oṃ asya śrīviṣṇupañjarastotra mahāmantrasya nārada ṛṣiḥ | anuṣṭup chandaḥ | śrīviṣṇuḥ paramātmā devatā | ahaṃ bījam | sohaṃ śaktiḥ | oṃ hrīṃ kīlakam | mama sarvadeharakṣaṇārthaṃ jape viniyogaḥ |
nārada ṛṣaye namaḥ mukhe | śrīviṣṇuparamātmadevatāyai namaḥ hṛdaye | ahaṃ bījaṃ guhye | sohaṃ śaktiḥ pādayoḥ | oṃ hrīṃ kīlakaṃ pādāgre | oṃ hrāṃ hrīṃ hrūṃ hraiṃ hrauṃ hraḥ iti mantraḥ |
oṃ hrāṃ aṅguṣṭhābhyāṃ namaḥ |
oṃ hrīṃ tarjanībhyāṃ namaḥ |
oṃ hrūṃ madhyamābhyāṃ namaḥ |
oṃ hraiṃ anāmikābhyāṃ namaḥ |
oṃ hrauṃ kaniṣṭhikābhyāṃ namaḥ |
oṃ hraḥ karatalakarapṛṣṭhābhyāṃ namaḥ |
iti karanyāsaḥ |
oṃ hrāṃ hṛdayāya namaḥ |
oṃ hrīṃ śirase svāhā |
oṃ hrūṃ śikhāyai vaṣaṭ |
oṃ hraiṃ kavacāya hum |
oṃ hrauṃ netratrayāya vauṣaṭ |
oṃ hraḥ astrāya phaṭ |
iti aṅganyāsaḥ |
ahaṃ bījaṃ prāṇāyāmaṃ mantratrayeṇa kuryāt |
dhyānam |
paraṃ parasmātprakṛteranādimekaṃ niviṣṭaṃ bahudhā guhāyām |
1
sarvālayaṃ sarvacarācarasthaṃ namāmi viṣṇuṃ jagadekanātham || 1 ||
oṃ viṣṇupañjarakaṃ divyaṃ sarvaduṣṭanivāraṇam |
2
ugratejo mahāvīryaṃ sarvaśatrunikṛntanam || 2 ||
tripuraṃ dahamānasya harasya brahmaṇo hitam |
3
tadahaṃ sampravakṣyāmi ātmarakṣākaraṃ nṛṇām || 3 ||
pādau rakṣatu govindo jaṅghe caiva trivikramaḥ |
4
ūrū me keśavaḥ pātu kaṭiṃ caiva janārdanaḥ || 4 ||
nābhiṃ caivācyutaḥ pātu guhyaṃ caiva tu vāmanaḥ |
5
udaraṃ padmanābhaśca pṛṣṭhaṃ caiva tu mādhavaḥ || 5 ||
vāmapārśvaṃ tathā viṣṇurdakṣiṇaṃ madhusūdanaḥ |
6
bāhū vai vāsudevaśca hṛdi dāmodarastathā || 6 ||
kaṇṭhaṃ rakṣatu vārāhaḥ kṛṣṇaśca mukhamaṇḍalam |
7
mādhavaḥ karṇamūle tu hṛṣīkeśaśca nāsike || 7 ||
netre nārāyaṇo rakṣellalāṭaṃ garuḍadhvajaḥ |
8
kapolau keśavo rakṣedvaikuṇṭhaḥ sarvatodiśam || 8 ||
śrīvatsāṅkaśca sarveṣāmaṅgānāṃ rakṣako bhavet |
9
pūrvasyāṃ puṇḍarīkākṣa āgneyyāṃ śrīdharastathā || 9 ||
dakṣiṇe nārasiṃhaśca nairṛtyāṃ mādhavo'vatu |
10
puruṣottamo vāruṇyāṃ vāyavyāṃ ca janārdanaḥ || 10 ||
gadādharastu kauberyāmīśānyāṃ pātu keśavaḥ |
11
ākāśe ca gadā pātu pātāle ca sudarśanam || 11 ||
sannaddhaḥ sarvagātreṣu praviṣṭo viṣṇupañjaraḥ |
12
viṣṇupañjaraviṣṭo'haṃ vicarāmi mahītale || 12 ||
rājadvāre'pathe ghore saṅgrāme śatrusaṅkaṭe |
13
nadīṣu ca raṇe caiva coravyāghrabhayeṣu ca || 13 ||
ḍākinīpretabhūteṣu bhayaṃ tasya na jāyate |
14
rakṣa rakṣa mahādeva rakṣa rakṣa janeśvara || 14 ||
rakṣantu devatāḥ sarvā brahmaviṣṇumaheśvarāḥ |
15
jale rakṣatu vārāhaḥ sthale rakṣatu vāmanaḥ || 15 ||
aṭavyāṃ nārasiṃhaśca sarvataḥ pātu keśavaḥ ||
16
divā rakṣatu māṃ sūryo rātrau rakṣatu candramāḥ || 16 ||
panthānaṃ durgamaṃ rakṣetsarvameva janārdanaḥ |
17
rogavighnahataścaiva brahmahā gurutalpagaḥ || 17 ||
strīhantā bālaghātī ca surāpo vṛṣalīpatiḥ |
18
mucyate sarvapāpebhyo yaḥ paṭhennātra saṃśayaḥ || 18 ||
aputro labhate putraṃ dhanārthī labhate dhanam |
19
vidyārthī labhate vidyāṃ mokṣārthī labhate gatim || 19 ||
āpado harate nityaṃ viṣṇustotrārthasampadā |
20
yastvidaṃ paṭhate stotraṃ viṣṇupañjaramuttamam || 20 ||
mucyate sarvapāpebhyo viṣṇulokaṃ sa gacchati |
21
gosahasraphalaṃ tasya vājapeyaśatasya ca || 21 ||
aśvamedhasahasrasya phalaṃ prāpnoti mānavaḥ |
22
sarvakāmaṃ labhedasya paṭhanānnātra saṃśayaḥ || 22 ||
jale viṣṇuḥ sthale viṣṇurviṣṇuḥ parvatamastake |
23
jvālāmālākule viṣṇuḥ sarvaṃ viṣṇumayaṃ jagat || 23 ||
iti śrībrahmāṇḍapurāṇe indranāradasaṃvāde śrīviṣṇupañjarastotram ||