📄 Save this Stotram as PDF Click the button to open the Save dialog
How to save: 1 Click "Save as PDF" → 2 A dialog opens → 3 Choose "Save as PDF" as printer → 4 Click Save
ॐ
𑌅𑌷𑍍𑌟𑌾𑌵𑌕𑍍𑌰 𑌗𑍀𑌤𑌾 𑌅𑌷𑍍𑌟𑌾𑌦𑌶𑍋𑌽𑌧𑍍𑌯𑌾𑌯𑌃
Ashtavakra Gita Ashtadasho'dhyayah
Gita Ashtavakra Grantha
𑌅𑌷𑍍𑌟𑌾𑌵𑌕𑍍𑌰 𑌉𑌵𑌾𑌚 ॥
𑌯𑌸𑍍𑌯 𑌬𑍋𑌧𑍋𑌦𑌯𑍇 𑌤𑌾𑌵𑌤𑍍𑌸𑍍𑌵𑌪𑍍𑌨𑌵𑌦𑍍 𑌭𑌵𑌤𑌿 𑌭𑍍𑌰𑌮𑌃 ।
𑌤𑌸𑍍𑌮𑍈 𑌸𑍁𑌖𑍈𑌕𑌰𑍂𑌪𑌾𑌯 𑌨𑌮𑌃 𑌶𑌾𑌨𑍍𑌤𑌾𑌯 𑌤𑍇𑌜𑌸𑍇 ॥ 18-1॥
𑌅𑌰𑍍𑌜𑌯𑌿𑌤𑍍𑌵𑌾𑌖𑌿𑌲𑌾𑌨𑍍 𑌅𑌰𑍍𑌥𑌾𑌨𑍍 𑌭𑍋𑌗𑌾𑌨𑌾𑌪𑍍𑌨𑍋𑌤𑌿 𑌪𑍁𑌷𑍍𑌕𑌲𑌾𑌨𑍍 ।
𑌨 𑌹𑌿 𑌸𑌰𑍍𑌵𑌪𑌰𑌿𑌤𑍍𑌯𑌾𑌗𑌮𑌨𑍍𑌤𑌰𑍇𑌣 𑌸𑍁𑌖𑍀 𑌭𑌵𑍇𑌤𑍍 ॥ 18-2॥
𑌕𑌰𑍍𑌤𑌵𑍍𑌯𑌦𑍁𑌃𑌖𑌮𑌾𑌰𑍍𑌤𑌣𑍍𑌡𑌜𑍍𑌵𑌾𑌲𑌾𑌦𑌗𑍍𑌧𑌾𑌨𑍍𑌤𑌰𑌾𑌤𑍍𑌮𑌨𑌃 ।
𑌕𑍁𑌤𑌃 𑌪𑍍𑌰𑌶𑌮𑌪𑍀𑌯𑍂𑌷𑌧𑌾𑌰𑌾𑌸𑌾𑌰𑌮𑍃𑌤𑍇 𑌸𑍁𑌖𑌮𑍍 ॥ 18-3॥
𑌭𑌵𑍋𑌽𑌯𑌂 𑌭𑌾𑌵𑌨𑌾𑌮𑌾𑌤𑍍𑌰𑍋 𑌨 𑌕𑌿𑌞𑍍𑌚𑌿𑌤𑍍 𑌪𑌰𑌮𑌾𑌰𑍍𑌥𑌤𑌃 ।
𑌨𑌾𑌸𑍍𑌤𑍍𑌯𑌭𑌾𑌵𑌃 𑌸𑍍𑌵𑌭𑌾𑌵𑌾𑌨𑌾𑌂 𑌭𑌾𑌵𑌾𑌭𑌾𑌵𑌵𑌿𑌭𑌾𑌵𑌿𑌨𑌾𑌮𑍍 ॥ 18-4॥
𑌨 𑌦𑍂𑌰𑌂 𑌨 𑌚 𑌸𑌙𑍍𑌕𑍋𑌚𑌾𑌲𑍍𑌲𑌬𑍍𑌧𑌮𑍇𑌵𑌾𑌤𑍍𑌮𑌨𑌃 𑌪𑌦𑌮𑍍 ।
𑌨𑌿𑌰𑍍𑌵𑌿𑌕𑌲𑍍𑌪𑌂 𑌨𑌿𑌰𑌾𑌯𑌾𑌸𑌂 𑌨𑌿𑌰𑍍𑌵𑌿𑌕𑌾𑌰𑌂 𑌨𑌿𑌰𑌞𑍍𑌜𑌨𑌮𑍍 ॥ 18-5॥
𑌵𑍍𑌯𑌾𑌮𑍋𑌹𑌮𑌾𑌤𑍍𑌰𑌵𑌿𑌰𑌤𑍗 𑌸𑍍𑌵𑌰𑍂𑌪𑌾𑌦𑌾𑌨𑌮𑌾𑌤𑍍𑌰𑌤𑌃 ।
𑌵𑍀𑌤𑌶𑍋𑌕𑌾 𑌵𑌿𑌰𑌾𑌜𑌨𑍍𑌤𑍇 𑌨𑌿𑌰𑌾𑌵𑌰𑌣𑌦𑍃𑌷𑍍𑌟𑌯𑌃 ॥ 18-6॥
𑌸𑌮𑌸𑍍𑌤𑌂 𑌕𑌲𑍍𑌪𑌨𑌾𑌮𑌾𑌤𑍍𑌰𑌮𑌾𑌤𑍍𑌮𑌾 𑌮𑍁𑌕𑍍𑌤𑌃 𑌸𑌨𑌾𑌤𑌨𑌃 ।
𑌇𑌤𑌿 𑌵𑌿𑌜𑍍𑌞𑌾𑌯 𑌧𑍀𑌰𑍋 𑌹𑌿 𑌕𑌿𑌮𑌭𑍍𑌯𑌸𑍍𑌯𑌤𑌿 𑌬𑌾𑌲𑌵𑌤𑍍 ॥ 18-7॥
𑌆𑌤𑍍𑌮𑌾 𑌬𑍍𑌰𑌹𑍍𑌮𑍇𑌤𑌿 𑌨𑌿𑌶𑍍𑌚𑌿𑌤𑍍𑌯 𑌭𑌾𑌵𑌾𑌭𑌾𑌵𑍗 𑌚 𑌕𑌲𑍍𑌪𑌿𑌤𑍗 ।
𑌨𑌿𑌷𑍍𑌕𑌾𑌮𑌃 𑌕𑌿𑌂 𑌵𑌿𑌜𑌾𑌨𑌾𑌤𑌿 𑌕𑌿𑌂 𑌬𑍍𑌰𑍂𑌤𑍇 𑌚 𑌕𑌰𑍋𑌤𑌿 𑌕𑌿𑌮𑍍 ॥ 18-8॥
𑌅𑌯𑌂 𑌸𑍋𑌽𑌹𑌮𑌯𑌂 𑌨𑌾𑌹𑌮𑌿𑌤𑌿 𑌕𑍍𑌷𑍀𑌣𑌾 𑌵𑌿𑌕𑌲𑍍𑌪𑌨𑌾 ।
𑌸𑌰𑍍𑌵𑌮𑌾𑌤𑍍𑌮𑍇𑌤𑌿 𑌨𑌿𑌶𑍍𑌚𑌿𑌤𑍍𑌯 𑌤𑍂𑌷𑍍𑌣𑍀𑌮𑍍𑌭𑍂𑌤𑌸𑍍𑌯 𑌯𑍋𑌗𑌿𑌨𑌃 ॥ 18-9॥
𑌨 𑌵𑌿𑌕𑍍𑌷𑍇𑌪𑍋 𑌨 𑌚𑍈𑌕𑌾𑌗𑍍𑌰𑍍𑌯𑌂 𑌨𑌾𑌤𑌿𑌬𑍋𑌧𑍋 𑌨 𑌮𑍂𑌢𑌤𑌾 ।
𑌨 𑌸𑍁𑌖𑌂 𑌨 𑌚 𑌵𑌾 𑌦𑍁𑌃𑌖𑌮𑍁𑌪𑌶𑌾𑌨𑍍𑌤𑌸𑍍𑌯 𑌯𑍋𑌗𑌿𑌨𑌃 ॥ 18-10॥
𑌸𑍍𑌵𑌾𑌰𑌾𑌜𑍍𑌯𑍇 𑌭𑍈𑌕𑍍𑌷𑌵𑍃𑌤𑍍𑌤𑍗 𑌚 𑌲𑌾𑌭𑌾𑌲𑌾𑌭𑍇 𑌜𑌨𑍇 𑌵𑌨𑍇 ।
𑌨𑌿𑌰𑍍𑌵𑌿𑌕𑌲𑍍𑌪𑌸𑍍𑌵𑌭𑌾𑌵𑌸𑍍𑌯 𑌨 𑌵𑌿𑌶𑍇𑌷𑍋𑌽𑌸𑍍𑌤𑌿 𑌯𑍋𑌗𑌿𑌨𑌃 ॥ 18-11॥
𑌕𑍍𑌵 𑌧𑌰𑍍𑌮𑌃 𑌕𑍍𑌵 𑌚 𑌵𑌾 𑌕𑌾𑌮𑌃 𑌕𑍍𑌵 𑌚𑌾𑌰𑍍𑌥𑌃 𑌕𑍍𑌵 𑌵𑌿𑌵𑍇𑌕𑌿𑌤𑌾 ।
𑌇𑌦𑌂 𑌕𑍃𑌤𑌮𑌿𑌦𑌂 𑌨𑍇𑌤𑌿 𑌦𑍍𑌵𑌨𑍍𑌦𑍍𑌵𑍈𑌰𑍍𑌮𑍁𑌕𑍍𑌤𑌸𑍍𑌯 𑌯𑍋𑌗𑌿𑌨𑌃 ॥ 18-12॥
𑌕𑍃𑌤𑍍𑌯𑌂 𑌕𑌿𑌮𑌪𑌿 𑌨𑍈𑌵𑌾𑌸𑍍𑌤𑌿 𑌨 𑌕𑌾𑌪𑌿 𑌹𑍃𑌦𑌿 𑌰𑌞𑍍𑌜𑌨𑌾 ।
𑌯𑌥𑌾 𑌜𑍀𑌵𑌨𑌮𑍇𑌵𑍇𑌹 𑌜𑍀𑌵𑌨𑍍𑌮𑍁𑌕𑍍𑌤𑌸𑍍𑌯 𑌯𑍋𑌗𑌿𑌨𑌃 ॥ 18-13॥
𑌕𑍍𑌵 𑌮𑍋𑌹𑌃 𑌕𑍍𑌵 𑌚 𑌵𑌾 𑌵𑌿𑌶𑍍𑌵𑌂 𑌕𑍍𑌵 𑌤𑌦𑍍 𑌧𑍍𑌯𑌾𑌨𑌂 𑌕𑍍𑌵 𑌮𑍁𑌕𑍍𑌤𑌤𑌾 ।
𑌸𑌰𑍍𑌵𑌸𑌙𑍍𑌕𑌲𑍍𑌪𑌸𑍀𑌮𑌾𑌯𑌾𑌂 𑌵𑌿𑌶𑍍𑌰𑌾𑌨𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 18-14॥
𑌯𑍇𑌨 𑌵𑌿𑌶𑍍𑌵𑌮𑌿𑌦𑌂 𑌦𑍃𑌷𑍍𑌟𑌂 𑌸 𑌨𑌾𑌸𑍍𑌤𑍀𑌤𑌿 𑌕𑌰𑍋𑌤𑍁 𑌵𑍈 ।
𑌨𑌿𑌰𑍍𑌵𑌾𑌸𑌨𑌃 𑌕𑌿𑌂 𑌕𑍁𑌰𑍁𑌤𑍇 𑌪𑌶𑍍𑌯𑌨𑍍𑌨𑌪𑌿 𑌨 𑌪𑌶𑍍𑌯𑌤𑌿 ॥ 18-15॥
𑌯𑍇𑌨 𑌦𑍃𑌷𑍍𑌟𑌂 𑌪𑌰𑌂 𑌬𑍍𑌰𑌹𑍍𑌮 𑌸𑍋𑌽𑌹𑌂 𑌬𑍍𑌰𑌹𑍍𑌮𑍇𑌤𑌿 𑌚𑌿𑌨𑍍𑌤𑌯𑍇𑌤𑍍 ।
𑌕𑌿𑌂 𑌚𑌿𑌨𑍍𑌤𑌯𑌤𑌿 𑌨𑌿𑌶𑍍𑌚𑌿𑌨𑍍𑌤𑍋 𑌦𑍍𑌵𑌿𑌤𑍀𑌯𑌂 𑌯𑍋 𑌨 𑌪𑌶𑍍𑌯𑌤𑌿 ॥ 18-16॥
𑌦𑍃𑌷𑍍𑌟𑍋 𑌯𑍇𑌨𑌾𑌤𑍍𑌮𑌵𑌿𑌕𑍍𑌷𑍇𑌪𑍋 𑌨𑌿𑌰𑍋𑌧𑌂 𑌕𑍁𑌰𑍁𑌤𑍇 𑌤𑍍𑌵𑌸𑍗 ।
𑌉𑌦𑌾𑌰𑌸𑍍𑌤𑍁 𑌨 𑌵𑌿𑌕𑍍𑌷𑌿𑌪𑍍𑌤𑌃 𑌸𑌾𑌧𑍍𑌯𑌾𑌭𑌾𑌵𑌾𑌤𑍍𑌕𑌰𑍋𑌤𑌿 𑌕𑌿𑌮𑍍 ॥ 18-17॥
𑌧𑍀𑌰𑍋 𑌲𑍋𑌕𑌵𑌿𑌪𑌰𑍍𑌯𑌸𑍍𑌤𑍋 𑌵𑌰𑍍𑌤𑌮𑌾𑌨𑍋𑌽𑌪𑌿 𑌲𑍋𑌕𑌵𑌤𑍍 ।
𑌨 𑌸𑌮𑌾𑌧𑌿𑌂 𑌨 𑌵𑌿𑌕𑍍𑌷𑍇𑌪𑌂 𑌨 𑌲𑍋𑌪𑌂 𑌸𑍍𑌵𑌸𑍍𑌯 𑌪𑌶𑍍𑌯𑌤𑌿 ॥ 18-18॥
𑌭𑌾𑌵𑌾𑌭𑌾𑌵𑌵𑌿𑌹𑍀𑌨𑍋 𑌯𑌸𑍍𑌤𑍃𑌪𑍍𑌤𑍋 𑌨𑌿𑌰𑍍𑌵𑌾𑌸𑌨𑍋 𑌬𑍁𑌧𑌃 ।
𑌨𑍈𑌵 𑌕𑌿𑌞𑍍𑌚𑌿𑌤𑍍𑌕𑍃𑌤𑌂 𑌤𑍇𑌨 𑌲𑍋𑌕𑌦𑍃𑌷𑍍𑌟𑍍𑌯𑌾 𑌵𑌿𑌕𑍁𑌰𑍍𑌵𑌤𑌾 ॥ 18-19॥
𑌪𑍍𑌰𑌵𑍃𑌤𑍍𑌤𑍗 𑌵𑌾 𑌨𑌿𑌵𑍃𑌤𑍍𑌤𑍗 𑌵𑌾 𑌨𑍈𑌵 𑌧𑍀𑌰𑌸𑍍𑌯 𑌦𑍁𑌰𑍍𑌗𑍍𑌰𑌹𑌃 ।
𑌯𑌦𑌾 𑌯𑌤𑍍𑌕𑌰𑍍𑌤𑍁𑌮𑌾𑌯𑌾𑌤𑌿 𑌤𑌤𑍍𑌕𑍃𑌤𑍍𑌵𑌾 𑌤𑌿𑌷𑍍𑌠𑌤𑌃 𑌸𑍁𑌖𑌮𑍍 ॥ 18-20॥
𑌨𑌿𑌰𑍍𑌵𑌾𑌸𑌨𑍋 𑌨𑌿𑌰𑌾𑌲𑌮𑍍𑌬𑌃 𑌸𑍍𑌵𑌚𑍍𑌛𑌨𑍍𑌦𑍋 𑌮𑍁𑌕𑍍𑌤𑌬𑌨𑍍𑌧𑌨𑌃 ।
𑌕𑍍𑌷𑌿𑌪𑍍𑌤𑌃 𑌸𑌂𑌸𑍍𑌕𑌾𑌰𑌵𑌾𑌤𑍇𑌨 𑌚𑍇𑌷𑍍𑌟𑌤𑍇 𑌶𑍁𑌷𑍍𑌕𑌪𑌰𑍍𑌣𑌵𑌤𑍍 ॥ 18-21॥
𑌅𑌸𑌂𑌸𑌾𑌰𑌸𑍍𑌯 𑌤𑍁 𑌕𑍍𑌵𑌾𑌪𑌿 𑌨 𑌹𑌰𑍍𑌷𑍋 𑌨 𑌵𑌿𑌷𑌾𑌦𑌤𑌾 ।
𑌸 𑌶𑍀𑌤𑌲𑌮𑌨𑌾 𑌨𑌿𑌤𑍍𑌯𑌂 𑌵𑌿𑌦𑍇𑌹 𑌇𑌵 𑌰𑌾𑌜𑌯𑍇 ॥ 18-22॥
𑌕𑍁𑌤𑍍𑌰𑌾𑌪𑌿 𑌨 𑌜𑌿𑌹𑌾𑌸𑌾𑌸𑍍𑌤𑌿 𑌨𑌾𑌶𑍋 𑌵𑌾𑌪𑌿 𑌨 𑌕𑍁𑌤𑍍𑌰𑌚𑌿𑌤𑍍 ।
𑌆𑌤𑍍𑌮𑌾𑌰𑌾𑌮𑌸𑍍𑌯 𑌧𑍀𑌰𑌸𑍍𑌯 𑌶𑍀𑌤𑌲𑌾𑌚𑍍𑌛𑌤𑌰𑌾𑌤𑍍𑌮𑌨𑌃 ॥ 18-23॥
𑌪𑍍𑌰𑌕𑍃𑌤𑍍𑌯𑌾 𑌶𑍂𑌨𑍍𑌯𑌚𑌿𑌤𑍍𑌤𑌸𑍍𑌯 𑌕𑍁𑌰𑍍𑌵𑌤𑍋𑌽𑌸𑍍𑌯 𑌯𑌦𑍃𑌚𑍍𑌛𑌯𑌾 ।
