Narayaniyam Dashaka 35 - Shriramavataram-2

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 35 - 𑌶𑍍𑌰𑍀𑌰𑌾𑌮𑌾𑌵𑌤𑌾𑌰𑌮𑍍-2

Vishnu Grantha

𑌨𑍀𑌤𑌸𑍍𑌸𑍁𑌗𑍍𑌰𑍀𑌵𑌮𑍈𑌤𑍍𑌰𑍀𑌂 𑌤𑌦𑌨𑍁 𑌹𑌨𑍁𑌮𑌤𑌾 𑌦𑍁𑌨𑍍𑌦𑍁𑌭𑍇𑌃 𑌕𑌾𑌯𑌮𑍁𑌚𑍍𑌚𑍈𑌃

𑌕𑍍𑌷𑌿𑌪𑍍𑌤𑍍𑌵𑌾𑌙𑍍𑌗𑍁𑌷𑍍𑌠𑍇𑌨 𑌭𑍂𑌯𑍋 𑌲𑍁𑌲𑍁𑌵𑌿𑌥 𑌯𑍁𑌗𑌪𑌤𑍍 𑌪𑌤𑍍𑌰𑌿𑌣𑌾 𑌸𑌪𑍍𑌤 𑌸𑌾𑌲𑌾𑌨𑍍 ।

𑌹𑌤𑍍𑌵𑌾 𑌸𑍁𑌗𑍍𑌰𑍀𑌵𑌘𑌾𑌤𑍋𑌦𑍍𑌯𑌤𑌮𑌤𑍁𑌲𑌬𑌲𑌂 𑌬𑌾𑌲𑌿𑌨𑌂 𑌵𑍍𑌯𑌾𑌜𑌵𑍃𑌤𑍍𑌤𑍍𑌯𑌾

𑌵𑌰𑍍𑌷𑌾𑌵𑍇𑌲𑌾𑌮𑌨𑍈𑌷𑍀𑌰𑍍𑌵𑌿𑌰𑌹𑌤𑌰𑌲𑌿𑌤𑌸𑍍𑌤𑍍𑌵𑌂 𑌮𑌤𑌙𑍍𑌗𑌾𑌶𑍍𑌰𑌮𑌾𑌨𑍍𑌤𑍇 ॥1॥

𑌸𑍁𑌗𑍍𑌰𑍀𑌵𑍇𑌣𑌾𑌨𑍁𑌜𑍋𑌕𑍍𑌤𑍍𑌯𑌾 𑌸𑌭𑌯𑌮𑌭𑌿𑌯𑌤𑌾 𑌵𑍍𑌯𑍂𑌹𑌿𑌤𑌾𑌂 𑌵𑌾𑌹𑌿𑌨𑍀𑌂 𑌤𑌾-

𑌮𑍃𑌕𑍍𑌷𑌾𑌣𑌾𑌂 𑌵𑍀𑌕𑍍𑌷𑍍𑌯 𑌦𑌿𑌕𑍍𑌷𑍁 𑌦𑍍𑌰𑍁𑌤𑌮𑌥 𑌦𑌯𑌿𑌤𑌾𑌮𑌾𑌰𑍍𑌗𑌣𑌾𑌯𑌾𑌵𑌨𑌮𑍍𑌰𑌾𑌮𑍍 ।

𑌸𑌨𑍍𑌦𑍇𑌶𑌂 𑌚𑌾𑌙𑍍𑌗𑍁𑌲𑍀𑌯𑌂 𑌪𑌵𑌨𑌸𑍁𑌤𑌕𑌰𑍇 𑌪𑍍𑌰𑌾𑌦𑌿𑌶𑍋 𑌮𑍋𑌦𑌶𑌾𑌲𑍀

𑌮𑌾𑌰𑍍𑌗𑍇 𑌮𑌾𑌰𑍍𑌗𑍇 𑌮𑌮𑌾𑌰𑍍𑌗𑍇 𑌕𑌪𑌿𑌭𑌿𑌰𑌪𑌿 𑌤𑌦𑌾 𑌤𑍍𑌵𑌤𑍍𑌪𑍍𑌰𑌿𑌯𑌾 𑌸𑌪𑍍𑌰𑌯𑌾𑌸𑍈𑌃 ॥2॥

𑌤𑍍𑌵𑌦𑍍𑌵𑌾𑌰𑍍𑌤𑌾𑌕𑌰𑍍𑌣𑌨𑍋𑌦𑍍𑌯𑌦𑍍𑌗𑌰𑍁𑌦𑍁𑌰𑍁𑌜𑌵𑌸𑌮𑍍𑌪𑌾𑌤𑌿𑌸𑌮𑍍𑌪𑌾𑌤𑌿𑌵𑌾𑌕𑍍𑌯-

𑌪𑍍𑌰𑍋𑌤𑍍𑌤𑍀𑌰𑍍𑌣𑌾𑌰𑍍𑌣𑍋𑌧𑌿𑌰𑌨𑍍𑌤𑌰𑍍𑌨𑌗𑌰𑌿 𑌜𑌨𑌕𑌜𑌾𑌂 𑌵𑍀𑌕𑍍𑌷𑍍𑌯 𑌦𑌤𑍍𑌵𑌾𑌙𑍍𑌗𑍁𑌲𑍀𑌯𑌮𑍍 ।

𑌪𑍍𑌰𑌕𑍍𑌷𑍁𑌦𑍍𑌯𑍋𑌦𑍍𑌯𑌾𑌨𑌮𑌕𑍍𑌷𑌕𑍍𑌷𑌪𑌣𑌚𑌣𑌰𑌣𑌃 𑌸𑍋𑌢𑌬𑌨𑍍𑌧𑍋 𑌦𑌶𑌾𑌸𑍍𑌯𑌂

𑌦𑍃𑌷𑍍𑌟𑍍𑌵𑌾 𑌪𑍍𑌲𑍁𑌷𑍍𑌟𑍍𑌵𑌾 𑌚 𑌲𑌙𑍍𑌕𑌾𑌂 𑌝𑌟𑌿𑌤𑌿 𑌸 𑌹𑌨𑍁𑌮𑌾𑌨𑍍 𑌮𑍗𑌲𑌿𑌰𑌤𑍍𑌨𑌂 𑌦𑌦𑍗 𑌤𑍇 ॥3॥

