kadambavanacāriṇīṃ munikadambakādambinīṃ
nitambajitabhūdharāṃ suranitambinīsevitām |
navāmburuhalocanāmabhinavāmbudaśyāmalāṃ
1
trilocanakuṭumbinīṃ tripurasundarīmāśraye || 1 ||
kadambavanavāsinīṃ kanakavallakīdhāriṇīṃ
mahārhamaṇihāriṇīṃ mukhasamullasadvāruṇīm |
dayāvibhavakāriṇīṃ viśadarocanācāriṇīṃ
2
trilocanakuṭumbinīṃ tripurasundarīmāśraye || 2 ||
kadambavanaśālayā kucabharollasanmālayā
kucopamitaśailayā gurukṛpālasadvelayā |
madāruṇakapolayā madhuragītavācālayā
3
kayāpi ghananīlayā kavacitā vayaṃ līlayā || 3 ||
kadambavanamadhyagāṃ kanakamaṇḍalopasthitāṃ
ṣaḍamburuhavāsinīṃ satatasiddhasaudāminīm |
viḍambitajapāruciṃ vikacacandracūḍāmaṇiṃ
4
trilocanakuṭumbinīṃ tripurasundarīmāśraye || 4 ||
kucāñcitavipañcikāṃ kuṭilakuntalālaṅkṛtāṃ
kuśeśayanivāsinīṃ kuṭilacittavidveṣiṇīm |
madāruṇavilocanāṃ manasijārisammohinīṃ
5
mataṅgamunikanyakāṃ madhurabhāṣiṇīmāśraye || 5 ||
smaretprathamapuṣpiṇīṃ rudhirabindunīlāmbarāṃ
gṛhītamadhupātrikāṃ madavighūrṇanetrāñcalām |
ghanastanabharonnatāṃ galitacūlikāṃ śyāmalāṃ
6
trilocanakuṭumbinīṃ tripurasundarīmāśraye || 6 ||
sakuṅkumavilepanāmalakacumbikastūrikāṃ
samandahasitekṣaṇāṃ saśaracāpapāśāṅkuśām |
aśeṣajanamohinīmaruṇamālyabhūṣāmbarāṃ
7
japākusumabhāsurāṃ japavidhau smarāmyambikām || 7 ||
purandarapurandhrikācikurabandhasairandhrikāṃ
pitāmahapativratāpaṭupaṭīracarcāratām |
mukundaramaṇīmaṇīlasadalaṅkriyākāriṇīṃ
8
bhajāmi bhuvanāmbikāṃ suravadhūṭikāceṭikām || 8 ||
iti śrīmatparamahaṃsaparivrājakācāryasya śrīgovindabhagavatpūjyapādaśiṣyasya śrīmacchaṅkarabhagavataḥ kṛtau tripurasundaryaṣṭakam |