𑌪𑍍𑌰𑌾𑌕𑍃𑌤𑌸𑍍𑌯𑍇𑌵 𑌧𑍀𑌰𑌸𑍍𑌯 𑌨 𑌮𑌾𑌨𑍋 𑌨𑌾𑌵𑌮𑌾𑌨𑌤𑌾 ॥ 18-24॥
𑌕𑍃𑌤𑌂 𑌦𑍇𑌹𑍇𑌨 𑌕𑌰𑍍𑌮𑍇𑌦𑌂 𑌨 𑌮𑌯𑌾 𑌶𑍁𑌦𑍍𑌧𑌰𑍂𑌪𑌿𑌣𑌾 ।
𑌇𑌤𑌿 𑌚𑌿𑌨𑍍𑌤𑌾𑌨𑍁𑌰𑍋𑌧𑍀 𑌯𑌃 𑌕𑍁𑌰𑍍𑌵𑌨𑍍𑌨𑌪𑌿 𑌕𑌰𑍋𑌤𑌿 𑌨 ॥ 18-25॥
𑌅𑌤𑌦𑍍𑌵𑌾𑌦𑍀𑌵 𑌕𑍁𑌰𑍁𑌤𑍇 𑌨 𑌭𑌵𑍇𑌦𑌪𑌿 𑌬𑌾𑌲𑌿𑌶𑌃 ।
𑌜𑍀𑌵𑌨𑍍𑌮𑍁𑌕𑍍𑌤𑌃 𑌸𑍁𑌖𑍀 𑌶𑍍𑌰𑍀𑌮𑌾𑌨𑍍 𑌸𑌂𑌸𑌰𑌨𑍍𑌨𑌪𑌿 𑌶𑍋𑌭𑌤𑍇 ॥ 18-26॥
𑌨𑌾𑌨𑌾𑌵𑌿𑌚𑌾𑌰𑌸𑍁𑌶𑍍𑌰𑌾𑌨𑍍𑌤𑍋 𑌧𑍀𑌰𑍋 𑌵𑌿𑌶𑍍𑌰𑌾𑌨𑍍𑌤𑌿𑌮𑌾𑌗𑌤𑌃 ।
𑌨 𑌕𑌲𑍍𑌪𑌤𑍇 𑌨 𑌜𑌾𑌨𑌾𑌤𑌿 𑌨 𑌶𑍃𑌣𑍋𑌤𑌿 𑌨 𑌪𑌶𑍍𑌯𑌤𑌿 ॥ 18-27॥
𑌅𑌸𑌮𑌾𑌧𑍇𑌰𑌵𑌿𑌕𑍍𑌷𑍇𑌪𑌾𑌨𑍍 𑌨 𑌮𑍁𑌮𑍁𑌕𑍍𑌷𑍁𑌰𑍍𑌨 𑌚𑍇𑌤𑌰𑌃 ।
𑌨𑌿𑌶𑍍𑌚𑌿𑌤𑍍𑌯 𑌕𑌲𑍍𑌪𑌿𑌤𑌂 𑌪𑌶𑍍𑌯𑌨𑍍 𑌬𑍍𑌰𑌹𑍍𑌮𑍈𑌵𑌾𑌸𑍍𑌤𑍇 𑌮𑌹𑌾𑌶𑌯𑌃 ॥ 18-28॥
𑌯𑌸𑍍𑌯𑌾𑌨𑍍𑌤𑌃 𑌸𑍍𑌯𑌾𑌦𑌹𑌙𑍍𑌕𑌾𑌰𑍋 𑌨 𑌕𑌰𑍋𑌤𑌿 𑌕𑌰𑍋𑌤𑌿 𑌸𑌃 ।
𑌨𑌿𑌰𑌹𑌙𑍍𑌕𑌾𑌰𑌧𑍀𑌰𑍇𑌣 𑌨 𑌕𑌿𑌞𑍍𑌚𑌿𑌦𑌕𑍃𑌤𑌂 𑌕𑍃𑌤𑌮𑍍 ॥ 18-29॥
𑌨𑍋𑌦𑍍𑌵𑌿𑌗𑍍𑌨𑌂 𑌨 𑌚 𑌸𑌨𑍍𑌤𑍁𑌷𑍍𑌟𑌮𑌕𑌰𑍍𑌤𑍃 𑌸𑍍𑌪𑌨𑍍𑌦𑌵𑌰𑍍𑌜𑌿𑌤𑌮𑍍 ।
𑌨𑌿𑌰𑌾𑌶𑌂 𑌗𑌤𑌸𑌨𑍍𑌦𑍇𑌹𑌂 𑌚𑌿𑌤𑍍𑌤𑌂 𑌮𑍁𑌕𑍍𑌤𑌸𑍍𑌯 𑌰𑌾𑌜𑌤𑍇 ॥ 18-30॥
𑌨𑌿𑌰𑍍𑌧𑍍𑌯𑌾𑌤𑍁𑌂 𑌚𑍇𑌷𑍍𑌟𑌿𑌤𑍁𑌂 𑌵𑌾𑌪𑌿 𑌯𑌚𑍍𑌚𑌿𑌤𑍍𑌤𑌂 𑌨 𑌪𑍍𑌰𑌵𑌰𑍍𑌤𑌤𑍇 ।
𑌨𑌿𑌰𑍍𑌨𑌿𑌮𑌿𑌤𑍍𑌤𑌮𑌿𑌦𑌂 𑌕𑌿𑌨𑍍𑌤𑍁 𑌨𑌿𑌰𑍍𑌧𑍍𑌯𑌾𑌯𑍇𑌤𑌿 𑌵𑌿𑌚𑍇𑌷𑍍𑌟𑌤𑍇 ॥ 18-31॥
𑌤𑌤𑍍𑌤𑍍𑌵𑌂 𑌯𑌥𑌾𑌰𑍍𑌥𑌮𑌾𑌕𑌰𑍍𑌣𑍍𑌯 𑌮𑌨𑍍𑌦𑌃 𑌪𑍍𑌰𑌾𑌪𑍍𑌨𑍋𑌤𑌿 𑌮𑍂𑌢𑌤𑌾𑌮𑍍 ।
𑌅𑌥𑌵𑌾 𑌯𑌾𑌤𑌿 𑌸𑌙𑍍𑌕𑍋𑌚𑌮𑌮𑍂𑌢𑌃 𑌕𑍋𑌽𑌪𑌿 𑌮𑍂𑌢𑌵𑌤𑍍 ॥ 18-32॥
𑌏𑌕𑌾𑌗𑍍𑌰𑌤𑌾 𑌨𑌿𑌰𑍋𑌧𑍋 𑌵𑌾 𑌮𑍂𑌢𑍈𑌰𑌭𑍍𑌯𑌸𑍍𑌯𑌤𑍇 𑌭𑍃𑌶𑌮𑍍 ।
𑌧𑍀𑌰𑌾𑌃 𑌕𑍃𑌤𑍍𑌯𑌂 𑌨 𑌪𑌶𑍍𑌯𑌨𑍍𑌤𑌿 𑌸𑍁𑌪𑍍𑌤𑌵𑌤𑍍𑌸𑍍𑌵𑌪𑌦𑍇 𑌸𑍍𑌥𑌿𑌤𑌾𑌃 ॥ 18-33॥
𑌅𑌪𑍍𑌰𑌯𑌤𑍍𑌨𑌾𑌤𑍍 𑌪𑍍𑌰𑌯𑌤𑍍𑌨𑌾𑌦𑍍 𑌵𑌾 𑌮𑍂𑌢𑍋 𑌨𑌾𑌪𑍍𑌨𑍋𑌤𑌿 𑌨𑌿𑌰𑍍𑌵𑍃𑌤𑌿𑌮𑍍 ।
𑌤𑌤𑍍𑌤𑍍𑌵𑌨𑌿𑌶𑍍𑌚𑌯𑌮𑌾𑌤𑍍𑌰𑍇𑌣 𑌪𑍍𑌰𑌾𑌜𑍍𑌞𑍋 𑌭𑌵𑌤𑌿 𑌨𑌿𑌰𑍍𑌵𑍃𑌤𑌃 ॥ 18-34॥
𑌶𑍁𑌦𑍍𑌧𑌂 𑌬𑍁𑌦𑍍𑌧𑌂 𑌪𑍍𑌰𑌿𑌯𑌂 𑌪𑍂𑌰𑍍𑌣𑌂 𑌨𑌿𑌷𑍍𑌪𑍍𑌰𑌪𑌞𑍍𑌚𑌂 𑌨𑌿𑌰𑌾𑌮𑌯𑌮𑍍 ।
𑌆𑌤𑍍𑌮𑌾𑌨𑌂 𑌤𑌂 𑌨 𑌜𑌾𑌨𑌨𑍍𑌤𑌿 𑌤𑌤𑍍𑌰𑌾𑌭𑍍𑌯𑌾𑌸𑌪𑌰𑌾 𑌜𑌨𑌾𑌃 ॥ 18-35॥
𑌨𑌾𑌪𑍍𑌨𑍋𑌤𑌿 𑌕𑌰𑍍𑌮𑌣𑌾 𑌮𑍋𑌕𑍍𑌷𑌂 𑌵𑌿𑌮𑍂𑌢𑍋𑌽𑌭𑍍𑌯𑌾𑌸𑌰𑍂𑌪𑌿𑌣𑌾 ।
𑌧𑌨𑍍𑌯𑍋 𑌵𑌿𑌜𑍍𑌞𑌾𑌨𑌮𑌾𑌤𑍍𑌰𑍇𑌣 𑌮𑍁𑌕𑍍𑌤𑌸𑍍𑌤𑌿𑌷𑍍𑌠𑌤𑍍𑌯𑌵𑌿𑌕𑍍𑌰𑌿𑌯𑌃 ॥ 18-36॥
𑌮𑍂𑌢𑍋 𑌨𑌾𑌪𑍍𑌨𑍋𑌤𑌿 𑌤𑌦𑍍 𑌬𑍍𑌰𑌹𑍍𑌮 𑌯𑌤𑍋 𑌭𑌵𑌿𑌤𑍁𑌮𑌿𑌚𑍍𑌛𑌤𑌿 ।
𑌅𑌨𑌿𑌚𑍍𑌛𑌨𑍍𑌨𑌪𑌿 𑌧𑍀𑌰𑍋 𑌹𑌿 𑌪𑌰𑌬𑍍𑌰𑌹𑍍𑌮𑌸𑍍𑌵𑌰𑍂𑌪𑌭𑌾𑌕𑍍 ॥ 18-37॥
𑌨𑌿𑌰𑌾𑌧𑌾𑌰𑌾 𑌗𑍍𑌰𑌹𑌵𑍍𑌯𑌗𑍍𑌰𑌾 𑌮𑍂𑌢𑌾𑌃 𑌸𑌂𑌸𑌾𑌰𑌪𑍋𑌷𑌕𑌾𑌃 ।
𑌏𑌤𑌸𑍍𑌯𑌾𑌨𑌰𑍍𑌥𑌮𑍂𑌲𑌸𑍍𑌯 𑌮𑍂𑌲𑌚𑍍𑌛𑍇𑌦𑌃 𑌕𑍃𑌤𑍋 𑌬𑍁𑌧𑍈𑌃 ॥ 18-38॥
𑌨 𑌶𑌾𑌨𑍍𑌤𑌿𑌂 𑌲𑌭𑌤𑍇 𑌮𑍂𑌢𑍋 𑌯𑌤𑌃 𑌶𑌮𑌿𑌤𑍁𑌮𑌿𑌚𑍍𑌛𑌤𑌿 ।
𑌧𑍀𑌰𑌸𑍍𑌤𑌤𑍍𑌤𑍍𑌵𑌂 𑌵𑌿𑌨𑌿𑌶𑍍𑌚𑌿𑌤𑍍𑌯 𑌸𑌰𑍍𑌵𑌦𑌾 𑌶𑌾𑌨𑍍𑌤𑌮𑌾𑌨𑌸𑌃 ॥ 18-39॥
𑌕𑍍𑌵𑌾𑌤𑍍𑌮𑌨𑍋 𑌦𑌰𑍍𑌶𑌨𑌂 𑌤𑌸𑍍𑌯 𑌯𑌦𑍍 𑌦𑍃𑌷𑍍𑌟𑌮𑌵𑌲𑌮𑍍𑌬𑌤𑍇 ।
𑌧𑍀𑌰𑌾𑌸𑍍𑌤𑌂 𑌤𑌂 𑌨 𑌪𑌶𑍍𑌯𑌨𑍍𑌤𑌿 𑌪𑌶𑍍𑌯𑌨𑍍𑌤𑍍𑌯𑌾𑌤𑍍𑌮𑌾𑌨𑌮𑌵𑍍𑌯𑌯𑌮𑍍 ॥ 18-40॥
𑌕𑍍𑌵 𑌨𑌿𑌰𑍋𑌧𑍋 𑌵𑌿𑌮𑍂𑌢𑌸𑍍𑌯 𑌯𑍋 𑌨𑌿𑌰𑍍𑌬𑌨𑍍𑌧𑌂 𑌕𑌰𑍋𑌤𑌿 𑌵𑍈 ।
𑌸𑍍𑌵𑌾𑌰𑌾𑌮𑌸𑍍𑌯𑍈𑌵 𑌧𑍀𑌰𑌸𑍍𑌯 𑌸𑌰𑍍𑌵𑌦𑌾𑌸𑌾𑌵𑌕𑍃𑌤𑍍𑌰𑌿𑌮𑌃 ॥ 18-41॥
𑌭𑌾𑌵𑌸𑍍𑌯 𑌭𑌾𑌵𑌕𑌃 𑌕𑌶𑍍𑌚𑌿𑌨𑍍 𑌨 𑌕𑌿𑌞𑍍𑌚𑌿𑌦𑍍 𑌭𑌾𑌵𑌕𑍋𑌪𑌰𑌃 ।
𑌉𑌭𑌯𑌾𑌭𑌾𑌵𑌕𑌃 𑌕𑌶𑍍𑌚𑌿𑌦𑍍 𑌏𑌵𑌮𑍇𑌵 𑌨𑌿𑌰𑌾𑌕𑍁𑌲𑌃 ॥ 18-42॥
𑌶𑍁𑌦𑍍𑌧𑌮𑌦𑍍𑌵𑌯𑌮𑌾𑌤𑍍𑌮𑌾𑌨𑌂 𑌭𑌾𑌵𑌯𑌨𑍍𑌤𑌿 𑌕𑍁𑌬𑍁𑌦𑍍𑌧𑌯𑌃 ।
𑌨 𑌤𑍁 𑌜𑌾𑌨𑌨𑍍𑌤𑌿 𑌸𑌮𑍍𑌮𑍋𑌹𑌾𑌦𑍍𑌯𑌾𑌵𑌜𑍍𑌜𑍀𑌵𑌮𑌨𑌿𑌰𑍍𑌵𑍃𑌤𑌾𑌃 ॥ 18-43॥
𑌮𑍁𑌮𑍁𑌕𑍍𑌷𑍋𑌰𑍍𑌬𑍁𑌦𑍍𑌧𑌿𑌰𑌾𑌲𑌮𑍍𑌬𑌮𑌨𑍍𑌤𑌰𑍇𑌣 𑌨 𑌵𑌿𑌦𑍍𑌯𑌤𑍇 ।
𑌨𑌿𑌰𑌾𑌲𑌮𑍍𑌬𑍈𑌵 𑌨𑌿𑌷𑍍𑌕𑌾𑌮𑌾 𑌬𑍁𑌦𑍍𑌧𑌿𑌰𑍍𑌮𑍁𑌕𑍍𑌤𑌸𑍍𑌯 𑌸𑌰𑍍𑌵𑌦𑌾 ॥ 18-44॥
𑌵𑌿𑌷𑌯𑌦𑍍𑌵𑍀𑌪𑌿𑌨𑍋 𑌵𑍀𑌕𑍍𑌷𑍍𑌯 𑌚𑌕𑌿𑌤𑌾𑌃 𑌶𑌰𑌣𑌾𑌰𑍍𑌥𑌿𑌨𑌃 ।
𑌵𑌿𑌶𑌨𑍍𑌤𑌿 𑌝𑌟𑌿𑌤𑌿 𑌕𑍍𑌰𑍋𑌡𑌂 𑌨𑌿𑌰𑍋𑌧𑍈𑌕𑌾𑌗𑍍𑌰𑌸𑌿𑌦𑍍𑌧𑌯𑍇 ॥ 18-45॥
𑌨𑌿𑌰𑍍𑌵𑌾𑌸𑌨𑌂 𑌹𑌰𑌿𑌂 𑌦𑍃𑌷𑍍𑌟𑍍𑌵𑌾 𑌤𑍂𑌷𑍍𑌣𑍀𑌂 𑌵𑌿𑌷𑌯𑌦𑌨𑍍𑌤𑌿𑌨𑌃 ।
𑌪𑌲𑌾𑌯𑌨𑍍𑌤𑍇 𑌨 𑌶𑌕𑍍𑌤𑌾𑌸𑍍𑌤𑍇 𑌸𑍇𑌵𑌨𑍍𑌤𑍇 𑌕𑍃𑌤𑌚𑌾𑌟𑌵𑌃 ॥ 18-46॥
𑌨 𑌮𑍁𑌕𑍍𑌤𑌿𑌕𑌾𑌰𑌿𑌕𑌾𑌂 𑌧𑌤𑍍𑌤𑍇 𑌨𑌿𑌃𑌶𑌙𑍍𑌕𑍋 𑌯𑍁𑌕𑍍𑌤𑌮𑌾𑌨𑌸𑌃 ।
𑌪𑌶𑍍𑌯𑌨𑍍 𑌶𑍃𑌣𑍍𑌵𑌨𑍍 𑌸𑍍𑌪𑍃𑌶𑌨𑍍 𑌜𑌿𑌘𑍍𑌰𑌨𑍍𑌨𑌶𑍍𑌨𑌨𑍍𑌨𑌾𑌸𑍍𑌤𑍇 𑌯𑌥𑌾𑌸𑍁𑌖𑌮𑍍 ॥ 18-47॥
𑌵𑌸𑍍𑌤𑍁𑌶𑍍𑌰𑌵𑌣𑌮𑌾𑌤𑍍𑌰𑍇𑌣 𑌶𑍁𑌦𑍍𑌧𑌬𑍁𑌦𑍍𑌧𑌿𑌰𑍍𑌨𑌿𑌰𑌾𑌕𑍁𑌲𑌃 ।
𑌨𑍈𑌵𑌾𑌚𑌾𑌰𑌮𑌨𑌾𑌚𑌾𑌰𑌮𑍗𑌦𑌾𑌸𑍍𑌯𑌂 𑌵𑌾 𑌪𑍍𑌰𑌪𑌶𑍍𑌯𑌤𑌿 ॥ 18-48॥
𑌯𑌦𑌾 𑌯𑌤𑍍𑌕𑌰𑍍𑌤𑍁𑌮𑌾𑌯𑌾𑌤𑌿 𑌤𑌦𑌾 𑌤𑌤𑍍𑌕𑍁𑌰𑍁𑌤𑍇 𑌋𑌜𑍁𑌃 ।
𑌶𑍁𑌭𑌂 𑌵𑌾𑌪𑍍𑌯𑌶𑍁𑌭𑌂 𑌵𑌾𑌪𑌿 𑌤𑌸𑍍𑌯 𑌚𑍇𑌷𑍍𑌟𑌾 𑌹𑌿 𑌬𑌾𑌲𑌵𑌤𑍍 ॥ 18-49॥
𑌸𑍍𑌵𑌾𑌤𑌨𑍍𑌤𑍍𑌰𑍍𑌯𑌾𑌤𑍍𑌸𑍁𑌖𑌮𑌾𑌪𑍍𑌨𑍋𑌤𑌿 𑌸𑍍𑌵𑌾𑌤𑌨𑍍𑌤𑍍𑌰𑍍𑌯𑌾𑌲𑍍𑌲𑌭𑌤𑍇 𑌪𑌰𑌮𑍍 ।
𑌸𑍍𑌵𑌾𑌤𑌨𑍍𑌤𑍍𑌰𑍍𑌯𑌾𑌨𑍍𑌨𑌿𑌰𑍍𑌵𑍃𑌤𑌿𑌂 𑌗𑌚𑍍𑌛𑍇𑌤𑍍𑌸𑍍𑌵𑌾𑌤𑌨𑍍𑌤𑍍𑌰𑍍𑌯𑌾𑌤𑍍 𑌪𑌰𑌮𑌂 𑌪𑌦𑌮𑍍 ॥ 18-50॥
