1.7 - Rajasuyanubrahmanam - Krishna Yajurveda Taittiriya Brahmana Pathah - Etad Brahmananyeva

ॐ

1.7 - 𑌰𑌾𑌜𑌸𑍂𑌯𑌾𑌨𑍁𑌬𑍍𑌰𑌾𑌹𑍍𑌮𑌣𑌂 - 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣 𑌪𑌾𑌠𑌃 - 𑌏𑌤𑌦𑍍 𑌬𑍍𑌰𑌾𑌹𑍍𑌮𑌣𑌾𑌨𑍍𑌯𑍇𑌵

Krishna Vedic Grantha

𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌪𑍍𑌰𑌥𑌮𑌾𑌷𑍍𑌟𑌕𑍇 𑌸𑌪𑍍𑌤𑌮𑌃 𑌪𑍍𑌰𑌪𑌾𑌠𑌕𑌃 - 𑌰𑌾𑌜𑌸𑍂𑌯𑌾𑌨𑍁𑌬𑍍𑌰𑌾𑌹𑍍𑌮𑌣𑌂

𑌓-𑌨𑍍𑌨𑌮𑌃 𑌪𑌰𑌮𑌾𑌤𑍍𑌮𑌨𑍇, 𑌶𑍍𑌰𑍀 𑌮𑌹𑌾𑌗𑌣𑌪𑌤𑌯𑍇 𑌨𑌮𑌃,

𑌶𑍍𑌰𑍀 𑌗𑍁𑌰𑍁𑌭𑍍𑌯𑍋 𑌨𑌮𑌃 । 𑌹॒𑌰𑌿𑌃॒ 𑌓𑌮𑍍 ॥

𑌅𑌨𑍁𑌵𑌾𑌕𑌂 1 - 𑌶𑍁𑌨𑌾𑌸𑍀𑌰𑍀𑌯𑍇𑌨𑍍𑌦𑍍𑌰𑌤𑍁𑌰𑍀𑌯𑌪𑌞𑍍𑌚𑌾𑌵𑌤𑍍𑌤𑍀𑌯𑌾𑌪𑌾𑌮𑌾𑌰𑍍𑌗𑌹𑍋𑌮𑌾𑌃

𑌏॒𑌤-𑌦𑍍𑌬𑍍𑌰𑌾᳚𑌹𑍍𑌮𑌣𑌾𑌨𑍍𑌯𑍇॒𑌵 𑌪𑌞𑍍𑌚॑ 𑌹॒𑌵𑍀𑌗𑍍𑌂𑌷𑌿॑ । 𑌅𑌥𑍇𑌨𑍍𑌦𑍍𑌰𑌾॑𑌯॒ 𑌶𑍁𑌨𑌾॒𑌸𑍀𑌰𑌾॑𑌯 𑌪𑍁𑌰𑍋॒𑌡𑌾𑌶॒-𑌨𑍍𑌦𑍍𑌵𑌾𑌦॑𑌶𑌕𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑌤𑌿 । 𑌸𑌂॒𑌵𑌁॒𑌥𑍍𑌸॒𑌰𑍋 𑌵𑌾 𑌇𑌨𑍍𑌦𑍍𑌰𑌾॒ 𑌶𑍁𑌨𑌾॒𑌸𑍀𑌰𑌃॑ । 𑌸𑌂॒𑌵𑌁॒𑌥𑍍𑌸॒𑌰𑍇𑌣𑍈॒𑌵𑌾𑌸𑍍𑌮𑌾॒ 𑌅𑌨𑍍𑌨॒𑌮𑌵॑ 𑌰𑍁𑌨𑍍𑌧𑍇 । 𑌵𑌾॒𑌯॒𑌵𑍍𑌯॑-𑌮𑍍𑌪𑌯𑍋॑ 𑌭𑌵𑌤𑌿 । 𑌵𑌾॒𑌯𑍁𑌰𑍍𑌵𑍈 𑌵𑍃𑌷𑍍𑌟𑍍𑌯𑍈᳚ 𑌪𑍍𑌰𑌦𑌾𑌪𑌯𑌿॒𑌤𑌾 । 𑌸 𑌏॒𑌵𑌾𑌸𑍍𑌮𑍈॒ 𑌵𑍃𑌷𑍍𑌟𑌿॒-𑌮𑍍𑌪𑍍𑌰𑌦𑌾॑𑌪𑌯𑌤𑌿 । 𑌸𑍗॒𑌰𑍍𑌯॑ 𑌏𑌕॑𑌕𑌪𑌾𑌲𑍋 𑌭𑌵𑌤𑌿 । 𑌸𑍂𑌰𑍍𑌯𑍇॑𑌣॒ 𑌵𑌾 𑌅॒𑌮𑍁𑌷𑍍𑌮𑌿॑𑌁𑌲𑍍𑌲𑍋॒𑌕𑍇 𑌵𑍃𑌷𑍍𑌟𑌿॑𑌰𑍍𑌧𑍃॒𑌤𑌾 । 𑌸 𑌏॒𑌵𑌾𑌸𑍍𑌮𑍈॒ 𑌵𑍃𑌷𑍍𑌟𑌿॒-𑌨𑍍𑌨𑌿 𑌯॑𑌚𑍍𑌛𑌤𑌿 ॥ 1 ॥

𑌦𑍍𑌵𑌾॒𑌦॒𑌶॒𑌗॒𑌵𑌗𑍍𑌂 𑌸𑍀𑌰॒-𑌨𑍍𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌦𑍇॒𑌵𑌾॒𑌸𑍁॒𑌰𑌾-𑌸𑍍𑌸𑌂𑌯𑌁॑𑌤𑍍𑌤𑌾 𑌆𑌸𑌨𑍍𑌨𑍍 । 𑌤𑍇 𑌦𑍇॒𑌵𑌾 𑌅॒𑌗𑍍𑌨𑌿𑌮॑𑌬𑍍𑌰𑍁𑌵𑌨𑍍𑌨𑍍 । 𑌤𑍍𑌵𑌯𑌾॑ 𑌵𑍀॒𑌰𑍇𑌣𑌾𑌸𑍁॑𑌰𑌾𑌨॒-𑌭𑌿𑌭॑𑌵𑌾॒𑌮𑍇𑌤𑌿॑ । 𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌤𑍍𑌰𑍇॒𑌧𑌾-𑌽𑌹𑌮𑌾॒𑌤𑍍𑌮𑌾𑌨𑌂॒-𑌵𑌿𑌁𑌕॑𑌰𑌿𑌷𑍍𑌯॒ 𑌇𑌤𑌿॑ । 𑌸 𑌤𑍍𑌰𑍇॒𑌧𑌾 𑌽𑌽𑌤𑍍𑌮𑌾𑌨𑌂॒-𑌵𑍍𑌯𑌁॑𑌕𑍁𑌰𑍁𑌤 । 𑌅॒𑌗𑍍𑌨𑌿-𑌨𑍍𑌤𑍃𑌤𑍀॑𑌯𑌮𑍍 । 𑌰𑍁॒𑌦𑍍𑌰-𑌨𑍍𑌤𑍃𑌤𑍀॑𑌯𑌮𑍍 । 𑌵𑌰𑍁॑𑌣॒-𑌨𑍍𑌤𑍃𑌤𑍀॑𑌯𑌮𑍍 ॥ 2 ॥

𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌕 𑌇॒𑌦-𑌨𑍍𑌤𑍁॒𑌰𑍀𑌯॒𑌮𑌿𑌤𑌿॑ । 𑌅॒𑌹𑌮𑌿𑌤𑍀𑌨𑍍𑌦𑍍𑌰𑍋᳚-𑌽𑌬𑍍𑌰𑌵𑍀𑌤𑍍 ।

𑌸-𑌨𑍍𑌤𑍁 𑌸𑍃॑𑌜𑌾𑌵𑌹𑌾॒ 𑌇𑌤𑌿॑ । 𑌤𑍗 𑌸𑌮॑𑌸𑍃𑌜𑍇𑌤𑌾𑌮𑍍 । 𑌸 𑌇𑌨𑍍𑌦𑍍𑌰॑𑌸𑍍𑌤𑍁॒𑌰𑍀𑌯॑-𑌮𑌭𑌵𑌤𑍍 । 𑌯𑌦𑌿𑌨𑍍𑌦𑍍𑌰॑-𑌸𑍍𑌤𑍁॒𑌰𑍀𑌯॒-𑌮𑌭॑𑌵𑌤𑍍 । 𑌤𑌦𑌿॑𑌨𑍍𑌦𑍍𑌰-𑌤𑍁𑌰𑍀॒𑌯𑌸𑍍𑌯𑍇᳚𑌨𑍍𑌦𑍍𑌰-𑌤𑍁𑌰𑍀𑌯॒𑌤𑍍𑌵𑌮𑍍 । 𑌤𑌤𑍋॒ 𑌵𑍈 𑌦𑍇॒𑌵𑌾 𑌵𑍍𑌯॑𑌜𑌯𑌨𑍍𑌤 । 𑌯𑌦𑌿॑𑌨𑍍𑌦𑍍𑌰𑌤𑍁𑌰𑍀॒𑌯-𑌨𑍍𑌨𑌿॑𑌰𑍁॒𑌪𑍍𑌯𑌤𑍇॒ 𑌵𑌿𑌜𑌿॑𑌤𑍍𑌯𑍈 ॥ 3 ॥

𑌵॒𑌹𑌿𑌨𑍀॑ 𑌧𑍇॒𑌨𑍁-𑌰𑍍𑌦𑌕𑍍𑌷𑌿॑𑌣𑌾 । 𑌯-𑌦𑍍𑌵॒𑌹𑌿𑌨𑍀᳚ । 𑌤𑍇𑌨𑌾᳚𑌗𑍍𑌨𑍇॒𑌯𑍀 ।

𑌯-𑌦𑍍𑌗𑍗𑌃 । 𑌤𑍇𑌨॑ 𑌰𑍗॒𑌦𑍍𑌰𑍀 । 𑌯-𑌦𑍍𑌧𑍇॒𑌨𑍁𑌃 । 𑌤𑍇𑌨𑍈॒𑌨𑍍𑌦𑍍𑌰𑍀 । 𑌯𑌥𑍍𑌸𑍍𑌤𑍍𑌰𑍀 𑌸॒𑌤𑍀 𑌦𑌾॒𑌨𑍍𑌤𑌾 । 𑌤𑍇𑌨॑ 𑌵𑌾𑌰𑍁॒𑌣𑍀 𑌸𑌮𑍃॑𑌦𑍍𑌧𑍍𑌯𑍈 । 𑌪𑍍𑌰॒𑌜𑌾𑌪॑𑌤𑌿-𑌰𑍍𑌯॒𑌜𑍍𑌞𑌮॑𑌸𑍃𑌜𑌤 ॥ 4 ॥

𑌤𑌗𑍍𑌂 𑌸𑍃॒𑌷𑍍𑌟𑌗𑍍𑌂 𑌰𑌕𑍍𑌷𑌾𑌗𑍍॑𑌸𑍍𑌯𑌜𑌿𑌘𑌾𑌗𑍍𑌂𑌸𑌨𑍍𑌨𑍍 । 𑌸 𑌏॒𑌤𑌾𑌃 𑌪𑍍𑌰॒𑌜𑌾𑌪॑𑌤𑌿-𑌰𑌾॒𑌤𑍍𑌮𑌨𑍋॑ 𑌦𑍇॒𑌵𑌤𑌾॒ 𑌨𑌿𑌰॑𑌮𑌿𑌮𑍀𑌤 । 𑌤𑌾𑌭𑌿॒𑌰𑍍𑌵𑍈 𑌸 𑌦𑌿॒𑌗𑍍𑌭𑍍𑌯𑍋 𑌰𑌕𑍍𑌷𑌾𑌗𑍍𑌂॑𑌸𑌿॒ 𑌪𑍍𑌰𑌾𑌣𑍁॑𑌦𑌤 । 𑌯-𑌤𑍍𑌪॑𑌞𑍍𑌚𑌾𑌵॒𑌤𑍍𑌤𑍀𑌯॑-𑌞𑍍𑌜𑍁॒𑌹𑍋𑌤𑌿॑ । 𑌦𑌿॒𑌗𑍍𑌭𑍍𑌯 𑌏॒𑌵 𑌤-𑌦𑍍𑌯𑌜॑𑌮𑌾𑌨𑍋॒ 𑌰𑌕𑍍𑌷𑌾𑌗𑍍𑌂॑𑌸𑌿॒ 𑌪𑍍𑌰𑌣𑍁॑𑌦𑌤𑍇 । 𑌸𑌮𑍂॑𑌢॒𑌗𑍍𑌂॒ 𑌰𑌕𑍍𑌷॒-𑌸𑍍𑌸𑌨𑍍𑌦॑𑌗𑍍𑌧॒𑌗𑍍𑌂॒ 𑌰𑌕𑍍𑌷॒ 𑌇𑌤𑍍𑌯𑌾॑𑌹 । 𑌰𑌕𑍍𑌷𑌾𑌗𑍍॑𑌸𑍍𑌯𑍇॒𑌵 𑌸𑌨𑍍𑌦॑𑌹𑌤𑌿 । 𑌅॒𑌗𑍍𑌨𑌯𑍇॑ 𑌰𑌕𑍍𑌷𑍋॒𑌘𑍍𑌨𑍇 𑌸𑍍𑌵𑌾𑌹𑍇𑌤𑍍𑌯𑌾॑𑌹 । 𑌦𑍇॒𑌵𑌤𑌾᳚𑌭𑍍𑌯 𑌏॒𑌵 𑌵𑌿॑𑌜𑌿𑌗𑍍𑌯𑌾॒𑌨𑌾𑌭𑍍𑌯𑍋॑ 𑌭𑌾𑌗॒𑌧𑍇𑌯॑-𑌙𑍍𑌕𑌰𑍋𑌤𑌿 । 𑌪𑍍𑌰॒𑌷𑍍𑌟𑌿॒𑌵𑌾॒𑌹𑍀 𑌰𑌥𑍋॒ 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 ॥ 5 ॥

𑌇𑌨𑍍𑌦𑍍𑌰𑍋॑ 𑌵𑍃॒𑌤𑍍𑌰𑌗𑍍𑌂 𑌹॒𑌤𑍍𑌵𑌾 । 𑌅𑌸𑍁॑𑌰𑌾-𑌨𑍍𑌪𑌰𑌾॒𑌭𑌾𑌵𑍍𑌯॑ । 𑌨𑌮𑍁॑𑌚𑌿𑌮𑌾𑌸𑍁॒𑌰-𑌨𑍍𑌨𑌾𑌲॑𑌭𑌤 । 𑌤𑌗𑍍𑌂 𑌶॒𑌚𑍍𑌯𑌾॑-𑌽𑌗𑍃𑌹𑍍𑌣𑌾𑌤𑍍 । 𑌤𑍗 𑌸𑌮॑𑌲𑌭𑍇𑌤𑌾𑌮𑍍 । 𑌸𑍋᳚-𑌽𑌸𑍍𑌮𑌾-𑌦॒𑌭𑌿𑌶𑍁॑𑌨𑌤𑌰𑍋-𑌽𑌭𑌵𑌤𑍍 । 𑌸𑍋᳚-𑌽𑌬𑍍𑌰𑌵𑍀𑌤𑍍 । 𑌸॒𑌧𑌾𑌂𑌗𑍍𑌂 𑌸𑌨𑍍𑌦॑𑌧𑌾𑌵𑌹𑍈 । 𑌅𑌥॒ 𑌤𑍍𑌵𑌾-𑌽𑌵॑ 𑌸𑍍𑌰𑌕𑍍𑌷𑍍𑌯𑌾𑌮𑌿 । 𑌨 𑌮𑌾॒ 𑌶𑍁𑌷𑍍𑌕𑍇॑𑌣॒ 𑌨𑌾𑌰𑍍𑌦𑍍𑌰𑍇𑌣॑ 𑌹𑌨𑌃 ॥ 6 ॥

𑌨 𑌦𑌿𑌵𑌾॒ 𑌨 𑌨𑌕𑍍𑌤॒𑌮𑌿𑌤𑌿॑ । 𑌸 𑌏॒𑌤𑌮॒𑌪𑌾-𑌮𑍍𑌫𑍇𑌨॑𑌮𑌸𑌿𑌞𑍍𑌚𑌤𑍍 । 𑌨 𑌵𑌾 𑌏॒𑌷 𑌶𑍁𑌷𑍍𑌕𑍋॒ 𑌨𑌾𑌰𑍍𑌦𑍍𑌰𑍋 𑌵𑍍𑌯𑍁॑𑌷𑍍𑌟𑌾 𑌽𑌽𑌸𑍀𑌤𑍍 । 𑌅𑌨𑍁॑𑌦𑌿𑌤॒-𑌸𑍍𑌸𑍂𑌰𑍍𑌯𑌃॑ । 𑌨 𑌵𑌾 𑌏॒𑌤-𑌦𑍍𑌦𑌿𑌵𑌾॒ 𑌨 𑌨𑌕𑍍𑌤᳚𑌮𑍍 । 𑌤𑌸𑍍𑌯𑍈॒𑌤𑌸𑍍𑌮𑌿॑𑌨𑍍 𑌁𑌲𑍋॒𑌕𑍇 । 𑌅॒𑌪𑌾-𑌮𑍍𑌫𑍇𑌨𑍇॑𑌨॒ 𑌶𑌿𑌰॒ 𑌉𑌦॑𑌵𑌰𑍍𑌤𑌯𑌤𑍍 । 𑌤𑌦𑍇॑𑌨॒𑌮𑌨𑍍𑌵॑𑌵𑌰𑍍𑌤𑌤 । 𑌮𑌿𑌤𑍍𑌰॑𑌦𑍍𑌰𑍁॒𑌗𑌿𑌤𑌿॑ ॥ 7 ॥

𑌸 𑌏॒𑌤𑌾𑌨॑𑌪𑌾𑌮𑌾॒𑌰𑍍𑌗𑌾𑌨॑𑌜𑌨𑌯𑌤𑍍 । 𑌤𑌾𑌨॑𑌜𑍁𑌹𑍋𑌤𑍍 । 𑌤𑍈𑌰𑍍𑌵𑍈 𑌸 𑌰𑌕𑍍𑌷𑌾॒𑌗𑍍॒𑌸𑍍𑌯𑌪𑌾॑𑌹𑌤 । 𑌯𑌦॑𑌪𑌾𑌮𑌾𑌰𑍍𑌗 𑌹𑍋॒𑌮𑍋 𑌭𑌵॑𑌤𑌿 । 𑌰𑌕𑍍𑌷॑𑌸𑌾॒-𑌮𑌪॑𑌹𑌤𑍍𑌯𑍈 । 𑌏॒𑌕𑍋॒𑌲𑍍 𑌮𑍁॒𑌕𑍇𑌨॑ 𑌯𑌨𑍍𑌤𑌿 । 𑌤𑌦𑍍𑌧𑌿 𑌰𑌕𑍍𑌷॑𑌸𑌾-𑌮𑍍𑌭𑌾𑌗॒𑌧𑍇𑌯᳚𑌮𑍍 । 𑌇॒𑌮𑌾-𑌨𑍍𑌦𑌿𑌶𑌂॑-𑌯𑌁𑌨𑍍𑌤𑌿 । 𑌏॒𑌷𑌾 𑌵𑍈 𑌰𑌕𑍍𑌷॑𑌸𑌾॒-𑌨𑍍𑌦𑌿𑌕𑍍 । 𑌸𑍍𑌵𑌾𑌯𑌾॑𑌮𑍇॒𑌵 𑌦𑌿॒𑌶𑌿 𑌰𑌕𑍍𑌷𑌾𑌗𑍍𑌂॑𑌸𑌿 𑌹𑌨𑍍𑌤𑌿 ॥ 8 ॥

𑌸𑍍𑌵𑌕𑍃॑𑌤॒ 𑌇𑌰𑌿॑𑌣𑍇 𑌜𑍁𑌹𑍋𑌤𑌿 𑌪𑍍𑌰𑌦॒𑌰𑍇 𑌵𑌾᳚ । 𑌏॒𑌤-𑌦𑍍𑌵𑍈 𑌰𑌕𑍍𑌷॑𑌸𑌾𑌮𑌾॒𑌯𑌤॑𑌨𑌮𑍍 । 𑌸𑍍𑌵 𑌏॒𑌵𑌾𑌯𑌤॑𑌨𑍇॒ 𑌰𑌕𑍍𑌷𑌾𑌗𑍍𑌂॑𑌸𑌿 𑌹𑌨𑍍𑌤𑌿 । 𑌪॒𑌰𑍍𑌣॒𑌮𑌯𑍇॑𑌨 𑌸𑍍𑌰𑍁॒𑌵𑍇𑌣॑ 𑌜𑍁𑌹𑍋𑌤𑌿 । 𑌬𑍍𑌰𑌹𑍍𑌮॒ 𑌵𑍈 𑌪॒𑌰𑍍𑌣𑌃 । 𑌬𑍍𑌰𑌹𑍍𑌮॑𑌣𑍈॒𑌵 𑌰𑌕𑍍𑌷𑌾𑌗𑍍𑌂॑𑌸𑌿 𑌹𑌨𑍍𑌤𑌿 । 𑌦𑍇॒𑌵𑌸𑍍𑌯॑ 𑌤𑍍𑌵𑌾 𑌸𑌵𑌿॒𑌤𑍁𑌃 𑌪𑍍𑌰॑𑌸॒𑌵 𑌇𑌤𑍍𑌯𑌾॑𑌹 । 𑌸॒𑌵𑌿॒𑌤𑍃𑌪𑍍𑌰॑𑌸𑍂𑌤 𑌏॒𑌵 𑌰𑌕𑍍𑌷𑌾𑌗𑍍𑌂॑𑌸𑌿 𑌹𑌨𑍍𑌤𑌿 । 𑌹॒𑌤𑌗𑍍𑌂 𑌰𑌕𑍍𑌷𑍋 𑌽𑌵॑𑌧𑌿𑌷𑍍𑌮॒ 𑌰𑌕𑍍𑌷॒ 𑌇𑌤𑍍𑌯𑌾॑𑌹 । 𑌰𑌕𑍍𑌷॑𑌸𑌾॒𑌗𑍍॒ 𑌸𑍍𑌤𑍃𑌤𑍍𑌯𑍈᳚ । 𑌯𑌦𑍍𑌵𑌸𑍍𑌤𑍇॒ 𑌤-𑌦𑍍𑌦𑌕𑍍𑌷𑌿॑𑌣𑌾 𑌨𑌿॒𑌰𑌵॑𑌤𑍍𑌤𑍍𑌯𑍈 । 𑌅𑌪𑍍𑌰॑𑌤𑍀𑌕𑍍𑌷॒𑌮𑌾 𑌯॑𑌨𑍍𑌤𑌿 । 𑌰𑌕𑍍𑌷॑𑌸𑌾-𑌮॒𑌨𑍍𑌤𑌰𑍍𑌹𑌿॑𑌤𑍍𑌯𑍈 ॥ 9 ॥

(𑌯॒𑌚𑍍𑌛॒𑌤𑌿॒ - 𑌵𑌰𑍁॑𑌣॒-𑌨𑍍𑌤𑍃𑌤𑍀॑𑌯𑌂॒ - 𑌁𑌵𑌿𑌜𑌿॑𑌤𑍍𑌯𑌾 - 𑌅𑌸𑍃𑌜𑌤॒ - 𑌸𑌮𑍃॑𑌦𑍍𑌧𑍍𑌯𑍈 - 𑌹𑌨𑍋॒ - 𑌮𑌿𑌤𑍍𑌰॑𑌦𑍍𑌰𑍁॒𑌗𑌿𑌤𑌿॑ - 𑌹𑌨𑍍𑌤𑌿॒ - 𑌸𑍍𑌤𑍃𑌤𑍍𑌯𑍈॒ 𑌤𑍍𑌰𑍀𑌣𑌿॑ 𑌚) (𑌅. 1)

𑌅𑌨𑍁𑌵𑌾𑌕𑌂 2 - 𑌦𑍇𑌵𑌿𑌕𑌾𑌵𑌹𑌵𑍀𑌂𑌷𑌿

𑌧𑌾॒𑌤𑍍𑌰𑍇 𑌪𑍁॑𑌰𑍋॒𑌡𑌾𑌶॒-𑌨𑍍𑌦𑍍𑌵𑌾𑌦॑𑌶𑌕𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑌤𑌿 । 𑌸𑌂॒𑌵𑌁॒𑌥𑍍𑌸॒𑌰𑍋 𑌵𑍈 𑌧𑌾॒𑌤𑌾 । 𑌸𑌂॒𑌵𑌁॒𑌥𑍍𑌸॒𑌰𑍇𑌣𑍈॒𑌵𑌾𑌸𑍍𑌮𑍈᳚ 𑌪𑍍𑌰॒𑌜𑌾𑌃 𑌪𑍍𑌰𑌜॑𑌨𑌯𑌤𑌿 । 𑌅𑌨𑍍𑌵𑍇॒𑌵𑌾𑌸𑍍𑌮𑌾॒ 𑌅𑌨𑍁॑𑌮𑌤𑌿𑌰𑍍𑌮𑌨𑍍𑌯𑌤𑍇 । 𑌰𑌾॒𑌤𑍇 𑌰𑌾॒𑌕𑌾 । 𑌪𑍍𑌰 𑌸𑌿॑𑌨𑍀𑌵𑌾॒𑌲𑍀 𑌜॑𑌨𑌯𑌤𑌿 । 𑌪𑍍𑌰॒𑌜𑌾𑌸𑍍𑌵𑍇॒𑌵 𑌪𑍍𑌰𑌜𑌾॑𑌤𑌾𑌸𑍁 𑌕𑍁॒𑌹𑍍𑌵𑌾॑ 𑌵𑌾𑌚॑-𑌨𑍍𑌦𑌧𑌾𑌤𑌿 । 𑌮𑌿॒𑌥𑍁॒𑌨𑍗 𑌗𑌾𑌵𑍗॒ 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌆॒𑌗𑍍𑌨𑌾॒𑌵𑍈॒𑌷𑍍𑌣॒𑌵-𑌮𑍇𑌕𑌾॑𑌦𑌶𑌕𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑌤𑌿 । 𑌐॒𑌨𑍍𑌦𑍍𑌰𑌾॒𑌵𑍈॒𑌷𑍍𑌣॒𑌵-𑌮𑍇𑌕𑌾॑𑌦𑌶𑌕𑌪𑌾𑌲𑌮𑍍 ॥ 10 ॥

𑌵𑍈॒𑌷𑍍𑌣॒𑌵-𑌨𑍍𑌤𑍍𑌰𑌿॑𑌕𑌪𑌾॒𑌲𑌮𑍍 । 𑌵𑍀॒𑌰𑍍𑌯𑌂॑-𑌵𑌾𑌁 𑌅॒𑌗𑍍𑌨𑌿𑌃 । 𑌵𑍀॒𑌰𑍍𑌯॑𑌮𑌿𑌨𑍍𑌦𑍍𑌰𑌃॑ । 𑌵𑍀॒𑌰𑍍𑌯𑌂॑-𑌵𑌿𑌁𑌷𑍍𑌣𑍁𑌃॑ । 𑌪𑍍𑌰॒𑌜𑌾 𑌏॒𑌵 𑌪𑍍𑌰𑌜𑌾॑𑌤𑌾 𑌵𑍀॒𑌰𑍍𑌯𑍇᳚ 𑌪𑍍𑌰𑌤𑌿॑𑌷𑍍𑌠𑌾𑌪𑌯𑌤𑌿 । 𑌤𑌸𑍍𑌮𑌾᳚-𑌤𑍍𑌪𑍍𑌰॒𑌜𑌾 𑌵𑍀॒𑌰𑍍𑌯𑌾॑𑌵𑌤𑍀𑌃 । 𑌵𑌾॒𑌮॒𑌨 𑌋॑𑌷॒𑌭𑍋 𑌵॒𑌹𑍀 𑌦𑌕𑍍𑌷𑌿॑𑌣𑌾 । 𑌯𑌦𑍍𑌵॒𑌹𑍀 । 𑌤𑍇𑌨𑌾᳚𑌗𑍍𑌨𑍇॒𑌯𑌃 । 𑌯𑌦𑍃॑𑌷॒𑌭𑌃 ॥ 11 ॥

𑌤𑍇𑌨𑍈॒𑌨𑍍𑌦𑍍𑌰𑌃 । 𑌯𑌦𑍍𑌵𑌾॑𑌮॒𑌨𑌃 । 𑌤𑍇𑌨॑ 𑌵𑍈𑌷𑍍𑌣॒𑌵-𑌸𑍍𑌸𑌮𑍃॑𑌦𑍍𑌧𑍍𑌯𑍈 । 𑌅॒𑌗𑍍𑌨𑍀॒𑌷𑍋॒𑌮𑍀𑌯॒-𑌮𑍇𑌕𑌾॑𑌦𑌶𑌕𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑌤𑌿 । 𑌇॒𑌨𑍍𑌦𑍍𑌰𑌾॒𑌸𑍋॒𑌮𑍀𑌯॒-𑌮𑍇𑌕𑌾॑𑌦𑌶𑌕𑌪𑌾𑌲𑌮𑍍 । 𑌸𑍗॒𑌮𑍍𑌯-𑌞𑍍𑌚॒𑌰𑍁𑌮𑍍 । 𑌸𑍋𑌮𑍋॒ 𑌵𑍈 𑌰𑍇॑𑌤𑍋॒𑌧𑌾𑌃 । 𑌅॒𑌗𑍍𑌨𑌿𑌃 𑌪𑍍𑌰॒𑌜𑌾𑌨𑌾᳚-𑌮𑍍𑌪𑍍𑌰𑌜𑌨𑌯𑌿॒𑌤𑌾 । 𑌵𑍃॒𑌦𑍍𑌧𑌾𑌨𑌾॒𑌮𑌿𑌨𑍍𑌦𑍍𑌰𑌃॑ 𑌪𑍍𑌰𑌦𑌾𑌪𑌯𑌿॒𑌤𑌾 । 𑌸𑍋𑌮॑ 𑌏॒𑌵𑌾𑌸𑍍𑌮𑍈॒ 𑌰𑍇𑌤𑍋॒ 𑌦𑌧𑌾॑𑌤𑌿 ॥ 12 ॥

