Narayaniyam Dashaka 36 - Parashuramavataram

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 36 - 𑌪𑌰𑌶𑍁𑌰𑌾𑌮𑌾𑌵𑌤𑌾𑌰𑌮𑍍

Vishnu Grantha

𑌅𑌤𑍍𑌰𑍇𑌃 𑌪𑍁𑌤𑍍𑌰𑌤𑌯𑌾 𑌪𑍁𑌰𑌾 𑌤𑍍𑌵𑌮𑌨𑌸𑍂𑌯𑌾𑌯𑌾𑌂 𑌹𑌿 𑌦𑌤𑍍𑌤𑌾𑌭𑌿𑌧𑍋

𑌜𑌾𑌤𑌃 𑌶𑌿𑌷𑍍𑌯𑌨𑌿𑌬𑌨𑍍𑌧𑌤𑌨𑍍𑌦𑍍𑌰𑌿𑌤𑌮𑌨𑌾𑌃 𑌸𑍍𑌵𑌸𑍍𑌥𑌶𑍍𑌚𑌰𑌨𑍍 𑌕𑌾𑌨𑍍𑌤𑌯𑌾 ।

𑌦𑍃𑌷𑍍𑌟𑍋 𑌭𑌕𑍍𑌤𑌤𑌮𑍇𑌨 𑌹𑍇𑌹𑌯𑌮𑌹𑍀𑌪𑌾𑌲𑍇𑌨 𑌤𑌸𑍍𑌮𑍈 𑌵𑌰𑌾-

𑌨𑌷𑍍𑌟𑍈𑌶𑍍𑌵𑌰𑍍𑌯𑌮𑍁𑌖𑌾𑌨𑍍 𑌪𑍍𑌰𑌦𑌾𑌯 𑌦𑌦𑌿𑌥 𑌸𑍍𑌵𑍇𑌨𑍈𑌵 𑌚𑌾𑌨𑍍𑌤𑍇 𑌵𑌧𑌮𑍍 ॥1॥

𑌸𑌤𑍍𑌯𑌂 𑌕𑌰𑍍𑌤𑍁𑌮𑌥𑌾𑌰𑍍𑌜𑍁𑌨𑌸𑍍𑌯 𑌚 𑌵𑌰𑌂 𑌤𑌚𑍍𑌛𑌕𑍍𑌤𑌿𑌮𑌾𑌤𑍍𑌰𑌾𑌨𑌤𑌂

𑌬𑍍𑌰𑌹𑍍𑌮𑌦𑍍𑌵𑍇𑌷𑌿 𑌤𑌦𑌾𑌖𑌿𑌲𑌂 𑌨𑍃𑌪𑌕𑍁𑌲𑌂 𑌹𑌨𑍍𑌤𑍁𑌂 𑌚 𑌭𑍂𑌮𑍇𑌰𑍍𑌭𑌰𑌮𑍍 ।

𑌸𑌞𑍍𑌜𑌾𑌤𑍋 𑌜𑌮𑌦𑌗𑍍𑌨𑌿𑌤𑍋 𑌭𑍃𑌗𑍁𑌕𑍁𑌲𑍇 𑌤𑍍𑌵𑌂 𑌰𑍇𑌣𑍁𑌕𑌾𑌯𑌾𑌂 𑌹𑌰𑍇

𑌰𑌾𑌮𑍋 𑌨𑌾𑌮 𑌤𑌦𑌾𑌤𑍍𑌮𑌜𑍇𑌷𑍍𑌵𑌵𑌰𑌜𑌃 𑌪𑌿𑌤𑍍𑌰𑍋𑌰𑌧𑌾𑌃 𑌸𑌮𑍍𑌮𑌦𑌮𑍍 ॥2॥

𑌲𑌬𑍍𑌧𑌾𑌮𑍍𑌨𑌾𑌯𑌗𑌣𑌶𑍍𑌚𑌤𑍁𑌰𑍍𑌦𑌶𑌵𑌯𑌾 𑌗𑌨𑍍𑌧𑌰𑍍𑌵𑌰𑌾𑌜𑍇 𑌮𑌨𑌾-

𑌗𑌾𑌸𑌕𑍍𑌤𑌾𑌂 𑌕𑌿𑌲 𑌮𑌾𑌤𑌰𑌂 𑌪𑍍𑌰𑌤𑌿 𑌪𑌿𑌤𑍁𑌃 𑌕𑍍𑌰𑍋𑌧𑌾𑌕𑍁𑌲𑌸𑍍𑌯𑌾𑌜𑍍𑌞𑌯𑌾 ।

𑌤𑌾𑌤𑌾𑌜𑍍𑌞𑌾𑌤𑌿𑌗𑌸𑍋𑌦𑌰𑍈𑌃 𑌸𑌮𑌮𑌿𑌮𑌾𑌂 𑌛𑌿𑌤𑍍𑌵𑌾𑌽𑌥 𑌶𑌾𑌨𑍍𑌤𑌾𑌤𑍍 𑌪𑌿𑌤𑍁-

𑌸𑍍𑌤𑍇𑌷𑌾𑌂 𑌜𑍀𑌵𑌨𑌯𑍋𑌗𑌮𑌾𑌪𑌿𑌥 𑌵𑌰𑌂 𑌮𑌾𑌤𑌾 𑌚 𑌤𑍇𑌽𑌦𑌾𑌦𑍍𑌵𑌰𑌾𑌨𑍍 ॥3॥

𑌪𑌿𑌤𑍍𑌰𑌾 𑌮𑌾𑌤𑍃𑌮𑍁𑌦𑍇 𑌸𑍍𑌤𑌵𑌾𑌹𑍃𑌤𑌵𑌿𑌯𑌦𑍍𑌧𑍇𑌨𑍋𑌰𑍍𑌨𑌿𑌜𑌾𑌦𑌾𑌶𑍍𑌰𑌮𑌾𑌤𑍍

