yāmunāryasudhāmbhodhimavagāhya yathāmati |
ādāya bhaktiyogākhyaṃ ratnaṃ sandarśayāmyaham ||
svādhīna trividhacetanācetanasvarūpasthiti pravṛttibhedaṃ, kleśa karmādyaśeṣadoṣāsaṃspṛṣṭaṃ, svābhāvikānavadhikātiśaya jñānabalaiśvaryavīryaśaktitejaḥ prabhṛtyasaṅkhyeya kalyāṇaguṇagaṇaugha mahārṇavaṃ, paramapuruṣaṃ, bhagavantaṃ, nārāyaṇaṃ, svāmitvena suhṛtvena gurutvena ca parigṛhya aikāntikātyantika tatpādāmbujadvaya paricaryaikamanorathaḥ, tatprāptaye ca tatpādāmbujadvaya prapatteranyanna me kalpakoṭisahasreṇāpi sādhanamastīti manvānaḥ, tasyaiva bhagavato nārāyaṇasya akhilasattvadayaikasāgarasya anālocita guṇaguṇākhaṇḍa janānukūlāmaryāda śīlavataḥ, svābhāvikānavadhikātiśaya guṇavattayā devatiryaṅmanuṣyādyakhilajana hṛdayānandanasya āśritavātsalyaikajaladheḥ bhaktajanasaṃśleṣaikabhogasya nityajñānakriyaiśvaryādi bhogasāmagrīsamṛddhasya, mahāvibhūteḥ, śrīmaccaraṇāravindayugalaṃ ananyātmasañjīvanena tadgatasarvabhāvena śaraṇamanuvrajet | tataśca pratyahamātmojjīvanāyaivamanusmaret | caturdaśabhuvanātmakaṃ aṇḍaṃ, daśaguṇitottaraṃ ca āvaraṇasaptakaṃ, samastaṃ kāryakāraṇa(jāta)matītya, vartamāne paramavyomaśabdābhidheye, brahmādīnāṃ vāṅmanasā'gocare, śrīmati vaikuṇṭhe divyaloke, sanakavidhiśivādibhirapi acintyasvabhāvaiśvaryaiḥ, nityasiddhairanantairbhagavadānukūlyaika bhogairdivyapuruṣaiḥ mahātmabhiḥ āpūrite, teṣāmapi iyatparimāṇaṃ, iyadaiśvaryaṃ, īdṛśasvabhāvamiti paricchettumayogye, divyāvaraṇaśatasahasrāvṛte, divyakalpakatarūpaśobhite, divyodyāna śatasahasrakoṭibhirāvṛte, atipramāṇe divyāyatane, kasmiṃścidvicitra divyaratnamaya divyāsthānamaṇḍape, divyaratnastambha śatasahasrakoṭibhirupaśobhite,
divyanānāratnakṛtasthala vicitrite, divyālaṅkārālaṅkṛte, paritaḥ patitaiḥ patamānaiḥ pādapasthaiśca nānāgandhavarṇairdivyapuṣpaiḥ śobhamānairdivyapuṣpopavanairupaśobhite, saṅkīrṇapārijātādi kalpadrumopaśobhitaiḥ, asaṅkīrṇaiśca kaiścidantassthapuṣparatnādinirmita divyalīlāmaṇḍapa śatasahasropaśobhitaiḥ, sarvadā'nubhūyamānairapyapūrvavadāścaryamāvahadbhiḥ krīḍāśaila śatasahasrairalaṅkṛtaiḥ, kaiścinnārāyaṇadivyalīlā'sādhāraṇaiḥ, kaiścitpadmavanālayā divyalīlā'sādhāraṇaiḥ, sādhāraṇaiśca kaiścit śukaśārikāmayūrakokilādibhiḥ komalakūjitairākulaiḥ, divyodyāna śatasahasrairāvṛte, maṇimuktāpravāla kṛtasopānaiḥ, divyāmalāmṛtarasodakaiḥ, divyāṇḍajavaraiḥ, atiramaṇīyadarśanaiḥ atimanoharamadhurasvaraiḥ ākulaiḥ, antastha muktāmaya divyakrīḍāsthānopaśobhitaiḥ divyasaugandhikavāpīśatasahasraiḥ, divyarājahaṃsāvalīvirājitairāvṛte, nirastātiśayānandaikarasatayā cānantyācca praviṣṭānunmādayadbhiḥ krīḍoddeśairvirājite, tatra tatra kṛta divyapuṣpaparyaṅkopaśobhite, nānāpuṣpāsavāsvāda mattabhṛṅgāvalībhiḥ udgīyamāna divyagāndharveṇāpūrite, candanāgarukarpūra divyapuṣpāvagāhi mandānilāsevyamāne, madhye puṣpasañcaya vicitrite, mahati divyayogaparyaṅke anantabhogini, śrīmadvaikuṇṭhaiśvaryādi divyalokaṃ ātmakāntyā viśvamāpyāyayantyā śeṣa śeṣāśanādi sarvaparijanaṃ bhagavatastattadavasthocita paricaryāyāṃ ājñāpayantyā, śīlarūpaguṇa vilāsādibhiḥ ātmānurūpayā śriyā sahāsīnaṃ, pratyagronmīlita sarasijasadṛśa nayanayugalaṃ, svacchanīlajīmūtasaṅkāśaṃ, atyujjvalapītavāsasaṃ, svayā prabhayā'tinirmalayā atiśītalayā atikomalayā svacchamāṇikyābhayā kṛtsnaṃ jagadbhāsayantaṃ,
acintyadivyādbhuta nityayauvana svabhāvalāvaṇyamayāmṛtasāgaraṃ, atisaukumāryādi īṣat prasvinnavadālakṣyamāṇa lalāṭaphalaka divyālakāvalīvirājitaṃ, prabuddhamugdhāmbuja cārulocanaṃ, savibhramabhrūlataṃ, ujjvalādharaṃ, śucismitaṃ, komalagaṇḍaṃ, unnasaṃ, udagrapīnāṃsa vilambikuṇḍalālakāvalī bandhura kambukandharaṃ, priyāvataṃsotpala karṇabhūṣaṇaślathālakābandha vimardaśaṃsibhiḥ caturbhirājānuvilambibhirbhujairvirājitaṃ, atikomala divyarekhālaṅkṛtātāmrakaratalaṃ, divyāṅgulīyakavirājitaṃ, atikomala divyanakhāvalīvirājitaṃ, atiraktāṅgulībhiralaṅkṛtaṃ, tatkṣaṇonmīlita puṇḍarīka sadṛśacaraṇayugalaṃ, atimanohara kirīṭamakuṭa cūḍāvataṃsa makarakuṇḍala graiveyaka hāra keyūra kaṭaka śrīvatsa kaustubha muktādāmodarabandhana pītāmbara kāñcīguṇa nūpurādibhiratyanta sukhasparśaiḥ divyagandhairbhūṣaṇairbhūṣitaṃ, śrīmatyā vaijayantyā vanamālayā virājitaṃ, śaṅkhacakragadā'si śārṅgādi divyāyudhaiḥ sevyamānaṃ, svasaṅkalpamātrāvaklupta jagajjanmasthitidhvaṃsādike śrīmati viṣvaksene nyasta samastātmaiśvaryaṃ, vainateyādibhiḥ svabhāvato nirasta samasta sāṃsārika svabhāvaiḥ bhagavatparicaryākaraṇa yogyairbhagavatparicaryaikabhogai-rnityasiddhairanantaiḥ yathā yogaṃ sevyamānaṃ, ātmabhogena ananusaṃhitaparādikāla divyāmala komalāvalokanena viśvamāhlādayantaṃ, īṣadunmīlita mukhāmbujodaravinirgatena divyānanāravinda śobhājananena