📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌲𑌘𑍁 𑌸𑍍𑌤𑌵𑌃
Laghu Stavah
Grantha
𑌐𑌨𑍍𑌦𑍍𑌰𑌸𑍍𑌯𑍇𑌵 𑌶𑌰𑌾𑌸𑌨𑌸𑍍𑌯 𑌦𑌧𑌤𑍀 𑌮𑌧𑍍𑌯𑍇𑌲𑌲𑌾𑌟𑌂 𑌪𑍍𑌰𑌭𑌾𑌂
𑌶𑍗𑌕𑍍𑌲𑍀𑌂 𑌕𑌾𑌨𑍍𑌤𑌿𑌮𑌨𑍁𑌷𑍍𑌣𑌗𑍋𑌰𑌿𑌵 𑌶𑌿𑌰𑌸𑍍𑌯𑌾𑌤𑌨𑍍𑌵𑌤𑍀 𑌸𑌰𑍍𑌵𑌤𑌃 ।
𑌏𑌷𑌾𑌸𑍗 𑌤𑍍𑌰𑌿𑌪𑍁𑌰𑌾 𑌹𑍃𑌦𑌿 𑌦𑍍𑌯𑍁𑌤𑌿𑌰𑌿𑌵𑍋𑌷𑍍𑌣𑌾𑌂𑌶𑍋𑌃 𑌸𑌦𑌾𑌹𑌃 𑌸𑍍𑌥𑌿𑌤𑌾𑌤𑍍
𑌛𑌿𑌨𑍍𑌦𑍍𑌯𑌾𑌨𑍍𑌨𑌃 𑌸𑌹𑌸𑌾 𑌪𑌦𑍈𑌸𑍍𑌤𑍍𑌰𑌿𑌭𑌿𑌰𑌘𑌂 𑌜𑍍𑌯𑍋𑌤𑌿𑌰𑍍𑌮𑌯𑍀 𑌵𑌾𑌙𑍍𑌮𑌯𑍀 ॥ 1 ॥
𑌯𑌾 𑌮𑌾𑌤𑍍𑌰𑌾 𑌤𑍍𑌰𑌪𑍁𑌸𑍀𑌲𑌤𑌾𑌤𑌨𑍁𑌲𑌸𑌤𑍍𑌤𑌨𑍍𑌤𑍂𑌤𑍍𑌥𑌿𑌤𑌿𑌸𑍍𑌪𑌰𑍍𑌧𑌿𑌨𑍀
𑌵𑌾𑌗𑍍𑌬𑍀𑌜𑍇 𑌪𑍍𑌰𑌥𑌮𑍇 𑌸𑍍𑌥𑌿𑌤𑌾 𑌤𑌵 𑌸𑌦𑌾 𑌤𑌾𑌂 𑌮𑌨𑍍𑌮𑌹𑍇 𑌤𑍇 𑌵𑌯𑌮𑍍 ।
𑌶𑌕𑍍𑌤𑌿𑌃 𑌕𑍁𑌣𑍍𑌡𑌲𑌿𑌨𑍀𑌤𑌿 𑌵𑌿𑌶𑍍𑌵𑌜𑌨𑌨𑌵𑍍𑌯𑌾𑌪𑌾𑌰𑌬𑌦𑍍𑌧𑍋𑌦𑍍𑌯𑌮𑌾𑌃
𑌜𑍍𑌞𑌾𑌤𑍍𑌵𑍇𑌤𑍍𑌥𑌂 𑌨 𑌪𑍁𑌨𑌃 𑌸𑍍𑌪𑍃𑌶𑌨𑍍𑌤𑌿 𑌜𑌨𑌨𑍀𑌗𑌰𑍍𑌭𑍇𑌽𑌰𑍍𑌭𑌕𑌤𑍍𑌵𑌂 𑌨𑌰𑌾𑌃 ॥ 2 ॥
𑌦𑍃𑌷𑍍𑌟𑍍𑌵𑌾 𑌸𑌮𑍍𑌭𑍍𑌰𑌮𑌕𑌾𑌰𑌿 𑌵𑌸𑍍𑌤𑍁 𑌸𑌹𑌸𑌾 𑌐 𑌐 𑌇𑌤𑌿 𑌵𑍍𑌯𑌾𑌹𑍃𑌤𑌂
𑌯𑍇𑌨𑌾𑌕𑍂𑌤𑌵𑌶𑌾𑌦𑌪𑍀𑌹 𑌵𑌰𑌦𑍇 𑌬𑌿𑌨𑍍𑌦𑍁𑌂 𑌵𑌿𑌨𑌾𑌪𑍍𑌯𑌕𑍍𑌷𑌰𑌮𑍍 ।
𑌤𑌸𑍍𑌯𑌾𑌪𑌿 𑌧𑍍𑌰𑍁𑌵𑌮𑍇𑌵 𑌦𑍇𑌵𑌿 𑌤𑌰𑌸𑌾 𑌜𑌾𑌤𑍇 𑌤𑌵𑌾𑌨𑍁𑌗𑍍𑌰𑌹𑍇
𑌵𑌾𑌚𑌃𑌸𑍂𑌕𑍍𑌤𑌿𑌸𑍁𑌧𑌾𑌰𑌸𑌦𑍍𑌰𑌵𑌮𑍁𑌚𑍋 𑌨𑌿𑌰𑍍𑌯𑌾𑌨𑍍𑌤𑌿 𑌵𑌕𑍍𑌤𑍍𑌰𑌾𑌮𑍍𑌬𑍁𑌜𑌾𑌤𑍍 ॥ 3 ॥
𑌯𑌨𑍍𑌨𑌿𑌤𑍍𑌯𑍇 𑌤𑌵 𑌕𑌾𑌮𑌰𑌾𑌜𑌮𑌪𑌰𑌂 𑌮𑌨𑍍𑌤𑍍𑌰𑌾𑌕𑍍𑌷𑌰𑌂 𑌨𑌿𑌷𑍍𑌕𑌲𑌂
𑌤𑌤𑍍𑌸𑌾𑌰𑌸𑍍𑌵𑌤𑌮𑌿𑌤𑍍𑌯𑌵𑍈𑌤𑌿 𑌵𑌿𑌰𑌲𑌃 𑌕𑌶𑍍𑌚𑌿𑌦𑍍𑌬𑍁𑌧𑌶𑍍𑌚𑍇𑌦𑍍𑌭𑍁𑌵𑌿 ।
𑌆𑌖𑍍𑌯𑌾𑌨𑌂 𑌪𑍍𑌰𑌤𑌿𑌪𑌰𑍍𑌵 𑌸𑌤𑍍𑌯𑌤𑌪𑌸𑍋 𑌯𑌤𑍍𑌕𑍀𑌰𑍍𑌤𑌯𑌨𑍍𑌤𑍋 𑌦𑍍𑌵𑌿𑌜𑌾𑌃
𑌪𑍍𑌰𑌾𑌰𑌮𑍍𑌭𑍇 𑌪𑍍𑌰𑌣𑌵𑌾𑌸𑍍𑌪𑌦𑌪𑍍𑌰𑌣𑌯𑌿𑌤𑌾𑌂 𑌨𑍀𑌤𑍍𑌵𑍋𑌚𑍍𑌚𑌰𑌨𑍍𑌤𑌿 𑌸𑍍𑌫𑍁𑌟𑌮𑍍 ॥ 4 ॥
𑌯𑌤𑍍𑌸𑌦𑍍𑌯𑍋 𑌵𑌚𑌸𑌾𑌂 𑌪𑍍𑌰𑌵𑍃𑌤𑍍𑌤𑌿𑌕𑌰𑌣𑍇 𑌦𑍃𑌷𑍍𑌟𑌪𑍍𑌰𑌭𑌾𑌵𑌂 𑌬𑍁𑌧𑍈𑌃
𑌤𑌾𑌰𑍍𑌤𑍀𑌯𑌂 𑌤𑌦𑌹𑌂 𑌨𑌮𑌾𑌮𑌿 𑌮𑌨𑌸𑌾 𑌤𑍍𑌵𑌦𑍍𑌬𑍀𑌜𑌮𑌿𑌨𑍍𑌦𑍁𑌪𑍍𑌰𑌭𑌮𑍍 ।
𑌅𑌸𑍍𑌤𑍍𑌯𑍗𑌰𑍍𑌵𑍋𑌽𑌪𑌿 𑌸𑌰𑌸𑍍𑌵𑌤𑍀𑌮𑌨𑍁𑌗𑌤𑍋 𑌜𑌾𑌡𑍍𑌯𑌾𑌮𑍍𑌬𑍁𑌵𑌿𑌚𑍍𑌛𑌿𑌤𑍍𑌤𑌯𑍇
𑌗𑍋𑌶𑌬𑍍𑌦𑍋 𑌗𑌿𑌰𑌿 𑌵𑌰𑍍𑌤𑌤𑍇 𑌸𑌨𑌿𑌯𑌤𑌂 𑌯𑍋𑌗𑌂 𑌵𑌿𑌨𑌾 𑌸𑌿𑌦𑍍𑌧𑌿𑌦𑌃 ॥ 5 ॥
𑌏𑌕𑍈𑌕𑌂 𑌤𑌵 𑌦𑍇𑌵𑌿 𑌬𑍀𑌜𑌮𑌨𑌘𑌂 𑌸𑌵𑍍𑌯𑌞𑍍𑌜𑌨𑌾𑌵𑍍𑌯𑌞𑍍𑌜𑌨𑌂