𑌅𑌕𑌰𑍍𑌤𑍃𑌤𑍍𑌵𑌮𑌭𑍋𑌕𑍍𑌤𑍃𑌤𑍍𑌵𑌂 𑌸𑍍𑌵𑌾𑌤𑍍𑌮𑌨𑍋 𑌮𑌨𑍍𑌯𑌤𑍇 𑌯𑌦𑌾 ।
𑌤𑌦𑌾 𑌕𑍍𑌷𑍀𑌣𑌾 𑌭𑌵𑌨𑍍𑌤𑍍𑌯𑍇𑌵 𑌸𑌮𑌸𑍍𑌤𑌾𑌶𑍍𑌚𑌿𑌤𑍍𑌤𑌵𑍃𑌤𑍍𑌤𑌯𑌃 ॥ 18-51॥
𑌉𑌚𑍍𑌛𑍃𑌙𑍍𑌖𑌲𑌾𑌪𑍍𑌯𑌕𑍃𑌤𑌿𑌕𑌾 𑌸𑍍𑌥𑌿𑌤𑌿𑌰𑍍𑌧𑍀𑌰𑌸𑍍𑌯 𑌰𑌾𑌜𑌤𑍇 ।
𑌨 𑌤𑍁 𑌸𑌸𑍍𑌪𑍃𑌹𑌚𑌿𑌤𑍍𑌤𑌸𑍍𑌯 𑌶𑌾𑌨𑍍𑌤𑌿𑌰𑍍𑌮𑍂𑌢𑌸𑍍𑌯 𑌕𑍃𑌤𑍍𑌰𑌿𑌮𑌾 ॥ 18-52॥
𑌵𑌿𑌲𑌸𑌨𑍍𑌤𑌿 𑌮𑌹𑌾𑌭𑍋𑌗𑍈𑌰𑍍𑌵𑌿𑌶𑌨𑍍𑌤𑌿 𑌗𑌿𑌰𑌿𑌗𑌹𑍍𑌵𑌰𑌾𑌨𑍍 ।
𑌨𑌿𑌰𑌸𑍍𑌤𑌕𑌲𑍍𑌪𑌨𑌾 𑌧𑍀𑌰𑌾 𑌅𑌬𑌦𑍍𑌧𑌾 𑌮𑍁𑌕𑍍𑌤𑌬𑍁𑌦𑍍𑌧𑌯𑌃 ॥ 18-53॥
𑌶𑍍𑌰𑍋𑌤𑍍𑌰𑌿𑌯𑌂 𑌦𑍇𑌵𑌤𑌾𑌂 𑌤𑍀𑌰𑍍𑌥𑌮𑌙𑍍𑌗𑌨𑌾𑌂 𑌭𑍂𑌪𑌤𑌿𑌂 𑌪𑍍𑌰𑌿𑌯𑌮𑍍 ।
𑌦𑍃𑌷𑍍𑌟𑍍𑌵𑌾 𑌸𑌮𑍍𑌪𑍂𑌜𑍍𑌯 𑌧𑍀𑌰𑌸𑍍𑌯 𑌨 𑌕𑌾𑌪𑌿 𑌹𑍃𑌦𑌿 𑌵𑌾𑌸𑌨𑌾 ॥ 18-54॥
𑌭𑍃𑌤𑍍𑌯𑍈𑌃 𑌪𑍁𑌤𑍍𑌰𑍈𑌃 𑌕𑌲𑌤𑍍𑌰𑍈𑌶𑍍𑌚 𑌦𑍗𑌹𑌿𑌤𑍍𑌰𑍈𑌶𑍍𑌚𑌾𑌪𑌿 𑌗𑍋𑌤𑍍𑌰𑌜𑍈𑌃 ।
𑌵𑌿𑌹𑌸𑍍𑌯 𑌧𑌿𑌕𑍍𑌕𑍃𑌤𑍋 𑌯𑍋𑌗𑍀 𑌨 𑌯𑌾𑌤𑌿 𑌵𑌿𑌕𑍃𑌤𑌿𑌂 𑌮𑌨𑌾𑌕𑍍 ॥ 18-55॥
𑌸𑌨𑍍𑌤𑍁𑌷𑍍𑌟𑍋𑌽𑌪𑌿 𑌨 𑌸𑌨𑍍𑌤𑍁𑌷𑍍𑌟𑌃 𑌖𑌿𑌨𑍍𑌨𑍋𑌽𑌪𑌿 𑌨 𑌚 𑌖𑌿𑌦𑍍𑌯𑌤𑍇 ।
𑌤𑌸𑍍𑌯𑌾𑌶𑍍𑌚𑌰𑍍𑌯𑌦𑌶𑌾𑌂 𑌤𑌾𑌂 𑌤𑌾𑌂 𑌤𑌾𑌦𑍃𑌶𑌾 𑌏𑌵 𑌜𑌾𑌨𑌤𑍇 ॥ 18-56॥
𑌕𑌰𑍍𑌤𑌵𑍍𑌯𑌤𑍈𑌵 𑌸𑌂𑌸𑌾𑌰𑍋 𑌨 𑌤𑌾𑌂 𑌪𑌶𑍍𑌯𑌨𑍍𑌤𑌿 𑌸𑍂𑌰𑌯𑌃 ।
𑌶𑍂𑌨𑍍𑌯𑌾𑌕𑌾𑌰𑌾 𑌨𑌿𑌰𑌾𑌕𑌾𑌰𑌾 𑌨𑌿𑌰𑍍𑌵𑌿𑌕𑌾𑌰𑌾 𑌨𑌿𑌰𑌾𑌮𑌯𑌾𑌃 ॥ 18-57॥
𑌅𑌕𑍁𑌰𑍍𑌵𑌨𑍍𑌨𑌪𑌿 𑌸𑌙𑍍𑌕𑍍𑌷𑍋𑌭𑌾𑌦𑍍 𑌵𑍍𑌯𑌗𑍍𑌰𑌃 𑌸𑌰𑍍𑌵𑌤𑍍𑌰 𑌮𑍂𑌢𑌧𑍀𑌃 ।
𑌕𑍁𑌰𑍍𑌵𑌨𑍍𑌨𑌪𑌿 𑌤𑍁 𑌕𑍃𑌤𑍍𑌯𑌾𑌨𑌿 𑌕𑍁𑌶𑌲𑍋 𑌹𑌿 𑌨𑌿𑌰𑌾𑌕𑍁𑌲𑌃 ॥ 18-58॥
𑌸𑍁𑌖𑌮𑌾𑌸𑍍𑌤𑍇 𑌸𑍁𑌖𑌂 𑌶𑍇𑌤𑍇 𑌸𑍁𑌖𑌮𑌾𑌯𑌾𑌤𑌿 𑌯𑌾𑌤𑌿 𑌚 ।
𑌸𑍁𑌖𑌂 𑌵𑌕𑍍𑌤𑌿 𑌸𑍁𑌖𑌂 𑌭𑍁𑌙𑍍𑌕𑍍𑌤𑍇 𑌵𑍍𑌯𑌵𑌹𑌾𑌰𑍇𑌽𑌪𑌿 𑌶𑌾𑌨𑍍𑌤𑌧𑍀𑌃 ॥ 18-59॥
𑌸𑍍𑌵𑌭𑌾𑌵𑌾𑌦𑍍𑌯𑌸𑍍𑌯 𑌨𑍈𑌵𑌾𑌰𑍍𑌤𑌿𑌰𑍍𑌲𑍋𑌕𑌵𑌦𑍍 𑌵𑍍𑌯𑌵𑌹𑌾𑌰𑌿𑌣𑌃 ।
𑌮𑌹𑌾𑌹𑍍𑌰𑌦 𑌇𑌵𑌾𑌕𑍍𑌷𑍋𑌭𑍍𑌯𑍋 𑌗𑌤𑌕𑍍𑌲𑍇𑌶𑌃 𑌸𑍁𑌶𑍋𑌭𑌤𑍇 ॥ 18-60॥
𑌨𑌿𑌵𑍃𑌤𑍍𑌤𑌿𑌰𑌪𑌿 𑌮𑍂𑌢𑌸𑍍𑌯 𑌪𑍍𑌰𑌵𑍃𑌤𑍍𑌤𑌿 𑌰𑍁𑌪𑌜𑌾𑌯𑌤𑍇 ।
𑌪𑍍𑌰𑌵𑍃𑌤𑍍𑌤𑌿𑌰𑌪𑌿 𑌧𑍀𑌰𑌸𑍍𑌯 𑌨𑌿𑌵𑍃𑌤𑍍𑌤𑌿𑌫𑌲𑌭𑌾𑌗𑌿𑌨𑍀 ॥ 18-61॥
𑌪𑌰𑌿𑌗𑍍𑌰𑌹𑍇𑌷𑍁 𑌵𑍈𑌰𑌾𑌗𑍍𑌯𑌂 𑌪𑍍𑌰𑌾𑌯𑍋 𑌮𑍂𑌢𑌸𑍍𑌯 𑌦𑍃𑌶𑍍𑌯𑌤𑍇 ।
𑌦𑍇𑌹𑍇 𑌵𑌿𑌗𑌲𑌿𑌤𑌾𑌶𑌸𑍍𑌯 𑌕𑍍𑌵 𑌰𑌾𑌗𑌃 𑌕𑍍𑌵 𑌵𑌿𑌰𑌾𑌗𑌤𑌾 ॥ 18-62॥
𑌭𑌾𑌵𑌨𑌾𑌭𑌾𑌵𑌨𑌾𑌸𑌕𑍍𑌤𑌾 𑌦𑍃𑌷𑍍𑌟𑌿𑌰𑍍𑌮𑍂𑌢𑌸𑍍𑌯 𑌸𑌰𑍍𑌵𑌦𑌾 ।
𑌭𑌾𑌵𑍍𑌯𑌭𑌾𑌵𑌨𑌯𑌾 𑌸𑌾 𑌤𑍁 𑌸𑍍𑌵𑌸𑍍𑌥𑌸𑍍𑌯𑌾𑌦𑍃𑌷𑍍𑌟𑌿𑌰𑍂𑌪𑌿𑌣𑍀 ॥ 18-63॥
𑌸𑌰𑍍𑌵𑌾𑌰𑌮𑍍𑌭𑍇𑌷𑍁 𑌨𑌿𑌷𑍍𑌕𑌾𑌮𑍋 𑌯𑌶𑍍𑌚𑌰𑍇𑌦𑍍 𑌬𑌾𑌲𑌵𑌨𑍍 𑌮𑍁𑌨𑌿𑌃 ।
𑌨 𑌲𑍇𑌪𑌸𑍍𑌤𑌸𑍍𑌯 𑌶𑍁𑌦𑍍𑌧𑌸𑍍𑌯 𑌕𑍍𑌰𑌿𑌯𑌮𑌾𑌣𑍇𑌽𑌪𑌿 𑌕𑌰𑍍𑌮𑌣𑌿 ॥ 18-64॥
𑌸 𑌏𑌵 𑌧𑌨𑍍𑌯 𑌆𑌤𑍍𑌮𑌜𑍍𑌞𑌃 𑌸𑌰𑍍𑌵𑌭𑌾𑌵𑍇𑌷𑍁 𑌯𑌃 𑌸𑌮𑌃 ।
𑌪𑌶𑍍𑌯𑌨𑍍 𑌶𑍃𑌣𑍍𑌵𑌨𑍍 𑌸𑍍𑌪𑍃𑌶𑌨𑍍 𑌜𑌿𑌘𑍍𑌰𑌨𑍍𑌨𑍍 𑌅𑌶𑍍𑌨𑌨𑍍𑌨𑌿𑌸𑍍𑌤𑌰𑍍𑌷𑌮𑌾𑌨𑌸𑌃 ॥ 18-65॥
𑌕𑍍𑌵 𑌸𑌂𑌸𑌾𑌰𑌃 𑌕𑍍𑌵 𑌚𑌾𑌭𑌾𑌸𑌃 𑌕𑍍𑌵 𑌸𑌾𑌧𑍍𑌯𑌂 𑌕𑍍𑌵 𑌚 𑌸𑌾𑌧𑌨𑌮𑍍 ।
𑌆𑌕𑌾𑌶𑌸𑍍𑌯𑍇𑌵 𑌧𑍀𑌰𑌸𑍍𑌯 𑌨𑌿𑌰𑍍𑌵𑌿𑌕𑌲𑍍𑌪𑌸𑍍𑌯 𑌸𑌰𑍍𑌵𑌦𑌾 ॥ 18-66॥
𑌸 𑌜𑌯𑌤𑍍𑌯𑌰𑍍𑌥𑌸𑌨𑍍𑌨𑍍𑌯𑌾𑌸𑍀 𑌪𑍂𑌰𑍍𑌣𑌸𑍍𑌵𑌰𑌸𑌵𑌿𑌗𑍍𑌰𑌹𑌃 ।
𑌅𑌕𑍃𑌤𑍍𑌰𑌿𑌮𑍋𑌽𑌨𑌵𑌚𑍍𑌛𑌿𑌨𑍍𑌨𑍇 𑌸𑌮𑌾𑌧𑌿𑌰𑍍𑌯𑌸𑍍𑌯 𑌵𑌰𑍍𑌤𑌤𑍇 ॥ 18-67॥
𑌬𑌹𑍁𑌨𑌾𑌤𑍍𑌰 𑌕𑌿𑌮𑍁𑌕𑍍𑌤𑍇𑌨 𑌜𑍍𑌞𑌾𑌤𑌤𑌤𑍍𑌤𑍍𑌵𑍋 𑌮𑌹𑌾𑌶𑌯𑌃 ।
𑌭𑍋𑌗𑌮𑍋𑌕𑍍𑌷𑌨𑌿𑌰𑌾𑌕𑌾𑌙𑍍𑌕𑍍𑌷𑍀 𑌸𑌦𑌾 𑌸𑌰𑍍𑌵𑌤𑍍𑌰 𑌨𑍀𑌰𑌸𑌃 ॥ 18-68॥
𑌮𑌹𑌦𑌾𑌦𑌿 𑌜𑌗𑌦𑍍𑌦𑍍𑌵𑍈𑌤𑌂 𑌨𑌾𑌮𑌮𑌾𑌤𑍍𑌰𑌵𑌿𑌜𑍃𑌮𑍍𑌭𑌿𑌤𑌮𑍍 ।
𑌵𑌿𑌹𑌾𑌯 𑌶𑍁𑌦𑍍𑌧𑌬𑍋𑌧𑌸𑍍𑌯 𑌕𑌿𑌂 𑌕𑍃𑌤𑍍𑌯𑌮𑌵𑌶𑌿𑌷𑍍𑌯𑌤𑍇 ॥ 18-69॥
𑌭𑍍𑌰𑌮𑌭𑍂𑌤𑌮𑌿𑌦𑌂 𑌸𑌰𑍍𑌵𑌂 𑌕𑌿𑌞𑍍𑌚𑌿𑌨𑍍𑌨𑌾𑌸𑍍𑌤𑍀𑌤𑌿 𑌨𑌿𑌶𑍍𑌚𑌯𑍀 ।
𑌅𑌲𑌕𑍍𑌷𑍍𑌯𑌸𑍍𑌫𑍁𑌰𑌣𑌃 𑌶𑍁𑌦𑍍𑌧𑌃 𑌸𑍍𑌵𑌭𑌾𑌵𑍇𑌨𑍈𑌵 𑌶𑌾𑌮𑍍𑌯𑌤𑌿 ॥ 18-70॥
𑌶𑍁𑌦𑍍𑌧𑌸𑍍𑌫𑍁𑌰𑌣𑌰𑍂𑌪𑌸𑍍𑌯 𑌦𑍃𑌶𑍍𑌯𑌭𑌾𑌵𑌮𑌪𑌶𑍍𑌯𑌤𑌃 ।
𑌕𑍍𑌵 𑌵𑌿𑌧𑌿𑌃 𑌕𑍍𑌵 𑌚 𑌵𑍈𑌰𑌾𑌗𑍍𑌯𑌂 𑌕𑍍𑌵 𑌤𑍍𑌯𑌾𑌗𑌃 𑌕𑍍𑌵 𑌶𑌮𑍋𑌽𑌪𑌿 𑌵𑌾 ॥ 18-71॥
𑌸𑍍𑌫𑍁𑌰𑌤𑍋𑌽𑌨𑌨𑍍𑌤𑌰𑍂𑌪𑍇𑌣 𑌪𑍍𑌰𑌕𑍃𑌤𑌿𑌂 𑌚 𑌨 𑌪𑌶𑍍𑌯𑌤𑌃 ।
𑌕𑍍𑌵 𑌬𑌨𑍍𑌧𑌃 𑌕𑍍𑌵 𑌚 𑌵𑌾 𑌮𑍋𑌕𑍍𑌷𑌃 𑌕𑍍𑌵 𑌹𑌰𑍍𑌷𑌃 𑌕𑍍𑌵 𑌵𑌿𑌷𑌾𑌦𑌿𑌤𑌾 ॥ 18-72॥
𑌬𑍁𑌦𑍍𑌧𑌿𑌪𑌰𑍍𑌯𑌨𑍍𑌤𑌸𑌂𑌸𑌾𑌰𑍇 𑌮𑌾𑌯𑌾𑌮𑌾𑌤𑍍𑌰𑌂 𑌵𑌿𑌵𑌰𑍍𑌤𑌤𑍇 ।
𑌨𑌿𑌰𑍍𑌮𑌮𑍋 𑌨𑌿𑌰𑌹𑌙𑍍𑌕𑌾𑌰𑍋 𑌨𑌿𑌷𑍍𑌕𑌾𑌮𑌃 𑌶𑍋𑌭𑌤𑍇 𑌬𑍁𑌧𑌃 ॥ 18-73॥
𑌅𑌕𑍍𑌷𑌯𑌂 𑌗𑌤𑌸𑌨𑍍𑌤𑌾𑌪𑌮𑌾𑌤𑍍𑌮𑌾𑌨𑌂 𑌪𑌶𑍍𑌯𑌤𑍋 𑌮𑍁𑌨𑍇𑌃 ।
𑌕𑍍𑌵 𑌵𑌿𑌦𑍍𑌯𑌾 𑌚 𑌕𑍍𑌵 𑌵𑌾 𑌵𑌿𑌶𑍍𑌵𑌂 𑌕𑍍𑌵 𑌦𑍇𑌹𑍋𑌽𑌹𑌂 𑌮𑌮𑍇𑌤𑌿 𑌵𑌾 ॥ 18-74॥
𑌨𑌿𑌰𑍋𑌧𑌾𑌦𑍀𑌨𑌿 𑌕𑌰𑍍𑌮𑌾𑌣𑌿 𑌜𑌹𑌾𑌤𑌿 𑌜𑌡𑌧𑍀𑌰𑍍𑌯𑌦𑌿 ।
𑌮𑌨𑍋𑌰𑌥𑌾𑌨𑍍 𑌪𑍍𑌰𑌲𑌾𑌪𑌾𑌂𑌶𑍍𑌚 𑌕𑌰𑍍𑌤𑍁𑌮𑌾𑌪𑍍𑌨𑍋𑌤𑍍𑌯𑌤𑌤𑍍𑌕𑍍𑌷𑌣𑌾𑌤𑍍 ॥ 18-75॥
𑌮𑌨𑍍𑌦𑌃 𑌶𑍍𑌰𑍁𑌤𑍍𑌵𑌾𑌪𑌿 𑌤𑌦𑍍𑌵𑌸𑍍𑌤𑍁 𑌨 𑌜𑌹𑌾𑌤𑌿 𑌵𑌿𑌮𑍂𑌢𑌤𑌾𑌮𑍍 ।
𑌨𑌿𑌰𑍍𑌵𑌿𑌕𑌲𑍍𑌪𑍋 𑌬𑌹𑌿𑌰𑍍𑌯𑌤𑍍𑌨𑌾𑌦𑌨𑍍𑌤𑌰𑍍𑌵𑌿𑌷𑌯𑌲𑌾𑌲𑌸𑌃 ॥ 18-76॥
𑌜𑍍𑌞𑌾𑌨𑌾𑌦𑍍 𑌗𑌲𑌿𑌤𑌕𑌰𑍍𑌮𑌾 𑌯𑍋 𑌲𑍋𑌕𑌦𑍃𑌷𑍍𑌟𑍍𑌯𑌾𑌪𑌿 𑌕𑌰𑍍𑌮𑌕𑍃𑌤𑍍 ।
𑌨𑌾𑌪𑍍𑌨𑍋𑌤𑍍𑌯𑌵𑌸𑌰𑌂 𑌕𑌰𑍍𑌤𑍁𑌂 𑌵𑌕𑍍𑌤𑍁𑌮𑍇𑌵 𑌨 𑌕𑌿𑌞𑍍𑌚𑌨 ॥ 18-77॥
