Narayaniyam Dashaka 34 - Shriramavataram

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 34 - 𑌶𑍍𑌰𑍀𑌰𑌾𑌮𑌾𑌵𑌤𑌾𑌰𑌮𑍍

Vishnu Grantha

𑌗𑍀𑌰𑍍𑌵𑌾𑌣𑍈𑌰𑌰𑍍𑌥𑍍𑌯𑌮𑌾𑌨𑍋 𑌦𑌶𑌮𑍁𑌖𑌨𑌿𑌧𑌨𑌂 𑌕𑍋𑌸𑌲𑍇𑌷𑍍𑌵𑍃𑌶𑍍𑌯𑌶𑍃𑌙𑍍𑌗𑍇

𑌪𑍁𑌤𑍍𑌰𑍀𑌯𑌾𑌮𑌿𑌷𑍍𑌟𑌿𑌮𑌿𑌷𑍍𑌟𑍍𑌵𑌾 𑌦𑌦𑍁𑌷𑌿 𑌦𑌶𑌰𑌥𑌕𑍍𑌷𑍍𑌮𑌾𑌭𑍃𑌤𑍇 𑌪𑌾𑌯𑌸𑌾𑌗𑍍𑌰𑍍𑌯𑌮𑍍 ।

𑌤𑌦𑍍𑌭𑍁𑌕𑍍𑌤𑍍𑌯𑌾 𑌤𑌤𑍍𑌪𑍁𑌰𑌨𑍍𑌧𑍍𑌰𑍀𑌷𑍍𑌵𑌪𑌿 𑌤𑌿𑌸𑍃𑌷𑍁 𑌸𑌮𑌂 𑌜𑌾𑌤𑌗𑌰𑍍𑌭𑌾𑌸𑍁 𑌜𑌾𑌤𑍋

𑌰𑌾𑌮𑌸𑍍𑌤𑍍𑌵𑌂 𑌲𑌕𑍍𑌷𑍍𑌮𑌣𑍇𑌨 𑌸𑍍𑌵𑌯𑌮𑌥 𑌭𑌰𑌤𑍇𑌨𑌾𑌪𑌿 𑌶𑌤𑍍𑌰𑍁𑌘𑍍𑌨𑌨𑌾𑌮𑍍𑌨𑌾 ॥1॥

𑌕𑍋𑌦𑌣𑍍𑌡𑍀 𑌕𑍗𑌶𑌿𑌕𑌸𑍍𑌯 𑌕𑍍𑌰𑌤𑍁𑌵𑌰𑌮𑌵𑌿𑌤𑍁𑌂 𑌲𑌕𑍍𑌷𑍍𑌮𑌣𑍇𑌨𑌾𑌨𑍁𑌯𑌾𑌤𑍋

𑌯𑌾𑌤𑍋𑌽𑌭𑍂𑌸𑍍𑌤𑌾𑌤𑌵𑌾𑌚𑌾 𑌮𑍁𑌨𑌿𑌕𑌥𑌿𑌤𑌮𑌨𑍁𑌦𑍍𑌵𑌨𑍍𑌦𑍍𑌵𑌶𑌾𑌨𑍍𑌤𑌾𑌧𑍍𑌵𑌖𑍇𑌦𑌃 ।

𑌨𑍃𑌣𑌾𑌂 𑌤𑍍𑌰𑌾𑌣𑌾𑌯 𑌬𑌾𑌣𑍈𑌰𑍍𑌮𑍁𑌨𑌿𑌵𑌚𑌨𑌬𑌲𑌾𑌤𑍍𑌤𑌾𑌟𑌕𑌾𑌂 𑌪𑌾𑌟𑌯𑌿𑌤𑍍𑌵𑌾

𑌲𑌬𑍍𑌧𑍍𑌵𑌾𑌸𑍍𑌮𑌾𑌦𑌸𑍍𑌤𑍍𑌰𑌜𑌾𑌲𑌂 𑌮𑍁𑌨𑌿𑌵𑌨𑌮𑌗𑌮𑍋 𑌦𑍇𑌵 𑌸𑌿𑌦𑍍𑌧𑌾𑌶𑍍𑌰𑌮𑌾𑌖𑍍𑌯𑌮𑍍 ॥2॥

𑌮𑌾𑌰𑍀𑌚𑌂 𑌦𑍍𑌰𑌾𑌵𑌯𑌿𑌤𑍍𑌵𑌾 𑌮𑌖𑌶𑌿𑌰𑌸𑌿 𑌶𑌰𑍈𑌰𑌨𑍍𑌯𑌰𑌕𑍍𑌷𑌾𑌂𑌸𑌿 𑌨𑌿𑌘𑍍𑌨𑌨𑍍

𑌕𑌲𑍍𑌯𑌾𑌂 𑌕𑍁𑌰𑍍𑌵𑌨𑍍𑌨𑌹𑌲𑍍𑌯𑌾𑌂 𑌪𑌥𑌿 𑌪𑌦𑌰𑌜𑌸𑌾 𑌪𑍍𑌰𑌾𑌪𑍍𑌯 𑌵𑍈𑌦𑍇𑌹𑌗𑍇𑌹𑌮𑍍 ।

𑌭𑌿𑌨𑍍𑌦𑌾𑌨𑌶𑍍𑌚𑌾𑌨𑍍𑌦𑍍𑌰𑌚𑍂𑌡𑌂 𑌧𑌨𑍁𑌰𑌵𑌨𑌿𑌸𑍁𑌤𑌾𑌮𑌿𑌨𑍍𑌦𑌿𑌰𑌾𑌮𑍇𑌵 𑌲𑌬𑍍𑌧𑍍𑌵𑌾

𑌰𑌾𑌜𑍍𑌯𑌂 𑌪𑍍𑌰𑌾𑌤𑌿𑌷𑍍𑌠𑌥𑌾𑌸𑍍𑌤𑍍𑌵𑌂 𑌤𑍍𑌰𑌿𑌭𑌿𑌰𑌪𑌿 𑌚 𑌸𑌮𑌂 𑌭𑍍𑌰𑌾𑌤𑍃𑌵𑍀𑌰𑍈𑌸𑍍𑌸𑌦𑌾𑌰𑍈𑌃 ॥3॥

