📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌦𑍇𑌵𑍀 𑌭𑍁𑌜𑌙𑍍𑌗 𑌸𑍍𑌤𑍋𑌤𑍍𑌰𑌂
Devi Bhujanga Stotram
Devi Stotram Grantha
𑌵𑌿𑌰𑌿𑌞𑍍𑌚𑍍𑌯𑌾𑌦𑌿𑌭𑌿𑌃 𑌪𑌞𑍍𑌚𑌭𑌿𑌰𑍍𑌲𑍋𑌕𑌪𑌾𑌲𑍈𑌃
𑌸𑌮𑍂𑌢𑍇 𑌮𑌹𑌾𑌨𑌨𑍍𑌦𑌪𑍀𑌠𑍇 𑌨𑌿𑌷𑌣𑍍𑌣𑌮𑍍 ।
𑌧𑌨𑍁𑌰𑍍𑌬𑌾𑌣𑌪𑌾𑌶𑌾𑌙𑍍𑌕𑍁𑌶𑌪𑍍𑌰𑍋𑌤𑌹𑌸𑍍𑌤𑌂
𑌮𑌹𑌸𑍍𑌤𑍍𑌰𑍈𑌪𑍁𑌰𑌂 𑌶𑌙𑍍𑌕𑌰𑌾𑌦𑍍𑌵𑍈𑌤𑌮𑌵𑍍𑌯𑌾𑌤𑍍 ॥ 1 ॥
𑌯𑌦𑌨𑍍𑌨𑌾𑌦𑌿𑌭𑌿𑌃 𑌪𑌞𑍍𑌚𑌭𑌿𑌃 𑌕𑍋𑌶𑌜𑌾𑌲𑍈𑌃
𑌶𑌿𑌰𑌃𑌪𑌕𑍍𑌷𑌪𑍁𑌚𑍍𑌛𑌾𑌤𑍍𑌮𑌕𑍈𑌰𑌨𑍍𑌤𑌰𑌨𑍍𑌤𑌃 ।
𑌨𑌿𑌗𑍂𑌢𑍇 𑌮𑌹𑌾𑌯𑍋𑌗𑌪𑍀𑌠𑍇 𑌨𑌿𑌷𑌣𑍍𑌣𑌂
𑌪𑍁𑌰𑌾𑌰𑍇𑌰𑌥𑌾𑌨𑍍𑌤𑌃𑌪𑍁𑌰𑌂 𑌨𑍗𑌮𑌿 𑌨𑌿𑌤𑍍𑌯𑌮𑍍 ॥ 2 ॥
𑌵𑌿𑌰𑌿𑌞𑍍𑌚𑌾𑌦𑌿𑌰𑍂𑌪𑍈𑌃 𑌪𑍍𑌰𑌪𑌞𑍍𑌚𑍇 𑌵𑌿𑌹𑍃𑌤𑍍𑌯
𑌸𑍍𑌵𑌤𑌨𑍍𑌤𑍍𑌰𑌾 𑌯𑌦𑌾 𑌸𑍍𑌵𑌾𑌤𑍍𑌮𑌵𑌿𑌶𑍍𑌰𑌾𑌨𑍍𑌤𑌿𑌰𑍇𑌷𑌾 ।
𑌤𑌦𑌾 𑌮𑌾𑌨𑌮𑌾𑌤𑍃𑌪𑍍𑌰𑌮𑍇𑌯𑌾𑌤𑌿𑌰𑌿𑌕𑍍𑌤𑌂
𑌪𑌰𑌾𑌨𑌨𑍍𑌦𑌮𑍀𑌡𑍇 𑌭𑌵𑌾𑌨𑌿 𑌤𑍍𑌵𑌦𑍀𑌯𑌮𑍍 ॥ 3 ॥
𑌵𑌿𑌨𑍋𑌦𑌾𑌯 𑌚𑍈𑌤𑌨𑍍𑌯𑌮𑍇𑌕𑌂 𑌵𑌿𑌭𑌜𑍍𑌯
𑌦𑍍𑌵𑌿𑌧𑌾 𑌦𑍇𑌵𑌿 𑌜𑍀𑌵𑌃 𑌶𑌿𑌵𑌶𑍍𑌚𑍇𑌤𑌿 𑌨𑌾𑌮𑍍𑌨𑌾 ।
𑌶𑌿𑌵𑌸𑍍𑌯𑌾𑌪𑌿 𑌜𑍀𑌵𑌤𑍍𑌵𑌮𑌾𑌪𑌾𑌦𑌯𑌨𑍍𑌤𑍀
𑌪𑍁𑌨𑌰𑍍𑌜𑍀𑌵𑌮𑍇𑌨𑌂 𑌶𑌿𑌵𑌂 𑌵𑌾 𑌕𑌰𑍋𑌷𑌿 ॥ 4 ॥
𑌸𑌮𑌾𑌕𑍁𑌞𑍍𑌚𑍍𑌯 𑌮𑍂𑌲𑌂 𑌹𑍃𑌦𑌿 𑌨𑍍𑌯𑌸𑍍𑌯 𑌵𑌾𑌯𑍁𑌂
𑌮𑌨𑍋 𑌭𑍍𑌰𑍂𑌬𑌿𑌲𑌂 𑌪𑍍𑌰𑌾𑌪𑌯𑌿𑌤𑍍𑌵𑌾 𑌨𑌿𑌵𑍃𑌤𑍍𑌤𑌾𑌃 ।
𑌤𑌤𑌃 𑌸𑌚𑍍𑌚𑌿𑌦𑌾𑌨𑌨𑍍𑌦𑌰𑍂𑌪𑍇 𑌪𑌦𑍇 𑌤𑍇
𑌭𑌵𑌨𑍍𑌤𑍍𑌯𑌮𑍍𑌬 𑌜𑍀𑌵𑌾𑌃 𑌶𑌿𑌵𑌤𑍍𑌵𑍇𑌨 𑌕𑍇𑌚𑌿𑌤𑍍 ॥ 5 ॥
𑌶𑌰𑍀𑌰𑍇𑌽𑌤𑌿𑌕𑌷𑍍𑌟𑍇 𑌰𑌿𑌪𑍗 𑌪𑍁𑌤𑍍𑌰𑌵𑌰𑍍𑌗𑍇
𑌸𑌦𑌾𑌭𑍀𑌤𑌿𑌮𑍂𑌲𑍇 𑌕𑌲𑌤𑍍𑌰𑍇 𑌧𑌨𑍇 𑌵𑌾 ।
𑌨 𑌕𑌶𑍍𑌚𑌿𑌦𑍍𑌵𑌿𑌰𑌜𑍍𑌯𑌤𑍍𑌯𑌹𑍋 𑌦𑍇𑌵𑌿 𑌚𑌿𑌤𑍍𑌰𑌂
𑌕𑌥𑌂 𑌤𑍍𑌵𑌤𑍍𑌕𑌟𑌾𑌕𑍍𑌷𑌂 𑌵𑌿𑌨𑌾 𑌤𑌤𑍍𑌤𑍍𑌵𑌬𑍋𑌧𑌃 ॥ 6 ॥
𑌶𑌰𑍀𑌰𑍇 𑌧𑌨𑍇𑌽𑌪𑌤𑍍𑌯𑌵𑌰𑍍𑌗𑍇 𑌕𑌲𑌤𑍍𑌰𑍇
𑌵𑌿𑌰𑌕𑍍𑌤𑌸𑍍𑌯 𑌸𑌦𑍍𑌦𑍇𑌶𑌿𑌕𑌾𑌦𑌿𑌷𑍍𑌟𑌬𑍁𑌦𑍍𑌧𑍇𑌃 ।
𑌯𑌦𑌾𑌕𑌸𑍍𑌮𑌿𑌕𑌂 𑌜𑍍𑌯𑍋𑌤𑌿𑌰𑌾𑌨𑌨𑍍𑌦𑌰𑍂𑌪𑌂