𑌕𑍂𑌟𑌸𑍍𑌥𑌂 𑌯𑌦𑌿 𑌵𑌾 𑌪𑍃𑌥𑌕𑍍 𑌕𑍍𑌰𑌮𑌗𑌤𑌂 𑌯𑌦𑍍𑌵𑌾 𑌸𑍍𑌥𑌿𑌤𑌂 𑌵𑍍𑌯𑍁𑌤𑍍𑌕𑍍𑌰𑌮𑌾𑌤𑍍 ।
𑌯𑌂 𑌯𑌂 𑌕𑌾𑌮𑌮𑌪𑍇𑌕𑍍𑌷𑍍𑌯 𑌯𑍇𑌨 𑌵𑌿𑌧𑌿𑌨𑌾 𑌕𑍇𑌨𑌾𑌪𑌿 𑌵𑌾 𑌚𑌿𑌨𑍍𑌤𑌿𑌤𑌂
𑌜𑌪𑍍𑌤𑌂 𑌵𑌾 𑌸𑌫𑌲𑍀𑌕𑌰𑍋𑌤𑌿 𑌸𑌤𑌤𑌂 𑌤𑌂 𑌤𑌂 𑌸𑌮𑌸𑍍𑌤𑌂 𑌨𑍃𑌣𑌾𑌮𑍍 ॥ 6 ॥
𑌵𑌾𑌮𑍇 𑌪𑍁𑌸𑍍𑌤𑌕𑌧𑌾𑌰𑌿𑌣𑍀𑌮𑌭𑌯𑌦𑌾𑌂 𑌸𑌾𑌕𑍍𑌷𑌸𑍍𑌰𑌜𑌂 𑌦𑌕𑍍𑌷𑌿𑌣𑍇
𑌭𑌕𑍍𑌤𑍇𑌭𑍍𑌯𑍋 𑌵𑌰𑌦𑌾𑌨𑌪𑍇𑌶𑌲𑌕𑌰𑌾𑌂 𑌕𑌰𑍍𑌪𑍂𑌰𑌕𑍁𑌨𑍍𑌦𑍋𑌜𑍍𑌜𑍍𑌵𑌲𑌾𑌮𑍍 ।
𑌉𑌜𑍍𑌜𑍃𑌮𑍍𑌭𑌾𑌮𑍍𑌬𑍁𑌜𑌪𑌤𑍍𑌰𑌕𑌾𑌨𑍍𑌤𑌿𑌨𑌯𑌨𑌸𑍍𑌨𑌿𑌗𑍍𑌧𑌪𑍍𑌰𑌭𑌾𑌲𑍋𑌕𑌿𑌨𑍀𑌂
𑌯𑍇 𑌤𑍍𑌵𑌾𑌮𑌮𑍍𑌬 𑌨 𑌶𑍀𑌲𑌯𑌨𑍍𑌤𑌿 𑌮𑌨𑌸𑌾 𑌤𑍇𑌷𑌾𑌂 𑌕𑌵𑌿𑌤𑍍𑌵𑌂 𑌕𑍁𑌤𑌃 ॥ 7 ॥
𑌯𑍇 𑌤𑍍𑌵𑌾𑌂 𑌪𑌾𑌣𑍍𑌡𑍁𑌰𑌪𑍁𑌣𑍍𑌡𑌰𑍀𑌕𑌪𑌟𑌲𑌸𑍍𑌪𑌷𑍍𑌟𑌾𑌭𑌿𑌰𑌾𑌮𑌪𑍍𑌰𑌭𑌾𑌂
𑌸𑌿𑌞𑍍𑌚𑌨𑍍𑌤𑍀𑌮𑌮𑍃𑌤𑌦𑍍𑌰𑌵𑍈𑌰𑌿𑌵 𑌶𑌿𑌰𑍋 𑌧𑍍𑌯𑌾𑌯𑌨𑍍𑌤𑌿 𑌮𑍂𑌰𑍍𑌧𑍍𑌨𑌿 𑌸𑍍𑌥𑌿𑌤𑌾𑌮𑍍 ।
𑌅𑌶𑍍𑌰𑌾𑌨𑍍𑌤𑌾 𑌵𑌿𑌕𑌟𑌸𑍍𑌫𑍁𑌟𑌾𑌕𑍍𑌷𑌰𑌪𑌦𑌾 𑌨𑌿𑌰𑍍𑌯𑌾𑌤𑌿 𑌵𑌕𑍍𑌤𑍍𑌰𑌾𑌮𑍍𑌬𑍁𑌜𑌾𑌤𑍍
𑌤𑍇𑌷𑌾𑌂 𑌭𑌾𑌰𑌤𑌿 𑌭𑌾𑌰𑌤𑍀 𑌸𑍁𑌰𑌸𑌰𑌿𑌤𑍍𑌕𑌲𑍍𑌲𑍋𑌲𑌲𑍋𑌲𑍋𑌰𑍍𑌮𑌿𑌵𑌤𑍍 ॥ 8 ॥
𑌯𑍇 𑌸𑌿𑌨𑍍𑌦𑍂𑌰𑌪𑌰𑌾𑌗𑌪𑌿𑌞𑍍𑌜𑌪𑌿𑌹𑌿𑌤𑌾𑌂 𑌤𑍍𑌵𑌤𑍍𑌤𑍇𑌜𑌸𑌾𑌦𑍍𑌯𑌾𑌮𑌿𑌮𑌾𑌂
𑌉𑌰𑍍𑌵𑍀𑌂 𑌚𑌾𑌪𑌿 𑌵𑌿𑌲𑍀𑌨𑌯𑌾𑌵𑌕𑌰𑌸𑌪𑍍𑌰𑌸𑍍𑌤𑌾𑌰𑌮𑌗𑍍𑌨𑌾𑌮𑌿𑌵 ।
𑌪𑌶𑍍𑌯𑌨𑍍𑌤𑌿 𑌕𑍍𑌷𑌣𑌮𑌪𑍍𑌯𑌨𑌨𑍍𑌯𑌮𑌨𑌸𑌸𑍍𑌤𑍇𑌷𑌾𑌮𑌨𑌙𑍍𑌗𑌜𑍍𑌵𑌰-
-𑌕𑍍𑌲𑌾𑌨𑍍𑌤𑌸𑍍𑌰𑌸𑍍𑌤𑌕𑍁𑌰𑌙𑍍𑌗𑌶𑌾𑌬𑌕𑌦𑍃𑌶𑍋 𑌵𑌶𑍍𑌯𑌾 𑌭𑌵𑌨𑍍𑌤𑌿 𑌸𑍍𑌫𑍁𑌟𑌮𑍍 ॥ 9 ॥
𑌚𑌞𑍍𑌚𑌤𑍍𑌕𑌾𑌞𑍍𑌚𑌨𑌕𑍁𑌣𑍍𑌡𑌲𑌾𑌙𑍍𑌗𑌦𑌧𑌰𑌾𑌮𑌾𑌬𑌦𑍍𑌧𑌕𑌾𑌞𑍍𑌚𑍀𑌸𑍍𑌰𑌜𑌂
𑌯𑍇 𑌤𑍍𑌵𑌾𑌂 𑌚𑍇𑌤𑌸𑌿 𑌤𑌦𑍍𑌗𑌤𑍇 𑌕𑍍𑌷𑌣𑌮𑌪𑌿 𑌧𑍍𑌯𑌾𑌯𑌨𑍍𑌤𑌿 𑌕𑍃𑌤𑍍𑌵𑌾 𑌸𑍍𑌥𑌿𑌰𑌾𑌮𑍍 ।
𑌤𑍇𑌷𑌾𑌂 𑌵𑍇𑌶𑍍𑌮𑌸𑍁 𑌵𑌿𑌭𑍍𑌰𑌮𑌾𑌦𑌹𑌰𑌹𑌃 𑌸𑍍𑌫𑌾𑌰𑍀𑌭𑌵𑌨𑍍𑌤𑍍𑌯𑌶𑍍𑌚𑌿𑌰𑌂
𑌮𑌾𑌦𑍍𑌯𑌤𑍍𑌕𑍁𑌞𑍍𑌜𑌰𑌕𑌰𑍍𑌣𑌤𑌾𑌲𑌤𑌰𑌲𑌾𑌃 𑌸𑍍𑌥𑍈𑌰𑍍𑌯𑌂 𑌭𑌜𑌨𑍍𑌤𑍇 𑌶𑍍𑌰𑌿𑌯𑌃 ॥ 10 ॥
𑌆𑌰𑍍𑌭𑌟𑍍𑌯𑌾 𑌶𑌶𑌿𑌖𑌣𑍍𑌡𑌮𑌣𑍍𑌡𑌿𑌤𑌜𑌟𑌾𑌜𑍂𑌟𑌾𑌂 𑌨𑍃𑌮𑍁𑌣𑍍𑌡𑌸𑍍𑌰𑌜𑌂
𑌬𑌨𑍍𑌧𑍂𑌕𑌪𑍍𑌰𑌸𑌵𑌾𑌰𑍁𑌣𑌾𑌮𑍍𑌬𑌰𑌧𑌰𑌾𑌂 𑌪𑍍𑌰𑍇𑌤𑌾𑌸𑌨𑌾𑌧𑍍𑌯𑌾𑌸𑌿𑌨𑍀𑌮𑍍 ।
𑌤𑍍𑌵𑌾𑌂 𑌧𑍍𑌯𑌾𑌯𑌨𑍍𑌤𑌿 𑌚𑌤𑍁𑌰𑍍𑌭𑍁𑌜𑌾𑌂 𑌤𑍍𑌰𑌿𑌨𑌯𑌨𑌾𑌮𑌾𑌪𑍀𑌨𑌤𑍁𑌙𑍍𑌗𑌸𑍍𑌤𑌨𑍀𑌂
𑌮𑌧𑍍𑌯𑍇 𑌨𑌿𑌮𑍍𑌨𑌵𑌲𑌿𑌤𑍍𑌰𑌯𑌾𑌙𑍍𑌕𑌿𑌤𑌤𑌨𑍁𑌂 𑌤𑍍𑌵𑌦𑍍𑌰𑍂𑌪𑌸𑌂𑌵𑌿𑌤𑍍𑌤𑌯𑍇 ॥ 11 ॥