𑌕𑍍𑌵 𑌤𑌮𑌃 𑌕𑍍𑌵 𑌪𑍍𑌰𑌕𑌾𑌶𑍋 𑌵𑌾 𑌹𑌾𑌨𑌂 𑌕𑍍𑌵 𑌚 𑌨 𑌕𑌿𑌞𑍍𑌚𑌨 ।
𑌨𑌿𑌰𑍍𑌵𑌿𑌕𑌾𑌰𑌸𑍍𑌯 𑌧𑍀𑌰𑌸𑍍𑌯 𑌨𑌿𑌰𑌾𑌤𑌙𑍍𑌕𑌸𑍍𑌯 𑌸𑌰𑍍𑌵𑌦𑌾 ॥ 18-78॥
𑌕𑍍𑌵 𑌧𑍈𑌰𑍍𑌯𑌂 𑌕𑍍𑌵 𑌵𑌿𑌵𑍇𑌕𑌿𑌤𑍍𑌵𑌂 𑌕𑍍𑌵 𑌨𑌿𑌰𑌾𑌤𑌙𑍍𑌕𑌤𑌾𑌪𑌿 𑌵𑌾 ।
𑌅𑌨𑌿𑌰𑍍𑌵𑌾𑌚𑍍𑌯𑌸𑍍𑌵𑌭𑌾𑌵𑌸𑍍𑌯 𑌨𑌿𑌃𑌸𑍍𑌵𑌭𑌾𑌵𑌸𑍍𑌯 𑌯𑍋𑌗𑌿𑌨𑌃 ॥ 18-79॥
𑌨 𑌸𑍍𑌵𑌰𑍍𑌗𑍋 𑌨𑍈𑌵 𑌨𑌰𑌕𑍋 𑌜𑍀𑌵𑌨𑍍𑌮𑍁𑌕𑍍𑌤𑌿𑌰𑍍𑌨 𑌚𑍈𑌵 𑌹𑌿 ।
𑌬𑌹𑍁𑌨𑌾𑌤𑍍𑌰 𑌕𑌿𑌮𑍁𑌕𑍍𑌤𑍇𑌨 𑌯𑍋𑌗𑌦𑍃𑌷𑍍𑌟𑍍𑌯𑌾 𑌨 𑌕𑌿𑌞𑍍𑌚𑌨 ॥ 18-80॥
𑌨𑍈𑌵 𑌪𑍍𑌰𑌾𑌰𑍍𑌥𑌯𑌤𑍇 𑌲𑌾𑌭𑌂 𑌨𑌾𑌲𑌾𑌭𑍇𑌨𑌾𑌨𑍁𑌶𑍋𑌚𑌤𑌿 ।
𑌧𑍀𑌰𑌸𑍍𑌯 𑌶𑍀𑌤𑌲𑌂 𑌚𑌿𑌤𑍍𑌤𑌮𑌮𑍃𑌤𑍇𑌨𑍈𑌵 𑌪𑍂𑌰𑌿𑌤𑌮𑍍 ॥ 18-81॥
𑌨 𑌶𑌾𑌨𑍍𑌤𑌂 𑌸𑍍𑌤𑍗𑌤𑌿 𑌨𑌿𑌷𑍍𑌕𑌾𑌮𑍋 𑌨 𑌦𑍁𑌷𑍍𑌟𑌮𑌪𑌿 𑌨𑌿𑌨𑍍𑌦𑌤𑌿 ।
𑌸𑌮𑌦𑍁𑌃𑌖𑌸𑍁𑌖𑌸𑍍𑌤𑍃𑌪𑍍𑌤𑌃 𑌕𑌿𑌞𑍍𑌚𑌿𑌤𑍍 𑌕𑍃𑌤𑍍𑌯𑌂 𑌨 𑌪𑌶𑍍𑌯𑌤𑌿 ॥ 18-82॥
𑌧𑍀𑌰𑍋 𑌨 𑌦𑍍𑌵𑍇𑌷𑍍𑌟𑌿 𑌸𑌂𑌸𑌾𑌰𑌮𑌾𑌤𑍍𑌮𑌾𑌨𑌂 𑌨 𑌦𑌿𑌦𑍃𑌕𑍍𑌷𑌤𑌿 ।
𑌹𑌰𑍍𑌷𑌾𑌮𑌰𑍍𑌷𑌵𑌿𑌨𑌿𑌰𑍍𑌮𑍁𑌕𑍍𑌤𑍋 𑌨 𑌮𑍃𑌤𑍋 𑌨 𑌚 𑌜𑍀𑌵𑌤𑌿 ॥ 18-83॥
𑌨𑌿𑌃𑌸𑍍𑌨𑍇𑌹𑌃 𑌪𑍁𑌤𑍍𑌰𑌦𑌾𑌰𑌾𑌦𑍗 𑌨𑌿𑌷𑍍𑌕𑌾𑌮𑍋 𑌵𑌿𑌷𑌯𑍇𑌷𑍁 𑌚 ।
𑌨𑌿𑌶𑍍𑌚𑌿𑌨𑍍𑌤𑌃 𑌸𑍍𑌵𑌶𑌰𑍀𑌰𑍇𑌽𑌪𑌿 𑌨𑌿𑌰𑌾𑌶𑌃 𑌶𑍋𑌭𑌤𑍇 𑌬𑍁𑌧𑌃 ॥ 18-84॥
𑌤𑍁𑌷𑍍𑌟𑌿𑌃 𑌸𑌰𑍍𑌵𑌤𑍍𑌰 𑌧𑍀𑌰𑌸𑍍𑌯 𑌯𑌥𑌾𑌪𑌤𑌿𑌤𑌵𑌰𑍍𑌤𑌿𑌨𑌃 ।
𑌸𑍍𑌵𑌚𑍍𑌛𑌨𑍍𑌦𑌂 𑌚𑌰𑌤𑍋 𑌦𑍇𑌶𑌾𑌨𑍍 𑌯𑌤𑍍𑌰𑌸𑍍𑌤𑌮𑌿𑌤𑌶𑌾𑌯𑌿𑌨𑌃 ॥ 18-85॥
𑌪𑌤𑌤𑍂𑌦𑍇𑌤𑍁 𑌵𑌾 𑌦𑍇𑌹𑍋 𑌨𑌾𑌸𑍍𑌯 𑌚𑌿𑌨𑍍𑌤𑌾 𑌮𑌹𑌾𑌤𑍍𑌮𑌨𑌃 ।
𑌸𑍍𑌵𑌭𑌾𑌵𑌭𑍂𑌮𑌿𑌵𑌿𑌶𑍍𑌰𑌾𑌨𑍍𑌤𑌿𑌵𑌿𑌸𑍍𑌮𑍃𑌤𑌾𑌶𑍇𑌷𑌸𑌂𑌸𑍃𑌤𑍇𑌃 ॥ 18-86॥
𑌅𑌕𑌿𑌞𑍍𑌚𑌨𑌃 𑌕𑌾𑌮𑌚𑌾𑌰𑍋 𑌨𑌿𑌰𑍍𑌦𑍍𑌵𑌨𑍍𑌦𑍍𑌵𑌶𑍍𑌛𑌿𑌨𑍍𑌨𑌸𑌂𑌶𑌯𑌃 ।
𑌅𑌸𑌕𑍍𑌤𑌃 𑌸𑌰𑍍𑌵𑌭𑌾𑌵𑍇𑌷𑍁 𑌕𑍇𑌵𑌲𑍋 𑌰𑌮𑌤𑍇 𑌬𑍁𑌧𑌃 ॥ 18-87॥
𑌨𑌿𑌰𑍍𑌮𑌮𑌃 𑌶𑍋𑌭𑌤𑍇 𑌧𑍀𑌰𑌃 𑌸𑌮𑌲𑍋𑌷𑍍𑌟𑌾𑌶𑍍𑌮𑌕𑌾𑌞𑍍𑌚𑌨𑌃 ।
𑌸𑍁𑌭𑌿𑌨𑍍𑌨𑌹𑍃𑌦𑌯𑌗𑍍𑌰𑌨𑍍𑌥𑌿𑌰𑍍𑌵𑌿𑌨𑌿𑌰𑍍𑌧𑍂𑌤𑌰𑌜𑌸𑍍𑌤𑌮𑌃 ॥ 18-88॥
𑌸𑌰𑍍𑌵𑌤𑍍𑌰𑌾𑌨𑌵𑌧𑌾𑌨𑌸𑍍𑌯 𑌨 𑌕𑌿𑌞𑍍𑌚𑌿𑌦𑍍 𑌵𑌾𑌸𑌨𑌾 𑌹𑍃𑌦𑌿 ।
𑌮𑍁𑌕𑍍𑌤𑌾𑌤𑍍𑌮𑌨𑍋 𑌵𑌿𑌤𑍃𑌪𑍍𑌤𑌸𑍍𑌯 𑌤𑍁𑌲𑌨𑌾 𑌕𑍇𑌨 𑌜𑌾𑌯𑌤𑍇 ॥ 18-89॥
𑌜𑌾𑌨𑌨𑍍𑌨𑌪𑌿 𑌨 𑌜𑌾𑌨𑌾𑌤𑌿 𑌪𑌶𑍍𑌯𑌨𑍍𑌨𑌪𑌿 𑌨 𑌪𑌶𑍍𑌯𑌤𑌿 ।
𑌬𑍍𑌰𑍁𑌵𑌨𑍍𑌨𑍍 𑌅𑌪𑌿 𑌨 𑌚 𑌬𑍍𑌰𑍂𑌤𑍇 𑌕𑍋𑌽𑌨𑍍𑌯𑍋 𑌨𑌿𑌰𑍍𑌵𑌾𑌸𑌨𑌾𑌦𑍃𑌤𑍇 ॥ 18-90॥
𑌭𑌿𑌕𑍍𑌷𑍁𑌰𑍍𑌵𑌾 𑌭𑍂𑌪𑌤𑌿𑌰𑍍𑌵𑌾𑌪𑌿 𑌯𑍋 𑌨𑌿𑌷𑍍𑌕𑌾𑌮𑌃 𑌸 𑌶𑍋𑌭𑌤𑍇 ।
𑌭𑌾𑌵𑍇𑌷𑍁 𑌗𑌲𑌿𑌤𑌾 𑌯𑌸𑍍𑌯 𑌶𑍋𑌭𑌨𑌾𑌶𑍋𑌭𑌨𑌾 𑌮𑌤𑌿𑌃 ॥ 18-91॥
𑌕𑍍𑌵 𑌸𑍍𑌵𑌾𑌚𑍍𑌛𑌨𑍍𑌦𑍍𑌯𑌂 𑌕𑍍𑌵 𑌸𑌙𑍍𑌕𑍋𑌚𑌃 𑌕𑍍𑌵 𑌵𑌾 𑌤𑌤𑍍𑌤𑍍𑌵𑌵𑌿𑌨𑌿𑌶𑍍𑌚𑌯𑌃 ।
𑌨𑌿𑌰𑍍𑌵𑍍𑌯𑌾𑌜𑌾𑌰𑍍𑌜𑌵𑌭𑍂𑌤𑌸𑍍𑌯 𑌚𑌰𑌿𑌤𑌾𑌰𑍍𑌥𑌸𑍍𑌯 𑌯𑍋𑌗𑌿𑌨𑌃 ॥ 18-92॥
𑌆𑌤𑍍𑌮𑌵𑌿𑌶𑍍𑌰𑌾𑌨𑍍𑌤𑌿𑌤𑍃𑌪𑍍𑌤𑍇𑌨 𑌨𑌿𑌰𑌾𑌶𑍇𑌨 𑌗𑌤𑌾𑌰𑍍𑌤𑌿𑌨𑌾 ।
𑌅𑌨𑍍𑌤𑌰𑍍𑌯𑌦𑌨𑍁𑌭𑍂𑌯𑍇𑌤 𑌤𑌤𑍍 𑌕𑌥𑌂 𑌕𑌸𑍍𑌯 𑌕𑌥𑍍𑌯𑌤𑍇 ॥ 18-93॥
𑌸𑍁𑌪𑍍𑌤𑍋𑌽𑌪𑌿 𑌨 𑌸𑍁𑌷𑍁𑌪𑍍𑌤𑍗 𑌚 𑌸𑍍𑌵𑌪𑍍𑌨𑍇𑌽𑌪𑌿 𑌶𑌯𑌿𑌤𑍋 𑌨 𑌚 ।
𑌜𑌾𑌗𑌰𑍇𑌽𑌪𑌿 𑌨 𑌜𑌾𑌗𑌰𑍍𑌤𑌿 𑌧𑍀𑌰𑌸𑍍𑌤𑍃𑌪𑍍𑌤𑌃 𑌪𑌦𑍇 𑌪𑌦𑍇 ॥ 18-94॥
𑌜𑍍𑌞𑌃 𑌸𑌚𑌿𑌨𑍍𑌤𑍋𑌽𑌪𑌿 𑌨𑌿𑌶𑍍𑌚𑌿𑌨𑍍𑌤𑌃 𑌸𑍇𑌨𑍍𑌦𑍍𑌰𑌿𑌯𑍋𑌽𑌪𑌿 𑌨𑌿𑌰𑌿𑌨𑍍𑌦𑍍𑌰𑌿𑌯𑌃 ।
𑌸𑍁𑌬𑍁𑌦𑍍𑌧𑌿𑌰𑌪𑌿 𑌨𑌿𑌰𑍍𑌬𑍁𑌦𑍍𑌧𑌿𑌃 𑌸𑌾𑌹𑌙𑍍𑌕𑌾𑌰𑍋𑌽𑌨𑌹𑌙𑍍𑌕𑍃𑌤𑌿𑌃 ॥ 18-95॥
𑌨 𑌸𑍁𑌖𑍀 𑌨 𑌚 𑌵𑌾 𑌦𑍁𑌃𑌖𑍀 𑌨 𑌵𑌿𑌰𑌕𑍍𑌤𑍋 𑌨 𑌸𑌙𑍍𑌗𑌵𑌾𑌨𑍍 ।
𑌨 𑌮𑍁𑌮𑍁𑌕𑍍𑌷𑍁𑌰𑍍𑌨 𑌵𑌾 𑌮𑍁𑌕𑍍𑌤𑌾 𑌨 𑌕𑌿𑌞𑍍𑌚𑌿𑌨𑍍𑌨 𑌚 𑌕𑌿𑌞𑍍𑌚𑌨 ॥ 18-96॥
𑌵𑌿𑌕𑍍𑌷𑍇𑌪𑍇𑌽𑌪𑌿 𑌨 𑌵𑌿𑌕𑍍𑌷𑌿𑌪𑍍𑌤𑌃 𑌸𑌮𑌾𑌧𑍗 𑌨 𑌸𑌮𑌾𑌧𑌿𑌮𑌾𑌨𑍍 ।
𑌜𑌾𑌡𑍍𑌯𑍇𑌽𑌪𑌿 𑌨 𑌜𑌡𑍋 𑌧𑌨𑍍𑌯𑌃 𑌪𑌾𑌣𑍍𑌡𑌿𑌤𑍍𑌯𑍇𑌽𑌪𑌿 𑌨 𑌪𑌣𑍍𑌡𑌿𑌤𑌃 ॥ 18-97॥
𑌮𑍁𑌕𑍍𑌤𑍋 𑌯𑌥𑌾𑌸𑍍𑌥𑌿𑌤𑌿𑌸𑍍𑌵𑌸𑍍𑌥𑌃 𑌕𑍃𑌤𑌕𑌰𑍍𑌤𑌵𑍍𑌯𑌨𑌿𑌰𑍍𑌵𑍃𑌤𑌃 ।
𑌸𑌮𑌃 𑌸𑌰𑍍𑌵𑌤𑍍𑌰 𑌵𑍈𑌤𑍃𑌷𑍍𑌣𑍍𑌯𑌾𑌨𑍍𑌨 𑌸𑍍𑌮𑌰𑌤𑍍𑌯𑌕𑍃𑌤𑌂 𑌕𑍃𑌤𑌮𑍍 ॥ 18-98॥
𑌨 𑌪𑍍𑌰𑍀𑌯𑌤𑍇 𑌵𑌨𑍍𑌦𑍍𑌯𑌮𑌾𑌨𑍋 𑌨𑌿𑌨𑍍𑌦𑍍𑌯𑌮𑌾𑌨𑍋 𑌨 𑌕𑍁𑌪𑍍𑌯𑌤𑌿 ।
𑌨𑍈𑌵𑍋𑌦𑍍𑌵𑌿𑌜𑌤𑌿 𑌮𑌰𑌣𑍇 𑌜𑍀𑌵𑌨𑍇 𑌨𑌾𑌭𑌿𑌨𑌨𑍍𑌦𑌤𑌿 ॥ 18-99॥
𑌨 𑌧𑌾𑌵𑌤𑌿 𑌜𑌨𑌾𑌕𑍀𑌰𑍍𑌣𑌂 𑌨𑌾𑌰𑌣𑍍𑌯𑌮𑍁𑌪𑌶𑌾𑌨𑍍𑌤𑌧𑍀𑌃 ।
𑌯𑌥𑌾𑌤𑌥𑌾 𑌯𑌤𑍍𑌰𑌤𑌤𑍍𑌰 𑌸𑌮 𑌏𑌵𑌾𑌵𑌤𑌿𑌷𑍍𑌠𑌤𑍇 ॥ 18-100॥
Roman (IAST) Transliteration
aṣṭāvakra uvāca ||
yasya bodhodaye tāvatsvapnavad bhavati bhramaḥ |
tasmai sukhaikarūpāya namaḥ śāntāya tejase || 18-1||
arjayitvākhilān arthān bhogānāpnoti puṣkalān |
na hi sarvaparityāgamantareṇa sukhī bhavet || 18-2||
kartavyaduḥkhamārtaṇḍajvālādagdhāntarātmanaḥ |
kutaḥ praśamapīyūṣadhārāsāramṛte sukham || 18-3||
