Narayaniyam Dashaka 100 - Bhagavatah Keshadipadavarnanam

ॐ

𑌨𑌾𑌰𑌾𑌯𑌣𑍀𑌯𑌂 𑌦𑌶𑌕 100 - 𑌭𑌗𑌵𑌤𑌃 𑌕𑍇𑌶𑌾𑌦𑌿𑌪𑌾𑌦𑌵𑌰𑍍𑌣𑌨𑌮𑍍

Vishnu Narayana Bhattatiri Grantha

𑌅𑌗𑍍𑌰𑍇 𑌪𑌶𑍍𑌯𑌾𑌮𑌿 𑌤𑍇𑌜𑍋 𑌨𑌿𑌬𑌿𑌡𑌤𑌰𑌕𑌲𑌾𑌯𑌾𑌵𑌲𑍀𑌲𑍋𑌭𑌨𑍀𑌯𑌂

𑌪𑍀𑌯𑍂𑌷𑌾𑌪𑍍𑌲𑌾𑌵𑌿𑌤𑍋𑌽𑌹𑌂 𑌤𑌦𑌨𑍁 𑌤𑌦𑍁𑌦𑌰𑍇 𑌦𑌿𑌵𑍍𑌯𑌕𑍈𑌶𑍋𑌰𑌵𑍇𑌷𑌮𑍍 ।

𑌤𑌾𑌰𑍁𑌣𑍍𑌯𑌾𑌰𑌮𑍍𑌭𑌰𑌮𑍍𑌯𑌂 𑌪𑌰𑌮𑌸𑍁𑌖𑌰𑌸𑌾𑌸𑍍𑌵𑌾𑌦𑌰𑍋𑌮𑌾𑌞𑍍𑌚𑌿𑌤𑌾𑌙𑍍𑌗𑍈-

𑌰𑌾𑌵𑍀𑌤𑌂 𑌨𑌾𑌰𑌦𑌾𑌦𑍍𑌯𑍈𑌰𑍍𑌵𑌿𑌲𑌸𑌦𑍁𑌪𑌨𑌿𑌷𑌤𑍍𑌸𑍁𑌨𑍍𑌦𑌰𑍀𑌮𑌣𑍍𑌡𑌲𑍈𑌶𑍍𑌚 ॥1॥

𑌨𑍀𑌲𑌾𑌭𑌂 𑌕𑍁𑌞𑍍𑌚𑌿𑌤𑌾𑌗𑍍𑌰𑌂 𑌘𑌨𑌮𑌮𑌲𑌤𑌰𑌂 𑌸𑌂𑌯𑌤𑌂 𑌚𑌾𑌰𑍁𑌭𑌙𑍍𑌗𑍍𑌯𑌾

𑌰𑌤𑍍𑌨𑍋𑌤𑍍𑌤𑌂𑌸𑌾𑌭𑌿𑌰𑌾𑌮𑌂 𑌵𑌲𑌯𑌿𑌤𑌮𑍁𑌦𑌯𑌚𑍍𑌚𑌨𑍍𑌦𑍍𑌰𑌕𑍈𑌃 𑌪𑌿𑌞𑍍𑌛𑌜𑌾𑌲𑍈𑌃 ।

𑌮𑌨𑍍𑌦𑌾𑌰𑌸𑍍𑌰𑌙𑍍𑌨𑌿𑌵𑍀𑌤𑌂 𑌤𑌵 𑌪𑍃𑌥𑍁𑌕𑌬𑌰𑍀𑌭𑌾𑌰𑌮𑌾𑌲𑍋𑌕𑌯𑍇𑌽𑌹𑌂

