Muka Pancha Shati 1 - Arya Shatakam

ॐ

𑌮𑍂𑌕 𑌪𑌞𑍍𑌚 𑌶𑌤𑌿 1 - 𑌆𑌰𑍍𑌯 𑌶𑌤𑌕𑌮𑍍

Shatakam Mooka Kavi Grantha

𑌕𑌾𑌰𑌣𑌪𑌰𑌚𑌿𑌦𑍍𑌰𑍂𑌪𑌾 𑌕𑌾𑌞𑍍𑌚𑍀𑌪𑍁𑌰𑌸𑍀𑌮𑍍𑌨𑌿 𑌕𑌾𑌮𑌪𑍀𑌠𑌗𑌤𑌾 ।

𑌕𑌾𑌚𑌨 𑌵𑌿𑌹𑌰𑌤𑌿 𑌕𑌰𑍁𑌣𑌾 𑌕𑌾𑌶𑍍𑌮𑍀𑌰𑌸𑍍𑌤𑌬𑌕𑌕𑍋𑌮𑌲𑌾𑌙𑍍𑌗𑌲𑌤𑌾 ॥1॥

𑌕𑌞𑍍𑌚𑌨 𑌕𑌾𑌞𑍍𑌚𑍀𑌨𑌿𑌲𑌯𑌂 𑌕𑌰𑌧𑍃𑌤𑌕𑍋𑌦𑌣𑍍𑌡𑌬𑌾𑌣𑌸𑍃𑌣𑌿𑌪𑌾𑌶𑌮𑍍 ।

𑌕𑌠𑌿𑌨𑌸𑍍𑌤𑌨𑌭𑌰𑌨𑌮𑍍𑌰𑌂 𑌕𑍈𑌵𑌲𑍍𑌯𑌾𑌨𑌨𑍍𑌦𑌕𑌨𑍍𑌦𑌮𑌵𑌲𑌮𑍍𑌬𑍇 ॥2॥

𑌚𑌿𑌨𑍍𑌤𑌿𑌤𑌫𑌲𑌪𑌰𑌿𑌪𑍋𑌷𑌣𑌚𑌿𑌨𑍍𑌤𑌾𑌮𑌣𑌿𑌰𑍇𑌵 𑌕𑌾𑌞𑍍𑌚𑌿𑌨𑌿𑌲𑌯𑌾 𑌮𑍇 ।

𑌚𑌿𑌰𑌤𑌰𑌸𑍁𑌚𑌰𑌿𑌤𑌸𑍁𑌲𑌭𑌾 𑌚𑌿𑌤𑍍𑌤𑌂 𑌶𑌿𑌶𑌿𑌰𑌯𑌤𑍁 𑌚𑌿𑌤𑍍𑌸𑍁𑌖𑌾𑌧𑌾𑌰𑌾 ॥3॥

𑌕𑍁𑌟𑌿𑌲𑌕𑌚𑌂 𑌕𑌠𑌿𑌨𑌕𑍁𑌚𑌂 𑌕𑍁𑌨𑍍𑌦𑌸𑍍𑌮𑌿𑌤𑌕𑌾𑌨𑍍𑌤𑌿 𑌕𑍁𑌙𑍍𑌕𑍁𑌮𑌚𑍍𑌛𑌾𑌯𑌮𑍍 ।

𑌕𑍁𑌰𑍁𑌤𑍇 𑌵𑌿𑌹𑍃𑌤𑌿𑌂 𑌕𑌾𑌞𑍍𑌚𑍍𑌯𑌾𑌂 𑌕𑍁𑌲𑌪𑌰𑍍𑌵𑌤𑌸𑌾𑌰𑍍𑌵𑌭𑍗𑌮𑌸𑌰𑍍𑌵𑌸𑍍𑌵𑌮𑍍 ॥4॥

𑌪𑌞𑍍𑌚𑌶𑌰𑌶𑌾𑌸𑍍𑌤𑍍𑌰𑌬𑍋𑌧𑌨𑌪𑌰𑌮𑌾𑌚𑌾𑌰𑍍𑌯𑍇𑌣 𑌦𑍃𑌷𑍍𑌟𑌿𑌪𑌾𑌤𑍇𑌨 ।

𑌕𑌾𑌞𑍍𑌚𑍀𑌸𑍀𑌮𑍍𑌨𑌿 𑌕𑍁𑌮𑌾𑌰𑍀 𑌕𑌾𑌚𑌨 𑌮𑍋𑌹𑌯𑌤𑌿 𑌕𑌾𑌮𑌜𑍇𑌤𑌾𑌰𑌮𑍍 ॥5॥

𑌪𑌰𑌯𑌾 𑌕𑌾𑌞𑍍𑌚𑍀𑌪𑍁𑌰𑌯𑌾 𑌪𑌰𑍍𑌵𑌤𑌪𑌰𑍍𑌯𑌾𑌯𑌪𑍀𑌨𑌕𑍁𑌚𑌭𑌰𑌯𑌾 ।

𑌪𑌰𑌤𑌨𑍍𑌤𑍍𑌰𑌾 𑌵𑌯𑌮𑌨𑌯𑌾 𑌪𑌙𑍍𑌕𑌜𑌸𑌬𑍍𑌰𑌹𑍍𑌮𑌚𑌾𑌰𑌿𑌲𑍋𑌚𑌨𑌯𑌾 ॥6॥

𑌐𑌶𑍍𑌵𑌰𑍍𑌯𑌮𑌿𑌨𑍍𑌦𑍁𑌮𑍗𑌲𑍇𑌰𑍈𑌕𑌤𑍍𑌮𑍍𑌯𑌪𑍍𑌰𑌕𑍃𑌤𑌿 𑌕𑌾𑌞𑍍𑌚𑌿𑌮𑌧𑍍𑌯𑌗𑌤𑌮𑍍 ।

𑌐𑌨𑍍𑌦𑌵𑌕𑌿𑌶𑍋𑌰𑌶𑍇𑌖𑌰𑌮𑍈𑌦𑌮𑍍𑌪𑌰𑍍𑌯𑌂 𑌚𑌕𑌾𑌸𑍍𑌤𑌿 𑌨𑌿𑌗𑌮𑌾𑌨𑌾𑌮𑍍 ॥7॥

𑌶𑍍𑌰𑌿𑌤𑌕𑌮𑍍𑌪𑌸𑍀𑌮𑌾𑌨𑌂 𑌶𑌿𑌥𑌿𑌲𑌿𑌤𑌪𑌰𑌮𑌶𑌿𑌵𑌧𑍈𑌰𑍍𑌯𑌮𑌹𑌿𑌮𑌾𑌨𑌮𑍍 ।

𑌕𑌲𑌯𑍇 𑌪𑌟𑌲𑌿𑌮𑌾𑌨𑌂 𑌕𑌞𑍍𑌚𑌨 𑌕𑌞𑍍𑌚𑍁𑌕𑌿𑌤𑌭𑍁𑌵𑌨𑌭𑍂𑌮𑌾𑌨𑌮𑍍 ॥8॥

𑌆𑌦𑍃𑌤𑌕𑌾𑌞𑍍𑌚𑍀𑌨𑌿𑌲𑌯𑌮𑌾𑌦𑍍𑌯𑌾𑌮𑌾𑌰𑍂𑌢𑌯𑍗𑌵𑌨𑌾𑌟𑍋𑌪𑌾𑌮𑍍 ।

𑌆𑌗𑌮𑌵𑌤𑌂𑌸𑌕𑌲𑌿𑌕𑌾𑌮𑌾𑌨𑌨𑍍𑌦𑌾𑌦𑍍𑌵𑍈𑌤𑌕𑌨𑍍𑌦𑌲𑍀𑌂 𑌵𑌨𑍍𑌦𑍇 ॥9॥

𑌤𑍁𑌙𑍍𑌗𑌾𑌭𑌿𑌰𑌾𑌮𑌕𑍁𑌚𑌭𑌰𑌶𑍃𑌙𑍍𑌗𑌾𑌰𑌿𑌤𑌮𑌾𑌶𑍍𑌰𑌯𑌾𑌮𑌿 𑌕𑌾𑌞𑍍𑌚𑌿𑌗𑌤𑌮𑍍 ।

𑌗𑌙𑍍𑌗𑌾𑌧𑌰𑌪𑌰𑌤𑌨𑍍𑌤𑍍𑌰𑌂 𑌶𑍃𑌙𑍍𑌗𑌾𑌰𑌾𑌦𑍍𑌵𑍈𑌤𑌤𑌨𑍍𑌤𑍍𑌰𑌸𑌿𑌦𑍍𑌧𑌾𑌨𑍍𑌤𑌮𑍍 ॥10॥

𑌕𑌾𑌞𑍍𑌚𑍀𑌰𑌤𑍍𑌨𑌵𑌿𑌭𑍂𑌷𑌾𑌂 𑌕𑌾𑌮𑌪𑌿 𑌕𑌨𑍍𑌦𑌰𑍍𑌪𑌸𑍂𑌤𑌿𑌕𑌾𑌪𑌾𑌙𑍍𑌗𑍀𑌮𑍍 ।

𑌪𑌰𑌮𑌾𑌂 𑌕𑌲𑌾𑌮𑍁𑌪𑌾𑌸𑍇 𑌪𑌰𑌶𑌿𑌵𑌵𑌾𑌮𑌾𑌙𑍍𑌕𑌪𑍀𑌠𑌿𑌕𑌾𑌸𑍀𑌨𑌾𑌮𑍍 ॥11॥

𑌕𑌮𑍍𑌪𑌾𑌤𑍀𑌚𑌰𑌾𑌣𑌾𑌂 𑌕𑌰𑍁𑌣𑌾𑌕𑍋𑌰𑌕𑌿𑌤𑌦𑍃𑌷𑍍𑌟𑌿𑌪𑌾𑌤𑌾𑌨𑌾𑌮𑍍 ।

𑌕𑍇𑌲𑍀𑌵𑌨𑌂 𑌮𑌨𑍋 𑌮𑍇 𑌕𑍇𑌷𑌾𑌞𑍍𑌚𑌿𑌦𑍍𑌭𑌵𑌤𑍁 𑌚𑌿𑌦𑍍𑌵𑌿𑌲𑌾𑌸𑌾𑌨𑌾𑌮𑍍 ॥12॥

𑌆𑌮𑍍𑌰𑌤𑌰𑍁𑌮𑍂𑌲𑌵𑌸𑌤𑍇𑌰𑌾𑌦𑌿𑌮𑌪𑍁𑌰𑍁𑌷𑌸𑍍𑌯 𑌨𑌯𑌨𑌪𑍀𑌯𑍂𑌷𑌮𑍍 ।

𑌆𑌰𑌬𑍍𑌧𑌯𑍗𑌵𑌨𑍋𑌤𑍍𑌸𑌵𑌮𑌾𑌮𑍍𑌨𑌾𑌯𑌰𑌹𑌸𑍍𑌯𑌮𑌨𑍍𑌤𑌰𑌵𑌲𑌮𑍍𑌬𑍇 ॥13॥

𑌅𑌧𑌿𑌕𑌾𑌞𑍍𑌚𑌿 𑌪𑌰𑌮𑌯𑍋𑌗𑌿𑌭𑌿𑌰𑌾𑌦𑌿𑌮𑌪𑌰𑌪𑍀𑌠𑌸𑍀𑌮𑍍𑌨𑌿 𑌦𑍃𑌶𑍍𑌯𑍇𑌨 ।

𑌅𑌨𑍁𑌬𑌦𑍍𑌧𑌂 𑌮𑌮 𑌮𑌾𑌨𑌸𑌮𑌰𑍁𑌣𑌿𑌮𑌸𑌰𑍍𑌵𑌸𑍍𑌵𑌸𑌮𑍍𑌪𑍍𑌰𑌦𑌾𑌯𑍇𑌨 ॥14॥

𑌅𑌙𑍍𑌕𑌿𑌤𑌶𑌙𑍍𑌕𑌰𑌦𑍇𑌹𑌾𑌮𑌙𑍍𑌕𑍁𑌰𑌿𑌤𑍋𑌰𑍋𑌜𑌕𑌙𑍍𑌕𑌣𑌾𑌶𑍍𑌲𑍇𑌷𑍈𑌃 ।

𑌅𑌧𑌿𑌕𑌾𑌞𑍍𑌚𑌿 𑌨𑌿𑌤𑍍𑌯𑌤𑌰𑍁𑌣𑍀𑌮𑌦𑍍𑌰𑌾𑌕𑍍𑌷𑌂 𑌕𑌾𑌞𑍍𑌚𑌿𑌦𑌦𑍍𑌭𑍁𑌤𑌾𑌂 𑌬𑌾𑌲𑌾𑌮𑍍 ॥15॥

𑌮𑌧𑍁𑌰𑌧𑌨𑍁𑌷𑌾 𑌮𑌹𑍀𑌧𑌰𑌜𑌨𑍁𑌷𑌾 𑌨𑌨𑍍𑌦𑌾𑌮𑌿 𑌸𑍁𑌰𑌭𑌿𑌬𑌾𑌣𑌜𑍁𑌷𑌾 ।

𑌚𑌿𑌦𑍍𑌵𑌪𑍁𑌷𑌾 𑌕𑌾𑌞𑍍𑌚𑌿𑌪𑍁𑌰𑍇 𑌕𑍇𑌲𑌿𑌜𑍁𑌷𑌾 𑌬𑌨𑍍𑌧𑍁𑌜𑍀𑌵𑌕𑌾𑌨𑍍𑌤𑌿𑌮𑍁𑌷𑌾 ॥16॥

𑌮𑌧𑍁𑌰𑌸𑍍𑌮𑌿𑌤𑍇𑌨 𑌰𑌮𑌤𑍇 𑌮𑌾𑌂𑌸𑌲𑌕𑍁𑌚𑌭𑌾𑌰𑌮𑌨𑍍𑌦𑌗𑌮𑌨𑍇𑌨 ।

𑌮𑌧𑍍𑌯𑍇𑌕𑌾𑌞𑍍𑌚𑌿 𑌮𑌨𑍋 𑌮𑍇 𑌮𑌨𑌸𑌿𑌜𑌸𑌾𑌮𑍍𑌰𑌾𑌜𑍍𑌯𑌗𑌰𑍍𑌵𑌬𑍀𑌜𑍇𑌨 ॥17॥

𑌧𑌰𑌣𑌿𑌮𑌯𑍀𑌂 𑌤𑌰𑌣𑌿𑌮𑌯𑍀𑌂 𑌪𑌵𑌨𑌮𑌯𑍀𑌂 𑌗𑌗𑌨𑌦𑌹𑌨𑌹𑍋𑌤𑍃𑌮𑌯𑍀𑌮𑍍 ।

𑌅𑌮𑍍𑌬𑍁𑌮𑌯𑍀𑌮𑌿𑌨𑍍𑌦𑍁𑌮𑌯𑍀𑌮𑌮𑍍𑌬𑌾𑌮𑌨𑍁𑌕𑌮𑍍𑌪𑌮𑌾𑌦𑌿𑌮𑌾𑌮𑍀𑌕𑍍𑌷𑍇 ॥18॥

𑌲𑍀𑌨𑌸𑍍𑌥𑌿𑌤𑌿 𑌮𑍁𑌨𑌿𑌹𑍃𑌦𑌯𑍇 𑌧𑍍𑌯𑌾𑌨𑌸𑍍𑌤𑌿𑌮𑌿𑌤𑌂 𑌤𑌪𑌸𑍍𑌯𑌦𑍁𑌪𑌕𑌮𑍍𑌪𑌮𑍍 ।

𑌪𑍀𑌨𑌸𑍍𑌤𑌨𑌭𑌰𑌮𑍀𑌡𑍇 𑌮𑍀𑌨𑌧𑍍𑌵𑌜𑌤𑌨𑍍𑌤𑍍𑌰𑌪𑌰𑌮𑌤𑌾𑌤𑍍𑌪𑌰𑍍𑌯𑌮𑍍 ॥19॥

𑌶𑍍𑌵𑍇𑌤𑌾 𑌮𑌨𑍍𑌥𑌰𑌹𑌸𑌿𑌤𑍇 𑌶𑌾𑌤𑌾 𑌮𑌧𑍍𑌯𑍇 𑌚 𑌵𑌾𑌡𑍍𑌭𑌨𑍋𑌽𑌤𑍀𑌤𑌾 ।

𑌶𑍀𑌤𑌾 𑌲𑍋𑌚𑌨𑌪𑌾𑌤𑍇 𑌸𑍍𑌫𑍀𑌤𑌾 𑌕𑍁𑌚𑌸𑍀𑌮𑍍𑌨𑌿 𑌶𑌾𑌶𑍍𑌵𑌤𑍀 𑌮𑌾𑌤𑌾 ॥20॥

𑌪𑍁𑌰𑌤𑌃 𑌕𑌦𑌾 𑌨 𑌕𑌰𑌵𑍈 𑌪𑍁𑌰𑌵𑍈𑌰𑌿𑌵𑌿𑌮𑌰𑍍𑌦𑌪𑍁𑌲𑌕𑌿𑌤𑌾𑌙𑍍𑌗𑌲𑌤𑌾𑌮𑍍 ।

𑌪𑍁𑌨𑌤𑍀𑌂 𑌕𑌾𑌞𑍍𑌚𑍀𑌦𑍇𑌶𑌂 𑌪𑍁𑌷𑍍𑌪𑌾𑌯𑍁𑌧𑌵𑍀𑌰𑍍𑌯𑌸𑌰𑌸𑌪𑌰𑌿𑌪𑌾𑌟𑍀𑌮𑍍 ॥21॥

𑌪𑍁𑌣𑍍𑌯𑌾 𑌕𑌾𑌽𑌪𑌿 𑌪𑍁𑌰𑌨𑍍𑌧𑍍𑌰𑍀 𑌪𑍁𑌙𑍍𑌖𑌿𑌤𑌕𑌨𑍍𑌦𑌰𑍍𑌪𑌸𑌮𑍍𑌪𑌦𑌾 𑌵𑌪𑍁𑌷𑌾 ।

𑌪𑍁𑌲𑌿𑌨𑌚𑌰𑍀 𑌕𑌮𑍍𑌪𑌾𑌯𑌾𑌃 𑌪𑍁𑌰𑌮𑌥𑌨𑌂 𑌪𑍁𑌲𑌕𑌨𑌿𑌚𑍁𑌲𑌿𑌤𑌂 𑌕𑍁𑌰𑍁𑌤𑍇 ॥22॥

𑌤𑌨𑌿𑌮𑌾𑌦𑍍𑌵𑍈𑌤𑌵𑌲𑌗𑍍𑌨𑌂 𑌤𑌰𑍁𑌣𑌾𑌰𑍁𑌣𑌸𑌮𑍍𑌪𑍍𑌰𑌦𑌾𑌯𑌤𑌨𑍁𑌲𑍇𑌖𑌮𑍍 ।

𑌤𑌟𑌸𑍀𑌮𑌨𑌿 𑌕𑌮𑍍𑌪𑌾𑌯𑌾𑌸𑍍𑌤𑌰𑍁𑌣𑌿𑌮𑌸𑌰𑍍𑌵𑌸𑍍𑌵𑌮𑌾𑌦𑍍𑌯𑌮𑌦𑍍𑌰𑌾𑌕𑍍𑌷𑌮𑍍 ॥23॥

𑌪𑍗𑌷𑍍𑌟𑌿𑌕𑌕𑌰𑍍𑌮𑌵𑌿𑌪𑌾𑌕𑌂 𑌪𑍗𑌷𑍍𑌪𑌶𑌰𑌂 𑌸𑌵𑌿𑌧𑌸𑍀𑌮𑍍𑌨𑌿 𑌕𑌮𑍍𑌪𑌾𑌯𑌾𑌃 ।

𑌅𑌦𑍍𑌰𑌾𑌕𑍍𑌷𑌮𑌾𑌤𑍍𑌤𑌯𑍗𑌵𑌨𑌮𑌭𑍍𑌯𑍁𑌦𑌯𑌂 𑌕𑌞𑍍𑌚𑌿𑌦𑌰𑍍𑌧𑌶𑌶𑌿𑌮𑍗𑌲𑍈𑌃 ॥24॥

𑌸𑌂𑌶𑍍𑌰𑌿𑌤𑌕𑌾𑌞𑍍𑌚𑍀𑌦𑍇𑌶𑍇 𑌸𑌰𑌸𑌿𑌜𑌦𑍗𑌰𑍍𑌭𑌾𑌗𑍍𑌯𑌜𑌾𑌗𑍍𑌰𑌦𑍁𑌤𑍍𑌤𑌂𑌸𑍇 ।

𑌸𑌂𑌵𑌿𑌨𑍍𑌮𑌯𑍇 𑌵𑌿𑌲𑍀𑌯𑍇 𑌸𑌾𑌰𑌸𑍍𑌵𑌤𑌪𑍁𑌰𑍁𑌷𑌕𑌾𑌰𑌸𑌾𑌮𑍍𑌰𑌾𑌜𑍍𑌯𑍇 ॥25॥

𑌮𑍋𑌦𑌿𑌤𑌮𑌧𑍁𑌕𑌰𑌵𑌿𑌶𑌿𑌖𑌂 𑌸𑍍𑌵𑌾𑌦𑌿𑌮𑌸𑌮𑍁𑌦𑌾𑌯𑌸𑌾𑌰𑌕𑍋𑌦𑌣𑍍𑌡𑌮𑍍 ।

𑌆𑌦𑍃𑌤𑌕𑌾𑌞𑍍𑌚𑍀𑌖𑍇𑌲𑌨𑌮𑌾𑌦𑌿𑌮𑌮𑌾𑌰𑍁𑌣𑍍𑌯𑌭𑍇𑌦𑌮𑌾𑌕𑌲𑌯𑍇 ॥26॥

𑌉𑌰𑌰𑍀𑌕𑍃𑌤𑌕𑌾𑌞𑍍𑌚𑌿𑌪𑍁𑌰𑍀𑌮𑍁𑌪𑌨𑌿𑌷𑌦𑌰𑌵𑌿𑌨𑍍𑌦𑌕𑍁𑌹𑌰𑌮𑌧𑍁𑌧𑌾𑌰𑌾𑌮𑍍 ।

𑌉𑌨𑍍𑌨𑌮𑍍𑌰𑌸𑍍𑌤𑌨𑌕𑌲𑌶𑍀𑌮𑍁𑌤𑍍𑌸𑌵𑌲𑌹𑌰𑍀𑌮𑍁𑌪𑌾𑌸𑍍𑌮𑌹𑍇 𑌶𑌮𑍍𑌭𑍋𑌃 ॥27॥

