śeṣācalaṃ samāsādya kaśyapādyā maharṣayaḥ |
1
veṅkaṭeśaṃ ramānāthaṃ śaraṇaṃ prāpurañjasā || 1 ||
kalisantārakaṃ mukhyaṃ stotrametajjapennaraḥ |
2
saptarṣivākprasādena viṣṇustasmai prasīdati || 2 ||
kaśyapa uvāca –
kādihrīmantavidyāyāḥ prāpyaiva paradevatā |
3
kalau śrīveṅkaṭeśākhyā tāmahaṃ śaraṇaṃ bhaje || 3 ||
atriruvāca –
akārādikṣakārāntavarṇairyaḥ pratipādyate |
4
kalau sa veṅkaṭeśākhyaḥ śaraṇaṃ me ramāpatiḥ || 4 ||
bharadvāja uvāca –
bhagavān bhārgavīkānto bhaktābhīpsitadāyakaḥ |
5
bhaktasya veṅkaṭeśākhyo bharadvājasya me gatiḥ || 5 ||
viśvāmitra uvāca –
virāḍviṣṇurvidhātā ca viśvavijñānavigrahaḥ |
6
viśvāmitrasya śaraṇaṃ veṅkaṭeśo vibhuḥ sadā || 6 ||
gautama uvāca –
gaurgaurīśapriyo nityaṃ govindo gopatirvibhuḥ |
7
śaraṇaṃ gautamasyāstu veṅkaṭādriśiromaṇiḥ || 7 ||
jamadagniruvāca –
jagatkartā jagadbhartā jagaddhartā jaganmayaḥ |
8
jamadagneḥ prapannasya jīveśo veṅkaṭeśvaraḥ || 8 ||
vasiṣṭha uvāca –
vastuvijñānamātraṃ yannirviśeṣaṃ sukhaṃ ca sat |
9
tadbrahmaivāhamasmīti veṅkaṭeśaṃ bhaje sadā || 9 ||
saptarṣiracitaṃ stotraṃ sarvadā yaḥ paṭhennaraḥ |
10
so'bhayaṃ prāpnuyātsatyaṃ sarvatra vijayī bhavet || 10 ||
iti saptarṣibhiḥ kṛtaṃ śrī veṅkaṭeśvara śaraṇāgati stotram |