𑌸𑌮𑌾𑌧𑍗 𑌭𑌵𑍇𑌤𑍍𑌤𑌤𑍍𑌤𑍍𑌵𑌮𑌸𑍍𑌯𑌮𑍍𑌬 𑌸𑌤𑍍𑌯𑌮𑍍 ॥ 7 ॥
𑌮𑍃𑌷𑌾𑌨𑍍𑌯𑍋 𑌮𑍃𑌷𑌾𑌨𑍍𑌯𑌃 𑌪𑌰𑍋 𑌮𑌿𑌶𑍍𑌰𑌮𑍇𑌨𑌂
𑌪𑌰𑌃 𑌪𑍍𑌰𑌾𑌕𑍃𑌤𑌂 𑌚𑌾𑌪𑌰𑍋 𑌬𑍁𑌦𑍍𑌧𑌿𑌮𑌾𑌤𑍍𑌰𑌮𑍍 ।
𑌪𑍍𑌰𑌪𑌞𑍍𑌚𑌂 𑌮𑌿𑌮𑍀𑌤𑍇 𑌮𑍁𑌨𑍀𑌨𑌾𑌂 𑌗𑌣𑍋𑌽𑌯𑌂
𑌤𑌦𑍇𑌤𑌤𑍍𑌤𑍍𑌵𑌮𑍇𑌵𑍇𑌤𑌿 𑌨 𑌤𑍍𑌵𑌾𑌂 𑌜𑌹𑍀𑌮𑌃 ॥ 8 ॥
𑌨𑌿𑌵𑍃𑌤𑍍𑌤𑌿𑌃 𑌪𑍍𑌰𑌤𑌿𑌷𑍍𑌠𑌾 𑌚 𑌵𑌿𑌦𑍍𑌯𑌾 𑌚 𑌶𑌾𑌨𑍍𑌤𑌿-
𑌸𑍍𑌤𑌥𑌾 𑌶𑌾𑌨𑍍𑌤𑍍𑌯𑌤𑍀𑌤𑍇𑌤𑌿 𑌪𑌞𑍍𑌚𑍀𑌕𑍃𑌤𑌾𑌭𑌿𑌃 ।
𑌕𑌲𑌾𑌭𑌿𑌃 𑌪𑌰𑍇 𑌪𑌞𑍍𑌚𑌵𑌿𑌂𑌶𑌾𑌤𑍍𑌮𑌿𑌕𑌾𑌭𑌿-
𑌸𑍍𑌤𑍍𑌵𑌮𑍇𑌕𑍈𑌵 𑌸𑍇𑌵𑍍𑌯𑌾 𑌶𑌿𑌵𑌾𑌭𑌿𑌨𑍍𑌨𑌰𑍂𑌪𑌾 ॥ 9 ॥
𑌅𑌗𑌾𑌧𑍇𑌽𑌤𑍍𑌰 𑌸𑌂𑌸𑌾𑌰𑌪𑌙𑍍𑌕𑍇 𑌨𑌿𑌮𑌗𑍍𑌨𑌂
𑌕𑌲𑌤𑍍𑌰𑌾𑌦𑌿𑌭𑌾𑌰𑍇𑌣 𑌖𑌿𑌨𑍍𑌨𑌂 𑌨𑌿𑌤𑌾𑌨𑍍𑌤𑌮𑍍 ।
𑌮𑌹𑌾𑌮𑍋𑌹𑌪𑌾𑌶𑍗𑌘𑌬𑌦𑍍𑌧𑌂 𑌚𑌿𑌰𑌾𑌨𑍍𑌮𑌾𑌂
𑌸𑌮𑍁𑌦𑍍𑌧𑌰𑍍𑌤𑍁𑌮𑌮𑍍𑌬 𑌤𑍍𑌵𑌮𑍇𑌕𑍈𑌵 𑌶𑌕𑍍𑌤𑌾 ॥ 10 ॥
𑌸𑌮𑌾𑌰𑌭𑍍𑌯 𑌮𑍂𑌲𑌂 𑌗𑌤𑍋 𑌬𑍍𑌰𑌹𑍍𑌮𑌚𑌕𑍍𑌰𑌂
𑌭𑌵𑌦𑍍𑌦𑌿𑌵𑍍𑌯𑌚𑌕𑍍𑌰𑍇𑌶𑍍𑌵𑌰𑍀𑌧𑌾𑌮𑌭𑌾𑌜𑌃 ।
𑌮𑌹𑌾𑌸𑌿𑌦𑍍𑌧𑌿𑌸𑌙𑍍𑌘𑌾𑌤𑌕𑌲𑍍𑌪𑌦𑍍𑌰𑍁𑌮𑌾𑌭𑌾-
𑌨𑌵𑌾𑌪𑍍𑌯𑌾𑌮𑍍𑌬 𑌨𑌾𑌦𑌾𑌨𑍁𑌪𑌾𑌸𑍍𑌤𑍇 𑌚 𑌯𑍋𑌗𑍀 ॥ 11 ॥
𑌗𑌣𑍇𑌶𑍈𑌰𑍍𑌗𑍍𑌰𑌹𑍈𑌰𑌮𑍍𑌬 𑌨𑌕𑍍𑌷𑌤𑍍𑌰𑌪𑌙𑍍𑌕𑍍𑌤𑍍𑌯𑌾
𑌤𑌥𑌾 𑌯𑍋𑌗𑌿𑌨𑍀𑌰𑌾𑌶𑌿𑌪𑍀𑌠𑍈𑌰𑌭𑌿𑌨𑍍𑌨𑌮𑍍 ।
𑌮𑌹𑌾𑌕𑌾𑌲𑌮𑌾𑌤𑍍𑌮𑌾𑌨𑌮𑌾𑌮𑍃𑌶𑍍𑌯 𑌲𑍋𑌕𑌂
𑌵𑌿𑌧𑌤𑍍𑌸𑍇 𑌕𑍃𑌤𑌿𑌂 𑌵𑌾 𑌸𑍍𑌥𑌿𑌤𑌿𑌂 𑌵𑌾 𑌮𑌹𑍇𑌶𑌿 ॥ 12 ॥
𑌲𑌸𑌤𑍍𑌤𑌾𑌰𑌹𑌾𑌰𑌾𑌮𑌤𑌿𑌸𑍍𑌵𑌚𑍍𑌛𑌚𑍇𑌲𑌾𑌂
𑌵𑌹𑌨𑍍𑌤𑍀𑌂 𑌕𑌰𑍇 𑌪𑍁𑌸𑍍𑌤𑌕𑌂 𑌚𑌾𑌕𑍍𑌷𑌮𑌾𑌲𑌾𑌮𑍍 ।
𑌶𑌰𑌚𑍍𑌚𑌨𑍍𑌦𑍍𑌰𑌕𑍋𑌟𑌿𑌪𑍍𑌰𑌭𑌾𑌭𑌾𑌸𑍁𑌰𑌾𑌂 𑌤𑍍𑌵𑌾𑌂
𑌸𑌕𑍃𑌦𑍍𑌭𑌾𑌵𑌯𑌨𑍍𑌭𑌾𑌰𑌤𑍀𑌵𑌲𑍍𑌲𑌭𑌃 𑌸𑍍𑌯𑌾𑌤𑍍 ॥ 13 ॥
𑌸𑌮𑍁𑌦𑍍𑌯𑌤𑍍𑌸𑌹𑌸𑍍𑌰𑌾𑌰𑍍𑌕𑌬𑌿𑌮𑍍𑌬𑌾𑌭𑌵𑌕𑍍𑌤𑍍𑌰𑌾𑌂
𑌸𑍍𑌵𑌭𑌾𑌸𑍈𑌵 𑌸𑌿𑌨𑍍𑌦𑍂𑌰𑌿𑌤𑌾𑌜𑌾𑌣𑍍𑌡𑌕𑍋𑌟𑌿𑌮𑍍 ।
𑌧𑌨𑍁𑌰𑍍𑌬𑌾𑌣𑌪𑌾𑌶𑌾𑌙𑍍𑌕𑍁𑌶𑌾𑌨𑍍𑌧𑌾𑌰𑌯𑌨𑍍𑌤𑍀𑌂
𑌸𑍍𑌮𑌰𑌨𑍍𑌤𑌃 𑌸𑍍𑌮𑌰𑌂 𑌵𑌾𑌪𑌿 𑌸𑌮𑍍𑌮𑍋𑌹𑌯𑍇𑌯𑍁𑌃 ॥ 14 ॥
𑌮𑌣𑌿𑌸𑍍𑌯𑍂𑌤𑌤𑌾𑌟𑌙𑍍𑌕𑌶𑍋𑌣𑌾𑌸𑍍𑌯𑌬𑌿𑌮𑍍𑌬𑌾𑌂
𑌹𑌰𑌿𑌤𑍍𑌪𑌟𑍍𑌟𑌵𑌸𑍍𑌤𑍍𑌰𑌾𑌂 𑌤𑍍𑌵𑌗𑍁𑌲𑍍𑌲𑌾𑌸𑌿𑌭𑍂𑌷𑌾𑌮𑍍 ।