bhavo'yaṃ bhāvanāmātro na kiñcit paramārthataḥ |
nāstyabhāvaḥ svabhāvānāṃ bhāvābhāvavibhāvinām || 18-4||
na dūraṃ na ca saṅkocāllabdhamevātmanaḥ padam |
nirvikalpaṃ nirāyāsaṃ nirvikāraṃ nirañjanam || 18-5||
vyāmohamātraviratau svarūpādānamātrataḥ |
vītaśokā virājante nirāvaraṇadṛṣṭayaḥ || 18-6||
samastaṃ kalpanāmātramātmā muktaḥ sanātanaḥ |
iti vijñāya dhīro hi kimabhyasyati bālavat || 18-7||
ātmā brahmeti niścitya bhāvābhāvau ca kalpitau |
niṣkāmaḥ kiṃ vijānāti kiṃ brūte ca karoti kim || 18-8||
ayaṃ so'hamayaṃ nāhamiti kṣīṇā vikalpanā |
sarvamātmeti niścitya tūṣṇīmbhūtasya yoginaḥ || 18-9||
na vikṣepo na caikāgryaṃ nātibodho na mūḍhatā |
na sukhaṃ na ca vā duḥkhamupaśāntasya yoginaḥ || 18-10||
svārājye bhaikṣavṛttau ca lābhālābhe jane vane |
nirvikalpasvabhāvasya na viśeṣo'sti yoginaḥ || 18-11||
kva dharmaḥ kva ca vā kāmaḥ kva cārthaḥ kva vivekitā |
idaṃ kṛtamidaṃ neti dvandvairmuktasya yoginaḥ || 18-12||
kṛtyaṃ kimapi naivāsti na kāpi hṛdi rañjanā |
yathā jīvanameveha jīvanmuktasya yoginaḥ || 18-13||
kva mohaḥ kva ca vā viśvaṃ kva tad dhyānaṃ kva muktatā |
sarvasaṅkalpasīmāyāṃ viśrāntasya mahātmanaḥ || 18-14||
yena viśvamidaṃ dṛṣṭaṃ sa nāstīti karotu vai |
nirvāsanaḥ kiṃ kurute paśyannapi na paśyati || 18-15||
yena dṛṣṭaṃ paraṃ brahma so'haṃ brahmeti cintayet |
kiṃ cintayati niścinto dvitīyaṃ yo na paśyati || 18-16||
dṛṣṭo yenātmavikṣepo nirodhaṃ kurute tvasau |
udārastu na vikṣiptaḥ sādhyābhāvātkaroti kim || 18-17||
dhīro lokaviparyasto vartamāno'pi lokavat |
na samādhiṃ na vikṣepaṃ na lopaṃ svasya paśyati || 18-18||
bhāvābhāvavihīno yastṛpto nirvāsano budhaḥ |
naiva kiñcitkṛtaṃ tena lokadṛṣṭyā vikurvatā || 18-19||
pravṛttau vā nivṛttau vā naiva dhīrasya durgrahaḥ |
yadā yatkartumāyāti tatkṛtvā tiṣṭhataḥ sukham || 18-20||
nirvāsano nirālambaḥ svacchando muktabandhanaḥ |
kṣiptaḥ saṃskāravātena ceṣṭate śuṣkaparṇavat || 18-21||
asaṃsārasya tu kvāpi na harṣo na viṣādatā |
sa śītalamanā nityaṃ videha iva rājaye || 18-22||
kutrāpi na jihāsāsti nāśo vāpi na kutracit |
ātmārāmasya dhīrasya śītalācchatarātmanaḥ || 18-23||
prakṛtyā śūnyacittasya kurvato'sya yadṛcchayā |
prākṛtasyeva dhīrasya na māno nāvamānatā || 18-24||
kṛtaṃ dehena karmedaṃ na mayā śuddharūpiṇā |
iti cintānurodhī yaḥ kurvannapi karoti na || 18-25||
atadvādīva kurute na bhavedapi bāliśaḥ |
jīvanmuktaḥ sukhī śrīmān saṃsarannapi śobhate || 18-26||
nānāvicārasuśrānto dhīro viśrāntimāgataḥ |
na kalpate na jānāti na śṛṇoti na paśyati || 18-27||
asamādheravikṣepān na mumukṣurna cetaraḥ |
niścitya kalpitaṃ paśyan brahmaivāste mahāśayaḥ || 18-28||