𑌅॒𑌗𑍍𑌨𑌿𑌃 𑌪𑍍𑌰॒𑌜𑌾-𑌮𑍍𑌪𑍍𑌰𑌜॑𑌨𑌯𑌤𑌿 । 𑌵𑍃॒𑌦𑍍𑌧𑌾𑌮𑌿𑌨𑍍𑌦𑍍𑌰𑌃॒ 𑌪𑍍𑌰𑌯॑𑌚𑍍𑌛𑌤𑌿 । 𑌬॒𑌭𑍍𑌰𑍁-𑌰𑍍𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌸𑍋॒𑌮𑌾॒𑌪𑍗॒𑌷𑍍𑌣-𑌞𑍍𑌚॒𑌰𑍁-𑌨𑍍𑌨𑌿𑌰𑍍𑌵॑𑌪𑌤𑌿 । 𑌐॒𑌨𑍍𑌦𑍍𑌰𑌾॒𑌪𑍗॒𑌷𑍍𑌣-𑌞𑍍𑌚॒𑌰𑍁𑌮𑍍 । 𑌸𑍋𑌮𑍋॒ 𑌵𑍈 𑌰𑍇॑𑌤𑍋॒𑌧𑌾𑌃 । 𑌪𑍂॒𑌷𑌾 𑌪॑𑌶𑍂॒𑌨𑌾-𑌮𑍍𑌪𑍍𑌰॑𑌜𑌨𑌯𑌿॒𑌤𑌾 । 𑌵𑍃॒𑌦𑍍𑌧𑌾𑌨𑌾॒𑌮𑌿𑌨𑍍𑌦𑍍𑌰𑌃॑ 𑌪𑍍𑌰𑌦𑌾𑌪𑌯𑌿॒𑌤𑌾 । 𑌸𑍋𑌮॑ 𑌏॒𑌵𑌾𑌸𑍍𑌮𑍈॒ 𑌰𑍇𑌤𑍋॒ 𑌦𑌧𑌾॑𑌤𑌿 । 𑌪𑍂॒𑌷𑌾 𑌪॒𑌶𑍂-𑌨𑍍𑌪𑍍𑌰𑌜॑𑌨𑌯𑌤𑌿 ॥ 13 ॥

𑌵𑍃॒𑌦𑍍𑌧𑌾𑌨𑌿𑌨𑍍𑌦𑍍𑌰𑌃॒ 𑌪𑍍𑌰𑌯॑𑌚𑍍𑌛𑌤𑌿 । 𑌪𑍗॒𑌷𑍍𑌣𑌶𑍍𑌚॒𑌰𑍁-𑌰𑍍𑌭॑𑌵𑌤𑌿 । 𑌇॒𑌯𑌂-𑌵𑍈𑌁 𑌪𑍂॒𑌷𑌾 । 𑌅॒𑌸𑍍𑌯𑌾𑌮𑍇॒𑌵 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿 । 𑌶𑍍𑌯𑌾॒𑌮𑍋 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌬॒𑌹𑍁 𑌵𑍈 𑌪𑍁𑌰𑍁॑𑌷𑍋-𑌽𑌮𑍇॒𑌦𑍍𑌧𑍍𑌯-𑌮𑍁𑌪॑𑌗𑌚𑍍𑌛𑌤𑌿 । 𑌵𑍈॒𑌶𑍍𑌵𑌾॒𑌨॒𑌰-𑌨𑍍𑌦𑍍𑌵𑌾𑌦॑𑌶𑌕𑌪𑌾𑌲॒-𑌨𑍍𑌨𑌿𑌰𑍍𑌵॑𑌪𑌤𑌿 । 𑌸𑌂॒𑌵𑌁॒𑌥𑍍𑌸॒𑌰𑍋 𑌵𑌾 𑌅॒𑌗𑍍𑌨𑌿-𑌰𑍍𑌵𑍈᳚𑌶𑍍𑌵𑌾𑌨॒𑌰𑌃 । 𑌸𑌂॒𑌵𑌁॒𑌥𑍍𑌸॒𑌰𑍇𑌣𑍈॒𑌵𑍈𑌨𑌗𑍍𑌗𑍍॑ 𑌸𑍍𑌵𑌦𑌯𑌤𑌿 । 𑌹𑌿𑌰॑𑌣𑍍𑌯॒-𑌨𑍍𑌦𑌕𑍍𑌷𑌿॑𑌣𑌾 ॥ 14 ॥

𑌪॒𑌵𑌿𑌤𑍍𑌰𑌂॒-𑌵𑍈𑌁 𑌹𑌿𑌰॑𑌣𑍍𑌯𑌮𑍍 । 𑌪𑍁॒𑌨𑌾𑌤𑍍𑌯𑍇॒𑌵𑍈𑌨᳚𑌮𑍍 । 𑌬॒𑌹𑍁 𑌵𑍈 𑌰𑌾॑𑌜॒𑌨𑍍𑌯𑍋 𑌽𑌨𑍃॑𑌤-𑌙𑍍𑌕𑌰𑍋𑌤𑌿 । 𑌉𑌪॑ 𑌜𑌾॒𑌮𑍍𑌯𑍈 𑌹𑌰॑𑌤𑍇 । 𑌜𑌿॒𑌨𑌾𑌤𑌿॑ 𑌬𑍍𑌰𑌾𑌹𑍍𑌮॒𑌣𑌮𑍍 । 𑌵𑌦॒𑌤𑍍𑌯𑌨𑍃॑𑌤𑌮𑍍 । 𑌅𑌨𑍃॑𑌤𑍇॒ 𑌖𑌲𑍁॒ 𑌵𑍈 𑌕𑍍𑌰𑌿॒𑌯𑌮𑌾॑𑌣𑍇॒ 𑌵𑌰𑍁॑𑌣𑍋 𑌗𑍃𑌹𑍍𑌣𑌾𑌤𑌿 । 𑌵𑌾॒𑌰𑍁॒𑌣𑌂-𑌯𑌁॑𑌵॒𑌮𑌯॑-𑌞𑍍𑌚॒𑌰𑍁-𑌨𑍍𑌨𑌿𑌰𑍍𑌵॑𑌪𑌤𑌿 । 𑌵॒𑌰𑍁॒𑌣॒𑌪𑌾॒𑌶𑌾𑌦𑍇॒𑌵𑍈𑌨॑-𑌮𑍍𑌮𑍁𑌞𑍍𑌚𑌤𑌿 । 𑌅𑌶𑍍𑌵𑍋॒ 𑌦𑌕𑍍𑌷𑌿॑𑌣𑌾 । 𑌵𑌾॒𑌰𑍁॒𑌣𑍋 𑌹𑌿 𑌦𑍇॒𑌵𑌤॒𑌯𑌾-𑌽𑌶𑍍𑌵॒-𑌸𑍍𑌸𑌮𑍃॑𑌦𑍍𑌧𑍍𑌯𑍈 ॥ 15 ॥

(𑌐॒𑌨𑍍𑌦𑍍𑌰𑌾॒𑌵𑍈॒𑌷𑍍𑌣𑌾॒𑌵𑌮𑍇𑌕𑌾॑𑌦𑌶𑌕𑌪𑌾𑌲𑌂॒-𑌁𑌯𑌦𑍃॑𑌷॒𑌭𑍋- 𑌦𑌧𑌾॑𑌤𑌿-𑌪𑍂॒𑌷𑌾 𑌪॒𑌶𑍂-𑌨𑍍𑌪𑍍𑌰𑌜॑𑌨𑌯𑌤𑌿॒-𑌹𑌿𑌰॑𑌣𑍍𑌯𑌂॒ 𑌦𑌕𑍍𑌷𑌿॑𑌣𑌾॒-𑌦𑌕𑍍𑌷𑌿॒𑌣𑍈𑌕𑌂॑ 𑌚) (𑌅. 2)

𑌅𑌨𑍁𑌵𑌾𑌕𑌂 3 - 𑌰𑌤𑍍𑌨𑌿𑌨𑌾𑌂 𑌹𑌵𑍀𑌂𑌷𑌿

𑌰॒𑌤𑍍𑌨𑌿𑌨𑌾॑𑌮𑍇॒𑌤𑌾𑌨𑌿॑ 𑌹॒𑌵𑍀𑌗𑍍𑌂𑌷𑌿॑ 𑌭𑌵𑌨𑍍𑌤𑌿 । 𑌏॒𑌤𑍇 𑌵𑍈 𑌰𑌾॒𑌷𑍍𑌟𑍍𑌰𑌸𑍍𑌯॑ 𑌪𑍍𑌰𑌦𑌾॒𑌤𑌾𑌰𑌃॑ । 𑌏॒𑌤𑍇॑-𑌽𑌪𑌾𑌦𑌾॒𑌤𑌾𑌰𑌃॑ । 𑌯 𑌏॒𑌵 𑌰𑌾॒𑌷𑍍𑌟𑍍𑌰𑌸𑍍𑌯॑ 𑌪𑍍𑌰𑌦𑌾॒𑌤𑌾𑌰𑌃॑ । 𑌯𑍇॑-𑌽𑌪𑌾𑌦𑌾॒𑌤𑌾𑌰𑌃॑ । 𑌤 𑌏॒𑌵𑌾𑌸𑍍𑌮𑍈॑ 𑌰𑌾॒𑌷𑍍𑌟𑍍𑌰-𑌮𑍍𑌪𑍍𑌰𑌯॑𑌚𑍍𑌛𑌨𑍍𑌤𑌿 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌭॑𑌵𑌤𑌿 । 𑌯-𑌥𑍍𑌸॑𑌮𑌾॒𑌹𑍃𑌤𑍍𑌯॑ 𑌨𑌿॒𑌰𑍍𑌵𑌪𑍇᳚𑌤𑍍 । 𑌅𑌰॑𑌤𑍍𑌨𑌿𑌨-𑌸𑍍𑌸𑍍𑌯𑍁𑌃 । 𑌯॒𑌥𑌾॒𑌯॒𑌥-𑌨𑍍𑌨𑌿𑌰𑍍𑌵॑𑌪𑌤𑌿 𑌰𑌤𑍍𑌨𑌿॒𑌤𑍍𑌵𑌾𑌯॑ ॥ 16 ॥

𑌯-𑌥𑍍𑌸॒𑌦𑍍𑌯𑍋 𑌨𑌿॒𑌰𑍍𑌵𑌪𑍇᳚𑌤𑍍 । 𑌯𑌾𑌵॑𑌤𑍀॒𑌮𑍇𑌕𑍇॑𑌨 𑌹॒𑌵𑌿𑌷𑌾॒-𑌽𑌽𑌶𑌿𑌷॑𑌮𑌵 𑌰𑍁॒𑌨𑍍𑌧𑍇 । 𑌤𑌾𑌵॑𑌤𑍀॒𑌮𑌵॑ 𑌰𑍁𑌨𑍍𑌧𑍀𑌤 । 𑌅॒𑌨𑍍𑌵॒𑌹-𑌨𑍍𑌨𑌿𑌰𑍍𑌵॑𑌪𑌤𑌿 । 𑌭𑍂𑌯॑𑌸𑍀𑌮𑍇॒𑌵𑌾𑌶𑌿𑌷॒𑌮𑌵॑ 𑌰𑍁𑌨𑍍𑌧𑍇 । 𑌭𑍂𑌯॑𑌸𑍋 𑌯𑌜𑍍𑌞𑌕𑍍𑌰॒𑌤𑍂𑌨𑍁𑌪𑍈॑𑌤𑌿 । 𑌬𑌾॒𑌰𑍍॒𑌹॒𑌸𑍍𑌪॒𑌤𑍍𑌯-𑌞𑍍𑌚॒𑌰𑍁-𑌨𑍍𑌨𑌿𑌰𑍍𑌵॑𑌪𑌤𑌿 𑌬𑍍𑌰॒𑌹𑍍𑌮𑌣𑍋॑ 𑌗𑍃॒𑌹𑍇 । 𑌮𑍁॒𑌖॒𑌤 𑌏॒𑌵𑌾𑌸𑍍𑌮𑍈॒ 𑌬𑍍𑌰𑌹𑍍𑌮॒ 𑌸𑌗𑍍𑌗𑍍𑌶𑍍𑌯॑𑌤𑌿 । 𑌅𑌥𑍋॒ 𑌬𑍍𑌰𑌹𑍍𑌮॑𑌨𑍍𑌨𑍇॒𑌵 𑌕𑍍𑌷॒𑌤𑍍𑌰-𑌮॒𑌨𑍍𑌵𑌾𑌰॑𑌮𑍍𑌭𑌯𑌤𑌿 । 𑌶𑌿॒𑌤𑌿॒𑌪𑍃॒𑌷𑍍𑌠𑍋 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 ॥ 17 ॥

𑌐॒𑌨𑍍𑌦𑍍𑌰-𑌮𑍇𑌕𑌾॑𑌦𑌶𑌕𑌪𑌾𑌲𑌗𑍍𑌂 𑌰𑌾𑌜॒𑌨𑍍𑌯॑𑌸𑍍𑌯 𑌗𑍃॒𑌹𑍇 । 𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌋॒𑌷॒𑌭𑍋 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌆॒𑌦𑌿॒𑌤𑍍𑌯-𑌞𑍍𑌚॒𑌰𑍁-𑌮𑍍𑌮𑌹𑌿॑𑌷𑍍𑌯𑍈 𑌗𑍃॒𑌹𑍇 । 𑌇॒𑌯𑌂-𑌵𑌾𑌁 𑌅𑌦𑌿॑𑌤𑌿𑌃 । 𑌅॒𑌸𑍍𑌯𑌾𑌮𑍇॒𑌵 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌧𑍇॒𑌨𑍁-𑌰𑍍𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌭𑌗𑌾॑𑌯 𑌚॒𑌰𑍁𑌂-𑌵𑌾𑌁॒𑌵𑌾𑌤𑌾॑𑌯𑍈 𑌗𑍃॒𑌹𑍇 । 𑌭𑌗॑𑌮𑍇॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌵𑌿𑌚𑌿॑𑌤𑍍𑌤𑌗𑌰𑍍𑌭𑌾 𑌪𑌷𑍍𑌠𑍗॒𑌹𑍀 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 ॥ 18 ॥

𑌨𑍈॒𑌰𑍍॒𑌋॒𑌤-𑌞𑍍𑌚॒𑌰𑍁-𑌮𑍍𑌪॑𑌰𑌿𑌵𑍃॒𑌕𑍍𑌤𑍍𑌯𑍈॑ 𑌗𑍃॒𑌹𑍇 𑌕𑍃॒𑌷𑍍𑌣𑌾𑌨𑌾𑌂᳚-𑌵𑍍𑌰𑍀𑌁𑌹𑍀॒𑌣𑌾-𑌨𑍍𑌨॒𑌖𑌨𑌿॑𑌰𑍍𑌭𑌿𑌨𑍍𑌨𑌮𑍍 । 𑌪𑌾॒𑌪𑍍𑌮𑌾𑌨॑𑌮𑍇॒𑌵 𑌨𑌿𑌰𑍍-𑌋॑𑌤𑌿-𑌨𑍍𑌨𑌿॒𑌰𑌵॑𑌦𑌯𑌤𑍇 । 𑌕𑍃॒𑌷𑍍𑌣𑌾 𑌕𑍂॒𑌟𑌾 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌆॒𑌗𑍍𑌨𑍇॒𑌯-𑌮॒𑌷𑍍𑌟𑌾𑌕॑𑌪𑌾𑌲𑌗𑍍𑌂 𑌸𑍇𑌨𑌾॒𑌨𑍍𑌯𑍋॑ 𑌗𑍃॒𑌹𑍇 । 𑌸𑍇𑌨𑌾॑𑌮𑍇॒𑌵𑌾𑌸𑍍𑌯॒ 𑌸𑌗𑍍𑌗𑍍𑌶𑍍𑌯॑𑌤𑌿 । 𑌹𑌿𑌰॑𑌣𑍍𑌯॒-𑌨𑍍𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌵𑌾॒𑌰𑍁॒𑌣-𑌨𑍍𑌦𑌶॑𑌕𑌪𑌾𑌲𑌗𑍍𑌂 𑌸𑍂॒𑌤𑌸𑍍𑌯॑ 𑌗𑍃॒𑌹𑍇 । 𑌵॒𑌰𑍁॒𑌣॒𑌸॒𑌵𑌮𑍇॒𑌵𑌾𑌵॑-𑌰𑍁𑌨𑍍𑌧𑍇 । 𑌮॒𑌹𑌾𑌨𑌿॑𑌰𑌷𑍍𑌟𑍋॒ 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌮𑌾॒𑌰𑍁॒𑌤𑌗𑍍𑌂 𑌸॒𑌪𑍍𑌤𑌕॑𑌪𑌾𑌲-𑌙𑍍𑌗𑍍𑌰𑌾𑌮॒𑌣𑍍𑌯𑍋॑ 𑌗𑍃॒𑌹𑍇 ॥ 19 ॥

𑌅𑌨𑍍𑌨𑌂॒-𑌵𑍈𑌁 𑌮॒𑌰𑍁𑌤𑌃॑ । 𑌅𑌨𑍍𑌨॑𑌮𑍇॒𑌵𑌾𑌵॑-𑌰𑍁𑌨𑍍𑌧𑍇 । 𑌪𑍃𑌶𑍍𑌞𑌿॒-𑌰𑍍𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌸𑌾॒𑌵𑌿॒𑌤𑍍𑌰-𑌨𑍍𑌦𑍍𑌵𑌾𑌦॑𑌶𑌕𑌪𑌾𑌲-𑌙𑍍𑌕𑍍𑌷॒𑌤𑍍𑌤𑍁𑌰𑍍𑌗𑍃॒𑌹𑍇 𑌪𑍍𑌰𑌸𑍂᳚𑌤𑍍𑌯𑍈 । 𑌉॒𑌪॒𑌦𑍍𑌧𑍍𑌵॒𑌸𑍍𑌤𑍋 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌆॒𑌶𑍍𑌵𑌿॒𑌨-𑌨𑍍𑌦𑍍𑌵𑌿॑𑌕𑌪𑌾॒𑌲𑌗𑍍𑌂 𑌸॑𑌗𑍍𑌰𑌂𑌹𑍀॒𑌤𑍁𑌰𑍍𑌗𑍃॒𑌹𑍇 । 𑌅॒𑌶𑍍𑌵𑌿𑌨𑍗॒ 𑌵𑍈 𑌦𑍇॒𑌵𑌾𑌨𑌾᳚-𑌮𑍍𑌭𑌿॒𑌷𑌜𑍗᳚ । 𑌤𑌾𑌭𑍍𑌯𑌾॑𑌮𑍇॒𑌵𑌾𑌸𑍍𑌮𑍈॑ 𑌭𑍇𑌷॒𑌜-𑌙𑍍𑌕॑𑌰𑍋𑌤𑌿 । 𑌸॒𑌵𑌾॒𑌤𑍍𑌯𑍗॑ 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌪𑍗॒𑌷𑍍𑌣-𑌞𑍍𑌚॒𑌰𑍁-𑌮𑍍𑌭𑌾॑𑌗𑌦𑍁॒𑌘𑌸𑍍𑌯॑ 𑌗𑍃॒𑌹𑍇 ॥ 20 ॥

𑌅𑌨𑍍𑌨𑌂॒-𑌵𑍈𑌁 𑌪𑍂॒𑌷𑌾 । 𑌅𑌨𑍍𑌨॑𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌶𑍍𑌯𑌾॒𑌮𑍋 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌰𑍗॒𑌦𑍍𑌰-𑌙𑍍𑌗𑌾॑𑌵𑍀𑌧𑍁॒𑌕-𑌞𑍍𑌚॒𑌰𑍁𑌮॑𑌕𑍍𑌷𑌾𑌵𑌾॒𑌪𑌸𑍍𑌯॑ 𑌗𑍃॒𑌹𑍇 । 𑌅॒𑌨𑍍𑌤॒𑌤 𑌏॒𑌵 𑌰𑍁॒𑌦𑍍𑌰-𑌨𑍍𑌨𑌿॒𑌰𑌵॑𑌦𑌯𑌤𑍇 । 𑌶॒𑌬𑌲॒ 𑌉𑌦𑍍𑌵𑌾॑𑌰𑍋॒ 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 । 𑌦𑍍𑌵𑌾𑌦॑𑌶𑍈॒𑌤𑌾𑌨𑌿॑ 𑌹॒𑌵𑍀𑌗𑍍𑌂𑌷𑌿॑ 𑌭𑌵𑌨𑍍𑌤𑌿 । 𑌦𑍍𑌵𑌾𑌦॑𑌶॒ 𑌮𑌾𑌸𑌾᳚-𑌸𑍍𑌸𑌂𑌵𑌁𑌥𑍍𑌸॒𑌰𑌃 । 𑌸𑌂॒𑌵𑌁॒𑌥𑍍𑌸॒𑌰𑍇𑌣𑍈॒𑌵𑌾𑌸𑍍𑌮𑍈॑ 𑌰𑌾॒𑌷𑍍𑌟𑍍𑌰𑌮𑌵॑-𑌰𑍁𑌨𑍍𑌧𑍇 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌭॑𑌵𑌤𑌿 ॥ 21 ॥

𑌯𑌨𑍍𑌨 𑌪𑍍𑌰॑𑌤𑌿 𑌨𑌿॒𑌰𑍍𑌵𑌪𑍇᳚𑌤𑍍 । 𑌰॒𑌤𑍍𑌨𑌿𑌨॑ 𑌆॒𑌶𑌿𑌷𑍋-𑌽𑌵॑𑌰𑍁𑌨𑍍𑌧𑍀𑌰𑌨𑍍𑌨𑍍 । 𑌪𑍍𑌰𑌤𑌿॒ 𑌨𑌿𑌰𑍍𑌵॑𑌪𑌤𑌿 । 𑌇𑌨𑍍𑌦𑍍𑌰𑌾॑𑌯 𑌸𑍁॒𑌤𑍍𑌰𑌾𑌮𑍍𑌣𑍇॑ 𑌪𑍁𑌰𑍋॒𑌡𑌾𑌶॒-𑌮𑍇𑌕𑌾॑𑌦𑌶𑌕𑌪𑌾𑌲𑌮𑍍 । 𑌇𑌨𑍍𑌦𑍍𑌰𑌾॑𑌯𑌾𑌗𑍍𑌂𑌹𑍋॒𑌮𑍁𑌚𑍇᳚ । 𑌆॒𑌶𑌿𑌷॑ 𑌏॒𑌵𑌾𑌵॑𑌰𑍁𑌨𑍍𑌧𑍇 । 𑌅॒𑌯-𑌨𑍍𑌨𑍋॒ 𑌰𑌾𑌜𑌾॑ 𑌵𑍃𑌤𑍍𑌰॒𑌹𑌾 𑌰𑌾𑌜𑌾॑ 𑌭𑍂॒𑌤𑍍𑌵𑌾 𑌵𑍃॒𑌤𑍍𑌰𑌂-𑌵𑌁॑𑌦𑍍𑌧𑍍𑌯𑌾॒𑌦𑌿𑌤𑍍𑌯𑌾॑𑌹 । 𑌆॒𑌶𑌿𑌷॑𑌮𑍇॒𑌵𑍈𑌤𑌾𑌮𑌾𑌶𑌾᳚𑌸𑍍𑌤𑍇 । 𑌮𑍈॒𑌤𑍍𑌰𑌾॒-𑌬𑌾॒𑌰𑍍॒𑌹॒𑌸𑍍𑌪॒𑌤𑍍𑌯-𑌮𑍍𑌭॑𑌵𑌤𑌿 । 𑌶𑍍𑌵𑍇॒𑌤𑌾𑌯𑍈᳚ 𑌶𑍍𑌵𑍇॒𑌤𑌵॑𑌥𑍍𑌸𑌾𑌯𑍈 𑌦𑍁॒𑌗𑍍𑌧𑍇 ॥ 22 ॥

𑌬𑌾॒𑌰𑍍॒𑌹॒𑌸𑍍𑌪॒𑌤𑍍𑌯𑍇 𑌮𑍈॒𑌤𑍍𑌰𑌮𑌪𑌿॑ 𑌦𑌧𑌾𑌤𑌿 । 𑌬𑍍𑌰𑌹𑍍𑌮॑ 𑌚𑍈॒𑌵𑌾𑌸𑍍𑌮𑍈᳚ 𑌕𑍍𑌷॒𑌤𑍍𑌰-𑌞𑍍𑌚॑ 𑌸॒𑌮𑍀𑌚𑍀॑ 𑌦𑌧𑌾𑌤𑌿 । 𑌅𑌥𑍋॒ 𑌬𑍍𑌰𑌹𑍍𑌮॑𑌨𑍍𑌨𑍇॒𑌵 𑌕𑍍𑌷॒𑌤𑍍𑌰-𑌮𑍍𑌪𑍍𑌰𑌤𑌿॑𑌷𑍍𑌠𑌾𑌪𑌯𑌤𑌿 । 𑌬𑌾॒𑌰𑍍॒𑌹॒𑌸𑍍𑌪॒𑌤𑍍𑌯𑍇𑌨॒ 𑌪𑍂𑌰𑍍𑌵𑍇॑𑌣॒ 𑌪𑍍𑌰𑌚॑𑌰𑌤𑌿 । 𑌮𑍁॒𑌖॒𑌤 𑌏॒𑌵𑌾𑌸𑍍𑌮𑍈॒ 𑌬𑍍𑌰𑌹𑍍𑌮॒ 𑌸𑌗𑍍𑌗𑍍𑌶𑍍𑌯॑𑌤𑌿 । 𑌅𑌥𑍋॒ 𑌬𑍍𑌰𑌹𑍍𑌮॑𑌨𑍍𑌨𑍇॒𑌵 𑌕𑍍𑌷॒𑌤𑍍𑌰-𑌮॒𑌨𑍍𑌵𑌾𑌰॑𑌮𑍍𑌭𑌯𑌤𑌿 । 𑌸𑍍𑌵॒𑌯॒-𑌙𑍍𑌕𑍃॒𑌤𑌾 𑌵𑍇𑌦𑌿॑𑌰𑍍𑌭𑌵𑌤𑌿 । 𑌸𑍍𑌵॒𑌯॒𑌦𑌿॒𑌨𑍍𑌨-𑌮𑍍𑌬॒𑌰𑍍॒𑌹𑌿𑌃 । 𑌸𑍍𑌵॒𑌯॒𑌕𑍃॒𑌨𑍍𑌤 𑌇॒𑌦𑍍𑌧𑍍𑌮𑌃 । 𑌅𑌨॑𑌭𑌿𑌜𑌿𑌤𑌸𑍍𑌯𑌾॒-𑌭𑌿𑌜𑌿॑𑌤𑍍𑌯𑍈 । 𑌤𑌸𑍍𑌮𑌾॒-𑌦𑍍𑌰𑌾𑌜𑍍𑌞𑌾॒𑌮𑌰॑𑌣𑍍𑌯-𑌮॒𑌭𑌿𑌜𑌿॑𑌤𑌮𑍍 । 𑌸𑍈𑌵 𑌶𑍍𑌵𑍇॒𑌤𑌾 𑌶𑍍𑌵𑍇॒𑌤𑌵॑𑌥𑍍𑌸𑌾॒ 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 ॥ 23 ॥

(𑌰॒𑌤𑍍𑌨𑌿॒𑌤𑍍𑌵𑌾𑌯॒ - 𑌸𑌮𑍃॑𑌦𑍍𑌧𑍍𑌯𑍈 - 𑌪𑌷𑍍𑌠𑍗॒𑌹𑌿 𑌦𑌕𑍍𑌷𑌿॑𑌣𑌾॒ 𑌸𑌮𑍃॑𑌦𑍍𑌧𑍍𑌯𑍈 - 𑌗𑍍𑌰𑌾𑌮॒𑌣𑍍𑌯𑍋॑ 𑌗𑍃॒𑌹𑍇 - 𑌭𑌾॑𑌗𑌦𑍁॒𑌘𑌸𑍍𑌯॑ 𑌗𑍃॒𑌹𑍇-𑌭॑𑌵𑌤𑌿 - 𑌦𑍁॒𑌗𑍍𑌧𑍇॑ - 𑌽𑌭𑌿𑌜𑌿॑𑌤𑍍𑌯𑍈॒ 𑌦𑍍𑌵𑍇 𑌚॑) (𑌅. 3)