𑌪𑍍𑌰𑌸𑍍𑌥𑌾𑌯𑌾𑌥 𑌭𑍃𑌗𑍋𑌰𑍍𑌗𑌿𑌰𑌾 𑌹𑌿𑌮𑌗𑌿𑌰𑌾𑌵𑌾𑌰𑌾𑌧𑍍𑌯 𑌗𑍗𑌰𑍀𑌪𑌤𑌿𑌮𑍍 ।

𑌲𑌬𑍍𑌧𑍍𑌵𑌾 𑌤𑌤𑍍𑌪𑌰𑌶𑍁𑌂 𑌤𑌦𑍁𑌕𑍍𑌤𑌦𑌨𑍁𑌜𑌚𑍍𑌛𑍇𑌦𑍀 𑌮𑌹𑌾𑌸𑍍𑌤𑍍𑌰𑌾𑌦𑌿𑌕𑌂

𑌪𑍍𑌰𑌾𑌪𑍍𑌤𑍋 𑌮𑌿𑌤𑍍𑌰𑌮𑌥𑌾𑌕𑍃𑌤𑌵𑍍𑌰𑌣𑌮𑍁𑌨𑌿𑌂 𑌪𑍍𑌰𑌾𑌪𑍍𑌯𑌾𑌗𑌮𑌃 𑌸𑍍𑌵𑌾𑌶𑍍𑌰𑌮𑌮𑍍 ॥4॥

𑌆𑌖𑍇𑌟𑍋𑌪𑌗𑌤𑍋𑌽𑌰𑍍𑌜𑍁𑌨𑌃 𑌸𑍁𑌰𑌗𑌵𑍀𑌸𑌮𑍍𑌪𑍍𑌰𑌾𑌪𑍍𑌤𑌸𑌮𑍍𑌪𑌦𑍍𑌗𑌣𑍈-

𑌸𑍍𑌤𑍍𑌵𑌤𑍍𑌪𑌿𑌤𑍍𑌰𑌾 𑌪𑌰𑌿𑌪𑍂𑌜𑌿𑌤𑌃 𑌪𑍁𑌰𑌗𑌤𑍋 𑌦𑍁𑌰𑍍𑌮𑌨𑍍𑌤𑍍𑌰𑌿𑌵𑌾𑌚𑌾 𑌪𑍁𑌨𑌃 ।

𑌗𑌾𑌂 𑌕𑍍𑌰𑍇𑌤𑍁𑌂 𑌸𑌚𑌿𑌵𑌂 𑌨𑍍𑌯𑌯𑍁𑌙𑍍𑌕𑍍𑌤 𑌕𑍁𑌧𑌿𑌯𑌾 𑌤𑍇𑌨𑌾𑌪𑌿 𑌰𑍁𑌨𑍍𑌧𑌨𑍍𑌮𑍁𑌨𑌿-

𑌪𑍍𑌰𑌾𑌣𑌕𑍍𑌷𑍇𑌪𑌸𑌰𑍋𑌷𑌗𑍋𑌹𑌤𑌚𑌮𑍂𑌚𑌕𑍍𑌰𑍇𑌣 𑌵𑌤𑍍𑌸𑍋 𑌹𑍃𑌤𑌃 ॥5॥

𑌶𑍁𑌕𑍍𑌰𑍋𑌜𑍍𑌜𑍀𑌵𑌿𑌤𑌤𑌾𑌤𑌵𑌾𑌕𑍍𑌯𑌚𑌲𑌿𑌤𑌕𑍍𑌰𑍋𑌧𑍋𑌽𑌥 𑌸𑌖𑍍𑌯𑌾 𑌸𑌮𑌂

𑌬𑌿𑌭𑍍𑌰𑌦𑍍𑌧𑍍𑌯𑌾𑌤𑌮𑌹𑍋𑌦𑌰𑍋𑌪𑌨𑌿𑌹𑌿𑌤𑌂 𑌚𑌾𑌪𑌂 𑌕𑍁𑌠𑌾𑌰𑌂 𑌶𑌰𑌾𑌨𑍍 ।

𑌆𑌰𑍂𑌢𑌃 𑌸𑌹𑌵𑌾𑌹𑌯𑌨𑍍𑌤𑍃𑌕𑌰𑌥𑌂 𑌮𑌾𑌹𑌿𑌷𑍍𑌮𑌤𑍀𑌮𑌾𑌵𑌿𑌶𑌨𑍍

𑌵𑌾𑌗𑍍𑌭𑌿𑌰𑍍𑌵𑌤𑍍𑌸𑌮𑌦𑌾𑌶𑍁𑌷𑌿 𑌕𑍍𑌷𑌿𑌤𑌿𑌪𑌤𑍗 𑌸𑌮𑍍𑌪𑍍𑌰𑌾𑌸𑍍𑌤𑍁𑌥𑌾𑌃 𑌸𑌙𑍍𑌗𑌰𑌮𑍍 ॥6॥

𑌪𑍁𑌤𑍍𑌰𑌾𑌣𑌾𑌮𑌯𑍁𑌤𑍇𑌨 𑌸𑌪𑍍𑌤𑌦𑌶𑌭𑌿𑌶𑍍𑌚𑌾𑌕𑍍𑌷𑍗𑌹𑌿𑌣𑍀𑌭𑌿𑌰𑍍𑌮𑌹𑌾-

𑌸𑍇𑌨𑌾𑌨𑍀𑌭𑌿𑌰𑌨𑍇𑌕𑌮𑌿𑌤𑍍𑌰𑌨𑌿𑌵𑌹𑍈𑌰𑍍𑌵𑍍𑌯𑌾𑌜𑍃𑌮𑍍𑌭𑌿𑌤𑌾𑌯𑍋𑌧𑌨𑌃 ।

𑌸𑌦𑍍𑌯𑌸𑍍𑌤𑍍𑌵𑌤𑍍𑌕𑌕𑍁𑌠𑌾𑌰𑌬𑌾𑌣𑌵𑌿𑌦𑌲𑌨𑍍𑌨𑌿𑌶𑍍𑌶𑍇𑌷𑌸𑍈𑌨𑍍𑌯𑍋𑌤𑍍𑌕𑌰𑍋

𑌭𑍀𑌤𑌿𑌪𑍍𑌰𑌦𑍍𑌰𑍁𑌤𑌨𑌷𑍍𑌟𑌶𑌿𑌷𑍍𑌟𑌤𑌨𑌯𑌸𑍍𑌤𑍍𑌵𑌾𑌮𑌾𑌪𑌤𑌤𑍍 𑌹𑍇𑌹𑌯𑌃 ॥7॥

𑌲𑍀𑌲𑌾𑌵𑌾𑌰𑌿𑌤𑌨𑌰𑍍𑌮𑌦𑌾𑌜𑌲𑌵𑌲𑌲𑍍𑌲𑌙𑍍𑌕𑍇𑌶𑌗𑌰𑍍𑌵𑌾𑌪𑌹-

𑌶𑍍𑌰𑍀𑌮𑌦𑍍𑌬𑌾𑌹𑍁𑌸𑌹𑌸𑍍𑌰𑌮𑍁𑌕𑍍𑌤𑌬𑌹𑍁𑌶𑌸𑍍𑌤𑍍𑌰𑌾𑌸𑍍𑌤𑍍𑌰𑌂 𑌨𑌿𑌰𑍁𑌨𑍍𑌧𑌨𑍍𑌨𑌮𑍁𑌮𑍍 ।

