karturājñayā prāpyate phalam |
1
karma kiṃ paraṃ karma tajjaḍam || 1 ||
kṛtimahodadhau patanakāraṇam |
2
phalamaśāśvataṃ gatinirodhakam || 2 ||
īśvarārpitaṃ necchayā kṛtam |
3
cittaśodhakaṃ muktisādhakam || 3 ||
kāyavāṅmanaḥ kāryamuttamam |
4
pūjanaṃ japaścintanaṃ kramāt || 4 ||
jagata īśadhī yuktasevanam |
5
aṣṭamūrtibhṛddevapūjanam || 5 ||
uttamastavāduccamandataḥ |
6
cittajaṃ japadhyānamuttamam || 6 ||
ājyadhārayā srotasā samam |
7
saralacintanaṃ viralataḥ param || 7 ||
bhedabhāvanāt so'hamityasau |
8
bhāvanā'bhidā pāvanī matā || 8 ||
bhāvaśūnyasadbhāvasusthitiḥ |
9
bhāvanābalādbhaktiruttamā || 9 ||
hṛtsthale manaḥ svasthatā kriyā |
10
bhaktiyogabodhāśca niścitam || 10 ||
vāyurodhanāllīyate manaḥ |
11
jālapakṣivadrodhasādhanam || 11 ||
cittavāyavaścitkriyāyutāḥ |
12
śākhayordvayī śaktimūlakā || 12 ||
layavināśane ubhayarodhane |
13
layagataṃ punarbhavati no mṛtam || 13 ||
prāṇabandhanāllīnamānasam |
14
ekacintanānnāśametyadaḥ || 14 ||
naṣṭamānasotkṛṣṭayoginaḥ |
15
kṛtyamasti kiṃ svasthitiṃ yataḥ || 15 ||
dṛśyavāritaṃ cittamātmanaḥ |
16
cittvadarśanaṃ tattvadarśanam || 16 ||
mānasaṃ tu kiṃ mārgaṇe kṛte |
17
naiva mānasaṃ mārga ārjavāt || 17 ||
vṛttayastvahaṃ vṛttimāśritāḥ |
18
vṛttayo mano viddhyahaṃ manaḥ || 18 ||
ahamayaṃ kuto bhavati cinvataḥ |
19
ayi patatyahaṃ nijavicāraṇam || 19 ||
ahami nāśabhājyahamahantayā |
20
sphurati hṛtsvayaṃ paramapūrṇasat || 20 ||
idamahaṃ padā'bhikhyamanvaham |
21
ahamilīnake'pyalayasattayā || 21 ||
vigrahendriyaprāṇadhītamaḥ |
22
nāhamekasattajjaḍaṃ hyasat || 22 ||
sattvabhāsikā citkvavetarā |
23
sattayā hi ciccittayā hyaham || 23 ||
īśajīvayorveṣadhībhidā |
24
satsvabhāvato vastu kevalam || 24 ||
veṣahānataḥ svātmadarśanam |
25
īśadarśanaṃ svātmarūpataḥ || 25 ||
ātmasaṃsthitiḥ svātmadarśanam |
26
ātmanirdvayādātmaniṣṭhatā || 26 ||
jñānavarjitā'jñānahīnacit |
27
jñānamasti kiṃ jñātumantaram || 27 ||
kiṃ svarūpamityātmadarśane |
28
avyayā'bhavā''pūrṇacitsukham || 28 ||
bandhamuktyatītaṃ paraṃ sukham |
29
vindatīha jīvastu daivikaḥ || 29 ||
ahamapetakaṃ nijavibhānakam |
30
mahadidantapo ramanavāgiyam || 30 ||