𑌅𑌨𑍁𑌵𑌾𑌕𑌂 4 - 𑌦𑍇𑌵𑌸𑍁𑌵𑌾𑌂 𑌹𑌵𑍀𑌂𑌷𑌿

𑌦𑍇॒𑌵॒𑌸𑍁॒𑌵𑌾𑌮𑍇॒𑌤𑌾𑌨𑌿॑ 𑌹॒𑌵𑍀𑌗𑍍𑌂𑌷𑌿॑ 𑌭𑌵𑌨𑍍𑌤𑌿 । 𑌏॒𑌤𑌾𑌵॑𑌨𑍍𑌤𑍋॒ 𑌵𑍈 𑌦𑍇॒𑌵𑌾𑌨𑌾𑌗𑍍𑌂॑ 𑌸॒𑌵𑌾𑌃 । 𑌤 𑌏॒𑌵𑌾𑌸𑍍𑌮𑍈॑ 𑌸॒𑌵𑌾-𑌨𑍍𑌪𑍍𑌰𑌯॑𑌚𑍍𑌛𑌨𑍍𑌤𑌿 । 𑌤 𑌏॑𑌨𑌗𑍍𑌂 𑌸𑍁𑌵𑌨𑍍𑌤𑍇 । 𑌅॒𑌗𑍍𑌨𑌿𑌰𑍇॒𑌵𑍈𑌨॑-𑌙𑍍𑌗𑍃॒𑌹𑌪॑𑌤𑍀𑌨𑌾𑌗𑍍𑌂 𑌸𑍁𑌵𑌤𑍇 । 𑌸𑍋𑌮𑍋॒ 𑌵𑌨॒𑌸𑍍𑌪𑌤𑍀॑𑌨𑌾𑌮𑍍 । 𑌰𑍁॒𑌦𑍍𑌰𑌃 𑌪॑𑌶𑍂॒𑌨𑌾𑌮𑍍 । 𑌬𑍃𑌹॒𑌸𑍍𑌪𑌤𑌿॑-𑌰𑍍𑌵𑌾॒𑌚𑌾𑌮𑍍 । 𑌇𑌨𑍍𑌦𑍍𑌰𑍋᳚ 𑌜𑍍𑌯𑍇॒𑌷𑍍𑌠𑌾𑌨𑌾᳚𑌮𑍍 । 𑌮𑌿॒𑌤𑍍𑌰-𑌸𑍍𑌸॒𑌤𑍍𑌯𑌾𑌨𑌾᳚𑌮𑍍 ॥ 24 ॥

𑌵𑌰𑍁॑𑌣𑍋॒ 𑌧𑌰𑍍𑌮॑𑌪𑌤𑍀𑌨𑌾𑌮𑍍 । 𑌏॒𑌤𑌦𑍇॒𑌵 𑌸𑌰𑍍𑌵॑-𑌮𑍍𑌭𑌵𑌤𑌿 । 𑌸॒𑌵𑌿॒𑌤𑌾 𑌤𑍍𑌵𑌾᳚ 𑌪𑍍𑌰𑌸॒𑌵𑌾𑌨𑌾𑌗𑍍𑌂॑ 𑌸𑍁𑌵𑌤𑌾॒𑌮𑌿𑌤𑌿॒ 𑌹𑌸𑍍𑌤॑-𑌙𑍍𑌗𑍃𑌹𑍍𑌣𑌾𑌤𑌿॒ 𑌪𑍍𑌰𑌸𑍂᳚𑌤𑍍𑌯𑍈 । 𑌯𑍇 𑌦𑍇॑𑌵𑌾 𑌦𑍇𑌵॒𑌸𑍁𑌵॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌯॒𑌥𑌾॒ 𑌯॒𑌜𑍁𑌰𑍇॒𑌵𑍈 𑌤𑌤𑍍 । 𑌮॒𑌹॒𑌤𑍇 𑌕𑍍𑌷॒𑌤𑍍𑌰𑌾𑌯॑ 𑌮𑌹॒𑌤 𑌆𑌧𑌿॑𑌪𑌤𑍍𑌯𑌾𑌯 𑌮𑌹॒𑌤𑍇 𑌜𑌾𑌨॑𑌰𑌾𑌜𑍍𑌯𑌾॒𑌯𑍇𑌤𑍍𑌯𑌾॑𑌹 । 𑌆॒𑌶𑌿𑌷॑𑌮𑍇॒𑌵𑍈𑌤𑌾𑌮𑌾𑌶𑌾᳚𑌸𑍍𑌤𑍇 । 𑌏॒𑌷 𑌵𑍋॑ 𑌭𑌰𑌤𑌾॒ 𑌰𑌾𑌜𑌾॒ 𑌸𑍋𑌮𑍋॒-𑌽𑌸𑍍𑌮𑌾𑌕॑-𑌮𑍍𑌬𑍍𑌰𑌾𑌹𑍍𑌮॒𑌣𑌾𑌨𑌾॒𑌗𑍍𑌂॒ 𑌰𑌾𑌜𑍇𑌤𑍍𑌯𑌾॑𑌹 । 𑌤𑌸𑍍𑌮𑌾॒-𑌥𑍍𑌸𑍋𑌮॑𑌰𑌾𑌜𑌾𑌨𑍋 𑌬𑍍𑌰𑌾𑌹𑍍𑌮॒𑌣𑌾𑌃 । 𑌪𑍍𑌰𑌤𑌿॒ 𑌤𑍍𑌯𑌨𑍍𑌨𑌾𑌮॑ 𑌰𑌾॒𑌜𑍍𑌯𑌮॑𑌧𑌾॒𑌯𑍀𑌤𑍍𑌯𑌾॑𑌹 ॥ 25 ॥

𑌰𑌾॒𑌜𑍍𑌯𑌮𑍇॒𑌵𑌾𑌸𑍍𑌮𑌿॒-𑌨𑍍𑌪𑍍𑌰𑌤𑌿॑ 𑌦𑌧𑌾𑌤𑌿 । 𑌸𑍍𑌵𑌾-𑌨𑍍𑌤॒𑌨𑍁𑌵𑌂॒-𑌵𑌁𑌰𑍁॑𑌣𑍋 𑌅𑌶𑌿𑌶𑍍𑌰𑍇॒𑌦𑌿𑌤𑍍𑌯𑌾॑𑌹 । 𑌵॒𑌰𑍁॒𑌣॒𑌸॒𑌵𑌮𑍇॒𑌵𑌾-𑌵॑𑌰𑍁𑌨𑍍𑌧𑍇 । 𑌶𑍁𑌚𑍇᳚𑌰𑍍𑌮𑌿॒𑌤𑍍𑌰𑌸𑍍𑌯॒ 𑌵𑍍𑌰𑌤𑍍𑌯𑌾॑ 𑌅𑌭𑍂॒𑌮𑍇𑌤𑍍𑌯𑌾॑𑌹 । 𑌶𑍁𑌚𑌿॑𑌮𑍇॒𑌵𑍈𑌨𑌂॒-𑌵𑍍𑌰𑌁𑌤𑍍𑌯॑-𑌙𑍍𑌕𑌰𑍋𑌤𑌿 । 𑌅𑌮॑𑌨𑍍𑌮𑌹𑌿 𑌮𑌹॒𑌤 𑌋॒𑌤𑌸𑍍𑌯॒ 𑌨𑌾𑌮𑍇𑌤𑍍𑌯𑌾॑𑌹 । 𑌮॒𑌨𑍁॒𑌤 𑌏॒𑌵𑍈𑌨᳚𑌮𑍍 । 𑌸𑌰𑍍𑌵𑍇॒ 𑌵𑍍𑌰𑌾𑌤𑌾॒ 𑌵𑌰𑍁॑𑌣𑌸𑍍𑌯𑌾 𑌭𑍂𑌵॒𑌨𑍍𑌨𑌿𑌤𑍍𑌯𑌾॑𑌹 । 𑌸𑌰𑍍𑌵॑𑌵𑍍𑌰𑌾𑌤𑌮𑍇॒𑌵𑍈𑌨॑-𑌙𑍍𑌕𑌰𑍋𑌤𑌿 । 𑌵𑌿 𑌮𑌿॒𑌤𑍍𑌰 𑌏𑌵𑍈॒𑌰𑌰𑌾॑𑌤𑌿-𑌮𑌤𑌾𑌰𑍀॒𑌦𑌿𑌤𑍍𑌯𑌾॑𑌹 ॥ 26 ॥

𑌅𑌰𑌾॑𑌤𑌿𑌮𑍇॒𑌵𑍈𑌨॑-𑌨𑍍𑌤𑌾𑌰𑌯𑌤𑌿 । 𑌅𑌸𑍂॑𑌷𑍁𑌦𑌨𑍍𑌤 𑌯॒𑌜𑍍𑌞𑌿𑌯𑌾॑ 𑌋॒𑌤𑍇𑌨𑍇𑌤𑍍𑌯𑌾॑𑌹 । 𑌸𑍍𑌵॒𑌦𑌯॑𑌤𑍍𑌯𑍇॒𑌵𑍈𑌨᳚𑌮𑍍 । 𑌵𑍍𑌯𑍁॑ 𑌤𑍍𑌰𑌿॒𑌤𑍋 𑌜॑𑌰𑌿॒𑌮𑌾𑌣॑-𑌨𑍍𑌨 𑌆𑌨॒𑌡𑌿𑌤𑍍𑌯𑌾॑𑌹 । 𑌆𑌯𑍁॑𑌰𑍇॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌦𑍍𑌵𑌾𑌭𑍍𑌯𑌾𑌂॒-𑌵𑌿𑌁𑌮𑍃॑𑌷𑍍𑌟𑍇 । 𑌦𑍍𑌵𑌿॒𑌪𑌾-𑌦𑍍𑌯𑌜॑𑌮𑌾𑌨𑌃॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 । 𑌅॒𑌗𑍍𑌨𑍀॒𑌷𑍋॒𑌮𑍀𑌯॑𑌸𑍍𑌯॒ 𑌚𑍈𑌕𑌾॑𑌦𑌶𑌕𑌪𑌾𑌲𑌸𑍍𑌯 𑌦𑍇𑌵𑌸𑍁॒𑌵𑌾-𑌞𑍍𑌚॑ 𑌹॒𑌵𑌿𑌷𑌾॑𑌮॒𑌗𑍍𑌨𑌯𑍇᳚ 𑌸𑍍𑌵𑌿𑌷𑍍𑌟॒𑌕𑍃𑌤𑍇॑ 𑌸॒𑌮𑌵॑𑌦𑍍𑌯𑌤𑌿 । 𑌦𑍇॒𑌵𑌤𑌾॑𑌭𑌿𑌰𑍇॒𑌵𑍈𑌨॑-𑌮𑍁𑌭॒𑌯𑌤𑌃॒ 𑌪𑌰𑌿॑𑌗𑍃𑌹𑍍𑌣𑌾𑌤𑌿 । 𑌵𑌿॒𑌷𑍍𑌣𑍁॒𑌕𑍍𑌰॒𑌮𑌾𑌨𑍍 𑌕𑍍𑌰॑𑌮𑌤𑍇( ) । 𑌵𑌿𑌷𑍍𑌣𑍁॑𑌰𑍇॒𑌵 𑌭𑍂॒𑌤𑍍𑌵𑍇𑌮𑌾𑌁𑌲𑍍𑌲𑍋॒𑌕𑌾-𑌨॒𑌭𑌿𑌜॑𑌯𑌤𑌿 ॥ 27 ॥

(𑌸॒𑌤𑍍𑌯𑌾𑌨𑌾॑-𑌮𑌧𑌾॒𑌯𑍀𑌤𑍍𑌯𑌾॑-𑌹𑌾𑌤𑌾𑌰𑍀॒𑌦𑌿𑌤𑍍𑌯𑌾॑𑌹-𑌕𑍍𑌰𑌮𑌤॒ 𑌏𑌕॑-𑌞𑍍𑌚) (𑌅. 4)

𑌅𑌨𑍁𑌵𑌾𑌕𑌂 5 - 𑌅𑌭𑌿𑌷𑍇𑌕𑌾𑌰𑍍𑌥𑌮𑌪𑌾𑌙𑍍𑌗𑍍𑌰𑌹𑌗𑍍𑌰𑌹𑌣𑌮𑍍

𑌅॒𑌰𑍍𑌥𑍇𑌤॒-𑌸𑍍𑌸𑍍𑌥𑍇𑌤𑌿॑ 𑌜𑍁𑌹𑍋𑌤𑌿 । 𑌆𑌹𑍁॑𑌤𑍍𑌯𑍈॒𑌵𑍈𑌨𑌾॑ 𑌨𑌿॒𑌷𑍍𑌕𑍍𑌰𑍀𑌯॑ 𑌗𑍃𑌹𑍍𑌣𑌾𑌤𑌿 । 𑌅𑌥𑍋॑ 𑌹॒𑌵𑌿𑌷𑍍𑌕𑍃॑𑌤𑌾𑌨𑌾𑌮𑍇॒𑌵𑌾𑌭𑌿𑌘𑍃॑𑌤𑌾𑌨𑌾-𑌙𑍍𑌗𑍃𑌹𑍍𑌣𑌾𑌤𑌿 । 𑌵𑌹॑𑌨𑍍𑌤𑍀𑌨𑌾-𑌙𑍍𑌗𑍃𑌹𑍍𑌣𑌾𑌤𑌿 । 𑌏॒𑌤𑌾 𑌵𑌾 𑌅॒𑌪𑌾𑌗𑍍𑌂 𑌰𑌾॒𑌷𑍍𑌟𑍍𑌰𑌮𑍍 । 𑌰𑌾॒𑌷𑍍𑌟𑍍𑌰𑌮𑍇॒𑌵𑌾𑌸𑍍𑌮𑍈॑ 𑌗𑍃𑌹𑍍𑌣𑌾𑌤𑌿 । 𑌅𑌥𑍋॒ 𑌶𑍍𑌰𑌿𑌯॑𑌮𑍇॒𑌵𑍈𑌨॑𑌮॒𑌭𑌿 𑌵॑𑌹𑌨𑍍𑌤𑌿 । 𑌅॒𑌪𑌾-𑌮𑍍𑌪𑌤𑌿॑𑌰॒𑌸𑍀𑌤𑍍𑌯𑌾॑𑌹 । 𑌮𑌿॒𑌥𑍁॒𑌨𑌮𑍇॒𑌵𑌾𑌕𑌃॑ । 𑌵𑍃𑌷𑌾᳚-𑌽𑌸𑍍𑌯𑍂॒𑌰𑍍𑌮𑌿𑌰𑌿𑌤𑍍𑌯𑌾॑𑌹 ॥ 28 ॥

𑌊॒𑌰𑍍𑌮𑌿॒𑌮𑌨𑍍𑌤॑𑌮𑍇॒𑌵𑍈𑌨॑-𑌙𑍍𑌕𑌰𑍋𑌤𑌿 । 𑌵𑍃॒𑌷॒𑌸𑍇॒𑌨𑍋॑-𑌽𑌸𑍀𑌤𑍍𑌯𑌾॑𑌹 । 𑌸𑍇𑌨𑌾॑𑌮𑍇॒𑌵𑌾𑌸𑍍𑌯॒ 𑌸𑌗𑍍𑌗𑍍𑌶𑍍𑌯॑𑌤𑌿 । 𑌵𑍍𑌰॒𑌜॒𑌕𑍍𑌷𑌿𑌤॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌏॒𑌤𑌾 𑌵𑌾 𑌅॒𑌪𑌾𑌂-𑌵𑌿𑌁𑌶𑌃॑ । 𑌵𑌿𑌶॑𑌮𑍇॒𑌵𑌾𑌸𑍍𑌮𑍈॒ 𑌪𑌰𑍍𑌯𑍂॑𑌹𑌤𑌿 । 𑌮॒𑌰𑍁𑌤𑌾॒𑌮𑍋𑌜॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌅𑌨𑍍𑌨𑌂॒-𑌵𑍈𑌁 𑌮॒𑌰𑍁𑌤𑌃॑ । 𑌅𑌨𑍍𑌨॑𑌮𑍇॒𑌵𑌾 𑌵॑𑌰𑍁𑌨𑍍𑌧𑍇 । 𑌸𑍂𑌰𑍍𑌯॑𑌵𑌰𑍍𑌚𑌸॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 ॥ 29 ॥

𑌰𑌾॒𑌷𑍍𑌟𑍍𑌰𑌮𑍇॒𑌵 𑌵॑𑌰𑍍𑌚॒𑌸𑍍𑌵𑍍𑌯॑𑌕𑌃 । 𑌸𑍂𑌰𑍍𑌯॑𑌤𑍍𑌵𑌚𑌸॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌸॒𑌤𑍍𑌯𑌂-𑌵𑌾𑌁 𑌏॒𑌤𑌤𑍍 । 𑌯-𑌦𑍍𑌵𑌰𑍍𑌷॑𑌤𑌿 । 𑌅𑌨𑍃॑𑌤𑌂॒-𑌯𑌁𑌦𑌾॒𑌤𑌪॑𑌤𑌿॒ 𑌵𑌰𑍍𑌷॑𑌤𑌿 । 𑌸॒𑌤𑍍𑌯𑌾॒𑌨𑍃॒𑌤𑍇 𑌏॒𑌵𑌾𑌵॑𑌰𑍁𑌨𑍍𑌧𑍇 । 𑌨𑍈𑌨𑌗𑍍𑌂॑ 𑌸𑌤𑍍𑌯𑌾𑌨𑍃॒𑌤𑍇 𑌉॑𑌦𑌿॒𑌤𑍇 𑌹𑌿𑌗𑍍𑌗𑍍॑𑌸𑍍𑌤𑌃 । 𑌯 𑌏॒𑌵𑌂-𑌵𑍇𑌁𑌦॑ । 𑌮𑌾𑌨𑍍𑌦𑌾॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌬𑍍𑌰॑𑌹𑍍𑌮𑌵𑌰𑍍𑌚॒𑌸𑍍𑌯॑𑌕𑌃 ॥ 30 ॥

𑌵𑌾𑌶𑌾॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌵॒𑌶𑍍𑌯॑𑌕𑌃 । 𑌶𑌕𑍍𑌵॑𑌰𑍀॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌪॒𑌶𑌵𑍋॒ 𑌵𑍈 𑌶𑌕𑍍𑌵॑𑌰𑍀𑌃 । 𑌪॒𑌶𑍂𑌨𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌵𑌿॒𑌶𑍍𑌵॒𑌭𑍃𑌤॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌪॑𑌯॒𑌸𑍍𑌵𑍍𑌯॑𑌕𑌃 । 𑌜॒𑌨॒𑌭𑍃𑌤॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌰𑌾॒𑌷𑍍𑌟𑍍𑌰𑌮𑍇॒𑌵𑍇𑌨𑍍𑌦𑍍𑌰𑌿॑𑌯𑌾॒𑌵𑍍𑌯॑𑌕𑌃 । 𑌅॒𑌗𑍍𑌨𑍇𑌸𑍍𑌤𑍇॑𑌜॒𑌸𑍍𑌯𑌾᳚-𑌸𑍍𑌸𑍍𑌥𑍇𑌤𑍍𑌯𑌾॑𑌹 ॥ 31 ॥

𑌰𑌾॒𑌷𑍍𑌟𑍍𑌰𑌮𑍇॒𑌵 𑌤𑍇॑𑌜॒𑌸𑍍𑌵𑍍𑌯॑𑌕𑌃 । 𑌅॒𑌪𑌾𑌮𑍋𑌷॑𑌧𑍀𑌨𑌾॒𑌗𑍍𑌂॒ 𑌰𑌸॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌮॑𑌧॒𑌵𑍍𑌯॑𑌮𑌕𑌃 । 𑌸𑌾॒𑌰॒𑌸𑍍𑌵॒𑌤-𑌙𑍍𑌗𑍍𑌰𑌹॑-𑌙𑍍𑌗𑍃𑌹𑍍𑌣𑌾𑌤𑌿 । 𑌏॒𑌷𑌾 𑌵𑌾 𑌅॒𑌪𑌾-𑌮𑍍𑌪𑍃॒𑌷𑍍𑌠𑌮𑍍 । 𑌯𑌥𑍍𑌸𑌰॑𑌸𑍍𑌵𑌤𑍀 । 𑌪𑍃॒𑌷𑍍𑌠𑌮𑍇॒𑌵𑍈𑌨𑌗𑍍𑌂॑ 𑌸𑌮𑌾॒𑌨𑌾𑌨𑌾᳚-𑌙𑍍𑌕𑌰𑍋𑌤𑌿 । 𑌷𑍋॒𑌡॒𑌶𑌭𑌿॑-𑌰𑍍𑌗𑍃𑌹𑍍𑌣𑌾𑌤𑌿 । 𑌷𑍋𑌡॑𑌶𑌕𑌲𑍋॒ 𑌵𑍈 𑌪𑍁𑌰𑍁॑𑌷𑌃 । 𑌯𑌾𑌵𑌾॑𑌨𑍇॒𑌵 𑌪𑍁𑌰𑍁॑𑌷𑌃 । 𑌤𑌸𑍍𑌮𑌿॑𑌨𑍍 𑌵𑍀॒𑌰𑍍𑌯॑-𑌨𑍍𑌦𑌧𑌾𑌤𑌿 । 𑌷𑍋॒𑌡॒𑌶𑌭𑌿॑-𑌰𑍍𑌜𑍁॒𑌹𑍋𑌤𑌿॑ 𑌷𑍋𑌡॒𑌶𑌭𑌿॑-𑌰𑍍𑌗𑍃𑌹𑍍𑌣𑌾𑌤𑌿 । 𑌦𑍍𑌵𑌾𑌤𑍍𑌰𑌿𑌗𑍍𑌂॑𑌶॒-𑌥𑍍𑌸𑌮𑍍𑌪॑𑌦𑍍𑌯𑌨𑍍𑌤𑍇 । 𑌦𑍍𑌵𑌾𑌤𑍍𑌰𑌿𑌗𑍍𑌂॑𑌶𑌦𑌕𑍍𑌷𑌰𑌾 𑌽𑌨𑍁॒𑌷𑍍𑌟𑍁𑌕𑍍 । 𑌵𑌾𑌗॑𑌨𑍁॒𑌷𑍍𑌟𑍁-𑌫𑍍𑌸𑌰𑍍𑌵𑌾॑𑌣𑌿॒ 𑌛𑌨𑍍𑌦𑌾𑌗𑍍𑌂॑𑌸𑌿 । 𑌵𑌾॒𑌚𑍈𑌵𑍈𑌨॒𑌗𑍍𑌂॒ 𑌸𑌰𑍍𑌵𑍇॑𑌭𑌿॒-𑌶𑍍𑌛𑌨𑍍𑌦𑍋॑𑌭𑌿-𑌰॒𑌭𑌿𑌷𑌿॑𑌞𑍍𑌚𑌤𑌿 ॥ 32 ॥

(𑌊॒𑌰𑍍𑌮𑌿𑌰𑌿𑌤𑍍𑌯𑌾॑𑌹॒ - 𑌸𑍂𑌰𑍍𑌯॑𑌵𑌰𑍍𑌚𑌸॒-𑌸𑍍𑌸𑍍𑌥𑍇𑌤𑍍𑌯𑌾॑𑌹 - 𑌬𑍍𑌰𑌹𑍍𑌮𑌵𑌰𑍍𑌚॒𑌸𑍍𑌯॑𑌕 - 𑌸𑍍𑌤𑍇𑌜॒𑌸𑍍𑌯𑌾᳚-𑌸𑍍𑌸𑍍𑌥𑍇𑌤𑍍𑌯𑌾॑𑌹𑍈॒𑌵 - 𑌪𑍁𑌰𑍁॑𑌷॒-𑌷𑍍𑌷𑌟𑍍𑌚॑) (𑌅. 5)

𑌅𑌨𑍁𑌵𑌾𑌕𑌂 6 - 𑌅𑌭𑌿𑌷𑍇𑌕𑌾𑌰𑍍𑌥𑌜𑌲𑌸𑌂𑌸𑍍𑌕𑌾𑌰𑌃

𑌦𑍇𑌵𑍀॑𑌰𑌾𑌪॒-𑌸𑍍𑌸-𑌮𑍍𑌮𑌧𑍁॑𑌮𑌤𑍀॒-𑌰𑍍𑌮𑌧𑍁॑𑌮𑌤𑍀𑌭𑌿-𑌸𑍍𑌸𑍃𑌜𑍍𑌯𑌦𑍍𑌧𑍍𑌵॒𑌮𑌿𑌤𑍍𑌯𑌾॑𑌹 । 𑌬𑍍𑌰𑌹𑍍𑌮॑𑌣𑍈॒𑌵𑍈𑌨𑌾॒-𑌸𑍍𑌸𑌗𑍍𑌂 𑌸𑍃॑𑌜𑌤𑌿 । 𑌅𑌨𑌾॑𑌧𑍃𑌷𑍍𑌟𑌾-𑌸𑍍𑌸𑍀𑌦॒𑌤𑍇𑌤𑍍𑌯𑌾॑𑌹 । 𑌬𑍍𑌰𑌹𑍍𑌮॑𑌣𑍈॒𑌵𑍈𑌨𑌾᳚-𑌸𑍍𑌸𑌾𑌦𑌯𑌤𑌿 । 𑌅॒𑌨𑍍𑌤॒𑌰𑌾 𑌹𑍋𑌤𑍁॑𑌶𑍍𑌚॒ 𑌧𑌿𑌷𑍍𑌣𑌿॑𑌯-𑌮𑍍𑌬𑍍𑌰𑌾𑌹𑍍𑌮𑌣𑌾𑌚𑍍𑌛॒𑌗𑍍𑌂॒ 𑌸𑌿𑌨॑𑌶𑍍𑌚 𑌸𑌾𑌦𑌯𑌤𑌿 । 𑌆॒𑌗𑍍𑌨𑍇॒𑌯𑍋 𑌵𑍈 𑌹𑍋𑌤𑌾᳚ । 𑌐॒𑌨𑍍𑌦𑍍𑌰𑍋 𑌬𑍍𑌰𑌾᳚𑌹𑍍𑌮𑌣𑌾𑌚𑍍𑌛॒𑌗𑍍𑌂॒𑌸𑍀 । 𑌤𑍇𑌜॑𑌸𑌾 𑌚𑍈॒𑌵𑍇𑌨𑍍𑌦𑍍𑌰𑌿॒𑌯𑍇𑌣॑ 𑌚𑍋𑌭॒𑌯𑌤𑍋॑ 𑌰𑌾॒𑌷𑍍𑌟𑍍𑌰-𑌮𑍍𑌪𑌰𑌿॑𑌗𑍃𑌹𑍍𑌣𑌾𑌤𑌿 । 𑌹𑌿𑌰॑𑌣𑍍𑌯𑍇॒𑌨𑍋-𑌤𑍍𑌪𑍁॑𑌨𑌾𑌤𑌿 । 𑌆𑌹𑍁॑𑌤𑍍𑌯𑍈॒ 𑌹𑌿 𑌪॒𑌵𑌿𑌤𑍍𑌰𑌾᳚𑌭𑍍𑌯𑌾𑌮𑍁𑌤𑍍𑌪𑍁॒𑌨𑌨𑍍𑌤𑌿॒ 𑌵𑍍𑌯𑌾𑌵𑍃॑𑌤𑍍𑌤𑍍𑌯𑍈 ॥ 33 ॥

𑌶॒𑌤𑌮𑌾॑𑌨-𑌮𑍍𑌭𑌵𑌤𑌿 । 𑌶॒𑌤𑌾𑌯𑍁𑌃॒ 𑌪𑍁𑌰𑍁॑𑌷-𑌶𑍍𑌶॒𑌤𑍇𑌨𑍍𑌦𑍍𑌰𑌿॑𑌯𑌃 । 𑌆𑌯𑍁॑𑌷𑍍𑌯𑍇॒𑌵𑍇𑌨𑍍𑌦𑍍𑌰𑌿॒𑌯𑍇 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌅𑌨𑌿॑𑌭𑍃𑌷𑍍𑌟𑌮॒𑌸𑍀𑌤𑍍𑌯𑌾॑𑌹 । 𑌅𑌨𑌿॑𑌭𑍃𑌷𑍍𑌟॒𑌗𑍍𑌗𑍍॒ 𑌹𑍍𑌯𑍇॑𑌤𑌤𑍍 । 𑌵𑌾॒𑌚𑍋 𑌬𑌨𑍍𑌧𑍁॒𑌰𑌿𑌤𑍍𑌯𑌾॑𑌹 । 𑌵𑌾॒𑌚𑍋 𑌹𑍍𑌯𑍇॑𑌷 𑌬𑌨𑍍𑌧𑍁𑌃॑ । 𑌤॒𑌪𑍋॒𑌜𑌾 𑌇𑌤𑍍𑌯𑌾॑𑌹 । 𑌤॒𑌪𑍋॒𑌜𑌾 𑌹𑍍𑌯𑍇॑𑌤𑌤𑍍 । 𑌸𑍋𑌮॑𑌸𑍍𑌯 𑌦𑌾॒𑌤𑍍𑌰𑌮॒𑌸𑍀𑌤𑍍𑌯𑌾॑𑌹 ॥ 34 ॥

𑌸𑍋𑌮॑𑌸𑍍𑌯॒ 𑌹𑍍𑌯𑍇॑𑌤𑌦𑍍𑌦𑌾॒𑌤𑍍𑌰𑌮𑍍 । 𑌶𑍁॒𑌕𑍍𑌰𑌾 𑌵𑌃॑ 𑌶𑍁॒𑌕𑍍𑌰𑍇𑌣𑍋𑌤𑍍𑌪𑍁॑𑌨𑌾॒𑌮𑍀𑌤𑍍𑌯𑌾॑𑌹 । 𑌶𑍁॒𑌕𑍍𑌰𑌾 𑌹𑍍𑌯𑌾𑌪𑌃॑ । 𑌶𑍁॒𑌕𑍍𑌰𑌗𑍍𑌂 𑌹𑌿𑌰॑𑌣𑍍𑌯𑌮𑍍 । 𑌚॒𑌨𑍍𑌦𑍍𑌰𑌾𑌶𑍍𑌚॒𑌨𑍍𑌦𑍍𑌰𑍇𑌣𑍇𑌤𑍍𑌯𑌾॑𑌹 । 𑌚॒𑌨𑍍𑌦𑍍𑌰𑌾 𑌹𑍍𑌯𑌾𑌪𑌃॑ । 𑌚॒𑌨𑍍𑌦𑍍𑌰𑌗𑍍𑌂 𑌹𑌿𑌰॑𑌣𑍍𑌯𑌮𑍍 । 𑌅॒𑌮𑍃𑌤𑌾॑ 𑌅॒𑌮𑍃𑌤𑍇॒𑌨𑍇𑌤𑍍𑌯𑌾॑𑌹 । 𑌅॒𑌮𑍃𑌤𑌾॒ 𑌹𑍍𑌯𑌾𑌪𑌃॑ । 𑌅॒𑌮𑍃𑌤॒𑌗𑍍𑌂॒ 𑌹𑌿𑌰॑𑌣𑍍𑌯𑌮𑍍 ॥ 35 ॥