𑌚𑌕𑍍𑌰𑍇 𑌤𑍍𑌵𑌯𑍍𑌯𑌥 𑌵𑍈𑌷𑍍𑌣𑌵𑍇𑌽𑌪𑌿 𑌵𑌿𑌫𑌲𑍇 𑌬𑍁𑌦𑍍𑌧𑍍𑌵𑌾 𑌹𑌰𑌿𑌂 𑌤𑍍𑌵𑌾𑌂 𑌮𑍁𑌦𑌾

𑌧𑍍𑌯𑌾𑌯𑌨𑍍𑌤𑌂 𑌛𑌿𑌤𑌸𑌰𑍍𑌵𑌦𑍋𑌷𑌮𑌵𑌧𑍀𑌃 𑌸𑍋𑌽𑌗𑌾𑌤𑍍 𑌪𑌰𑌂 𑌤𑍇 𑌪𑌦𑌮𑍍 ॥8॥

𑌭𑍂𑌯𑍋𑌽𑌮𑌰𑍍𑌷𑌿𑌤𑌹𑍇𑌹𑌯𑌾𑌤𑍍𑌮𑌜𑌗𑌣𑍈𑌸𑍍𑌤𑌾𑌤𑍇 𑌹𑌤𑍇 𑌰𑍇𑌣𑍁𑌕𑌾-

𑌮𑌾𑌘𑍍𑌨𑌾𑌨𑌾𑌂 𑌹𑍃𑌦𑌯𑌂 𑌨𑌿𑌰𑍀𑌕𑍍𑌷𑍍𑌯 𑌬𑌹𑍁𑌶𑍋 𑌘𑍋𑌰𑌾𑌂 𑌪𑍍𑌰𑌤𑌿𑌜𑍍𑌞𑌾𑌂 𑌵𑌹𑌨𑍍 ।

𑌧𑍍𑌯𑌾𑌨𑌾𑌨𑍀𑌤𑌰𑌥𑌾𑌯𑍁𑌧𑌸𑍍𑌤𑍍𑌵𑌮𑌕𑍃𑌥𑌾 𑌵𑌿𑌪𑍍𑌰𑌦𑍍𑌰𑍁𑌹𑌃 𑌕𑍍𑌷𑌤𑍍𑌰𑌿𑌯𑌾𑌨𑍍

𑌦𑌿𑌕𑍍𑌚𑌕𑍍𑌰𑍇𑌷𑍁 𑌕𑍁𑌠𑌾𑌰𑌯𑌨𑍍 𑌵𑌿𑌶𑌿𑌖𑌯𑌨𑍍 𑌨𑌿𑌃𑌕𑍍𑌷𑌤𑍍𑌰𑌿𑌯𑌾𑌂 𑌮𑍇𑌦𑌿𑌨𑍀𑌮𑍍 ॥9॥

𑌤𑌾𑌤𑍋𑌜𑍍𑌜𑍀𑌵𑌨𑌕𑍃𑌨𑍍𑌨𑍃𑌪𑌾𑌲𑌕𑌕𑍁𑌲𑌂 𑌤𑍍𑌰𑌿𑌸𑍍𑌸𑌪𑍍𑌤𑌕𑍃𑌤𑍍𑌵𑍋 𑌜𑌯𑌨𑍍

𑌸𑌨𑍍𑌤𑌰𑍍𑌪𑍍𑌯𑌾𑌥 𑌸𑌮𑌨𑍍𑌤𑌪𑌞𑍍𑌚𑌕𑌮𑌹𑌾𑌰𑌕𑍍𑌤𑌹𑍃𑌦𑍗𑌘𑍇 𑌪𑌿𑌤𑍃𑌨𑍍

𑌯𑌜𑍍𑌞𑍇 𑌕𑍍𑌷𑍍𑌮𑌾𑌮𑌪𑌿 𑌕𑌾𑌶𑍍𑌯𑌪𑌾𑌦𑌿𑌷𑍁 𑌦𑌿𑌶𑌨𑍍 𑌸𑌾𑌲𑍍𑌵𑍇𑌨 𑌯𑍁𑌧𑍍𑌯𑌨𑍍 𑌪𑍁𑌨𑌃

𑌕𑍃𑌷𑍍𑌣𑍋𑌽𑌮𑍁𑌂 𑌨𑌿𑌹𑌨𑌿𑌷𑍍𑌯𑌤𑍀𑌤𑌿 𑌶𑌮𑌿𑌤𑍋 𑌯𑍁𑌦𑍍𑌧𑌾𑌤𑍍 𑌕𑍁𑌮𑌾𑌰𑍈𑌰𑍍𑌭𑌵𑌾𑌨𑍍 ॥10॥

𑌨𑍍𑌯𑌸𑍍𑌯𑌾𑌸𑍍𑌤𑍍𑌰𑌾𑌣𑌿 𑌮𑌹𑍇𑌨𑍍𑌦𑍍𑌰𑌭𑍂𑌭𑍃𑌤𑌿 𑌤𑌪𑌸𑍍𑌤𑌨𑍍𑌵𑌨𑍍 𑌪𑍁𑌨𑌰𑍍𑌮𑌜𑍍𑌜𑌿𑌤𑌾𑌂

𑌗𑍋𑌕𑌰𑍍𑌣𑌾𑌵𑌧𑌿 𑌸𑌾𑌗𑌰𑍇𑌣 𑌧𑌰𑌣𑍀𑌂 𑌦𑍃𑌷𑍍𑌟𑍍𑌵𑌾𑌰𑍍𑌥𑌿𑌤𑌸𑍍𑌤𑌾𑌪𑌸𑍈𑌃 ।

𑌧𑍍𑌯𑌾𑌤𑍇𑌷𑍍𑌵𑌾𑌸𑌧𑍃𑌤𑌾𑌨𑌲𑌾𑌸𑍍𑌤𑍍𑌰𑌚𑌕𑌿𑌤𑌂 𑌸𑌿𑌨𑍍𑌧𑍁𑌂 𑌸𑍍𑌰𑍁𑌵𑌕𑍍𑌷𑍇𑌪𑌣𑌾-

𑌦𑍁𑌤𑍍𑌸𑌾𑌰𑍍𑌯𑍋𑌦𑍍𑌧𑍃𑌤𑌕𑍇𑌰𑌲𑍋 𑌭𑍃𑌗𑍁𑌪𑌤𑍇 𑌵𑌾𑌤𑍇𑌶 𑌸𑌂𑌰𑌕𑍍𑌷 𑌮𑌾𑌮𑍍 ॥11॥

Roman (IAST) Transliteration

atreḥ putratayā purā tvamanasūyāyāṃ hi dattābhidho