𑌏𑌣𑌶𑌿𑌶𑍁𑌦𑍀𑌰𑍍𑌘𑌲𑍋𑌚𑌨𑌮𑍇𑌨𑌃𑌪𑌰𑌿𑌪𑌨𑍍𑌥𑌿 𑌸𑌨𑍍𑌤𑌤𑌂 𑌭𑌜𑌤𑌾𑌮𑍍 ।

𑌏𑌕𑌾𑌮𑍍𑌰𑌨𑌾𑌥𑌜𑍀𑌵𑌿𑌤𑌮𑍇𑌵𑌮𑍍𑌪𑌦𑌦𑍂𑌰𑌮𑍇𑌕𑌮𑌵𑌲𑌮𑍍𑌬𑍇 ॥28॥

𑌸𑍍𑌮𑌯𑌮𑌾𑌨𑌮𑍁𑌖𑌂 𑌕𑌾𑌞𑍍𑌚𑍀𑌭𑌯𑌮𑌾𑌨𑌂 𑌕𑌮𑌪𑌿 𑌦𑍇𑌵𑌤𑌾𑌭𑍇𑌦𑌮𑍍 ।

𑌦𑌯𑌮𑌾𑌨𑌂 𑌵𑍀𑌕𑍍𑌷𑍍𑌯 𑌮𑍁𑌹𑍁𑌰𑍍𑌵𑌯𑌮𑌾𑌨𑌨𑍍𑌦𑌾𑌮𑍃𑌤𑌾𑌮𑍍𑌬𑍁𑌧𑍗 𑌮𑌗𑍍𑌨𑌾𑌃 ॥29॥

𑌕𑍁𑌤𑍁𑌕𑌜𑍁𑌷𑌿 𑌕𑌾𑌞𑍍𑌚𑌿𑌦𑍇𑌶𑍇 𑌕𑍁𑌮𑍁𑌦𑌤𑌪𑍋𑌰𑌾𑌶𑌿𑌪𑌾𑌕𑌶𑍇𑌖𑌰𑌿𑌤𑍇 ।

𑌕𑍁𑌰𑍁𑌤𑍇 𑌮𑌨𑍋𑌵𑌿𑌹𑌾𑌰𑌂 𑌕𑍁𑌲𑌗𑌿𑌰𑌿𑌪𑌰𑌿𑌬𑍃𑌢𑌕𑍁𑌲𑍈𑌕𑌮𑌣𑌿𑌦𑍀𑌪𑍇 ॥30॥

𑌵𑍀𑌕𑍍𑌷𑍇𑌮𑌹𑌿 𑌕𑌾𑌞𑍍𑌚𑌿𑌪𑍁𑌰𑍇 𑌵𑌿𑌪𑍁𑌲𑌸𑍍𑌤𑌨𑌕𑌲𑌶𑌗𑌰𑌿𑌮𑌪𑌰𑌵𑌶𑌿𑌤𑌮𑍍 ।

𑌵𑌿𑌦𑍍𑌰𑍁𑌮𑌸𑌹𑌚𑌰𑌦𑍇𑌹𑌂 𑌵𑌿𑌭𑍍𑌰𑌮𑌸𑌮𑌵𑌾𑌯𑌸𑌾𑌰𑌸𑌨𑍍𑌨𑌾𑌹𑌮𑍍 ॥31॥

𑌕𑍁𑌰𑍁𑌵𑌿𑌨𑍍𑌦𑌗𑍋𑌤𑍍𑌰𑌗𑌾𑌤𑍍𑌰𑌂 𑌕𑍂𑌲𑌚𑌰𑌂 𑌕𑌮𑌪𑌿 𑌨𑍗𑌮𑌿 𑌕𑌮𑍍𑌪𑌾𑌯𑌾𑌃 ।

𑌕𑍂𑌲𑌙𑍍𑌕𑌷𑌕𑍁𑌚𑌕𑍁𑌮𑍍𑌭𑌂 𑌕𑍁𑌸𑍁𑌮𑌾𑌯𑍁𑌧𑌵𑍀𑌰𑍍𑌯𑌸𑌾𑌰𑌸𑌂𑌰𑌮𑍍𑌭𑌮𑍍 ॥32॥

𑌕𑍁𑌡𑍂𑌮𑌲𑌿𑌤𑌕𑍁𑌚𑌕𑌿𑌶𑍋𑌰𑍈𑌃 𑌕𑍁𑌰𑍍𑌵𑌾𑌣𑍈𑌃 𑌕𑌾𑌞𑍍𑌚𑌿𑌦𑍇𑌶𑌸𑍗𑌹𑌾𑌰𑍍𑌦𑌮𑍍 ।

𑌕𑍁𑌙𑍍𑌕𑍁𑌮𑌶𑍋𑌣𑍈𑌰𑍍𑌨𑌿𑌚𑌿𑌤𑌂 𑌕𑍁𑌶𑌲𑌪𑌥𑌂 𑌶𑌮𑍍𑌭𑍁𑌸𑍁𑌕𑍃𑌤𑌸𑌮𑍍𑌭𑌾𑌰𑍈𑌃 ॥33॥

𑌅𑌙𑍍𑌕𑌿𑌤𑌕𑌚𑍇𑌨 𑌕𑍇𑌨𑌚𑌿𑌦𑌨𑍍𑌧𑌙𑍍𑌕𑌰𑌣𑍗𑌷𑌧𑍇𑌨 𑌕𑌮𑌲𑌾𑌨𑌾𑌮𑍍 ।

𑌅𑌨𑍍𑌤𑌃𑌪𑍁𑌰𑍇𑌣 𑌶𑌮𑍍𑌭𑍋𑌰𑌲𑌙𑍍𑌕𑍍𑌰𑌿𑌯𑌾 𑌕𑌾𑌽𑌪𑌿 𑌕𑌲𑍍𑌪𑍍𑌯𑌤𑍇 𑌕𑌾𑌞𑍍𑌚𑍍𑌯𑌾𑌮𑍍 ॥34॥

𑌊𑌰𑍀𑌕𑌰𑍋𑌮𑌿 𑌸𑌨𑍍𑌤𑌤𑌮𑍂𑌷𑍍𑌮𑌲𑌫𑌾𑌲𑍇𑌨 𑌲𑌲𑌿𑌤𑌂 𑌪𑍁𑌂𑌸𑌾 ।

𑌉𑌪𑌕𑌮𑍍𑌪𑌮𑍁𑌚𑌿𑌤𑌖𑍇𑌲𑌨𑌮𑍁𑌰𑍍𑌵𑍀𑌧𑌰𑌵𑌂𑌶𑌸𑌮𑍍𑌪𑌦𑍁𑌨𑍍𑌮𑍇𑌷𑌮𑍍 ॥35॥

𑌅𑌙𑍍𑌕𑍁𑌰𑌿𑌤𑌸𑍍𑌤𑌨𑌕𑍋𑌰𑌕𑌮𑌙𑍍𑌕𑌾𑌲𑌙𑍍𑌕𑌾𑌰𑌮𑍇𑌕𑌚𑍂𑌤𑌪𑌤𑍇𑌃 ।

𑌆𑌲𑍋𑌕𑍇𑌮𑌹𑌿 𑌕𑍋𑌮𑌲𑌮𑌾𑌗𑌮𑌸𑌂𑌲𑌾𑌪𑌸𑌾𑌰𑌯𑌾𑌥𑌾𑌰𑍍𑌥𑍍𑌯𑌮𑍍 ॥36॥

𑌪𑍁𑌞𑍍𑌜𑌿𑌤𑌕𑌰𑍁𑌣𑌮𑍁𑌦𑌞𑍍𑌚𑌿𑌤𑌶𑌿𑌞𑍍𑌜𑌿𑌤𑌮𑌣𑌿𑌕𑌾𑌞𑍍𑌚𑌿 𑌕𑌿𑌮𑌪𑌿 𑌕𑌾𑌞𑍍𑌚𑌿𑌪𑍁𑌰𑍇 ।

𑌮𑌞𑍍𑌜𑌰𑌿𑌤𑌮𑍃𑌦𑍁𑌲𑌹𑌾𑌸𑌂 𑌪𑌿𑌞𑍍𑌜𑌰𑌤𑌨𑍁𑌰𑍁𑌚𑌿 𑌪𑌿𑌨𑌾𑌕𑌿𑌮𑍂𑌲𑌧𑌨𑌮𑍍 ॥37॥

𑌲𑍋𑌲𑌹𑍃𑌦𑌯𑍋𑌽𑌸𑍍𑌤𑌿 𑌶𑌮𑍍𑌭𑍋𑌰𑍍𑌲𑍋𑌚𑌨𑌯𑍁𑌗𑌲𑍇𑌨 𑌲𑍇𑌹𑍍𑌯𑌮𑌾𑌨𑌾𑌯𑌾𑌮𑍍 ।

𑌲𑌲𑌿𑌤𑌪𑌰𑌮𑌶𑌿𑌵𑌾𑌯𑌾𑌂 𑌲𑌾𑌵𑌣𑍍𑌯𑌾𑌮𑍃𑌤𑌤𑌰𑌙𑍍𑌗𑌮𑌾𑌲𑌾𑌯𑌾𑌮𑍍 ॥38॥

𑌮𑌧𑍁𑌕𑌰𑌸𑌹𑌚𑌰𑌚𑌿𑌕𑍁𑌰𑍈𑌰𑍍𑌮𑌦𑌨𑌾𑌗𑌮𑌸𑌮𑌯𑌦𑍀𑌕𑍍𑌷𑌿𑌤𑌕𑌟𑌾𑌕𑍍𑌷𑍈𑌃 ।

𑌮𑌣𑍍𑌡𑌿𑌤𑌕𑌮𑍍𑌪𑌾𑌤𑍀𑌰𑍈𑌰𑍍𑌮𑌙𑍍𑌗𑌲𑌕𑌨𑍍𑌦𑍈𑌰𑍍𑌮𑌮𑌾𑌸𑍍𑌤𑍁 𑌸𑌾𑌰𑍂𑌪𑍍𑌯𑌮𑍍 ॥39॥

𑌵𑌦𑌨𑌾𑌰𑌵𑌿𑌨𑍍𑌦𑌵𑌕𑍍𑌷𑍋𑌵𑌾𑌮𑌾𑌙𑍍𑌕𑌤𑌟𑍀𑌵𑌶𑌂𑌵𑌦𑍀𑌭𑍂𑌤𑌾 ।

𑌪𑍂𑌰𑍁𑌷𑌤𑍍𑌰𑌿𑌤𑌯𑍇 𑌤𑍍𑌰𑍇𑌧𑌾 𑌪𑍁𑌰𑌨𑍍𑌧𑍍𑌰𑌿𑌰𑍂𑌪𑌾 𑌤𑍍𑌵𑌮𑍇𑌵 𑌕𑌾𑌮𑌾𑌕𑍍𑌷𑌿 ॥40॥

𑌬𑌾𑌧𑌾𑌕𑌰𑍀𑌂 𑌭𑌵𑌾𑌬𑍍𑌧𑍇𑌰𑌾𑌧𑌾𑌰𑌾𑌦𑍍𑌯𑌮𑍍𑌬𑍁𑌜𑍇𑌷𑍁 𑌵𑌿𑌚𑌰𑌨𑍍𑌤𑍀𑌮𑍍 ।

𑌆𑌧𑌾𑌰𑍀𑌕𑍃𑌤𑌕𑌾𑌞𑍍𑌚𑍀 𑌬𑍋𑌧𑌾𑌮𑍃𑌤𑌵𑍀𑌚𑌿𑌮𑍇𑌵 𑌵𑌿𑌮𑍃𑌶𑌾𑌮𑌃 ॥41॥

𑌕𑌲𑌯𑌾𑌮𑍍𑌯𑌨𑍍𑌤𑌃 𑌶𑌶𑌧𑌰𑌕𑌲𑌯𑌾𑌽𑌙𑍍𑌕𑌿𑌤𑌮𑍗𑌲𑌿𑌮𑌮𑌲𑌚𑌿𑌦𑍍𑌵𑌲𑌯𑌾𑌮𑍍 ।

𑌅𑌲𑌯𑌾𑌮𑌾𑌗𑌮𑌪𑍀𑌠𑍀𑌨𑌿𑌲𑌯𑌾𑌂 𑌵𑌲𑌯𑌾𑌙𑍍𑌕𑌸𑍁𑌨𑍍𑌦𑌰𑍀𑌮𑌮𑍍𑌬𑌾𑌮𑍍 ॥42॥

𑌶𑌰𑍍𑌵𑌾𑌦𑌿𑌪𑌰𑌮𑌸𑌾𑌧𑌕𑌗𑍁𑌰𑍍𑌵𑌾𑌨𑍀𑌤𑌾𑌯 𑌕𑌾𑌮𑌪𑍀𑌠𑌜𑍁𑌷𑍇 ।

𑌸𑌰𑍍𑌵𑌾𑌕𑍃𑌤𑌯𑍇 𑌶𑍋𑌣𑌿𑌮𑌗𑌰𑍍𑌵𑌾𑌯𑌾𑌸𑍍𑌮𑍈 𑌸𑌮𑌰𑍍𑌪𑍍𑌯𑌤𑍇 𑌹𑍃𑌦𑌯𑌮𑍍 ॥43॥

𑌸𑌮𑌯𑌾 𑌸𑌾𑌨𑍍𑌧𑍍𑌯𑌮𑌯𑍂𑌖𑍈𑌃 𑌸𑌮𑌯𑌾 𑌬𑍁𑌦𑍍𑌧𑌯𑌾 𑌸𑌦𑍈𑌵 𑌶𑍀𑌲𑌿𑌤𑌯𑌾 ।

𑌉𑌮𑌯𑌾 𑌕𑌾𑌞𑍍𑌚𑍀𑌰𑌤𑌯𑌾 𑌨 𑌮𑌯𑌾 𑌲𑌭𑍍𑌯𑌤𑍇 𑌕𑌿𑌂 𑌨𑍁 𑌤𑌾𑌦𑌾𑌤𑍍𑌮𑍍𑌯𑌮𑍍 ॥44॥

𑌜𑌨𑍍𑌤𑍋𑌸𑍍𑌤𑌵 𑌪𑌦𑌪𑍂𑌜𑌨𑌸𑌨𑍍𑌤𑍋𑌷𑌤𑌰𑌙𑍍𑌗𑌿𑌤𑌸𑍍𑌯 𑌕𑌾𑌮𑌾𑌕𑍍𑌷𑌿 ।

𑌵𑌨𑍍𑌧𑍋 𑌯𑌦𑌿 𑌭𑌵𑌤𑌿 𑌪𑍁𑌨𑌃 𑌸𑌿𑌨𑍍𑌧𑍋𑌰𑌮𑍍𑌭𑌸𑍍𑌸𑍁 𑌬𑌮𑍍𑌭𑍍𑌰𑌮𑍀𑌤𑌿 𑌶𑌿𑌲𑌾 ॥45॥

𑌕𑍁𑌣𑍍𑌡𑌲𑌿 𑌕𑍁𑌮𑌾𑌰𑌿 𑌕𑍁𑌟𑌿𑌲𑍇 𑌚𑌣𑍍𑌡𑌿 𑌚𑌰𑌾𑌚𑌰𑌸𑌵𑌿𑌤𑍍𑌰𑌿 𑌚𑌾𑌮𑍁𑌣𑍍𑌡𑍇 ।

𑌗𑍁𑌣𑌿𑌨𑌿 𑌗𑍁𑌹𑌾𑌰𑌿𑌣𑌿 𑌗𑍁𑌹𑍍𑌯𑍇 𑌗𑍁𑌰𑍁𑌮𑍂𑌰𑍍𑌤𑍇 𑌤𑍍𑌵𑌾𑌂 𑌨𑌮𑌾𑌮𑌿 𑌕𑌾𑌮𑌾𑌕𑍍𑌷𑌿 ॥46॥

𑌅𑌭𑌿𑌦𑌾𑌕𑍃𑌤𑌿𑌰𑍍𑌭𑌿𑌦𑌾𑌕𑍃𑌤𑌿𑌰𑌚𑌿𑌦𑌾𑌕𑍃𑌤𑌿𑌰𑌪𑌿 𑌚𑌿𑌦𑌾𑌕𑍃𑌤𑌿𑌰𑍍𑌮𑌾𑌤𑌃 ।

𑌅𑌨𑌹𑌨𑍍𑌤𑌾 𑌤𑍍𑌵𑌮𑌹𑌨𑍍𑌤𑌾 𑌭𑍍𑌰𑌮𑌯𑌸𑌿 𑌕𑌾𑌮𑌾𑌕𑍍𑌷𑌿 𑌶𑌾𑌶𑍍𑌵𑌤𑍀 𑌵𑌿𑌶𑍍𑌵𑌮𑍍 ॥47॥

𑌶𑌿𑌵 𑌶𑌿𑌵 𑌪𑌶𑍍𑌯𑌨𑍍𑌤𑌿 𑌸𑌮𑌂 𑌶𑍍𑌰𑍀𑌕𑌾𑌮𑌾𑌕𑍍𑌷𑍀𑌕𑌟𑌾𑌕𑍍𑌷𑌿𑌤𑌾𑌃 𑌪𑍁𑌰𑍁𑌷𑌾𑌃 ।

𑌵𑌿𑌪𑌿𑌨𑌂 𑌭𑌵𑌨𑌮𑌮𑌿𑌤𑍍𑌰𑌂 𑌮𑌿𑌤𑍍𑌰𑌂 𑌲𑍋𑌷𑍍𑌟𑌂 𑌚 𑌯𑍁𑌵𑌤𑌿𑌬𑌿𑌮𑍍𑌬𑍋𑌷𑍍𑌠𑌮𑍍 ॥48॥

𑌕𑌾𑌮𑌪𑌰𑌿𑌪𑌨𑍍𑌥𑌿𑌕𑌾𑌮𑌿𑌨𑌿 𑌕𑌾𑌮𑍇𑌶𑍍𑌵𑌰𑌿 𑌕𑌾𑌮𑌪𑍀𑌠𑌮𑌧𑍍𑌯𑌗𑌤𑍇 ।

𑌕𑌾𑌮𑌦𑍁𑌘𑌾 𑌭𑌵 𑌕𑌮𑌲𑍇 𑌕𑌾𑌮𑌕𑌲𑍇 𑌕𑌾𑌮𑌕𑍋𑌟𑌿 𑌕𑌾𑌮𑌾𑌕𑍍𑌷𑌿 ॥49॥

𑌮𑌧𑍍𑌯𑍇𑌹𑍃𑌦𑌯𑌂 𑌮𑌧𑍍𑌯𑍇𑌨𑌿𑌟𑌿𑌲𑌂 𑌮𑌧𑍍𑌯𑍇𑌶𑌿𑌰𑍋𑌽𑌪𑌿 𑌵𑌾𑌸𑍍𑌤𑌵𑍍𑌯𑌾𑌮𑍍 ।

𑌚𑌣𑍍𑌡𑌕𑌰𑌶𑌕𑍍𑌰𑌕𑌾𑌰𑍍𑌮𑍁𑌕𑌚𑌨𑍍𑌦𑍍𑌰𑌸𑌮𑌾𑌭𑌾𑌂 𑌨𑌮𑌾𑌮𑌿 𑌕𑌾𑌮𑌾𑌕𑍍𑌷𑍀𑌮𑍍 ॥50॥

𑌅𑌧𑌿𑌕𑌾𑌞𑍍𑌚𑌿 𑌕𑍇𑌲𑌿𑌲𑍋𑌲𑍈𑌰𑌖𑌿𑌲𑌾𑌗𑌮𑌯𑌨𑍍𑌤𑍍𑌰𑌤𑌨𑍍𑌤𑍍𑌰𑌮𑌯𑍈𑌃 ।

𑌅𑌤𑌿𑌶𑍀𑌤𑌂 𑌮𑌮 𑌮𑌾𑌨𑌸𑌮𑌸𑌮𑌶𑌰𑌦𑍍𑌰𑍋𑌹𑌿𑌜𑍀𑌵𑌨𑍋𑌪𑌾𑌯𑍈𑌃 ॥51॥

𑌨𑌨𑍍𑌦𑌤𑌿 𑌮𑌮 𑌹𑍃𑌦𑌿 𑌕𑌾𑌚𑌨 𑌮𑌨𑍍𑌦𑌿𑌰𑌯𑌨𑍍𑌤𑍀 𑌨𑌿𑌰𑌨𑍍𑌤𑌰𑌂 𑌕𑌾𑌞𑍍𑌚𑍀𑌮𑍍 ।

𑌇𑌨𑍍𑌦𑍁𑌰𑌵𑌿𑌮𑌣𑍍𑌡𑌲𑌕𑍁𑌚𑌾 𑌬𑌿𑌨𑍍𑌦𑍁𑌵𑌿𑌯𑌨𑍍𑌨𑌾𑌦𑌪𑌰𑌿𑌣𑌤𑌾 𑌤𑌰𑍁𑌣𑍀 ॥52॥

𑌶𑌮𑍍𑌪𑌾𑌲𑌤𑌾𑌸𑌵𑌰𑍍𑌣𑌂 𑌸𑌮𑍍𑌪𑌾𑌦𑌯𑌿𑌤𑍁𑌂 𑌭𑌵𑌜𑍍𑌵𑌰𑌚𑌿𑌕𑌿𑌤𑍍𑌸𑌾𑌮𑍍 ।

𑌲𑌿𑌮𑍍𑌪𑌾𑌮𑌿 𑌮𑌨𑌸𑌿 𑌕𑌿𑌞𑍍𑌚𑌨 𑌕𑌮𑍍𑌪𑌾𑌤𑌟𑌰𑍋𑌹𑌿 𑌸𑌿𑌦𑍍𑌧𑌭𑍈𑌷𑌜𑍍𑌯𑌮𑍍 ॥53॥

𑌅𑌨𑍁𑌮𑌿𑌤𑌕𑍁𑌚𑌕𑌾𑌠𑌿𑌨𑍍𑌯𑌾𑌮𑌧𑌿𑌵𑌕𑍍𑌷𑌃𑌪𑍀𑌠𑌮𑌙𑍍𑌗𑌜𑌨𑍍𑌮𑌰𑌿𑌪𑍋𑌃 ।

𑌆𑌨𑌨𑍍𑌦𑌦𑌾𑌂 𑌭𑌜𑍇 𑌤𑌾𑌮𑌾𑌨𑌙𑍍𑌗𑌬𑍍𑌰𑌹𑍍𑌮𑌤𑌤𑍍𑌵𑌬𑍋𑌧𑌸𑌿𑌰𑌾𑌮𑍍 ॥54॥

𑌐𑌕𑍍𑌷𑌿𑌷𑌿 𑌪𑌾𑌶𑌾𑌙𑍍𑌕𑍁𑌶𑌧𑌰𑌹𑌸𑍍𑌤𑌾𑌨𑍍𑌤𑌂 𑌵𑌿𑌸𑍍𑌮𑌯𑌾𑌰𑍍𑌹𑌵𑍃𑌤𑍍𑌤𑌾𑌨𑍍𑌤𑌮𑍍 ।