𑌸𑍍𑌵𑌾𑌹𑌾॑ 𑌰𑌾𑌜॒𑌸𑍂𑌯𑌾॒𑌯𑍇𑌤𑍍𑌯𑌾॑𑌹 । 𑌰𑌾॒𑌜॒𑌸𑍂𑌯𑌾॑𑌯॒ 𑌹𑍍𑌯𑍇॑𑌨𑌾 𑌉𑌤𑍍𑌪𑍁॒𑌨𑌾𑌤𑌿॑ । 𑌸॒𑌧॒𑌮𑌾𑌦𑍋᳚ 𑌦𑍍𑌯𑍁॒𑌮𑍍𑌨𑌿𑌨𑍀॒𑌰𑍂𑌰𑍍𑌜॑ 𑌏॒𑌤𑌾 𑌇𑌤𑌿॑ 𑌵𑌾𑌰𑍁॒𑌣𑍍𑌯𑌰𑍍𑌚𑌾 𑌗𑍃॑𑌹𑍍𑌣𑌾𑌤𑌿 । 𑌵॒𑌰𑍁॒𑌣॒𑌸॒𑌵𑌮𑍇॒𑌵𑌾 𑌵॑𑌰𑍁𑌨𑍍𑌧𑍇 । 𑌏𑌕॑𑌯𑌾 𑌗𑍃𑌹𑍍𑌣𑌾𑌤𑌿 । 𑌏॒𑌕॒𑌧𑍈𑌵 𑌯𑌜॑𑌮𑌾𑌨𑍇 𑌵𑍀॒𑌰𑍍𑌯॑-𑌨𑍍𑌦𑌧𑌾𑌤𑌿 । 𑌕𑍍𑌷॒𑌤𑍍𑌰𑌸𑍍𑌯𑍋𑌲𑍍𑌬॑𑌮𑌸𑌿 𑌕𑍍𑌷॒𑌤𑍍𑌰𑌸𑍍𑌯॒ 𑌯𑍋𑌨𑌿॑𑌰॒𑌸𑍀𑌤𑌿॑ 𑌤𑌾॒𑌰𑍍𑌪𑍍𑌯-𑌞𑍍𑌚𑍋॒𑌷𑍍𑌣𑍀𑌷॑-𑌞𑍍𑌚॒ 𑌪𑍍𑌰𑌯॑𑌚𑍍𑌛𑌤𑌿 𑌸𑌯𑍋𑌨𑌿॒𑌤𑍍𑌵𑌾𑌯॑ । 𑌏𑌕॑𑌶𑌤𑍇𑌨 𑌦𑌰𑍍𑌭𑌪𑍁𑌞𑍍𑌜𑍀॒𑌲𑍈𑌃 𑌪॑𑌵𑌯𑌤𑌿 । 𑌶॒𑌤𑌾𑌯𑍁॒𑌰𑍍𑌵𑍈 𑌪𑍁𑌰𑍁॑𑌷-𑌶𑍍𑌶॒𑌤𑌵𑍀᳚𑌰𑍍𑌯𑌃 । 𑌆॒𑌤𑍍𑌮𑍈𑌕॑𑌶॒𑌤𑌃 ॥ 36 ॥

𑌯𑌾𑌵𑌾॑𑌨𑍇॒𑌵 𑌪𑍁𑌰𑍁॑𑌷𑌃 । 𑌤𑌸𑍍𑌮𑌿॑𑌨𑍍 𑌵𑍀॒𑌰𑍍𑌯॑-𑌨𑍍𑌦𑌧𑌾𑌤𑌿 । 𑌦𑌦𑍍𑌧𑍍𑌯𑌾॑𑌶𑌯𑌤𑌿 । 𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵𑌾-𑌵॑𑌰𑍁𑌨𑍍𑌧𑍇 । 𑌉॒𑌦𑍁॒𑌮𑍍𑌬𑌰॑-𑌮𑌾𑌶𑌯𑌤𑌿 । 𑌅॒𑌨𑍍𑌨𑌾𑌦𑍍𑌯॒𑌸𑍍𑌯𑌾𑌵॑ 𑌰𑍁𑌦𑍍𑌧𑍍𑌯𑍈 । 𑌶𑌷𑍍𑌪𑌾᳚𑌣𑍍𑌯𑌾𑌶𑌯𑌤𑌿 । 𑌸𑍁𑌰𑌾॑𑌬𑌲𑌿-𑌮𑍇॒𑌵𑍈𑌨॑-𑌙𑍍𑌕𑌰𑍋𑌤𑌿 । 𑌆॒𑌵𑌿𑌦॑ 𑌏॒𑌤𑌾 𑌭॑𑌵𑌨𑍍𑌤𑌿 । 𑌆॒𑌵𑌿𑌦॑𑌮𑍇॒𑌵𑍈𑌨॑-𑌙𑍍𑌗𑌮𑌯𑌨𑍍𑌤𑌿 ॥ 37 ॥

𑌅॒𑌗𑍍𑌨𑌿𑌰𑍇॒𑌵𑍈𑌨॒-𑌙𑍍𑌗𑌾𑌰𑍍𑌹॑𑌪𑌤𑍍𑌯𑍇𑌨𑌾𑌵𑌤𑌿 । 𑌇𑌨𑍍𑌦𑍍𑌰॑ 𑌇𑌨𑍍𑌦𑍍𑌰𑌿॒𑌯𑍇𑌣॑ । 𑌪𑍂॒𑌷𑌾 𑌪॒𑌶𑍁𑌭𑌿𑌃॑ । 𑌮𑌿॒𑌤𑍍𑌰𑌾𑌵𑌰𑍁॑𑌣𑍗 𑌪𑍍𑌰𑌾𑌣𑌾𑌪𑌾॒𑌨𑌾𑌭𑍍𑌯𑌾᳚𑌮𑍍 । 𑌇𑌨𑍍𑌦𑍍𑌰𑍋॑ 𑌵𑍃॒𑌤𑍍𑌰𑌾𑌯॒ 𑌵𑌜𑍍𑌰॒𑌮𑍁𑌦॑𑌯𑌚𑍍𑌛𑌤𑍍 । 𑌸 𑌦𑌿𑌵॑𑌮𑌲𑌿𑌖𑌤𑍍 । 𑌸𑍋᳚-𑌽𑌰𑍍𑌯॒𑌮𑍍𑌣𑌃 𑌪𑌨𑍍𑌥𑌾॑ 𑌅𑌭𑌵𑌤𑍍 । 𑌸 𑌆𑌵𑌿॑𑌨𑍍𑌨𑍇॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌧𑍃॒𑌤𑌵𑍍𑌰॑𑌤𑍇॒ 𑌇𑌤𑌿॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌉𑌪𑌾॑𑌧𑌾𑌵𑌤𑍍 । 𑌸 𑌆॒𑌭𑍍𑌯𑌾𑌮𑍇॒𑌵 𑌪𑍍𑌰𑌸𑍂॑𑌤॒ 𑌇𑌨𑍍𑌦𑍍𑌰𑍋॑ 𑌵𑍃॒𑌤𑍍𑌰𑌾𑌯॒ 𑌵𑌜𑍍𑌰॒-𑌮𑍍𑌪𑍍𑌰𑌾𑌹॑𑌰𑌤𑍍 । 𑌆𑌵𑌿॑𑌨𑍍𑌨𑍇॒ 𑌦𑍍𑌯𑌾𑌵𑌾॑𑌪𑍃𑌥𑌿॒𑌵𑍀 𑌧𑍃॒𑌤𑌵𑍍𑌰॑𑌤𑍇॒ 𑌇𑌤𑌿॒ 𑌯𑌦𑌾𑌹॑ ॥ 38 ॥

𑌆॒𑌭𑍍𑌯𑌾𑌮𑍇॒𑌵 𑌪𑍍𑌰𑌸𑍂॑𑌤𑍋॒ 𑌯𑌜॑𑌮𑌾𑌨𑍋॒ 𑌵𑌜𑍍𑌰॒-𑌮𑍍𑌭𑍍𑌰𑌾𑌤𑍃॑𑌵𑍍𑌯𑌾𑌯॒ 𑌪𑍍𑌰𑌹॑𑌰𑌤𑌿 । 𑌆𑌵𑌿॑𑌨𑍍𑌨𑌾 𑌦𑍇॒𑌵𑍍𑌯𑌦𑌿॑𑌤𑌿-𑌰𑍍𑌵𑌿𑌶𑍍𑌵𑌰𑍂॒𑌪𑍀𑌤𑍍𑌯𑌾॑𑌹 । 𑌇॒𑌯𑌂-𑌵𑍈𑌁 𑌦𑍇॒𑌵𑍍𑌯𑌦𑌿॑𑌤𑌿-𑌰𑍍𑌵𑌿𑌶𑍍𑌵𑌰𑍂॒𑌪𑍀 । 𑌅॒𑌸𑍍𑌯𑌾𑌮𑍇॒𑌵 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿 । 𑌆𑌵𑌿॑𑌨𑍍𑌨𑍋॒-𑌽𑌯𑌮॒𑌸𑌾𑌵𑌾॑𑌮𑍁𑌷𑍍𑌯𑌾𑌯॒𑌣𑍋᳚-𑌽𑌸𑍍𑌯𑌾𑌂-𑌵𑌿𑌁॒𑌶𑍍𑌯॑𑌸𑍍𑌮𑌿-𑌨𑍍𑌰𑌾॒𑌷𑍍𑌟𑍍𑌰 𑌇𑌤𑍍𑌯𑌾॑𑌹 । 𑌵𑌿॒𑌶𑍈𑌵𑍈𑌨𑌗𑍍𑌂॑ 𑌰𑌾॒𑌷𑍍𑌟𑍍𑌰𑍇𑌣॒ 𑌸𑌮॑𑌰𑍍𑌧𑌯𑌤𑌿 । 𑌮॒𑌹॒𑌤𑍇 𑌕𑍍𑌷॒𑌤𑍍𑌰𑌾𑌯॑ 𑌮𑌹॒𑌤 𑌆𑌧𑌿॑𑌪𑌤𑍍𑌯𑌾𑌯 𑌮𑌹॒𑌤𑍇 𑌜𑌾𑌨॑𑌰𑌾𑌜𑍍𑌯𑌾॒𑌯𑍇𑌤𑍍𑌯𑌾॑𑌹 । 𑌆॒𑌶𑌿𑌷॑𑌮𑍇॒𑌵𑍈𑌤𑌾𑌮𑌾𑌶𑌾᳚𑌸𑍍𑌤𑍇 । 𑌏॒𑌷 𑌵𑍋॑ 𑌭𑌰𑌤𑌾॒ 𑌰𑌾𑌜𑌾॒ 𑌸𑍋𑌮𑍋॒-𑌽𑌸𑍍𑌮𑌾𑌕॑-𑌮𑍍𑌬𑍍𑌰𑌾𑌹𑍍𑌮॒𑌣𑌾𑌨𑌾॒𑌗𑍍𑌂॒ 𑌰𑌾𑌜𑍇𑌤𑍍𑌯𑌾॑𑌹 । 𑌤𑌸𑍍𑌮𑌾॒-𑌥𑍍𑌸𑍋𑌮॑𑌰𑌾𑌜𑌾𑌨𑍋 𑌬𑍍𑌰𑌾𑌹𑍍𑌮॒𑌣𑌾𑌃 ॥ 39 ॥

𑌇𑌨𑍍𑌦𑍍𑌰॑𑌸𑍍𑌯॒ 𑌵𑌜𑍍𑌰𑍋॑-𑌽𑌸𑌿॒ 𑌵𑌾𑌰𑍍𑌤𑍍𑌰॑𑌘𑍍𑌨॒ 𑌇𑌤𑌿॒ 𑌧𑌨𑍁𑌃॒ 𑌪𑍍𑌰𑌯॑𑌚𑍍𑌛𑌤𑌿॒ 𑌵𑌿𑌜𑌿॑𑌤𑍍𑌯𑍈 । 𑌶॒𑌤𑍍𑌰𑍁॒𑌬𑌾𑌧॑𑌨𑌾॒-𑌸𑍍𑌸𑍍𑌥𑍇𑌤𑍀𑌷𑍂𑌨𑍍॑ । 𑌶𑌤𑍍𑌰𑍂॑𑌨𑍇॒𑌵𑌾𑌸𑍍𑌯॑ 𑌬𑌾𑌧𑌨𑍍𑌤𑍇 । 𑌪𑌾॒𑌤 𑌮𑌾᳚ 𑌪𑍍𑌰॒𑌤𑍍𑌯𑌞𑍍𑌚॑-𑌮𑍍𑌪𑌾॒𑌤 𑌮𑌾॑ 𑌤𑌿॒𑌰𑍍𑌯𑌞𑍍𑌚॑𑌮॒𑌨𑍍𑌵𑌞𑍍𑌚॑-𑌮𑍍𑌮𑌾 𑌪𑌾॒𑌤𑍇𑌤𑍍𑌯𑌾॑𑌹 । 𑌤𑌿॒𑌸𑍍𑌰𑍋 𑌵𑍈 𑌶॑𑌰॒𑌵𑍍𑌯𑌾𑌃᳚ । 𑌪𑍍𑌰॒𑌤𑍀𑌚𑍀॑ 𑌤𑌿॒𑌰𑌶𑍍𑌚𑍍𑌯॒𑌨𑍂𑌚𑍀᳚ । 𑌤𑌾𑌭𑍍𑌯॑ 𑌏॒𑌵𑍈𑌨॑-𑌮𑍍𑌪𑌾𑌨𑍍𑌤𑌿 । 𑌦𑌿॒𑌗𑍍𑌭𑍍𑌯𑍋 𑌮𑌾॑ 𑌪𑌾॒𑌤𑍇𑌤𑍍𑌯𑌾॑𑌹 । 𑌦𑌿॒𑌗𑍍𑌭𑍍𑌯 𑌏॒𑌵𑍈𑌨॑-𑌮𑍍𑌪𑌾𑌨𑍍𑌤𑌿 । 𑌵𑌿𑌶𑍍𑌵𑌾᳚𑌭𑍍𑌯𑍋 𑌮𑌾 𑌨𑌾॒𑌷𑍍𑌟𑍍𑌰𑌾𑌭𑍍𑌯𑌃॑ 𑌪𑌾॒𑌤𑍇𑌤𑍍𑌯𑌾॑𑌹 । 𑌅𑌪॑𑌰𑌿𑌮𑌿𑌤𑌾𑌦𑍇॒𑌵𑍈𑌨॑-𑌮𑍍𑌪𑌾𑌨𑍍𑌤𑌿 । 𑌹𑌿𑌰॑𑌣𑍍𑌯𑌵𑌰𑍍𑌣𑌾𑌵𑍁॒𑌷𑌸𑌾𑌂᳚-𑌵𑌿𑌁𑌰𑍋॒𑌕 𑌇𑌤𑌿॑ 𑌤𑍍𑌰𑌿॒𑌷𑍍𑌟𑍁𑌭𑌾॑ 𑌬𑌾॒𑌹𑍂 𑌉-𑌦𑍍𑌗𑍃॑𑌹𑍍𑌣𑌾𑌤𑌿 । 𑌇॒𑌨𑍍𑌦𑍍𑌰𑌿॒𑌯𑌂-𑌵𑍈𑌁 𑌵𑍀॒𑌰𑍍𑌯॑-𑌨𑍍𑌤𑍍𑌰𑌿॒𑌷𑍍𑌟𑍁𑌕𑍍 । 𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵 𑌵𑍀॒𑌰𑍍𑌯॑-𑌮𑍁॒𑌪𑌰𑌿॑𑌷𑍍𑌟𑌾𑌦𑌾॒𑌤𑍍𑌮𑌨𑍍-𑌧॑𑌤𑍍𑌤𑍇 ॥ 40 ॥

(𑌵𑍍𑌯𑌾𑌵𑍃॑𑌤𑍍𑌤𑍍𑌯𑍈-𑌦𑌾॒𑌤𑍍𑌰𑌮॒𑌸𑍀𑌤𑍍𑌯𑌾॑𑌹𑌾॒-𑌮𑍃𑌤॒𑌗𑍍𑌂॒ 𑌹𑌿𑌰॑𑌣𑍍𑌯-𑌮𑍇𑌕𑌶॒𑌤𑍋-𑌗॑𑌮𑌯॒𑌨𑍍-𑌤𑍍𑌯𑌾𑌹॑-𑌬𑍍𑌰𑌾𑌹𑍍𑌮𑌾॒𑌣𑌾-𑌨𑌾॒𑌷𑍍𑌟𑍍𑌰𑌾𑌭𑍍𑌯𑌃॑ 𑌪𑌾॒𑌤𑍇𑌤𑍍𑌯𑌾॑𑌹 𑌚॒𑌤𑍍𑌵𑌾𑌰𑌿॑ 𑌚) (𑌅. 6)

𑌅𑌨𑍁𑌵𑌾𑌕𑌂 7 - 𑌦𑌿𑌗𑍍𑌵𑍍𑌯𑌾𑌸𑍍𑌥𑌾𑌪𑌨𑌮𑍍

𑌦𑌿𑌶𑍋॒ 𑌵𑍍𑌯𑌾𑌸𑍍𑌥𑌾॑𑌪𑌯𑌤𑌿 । 𑌦𑌿॒𑌶𑌾𑌮॒𑌭𑌿𑌜𑌿॑𑌤𑍍𑌯𑍈 । 𑌯𑌦॑𑌨𑍁 𑌪𑍍𑌰॒𑌕𑍍𑌰𑌾𑌮𑍇᳚𑌤𑍍 । 𑌅॒𑌭𑌿 𑌦𑌿𑌶𑍋॑ 𑌜𑌯𑍇𑌤𑍍 । 𑌉𑌤𑍍𑌤𑍁 𑌮𑌾᳚𑌦𑍍𑌯𑍇𑌤𑍍 । 𑌮𑌨॒𑌸𑌾-𑌽𑌨𑍁॒ 𑌪𑍍𑌰𑌕𑍍𑌰𑌾॑𑌮𑌤𑌿 । 𑌅॒𑌭𑌿 𑌦𑌿𑌶𑍋॑ 𑌜𑌯𑌤𑌿 । 𑌨𑍋𑌨𑍍𑌮𑌾᳚𑌦𑍍𑌯𑌤𑌿 । 𑌸॒𑌮𑌿𑌧॒𑌮𑌾 𑌤𑌿॒𑌷𑍍𑌠𑍇𑌤𑍍𑌯𑌾॑𑌹 । 𑌤𑍇𑌜॑ 𑌏॒𑌵𑌾𑌵॑𑌰𑍁𑌨𑍍𑌧𑍇 ॥ 41 ॥

𑌉॒𑌗𑍍𑌰𑌾𑌮𑌾 𑌤𑌿॒𑌷𑍍𑌠𑍇𑌤𑍍𑌯𑌾॑𑌹 । 𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌵𑌿॒𑌰𑌾𑌜॒𑌮𑌾 𑌤𑌿॒𑌷𑍍𑌠𑍇𑌤𑍍𑌯𑌾॑𑌹 । 𑌅॒𑌨𑍍𑌨𑌾𑌦𑍍𑌯॑𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌉𑌦𑍀॑𑌚𑍀॒𑌮𑌾 𑌤𑌿॒𑌷𑍍𑌠𑍇𑌤𑍍𑌯𑌾॑𑌹 । 𑌪॒𑌶𑍂𑌨𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌊॒𑌰𑍍𑌧𑍍𑌵𑌾𑌮𑌾 𑌤𑌿॒𑌷𑍍𑌠𑍇𑌤𑍍𑌯𑌾॑𑌹 । 𑌸𑍁॒𑌵॒𑌰𑍍𑌗𑌮𑍇॒𑌵 𑌲𑍋॒𑌕-𑌮॒𑌭𑌿𑌜॑𑌯𑌤𑌿 । 𑌅𑌨𑍂𑌜𑍍𑌜𑌿॑𑌹𑍀𑌤𑍇 । 𑌸𑍁॒𑌵॒𑌰𑍍𑌗𑌸𑍍𑌯॑ 𑌲𑍋॒𑌕𑌸𑍍𑌯॒ 𑌸𑌮॑𑌷𑍍𑌟𑍍𑌯𑍈 ॥ 42 ॥

𑌮𑌾॒𑌰𑍁॒𑌤 𑌏॒𑌷 𑌭॑𑌵𑌤𑌿 । 𑌅𑌨𑍍𑌨𑌂॒-𑌵𑍈𑌁 𑌮॒𑌰𑍁𑌤𑌃॑ । 𑌅𑌨𑍍𑌨॑𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌏𑌕॑𑌵𑌿𑌗𑍍𑌂𑌶𑌤𑌿𑌕𑌪𑌾𑌲𑍋 𑌭𑌵𑌤𑌿॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 । 𑌯𑍋॑-𑌽𑌰𑌣𑍍𑌯𑍇 𑌽𑌨𑍁𑌵𑌾॒𑌕𑍍𑌯𑍋॑ 𑌗॒𑌣𑌃 । 𑌤-𑌮𑍍𑌮॑𑌦𑍍𑌧𑍍𑌯॒𑌤 𑌉𑌪॑𑌦𑌧𑌾𑌤𑌿 । 𑌗𑍍𑌰𑌾॒𑌮𑍍𑌯𑍈𑌰𑍇॒𑌵 𑌪॒𑌶𑍁𑌭𑌿॑-𑌰𑌾𑌰॒𑌣𑍍𑌯𑌾-𑌨𑍍𑌪॒𑌶𑍂-𑌨𑍍𑌪𑌰𑌿॑𑌗𑍃𑌹𑍍𑌣𑌾𑌤𑌿 । 𑌤𑌸𑍍𑌮𑌾᳚-𑌦𑍍𑌗𑍍𑌰𑌾॒𑌮𑍍𑌯𑍈𑌃 𑌪॒𑌶𑍁𑌭𑌿॑𑌰𑌾𑌰॒𑌣𑍍𑌯𑌾𑌃 𑌪॒𑌶𑌵𑌃॒ 𑌪𑌰𑌿॑𑌗𑍃𑌹𑍀𑌤𑌾𑌃 । 𑌪𑍃𑌥𑌿॑𑌰𑍍𑌵𑍈॒𑌨𑍍𑌯𑌃 । 𑌅॒𑌭𑍍𑌯॑𑌷𑌿𑌚𑍍𑌯𑌤 ॥ 43 ॥

𑌸 𑌰𑌾॒𑌷𑍍𑌟𑍍𑌰-𑌨𑍍𑌨𑌾𑌭॑𑌵𑌤𑍍 । 𑌸 𑌏॒𑌤𑌾𑌨𑌿॑ 𑌪𑌾॒𑌰𑍍𑌥𑌾𑌨𑍍𑌯॑𑌪𑌶𑍍𑌯𑌤𑍍 । 𑌤𑌾𑌨𑍍𑌯॑𑌜𑍁𑌹𑍋𑌤𑍍 । 𑌤𑍈𑌰𑍍𑌵𑍈 𑌸 𑌰𑌾॒𑌷𑍍𑌟𑍍𑌰-𑌮॑𑌭𑌵𑌤𑍍 । 𑌯𑌤𑍍𑌪𑌾॒𑌰𑍍𑌥𑌾𑌨𑌿॑ 𑌜𑍁॒𑌹𑍋𑌤𑌿॑ । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌭॑𑌵𑌤𑌿 । 𑌬𑌾॒𑌰𑍍॒𑌹॒𑌸𑍍𑌪॒𑌤𑍍𑌯-𑌮𑍍𑌪𑍂𑌰𑍍𑌵𑍇॑𑌷𑌾𑌮𑍁𑌤𑍍𑌤॒𑌮-𑌮𑍍𑌭॑𑌵𑌤𑌿 । 𑌐॒𑌨𑍍𑌦𑍍𑌰𑌮𑍁𑌤𑍍𑌤॑𑌰𑍇𑌷𑌾-𑌮𑍍𑌪𑍍𑌰𑌥॒𑌮𑌮𑍍 । 𑌬𑍍𑌰𑌹𑍍𑌮॑ 𑌚𑍈॒𑌵𑌾𑌸𑍍𑌮𑍈᳚ 𑌕𑍍𑌷॒𑌤𑍍𑌰-𑌞𑍍𑌚॑ 𑌸॒𑌮𑍀𑌚𑍀॑ 𑌦𑌧𑌾𑌤𑌿 । 𑌅𑌥𑍋॒ 𑌬𑍍𑌰𑌹𑍍𑌮॑𑌨𑍍𑌨𑍇॒𑌵 𑌕𑍍𑌷॒𑌤𑍍𑌰-𑌮𑍍𑌪𑍍𑌰𑌤𑌿॑𑌷𑍍𑌠𑌾𑌪𑌯𑌤𑌿 ॥ 44 ॥

𑌷𑌟𑍍𑌪𑍁॒𑌰𑌸𑍍𑌤𑌾॑-𑌦𑌭𑌿𑌷𑍇॒𑌕𑌸𑍍𑌯॑ 𑌜𑍁𑌹𑍋𑌤𑌿 । 𑌷𑌡𑍁॒𑌪𑌰𑌿॑𑌷𑍍𑌟𑌾𑌤𑍍 । 𑌦𑍍𑌵𑌾𑌦॑𑌶॒ 𑌸-𑌮𑍍𑌪॑𑌦𑍍𑌯𑌨𑍍𑌤𑍇 । 𑌦𑍍𑌵𑌾𑌦॑𑌶॒ 𑌮𑌾𑌸𑌾᳚-𑌸𑍍𑌸𑌂𑌵𑌁𑌥𑍍𑌸॒𑌰𑌃 । 𑌸𑌂॒𑌵𑌁॒𑌥𑍍𑌸॒𑌰𑌃 𑌖𑌲𑍁॒ 𑌵𑍈 𑌦𑍇॒𑌵𑌾𑌨𑌾॒-𑌮𑍍𑌪𑍂𑌃 । 𑌦𑍇॒𑌵𑌾𑌨𑌾॑𑌮𑍇॒𑌵 𑌪𑍁𑌰॑-𑌮𑍍𑌮𑌦𑍍𑌧𑍍𑌯॒𑌤𑍋 𑌵𑍍𑌯𑌵॑𑌸𑌰𑍍𑌪𑌤𑌿 । 𑌤𑌸𑍍𑌯॒ 𑌨 𑌕𑍁𑌤॑𑌶𑍍𑌚॒ 𑌨𑍋𑌪𑌾᳚𑌵𑍍𑌯𑌾॒𑌧𑍋 𑌭॑𑌵𑌤𑌿 । 𑌭𑍂॒𑌤𑌾𑌨𑌾॒-𑌮𑌵𑍇᳚𑌷𑍍𑌟𑍀-𑌰𑍍𑌜𑍁𑌹𑍋𑌤𑌿 । 𑌅𑌤𑍍𑌰𑌾᳚𑌤𑍍𑌰॒ 𑌵𑍈 𑌮𑍃॒𑌤𑍍𑌯𑍁-𑌰𑍍𑌜𑌾॑𑌯𑌤𑍇 । 𑌯𑌤𑍍𑌰॑ 𑌯𑌤𑍍𑌰𑍈॒𑌵 𑌮𑍃॒𑌤𑍍𑌯𑍁-𑌰𑍍𑌜𑌾𑌯॑𑌤𑍇 । 𑌤𑌤॑ 𑌏॒𑌵𑍈𑌨॒𑌮𑌵॑𑌯𑌜𑌤𑍇 । 𑌤𑌸𑍍𑌮𑌾᳚-𑌦𑍍𑌰𑌾𑌜॒𑌸𑍂𑌯𑍇॑𑌨𑍇𑌜𑌾॒𑌨-𑌸𑍍𑌸𑌰𑍍𑌵॒𑌮𑌾𑌯𑍁॑𑌰𑍇𑌤𑌿 । 𑌸𑌰𑍍𑌵𑍇॒ 𑌹𑍍𑌯॑𑌸𑍍𑌯 𑌮𑍃॒𑌤𑍍𑌯𑌵𑍋-𑌽𑌵𑍇᳚𑌷𑍍𑌟𑌾𑌃 । 𑌤𑌸𑍍𑌮𑌾᳚-𑌦𑍍𑌰𑌾𑌜॒𑌸𑍂𑌯𑍇॑𑌨𑍇𑌜𑌾॒𑌨𑍋 𑌨𑌾𑌭𑌿𑌚॑𑌰𑌿𑌤॒𑌵𑍈 । 𑌪𑍍𑌰॒𑌤𑍍𑌯𑌗𑍇॑𑌨-𑌮𑌭𑌿𑌚𑌾॒𑌰-𑌸𑍍𑌸𑍍𑌤𑍃॑𑌣𑍁𑌤𑍇 ॥ 45 ॥