𑌆𑌰𑍁𑌨𑍍𑌧𑌾𑌨𑍇 𑌰𑍁𑌷𑌾𑌨𑍍𑌧𑍇 𑌭𑍃𑌗𑍁𑌕𑍁𑌲 𑌤𑌿𑌲𑌕𑍇 𑌸𑌙𑍍𑌕𑍍𑌰𑌮𑌯𑍍𑌯 𑌸𑍍𑌵𑌤𑍇𑌜𑍋

𑌯𑌾𑌤𑍇 𑌯𑌾𑌤𑍋𑌽𑌸𑍍𑌯𑌯𑍋𑌧𑍍𑌯𑌾𑌂 𑌸𑍁𑌖𑌮𑌿𑌹 𑌨𑌿𑌵𑌸𑌨𑍍 𑌕𑌾𑌨𑍍𑌤𑌯𑌾 𑌕𑌾𑌨𑍍𑌤𑌮𑍂𑌰𑍍𑌤𑍇 ।

𑌶𑌤𑍍𑌰𑍁𑌘𑍍𑌨𑍇𑌨𑍈𑌕𑌦𑌾𑌥𑍋 𑌗𑌤𑌵𑌤𑌿 𑌭𑌰𑌤𑍇 𑌮𑌾𑌤𑍁𑌲𑌸𑍍𑌯𑌾𑌧𑌿𑌵𑌾𑌸𑌂

𑌤𑌾𑌤𑌾𑌰𑌬𑍍𑌧𑍋𑌽𑌭𑌿𑌷𑍇𑌕𑌸𑍍𑌤𑌵 𑌕𑌿𑌲 𑌵𑌿𑌹𑌤𑌃 𑌕𑍇𑌕𑌯𑌾𑌧𑍀𑌶𑌪𑍁𑌤𑍍𑌰𑍍𑌯𑌾 ॥4॥

𑌤𑌾𑌤𑍋𑌕𑍍𑌤𑍍𑌯𑌾 𑌯𑌾𑌤𑍁𑌕𑌾𑌮𑍋 𑌵𑌨𑌮𑌨𑍁𑌜𑌵𑌧𑍂𑌸𑌂𑌯𑍁𑌤𑌶𑍍𑌚𑌾𑌪𑌧𑌾𑌰𑌃

𑌪𑍗𑌰𑌾𑌨𑌾𑌰𑍁𑌧𑍍𑌯 𑌮𑌾𑌰𑍍𑌗𑍇 𑌗𑍁𑌹𑌨𑌿𑌲𑌯𑌗𑌤𑌸𑍍𑌤𑍍𑌵𑌂 𑌜𑌟𑌾𑌚𑍀𑌰𑌧𑌾𑌰𑍀।

𑌨𑌾𑌵𑌾 𑌸𑌨𑍍𑌤𑍀𑌰𑍍𑌯 𑌗𑌙𑍍𑌗𑌾𑌮𑌧𑌿𑌪𑌦𑌵𑌿 𑌪𑍁𑌨𑌸𑍍𑌤𑌂 𑌭𑌰𑌦𑍍𑌵𑌾𑌜𑌮𑌾𑌰𑌾-

𑌨𑍍𑌨𑌤𑍍𑌵𑌾 𑌤𑌦𑍍𑌵𑌾𑌕𑍍𑌯𑌹𑍇𑌤𑍋𑌰𑌤𑌿𑌸𑍁𑌖𑌮𑌵𑌸𑌶𑍍𑌚𑌿𑌤𑍍𑌰𑌕𑍂𑌟𑍇 𑌗𑌿𑌰𑍀𑌨𑍍𑌦𑍍𑌰𑍇 ॥5॥

𑌶𑍍𑌰𑍁𑌤𑍍𑌵𑌾 𑌪𑍁𑌤𑍍𑌰𑌾𑌰𑍍𑌤𑌿𑌖𑌿𑌨𑍍𑌨𑌂 𑌖𑌲𑍁 𑌭𑌰𑌤𑌮𑍁𑌖𑌾𑌤𑍍 𑌸𑍍𑌵𑌰𑍍𑌗𑌯𑌾𑌤𑌂 𑌸𑍍𑌵𑌤𑌾𑌤𑌂

𑌤𑌪𑍍𑌤𑍋 𑌦𑌤𑍍𑌵𑌾𑌽𑌮𑍍𑌬𑍁 𑌤𑌸𑍍𑌮𑍈 𑌨𑌿𑌦𑌧𑌿𑌥 𑌭𑌰𑌤𑍇 𑌪𑌾𑌦𑍁𑌕𑌾𑌂 𑌮𑍇𑌦𑌿𑌨𑍀𑌂 𑌚

𑌅𑌤𑍍𑌰𑌿𑌂 𑌨𑌤𑍍𑌵𑌾𑌽𑌥 𑌗𑌤𑍍𑌵𑌾 𑌵𑌨𑌮𑌤𑌿𑌵𑌿𑌪𑍁𑌲𑌂 𑌦𑌣𑍍𑌡𑌕𑌂 𑌚𑌣𑍍𑌡𑌕𑌾𑌯𑌂

𑌹𑌤𑍍𑌵𑌾 𑌦𑍈𑌤𑍍𑌯𑌂 𑌵𑌿𑌰𑌾𑌧𑌂 𑌸𑍁𑌗𑌤𑌿𑌮𑌕𑌲𑌯𑌶𑍍𑌚𑌾𑌰𑍁 𑌭𑍋𑌃 𑌶𑌾𑌰𑌭𑌙𑍍𑌗𑍀𑌮𑍍 ॥6॥

𑌨𑌤𑍍𑌵𑌾𑌽𑌗𑌸𑍍𑌤𑍍𑌯𑌂 𑌸𑌮𑌸𑍍𑌤𑌾𑌶𑌰𑌨𑌿𑌕𑌰𑌸𑌪𑌤𑍍𑌰𑌾𑌕𑍃𑌤𑌿𑌂 𑌤𑌾𑌪𑌸𑍇𑌭𑍍𑌯𑌃

𑌪𑍍𑌰𑌤𑍍𑌯𑌶𑍍𑌰𑍗𑌷𑍀𑌃 𑌪𑍍𑌰𑌿𑌯𑍈𑌷𑍀 𑌤𑌦𑌨𑍁 𑌚 𑌮𑍁𑌨𑌿𑌨𑌾 𑌵𑍈𑌷𑍍𑌣𑌵𑍇 𑌦𑌿𑌵𑍍𑌯𑌚𑌾𑌪𑍇 ।

𑌬𑍍𑌰𑌹𑍍𑌮𑌾𑌸𑍍𑌤𑍍𑌰𑍇 𑌚𑌾𑌪𑌿 𑌦𑌤𑍍𑌤𑍇 𑌪𑌥𑌿 𑌪𑌿𑌤𑍃𑌸𑍁𑌹𑍃𑌦𑌂 𑌵𑍀𑌕𑍍𑌷𑍍𑌯 𑌭𑍂𑌯𑍋 𑌜𑌟𑌾𑌯𑍁𑌂