𑌜𑌾𑌤𑍋𑌽𑌪𑍍𑌯𑌲𑍍𑌪𑌪𑌰𑌿𑌚𑍍𑌛𑌦𑍇 𑌕𑍍𑌷𑌿𑌤𑌿𑌭𑍁𑌜𑌾𑌂 𑌸𑌾𑌮𑌾𑌨𑍍𑌯𑌮𑌾𑌤𑍍𑌰𑍇 𑌕𑍁𑌲𑍇
𑌨𑌿𑌃𑌶𑍇𑌷𑌾𑌵𑌨𑌿𑌚𑌕𑍍𑌰𑌵𑌰𑍍𑌤𑌿𑌪𑌦𑌵𑍀𑌂 𑌲𑌬𑍍𑌧𑍍𑌵𑌾 𑌪𑍍𑌰𑌤𑌾𑌪𑍋𑌨𑍍𑌨𑌤𑌃 ।
𑌯𑌦𑍍𑌵𑌿𑌦𑍍𑌯𑌾𑌧𑌰 𑌬𑍃𑌨𑍍𑌦𑌵𑌨𑍍𑌦𑌿𑌤𑌪𑌦𑌃 𑌶𑍍𑌰𑍀𑌵𑌤𑍍𑌸𑌰𑌾𑌜𑍋𑌽𑌭𑌵𑌤𑍍
𑌦𑍇𑌵𑌿 𑌤𑍍𑌵𑌚𑍍𑌚𑌰𑌣𑌾𑌮𑍍𑌬𑍁𑌜 𑌪𑍍𑌰𑌣𑌤𑌿𑌜𑌃 𑌸𑍋𑌽𑌯𑌂 𑌪𑍍𑌰𑌸𑌾𑌦𑍋𑌦𑌯𑌃 ॥ 12 ॥
𑌚𑌣𑍍𑌡𑌿 𑌤𑍍𑌵𑌚𑍍𑌚𑌰𑌣𑌾𑌮𑍍𑌬𑍁𑌜𑌾𑌰𑍍𑌚𑌨𑌕𑍃𑌤𑍇 𑌬𑌿𑌲𑍍𑌵𑌾𑌦𑌿𑌲𑍋𑌲𑍍𑌲𑍁𑌣𑍍𑌠𑌨-
-𑌤𑍍𑌰𑍁𑌟𑍍𑌯𑌤𑍍𑌕𑌣𑍍𑌟𑌕𑌕𑍋𑌟𑌿𑌭𑌿𑌃 𑌪𑌰𑌿𑌚𑌯𑌂 𑌯𑍇𑌷𑌾𑌂 𑌨 𑌜𑌗𑍍𑌮𑍁𑌃 𑌕𑌰𑌾𑌃 ।
𑌤𑍇 𑌦𑌣𑍍𑌡𑌾𑌙𑍍𑌕𑍁𑌶𑌚𑌕𑍍𑌰𑌚𑌾𑌪𑌕𑍁𑌲𑌿𑌶𑌶𑍍𑌰𑍀𑌵𑌤𑍍𑌸𑌮𑌤𑍍𑌸𑍍𑌯𑌾𑌙𑍍𑌕𑌿𑌤𑍈𑌃
𑌜𑌾𑌯𑌨𑍍𑌤𑍇 𑌪𑍃𑌥𑌿𑌵𑍀𑌭𑍁𑌜𑌃 𑌕𑌥𑌮𑌿𑌵𑌾𑌮𑍍𑌭𑍋𑌜𑌪𑍍𑌰𑌭𑍈𑌃 𑌪𑌾𑌣𑌿𑌭𑌿𑌃 ॥ 13 ॥
𑌵𑌿𑌪𑍍𑌰𑌾𑌃 𑌕𑍍𑌷𑍋𑌣𑌿𑌭𑍁𑌜𑍋 𑌵𑌿𑌶𑌸𑍍𑌤𑌦𑌿𑌤𑌰𑍇 𑌕𑍍𑌷𑍀𑌰𑌾𑌜𑍍𑌯𑌮𑌧𑍍𑌵𑌾𑌸𑌵𑍈𑌃 ।
𑌤𑍍𑌵𑌾𑌂 𑌦𑍇𑌵𑌿 𑌤𑍍𑌰𑌿𑌪𑍁𑌰𑍇 𑌪𑌰𑌾𑌪𑌰𑌮𑌯𑍀𑌂 𑌸𑌨𑍍𑌤𑌰𑍍𑌪𑍍𑌯 𑌪𑍂𑌜𑌾𑌵𑌿𑌧𑍗 ।
𑌯𑌾𑌂 𑌯𑌾𑌂 𑌪𑍍𑌰𑌾𑌰𑍍𑌥𑌯𑌤𑍇 𑌮𑌨𑌃 𑌸𑍍𑌥𑌿𑌰𑌧𑌿𑌯𑌾𑌂 𑌤𑍇𑌷𑌾𑌂 𑌤 𑌏𑌵 𑌧𑍍𑌰𑍁𑌵𑌂
𑌤𑌾𑌂 𑌤𑌾𑌂 𑌸𑌿𑌦𑍍𑌧𑌿𑌮𑌵𑌾𑌪𑍍𑌨𑍁𑌵𑌨𑍍𑌤𑌿 𑌤𑌰𑌸𑌾 𑌵𑌿𑌘𑍍𑌨𑍈𑌰𑌵𑌿𑌘𑍍𑌨𑍀𑌕𑍃𑌤𑌾𑌃 ॥ 14 ॥
𑌶𑌬𑍍𑌦𑌾𑌨𑌾𑌂 𑌜𑌨𑌨𑍀 𑌤𑍍𑌵𑌮𑌤𑍍𑌰 𑌭𑍁𑌵𑌨𑍇 𑌵𑌾𑌗𑍍𑌵𑌾𑌦𑌿𑌨𑍀𑌤𑍍𑌯𑍁𑌚𑍍𑌯𑌸𑍇
𑌤𑍍𑌵𑌤𑍍𑌤𑌃 𑌕𑍇𑌶𑌵𑌵𑌾𑌸𑌵 𑌪𑍍𑌰𑌭𑍃𑌤𑌯𑍋𑌽𑌪𑍍𑌯𑌾𑌵𑌿𑌰𑍍𑌭𑌵𑌨𑍍𑌤𑌿 𑌸𑍍𑌫𑍁𑌟𑌮𑍍 ।
𑌲𑍀𑌯𑌨𑍍𑌤𑍇 𑌖𑌲𑍁 𑌯𑌤𑍍𑌰 𑌕𑌲𑍍𑌪𑌵𑌿𑌰𑌮𑍇 𑌬𑍍𑌰𑌹𑍍𑌮𑌾𑌦𑌯𑌸𑍍𑌤𑍇𑌽𑌪𑍍𑌯𑌮𑍀
𑌸𑌾 𑌤𑍍𑌵𑌂 𑌕𑌾𑌚𑌿𑌦𑌚𑌿𑌨𑍍𑌤𑍍𑌯𑌰𑍂𑌪𑌮𑌹𑌿𑌮𑌾 𑌶𑌕𑍍𑌤𑌿𑌃 𑌪𑌰𑌾 𑌗𑍀𑌯𑌸𑍇 ॥ 15 ॥
𑌦𑍇𑌵𑌾𑌨𑌾𑌂 𑌤𑍍𑌰𑌿𑌤𑌯𑌂 𑌤𑍍𑌰𑌯𑍀 𑌹𑍁𑌤𑌭𑍁𑌜𑌾𑌂 𑌶𑌕𑍍𑌤𑌿𑌤𑍍𑌰𑌯𑌂 𑌤𑍍𑌰𑌿𑌃 𑌸𑍍𑌵𑌰𑌾𑌃
𑌤𑍍𑌰𑍈𑌲𑍋𑌕𑍍𑌯𑌂 𑌤𑍍𑌰𑌿𑌪𑌦𑍀 𑌤𑍍𑌰𑌿𑌪𑍁𑌷𑍍𑌕𑌰𑌮𑌥𑍋 𑌤𑍍𑌰𑌿𑌬𑍍𑌰𑌹𑍍𑌮 𑌵𑌰𑍍𑌣𑌾𑌸𑍍𑌤𑍍𑌰𑌯𑌃 ।
𑌯𑌤𑍍𑌕𑌿𑌞𑍍𑌚𑌿𑌜𑍍𑌜𑌗𑌤𑌿 𑌤𑍍𑌰𑌿𑌧𑌾 𑌨𑌿𑌯𑌮𑌿𑌤𑌂 𑌵𑌸𑍍𑌤𑍁 𑌤𑍍𑌰𑌿𑌵𑌰𑍍𑌗𑌾𑌦𑌿𑌕𑌂
𑌤𑌤𑍍𑌸𑌰𑍍𑌵𑌂 𑌤𑍍𑌰𑌿𑌪𑍁𑌰𑍇𑌤𑌿 𑌨𑌾𑌮 𑌭𑌗𑌵𑌤𑍍𑌯𑌨𑍍𑌵𑍇𑌤𑌿 𑌤𑍇 𑌤𑌤𑍍𑌤𑍍𑌵𑌤𑌃 ॥ 16 ॥
𑌲𑌕𑍍𑌷𑍍𑌮𑍀𑌂 𑌰𑌾𑌜𑌕𑍁𑌲𑍇 𑌜𑌯𑌾𑌂 𑌰𑌣𑌭𑍁𑌵𑌿 𑌕𑍍𑌷𑍇𑌮𑌙𑍍𑌕𑌰𑍀𑌮𑌧𑍍𑌵𑌨𑌿
𑌕𑍍𑌰𑌵𑍍𑌯𑌾𑌦𑌦𑍍𑌵𑌿𑌪𑌸𑌰𑍍𑌪𑌭𑌾𑌜𑌿 𑌶𑌬𑌰𑍀𑌂 𑌕𑌾𑌨𑍍𑌤𑌾𑌰𑌦𑍁𑌰𑍍𑌗𑍇 𑌗𑌿𑌰𑍗 ।
𑌭𑍂𑌤𑌪𑍍𑌰𑍇𑌤𑌪𑌿𑌶𑌾𑌚𑌜𑌮𑍍𑌬𑍁𑌕𑌭𑌯𑍇 𑌸𑍍𑌮𑍃𑌤𑍍𑌵𑌾 𑌮𑌹𑌾𑌭𑍈𑌰𑌵𑍀𑌂
𑌵𑍍𑌯𑌾𑌮𑍋𑌹𑍇 𑌤𑍍𑌰𑌿𑌪𑍁𑌰𑌾𑌂 𑌤𑌰𑌨𑍍𑌤𑌿 𑌵𑌿𑌪𑌦𑌸𑍍𑌤𑌾𑌰𑌾𑌂 𑌚 𑌤𑍋𑌯𑌪𑍍𑌲𑌵𑍇 ॥ 17 ॥
𑌮𑌾𑌯𑌾 𑌕𑍁𑌣𑍍𑌡𑌲𑌿𑌨𑍀 𑌕𑍍𑌰𑌿𑌯𑌾 𑌮𑌧𑍁𑌮𑌤𑍀 𑌕𑌾𑌲𑍀 𑌕𑌲𑌾𑌮𑌾𑌲𑌿𑌨𑍀
𑌮𑌾𑌤𑌙𑍍𑌗𑍀 𑌵𑌿𑌜𑌯𑌾 𑌜𑌯𑌾 𑌭𑌗𑌵𑌤𑍀 𑌦𑍇𑌵𑍀 𑌶𑌿𑌵𑌾 𑌶𑌾𑌮𑍍𑌭𑌵𑍀 ।
𑌶𑌕𑍍𑌤𑌿𑌃 𑌶𑌙𑍍𑌕𑌰𑌵𑌲𑍍𑌲𑌭𑌾 𑌤𑍍𑌰𑌿𑌨𑌯𑌨𑌾 𑌵𑌾𑌗𑍍𑌵𑌾𑌦𑌿𑌨𑍀 𑌭𑍈𑌰𑌵𑍀
𑌹𑍍𑌰𑍀𑌙𑍍𑌕𑌾𑌰𑍀 𑌤𑍍𑌰𑌿𑌪𑍁𑌰𑌾 𑌪𑌰𑌾𑌪𑌰𑌮𑌯𑍀 𑌮𑌾𑌤𑌾 𑌕𑍁𑌮𑌾𑌰𑍀𑌤𑍍𑌯𑌸𑌿 ॥ 18 ॥
𑌆𑌈𑌪𑌲𑍍𑌲𑌵𑌿𑌤𑍈𑌃 𑌪𑌰𑌸𑍍𑌪𑌰𑌯𑍁𑌤𑍈𑌰𑍍𑌦𑍍𑌵𑌿𑌤𑍍𑌰𑌿𑌕𑍍𑌰𑌮𑌾𑌦𑍍𑌯𑌕𑍍𑌷𑌰𑍈
𑌕𑌾𑌦𑍍𑌯𑍈𑌃 𑌕𑍍𑌷𑌾𑌨𑍍𑌤𑌗𑌤𑍈𑌃 𑌸𑍍𑌵𑌰𑌾𑌦𑌿𑌭𑌿𑌰𑌥 𑌕𑍍𑌷𑌾𑌨𑍍𑌤𑍈𑌶𑍍𑌚 𑌤𑍈𑌃 𑌸𑌸𑍍𑌵𑌰𑍈𑌃 ।
𑌨𑌾𑌮𑌾𑌨𑌿 𑌤𑍍𑌰𑌿𑌪𑍁𑌰𑍇 𑌭𑌵𑌨𑍍𑌤𑌿 𑌖𑌲𑍁 𑌯𑌾𑌨𑍍𑌯𑌤𑍍𑌯𑌨𑍍𑌤𑌗𑍁𑌹𑍍𑌯𑌾𑌨𑌿 𑌤𑍇
𑌤𑍇𑌭𑍍𑌯𑍋 𑌭𑍈𑌰𑌵𑌪𑌤𑍍𑌨𑌿 𑌵𑌿𑌂𑌶𑌤𑌿𑌸𑌹𑌸𑍍𑌰𑍇𑌭𑍍𑌯𑌃 𑌪𑌰𑍇𑌭𑍍𑌯𑍋 𑌨𑌮𑌃 ॥ 19 ॥
𑌬𑍋𑌦𑍍𑌧𑌵𑍍𑌯𑌾 𑌨𑌿𑌪𑍁𑌣𑌂 𑌬𑍁𑌧𑍈𑌃 𑌸𑍍𑌤𑍁𑌤𑌿𑌰𑌿𑌯𑌂 𑌕𑍃𑌤𑍍𑌵𑌾 𑌮𑌨𑌸𑍍𑌤𑌦𑍍𑌗𑌤𑌂
𑌭𑌾𑌰𑌤𑍍𑌯𑌾𑌸𑍍𑌤𑍍𑌰𑌿𑌪𑍁𑌰𑍇𑌤𑍍𑌯𑌨𑌨𑍍𑌯𑌮𑌨𑌸𑌾 𑌯𑌤𑍍𑌰𑌾𑌦𑍍𑌯𑌵𑍃𑌤𑍍𑌤𑍇 𑌸𑍍𑌫𑍁𑌟𑌮𑍍 ।
𑌏𑌕𑌦𑍍𑌵𑌿𑌤𑍍𑌰𑌿𑌪𑌦𑌕𑍍𑌰𑌮𑍇𑌣 𑌕𑌥𑌿𑌤𑌸𑍍𑌤𑌤𑍍𑌪𑌾𑌦𑌸𑌙𑍍𑌖𑍍𑌯𑌾𑌕𑍍𑌷𑌰𑍈𑌃
𑌮𑌨𑍍𑌤𑍍𑌰𑍋𑌦𑍍𑌧𑌾𑌰 𑌵𑌿𑌧𑌿𑌰𑍍𑌵𑌿𑌶𑍇𑌷𑌸𑌹𑌿𑌤𑌃 𑌸𑌤𑍍𑌸𑌮𑍍𑌪𑍍𑌰𑌦𑌾𑌯𑌾𑌨𑍍𑌵𑌿𑌤𑌃 ॥ 20 ॥
𑌸𑌾𑌵𑌦𑍍𑌯𑌂 𑌨𑌿𑌰𑌵𑌦𑍍𑌯𑌮𑌸𑍍𑌤𑍁 𑌯𑌦𑌿 𑌵𑌾 𑌕𑌿𑌂 𑌵𑌾𑌨𑌯𑌾 𑌚𑌿𑌨𑍍𑌤𑌯𑌾
𑌨𑍂𑌨𑌂 𑌸𑍍𑌤𑍋𑌤𑍍𑌰𑌮𑌿𑌦𑌂 𑌪𑌠𑌿𑌷𑍍𑌯𑌤𑌿 𑌜𑌨𑍋 𑌯𑌸𑍍𑌯𑌾𑌸𑍍𑌤𑌿 𑌭𑌕𑍍𑌤𑌿𑌸𑍍𑌤𑍍𑌵𑌯𑌿 ।
𑌸𑌞𑍍𑌚𑌿𑌨𑍍𑌤𑍍𑌯𑌾𑌪𑌿 𑌲𑌘𑍁𑌤𑍍𑌵𑌮𑌾𑌤𑍍𑌮𑌨𑌿 𑌦𑍃𑌢𑌂 𑌸𑌞𑍍𑌜𑌾𑌯𑌮𑌾𑌨𑌂 𑌹𑌠𑌾𑌤𑍍
𑌤𑍍𑌵𑌦𑍍𑌭𑌕𑍍𑌤𑍍𑌯𑌾 𑌮𑍁𑌖𑌰𑍀𑌕𑍃𑌤𑍇𑌨 𑌰𑌚𑌿𑌤𑌂 𑌯𑌸𑍍𑌮𑌾𑌨𑍍𑌮𑌯𑌾𑌪𑌿 𑌧𑍃𑌵𑌮𑍍 ॥ 21 ॥
𑌇𑌤𑌿 𑌶𑍍𑌰𑍀𑌕𑌾𑌲𑌿𑌦𑌾𑌸 𑌵𑌿𑌰𑌚𑌿𑌤 𑌪𑌞𑍍𑌚𑌸𑍍𑌤𑌵𑍍𑌯𑌾𑌂 𑌪𑍍𑌰𑌥𑌮𑌃 𑌲𑌘𑍁𑌸𑍍𑌤𑌵𑌃 ।
Roman (IAST) Transliteration
aindrasyeva śarāsanasya dadhatī madhyelalāṭaṃ prabhāṃ
śauklīṃ kāntimanuṣṇagoriva śirasyātanvatī sarvataḥ |
eṣāsau tripurā hṛdi dyutirivoṣṇāṃśoḥ sadāhaḥ sthitāt