𑌅𑌧𑌿𑌕𑌾𑌞𑍍𑌚𑌿 𑌨𑌿𑌗𑌮𑌵𑌾𑌚𑌾𑌂 𑌸𑌿𑌦𑍍𑌧𑌾𑌨𑍍𑌤𑌂 𑌶𑍂𑌲𑌪𑌾𑌣𑌿𑌶𑍁𑌦𑍍𑌧𑌾𑌨𑍍𑌤𑌮𑍍 ॥55॥

𑌆𑌹𑌿𑌤𑌵𑌿𑌲𑌾𑌸𑌭𑌙𑍍𑌗𑍀𑌮𑌾𑌬𑍍𑌰𑌹𑍍𑌮𑌸𑍍𑌤𑌮𑍍𑌬𑌶𑌿𑌲𑍍𑌪𑌕𑌲𑍍𑌪𑌨𑌯𑌾 ।

𑌆𑌶𑍍𑌰𑌿𑌤𑌕𑌾𑌞𑍍𑌚𑍀𑌮𑌤𑍁𑌲𑌾𑌮𑌾𑌦𑍍𑌯𑌾𑌂 𑌵𑌿𑌸𑍍𑌫𑍂𑌰𑍍𑌤𑌿𑌮𑌾𑌦𑍍𑌰𑌿𑌯𑍇 𑌵𑌿𑌦𑍍𑌯𑌾𑌮𑍍 ॥56॥

𑌮𑍂𑌕𑍋𑌽𑌪𑌿 𑌜𑌟𑌿𑌲𑌦𑍁𑌰𑍍𑌗𑌤𑌿𑌶𑍋𑌕𑍋𑌽𑌪𑌿 𑌸𑍍𑌮𑌰𑌤𑌿 𑌯𑌃 𑌕𑍍𑌷𑌣𑌂 𑌭𑌵𑌤𑍀𑌮𑍍 ।

𑌏𑌕𑍋 𑌭𑌵𑌤𑌿 𑌸 𑌜𑌨𑍍𑌤𑍁𑌰𑍍𑌲𑍋𑌕𑍋𑌤𑍍𑌤𑌰𑌕𑍀𑌰𑍍𑌤𑌿𑌰𑍇𑌵 𑌕𑌾𑌮𑌾𑌕𑍍𑌷𑌿 ॥57॥

𑌪𑌞𑍍𑌚𑌦𑌶𑌵𑌰𑍍𑌣𑌰𑍂𑌪𑌂 𑌕𑌞𑍍𑌚𑌨 𑌕𑌾𑌞𑍍𑌚𑍀𑌵𑌿𑌹𑌾𑌰𑌧𑍗𑌰𑍇𑌯𑌮𑍍 ।

𑌪𑌞𑍍𑌚𑌶𑌰𑍀𑌯𑌂 𑌶𑌮𑍍𑌭𑍋𑌰𑍍𑌵𑌞𑍍𑌚𑌨𑌵𑍈𑌦𑌗𑍍𑌧𑍍𑌯𑌮𑍂𑌲𑌮𑌵𑌲𑌮𑍍𑌬𑍇 ॥58॥

𑌪𑌰𑌿𑌣𑌤𑌿𑌮𑌤𑍀𑌂 𑌚𑌤𑍁𑌰𑍍𑌧𑌾 𑌪𑌦𑌵𑍀𑌂 𑌸𑍁𑌧𑌿𑌯𑌾𑌂 𑌸𑌮𑍇𑌤𑍍𑌯 𑌸𑍗𑌷𑍁𑌮𑍍𑌨𑍀𑌮𑍍 ।

𑌪𑌞𑍍𑌚𑌾𑌶𑌦𑌰𑍍𑌣𑌕𑌲𑍍𑌪𑌿𑌤𑌮𑌦𑌶𑌿𑌲𑍍𑌪𑌾𑌂 𑌤𑍍𑌵𑌾𑌂 𑌨𑌮𑌾𑌮𑌿 𑌕𑌾𑌮𑌾𑌕𑍍𑌷𑌿 ॥59॥

𑌆𑌦𑌿𑌕𑍍𑌷𑌨𑍍𑌮𑌮 𑌗𑍁𑌰𑍁𑌰𑌾𑌡𑌾𑌦𑌿𑌕𑍍𑌷𑌾𑌨𑍍𑌤𑌾𑌕𑍍𑌷𑌰𑌾𑌤𑍍𑌮𑌿𑌕𑌾𑌂 𑌵𑌿𑌦𑍍𑌯𑌾𑌮𑍍 ।

𑌸𑍍𑌵𑌾𑌦𑌿𑌷𑍍𑌠𑌚𑌾𑌪𑌦𑌣𑍍𑌡𑌾𑌂 𑌨𑍇𑌦𑌿𑌷𑍍𑌠𑌾𑌮𑍇𑌵 𑌕𑌾𑌮𑌪𑍀𑌠𑌗𑌤𑌾𑌮𑍍 ॥60॥

𑌤𑍁𑌷𑍍𑌯𑌾𑌮𑌿 𑌹𑌰𑍍𑌷𑌿𑌤𑌸𑍍𑌮𑌰𑌶𑌾𑌸𑌨𑌯𑌾 𑌕𑌾𑌞𑍍𑌚𑌿𑌪𑍁𑌰𑌕𑍃𑌤𑌾𑌸𑌨𑌯𑌾 ।

𑌸𑍍𑌵𑌾𑌸𑌨𑌯𑌾 𑌸𑌕𑌲𑌜𑌗𑌦𑍍𑌭𑌾𑌸𑌨𑌯𑌾 𑌕𑌲𑌿𑌤𑌶𑌮𑍍𑌬𑌰𑌾𑌸𑌨𑌯𑌾 ॥61॥

𑌪𑍍𑌰𑍇𑌮𑌵𑌤𑍀 𑌕𑌮𑍍𑌪𑌾𑌯𑌾𑌂 𑌸𑍍𑌥𑍇𑌮𑌵𑌤𑍀 𑌯𑌤𑌿𑌮𑌨𑌸𑍍𑌸𑍁 𑌭𑍂𑌮𑌵𑌤𑍀 ।

𑌸𑌾𑌮𑌵𑌤𑍀 𑌨𑌿𑌤𑍍𑌯𑌗𑌿𑌰𑌾 𑌸𑍋𑌮𑌵𑌤𑍀 𑌶𑌿𑌰𑌸𑌿 𑌭𑌾𑌤𑌿 𑌹𑍈𑌮𑌵𑌤𑍀 ॥62॥

𑌕𑍗𑌤𑍁𑌕𑌿𑌨𑌾 𑌕𑌮𑍍𑌪𑌾𑌯𑌾𑌂 𑌕𑍗𑌸𑍁𑌮𑌚𑌾𑌪𑍇𑌨 𑌕𑍀𑌲𑌿𑌤𑍇𑌨𑌾𑌨𑍍𑌤𑌃 ।

𑌕𑍁𑌲𑌦𑍈𑌵𑌤𑍇𑌨 𑌮𑌹𑌤𑌾 𑌕𑍁𑌡𑍍𑌮𑌲𑌮𑍁𑌦𑍍𑌰𑌾𑌂 𑌧𑍁𑌨𑍋𑌤𑍁 𑌨𑌃𑌪𑍍𑌰𑌤𑌿𑌭𑌾 ॥63॥

𑌯𑍂𑌨𑌾 𑌕𑍇𑌨𑌾𑌪𑌿 𑌮𑌿𑌲𑌦𑍍𑌦𑍇𑌹𑌾 𑌸𑍍𑌵𑌾𑌹𑌾𑌸𑌹𑌾𑌯𑌤𑌿𑌲𑌕𑍇𑌨 ।

𑌸𑌹𑌕𑌾𑌰𑌮𑍂𑌲𑌦𑍇𑌶𑍇 𑌸𑌂𑌵𑌿𑌦𑍍𑌰𑍂𑌪𑌾 𑌕𑍁𑌟𑍁𑌮𑍍𑌬𑌿𑌨𑍀 𑌰𑌮𑌤𑍇 ॥64॥

𑌕𑍁𑌸𑍁𑌮𑌶𑌰𑌗𑌰𑍍𑌵𑌸𑌮𑍍𑌪𑌤𑍍𑌕𑍋𑌶𑌗𑍃𑌹𑌂 𑌭𑌾𑌤𑌿 𑌕𑌾𑌞𑍍𑌚𑌿𑌦𑍇𑌶𑌗𑌤𑌮𑍍 ।

𑌸𑍍𑌥𑌾𑌪𑌿𑌤𑌮𑌸𑍍𑌮𑌿𑌨𑍍𑌕𑌥𑌮𑌪𑌿 𑌗𑍋𑌪𑌿𑌤𑌮𑌨𑍍𑌤𑌰𑍍𑌮𑌯𑌾 𑌮𑌨𑍋𑌰𑌤𑍍𑌨𑌮𑍍 ॥65॥

𑌦𑌗𑍍𑌧𑌷𑌡𑌧𑍍𑌵𑌾𑌰𑌣𑍍𑌯𑌂 𑌦𑌰𑌦𑌲𑌿𑌤𑌕𑍁𑌸𑍁𑌮𑍍𑌭𑌸𑌮𑍍𑌭𑍃𑌤𑌾𑌰𑍁𑌣𑍍𑌯𑌮𑍍 ।

𑌕𑌲𑌯𑍇 𑌨𑌵𑌤𑌾𑌰𑍁𑌣𑍍𑌯𑌂 𑌕𑌮𑍍𑌪𑌾𑌤𑌟𑌸𑍀𑌮𑍍𑌨𑌿 𑌕𑌿𑌮𑌪𑌿 𑌕𑌾𑌰𑍁𑌣𑍍𑌯𑌮𑍍 ॥66॥

𑌅𑌧𑌿𑌕𑌾𑌞𑍍𑌚𑌿 𑌵𑌰𑍍𑌧𑌮𑌾𑌨𑌾𑌮𑌤𑍁𑌲𑌾𑌂 𑌕𑌰𑌵𑌾𑌣𑌿 𑌪𑌾𑌰𑌣𑌾𑌮𑌕𑍍𑌷𑍍𑌣𑍋𑌃 ।

𑌆𑌨𑌨𑍍𑌦𑌪𑌾𑌕𑌭𑍇𑌦𑌾𑌮𑌰𑍁𑌣𑌿𑌮𑌪𑌰𑌿𑌣𑌾𑌮𑌗𑌰𑍍𑌵𑌪𑌲𑍍𑌲𑌵𑌿𑌤𑌾𑌮𑍍 ॥67॥

𑌬𑌾𑌣𑌸𑍃𑌣𑌿𑌪𑌾𑌶𑌕𑌾𑌰𑍍𑌮𑍁𑌕𑌪𑌾𑌣𑌿𑌮𑌮𑍁𑌂 𑌕𑌮𑌪𑌿 𑌕𑌾𑌮𑌪𑍀𑌠𑌗𑌤𑌮𑍍 ।

𑌏𑌣𑌧𑌰𑌕𑍋𑌣𑌚𑍂𑌡𑌂 𑌶𑍋𑌣𑌿𑌮𑌪𑌰𑌿𑌪𑌾𑌕𑌭𑍇𑌦𑌮𑌾𑌕𑌲𑌯𑍇 ॥68॥

𑌕𑌿𑌂 𑌵𑌾 𑌫𑌲𑌤𑌿 𑌮𑌮𑌾𑌨𑍍𑌯𑍗𑌰𑍍𑌬𑌿𑌮𑍍𑌬𑌾𑌧𑌰𑌚𑍁𑌮𑍍𑌬𑌿𑌮𑌨𑍍𑌦𑌹𑌾𑌸𑌮𑍁𑌖𑍀 ।

𑌸𑌮𑍍𑌬𑌾𑌧𑌕𑌰𑍀 𑌤𑌮𑌸𑌾𑌮𑌮𑍍𑌬𑌾 𑌜𑌾𑌗𑌰𑍍𑌤𑌿 𑌮𑌨𑌸𑌿 𑌕𑌾𑌮𑌾𑌕𑍍𑌷𑍀 ॥69॥

𑌮𑌞𑍍𑌚𑍇 𑌸𑌦𑌾𑌶𑌿𑌵𑌮𑌯𑍇 𑌪𑌰𑌿𑌶𑌿𑌵𑌮𑌯𑌲𑌲𑌿𑌤𑌪𑍗𑌷𑍍𑌪𑌪𑌰𑍍𑌯𑌙𑍍𑌕𑍇 ।

𑌅𑌧𑌿𑌚𑌕𑍍𑌰𑌮𑌧𑍍𑌯𑌮𑌾𑌸𑍍𑌤𑍇 𑌕𑌾𑌮𑌾𑌕𑍍𑌷𑍀 𑌨𑌾𑌮 𑌕𑌿𑌮𑌪𑌿 𑌮𑌮 𑌭𑌾𑌗𑍍𑌯𑌮𑍍 ॥70॥

𑌰𑌕𑍍𑌷𑍍𑌯𑍋𑌽𑌸𑍍𑌮𑌿 𑌕𑌾𑌮𑌪𑍀𑌠𑍀𑌲𑌾𑌸𑌿𑌕𑌯𑌾 𑌘𑌨𑌕𑍃𑌪𑌾𑌮𑍍𑌬𑍁𑌰𑌾𑌶𑌿𑌕𑌯𑌾 ।

𑌶𑍍𑌰𑍁𑌤𑌿𑌯𑍁𑌵𑌤𑌿𑌕𑍁𑌨𑍍𑌤𑌲𑍀𑌮𑌣𑌿𑌮𑌾𑌲𑌿𑌕𑌯𑌾 𑌤𑍁𑌹𑌿𑌨𑌶𑍈𑌲𑌬𑌾𑌲𑌿𑌕𑌯𑌾 ॥71॥

𑌲𑍀𑌯𑍇 𑌪𑍁𑌰𑌹𑌰𑌜𑌾𑌯𑍇 𑌮𑌾𑌯𑍇 𑌤𑌵 𑌤𑌰𑍁𑌣𑌪𑌲𑍍𑌲𑌵𑌚𑍍𑌛𑌾𑌯𑍇 ।

𑌚𑌰𑌣𑍇 𑌚𑌨𑍍𑌦𑍍𑌰𑌾𑌭𑌰𑌣𑍇 𑌕𑌾𑌞𑍍𑌚𑍀𑌶𑌰𑌣𑍇 𑌨𑌤𑌾𑌰𑍍𑌤𑌿𑌸𑌂𑌹𑌰𑌣𑍇 ॥72॥

𑌮𑍂𑌰𑍍𑌤𑌿𑌮𑌤𑌿 𑌮𑍁𑌕𑍍𑌤𑌿𑌬𑍀𑌜𑍇 𑌮𑍂𑌰𑍍𑌧𑍍𑌨𑌿 𑌸𑍍𑌤𑌬𑌕𑌿𑌤𑌚𑌕𑍋𑌰𑌸𑌾𑌮𑍍𑌰𑌾𑌜𑍍𑌯𑍇 ।

𑌮𑍋𑌦𑌿𑌤𑌕𑌮𑍍𑌪𑌾𑌕𑍂𑌲𑍇 𑌮𑍁𑌹𑍁𑌰𑍍𑌮𑍁𑌹𑍁𑌰𑍍𑌮𑌨𑌸𑌿 𑌮𑍁𑌮𑍁𑌦𑌿𑌷𑌾𑌽𑌸𑍍𑌮𑌾𑌕𑌮𑍍 ॥73॥

𑌵𑍇𑌦𑌮𑌯𑍀𑌂 𑌨𑌾𑌦𑌮𑌯𑍀𑌂 𑌬𑌿𑌨𑍍𑌦𑍁𑌮𑌯𑍀𑌂 𑌪𑌰𑌪𑌦𑍋𑌦𑍍𑌯𑌦𑌿𑌨𑍍𑌦𑍁𑌮𑌯𑍀𑌮𑍍 ।

𑌮𑌨𑍍𑌤𑍍𑌰𑌮𑌯𑍀𑌂 𑌤𑌨𑍍𑌤𑍍𑌰𑌮𑌯𑍀𑌂 𑌪𑍍𑌰𑌕𑍃𑌤𑌿𑌮𑌯𑍀𑌂 𑌨𑍗𑌮𑌿 𑌵𑌿𑌶𑍍𑌵𑌵𑌿𑌕𑍃𑌤𑌿𑌮𑌯𑍀𑌮𑍍 ॥74॥

𑌪𑍁𑌰𑌮𑌥𑌨𑌪𑍁𑌣𑍍𑌯𑌕𑍋𑌟𑍀 𑌪𑍁𑌞𑍍𑌜𑌿𑌤𑌕𑌵𑌿𑌲𑍋𑌕𑌸𑍂𑌕𑍍𑌤𑌿𑌰𑌸𑌧𑌾𑌟𑍀 ।

𑌮𑌨𑌸𑌿 𑌮𑌮 𑌕𑌾𑌮𑌕𑍋𑌟𑍀 𑌵𑌿𑌹𑌰𑌤𑍁 𑌕𑌰𑍁𑌣𑌾𑌵𑌿𑌪𑌾𑌕𑌪𑌰𑌿𑌪𑌾𑌟𑍀 ॥75॥

𑌕𑍁𑌟𑌿𑌲𑌂 𑌚𑌟𑍁𑌲𑌂 𑌪𑍃𑌥𑍁𑌲𑌂 𑌮𑍃𑌦𑍁𑌲𑌂 𑌕𑌚𑌨𑌯𑌨𑌜𑌘𑌨𑌚𑌰𑌣𑍇𑌷𑍁 ।

𑌅𑌵𑌲𑍋𑌕𑌿𑌤𑌮𑌵𑌲𑌮𑍍𑌬𑌿𑌤𑌮𑌧𑌿𑌕𑌮𑍍𑌪𑌾𑌤𑌟𑌮𑌮𑍇𑌯𑌮𑌸𑍍𑌮𑌾𑌭𑌿𑌃 ॥76॥

𑌪𑍍𑌰𑌤𑍍𑌯𑌙𑍍𑌮𑍁𑌖𑍍𑌯𑌾 𑌦𑍃𑌷𑍍𑌟𑌯𑌾 𑌪𑍍𑌰𑌸𑌾𑌦𑌦𑍀𑌪𑌾𑌙𑍍𑌕𑍁𑌰𑍇𑌣 𑌕𑌾𑌮𑌾𑌕𑍍𑌷𑍍𑌯𑌾𑌃 ।

𑌪𑌶𑍍𑌯𑌾𑌮𑌿 𑌨𑌿𑌸𑍍𑌤𑍁𑌲𑌮𑌹𑍋 𑌪𑌚𑍇𑌲𑌿𑌮𑌂 𑌕𑌮𑌪𑌿 𑌪𑌰𑌶𑌿𑌵𑍋𑌲𑍍𑌲𑌾𑌸𑌮𑍍 ॥77॥

𑌵𑌿𑌦𑍍𑌯𑍇 𑌵𑌿𑌧𑌾𑌤𑍃𑌵𑌿𑌷𑌯𑍇 𑌕𑌾𑌤𑍍𑌯𑌾𑌯𑌨𑌿 𑌕𑌾𑌲𑌿 𑌕𑌾𑌮𑌕𑍋𑌟𑌿𑌕𑌲𑍇 ।

𑌭𑌾𑌰𑌤𑌿 𑌭𑍈𑌰𑌵𑌿 𑌭𑌦𑍍𑌰𑍇 𑌶𑌾𑌕𑌿𑌨𑌿 𑌶𑌾𑌮𑍍𑌭𑌵𑌿 𑌶𑌿𑌵𑍇 𑌸𑍍𑌤𑍁𑌵𑍇 𑌭𑌵𑌤𑍀𑌮𑍍 ॥78॥

𑌮𑌾𑌲𑌿𑌨𑌿 𑌮𑌹𑍇𑌶𑌚𑌾𑌲𑌿𑌨𑌿 𑌕𑌾𑌞𑍍𑌚𑍀𑌖𑍇𑌲𑌿𑌨𑌿 𑌵𑌿𑌪𑌕𑍍𑌷𑌕𑌾𑌲𑌿𑌨𑌿 𑌤𑍇 ।

𑌶𑍂𑌲𑌿𑌨𑌿 𑌵𑌿𑌦𑍍𑌰𑍁𑌮𑌶𑌾𑌲𑌿𑌨𑌿 𑌸𑍁𑌰𑌜𑌨𑌪𑌾𑌲𑌿𑌨𑌿 𑌕𑌪𑌾𑌲𑌿𑌨𑌿 𑌨𑌮𑍋𑌽𑌸𑍍𑌤𑍁 ॥79॥

𑌦𑍇𑌶𑌿𑌕 𑌇𑌤𑌿 𑌕𑌿𑌂 𑌶𑌙𑍍𑌕𑍇 𑌤𑌤𑍍𑌤𑌾𑌦𑍃𑌕𑍍𑌤𑌵 𑌨𑍁 𑌤𑌰𑍁𑌣𑌿𑌮𑍋𑌨𑍍𑌮𑍇𑌷𑌃 ।

𑌕𑌾𑌮𑌾𑌕𑍍𑌷𑌿 𑌶𑍂𑌲𑌪𑌾𑌣𑍇𑌃 𑌕𑌾𑌮𑌾𑌗𑌮𑌸𑌮𑌯𑌦𑍀𑌕𑍍𑌷𑌾𑌯𑌾𑌮𑍍 ॥80॥

𑌵𑍇𑌤𑌣𑍍𑌡𑌕𑍁𑌮𑍍𑌭𑌡𑌮𑍍𑌬𑌰𑌵𑍈𑌤𑌣𑍍𑌡𑌿𑌕𑌕𑍁𑌚𑌭𑌰𑌾𑌰𑍍𑌤𑌮𑌧𑍍𑌯𑌾𑌯 ।

𑌕𑍁𑌙𑍍𑌕𑍁𑌮𑌰𑍁𑌚𑍇 𑌨𑌮𑌸𑍍𑌯𑌾𑌂 𑌶𑌙𑍍𑌕𑌰𑌨𑌯𑌨𑌾𑌮𑍃𑌤𑌾𑌯 𑌰𑌚𑌯𑌾𑌮𑌃 ॥81॥

𑌅𑌧𑌿𑌕𑌾𑌞𑍍𑌚𑌿𑌤𑌮𑌣𑌿𑌕𑌾𑌞𑍍𑌚𑌨𑌕𑌾𑌞𑍍𑌚𑍀𑌮𑌧𑌿𑌕𑌾𑌞𑍍𑌚𑌿 𑌕𑌾𑌞𑍍𑌚𑌿𑌦𑌦𑍍𑌰𑌾𑌕𑍍𑌷𑌮𑍍 ।

𑌅𑌵𑌨𑌤𑌜𑌨𑌾𑌨𑍁𑌕𑌮𑍍𑌪𑌾𑌮𑌨𑍁𑌕𑌮𑍍𑌪𑌾𑌕𑍂𑌲𑌮𑌸𑍍𑌮𑌦𑌨𑍁𑌕𑍂𑌲𑌾𑌮𑍍 ॥82॥