𑌮𑍋𑌦𑌾𑌤𑍍 𑌗𑍋𑌦𑌾𑌤𑌟𑌾𑌨𑍍𑌤𑍇 𑌪𑌰𑌿𑌰𑌮𑌸𑌿 𑌪𑍁𑌰𑌾 𑌪𑌞𑍍𑌚𑌵𑌟𑍍𑌯𑌾𑌂 𑌵𑌧𑍂𑌟𑍍𑌯𑌾 ॥7॥

𑌪𑍍𑌰𑌾𑌪𑍍𑌤𑌾𑌯𑌾𑌃 𑌶𑍂𑌰𑍍𑌪𑌣𑌖𑍍𑌯𑌾 𑌮𑌦𑌨𑌚𑌲𑌧𑍃𑌤𑍇𑌰𑌰𑍍𑌥𑌨𑍈𑌰𑍍𑌨𑌿𑌸𑍍𑌸𑌹𑌾𑌤𑍍𑌮𑌾

𑌤𑌾𑌂 𑌸𑍗𑌮𑌿𑌤𑍍𑌰𑍗 𑌵𑌿𑌸𑍃𑌜𑍍𑌯 𑌪𑍍𑌰𑌬𑌲𑌤𑌮𑌰𑍁𑌷𑌾 𑌤𑍇𑌨 𑌨𑌿𑌰𑍍𑌲𑍂𑌨𑌨𑌾𑌸𑌾𑌮𑍍 ।

𑌦𑍃𑌷𑍍𑌟𑍍𑌵𑍈𑌨𑌾𑌂 𑌰𑍁𑌷𑍍𑌟𑌚𑌿𑌤𑍍𑌤𑌂 𑌖𑌰𑌮𑌭𑌿𑌪𑌤𑌿𑌤𑌂 𑌦𑍂𑌷𑌣𑌂 𑌚 𑌤𑍍𑌰𑌿𑌮𑍂𑌰𑍍𑌧𑌂

𑌵𑍍𑌯𑌾𑌹𑌿𑌂𑌸𑍀𑌰𑌾𑌶𑌰𑌾𑌨𑌪𑍍𑌯𑌯𑍁𑌤𑌸𑌮𑌧𑌿𑌕𑌾𑌂𑌸𑍍𑌤𑌤𑍍𑌕𑍍𑌷𑌣𑌾𑌦𑌕𑍍𑌷𑌤𑍋𑌷𑍍𑌮𑌾 ॥8॥

𑌸𑍋𑌦𑌰𑍍𑌯𑌾𑌪𑍍𑌰𑍋𑌕𑍍𑌤𑌵𑌾𑌰𑍍𑌤𑌾𑌵𑌿𑌵𑌶𑌦𑌶𑌮𑍁𑌖𑌾𑌦𑌿𑌷𑍍𑌟𑌮𑌾𑌰𑍀𑌚𑌮𑌾𑌯𑌾-

𑌸𑌾𑌰𑌙𑍍𑌗 𑌸𑌾𑌰𑌸𑌾𑌕𑍍𑌷𑍍𑌯𑌾 𑌸𑍍𑌪𑍃𑌹𑌿𑌤𑌮𑌨𑍁𑌗𑌤𑌃 𑌪𑍍𑌰𑌾𑌵𑌧𑍀𑌰𑍍𑌬𑌾𑌣𑌘𑌾𑌤𑌮𑍍 ।

𑌤𑌨𑍍𑌮𑌾𑌯𑌾𑌕𑍍𑌰𑌨𑍍𑌦𑌨𑌿𑌰𑍍𑌯𑌾𑌪𑌿𑌤𑌭𑌵𑌦𑌨𑍁𑌜𑌾𑌂 𑌰𑌾𑌵𑌣𑌸𑍍𑌤𑌾𑌮𑌹𑌾𑌰𑍍𑌷𑍀-

𑌤𑍍𑌤𑍇𑌨𑌾𑌰𑍍𑌤𑍋𑌽𑌪𑌿 𑌤𑍍𑌵𑌮𑌨𑍍𑌤𑌃 𑌕𑌿𑌮𑌪𑌿 𑌮𑍁𑌦𑌮𑌧𑌾𑌸𑍍𑌤𑌦𑍍𑌵𑌧𑍋𑌪𑌾𑌯𑌲𑌾𑌭𑌾𑌤𑍍 ॥9॥

𑌭𑍂𑌯𑌸𑍍𑌤𑌨𑍍𑌵𑍀𑌂 𑌵𑌿𑌚𑌿𑌨𑍍𑌵𑌨𑍍𑌨𑌹𑍃𑌤 𑌦𑌶𑌮𑍁𑌖𑌸𑍍𑌤𑍍𑌵𑌦𑍍𑌵𑌧𑍂𑌂 𑌮𑌦𑍍𑌵𑌧𑍇𑌨𑍇-

𑌤𑍍𑌯𑍁𑌕𑍍𑌤𑍍𑌵𑌾 𑌯𑌾𑌤𑍇 𑌜𑌟𑌾𑌯𑍗 𑌦𑌿𑌵𑌮𑌥 𑌸𑍁𑌹𑍃𑌦𑌃 𑌪𑍍𑌰𑌾𑌤𑌨𑍋𑌃 𑌪𑍍𑌰𑍇𑌤𑌕𑌾𑌰𑍍𑌯𑌮𑍍 ।

𑌗𑍃𑌹𑍍𑌣𑌾𑌨𑌂 𑌤𑌂 𑌕𑌬𑌨𑍍𑌧𑌂 𑌜𑌘𑌨𑌿𑌥 𑌶𑌬𑌰𑍀𑌂 𑌪𑍍𑌰𑍇𑌕𑍍𑌷𑍍𑌯 𑌪𑌮𑍍𑌪𑌾𑌤𑌟𑍇 𑌤𑍍𑌵𑌂

𑌸𑌮𑍍𑌪𑍍𑌰𑌾𑌪𑍍𑌤𑍋 𑌵𑌾𑌤𑌸𑍂𑌨𑍁𑌂 𑌭𑍃𑌶𑌮𑍁𑌦𑌿𑌤𑌮𑌨𑌾𑌃 𑌪𑌾𑌹𑌿 𑌵𑌾𑌤𑌾𑌲𑌯𑍇𑌶 ॥10॥

Roman (IAST) Transliteration

gīrvāṇairarthyamāno daśamukhanidhanaṃ kosaleṣvṛśyaśṛṅge