𑌤𑍍𑌵𑌂 𑌸𑍁𑌗𑍍𑌰𑍀𑌵𑌾𑌙𑍍𑌗𑌦𑌾𑌦𑌿𑌪𑍍𑌰𑌬𑌲𑌕𑌪𑌿𑌚𑌮𑍂𑌚𑌕𑍍𑌰𑌵𑌿𑌕𑍍𑌰𑌾𑌨𑍍𑌤𑌭𑍂𑌮𑍀-

𑌚𑌕𑍍𑌰𑍋𑌽𑌭𑌿𑌕𑍍𑌰𑌮𑍍𑌯 𑌪𑌾𑌰𑍇𑌜𑌲𑌧𑌿 𑌨𑌿𑌶𑌿𑌚𑌰𑍇𑌨𑍍𑌦𑍍𑌰𑌾𑌨𑍁𑌜𑌾𑌶𑍍𑌰𑍀𑌯𑌮𑌾𑌣𑌃 ।

𑌤𑌤𑍍𑌪𑍍𑌰𑍋𑌕𑍍𑌤𑌾𑌂 𑌶𑌤𑍍𑌰𑍁𑌵𑌾𑌰𑍍𑌤𑌾𑌂 𑌰𑌹𑌸𑌿 𑌨𑌿𑌶𑌮𑌯𑌨𑍍 𑌪𑍍𑌰𑌾𑌰𑍍𑌥𑌨𑌾𑌪𑌾𑌰𑍍𑌥𑍍𑌯𑌰𑍋𑌷-

𑌪𑍍𑌰𑌾𑌸𑍍𑌤𑌾𑌗𑍍𑌨𑍇𑌯𑌾𑌸𑍍𑌤𑍍𑌰𑌤𑍇𑌜𑌸𑍍𑌤𑍍𑌰𑌸𑌦𑍁𑌦𑌧𑌿𑌗𑌿𑌰𑌾 𑌲𑌬𑍍𑌧𑌵𑌾𑌨𑍍 𑌮𑌧𑍍𑌯𑌮𑌾𑌰𑍍𑌗𑌮𑍍 ॥4॥

𑌕𑍀𑌶𑍈𑌰𑌾𑌶𑌾𑌨𑍍𑌤𑌰𑍋𑌪𑌾𑌹𑍃𑌤𑌗𑌿𑌰𑌿𑌨𑌿𑌕𑌰𑍈𑌃 𑌸𑍇𑌤𑍁𑌮𑌾𑌧𑌾𑌪𑍍𑌯 𑌯𑌾𑌤𑍋

𑌯𑌾𑌤𑍂𑌨𑍍𑌯𑌾𑌮𑌰𑍍𑌦𑍍𑌯 𑌦𑌂𑌷𑍍𑌟𑍍𑌰𑌾𑌨𑌖𑌶𑌿𑌖𑌰𑌿𑌶𑌿𑌲𑌾𑌸𑌾𑌲𑌶𑌸𑍍𑌤𑍍𑌰𑍈𑌃 𑌸𑍍𑌵𑌸𑍈𑌨𑍍𑌯𑍈𑌃 ।

𑌵𑍍𑌯𑌾𑌕𑍁𑌰𑍍𑌵𑌨𑍍 𑌸𑌾𑌨𑍁𑌜𑌸𑍍𑌤𑍍𑌵𑌂 𑌸𑌮𑌰𑌭𑍁𑌵𑌿 𑌪𑌰𑌂 𑌵𑌿𑌕𑍍𑌰𑌮𑌂 𑌶𑌕𑍍𑌰𑌜𑍇𑌤𑍍𑌰𑌾

𑌵𑍇𑌗𑌾𑌨𑍍𑌨𑌾𑌗𑌾𑌸𑍍𑌤𑍍𑌰𑌬𑌦𑍍𑌧𑌃 𑌪𑌤𑌗𑌪𑌤𑌿𑌗𑌰𑍁𑌨𑍍𑌮𑌾𑌰𑍁𑌤𑍈𑌰𑍍𑌮𑍋𑌚𑌿𑌤𑍋𑌽𑌭𑍂𑌃 ॥5॥

𑌸𑍗𑌮𑌿𑌤𑍍𑌰𑌿𑌸𑍍𑌤𑍍𑌵𑌤𑍍𑌰 𑌶𑌕𑍍𑌤𑌿𑌪𑍍𑌰𑌹𑍃𑌤𑌿𑌗𑌲𑌦𑌸𑍁𑌰𑍍𑌵𑌾𑌤𑌜𑌾𑌨𑍀𑌤𑌶𑍈𑌲-

𑌘𑍍𑌰𑌾𑌣𑌾𑌤𑍍 𑌪𑍍𑌰𑌾𑌣𑌾𑌨𑍁𑌪𑍇𑌤𑍋 𑌵𑍍𑌯𑌕𑍃𑌣𑍁𑌤 𑌕𑍁𑌸𑍃𑌤𑌿𑌶𑍍𑌲𑌾𑌘𑌿𑌨𑌂 𑌮𑍇𑌘𑌨𑌾𑌦𑌮𑍍 ।

𑌮𑌾𑌯𑌾𑌕𑍍𑌷𑍋𑌭𑍇𑌷𑍁 𑌵𑍈𑌭𑍀𑌷𑌣𑌵𑌚𑌨𑌹𑍃𑌤𑌸𑍍𑌤𑌮𑍍𑌭𑌨𑌃 𑌕𑍁𑌮𑍍𑌭𑌕𑌰𑍍𑌣𑌂

𑌸𑌮𑍍𑌪𑍍𑌰𑌾𑌪𑍍𑌤𑌂 𑌕𑌮𑍍𑌪𑌿𑌤𑍋𑌰𑍍𑌵𑍀𑌤𑌲𑌮𑌖𑌿𑌲𑌚𑌮𑍂𑌭𑌕𑍍𑌷𑌿𑌣𑌂 𑌵𑍍𑌯𑌕𑍍𑌷𑌿𑌣𑍋𑌸𑍍𑌤𑍍𑌵𑌮𑍍 ॥6॥

𑌗𑍃𑌹𑍍𑌣𑌨𑍍 𑌜𑌮𑍍𑌭𑌾𑌰𑌿𑌸𑌮𑍍𑌪𑍍𑌰𑍇𑌷𑌿𑌤𑌰𑌥𑌕𑌵𑌚𑍗 𑌰𑌾𑌵𑌣𑍇𑌨𑌾𑌭𑌿𑌯𑍁𑌦𑍍𑌧𑍍𑌯𑌨𑍍

𑌬𑍍𑌰𑌹𑍍𑌮𑌾𑌸𑍍𑌤𑍍𑌰𑍇𑌣𑌾𑌸𑍍𑌯 𑌭𑌿𑌨𑍍𑌦𑌨𑍍 𑌗𑌲𑌤𑌤𑌿𑌮𑌬𑌲𑌾𑌮𑌗𑍍𑌨𑌿𑌶𑍁𑌦𑍍𑌧𑌾𑌂 𑌪𑍍𑌰𑌗𑍃𑌹𑍍𑌣𑌨𑍍 ।