𑌪𑌰𑌿𑌚𑌿𑌤𑌕𑌮𑍍𑌪𑌾𑌤𑍀𑌰𑌂 𑌪𑌰𑍍𑌵𑌤𑌰𑌾𑌜𑌨𑍍𑌯𑌸𑍁𑌕𑍃𑌤𑌸𑌨𑍍𑌨𑌾𑌹𑌮𑍍 ।

𑌪𑌰𑌗𑍁𑌰𑍁𑌕𑍃𑌪𑌯𑌾 𑌵𑍀𑌕𑍍𑌷𑍇 𑌪𑌰𑌮𑌶𑌿𑌵𑍋𑌤𑍍𑌸𑌙𑍍𑌗𑌮𑌙𑍍𑌗𑌲𑌾𑌭𑌰𑌣𑌮𑍍 ॥83॥

𑌦𑌗𑍍𑌧𑌮𑌦𑌨𑌸𑍍𑌯 𑌶𑌮𑍍𑌭𑍋𑌃 𑌪𑍍𑌰𑌥𑍀𑌯𑌸𑍀𑌂 𑌬𑍍𑌰𑌹𑍍𑌮𑌚𑌰𑍍𑌯𑌵𑍈𑌦𑌗𑍍𑌧𑍀𑌮𑍍 ।

𑌤𑌵 𑌦𑍇𑌵𑌿 𑌤𑌰𑍁𑌣𑌿𑌮𑌶𑍍𑌰𑍀𑌚𑌤𑍁𑌰𑌿𑌮𑌪𑌾𑌕𑍋 𑌨 𑌚𑌕𑍍𑌷𑌮𑍇 𑌮𑌾𑌤𑌃 ॥84॥

𑌮𑌦𑌜𑌲𑌤𑌮𑌾𑌲𑌪𑌤𑍍𑌰𑌾 𑌵𑌸𑌨𑌿𑌤𑌪𑌤𑍍𑌰𑌾 𑌕𑌰𑌾𑌦𑍃𑌤𑌖𑌾𑌨𑌿𑌤𑍍𑌰𑌾 ।

𑌵𑌿𑌹𑌰𑌤𑌿 𑌪𑍁𑌲𑌿𑌨𑍍𑌦𑌯𑍋𑌷𑌾 𑌗𑍁𑌞𑍍𑌜𑌾𑌭𑍂𑌷𑌾 𑌫𑌣𑍀𑌨𑍍𑌦𑍍𑌰𑌕𑍃𑌤𑌵𑍇𑌷𑌾 ॥85॥

𑌅𑌙𑍍𑌕𑍇 𑌶𑍁𑌕𑌿𑌨𑍀 𑌗𑍀𑌤𑍇 𑌕𑍗𑌤𑍁𑌕𑌿𑌨𑍀 𑌪𑌰𑌿𑌸𑌰𑍇 𑌚 𑌗𑌾𑌯𑌕𑌿𑌨𑍀 ।

𑌜𑌯𑌸𑌿 𑌸𑌵𑌿𑌧𑍇𑌽𑌮𑍍𑌬 𑌭𑍈𑌰𑌵𑌮𑌣𑍍𑌡𑌲𑌿𑌨𑍀 𑌶𑍍𑌰𑌵𑌸𑌿 𑌶𑌙𑍍𑌖𑌕𑍁𑌨𑍍𑌡𑌲𑌿𑌨𑍀 ॥86॥

𑌪𑍍𑌰𑌣𑌤𑌜𑌨𑌤𑌾𑌪𑌵𑌰𑍍𑌗𑌾 𑌕𑍃𑌤𑌬𑌹𑍁𑌸𑌰𑍍𑌗𑌾 𑌸𑌸𑌿𑌂𑌹𑌸𑌂𑌸𑌰𑍍𑌗𑌾 ।

𑌕𑌾𑌮𑌾𑌕𑍍𑌷𑌿 𑌮𑍁𑌦𑌿𑌤𑌭𑌰𑍍𑌗𑌾 𑌹𑌤𑌰𑌿𑌪𑍁𑌵𑌰𑍍𑌗𑌾 𑌤𑍍𑌵𑌮𑍇𑌵 𑌸𑌾 𑌦𑍁𑌰𑍍𑌗𑌾 ॥87॥

𑌶𑍍𑌰𑌵𑌣𑌚𑌲𑌦𑍍𑌵𑍇𑌤𑌣𑍍𑌡𑌾 𑌸𑌮𑌰𑍋𑌦𑍍𑌦𑌣𑍍𑌡𑌾 𑌧𑍁𑌤𑌾𑌸𑍁𑌰𑌶𑌿𑌖𑌣𑍍𑌡𑌾 ।

𑌦𑍇𑌵𑌿 𑌕𑌲𑌿𑌤𑌾𑌨𑍍𑌤𑍍𑌰𑌷𑌣𑍍𑌡𑌾 𑌧𑍃𑌤𑌨𑌰𑌮𑍁𑌣𑍍𑌡𑌾 𑌤𑍍𑌵𑌮𑍇𑌵 𑌚𑌾𑌮𑍁𑌣𑍍𑌡𑌾 ॥88॥

𑌉𑌰𑍍𑌵𑍀𑌧𑌰𑍇𑌨𑍍𑌦𑍍𑌰𑌕𑌨𑍍𑌯𑍇 𑌦𑌰𑍍𑌵𑍀𑌭𑌰𑌿𑌤𑍇𑌨 𑌭𑌕𑍍𑌤𑌪𑍂𑌰𑍇𑌣 ।

𑌗𑍁𑌰𑍍𑌵𑍀𑌮𑌕𑌿𑌞𑍍𑌚𑌨𑌾𑌰𑍍𑌤𑌿 𑌖𑌰𑍍𑌵𑍀𑌕𑍁𑌰𑍁𑌷𑍇 𑌤𑍍𑌵𑌮𑍇𑌵 𑌕𑌾𑌮𑌾𑌕𑍍𑌷𑌿 ॥89॥

𑌤𑌾𑌡𑌿𑌤𑌰𑌿𑌪𑍁𑌪𑌰𑌿𑌪𑍀𑌡𑌨𑌭𑌯𑌹𑌰𑌣 𑌨𑌿𑌪𑍁𑌣𑌹𑌲𑌮𑍁𑌸𑌲𑌾 ।

𑌕𑍍𑌰𑍋𑌡𑌪𑌤𑌿𑌭𑍀𑌷𑌣𑌮𑍁𑌖𑍀 𑌕𑍍𑌰𑍀𑌡𑌸𑌿 𑌜𑌗𑌤𑌿 𑌤𑍍𑌵𑌮𑍇𑌵 𑌕𑌾𑌮𑌾𑌕𑍍𑌷𑌿 ॥90॥

𑌸𑍍𑌮𑌰𑌮𑌥𑌨𑌵𑌰𑌣𑌲𑍋𑌲𑌾 𑌮𑌨𑍍𑌮𑌥𑌹𑍇𑌲𑌾𑌵𑌿𑌲𑌾𑌸𑌮𑌣𑌿𑌶𑌾𑌲𑌾 ।

𑌕𑌨𑌕𑌰𑍁𑌚𑌿𑌚𑍗𑌰𑍍𑌯𑌶𑍀𑌲𑌾 𑌤𑍍𑌵𑌮𑌮𑍍𑌬 𑌬𑌾𑌲𑌾 𑌕𑌰𑌾𑌬𑍍𑌜𑌧𑍃𑌤𑌮𑌾𑌲𑌾 ॥91॥

𑌵𑌿𑌮𑌲𑌪𑌟𑍀 𑌕𑌮𑌲𑌕𑍁𑌟𑍀 𑌪𑍁𑌸𑍍𑌤𑌕𑌰𑍁𑌦𑍍𑌰𑌾𑌕𑍍𑌷𑌶𑌸𑍍𑌤𑌹𑌸𑍍𑌤𑌪𑍁𑌟𑍀 ।

𑌕𑌾𑌮𑌾𑌕𑍍𑌷𑌿 𑌪𑌕𑍍𑌷𑍍𑌮𑌲𑌾𑌕𑍍𑌷𑍀 𑌕𑌲𑌿𑌤𑌵𑌿𑌪𑌞𑍍𑌚𑍀 𑌵𑌿𑌭𑌾𑌸𑌿 𑌵𑍈𑌰𑌿𑌞𑍍𑌚𑍀 ॥92॥

𑌕𑍁𑌙𑍍𑌕𑍁𑌮𑌰𑍁𑌚𑌿𑌪𑌿𑌙𑍍𑌗𑌮𑌸𑍃𑌕𑍍𑌪𑌙𑍍𑌕𑌿𑌲𑌮𑍁𑌣𑍍𑌡𑌾𑌲𑌿𑌮𑌣𑍍𑌡𑌿𑌤𑌂 𑌮𑌾𑌤𑌃 ।

𑌶𑍍𑌰𑍀𑌕𑌾𑌮𑌾𑌕𑍍𑌷𑌿 𑌤𑌦𑍀𑌯𑌸𑌙𑍍𑌗𑌮𑌕𑌲𑌾𑌮𑌨𑍍𑌦𑍀𑌭𑌵𑌤𑍍𑌕𑍗𑌤𑍁𑌕𑌃

𑌜𑌯𑌤𑌿 𑌤𑌵 𑌰𑍂𑌪𑌧𑍇𑌯𑌂 𑌜𑌪𑌪𑌟𑌪𑍁𑌸𑍍𑌤𑌕𑌵𑌰𑌾𑌭𑌯𑌕𑌰𑌾𑌬𑍍𑌜𑌮𑍍 ॥93॥

𑌕𑌨𑌕𑌮𑌣𑌿𑌕𑌲𑌿𑌤𑌭𑍂𑌷𑌾𑌂 𑌕𑌾𑌲𑌾𑌯𑌸𑌕𑌲𑌹𑌶𑍀𑌲𑌕𑌾𑌨𑍍𑌤𑌿𑌕𑌲𑌾𑌮𑍍 ।

𑌕𑌾𑌮𑌾𑌕𑍍𑌷𑌿 𑌶𑍀𑌲𑌯𑍇 𑌤𑍍𑌵𑌾𑌂 𑌕𑌪𑌾𑌲𑌶𑍂𑌲𑌾𑌭𑌿𑌰𑌾𑌮𑌕𑌰𑌕𑌮𑌲𑌾𑌮𑍍 ॥94॥

𑌲𑍋𑌹𑌿𑌤𑌿𑌮𑌪𑍁𑌞𑍍𑌜𑌮𑌧𑍍𑌯𑍇 𑌮𑍋𑌹𑌿𑌤𑌭𑍁𑌵𑌨𑍇 𑌮𑍁𑌦𑌾 𑌨𑌿𑌰𑍀𑌕𑍍𑌷𑌨𑍍𑌤𑍇 ।

𑌵𑌦𑌨𑌂 𑌤𑌵 𑌕𑍁𑌵𑌯𑍁𑌗𑌲𑌂 𑌕𑌾𑌞𑍍𑌚𑍀𑌸𑍀𑌮𑌾𑌂 𑌚 𑌕𑍇𑌽𑌪𑌿 𑌕𑌾𑌮𑌾𑌕𑍍𑌷𑌿 ॥95॥

𑌜𑌲𑌧𑌿𑌦𑍍𑌵𑌿𑌗𑍁𑌣𑌿𑌤𑌹𑍁𑌤𑌬𑌹𑌦𑌿𑌶𑌾𑌦𑌿𑌨𑍇𑌶𑍍𑌵𑌰𑌕𑌲𑌾𑌶𑍍𑌵𑌿𑌨𑍇𑌯𑌦𑌲𑍈𑌃 ।

𑌨𑌲𑌿𑌨𑍈𑌰𑍍𑌮𑌹𑍇𑌶𑌿 𑌗𑌚𑍍𑌛𑌸𑌿 𑌸𑌰𑍍𑌵𑍋𑌤𑍍𑌤𑌰𑌕𑌰𑌕𑌮𑌲𑌦𑌲𑌮𑌮𑌲𑌮𑍍 ॥96॥

𑌸𑌤𑍍𑌕𑍃𑌤𑌦𑍇𑌶𑌿𑌕𑌚𑌰𑌣𑌾𑌃 𑌸𑌬𑍀𑌜𑌨𑌿𑌰𑍍𑌬𑍀𑌜𑌯𑍋𑌗𑌨𑌿𑌶𑍍𑌰𑍇𑌣𑍍𑌯𑌾 ।

𑌅𑌪𑌵𑌰𑍍𑌗𑌸𑍗𑌧𑌵𑌲𑌭𑍀𑌮𑌾𑌰𑍋𑌹𑌨𑍍𑌤𑍍𑌯𑌮𑍍𑌬 𑌕𑍇𑌽𑌪𑌿 𑌤𑌵 𑌕𑍃𑌪𑌯𑌾 ॥97॥

𑌅𑌨𑍍𑌤𑌰𑌪𑌿 𑌬𑌹𑌿𑌰𑌪𑌿 𑌤𑍍𑌵𑌂 𑌜𑌨𑍍𑌤𑍁𑌤𑌤𑍇𑌰𑌨𑍍𑌤𑌕𑌾𑌨𑍍𑌤𑌕𑍃𑌦𑌹𑌨𑍍𑌤𑍇 ।

𑌚𑌿𑌨𑍍𑌤𑌿𑌤𑌸𑌨𑍍𑌤𑌾𑌨𑌵𑌤𑌾𑌂 𑌸𑌨𑍍𑌤𑌤𑌮𑌪𑌿 𑌤𑌨𑍍𑌤𑌨𑍀𑌷𑌿 𑌮𑌹𑌿𑌮𑌾𑌨𑌮𑍍 ॥98॥

𑌕𑌲𑌮𑌞𑍍𑌜𑍁𑌲𑌵𑌾𑌗𑌨𑍁𑌮𑌿𑌤𑌗𑌲𑌪𑌞𑍍𑌜𑌰𑌗𑌤𑌶𑍁𑌕𑌗𑍍𑌰𑌹𑍗𑌤𑍍𑌕𑌣𑍍𑌠𑍍𑌯𑌾𑌤𑍍 ।

𑌅𑌮𑍍𑌬 𑌰𑌦𑌨𑌾𑌮𑍍𑌬𑌰𑌂 𑌤𑍇 𑌬𑌿𑌮𑍍𑌬𑌫𑌲𑌂 𑌶𑌮𑍍𑌬𑌰𑌾𑌰𑌿𑌣𑌾 𑌨𑍍𑌯𑌸𑍍𑌤𑌮𑍍 ॥99॥

𑌜𑌯 𑌜𑌯 𑌜𑌗𑌦𑌮𑍍𑌬 𑌶𑌿𑌵𑍇 𑌜𑌯 𑌜𑌯 𑌕𑌾𑌮𑌾𑌕𑍍𑌷𑌿 𑌜𑌯 𑌜𑌯𑌾𑌦𑍍𑌰𑌿𑌸𑍁𑌤𑍇 ।

𑌜𑌯 𑌜𑌯 𑌮𑌹𑍇𑌶𑌦𑌯𑌿𑌤𑍇 𑌜𑌯 𑌜𑌯 𑌚𑌿𑌦𑍍𑌗𑌗𑌨𑌕𑍗𑌮𑍁𑌦𑍀𑌧𑌾𑌰𑍇 ॥100॥

𑌆𑌰𑍍𑌯𑌾𑌶𑌤𑌕𑌂 𑌭𑌕𑍍𑌤𑍍𑌯𑌾 𑌪𑌠𑌤𑌾𑌮𑌾𑌰𑍍𑌯𑌾𑌕𑌟𑌾𑌕𑍍𑌷𑍇𑌣 ।

𑌨𑌿𑌸𑍍𑌸𑌰𑌤𑌿 𑌵𑌦𑌨𑌕𑌮𑌲𑌾𑌦𑍍𑌵𑌾𑌣𑍀 𑌪𑍀𑌯𑍂𑌷𑌧𑍋𑌰𑌣𑍀 𑌦𑌿𑌵𑍍𑌯𑌾 ॥101॥

॥ 𑌇𑌤𑌿 𑌆𑌰𑍍𑌯𑌾𑌶𑌤𑌕𑌂 𑌸𑌮𑍍𑌪𑍂𑌰𑍍𑌣𑌮𑍍 ॥

Roman (IAST) Transliteration

kāraṇaparacidrūpā kāñcīpurasīmni kāmapīṭhagatā |

kācana viharati karuṇā kāśmīrastabakakomalāṅgalatā ||1||

kañcana kāñcīnilayaṃ karadhṛtakodaṇḍabāṇasṛṇipāśam |

kaṭhinastanabharanamraṃ kaivalyānandakandamavalambe ||2||

cintitaphalaparipoṣaṇacintāmaṇireva kāñcinilayā me |

ciratarasucaritasulabhā cittaṃ śiśirayatu citsukhādhārā ||3||

kuṭilakacaṃ kaṭhinakucaṃ kundasmitakānti kuṅkumacchāyam |

kurute vihṛtiṃ kāñcyāṃ kulaparvatasārvabhaumasarvasvam ||4||

pañcaśaraśāstrabodhanaparamācāryeṇa dṛṣṭipātena |

kāñcīsīmni kumārī kācana mohayati kāmajetāram ||5||

parayā kāñcīpurayā parvataparyāyapīnakucabharayā |

paratantrā vayamanayā paṅkajasabrahmacārilocanayā ||6||

aiśvaryamindumauleraikatmyaprakṛti kāñcimadhyagatam |