jātaḥ śiṣyanibandhatandritamanāḥ svasthaścaran kāntayā |

dṛṣṭo bhaktatamena hehayamahīpālena tasmai varā-

naṣṭaiśvaryamukhān pradāya daditha svenaiva cānte vadham ||1||

satyaṃ kartumathārjunasya ca varaṃ tacchaktimātrānataṃ

brahmadveṣi tadākhilaṃ nṛpakulaṃ hantuṃ ca bhūmerbharam |

sañjāto jamadagnito bhṛgukule tvaṃ reṇukāyāṃ hare

rāmo nāma tadātmajeṣvavarajaḥ pitroradhāḥ sammadam ||2||

labdhāmnāyagaṇaścaturdaśavayā gandharvarāje manā-

gāsaktāṃ kila mātaraṃ prati pituḥ krodhākulasyājñayā |

tātājñātigasodaraiḥ samamimāṃ chitvā'tha śāntāt pitu-

steṣāṃ jīvanayogamāpitha varaṃ mātā ca te'dādvarān ||3||

pitrā mātṛmude stavāhṛtaviyaddhenornijādāśramāt

prasthāyātha bhṛgorgirā himagirāvārādhya gaurīpatim |

labdhvā tatparaśuṃ taduktadanujacchedī mahāstrādikaṃ