𑌦𑍇𑌵𑌶𑍍𑌰𑍇𑌣𑍀𑌵𑌰𑍋𑌜𑍍𑌜𑍀𑌵𑌿𑌤𑌸𑌮𑌰𑌮𑍃𑌤𑍈𑌰𑌕𑍍𑌷𑌤𑍈𑌃 𑌋𑌕𑍍𑌷𑌸𑌙𑍍𑌘𑍈-

𑌰𑍍𑌲𑌙𑍍𑌕𑌾𑌭𑌰𑍍𑌤𑍍𑌰𑌾 𑌚 𑌸𑌾𑌕𑌂 𑌨𑌿𑌜𑌨𑌗𑌰𑌮𑌗𑌾𑌃 𑌸𑌪𑍍𑌰𑌿𑌯𑌃 𑌪𑍁𑌷𑍍𑌪𑌕𑍇𑌣 ॥7॥

𑌪𑍍𑌰𑍀𑌤𑍋 𑌦𑌿𑌵𑍍𑌯𑌾𑌭𑌿𑌷𑍇𑌕𑍈𑌰𑌯𑍁𑌤𑌸𑌮𑌧𑌿𑌕𑌾𑌨𑍍 𑌵𑌤𑍍𑌸𑌰𑌾𑌨𑍍 𑌪𑌰𑍍𑌯𑌰𑌂𑌸𑍀-

𑌰𑍍𑌮𑍈𑌥𑌿𑌲𑍍𑌯𑌾𑌂 𑌪𑌾𑌪𑌵𑌾𑌚𑌾 𑌶𑌿𑌵! 𑌶𑌿𑌵! 𑌕𑌿𑌲 𑌤𑌾𑌂 𑌗𑌰𑍍𑌭𑌿𑌣𑍀𑌮𑌭𑍍𑌯𑌹𑌾𑌸𑍀𑌃 ।

𑌶𑌤𑍍𑌰𑍁𑌘𑍍𑌨𑍇𑌨𑌾𑌰𑍍𑌦𑌯𑌿𑌤𑍍𑌵𑌾 𑌲𑌵𑌣𑌨𑌿𑌶𑌿𑌚𑌰𑌂 𑌪𑍍𑌰𑌾𑌰𑍍𑌦𑌯𑌃 𑌶𑍂𑌦𑍍𑌰𑌪𑌾𑌶𑌂

𑌤𑌾𑌵𑌦𑍍𑌵𑌾𑌲𑍍𑌮𑍀𑌕𑌿𑌗𑍇𑌹𑍇 𑌕𑍃𑌤𑌵𑌸𑌤𑌿𑌰𑍁𑌪𑌾𑌸𑍂𑌤 𑌸𑍀𑌤𑌾 𑌸𑍁𑌤𑍗 𑌤𑍇 ॥8॥

𑌵𑌾𑌲𑍍𑌮𑍀𑌕𑍇𑌸𑍍𑌤𑍍𑌵𑌤𑍍𑌸𑍁𑌤𑍋𑌦𑍍𑌗𑌾𑌪𑌿𑌤𑌮𑌧𑍁𑌰𑌕𑍃𑌤𑍇𑌰𑌾𑌜𑍍𑌞𑌯𑌾 𑌯𑌜𑍍𑌞𑌵𑌾𑌟𑍇

𑌸𑍀𑌤𑌾𑌂 𑌤𑍍𑌵𑌯𑍍𑌯𑌾𑌪𑍍𑌤𑍁𑌕𑌾𑌮𑍇 𑌕𑍍𑌷𑌿𑌤𑌿𑌮𑌵𑌿𑌶𑌦𑌸𑍗 𑌤𑍍𑌵𑌂 𑌚 𑌕𑌾𑌲𑌾𑌰𑍍𑌥𑌿𑌤𑍋𑌽𑌭𑍂𑌃 ।

𑌹𑍇𑌤𑍋𑌃 𑌸𑍗𑌮𑌿𑌤𑍍𑌰𑌿𑌘𑌾𑌤𑍀 𑌸𑍍𑌵𑌯𑌮𑌥 𑌸𑌰𑌯𑍂𑌮𑌗𑍍𑌨𑌨𑌿𑌶𑍍𑌶𑍇𑌷𑌭𑍃𑌤𑍍𑌯𑍈𑌃

𑌸𑌾𑌕𑌂 𑌨𑌾𑌕𑌂 𑌪𑍍𑌰𑌯𑌾𑌤𑍋 𑌨𑌿𑌜𑌪𑌦𑌮𑌗𑌮𑍋 𑌦𑍇𑌵 𑌵𑍈𑌕𑍁𑌣𑍍𑌠𑌮𑌾𑌦𑍍𑌯𑌮𑍍 ॥9॥

𑌸𑍋𑌽𑌯𑌂 𑌮𑌰𑍍𑌤𑍍𑌯𑌾𑌵𑌤𑌾𑌰𑌸𑍍𑌤𑌵 𑌖𑌲𑍁 𑌨𑌿𑌯𑌤𑌂 𑌮𑌰𑍍𑌤𑍍𑌯𑌶𑌿𑌕𑍍𑌷𑌾𑌰𑍍𑌥𑌮𑍇𑌵𑌂

𑌵𑌿𑌶𑍍𑌲𑍇𑌷𑌾𑌰𑍍𑌤𑌿𑌰𑍍𑌨𑌿𑌰𑌾𑌗𑌸𑍍𑌤𑍍𑌯𑌜𑌨𑌮𑌪𑌿 𑌭𑌵𑍇𑌤𑍍 𑌕𑌾𑌮𑌧𑌰𑍍𑌮𑌾𑌤𑌿𑌸𑌕𑍍𑌤𑍍𑌯𑌾 ।

𑌨𑍋 𑌚𑍇𑌤𑍍 𑌸𑍍𑌵𑌾𑌤𑍍𑌮𑌾𑌨𑍁𑌭𑍂𑌤𑍇𑌃 𑌕𑍍𑌵 𑌨𑍁 𑌤𑌵 𑌮𑌨𑌸𑍋 𑌵𑌿𑌕𑍍𑌰𑌿𑌯𑌾 𑌚𑌕𑍍𑌰𑌪𑌾𑌣𑍇

𑌸 𑌤𑍍𑌵𑌂 𑌸𑌤𑍍𑌤𑍍𑌵𑍈𑌕𑌮𑍂𑌰𑍍𑌤𑍇 𑌪𑌵𑌨𑌪𑍁𑌰𑌪𑌤𑍇 𑌵𑍍𑌯𑌾𑌧𑍁𑌨𑍁 𑌵𑍍𑌯𑌾𑌧𑌿𑌤𑌾𑌪𑌾𑌨𑍍 ॥10॥

Roman (IAST) Transliteration