chindyānnaḥ sahasā padaistribhiraghaṃ jyotirmayī vāṅmayī || 1 ||
yā mātrā trapusīlatātanulasattantūtthitispardhinī
vāgbīje prathame sthitā tava sadā tāṃ manmahe te vayam |
śaktiḥ kuṇḍalinīti viśvajananavyāpārabaddhodyamāḥ
jñātvetthaṃ na punaḥ spṛśanti jananīgarbhe'rbhakatvaṃ narāḥ || 2 ||
dṛṣṭvā sambhramakāri vastu sahasā ai ai iti vyāhṛtaṃ
yenākūtavaśādapīha varade binduṃ vināpyakṣaram |
tasyāpi dhruvameva devi tarasā jāte tavānugrahe
vācaḥsūktisudhārasadravamuco niryānti vaktrāmbujāt || 3 ||
yannitye tava kāmarājamaparaṃ mantrākṣaraṃ niṣkalaṃ
tatsārasvatamityavaiti viralaḥ kaścidbudhaścedbhuvi |
ākhyānaṃ pratiparva satyatapaso yatkīrtayanto dvijāḥ
prārambhe praṇavāspadapraṇayitāṃ nītvoccaranti sphuṭam || 4 ||
yatsadyo vacasāṃ pravṛttikaraṇe dṛṣṭaprabhāvaṃ budhaiḥ
tārtīyaṃ tadahaṃ namāmi manasā tvadbījaminduprabham |
astyaurvo'pi sarasvatīmanugato jāḍyāmbuvicchittaye
gośabdo giri vartate saniyataṃ yogaṃ vinā siddhidaḥ || 5 ||
ekaikaṃ tava devi bījamanaghaṃ savyañjanāvyañjanaṃ
kūṭasthaṃ yadi vā pṛthak kramagataṃ yadvā sthitaṃ vyutkramāt |
yaṃ yaṃ kāmamapekṣya yena vidhinā kenāpi vā cintitaṃ
japtaṃ vā saphalīkaroti satataṃ taṃ taṃ samastaṃ nṛṇām || 6 ||