aindavakiśoraśekharamaidamparyaṃ cakāsti nigamānām ||7||

śritakampasīmānaṃ śithilitaparamaśivadhairyamahimānam |

kalaye paṭalimānaṃ kañcana kañcukitabhuvanabhūmānam ||8||

ādṛtakāñcīnilayamādyāmārūḍhayauvanāṭopām |

āgamavataṃsakalikāmānandādvaitakandalīṃ vande ||9||

tuṅgābhirāmakucabharaśṛṅgāritamāśrayāmi kāñcigatam |

gaṅgādharaparatantraṃ śṛṅgārādvaitatantrasiddhāntam ||10||

kāñcīratnavibhūṣāṃ kāmapi kandarpasūtikāpāṅgīm |

paramāṃ kalāmupāse paraśivavāmāṅkapīṭhikāsīnām ||11||

kampātīcarāṇāṃ karuṇākorakitadṛṣṭipātānām |

kelīvanaṃ mano me keṣāñcidbhavatu cidvilāsānām ||12||

āmratarumūlavasaterādimapuruṣasya nayanapīyūṣam |

ārabdhayauvanotsavamāmnāyarahasyamantaravalambe ||13||

adhikāñci paramayogibhirādimaparapīṭhasīmni dṛśyena |

anubaddhaṃ mama mānasamaruṇimasarvasvasampradāyena ||14||

aṅkitaśaṅkaradehāmaṅkuritorojakaṅkaṇāśleṣaiḥ |

adhikāñci nityataruṇīmadrākṣaṃ kāñcidadbhutāṃ bālām ||15||

madhuradhanuṣā mahīdharajanuṣā nandāmi surabhibāṇajuṣā |

cidvapuṣā kāñcipure kelijuṣā bandhujīvakāntimuṣā ||16||

madhurasmitena ramate māṃsalakucabhāramandagamanena |

madhyekāñci mano me manasijasāmrājyagarvabījena ||17||

dharaṇimayīṃ taraṇimayīṃ pavanamayīṃ gaganadahanahotṛmayīm |

ambumayīmindumayīmambāmanukampamādimāmīkṣe ||18||

līnasthiti munihṛdaye dhyānastimitaṃ tapasyadupakampam |

pīnastanabharamīḍe mīnadhvajatantraparamatātparyam ||19||

śvetā mantharahasite śātā madhye ca vāḍbhano'tītā |

śītā locanapāte sphītā kucasīmni śāśvatī mātā ||20||

purataḥ kadā na karavai puravairivimardapulakitāṅgalatām |

punatīṃ kāñcīdeśaṃ puṣpāyudhavīryasarasaparipāṭīm ||21||

puṇyā kā'pi purandhrī puṅkhitakandarpasampadā vapuṣā |

pulinacarī kampāyāḥ puramathanaṃ pulakaniculitaṃ kurute ||22||

tanimādvaitavalagnaṃ taruṇāruṇasampradāyatanulekham |

taṭasīmani kampāyāstaruṇimasarvasvamādyamadrākṣam ||23||

pauṣṭikakarmavipākaṃ pauṣpaśaraṃ savidhasīmni kampāyāḥ |

adrākṣamāttayauvanamabhyudayaṃ kañcidardhaśaśimaulaiḥ ||24||

saṃśritakāñcīdeśe sarasijadaurbhāgyajāgraduttaṃse |

saṃvinmaye vilīye sārasvatapuruṣakārasāmrājye ||25||

moditamadhukaraviśikhaṃ svādimasamudāyasārakodaṇḍam |

ādṛtakāñcīkhelanamādimamāruṇyabhedamākalaye ||26||

urarīkṛtakāñcipurīmupaniṣadaravindakuharamadhudhārām |

unnamrastanakalaśīmutsavalaharīmupāsmahe śambhoḥ ||27||

eṇaśiśudīrghalocanamenaḥparipanthi santataṃ bhajatām |

ekāmranāthajīvitamevampadadūramekamavalambe ||28||

smayamānamukhaṃ kāñcībhayamānaṃ kamapi devatābhedam |

dayamānaṃ vīkṣya muhurvayamānandāmṛtāmbudhau magnāḥ ||29||

kutukajuṣi kāñcideśe kumudataporāśipākaśekharite |

kurute manovihāraṃ kulagiriparibṛḍhakulaikamaṇidīpe ||30||

vīkṣemahi kāñcipure vipulastanakalaśagarimaparavaśitam |