nītassugrīvamaitrīṃ tadanu hanumatā dundubheḥ kāyamuccaiḥ

kṣiptvāṅguṣṭhena bhūyo luluvitha yugapat patriṇā sapta sālān |

hatvā sugrīvaghātodyatamatulabalaṃ bālinaṃ vyājavṛttyā

varṣāvelāmanaiṣīrvirahataralitastvaṃ mataṅgāśramānte ||1||

sugrīveṇānujoktyā sabhayamabhiyatā vyūhitāṃ vāhinīṃ tā-

mṛkṣāṇāṃ vīkṣya dikṣu drutamatha dayitāmārgaṇāyāvanamrām |

sandeśaṃ cāṅgulīyaṃ pavanasutakare prādiśo modaśālī

mārge mārge mamārge kapibhirapi tadā tvatpriyā saprayāsaiḥ ||2||

tvadvārtākarṇanodyadgarudurujavasampātisampātivākya-

prottīrṇārṇodhirantarnagari janakajāṃ vīkṣya datvāṅgulīyam |

prakṣudyodyānamakṣakṣapaṇacaṇaraṇaḥ soḍhabandho daśāsyaṃ

dṛṣṭvā pluṣṭvā ca laṅkāṃ jhaṭiti sa hanumān mauliratnaṃ dadau te ||3||

tvaṃ sugrīvāṅgadādiprabalakapicamūcakravikrāntabhūmī-

cakro'bhikramya pārejaladhi niśicarendrānujāśrīyamāṇaḥ |