divyagāmbhīryaudārya saundarya mādhuryādyanavadhika guṇagaṇavibhūṣitena, atimanohara divyabhāvagarbheṇa divyalīlā''lāpāmṛtena akhilajana hṛdayāntarāṇyāpūrayantaṃ bhagavantaṃ nārāyaṇaṃ dhyānayogena dṛṣṭvā, tato bhagavato nityasvāmyamātmano nityadāsyaṃ ca yathāvasthitamanusandhāya, kadā'haṃ bhagavantaṃ nārāyaṇaṃ, mama kulanāthaṃ, mama kuladaivataṃ, mama kuladhanaṃ, mama bhogyaṃ, mama mātaraṃ, mama pitaraṃ, mama sarvaṃ sākṣātkaravāṇi cakṣuṣā |
kadā'haṃ bhagavatpādāmbujadvayaṃ śirasā saṅgrahīṣyāmi | kadā'haṃ bhagavatpādāmbujadvaya paricaryā''śayā nirastasamastetara bhogāśaḥ, apagata samasta sāṃsārikasvabhāvaḥ tatpādāmbujadvayaṃ pravekṣyāmi | kadā'haṃ bhagavatpādāmbujadvaya paricaryākaraṇayogya-stadekabhogastatpādau paricariṣyāmi | kadā māṃ bhagavān svakīyayā atiśītalayā dṛśā avalokya, snigdhagambhīramadhurayā girā paricaryāyāṃ ājñāpayiṣyati, iti bhagavatparicaryāyāmāśāṃ vardhayitvā tayaivā'śayā tatprasādopabṛṃhitayā bhagavantamupetya, dūrādeva bhagavantaṃ śeṣabhoge śriyā sahāsīnaṃ vainateyādibhiḥ sevyamānaṃ, samastaparivārāya śrīmate nārāyaṇāya namaḥ, iti praṇamya utthāyotthāya punaḥ punaḥ praṇamya atyanta sādhvasavinayāvanato bhūtvā, bhagavatpāriṣadagaṇanāyakairdvārapālaiḥ kṛpayā snehagarbhayā dṛśā'valokitaḥ samyagabhivanditaistaistairevānumato bhagavantamupetya, śrīmatā mūlamantreṇa māmaikāntikātyantika paricaryākaraṇāya parigṛhṇīṣva iti yācamānaḥ praṇamyātmānaṃ bhagavate nivedayet |
tato bhagavatā svayamevātmasañjīvanena amaryādaśīlavatā atipremānvitena avalokanenāvalokya sarvadeśa sarvakāla sarvāvasthocitātyantaśeṣabhāvāya svīkṛto'nujñātaśca atyantasādhvasavinayāvanataḥ kiṅkurvāṇaḥ kṛtāñjalipuṭo bhagavantamupāsīta | tataścānubhūyamāna bhāvaviśeṣaḥ niratiśayaprītyā'nyatkiñcitkartuṃ draṣṭuṃ smartumaśaktaḥ punarapi śeṣabhāvameva yācamāno bhagavantamevāvicchinnasrotorūpeṇāvalokanena avalokayannāsīta | tato bhagavatā svayamevātmasañjīvanenāvalokanenāvalokya sasmitamāhūya samastakleśāpahaṃ niratiśayasukhāvahamātmīyaṃ, śrīmatpādāravindayugalaṃ śirasi kṛtaṃ dhyātvā, amṛtasāgarāntarnimagnasarvāvayavaḥ sukhamāsīta |
lakṣmīpateryatipateśca dayaikadhāmnoḥ
yo'sau purā samajaniṣṭa jagaddhitārtham |
prāpyaṃ prakāśayatu naḥ paramaṃ rahasyaṃ
saṃvāda eṣa śaraṇāgati mantrasāraḥ ||
iti śrībhagavadrāmānujaviracite śrīvaikuṇṭhagadyam |