vāme pustakadhāriṇīmabhayadāṃ sākṣasrajaṃ dakṣiṇe
bhaktebhyo varadānapeśalakarāṃ karpūrakundojjvalām |
ujjṛmbhāmbujapatrakāntinayanasnigdhaprabhālokinīṃ
ye tvāmamba na śīlayanti manasā teṣāṃ kavitvaṃ kutaḥ || 7 ||
ye tvāṃ pāṇḍurapuṇḍarīkapaṭalaspaṣṭābhirāmaprabhāṃ
siñcantīmamṛtadravairiva śiro dhyāyanti mūrdhni sthitām |
aśrāntā vikaṭasphuṭākṣarapadā niryāti vaktrāmbujāt
teṣāṃ bhārati bhāratī surasaritkallolalolormivat || 8 ||
ye sindūraparāgapiñjapihitāṃ tvattejasādyāmimāṃ
urvīṃ cāpi vilīnayāvakarasaprastāramagnāmiva |
paśyanti kṣaṇamapyananyamanasasteṣāmanaṅgajvara-
-klāntasrastakuraṅgaśābakadṛśo vaśyā bhavanti sphuṭam || 9 ||
cañcatkāñcanakuṇḍalāṅgadadharāmābaddhakāñcīsrajaṃ
ye tvāṃ cetasi tadgate kṣaṇamapi dhyāyanti kṛtvā sthirām |
teṣāṃ veśmasu vibhramādaharahaḥ sphārībhavantyaściraṃ
mādyatkuñjarakarṇatālataralāḥ sthairyaṃ bhajante śriyaḥ || 10 ||
ārbhaṭyā śaśikhaṇḍamaṇḍitajaṭājūṭāṃ nṛmuṇḍasrajaṃ
bandhūkaprasavāruṇāmbaradharāṃ pretāsanādhyāsinīm |
tvāṃ dhyāyanti caturbhujāṃ trinayanāmāpīnatuṅgastanīṃ
madhye nimnavalitrayāṅkitatanuṃ tvadrūpasaṃvittaye || 11 ||
jāto'pyalpaparicchade kṣitibhujāṃ sāmānyamātre kule