tatproktāṃ śatruvārtāṃ rahasi niśamayan prārthanāpārthyaroṣa-

prāstāgneyāstratejastrasadudadhigirā labdhavān madhyamārgam ||4||

kīśairāśāntaropāhṛtagirinikaraiḥ setumādhāpya yāto

yātūnyāmardya daṃṣṭrānakhaśikhariśilāsālaśastraiḥ svasainyaiḥ |

vyākurvan sānujastvaṃ samarabhuvi paraṃ vikramaṃ śakrajetrā

vegānnāgāstrabaddhaḥ patagapatigarunmārutairmocito'bhūḥ ||5||

saumitristvatra śaktiprahṛtigaladasurvātajānītaśaila-

ghrāṇāt prāṇānupeto vyakṛṇuta kusṛtiślāghinaṃ meghanādam |

māyākṣobheṣu vaibhīṣaṇavacanahṛtastambhanaḥ kumbhakarṇaṃ

samprāptaṃ kampitorvītalamakhilacamūbhakṣiṇaṃ vyakṣiṇostvam ||6||

gṛhṇan jambhārisampreṣitarathakavacau rāvaṇenābhiyuddhyan

brahmāstreṇāsya bhindan galatatimabalāmagniśuddhāṃ pragṛhṇan |

devaśreṇīvarojjīvitasamaramṛtairakṣataiḥ ṛkṣasaṅghai-