prāpto mitramathākṛtavraṇamuniṃ prāpyāgamaḥ svāśramam ||4||

ākheṭopagato'rjunaḥ suragavīsamprāptasampadgaṇai-

stvatpitrā paripūjitaḥ puragato durmantrivācā punaḥ |

gāṃ kretuṃ sacivaṃ nyayuṅkta kudhiyā tenāpi rundhanmuni-

prāṇakṣepasaroṣagohatacamūcakreṇa vatso hṛtaḥ ||5||

śukrojjīvitatātavākyacalitakrodho'tha sakhyā samaṃ

bibhraddhyātamahodaropanihitaṃ cāpaṃ kuṭhāraṃ śarān |

ārūḍhaḥ sahavāhayantṛkarathaṃ māhiṣmatīmāviśan

vāgbhirvatsamadāśuṣi kṣitipatau samprāstuthāḥ saṅgaram ||6||

putrāṇāmayutena saptadaśabhiścākṣauhiṇībhirmahā-

senānībhiranekamitranivahairvyājṛmbhitāyodhanaḥ |

sadyastvatkakuṭhārabāṇavidalanniśśeṣasainyotkaro

bhītipradrutanaṣṭaśiṣṭatanayastvāmāpatat hehayaḥ ||7||

līlāvāritanarmadājalavalallaṅkeśagarvāpaha-

śrīmadbāhusahasramuktabahuśastrāstraṃ nirundhannamum |