putrīyāmiṣṭimiṣṭvā daduṣi daśarathakṣmābhṛte pāyasāgryam |

tadbhuktyā tatpurandhrīṣvapi tisṛṣu samaṃ jātagarbhāsu jāto

rāmastvaṃ lakṣmaṇena svayamatha bharatenāpi śatrughnanāmnā ||1||

kodaṇḍī kauśikasya kratuvaramavituṃ lakṣmaṇenānuyāto

yāto'bhūstātavācā munikathitamanudvandvaśāntādhvakhedaḥ |

nṛṇāṃ trāṇāya bāṇairmunivacanabalāttāṭakāṃ pāṭayitvā

labdhvāsmādastrajālaṃ munivanamagamo deva siddhāśramākhyam ||2||

mārīcaṃ drāvayitvā makhaśirasi śarairanyarakṣāṃsi nighnan

kalyāṃ kurvannahalyāṃ pathi padarajasā prāpya vaidehageham |

bhindānaścāndracūḍaṃ dhanuravanisutāmindirāmeva labdhvā

rājyaṃ prātiṣṭhathāstvaṃ tribhirapi ca samaṃ bhrātṛvīraissadāraiḥ ||3||

ārundhāne ruṣāndhe bhṛgukula tilake saṅkramayya svatejo

yāte yāto'syayodhyāṃ sukhamiha nivasan kāntayā kāntamūrte |