𑌹𑍃𑌦𑌾 𑌭𑌾𑌵𑌯𑌂𑌸𑍍𑌤𑌪𑍍𑌤𑌹𑍇𑌮𑌪𑍍𑌰𑌭𑌾𑌂 𑌤𑍍𑌵𑌾𑌂
𑌶𑍍𑌰𑌿𑌯𑍋 𑌨𑌾𑌶𑌯𑌤𑍍𑌯𑌮𑍍𑌬 𑌚𑌾𑌞𑍍𑌚𑌲𑍍𑌯𑌭𑌾𑌵𑌮𑍍 ॥ 15 ॥
𑌮𑌹𑌾𑌮𑌨𑍍𑌤𑍍𑌰𑌰𑌾𑌜𑌾𑌨𑍍𑌤𑌬𑍀𑌜𑌂 𑌪𑌰𑌾𑌖𑍍𑌯𑌂
𑌸𑍍𑌵𑌤𑍋 𑌨𑍍𑌯𑌸𑍍𑌤𑌬𑌿𑌨𑍍𑌦𑍁 𑌸𑍍𑌵𑌯𑌂 𑌨𑍍𑌯𑌸𑍍𑌤𑌹𑌾𑌰𑍍𑌦𑌮𑍍 ।
𑌭𑌵𑌦𑍍𑌵𑌕𑍍𑌤𑍍𑌰𑌵𑌕𑍍𑌷𑍋𑌜𑌗𑍁𑌹𑍍𑌯𑌾𑌭𑌿𑌧𑌾𑌨𑌂
𑌸𑍍𑌵𑌰𑍂𑌪𑌂 𑌸𑌕𑍃𑌦𑍍𑌭𑌾𑌵𑌯𑍇𑌤𑍍𑌸 𑌤𑍍𑌵𑌮𑍇𑌵 ॥ 16 ॥
𑌤𑌥𑌾𑌨𑍍𑌯𑍇 𑌵𑌿𑌕𑌲𑍍𑌪𑍇𑌷𑍁 𑌨𑌿𑌰𑍍𑌵𑌿𑌣𑍍𑌣𑌚𑌿𑌤𑍍𑌤𑌾-
𑌸𑍍𑌤𑌦𑍇𑌕𑌂 𑌸𑌮𑌾𑌧𑌾𑌯 𑌬𑌿𑌨𑍍𑌦𑍁𑌤𑍍𑌰𑌯𑌂 𑌤𑍇 ।
𑌪𑌰𑌾𑌨𑌨𑍍𑌦𑌸𑌨𑍍𑌧𑌾𑌨𑌸𑌿𑌨𑍍𑌧𑍗 𑌨𑌿𑌮𑌗𑍍𑌨𑌾𑌃
𑌪𑍁𑌨𑌰𑍍𑌗𑌰𑍍𑌭𑌰𑌨𑍍𑌧𑍍𑌰𑌂 𑌨 𑌪𑌶𑍍𑌯𑌨𑍍𑌤𑌿 𑌧𑍀𑌰𑌾𑌃 ॥ 17 ॥
𑌤𑍍𑌵𑌦𑍁𑌨𑍍𑌮𑍇𑌷𑌲𑍀𑌲𑌾𑌨𑍁𑌬𑌨𑍍𑌧𑌾𑌧𑌿𑌕𑌾𑌰𑌾-
𑌨𑍍𑌵𑌿𑌰𑌿𑌞𑍍𑌚𑍍𑌯𑌾𑌦𑌿𑌕𑌾𑌂𑌸𑍍𑌤𑍍𑌵𑌦𑍍𑌗𑍁𑌣𑌾𑌮𑍍𑌭𑍋𑌧𑌿𑌬𑌿𑌨𑍍𑌦𑍂𑌨𑍍 ।
𑌭𑌜𑌨𑍍𑌤𑌸𑍍𑌤𑌿𑌤𑍀𑌰𑍍𑌷𑌨𑍍𑌤𑌿 𑌸𑌂𑌸𑌾𑌰𑌸𑌿𑌨𑍍𑌧𑍁𑌂
𑌶𑌿𑌵𑍇 𑌤𑌾𑌵𑌕𑍀𑌨𑌾 𑌸𑍁𑌸𑌮𑍍𑌭𑌾𑌵𑌨𑍇𑌯𑌮𑍍 ॥ 18 ॥
𑌕𑌦𑌾 𑌵𑌾 𑌭𑌵𑌤𑍍𑌪𑌾𑌦𑌪𑍋𑌤𑍇𑌨 𑌤𑍂𑌰𑍍𑌣𑌂
𑌭𑌵𑌾𑌮𑍍𑌭𑍋𑌧𑌿𑌮𑍁𑌤𑍍𑌤𑍀𑌰𑍍𑌯 𑌪𑍂𑌰𑍍𑌣𑌾𑌨𑍍𑌤𑌰𑌙𑍍𑌗𑌃 ।
𑌨𑌿𑌮𑌜𑍍𑌜𑌨𑍍𑌤𑌮𑍇𑌨𑌂 𑌦𑍁𑌰𑌾𑌶𑌾𑌵𑌿𑌷𑌾𑌬𑍍𑌧𑍗
𑌸𑌮𑌾𑌲𑍋𑌕𑍍𑌯 𑌲𑍋𑌕𑌂 𑌕𑌥𑌂 𑌪𑌰𑍍𑌯𑍁𑌦𑌾𑌸𑍍𑌸𑍇 ॥ 19 ॥
𑌕𑌦𑌾𑌵𑌾 𑌹𑍃𑌷𑍀𑌕𑌾𑌣𑌿 𑌸𑌾𑌮𑍍𑌯𑌂 𑌭𑌜𑍇𑌯𑍁𑌃
𑌕𑌦𑌾 𑌵𑌾 𑌨 𑌶𑌤𑍍𑌰𑍁𑌰𑍍𑌨 𑌮𑌿𑌤𑍍𑌰𑌂 𑌭𑌵𑌾𑌨𑌿 ।
𑌕𑌦𑌾 𑌵𑌾 𑌦𑍁𑌰𑌾𑌶𑌾𑌵𑌿𑌷𑍂𑌚𑍀𑌵𑌿𑌲𑍋𑌪𑌃
𑌕𑌦𑌾 𑌵𑌾 𑌮𑌨𑍋 𑌮𑍇 𑌸𑌮𑍂𑌲𑌂 𑌵𑌿𑌨𑌶𑍍𑌯𑍇𑌤𑍍 ॥ 20 ॥
𑌨𑌮𑍋𑌵𑌾𑌕𑌮𑌾𑌶𑌾𑌸𑍍𑌮𑌹𑍇 𑌦𑍇𑌵𑌿 𑌯𑍁𑌷𑍍𑌮-
𑌤𑍍𑌪𑌦𑌾𑌮𑍍𑌭𑍋𑌜𑌯𑍁𑌗𑍍𑌮𑌾𑌯 𑌤𑌿𑌗𑍍𑌮𑌾𑌯 𑌗𑍗𑌰𑌿 ।
𑌵𑌿𑌰𑌿𑌞𑍍𑌚𑍍𑌯𑌾𑌦𑌿𑌭𑌾𑌸𑍍𑌵𑌤𑍍𑌕𑌿𑌰𑍀𑌟𑌪𑍍𑌰𑌤𑍋𑌲𑍀-
𑌪𑍍𑌰𑌦𑍀𑌪𑌾𑌯𑌮𑌾𑌨𑌪𑍍𑌰𑌭𑌾𑌭𑌾𑌸𑍍𑌵𑌰𑌾𑌯 ॥ 21 ॥
𑌕𑌚𑍇 𑌚𑌨𑍍𑌦𑍍𑌰𑌰𑍇𑌖𑌂 𑌕𑍁𑌚𑍇 𑌤𑌾𑌰𑌹𑌾𑌰𑌂
𑌕𑌰𑍇 𑌸𑍍𑌵𑌾𑌦𑍁𑌚𑌾𑌪𑌂 𑌶𑌰𑍇 𑌷𑌟𑍍𑌪𑌦𑍗𑌘𑌮𑍍 ।
𑌸𑍍𑌮𑌰𑌾𑌮𑌿 𑌸𑍍𑌮𑌰𑌾𑌰𑍇𑌰𑌭𑌿𑌪𑍍𑌰𑌾𑌯𑌮𑍇𑌕𑌂
𑌮𑌦𑌾𑌘𑍂𑌰𑍍𑌣𑌨𑍇𑌤𑍍𑌰𑌂 𑌮𑌦𑍀𑌯𑌂 𑌨𑌿𑌧𑌾𑌨𑌮𑍍 ॥ 22 ॥