yasyāntaḥ syādahaṅkāro na karoti karoti saḥ |
nirahaṅkāradhīreṇa na kiñcidakṛtaṃ kṛtam || 18-29||
nodvignaṃ na ca santuṣṭamakartṛ spandavarjitam |
nirāśaṃ gatasandehaṃ cittaṃ muktasya rājate || 18-30||
nirdhyātuṃ ceṣṭituṃ vāpi yaccittaṃ na pravartate |
nirnimittamidaṃ kintu nirdhyāyeti viceṣṭate || 18-31||
tattvaṃ yathārthamākarṇya mandaḥ prāpnoti mūḍhatām |
athavā yāti saṅkocamamūḍhaḥ ko'pi mūḍhavat || 18-32||
ekāgratā nirodho vā mūḍhairabhyasyate bhṛśam |
dhīrāḥ kṛtyaṃ na paśyanti suptavatsvapade sthitāḥ || 18-33||
aprayatnāt prayatnād vā mūḍho nāpnoti nirvṛtim |
tattvaniścayamātreṇa prājño bhavati nirvṛtaḥ || 18-34||
śuddhaṃ buddhaṃ priyaṃ pūrṇaṃ niṣprapañcaṃ nirāmayam |
ātmānaṃ taṃ na jānanti tatrābhyāsaparā janāḥ || 18-35||
nāpnoti karmaṇā mokṣaṃ vimūḍho'bhyāsarūpiṇā |
dhanyo vijñānamātreṇa muktastiṣṭhatyavikriyaḥ || 18-36||
mūḍho nāpnoti tad brahma yato bhavitumicchati |
anicchannapi dhīro hi parabrahmasvarūpabhāk || 18-37||
nirādhārā grahavyagrā mūḍhāḥ saṃsārapoṣakāḥ |
etasyānarthamūlasya mūlacchedaḥ kṛto budhaiḥ || 18-38||
na śāntiṃ labhate mūḍho yataḥ śamitumicchati |
dhīrastattvaṃ viniścitya sarvadā śāntamānasaḥ || 18-39||
kvātmano darśanaṃ tasya yad dṛṣṭamavalambate |
dhīrāstaṃ taṃ na paśyanti paśyantyātmānamavyayam || 18-40||
kva nirodho vimūḍhasya yo nirbandhaṃ karoti vai |
svārāmasyaiva dhīrasya sarvadāsāvakṛtrimaḥ || 18-41||
bhāvasya bhāvakaḥ kaścin na kiñcid bhāvakoparaḥ |
ubhayābhāvakaḥ kaścid evameva nirākulaḥ || 18-42||
śuddhamadvayamātmānaṃ bhāvayanti kubuddhayaḥ |
na tu jānanti sammohādyāvajjīvamanirvṛtāḥ || 18-43||
mumukṣorbuddhirālambamantareṇa na vidyate |
nirālambaiva niṣkāmā buddhirmuktasya sarvadā || 18-44||
viṣayadvīpino vīkṣya cakitāḥ śaraṇārthinaḥ |
viśanti jhaṭiti kroḍaṃ nirodhaikāgrasiddhaye || 18-45||
nirvāsanaṃ hariṃ dṛṣṭvā tūṣṇīṃ viṣayadantinaḥ |
palāyante na śaktāste sevante kṛtacāṭavaḥ || 18-46||
na muktikārikāṃ dhatte niḥśaṅko yuktamānasaḥ |
paśyan śṛṇvan spṛśan jighrannaśnannāste yathāsukham || 18-47||
vastuśravaṇamātreṇa śuddhabuddhirnirākulaḥ |
naivācāramanācāramaudāsyaṃ vā prapaśyati || 18-48||
yadā yatkartumāyāti tadā tatkurute ṛjuḥ |
śubhaṃ vāpyaśubhaṃ vāpi tasya ceṣṭā hi bālavat || 18-49||
svātantryātsukhamāpnoti svātantryāllabhate param |
svātantryānnirvṛtiṃ gacchetsvātantryāt paramaṃ padam || 18-50||
akartṛtvamabhoktṛtvaṃ svātmano manyate yadā |
tadā kṣīṇā bhavantyeva samastāścittavṛttayaḥ || 18-51||
ucchṛṅkhalāpyakṛtikā sthitirdhīrasya rājate |
na tu saspṛhacittasya śāntirmūḍhasya kṛtrimā || 18-52||