śatrughnenaikadātho gatavati bharate mātulasyādhivāsaṃ

tātārabdho'bhiṣekastava kila vihataḥ kekayādhīśaputryā ||4||

tātoktyā yātukāmo vanamanujavadhūsaṃyutaścāpadhāraḥ

paurānārudhya mārge guhanilayagatastvaṃ jaṭācīradhārī|

nāvā santīrya gaṅgāmadhipadavi punastaṃ bharadvājamārā-

nnatvā tadvākyahetoratisukhamavasaścitrakūṭe girīndre ||5||

śrutvā putrārtikhinnaṃ khalu bharatamukhāt svargayātaṃ svatātaṃ

tapto datvā'mbu tasmai nidadhitha bharate pādukāṃ medinīṃ ca

atriṃ natvā'tha gatvā vanamativipulaṃ daṇḍakaṃ caṇḍakāyaṃ

hatvā daityaṃ virādhaṃ sugatimakalayaścāru bhoḥ śārabhaṅgīm ||6||

natvā'gastyaṃ samastāśaranikarasapatrākṛtiṃ tāpasebhyaḥ

pratyaśrauṣīḥ priyaiṣī tadanu ca muninā vaiṣṇave divyacāpe |

brahmāstre cāpi datte pathi pitṛsuhṛdaṃ vīkṣya bhūyo jaṭāyuṃ