𑌶𑌰𑍇𑌷𑍍𑌵𑍇𑌵 𑌨𑌾𑌸𑌾 𑌧𑌨𑍁𑌷𑍍𑌵𑍇𑌵 𑌜𑌿𑌹𑍍𑌵𑌾
𑌜𑌪𑌾𑌪𑌾𑌟𑌲𑍇 𑌲𑍋𑌚𑌨𑍇 𑌤𑍇 𑌸𑍍𑌵𑌰𑍂𑌪𑍇 ।
𑌤𑍍𑌵𑌗𑍇𑌷𑌾 𑌭𑌵𑌚𑍍𑌚𑌨𑍍𑌦𑍍𑌰𑌖𑌣𑍍𑌡𑍇 𑌶𑍍𑌰𑌵𑍋 𑌮𑍇
𑌗𑍁𑌣𑍇 𑌤𑍇 𑌮𑌨𑍋𑌵𑍃𑌤𑍍𑌤𑌿𑌰𑌮𑍍𑌬 𑌤𑍍𑌵𑌯𑌿 𑌸𑍍𑌯𑌾𑌤𑍍 ॥ 23 ॥
𑌜𑌗𑌤𑍍𑌕𑌰𑍍𑌮𑌧𑍀𑌰𑌾𑌨𑍍𑌵𑌚𑍋𑌧𑍂𑌤𑌕𑍀𑌰𑌾𑌨𑍍
𑌕𑍁𑌚𑌨𑍍𑌯𑌸𑍍𑌤𑌹𑌾𑌰𑌾𑌙𑍍𑌕𑍃𑌪𑌾𑌸𑌿𑌨𑍍𑌧𑍁𑌪𑍂𑌰𑌾𑌨𑍍 ।
𑌭𑌵𑌾𑌮𑍍𑌭𑍋𑌧𑌿𑌪𑌾𑌰𑌾𑌨𑍍𑌮𑌹𑌾𑌪𑌾𑌪𑌦𑍂𑌰𑌾𑌨𑍍
𑌭𑌜𑍇 𑌵𑍇𑌦𑌸𑌾𑌰𑌾𑌂𑌶𑌿𑌵𑌪𑍍𑌰𑍇𑌮𑌦𑌾𑌰𑌾𑌨𑍍 ॥ 24 ॥
𑌸𑍁𑌧𑌾𑌸𑌿𑌨𑍍𑌧𑍁𑌸𑌾𑌰𑍇 𑌚𑌿𑌦𑌾𑌨𑌨𑍍𑌦𑌨𑍀𑌰𑍇
𑌸𑌮𑍁𑌤𑍍𑌫𑍁𑌲𑍍𑌲𑌨𑍀𑌪𑍇 𑌸𑍁𑌰𑌤𑍍𑌰𑌾𑌨𑍍𑌤𑌰𑍀𑌪𑍇 ।
𑌮𑌣𑌿𑌵𑍍𑌯𑍂𑌹𑌸𑌾𑌲𑍇 𑌸𑍍𑌥𑌿𑌤𑍇 𑌹𑍈𑌮𑌶𑌾𑌲𑍇
𑌮𑌨𑍋𑌜𑌾𑌰𑌿𑌵𑌾𑌮𑍇 𑌨𑌿𑌷𑌣𑍍𑌣𑌂 𑌮𑌨𑍋 𑌮𑍇 ॥ 25 ॥
𑌦𑍃𑌗𑌨𑍍𑌤𑍇 𑌵𑌿𑌲𑍋𑌲𑌾 𑌸𑍁𑌗𑌨𑍍𑌧𑍀𑌷𑍁𑌮𑌾𑌲𑌾
𑌪𑍍𑌰𑌪𑌞𑍍𑌚𑍇𑌨𑍍𑌦𑍍𑌰𑌜𑌾𑌲𑌾 𑌵𑌿𑌪𑌤𑍍𑌸𑌿𑌨𑍍𑌧𑍁𑌕𑍂𑌲𑌾 ।
𑌮𑍁𑌨𑌿𑌸𑍍𑌵𑌾𑌨𑍍𑌤𑌶𑌾𑌲𑌾 𑌨𑌮𑌲𑍍𑌲𑍋𑌕𑌪𑌾𑌲𑌾
𑌹𑍃𑌦𑌿 𑌪𑍍𑌰𑍇𑌮𑌲𑍋𑌲𑌾𑌮𑍃𑌤𑌸𑍍𑌵𑌾𑌦𑍁𑌲𑍀𑌲𑌾 ॥ 26 ॥
𑌜𑌗𑌜𑍍𑌜𑌾𑌲𑌮𑍇𑌤𑌤𑍍𑌤𑍍𑌵𑌯𑍈𑌵𑌾𑌮𑍍𑌬 𑌸𑍃𑌷𑍍𑌟𑌂
𑌤𑍍𑌵𑌮𑍇𑌵𑌾𑌦𑍍𑌯 𑌯𑌾𑌸𑍀𑌨𑍍𑌦𑍍𑌰𑌿𑌯𑍈𑌰𑌰𑍍𑌥𑌜𑌾𑌲𑌮𑍍 ।
𑌤𑍍𑌵𑌮𑍇𑌕𑍈𑌵 𑌕𑌰𑍍𑌤𑍍𑌰𑍀 𑌤𑍍𑌵𑌮𑍇𑌕𑍈𑌵 𑌭𑍋𑌕𑍍𑌤𑍍𑌰𑍀
𑌨 𑌮𑍇 𑌪𑍁𑌣𑍍𑌯𑌪𑌾𑌪𑍇 𑌨 𑌮𑍇 𑌬𑌨𑍍𑌧𑌮𑍋𑌕𑍍𑌷𑍗 ॥ 27 ॥
𑌇𑌤𑌿 𑌪𑍍𑌰𑍇𑌮𑌭𑌾𑌰𑍇𑌣 𑌕𑌿𑌞𑍍𑌚𑌿𑌨𑍍𑌮𑌯𑍋𑌕𑍍𑌤𑌂
𑌨 𑌬𑍁𑌧𑍍𑌵𑍈𑌵 𑌤𑌤𑍍𑌤𑍍𑌵𑌂 𑌮𑌦𑍀𑌯𑌂 𑌤𑍍𑌵𑌦𑍀𑌯𑌮𑍍 ।
𑌵𑌿𑌨𑍋𑌦𑌾𑌯 𑌬𑌾𑌲𑌸𑍍𑌯 𑌮𑍗𑌰𑍍𑌖𑍍𑌯𑌂 𑌹𑌿 𑌮𑌾𑌤𑌸𑍍-
𑌤𑌦𑍇𑌤𑌤𑍍𑌪𑍍𑌰𑌲𑌾𑌪𑌸𑍍𑌤𑍁𑌤𑌿𑌂 𑌮𑍇 𑌗𑍃𑌹𑌾𑌣 ॥ 28 ॥
॥ 𑌇𑌤𑌿 𑌶𑍍𑌰𑍀𑌮𑌚𑍍𑌛𑌙𑍍𑌕𑌰𑌾𑌚𑌾𑌰𑍍𑌯𑌵𑌿𑌰𑌚𑌿𑌤𑌾 𑌦𑍇𑌵𑍀𑌭𑍁𑌜𑌙𑍍𑌗𑌂 𑌸𑌮𑍍𑌪𑍂𑌰𑍍𑌣𑌮𑍍 ॥
Roman (IAST) Transliteration
viriñcyādibhiḥ pañcabhirlokapālaiḥ
samūḍhe mahānandapīṭhe niṣaṇṇam |
dhanurbāṇapāśāṅkuśaprotahastaṃ
mahastraipuraṃ śaṅkarādvaitamavyāt || 1 ||