𑌸𑍍𑌨𑌿𑌗𑍍𑌧𑌶𑍍𑌵𑍇𑌤𑍋𑌰𑍍𑌧𑍍𑌵𑌪𑍁𑌣𑍍𑌡𑍍𑌰𑌾𑌮𑌪𑌿 𑌚 𑌸𑍁𑌲𑌲𑌿𑌤𑌾𑌂 𑌫𑌾𑌲𑌬𑌾𑌲𑍇𑌨𑍍𑌦𑍁𑌵𑍀𑌥𑍀𑌮𑍍 ॥2

𑌹𑍃𑌦𑍍𑌯𑌂 𑌪𑍂𑌰𑍍𑌣𑌾𑌨𑍁𑌕𑌮𑍍𑌪𑌾𑌰𑍍𑌣𑌵𑌮𑍃𑌦𑍁𑌲𑌹𑌰𑍀𑌚𑌞𑍍𑌚𑌲𑌭𑍍𑌰𑍂𑌵𑌿𑌲𑌾𑌸𑍈-

𑌰𑌾𑌨𑍀𑌲𑌸𑍍𑌨𑌿𑌗𑍍𑌧𑌪𑌕𑍍𑌷𑍍𑌮𑌾𑌵𑌲𑌿𑌪𑌰𑌿𑌲𑌸𑌿𑌤𑌂 𑌨𑍇𑌤𑍍𑌰𑌯𑍁𑌗𑍍𑌮𑌂 𑌵𑌿𑌭𑍋 𑌤𑍇 ।

𑌸𑌾𑌨𑍍𑌦𑍍𑌰𑌚𑍍𑌛𑌾𑌯𑌂 𑌵𑌿𑌶𑌾𑌲𑌾𑌰𑍁𑌣𑌕𑌮𑌲𑌦𑌲𑌾𑌕𑌾𑌰𑌮𑌾𑌮𑍁𑌗𑍍𑌧𑌤𑌾𑌰𑌂

𑌕𑌾𑌰𑍁𑌣𑍍𑌯𑌾𑌲𑍋𑌕𑌲𑍀𑌲𑌾𑌶𑌿𑌶𑌿𑌰𑌿𑌤𑌭𑍁𑌵𑌨𑌂 𑌕𑍍𑌷𑌿𑌪𑍍𑌯𑌤𑌾𑌂 𑌮𑌯𑍍𑌯𑌨𑌾𑌥𑍇 ॥3॥

𑌉𑌤𑍍𑌤𑍁𑌙𑍍𑌗𑍋𑌲𑍍𑌲𑌾𑌸𑌿𑌨𑌾𑌸𑌂 𑌹𑌰𑌿𑌮𑌣𑌿𑌮𑍁𑌕𑍁𑌰𑌪𑍍𑌰𑍋𑌲𑍍𑌲𑌸𑌦𑍍𑌗𑌣𑍍𑌡𑌪𑌾𑌲𑍀-

𑌵𑍍𑌯𑌾𑌲𑍋𑌲𑌤𑍍𑌕𑌰𑍍𑌣𑌪𑌾𑌶𑌾𑌞𑍍𑌚𑌿𑌤𑌮𑌕𑌰𑌮𑌣𑍀𑌕𑍁𑌣𑍍𑌡𑌲𑌦𑍍𑌵𑌨𑍍𑌦𑍍𑌵𑌦𑍀𑌪𑍍𑌰𑌮𑍍 ।

𑌉𑌨𑍍𑌮𑍀𑌲𑌦𑍍𑌦𑌨𑍍𑌤𑌪𑌙𑍍𑌕𑍍𑌤𑌿𑌸𑍍𑌫𑍁𑌰𑌦𑌰𑍁𑌣𑌤𑌰𑌚𑍍𑌛𑌾𑌯𑌬𑌿𑌮𑍍𑌬𑌾𑌧𑌰𑌾𑌨𑍍𑌤𑌃-

𑌪𑍍𑌰𑍀𑌤𑌿𑌪𑍍𑌰𑌸𑍍𑌯𑌨𑍍𑌦𑌿𑌮𑌨𑍍𑌦𑌸𑍍𑌮𑌿𑌤𑌮𑌧𑍁𑌰𑌤𑌰𑌂 𑌵𑌕𑍍𑌤𑍍𑌰𑌮𑍁𑌦𑍍𑌭𑌾𑌸𑌤𑌾𑌂 𑌮𑍇 ॥4॥