vidrumasahacaradehaṃ vibhramasamavāyasārasannāham ||31||

kuruvindagotragātraṃ kūlacaraṃ kamapi naumi kampāyāḥ |

kūlaṅkaṣakucakumbhaṃ kusumāyudhavīryasārasaṃrambham ||32||

kuḍūmalitakucakiśoraiḥ kurvāṇaiḥ kāñcideśasauhārdam |

kuṅkumaśoṇairnicitaṃ kuśalapathaṃ śambhusukṛtasambhāraiḥ ||33||

aṅkitakacena kenacidandhaṅkaraṇauṣadhena kamalānām |

antaḥpureṇa śambhoralaṅkriyā kā'pi kalpyate kāñcyām ||34||

ūrīkaromi santatamūṣmalaphālena lalitaṃ puṃsā |

upakampamucitakhelanamurvīdharavaṃśasampadunmeṣam ||35||

aṅkuritastanakorakamaṅkālaṅkāramekacūtapateḥ |

ālokemahi komalamāgamasaṃlāpasārayāthārthyam ||36||

puñjitakaruṇamudañcitaśiñjitamaṇikāñci kimapi kāñcipure |

mañjaritamṛdulahāsaṃ piñjaratanuruci pinākimūladhanam ||37||

lolahṛdayo'sti śambhorlocanayugalena lehyamānāyām |

lalitaparamaśivāyāṃ lāvaṇyāmṛtataraṅgamālāyām ||38||

madhukarasahacaracikurairmadanāgamasamayadīkṣitakaṭākṣaiḥ |

maṇḍitakampātīrairmaṅgalakandairmamāstu sārūpyam ||39||

vadanāravindavakṣovāmāṅkataṭīvaśaṃvadībhūtā |

pūruṣatritaye tredhā purandhrirūpā tvameva kāmākṣi ||40||

bādhākarīṃ bhavābdherādhārādyambujeṣu vicarantīm |

ādhārīkṛtakāñcī bodhāmṛtavīcimeva vimṛśāmaḥ ||41||

kalayāmyantaḥ śaśadharakalayā'ṅkitamaulimamalacidvalayām |

alayāmāgamapīṭhīnilayāṃ valayāṅkasundarīmambām ||42||

śarvādiparamasādhakagurvānītāya kāmapīṭhajuṣe |

sarvākṛtaye śoṇimagarvāyāsmai samarpyate hṛdayam ||43||

samayā sāndhyamayūkhaiḥ samayā buddhayā sadaiva śīlitayā |

umayā kāñcīratayā na mayā labhyate kiṃ nu tādātmyam ||44||

jantostava padapūjanasantoṣataraṅgitasya kāmākṣi |

vandho yadi bhavati punaḥ sindhorambhassu bambhramīti śilā ||45||

kuṇḍali kumāri kuṭile caṇḍi carācarasavitri cāmuṇḍe |

guṇini guhāriṇi guhye gurumūrte tvāṃ namāmi kāmākṣi ||46||

abhidākṛtirbhidākṛtiracidākṛtirapi cidākṛtirmātaḥ |

anahantā tvamahantā bhramayasi kāmākṣi śāśvatī viśvam ||47||

śiva śiva paśyanti samaṃ śrīkāmākṣīkaṭākṣitāḥ puruṣāḥ |

vipinaṃ bhavanamamitraṃ mitraṃ loṣṭaṃ ca yuvatibimboṣṭham ||48||

kāmaparipanthikāmini kāmeśvari kāmapīṭhamadhyagate |

kāmadughā bhava kamale kāmakale kāmakoṭi kāmākṣi ||49||

madhyehṛdayaṃ madhyeniṭilaṃ madhyeśiro'pi vāstavyām |

caṇḍakaraśakrakārmukacandrasamābhāṃ namāmi kāmākṣīm ||50||

adhikāñci kelilolairakhilāgamayantratantramayaiḥ |

atiśītaṃ mama mānasamasamaśaradrohijīvanopāyaiḥ ||51||

nandati mama hṛdi kācana mandirayantī nirantaraṃ kāñcīm |

induravimaṇḍalakucā binduviyannādapariṇatā taruṇī ||52||

śampālatāsavarṇaṃ sampādayituṃ bhavajvaracikitsām |

limpāmi manasi kiñcana kampātaṭarohi siddhabhaiṣajyam ||53||

anumitakucakāṭhinyāmadhivakṣaḥpīṭhamaṅgajanmaripoḥ |

ānandadāṃ bhaje tāmānaṅgabrahmatatvabodhasirām ||54||

aikṣiṣi pāśāṅkuśadharahastāntaṃ vismayārhavṛttāntam |