yadannādibhiḥ pañcabhiḥ kośajālaiḥ
śiraḥpakṣapucchātmakairantarantaḥ |
nigūḍhe mahāyogapīṭhe niṣaṇṇaṃ
purārerathāntaḥpuraṃ naumi nityam || 2 ||
viriñcādirūpaiḥ prapañce vihṛtya
svatantrā yadā svātmaviśrāntireṣā |
tadā mānamātṛprameyātiriktaṃ
parānandamīḍe bhavāni tvadīyam || 3 ||
vinodāya caitanyamekaṃ vibhajya
dvidhā devi jīvaḥ śivaśceti nāmnā |
śivasyāpi jīvatvamāpādayantī
punarjīvamenaṃ śivaṃ vā karoṣi || 4 ||
samākuñcya mūlaṃ hṛdi nyasya vāyuṃ
mano bhrūbilaṃ prāpayitvā nivṛttāḥ |
tataḥ saccidānandarūpe pade te
bhavantyamba jīvāḥ śivatvena kecit || 5 ||
śarīre'tikaṣṭe ripau putravarge
sadābhītimūle kalatre dhane vā |
na kaścidvirajyatyaho devi citraṃ
kathaṃ tvatkaṭākṣaṃ vinā tattvabodhaḥ || 6 ||
śarīre dhane'patyavarge kalatre
viraktasya saddeśikādiṣṭabuddheḥ |
yadākasmikaṃ jyotirānandarūpaṃ
samādhau bhavettattvamasyamba satyam || 7 ||
mṛṣānyo mṛṣānyaḥ paro miśramenaṃ
paraḥ prākṛtaṃ cāparo buddhimātram |
prapañcaṃ mimīte munīnāṃ gaṇo'yaṃ
tadetattvameveti na tvāṃ jahīmaḥ || 8 ||