cakre tvayyatha vaiṣṇave'pi viphale buddhvā hariṃ tvāṃ mudā

dhyāyantaṃ chitasarvadoṣamavadhīḥ so'gāt paraṃ te padam ||8||

bhūyo'marṣitahehayātmajagaṇaistāte hate reṇukā-

māghnānāṃ hṛdayaṃ nirīkṣya bahuśo ghorāṃ pratijñāṃ vahan |

dhyānānītarathāyudhastvamakṛthā vipradruhaḥ kṣatriyān

dikcakreṣu kuṭhārayan viśikhayan niḥkṣatriyāṃ medinīm ||9||

tātojjīvanakṛnnṛpālakakulaṃ trissaptakṛtvo jayan

santarpyātha samantapañcakamahāraktahṛdaughe pitṛn

yajñe kṣmāmapi kāśyapādiṣu diśan sālvena yudhyan punaḥ

kṛṣṇo'muṃ nihaniṣyatīti śamito yuddhāt kumārairbhavān ||10||

nyasyāstrāṇi mahendrabhūbhṛti tapastanvan punarmajjitāṃ

gokarṇāvadhi sāgareṇa dharaṇīṃ dṛṣṭvārthitastāpasaiḥ |

dhyāteṣvāsadhṛtānalāstracakitaṃ sindhuṃ sruvakṣepaṇā-

dutsāryoddhṛtakeralo bhṛgupate vāteśa saṃrakṣa mām ||11||