vilasanti mahābhogairviśanti girigahvarān |
nirastakalpanā dhīrā abaddhā muktabuddhayaḥ || 18-53||
śrotriyaṃ devatāṃ tīrthamaṅganāṃ bhūpatiṃ priyam |
dṛṣṭvā sampūjya dhīrasya na kāpi hṛdi vāsanā || 18-54||
bhṛtyaiḥ putraiḥ kalatraiśca dauhitraiścāpi gotrajaiḥ |
vihasya dhikkṛto yogī na yāti vikṛtiṃ manāk || 18-55||
santuṣṭo'pi na santuṣṭaḥ khinno'pi na ca khidyate |
tasyāścaryadaśāṃ tāṃ tāṃ tādṛśā eva jānate || 18-56||
kartavyataiva saṃsāro na tāṃ paśyanti sūrayaḥ |
śūnyākārā nirākārā nirvikārā nirāmayāḥ || 18-57||
akurvannapi saṅkṣobhād vyagraḥ sarvatra mūḍhadhīḥ |
kurvannapi tu kṛtyāni kuśalo hi nirākulaḥ || 18-58||
sukhamāste sukhaṃ śete sukhamāyāti yāti ca |
sukhaṃ vakti sukhaṃ bhuṅkte vyavahāre'pi śāntadhīḥ || 18-59||
svabhāvādyasya naivārtirlokavad vyavahāriṇaḥ |
mahāhrada ivākṣobhyo gatakleśaḥ suśobhate || 18-60||
nivṛttirapi mūḍhasya pravṛtti rupajāyate |
pravṛttirapi dhīrasya nivṛttiphalabhāginī || 18-61||
parigraheṣu vairāgyaṃ prāyo mūḍhasya dṛśyate |
dehe vigalitāśasya kva rāgaḥ kva virāgatā || 18-62||
bhāvanābhāvanāsaktā dṛṣṭirmūḍhasya sarvadā |
bhāvyabhāvanayā sā tu svasthasyādṛṣṭirūpiṇī || 18-63||
sarvārambheṣu niṣkāmo yaścared bālavan muniḥ |
na lepastasya śuddhasya kriyamāṇe'pi karmaṇi || 18-64||
sa eva dhanya ātmajñaḥ sarvabhāveṣu yaḥ samaḥ |
paśyan śṛṇvan spṛśan jighrann aśnannistarṣamānasaḥ || 18-65||
kva saṃsāraḥ kva cābhāsaḥ kva sādhyaṃ kva ca sādhanam |
ākāśasyeva dhīrasya nirvikalpasya sarvadā || 18-66||
sa jayatyarthasannyāsī pūrṇasvarasavigrahaḥ |
akṛtrimo'navacchinne samādhiryasya vartate || 18-67||
bahunātra kimuktena jñātatattvo mahāśayaḥ |
bhogamokṣanirākāṅkṣī sadā sarvatra nīrasaḥ || 18-68||
mahadādi jagaddvaitaṃ nāmamātravijṛmbhitam |
vihāya śuddhabodhasya kiṃ kṛtyamavaśiṣyate || 18-69||
bhramabhūtamidaṃ sarvaṃ kiñcinnāstīti niścayī |
alakṣyasphuraṇaḥ śuddhaḥ svabhāvenaiva śāmyati || 18-70||
śuddhasphuraṇarūpasya dṛśyabhāvamapaśyataḥ |
kva vidhiḥ kva ca vairāgyaṃ kva tyāgaḥ kva śamo'pi vā || 18-71||
sphurato'nantarūpeṇa prakṛtiṃ ca na paśyataḥ |
kva bandhaḥ kva ca vā mokṣaḥ kva harṣaḥ kva viṣāditā || 18-72||
buddhiparyantasaṃsāre māyāmātraṃ vivartate |
nirmamo nirahaṅkāro niṣkāmaḥ śobhate budhaḥ || 18-73||
akṣayaṃ gatasantāpamātmānaṃ paśyato muneḥ |
kva vidyā ca kva vā viśvaṃ kva deho'haṃ mameti vā || 18-74||
nirodhādīni karmāṇi jahāti jaḍadhīryadi |
manorathān pralāpāṃśca kartumāpnotyatatkṣaṇāt || 18-75||
mandaḥ śrutvāpi tadvastu na jahāti vimūḍhatām |
nirvikalpo bahiryatnādantarviṣayalālasaḥ || 18-76||