adhikāñci nigamavācāṃ siddhāntaṃ śūlapāṇiśuddhāntam ||55||

āhitavilāsabhaṅgīmābrahmastambaśilpakalpanayā |

āśritakāñcīmatulāmādyāṃ visphūrtimādriye vidyām ||56||

mūko'pi jaṭiladurgatiśoko'pi smarati yaḥ kṣaṇaṃ bhavatīm |

eko bhavati sa janturlokottarakīrtireva kāmākṣi ||57||

pañcadaśavarṇarūpaṃ kañcana kāñcīvihāradhaureyam |

pañcaśarīyaṃ śambhorvañcanavaidagdhyamūlamavalambe ||58||

pariṇatimatīṃ caturdhā padavīṃ sudhiyāṃ sametya sauṣumnīm |

pañcāśadarṇakalpitamadaśilpāṃ tvāṃ namāmi kāmākṣi ||59||

ādikṣanmama gururāḍādikṣāntākṣarātmikāṃ vidyām |

svādiṣṭhacāpadaṇḍāṃ nediṣṭhāmeva kāmapīṭhagatām ||60||

tuṣyāmi harṣitasmaraśāsanayā kāñcipurakṛtāsanayā |

svāsanayā sakalajagadbhāsanayā kalitaśambarāsanayā ||61||

premavatī kampāyāṃ sthemavatī yatimanassu bhūmavatī |

sāmavatī nityagirā somavatī śirasi bhāti haimavatī ||62||

kautukinā kampāyāṃ kausumacāpena kīlitenāntaḥ |

kuladaivatena mahatā kuḍmalamudrāṃ dhunotu naḥpratibhā ||63||

yūnā kenāpi miladdehā svāhāsahāyatilakena |

sahakāramūladeśe saṃvidrūpā kuṭumbinī ramate ||64||

kusumaśaragarvasampatkośagṛhaṃ bhāti kāñcideśagatam |

sthāpitamasminkathamapi gopitamantarmayā manoratnam ||65||

dagdhaṣaḍadhvāraṇyaṃ daradalitakusumbhasambhṛtāruṇyam |

kalaye navatāruṇyaṃ kampātaṭasīmni kimapi kāruṇyam ||66||

adhikāñci vardhamānāmatulāṃ karavāṇi pāraṇāmakṣṇoḥ |

ānandapākabhedāmaruṇimapariṇāmagarvapallavitām ||67||

bāṇasṛṇipāśakārmukapāṇimamuṃ kamapi kāmapīṭhagatam |

eṇadharakoṇacūḍaṃ śoṇimaparipākabhedamākalaye ||68||

kiṃ vā phalati mamānyaurbimbādharacumbimandahāsamukhī |

sambādhakarī tamasāmambā jāgarti manasi kāmākṣī ||69||

mañce sadāśivamaye pariśivamayalalitapauṣpaparyaṅke |

adhicakramadhyamāste kāmākṣī nāma kimapi mama bhāgyam ||70||

rakṣyo'smi kāmapīṭhīlāsikayā ghanakṛpāmburāśikayā |

śrutiyuvatikuntalīmaṇimālikayā tuhinaśailabālikayā ||71||

līye puraharajāye māye tava taruṇapallavacchāye |

caraṇe candrābharaṇe kāñcīśaraṇe natārtisaṃharaṇe ||72||

mūrtimati muktibīje mūrdhni stabakitacakorasāmrājye |

moditakampākūle muhurmuhurmanasi mumudiṣā'smākam ||73||

vedamayīṃ nādamayīṃ bindumayīṃ parapadodyadindumayīm |

mantramayīṃ tantramayīṃ prakṛtimayīṃ naumi viśvavikṛtimayīm ||74||

puramathanapuṇyakoṭī puñjitakavilokasūktirasadhāṭī |

manasi mama kāmakoṭī viharatu karuṇāvipākaparipāṭī ||75||

kuṭilaṃ caṭulaṃ pṛthulaṃ mṛdulaṃ kacanayanajaghanacaraṇeṣu |

avalokitamavalambitamadhikampātaṭamameyamasmābhiḥ ||76||

pratyaṅmukhyā dṛṣṭayā prasādadīpāṅkureṇa kāmākṣyāḥ |

paśyāmi nistulamaho pacelimaṃ kamapi paraśivollāsam ||77||

vidye vidhātṛviṣaye kātyāyani kāli kāmakoṭikale |

bhārati bhairavi bhadre śākini śāmbhavi śive stuve bhavatīm ||78||