𑌬𑌾𑌹𑍁𑌦𑍍𑌵𑌨𑍍𑌦𑍍𑌵𑍇𑌨 𑌰𑌤𑍍𑌨𑍋𑌜𑍍𑌜𑍍𑌵𑌲𑌵𑌲𑌯𑌭𑍃𑌤𑌾 𑌶𑍋𑌣𑌪𑌾𑌣𑌿𑌪𑍍𑌰𑌵𑌾𑌲𑍇-

𑌨𑍋𑌪𑌾𑌤𑍍𑌤𑌾𑌂 𑌵𑍇𑌣𑍁𑌨𑌾𑌲𑍀 𑌪𑍍𑌰𑌸𑍃𑌤𑌨𑌖𑌮𑌯𑍂𑌖𑌾𑌙𑍍𑌗𑍁𑌲𑍀𑌸𑌙𑍍𑌗𑌶𑌾𑌰𑌾𑌮𑍍 ।

𑌕𑍃𑌤𑍍𑌵𑌾 𑌵𑌕𑍍𑌤𑍍𑌰𑌾𑌰𑌵𑌿𑌨𑍍𑌦𑍇 𑌸𑍁𑌮𑌧𑍁𑌰𑌵𑌿𑌕𑌸𑌦𑍍𑌰𑌾𑌗𑌮𑍁𑌦𑍍𑌭𑌾𑌵𑍍𑌯𑌮𑌾𑌨𑍈𑌃

𑌶𑌬𑍍𑌦𑌬𑍍𑌰𑌹𑍍𑌮𑌾𑌮𑍃𑌤𑍈𑌸𑍍𑌤𑍍𑌵𑌂 𑌶𑌿𑌶𑌿𑌰𑌿𑌤𑌭𑍁𑌵𑌨𑍈𑌃 𑌸𑌿𑌞𑍍𑌚 𑌮𑍇 𑌕𑌰𑍍𑌣𑌵𑍀𑌥𑍀𑌮𑍍 ॥5॥

𑌉𑌤𑍍𑌸𑌰𑍍𑌪𑌤𑍍𑌕𑍗𑌸𑍍𑌤𑍁𑌭𑌶𑍍𑌰𑍀𑌤𑌤𑌿𑌭𑌿𑌰𑌰𑍁𑌣𑌿𑌤𑌂 𑌕𑍋𑌮𑌲𑌂 𑌕𑌣𑍍𑌠𑌦𑍇𑌶𑌂

𑌵𑌕𑍍𑌷𑌃 𑌶𑍍𑌰𑍀𑌵𑌤𑍍𑌸𑌰𑌮𑍍𑌯𑌂 𑌤𑌰𑌲𑌤𑌰𑌸𑌮𑍁𑌦𑍍𑌦𑍀𑌪𑍍𑌰𑌹𑌾𑌰𑌪𑍍𑌰𑌤𑌾𑌨𑌮𑍍 ।

𑌨𑌾𑌨𑌾𑌵𑌰𑍍𑌣𑌪𑍍𑌰𑌸𑍂𑌨𑌾𑌵𑌲𑌿𑌕𑌿𑌸𑌲𑌯𑌿𑌨𑍀𑌂 𑌵𑌨𑍍𑌯𑌮𑌾𑌲𑌾𑌂 𑌵𑌿𑌲𑍋𑌲-

𑌲𑍍𑌲𑍋𑌲𑌮𑍍𑌬𑌾𑌂 𑌲𑌮𑍍𑌬𑌮𑌾𑌨𑌾𑌮𑍁𑌰𑌸𑌿 𑌤𑌵 𑌤𑌥𑌾 𑌭𑌾𑌵𑌯𑍇 𑌰𑌤𑍍𑌨𑌮𑌾𑌲𑌾𑌮𑍍 ॥6॥

𑌅𑌙𑍍𑌗𑍇 𑌪𑌞𑍍𑌚𑌾𑌙𑍍𑌗𑌰𑌾𑌗𑍈𑌰𑌤𑌿𑌶𑌯𑌵𑌿𑌕𑌸𑌤𑍍𑌸𑍗𑌰𑌭𑌾𑌕𑍃𑌷𑍍𑌟𑌲𑍋𑌕𑌂