nivṛttiḥ pratiṣṭhā ca vidyā ca śānti-
stathā śāntyatīteti pañcīkṛtābhiḥ |
kalābhiḥ pare pañcaviṃśātmikābhi-
stvamekaiva sevyā śivābhinnarūpā || 9 ||
agādhe'tra saṃsārapaṅke nimagnaṃ
kalatrādibhāreṇa khinnaṃ nitāntam |
mahāmohapāśaughabaddhaṃ cirānmāṃ
samuddhartumamba tvamekaiva śaktā || 10 ||
samārabhya mūlaṃ gato brahmacakraṃ
bhavaddivyacakreśvarīdhāmabhājaḥ |
mahāsiddhisaṅghātakalpadrumābhā-
navāpyāmba nādānupāste ca yogī || 11 ||
gaṇeśairgrahairamba nakṣatrapaṅktyā
tathā yoginīrāśipīṭhairabhinnam |
mahākālamātmānamāmṛśya lokaṃ
vidhatse kṛtiṃ vā sthitiṃ vā maheśi || 12 ||
lasattārahārāmatisvacchacelāṃ
vahantīṃ kare pustakaṃ cākṣamālām |
śaraccandrakoṭiprabhābhāsurāṃ tvāṃ
sakṛdbhāvayanbhāratīvallabhaḥ syāt || 13 ||
samudyatsahasrārkabimbābhavaktrāṃ
svabhāsaiva sindūritājāṇḍakoṭim |
dhanurbāṇapāśāṅkuśāndhārayantīṃ
smarantaḥ smaraṃ vāpi sammohayeyuḥ || 14 ||
maṇisyūtatāṭaṅkaśoṇāsyabimbāṃ
haritpaṭṭavastrāṃ tvagullāsibhūṣām |
hṛdā bhāvayaṃstaptahemaprabhāṃ tvāṃ