(𑌰𑍁॒𑌨𑍍𑌧𑍇॒-𑌸𑌮॑𑌷𑍍𑌟𑍍𑌯𑌾-𑌅𑌸𑌿𑌚𑍍𑌯𑌤-𑌸𑍍𑌥𑌾𑌪𑌯𑌤𑌿॒-𑌜𑌾𑌯॑𑌤𑍇॒ 𑌪𑌞𑍍𑌚॑ 𑌚) (𑌅. 7)

𑌅𑌨𑍁𑌵𑌾𑌕𑌂 8 - 𑌅𑌭𑌿𑌷𑍇𑌕𑌃

𑌸𑍋𑌮॑𑌸𑍍𑌯॒ 𑌤𑍍𑌵𑌿𑌷𑌿॑𑌰𑌸𑌿॒ 𑌤𑌵𑍇॑𑌵 𑌮𑍇॒ 𑌤𑍍𑌵𑌿𑌷𑌿॑𑌰𑍍𑌭𑍂𑌯𑌾॒𑌦𑌿𑌤𑌿॑ 𑌶𑌾𑌰𑍍𑌦𑍂𑌲𑌚॒𑌰𑍍𑌮𑍋𑌪॑𑌸𑍍𑌤𑍃𑌣𑌾𑌤𑌿 । 𑌯𑍈𑌵 𑌸𑍋𑌮𑍇॒ 𑌤𑍍𑌵𑌿𑌷𑌿𑌃॑ । 𑌯𑌾 𑌶𑌾᳚𑌰𑍍𑌦𑍂॒𑌲𑍇 । 𑌤𑌾𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌮𑍃॒𑌤𑍍𑌯𑍋𑌰𑍍𑌵𑌾 𑌏॒𑌷 𑌵𑌰𑍍𑌣𑌃॑ । 𑌯𑌚𑍍𑌛𑌾᳚𑌰𑍍𑌦𑍂॒𑌲𑌃 । 𑌅॒𑌮𑍃𑌤॒𑌗𑍍𑌂॒ 𑌹𑌿𑌰॑𑌣𑍍𑌯𑌮𑍍 । 𑌅॒𑌮𑍃𑌤॑𑌮𑌸𑌿 𑌮𑍃॒𑌤𑍍𑌯𑍋𑌰𑍍𑌮𑌾॑ 𑌪𑌾॒𑌹𑍀𑌤𑌿॒ 𑌹𑌿𑌰॑𑌣𑍍𑌯॒-𑌮𑍁𑌪𑌾᳚𑌸𑍍𑌯𑌤𑌿 । 𑌅॒𑌮𑍃𑌤॑𑌮𑍇॒𑌵 𑌮𑍃॒𑌤𑍍𑌯𑍋𑌰॒𑌨𑍍𑌤-𑌰𑍍𑌧॑𑌤𑍍𑌤𑍇 । 𑌶॒𑌤𑌮𑌾॑𑌨-𑌮𑍍𑌭𑌵𑌤𑌿 ॥ 46 ॥

𑌶॒𑌤𑌾𑌯𑍁𑌃॒ 𑌪𑍁𑌰𑍁॑𑌷-𑌶𑍍𑌶॒𑌤𑍇𑌨𑍍𑌦𑍍𑌰𑌿॑𑌯𑌃 । 𑌆𑌯𑍁॑𑌷𑍍𑌯𑍇॒𑌵𑍇𑌨𑍍𑌦𑍍𑌰𑌿॒𑌯𑍇 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿 । 𑌦𑌿॒𑌦𑍍𑌯𑍋𑌨𑍍𑌮𑌾॑ 𑌪𑌾॒𑌹𑍀𑌤𑍍𑌯𑍁॒𑌪𑌰𑌿॑𑌷𑍍𑌟𑌾॒𑌦𑌧𑌿॒ 𑌨𑌿𑌦॑𑌧𑌾𑌤𑌿 । 𑌉॒𑌭॒𑌯𑌤॑ 𑌏॒𑌵𑌾𑌸𑍍𑌮𑍈॒ 𑌶𑌰𑍍𑌮॑ 𑌦𑌧𑌾𑌤𑌿 । 𑌅𑌵𑍇᳚𑌷𑍍𑌟𑌾 𑌦𑌨𑍍𑌦॒𑌶𑍂𑌕𑌾॒ 𑌇𑌤𑌿॑ 𑌕𑍍𑌲𑍀॒𑌬𑌗𑍍𑌂 𑌸𑍀𑌸𑍇॑𑌨 𑌵𑌿𑌦𑍍𑌧𑍍𑌯𑌤𑌿 । 𑌦॒𑌨𑍍𑌦॒𑌶𑍂𑌕𑌾॑-𑌨𑍇॒𑌵𑌾𑌵॑ 𑌯𑌜𑌤𑍇 । 𑌤𑌸𑍍𑌮𑌾᳚-𑌤𑍍𑌕𑍍𑌲𑍀॒𑌬-𑌨𑍍𑌦॑𑌨𑍍𑌦॒𑌶𑍂𑌕𑌾॒ 𑌦𑌗𑍍𑌂𑌶𑍁॑𑌕𑌾𑌃 । 𑌨𑌿𑌰॑𑌸𑍍𑌤॒-𑌨𑍍𑌨𑌮𑍁॑𑌚𑍇॒-𑌶𑍍𑌶𑌿𑌰॒ 𑌇𑌤𑌿॑ 𑌲𑍋𑌹𑌿𑌤𑌾𑌯॒𑌸-𑌨𑍍𑌨𑌿𑌰॑𑌸𑍍𑌯𑌤𑌿 । 𑌪𑌾॒𑌪𑍍𑌮𑌾𑌨॑𑌮𑍇॒𑌵 𑌨𑌮𑍁॑𑌚𑌿-𑌨𑍍𑌨𑌿॒𑌰𑌵॑𑌦𑌯𑌤𑍇 । 𑌪𑍍𑌰𑌾॒𑌣𑌾 𑌆॒𑌤𑍍𑌮𑌨𑌃॒ 𑌪𑍂𑌰𑍍𑌵𑍇॑-𑌽𑌭𑌿॒𑌷𑌿𑌚𑍍𑌯𑌾॒ 𑌇𑌤𑍍𑌯𑌾॑𑌹𑍁𑌃 ॥ 47 ॥

𑌸𑍋𑌮𑍋॒ 𑌰𑌾𑌜𑌾॒ 𑌵𑌰𑍁॑𑌣𑌃 । 𑌦𑍇॒𑌵𑌾 𑌧॑𑌰𑍍𑌮॒𑌸𑍁𑌵॑𑌶𑍍𑌚॒ 𑌯𑍇 । 𑌤𑍇 𑌤𑍇॒ 𑌵𑌾𑌚𑌗𑍍𑌂॑ 𑌸𑍁𑌵𑌨𑍍𑌤𑌾॒-𑌨𑍍𑌤𑍇 𑌤𑍇᳚ 𑌪𑍍𑌰𑌾॒𑌣𑌗𑍍𑌂 𑌸𑍁॑𑌵𑌨𑍍𑌤𑌾॒𑌮𑌿𑌤𑍍𑌯𑌾॑𑌹 । 𑌪𑍍𑌰𑌾॒𑌣𑌾𑌨𑍇॒𑌵𑌾𑌤𑍍𑌮𑌨𑌃॒ 𑌪𑍂𑌰𑍍𑌵𑌾॑-𑌨॒𑌭𑌿𑌷𑌿॑𑌞𑍍𑌚𑌤𑌿 । 𑌯-𑌦𑍍𑌬𑍍𑌰𑍂॒𑌯𑌾𑌤𑍍 । 𑌅॒𑌗𑍍𑌨𑍇𑌸𑍍𑌤𑍍𑌵𑌾॒ 𑌤𑍇𑌜॑𑌸𑌾॒ 𑌽𑌭𑌿𑌷𑌿॑𑌞𑍍𑌚𑌾॒𑌮𑍀𑌤𑌿॑ । 𑌤𑍇॒𑌜॒𑌸𑍍𑌵𑍍𑌯𑍇॑𑌵 𑌸𑍍𑌯𑌾᳚𑌤𑍍 । 𑌦𑍁॒𑌶𑍍𑌚𑌰𑍍𑌮𑌾॒ 𑌤𑍁 𑌭॑𑌵𑍇𑌤𑍍 । 𑌸𑍋𑌮॑𑌸𑍍𑌯 𑌤𑍍𑌵𑌾 𑌦𑍍𑌯𑍁॒𑌮𑍍𑌨𑍇𑌨𑌾॒-𑌭𑌿𑌷𑌿॑𑌞𑍍𑌚𑌾॒𑌮𑍀𑌤𑍍𑌯𑌾॑𑌹 । 𑌸𑍗॒𑌮𑍍𑌯𑍋 𑌵𑍈 𑌦𑍇॒𑌵𑌤॑𑌯𑌾॒ 𑌪𑍁𑌰𑍁॑𑌷𑌃 ॥ 48 ॥

𑌸𑍍𑌵𑌯𑍈॒𑌵𑍈𑌨॑-𑌨𑍍𑌦𑍇॒𑌵𑌤॑𑌯𑌾॒-𑌽𑌭𑌿𑌷𑌿॑𑌞𑍍𑌚𑌤𑌿 । 𑌅॒𑌗𑍍𑌨𑍇-𑌸𑍍𑌤𑍇𑌜॒𑌸𑍇𑌤𑍍𑌯𑌾॑𑌹 । 𑌤𑍇𑌜॑ 𑌏॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌸𑍂𑌰𑍍𑌯॑𑌸𑍍𑌯॒ 𑌵𑌰𑍍𑌚॒𑌸𑍇𑌤𑍍𑌯𑌾॑𑌹 । 𑌵𑌰𑍍𑌚॑ 𑌏॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌇𑌨𑍍𑌦𑍍𑌰॑𑌸𑍍𑌯𑍇-𑌨𑍍𑌦𑍍𑌰𑌿॒𑌯𑍇𑌣𑍇𑌤𑍍𑌯𑌾॑𑌹 । 𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌮𑌿॒𑌤𑍍𑌰𑌾𑌵𑌰𑍁॑𑌣𑌯𑍋-𑌰𑍍𑌵𑍀॒𑌰𑍍𑌯𑍇॑𑌣𑍇𑌤𑍍𑌯𑌾॑𑌹 । 𑌵𑍀॒𑌰𑍍𑌯॑𑌮𑍇॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌮॒𑌰𑍁𑌤𑌾॒𑌮𑍋𑌜॒𑌸𑍇𑌤𑍍𑌯𑌾॑𑌹 ॥ 49 ॥

𑌓𑌜॑ 𑌏॒𑌵𑌾𑌸𑍍𑌮𑌿॑-𑌨𑍍𑌦𑌧𑌾𑌤𑌿 । 𑌕𑍍𑌷॒𑌤𑍍𑌰𑌾𑌣𑌾᳚-𑌙𑍍𑌕𑍍𑌷॒𑌤𑍍𑌰𑌪॑𑌤𑌿𑌰॒𑌸𑍀𑌤𑍍𑌯𑌾॑𑌹 । 𑌕𑍍𑌷॒𑌤𑍍𑌰𑌾𑌣𑌾॑𑌮𑍇॒𑌵𑍈𑌨॑-𑌙𑍍𑌕𑍍𑌷॒𑌤𑍍𑌰𑌪॑𑌤𑌿-𑌙𑍍𑌕𑌰𑍋𑌤𑌿 । 𑌅𑌤𑌿॑ 𑌦𑌿॒𑌵𑌸𑍍𑌪𑌾॒𑌹𑍀𑌤𑍍𑌯𑌾॑𑌹 । 𑌅𑌤𑍍𑌯॒𑌨𑍍𑌯𑌾-𑌨𑍍𑌪𑌾॒𑌹𑍀𑌤𑌿॒ 𑌵𑌾𑌵𑍈𑌤𑌦𑌾॑𑌹 । 𑌸॒𑌮𑌾𑌵॑𑌵𑍃𑌤𑍍𑌰𑌨𑍍𑌨-𑌧॒𑌰𑌾𑌗𑍁𑌦𑍀॑𑌚𑍀॒-𑌰𑌿𑌤𑍍𑌯𑌾॑𑌹 । 𑌰𑌾॒𑌷𑍍𑌟𑍍𑌰𑌮𑍇॒𑌵𑌾𑌸𑍍𑌮𑌿॑-𑌨𑍍𑌧𑍍𑌰𑍁॒𑌵𑌮॑𑌕𑌃 । 𑌉॒𑌚𑍍𑌛𑍇𑌷॑𑌣𑍇𑌨 𑌜𑍁𑌹𑍋𑌤𑌿 । 𑌉॒𑌚𑍍𑌛𑍇𑌷॑𑌣𑌭𑌾𑌗𑍋॒ 𑌵𑍈 𑌰𑍁॒𑌦𑍍𑌰𑌃 । 𑌭𑌾॒𑌗॒𑌧𑍇𑌯𑍇॑𑌨𑍈॒𑌵 𑌰𑍁॒𑌦𑍍𑌰-𑌨𑍍𑌨𑌿॒𑌰𑌵॑𑌦𑌯𑌤𑍇 ॥ 50 ॥

𑌉𑌦॑𑌮𑍍𑌪॒𑌰𑍇𑌤𑍍𑌯𑌾𑌗𑍍𑌨𑍀᳚𑌦𑍍𑌧𑍍𑌰𑍇 𑌜𑍁𑌹𑍋𑌤𑌿 । 𑌏॒𑌷𑌾 𑌵𑍈 𑌰𑍁॒𑌦𑍍𑌰𑌸𑍍𑌯॒ 𑌦𑌿𑌕𑍍 । 𑌸𑍍𑌵𑌾𑌯𑌾॑𑌮𑍇॒𑌵 𑌦𑌿॒𑌶𑌿 𑌰𑍁॒𑌦𑍍𑌰-𑌨𑍍𑌨𑌿॒𑌰𑌵॑𑌦𑌯𑌤𑍇 । 𑌰𑍁𑌦𑍍𑌰॒ 𑌯𑌤𑍍𑌤𑍇॒ 𑌕𑍍𑌰𑌯𑍀॒ 𑌪𑌰॒-𑌨𑍍𑌨𑌾𑌮𑍇𑌤𑍍𑌯𑌾॑𑌹 । 𑌯𑌦𑍍𑌵𑌾 𑌅॑𑌸𑍍𑌯॒ 𑌕𑍍𑌰𑌯𑍀॒ 𑌪𑌰॒-𑌨𑍍𑌨𑌾𑌮॑ । 𑌤𑍇𑌨॒ 𑌵𑌾 𑌏॒𑌷 𑌹𑌿॑𑌨𑌸𑍍𑌤𑌿 । 𑌯𑌗𑍍𑌂 𑌹𑌿॒𑌨𑌸𑍍𑌤𑌿॑ । 𑌤𑍇𑌨𑍈॒𑌵𑍈𑌨𑌗𑍍𑌂॑ 𑌸॒𑌹 𑌶॑𑌮𑌯𑌤𑌿 । 𑌤𑌸𑍍𑌮𑍈॑ 𑌹𑍁॒𑌤𑌮॑𑌸𑌿 𑌯॒𑌮𑍇𑌷𑍍𑌟॑𑌮॒𑌸𑍀𑌤𑍍𑌯𑌾॑𑌹 । 𑌯॒𑌮𑌾𑌦𑍇॒𑌵𑌾𑌸𑍍𑌯॑ 𑌮𑍃॒𑌤𑍍𑌯𑍁𑌮𑌵॑𑌯𑌜𑌤𑍇 ॥ 51 ॥

𑌪𑍍𑌰𑌜𑌾॑𑌪𑌤𑍇॒ 𑌨 𑌤𑍍𑌵𑌦𑍇॒𑌤𑌾𑌨𑍍𑌯॒𑌨𑍍𑌯 𑌇𑌤𑌿॒ 𑌤𑌸𑍍𑌯𑍈॑ 𑌗𑍃॒𑌹𑍇 𑌜𑍁॑𑌹𑍁𑌯𑌾𑌤𑍍 । 𑌯𑌾-𑌙𑍍𑌕𑌾॒𑌮𑌯𑍇॑𑌤 𑌰𑌾॒𑌷𑍍𑌟𑍍𑌰𑌮॑𑌸𑍍𑌯𑍈 𑌪𑍍𑌰॒𑌜𑌾 𑌸𑍍𑌯𑌾॒𑌦𑌿𑌤𑌿॑ । 𑌰𑌾॒𑌷𑍍𑌟𑍍𑌰𑌮𑍇॒𑌵𑌾𑌸𑍍𑌯𑍈᳚ 𑌪𑍍𑌰॒𑌜𑌾 𑌭॑𑌵𑌤𑌿 । 𑌪॒𑌰𑍍𑌣॒-𑌮𑌯𑍇॑𑌨𑌾-𑌦𑍍𑌧𑍍𑌵॒𑌰𑍍𑌯𑍁-𑌰॒𑌭𑌿𑌷𑌿॑𑌞𑍍𑌚𑌤𑌿 । 𑌬𑍍𑌰॒𑌹𑍍𑌮॒𑌵॒𑌰𑍍𑌚॒𑌸𑌮𑍇॒𑌵𑌾𑌸𑍍𑌮𑌿॒𑌨𑍍-𑌤𑍍𑌵𑌿𑌷𑌿॑-𑌨𑍍𑌦𑌧𑌾𑌤𑌿 । 𑌔𑌦𑍁॑𑌮𑍍𑌬𑌰𑍇𑌣 𑌰𑌾𑌜॒𑌨𑍍𑌯𑌃॑ । 𑌊𑌰𑍍𑌜॑𑌮𑍇॒𑌵𑌾𑌸𑍍𑌮𑌿॑-𑌨𑍍𑌨॒𑌨𑍍𑌨𑌾𑌦𑍍𑌯॑-𑌨𑍍𑌦𑌧𑌾𑌤𑌿 । 𑌆𑌶𑍍𑌵॑𑌤𑍍𑌥𑍇𑌨॒ 𑌵𑍈𑌶𑍍𑌯𑌃॑ । 𑌵𑌿𑌶॑𑌮𑍇॒𑌵𑌾𑌸𑍍𑌮𑌿॒-𑌨𑍍𑌪𑍁𑌷𑍍𑌟𑌿॑-𑌨𑍍𑌦𑌧𑌾𑌤𑌿 । 𑌨𑍈𑌯॑𑌗𑍍𑌰𑍋𑌧𑍇𑌨॒ 𑌜𑌨𑍍𑌯𑌃॑( ) । 𑌮𑌿॒𑌤𑍍𑌰𑌾𑌣𑍍𑌯𑍇॒𑌵𑌾𑌸𑍍𑌮𑍈॑ 𑌕𑌲𑍍𑌪𑌯𑌤𑌿 । 𑌅𑌥𑍋॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 ॥ 52 ॥

(𑌭॒𑌵॒ - 𑌤𑍍𑌯𑌾॒𑌹𑍁𑌃॒ - 𑌪𑍁𑌰𑍁॑𑌷॒ - 𑌓𑌜॒𑌸𑍇𑌤𑍍𑌯𑌾॑𑌹 - 𑌨𑌿॒𑌰𑌵॑𑌦𑌯𑌤𑍇 - 𑌯𑌜𑌤𑍇॒ - 𑌜𑌨𑍍𑌯𑍋॒ 𑌦𑍍𑌵𑍇 𑌚॑) (𑌅. 8)

𑌅𑌨𑍁𑌵𑌾𑌕𑌂 9 - 𑌸𑍍𑌥𑌾𑌰𑍋𑌹𑌣𑌮𑍍. 𑌵𑌿𑌜𑌯𑌃

𑌇𑌨𑍍𑌦𑍍𑌰॑𑌸𑍍𑌯॒ 𑌵𑌜𑍍𑌰𑍋॑-𑌽𑌸𑌿॒ 𑌵𑌾𑌰𑍍𑌤𑍍𑌰॑𑌘𑍍𑌨॒ 𑌇𑌤𑌿॒ 𑌰𑌥॑𑌮𑍁॒𑌪𑌾𑌵॑𑌹𑌰𑌤𑌿॒ 𑌵𑌿𑌜𑌿॑𑌤𑍍𑌯𑍈 । 𑌮𑌿॒𑌤𑍍𑌰𑌾𑌵𑌰𑍁॑𑌣𑌯𑍋𑌸𑍍𑌤𑍍𑌵𑌾 𑌪𑍍𑌰𑌶𑌾॒𑌸𑍍𑌤𑍍𑌰𑍋𑌃 𑌪𑍍𑌰॒𑌶𑌿𑌷𑌾॑ 𑌯𑍁𑌨॒𑌜𑍍𑌮𑍀𑌤𑍍𑌯𑌾॑𑌹 । 𑌬𑍍𑌰𑌹𑍍𑌮॑𑌣𑍈॒𑌵𑍈𑌨॑-𑌨𑍍𑌦𑍇॒𑌵𑌤𑌾᳚𑌭𑍍𑌯𑌾𑌂-𑌯𑍁𑌁𑌨𑌕𑍍𑌤𑌿 । 𑌪𑍍𑌰॒𑌷𑍍𑌟𑌿॒𑌵𑌾॒𑌹𑌿𑌨𑌂॑-𑌯𑍁𑌁𑌨𑌕𑍍𑌤𑌿 । 𑌪𑍍𑌰॒𑌷𑍍𑌟𑌿॒𑌵𑌾॒𑌹𑍀 𑌵𑍈 𑌦𑍇॑𑌵𑌰॒𑌥𑌃 । 𑌦𑍇॒𑌵॒𑌰॒𑌥-𑌮𑍇॒𑌵𑌾𑌸𑍍𑌮𑍈॑ 𑌯𑍁𑌨𑌕𑍍𑌤𑌿 । 𑌤𑍍𑌰𑌯𑍋-𑌽𑌶𑍍𑌵𑌾॑ 𑌭𑌵𑌨𑍍𑌤𑌿 । 𑌰𑌥॑𑌶𑍍𑌚𑌤𑍁॒𑌰𑍍𑌥𑌃 । 𑌦𑍍𑌵𑍗 𑌸॑𑌵𑍍𑌯𑍇𑌷𑍍𑌠𑌸𑌾𑌰॒𑌥𑍀 । 𑌷𑌟𑍍-𑌥𑍍𑌸𑌮𑍍𑌪॑𑌦𑍍𑌯𑌨𑍍𑌤𑍇 ॥ 53 ॥

𑌷𑌡𑍍𑌵𑌾 𑌋॒𑌤𑌵𑌃॑ । 𑌋॒𑌤𑍁𑌭𑌿॑𑌰𑍇॒𑌵𑍈𑌨𑌂॑-𑌯𑍁𑌁𑌨𑌕𑍍𑌤𑌿 । 𑌵𑌿॒𑌷𑍍𑌣𑍁॒𑌕𑍍𑌰॒𑌮𑌾𑌨𑍍-𑌕𑍍𑌰॑𑌮𑌤𑍇 । 𑌵𑌿𑌷𑍍𑌣𑍁॑𑌰𑍇॒𑌵 𑌭𑍂॒𑌤𑍍𑌵𑍇𑌮𑌾𑌨𑍍 𑌁𑌲𑍋॒𑌕𑌾𑌨॒𑌭𑌿𑌜॑𑌯𑌤𑌿 । 𑌯𑌃, 𑌕𑍍𑌷॒𑌤𑍍𑌰𑌿𑌯𑌃॒ 𑌪𑍍𑌰𑌤𑌿॑𑌹𑌿𑌤𑌃 । 𑌸𑍋᳚-𑌽𑌨𑍍𑌵𑌾𑌰॑𑌭𑌤𑍇 । 𑌰𑌾॒𑌷𑍍𑌟𑍍𑌰𑌮𑍇॒𑌵 𑌭॑𑌵𑌤𑌿 । 𑌤𑍍𑌰𑌿॒𑌷𑍍𑌟𑍁𑌭𑌾॒ 𑌽𑌨𑍍𑌵𑌾𑌰॑𑌭𑌤𑍇 । 𑌇॒𑌨𑍍𑌦𑍍𑌰𑌿॒𑌯𑌂-𑌵𑍈𑌁 𑌤𑍍𑌰𑌿॒𑌷𑍍𑌟𑍁𑌕𑍍 । 𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵 𑌯𑌜॑𑌮𑌾𑌨𑍇 𑌦𑌧𑌾𑌤𑌿 ॥ 54 ॥

𑌮॒𑌰𑍁𑌤𑌾᳚-𑌮𑍍𑌪𑍍𑌰𑌸॒𑌵𑍇 𑌜𑍇॑𑌷॒𑌮𑌿𑌤𑍍𑌯𑌾॑𑌹 । 𑌮॒𑌰𑍁𑌦𑍍𑌭𑌿॑𑌰𑍇॒𑌵 𑌪𑍍𑌰𑌸𑍂॑𑌤॒ 𑌉𑌜𑍍𑌜॑𑌯𑌤𑌿 । 𑌆॒𑌪𑍍𑌤-𑌮𑍍𑌮𑌨॒ 𑌇𑌤𑍍𑌯𑌾॑𑌹 । 𑌯𑌦𑍇॒𑌵 𑌮𑌨॒𑌸𑍈𑌫𑍍𑌸𑍀᳚𑌤𑍍 । 𑌤𑌦𑌾॑𑌪𑌤𑍍 । 𑌰𑌾॒𑌜॒𑌨𑍍𑌯॑-𑌞𑍍𑌜𑌿𑌨𑌾𑌤𑌿 । 𑌅𑌨𑌾᳚𑌕𑍍𑌰𑌾𑌨𑍍𑌤 𑌏॒𑌵𑌾𑌕𑍍𑌰॑𑌮𑌤𑍇 । 𑌵𑌿 𑌵𑌾 𑌏॒𑌷 𑌇॑𑌨𑍍𑌦𑍍𑌰𑌿॒𑌯𑍇𑌣॑ 𑌵𑍀॒𑌰𑍍𑌯𑍇॑𑌣𑌰𑍍𑌧𑍍𑌯𑌤𑍇 । 𑌯𑍋 𑌰𑌾॑𑌜॒𑌨𑍍𑌯॑-𑌞𑍍𑌜𑌿॒𑌨𑌾𑌤𑌿॑ । 𑌸𑌮॒𑌹𑌮𑌿॑𑌨𑍍𑌦𑍍𑌰𑌿॒𑌯𑍇𑌣॑ 𑌵𑍀॒𑌰𑍍𑌯𑍇॑𑌣𑍇𑌤𑍍𑌯𑌾॑𑌹 ॥ 55 ॥

𑌇॒𑌨𑍍𑌦𑍍𑌰𑌿॒𑌯𑌮𑍇॒𑌵 𑌵𑍀॒𑌰𑍍𑌯॑𑌮𑌾॒𑌤𑍍𑌮𑌨𑍍-𑌧॑𑌤𑍍𑌤𑍇 । 𑌪॒𑌶𑍂॒𑌨𑌾-𑌮𑍍𑌮॒𑌨𑍍𑌯𑍁𑌰॑𑌸𑌿॒ 𑌤𑌵𑍇॑𑌵 𑌮𑍇 𑌮॒𑌨𑍍𑌯𑍁𑌰𑍍𑌭𑍂॑𑌯𑌾॒𑌦𑌿𑌤𑌿॒ 𑌵𑌾𑌰𑌾॑𑌹𑍀 𑌉𑌪𑌾॒𑌨𑌹𑌾॒𑌵𑍁𑌪॑ 𑌮𑍁𑌞𑍍𑌚𑌤𑍇 । 𑌪॒𑌶𑍂॒𑌨𑌾𑌂-𑌵𑌾𑌁 𑌏॒𑌷 𑌮॒𑌨𑍍𑌯𑍁𑌃 । 𑌯-𑌦𑍍𑌵॑𑌰𑌾॒𑌹𑌃 । 𑌤𑍇𑌨𑍈॒𑌵 𑌪॑𑌶𑍂॒𑌨𑌾-𑌮𑍍𑌮॒𑌨𑍍𑌯𑍁𑌮𑌾॒𑌤𑍍𑌮-𑌨𑍍𑌧॑𑌤𑍍𑌤𑍇 । 𑌅॒𑌭𑌿 𑌵𑌾 𑌇॒𑌯𑌗𑍍𑌂 𑌸𑍁॑𑌷𑍁𑌵𑌾॒𑌣-𑌙𑍍𑌕𑌾॑𑌮𑌯𑌤𑍇 । 𑌤𑌸𑍍𑌯𑍇᳚𑌶𑍍𑌵॒𑌰𑍇𑌨𑍍𑌦𑍍𑌰𑌿॒𑌯𑌂-𑌵𑍀𑌁॒𑌰𑍍𑌯॑𑌮𑌾𑌦𑌾॑𑌤𑍋𑌃 । 𑌵𑌾𑌰𑌾॑𑌹𑍀 𑌉𑌪𑌾॒𑌨𑌹𑌾॒𑌵𑍁𑌪॑𑌮𑍁𑌞𑍍𑌚𑌤𑍇 । 𑌅॒𑌸𑍍𑌯𑌾 𑌏॒𑌵𑌾𑌨𑍍𑌤𑌰𑍍𑌧॑𑌤𑍍𑌤𑍇 । 𑌇॒𑌨𑍍𑌦𑍍𑌰𑌿॒𑌯𑌸𑍍𑌯॑ 𑌵𑍀॒𑌰𑍍𑌯॑𑌸𑍍𑌯𑌾𑌨𑌾᳚𑌤𑍍𑌤𑍍𑌯𑍈 ॥ 56 ॥