niḥśeṣāvanicakravartipadavīṃ labdhvā pratāponnataḥ |
yadvidyādhara bṛndavanditapadaḥ śrīvatsarājo'bhavat
devi tvaccaraṇāmbuja praṇatijaḥ so'yaṃ prasādodayaḥ || 12 ||
caṇḍi tvaccaraṇāmbujārcanakṛte bilvādilolluṇṭhana-
-truṭyatkaṇṭakakoṭibhiḥ paricayaṃ yeṣāṃ na jagmuḥ karāḥ |
te daṇḍāṅkuśacakracāpakuliśaśrīvatsamatsyāṅkitaiḥ
jāyante pṛthivībhujaḥ kathamivāmbhojaprabhaiḥ pāṇibhiḥ || 13 ||
viprāḥ kṣoṇibhujo viśastaditare kṣīrājyamadhvāsavaiḥ |
tvāṃ devi tripure parāparamayīṃ santarpya pūjāvidhau |
yāṃ yāṃ prārthayate manaḥ sthiradhiyāṃ teṣāṃ ta eva dhruvaṃ
tāṃ tāṃ siddhimavāpnuvanti tarasā vighnairavighnīkṛtāḥ || 14 ||
śabdānāṃ jananī tvamatra bhuvane vāgvādinītyucyase
tvattaḥ keśavavāsava prabhṛtayo'pyāvirbhavanti sphuṭam |
līyante khalu yatra kalpavirame brahmādayaste'pyamī
sā tvaṃ kācidacintyarūpamahimā śaktiḥ parā gīyase || 15 ||
devānāṃ tritayaṃ trayī hutabhujāṃ śaktitrayaṃ triḥ svarāḥ
trailokyaṃ tripadī tripuṣkaramatho tribrahma varṇāstrayaḥ |
yatkiñcijjagati tridhā niyamitaṃ vastu trivargādikaṃ
tatsarvaṃ tripureti nāma bhagavatyanveti te tattvataḥ || 16 ||
lakṣmīṃ rājakule jayāṃ raṇabhuvi kṣemaṅkarīmadhvani
kravyādadvipasarpabhāji śabarīṃ kāntāradurge girau |