𑌲𑍀𑌨𑌾𑌨𑍇𑌕𑌤𑍍𑌰𑌿𑌲𑍋𑌕𑍀𑌵𑌿𑌤𑌤𑌿𑌮𑌪𑌿 𑌕𑍃𑌶𑌾𑌂 𑌬𑌿𑌭𑍍𑌰𑌤𑌂 𑌮𑌧𑍍𑌯𑌵𑌲𑍍𑌲𑍀𑌮𑍍 ।

𑌶𑌕𑍍𑌰𑌾𑌶𑍍𑌮𑌨𑍍𑌯𑌸𑍍𑌤𑌤𑌪𑍍𑌤𑍋𑌜𑍍𑌜𑍍𑌵𑌲𑌕𑌨𑌕𑌨𑌿𑌭𑌂 𑌪𑍀𑌤𑌚𑍇𑌲𑌂 𑌦𑌧𑌾𑌨𑌂

𑌧𑍍𑌯𑌾𑌯𑌾𑌮𑍋 𑌦𑍀𑌪𑍍𑌤𑌰𑌶𑍍𑌮𑌿𑌸𑍍𑌫𑍁𑌟𑌮𑌣𑌿𑌰𑌶𑌨𑌾𑌕𑌿𑌙𑍍𑌕𑌿𑌣𑍀𑌮𑌣𑍍𑌡𑌿𑌤𑌂 𑌤𑍍𑌵𑌾𑌮𑍍 ॥7॥

𑌊𑌰𑍂 𑌚𑌾𑌰𑍂 𑌤𑌵𑍋𑌰𑍂 𑌘𑌨𑌮𑌸𑍃𑌣𑌰𑍁𑌚𑍗 𑌚𑌿𑌤𑍍𑌤𑌚𑍋𑌰𑍗 𑌰𑌮𑌾𑌯𑌾𑌃

𑌵𑌿𑌶𑍍𑌵𑌕𑍍𑌷𑍋𑌭𑌂 𑌵𑌿𑌶𑌙𑍍𑌕𑍍𑌯 𑌧𑍍𑌰𑍁𑌵𑌮𑌨𑌿𑌶𑌮𑍁𑌭𑍗 𑌪𑍀𑌤𑌚𑍇𑌲𑌾𑌵𑍃𑌤𑌾𑌙𑍍𑌗𑍗 ।

𑌆𑌨𑌮𑍍𑌰𑌾𑌣𑌾𑌂 𑌪𑍁𑌰𑌸𑍍𑌤𑌾𑌨𑍍𑌨𑍍𑌯𑌸𑌨𑌧𑍃𑌤𑌸𑌮𑌸𑍍𑌤𑌾𑌰𑍍𑌥𑌪𑌾𑌲𑍀𑌸𑌮𑍁𑌦𑍍𑌗-

𑌚𑍍𑌛𑌾𑌯𑌂 𑌜𑌾𑌨𑍁𑌦𑍍𑌵𑌯𑌂 𑌚 𑌕𑍍𑌰𑌮𑌪𑍃𑌥𑍁𑌲𑌮𑌨𑍋𑌜𑍍𑌞𑍇 𑌚 𑌜𑌙𑍍𑌘𑍇 𑌨𑌿𑌷𑍇𑌵𑍇 ॥8॥

𑌮𑌞𑍍𑌜𑍀𑌰𑌂 𑌮𑌞𑍍𑌜𑍁𑌨𑌾𑌦𑍈𑌰𑌿𑌵 𑌪𑌦𑌭𑌜𑌨𑌂 𑌶𑍍𑌰𑍇𑌯 𑌇𑌤𑍍𑌯𑌾𑌲𑌪𑌨𑍍𑌤𑌂

𑌪𑌾𑌦𑌾𑌗𑍍𑌰𑌂 𑌭𑍍𑌰𑌾𑌨𑍍𑌤𑌿𑌮𑌜𑍍𑌜𑌤𑍍𑌪𑍍𑌰𑌣𑌤𑌜𑌨𑌮𑌨𑍋𑌮𑌨𑍍𑌦𑌰𑍋𑌦𑍍𑌧𑌾𑌰𑌕𑍂𑌰𑍍𑌮𑌮𑍍 ।