𑌨𑌮𑍋॑ 𑌮𑌾॒𑌤𑍍𑌰𑍇 𑌪𑍃॑𑌥𑌿॒𑌵𑍍𑌯𑌾 𑌇𑌤𑍍𑌯𑌾॒𑌹𑌾𑌹𑌿𑌗𑍍𑌂॑ 𑌸𑌾𑌯𑍈 । 𑌇𑌯॑𑌦॒𑌸𑍍𑌯𑌾-𑌯𑍁॑𑌰॒𑌸𑍍𑌯𑌾𑌯𑍁॑𑌰𑍍𑌮𑍇 𑌧𑍇॒𑌹𑍀𑌤𑍍𑌯𑌾॑𑌹 । 𑌆𑌯𑍁𑌰𑍇॒𑌵𑌾𑌤𑍍𑌮𑌨𑍍-𑌧॑𑌤𑍍𑌤𑍇 । 𑌊𑌰𑍍𑌗॒𑌸𑍍𑌯𑍂𑌰𑍍𑌜॑-𑌮𑍍𑌮𑍇 𑌧𑍇॒𑌹𑍀𑌤𑍍𑌯𑌾॑𑌹 । 𑌊𑌰𑍍𑌜॑𑌮॒𑌵𑌾𑌤𑍍𑌮-𑌨𑍍𑌧॑𑌤𑍍𑌤𑍇 । 𑌯𑍁𑌙𑍍𑌙॑𑌸𑌿॒ 𑌵𑌰𑍍𑌚𑍋॑-𑌽𑌸𑌿॒ 𑌵𑌰𑍍𑌚𑍋॒ 𑌮𑌯𑌿॑ 𑌧𑍇॒𑌹𑍀𑌤𑍍𑌯𑌾॑𑌹 । 𑌵𑌰𑍍𑌚॑ 𑌏॒𑌵𑌾𑌤𑍍𑌮-𑌨𑍍𑌧॑𑌤𑍍𑌤𑍇 । 𑌏॒𑌕॒𑌧𑌾 𑌬𑍍𑌰॒𑌹𑍍𑌮𑌣॒ 𑌉𑌪॑ 𑌹𑌰𑌤𑌿 । 𑌏॒𑌕॒𑌧𑍈𑌵 𑌯𑌜॑𑌮𑌾𑌨॒ 𑌆𑌯𑍁॒𑌰𑍂𑌰𑍍𑌜𑌂॒-𑌵𑌁𑌰𑍍𑌚𑍋॑ 𑌦𑌧𑌾𑌤𑌿 । 𑌰॒𑌥॒𑌵𑌿॒𑌮𑍋॒𑌚॒𑌨𑍀𑌯𑌾॑ 𑌜𑍁𑌹𑍋𑌤𑌿॒ 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈 ॥ 57 ॥

𑌤𑍍𑌰𑌯𑍋-𑌽𑌶𑍍𑌵𑌾॑ 𑌭𑌵𑌨𑍍𑌤𑌿 । 𑌰𑌥॑𑌶𑍍𑌚𑌤𑍁॒𑌰𑍍𑌥𑌃 । 𑌤𑌸𑍍𑌮𑌾᳚-𑌚𑍍𑌚॒𑌤𑍁𑌰𑍍𑌜𑍁॑𑌹𑍋𑌤𑌿 । 𑌯𑌦𑍁॒𑌭𑍗 𑌸॒𑌹𑌾𑌵॒𑌤𑌿𑌷𑍍𑌠𑍇॑𑌤𑌾𑌮𑍍 । 𑌸॒𑌮𑌾॒𑌨𑌂-𑌲𑍋𑌁॒𑌕𑌮𑌿॑𑌯𑌾𑌤𑌾𑌮𑍍 । 𑌸॒𑌹 𑌸॑𑌗𑍍𑌰𑌂𑌹𑍀॒𑌤𑍍𑌰𑌾 𑌰॑𑌥॒𑌵𑌾𑌹॑𑌨𑍇॒ 𑌰𑌥॒𑌮𑌾𑌦॑𑌧𑌾𑌤𑌿 । 𑌸𑍁॒𑌵॒𑌰𑍍𑌗𑌾𑌦𑍇॒𑌵𑍈𑌨𑌂॑-𑌲𑍋𑌁॒𑌕𑌾𑌦॒𑌨𑍍𑌤𑌰𑍍𑌦॑𑌧𑌾𑌤𑌿 । 𑌹॒𑌗𑍍𑌂॒𑌸-𑌶𑍍𑌶𑍁॑𑌚𑌿॒𑌷𑌦𑌿𑌤𑍍𑌯𑌾 𑌦॑𑌧𑌾𑌤𑌿 । 𑌬𑍍𑌰𑌹𑍍𑌮॑𑌣𑍈॒𑌵𑍈𑌨॑-𑌮𑍁𑌪𑌾𑌵॒𑌹𑌰॑𑌤𑌿 । 𑌬𑍍𑌰𑌹𑍍𑌮॒𑌣𑌾 𑌽𑌽𑌦॑𑌧𑌾𑌤𑌿 । 𑌅𑌤𑌿॑𑌚𑍍𑌛𑌨𑍍𑌦॒𑌸𑌾 𑌽𑌽𑌦॑𑌧𑌾𑌤𑌿 । 𑌅𑌤𑌿॑𑌚𑍍𑌛𑌨𑍍𑌦𑌾॒ 𑌵𑍈 𑌸𑌰𑍍𑌵𑌾॑𑌣𑌿॒ 𑌛𑌨𑍍𑌦𑌾𑌗𑍍𑌂॑𑌸𑌿 । 𑌸𑌰𑍍𑌵𑍇॑𑌭𑌿𑌰𑍇॒𑌵𑍈𑌨॒-𑌞𑍍𑌛𑌨𑍍𑌦𑍋॑𑌭𑌿॒-𑌰𑌾𑌦॑𑌧𑌾𑌤𑌿 । 𑌵𑌰𑍍𑌷𑍍𑌮॒ 𑌵𑌾 𑌏॒𑌷𑌾 𑌛𑌨𑍍𑌦॑𑌸𑌾𑌮𑍍 । 𑌯𑌦𑌤𑌿॑𑌚𑍍𑌛𑌨𑍍𑌦𑌾𑌃 । 𑌯𑌦𑌤𑌿॑𑌚𑍍𑌛𑌨𑍍𑌦𑌸𑌾॒ 𑌦𑌧𑌾॑𑌤𑌿 । 𑌵𑌰𑍍𑌷𑍍𑌮𑍈॒𑌵𑍈𑌨𑌗𑍍𑌂॑ 𑌸𑌮𑌾॒𑌨𑌾𑌨𑌾᳚-𑌙𑍍𑌕𑌰𑍋𑌤𑌿 ॥ 58 ॥

(𑌪॒𑌦𑍍𑌯॒𑌨𑍍𑌤𑍇॒ - 𑌦॒𑌧𑌾॒𑌤𑌿॒ - 𑌵𑍀॒𑌰𑍍𑌯𑍇॑𑌣𑍇𑌤𑍍𑌯𑌾॒𑌹𑌾 - 𑌨𑌾᳚𑌤𑍍𑌯𑍈॒ - 𑌪𑍍𑌰𑌤𑌿॑𑌷𑍍𑌠𑌿𑌤𑍍𑌯𑍈॒ - 𑌬𑍍𑌰𑌹𑍍𑌮॒𑌣𑌾-𑌽𑌽𑌦॑𑌧𑌾𑌤𑌿 𑌸॒𑌪𑍍𑌤 𑌚॑) (𑌅. 9)

𑌅𑌨𑍁𑌵𑌾𑌕𑌂 10 - 𑌆𑌸𑌨𑍇 𑌸𑌮𑍁𑌪𑌵𑍇𑌶-𑌸𑍍𑌸𑌰𑍍𑌵𑍈𑌸𑍍𑌸𑍇𑌵𑍍𑌯𑌤𑍍𑌵-𑌞𑍍𑌚

𑌮𑌿॒𑌤𑍍𑌰𑍋॑-𑌽𑌸𑌿॒ 𑌵𑌰𑍁॑𑌣𑍋॒-𑌽𑌸𑍀𑌤𑍍𑌯𑌾॑𑌹 । 𑌮𑍈॒𑌤𑍍𑌰𑌂-𑌵𑌾𑌁 𑌅𑌹𑌃॑ । 𑌵𑌾॒𑌰𑍁॒𑌣𑍀 𑌰𑌾𑌤𑍍𑌰𑌿𑌃॑ । 𑌅॒𑌹𑍋॒𑌰𑌾॒𑌤𑍍𑌰𑌾𑌭𑍍𑌯𑌾॑-𑌮𑍇॒𑌵𑍈𑌨॑-𑌮𑍁॒𑌪𑌾𑌵॑𑌹𑌰𑌤𑌿 । 𑌮𑌿॒𑌤𑍍𑌰𑍋॑-𑌽𑌸𑌿॒ 𑌵𑌰𑍁॑𑌣𑍋॒𑌸𑍀𑌤𑍍𑌯𑌾॑𑌹 । 𑌮𑍈॒𑌤𑍍𑌰𑍋 𑌵𑍈 𑌦𑌕𑍍𑌷𑌿॑𑌣𑌃 । 𑌵𑌾॒𑌰𑍁॒𑌣-𑌸𑍍𑌸॒𑌵𑍍𑌯𑌃 । 𑌵𑍈॒𑌶𑍍𑌵॒𑌦𑍇॒𑌵𑍍𑌯𑌾॑𑌮𑌿𑌕𑍍𑌷𑌾᳚ । 𑌸𑍍𑌵𑌮𑍇॒𑌵𑍈𑌨𑍗॑ 𑌭𑌾𑌗॒𑌧𑍇𑌯॑-𑌮𑍁॒𑌪𑌾𑌵॑𑌹𑌰𑌤𑌿 । 𑌸𑌮॒𑌹𑌂-𑌵𑌿𑌁𑌶𑍍𑌵𑍈᳚𑌰𑍍𑌦𑍇॒𑌵𑍈-𑌰𑌿𑌤𑍍𑌯𑌾॑𑌹 ॥ 59 ॥

𑌵𑍈॒𑌶𑍍𑌵॒𑌦𑍇॒𑌵𑍍𑌯𑍋॑ 𑌵𑍈 𑌪𑍍𑌰॒𑌜𑌾𑌃 । 𑌤𑌾 𑌏॒𑌵𑌾𑌦𑍍𑌯𑌾𑌃᳚ 𑌕𑍁𑌰𑍁𑌤𑍇 । 𑌕𑍍𑌷॒𑌤𑍍𑌰𑌸𑍍𑌯॒ 𑌨𑌾𑌭𑌿॑𑌰𑌸𑌿 𑌕𑍍𑌷॒𑌤𑍍𑌰𑌸𑍍𑌯॒ 𑌯𑍋𑌨𑌿॑-𑌰॒𑌸𑍀𑌤𑍍𑌯॑𑌧𑍀𑌵𑌾॒𑌸𑌮𑌾-𑌸𑍍𑌤𑍃॑𑌣𑌾𑌤𑌿 𑌸𑌯𑍋𑌨𑌿॒𑌤𑍍𑌵𑌾𑌯॑ । 𑌸𑍍𑌯𑍋॒𑌨𑌾𑌮𑌾𑌸𑍀॑𑌦 𑌸𑍁॒𑌷𑌦𑌾॒𑌮𑌾𑌸𑍀॒𑌦𑍇𑌤𑍍𑌯𑌾॑𑌹 । 𑌯॒𑌥𑌾॒ 𑌯॒𑌜𑍁𑌰𑍇॒𑌵𑍈 𑌤𑌤𑍍 । 𑌮𑌾 𑌤𑍍𑌵𑌾॑ 𑌹𑌿𑌗𑍍𑌂𑌸𑍀॒-𑌨𑍍𑌮𑌾 𑌮𑌾॑ 𑌹𑌿𑌗𑍍𑌂𑌸𑍀॒𑌦𑌿𑌤𑍍𑌯𑌾॒𑌹𑌾-𑌹𑌿𑌗𑍍𑌂॑𑌸𑌾𑌯𑍈 । 𑌨𑌿𑌷॑𑌸𑌾𑌦 𑌧𑍃॒𑌤𑌵𑍍𑌰॑𑌤𑍋॒ 𑌵𑌰𑍁॑𑌣𑌃 𑌪॒𑌸𑍍𑌤𑍍𑌯𑌾᳚𑌸𑍍𑌵𑌾 𑌸𑌾𑌮𑍍𑌰𑌾᳚𑌜𑍍𑌯𑌾𑌯 𑌸𑍁॒𑌕𑍍𑌰𑌤𑍁॒𑌰𑌿𑌤𑍍𑌯𑌾॑𑌹 । 𑌸𑌾𑌮𑍍𑌰𑌾᳚𑌜𑍍𑌯𑌮𑍇॒𑌵𑍈𑌨𑌗𑍍𑌂॑ 𑌸𑍁॒𑌕𑍍𑌰𑌤𑍁॑-𑌙𑍍𑌕𑌰𑍋𑌤𑌿 । 𑌬𑍍𑌰𑌹𑍍𑌮𑌾(3)𑌨𑍍𑌤𑍍𑌵𑌗𑍍𑌂 𑌰𑌾॑𑌜𑌨𑍍-𑌬𑍍𑌰॒𑌹𑍍𑌮𑌾-𑌽𑌸𑌿॑ 𑌸𑌵𑌿॒𑌤𑌾-𑌽𑌸𑌿॑ 𑌸॒𑌤𑍍𑌯𑌸॑𑌵॒ 𑌇𑌤𑍍𑌯𑌾॑𑌹 । 𑌸॒𑌵𑌿॒𑌤𑌾𑌰॑-𑌮𑍇॒𑌵𑍈𑌨𑌗𑍍𑌂॑ 𑌸॒𑌤𑍍𑌯𑌸॑𑌵-𑌙𑍍𑌕𑌰𑍋𑌤𑌿 ॥ 60 ॥

𑌬𑍍𑌰𑌹𑍍𑌮𑌾(3)𑌨𑍍𑌤𑍍𑌵𑌗𑍍𑌂 𑌰𑌾॑𑌜𑌨𑍍-𑌬𑍍𑌰॒𑌹𑍍𑌮𑌾-𑌽𑌸𑍀𑌨𑍍𑌦𑍍𑌰𑍋॑-𑌽𑌸𑌿 𑌸॒𑌤𑍍𑌯𑍗𑌜𑌾॒ 𑌇𑌤𑍍𑌯𑌾॑𑌹 । 𑌇𑌨𑍍𑌦𑍍𑌰॑𑌮𑍇॒𑌵𑍈𑌨𑌗𑍍𑌂॑ 𑌸॒𑌤𑍍𑌯𑍗𑌜॑𑌸-𑌙𑍍𑌕𑌰𑍋𑌤𑌿 । 𑌬𑍍𑌰𑌹𑍍𑌮𑌾(3)𑌨𑍍𑌤𑍍𑌵𑌗𑍍𑌂 𑌰𑌾॑𑌜𑌨𑍍-𑌬𑍍𑌰॒𑌹𑍍𑌮𑌾-𑌽𑌸𑌿॑ 𑌮𑌿॒𑌤𑍍𑌰𑍋॑-𑌽𑌸𑌿 𑌸𑍁॒𑌶𑍇𑌵॒ 𑌇𑌤𑍍𑌯𑌾॑𑌹 । 𑌮𑌿॒𑌤𑍍𑌰𑌮𑍇॒𑌵𑍈𑌨𑌗𑍍𑌂॑ 𑌸𑍁॒𑌶𑍇𑌵॑-𑌙𑍍𑌕𑌰𑍋𑌤𑌿 । 𑌬𑍍𑌰𑌹𑍍𑌮𑌾(3)𑌨𑍍𑌤𑍍𑌵𑌗𑍍𑌂 𑌰𑌾॑𑌜𑌨𑍍-𑌬𑍍𑌰॒𑌹𑍍𑌮𑌾-𑌽𑌸𑌿॒ 𑌵𑌰𑍁॑𑌣𑍋-𑌽𑌸𑌿 𑌸॒𑌤𑍍𑌯𑌧॒𑌰𑍍𑌮𑍇𑌤𑍍𑌯𑌾॑𑌹 । 𑌵𑌰𑍁॑𑌣𑌮𑍇॒𑌵𑍈𑌨𑌗𑍍𑌂॑ 𑌸॒𑌤𑍍𑌯𑌧॑𑌰𑍍𑌮𑌾𑌣-𑌙𑍍𑌕𑌰𑍋𑌤𑌿 । 𑌸॒𑌵𑌿॒𑌤𑌾-𑌽𑌸𑌿॑ 𑌸॒𑌤𑍍𑌯𑌸॑𑌵॒ 𑌇𑌤𑍍𑌯𑌾॑𑌹 । 𑌗𑌾॒𑌯॒𑌤𑍍𑌰𑍀-𑌮𑍇॒𑌵𑍈𑌤𑍇𑌨𑌾॑𑌭𑌿॒𑌵𑍍𑌯𑌾𑌹॑𑌰𑌤𑌿 । 𑌇𑌨𑍍𑌦𑍍𑌰𑍋॑-𑌽𑌸𑌿 𑌸॒𑌤𑍍𑌯𑍗𑌜𑌾॒ 𑌇𑌤𑍍𑌯𑌾॑𑌹 । 𑌤𑍍𑌰𑌿॒𑌷𑍍𑌟𑍁𑌭॑-𑌮𑍇॒𑌵𑍈𑌤𑍇𑌨𑌾॑𑌭𑌿॒-𑌵𑍍𑌯𑌾𑌹॑𑌰𑌤𑌿 ॥ 61 ॥

𑌮𑌿॒𑌤𑍍𑌰𑍋॑-𑌽𑌸𑌿 𑌸𑍁॒𑌶𑍇𑌵॒ 𑌇𑌤𑍍𑌯𑌾॑𑌹 । 𑌜𑌗॑𑌤𑍀-𑌮𑍇॒𑌵𑍈𑌤𑍇𑌨𑌾॑𑌭𑌿॒𑌵𑍍𑌯𑌾𑌹॑𑌰𑌤𑌿 । 𑌸॒𑌤𑍍𑌯𑌮𑍇॒𑌤𑌾 𑌦𑍇॒𑌵𑌤𑌾𑌃᳚ । 𑌸॒𑌤𑍍𑌯𑌮𑍇॒𑌤𑌾𑌨𑌿॒ 𑌛𑌨𑍍𑌦𑌾𑌗𑍍𑌂॑𑌸𑌿 । 𑌸॒𑌤𑍍𑌯𑌮𑍇॒𑌵𑌾𑌵॑ 𑌰𑍁𑌨𑍍𑌧𑍇 । 𑌵𑌰𑍁॑𑌣𑍋-𑌽𑌸𑌿 𑌸॒𑌤𑍍𑌯𑌧॒𑌰𑍍𑌮𑍇𑌤𑍍𑌯𑌾॑𑌹 । 𑌅॒𑌨𑍁॒𑌷𑍍𑌟𑍁𑌭॑-𑌮𑍇॒𑌵𑍈𑌤𑍇𑌨𑌾॑𑌭𑌿॒𑌵𑍍𑌯𑌾𑌹॑𑌰𑌤𑌿 । 𑌸॒𑌤𑍍𑌯𑌾॒𑌨𑍃॒𑌤𑍇 𑌵𑌾 𑌅॑𑌨𑍁॒𑌷𑍍𑌟𑍁𑌪𑍍 । 𑌸॒𑌤𑍍𑌯𑌾॒𑌨𑍃॒𑌤𑍇 𑌵𑌰𑍁॑𑌣𑌃 । 𑌸॒𑌤𑍍𑌯𑌾॒𑌨𑍃॒𑌤𑍇 𑌏॒𑌵𑌾𑌵॑𑌰𑍁𑌨𑍍𑌧𑍇 ॥ 62 ॥

𑌨𑍈𑌨𑌗𑍍𑌂॑ 𑌸𑌤𑍍𑌯𑌾𑌨𑍃॒𑌤𑍇 𑌉॑𑌦𑌿॒𑌤𑍇 𑌹𑌿𑌗𑍍𑌗𑍍॑𑌸𑍍𑌤𑌃 । 𑌯 𑌏॒𑌵𑌂-𑌵𑍇𑌁𑌦॑ । 𑌇𑌨𑍍𑌦𑍍𑌰॑𑌸𑍍𑌯॒ 𑌵𑌜𑍍𑌰𑍋॑-𑌽𑌸𑌿॒ 𑌵𑌾𑌰𑍍𑌤𑍍𑌰॑𑌘𑍍𑌨॒ 𑌇𑌤𑌿॒ 𑌸𑍍𑌫𑍍𑌯-𑌮𑍍𑌪𑍍𑌰𑌯॑𑌚𑍍𑌛𑌤𑌿 । 𑌵𑌜𑍍𑌰𑍋॒ 𑌵𑍈 𑌸𑍍𑌫𑍍𑌯𑌃 । 𑌵𑌜𑍍𑌰𑍇॑𑌣𑍈॒𑌵𑌾𑌸𑍍𑌮𑌾॑ 𑌅𑌵𑌰𑌪॒𑌰𑌗𑍍𑌂 𑌰॑𑌨𑍍𑌧𑌯𑌤𑌿 । 𑌏॒𑌵𑌗𑍍𑌂 𑌹𑌿 𑌤𑌚𑍍𑌛𑍍𑌰𑍇𑌯𑌃॑ । 𑌯𑌦॑𑌸𑍍𑌮𑌾 𑌏॒𑌤𑍇 𑌰𑌦𑍍𑌧𑍍𑌯𑍇॑𑌯𑍁𑌃 । 𑌦𑌿𑌶𑍋॒-𑌽𑌭𑍍𑌯॑𑌯𑌗𑍍𑌂 𑌰𑌾𑌜𑌾॑ 𑌽𑌭𑍂॒𑌦𑌿𑌤𑌿॒ 𑌪𑌞𑍍𑌚𑌾॒𑌕𑍍𑌷𑌾𑌨𑍍-𑌪𑍍𑌰𑌯॑𑌚𑍍𑌛𑌤𑌿 । 𑌏॒𑌤𑍇 𑌵𑍈 𑌸𑌰𑍍𑌵𑍇-𑌽𑌯𑌾𑌃᳚ । 𑌅𑌪॑𑌰𑌾𑌜𑌾𑌯𑌿𑌨-𑌮𑍇॒𑌵𑍈𑌨॑-𑌙𑍍𑌕𑌰𑍋𑌤𑌿 ॥ 63 ॥

𑌓॒𑌦॒𑌨𑌮𑍁𑌦𑍍𑌬𑍍𑌰𑍁॑𑌵𑌤𑍇 । 𑌪॒𑌰॒𑌮𑍇॒𑌷𑍍𑌠𑍀 𑌵𑌾 𑌏॒𑌷𑌃 । 𑌯𑌦𑍋॑𑌦॒𑌨𑌃 । 𑌪॒𑌰॒𑌮𑌾𑌮𑍇॒𑌵𑍈𑌨॒𑌗𑍍𑌗𑍍॒ 𑌶𑍍𑌰𑌿𑌯॑-𑌙𑍍𑌗𑌮𑌯𑌤𑌿 । 𑌸𑍁𑌶𑍍𑌲𑍋॒𑌕𑌾𑌁(4) 𑌸𑍁𑌮॑𑌙𑍍𑌗॒𑌲𑌾𑌁(4) 𑌸𑌤𑍍𑌯॑𑌰𑌾॒𑌜𑌾(3)𑌨𑌿𑌤𑍍𑌯𑌾॑𑌹 । 𑌆॒𑌶𑌿𑌷॑𑌮𑍇॒𑌵𑍈𑌤𑌾𑌮𑌾 𑌶𑌾᳚𑌸𑍍𑌤𑍇 । 𑌶𑍗॒𑌨॒-𑌶𑍍𑌶𑍇॒𑌪𑌮𑌾𑌖𑍍𑌯𑌾॑𑌪𑌯𑌤𑍇 । 𑌵॒𑌰𑍁॒𑌣॒𑌪𑌾॒𑌶𑌾-𑌦𑍇॒𑌵𑍈𑌨॑-𑌮𑍍𑌮𑍁𑌞𑍍𑌚𑌤𑌿 । 𑌪॒𑌰॒-𑌶𑍍𑌶॒𑌤-𑌮𑍍𑌭॑𑌵𑌤𑌿 । 𑌶॒𑌤𑌾𑌯𑍁𑌃॒ 𑌪𑍁𑌰𑍁॑𑌷-𑌶𑍍𑌶॒𑌤𑍇𑌨𑍍𑌦𑍍𑌰𑌿॑𑌯𑌃( ) । 𑌆𑌯𑍁॑𑌷𑍍𑌯𑍇॒𑌵𑍇𑌨𑍍𑌦𑍍𑌰𑌿॒𑌯𑍇 𑌪𑍍𑌰𑌤𑌿॑𑌤𑌿𑌷𑍍𑌠𑌤𑌿 । 𑌮𑌾॒𑌰𑍁॒𑌤𑌸𑍍𑌯॒ 𑌚𑍈𑌕॑𑌵𑌿𑌗𑍍𑌂𑌶𑌤𑌿𑌕𑌪𑌾𑌲𑌸𑍍𑌯 𑌵𑍈𑌶𑍍𑌵𑌦𑍇॒𑌵𑍍𑌯𑍈 𑌚𑌾॒𑌮𑌿𑌕𑍍𑌷𑌾॑𑌯𑌾 𑌅॒𑌗𑍍𑌨𑌯𑍇᳚ 𑌸𑍍𑌵𑌿𑌷𑍍𑌟॒𑌕𑍃𑌤𑍇॑ 𑌸॒𑌮𑌵॑𑌦𑍍𑌯𑌤𑌿 । 𑌦𑍇॒𑌵𑌤𑌾॑𑌭𑌿𑌰𑍇॒𑌵𑍈𑌨॑-𑌮𑍁𑌭॒𑌯𑌤𑌃॒ 𑌪𑌰𑌿॑𑌗𑍃𑌹𑍍𑌣𑌾𑌤𑌿 । 𑌅॒𑌪𑌾-𑌨𑍍𑌨𑌪𑍍𑌤𑍍𑌰𑍇॒ 𑌸𑍍𑌵𑌾𑌹𑍋॒𑌰𑍍𑌜𑍋 𑌨𑌪𑍍𑌤𑍍𑌰𑍇॒ 𑌸𑍍𑌵𑌾𑌹𑌾॒-𑌽𑌗𑍍𑌨𑌯𑍇॑ 𑌗𑍃॒𑌹𑌪॑𑌤𑌯𑍇॒ 𑌸𑍍𑌵𑌾𑌹𑍇𑌤𑌿॑ 𑌤𑌿॒𑌸𑍍𑌰 𑌆𑌹𑍁॑𑌤𑍀-𑌰𑍍𑌜𑍁𑌹𑍋𑌤𑌿 । 𑌤𑍍𑌰𑌯॑ 𑌇॒𑌮𑍇 𑌲𑍋॒𑌕𑌾𑌃 । 𑌏॒𑌷𑍍𑌵𑍇॑𑌵 𑌲𑍋॒𑌕𑍇𑌷𑍁॒ 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿 ॥ 64 ॥

(𑌦𑍇॒𑌵𑍈𑌰𑌿𑌤𑍍𑌯𑌾॑𑌹 - 𑌸॒𑌤𑍍𑌯𑌸॑𑌵-𑌙𑍍𑌕𑌰𑍋𑌤𑌿 - 𑌤𑍍𑌰𑌿॒𑌷𑍍𑌟𑍁𑌭॑𑌮𑍇॒𑌵𑍈𑌤𑍇𑌨𑌾॑𑌭𑌿॒ 𑌵𑍍𑌯𑌾𑌹॑𑌰𑌤𑌿- 𑌸𑌤𑍍𑌯𑌾𑌨𑍃॒𑌤𑍇 𑌏॒𑌵𑌾𑌵॑𑌰𑍁𑌨𑍍𑌧𑍇 - 𑌕𑌰𑍋𑌤𑌿 - 𑌶॒𑌤𑍇𑌨𑍍𑌦𑍍𑌰𑌿॑𑌯॒-𑌷𑍍𑌷𑌟𑍍𑌚॑) (𑌅. 10)

(𑌏॒𑌤-𑌦𑍍𑌬𑍍𑌰𑌾᳚𑌹𑍍𑌮𑌣𑌾𑌨𑌿 - 𑌧𑌾॒𑌤𑍍𑌰𑍇 - 𑌰𑌾॒𑌤𑍍𑌨𑌿𑌨𑌾𑌂᳚ - 𑌦𑍇𑌵𑌸𑍁॒𑌵𑌾 - 𑌮॒𑌰𑍍𑌥𑍇𑌤𑍋॒ - 𑌦𑍇𑌵𑍀॒--𑌰𑍍 𑌦𑌿𑌶𑌃॒ - 𑌸𑍋𑌮॒𑌸𑍍𑌯𑍇 - 𑌨𑍍𑌦𑍍𑌰॑𑌸𑍍𑌯 - 𑌮𑌿॒𑌤𑍍𑌰𑍋 𑌦𑌶॑)