jñānād galitakarmā yo lokadṛṣṭyāpi karmakṛt |
nāpnotyavasaraṃ kartuṃ vaktumeva na kiñcana || 18-77||
kva tamaḥ kva prakāśo vā hānaṃ kva ca na kiñcana |
nirvikārasya dhīrasya nirātaṅkasya sarvadā || 18-78||
kva dhairyaṃ kva vivekitvaṃ kva nirātaṅkatāpi vā |
anirvācyasvabhāvasya niḥsvabhāvasya yoginaḥ || 18-79||
na svargo naiva narako jīvanmuktirna caiva hi |
bahunātra kimuktena yogadṛṣṭyā na kiñcana || 18-80||
naiva prārthayate lābhaṃ nālābhenānuśocati |
dhīrasya śītalaṃ cittamamṛtenaiva pūritam || 18-81||
na śāntaṃ stauti niṣkāmo na duṣṭamapi nindati |
samaduḥkhasukhastṛptaḥ kiñcit kṛtyaṃ na paśyati || 18-82||
dhīro na dveṣṭi saṃsāramātmānaṃ na didṛkṣati |
harṣāmarṣavinirmukto na mṛto na ca jīvati || 18-83||
niḥsnehaḥ putradārādau niṣkāmo viṣayeṣu ca |
niścintaḥ svaśarīre'pi nirāśaḥ śobhate budhaḥ || 18-84||
tuṣṭiḥ sarvatra dhīrasya yathāpatitavartinaḥ |
svacchandaṃ carato deśān yatrastamitaśāyinaḥ || 18-85||
patatūdetu vā deho nāsya cintā mahātmanaḥ |
svabhāvabhūmiviśrāntivismṛtāśeṣasaṃsṛteḥ || 18-86||
akiñcanaḥ kāmacāro nirdvandvaśchinnasaṃśayaḥ |
asaktaḥ sarvabhāveṣu kevalo ramate budhaḥ || 18-87||
nirmamaḥ śobhate dhīraḥ samaloṣṭāśmakāñcanaḥ |
subhinnahṛdayagranthirvinirdhūtarajastamaḥ || 18-88||
sarvatrānavadhānasya na kiñcid vāsanā hṛdi |
muktātmano vitṛptasya tulanā kena jāyate || 18-89||
jānannapi na jānāti paśyannapi na paśyati |
bruvann api na ca brūte ko'nyo nirvāsanādṛte || 18-90||
bhikṣurvā bhūpatirvāpi yo niṣkāmaḥ sa śobhate |
bhāveṣu galitā yasya śobhanāśobhanā matiḥ || 18-91||
kva svācchandyaṃ kva saṅkocaḥ kva vā tattvaviniścayaḥ |
nirvyājārjavabhūtasya caritārthasya yoginaḥ || 18-92||
ātmaviśrāntitṛptena nirāśena gatārtinā |
antaryadanubhūyeta tat kathaṃ kasya kathyate || 18-93||
supto'pi na suṣuptau ca svapne'pi śayito na ca |
jāgare'pi na jāgarti dhīrastṛptaḥ pade pade || 18-94||
jñaḥ sacinto'pi niścintaḥ sendriyo'pi nirindriyaḥ |
subuddhirapi nirbuddhiḥ sāhaṅkāro'nahaṅkṛtiḥ || 18-95||
na sukhī na ca vā duḥkhī na virakto na saṅgavān |
na mumukṣurna vā muktā na kiñcinna ca kiñcana || 18-96||
vikṣepe'pi na vikṣiptaḥ samādhau na samādhimān |
jāḍye'pi na jaḍo dhanyaḥ pāṇḍitye'pi na paṇḍitaḥ || 18-97||
mukto yathāsthitisvasthaḥ kṛtakartavyanirvṛtaḥ |
samaḥ sarvatra vaitṛṣṇyānna smaratyakṛtaṃ kṛtam || 18-98||
na prīyate vandyamāno nindyamāno na kupyati |
naivodvijati maraṇe jīvane nābhinandati || 18-99||
na dhāvati janākīrṇaṃ nāraṇyamupaśāntadhīḥ |
yathātathā yatratatra sama evāvatiṣṭhate || 18-100||
InfoLyter.in — Sacred Vedic Knowledge Portal · Free forever