𑌉𑌤𑍍𑌤𑍁𑌙𑍍𑌗𑌾𑌤𑌾𑌮𑍍𑌰𑌰𑌾𑌜𑌨𑍍𑌨𑌖𑌰𑌹𑌿𑌮𑌕𑌰𑌜𑍍𑌯𑍋𑌤𑍍𑌸𑍍𑌨𑌯𑌾 𑌚𑌾𑌽𑌶𑍍𑌰𑌿𑌤𑌾𑌨𑌾𑌂

𑌸𑌨𑍍𑌤𑌾𑌪𑌧𑍍𑌵𑌾𑌨𑍍𑌤𑌹𑌨𑍍𑌤𑍍𑌰𑍀𑌂 𑌤𑌤𑌿𑌮𑌨𑍁𑌕𑌲𑌯𑍇 𑌮𑌙𑍍𑌗𑌲𑌾𑌮𑌙𑍍𑌗𑍁𑌲𑍀𑌨𑌾𑌮𑍍 ॥9॥

𑌯𑍋𑌗𑍀𑌨𑍍𑌦𑍍𑌰𑌾𑌣𑌾𑌂 𑌤𑍍𑌵𑌦𑌙𑍍𑌗𑍇𑌷𑍍𑌵𑌧𑌿𑌕𑌸𑍁𑌮𑌧𑍁𑌰𑌂 𑌮𑍁𑌕𑍍𑌤𑌿𑌭𑌾𑌜𑌾𑌂 𑌨𑌿𑌵𑌾𑌸𑍋

𑌭𑌕𑍍𑌤𑌾𑌨𑌾𑌂 𑌕𑌾𑌮𑌵𑌰𑍍𑌷𑌦𑍍𑌯𑍁𑌤𑌰𑍁𑌕𑌿𑌸𑌲𑌯𑌂 𑌨𑌾𑌥 𑌤𑍇 𑌪𑌾𑌦𑌮𑍂𑌲𑌮𑍍 ।

𑌨𑌿𑌤𑍍𑌯𑌂 𑌚𑌿𑌤𑍍𑌤𑌸𑍍𑌥𑌿𑌤𑌂 𑌮𑍇 𑌪𑌵𑌨𑌪𑍁𑌰𑌪𑌤𑍇 𑌕𑍃𑌷𑍍𑌣 𑌕𑌾𑌰𑍁𑌣𑍍𑌯𑌸𑌿𑌨𑍍𑌧𑍋

𑌹𑍃𑌤𑍍𑌵𑌾 𑌨𑌿𑌶𑍍𑌶𑍇𑌷𑌤𑌾𑌪𑌾𑌨𑍍 𑌪𑍍𑌰𑌦𑌿𑌶𑌤𑍁 𑌪𑌰𑌮𑌾𑌨𑌨𑍍𑌦𑌸𑌨𑍍𑌦𑍋𑌹𑌲𑌕𑍍𑌷𑍍𑌮𑍀𑌮𑍍 ॥10॥

𑌅𑌜𑍍𑌞𑌾𑌤𑍍𑌵𑌾 𑌤𑍇 𑌮𑌹𑌤𑍍𑌵𑌂 𑌯𑌦𑌿𑌹 𑌨𑌿𑌗𑌦𑌿𑌤𑌂 𑌵𑌿𑌶𑍍𑌵𑌨𑌾𑌥 𑌕𑍍𑌷𑌮𑍇𑌥𑌾𑌃

𑌸𑍍𑌤𑍋𑌤𑍍𑌰𑌂 𑌚𑍈𑌤𑌤𑍍𑌸𑌹𑌸𑍍𑌰𑍋𑌤𑍍𑌤𑌰𑌮𑌧𑌿𑌕𑌤𑌰𑌂 𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌯 𑌭𑍂𑌯𑌾𑌤𑍍 ।