mālini maheśacālini kāñcīkhelini vipakṣakālini te |

śūlini vidrumaśālini surajanapālini kapālini namo'stu ||79||

deśika iti kiṃ śaṅke tattādṛktava nu taruṇimonmeṣaḥ |

kāmākṣi śūlapāṇeḥ kāmāgamasamayadīkṣāyām ||80||

vetaṇḍakumbhaḍambaravaitaṇḍikakucabharārtamadhyāya |

kuṅkumaruce namasyāṃ śaṅkaranayanāmṛtāya racayāmaḥ ||81||

adhikāñcitamaṇikāñcanakāñcīmadhikāñci kāñcidadrākṣam |

avanatajanānukampāmanukampākūlamasmadanukūlām ||82||

paricitakampātīraṃ parvatarājanyasukṛtasannāham |

paragurukṛpayā vīkṣe paramaśivotsaṅgamaṅgalābharaṇam ||83||

dagdhamadanasya śambhoḥ prathīyasīṃ brahmacaryavaidagdhīm |

tava devi taruṇimaśrīcaturimapāko na cakṣame mātaḥ ||84||

madajalatamālapatrā vasanitapatrā karādṛtakhānitrā |

viharati pulindayoṣā guñjābhūṣā phaṇīndrakṛtaveṣā ||85||

aṅke śukinī gīte kautukinī parisare ca gāyakinī |

jayasi savidhe'mba bhairavamaṇḍalinī śravasi śaṅkhakunḍalinī ||86||

praṇatajanatāpavargā kṛtabahusargā sasiṃhasaṃsargā |

kāmākṣi muditabhargā hataripuvargā tvameva sā durgā ||87||

śravaṇacaladvetaṇḍā samaroddaṇḍā dhutāsuraśikhaṇḍā |

devi kalitāntraṣaṇḍā dhṛtanaramuṇḍā tvameva cāmuṇḍā ||88||

urvīdharendrakanye darvībharitena bhaktapūreṇa |

gurvīmakiñcanārti kharvīkuruṣe tvameva kāmākṣi ||89||

tāḍitaripuparipīḍanabhayaharaṇa nipuṇahalamusalā |

kroḍapatibhīṣaṇamukhī krīḍasi jagati tvameva kāmākṣi ||90||

smaramathanavaraṇalolā manmathahelāvilāsamaṇiśālā |

kanakarucicauryaśīlā tvamamba bālā karābjadhṛtamālā ||91||

vimalapaṭī kamalakuṭī pustakarudrākṣaśastahastapuṭī |

kāmākṣi pakṣmalākṣī kalitavipañcī vibhāsi vairiñcī ||92||

kuṅkumarucipiṅgamasṛkpaṅkilamuṇḍālimaṇḍitaṃ mātaḥ |

śrīkāmākṣi tadīyasaṅgamakalāmandībhavatkautukaḥ

jayati tava rūpadheyaṃ japapaṭapustakavarābhayakarābjam ||93||

kanakamaṇikalitabhūṣāṃ kālāyasakalahaśīlakāntikalām |

kāmākṣi śīlaye tvāṃ kapālaśūlābhirāmakarakamalām ||94||

lohitimapuñjamadhye mohitabhuvane mudā nirīkṣante |

vadanaṃ tava kuvayugalaṃ kāñcīsīmāṃ ca ke'pi kāmākṣi ||95||

jaladhidviguṇitahutabahadiśādineśvarakalāśvineyadalaiḥ |

nalinairmaheśi gacchasi sarvottarakarakamaladalamamalam ||96||

satkṛtadeśikacaraṇāḥ sabījanirbījayoganiśreṇyā |

apavargasaudhavalabhīmārohantyamba ke'pi tava kṛpayā ||97||

antarapi bahirapi tvaṃ jantutaterantakāntakṛdahante |

cintitasantānavatāṃ santatamapi tantanīṣi mahimānam ||98||

kalamañjulavāganumitagalapañjaragataśukagrahautkaṇṭhyāt |

amba radanāmbaraṃ te bimbaphalaṃ śambarāriṇā nyastam ||99||

jaya jaya jagadamba śive jaya jaya kāmākṣi jaya jayādrisute |

jaya jaya maheśadayite jaya jaya cidgaganakaumudīdhāre ||100||

āryāśatakaṃ bhaktyā paṭhatāmāryākaṭākṣeṇa |

nissarati vadanakamalādvāṇī pīyūṣadhoraṇī divyā ||101||

|| iti āryāśatakaṃ sampūrṇam ||