(𑌏॒𑌤-𑌦𑍍𑌬𑍍𑌰𑌾᳚𑌹𑍍𑌮𑌣𑌾𑌨𑌿 - 𑌵𑍈𑌷𑍍𑌣॒𑌵-𑌨𑍍𑌤𑍍𑌰𑌿॑𑌕𑌪𑌾॒𑌲 - 𑌮𑌨𑍍𑌨𑌂॒-𑌵𑍈𑌁 𑌪𑍂॒𑌷𑌾 - 𑌵𑌾𑌶𑌾॒-𑌸𑍍𑌸𑍍𑌥𑍇𑌤𑍍𑌯𑌾॑𑌹॒ - 𑌦𑌿𑌶𑍋॒ 𑌵𑍍𑌯𑌾𑌸𑍍𑌥𑌾॑𑌪𑌯॒ - 𑌤𑍍𑌯𑍁𑌦॑𑌮𑍍𑌪॒𑌰𑍇𑌤𑍍𑌯॒ - 𑌬𑍍𑌰𑌹𑍍𑌮𑌾(3)𑌨𑍍𑌤𑍍𑌵𑌗𑍍𑌂 𑌰𑌾॑𑌜॒-𑌞𑍍𑌚𑌤𑍁॑𑌷𑍍𑌷𑌷𑍍𑌟𑌿𑌃

(𑌏॒𑌤-𑌦𑍍𑌬𑍍𑌰𑌾᳚𑌹𑍍𑌮𑌣𑌾𑌨𑌿॒ - 𑌪𑍍𑌰𑌤𑌿॑ 𑌤𑌿𑌷𑍍𑌠𑌤𑌿)

॥ 𑌹𑌰𑌿𑌃॑ 𑌓𑌮𑍍 ॥

॥ 𑌕𑍃𑌷𑍍𑌣 𑌯𑌜𑍁𑌰𑍍𑌵𑍇𑌦𑍀𑌯 𑌤𑍈𑌤𑍍𑌤𑌿𑌰𑍀𑌯 𑌬𑍍𑌰𑌾𑌹𑍍𑌮𑌣𑍇 𑌪𑍍𑌰𑌥𑌮𑌾𑌷𑍍𑌟𑌕𑍇 𑌸𑌪𑍍𑌤𑌮𑌃 𑌪𑍍𑌰𑌪𑌾𑌠𑌕-𑌸𑍍𑌸𑌮𑌾𑌪𑍍𑌤𑌃 ॥

Roman (IAST) Transliteration

kṛṣṇa yajurvedīya taittirīya brāhmaṇe prathamāṣṭake saptamaḥ prapāṭhakaḥ - rājasūyānubrāhmaṇaṃ

o-nnamaḥ paramātmane, śrī mahāgaṇapataye namaḥ,

śrī gurubhyo namaḥ | ha॒riḥ॒ om ||

anuvākaṃ 1 - śunāsīrīyendraturīyapañcāvattīyāpāmārgahomāḥ

e॒ta-dbrā᳚hmaṇānye॒va pañca̭ ha॒vīgṃṣi̭ | athendrā̭ya॒ śunā॒sīrā̭ya puro॒ḍāśa॒-ndvāda̭śakapāla॒-nnirva̭pati | saṃ॒va~॒thsa॒ro vā indrā॒ śunā॒sīraḥ̭ | saṃ॒va~॒thsa॒reṇai॒vāsmā॒ anna॒mava̭ rundhe | vā॒ya॒vya̭-mpayo̭ bhavati | vā॒yurvai vṛṣṭyai᳚ pradāpayi॒tā | sa e॒vāsmai॒ vṛṣṭi॒-mpradā̭payati | sau॒rya̭ eka̭kapālo bhavati | sūryḙṇa॒ vā a॒muṣmi̭~llo॒ke vṛṣṭi̭rdhṛ॒tā | sa e॒vāsmai॒ vṛṣṭi॒-nni ya̭cchati || 1 ||

dvā॒da॒śa॒ga॒vagṃ sīra॒-ndakṣi̭ṇā॒ samṛ̭ddhyai | de॒vā॒su॒rā-ssaṃya~̭ttā āsann | te de॒vā a॒gnima̭bruvann | tvayā̭ vī॒reṇāsṷrāna॒-bhibha̭vā॒meti̭ | so᳚-'bravīt | tre॒dhā-'hamā॒tmānaṃ॒-vi~ka̭riṣya॒ iti̭ | sa tre॒dhā ''tmānaṃ॒-vya~̭kuruta | a॒gni-ntṛtī̭yam | ru॒dra-ntṛtī̭yam | varṷṇa॒-ntṛtī̭yam || 2 ||

so᳚-'bravīt | ka i॒da-ntu॒rīya॒miti̭ | a॒hamitīndro᳚-'bravīt |

sa-ntu sṛ̭jāvahā॒ iti̭ | tau sama̭sṛjetām | sa indra̭stu॒rīya̭-mabhavat | yadindra̭-stu॒rīya॒-mabha̭vat | tadi̭ndra-turī॒yasye᳚ndra-turīya॒tvam | tato॒ vai de॒vā vya̭jayanta | yadi̭ndraturī॒ya-nni̭ru॒pyate॒ viji̭tyai || 3 ||

va॒hinī̭ dhe॒nu-rdakṣi̭ṇā | ya-dva॒hinī᳚ | tenā᳚gne॒yī |

ya-dgauḥ | tena̭ rau॒drī | ya-ddhe॒nuḥ | tenai॒ndrī | yathstrī sa॒tī dā॒ntā | tena̭ vāru॒ṇī samṛ̭ddhyai | pra॒jāpa̭ti-rya॒jñama̭sṛjata || 4 ||

tagṃ sṛ॒ṣṭagṃ rakṣāg̭syajighāgṃsann | sa e॒tāḥ pra॒jāpa̭ti-rā॒tmano̭ de॒vatā॒ nira̭mimīta | tābhi॒rvai sa di॒gbhyo rakṣāgṃ̭si॒ prāṇṷdata | ya-tpa̭ñcāva॒ttīya̭-ñju॒hoti̭ | di॒gbhya e॒va ta-dyaja̭māno॒ rakṣāgṃ̭si॒ praṇṷdate | samṷ̄ḍha॒gṃ॒ rakṣa॒-ssanda̭gdha॒gṃ॒ rakṣa॒ ityā̭ha | rakṣāg̭sye॒va sanda̭hati | a॒gnayḙ rakṣo॒ghne svāhetyā̭ha | de॒vatā᳚bhya e॒va vi̭jigyā॒nābhyo̭ bhāga॒dheya̭-ṅkaroti | pra॒ṣṭi॒vā॒hī ratho॒ dakṣi̭ṇā॒ samṛ̭ddhyai || 5 ||

indro̭ vṛ॒tragṃ ha॒tvā | asṷrā-nparā॒bhāvya̭ | namṷcimāsu॒ra-nnāla̭bhata | tagṃ śa॒cyā̭-'gṛhṇāt | tau sama̭labhetām | so᳚-'smā-da॒bhiśṷnataro-'bhavat | so᳚-'bravīt | sa॒dhāṃgṃ sanda̭dhāvahai | atha॒ tvā-'va̭ srakṣyāmi | na mā॒ śuṣkḙṇa॒ nārdreṇa̭ hanaḥ || 6 ||

na divā॒ na nakta॒miti̭ | sa e॒tama॒pā-mphena̭masiñcat | na vā e॒ṣa śuṣko॒ nārdro vyṷṣṭā ''sīt | anṷdita॒-ssūryaḥ̭ | na vā e॒ta-ddivā॒ na nakta᳚m | tasyai॒tasmi̭n ~lo॒ke | a॒pā-mphenḙna॒ śira॒ uda̭vartayat | tadḙna॒manva̭vartata | mitra̭dru॒giti̭ || 7 ||

sa e॒tāna̭pāmā॒rgāna̭janayat | tāna̭juhot | tairvai sa rakṣā॒g॒syapā̭hata | yada̭pāmārga ho॒mo bhava̭ti | rakṣa̭sā॒-mapa̭hatyai | e॒ko॒l mu॒kena̭ yanti | taddhi rakṣa̭sā-mbhāga॒dheya᳚m | i॒mā-ndiśaṃ̭-ya~nti | e॒ṣā vai rakṣa̭sā॒-ndik | svāyā̭me॒va di॒śi rakṣāgṃ̭si hanti || 8 ||

svakṛ̭ta॒ iri̭ṇe juhoti prada॒re vā᳚ | e॒ta-dvai rakṣa̭sāmā॒yata̭nam | sva e॒vāyata̭ne॒ rakṣāgṃ̭si hanti | pa॒rṇa॒mayḙna sru॒veṇa̭ juhoti | brahma॒ vai pa॒rṇaḥ | brahma̭ṇai॒va rakṣāgṃ̭si hanti | de॒vasya̭ tvā savi॒tuḥ pra̭sa॒va ityā̭ha | sa॒vi॒tṛpra̭sūta e॒va rakṣāgṃ̭si hanti | ha॒tagṃ rakṣo 'va̭dhiṣma॒ rakṣa॒ ityā̭ha | rakṣa̭sā॒g॒ stṛtyai᳚ | yadvaste॒ ta-ddakṣi̭ṇā ni॒rava̭ttyai | apra̭tīkṣa॒mā ya̭nti | rakṣa̭sā-ma॒ntarhi̭tyai || 9 ||

(ya॒ccha॒ti॒ - varṷṇa॒-ntṛtī̭yaṃ॒ - ~viji̭tyā - asṛjata॒ - samṛ̭ddhyai - hano॒ - mitra̭dru॒giti̭ - hanti॒ - stṛtyai॒ trīṇi̭ ca) (a. 1)

anuvākaṃ 2 - devikāvahavīṃṣi

dhā॒tre pṷro॒ḍāśa॒-ndvāda̭śakapāla॒-nnirva̭pati | saṃ॒va~॒thsa॒ro vai dhā॒tā | saṃ॒va~॒thsa॒reṇai॒vāsmai᳚ pra॒jāḥ praja̭nayati | anve॒vāsmā॒ anṷmatirmanyate | rā॒te rā॒kā | pra si̭nīvā॒lī ja̭nayati | pra॒jāsve॒va prajā̭tāsu ku॒hvā̭ vāca̭-ndadhāti | mi॒thu॒nau gāvau॒ dakṣi̭ṇā॒ samṛ̭ddhyai | ā॒gnā॒vai॒ṣṇa॒va-mekā̭daśakapāla॒-nnirva̭pati | ai॒ndrā॒vai॒ṣṇa॒va-mekā̭daśakapālam || 10 ||

vai॒ṣṇa॒va-ntri̭kapā॒lam | vī॒ryaṃ̭-vā~ a॒gniḥ | vī॒rya̭mindraḥ̭ | vī॒ryaṃ̭-vi~ṣṇuḥ̭ | pra॒jā e॒va prajā̭tā vī॒rye᳚ prati̭ṣṭhāpayati | tasmā᳚-tpra॒jā vī॒ryā̭vatīḥ | vā॒ma॒na ṛ̭ṣa॒bho va॒hī dakṣi̭ṇā | yadva॒hī | tenā᳚gne॒yaḥ | yadṛ̭ṣa॒bhaḥ || 11 ||

tenai॒ndraḥ | yadvā̭ma॒naḥ | tena̭ vaiṣṇa॒va-ssamṛ̭ddhyai | a॒gnī॒ṣo॒mīya॒-mekā̭daśakapāla॒-nnirva̭pati | i॒ndrā॒so॒mīya॒-mekā̭daśakapālam | sau॒mya-ñca॒rum | somo॒ vai rḙto॒dhāḥ | a॒gniḥ pra॒jānā᳚-mprajanayi॒tā | vṛ॒ddhānā॒mindraḥ̭ pradāpayi॒tā | soma̭ e॒vāsmai॒ reto॒ dadhā̭ti || 12 ||

a॒gniḥ pra॒jā-mpraja̭nayati | vṛ॒ddhāmindraḥ॒ praya̭cchati | ba॒bhru-rdakṣi̭ṇā॒ samṛ̭ddhyai | so॒mā॒pau॒ṣṇa-ñca॒ru-nnirva̭pati | ai॒ndrā॒pau॒ṣṇa-ñca॒rum | somo॒ vai rḙto॒dhāḥ | pū॒ṣā pa̭śū॒nā-mpra̭janayi॒tā | vṛ॒ddhānā॒mindraḥ̭ pradāpayi॒tā | soma̭ e॒vāsmai॒ reto॒ dadhā̭ti | pū॒ṣā pa॒śū-npraja̭nayati || 13 ||

vṛ॒ddhānindraḥ॒ praya̭cchati | pau॒ṣṇaśca॒ru-rbha̭vati | i॒yaṃ-vai~ pū॒ṣā | a॒syāme॒va prati̭ tiṣṭhati | śyā॒mo dakṣi̭ṇā॒ samṛ̭ddhyai | ba॒hu vai purṷṣo-'me॒ddhya-mupa̭gacchati | vai॒śvā॒na॒ra-ndvāda̭śakapāla॒-nnirva̭pati | saṃ॒va~॒thsa॒ro vā a॒gni-rvai᳚śvāna॒raḥ | saṃ॒va~॒thsa॒reṇai॒vainagg̭ svadayati | hira̭ṇya॒-ndakṣi̭ṇā || 14 ||

pa॒vitraṃ॒-vai~ hira̭ṇyam | pu॒nātye॒vaina᳚m | ba॒hu vai rā̭ja॒nyo 'nṛ̭ta-ṅkaroti | upa̭ jā॒myai hara̭te | ji॒nāti̭ brāhma॒ṇam | vada॒tyanṛ̭tam | anṛ̭te॒ khalu॒ vai kri॒yamā̭ṇe॒ varṷṇo gṛhṇāti | vā॒ru॒ṇaṃ-ya~̭va॒maya̭-ñca॒ru-nnirva̭pati | va॒ru॒ṇa॒pā॒śāde॒vaina̭-mmuñcati | aśvo॒ dakṣi̭ṇā | vā॒ru॒ṇo hi de॒vata॒yā-'śva॒-ssamṛ̭ddhyai || 15 ||

(ai॒ndrā॒vai॒ṣṇā॒vamekā̭daśakapālaṃ॒-~yadṛ̭ṣa॒bho- dadhā̭ti-pū॒ṣā pa॒śū-npraja̭nayati॒-hira̭ṇyaṃ॒ dakṣi̭ṇā॒-dakṣi॒ṇaikaṃ̭ ca) (a. 2)

anuvākaṃ 3 - ratnināṃ havīṃṣi

ra॒tninā̭me॒tāni̭ ha॒vīgṃṣi̭ bhavanti | e॒te vai rā॒ṣṭrasya̭ pradā॒tāraḥ̭ | e॒tḙ-'pādā॒tāraḥ̭ | ya e॒va rā॒ṣṭrasya̭ pradā॒tāraḥ̭ | yḙ-'pādā॒tāraḥ̭ | ta e॒vāsmai̭ rā॒ṣṭra-mpraya̭cchanti | rā॒ṣṭrame॒va bha̭vati | ya-thsa̭mā॒hṛtya̭ ni॒rvape᳚t | ara̭tnina-ssyuḥ | ya॒thā॒ya॒tha-nnirva̭pati ratni॒tvāya̭ || 16 ||

ya-thsa॒dyo ni॒rvape᳚t | yāva̭tī॒mekḙna ha॒viṣā॒-''śiṣa̭mava ru॒ndhe | tāva̭tī॒mava̭ rundhīta | a॒nva॒ha-nnirva̭pati | bhūya̭sīme॒vāśiṣa॒mava̭ rundhe | bhūya̭so yajñakra॒tūnupai̭ti | bā॒r॒ha॒spa॒tya-ñca॒ru-nnirva̭pati bra॒hmaṇo̭ gṛ॒he | mu॒kha॒ta e॒vāsmai॒ brahma॒ saggśya̭ti | atho॒ brahma̭nne॒va kṣa॒tra-ma॒nvāra̭mbhayati | śi॒ti॒pṛ॒ṣṭho dakṣi̭ṇā॒ samṛ̭ddhyai || 17 ||

ai॒ndra-mekā̭daśakapālagṃ rāja॒nya̭sya gṛ॒he | i॒ndri॒yame॒vāva̭ rundhe | ṛ॒ṣa॒bho dakṣi̭ṇā॒ samṛ̭ddhyai | ā॒di॒tya-ñca॒ru-mmahi̭ṣyai gṛ॒he | i॒yaṃ-vā~ adi̭tiḥ | a॒syāme॒va prati̭tiṣṭhati | dhe॒nu-rdakṣi̭ṇā॒ samṛ̭ddhyai | bhagā̭ya ca॒ruṃ-vā~॒vātā̭yai gṛ॒he | bhaga̭me॒vāsmi̭-ndadhāti | vici̭ttagarbhā paṣṭhau॒hī dakṣi̭ṇā॒ samṛ̭ddhyai || 18 ||

nai॒r॒ṛ॒ta-ñca॒ru-mpa̭rivṛ॒ktyai̭ gṛ॒he kṛ॒ṣṇānāṃ᳚-vrī~hī॒ṇā-nna॒khani̭rbhinnam | pā॒pmāna̭me॒va nir-ṛ̭ti-nni॒rava̭dayate | kṛ॒ṣṇā kū॒ṭā dakṣi̭ṇā॒ samṛ̭ddhyai | ā॒gne॒ya-ma॒ṣṭāka̭pālagṃ senā॒nyo̭ gṛ॒he | senā̭me॒vāsya॒ saggśya̭ti | hira̭ṇya॒-ndakṣi̭ṇā॒ samṛ̭ddhyai | vā॒ru॒ṇa-ndaśa̭kapālagṃ sū॒tasya̭ gṛ॒he | va॒ru॒ṇa॒sa॒vame॒vāva̭-rundhe | ma॒hāni̭raṣṭo॒ dakṣi̭ṇā॒ samṛ̭ddhyai | mā॒ru॒tagṃ sa॒ptaka̭pāla-ṅgrāma॒ṇyo̭ gṛ॒he || 19 ||

annaṃ॒-vai~ ma॒rutaḥ̭ | anna̭me॒vāva̭-rundhe | pṛśñi॒-rdakṣi̭ṇā॒ samṛ̭ddhyai | sā॒vi॒tra-ndvāda̭śakapāla-ṅkṣa॒tturgṛ॒he prasū᳚tyai | u॒pa॒ddhva॒sto dakṣi̭ṇā॒ samṛ̭ddhyai | ā॒śvi॒na-ndvi̭kapā॒lagṃ sa̭graṃhī॒turgṛ॒he | a॒śvinau॒ vai de॒vānā᳚-mbhi॒ṣajau᳚ | tābhyā̭me॒vāsmai̭ bheṣa॒ja-ṅka̭roti | sa॒vā॒tyaṷ dakṣi̭ṇā॒ samṛ̭ddhyai | pau॒ṣṇa-ñca॒ru-mbhā̭gadu॒ghasya̭ gṛ॒he || 20 ||

annaṃ॒-vai~ pū॒ṣā | anna̭me॒vāva̭ rundhe | śyā॒mo dakṣi̭ṇā॒ samṛ̭ddhyai | rau॒dra-ṅgā̭vīdhu॒ka-ñca॒ruma̭kṣāvā॒pasya̭ gṛ॒he | a॒nta॒ta e॒va ru॒dra-nni॒rava̭dayate | śa॒bala॒ udvā̭ro॒ dakṣi̭ṇā॒ samṛ̭ddhyai | dvāda̭śai॒tāni̭ ha॒vīgṃṣi̭ bhavanti | dvāda̭śa॒ māsā᳚-ssaṃva~thsa॒raḥ | saṃ॒va~॒thsa॒reṇai॒vāsmai̭ rā॒ṣṭramava̭-rundhe | rā॒ṣṭrame॒va bha̭vati || 21 ||

yanna pra̭ti ni॒rvape᳚t | ra॒tnina̭ ā॒śiṣo-'va̭rundhīrann | prati॒ nirva̭pati | indrā̭ya su॒trāmṇḙ puro॒ḍāśa॒-mekā̭daśakapālam | indrā̭yāgṃho॒muce᳚ | ā॒śiṣa̭ e॒vāva̭rundhe | a॒ya-nno॒ rājā̭ vṛtra॒hā rājā̭ bhū॒tvā vṛ॒traṃ-va~̭ddhyā॒dityā̭ha | ā॒śiṣa̭me॒vaitāmāśā᳚ste | mai॒trā॒-bā॒r॒ha॒spa॒tya-mbha̭vati | śve॒tāyai᳚ śve॒tava̭thsāyai du॒gdhe || 22 ||

bā॒r॒ha॒spa॒tye mai॒tramapi̭ dadhāti | brahma̭ cai॒vāsmai᳚ kṣa॒tra-ñca̭ sa॒mīcī̭ dadhāti | atho॒ brahma̭nne॒va kṣa॒tra-mprati̭ṣṭhāpayati | bā॒r॒ha॒spa॒tyena॒ pūrvḙṇa॒ praca̭rati | mu॒kha॒ta e॒vāsmai॒ brahma॒ saggśya̭ti | atho॒ brahma̭nne॒va kṣa॒tra-ma॒nvāra̭mbhayati | sva॒ya॒-ṅkṛ॒tā vedi̭rbhavati | sva॒ya॒di॒nna-mba॒r॒hiḥ | sva॒ya॒kṛ॒nta i॒ddhmaḥ | ana̭bhijitasyā॒-bhiji̭tyai | tasmā॒-drājñā॒mara̭ṇya-ma॒bhiji̭tam | saiva śve॒tā śve॒tava̭thsā॒ dakṣi̭ṇā॒ samṛ̭ddhyai || 23 ||

(ra॒tni॒tvāya॒ - samṛ̭ddhyai - paṣṭhau॒hi dakṣi̭ṇā॒ samṛ̭ddhyai - grāma॒ṇyo̭ gṛ॒he - bhā̭gadu॒ghasya̭ gṛ॒he-bha̭vati - du॒gdhḙ - 'bhiji̭tyai॒ dve ca̭) (a. 3)

anuvākaṃ 4 - devasuvāṃ havīṃṣi

de॒va॒su॒vāme॒tāni̭ ha॒vīgṃṣi̭ bhavanti | e॒tāva̭nto॒ vai de॒vānāgṃ̭ sa॒vāḥ | ta e॒vāsmai̭ sa॒vā-npraya̭cchanti | ta ḙnagṃ suvante | a॒gnire॒vaina̭-ṅgṛ॒hapa̭tīnāgṃ suvate | somo॒ vana॒spatī̭nām | ru॒draḥ pa̭śū॒nām | bṛha॒spati̭-rvā॒cām | indro᳚ jye॒ṣṭhānā᳚m | mi॒tra-ssa॒tyānā᳚m || 24 ||

varṷṇo॒ dharma̭patīnām | e॒tade॒va sarva̭-mbhavati | sa॒vi॒tā tvā᳚ prasa॒vānāgṃ̭ suvatā॒miti॒ hasta̭-ṅgṛhṇāti॒ prasū᳚tyai | ye dḙvā deva॒suva॒-ssthetyā̭ha | ya॒thā॒ ya॒jure॒vai tat | ma॒ha॒te kṣa॒trāya̭ maha॒ta ādhi̭patyāya maha॒te jāna̭rājyā॒yetyā̭ha | ā॒śiṣa̭me॒vaitāmāśā᳚ste | e॒ṣa vo̭ bharatā॒ rājā॒ somo॒-'smāka̭-mbrāhma॒ṇānā॒gṃ॒ rājetyā̭ha | tasmā॒-thsoma̭rājāno brāhma॒ṇāḥ | prati॒ tyannāma̭ rā॒jyama̭dhā॒yītyā̭ha || 25 ||

rā॒jyame॒vāsmi॒-nprati̭ dadhāti | svā-nta॒nuvaṃ॒-va~rṷṇo aśiśre॒dityā̭ha | va॒ru॒ṇa॒sa॒vame॒vā-va̭rundhe | śuce᳚rmi॒trasya॒ vratyā̭ abhū॒metyā̭ha | śuci̭me॒vainaṃ॒-vra~tya̭-ṅkaroti | ama̭nmahi maha॒ta ṛ॒tasya॒ nāmetyā̭ha | ma॒nu॒ta e॒vaina᳚m | sarve॒ vrātā॒ varṷṇasyā bhūva॒nnityā̭ha | sarva̭vrātame॒vaina̭-ṅkaroti | vi mi॒tra evai॒rarā̭ti-matārī॒dityā̭ha || 26 ||

arā̭time॒vaina̭-ntārayati | asṷ̄ṣudanta ya॒jñiyā̭ ṛ॒tenetyā̭ha | sva॒daya̭tye॒vaina᳚m | vyṷ tri॒to ja̭ri॒māṇa̭-nna āna॒ḍityā̭ha | āyṷre॒vāsmi̭-ndadhāti | dvābhyāṃ॒-vi~mṛ̭ṣṭe | dvi॒pā-dyaja̭mānaḥ॒ prati̭ṣṭhityai | a॒gnī॒ṣo॒mīya̭sya॒ caikā̭daśakapālasya devasu॒vā-ñca̭ ha॒viṣā̭ma॒gnaye᳚ sviṣṭa॒kṛtḙ sa॒mava̭dyati | de॒vatā̭bhire॒vaina̭-mubha॒yataḥ॒ pari̭gṛhṇāti | vi॒ṣṇu॒kra॒mān kra̭mate( ) | viṣṇṷre॒va bhū॒tvemā~llo॒kā-na॒bhija̭yati || 27 ||

(sa॒tyānā̭-madhā॒yītyā̭-hātārī॒dityā̭ha-kramata॒ eka̭-ñca) (a. 4)

anuvākaṃ 5 - abhiṣekārthamapāṅgrahagrahaṇam

a॒rtheta॒-sstheti̭ juhoti | āhṷtyai॒vainā̭ ni॒ṣkrīya̭ gṛhṇāti | atho̭ ha॒viṣkṛ̭tānāme॒vābhighṛ̭tānā-ṅgṛhṇāti | vaha̭ntīnā-ṅgṛhṇāti | e॒tā vā a॒pāgṃ rā॒ṣṭram | rā॒ṣṭrame॒vāsmai̭ gṛhṇāti | atho॒ śriya̭me॒vaina̭ma॒bhi va̭hanti | a॒pā-mpati̭ra॒sītyā̭ha | mi॒thu॒name॒vākaḥ̭ | vṛṣā᳚-'syū॒rmirityā̭ha || 28 ||

ū॒rmi॒manta̭me॒vaina̭-ṅkaroti | vṛ॒ṣa॒se॒no̭-'sītyā̭ha | senā̭me॒vāsya॒ saggśya̭ti | vra॒ja॒kṣita॒-ssthetyā̭ha | e॒tā vā a॒pāṃ-vi~śaḥ̭ | viśa̭me॒vāsmai॒ paryṷ̄hati | ma॒rutā॒moja॒-ssthetyā̭ha | annaṃ॒-vai~ ma॒rutaḥ̭ | anna̭me॒vā va̭rundhe | sūrya̭varcasa॒-ssthetyā̭ha || 29 ||

rā॒ṣṭrame॒va va̭rca॒svya̭kaḥ | sūrya̭tvacasa॒-ssthetyā̭ha | sa॒tyaṃ-vā~ e॒tat | ya-dvarṣa̭ti | anṛ̭taṃ॒-ya~dā॒tapa̭ti॒ varṣa̭ti | sa॒tyā॒nṛ॒te e॒vāva̭rundhe | nainagṃ̭ satyānṛ॒te ṷdi॒te higg̭staḥ | ya e॒vaṃ-ve~da̭ | māndā॒-ssthetyā̭ha | rā॒ṣṭrame॒va bra̭hmavarca॒sya̭kaḥ || 30 ||

vāśā॒-ssthetyā̭ha | rā॒ṣṭrame॒va va॒śya̭kaḥ | śakva̭rī॒-ssthetyā̭ha | pa॒śavo॒ vai śakva̭rīḥ | pa॒śūne॒vāva̭ rundhe | vi॒śva॒bhṛta॒-ssthetyā̭ha | rā॒ṣṭrame॒va pa̭ya॒svya̭kaḥ | ja॒na॒bhṛta॒-ssthetyā̭ha | rā॒ṣṭrame॒vendri̭yā॒vya̭kaḥ | a॒gnestḙja॒syā᳚-ssthetyā̭ha || 31 ||

rā॒ṣṭrame॒va tḙja॒svya̭kaḥ | a॒pāmoṣa̭dhīnā॒gṃ॒ rasa॒-ssthetyā̭ha | rā॒ṣṭrame॒va ma̭dha॒vya̭makaḥ | sā॒ra॒sva॒ta-ṅgraha̭-ṅgṛhṇāti | e॒ṣā vā a॒pā-mpṛ॒ṣṭham | yathsara̭svatī | pṛ॒ṣṭhame॒vainagṃ̭ samā॒nānā᳚-ṅkaroti | ṣo॒ḍa॒śabhi̭-rgṛhṇāti | ṣoḍa̭śakalo॒ vai purṷṣaḥ | yāvā̭ne॒va purṷṣaḥ | tasmi̭n vī॒rya̭-ndadhāti | ṣo॒ḍa॒śabhi̭-rju॒hoti̭ ṣoḍa॒śabhi̭-rgṛhṇāti | dvātrigṃ̭śa॒-thsampa̭dyante | dvātrigṃ̭śadakṣarā 'nu॒ṣṭuk | vāga̭nu॒ṣṭu-phsarvā̭ṇi॒ chandāgṃ̭si | vā॒caivaina॒gṃ॒ sarvḙbhi॒-śchando̭bhi-ra॒bhiṣi̭ñcati || 32 ||