bhūtapretapiśācajambukabhaye smṛtvā mahābhairavīṃ
vyāmohe tripurāṃ taranti vipadastārāṃ ca toyaplave || 17 ||
māyā kuṇḍalinī kriyā madhumatī kālī kalāmālinī
mātaṅgī vijayā jayā bhagavatī devī śivā śāmbhavī |
śaktiḥ śaṅkaravallabhā trinayanā vāgvādinī bhairavī
hrīṅkārī tripurā parāparamayī mātā kumārītyasi || 18 ||
āīpallavitaiḥ parasparayutairdvitrikramādyakṣarai
kādyaiḥ kṣāntagataiḥ svarādibhiratha kṣāntaiśca taiḥ sasvaraiḥ |
nāmāni tripure bhavanti khalu yānyatyantaguhyāni te
tebhyo bhairavapatni viṃśatisahasrebhyaḥ parebhyo namaḥ || 19 ||
boddhavyā nipuṇaṃ budhaiḥ stutiriyaṃ kṛtvā manastadgataṃ
bhāratyāstripuretyananyamanasā yatrādyavṛtte sphuṭam |
ekadvitripadakrameṇa kathitastatpādasaṅkhyākṣaraiḥ
mantroddhāra vidhirviśeṣasahitaḥ satsampradāyānvitaḥ || 20 ||
sāvadyaṃ niravadyamastu yadi vā kiṃ vānayā cintayā
nūnaṃ stotramidaṃ paṭhiṣyati jano yasyāsti bhaktistvayi |
sañcintyāpi laghutvamātmani dṛḍhaṃ sañjāyamānaṃ haṭhāt
tvadbhaktyā mukharīkṛtena racitaṃ yasmānmayāpi dhṛvam || 21 ||
iti śrīkālidāsa viracita pañcastavyāṃ prathamaḥ laghustavaḥ |
InfoLyter.in — Sacred Vedic Knowledge Portal · Free forever