śriyo nāśayatyamba cāñcalyabhāvam || 15 ||
mahāmantrarājāntabījaṃ parākhyaṃ
svato nyastabindu svayaṃ nyastahārdam |
bhavadvaktravakṣojaguhyābhidhānaṃ
svarūpaṃ sakṛdbhāvayetsa tvameva || 16 ||
tathānye vikalpeṣu nirviṇṇacittā-
stadekaṃ samādhāya bindutrayaṃ te |
parānandasandhānasindhau nimagnāḥ
punargarbharandhraṃ na paśyanti dhīrāḥ || 17 ||
tvadunmeṣalīlānubandhādhikārā-
nviriñcyādikāṃstvadguṇāmbhodhibindūn |
bhajantastitīrṣanti saṃsārasindhuṃ
śive tāvakīnā susambhāvaneyam || 18 ||
kadā vā bhavatpādapotena tūrṇaṃ
bhavāmbhodhimuttīrya pūrṇāntaraṅgaḥ |
nimajjantamenaṃ durāśāviṣābdhau
samālokya lokaṃ kathaṃ paryudāsse || 19 ||
kadāvā hṛṣīkāṇi sāmyaṃ bhajeyuḥ
kadā vā na śatrurna mitraṃ bhavāni |
kadā vā durāśāviṣūcīvilopaḥ
kadā vā mano me samūlaṃ vinaśyet || 20 ||
namovākamāśāsmahe devi yuṣma-
tpadāmbhojayugmāya tigmāya gauri |
viriñcyādibhāsvatkirīṭapratolī-
pradīpāyamānaprabhābhāsvarāya || 21 ||
kace candrarekhaṃ kuce tārahāraṃ
kare svāducāpaṃ śare ṣaṭpadaugham |
smarāmi smarārerabhiprāyamekaṃ