(ū॒rmirityā̭ha॒ - sūrya̭varcasa॒-ssthetyā̭ha - brahmavarca॒sya̭ka - steja॒syā᳚-ssthetyā̭hai॒va - purṷṣa॒-ṣṣaṭca̭) (a. 5)

anuvākaṃ 6 - abhiṣekārthajalasaṃskāraḥ

devī̭rāpa॒-ssa-mmadhṷmatī॒-rmadhṷmatībhi-ssṛjyaddhva॒mityā̭ha | brahma̭ṇai॒vainā॒-ssagṃ sṛ̭jati | anā̭dhṛṣṭā-ssīda॒tetyā̭ha | brahma̭ṇai॒vainā᳚-ssādayati | a॒nta॒rā hotṷśca॒ dhiṣṇi̭ya-mbrāhmaṇāccha॒gṃ॒ sina̭śca sādayati | ā॒gne॒yo vai hotā᳚ | ai॒ndro brā᳚hmaṇāccha॒gṃ॒sī | teja̭sā cai॒vendri॒yeṇa̭ cobha॒yato̭ rā॒ṣṭra-mpari̭gṛhṇāti | hira̭ṇye॒no-tpṷnāti | āhṷtyai॒ hi pa॒vitrā᳚bhyāmutpu॒nanti॒ vyāvṛ̭ttyai || 33 ||

śa॒tamā̭na-mbhavati | śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭tiṣṭhati | ani̭bhṛṣṭama॒sītyā̭ha | ani̭bhṛṣṭa॒gg॒ hyḙtat | vā॒co bandhu॒rityā̭ha | vā॒co hyḙṣa bandhuḥ̭ | ta॒po॒jā ityā̭ha | ta॒po॒jā hyḙtat | soma̭sya dā॒trama॒sītyā̭ha || 34 ||

soma̭sya॒ hyḙtaddā॒tram | śu॒krā vaḥ̭ śu॒kreṇotpṷnā॒mītyā̭ha | śu॒krā hyāpaḥ̭ | śu॒kragṃ hira̭ṇyam | ca॒ndrāśca॒ndreṇetyā̭ha | ca॒ndrā hyāpaḥ̭ | ca॒ndragṃ hira̭ṇyam | a॒mṛtā̭ a॒mṛte॒netyā̭ha | a॒mṛtā॒ hyāpaḥ̭ | a॒mṛta॒gṃ॒ hira̭ṇyam || 35 ||

svāhā̭ rāja॒sūyā॒yetyā̭ha | rā॒ja॒sūyā̭ya॒ hyḙnā utpu॒nāti̭ | sa॒dha॒mādo᳚ dyu॒mninī॒rūrja̭ e॒tā iti̭ vāru॒ṇyarcā gṛ̭hṇāti | va॒ru॒ṇa॒sa॒vame॒vā va̭rundhe | eka̭yā gṛhṇāti | e॒ka॒dhaiva yaja̭māne vī॒rya̭-ndadhāti | kṣa॒trasyolba̭masi kṣa॒trasya॒ yoni̭ra॒sīti̭ tā॒rpya-ñco॒ṣṇīṣa̭-ñca॒ praya̭cchati sayoni॒tvāya̭ | eka̭śatena darbhapuñjī॒laiḥ pa̭vayati | śa॒tāyu॒rvai purṷṣa-śśa॒tavī᳚ryaḥ | ā॒tmaika̭śa॒taḥ || 36 ||

yāvā̭ne॒va purṷṣaḥ | tasmi̭n vī॒rya̭-ndadhāti | daddhyā̭śayati | i॒ndri॒yame॒vā-va̭rundhe | u॒du॒mbara̭-māśayati | a॒nnādya॒syāva̭ ruddhyai | śaṣpā᳚ṇyāśayati | surā̭bali-me॒vaina̭-ṅkaroti | ā॒vida̭ e॒tā bha̭vanti | ā॒vida̭me॒vaina̭-ṅgamayanti || 37 ||

a॒gnire॒vaina॒-ṅgārha̭patyenāvati | indra̭ indri॒yeṇa̭ | pū॒ṣā pa॒śubhiḥ̭ | mi॒trāvarṷṇau prāṇāpā॒nābhyā᳚m | indro̭ vṛ॒trāya॒ vajra॒muda̭yacchat | sa diva̭malikhat | so᳚-'rya॒mṇaḥ panthā̭ abhavat | sa āvi̭nne॒ dyāvā̭pṛthi॒vī dhṛ॒tavra̭te॒ iti॒ dyāvā̭pṛthi॒vī upā̭dhāvat | sa ā॒bhyāme॒va prasṷ̄ta॒ indro̭ vṛ॒trāya॒ vajra॒-mprāha̭rat | āvi̭nne॒ dyāvā̭pṛthi॒vī dhṛ॒tavra̭te॒ iti॒ yadāha̭ || 38 ||

ā॒bhyāme॒va prasṷ̄to॒ yaja̭māno॒ vajra॒-mbhrātṛ̭vyāya॒ praha̭rati | āvi̭nnā de॒vyadi̭ti-rviśvarū॒pītyā̭ha | i॒yaṃ-vai~ de॒vyadi̭ti-rviśvarū॒pī | a॒syāme॒va prati̭ tiṣṭhati | āvi̭nno॒-'yama॒sāvā̭muṣyāya॒ṇo᳚-'syāṃ-vi~॒śya̭smi-nrā॒ṣṭra ityā̭ha | vi॒śaivainagṃ̭ rā॒ṣṭreṇa॒ sama̭rdhayati | ma॒ha॒te kṣa॒trāya̭ maha॒ta ādhi̭patyāya maha॒te jāna̭rājyā॒yetyā̭ha | ā॒śiṣa̭me॒vaitāmāśā᳚ste | e॒ṣa vo̭ bharatā॒ rājā॒ somo॒-'smāka̭-mbrāhma॒ṇānā॒gṃ॒ rājetyā̭ha | tasmā॒-thsoma̭rājāno brāhma॒ṇāḥ || 39 ||

indra̭sya॒ vajro̭-'si॒ vārtra̭ghna॒ iti॒ dhanuḥ॒ praya̭cchati॒ viji̭tyai | śa॒tru॒bādha̭nā॒-ssthetīṣūṋ | śatrṷ̄ne॒vāsya̭ bādhante | pā॒ta mā᳚ pra॒tyañca̭-mpā॒ta mā̭ ti॒ryañca̭ma॒nvañca̭-mmā pā॒tetyā̭ha | ti॒sro vai śa̭ra॒vyāḥ᳚ | pra॒tīcī̭ ti॒raścya॒nūcī᳚ | tābhya̭ e॒vaina̭-mpānti | di॒gbhyo mā̭ pā॒tetyā̭ha | di॒gbhya e॒vaina̭-mpānti | viśvā᳚bhyo mā nā॒ṣṭrābhyaḥ̭ pā॒tetyā̭ha | apa̭rimitāde॒vaina̭-mpānti | hira̭ṇyavarṇāvu॒ṣasāṃ᳚-vi~ro॒ka iti̭ tri॒ṣṭubhā̭ bā॒hū u-dgṛ̭hṇāti | i॒ndri॒yaṃ-vai~ vī॒rya̭-ntri॒ṣṭuk | i॒ndri॒yame॒va vī॒rya̭-mu॒pari̭ṣṭādā॒tman-dha̭tte || 40 ||

(vyāvṛ̭ttyai-dā॒trama॒sītyā̭hā॒-mṛta॒gṃ॒ hira̭ṇya-mekaśa॒to-ga̭maya॒n-tyāha̭-brāhmā॒ṇā-nā॒ṣṭrābhyaḥ̭ pā॒tetyā̭ha ca॒tvāri̭ ca) (a. 6)

anuvākaṃ 7 - digvyāsthāpanam

diśo॒ vyāsthā̭payati | di॒śāma॒bhiji̭tyai | yada̭nu pra॒krāme᳚t | a॒bhi diśo̭ jayet | uttu mā᳚dyet | mana॒sā-'nu॒ prakrā̭mati | a॒bhi diśo̭ jayati | nonmā᳚dyati | sa॒midha॒mā ti॒ṣṭhetyā̭ha | teja̭ e॒vāva̭rundhe || 41 ||

u॒grāmā ti॒ṣṭhetyā̭ha | i॒ndri॒yame॒vāva̭ rundhe | vi॒rāja॒mā ti॒ṣṭhetyā̭ha | a॒nnādya̭me॒vāva̭ rundhe | udī̭cī॒mā ti॒ṣṭhetyā̭ha | pa॒śūne॒vāva̭ rundhe | ū॒rdhvāmā ti॒ṣṭhetyā̭ha | su॒va॒rgame॒va lo॒ka-ma॒bhija̭yati | anūjji̭hīte | su॒va॒rgasya̭ lo॒kasya॒ sama̭ṣṭyai || 42 ||

mā॒ru॒ta e॒ṣa bha̭vati | annaṃ॒-vai~ ma॒rutaḥ̭ | anna̭me॒vāva̭ rundhe | eka̭vigṃśatikapālo bhavati॒ prati̭ṣṭhityai | yo̭-'raṇye 'nuvā॒kyo̭ ga॒ṇaḥ | ta-mma̭ddhya॒ta upa̭dadhāti | grā॒myaire॒va pa॒śubhi̭-rāra॒ṇyā-npa॒śū-npari̭gṛhṇāti | tasmā᳚-dgrā॒myaiḥ pa॒śubhi̭rāra॒ṇyāḥ pa॒śavaḥ॒ pari̭gṛhītāḥ | pṛthi̭rvai॒nyaḥ | a॒bhya̭ṣicyata || 43 ||

sa rā॒ṣṭra-nnābha̭vat | sa e॒tāni̭ pā॒rthānya̭paśyat | tānya̭juhot | tairvai sa rā॒ṣṭra-ma̭bhavat | yatpā॒rthāni̭ ju॒hoti̭ | rā॒ṣṭrame॒va bha̭vati | bā॒r॒ha॒spa॒tya-mpūrvḙṣāmutta॒ma-mbha̭vati | ai॒ndramutta̭reṣā-mpratha॒mam | brahma̭ cai॒vāsmai᳚ kṣa॒tra-ñca̭ sa॒mīcī̭ dadhāti | atho॒ brahma̭nne॒va kṣa॒tra-mprati̭ṣṭhāpayati || 44 ||

ṣaṭpu॒rastā̭-dabhiṣe॒kasya̭ juhoti | ṣaḍu॒pari̭ṣṭāt | dvāda̭śa॒ sa-mpa̭dyante | dvāda̭śa॒ māsā᳚-ssaṃva~thsa॒raḥ | saṃ॒va~॒thsa॒raḥ khalu॒ vai de॒vānā॒-mpūḥ | de॒vānā̭me॒va pura̭-mmaddhya॒to vyava̭sarpati | tasya॒ na kuta̭śca॒ nopā᳚vyā॒dho bha̭vati | bhū॒tānā॒-mave᳚ṣṭī-rjuhoti | atrā᳚tra॒ vai mṛ॒tyu-rjā̭yate | yatra̭ yatrai॒va mṛ॒tyu-rjāya̭te | tata̭ e॒vaina॒mava̭yajate | tasmā᳚-drāja॒sūyḙnejā॒na-ssarva॒māyṷreti | sarve॒ hya̭sya mṛ॒tyavo-'ve᳚ṣṭāḥ | tasmā᳚-drāja॒sūyḙnejā॒no nābhica̭rita॒vai | pra॒tyagḙna-mabhicā॒ra-sstṛ̭ṇute || 45 ||

(ru॒ndhe॒-sama̭ṣṭyā-asicyata-sthāpayati॒-jāya̭te॒ pañca̭ ca) (a. 7)

anuvākaṃ 8 - abhiṣekaḥ

soma̭sya॒ tviṣi̭rasi॒ tavḙva me॒ tviṣi̭rbhūyā॒diti̭ śārdūlaca॒rmopa̭stṛṇāti | yaiva some॒ tviṣiḥ̭ | yā śā᳚rdū॒le | tāme॒vāva̭ rundhe | mṛ॒tyorvā e॒ṣa varṇaḥ̭ | yacchā᳚rdū॒laḥ | a॒mṛta॒gṃ॒ hira̭ṇyam | a॒mṛta̭masi mṛ॒tyormā̭ pā॒hīti॒ hira̭ṇya॒-mupā᳚syati | a॒mṛta̭me॒va mṛ॒tyora॒nta-rdha̭tte | śa॒tamā̭na-mbhavati || 46 ||

śa॒tāyuḥ॒ purṷṣa-śśa॒tendri̭yaḥ | āyṷṣye॒vendri॒ye prati̭ tiṣṭhati | di॒dyonmā̭ pā॒hītyu॒pari̭ṣṭā॒dadhi॒ nida̭dhāti | u॒bha॒yata̭ e॒vāsmai॒ śarma̭ dadhāti | ave᳚ṣṭā danda॒śūkā॒ iti̭ klī॒bagṃ sīsḙna viddhyati | da॒nda॒śūkā̭-ne॒vāva̭ yajate | tasmā᳚-tklī॒ba-nda̭nda॒śūkā॒ dagṃśṷkāḥ | nira̭sta॒-nnamṷce॒-śśira॒ iti̭ lohitāya॒sa-nnira̭syati | pā॒pmāna̭me॒va namṷci-nni॒rava̭dayate | prā॒ṇā ā॒tmanaḥ॒ pūrvḙ-'bhi॒ṣicyā॒ ityā̭huḥ || 47 ||

somo॒ rājā॒ varṷṇaḥ | de॒vā dha̭rma॒suva̭śca॒ ye | te te॒ vācagṃ̭ suvantā॒-nte te᳚ prā॒ṇagṃ sṷvantā॒mityā̭ha | prā॒ṇāne॒vātmanaḥ॒ pūrvā̭-na॒bhiṣi̭ñcati | ya-dbrū॒yāt | a॒gnestvā॒ teja̭sā॒ 'bhiṣi̭ñcā॒mīti̭ | te॒ja॒svyḙva syā᳚t | du॒ścarmā॒ tu bha̭vet | soma̭sya tvā dyu॒mnenā॒-bhiṣi̭ñcā॒mītyā̭ha | sau॒myo vai de॒vata̭yā॒ purṷṣaḥ || 48 ||

svayai॒vaina̭-nde॒vata̭yā॒-'bhiṣi̭ñcati | a॒gne-steja॒setyā̭ha | teja̭ e॒vāsmi̭-ndadhāti | sūrya̭sya॒ varca॒setyā̭ha | varca̭ e॒vāsmi̭-ndadhāti | indra̭sye-ndri॒yeṇetyā̭ha | i॒ndri॒yame॒vāsmi̭-ndadhāti | mi॒trāvarṷṇayo-rvī॒ryḙṇetyā̭ha | vī॒rya̭me॒vāsmi̭-ndadhāti | ma॒rutā॒moja॒setyā̭ha || 49 ||

oja̭ e॒vāsmi̭-ndadhāti | kṣa॒trāṇā᳚-ṅkṣa॒trapa̭tira॒sītyā̭ha | kṣa॒trāṇā̭me॒vaina̭-ṅkṣa॒trapa̭ti-ṅkaroti | ati̭ di॒vaspā॒hītyā̭ha | atya॒nyā-npā॒hīti॒ vāvaitadā̭ha | sa॒māva̭vṛtranna-dha॒rāgudī̭cī॒-rityā̭ha | rā॒ṣṭrame॒vāsmi̭-ndhru॒vama̭kaḥ | u॒ccheṣa̭ṇena juhoti | u॒ccheṣa̭ṇabhāgo॒ vai ru॒draḥ | bhā॒ga॒dheyḙnai॒va ru॒dra-nni॒rava̭dayate || 50 ||

uda̭mpa॒retyāgnī᳚ddhre juhoti | e॒ṣā vai ru॒drasya॒ dik | svāyā̭me॒va di॒śi ru॒dra-nni॒rava̭dayate | rudra॒ yatte॒ krayī॒ para॒-nnāmetyā̭ha | yadvā a̭sya॒ krayī॒ para॒-nnāma̭ | tena॒ vā e॒ṣa hi̭nasti | yagṃ hi॒nasti̭ | tenai॒vainagṃ̭ sa॒ha śa̭mayati | tasmai̭ hu॒tama̭si ya॒meṣṭa̭ma॒sītyā̭ha | ya॒māde॒vāsya̭ mṛ॒tyumava̭yajate || 51 ||

prajā̭pate॒ na tvade॒tānya॒nya iti॒ tasyai̭ gṛ॒he jṷhuyāt | yā-ṅkā॒mayḙta rā॒ṣṭrama̭syai pra॒jā syā॒diti̭ | rā॒ṣṭrame॒vāsyai᳚ pra॒jā bha̭vati | pa॒rṇa॒-mayḙnā-ddhva॒ryu-ra॒bhiṣi̭ñcati | bra॒hma॒va॒rca॒same॒vāsmi॒n-tviṣi̭-ndadhāti | audṷmbareṇa rāja॒nyaḥ̭ | ūrja̭me॒vāsmi̭-nna॒nnādya̭-ndadhāti | āśva̭tthena॒ vaiśyaḥ̭ | viśa̭me॒vāsmi॒-npuṣṭi̭-ndadhāti | naiya̭grodhena॒ janyaḥ̭( ) | mi॒trāṇye॒vāsmai̭ kalpayati | atho॒ prati̭ṣṭhityai || 52 ||

(bha॒va॒ - tyā॒huḥ॒ - purṷṣa॒ - oja॒setyā̭ha - ni॒rava̭dayate - yajate॒ - janyo॒ dve ca̭) (a. 8)

anuvākaṃ 9 - sthārohaṇam. vijayaḥ

indra̭sya॒ vajro̭-'si॒ vārtra̭ghna॒ iti॒ ratha̭mu॒pāva̭harati॒ viji̭tyai | mi॒trāvarṷṇayostvā praśā॒stroḥ pra॒śiṣā̭ yuna॒jmītyā̭ha | brahma̭ṇai॒vaina̭-nde॒vatā᳚bhyāṃ-yu~nakti | pra॒ṣṭi॒vā॒hinaṃ̭-yu~nakti | pra॒ṣṭi॒vā॒hī vai dḙvara॒thaḥ | de॒va॒ra॒tha-me॒vāsmai̭ yunakti | trayo-'śvā̭ bhavanti | ratha̭ścatu॒rthaḥ | dvau sa̭vyeṣṭhasāra॒thī | ṣaṭ-thsampa̭dyante || 53 ||

ṣaḍvā ṛ॒tavaḥ̭ | ṛ॒tubhi̭re॒vainaṃ̭-yu~nakti | vi॒ṣṇu॒kra॒mān-kra̭mate | viṣṇṷre॒va bhū॒tvemān ~lo॒kāna॒bhija̭yati | yaḥ, kṣa॒triyaḥ॒ prati̭hitaḥ | so᳚-'nvāra̭bhate | rā॒ṣṭrame॒va bha̭vati | tri॒ṣṭubhā॒ 'nvāra̭bhate | i॒ndri॒yaṃ-vai~ tri॒ṣṭuk | i॒ndri॒yame॒va yaja̭māne dadhāti || 54 ||

ma॒rutā᳚-mprasa॒ve jḙṣa॒mityā̭ha | ma॒rudbhi̭re॒va prasṷ̄ta॒ ujja̭yati | ā॒pta-mmana॒ ityā̭ha | yade॒va mana॒saiphsī᳚t | tadā̭pat | rā॒ja॒nya̭-ñjināti | anā᳚krānta e॒vākra̭mate | vi vā e॒ṣa i̭ndri॒yeṇa̭ vī॒ryḙṇardhyate | yo rā̭ja॒nya̭-ñji॒nāti̭ | sama॒hami̭ndri॒yeṇa̭ vī॒ryḙṇetyā̭ha || 55 ||

i॒ndri॒yame॒va vī॒rya̭mā॒tman-dha̭tte | pa॒śū॒nā-mma॒nyura̭si॒ tavḙva me ma॒nyurbhṷ̄yā॒diti॒ vārā̭hī upā॒nahā॒vupa̭ muñcate | pa॒śū॒nāṃ-vā~ e॒ṣa ma॒nyuḥ | ya-dva̭rā॒haḥ | tenai॒va pa̭śū॒nā-mma॒nyumā॒tma-ndha̭tte | a॒bhi vā i॒yagṃ sṷṣuvā॒ṇa-ṅkā̭mayate | tasye᳚śva॒rendri॒yaṃ-vī~॒rya̭mādā̭toḥ | vārā̭hī upā॒nahā॒vupa̭muñcate | a॒syā e॒vāntardha̭tte | i॒ndri॒yasya̭ vī॒rya̭syānā᳚ttyai || 56 ||

namo̭ mā॒tre pṛ̭thi॒vyā ityā॒hāhigṃ̭ sāyai | iya̭da॒syā-yṷra॒syāyṷrme dhe॒hītyā̭ha | āyure॒vātman-dha̭tte | ūrga॒syūrja̭-mme dhe॒hītyā̭ha | ūrja̭ma॒vātma-ndha̭tte | yuṅṅa̭si॒ varco̭-'si॒ varco॒ mayi̭ dhe॒hītyā̭ha | varca̭ e॒vātma-ndha̭tte | e॒ka॒dhā bra॒hmaṇa॒ upa̭ harati | e॒ka॒dhaiva yaja̭māna॒ āyu॒rūrjaṃ॒-va~rco̭ dadhāti | ra॒tha॒vi॒mo॒ca॒nīyā̭ juhoti॒ prati̭ṣṭhityai || 57 ||

trayo-'śvā̭ bhavanti | ratha̭ścatu॒rthaḥ | tasmā᳚-cca॒turjṷhoti | yadu॒bhau sa॒hāva॒tiṣṭhḙtām | sa॒mā॒naṃ-lo~॒kami̭yātām | sa॒ha sa̭graṃhī॒trā ra̭tha॒vāha̭ne॒ ratha॒māda̭dhāti | su॒va॒rgāde॒vainaṃ̭-lo~॒kāda॒ntarda̭dhāti | ha॒gṃ॒sa-śśṷci॒ṣadityā da̭dhāti | brahma̭ṇai॒vaina̭-mupāva॒hara̭ti | brahma॒ṇā ''da̭dhāti | ati̭cchanda॒sā ''da̭dhāti | ati̭cchandā॒ vai sarvā̭ṇi॒ chandāgṃ̭si | sarvḙbhire॒vaina॒-ñchando̭bhi॒-rāda̭dhāti | varṣma॒ vā e॒ṣā chanda̭sām | yadati̭cchandāḥ | yadati̭cchandasā॒ dadhā̭ti | varṣmai॒vainagṃ̭ samā॒nānā᳚-ṅkaroti || 58 ||

(pa॒dya॒nte॒ - da॒dhā॒ti॒ - vī॒ryḙṇetyā॒hā - nā᳚tyai॒ - prati̭ṣṭhityai॒ - brahma॒ṇā-''da̭dhāti sa॒pta ca̭) (a. 9)

anuvākaṃ 10 - āsane samupaveśa-ssarvaissevyatva-ñca

mi॒tro̭-'si॒ varṷṇo॒-'sītyā̭ha | mai॒traṃ-vā~ ahaḥ̭ | vā॒ru॒ṇī rātriḥ̭ | a॒ho॒rā॒trābhyā̭-me॒vaina̭-mu॒pāva̭harati | mi॒tro̭-'si॒ varṷṇo॒sītyā̭ha | mai॒tro vai dakṣi̭ṇaḥ | vā॒ru॒ṇa-ssa॒vyaḥ | vai॒śva॒de॒vyā̭mikṣā᳚ | svame॒vainaṷ bhāga॒dheya̭-mu॒pāva̭harati | sama॒haṃ-vi~śvai᳚rde॒vai-rityā̭ha || 59 ||

vai॒śva॒de॒vyo̭ vai pra॒jāḥ | tā e॒vādyāḥ᳚ kurute | kṣa॒trasya॒ nābhi̭rasi kṣa॒trasya॒ yoni̭-ra॒sītya̭dhīvā॒samā-stṛ̭ṇāti sayoni॒tvāya̭ | syo॒nāmāsī̭da su॒ṣadā॒māsī॒detyā̭ha | ya॒thā॒ ya॒jure॒vai tat | mā tvā̭ higṃsī॒-nmā mā̭ higṃsī॒dityā॒hā-higṃ̭sāyai | niṣa̭sāda dhṛ॒tavra̭to॒ varṷṇaḥ pa॒styā᳚svā sāmrā᳚jyāya su॒kratu॒rityā̭ha | sāmrā᳚jyame॒vainagṃ̭ su॒kratṷ-ṅkaroti | brahmā(3)ntvagṃ rā̭jan-bra॒hmā-'si̭ savi॒tā-'si̭ sa॒tyasa̭va॒ ityā̭ha | sa॒vi॒tāra̭-me॒vainagṃ̭ sa॒tyasa̭va-ṅkaroti || 60 ||

brahmā(3)ntvagṃ rā̭jan-bra॒hmā-'sīndro̭-'si sa॒tyaujā॒ ityā̭ha | indra̭me॒vainagṃ̭ sa॒tyauja̭sa-ṅkaroti | brahmā(3)ntvagṃ rā̭jan-bra॒hmā-'si̭ mi॒tro̭-'si su॒śeva॒ ityā̭ha | mi॒trame॒vainagṃ̭ su॒śeva̭-ṅkaroti | brahmā(3)ntvagṃ rā̭jan-bra॒hmā-'si॒ varṷṇo-'si sa॒tyadha॒rmetyā̭ha | varṷṇame॒vainagṃ̭ sa॒tyadha̭rmāṇa-ṅkaroti | sa॒vi॒tā-'si̭ sa॒tyasa̭va॒ ityā̭ha | gā॒ya॒trī-me॒vaitenā̭bhi॒vyāha̭rati | indro̭-'si sa॒tyaujā॒ ityā̭ha | tri॒ṣṭubha̭-me॒vaitenā̭bhi॒-vyāha̭rati || 61 ||

mi॒tro̭-'si su॒śeva॒ ityā̭ha | jaga̭tī-me॒vaitenā̭bhi॒vyāha̭rati | sa॒tyame॒tā de॒vatāḥ᳚ | sa॒tyame॒tāni॒ chandāgṃ̭si | sa॒tyame॒vāva̭ rundhe | varṷṇo-'si sa॒tyadha॒rmetyā̭ha | a॒nu॒ṣṭubha̭-me॒vaitenā̭bhi॒vyāha̭rati | sa॒tyā॒nṛ॒te vā a̭nu॒ṣṭup | sa॒tyā॒nṛ॒te varṷṇaḥ | sa॒tyā॒nṛ॒te e॒vāva̭rundhe || 62 ||

nainagṃ̭ satyānṛ॒te ṷdi॒te higg̭staḥ | ya e॒vaṃ-ve~da̭ | indra̭sya॒ vajro̭-'si॒ vārtra̭ghna॒ iti॒ sphya-mpraya̭cchati | vajro॒ vai sphyaḥ | vajrḙṇai॒vāsmā̭ avarapa॒ragṃ ra̭ndhayati | e॒vagṃ hi tacchreyaḥ̭ | yada̭smā e॒te raddhyḙyuḥ | diśo॒-'bhya̭yagṃ rājā̭ 'bhū॒diti॒ pañcā॒kṣān-praya̭cchati | e॒te vai sarve-'yāḥ᳚ | apa̭rājāyina-me॒vaina̭-ṅkaroti || 63 ||

o॒da॒namudbrṷvate | pa॒ra॒me॒ṣṭhī vā e॒ṣaḥ | yado̭da॒naḥ | pa॒ra॒māme॒vaina॒gg॒ śriya̭-ṅgamayati | suślo॒kā~(4) suma̭ṅga॒lā~(4) satya̭rā॒jā(3)nityā̭ha | ā॒śiṣa̭me॒vaitāmā śā᳚ste | śau॒na॒-śśe॒pamākhyā̭payate | va॒ru॒ṇa॒pā॒śā-de॒vaina̭-mmuñcati | pa॒ra॒-śśa॒ta-mbha̭vati | śa॒tāyuḥ॒ purṷṣa-śśa॒tendri̭yaḥ( ) | āyṷṣye॒vendri॒ye prati̭tiṣṭhati | mā॒ru॒tasya॒ caika̭vigṃśatikapālasya vaiśvade॒vyai cā॒mikṣā̭yā a॒gnaye᳚ sviṣṭa॒kṛtḙ sa॒mava̭dyati | de॒vatā̭bhire॒vaina̭-mubha॒yataḥ॒ pari̭gṛhṇāti | a॒pā-nnaptre॒ svāho॒rjo naptre॒ svāhā॒-'gnayḙ gṛ॒hapa̭taye॒ svāheti̭ ti॒sra āhṷtī-rjuhoti | traya̭ i॒me lo॒kāḥ | e॒ṣvḙva lo॒keṣu॒ prati̭ tiṣṭhati || 64 ||

(de॒vairityā̭ha - sa॒tyasa̭va-ṅkaroti - tri॒ṣṭubha̭me॒vaitenā̭bhi॒ vyāha̭rati- satyānṛ॒te e॒vāva̭rundhe - karoti - śa॒tendri̭ya॒-ṣṣaṭca̭) (a. 10)

(e॒ta-dbrā᳚hmaṇāni - dhā॒tre - rā॒tnināṃ᳚ - devasu॒vā - ma॒rtheto॒ - devī॒--r diśaḥ॒ - soma॒sye - ndra̭sya - mi॒tro daśa̭)

(e॒ta-dbrā᳚hmaṇāni - vaiṣṇa॒va-ntri̭kapā॒la - mannaṃ॒-vai~ pū॒ṣā - vāśā॒-ssthetyā̭ha॒ - diśo॒ vyāsthā̭paya॒ - tyuda̭mpa॒retya॒ - brahmā(3)ntvagṃ rā̭ja॒-ñcatṷṣṣaṣṭiḥ

(e॒ta-dbrā᳚hmaṇāni॒ - prati̭ tiṣṭhati)

|| hariḥ̭ om ||

|| kṛṣṇa yajurvedīya taittirīya brāhmaṇe prathamāṣṭake saptamaḥ prapāṭhaka-ssamāptaḥ ||