 𑌯𑌦𑍂𑌨𑌦𑍂𑌧𑍁𑌨𑌦𑌸𑍗 𑌶𑍗𑌰𑍇𑌶𑍍𑌚 𑌸𑍂𑌨𑍂𑌨𑌹𑌨𑍍 ॥9॥

𑌪𑍍𑌰𑌾𑌪𑍍𑌤𑍇 𑌸𑌪𑍍𑌤𑌮𑌗𑌰𑍍𑌭𑌤𑌾𑌮𑌹𑌿𑌪𑌤𑍗 𑌤𑍍𑌵𑌤𑍍𑌪𑍍𑌰𑍇𑌰𑌣𑌾𑌨𑍍𑌮𑌾𑌯𑌯𑌾

𑌨𑍀𑌤𑍇 𑌮𑌾𑌧𑌵 𑌰𑍋𑌹𑌿𑌣𑍀𑌂 𑌤𑍍𑌵𑌮𑌪𑌿 𑌭𑍋𑌃𑌸𑌚𑍍𑌚𑌿𑌤𑍍𑌸𑍁𑌖𑍈𑌕𑌾𑌤𑍍𑌮𑌕𑌃 ।

𑌦𑍇𑌵𑌕𑍍𑌯𑌾 𑌜𑌠𑌰𑌂 𑌵𑌿𑌵𑍇𑌶𑌿𑌥 𑌵𑌿𑌭𑍋 𑌸𑌂𑌸𑍍𑌤𑍂𑌯𑌮𑌾𑌨𑌃 𑌸𑍁𑌰𑍈𑌃

𑌸 𑌤𑍍𑌵𑌂 𑌕𑍃𑌷𑍍𑌣 𑌵𑌿𑌧𑍂𑌯 𑌰𑍋𑌗𑌪𑌟𑌲𑍀𑌂 𑌭𑌕𑍍𑌤𑌿𑌂 𑌪𑌰𑌾𑌂 𑌦𑍇𑌹𑌿 𑌮𑍇 ॥10॥

Roman (IAST) Transliteration

sāndrānandatano hare nanu purā daivāsure saṅgare

tvatkṛttā api karmaśeṣavaśato ye te na yātā gatim |

teṣāṃ bhūtalajanmanāṃ ditibhuvāṃ bhāreṇa dūrārditā

bhūmiḥ prāpa viriñcamāśritapadaṃ devaiḥ puraivāgataiḥ ||1||

hā hā durjanabhūribhāramathitāṃ pāthonidhau pātukā-

metāṃ pālaya hanta me vivaśatāṃ sampṛccha devānimān |

ityādipracurapralāpavivaśāmālokya dhātā mahīṃ

devānāṃ vadanāni vīkṣya parito dadhyau bhavantaṃ hare ||2||

ūce cāmbujabhūramūnayi surāḥ satyaṃ dharitryā vaco

nanvasyā bhavatāṃ ca rakṣaṇavidhau dakṣo hi lakṣmīpatiḥ |

sarve śarvapurassarā vayamito gatvā payovāridhiṃ

natvā taṃ stumahe javāditi yayuḥ sākaṃ tavāketanam ||3||

te mugdhānilaśālidugdhajaladhestīraṃ gatāḥ saṅgatā

yāvattvatpadacintanaikamanasastāvat sa pāthojabhūḥ |

tvadvācaṃ hṛdaye niśamya sakalānānandayannūcivā-

nākhyātaḥ paramātmanā svayamahaṃ vākyaṃ tadākarṇyatām ||4||

jāne dīnadaśāmahaṃ diviṣadāṃ bhūmeśca bhīmairnṛpai-

statkṣepāya bhavāmi yādavakule so'haṃ samagrātmanā |

devā vṛṣṇikule bhavantu kalayā devāṅganāścāvanau

matsevārthamiti tvadīyavacanaṃ pāthojabhūrūcivān ||5||

śrutvā karṇarasāyanaṃ tava vacaḥ sarveṣu nirvāpita-

svānteṣvīśa gateṣu tāvakakṛpāpīyūṣatṛptātmasu |

vikhyāte madhurāpure kila bhavatsānnidhyapuṇyottare

dhanyāṃ devakanandanāmudavahadrājā sa śūrātmajaḥ ||6||

udvāhāvasitau tadīyasahajaḥ kaṃso'tha sammānaya-

nnetau sūtatayā gataḥ pathi rathe vyomotthayā tvadgirā |

asyāstvāmatiduṣṭamaṣṭamasuto hanteti hanteritaḥ

santrāsāt sa tu hantumantikagatāṃ tanvīṃ kṛpāṇīmadhāt ||7||

gṛhṇānaścikureṣu tāṃ khalamatiḥ śaureściraṃ sāntvanai-

rno muñcan punarātmajārpaṇagirā prīto'tha yāto gṛhān |

ādyaṃ tvatsahajaṃ tathā'rpitamapi snehena nāhannasau

duṣṭānāmapi deva puṣṭakaruṇā dṛṣṭā hi dhīrekadā ||8||

tāvattvanmanasaiva nāradamuniḥ proce sa bhojeśvaraṃ

yūyaṃ nanvasurāḥ surāśca yadavo jānāsi kiṃ na prabho |

māyāvī sa harirbhavadvadhakṛte bhāvī suraprārthanā-

dityākarṇya yadūnadūdhunadasau śaureśca sūnūnahan ||9||

prāpte saptamagarbhatāmahipatau tvatpreraṇānmāyayā

nīte mādhava rohiṇīṃ tvamapi bhoḥsaccitsukhaikātmakaḥ |

devakyā jaṭharaṃ viveśitha vibho saṃstūyamānaḥ suraiḥ

sa tvaṃ kṛṣṇa vidhūya rogapaṭalīṃ bhaktiṃ parāṃ dehi me ||10||