madāghūrṇanetraṃ madīyaṃ nidhānam || 22 ||
śareṣveva nāsā dhanuṣveva jihvā
japāpāṭale locane te svarūpe |
tvageṣā bhavaccandrakhaṇḍe śravo me
guṇe te manovṛttiramba tvayi syāt || 23 ||
jagatkarmadhīrānvacodhūtakīrān
kucanyastahārāṅkṛpāsindhupūrān |
bhavāmbhodhipārānmahāpāpadūrān
bhaje vedasārāṃśivapremadārān || 24 ||
sudhāsindhusāre cidānandanīre
samutphullanīpe suratrāntarīpe |
maṇivyūhasāle sthite haimaśāle
manojārivāme niṣaṇṇaṃ mano me || 25 ||
dṛgante vilolā sugandhīṣumālā
prapañcendrajālā vipatsindhukūlā |
munisvāntaśālā namallokapālā
hṛdi premalolāmṛtasvādulīlā || 26 ||
jagajjālametattvayaivāmba sṛṣṭaṃ
tvamevādya yāsīndriyairarthajālam |
tvamekaiva kartrī tvamekaiva bhoktrī
na me puṇyapāpe na me bandhamokṣau || 27 ||
iti premabhāreṇa kiñcinmayoktaṃ
na budhvaiva tattvaṃ madīyaṃ tvadīyam |
vinodāya bālasya maurkhyaṃ hi mātas-
tadetatpralāpastutiṃ me gṛhāṇa || 28 ||
|| iti śrīmacchaṅkarācāryaviracitā devībhujaṅgaṃ sampūrṇam ||
InfoLyter.in — Sacred Vedic Knowledge Portal · Free forever