modāt godātaṭānte pariramasi purā pañcavaṭyāṃ vadhūṭyā ||7||

prāptāyāḥ śūrpaṇakhyā madanacaladhṛterarthanairnissahātmā

tāṃ saumitrau visṛjya prabalatamaruṣā tena nirlūnanāsām |

dṛṣṭvaināṃ ruṣṭacittaṃ kharamabhipatitaṃ dūṣaṇaṃ ca trimūrdhaṃ

vyāhiṃsīrāśarānapyayutasamadhikāṃstatkṣaṇādakṣatoṣmā ||8||

sodaryāproktavārtāvivaśadaśamukhādiṣṭamārīcamāyā-

sāraṅga sārasākṣyā spṛhitamanugataḥ prāvadhīrbāṇaghātam |

tanmāyākrandaniryāpitabhavadanujāṃ rāvaṇastāmahārṣī-

ttenārto'pi tvamantaḥ kimapi mudamadhāstadvadhopāyalābhāt ||9||

bhūyastanvīṃ vicinvannahṛta daśamukhastvadvadhūṃ madvadhene-

tyuktvā yāte jaṭāyau divamatha suhṛdaḥ prātanoḥ pretakāryam |

gṛhṇānaṃ taṃ kabandhaṃ jaghanitha śabarīṃ prekṣya pampātaṭe tvaṃ

samprāpto vātasūnuṃ bhṛśamuditamanāḥ pāhi vātālayeśa ||10||