𑌦𑍍𑌵𑍇𑌧𑌾 𑌨𑌾𑌰𑌾𑌯𑌣𑍀𑌯𑌂 𑌶𑍍𑌰𑍁𑌤𑌿𑌷𑍁 𑌚 𑌜𑌨𑍁𑌷𑌾 𑌸𑍍𑌤𑍁𑌤𑍍𑌯𑌤𑌾𑌵𑌰𑍍𑌣𑌨𑍇𑌨

𑌸𑍍𑌫𑍀𑌤𑌂 𑌲𑍀𑌲𑌾𑌵𑌤𑌾𑌰𑍈𑌰𑌿𑌦𑌮𑌿𑌹 𑌕𑍁𑌰𑍁𑌤𑌾𑌮𑌾𑌯𑍁𑌰𑌾𑌰𑍋𑌗𑍍𑌯𑌸𑍗𑌖𑍍𑌯𑌮𑍍 ॥11॥

Roman (IAST) Transliteration

agre paśyāmi tejo nibiḍatarakalāyāvalīlobhanīyaṃ

pīyūṣāplāvito'haṃ tadanu tadudare divyakaiśoraveṣam |

tāruṇyārambharamyaṃ paramasukharasāsvādaromāñcitāṅgai-

rāvītaṃ nāradādyairvilasadupaniṣatsundarīmaṇḍalaiśca ||1||

nīlābhaṃ kuñcitāgraṃ ghanamamalataraṃ saṃyataṃ cārubhaṅgyā

ratnottaṃsābhirāmaṃ valayitamudayaccandrakaiḥ piñchajālaiḥ |

mandārasraṅnivītaṃ tava pṛthukabarībhāramālokaye'haṃ

snigdhaśvetordhvapuṇḍrāmapi ca sulalitāṃ phālabālenduvīthīm ||2

hṛdyaṃ pūrṇānukampārṇavamṛdulaharīcañcalabhrūvilāsai-

rānīlasnigdhapakṣmāvaliparilasitaṃ netrayugmaṃ vibho te |

sāndracchāyaṃ viśālāruṇakamaladalākāramāmugdhatāraṃ

kāruṇyālokalīlāśiśiritabhuvanaṃ kṣipyatāṃ mayyanāthe ||3||

uttuṅgollāsināsaṃ harimaṇimukuraprollasadgaṇḍapālī-

vyālolatkarṇapāśāñcitamakaramaṇīkuṇḍaladvandvadīpram |

unmīladdantapaṅktisphuradaruṇataracchāyabimbādharāntaḥ-

prītiprasyandimandasmitamadhurataraṃ vaktramudbhāsatāṃ me ||4||

bāhudvandvena ratnojjvalavalayabhṛtā śoṇapāṇipravāle-

nopāttāṃ veṇunālī prasṛtanakhamayūkhāṅgulīsaṅgaśārām |

kṛtvā vaktrāravinde sumadhuravikasadrāgamudbhāvyamānaiḥ

śabdabrahmāmṛtaistvaṃ śiśiritabhuvanaiḥ siñca me karṇavīthīm ||5||

utsarpatkaustubhaśrītatibhiraruṇitaṃ komalaṃ kaṇṭhadeśaṃ

vakṣaḥ śrīvatsaramyaṃ taralatarasamuddīprahārapratānam |

nānāvarṇaprasūnāvalikisalayinīṃ vanyamālāṃ vilola-

llolambāṃ lambamānāmurasi tava tathā bhāvaye ratnamālām ||6||

aṅge pañcāṅgarāgairatiśayavikasatsaurabhākṛṣṭalokaṃ

līnānekatrilokīvitatimapi kṛśāṃ bibhrataṃ madhyavallīm |

śakrāśmanyastataptojjvalakanakanibhaṃ pītacelaṃ dadhānaṃ

dhyāyāmo dīptaraśmisphuṭamaṇiraśanākiṅkiṇīmaṇḍitaṃ tvām ||7||

ūrū cārū tavorū ghanamasṛṇarucau cittacorau ramāyāḥ

viśvakṣobhaṃ viśaṅkya dhruvamaniśamubhau pītacelāvṛtāṅgau |

ānamrāṇāṃ purastānnyasanadhṛtasamastārthapālīsamudga-

cchāyaṃ jānudvayaṃ ca kramapṛthulamanojñe ca jaṅghe niṣeve ||8||

mañjīraṃ mañjunādairiva padabhajanaṃ śreya ityālapantaṃ

pādāgraṃ bhrāntimajjatpraṇatajanamanomandaroddhārakūrmam |

uttuṅgātāmrarājannakharahimakarajyotsnayā cā'śritānāṃ

santāpadhvāntahantrīṃ tatimanukalaye maṅgalāmaṅgulīnām ||9||

yogīndrāṇāṃ tvadaṅgeṣvadhikasumadhuraṃ muktibhājāṃ nivāso

bhaktānāṃ kāmavarṣadyutarukisalayaṃ nātha te pādamūlam |

nityaṃ cittasthitaṃ me pavanapurapate kṛṣṇa kāruṇyasindho

hṛtvā niśśeṣatāpān pradiśatu paramānandasandohalakṣmīm ||10||

ajñātvā te mahatvaṃ yadiha nigaditaṃ viśvanātha kṣamethāḥ

stotraṃ caitatsahasrottaramadhikataraṃ tvatprasādāya bhūyāt |

dvedhā nārāyaṇīyaṃ śrutiṣu ca januṣā stutyatāvarṇanena

sphītaṃ līlāvatārairidamiha kurutāmāyurārogyasaukhyam ||11||