rlaṅkābhartrā ca sākaṃ nijanagaramagāḥ sapriyaḥ puṣpakeṇa ||7||

prīto divyābhiṣekairayutasamadhikān vatsarān paryaraṃsī-

rmaithilyāṃ pāpavācā śiva! śiva! kila tāṃ garbhiṇīmabhyahāsīḥ |

śatrughnenārdayitvā lavaṇaniśicaraṃ prārdayaḥ śūdrapāśaṃ

tāvadvālmīkigehe kṛtavasatirupāsūta sītā sutau te ||8||

vālmīkestvatsutodgāpitamadhurakṛterājñayā yajñavāṭe

sītāṃ tvayyāptukāme kṣitimaviśadasau tvaṃ ca kālārthito'bhūḥ |

hetoḥ saumitrighātī svayamatha sarayūmagnaniśśeṣabhṛtyaiḥ

sākaṃ nākaṃ prayāto nijapadamagamo deva vaikuṇṭhamādyam ||9||

so'yaṃ martyāvatārastava khalu niyataṃ martyaśikṣārthamevaṃ

viśleṣārtirnirāgastyajanamapi bhavet kāmadharmātisaktyā |

no cet svātmānubhūteḥ kva nu tava manaso vikriyā cakrapāṇe

sa tvaṃ sattvaikamūrte pavanapurapate vyādhunu vyādhitāpān ||10||